\id GAL  
\h GALATAS 
\toc1 LIꞌI JAꞌ SVUN TI APOXTOL PABLOE TI ISTSꞌIBABE TI MUCHꞌUTIC XCHꞌUNOJIC SCꞌOP RIOX TA ESTADO GALACIAE 
\toc2 GALATAS 
\toc3 Gá. 
\mt1 LIꞌI JAꞌ SVUN TI APOXTOL PABLOE TI ISTSꞌIBABE TI MUCHꞌUTIC XCHꞌUNOJIC SCꞌOP RIOX TA ESTADO GALACIAE 
\c 1  
\p  
\v 1 Voꞌon Pabloon, yajꞌapoxtolon ti Cajvaltic Jesuse. Maꞌuc crixchano ti listac ta yalel aꞌyuc li scꞌop Rioxe. Jaꞌ listac ta yalel aꞌyuc ti Jesucristoe xchiꞌuc ti Jtotic Riox ta vinajele ti ixchaꞌcuxes loqꞌuel ta smuquenal ti Jesucristoe.  
\v 2 Chajcꞌoponticotic tal ta vun ti jayvoꞌoticotic liꞌi, voꞌoxuc ti achꞌunojic xa li scꞌop Rioxe ti butic jteclumal nacaloxuc ta estado Galaciae.  
\v 3 Acꞌu yacꞌboxuc crasia ti Jtotic Riox ta vinajele xchiꞌuc ti Cajvaltic Jesucristoe. Junuc me avoꞌonic, mu me cꞌusi xal avoꞌonic.  
\v 4 Ti Cajvaltic Jesucristoe iyacꞌ sba ta milel ta scoj jmultic yoꞌ xcom o cuꞌuntic li cꞌusitic chopol liꞌ ta sba balamile. Yuꞌun jaꞌ yech iscꞌan ti Jtotic Riox ta vinajele.  
\v 5 Yechꞌo ti jaꞌ chquichꞌtic ta mucꞌ ta sbatel osile. Toj lec ti jaꞌ yech chcꞌote. 
\s1 Jaꞌ liꞌ yaloj ti mu cꞌusi yan ti xuꞌ chicuxiotic o ta sbatel osile, jaꞌ noꞌox ti Jesucristoe 
\p  
\v 6 Toj chꞌayel o coꞌon avuꞌunic ti oy jayvoꞌoxuc ti ora avicta abaic ta yichꞌel ta mucꞌ ti Rioxe. Ti istoj amulic ti Cristoe, jaꞌ yoꞌ xacuxiic o ta sbatel osile, yechꞌo ti layiqꞌuic ti Rioxe. Lavie yan xa o cꞌusi chachꞌunic ti chacuxiic o ta sbatel osil ti avalojique.  
\v 7 Mu cꞌusi yan ti chicuxiotic o ta sbatel osile, jaꞌ noꞌox li cꞌusi lacalbeique. Li cꞌusi noꞌoxe, yuꞌun oy muchꞌutic chayalbeic ti maꞌuc yech ta chꞌunele, yechꞌo ti oy chavicta abaique. Yuꞌun mu jamluc chalic ti jaꞌ noꞌox chacꞌ cuxlicotic ta sbatel osil ti Cristoe.  
\v 8 Pero mi oy muchꞌu chtal yalboxuc scꞌop Riox ti mu xcoꞌolaj chac cꞌu chaꞌal lacalbeique, acꞌu acꞌbatuc castico yuꞌun ti Rioxe, muc ta alel muchꞌuuc, acꞌu mi voꞌoticoticuc, acꞌu mi anjel ta vinajel.  
\v 9 Li cꞌusi lacalbeique, chacalbeic to otro jꞌechꞌel. Mi oy muchꞌu chayalbeic scꞌop Riox ti mu xcoꞌolaj chac cꞌu chaꞌal achꞌunojique, acꞌu acꞌbatuc castico yuꞌun ti Rioxe. 
\p  
\v 10 Ti jaꞌuc ta jcꞌan ti lec chiyil li crixchanoetique, maꞌuc yech lacalbeic ti yechuque. Ti jaꞌuc ta jcꞌane cheꞌe, yuꞌun mu jchꞌun cꞌusi chiyalbe ti Jesucristoe. Lavie jaꞌ ta jcꞌan ti lec chiyil ti Rioxe, yechꞌo ti jaꞌ yech lacalbeique. 
\s1 Jaꞌ liꞌ yaloj ti tꞌujbil ti Pabloe ti chalbe scꞌop Riox ti muchꞌutic maꞌuc xchiꞌil ta jurioale 
\p  
\v 11 Voꞌotic ti jchiꞌil jbatic ta xchꞌunel li scꞌop Rioxe, ti ay cal avaꞌiic ti jaꞌ noꞌox chacꞌ jcuxlejaltic ta sbatel osil ti Jesucristoe, maꞌuc crixchano isnop.  
\v 12 Maꞌuc crixchano liyalbe lixchanubtas. Jaꞌ liyalbe ti Jesucristoe. 
\p  
\v 13 Avaꞌyojic xa ti cꞌusi ijpas ti cꞌalal jaꞌ toꞌox yech jchꞌunoj chac cꞌu chaꞌal xchꞌunojic li jchiꞌiltac ta jurioale ti cꞌalal mu toꞌox ta jchꞌun ti jaꞌ chacꞌ jcuxlejaltic ta sbatel osil ti Cristoe. Iquilbajin tajmec li muchꞌutic xchꞌunojic li scꞌop Rioxe. Yuꞌun ta jchꞌaybe scꞌoplal ti caloje.  
\v 14 Li cꞌusitic jchꞌunoj toꞌox xchiꞌuc li jchiꞌiltaque, voꞌon más jnaꞌbe smelol. Jaꞌ mu masuc snaꞌbeic smelol li jchiꞌiltac ta chꞌiele. Ti caloje, mu jcꞌan ti ta xchꞌay ti cꞌusitic ixchꞌunic ti jtot jmeꞌticotic ti ta más voꞌnee yuꞌun sjunul toꞌox coꞌon jchꞌunoj uc.  
\v 15 Pero ti Rioxe listꞌuj ti cꞌalal mu toꞌox chiꞌayane. Yuꞌun lec yoꞌon, yechꞌo ti liyiqꞌue.  
\v 16 Ti cꞌalal liyiqꞌue, iyacꞌ cojtiquinbe ti Xchꞌamale yoꞌ xacalbe o avaꞌiic voꞌoxuc ti maꞌuc juriooxuque, ti jaꞌ chacꞌ jcuxlejaltic ta sbatel osil ti Xchꞌamale. Ti cꞌalal liyiqꞌue, muc muchꞌu ijacꞌbe ti cꞌusi ta jpase.  
\v 17 Muc bu ay jacꞌbe ta Jerusalén ti muchꞌutic baꞌyi iꞌochic ta yalel aꞌyuc li scꞌop Rioxe. Ora libat ta Arabia. Tsꞌacal to lisut ta jteclum Damasco. 
\p  
\v 18 Jaꞌto libat ta Jerusalén ti cꞌalal ilocꞌ oxib jabile. Jaꞌ ba jvulaꞌan li Pedroe. Tey ijchiꞌin voꞌlajuneb cꞌacꞌal.  
\v 19 Muc bu iquil li yan xchiꞌiltac ta yalel aꞌyuc li scꞌop Rioxe, stuc noꞌox iquil li Jacoboe, li yitsꞌin Cajvaltic Jesuse.  
\v 20 Ti Rioxe yiloj ti yech li cꞌusi chajtsꞌibabeique, muc bu ta jnop. 
\p  
\v 21 Tsꞌacal to libat ta estado Siria xchiꞌuc ta estado Cilicia.  
\v 22 Li muchꞌutic yichꞌojic ta mucꞌ Cristo ta estado Judeae, mu toꞌox xiyojtiquinic.  
\v 23 Jaꞌ noꞌox yaꞌyojic jcꞌoplal: “Ti muchꞌu liyilbajinotic toꞌoxe, ti taꞌox xchꞌaybe scꞌoplal li scꞌop Rioxe, lavie chal xa ti jaꞌ chacꞌ jcuxlejaltic ta sbatel osil ti Jesucristoe”, xi ti loꞌil iyaꞌiique.  
\v 24 “Colaval”, xutic ti Rioxe ti iquichꞌ xa ta mucꞌ ti Jesucristoe. 
\c 2  
\p  
\v 1 Ti cꞌalal ilocꞌ chanlajuneb jabile, libat ta Jerusalén noxtoc xchiꞌuc li Bernabee. Iquicꞌ echꞌel li Tito uque.  
\v 2 Ti libat ta Jerusalene, yuꞌun jaꞌ yech isyules ta jol ti Rioxe. Jaꞌ ay jcꞌopon ti muchꞌutic ti stuquic noꞌox snaꞌbeic smelol avalojic cꞌusi yaloj ti Cajvaltique. Jaꞌ ay calbe yaꞌiic ti cꞌu xꞌelan chacalbeic voꞌoxuc ti maꞌuc juriooxuque, ti jaꞌ chacꞌ jcuxlejaltic ta sbatel osil ti Cajvaltic Jesucristoe. Ti ay calbeique, yuꞌun jaꞌ mu jcꞌan mi mu coꞌoluc li cꞌusi chcalticotique. Yuꞌun mi mu coꞌoluque, yicꞌal mu cꞌusi bal o li cꞌusi ta jpase.  
\v 3 Pero lec iyaꞌiic ti cꞌu xꞌelan chcal li scꞌop Rioxe. Li Tito jchiꞌuc echꞌele maꞌuc jchiꞌilticotic ta jurioal, pero muc xalic ti persa chichꞌ circuncisione.  
\v 4 Pero oy jayvoꞌ ti muchꞌutic xchꞌunojic scꞌop Riox ti ta alele, mucul iꞌochic uc ti cꞌalal liꞌochoticotique. Jaꞌ och yaꞌiic mi oy tey jchiꞌuc ti muchꞌu muc bu yichꞌoj circuncisione. Yuꞌun chalic ti persa chichꞌic circuncisión li muchꞌutic maꞌuc jchiꞌilticotic ta jurioale mi ta xchꞌunic li scꞌop Rioxe. Yan li voꞌotique jchꞌunojtic xa ti jaꞌ chacꞌ o jcuxlejaltic ta sbatel osil ti Rioxe ti iquichꞌtic xa ta mucꞌ ti Jesucristoe.  
\v 5 Ti iyalic ti persa chichꞌ circuncisión li Titoe, muc bu ijchꞌunticotic. Yuꞌun jaꞌ mu jcꞌanticotic ti chavicta abaic ta xchꞌunel ti jaꞌ noꞌox chacꞌ jcuxlejaltic ta sbatel osil ti Cajvaltic Jesuse chac cꞌu chaꞌal lacalbeic onoxe. Li cꞌusi lacalbeique, yuꞌun yech. 
\p  
\v 6 Ti ay jcꞌopon li muchꞌutic ti stuquic noꞌox snaꞌbeic smelol avalojic ti cꞌusi yaloj ti Cajvaltique, lec iyaꞌiic li cꞌusitic ta jpase. Li voꞌone mu cꞌu jcuenta o mi más ep cꞌusi yilojic cꞌusi spasojic. Ti Rioxe coꞌol chiyiloticotic.  
\v 7 Iyilic ti voꞌon tꞌujbilon ti chacalbeic ti cꞌusi yaloje, voꞌoxuc ti maꞌuc juriooxuque, chac cꞌu chaꞌal li Pedroe ti jaꞌ tꞌujbil ti chalbe li jchiꞌiltac ta jurioale.  
\v 8 Ti Rioxe ti iꞌalbon li Pedroe ti chalbe scꞌop Riox li jchiꞌiltac ta jurioale, jaꞌ liyalbe uc ti chacalbeic voꞌoxuc ti maꞌuc juriooxuque. 
\p  
\v 9 Li Jacoboe, xchiꞌuc li Pedroe, xchiꞌuc li Juane, ti stuc noꞌox snaꞌbeic smelol avalojic li scꞌop Rioxe, iyilic ti jaꞌ stꞌujojon ti Rioxe, istsac jcꞌobticotic xchiꞌuc li Bernabee. Jaꞌ seña ti coꞌol chcalticotic aꞌyuc li scꞌop Rioxe. Lec iyaꞌiic ti chcalticotic avaꞌiic scꞌop Riox voꞌoxuc ti maꞌuc juriooxuque. Jaꞌ noꞌox yech tey chalbeic scꞌop Riox li jchiꞌiltac ta jurioale.  
\v 10 Jaꞌ noꞌox liyalboticotic ti acꞌu jcꞌuxubinticotic li meꞌonetique. Lec icaꞌi ti jaꞌ yech liyalbeique yuꞌun jaꞌ onox yech ta jpas. 
\s1 Jaꞌ liꞌ yaloj ti iꞌalbat yuꞌun Pablo ti chopol cꞌusi tspas ti Pedroe 
\p  
\v 11 Tsꞌacal to ital ta Antioquía li Pedroe, tey cꞌot staon. Li Pedroe icalbe ta sat ti maꞌuc yech li cꞌusi ispase.  
\v 12 Yuꞌun li ta baꞌyie ixchꞌun ti chba xchiꞌin ta veꞌel lachiꞌilique, voꞌoxuc ti maꞌuc juriooxuque. Pero itaqueic tal jayvoꞌ jchiꞌiltac yuꞌun li Jacoboe ti xchꞌunojic scꞌop Rioxe. Jaꞌic ti muchꞌutic chalic ti persa chichꞌic circuncisión li muchꞌutic maꞌuc jchiꞌilticotic ta jurioal mi ta xchꞌunic li scꞌop Rioxe. Ti cꞌalal mu toꞌox chulique, jun toꞌox yoꞌon ta xchiꞌin ta veꞌel achiꞌilic li Pedroe. Ti cꞌalal iyulique, mu xa scꞌan xchiꞌin ta veꞌel yuꞌun ixiꞌ mi chopol chbat scꞌoplal.  
\v 13 Li yan jchiꞌiltaque ti xchꞌunojic li scꞌop Rioxe, jaꞌ ixchanic cꞌusi ispas li Pedroe. Jaꞌ noꞌox yech li Bernabee ixchan uc. Coꞌol xa sjolic, mu xa scꞌan xchiꞌinic ta veꞌel lachiꞌilique.  
\v 14 Yechꞌo un ti cꞌalal iquil ti maꞌuc yech tspasic chac cꞌu chaꞌal yaloj ti Cajvaltic Jesuse, jaꞌ yech lic calbe ta bail ta satil li Pedroe: “Li voꞌotique jchꞌunojtic toꞌox ti jaꞌ chicuxiotic o ta sbatel osil li smantaltac Rioxe. Pero lavie mu xa jchꞌuntic ti jaꞌ chicuxiotic o ta sbatel osile. Yechꞌo un maꞌuc onox yech smelol ti mu xa jchiꞌintic ta veꞌel li muchꞌutic maꞌuc jchiꞌiltic ta jurioale chac cꞌu chaꞌal ijpastic toꞌoxe. Lavi mu xa xachiꞌine, coꞌol xchiꞌuc jaꞌ chacꞌan ti acꞌu xchꞌunic ti jaꞌ chcuxiic o ta sbatel osil li mantaletique ti mu xa bu jchꞌunojtic ti jaꞌ chicuxiotic o li voꞌotique. 
\p  
\v 15 ’Li voꞌotique juriootic onox liꞌayanotic yechꞌo ti caꞌyojtic li smantaltac Riox ti iyal ti Moisese. Maꞌuc yechotic chac cꞌu chaꞌal li muchꞌutic maꞌuc jchiꞌiltique ti muc bu xaꞌiic li smantaltac Rioxe, yechꞌo ti cꞌusuc noꞌox spasique.  
\v 16 Li voꞌotique jnaꞌojtic ti maꞌuc chꞌabal o jmultic chiyilotic Riox li smantaltaque, ti jaꞌ noꞌox chꞌabal o jmultic chiyilotic mi ta jchꞌuntic ti jaꞌ istoj jmultic ti Jesucristoe. Yechꞌo ti ijchꞌuntic xa li voꞌotique, yechꞌo ti chꞌabal xa jmultic chiyilotic ti Rioxe. Li smantaltaque muc muchꞌu ti chꞌabal o smul ch-ile yuꞌun ti Rioxe yuꞌun mu xchꞌun cuꞌuntic. 
\p  
\v 17 ’Voꞌotic ti jchꞌunojtic xa ti jaꞌ chꞌabal o jmultic chiyilotic Riox ti istoj jmultic ti Cristoe, mi ta jnoptic ti ta jta o jmultic ti cꞌalal ta jpastic cꞌusi lec chil ti Cristoe, coꞌol xchiꞌuc jaꞌ xa chisujotic ta mulil ti Cristoe. Pero mu yechuc.  
\v 18 Jaꞌ mulil mi chlic to jchꞌuntic noxtoc ti jaꞌ chicuxiotic o ta sbatel osil li smantaltac Rioxe.  
\v 19 Lavie mu xa jchꞌuntic ti jaꞌ chicuxiotic o ta sbatel osil li smantaltac Rioxe yuꞌun mu xchꞌun cuꞌuntic. Jchꞌunojtic xa ti jaꞌ chacꞌ jcuxlejaltic ta sbatel osil ti Cajvaltic Jesuse, yechꞌo ti spas xa cuꞌuntic li cꞌusitic lec chil ti Rioxe.  
\v 20 Ti cꞌalal iquichꞌtic ta mucꞌ ti Cristoe, coꞌol lichamotic yaꞌel jchiꞌuctic yuꞌun ijchꞌuntic ti mu cꞌusi xuꞌ jpastic yoꞌ xicuxiotic o ta sbatel osile. Jaꞌ xa scuentainojotic ti Cristoe. Mu xa jtucticuc, xchiꞌinojotic xa, yechꞌo ti spas xa cuꞌuntic li cꞌusitic leque. Yuꞌun jchꞌunojtic ti jaꞌ chiscoltaotique yuꞌun jaꞌ Xchꞌamal ti Rioxe. Yuꞌun scꞌanojotic, yechꞌo ti iyacꞌ sba ta milel ta scoj jmultique.  
\v 21 Mu me xquictatic xchꞌunel ti ta slequil noꞌox yoꞌon ti chꞌabal jmultic chiyilotic ti Rioxe. Ti jaꞌuc chꞌabal o jmultic chiyilotic li smantaltaque, mu cꞌu stu ti ay chamuc ta cruz ti Cristoe”, xcut li Pedroe. 
\c 3  
\s1 Jaꞌ liꞌ yaloj ti jaꞌ noꞌox ta xchiꞌinatic yuꞌun Chꞌul Espíritu ti muchꞌutic ta xchꞌunic ti jaꞌ istoj jmultic ti Jesucristoe 
\p  
\v 1 Li voꞌoxuque, jgalaciaetic, toj sonsooxuc yuꞌun achꞌunic xa loꞌloel. Yuꞌun mu xa xachꞌunic ti jaꞌ noꞌox chacꞌ jcuxlejaltic ta sbatel osil ti Jesucristoe. Ti cꞌalal icalticotic avaꞌiique, achꞌunic. Coꞌol xchiꞌuc avilic yaꞌel ti jipil ta cruz ti Cristoe, yuꞌun jamal lacalbeic.  
\v 2 Oy cꞌusi chajacꞌbeic. Ti tal xchiꞌinoxuc ti Chꞌul Espíritue, ¿mi jaꞌ ti achꞌunbeic smantaltac ti Rioxe, o mi jaꞌ ti achꞌunic ti jaꞌ istoj jmultic ti Cristoe?  
\v 3 ¿Miꞌn toj sonsooxuc yaꞌel? ¿Miꞌn chanopic yaꞌel ti mu xa persauc chascoltaic ta spasel cꞌusi lec chil Riox ti Chꞌul Espíritue ti jaꞌ islecubtas avoꞌonic ti cꞌalal lic achꞌunique? ¿Miꞌn spas xa avuꞌunic atuquic ti avalojique?  
\v 4 ¿Miꞌn la yech noꞌox ti avacꞌ avocolic ti cꞌalal lic achꞌunique? Chcal voꞌone, mu yechuc noꞌox.  
\v 5 Ti layacꞌbe achiꞌinic Chꞌul Espíritu ti Rioxe, ti chacꞌ avilic ti oy slequilal syuꞌelale, ¿mi jaꞌ ti achꞌunbeic smantaltac ti Rioxe o mi jaꞌ ti achꞌunic ti jaꞌ istoj jmultic ti Cristoe? 
\s1 Jaꞌ liꞌ yaloj ti iꞌalbat yuꞌun Riox ti Abraame ti jun smom chacꞌ jcuxlejaltic ta sbatel osile 
\p  
\v 6 Ti Abraame ixchꞌun ti yech ti cꞌusi chal ti Rioxe, yechꞌo ti chꞌabal smul iꞌilee.  
\v 7 Mi jaꞌ yech jchꞌunojtic uque, chꞌabal jmultic chiyilotic ti Rioxe chac cꞌu chaꞌal chꞌabal smul iꞌile ti Abraame.  
\v 8 Ti Rioxe snopoj onox ti chachꞌunic uque, voꞌoxuc ti maꞌuc juriooxuque, ti chꞌabal amul chayilic uque, yechꞌo ti jaꞌ yech tsꞌibabile: “Ti amome jaꞌ ta sta o bentisyon ti jaylajuntos crixchanoetic ta sba balamile”, xꞌutat onox yuꞌun Riox ti Abraame.  
\v 9 Yechꞌo un ti muchꞌutic ta xchꞌunic chac cꞌu chaꞌal ixchꞌun ti Abraame, chꞌabal smul ch-ileic chac cꞌu chaꞌal chꞌabal smul iꞌile ti Abraame. 
\p  
\v 10 Ti muchꞌutic tsnopic ti jaꞌ chcuxiic o ta sbatel osil li smantaltac Rioxe, scꞌoplal xa ch-acꞌbatic castico yuꞌun ti Rioxe. Jaꞌ onox yech tsꞌibabil chac liꞌi: “Ti muchꞌutic mu xchꞌunic scotol li smantaltac Rioxe ti tsꞌibabil comele, ta xꞌacꞌbatic castico yuꞌun ti Rioxe”, xi tsꞌibabil.  
\v 11 Muc muchꞌu ti chꞌabal o smul ch-ile yuꞌun Riox li smantaltaque yuꞌun yaloj onox ti Rioxe: “Ti muchꞌutic chꞌabal smulic chquile jaꞌ ti muchꞌutic xchꞌunojic ti voꞌon ijtojbeique, jaꞌ ta xcuxiic ta sbatel osil”, xi ti Rioxe, xi tsꞌibabil.  
\v 12 Ti muchꞌutic ta xchꞌunic ti ch-acꞌbat scuxlejalic ta sbatel osil yuꞌun ti Rioxe, mu xa cꞌusi tspasic yoꞌ xcuxiic oe. Yan ti muchꞌutic ta snopic ti jaꞌ chcuxiic o ta sbatel osil li smantaltac Rioxe, persa ta xchꞌunic scotol li mantaletique. Yuꞌun yech onox tsꞌibabil ta scꞌop Riox: “Ti muchꞌutic ta xchꞌunic scotol li jmantaltaque, ta xcuxiic o ta sbatel osil”, xi ti Rioxe, xi tsꞌibabil. 
\p  
\v 13 Ti mu xchꞌun cuꞌuntic li smantaltac Rioxe, scꞌoplal ox chba quichꞌtic castico. Pero ti castico scꞌoplal ox chquichꞌtique, jaꞌ iyichꞌ ti Cristoe ti cꞌalal ijipanat ta cruze. Yuꞌun yech onox tsꞌibabil ta scꞌop Riox: “Ti muchꞌu chjipanat ta teꞌe jaꞌ chvinaj o ti iyichꞌ castico yuꞌun ti Rioxe”, xi tsꞌibabil.  
\v 14 Ti jaꞌ iyichꞌ castico ti Cristoe ti scꞌoplal ox chquichꞌtique, jaꞌ yoꞌ chꞌabal o amulic chayilic ti Riox uque, voꞌoxuc ti maꞌuc juriooxuque, chac cꞌu chaꞌal chꞌabal smul iꞌile yuꞌun Riox ti Abraame. Ti muchꞌutic jaꞌ yech ta xchꞌunique ta xchiꞌinatic yuꞌun ti Chꞌul Espíritue ti yaloj onox Riox chaqꞌue. 
\p  
\v 15 Voꞌotic ti jchiꞌil jbatic ta xchꞌunel li scꞌop Rioxe, ta xcal avaꞌiic cꞌu xꞌelan ta jpastic trate xchiꞌuc li jchiꞌiltique. Ta jpasbetic svunal, ta xcacꞌ jpirmatic yoꞌ xvinaj o ti ta xcꞌot ti cꞌusi ijpastic tratee. Muc muchꞌu xuꞌ tstupꞌ, muc muchꞌu xuꞌ tspꞌoles.  
\v 16 Jaꞌ noꞌox yech ti cꞌalal iꞌalbat yuꞌun Riox ti Abraame ti jaꞌ ta staic o bentisyon crixchanoetic ti smome, scꞌoplal noꞌox jun smom, jaꞌ ti Cristoe. Maꞌuc jcꞌoplal jcotolticotic ti smomoticotic ti Abraame.  
\v 17 Ti cꞌalal yech iꞌalbat yuꞌun Riox ti Abraame, scꞌan toꞌox cuatrocientos treinta jabil xal smantaltac ti Rioxe. Ti cꞌalal iyal li smantaltaque, muc xchꞌay o ti cꞌusi iꞌalbat ti Abraame.  
\v 18 Ti jaꞌuc chicuxiotic o ta sbatel osil li smantaltac Rioxe, mu cꞌusi bal o ta jchꞌuntic chac cꞌu chaꞌal ixchꞌun ti Abraame. Pero ti Abraame icuxi ta sbatel osil ti ixchꞌun ti yech ti cꞌusi chal ti Rioxe. Yechꞌo un maꞌuc chicuxiotic o ta sbatel osil li smantaltac Rioxe. 
\s1 Jaꞌ liꞌ yaloj ti jaꞌ noꞌox chquiltic o ti oy jmultic li smantaltac Rioxe 
\p  
\v 19 Yechꞌo un ¿cꞌusi stu li smantaltac Rioxe? mi xachiique, chcal avaꞌiic cꞌusi stu. Li smantaltac Rioxe jaꞌ yoꞌ iyilic o ti oy smulique. Jaꞌ noꞌox itun ti cꞌu sjalil mu toꞌox ta xtal ti jun smom Abraame ti iꞌalbat yuꞌun ti Rioxe, jaꞌ ti Cristoe. Ti iꞌay ti Cristoe, ichꞌay scꞌoplal li smantaltac Rioxe. Chvinaj ti mu masuc tsots scꞌoplal chaꞌi smantaltac ti Rioxe, yuꞌun anjeletic noꞌox iꞌalbat yuꞌun ti Moisese. Ti Moisese jaꞌ xa iyalbe ti jtot jmeꞌticotic ti ta más voꞌnee.  
\v 20 Pero ti cꞌalal iyal ti Rioxe ti cꞌuxi xuꞌ chicuxiotic ta sbatel osile, maꞌuc mantal istac echꞌel, iyalbe stuc ti Abraame. 
\p  
\v 21 Mi ta jnoptic ti jaꞌ ichꞌay o scꞌoplal ti cꞌusi baꞌyi yaloj ti Rioxe ti cꞌalal iyal li smantaltaque, mu yechuc. Ti jaꞌuc ilecub o coꞌontic li smantaltac Rioxe cheꞌe, chꞌabal jmultic ti yechuque.  
\v 22 Pero tsꞌibabil onox ta scꞌop Riox ti jcotoltic oy jmultique, jaꞌ yoꞌ jchꞌuntic o ti jaꞌ noꞌox chacꞌ jcuxlejaltic ta sbatel osil ti Jesucristoe chac cꞌu chaꞌal iꞌalbat yuꞌun Riox ti Abraame. 
\p  
\v 23 Ti cꞌalal mu toꞌox ta xtal ti muchꞌu istoj li jmultique, ta jchꞌuntic smantaltac Riox ti calojtique, pero mu xchꞌun cuꞌuntic. Jmultic noꞌox ijtatic, yechꞌo un jaꞌ ijcꞌantic ti acꞌu taluc ti muchꞌu ta stoj li jmultique.  
\v 24 Ti muc xchꞌun cuꞌuntic li smantaltac Rioxe, jaꞌ iquiltic o ti mu xicuxiotic ta sbatel osil ta jtuctique, ti persa ta jcꞌantic coltaele. Lavi ijchꞌuntic xa ti jaꞌ istoj jmultic ti Cristoe, chꞌabal xa jmultic chiyilotic ti Rioxe.  
\v 25 Lavi ijchꞌuntic xa ti chꞌabal jmultic chiyilotic ti Rioxe, mu xa bu jchꞌunojtic ti jaꞌ chꞌabal o jmultic chiyilotic li smantaltaque. 
\p  
\v 26 Lavi achꞌunic xa uc ti jaꞌ istoj jmultic ti Jesucristoe, voꞌoxuc ti maꞌuc juriooxuque, xchꞌamalotic xa Riox jcotoltic.  
\v 27 Yuꞌun avalic ti jaꞌ chavichꞌic ta mucꞌ ti Cristoe ti jayvoꞌ avichꞌic voꞌe.  
\v 28 Lavi une muc ta alel mi jurio o mi maꞌuc, mi mozoinbil o mi chꞌabal, mi ants o mi vinic, jun chayilic ti Jesucristoe.  
\v 29 Lavi avichꞌojic xa ta mucꞌ ti Cristoe, smomoxuc xa Abraam chil ti Rioxe. Yechꞌo un ta onox xacuxiic ta sbatel osil uc chac cꞌu chaꞌal iꞌalbat yuꞌun Riox ti Abraame. 
\c 4  
\p  
\v 1-2 Chacalbe avaꞌiic smelol ti cꞌusi lacalbeique. Caltic noꞌox yaꞌel ti oy jun creme ti cꞌox toꞌox icom ti cꞌalal icham ti stote. Yuꞌun ti cꞌox toe, mu to xuꞌ chichꞌbe entrucal li cꞌusuc yuꞌun ti stote, pero ta stsꞌitesat yuꞌun ti muchꞌutic saꞌoj comel ti stote. Albilic onox comel ti cꞌusi ora chacꞌbeic entrucale. Ti cꞌalal cꞌox toꞌoxe, coꞌol xchiꞌuc mozoil ti creme yuꞌun pasbil toꞌox ta mantal acꞌu mi jaꞌ onox chichꞌ scotol ti cꞌusuc yuꞌun ti stote.  
\v 3 Jaꞌ noꞌox yechotic yaꞌel uc. Coꞌolotic toꞌox xchiꞌuc mozoil yaꞌel yuꞌun naca toꞌox mantal ta jchꞌuntic. Calojtic ti jaꞌ chicuxiotic o ta sbatel osile. Pero yaloj onox ti Rioxe ti ta sta yora ti chiyacꞌbotic ti cꞌusuc yuꞌune.  
\v 4 Ti cꞌalal ista yorae, istac tal ti Xchꞌamale. Ti cꞌalal itale, jaꞌ yech iꞌayan chac cꞌu chaꞌal voꞌotic yuꞌun iꞌayan ta jun ants. Ixchꞌun mantal uc chac cꞌu chaꞌal li voꞌotique ti naca toꞌox mantal ta jchꞌuntique.  
\v 5 Ti itale, tal stoj jmultic voꞌotic ti jnopojtic ti jaꞌ chicuxiotic o ta sbatel osil li cꞌusitic ta jpastique. Lavi istoje, xuꞌ xa chixchꞌamalinotic o ti Rioxe. 
\p  
\v 6 Ti cꞌalal lixchꞌamalinotic ti Rioxe, istac tal xchiꞌinotic ti Chꞌul Espíritue chac cꞌu chaꞌal ichiꞌinat ti Xchꞌamale, yechꞌo ti “Tot”, xcutic xa ti Rioxe.  
\v 7 Yechꞌo un maꞌuc xa mozoiloxuc, xchꞌamaloxuc xa ti Rioxe. Lavi xchꞌamaloxuc xae, ta onox xaxchꞌacbeic ti cꞌusitic acꞌbil yuꞌun Jtotic Riox ta vinajel ti Jesucristoe. 
\s1 Jaꞌ liꞌ yaloj ti mu xa me jchꞌuntic ti cꞌusi chismozoinotic yaꞌele 
\p  
\v 8 Ti cꞌalal mu toꞌox chavichꞌic ta mucꞌ ti Riox ta vinajele, santoetic toꞌox avichꞌojic ta mucꞌ.  
\v 9 Pero lavi avichꞌic xa ta mucꞌ ti Rioxe, más lec xcaltic ti jaꞌ laxchꞌamalinic ti Rioxe, ¿cꞌu yuꞌun yaꞌel ti jaꞌ lic achabiic noxtoc li cꞌacꞌale ti mu xicuxiotic o ta sbatel osile? ¿Mi jaꞌ chacꞌanic ti coꞌol xchiꞌuc mozoiloxuc noxtoque?  
\v 10 Yuꞌun chachabiic xa cꞌacꞌal chac cꞌu chaꞌal ta xchabiic cꞌacꞌal li jchiꞌiltac ta jurioale. Jaꞌ li sliqueb jujun ue, li sliqueb jujun jabile, li scꞌacꞌalil qꞌuinetique.  
\v 11 Chcat coꞌon avuꞌunic yuꞌun yicꞌal yech noꞌox ti lacalbeic li scꞌop Rioxe. 
\p  
\v 12 Voꞌotic ti jchiꞌil jbatic ta xchꞌunel li scꞌop Rioxe, jaꞌ ta jcꞌan ti jaꞌ yechoxuc chac cꞌu chaꞌal li voꞌone, ti muc ta alel chcaꞌi li smantaltac Rioxe. Coꞌol xchiꞌuc muc bu caꞌyoj yaꞌel chac cꞌu chaꞌal muc bu avaꞌyojic ti cꞌalal mu toꞌox chachꞌunic li scꞌop Rioxe. Ti xꞌelan chacalbeique, muꞌnuc oy amulic cuꞌun. Jaꞌ noꞌox chacalbeic o yuꞌun achꞌunic xa loꞌloel.  
\v 13 Anaꞌojic ti jaꞌ ta scoj li chamele ti tey lijalij ta alumalique, yechꞌo ti ical avaꞌiic li scꞌop Rioxe, yechꞌo ti achꞌunique.  
\v 14 Ti cꞌalal ipone, muc xalabanicon, muc xapꞌajicon. Avichꞌicon ta mucꞌ. Yuꞌun coꞌol xchiꞌuc anjel avilicon. Yuꞌun coꞌol xchiꞌuc Jesucristo avilicon.  
\v 15 ¿Cꞌu yuꞌun ti mu xa bu jun avoꞌonic ta jtojole chac cꞌu chaꞌal jun toꞌox avoꞌonique? Xuꞌ chcal ti jun toꞌox avoꞌonique yuꞌun mu vocluc aqꞌuelicon ti cꞌalal ipone. Xuꞌ xa yaꞌel avaꞌiic ti chapits sbecꞌ asatic chavacꞌbecone.  
\v 16 Lavi une, ¿mi jaꞌ acrontaicon o yaꞌel ti lacalbeic cꞌu xaꞌelanique? 
\p  
\v 17 Ti muchꞌutic chaxchanubtasic ta alele, scꞌanojoxuc yilel pero mu ta slequiluc yoꞌonic. Yuꞌun jaꞌ tscꞌanic ti mu xa xachꞌunic li cꞌusi chcale yoꞌ jaꞌ xa xavichꞌic o ta muqꞌue.  
\v 18 Ti xꞌelan chcale, muꞌnuc chopol chcaꞌi ti oy muchꞌu chaxchanubtasique. Ti jaꞌuc chlecub o avoꞌonic ti cꞌusi chaxchanubtasic oe, lec ti yechuque yuꞌun muc bu liꞌ jchiꞌucoxuc scotol cꞌacꞌale.  
\v 19 Voꞌoxuc ti coꞌol xchiꞌuc jchꞌamaloxuc chcaꞌie, chcat coꞌon avuꞌunic tajmec. Coꞌol xchiꞌuc jun ants ti yatoj yoꞌon ti cꞌalal mu toꞌox chcole. Ti cꞌalal xcole, jun xa yoꞌon. Jaꞌ noꞌox yech jun coꞌon uc mi iquil ti jꞌechꞌel achꞌunic ti jaꞌ noꞌox chacꞌ jcuxlejaltic ta sbatel osil ti Cristoe.  
\v 20 Ti liꞌuc jchiꞌucoxuque, maꞌuc yech tsots chacalbeic ti yechuque, yuꞌun chquil mi jun avoꞌonic ta stojol ti Cajvaltique. Ti xꞌelan tsots chacalbeic tale, jaꞌ ti chcat coꞌon avuꞌunique. 
\s1 Jaꞌ liꞌ yaloj cꞌusi seña ti Agare ti quiaraile xchiꞌuc ti Sarae ti maꞌuc quiaraile 
\p  
\v 21 Voꞌoxuc ti chacꞌan chachꞌunic li smantaltac Rioxe, albecon caꞌi mi muc bu xavaꞌiic ti coꞌol xchiꞌuc smozootic yaꞌel li mantaletic mi jaꞌ ta jchꞌuntique.  
\v 22 Tsꞌibabil ta scꞌop Riox ti iyil chaꞌvoꞌ screm ti Abraame. Ti june yol squiara; ti june yol yajnil.  
\v 23 Ti iꞌayan yol ti quiaraile, maꞌuc ta smantal ti Rioxe; smantal noꞌox stuquic. Ti iꞌayan yol ti yajnil onoxe, jaꞌ ta smantal ti Rioxe.  
\v 24 Ti chaꞌvoꞌ antsetique jaꞌ seña yaꞌel ti chaꞌtos cꞌusi iyal ti Rioxe. Ti jtose jaꞌ ti iyal smantaltac ta vits Sinaie. Ti Agare ti quiaraile jaꞌ seña yaꞌel ti iyal smantaltac ti Rioxe. Yuꞌun ti muchꞌutic ta xchꞌunic ti jaꞌ chcuxiic o ta sbatel osil li mantaletique, coꞌol xchiꞌuc mozoiletic yaꞌel.  
\v 25 Li smomtac Agare Agar isbiin yuꞌunic li vits Sinaí ta Arabiae. Li jchiꞌiltac ta jurioale ti chcꞌotilanic ta mucꞌta templo ta Jerusalene, jaꞌ yoltac yaꞌel ti Agare, yuꞌun coꞌol xchiꞌuc mozoinbilic yuꞌun li mantaletique, yuꞌun xchꞌunojic to ti jaꞌ chcuxiic o ta sbatel osile.  
\v 26 Li voꞌotique jaꞌ jmeꞌtic yaꞌel ti Sarae ti maꞌuc quiaraile, yuꞌun mu xa jchꞌuntic ti jaꞌ chicuxiotic o ta sbatel osil li smantaltac Rioxe. Yuꞌun jaꞌ xa jlumaltic li vinajele, coꞌol xchiꞌuc jaꞌ xa yaꞌel ti achꞌ Jerusalene, yuꞌun tey ti muchꞌu chacꞌ jcuxlejaltic ta sbatel osile.  
\v 27 Jaꞌ yech tsꞌibabil ta scꞌop Riox chac liꞌi: 
\q1 Li voꞌoxuque, jꞌisraeletic, coꞌoloxuc xchiꞌuc jun ants ti mu snaꞌ xꞌalaje, 
\q1 pero tsꞌacal to ep ta xpꞌolesbat yol yuꞌun ti Rioxe. 
\q1 Jaꞌ jutuc noꞌox yol ti muchꞌu snaꞌ xꞌalaje. 
\q1 Yuꞌun ta jchꞌay lachiꞌiltac ta Jerusalene, 
\q1 jaꞌ ti muchꞌutic mu xiyichꞌic ta muqꞌue. 
\q1 Tsꞌacal to ta xquicꞌ tal ti muchꞌutic chiyichꞌic ta muqꞌue. 
\q1 Más xa epic, más jun yoꞌonic, 
\m xi tsꞌibabil. 
\p  
\v 28 Voꞌotic ti jchiꞌil jbatic ta xchꞌunel li scꞌop Rioxe, coꞌolotic xchiꞌuc ti Isaaque ti jaꞌ ta smantal Riox iꞌayane. Yuꞌun yaloj onox ti chixchꞌamalinotic uque.  
\v 29 Ti otro jun screm ti Abraame iyilbajin ti Isaaque ti iꞌayan ta syuꞌel ti Chꞌul Epíritue. Jaꞌ noꞌox yech lavie, ch-ilbajinvanic ti muchꞌutic ta snopic ti jaꞌ chcuxiic o ta sbatel osil li cꞌusitic tspas stuquique.  
\v 30 Pero jaꞌ yech chal li scꞌop Rioxe: “Taco loqꞌuel xchiꞌuc yol li quiaraile. Li yole mu xuꞌ chichꞌbe comel li cꞌusuc yuꞌun stote. Jaꞌ chichꞌ comel li yol li muchꞌu maꞌuc quiaraile”, xi.  
\v 31 Yechꞌo un voꞌotic ti jchiꞌil jbatic ta xchꞌunel li scꞌop Rioxe, maꞌuc yolotic yaꞌel ti quiaraile. Jaꞌ yolotic yaꞌel ti muchꞌu maꞌuc quiaraile. Yuꞌun yalojbotic onox ti Rioxe ti chiyacꞌbotic li cꞌusuc yuꞌune. 
\c 5  
\s1 Jaꞌ liꞌ yaloj ti jꞌechꞌel acꞌu jchꞌuntic ti mu xicuxiotic o ta sbatel osil li cꞌusiticuc mantalile 
\p  
\v 1 Voꞌotic ti coꞌolotic toꞌox xchiꞌuc mozoile yuꞌun icacꞌtic toꞌox persa xchꞌunel li mantaletique yuꞌun ijnoptic ti jaꞌ chicuxiotic o ta sbatel osil ti calojtique, lavi ijchꞌuntic xa ti jaꞌ chacꞌ jcuxlejaltic ta sbatel osil ti Cristoe, lilocꞌotic xa ta mozoil yaꞌel. Yechꞌo un mu xa me xachꞌunic noxtoc ti chacuxiic o ta sbatel osil ti cꞌusi lec chapasic ti avalojique. 
\p  
\v 2 Aꞌyic me li cꞌusi chacalbeique, voꞌon Pabloon. Mi chanopic ti jaꞌ chꞌabal o amulic chayilic Riox mi chavichꞌic circuncisione, jaꞌ mu cꞌu stu chcꞌot ti istoj jmultic ti Cristoe.  
\v 3 Chacalbeic noxtoc. Mi chanopic ti jaꞌ chꞌabal o amulic chayilic Riox mi chavichꞌic circuncisione, persa chachꞌunic scotol li smantaltaque yoꞌ chꞌabal o amulic chayilique.  
\v 4 Ti mi yech chanopique, maꞌuc xchꞌamaloxuc ti Cristoe, yuꞌun chanopic ti jaꞌ chꞌabal o amulic chayilic Riox ti chachꞌunbeic li smantaltaque. Yuꞌun jaꞌ xa mu xachꞌunic ti ta slequil noꞌox yoꞌon ti Rioxe ti chꞌabal amulic chayilique.  
\v 5 Voꞌotic ti jchꞌunojtic ti jaꞌ istoj jmultic ti Cristoe, jaꞌ chiyalbotic ti Chꞌul Espíritue ti chꞌabal jmultic chiyilotic ti Rioxe ti cꞌalal xicꞌototic ta stojole.  
\v 6 Lavi quichꞌojtic ta mucꞌ ti Cristoe, muc ta alel mi quichꞌojtic circuncisión, mi chꞌabal. Li cꞌusi tsots scꞌoplale, jaꞌ ti chicꞌuxubinvanotique, ti chicꞌanvanotique, yoꞌ xvinaj o ti jaꞌ quichꞌojtic ta mucꞌ ti Cajvaltic Jesuse. 
\p  
\v 7 Ti ta baꞌyie lec achꞌunic. Lavie chavat xa avoꞌonic yuꞌunic ti muchꞌutic maꞌuc yech li cꞌusi chalique.  
\v 8 Ti cꞌusi chayalbeique, maꞌuc yech yaloj ti Rioxe. Ti Rioxe layiqꞌuic yoꞌ xacuxiic o yuꞌun ta sbatel osile.  
\v 9 Naꞌic me ti coꞌol xchiꞌuc svuquesobil xchꞌut li pane. Acꞌu mi jsetꞌ xcacꞌtic pero chvuc o xchꞌut scotol li pane. Jaꞌ noꞌox yech, acꞌu mi jun ti muchꞌu ta xchꞌun ti oy cꞌusi yan tscꞌan chꞌunele yoꞌ xacuxiic o ta sbatel osile, cꞌuncꞌun chlic socbe sjol li yane.  
\v 10 Li voꞌone jpatoj coꞌon ti coꞌol quichꞌojtic ta mucꞌ ti Cajvaltic Jesuse, ti mu xchꞌay xavaꞌiic li cꞌusi coꞌol jchꞌunojtique. Yan ti muchꞌu chayaqꞌuic ta at-oꞌone, chichꞌ onox castico, muc ta alel mi ichꞌbil ta mucꞌ, o mi chꞌabal. 
\p  
\v 11 Voꞌotic ti jchiꞌil jbatic ta xchꞌunel li scꞌop Rioxe, oy muchꞌutic chalic ti chcal to ti persa chavichꞌic circuncisione. Ti yechuc chcale, muc muchꞌu chiscrontain ti yechuque, yuꞌun jaꞌ tscꞌanic. Pero lavi chcal ti jaꞌ noꞌox chicuxiotic o ta sbatel osil ti icham ta cruz ta scoj jmultic ti Cristoe, jaꞌ chicrontainat o.  
\v 12 Ti oyuc noꞌox cꞌuxi xchꞌac sbaic loqꞌuel li muchꞌutic chayaqꞌuic ta at-oꞌone, lec biꞌa. 
\p  
\v 13 Voꞌotic ti jchiꞌil jbatic ta xchꞌunel li scꞌop Rioxe, ti layiqꞌuic ti Rioxe, jnaꞌojtic ti loqꞌuemoxuc xa ta mozoil yaꞌele. Ti loqꞌuemoxuc xa ta mozoil yaꞌele, muꞌnuc jaꞌ yoꞌ xapasic o noxtoc li cꞌusitic chopole. Lavi acꞌanoj abaique, coꞌolcoꞌol me xacolta abaic.  
\v 14 Mi chacꞌuxubin achiꞌilic chac cꞌu chaꞌal chacꞌuxubin aba atuquique, yuꞌun achꞌunic xa scotol li smantaltac Rioxe.  
\v 15 Yan mi chasaꞌbe aba amulique, mi chavutilan abaique, qꞌuelo me abaic yuꞌun yicꞌal me xatani o abaic. 
\s1 Jaꞌ liꞌ yaloj ti chopol li cꞌusitic chal coꞌontique, ti lec li cꞌusitic chal ti Chꞌul Espíritue 
\p  
\v 16 Chacalbe avaꞌiic ti jaꞌ chꞌunic cꞌusi chayalbeic ti Chꞌul Espíritue yoꞌ mu xapasic o li cꞌusitic chal avoꞌonique.  
\v 17 Yuꞌun li cꞌusitic chal coꞌontique mu xcoꞌolaj xchiꞌuc ti cꞌusi chal ti Chꞌul Espíritue, yechꞌo ti mu spas cuꞌuntic li cꞌusitic leque ti ta jcꞌan ta jpastique.  
\v 18 Mi jaꞌ chaspꞌijubtasic ti Chꞌul Espíritue, achꞌunic xa scotol li smantaltac Rioxe. 
\p  
\v 19 Ti muchꞌutic jaꞌ noꞌox tspasic li cꞌusitic chal yoꞌonique, lec xvinaj. Tsaꞌ yantsic, tsaꞌ yajmulic, jaꞌ noꞌox ta yoꞌonic li cꞌusitic chopole, mu xqꞌuexavic.  
\v 20 Chichꞌic ta mucꞌ santoetic, ch-ilolajic, chcꞌacꞌal-oꞌontavanic, ch-ilinic, ch-itꞌixajic, chcapanvanic, jaꞌ tscꞌanic ti stuquic noꞌox jun yoꞌonique, ta stsob xchiꞌilic ta xchꞌac sbaic, cꞌusuc noꞌox xchꞌunic.  
\v 21 Chacꞌ o scꞌacꞌal yoꞌonic mi oy cꞌusuc cuꞌuntique, chmilvanic, chyacubic, cꞌusuc noꞌox spasic cꞌalal chyacubique. Chacalbeic noxtoc chac cꞌu chaꞌal lacalbeic xae, ti muchꞌutic jaꞌ yech tspasique, mu xꞌochic yoꞌ bu tspas mantal ti Rioxe. 
\p  
\v 22 Yan mi xchiꞌinojotic ti Chꞌul Espíritue, jcꞌanoj jbatic, jun coꞌontic, mu cꞌusi xal coꞌontic, chcuch cuꞌuntic scotol, lec coꞌontic, chicꞌuxubinvanotic, naca yech li cꞌusi chcaltique.  
\v 23 Mu jtoy jbatic, mu jpastic li cꞌusitic chal coꞌontique. Scotol li cꞌusitic chac taje, muc muchꞌu xuꞌ chal ti mu xuꞌ jpastique.  
\v 24 Voꞌotic ti quichꞌojtic ta mucꞌ ti Cristoe, coꞌol xchiꞌuc icacꞌtic xa ta milel ta cruz yaꞌel li cꞌusitic chal coꞌontique xchiꞌuc li pichꞌ-oꞌone, yuꞌun mu xa jchꞌuntic. 
\p  
\v 25 Ti xchiꞌinojotic xa ti Chꞌul Espíritue, jaꞌ acꞌu jchꞌuntic li cꞌusi lec chile.  
\v 26 Mu me xcaltic ti mu xa muchꞌu xistaotique, mu me xcacꞌbe jbatic scꞌacꞌal coꞌontic, mu me xquitꞌixan jbatic. 
\c 6  
\p  
\v 1 Voꞌotic ti jchiꞌil jbatic ta xchꞌunel li scꞌop Rioxe, mi oy muchꞌu ista smul avilique, voꞌoxuc ti spꞌijubtasojoxuc xa ti Chꞌul Espíritue, cꞌuxubinic. Ti muchꞌu yech yoꞌon chba scꞌopone, tucꞌ me xalbe. Pero acꞌu me sqꞌuel sba uc yoꞌ mu xloꞌloat oe yuꞌun jcotoltic lec chcaꞌitic li cꞌusi chopole.  
\v 2 Mi yech ta jcꞌuxubin jbatique, yuꞌun ijchꞌunbetic xa smantal ti Cristoe. 
\p  
\v 3 Mi oy muchꞌu tsnop ti pꞌije, ti snaꞌ snopele, stuc noꞌox ta sloꞌlo sba.  
\v 4 Jujuntal tscꞌan chavaꞌi abaic mi lec li cꞌusitic chapasique. Mi jaꞌ chaqꞌuelic cꞌusitic tspasic li yane, mu xavaꞌi abaic, lec cꞌusi chapasic ti avalojique. Pero mi lic avaꞌi abaic atuquique, jun avoꞌonic mi avaꞌiic ti lec cꞌusi apasique.  
\v 5 Ti cꞌusitic ta jpastic jujuntale, ta xcom ta jbatic. 
\p  
\v 6 Ti muchꞌutic ta xchanubtasatic ta scꞌop Rioxe, acꞌu yacꞌbeic cꞌusitic ta xtun yuꞌun li yajchanubtasvanejique. 
\p  
\v 7 Mu me xaloꞌlo aba atuquic, yuꞌun mu stacꞌ jloꞌlotic ti Rioxe. Ti cꞌusitic ta jpastique jaꞌ yech chcꞌot jtatic ti cꞌusi orae.  
\v 8 Mi jaꞌ ta jpastic li cꞌusitic lec chcaꞌitique, chopol cꞌusi chcꞌot jtatic, chiꞌochotic ta cꞌocꞌ ta sbatel osil. Yan mi jaꞌ ta jpastic li cꞌusitic lec chil ti Chꞌul Espíritue, lec ti cꞌusi chiyacꞌbotique, chicuxiotic yuꞌun ta sbatel osil.  
\v 9 Yechꞌo un mu me xtavan xcaꞌitic spasel li cꞌusitic leque. Mi mu xtavan xcaꞌitique, ta onox jtatic li cꞌusi leque.  
\v 10 Mi chquiltic ti oy abol sba li crixchanoetique, acꞌu jcꞌuxubintic. Pero jaꞌ más tsots scꞌoplal ti ta jcꞌuxubintic li jchiꞌiltactic ta xchꞌunel li scꞌop Rioxe. 
\s1 Jaꞌ liꞌ yaloj ti más tsots scꞌoplal iyaꞌi ti Pabloe ti chacꞌ ta ichꞌel ta mucꞌ ti Cristoe 
\p  
\v 11 Qꞌuelavilic, mucꞌtic li letra liꞌi, jaꞌ chavilic o ti voꞌon lajtsꞌibabeic li jaychol liꞌi.  
\v 12 Ti muchꞌutic chayalbeic ti persa chavichꞌic circuncisione, jaꞌ ti muchꞌutic tscꞌanic ti lec ch-ileic yuꞌun li yan jchiꞌiltac ta israelale ti mu to ta xchꞌunic li scꞌop Rioxe. Yuꞌun mu scꞌanic crontainel, yechꞌo ti mu jamluc chalic ti jaꞌ chicuxiotic o ta sbatel osil ti icham ta cruz ti Cristoe.  
\v 13 Ti muchꞌutic chalic ti persa chavichꞌic circuncisione, muc bu xchꞌunojic scotol li mantaletique. Jaꞌ noꞌox lec chaꞌiic ti chayacꞌbeic circuncisione yoꞌ xalic o ti svinicoxuc xae.  
\v 14 Li voꞌone muc ta alel mi mu xiꞌichꞌe ta mucꞌ. Jaꞌ noꞌox chcacꞌ ta ichꞌel ta mucꞌ ti Cajvaltic Jesucristoe ti icham ta cruz ta scoj jmultique. Ti jaꞌ noꞌox chcacꞌ ta ichꞌel ta muqꞌue, coꞌol xchiꞌuc chamemon xa yaꞌel yuꞌun mu xa tsotsuc scꞌoplal chcaꞌi li cꞌusitic oy liꞌ ta sba balamile.  
\v 15 Muc ta alel mi quichꞌojtic circuncisión, mi chꞌabal. Jaꞌ tsots scꞌoplal mi lec li coꞌontique.  
\v 16 Acotolic ti jayvoꞌoxuc achꞌunojic chac cꞌu chaꞌal icale, junuc me avoꞌonic, mu me cꞌusi xal avoꞌonic. Yuꞌun chaxcꞌuxubinic ti Rioxe yuꞌun xchꞌamaloxuc xa. 
\p  
\v 17 Lavie mu xa muchꞌu xuꞌ chal ti maꞌuc yajtacbalalon ti Cajvaltique yuꞌun chvinaj ti icacꞌ jvocole, ti limajee. Oy slutꞌumaltac li jpat jxocone. 
\p  
\v 18 Voꞌotic ti jchiꞌil jbatic ta xchꞌunel li scꞌop Rioxe, acꞌu yacꞌboxuc crasia acotolic ti Cajvaltic Jesucristoe.