\id TIT  
\h TITO 
\toc2 TITO 
\toc1 TITO 
\mt1 Tito  
\c 1  
\s1 Ti Pabloe ta stsꞌiba batel scarta ta stojol ti Titoe  
\p
\v 1 Vuꞌun Pabloun, yajꞌabtelun ti Diose. Yajcholcꞌopun ti Jesucristoe. Jaꞌ tacbilun yuꞌun yoꞌ jech ta xquicꞌ talel ta xchꞌunel ti buchꞌutic tꞌujbilic yuꞌun ti Diose, yoꞌ jech ta xojtiquinic ti melel ti cꞌusi jchꞌunojtique,  
\v 2 yoꞌ jech ta spat yoꞌntonic ti ta staic scuxlejalic sbatel osile. Yuꞌun yaloj onoꞌox ti Diose ti ta xacꞌ ti cuxlejale cꞌalal muꞌyuc to ox meltsajem ti banomile. Mu snaꞌ sjut ti Diose.  
\v 3 Avi tana un, ti Diose sta xa yorail ti laj yacꞌ ta aꞌyiel ti scꞌope. Yuꞌun jaꞌ cabtel laj yacꞌbun ti Jcoltavanej Dios cuꞌuntique. Jaꞌ smantal stuc ti vuꞌun ta xcale.  
\v 4 Ta xajtsꞌibabot talel ti jcarta lie, Tito, ti jnichꞌonot ta sventa ti coꞌol jchꞌunojtique. Ta jcꞌan ti acꞌo yacꞌbot ti bendicione, ti acꞌo xcꞌuxubinote, ti acꞌo yacꞌbot jun avoꞌnton ti Jtotic Diose schiꞌuc ti Cajvaltic Jesucristo Jcoltavaneje.   
\s1 Yabtel ti Tito ti ta Cretae  
\p
\v 5 Ti laj quictaot comel tey ta Creta ti joyobtabil ta nabe, yoꞌ jech ta xachapan ti cꞌusi scꞌan to chapanele. Jaꞌ jech xtoc yoꞌ ta xavaꞌan ancianoetic ta jujun tsobobbail ti oy ta jujun jteclume jech chac cꞌu chaꞌal laj calbot avaꞌie.  
\v 6 Ti buchꞌu ta xꞌoch ta ancianoile, jaꞌ ta scꞌan ti lec ta qꞌuelel ti scuxlejale, yoꞌ jech lec ti scꞌoplale, ti jun noꞌox ti yajnile, ti jchꞌunolajeluc ti snichꞌnabe yoꞌ jech mu saꞌbat smul ti ta sbisat ta jbajmantale.  
\v 7 Yuꞌun ti buchꞌu ta xꞌoch ta ancianoile, jaꞌ ta sbain ti cꞌusi jaꞌ yuꞌun ti Diose. Jech o xal un, tsots scꞌoplal ti lecuc ta qꞌuelel ti scuxlejale, ti mu jbeluc ta cꞌope, ti mu toyobbauque, ti maꞌuc jyacubele, ti maꞌuc jsaꞌletoe, ti maꞌuc ti cꞌupijem yoꞌnton yuꞌun ti taqꞌuine.  
\v 8 Jaꞌ ta scꞌan ti oy slequil yoꞌnton ti ta xichꞌ ta mucꞌ ti yuloꞌ ti ta xcꞌot ta snae, ti jaꞌ jun vinic ti lec ti cꞌusi ta spase, ti lec ti snopobil yuꞌune, ti tucꞌ yoꞌntone, ti spajesoj sba ta spasel ti cꞌusi chopole.  
\v 9 Jaꞌ ta scꞌan ti jun yoꞌnton xchꞌunoj ti cꞌu sꞌelan laj yichꞌ chanubtasele yoꞌ jech xuꞌ ta stsatsubtasbe yoꞌnton ti yan ta sventa ti lequil chanubtasele, yoꞌ jech xuꞌ ta stuqꞌuibtas ti buchꞌutic ta xcrontainvanique.   
\p
\v 10 Yuꞌun ep ti buchꞌu ta xcrontainvanique. Pero jaꞌ toj más ti jꞌisraeletic ti muꞌyuc smelol ta xcꞌopojique, ti ta sloꞌlaic ti cristianoetique.  
\v 11 Jaꞌ ta scꞌan pajesel taje. Yuꞌun sbejel ta na xchibajesbe yoꞌnton. Yuꞌun ta xchanubtasvanic ti cꞌusi maꞌuc xa stuqꞌuile. Yuꞌun jaꞌ noꞌox oy ta yoꞌnton ta spasic yaꞌiic ti canal taqꞌuin ta jech yepal noꞌoxe.   
\p
\v 12 Yuꞌun oy jun jꞌalcꞌop ti tey ta Cretae jech laj yalbe scꞌoplal ti schiꞌiltaque: “Ti jcretaetique jutcꞌopetic, muꞌyuc schꞌulelic. Toj chꞌajic, pero toj echꞌem xveꞌic”, xi.  
\v 13 Ti jech laj yal taje, melel onoꞌox. Jech o xal un, tsots xatuqꞌuibtas ta yalbel mantal yoꞌ jech acꞌo xchꞌunic lec ti Cajvaltique.  
\v 14 Jaꞌ jech xtoc yoꞌ jech mu xichꞌbeic ta mucꞌ scꞌopic ti jꞌisraeletic ti snopben noꞌox stuquique, yoꞌ jech mu xichꞌbeic ta mucꞌ smantal ti buchꞌutic svalopatinojic ti melele.   
\p
\v 15 Ti buchꞌu lec ti sjol yoꞌntone, lec ta xil scotol. Yan ti buchꞌu mu xchꞌune, ti mu lecuc ti sjol yoꞌntone, muꞌyuc cꞌusi lec ta xil. Yuꞌun soquem onoꞌox ti sjol yoꞌntone.  
\v 16 Ta xalic ti xojtiquinic ti Diose, pero ta sventa ti cꞌusi ta spasique, tey ta xvinaj ti mu meleluque. Yuꞌun xtiꞌet sjolic, jbajmantaletic, mu xtojobic ta spasel mi jutebuc ti cꞌusi leque.   
\c 2  
\s1 Ti lequil chanubtasele  
\p
\v 1 Ti cꞌusi ta xavale, coꞌoluc me schiꞌuc jech chac cꞌu chaꞌal ta xacꞌ ta naꞌel ti lequil chanubtasele.  
\v 2 Albo yaꞌi ti moletique ti acꞌo yichꞌ sbijilique, ti lecuc ti scꞌoplalique, ti lecuc ta qꞌuelel ti scuxlejalique, ti junuc yoꞌnton xchꞌunojicuc ti Cajvaltique, ti oyuc scꞌuxul yoꞌntonique, ti oyuc smucꞌul stsatsal ti yoꞌntonique.  
\v 3 Jaꞌ jech xtoc, albo yaꞌi ti yayiletique ti lecuc ta qꞌuelel ti scuxlejalique, ti maꞌucuc ti jloꞌiltavanejetique, ti maꞌucuc ti jyacubeletique. Jaꞌ ta scꞌan ti acꞌo yaqꞌuic ta qꞌuelel ti cꞌusi leque.  
\v 4 Yuꞌun jaꞌ yabtelic ti ta xchanubtasic ti tsebal antsetic ta xcꞌuxubinel ti smalalique schiꞌuc ti yolique,  
\v 5 ta spasel ti cꞌusi leque, ti lec ti stalelique, ti ta sventain ti snae, ti oy slequil ti yoꞌntone, ti coꞌoluc yoꞌnton schiꞌuc ti smalale, yoꞌ jech muꞌyuc buchꞌu chopol ta xcꞌopoj ta stojol ti lequil achꞌ cꞌop yuꞌun ti Diose.   
\p
\v 6 Jechuc me xatsatsubtasbe yoꞌntonic xtoc ti querem viniquetique ti tucꞌuc ti sjolique.  
\v 7 Acꞌbo yil ti voꞌote ti lec ta xapas scotole. Cꞌalal ta xachanubtase, ta slequiluc ta yutsiluc avoꞌnton.  
\v 8 Oyuc smelol xtoc ti cꞌusi ta xavale, yoꞌ jech mu xasaꞌbat amul. Jech ti buchꞌu ta xcrontainvane tey ta xqꞌuexav. Yuꞌun mu xuꞌ ta xchopol-cꞌopoj ta atojolic.   
\p
\v 9 Bijubtaso ti mosoviletique ti acꞌo xchꞌunbeic smantal ti yajvalique, ti lecuc ti yoꞌntonique, ti mu ta tacꞌobiluc ta xcꞌopojique.  
\v 10 Albo yaꞌiic ti mu me xꞌelcꞌajique. Acꞌo yaqꞌuic ta ilel ti lec yoꞌntonique, yoꞌ jech ta xqꞌuelbat scotol ti scuxlejalique ti yan yutsil ti chanubtasel yuꞌun ti Jcoltavanej Dios cuꞌuntique.   
\p
\v 11 Yuꞌun ti Diose laj xa yacꞌ ta ilel ti scꞌuxul yoꞌntone, ti jaꞌ scolelic scotol ti cristianoetique.  
\v 12 Ti scꞌuxul yoꞌnton ti Diose jaꞌ ta xischanubtasotic ta yictael ti cꞌusi chopole schiꞌuc ti scꞌupijel oꞌntonal yuꞌun ti sba banomile. Jaꞌ ta xischanubtasotic ti acꞌo ayanuc batel ti lequil cuxlejal liꞌ ta sba banomile yoꞌ jech lec, jun coꞌntontic ta xquichꞌtic ta mucꞌ ti Diose.  
\v 13 Jaꞌ jech xtoc jaꞌ ta xischanubtasotic ti acꞌo jmalatic ti jun mucꞌ ta cꞌacꞌal ti albil onoꞌox scꞌoplale. Yuꞌun jun yutsil ta xtal ti mucꞌul Dios cuꞌuntique schiꞌuc ti Jcoltavanej Jesucristoe.  
\v 14 Yuꞌun ti stuque jaꞌ laj yacꞌ sba ta milel ta jcojtic yoꞌ jech ta scoltaotic loqꞌuel ta stojol ti mulile, yoꞌ jech ta slecubtas ta jꞌechꞌel ti coꞌntontique, yoꞌ jech ta xijcꞌot ta yuꞌun, yoꞌ jech ta xbat coꞌntontic ta spasel ti cꞌusi leque.   
\p
\v 15 Ti vaꞌi sꞌelan laj calbot liꞌe, jaꞌ avabtel ti ta xatsatsubtasbe ta xatuqꞌuibtasbe yoꞌntonic. Jaꞌ me jech xapas yoꞌ jech mu xasbajic.   
\c 3  
\s1 Jech ta scꞌan ta spasic ti jchꞌunolajeletique  
\p
\v 1 Vulesbo ta yoꞌntonic ti jchꞌunolajeletique ti acꞌo yichꞌic ta mucꞌ ti ajvaliletique, ti jꞌopisialetique, ti acꞌo xchꞌunbeic ti smantale, ti chapalicuc ta spasel ti cꞌusiticuc leque.  
\v 2 Mu me buchꞌu xchopol-cꞌoptaic, lamajemuc me ti yoꞌntonique, oyuc me slequilal yoꞌntonic ta stojol ti cristianoetique.   
\p
\v 3 Yuꞌun ta voꞌne ti voꞌotic eque, toj alticotic to ox. Toyobbaotic to ox ta stojol ti Diose. Chꞌayemotic to ox ta be. Ochemotic to ox ta mosovil yuꞌun ti cꞌusi lec ta xaꞌi ti coꞌntontique. Yuꞌun jaꞌ cuxulotic to ox ta spasel ti cꞌusi chopole, ti itꞌix oꞌntone. Yuꞌun soquet to ox ti joltique. Chopol to ox ta xquil jbatic ta jujun talel.  
\v 4 Pero cꞌalal laj yacꞌ ta ilel scꞌuxul yoꞌnton ti Cajvaltic Dios Jcoltavanej ta stojol ti cristianoetique,  
\v 5 tey laj scoltaotic. Pero maꞌuc ta sventa ti oy cꞌusi lec laj jpastique. Yuꞌun jaꞌ noꞌox ti cꞌuxubaj yoꞌnton ta jtojoltique. Laj scoltaotic ta sventa ti laj slecubtasotic ti Chꞌul Espíritue. Yuꞌun laj svoqꞌuesotic ta achꞌ yoꞌ jech achꞌub ti cuxlejale.  
\v 6 Ta sventa ti Jcoltavanej Jesucristoe, mu bisbiluc laj yacꞌbotic ti Schꞌul Espíritu ti Diose,  
\v 7 yoꞌ jech ta sventa scꞌuxul yoꞌnton ti Diose lec ta xijyilotic, yoꞌ jech ta xquichꞌtic ti cuxlejal sbatel osil ti jmalaojtique.   
\p
\v 8 Ti jech taje, melel onoꞌox. Ta jcꞌan ti ta xavacꞌ persa ta yalolanel ti vaꞌi sꞌelan taje, yoꞌ jech ti buchꞌutic ta xchꞌunic ti Diose batuc ta yoꞌntonic ta spasel ti cꞌusi leque. Ti jech taje, toj lec. Yuꞌun jaꞌ ta xtun cuꞌun jcotoltic.  
\v 9 Yan ti voch voch cꞌop ti muꞌyuc smelole, schiꞌuc scꞌoplal ti smolmucꞌtotic ti tey onoꞌox ta xalolanique, schiꞌuc ti ta stsacolan sbaic ta cꞌop ta sventa smantal ti Moisese, mu me xaticꞌ aba tey. Yuꞌun muꞌyuc cꞌusi xtun o. Muꞌyuc smelol.   
\p
\v 10 Mi oy buchꞌu ta spas sba ta chaꞌchꞌac yuꞌun ti jchꞌunolajeletique, albo yaꞌi jun mi chib velta. Mi mu xichꞌ ta mucꞌ ti cꞌusi ta xavalbee, chꞌaco loqꞌuel.  
\v 11 Yuꞌun xanaꞌ lec ti soquem ti sjol ti vinic taje. Jaꞌ jech xtoc ti stuque snaꞌoj lec ti chopol onoꞌox ti cꞌusi ta spase.   
\s1 Ti cꞌusi ta scꞌan stuc ti Pabloe  
\p
\v 12 Cꞌalal tey ta jtac talel ta atojol ti Artemase, mi jaꞌ ti Tíquicoe, acꞌo persa ti cꞌu yepal xuꞌ avuꞌun ti ta xtal aqꞌuelun noꞌox ti ta Nicópolise. Yuꞌun laj xa jnop ti tey ta xꞌechꞌ cuꞌun ti yorail sictique.  
\v 13 Coltao me ti licenciado Zenase ti cꞌu yepal xuꞌ avuꞌune schiꞌuc ti Apolose. Acꞌbo ti cꞌusi ta xtun yuꞌunic ta bee, yoꞌ muꞌyuc palta ta xaꞌiic.  
\v 14 Acꞌo xchanic ti quermanotic ta spasel ti cꞌusi leque, yoꞌ jech ta xcoltavanic ti bu tsots scꞌoplal ta xtune, yoꞌ jech jtunelicuc ti liꞌ cuxulique.   
\s1 Slajeb chabanuc schiꞌuc bendición  
\p
\v 15 Scotol ti cꞌu yepal ti liꞌ jchiꞌinoje, chabanucot xayalbe. Chabanuc xavalbe yaꞌiic ti jchiꞌiltac ti jmoj jchꞌunojtic schiꞌuque. Acꞌo yacꞌboxuc bendición acotolic ti Diose. Jechuc.