\id ROM  
\h ROMANOS 
\toc2 ROMANOS 
\toc1 ROMANOS 
\mt1 Romanos  
\c 1  
\s1 Ti Pabloe ta stac batel scarta ta stojol ti jchꞌunolajeletic ta Romae  
\p
\v 1 Vuꞌun Pabloun, yajꞌabtelun ti Jesucristoe. Laj yicꞌun, laj stꞌujun ti Diose, yoꞌ jech ta xiꞌoch ta yajtacbolal, yoꞌ jech ta xcal batel ti lequil achꞌ cꞌop ti jaꞌ colebale.  
\v 2 Voꞌne yaloj ti Dios ta sventa ti yajꞌalcꞌoptac ti laj stsꞌibaic comele ti ta xcꞌot ta jtojoltic ti lequil achꞌ cꞌope.  
\v 3 Jaꞌ scꞌoplal ti Cajvaltic Jesucristoe, jaꞌ ti Snichꞌon ti Diose. Ti jech snitilul ti ajvalil David ti Cajvaltique, laj yichꞌ sbecꞌtal jech chac cꞌu chaꞌal cristiano.  
\v 4 Pero ivinaj ti muꞌyuc smule, ti jaꞌ Snichꞌon ti mucꞌul Diose, jaꞌ ti ichaꞌcuxie.  
\v 5 Ta sventa ti Jesucristoe, tacbiluncutic yuꞌun ti Diose, yoꞌ jech ta sventa ti Jesucristoe ta staic ti cristianoetic ti oy ta sjoylej ti banomile ti oy buchꞌu ta xchꞌunic ti lequil achꞌ cꞌope.  
\v 6 Ti ta scotolic ti ta xchꞌunic taje, tey oyoxuc ec. Yuꞌun icꞌbiloxuc xa yuꞌun ti Diose, yoꞌ jech ta xacꞌotic ta yuꞌuntac ti Jesucristoe.   
\p
\v 7 Ta jtsꞌibaboxuc ti jcarta liꞌe ti voꞌoxuc nacaloxuc ta Romae, ti cꞌuxubinbiloxuc yuꞌun ti Diose, ti tꞌujbiloxuc yoꞌ jech ta xacomic ta yuꞌuntaque. Ichꞌic ti slequilal yoꞌnton ti Jtotic Diose schiꞌuc ti Cajvaltic Jesucristoe. Ichꞌic xtoc ti jun avoꞌntonique.   
\s1 Ti Pabloe ta scꞌan xbat yaꞌi ta Roma  
\p
\v 8 Ta sventa ti Jesucristoe, baꞌyel ta xcal coliyalbun ti Dios cuꞌune, yuꞌun buꞌyuc noꞌox vinajem acoplalic ti achꞌunojic ti Cajvaltique.  
\v 9 Ti Diose, ti sjunul coꞌnton ta xitun yuꞌun ta yalel ti lequil achꞌ cꞌop yuꞌun ti Snichꞌone, jaꞌ yiloj stuc ti mu xajchꞌayoxuc ta coꞌnton ta scꞌoponel ti Dios ta atojolique.  
\v 10 Ta jcꞌanbe ti Diose ti acꞌo locꞌuc ta yoꞌnton stuc, yoꞌ jech mi oy cꞌusi xcut chtal jqꞌueloxuc.  
\v 11 Yuꞌun oy ta coꞌnton ta jqꞌueloxuc caꞌi yoꞌ jech xuꞌ ta jcoltaoxuc yuꞌun ti scꞌop Diose, yoꞌ jech ta xꞌayan más yip avoꞌntonic.  
\v 12 Ti jech ta xcal taje, yoꞌ jech coꞌol ta jtsatsubtasbe jbatic ti coꞌntontic ta jujun talele jech chac cꞌu chaꞌal jchꞌunoje, jech chac cꞌu chaꞌal achꞌunojique.   
\p
\v 13 Ta jcꞌan ta xanaꞌic, Quermanotac, ti ep ta velta ta jcꞌan xtal jqꞌueloxuc caꞌie. ¡Cꞌu stu un! macalun ta be ta jmec. Ta jcꞌan ta xital caꞌi ta yalel ti scꞌop Dios liꞌ ta atojolique, yoꞌ jech ta xaꞌepajic ta xchꞌunel ti Cajvaltique jech chac cꞌu chaꞌal iꞌepajic cuꞌun ti jyanlumetique.  
\v 14 Yuꞌun jbainoj ta xcaꞌi ta yalel ti lequil achꞌ cꞌop ta stojol ti cristianoetique. Manchuc mi chanubtasbilic, mi muꞌyuc chanubtasbilic, manchuc mi oy sbijilic, mi muꞌyuc sbijilic, acꞌo yaꞌiic scotolic.  
\v 15 Jech o xal un, ta jcꞌan ta xital caꞌi calboxuc avaꞌiic ti lequil achꞌ cꞌop ti jaꞌ colebale, ti voꞌoxuc nacaloxuc ta Romae.   
\s1 Stsatsal smucꞌul ti lequil achꞌ cꞌope  
\p
\v 16 Ti vuꞌune mu xiqꞌuexav ta yalel ti lequil achꞌ cꞌope. Yuꞌun jaꞌ smucꞌul stsatsal ti Diose, yoꞌ jech ta staic scolelic ti buchꞌu ta xchꞌunique, ti jꞌisraeletique schiꞌuc ti jyanlumetique.  
\v 17 Ti lequil achꞌ cꞌope jaꞌ ta xacꞌ ta naꞌel ti cꞌu sꞌelan ta jtatic ti lec xijꞌilatotic yuꞌun ti Diose. Ti lec xijyilotique, jaꞌ noꞌox ta sventa ta jchꞌuntic ti ta xiscoltaotic ti Diose. Yuꞌun jech onoꞌox tsꞌibabil ta scꞌop ti Diose: “Ti buchꞌu lec ta xquile, jaꞌ ti buchꞌu xchꞌunoj ti yajcoltavanejune. Jech ta xcuxi o”, xi ti Diose.   
\s1 Smulic ti cristianoetique  
\p
\v 18 Ti Dios ti oy ta vinajele ta xacꞌ ta ilel ti cꞌu sꞌelan tsots ta xacꞌbe yichꞌ svocolic ti chopol cristianoetic ti muꞌyuc stuqꞌuil ti yoꞌntonique. Ta scoj ti meꞌinem ti mulil ta yoꞌntonique, mu xacꞌ ochuc ta yoꞌntonic ti melele.  
\v 19 Ti cristianoetique snaꞌic lec ti oy jun Diose. Yuꞌun stuc ti Diose ta xacꞌ sba ta ojtiquinel ti cꞌu sꞌelane.  
\v 20 Manchuc mi mu xvinaj ta qꞌuelel ti Diose, pero ta xvinaj ti oye ta sventa ti yabtele. Yuꞌun ti cꞌalal lic meltsajuc talel ti banomile, lec xvinaj ta qꞌuelel ti oy jun Diose, ti oy smucꞌul stsatsal sbatel osile. Jech o xal un, muꞌyuc spacob-cꞌopic ti cristianoetique.  
\v 21 Manchuc mi jaꞌ jech snaꞌic ti oy jun Diose, ¡cꞌu stu un! mu sbisic ta Dios. Mi jaꞌuc ta xalbeic colavalbun ti xiique. Cꞌajomal noꞌox tey ta xbat yoꞌntonic ta snopel ti cꞌusi muꞌyuc stue. Jech o xal un, oyic ta icꞌal osil.  
\v 22 Manchuc mi ta xalic ti bijique, pero joybijemic ta bol cristiano.  
\v 23 Laj sjeltaic ti slequilal yutsilal ti Dios ti mu snaꞌ xchame. Yuꞌun jaꞌ laj sbisic ta Dios slocꞌobbail ti viniquetic ti snaꞌ xchame, schiꞌuc slocꞌobbail ti mutetique, schiꞌuc slocꞌobbail ti chonetique, schiꞌuc slocꞌobbail ti chonetic ti oy chanib yacane.   
\p
\v 24 Jech o xal un, acꞌbat comel ta sbaic yuꞌun ti Dios ta spasel ti sbolil yoꞌntonique. Jech o xal qꞌuexlal sba ti cꞌusitic lic spasbe sbaic ta jujun tale.  
\v 25 Jaꞌ laj sjipic comel ti melel yuꞌun ti Diose. Jaꞌ lec laj yaꞌiic xchꞌunel ti loꞌlaele. Jech o xal tey lic xrioxinic ti cꞌusitic pasbil yuꞌun ti Diose, cꞌalal jaꞌ ta scꞌan lequil ichꞌel ta mucꞌ ti Dios sbatel osile. Jechuc.   
\p
\v 26 Jech o xal un, ti Diose laj yacꞌbe comel ta sbaic ti cꞌusitic qꞌuexlal sba ta spasele. Ti antsetique lic stsacan sba stuquic, cꞌalal ti mu jechuc acꞌbilique.  
\v 27 Jaꞌ jech laj spasic xtoc ti viniquetique. Laj yictaic ta xchiꞌinel ti antse. Yuꞌun jaꞌ toj lec ta xaꞌiic ti ta stsac sbaic ti coꞌol viniquetique. Toj echꞌem qꞌuexlal ti cꞌusitic ta spasbe sbaic ta jujun tale. Ta xilbajinic ti sbecꞌtal stuquique. Ta xacꞌbe sba svocol stuquic ta scoj ti ta syanijes ti cꞌusi leque.   
\p
\v 28 Ti jech mu xa baluc xaꞌi ta snopilanel ti cꞌu sꞌelan stalel ti Dios ta melele, jech o xal tey acꞌbat comel ta sbaic ta snopel ti cꞌusitic toj qꞌuexlale, yoꞌ jech ta spasic ti cꞌusi mu stacꞌ pasele.  
\v 29 Muꞌyuc slequil ti sjolic ta jꞌechꞌele. Yuꞌun noj ta yoꞌntonic ti ta stsacan sbaique, ti bolibemique, ti ta xyuꞌunin yaꞌiic ti maꞌuc yuꞌunique, ti meꞌmuliletique. Jaꞌ yesinojic ti itꞌix oꞌntone, ti ta xmilvane, ti saꞌ letoe, ti loꞌlavaneje, ti tiꞌ oꞌntone, ti loꞌiltavaneje.  
\v 30 Ta xchopol-cꞌoptaic yan. Xtiꞌet sjolic ta stojol ti Diose. Muꞌyuc schꞌulelic. Stuc xa noꞌox jech ta xaꞌi sba. Toyobbaic. Achꞌ cꞌusitic chopol ta xlic snopic. Mu xchꞌunbeic smantal stot smeꞌic.  
\v 31 Mu xaꞌiic albel. Mu xcꞌot xcꞌopojic. Mu snaꞌ xcꞌuxubinvanic. Mu xaqꞌuic perdón. Muꞌyuc scꞌuxul yoꞌntonic.  
\v 32 Manchuc mi snaꞌic lec ti yaloj ti Diose ti buchꞌu jech ta spasic taje, jaꞌ xtun o ti acꞌo chamicuque, pero yacꞌojbe yipal ta spasel ti cꞌusi chopole. Jaꞌ jech xtoc xmuyubajic xa yuꞌun ti buchꞌu jech ta spasic ti chopol taje.   
\c 2  
\s1 Ti Diose tucꞌ ta xchapanvan  
\p
\v 1 Mi oy buchꞌu jech ta xal: “Ep smul taje. Jaꞌ xtun o ti ta onoꞌox xichꞌ castigo”, mi xie, muꞌyuc spacob-cꞌop. Yuꞌun ti jech ta xchapbe smul ti yane, jaꞌ ta xchapbe sba smul stuc. Yuꞌun jech ta spas ec jech chac cꞌu chaꞌal ti buchꞌu ta xchapanbe smule.  
\v 2 Yuꞌun jnaꞌtic lec ti tucꞌ ta xchapanvan ti Diose cꞌalal ta xacꞌbe stoj ti buchꞌu jech ta spasic taje.  
\v 3 Ti voꞌot ti ta xachapbe smul ti yane, ¿mi xavacꞌtouc ta xacol ta chapanel yuꞌun ti Dios cꞌalal coꞌol ta xapasique?  
\v 4 Xuꞌ nan ti mu bal xavaꞌi ti scꞌuxul yoꞌnton ti Diose ti tey stsꞌicojbot amule. ¿Mi mu xanaꞌ ti ta smala ti acꞌo ajelta avoꞌntone, jaꞌ ti ta xichꞌot ta cꞌuxe?  
\v 5 Pero yij avoꞌnton. Mu xacꞌan xavicta ti chopol avoꞌntone. Jech o xal un, atuc ta xacajtsobilan ti acastigoe, yoꞌ jech tsobol xa acastigo ti cꞌalal ta sta yorail ti ta xlequil-chapanvan ti Diose.  
\v 6 Ti cꞌu sꞌelan laj xa jpastic ta jujun tale, jaꞌ jech ta xquichꞌtic stojol yuꞌun ti Diose.  
\v 7 Ta xꞌacꞌbatic scuxlejalic sbatel osil ti buchꞌutic ta spasic ti leque. Yuꞌun ta scꞌan ta staic slequilal ti Diose, schiꞌuc ta scꞌan ta staic ti ichꞌel ta mucꞌ yuꞌun ti Diose, schiꞌuc ta scꞌan ta staic ti cꞌusi mu snaꞌ xlaj sbatel osile.  
\v 8 Pero ta yilal yoꞌnton ti Diose ta xacꞌbe castigo ti buchꞌutic jaꞌ noꞌox ta scꞌanic ti cꞌusi lec ta xaꞌi ti stuquique, ti mu scꞌan xchꞌunic ti melele, ti jaꞌ noꞌox lec ta xaꞌiic ta spasel ti chopole.  
\v 9 Ta staic ti mu xꞌechꞌ xjelav svocol scotolic ti buchꞌutic ta spasic ti chopole, ti jꞌisraeletique schiꞌuc ti jyanlumetique.  
\v 10 Yan ti buchꞌutic ta spasic ti cꞌusi scꞌan yoꞌnton ti Diose, ta xꞌacꞌbatic slequilalic. Ta xꞌacꞌatic ta ichꞌel ta mucꞌ. Ta xꞌacꞌbatic jun yoꞌntonic, ti jꞌisraeletique schiꞌuc ti jyanlumetique.   
\p
\v 11 Yuꞌun ti Diose mu snaꞌ ti jeltos yoꞌnton ta stojol ti cristianoetique.  
\v 12 Ti buchꞌutic ta saꞌ smulic ti muꞌyuc yaꞌbinojic smantal ti Moisese, maꞌuc ta sventa mantal ti jech chꞌayel ta xbatique. Ti buchꞌutic ta saꞌ smulic cꞌalal yaꞌbinojic smantal ti Moisese, ta xichꞌic chapanel yuꞌun ti mantale.  
\v 13 Yuꞌun maꞌuc lec ta xꞌilatic yuꞌun Dios ti buchꞌutic jaꞌ noꞌox ta xaꞌiic ti mantale. Ti buchꞌu ta staic ti lec ta xꞌilat yuꞌun ti Diose, jaꞌ noꞌox ti buchꞌutic ta xchꞌunique.  
\v 14 Pero ti jyanlumetic ti chꞌabal ta scꞌobic ti mantale, pero oy mantal ta stojolic. Yuꞌun tey ta xꞌacꞌbat snaꞌic ta yoꞌntonic ta spasel ti mantale.  
\v 15 Yuꞌun tey ta xvinaj yabtel ti mantal ti oy ta yoꞌntonique. Yuꞌun tey ta xꞌacꞌbat snaꞌ ta sjol ta yoꞌntonic mi lec ti cꞌusi ta spase, mi ta sta smul yuꞌun ti cꞌusi ta snope.  
\v 16 Ti scꞌacꞌalil ti ta xchapanvan ti Diose, ta sventa ti Jesucristoe tey ta xvinaj scotol ti cꞌusitic snopojic ta mucul ti cristianoetique. Jech ta xal xtoc ti lequil achꞌ cꞌop ti vuꞌun ta xcale.   
\s1 Ti jꞌisraeletique oy ta scꞌobic smantal ti Moisese  
\p
\v 17 Ta xaval ti jꞌisraelote. Ta xanop ti lec xavil abaic schiꞌuc ti Diose, yuꞌun yacꞌojbot ti smantale. Jech o xal un, atoyoj aba ti lec xavil abaic schiꞌuc ti Dios avaloje.  
\v 18 Ta xaval ti ta xanaꞌ cꞌusi ta scꞌan yoꞌnton ti Diose. Yuꞌun ti mantale ta xacꞌ anaꞌ stꞌujel ti cꞌusi lec avaloje.  
\v 19 Atoyoj aba ti xanaꞌ lec snitel batel ti maꞌsate. Xanaꞌ lec sjapbel stoj ti buchꞌu ta xanav ta icꞌal osil ti avaloje.  
\v 20 Avaloj ti xuꞌ avuꞌun ta stojobtasel ti buchꞌutic muꞌyuc sbijilique, ti xuꞌ avuꞌun ta sbijubtasel ti ololetic sꞌelane. Yuꞌun ta sventa ti mantale, ta xanop ti chanubtasbilot, bijubtasbilot yuꞌun ti melele.  
\v 21 Ti jech ta xachanubtas ti yane, ¿cꞌu chaꞌal mu xachanubtas aba atuc? Ti voꞌote ta xachanubtasvan: “Mu stacꞌ xaꞌelcꞌaj”, xachi. ¿Cꞌu chaꞌal ti voꞌot cajal ta xaꞌelcꞌaje?  
\v 22 “Mu xamulivajic”, xachi. ¿Cꞌu chaꞌal ta xamulivaj ti voꞌote? Ti voꞌote xtiꞌet ajol yuꞌun ti cꞌusi meltsanbil ta cꞌabale. ¿Cꞌu chaꞌal ta xavelcꞌanbe ti scꞌulejal ta schꞌul naique?  
\v 23 Atoyoj aba yuꞌun smantal ti Diose. Pero ta xabaj ti Dios ti jech mu xachꞌunbe ti smantale.  
\v 24 Jech o xal oy smelol ti jech ta xal ti scꞌop Diose: “Ta acojic voꞌoxuc ti chopol ta xcꞌopojic ta stojol Dios ti jyanlumetique”, xi.   
\p
\v 25 Ti jech acꞌbilot ti circuncisione, melel ta xtun avuꞌun ti mi ta xachꞌunbe smantal ti Moisese. Pero ti mi mu xachꞌunbe smantal ti Moisese, coꞌol sꞌelan ti muꞌyuc avichꞌoj ti circuncisione.  
\v 26 Yan ti buchꞌu muꞌyuc yichꞌoj ti circuncisione, pero ti mi ta xchꞌun ti mantale, coꞌol sꞌelan yichꞌoj ti circuncisione acꞌo mi muꞌyuc yichꞌoj.  
\v 27 Ti buchꞌu muꞌyuc yichꞌoj ti circuncisión ta sbecꞌtale, pero ti mi ta xchꞌun ti mantale: “Maꞌuc jchꞌunej mantal leꞌe”, xi acꞌoplal yuꞌun, acꞌo mi oy ta acꞌob ti mantale, acꞌo mi avichꞌoj ti circuncisione.  
\v 28 Ti jech jꞌisraele, maꞌuc noꞌox ta spat xocon. Maꞌuc noꞌox ti jech yichꞌoj ti circuncisión ta sbecꞌtale.  
\v 29 Ti jech batsꞌi jꞌisraele, jaꞌ ti buchꞌu ta xꞌabtej ti Dios ta yoꞌntone. Ti batsꞌi circuncisión ti yichꞌoje, maꞌuc ti spat xocone. Jaꞌ ti lecubtasbil xa ti yut yoꞌntone. Ti jech taje, maꞌuc ta sventa ti mantaletique. Jaꞌ yabtel ti Chꞌul Espíritue. Ti buchꞌu jech taje, maꞌuc ta sta ti lec ta xꞌilat yuꞌun ti cristianoetique. Jaꞌ ta sta ti lec ta xꞌilat yuꞌun ti Diose.   
\c 3  
\p
\v 1 ¿Cꞌusi bal o ti jech jꞌisraeletic un chaꞌe? ¿Cꞌusi xtun o ti yichꞌoj circuncisión un chaꞌe?  
\v 2 Ta xtun. Ep scꞌoplal. Ti june, jaꞌ ti Diose laj yacꞌbe sventainic ti schꞌul cꞌope.  
\v 3 Pero, ¿cꞌusi ta xcꞌot ta pasel ti mi oy jlom ti mu xa junuc ti yoꞌntonic ta stojol ti Diose? ¿Mi yanij xa yoꞌnton ti Dios xanaꞌique?  
\v 4 Moꞌoj, ti Diose ta onoꞌox spas scotol ti cꞌusi lec ta xile manchuc mi jutcꞌop scotol ti cristianoetique. Yuꞌun jech ta xal ti scꞌop Diose:  
\q1 Ta xvinaj onoꞌox ti tucꞌ scotol ti cꞌusi ta xavale.  
\q1 Mu xuꞌ ta staic amul ti cristianoetic ti cꞌalal ta xavichꞌ chapanele,  
\m xi.  
\v 5 Yuꞌun oy bu ta xalic jlom ti jaꞌ la más ta xvinaj slequilal yoꞌnton Dios ti jech ta jsaꞌ jmultique. ¿Cꞌusi ta xcaltic yuꞌun taje? Ati jechuque, ti cꞌalal ta xacꞌ castigo yuꞌun ti jmultique, ¿mi yuꞌun maꞌuc lequil Dios un chaꞌe?  
\v 6 ¡Bu xata ti chopol ti Diose! Ti yuꞌunuc chopoluc ti Dios ti ta xacꞌbe castigo ti buchꞌu chopole, ¿cꞌusi xut ta xchapan ti cristianoetic ti oyic ta sjoylej banomile?  
\v 7 Ti jechuc ta melel ti más to ta xvinaj stuqꞌuilal yoꞌnton ti Dios ti jech ta juttic ti cꞌope, ¿cꞌu chaꞌal ta xiyalbun ti jsaꞌmulilune?  
\v 8 Ti jechuc ta melele, laꞌ jpastic ti cꞌusi chopole, yoꞌ jech ta jtatic ti leque. Ati jech taje, yuꞌun oy jlom cristianoetic ti ta soquemal yoꞌntonic ta xalic ti jech ta xichanubtasvancutique. Pero ti buchꞌutic jech ta xalique, jaꞌ xtunic o ti batuc ta chꞌayele.   
\s1 Jcotoltic oy jmultic  
\p
\v 9 ¿Cꞌuxi xanaꞌic? ¿Mi más lec oyotic ti voꞌotic jꞌisraelotique? ¿Mi mu sta ti yane? Mu jechuc, yuꞌun laj xa cacꞌ anaꞌic ti jcotoltic pasbilotic ta mantal yuꞌun ti mulile.  
\v 10 Yuꞌun jech ta xal ti scꞌop Diose:  
\q1 Muꞌyuc buchꞌu lec, mi jaꞌuc junuc.   
\q1
\v 11 Muꞌyuc buchꞌu xaꞌi albel. Muꞌyuc buchꞌu junucal ta scꞌan ti ta saꞌ ti Diose.   
\q1
\v 12 Scotolic chꞌayemic ta be. Scotolic sbelel chꞌayel sqꞌuelojic.  
\q1 Muꞌyuc buchꞌu junucal ti oy cꞌusi lec ta spase.   
\q1
\v 13 Ti yeique jech jomol jech chac cꞌu chaꞌal stiꞌ smuquinal ti animae.  
\q1 Ta xloꞌlavanic schiꞌuc ti yeique. Ti yoqꞌuique coꞌol sꞌelan svenenoal chon.   
\q1
\v 14 Chopol ti cꞌusitic ta xlocꞌ ta yeique. Mu tsꞌicbaj ti cꞌusi ta xalique.   
\q1
\v 15 Xbitetic ta anil ta xmilvanic.   
\q1
\v 16 Scotol ti cꞌusi ta spasique ta soquesvan.   
\q1
\v 17 Mu snaꞌic ti bu ta jtatic ti jun coꞌntontique.   
\q1
\v 18 Mi jaꞌuc juteb ta snopic ti ta xiꞌtaic ti Diose,  
\m xi ti scꞌop Diose.   
\p
\v 19 Jnaꞌtic ti jech ta xꞌalbatic ti buchꞌutic oy ta yoc ta scꞌobic ti voꞌne mantale, yoꞌ jech jcotoltic macal ti quetic ta xijcꞌot ta stojol ti Diose. Jaꞌ ti oy jmultic jcotoltique.  
\v 20 Jech o xal un, muꞌyuc buchꞌu junucal ta staic ti lec ta xꞌilatic yuꞌun ti Dios ta sventa ti mantale. Ti mantale, cꞌajomal noꞌox ta xtun ti ta xacꞌbotic jnaꞌtic ti jsaꞌmulilotique.   
\s1 Ta xijcolotic ta sventa ti ta jchꞌuntique  
\p
\v 21 Avi tana un, laj xa yacꞌbotic jnaꞌtic ti Diose ti cꞌu sꞌelan ta jtatic ti lec xijꞌilatotic yuꞌune. Pero maꞌuc ta sventa ti mantale. Ti cꞌu sꞌelan ta jtatic ti lec xijꞌilatotic yuꞌun ti Diose, tey tsꞌibabil ta slibro ti Moisese schiꞌuc ti jꞌalcꞌopetique.  
\v 22 Ti jech ta jtatic ti lec xijꞌilatotic yuꞌun ti Diose, jaꞌ ta sventa ti ta jchꞌuntic ti Jesucristoe. Jech ta spas ti Dios ta stojol scotol ti cristianoetique, jaꞌ ti mu jeltosuc ti yoꞌntone.  
\v 23 Yuꞌun scotolic jsaꞌmuliletic. Nom oyic ta stojol ti Jcoltavanej Diose.  
\v 24 Manchuc mi jaꞌ jech stalelic, pero ta sventa ti scꞌuxul yoꞌnton ti Diose, jech o xal un, ta matanal laj staic ti lec xꞌilatique. Yuꞌun laj xa staic coltael ta sventa ti Cristo Jesuse.  
\v 25 Jaꞌ yuꞌun un, ti Diose laj yacꞌ ta milel ti Cristoe. Jaꞌ itun ta stojol ti smulique, yoꞌ jech ta staic perdón ti mi ta xchꞌunique. Jaꞌ jech laj spas ti Diose, yoꞌ jech ta xvinaj ti oy slequilal yoꞌntone. Yuꞌun avi tana ti Diose laj xa yacꞌbe perdón ti cristianoetic ti voꞌne stsꞌicojbe talel ti smulique.  
\v 26 Jaꞌ jech laj spas ti Diose, yoꞌ jech ta xvinaj ta ora ti oy slequilal yoꞌntone cꞌalal ta jtatic ti lec xijꞌilatotic yuꞌun ta sventa ti ta jchꞌuntic ti Jesuse.   
\p
\v 27 Ta ora liꞌe, mu xuꞌ ta jtoy jbatic. ¿Cꞌu chaꞌal? Yuꞌun ti tauc jcolta jba jtuctic ta sventa laj jchꞌuntic ti mantale, ta nan jtoy jbatic ti jechuque. Pero ta sventa ti ta jchꞌuntic ti Cajvaltic yoꞌ jech ta xijcolotique, mu xuꞌ ta jtoy jbatic.  
\v 28 Avi tana jnaꞌtic lec ti laj xa staic ti cristianoetic ti lec xꞌilatic yuꞌun ti Dios ta sventa ta xchꞌunic ti Jesucristoe. Maꞌuc ta sventa ti ta spasic ti cꞌusi ta xal ti mantale.   
\p
\v 29 ¿Mi yuꞌun jaꞌ noꞌox Dios yuꞌunic ti jꞌisraeletique? ¿Mi yuꞌun mu jaꞌuc Dios yuꞌunic ti jyanlumetique? Jaꞌ Dios yuꞌunic ec.  
\v 30 Yuꞌun jun noꞌox ti Diose. Yuꞌun stuc ti Diose ta xal ti lec ta xquil jbatic schiꞌuc ta sventa jchꞌunojtic ti Jesucristoe. Muꞌyuc ta alel mi quichꞌojtic ti circuncisione, o mi muꞌyuc.  
\v 31 Ti jech ta jchꞌuntic ti Jesucristo yoꞌ lec xijꞌilatotic yuꞌun ti Diose, ¿mi jaꞌ ta jchꞌaybetic scꞌoplal ti mantal xanaꞌique? Mu jechuc. Yuꞌun jaꞌ to jech ta xcꞌot ta pasel cuꞌuntic ti cꞌusi ta xal ti mantale.   
\c 4  
\s1 Ti cꞌu sꞌelan laj spas ti Abrahame  
\p
\v 1 ¿Cꞌu sꞌelan laj sta coltael ti jmolmucꞌtotic Abraham un chaꞌe?  
\v 2 Ati lajuc sta ti lec xꞌilat yuꞌun Dios ta sventa ti cꞌusi laj spas talele, xuꞌ ta stoy sba. Pero leꞌe, mu xuꞌ stoy sba ta stojol ti Diose.  
\v 3 Yuꞌun jech tsꞌibabil scꞌoplal ti ta scꞌop Diose: “Ti Abrahame laj xchꞌun ti Diose. Ti jech xchꞌunoje, lec iꞌilat yuꞌun ti Diose”, xi.  
\v 4 Lec oy, ti mi ta xꞌabtej ti jun vinique, mu yuꞌunuc qꞌuelanbiluc ti ta xichꞌ ti stojole. Yuꞌun jaꞌ stojol ti yabtele.  
\v 5 Buchꞌuuc noꞌox ti muꞌyuc ta spas ti yabtele, ti jaꞌ noꞌox ta xchꞌun ti muꞌyuc smul ta xꞌilat yuꞌun ti Diose, jech laj xa sta ti lec ta xꞌilat yuꞌun ti Diose.  
\v 6 Jaꞌ jech xtoc ti Davide laj onoꞌox yal ti xmuyubaj noꞌox ti buchꞌu ti ta sta ti lec xꞌilat yuꞌun ti Diose, ti maꞌuc ichꞌbil ta venta ti cꞌusi laj spase.  
\v 7 Jech laj yal ti Davide:  
\q1 Xmuyubajic xa ti buchꞌu ti iꞌacꞌbatic perdón yuꞌun ti schopolalique, ti chꞌaybatic ti smulic yuꞌun ti Diose.   
\q1
\v 8 Yan noꞌox yutsil ti vinic cꞌalal ti muꞌyuc qꞌuelbil smul yuꞌun ti Cajvaltique,  
\m xi ti Davide.  
\v 9 Ti jech xmuyubajic taje, ¿mi jaꞌ noꞌox ta staic ti buchꞌu yichꞌoj ti circuncisione? ¿Mi ta staic xtoc ti buchꞌu muꞌyuc yichꞌoje? Laj xa calcutic avaꞌiic, ti Diose lec laj yil ti Abraham ta sventa ti laj xchꞌun ti cꞌusi laj yal ti Diose.  
\v 10 Cꞌalal jech laj sta ti Abraham ti lec xꞌilat yuꞌun ti Diose, ¿mi jaꞌ o cꞌalal laj yichꞌ ti circuncisione, o mi muꞌyuc to ox? Muꞌyuc to ox.  
\v 11 Tsꞌacal to un, ti Abrahame laj yichꞌ ti circuncisione, señail ti laj xa sta ti lec xꞌilat yuꞌun ti Dios ta sventa ti laj xchꞌunbe ti scꞌope. Jaꞌ jech ti Abrahame icꞌot ta totil yuꞌunic ti buchꞌutic ta xchꞌunic ti Diose manchuc mi muꞌyuc yichꞌojic ti circuncisione. Jaꞌ jech ti Diose lec ta xil xtoc ti cristianoetic taje.  
\v 12 Melel, ti Abrahame jaꞌ totil yuꞌunic ti buchꞌutic yichꞌojic ti circuncisione. Pero jech xtoc jaꞌ totil yuꞌunic ti buchꞌutic ti jech ta xchꞌunic jech chac cꞌu chaꞌal xchꞌunoj ti Abraham ti cꞌalal muꞌyuc to ox yichꞌoj ti circuncisione.   
\s1 Ti cꞌusi albil ti Abrahame cꞌot xa ta pasel ta sventa ti laj xchꞌune  
\p
\v 13 Ti Abrahame iꞌalbat onoꞌox yuꞌun ti Diose ti ta xꞌacꞌbat sventain ti banomile schiꞌuc ti snitilultaque. Ti jech iꞌalbat ti Abrahame, maꞌuc ta sventa ti laj spas ti laj xchꞌun ti mantale. Yuꞌun laj xchꞌun ti jaꞌ noꞌox ta xcoltaat yuꞌun ti Diose. Jech o xal jech laj sta ti lec iꞌilat yuꞌun ti Diose.  
\v 14 Yan ti mi jaꞌ noꞌox ta staic ti lec xꞌilat yuꞌun Dios ti buchꞌutic ta spasic ti mantale, jaꞌ yuꞌun umbi, muꞌyuc cꞌusi xtun o ti jech ta jchꞌuntic ti oy cꞌusi yaloj ti Dios ti ta xaqꞌue. Chꞌay scꞌoplal.  
\v 15 Yuꞌun ti mantale jaꞌ noꞌox ta xichꞌ talel castigo. Pero ti bu muꞌyuc ti mantale, jaꞌ noꞌox jech xtoc muꞌyuc jmultic ta stojol ti mantale.   
\p
\v 16 Jech o xal, yoꞌ jech ta staic ti Abrahame schiꞌuc ti snitilultac ti cꞌusi yaloj ti Dios ti ta xaqꞌue, ta matanal ta staic ta sventa ti ta xchꞌunique. Jech o xal un, ti cꞌusi yaloj ti Dios ti ta xaqꞌue, maꞌuc noꞌox ta staic ti buchꞌutic ta xchꞌunic ti mantale. Jaꞌ jech ta staic ti buchꞌutic ta xchꞌunic jech chac cꞌu chaꞌal laj xchꞌun ti Abrahame. Jech o xal un, jaꞌ icom ta totil cuꞌuntic jcotoltic.  
\v 17 Ta sba ta sat ti Diose, jaꞌ totil cuꞌuntic ti Abrahame, jaꞌ ti laj xchꞌun ti Diose. Yuꞌun jech ta xal ti tsꞌibabil ta scꞌop Diose: “Laj xa cacꞌot ta totil yuꞌun epal cristianoetic”, xi. Yuꞌun ti Diose ta xacꞌbe scuxlejal ti animaetique. Jaꞌ jech xtoc xuꞌ ta xacꞌ ta ilel ti cꞌusi chꞌabal toe.  
\v 18 Acꞌo mi laj yaꞌi ti Abraham ti muꞌyuc spatobil ti yoꞌntone, pero laj sta ti spatobil yoꞌntone. Yuꞌun laj xchꞌun ti jech ta xcꞌot ta “totil yuꞌun epal cristianoetic”, jech cha cꞌu chaꞌal iꞌalbat yuꞌun ti Diose: “Jaꞌ jech yepal ta xbat anitilultac jech chac cꞌu chaꞌal leꞌe”, ti xꞌutate.  
\v 19 Ti Abrahame mol xa. Jutuc xa scꞌan voꞌvinic (100) jabil ti yichꞌoje. Manchuc mi laj yal ta yoꞌnton ti coꞌol sꞌelan chamemic xa schiꞌuc ti yajnile, ti muꞌyuc xa ta xꞌalaj xnichꞌnajique, pero muꞌyuc onoꞌox bu xchꞌay ta yoꞌnton, staoj yav xchꞌunoj ti ta xꞌacꞌbat snichꞌon yuꞌun ti Diose.  
\v 20 Jech o xal un, ti Abrahame mu teyuc xnaꞌet, mi jaꞌuc ichibaj yuꞌun ti cꞌusi iꞌalbat yuꞌun ti Diose. Más to laj spat yoꞌnton ta sventa ti laj xchꞌun ti Diose. Jech o xal un, laj yalbe slequilal ti Diose.  
\v 21 Laj xchꞌun ti xuꞌ yuꞌun ta spas ti Dios ti cꞌusi yaloje.  
\v 22 Ti jech laj xchꞌune, jech o xal laj sta ti lec iꞌilat yuꞌun ti Diose.   
\p
\v 23 Pero maꞌuc noꞌox scꞌoplal ti Abraham ti jech tsꞌibabil ti laj sta ti lec iꞌilat yuꞌun ti Dios ta sventa ti laj xchꞌune.  
\v 24 Jaꞌ jech ti jcꞌoplaltic eque. Lec xijꞌilatotic yuꞌun ti Dios ta sventa ti ta jchꞌuntic ti Buchꞌu laj xchaꞌcuxes ti Jesuse, jaꞌ ti Cajvaltique.  
\v 25 Yuꞌun ti stuque iꞌacꞌat ta milel ta scoj ti jmultique. Pero ichaꞌcuxesat yoꞌ jech ta jtatic ti lec xijꞌilatotic yuꞌun ti Diose.   
\c 5  
\s1 Jech laj jtatic ta sventa ti lec xijꞌilatotic yuꞌun ti Diose  
\p
\v 1 Jech o xal un, ti jech laj jtatic ti lec xijꞌilatotic yuꞌun ti Dios ta sventa ti laj jchꞌuntique, jun coꞌntontic schiꞌuc ti Dios ta sventa ti Cajvaltic Jesucristoe.  
\v 2 Yuꞌun ta sventa ti laj jchꞌuntic ti Cristoe, laj jtatic ti lec oyotic ta stojol ti Diose. Jech o xal xijmuyubajotic xa ta jpat coꞌntontic ti ta jchiꞌintic ta lequilal ti Diose.  
\v 3 Pero maꞌuc noꞌox ti xijmuyubajotic yuꞌun taje. Jaꞌ jech xtoc xijmuyubajotic yuꞌun ti vocole. Yuꞌun ti vocole, jnaꞌtic ti ta xacꞌ smucꞌul coꞌntontique.  
\v 4 Cꞌalal jech ta jtatic ti smucꞌul coꞌntontique, jaꞌ tey ta xꞌayan talel ti ta xcuch cuꞌuntic ti vocole. Cꞌalal jech ta xcuch cuꞌuntic ti vocole, jpatoj coꞌntontic ti ta xba jchiꞌintic ti Diose.  
\v 5 Ti jech jpatoj coꞌntontique, jech o xal un, mu xloꞌilaj ti coꞌntontique. Yuꞌun ta xcaꞌitic ta coꞌntontic ti scꞌuxul yoꞌnton ti Diose ta sventa ti Chꞌul Espíritu ti laj xa yacꞌbotique.  
\v 6 Cꞌalal mu xa xuꞌ jcolta jba jtuctique, jaꞌ o yorail tal chamuc ti Cristo ta scoj ti jsaꞌmuliletique.  
\v 7 Vocol ti oy buchꞌu ta xacꞌ sba ta milel ta sventa yan manchuc mi jaꞌ jun lequil vinic. Jaꞌ xa noꞌox mi toj lec ti vinic ti buchꞌu ta xchame, xuꞌ nan ta xacꞌ sba ta milel yuꞌun.  
\v 8 Pero ti Diose laj yacꞌ ta ilel ti scꞌuxul yoꞌntone. Jaꞌ ti laj yacꞌ ta milel ti Cristo ta jcojtic cꞌalal jsaꞌmulilotique.  
\v 9 Avi tana un, laj xa jtatic ti lec xijꞌilatotic yuꞌun ti Dios ta sventa ti icham ti Jesucristoe. Jech o xal un, razon ti mu xba quichꞌtic castigo ta sventa stuc ti ta slajeb cꞌacꞌale.  
\v 10 Cꞌalal jech yajcrontaotic to ox ti Diose, laj jtatic ti jun coꞌntontic schiꞌuc ta sventa ti jech icham ti Snichꞌone. Jech o xal un, razon ti ta xijcolotic ti jech oy scuxlejal ta jtojoltique, jaꞌ ti jun xa coꞌntontic schiꞌuque.  
\v 11 Maꞌuc noꞌox ti jech yepal taje. Jaꞌ jech xtoc ta sventa ti Cristoe xijmuyubajotic xa ta stojol ti Diose. Yuꞌun jaꞌ ta sventa laj jtatic ti jun coꞌntontic schiꞌuc ti Diose.   
\s1 Scꞌoplal ti Adane schiꞌuc ti Cristoe  
\p
\v 12 Ti jech ilic ti mulil liꞌ ta sba banomile, ilic ta scoj jun vinic. Jech o xal un, ta xijchamotic, jaꞌ ti voꞌotic jsaꞌmulilotique.  
\v 13 Cꞌalal chꞌabal to ox ti mantale, pero oy xa onoꞌox ti mulil liꞌ ta sba banomile. Ti jech muꞌyuc to ox ti mantale, jech o xal muꞌyuc qꞌuelbat smulic ti cristianoetic yuꞌun ti Diose.  
\v 14 Manchuc mi jaꞌ jech un, pero chamic onoꞌox talel ti cristianoetic cꞌalal cuxul ti Adane, icꞌot cꞌalal to ti Moisese ta scoj ti laj saꞌ smulique. Ti smulic ti cristianoetic taje, maꞌuc ta scoj ti laj sbajic ti jun mantal jech chac cꞌu chaꞌal laj spas ti Adane. Ti Adane jaꞌ svinajeb ti oy onoꞌox Buchꞌu ta xtale.   
\p
\v 15 Ti jech laj sta smul ti Adane, mu xcoꞌolaj schiꞌuc ti matanal ti ta xacꞌbotic ti Diose. Yuꞌun ti jech laj sta smul ti jun vinique, toj ep ichamic talel ti cristianoetique. Pero ti colebal ti ta matanal ti ta xacꞌ ti Dios ta sventa ti Jesucristoe, jelavem yutsil. Jaꞌ sventa slequilal scotolic.  
\v 16 Ti jech laj sta smul ti jun vinique, mu xcoꞌolaj schiꞌuc ti colebal ti ta xacꞌ ti Diose. Yuꞌun ta scoj ti laj sbaj jbel mantal ti jun vinique, jcotoltic laj jtatic chapanel, ta jtojtic ti jmultique. Pero ti jcoltaeltic ti laj yacꞌbotic ti Diose, matanal ti lec xꞌilatic ti cristianoetic yuꞌun ti Diose manchuc mi mu albajuc laj xa saꞌic ti smulique.  
\v 17 Ta scoj ti jech laj sta smul ti jun vinique, oy yip ti mulil ti ta xijchamotic yuꞌune. Ti mi jaꞌ jech taje, jech o xal un, más to oy smelol ti ta sventa ti jun vinic Jesucristoe ta jtatic ti achꞌ jcuxlejaltic ti voꞌotic ti ta matanal ti lec xijꞌilatotic yuꞌun Dios ta sventa ti Jesucristoe.   
\p
\v 18 Ti jech laj sta smul ti jun vinic Adane, jcotoltic ta jtatic chapanel ti ta jtojtic ti jmultique. Pero ta sventa ti icham ta jcojtic ti Jesucristoe, jcotoltic ta jtatic ti muꞌyuc ti chapanele, ti mu ta jtojtic ti jmultique.  
\v 19 Ta scoj ti jun vinic ti laj sbaj ti jbel mantale, jaꞌ yuꞌun un, scotol ti cristianoetique jsaꞌmulil icꞌotic. Jaꞌ onoꞌox jech xtoc, ta sventa ti jun jchꞌunej mantal vinique, jech o xal un, ep cristianoetic ta staic ti lec xꞌilatic yuꞌun ti Diose.   
\p
\v 20 Tal ti mantal ta jtojoltique yoꞌ ta svinajesbotic ti mu noꞌox albajuc ti jmultique. Ti jech ti mu noꞌox albajuc ti jmultique, pero jaꞌ ijelav ti scꞌuxul yoꞌnton Dios ta jtojoltique.  
\v 21 Ti jech oy yip ti mulil ti chꞌayel ta xijbatotic yuꞌune, jaꞌ jech xtoc ti jech lec xijꞌilatotic yuꞌun ti Diose, oy yip ti ta slequil yoꞌnton ta xijyacꞌbotic jcuxlejaltic sbatel osil ta sventa ti Cajvaltic Jesucristoe.   
\c 6  
\s1 Chamemotic ta scoj ti mulile, pero cuxulotic ta sventa ti Cristoe  
\p
\v 1 ¿Cꞌusi ta xcaltic un chaꞌe? ¿Mi jaꞌ lec ta xcacꞌbetic yipal ta saꞌel ti jmultique, yoꞌ jech más to ta jtatic cꞌuxubinel yuꞌun ti Diose?  
\v 2 ¡Bu xata ti jaꞌ jeche! Yuꞌun ti voꞌotique chamemotic yuꞌun ti mulile. Jech o xal un, maꞌuc xa smelol ti jech staoj yav ti ta jsaꞌolantic ti jmultique.  
\v 3 ¿Mi mu xanaꞌic ti cꞌalal laj quichꞌtic voꞌ ta sventa ti Jesucristoe, tey jmoj lijchamotic schiꞌuc?  
\v 4 Jaꞌ yuꞌun un, ti cꞌalal laj quichꞌtic ti voꞌe, jmoj tey lijchamotic lijmucatotic schiꞌuc ti Cristoe, yoꞌ jech ta jtamtic o batel ti achꞌ cuxlejale jech chac cꞌu chaꞌal ti Cristoe ti ichaꞌcuxesat yuꞌun ti Dios ta sventa ti smucꞌul stsatsale.   
\p
\v 5 Yuꞌun ti mi ta jchꞌuntic ti licham jech chac cꞌu chaꞌal icham ti Cristoe, jaꞌ jech ta xquichꞌtic jcuxlejaltic jech chac cꞌu chaꞌal laj yichꞌ ti stuque.  
\v 6 Ti jtaleltique, jnaꞌtic lec ti tey jipil ta cruz icham schiꞌuc ti Cristoe, yoꞌ jech acꞌo lilijuc yip ti jtaleltic ti jech jsaꞌmulilotique, yoꞌ jech mu staojuc yav ta xispasotic ta mantal, ta xismovinotic ti mulile.  
\v 7 Yuꞌun ti buchꞌu icham xae, icol xa loqꞌuel ta stojol ti mulile.  
\v 8 Ti mi jmoj lijchamotic schiꞌuc ti Cristoe, jech o xal jpatoj coꞌntontic ti jmoj ta xijcuxiotic schiꞌuque.  
\v 9 Yuꞌun jnaꞌtic lec ta sventa ti jꞌechꞌel ichaꞌcuxi ti Cristoe, mu xa ta xcham yan velta. Yuꞌun laj xa scꞌoplal ti ta to xcham yan veltae.  
\v 10 Ti jech icham ti Cristoe, jun noꞌox velta icham ta scoj ti mulile. Ti jech ichaꞌcuxie, tey cuxul ta stojol ti Diose.  
\v 11 Jaꞌ jech ti voꞌoxuc eque, ventainic ti jech chamemoxuc xa ta stojol ti mulile. Yuꞌun cuxuloxuc ta stojol ti Diose ta sventa ti jech junoxuc xa schiꞌuc ti Cristo Jesús ti Cajvaltic cuꞌuntique.   
\p
\v 12 Jech o xal un, ti voꞌoxuque mu xa xavacꞌ abaic ta tsalel yuꞌun ti mulile, yoꞌ jech mu ta xapasic ti cꞌusi ta scꞌan ti abecꞌtalic ti snaꞌ xchame.  
\v 13 Mu xavaqꞌuic ta tunesel ti abecꞌtalic ta spasel ti chopole. Jaꞌ lec, acꞌo abaic ta tunel yuꞌun ti Diose. Yuꞌun chaꞌcuxiemoxuc xa ti chamemoxuc to oxe. Jaꞌ yuꞌun un, acꞌo abaic ta tunel yuꞌun ti Diose, yoꞌ jech ta xapasic ti leque.  
\v 14 Yuꞌun ti mulile muꞌyuc xa yip ta atojolic. Yuꞌun muꞌyucoxuc xa ta yoc ta scꞌob ti mantale. Yuꞌun oyoxuc xa ta slequilal yutsilal ti Diose.   
\s1 Jech sꞌelan ti cꞌalal ochemotic ta mosovinile  
\p
\v 15 ¿Cꞌusi ta xcaltic un chaꞌe? Ti jech muꞌyuc xa oyotic ta stojol ti mantale, ti jech oyotic ta stojol yutsilal slequilal ti Diose, jech o xal un, ¿mi lec ti staoj yav ta jsaꞌolantic ti jmultique? ¡Bu xata ti stacꞌ jeche!  
\v 16 Ti voꞌoxuque xanaꞌic lec ti mi ta xavacꞌ abaic ta mosovinel ta stojol jun ajvalile, ta persa ta xachꞌunic ti cꞌusi ta xal ti ajvalile. Jaꞌ jech xtoc, ti mi ta xcacꞌ jbatic ta mosovinel yuꞌun ti mulile, persa ta jchꞌuntic ti smantale cꞌalal jaꞌ noꞌox ta xijchamotic yuꞌune. Yan ti mi ta xcacꞌ jbatic ta tunel yuꞌun ti Diose, ta jtatic ti lec tucꞌ ta jpastique.  
\v 17 Ta voꞌne ti voꞌoxuque avacꞌoj abaic to ox ta mosovinel yuꞌun ti mulile. Pero coliyal ti Diose ti ta sjunul avoꞌntonic ta xachꞌunic ti cꞌu sꞌelan ti laj avichꞌic chanubtasele.  
\v 18 Ti jech lacolic xa ta mosovinel yuꞌun ti mulile, laj xa avacꞌ abaic ta tunel ta spasel ti leque.  
\v 19 Ta xcal avaꞌiic jech chac cꞌu chaꞌal ta xal ti cristianoetique, yoꞌ jech ta xavaꞌibeic lec smelol taje. Ta voꞌne ti voꞌoxuque laj avacꞌ abaic ta tunel ta spasel ti chopol mulile. Jaꞌ noꞌox jech ta ora liꞌe, acꞌo abaic ta tunel xtoc ta spasel ti leque, yoꞌ jech staoj yav lequil jtuneloxuc ta stojol ti Diose.   
\p
\v 20 Cꞌalal jech mosovinbiloxuc yuꞌun ti mulile, muꞌyuc laj avacꞌ abaic ta tunel ta spasel ti leque.  
\v 21 Pero, ¿cꞌusi lec laj ataic yuꞌun ti jech laj apasique? Avi tana un, jaꞌ noꞌox qꞌuexlal sba ta xavaꞌiic. Muꞌyuc cꞌusi yan. Jaꞌ noꞌox laj ataic ti ta xachamic yuꞌune.  
\v 22 Pero ta ora tana un, colemoxuc xa ti jech ochemoxuc to ox ta mosovinel yuꞌun ti mulile. Ochemoxuc ta yajtunel yuꞌun ti Diose. Ti jech taje, ta xlocꞌ venta. Yuꞌun ta xavacꞌ abaic ta tunel yuꞌun ti Diose. Tsꞌacal to un, ta xataic ti acuxlejalic sventa sbatel osile.  
\v 23 Ti mulile, jaꞌ noꞌox stojol ta xacꞌ ti ta xijbatotic ta lajebale. Pero ti matanal ti ta xacꞌ ti Diose, jaꞌ jcuxlejaltic sbatel osil ta sventa ti jech junotic schiꞌuc ti Cajvaltic Jesucristoe.   
\c 7  
\s1 Ti cꞌusi coꞌol sꞌelan jech chac cꞌu chaꞌal ti nupunele  
\p
\v 1 Quermanotac, ti voꞌoxuc ti xavojtiquinic ti mantale, xanaꞌic lec ti jaꞌ noꞌox oy yip ti mantal ta stojol jun vinic ti cꞌalal cuxul toe.  
\v 2 Caltic jech chac cꞌu chaꞌal liꞌe. Ti jnupunel antse chucul ta xcom yuꞌun ti mantale ti cꞌalal cuxul to ti smalale. Pero mi icham ti smalale, jech o xal ti antse muꞌyuc xa chucul ta xcom yuꞌun ti mantale.  
\v 3 Yan ti mi ta xicꞌ yan vinic ti cꞌalal cuxul to ti smalale, ta sta smul. Pero mi icham smalal ti antse, jech ti stuque muꞌyuc xa bu chucul yuꞌun ti mantale. Xuꞌ ta xicꞌ yan vinic. Muꞌyuc xa ta sta smul.   
\p
\v 4 Jaꞌ jech ti voꞌoxuque, Quermanotac, ti yuꞌunoxuc xa ti Cristoe, chamemoxuc xa ta stojol ti mantale. Yuꞌun oyoxuc xa ta stojol ti Cristoe. Avi tana un, yuꞌunoxuc xa ti Cristoe, jaꞌ ti Buchꞌu icham ichaꞌcuxie. Jech icꞌot ta pasel ta atojolic yoꞌ jech ta xatunic yuꞌun ti Diose.  
\v 5 Cꞌalal cuxulotic ta jtaleltic noꞌoxe, jech ti mantale laj stijbotic ti coꞌntontique, yoꞌ jech ta jpastic más ti cꞌusi ta jcꞌantique. Ti jech taje, jaꞌ noꞌox ta xijchamotic yuꞌun.  
\v 6 Avi tana un, ti jech maꞌuc xa jmalalinojtic ti mantal ti tsots ta spasvan ta mantale, colemotic xa, yoꞌ jech ta xijtunotic yuꞌun ti Diose ta sventa ti jech oy achꞌ jcuxlejaltic yuꞌun ti Chꞌul Espíritue. Maꞌuc jsujoj jbatic ta xchꞌunel ti mantale yoꞌ jech ta xijtunotic yuꞌun ti Diose.   
\s1 Ti mulil ti oy ta jtojole  
\p
\v 7 ¿Cꞌusi ta xcaltic un chaꞌe? ¿Mi mulil ti mantale? ¡Bu xa ta ti jeche! Ti manchucuc jech oy ti mantale, mu laj jnaꞌ cꞌusi ti mulile. Ti manchucuc laj yalbun ti mu xavuꞌuninbe ti cꞌusi oy yuꞌun ti yan ti xie, mu laj jnaꞌ ti jaꞌ mulil ti jech ta xcuꞌuninbe ti cꞌusi oy yuꞌun ti yan jechuque.  
\v 8 Ta sventa ti mantale, más to yacꞌbe yipal ti mulil ta jtojol ti ep ta tos ti cꞌusiuc noꞌox ta xal ti coꞌntone. Ti manchucuc laj caꞌi ti mantale, mu xcaꞌi ti oy ti jmule.  
\v 9 Cꞌalal muꞌyuc caꞌioj to ox ti mantale, laj caꞌi ti lec oyune, chꞌabal ti jmule. Pero cꞌalal laj caꞌi ti mantale, jaꞌ to laj quil ti oy jmul ti ta xicham yuꞌune.  
\v 10 Acꞌo mi jaꞌ jꞌacꞌ-lequilal ti mantale, pero ti vuꞌune mu jechuc laj jta yuꞌun ti mantale. Jaꞌ noꞌox laj jta ti ta xicham yuꞌune.  
\v 11 Yuꞌun ti mulile laj stunes ti mantale. Jech o xal laj sloꞌlaun coꞌnton ti mulile. Ta scoj ti mulil ti laj yacꞌbun jnaꞌ ti mantale, laj jta ti chꞌayel ta xibat yuꞌune.   
\p
\v 12 Ti mantale, chꞌul mantal onoꞌox, yan yutsil, lec.  
\v 13 Ti jech chꞌul mantale, ¿mi jaꞌ ta scoj ti ta xiyicꞌun batel ta lajebale? ¡Bu xata ti jaꞌ chꞌayel ta xibat yuꞌune! Ti jech chꞌayel ta xibate, jaꞌ ta scoj ti mulile. Jaꞌ jech laj quil cꞌu sꞌelan stalel ti mulile. Laj quil cꞌu sꞌelan ti mulile ta sventa ti mantal ti yan yutsile. Jaꞌ jech ti mantale laj svinajesbun ti toj chopol ti mulile.   
\p
\v 14 Ti mantale, jnaꞌtic lec ti chꞌul mantale, jaꞌ yuꞌun ti Diose. ¡Cꞌu stu un! laj xa jchon jba ta mosovinel yuꞌun ti mulile.  
\v 15 Mu xcaꞌi jba ti cꞌu jꞌelane. Yuꞌun maꞌuc ta jpas ti bu ta jcꞌane. Yuꞌun jaꞌ chba jpas ti bu jcrontainoje.  
\v 16 Pero mi jaꞌ chba jpas ti cꞌusi mu jcꞌan jpase, ta jnaꞌ ti lec ti mantale.  
\v 17 Moꞌcun ti jech ta jpas taje. Jaꞌ ta spas ti mulil ti jech oy ta jtojole.  
\v 18 Ti jtalel ti oy ta jtojole, jnaꞌ lec ti muꞌyuc cꞌusi lec ta spase. Manchuc mi oy ta coꞌnton ta jpas caꞌi ti leque, pero mu xuꞌ cuꞌun spasel.  
\v 19 Maꞌuc ta jpas ti cꞌusi lec ta jcꞌane. Yuꞌun jaꞌ noꞌox ta jpas ti cꞌusi chopole, ti mu jcꞌane.  
\v 20 Ti mi jaꞌ ta jpas ti cꞌusi mu jcꞌane, maꞌuc xa vuꞌun ta jpas. Jaꞌ ta spas ti mulil ti jech oy ta jtojole.   
\p
\v 21 Jech ta xcꞌot ta spasel chquil. Cꞌalal ta jcꞌan ta jpas caꞌi ti leque, jaꞌ noꞌox ta jta ta spasel ti chopole.  
\v 22 Ti ta yut coꞌntone, lec ta xcaꞌi smantal ti Diose.  
\v 23 Pero ta xquil ti oy cꞌusi ta smacbun ta be ti snopobil cuꞌune. Jaꞌ ti yip ti mulil ti oy ta jtojol ti chuculun yuꞌune.   
\p
\v 24 Toj abol jba. ¿Buchꞌu ta xiscoltaun ti jech jꞌelane, ti jaꞌ noꞌox ta xiyicꞌun batel ta lajebale?  
\v 25 Jaꞌ noꞌox stuc ti Diose ta sventa ti Cajvaltic Jesucristoe. Coliyal ti Diose. Ta xcaꞌi ti acꞌo jpasbe smantal ti Diose. ¡Cꞌu stu un! ti jtalele mosovinbilun yuꞌun ti mulile.   
\c 8  
\s1 Ti cuxlejal ta sventa ti Chꞌul Espíritu yuꞌun ti Diose  
\p
\v 1 Avi tana un, muꞌyuc xa chba stoj smulic ti buchꞌutic oyic xa ta stojol ti Jesucristoe.  
\v 2 Yuꞌun ti Chꞌul Espíritu ti ta xacꞌbotic achꞌ jcuxlejaltic ta sventa ti jech oyotic ta stojol ti Jesucristoe, laj scoltaotic loqꞌuel ta stojol yip ti mulile ti jaꞌ sventa lajebale.  
\v 3 Ti jech muꞌyuc cꞌusi xuꞌ ta spas ti mantale, jaꞌ ti mu xuꞌ cuꞌuntic xchꞌunele, jaꞌ laj spas ti Diose. Yuꞌun coꞌol sꞌelan cristiano laj stacbotic talel ti Snichꞌone sventa stojol ti jmultique. Coꞌol sꞌelan jsaꞌmulil itacat talel, yoꞌ jech ta xtub ti mulil ta sventa ti laj yichꞌ ti sbecꞌtale.  
\v 4 Jaꞌ jech laj spas ti Diose, yoꞌ jech ti voꞌotique xuꞌ ta jchꞌuntic ti cꞌu sꞌelan ta xal ti mantale. Jaꞌ ti muꞌyuc xa ta jpastic ti cꞌusi ta scꞌan ti jtaleltique. Jaꞌ ti ta jpastic ti cꞌusi ta scꞌan ti Chꞌul Espíritue.   
\p
\v 5 Ti buchꞌutic staoj yav ta spasic ti cꞌu sꞌelan ti stalele, stalel noꞌox stuquic ti cꞌu sꞌelan xvulvun ti yoꞌntonique. Yan ti buchꞌutic ta spasic ti cꞌu sꞌelan stalel ti Chꞌul Espíritue, jaꞌ ta snopilanic cꞌu sꞌelan ta scꞌan ti Chꞌul Espíritue.  
\v 6 Ti mi staoj yav ta jnopilantic ti jtalel jtuctique, ta xicꞌvan batel ta lajebal. Pero ti mi staoj yav ta jnopilantic ti cꞌusi ta xꞌayan talel ta stojol ti Diose, ta xiyicꞌotic batel ta cuxlejal, ta jta jun coꞌntontic.  
\v 7 Ti buchꞌutic ta stalel stuc ta snopilan ti cꞌusi ta spasique, ta xcꞌotic ta yajcronta ti Diose. Yuꞌun mu scꞌanic, mu xtojobic ta xchꞌunel ti smantale.  
\v 8 Jech o xal un, ti buchꞌutic sujoj sbaic ta spasolanic ti stalel stuquique, mu xmuyubaj yoꞌnton ti Dios yuꞌunique.   
\p
\v 9 Ti mi nacal ta atojolic ti Chꞌul Espíritu yuꞌun ti Diose, mu xa ta xapasic ti cꞌusi ta scꞌan ti atalelique. Jaꞌ ta xapasic ti cꞌusi ta scꞌan ti Chꞌul Espíritue. Ti buchꞌu muꞌyuc yichꞌoj ti Chꞌul Espíritu yuꞌun ti Cristoe, maꞌuc yuꞌun ti Cristoe.  
\v 10 Ti mi nacal ta avoꞌntonic ti Cristoe, cuxuloxuc ta sventa laj xa ataic ti lec xaꞌilatic yuꞌun ti Diose, acꞌo mi ta onoꞌox xcham ti abecꞌtalic ta scoj ti mulile.  
\v 11 Ti mi nacal ta avoꞌntonic ti Chꞌul Espíritu yuꞌun ti Buchꞌu laj xchaꞌcuxes ti Jesucristoe, jaꞌ stuc ta xacꞌboxuc achꞌ scuxlejal ti abecꞌtalic ti snaꞌ xchame ta sventa ti jech nacal ta avoꞌntonic ti Chꞌul Espíritu yuꞌun ti Diose.   
\p
\v 12 Jech o xal un, Quermanotac, oy cꞌusi ti tsots scꞌoplal ta jpastique. Pero maꞌuc ta scꞌan ta jpastic ti cꞌusi ta xacꞌ jpastic ti jtaleltique.  
\v 13 Ti mi ta xapasic ti cꞌusi ta scꞌan ti atalelique, jaꞌ noꞌox ta xachamic. Pero mi ta sventa ti Chꞌul Espíritu ta xavacꞌ ta milel ti cꞌusi ta scꞌan ti atalelique, ta xacuxiic umbi.   
\p
\v 14 Scotolic ti buchꞌutic tojobtasbilic batel yuꞌun ti Chꞌul Espíritu yuꞌun ti Diose, jaꞌ snichꞌnab ti Diose.  
\v 15 Ti Chꞌul Espíritu ti laj avichꞌique, maꞌuc ta sticꞌoxuc ta mosovinel, ti ta xacꞌboxuc xiꞌele. Ti Chꞌul Espíritu ti laj avichꞌique, jaꞌ ta sventa yoꞌ lacꞌotic ta snichꞌnab ti Diose. Ti Chꞌul Espíritu taje, jech ta xcaltic yuꞌun: “Tot”, xcutic ti Diose.  
\v 16 Ti Chꞌul Espíritue jaꞌ stuc ta xacꞌ jnaꞌtic ta coꞌntontic ti snichꞌnabotic xa ti Diose.  
\v 17 Ti jech snichꞌnabotic ti Diose, xuꞌ ta xquichꞌtic ec ti cꞌusi yaloj onoꞌox ti Dios ti ta xaqꞌue. Yuꞌun coꞌol ta xquichꞌtic ti jlequilaltic schiꞌuc ti Cristoe ti mi coꞌol ta xquichꞌtic ti jvocoltic schiꞌuque.   
\p
\v 18 Cꞌalal yacalotic ta vocol avi liꞌe, coꞌol sꞌelan ti muꞌyuc laj quichꞌ jvocoltic ti cꞌalal ta jnoptic ti chba quiltic yutsilal slequilal ti Diose.  
\v 19 Scotol ti cꞌusitic meltsanbil yuꞌun ti Diose spatoj yoꞌnton ta smalaic ti cꞌusi ora ta xꞌacꞌbatic yutsilal ti snichꞌnab ti Diose.  
\v 20 Scotol ti cꞌusitic meltsanbile laj sta svocol, isoc. Pero maꞌuc ta scoj stuc ti jech isoque. Yuꞌun jech iꞌayan ta yoꞌnton ti Diose. Pero oy onoꞌox scꞌoplal ti ta xcom ta leque.  
\v 21 Ti cꞌusitic laj smeltsan ti Diose ta sta yorail ti ta xpaj ti svocolic ti jech ta xcꞌaꞌe, ti jech ta soque. Yuꞌun ta xichꞌ slequilal ec ti cꞌalal ta xcolic ti cꞌalal ta xichꞌic yutsilalic slequilalic ti snichꞌnabtac ti Diose.  
\v 22 Scotol ti cꞌusitic meltsanbile, jnaꞌtic lec ti staoj to yav ti xꞌajlajet ta vocol coꞌol sꞌelan jech chac cꞌu chaꞌal jun ants ti ta xichꞌ svocol cꞌalal ta svoqꞌues ti yole.  
\v 23 Pero maꞌuc noꞌox ta xichꞌ svocol ti cꞌusitic meltsanbile. Jaꞌ jechotic ec ta xquichꞌtic jvocoltic, manchuc mi quichꞌojtic ti Chꞌul Espíritu ti jaꞌ sliquebal ti oy cꞌusi ta xijyacꞌbotic ti Diose. Pero vocol ta jmalatic ta stael batel ti ta xijcꞌot ta batsꞌi snichꞌnab ti Diose, yoꞌ jech ta xjeltaj ti jbecꞌtaltique.  
\v 24 Yuꞌun ti jech jchꞌunojtic ti ta xijcolotique, jech o xal ta jmalatic. Pero mi laj xa quiltic ti cꞌusi ta jmalatique, paj scꞌoplal ti ta to jmalatique. Yuꞌun ti buchꞌu laj xa yil ti cꞌusi ta smalae, mu xa cꞌusi yan ta smala.  
\v 25 Pero mi mu to ta xquiltic ti cꞌusi ta jmalatique, jaꞌ yuꞌun umbi, sjunuluc coꞌntontic laꞌ jmalatic.   
\p
\v 26 Jaꞌ jech xtoc ti Chꞌul Espíritue ta scoltaotic, yuꞌun mu xijtojobotic cꞌu sꞌelan ta stael ta cꞌoponel ti Diose. Pero ti Chꞌul Espíritue jaꞌ stuc ta sticꞌ sba ta scꞌoponel ti Dios ta jtojoltic ti cꞌalal ta jicꞌ coꞌntontique, ti mu stacꞌ aꞌyeluc cꞌusi xuꞌ ta xcaltique.  
\v 27 Ti Dios ti yiloj ti coꞌntontique ta snaꞌ lec ti cꞌusi ta scꞌan ti Chꞌul Espíritue. Yuꞌun ti Chꞌul Espíritue jaꞌ ta scꞌan ti cꞌusi oy ta yoꞌnton ti Dios ta sventa ti yuꞌuntaque.   
\s1 Jelavam xuꞌ cuꞌuntic ta jꞌechꞌel  
\p
\v 28 Jnaꞌtic lec ti cꞌusiuc noꞌox ta xcꞌot ta pasele, jaꞌ ta sticꞌ sba ti Diose sventa slequilalic ti buchꞌutic ta scꞌanic ti Diose, ti icꞌbilic ta spasel ti cꞌusi oy ta yoꞌnton ti Diose.  
\v 29 Ti buchꞌutic voꞌne ojtiquinbilic yuꞌun ti Diose, ta sliquebal talel banomil oy scꞌoplal ta xcꞌotic jech chac cꞌu chaꞌal ti Snichꞌone, yoꞌ jech ti Snichꞌone jaꞌ banquilal cꞌotem ta stojol ti yermanotaque.  
\v 30 Ti buchꞌutic jech scꞌoplalic ta voꞌne yuꞌun ti Diose, laj yicꞌ ta stojol. Ti buchꞌutic laj yicꞌ ta stojole, jaꞌ laj staic ti lec xꞌilatic yuꞌun ti Diose. Ti buchꞌutic laj staic ti lec xꞌilatic yuꞌun ti Diose, jaꞌ iꞌacꞌbatic yutsilal slequilal ti Diose.   
\p
\v 31 ¿Cꞌusi ta xcaltic un chaꞌe? Ti mi jech svaꞌanoj sba ti Dios ta jtojoltique, ¿buchꞌu xuꞌ ta xismacotic ta be?  
\v 32 Ti Diose muꞌyuc laj sjalanbotic ti Snichꞌone. Ta sjunul yoꞌnton laj yacꞌ ta milel ta sventa jcotoltic. Jech o xal un, ¿mi jaꞌ xa mu xijyacꞌbotic ec scotol ti cꞌusi ta xacꞌbe ti Snichꞌone?  
\v 33 ¿Buchꞌu xuꞌ ta saꞌbat smul ti buchꞌu tꞌujbil yuꞌun ti Diose, ti cꞌalal laj yal ti Dios ti chꞌabal smule?  
\v 34 ¿Buchꞌu xuꞌ ta xchapanbat smul, ti cꞌalal cham xa ti Cristo ta sventae? Jaꞌ jech xtoc chaꞌcuxiem xa. Tey xa oy ta sbatsꞌi cꞌob ti Diose, yoꞌ jech ta scꞌanbe vocol ti Dios ta jtojoltique.  
\v 35 ¿Buchꞌu xuꞌ ta xischꞌacotic loqꞌuel ta scꞌuxul yoꞌnton ti Cristoe? ¿Mi jaꞌ xuꞌ yuꞌun ti vocole, ti ilbajinele, ti crontainele, ti viꞌnale, ti chꞌabal jcꞌuꞌtique, ti cꞌusi xiꞌbal sbae, ti ta xijchamotique?  
\v 36 Staoj yav ta xiscꞌanotic ti Cristoe jech chac cꞌu chaꞌal ti jcꞌoplaltic ti ta xal ti tsꞌibabil ta scꞌop Diose:  
\q1 Ta aventa voꞌot ti chapal jcꞌoplalcutic scotol cꞌacꞌal ti ta xquichꞌcutic milele.  
\q1 Coꞌol jꞌelancutic jech chac cꞌu chaꞌal ti chij ti icꞌbil ta xbat ta smilobile,  
\m xi.  
\v 37 Manchuc mi jaꞌ jech ti jvocoltique, pero tsalbil ta xcꞌot cuꞌuntic ta sventa ti Buchꞌu cꞌux ta xiyaꞌiotique.  
\v 38 Jech o xal jnaꞌ lec ti muꞌyuc cꞌusi xuꞌ ta xischꞌacotic loqꞌuel ta scꞌuxul yoꞌnton ti Diose. Mi jaꞌuc ti ta xijchame, mi jaꞌuc ti cuxulotic to liꞌe, mi jaꞌuc ti ángeletique, mi jaꞌuc ti pucujetic ti tsots xuꞌ yuꞌune, mi jaꞌuc ti cꞌusi ta xcꞌot ta jtojoltic ta ora liꞌe, mi jaꞌuc ti cꞌusi ta to xtale, mu xuꞌ yuꞌunic.  
\v 39 Mi jaꞌuc ti cꞌusi oy ta vinajele, mi jaꞌuc ti cꞌusi liꞌ ta banomile, mi jaꞌuc jun ta scotol ti cꞌusi laj smeltsan ti Diose, ti jech xuꞌ ta xischꞌacotic loqꞌuel ta scꞌuxul yoꞌnton ti Dios ti laj xa yacꞌ ta ilel ta sventa ti Cajvaltic Jesucristoe.   
\c 9  
\s1 Ti jꞌisraeletique tꞌujbilic yuꞌun ti Diose  
\p
\v 1 Ti jech jchꞌunoj ti Jesucristoe, jaꞌ yuꞌun un, melel ti jcꞌope, muꞌyuc ta jut. Acꞌbil jnaꞌ yuꞌun ti Chꞌul Espíritue ti melel ti cꞌusi ta xcale.  
\v 2 Mu xꞌech yipal ti at oꞌnton ta xcaꞌie. Scotol cꞌacꞌal xtuchꞌet coꞌnton.  
\v 3 Yuꞌun jcꞌanuc caꞌi ta jip jba loqꞌuel ta yoc ta scꞌob ti Jesucristoe yoꞌ jech ta xibat ta chꞌayel ti jaꞌuc ta staic slequilal ti jchiꞌiltaque.  
\v 4 Yuꞌun ti jchiꞌiltaque jaꞌic snitilultac ti Israele. Bisbilic ta snichꞌnab ti Diose. Yan yutsil laj svaꞌan sba ti Dios ta stojolic. Iꞌacꞌbatic ti trateetic yuꞌun ti Diose. Iꞌacꞌbatic smantal ti Moisese. Iꞌacꞌbatic ti cꞌu sꞌelan ta ichꞌel ta mucꞌ ti Dios ta sventa ti temploe. Iꞌalbatic yuꞌun ti Dios ti oy cꞌusi ta xꞌacꞌbatique.  
\v 5 Jaꞌic snitilultac ti jmolmucꞌtotic ta voꞌnee. Ta stojol ti jchiꞌiltaque tey iꞌayan talel ti Cristo ti laj yichꞌ sbecꞌtale, ti jaꞌ Dios yuꞌun scotol ti cꞌusi oye. Ichꞌbiluc ta mucꞌ sbatel osil. Jechuc.  
\v 6 Ti cꞌusi yaloj ti Dios ta stojol ti jꞌisraeletique icꞌot ta pasel. Pero jaꞌ noꞌox icꞌot ta pasel ta stojolic ti buchꞌutic jaꞌ batsꞌi snitilul ti Israel ta melele.  
\v 7 Yuꞌun ti snitilultac ti Abrahame mu scotolicuc ti jaꞌ snichꞌnab ta melele. Yuꞌun ti Diose jech laj yalbe ti Abrahame: “Ta sventa Isaac ta xꞌayan ep anitilultac”, xi.  
\v 8 Ati vaꞌi sꞌelan taje, jaꞌ ta xacꞌ jnaꞌtic ti maꞌuc batsꞌi snichꞌnab ti Dios ti jech ta xvoqꞌuic ta sventa snitilul noꞌox ti Abrahame. Ti buchꞌutic batsꞌi snichꞌnab ti Diose, jaꞌ noꞌox ti buchꞌutic ti ta xvoqꞌuic ta sventa ti jech albilic scꞌoplalic yuꞌun ti Diose.  
\v 9 Yuꞌun ti Abrahame jech iꞌalbat yuꞌun ti Diose ti oy cꞌusi ta xꞌacbate: “Ti scꞌacꞌalil ti nopbil cuꞌune ta xital. Jech ti Sarae ta xchiꞌin yol”, xi.   
\p
\v 10 Pero maꞌuc noꞌox jech yepal taje. Jaꞌ jech ti chib squerem ol ti Rebecae, jun ti stotique, jaꞌ ti jmolmucꞌtotic, Isaaque.  
\v 11-13 Pero cꞌalal muꞌyuc to ox voqꞌuemique, ti cꞌalal muꞌyuc to yaꞌbinojic ta spasel ti leque, ti chopole, jech iꞌalbat ti Rebeca yuꞌun ti Diose: “Ti banquilale ta smosovinat yuꞌun ti itsꞌinale”, xi. Ti vaꞌi sꞌelan taje, coꞌol schiꞌuc jech chac cꞌu chaꞌal tsꞌibabil ta scꞌop Diose: “Cꞌux laj caꞌi ti Jacobe. Pero laj jbaj ti Esaue”, ti xie. Jech com o ti xuꞌ ta stꞌuj ti Dios ti cꞌusi lec ta xile, ti buchꞌu ta scꞌan ta xiqꞌue. Maꞌuc ta xacꞌ ta venta ti cꞌusi ta spas ti vinique.   
\p
\v 14 ¿Cꞌusi ta xcaltic un chaꞌe? ¿Mi yuꞌun muꞌyuc stuqꞌuil yoꞌnton ti Diose? ¡Bu xata ti muꞌyuc tucꞌ yoꞌntone!  
\v 15 Ti Diose yuꞌun jech laj yalbe ti Moisese: “Ta jcꞌuxubin ti buchꞌu ta jcꞌan ta jcꞌuxubine. Ta jcolta ti buchꞌu ta jcꞌan ta jcoltae”, xi.  
\v 16 Ti jech ta jtatic cꞌuxubinel yuꞌun ti Diose, maꞌuc ta quip jtuctic, maꞌuc ta cabtel jtuctic. Jaꞌ noꞌox ta sventa scꞌuxul yoꞌnton ti Diose.  
\v 17 Yuꞌun jech iꞌalbat ti ajvalil yuꞌun ti Egipto banomil ti tsꞌibabil ta scꞌop Diose: “Laj jvaꞌanot ta ajvalil yoꞌ tey ta xcacꞌ ta ilel ti jmucꞌul jtsatsale, yoꞌ tey ta xtanij ti jcꞌoplal ta sjoylej banomile”, xi.  
\v 18 Jech o xal ti Diose ta xcꞌuxubin ti buchꞌu ta scꞌan ta xcꞌuxubine. Jaꞌ jech xtoc ta syijubtasbe yoꞌnton ti buchꞌu ta scꞌan syijubtasbee.   
\p
\v 19 Xuꞌ nan ti jech ta xavalbeicune: “Mi jaꞌ jech yoꞌnton ti Dios taje, ¿cꞌu chaꞌal ta xacꞌbe ta sba smul ti cristianoetique? ¿Buchꞌu xuꞌ smac ta be ti mi jech snopoj ti Diose?”, ti xachiique.  
\v 20 Pero ti voꞌote, ¿buchꞌuot yaꞌyel ti ta xatsacolan ta cꞌop ti Diose? Ti patbil bine mu xuꞌ ta xal ta stojol ti jpasbine: “¿Cꞌu chaꞌal ti vi sꞌelan laj apasune?”, ti xie.  
\v 21 Yuꞌun ti jpasbine oy ta yoc ta scꞌob ti achꞌele jaꞌ ti cꞌu sꞌelan ta scꞌan ta spas ti bine. Yuꞌun ta juteb noꞌox achꞌel xuꞌ ta xichꞌ pasel jun bin ti más jtunele. Jaꞌ jech xtoc xuꞌ ta xlocꞌ jun bin ti jaꞌ noꞌox sventa yav cꞌaꞌepe.  
\v 22 Jaꞌ noꞌox jech ti Dios eque. Cꞌalal ta scꞌan ta xacꞌ ta qꞌuelel smucꞌul stsatsal ta sventa ti buchꞌutic ta xichꞌic castigoe, pero laj xa stsꞌicbe talel sbolil ti buchꞌutic jaꞌ xtunic o ti ta xichꞌic ti castigoe.  
\v 23 Jaꞌ jech ta smala ora ti Diose, jaꞌ ti oyotic onoꞌox ta yoꞌnton ti ta xichꞌotic ta cꞌuxe, jaꞌ ti jech onoꞌox nopbil jcꞌoplaltic ta voꞌne ti ta xacꞌbotic ti yutsilal slequilale.  
\v 24 Jech o xal ti Diose laj staotic ta iqꞌuel. Jlomotic ti jꞌisraelotique. Jlom ti jyanlumetique.  
\v 25 Yuꞌun jech ta xal ti tsꞌibabil yuꞌun ti Osease:  
\q1 Ti buchꞌutic maꞌuc calab jnichꞌnabe, jaꞌ ta jbis ta calab jnichꞌnab.  
\q1 Ti buchꞌu maꞌuc cꞌuxubinbilic cuꞌune, jaꞌ ta staic cꞌuxubinel cuꞌun.   
\q1
\v 26 Yuꞌun oy bu jech iꞌalbatic: “Ti voꞌoxuque maꞌuc calab jnichꞌnaboxuc”, xi scꞌoplalic.  
\q1 Avi tana un, jaꞌ bisbilic ta yalab snichꞌnab ti cuxul Diose,  
\m xi.  
\v 27 Pero scꞌoplalic ti jꞌisraeletique, jech laj yal ti Isaíase:  
\q1 Manchuc mi coꞌol sꞌelanic syiꞌal nab yepalic snitilultac ti Israele, pero jaꞌ noꞌox jun chib ta xcolic.   
\q1
\v 28 Yuꞌun ti Cajvaltique xcꞌot xcꞌopoj. Ta ora noꞌox ta xchapan ti cristianoetic liꞌ ta sba banomile,  
\m xi.  
\v 29 Yuꞌun jech onoꞌox laj yal xtoc ti Isaías ta voꞌnee:  
\q1 Ati Cajvaltic Dios ti scotol xuꞌ yuꞌune, ati manchucuc laj yictabotic comel ti jnitilultique,  
\q1 jaꞌ jech icꞌot ta jtojoltic jech chac cꞌu chaꞌal ti jteclumetic Sodoma schiꞌuc Gomorra jechuque,  
\m xi.   
\s1 Ti jꞌisraeletic ti mu scꞌan xchꞌunic ti lequil achꞌ cꞌope  
\p
\v 30 Jech icꞌot ta pasel chcaltic un chaꞌe. Ti jyanlumetic ti buchꞌutic muꞌyuc laj yaqꞌuic persa ta saꞌel yoꞌ lec ta xꞌilatic yuꞌun ti Diose, pero laj xa staic ta sventa ti ta xchꞌunic ti Jesucristoe.  
\v 31 Yan ti jꞌisraeletic ti laj yaqꞌuic persa ta saꞌel yoꞌ jech ta staic ti lec xꞌilatic yuꞌun ti Dios ta sventa ti mantale, pero muꞌyuc laj staic. Yuꞌun muꞌyuc xchꞌun yuꞌunic ti mantale.  
\v 32 ¿Cꞌu chaꞌal un? Jaꞌ ti muꞌyuc laj yaqꞌuic persa ta saꞌel ti lec xꞌilatic yuꞌun ti Dios ta sventa ti ta xchꞌunic ti Cajvaltique. Ti stuquique jaꞌ noꞌox laj snopic ti ta staic ti lec xꞌilatic yuꞌun ti Diose ta svetna ti cꞌusi ta spas ti stuquique. Jech o xal un, ti stuquique laj sbosi yacanic yuꞌun ti jmac-acanil tone.  
\v 33 Yuꞌun jech albil scꞌoplal ti ta scꞌop Diose:  
\q1 Vuꞌun ta jvaꞌan ta jteclum Jerusalén ti jbosej-acanil ton ti ta sbajesvan ta lume.  
\q1 Yan ti buchꞌu ta xchꞌune, muꞌyuc ta sta ti ta xloꞌilaj ti yoꞌntone,  
\m xi.   
\c 10  
\p
\v 1 Quermanotac, ta sjunul coꞌnton ta jta ta cꞌoponel ti Dios yuꞌun ti jchiꞌiltaque, yuꞌun ta jcꞌan ti acꞌo colicuque.  
\v 2 Ti jꞌisraeletique yacꞌojic persa ta yichꞌel ta mucꞌ ti Dios yilele. Pero mu xcoꞌolaj schiꞌuc ti cꞌusi oy ta yoꞌnton ti Diose.  
\v 3 Yuꞌun ti stuquique mu xaꞌiic smelol ti cꞌu sꞌelan ta spas ti Dios yoꞌ lec ta xil ti cristianoetique. Jaꞌ noꞌox ta saꞌ stuquic cꞌu sꞌelan yoꞌ jech lec ta xꞌilatic yuꞌun ti Diose. Jaꞌ mu xchꞌunic ti cꞌusi lec laj xa spas ti Diose.  
\v 4 Yuꞌun jaꞌ noꞌox ta sventa Cristo yoꞌ jech ta xichꞌ tael ti lec xijꞌilat yuꞌun ti Diose. Maꞌuc ta sventa smantal ti Moisese. Buchꞌuuc noꞌox ti ta xchꞌunic ti Cristoe ta staic ti lec xꞌilatic yuꞌun ti Diose.   
\p
\v 5 Yan ti mi jaꞌ noꞌox ta jnoptic ti ta jtatic ti lec xijꞌilat yuꞌun ti Dios ta sventa ti mantale: “Ta scꞌan chꞌunel scotol ti mantale yoꞌ jech ta xicuxi”, xi laj stsꞌiba comel ti Moisese.  
\v 6 Ti mi ta jcꞌantic ti ta jtatic ti lec xijꞌilat yuꞌun ti Dios ta sventa ti ta jchꞌuntique, jech ta xacꞌ jnaꞌtic: “Mu xaval ta avoꞌnton un chaꞌe: Ta to scꞌan ta xibat ta vinajel yoꞌ chba jsaꞌ talel ti jcoltaele”, ti xachie. Ti jech ta xavale taje, ta xabaj ti talem xa ti Cristoe.  
\v 7 Jaꞌ jech xtoc: “Mu me xaval ta avoꞌnton: Ta to scꞌan ta xibat ta cꞌatimbac yoꞌ ta jsaꞌ talel ti jcoltaele”, ti xachie. Ti jech ta xavale, ta xabaj ti icham ichaꞌcuxi xa ti Cristoe.  
\v 8 ¿Cꞌusi ta xacꞌ jnaꞌtic ti jech ta xcalcutique? Ti lec xijꞌilat yuꞌun ti Dios ta sventa ti ta jchꞌuntic ti Jesucristoe, mu nomuc oy. Oy ta ave atiꞌ. Oy ta avoꞌnton. Jaꞌ ti lequil achꞌ cꞌop ti vuꞌun ta xcalcutique.  
\v 9 Yuꞌun ti mi ta xlocꞌ ta ave ti jaꞌ Avajval ti Jesuse, ti mi ta xachꞌunic ti ichaꞌcuxesat yuꞌun Dios ti Jesucristoe, ta xacolic.  
\v 10 Ta jtatic ti lec xijꞌilat yuꞌun ti Dios ta sventa ti ta jchꞌuntic ta sjunul coꞌntontique. Jaꞌ jech xtoc ta xlocꞌ ta quetic ti jaꞌ Cajvaltic ti Jesucristoe yoꞌ jech ta xijcol.   
\p
\v 11 Yuꞌun jech tsꞌibabil ta scꞌop Dios: “Scotol ti buchꞌu ta spat yoꞌnton ta stojole, mu xloꞌilaj ti yoꞌntonique”, xi.  
\v 12 Manchuc mi jꞌisraeletic, mi jyanlumetic, mu yanuc ti Cajvaltique. Jaꞌ Ajvalil cuꞌuntic jcotoltic ti Cajvaltique. Jech o xal buchꞌuuc noꞌox ti ta scꞌanbe vocole, ep ta xꞌacꞌbatic ti cꞌusi ta scꞌanique.  
\v 13 Yuꞌun jech onoꞌox ta xal ti tsꞌibabil ta scꞌop Diose: “Scotol ti buchꞌutic ta scꞌanbeic vocol ti Cajvaltique, jaꞌ ta xcolic”, xi.  
\v 14 Pero ¿cꞌusi ta xutic ta scꞌanbeic vocol ti mi muꞌyuc to xchꞌunojic ti Cajvaltique? ¿Cꞌusi xut ta xchꞌunic ti mi muꞌyuc yaꞌbinojic scꞌoplal ti Cajvaltique? ¿Cꞌusi xut ta xaꞌibeic scꞌoplal ti Cajvaltique ti mi muꞌyuc buchꞌu ta xbat yale?  
\v 15 ¿Cꞌusi xut ta xalic ti lequil achꞌ cꞌope ti mi muꞌyuc buchꞌu ta xtacatic batele? Yuꞌun jech ta xal ti tsꞌibabil ta scꞌop Diose: “Toj yan noꞌox yutsil scotolic ti buchꞌutic ta xalic ti lequil achꞌ cꞌop ti jaꞌ ta xacꞌ jun coꞌntontique”, xi.   
\p
\v 16 ¡Cꞌu stu un! Mu scotolicuc ta xichꞌic ta mucꞌ ti lequil achꞌ cꞌop ti jaꞌ colebale. Jaꞌ coꞌol sꞌelan jech chac cꞌu chaꞌal ta xal ti Isaíase: “Cajval, mu scꞌan xchꞌunic ti acꞌope”, xi.  
\v 17 Jech o xal un, ti jech ta jchꞌuntique, jaꞌ to ti mi ta xcaꞌitique. Ti cꞌusi ta xcaꞌitique, jaꞌ ti lequil achꞌ cꞌop yuꞌun ti Cristoe.   
\p
\v 18 Pero jech ta jacꞌ xtoc. ¿Mi yuꞌun muꞌyuc laj yaꞌiic ti lequil achꞌ cꞌop ti jchiꞌiltaque? Laj yaꞌiic. Yuꞌun jech ta xal ti tsꞌibabil ta scꞌop Diose:  
\q1 Scꞌopojelic ti jꞌalcꞌopetique vinaj ta sjoylej banomil.  
\q1 Scꞌopic ti jꞌalcꞌopetique icꞌot ta sbejel banomil ti bu tanijemic ti jchiꞌiltaque,  
\m xi.   
\p
\v 19 Yan to velta ta jacꞌbe jba xtoc. ¿Mi yuꞌun muꞌyuc laj stucꞌulanic ti jꞌisraeletic ti ta xicꞌ jyanlumetic ti Diose? Laj yaꞌiic. Yuꞌun jech onoꞌox laj yal ti Moisese:  
\q1 Itꞌix ta xavaꞌiic ti cꞌalal ta xavilic ti ta xquicꞌ ta jtojol ti jyanlumetic ti maꞌuc tꞌujbil cuꞌune.  
\q1 Ta xaꞌilinic yuꞌun ti cꞌalal ta xquicꞌ ta jtojol ti jyanlumetic ti muꞌyuc yichꞌojicun ta mucꞌ ta voꞌnee,  
\m xi ti Diose, xi.  
\v 20 Tsꞌacal to jech laj yal ti Isaías xtoque:  
\q1 Ti buchꞌutic muꞌyuc laj saꞌicune, laj staicun.  
\q1 Ti buchꞌu mu laj sjaqꞌuicune, laj cacꞌ jba iluc ta stojolic,  
\m xi ti Diose, xi.  
\v 21 Pero scꞌoplal xtoc ti jꞌisraeletique jech laj yal ti Isaíase: “Scotol cꞌacꞌal laj quicꞌ ta jtojol ti jtoyoba cristianoetique”, xi ti Diose, xi.   
\c 11  
\s1 Ti jlom jꞌisraeletic ti laj staic ti coltaele  
\p
\v 1 Ta jacꞌ caꞌi xtoc. Ti Diose, ¿mi laj sjip o ti yalab snichꞌnabe, jaꞌ ti jꞌisraeletique? ¡Bu xata! Yuꞌun ti vuꞌune jꞌisraelun ec. Snitilulun ti Abrahame. Liꞌayan talel ta jun ta slajchebal snichꞌon ti Israele, jaꞌ ti Benjamine.  
\v 2 Yuꞌun voꞌne xa onoꞌox ti Diose sbisoj talel ta yalab snichꞌnab ti jꞌisraeletique. Muꞌyuc sjipoj. Avi tana liꞌe, xanaꞌic lec cꞌusi laj yal cꞌalal laj scꞌopon Dios ti jꞌalcꞌop Elíase. Jech laj yalbe smul ti jꞌisraeletique:  
\v 3 “Cajval, laj xa smilic ti avajꞌalcꞌoptaque. Laj xa slilinic ti altaretic avuꞌune. Jtuc xa noꞌox licom. Jaꞌ jech xtoc ta xismilicun yaꞌiic ec”, xut ti Diose.  
\v 4 Pero ti Diose jech laj stacꞌ: “Laj xa jtꞌuj vucmil (7000) jꞌisraeletic ti muꞌyuc laj squejan sbaic ta stojol ti meltsanbil riox Baale”, xi.  
\v 5 Jaꞌ jech tana liꞌe, oy to jayibuc scomelal ti jꞌisraeletic ti ta xchꞌunic ti Cajvaltique ta sventa ti tꞌujbilic ta scꞌuxul yoꞌnton ti Diose.  
\v 6 Ti mi ta sventa scꞌuxul yoꞌnton ti Dios ti jech tꞌujbilique, jaꞌ yuꞌun umbi, mu xa jaꞌuc ta sventa ti cꞌusitic ta spas ti stuquique. Yan ti yuꞌunuc ta sventauc ti cꞌusi ta spas stuquic yoꞌ jech tꞌujbilique, maꞌuc xa scꞌuxul yoꞌnton Dios umbi.   
\p
\v 7 ¿Cꞌuxi un chaꞌe? Ti cꞌusi laj saꞌic ti jꞌisraeletique muꞌyuc laj staic. Pero ti buchꞌutic tꞌujbilic yuꞌun ti Diose laj staic ti lec xꞌilatic yuꞌune. Jaꞌuc ti yane iyijubtasbat yoꞌntonic.  
\v 8 Yuꞌun jech onoꞌox tsꞌibabil scꞌoplalic ta scꞌop Diose: “Chꞌaybat schꞌulelic yuꞌun ti Diose. Iꞌacꞌbat satic, mu xilic. Iꞌacꞌbat schiquinic, mu xaꞌiic. Jech staoj yav avi liꞌ tanae”, xi.  
\v 9 Jaꞌ jech laj yal xtoc ti Davide:  
\q1 Ati jech ta smalqꞌuin sbaic leque, acꞌo joybijuc ta spetsꞌalic,  
\q1 ta schucobbailic, yoꞌ jech ta sbosi yacanic, yoꞌ ta xꞌacꞌbatic castigo.   
\q1
\v 10 Acꞌo joybijuc ta maꞌsat yoꞌ jech mu xilic.  
\q1 Vujqꞌuijuc o ti spat ta jꞌechꞌele,  
\m xi.   
\s1 Scolebalic ti jyanlumetique  
\p
\v 11 Ta jacꞌ caꞌi xtoc. Ti jech laj sbosi yacanic ti jꞌisraeletique, ¿mi yalic o ta lum? ¡Bu xata ti jech yalic o ta lume! Cꞌalal jech laj sbajic slequilalic ti jꞌisraeletique, laj staic coltael yuꞌun Dios ti jyanlumetique, yoꞌ jech ti jꞌisraeletique ta xlic scoꞌoltas yoꞌntonic jech chac cꞌu chaꞌal ti jyanlumetique.  
\v 12 Ti mi jaꞌ jech laj staic coltael yuꞌun Dios ti jyanlumetic ti oy ta sjoylej banomile jaꞌ ta scoj ti jꞌisraeletic ti jech laj sbosi ti yacanique, jech o xal umbi, jaꞌ to jun yutsil ta xcꞌot ta jtojol jcotoltic ti cꞌalal ti jꞌisraeletic ta xlic xchaꞌacꞌ sbaic ta ventainel yuꞌun ti Diose.   
\p
\v 13 Pero oy cꞌusi ta jcꞌan ta xcalboxuc avaꞌiic ti voꞌoxuc jyanlumoxuque. Ta sventa ti jech tacbilun yuꞌun ti Dios ta atojolique, jaꞌ yuꞌun un, tsots scꞌoplal ta xcaꞌi ti cabtel ti laj yacꞌbune.  
\v 14 Ta jcꞌan caꞌi ti acꞌo scoꞌoltas yoꞌntonic ti jchiꞌiltaque, yoꞌ jech ta staic ti coltaele jech chac cꞌu chaꞌal ataojique.  
\v 15 Ti jech chꞌacbilic icomic yuꞌun Dios ti jchiꞌiltaque, jech o xal scotol ti cristianoetic ta sjoylej banomile laj staic ti lec ta xil sbaic schiꞌuc ti Diose. Pero cꞌalal ti jchiꞌiltac ta xꞌicꞌatic yuꞌun ti Dios yan veltae, ta staic scuxlejalic ti buchꞌutic chamemique.   
\p
\v 16 Yuꞌun ti baꞌyel snichꞌnab ti Diose coꞌol sꞌelan jbej chꞌul pan ti lec ta xil ti Diose. Jech o xal un, lec ta xil ti scomelal ti cꞌu yepal coꞌol sꞌelan ti votsꞌbil jarinae. Mi chꞌul ibel teꞌ ta xile, jaꞌ jech xtoc ti scꞌobtaque lec ta xil.   
\p
\v 17 Oy jlom jchiꞌiltac ti coꞌol sꞌelan sbatsꞌi cꞌobtac ti olivo teꞌe, laj yichꞌ setel loqꞌuel. Ti bu icom ti setbenale, jaꞌ tey laj avichꞌ tsꞌaquel ti voꞌoxuc jyanlumoxuque, ti coꞌol aꞌelanic jech chac cꞌu chaꞌal ti teꞌtical olivoe. Jaꞌ yuꞌun un, oy acuxlejalic ta sventa ti yibel ti batsꞌi olivo teꞌe.  
\v 18 Pero mu xanop ti más lec oyoxuque, ti jaꞌ mu sta ti sbatsꞌi cꞌobtac ti laj yichꞌ setele. Yan ti mi jech ta xanopique, vuleso me ta avoꞌntonic ti maꞌuc avicꞌojic ti yibele. Jaꞌ yicꞌojoxuc ti yibele.   
\p
\v 19 Xuꞌ nan jech ta xavalic: “Pero laj yichꞌ bojel ti scꞌobtaque yoꞌ tey laj quichꞌ tsꞌaquel ta olivo teꞌe”, ti xachiique.  
\v 20 Melel, jech xaval avaꞌuc. Laj yichꞌ setel loqꞌuel ta scoj ti muꞌyuc laj xchꞌunic ti coltael yuꞌun ti Diose. Tey laj avichꞌic tsꞌaquel ochel ta sventa ti achꞌunojic ti ta xacolique. Jech o xal un, bijanic me. Mu me xatoy abaic.  
\v 21 Yuꞌun ti Diose mi muꞌyuc laj yacꞌbe perdón ti sbatsꞌi cꞌobtaque, jaꞌ jech ti voꞌoxuque mu xaꞌacꞌbatic perdón ti mi ta xatoy abaique.  
\v 22 Qꞌuel avilic, toj lec ti Diose. Pero jaꞌ jech xtoc jbel xcꞌopoj. Ti buchꞌutic laj sbajic ti slequilalique jbel scꞌoplal laj yacꞌbe castigo. Pero lec yoꞌnton ta atojolic. Yan ti mi mu xachꞌunic ti cꞌuxubinel yuꞌun ti Diose, ta xavichꞌic setel loqꞌuel.  
\v 23 Pero ti jꞌisraeletique ti mi ta xlic xchꞌunic ti Diose, jaꞌ jech xtoc umbi, ta xlic yichꞌic tsꞌaquel ta achꞌ. Yuꞌun oy smucꞌul stsatsal ti Dios ti xuꞌ ta stsꞌaque.  
\v 24 Ti voꞌoxuque, maꞌuc jꞌisraeloxuc, coꞌol aꞌelanic colemal olivo teꞌ labojatic talel. Laj avichꞌic tsꞌaquel ochel ta batsꞌi olivo teꞌ. Jech o xal umbi, ti jꞌisraeletique más ta ora noꞌox ta stsꞌacatic ochel ta achꞌ yuꞌun ti Diose. Jaꞌ ti jaꞌ onoꞌox sbatsꞌi cꞌobtac ti batsꞌi olivoe.   
\s1 Ta sta yorail ti ta staic scolelic ti jꞌisraeletique  
\p
\v 25 Quermanotac, ta jcꞌan ta xcalboxuc avaꞌiic ti cꞌusi snopoj ta spas ti Dios ti mucul to oxe, yoꞌ jech mu xabis abaic ta bijoxuc. Ti jꞌisraeletique oy bu iyijub ti yoꞌntonique. Pero mu jechuc ta xcom o. Jaꞌ to ti mi ta xcꞌot ta stsꞌaquiel ti cꞌu yepal ta staic coltael ti jyanlumetique.  
\v 26 Cꞌalal jech ta xcꞌot ta pasele, scotol ti jꞌisraeletique ta staic scolelique jech chac cꞌu chaꞌal ta xal ti tsꞌibabil ta scꞌop Diose:  
\q1 Ti Jpojvaneje ta xlic talel ta Sión.  
\q1 Ta stubbe smulic ti jꞌisraeletique.   
\q1
\v 27 Jaꞌ jech ti jtrate schiꞌuquique cꞌalal ta jchꞌaybe ti smulique,  
\m xi ti Diose.   
\p
\v 28 Ti jech laj sbajic ti lequil achꞌ cꞌop ti jꞌisraeletique, jech o xal ti Diose laj syanijes yoꞌnton ta stojolic, yoꞌ jech ti voꞌoxuc jyanlumoxuque ta xataic ti coltael yuꞌun ti Diose. Pero ti stuquique staoj yav ti jech cꞌuxubinbilic yuꞌun ti Diose. Yuꞌun tꞌujbilic ti smolmucꞌtotic ta voꞌnee.  
\v 29 Ti cꞌusi ta xacꞌ ti Diose, mu spoj sutel. Mi jaꞌuc ta xchaꞌnaꞌ ti jech icꞌvaneme.  
\v 30 Ti voꞌoxuc jyanlumoxuque ta voꞌne mu xacꞌan xavichꞌic ta mucꞌ ti Diose. Avi tana un, laj ataic ti cꞌuxubinel yuꞌun ti Diose ta sventa ti jꞌisraeletic ti jech laj sbajic ti cꞌuxubinele.  
\v 31 Manchuc mi laj sbajic cꞌuxubinel ti jꞌisraeletique, pero oy bu ta sta scꞌacꞌalil ti ta staic ti cꞌuxubinel yuꞌun ti Diose jech chac cꞌu chaꞌal laj ataic ti voꞌoxuque.  
\v 32 Laj yilotic jcotoltic ti Diose ti coꞌol mu xquichꞌtic ta muqꞌue, yoꞌ jech ta jtatic cꞌuxubinel jcotoltic.   
\p
\v 33 Batsꞌi mu albajuc yutsil ti Diose. Mu stacꞌ alel ti sbijile, ti cꞌusi ta snope. Muꞌyuc buchꞌu xuꞌ ta xal ti cꞌusi snopoj ti Diose. Mu jnaꞌtic ti bu cꞌalal oy ti snopobil yuꞌune.  
\v 34 Yuꞌun jech ta xal ti tsꞌibabil ta scꞌope:  
\q1 ¿Buchꞌu junucal ti cristianoetic ti laj xa yaꞌi ti cꞌusi ta snop ta yoꞌnton ti Diose?  
\q1 ¿Buchꞌu laj sbijubtas?   
\q1
\v 35 ¿Buchꞌu oy cꞌusi laj xa yacꞌbe baꞌyel ti Cajvaltique yoꞌ jech ta sutesbat sqꞌuexol ti cꞌusi laj xa yaqꞌue?  
\m xi.  
\v 36 Yuꞌun scotol ti cꞌusitic oye ta xlic talel ta stojol ti Diose. Jaꞌ pasbilic yuꞌun, yoꞌ xtun yuꞌun. Ichꞌbiluc o ta mucꞌ sbatel osil ti Diose. Jechuc.   
\c 12  
\s1 Scuxlejalic ti jchꞌunolajeletic ti tꞌujbilic yuꞌun ti Diose  
\p
\v 1 Jech o xal un, Quermanotac, ta sventa scꞌuxul yoꞌnton ti Diose, ta jcꞌanboxuc vocol. Cuxul acꞌo abaic ta tunel yuꞌun ti Diose jech chac cꞌu chaꞌal ti animal ti laj yichꞌ acꞌbel sventa smoton ti Diose, ti tꞌujbile, ti lec ta xile. Jaꞌ jech ta ichꞌel ta mucꞌ ti Diose.  
\v 2 Mu xa jechuc xanopic jech chac cꞌu chaꞌal ta snopic ti cristianoetic ti liꞌ ta sba banomile. Jaꞌ lec jeluc ti snopobil avuꞌunique, yoꞌ jech ta xꞌachꞌub scotol ti acuxlejalique. Ti mi jech ta xapasique, tey ta xlic avaꞌiic ti cꞌusi oy ta yoꞌnton ti Diose, jaꞌ ti cꞌusi leque, jaꞌ ti cꞌusi xmuyubaj yoꞌnton yuꞌune, jaꞌ ti tucꞌ ta xile.   
\p
\v 3 Ti jech acꞌbil cabtel ta scꞌuxul yoꞌnton ti Diose, jech ta xcalboxuc avaꞌiic acotolic. Mu me cajaluc xavaꞌi abaic ti cꞌusi ta xanopique. Jujunoxuc lequil nopic ti cꞌu yepal laj scoltaoxuc ti Dios ta xchꞌunele.  
\v 4 Yuꞌun ti jbecꞌtaltique, jun noꞌox. Pero ep ta tos ti yabtelique. Pero mu junuc noꞌox ti yabtelic ti bu xtunique.  
\v 5 Jaꞌ jech ti voꞌotique. Manchuc mi toj epotic, pero junotic ti jech oyotic ta stojol ti Cristoe. Jun tsobolotic jcotoltic jech chac cꞌu chaꞌal ti sjunul jbecꞌtaltique.   
\p
\v 6 Jujutos laj yacꞌbotic jbijiltic ti Dios ta jujun tale, jaꞌ ti cꞌu sꞌelan iꞌayan ta yoꞌnton ti laj yaqꞌue. Jech o xal un, tojobcutic ta stunesel ti jbijiltique. Ti mi jaꞌ laj yacꞌ jbijiltic ti Dios ta yalel ti cꞌusi ta xacꞌ ta naꞌele, laꞌ me caltic ti cꞌu yepal coltabilotic ta xchꞌunele.  
\v 7 Ti mi jaꞌ laj yacꞌ jbijiltic yoꞌ jech ta xitun yuꞌun ti yane, laꞌ me jpastic ta sjunul coꞌntontic. Mi jaꞌ sbijil iꞌacꞌbat ti ta xchanubtasvane, acꞌo me yabtelan o ti jech ta xchanubtasvane.  
\v 8 Mi jaꞌ sbijil iꞌacꞌbat ti ta stsatsubtasbe yoꞌntonic ti yane, acꞌo me yabtelan o. Mi jaꞌ sbijil iꞌacꞌbat ti oy cꞌusi ta xaqꞌue, mu me snop ti ta xqꞌuextabat sutel ti jech ta xaqꞌue. Mi jaꞌ sbijil iꞌacꞌbat ti ta tojobtasvane, bijuc ti cꞌu sꞌelan ta xtojobtasvane. Mi jaꞌ sbijil iꞌacꞌbat ta scoltael ti buchꞌu abol sbaique, muyubajuc ta spasel.   
\s1 Jech ta scꞌan ta spasic ti jchꞌunolajeletique  
\p
\v 9 Ta melel cꞌux me xavaꞌi abaic ta jujun tal. Crontaino ti cꞌusi chopole. Jaꞌ acꞌbo yipal ta spasel ti leque.  
\v 10 Ta yutsiluc avoꞌntonic, cꞌano abaic ta jujun tal ti jech avermano xa abaique. Coꞌoluc xavil abaic. Ichꞌo abaic ta mucꞌ ta jujun tal.   
\p
\v 11 Aqꞌuic persa mu xachꞌajubic. Ta sjunuluc avoꞌntonic tunanic yuꞌun ti Cajvaltique.   
\p
\v 12 Junuc avoꞌntonic cuxianic. Muyubajanic, yuꞌun apatoj avoꞌntonic ti oy cꞌusi ta xataique. Oyuc me smucꞌul avoꞌntonic cꞌalal ta xavichꞌ avocolique. Mu me xavicta abaic ta scꞌoponel ti Diose.   
\p
\v 13 Coltaic me ti jchꞌunolajeletic ti oy cꞌusi ta xtun yuꞌunique. Ichꞌo me ta mucꞌ ti buchꞌu ta xasvuꞌlanique.   
\p
\v 14 Mu xaval ti acꞌo chamuc ti buchꞌu ta xayilbajinique. Cꞌanbeic slequilal Dios ta stojolic.   
\p
\v 15 Muyubajanic schiꞌuc ti buchꞌu xmuyubajic xae. Ocꞌanic schiꞌuc ti buchꞌu ta xꞌoqꞌuique.   
\p
\v 16 Junuc avoꞌntonic cuxianic acotolic. Maꞌuc me ti toyobbaoxuque. Coꞌol me xavil abaic schiꞌuc ti buchꞌutic abol sbaique. Mu me xanopic ti toj bijoxuque.   
\p
\v 17 Mu me ta chopoluc xapacbe sutel ti buchꞌu chopol ta spasboxuque. Aqꞌuic persa ta spasel ti lec ta stojol scotolique.  
\v 18 Aqꞌuic persa ti bu xa cꞌalal xuꞌ avuꞌunique yoꞌ jech jun avoꞌntonic schiꞌuc ti yane.  
\v 19 Quermanotac, mu me xapaquic sutel atuquic ti cꞌusi chopol ta spasboxuque. Acꞌbeic xchapan stuc ti Diose. Jaꞌ acꞌo yacꞌ castigo stuc. Yuꞌun jech ta xal ti tsꞌibabil ta scꞌop Diose: “Vuꞌun jventainoj ta xcacꞌbe castigo. Vuꞌun ta xcacꞌbe stojol”, xi ti Cajvaltique.  
\v 20 Jaꞌ jech ta xal xtoc: “Mi ta xviꞌnaj ti avajcrontae, acꞌbo sveꞌel. Mi ta xaꞌi taqui tiꞌile, acꞌbo voꞌ yuchꞌ. Yuꞌun ti mi jech ta xapasic taje, tey ta stsajub sat ta qꞌuexlal”, xi.  
\v 21 Mu xavacꞌ abaic ta tsalel yuꞌun ti chopole. Jaꞌ lec tsalic ti chopol ta sventa ti cꞌusi lec ta xapasique.   
\c 13  
\p
\v 1 Acotolicuc chꞌunbeic smantal ti ajvaliletic yuꞌun ti gobiernoe. Yuꞌun jech ta scꞌan Dios ti oy ajvaliletique. Ti jech oy ti ajvaliletic liꞌ ta sba banomile, jaꞌ nopbil yuꞌun ti Diose.  
\v 2 Jech o xal un, ti buchꞌutic ti ta stoy sbaic ta stojol ti ajvaliletique, ta scrontainic ti jech nopbil yuꞌun ti Diose. Ti buchꞌutic jech ta stoy sbaic taje, jech o xal ta sta smulic. Ta xꞌacꞌbatic castigo.  
\v 3 Yuꞌun ti ajvaliletique maꞌuc ta xacꞌbe xiꞌel ti buchꞌu lec ta spasique. Jaꞌ noꞌox ta xacꞌbe xiꞌel ti buchꞌu chopol ta spasique. Mi ta xacꞌanic ti mu xaꞌacꞌbat xiꞌel yuꞌun ti ajvaliletique, lec xapas abaic. Jech ti ajvaliletique tey ta stucꞌulanic lec ti cꞌu aꞌelanique.  
\v 4 Yuꞌun ti ajvaliletique jaꞌ yajtuneltac ti Diose, yoꞌ jech lec oyoxuc. Pero mi chopol ta xapas abaique, jech o xal ta xaxiꞌic ta stojolic. Yuꞌun mu ta jecheꞌuc noꞌox ti oy ta yoc ta scꞌob ti xuꞌ ta xacꞌboxuc ti castigoe. Yuꞌun jaꞌ yajtuneltac ti Diose, yoꞌ jech ta xacꞌbe yichꞌ castigo ti buchꞌu chopol ta spasique.  
\v 5 Jaꞌ yuꞌun un, tsots scꞌoplal chꞌunbeic smantal ti ajvaliletique. Pero maꞌuc noꞌox ti ta xapoj abaic yuꞌun ti castigoe. Yuꞌun xanaꞌic lec ti jech scꞌan pasele.  
\v 6 Jech o xal un, ti voꞌoxuque jaꞌ razon ta xatojic ti patane. Yuꞌun ti ajvaliletique jaꞌ yajtuneltac ti Diose ti jech yichꞌoj ti yabtelique.   
\p
\v 7 Ichꞌo ta mucꞌ ti cꞌu sꞌelan yabtel jujuchope. Tojic me ti patan ti ta scꞌanboxuque. Tojic me ti slocꞌ ti ta scꞌanboxuque. Ichꞌic ta mucꞌ ti buchꞌu ichꞌbil ta muqꞌue. Ti buchꞌu lec xꞌilate lec me xavilic ec.  
\v 8 Chꞌabalucuc me avilic ta stojol yan. Jaꞌuc noꞌox me avilic ti cꞌux ta xavaꞌi abaic ta jujun tale. Yuꞌun ti buchꞌu ta xcꞌuxubin ti schiꞌile, laj xa spas scotol ti cꞌu sꞌelan ta xal ti mantale.  
\v 9 Yuꞌun ti mantale jech ta xal: “Mu xamulivajic. Mu xamilvanic. Mu xaꞌelcꞌajic. Mu xajutbeic cꞌop yan. Mu xavuꞌuninbe ti cꞌusi oy yuꞌun yan”, xi. Ti mantal taje schiꞌuc scotol ti yan mantale, ta xcꞌot ta pasel avuꞌunic ti mi ta xapasic ti jbel noꞌox mantal ti ta xale: “Cꞌuxubino achiꞌiltac jech chac cꞌu chaꞌal ti ta xacꞌuxubin aba atuque”, xi.  
\v 10 Ti buchꞌu oy scꞌuxul yoꞌntone, mu soques ti schiꞌile. Ti jech oy scꞌuxul ti oꞌntonale, ta xcꞌot ta pasel scotol ti mantale.   
\p
\v 11 Ati vaꞌi sꞌelan laj jbijubtasoxuque, tucꞌulanic me ti cꞌu sꞌelan cuxuloxuc liꞌ ta banomile. Naꞌic me ti jaꞌ xa yorail ti ta xavicꞌ asatique. Yuꞌun poꞌot xa sta yorail ti colebale. Yan ti cꞌalal laj jchꞌuntic talele, jal to scꞌan.  
\v 12 Poꞌot xa xꞌechꞌ ti acꞌobale. Ta xa sacub talel ti osile. Jech o xal un, ictaic ta spasel ti cꞌusitic sventa icꞌal osile. Lapic ti amacobbailic ta spasel ti sventa saquil osile jech chac cꞌu chaꞌal jun soldado ti ta slap ti smacobbaile.  
\v 13 Oyuc me jtuqꞌuiltic jech chac cꞌu chaꞌal ti buchꞌu ta xanav ta cꞌacꞌaltique. Maꞌuc noꞌox me jtamojtic ti yacubele, ti xvochvunet ta veꞌel uchꞌ voꞌ ta spasel qꞌuine, ti mulivajele, ti cꞌusi chopol ta qꞌuelele, ti cꞌopetique, ti itꞌix oꞌntonale.  
\v 14 Jaꞌ lec, acꞌo amaquinic o ti Cajvaltic Jesucristo stuque. Mu me staojuc yav cꞌupil xavaꞌi ta spasel ti cꞌusi ta scꞌan ti atalelique.   
\c 14  
\s1 Mu xaloꞌilta ti avermanoe  
\p
\v 1 Mi oy buchꞌu junuc ti muꞌyuc to yip ti yoꞌntone, ichꞌo ta mucꞌ. Mu xavul abaic schiꞌuc ti cꞌusi vocol ta aꞌyiele.  
\v 2 Ta xcaltic noꞌox jech chac cꞌu chaꞌal liꞌe. Oy jlom jchunolajeletic ti xchꞌunojic ti xuꞌ ta slajesic scotol ti cꞌusi ta staique. Pero oy jlom ti xchibet yoꞌntonique. Jech o xal un, uni itaj noꞌox ta slajesic.  
\v 3 Ti buchꞌu ta slajes scotole, mu xuꞌ sbaj ti buchꞌu ti tꞌujbil ti sveꞌel ti ta slajese. Jaꞌ jech xtoc ti buchꞌu tꞌujbil ti sveꞌel ta slajese, mu me slaban xtoc ti buchꞌu ta slajes scotole. Yuꞌun coꞌol icꞌbilic yuꞌun ti Diose.  
\v 4 ¿Buchꞌuot yaꞌyel ta xanaꞌlebe ti yajꞌabtel yane? Mi lec ta xbat yuꞌun, mi chopol ta xbat yuꞌun, jaꞌ sventa ti yajvale. Pero ta xcom ta lec. Yuꞌun ti Cajvaltique oy smucꞌul stsatsal yoꞌ jech ta xcom ta lec yuꞌun.   
\p
\v 5 Ta xcaltic noꞌox jech chac cꞌu chaꞌal liꞌe. Oy jlom jchꞌunolajeletic ti oy bu jun cꞌacꞌal ti tsots scꞌoplal ta xaꞌiique. Oy yan jchꞌunolajeletic ti coꞌol noꞌox sꞌelan ta xaꞌiic scotol ti cꞌacꞌale. Jaꞌ lec, laꞌ jnoptic lec ta coꞌntontic ta jujun tal ti cꞌusi scꞌan pasele.  
\v 6 Ti buchꞌu ta xchabi ti jun cꞌacꞌale, jaꞌ ta spasic jech, yoꞌ ta xacꞌ ta ichꞌel ta mucꞌ ti Cajvaltique. Ti buchꞌu mu xchabi ti jun cꞌacꞌale, jaꞌ ta spasic jech, yoꞌ ta xacꞌ ta ichꞌel ta mucꞌ ti Cajvaltic ti jech mu xchabie. Jaꞌ jech xtoc ti buchꞌu ta slajes scotole, jaꞌ ta spasic jech, yoꞌ ta xacꞌ ta ichꞌel ta mucꞌ ti Cajvaltique. Yuꞌun ta xalbe vocol ti Diose. Jaꞌ jech xtoc ti buchꞌu tꞌujbil ti sveꞌel ta slajese, jaꞌ ta spasic jech, yoꞌ ta xacꞌ ta ichꞌel ta mucꞌ ti Cajvaltique. Jaꞌ jech xtoc ta xalbe vocol ti Diose.   
\p
\v 7 Yuꞌun muꞌyuc buchꞌu junucal sventainoj sba stuc ti liꞌ cuxul ta sba banomile. Mi jaꞌuc sventainoj sba stuc ti jech ta xchame.  
\v 8 Ti jech cuxulotique, cuxulotic yoꞌ jech ta xitun yuꞌun ti Cajvaltique. Ti jech ta xijchamotique, ta xijcham yoꞌ jech ta xitun yuꞌun ti Cajvaltique. Jech o xal un, manchuc mi cuxulotic, mi chamemotic, yuꞌunotic o ti Cajvaltique.  
\v 9 Yuꞌun ti Cristoe icham. Jaꞌ jech xtoc ichaꞌcuxi, yoꞌ jech ta xcꞌot ta Ajvalil yuꞌun scotol ti buchꞌutic chamemic xae schiꞌuc ti buchꞌutic cuxulic toe.   
\p
\v 10 Pero ti voꞌote, ¿cꞌu chaꞌal ta xaloꞌilta, cꞌu chaꞌal ta xabaj ti avermanoe? Yuꞌun jcotoltic ta xcꞌot jvaꞌan jbatic ta stojol ti Cristoe, yoꞌ jech ta xischapanotic.  
\v 11 Yuꞌun jech ta xal ti Dios ti tsꞌibabil ta scꞌope:  
\q1 Ti jech cuxulune, scotolic ta squejan sbaic ta jtojol.  
\q1 Scotol jamal ta xalic ti Diosune,  
\m xi.  
\v 12 Jech o xal un, jujunotic ta xcacꞌtic cuenta ta stojol ti Diose.   
\s1 Mu me xayanijesbe yoꞌnton ti avermanoe  
\p
\v 13 Jech o xal un, mu xa me jloꞌilta jbatic. Jaꞌ lec ti laꞌ jtucꞌulan jbatique, yoꞌ jech mu jyanijesbetic yoꞌnton, yoꞌ jech mu sta smul cuꞌuntic ti quermanotique.  
\v 14 Ti jech jchꞌunoj ti Cajvaltique, jnaꞌ lec ti maꞌuc mulil ti ta jlajes ti cꞌusiuc noꞌox veꞌlile. Pero mi oy buchꞌu ta snop ti jaꞌ mulil ta xaꞌi ti cꞌusi ta slajese, melel, jech onoꞌox ta sta smul ti mi ta slajese.  
\v 15 Ti mi ta xayanijesbe sjol yoꞌnton ti avermano yuꞌun ti cꞌusi ta xalajese, muꞌyuc xa ti scꞌuxul avoꞌntone. Mu me xavacꞌ ta chꞌayel ti quermanotic yuꞌun ti cꞌusiuc noꞌox ta xalajese cꞌalal icham ti Cristo ta sventae.  
\v 16 Mu xavaqꞌuic ta chopol cꞌoptael ti cꞌusi lec achꞌunojique.  
\v 17 Yuꞌun ti ventainel yuꞌun ti Diose maꞌuc tsots scꞌoplal ti cꞌusi ta jlajestique, ti cꞌusi ta xcuchꞌtique. Ti tsots scꞌoplale, jaꞌ ti tucꞌ coꞌntontique, ti jun coꞌntontique, ti xijmuyubaj ta sventa ti Chꞌul Espíritue.  
\v 18 Ti buchꞌu jech yacꞌoj sba ta tunel yuꞌun ti Cristoe, lec xꞌilat yuꞌun ti Diose. Jaꞌ jech xtoc lec ta xꞌilat yuꞌun ti cristianoetique.   
\p
\v 19 Jech o xal un, cacꞌtic persa ta saꞌel batel ti bu ta xacꞌ jun coꞌntontique, yoꞌ jech xuꞌ ta jcolta jbatic ta jujun tal ta xchꞌunel ti Cajvaltique.  
\v 20 Mu xasoquesbe yabtel ti Dios ta scoj ti cꞌusi xuꞌ ta xalajese. Scotol ti veꞌlile lec onoꞌox. Muꞌyuc cꞌusi chopol. Pero ti bu chopole, jaꞌ ti ta xalajes ti bu xuꞌ ti ta sta o smul avuꞌun ti yane.  
\v 21 Lec ti mu jlajestic ti beqꞌuete, ti mu xcuchꞌtic ti vinoe, ti mu ta jpastic ti cꞌusi yane, yoꞌ jech mu xyanij yoꞌnton ti avermanoe, yoꞌ jech mu sta smul, yoꞌ jech mu xchibaj yoꞌnton ti cꞌu sꞌelan xchꞌunoje.  
\v 22 Ti cꞌu sꞌelan achꞌunoje, avuꞌunuc atuc ta stojol ti Diose. Toj yan noꞌox yutsil ti buchꞌu mu xꞌacꞌbat snaꞌ ta yoꞌnton ti jaꞌ smul ti cꞌusi ta spase.  
\v 23 Yan ti buchꞌu xchibet yoꞌnton ti cꞌusi ta slajese, ta sta smul ti jech ta slajese. Jaꞌ ti mu sjunuluc yoꞌnton ta slajese. Cꞌusiuc noꞌox ti mu jechuc xchꞌunoj ti ta spase, ti jaꞌ noꞌox ta suj sbae, jaꞌ mulil.   
\c 15  
\s1 Cꞌuxubino achiꞌiltac. Maꞌuc noꞌox ta xacꞌuxubin aba atuc  
\p
\v 1 Ti voꞌotic ti oy xa yip ti coꞌntontic ta xchꞌunele, laꞌ quicatsinbetic svocolic ti buchꞌu chꞌabal yip ti yoꞌntonique. Maꞌuc noꞌox me ti lec ta xcaꞌi jba jtuctique.  
\v 2 Ta jujun tal ti voꞌotique laꞌ jpastic ti cꞌusitic xtun yuꞌunic ti yan jchꞌunolajeletique, yoꞌ jech lec oyic, yoꞌ jech ta xꞌayan más ta yoꞌnton ta yichꞌel ta mucꞌ ti Diose.  
\v 3 Yuꞌun ti Cristoe maꞌuc laj spas ti cꞌusi lec ta xaꞌi ti stuque. Yuꞌun jech icꞌot ta stojol jech chac cꞌu chaꞌal ti tsꞌibabil ta scꞌop Diose: “Scotol ti cꞌusitic chopol ilocꞌ ta yeic ti buchꞌutic laj scrontainote, jaꞌ cajal icꞌot ta jba”, xut ti Diose.  
\v 4 Scotol ti cꞌusitic tsꞌibabil ta scꞌop Dios ta voꞌnee, jaꞌ ta xischanubtasotic. Yuꞌun cꞌalal ta jqꞌueltic ti cꞌu sꞌelan istsꞌic yuꞌun ti vocol ti voꞌne cristianoetique, ti cꞌu sꞌelan icoltaat yuꞌun ti Diose, jech o xal un, tey ta jtatic ti spatobil coꞌntontique.  
\v 5 Ti Dios ti jaꞌ ta xacꞌ smucꞌul coꞌntontique, ti jaꞌ ta spat coꞌntontique, acꞌo scoltaoxuc yoꞌ jech jun avoꞌntonic cuxuloxuc jech chac cꞌu chaꞌal ta scꞌan ti Jesucristoe.  
\v 6 Yuꞌun jaꞌ jech scꞌan xapasic yoꞌ jech jun noꞌox acꞌopic ta xalequil-cꞌoponic ti Diose, jaꞌ ti Stot ti Cajvaltic Jesucristoe.   
\s1 Ta xichꞌ alel ti lequil achꞌ cꞌop ta stojol ti jyanlumetique  
\p
\v 7 Lecuc xavil abaic acotolic jech chac cꞌu chaꞌal lec laj yilotic ti Cristoe, yoꞌ jech lec ta xbat scꞌoplal ti Diose.  
\v 8 Vuꞌun ta xcal ti tal yacꞌ sba ta tunel ti Cristo ta stojol ti jꞌisraeletique, yoꞌ jech ta xcꞌot ta pasel ti cꞌusi albilic ti jmolmucꞌtotic ta voꞌne yuꞌun ti Diose, yoꞌ jech ta xvinaj ti xcꞌot xcꞌopoj ti cꞌusi yaloj onoꞌoxe.  
\v 9 Ital ti Cristo ta stojol ti jyanlumetic xtoque, yoꞌ jech ta xalequil-cꞌopojic ta stojol ti Dios ta sventa ti scꞌuxul yoꞌntone. Yuꞌun jech ta xal ti tsꞌibabil ta scꞌop Diose:  
\q1 Jech o xal un, ta jvinajesbot acꞌoplal ta stojol ti jyanlumetique.  
\q1 Jaꞌ jech xtoc ta xiqꞌuejin ti aqꞌuejoj ti jaꞌ avichꞌel ta muqꞌue,  
\m xi ti Davide.  
\v 10 Ti ta yan scꞌop Diose jech ta xal:  
\q1 Ti voꞌoxuc jyanlumoxuque, muyubajanic schiꞌuc ti yuꞌuntac ti Diose,  
\m xi ti Moisese.  
\v 11 Ti ta yan xtoque jech ta xal:  
\q1 Acotolic ti voꞌoxuc jyanlumoxuque, lequil cꞌopojanic ta stojol ti Cajvaltique.  
\q1 Acotolic, alic ti smucꞌul stsatsal ti Cajvaltic ta stojol ti cristianoetique,  
\m xi ti Davide.  
\v 12 Jaꞌ jech laj stsꞌiba ti Isaías xtoque:  
\q1 Ta xvocꞌ talel jun snitilul ti Isaie, ti jaꞌ ta xꞌoch ta Ajvalil yuꞌun ti jyanlumetique.  
\q1 Jech ti stuquique tey ta staic ti spatobil yoꞌntonique,  
\m xi.   
\p
\v 13 Ti Dios ti ta xacꞌbotic ti spatobil coꞌntontique, acꞌo yacꞌboxuc ti jech xamuyubajique. Acꞌo yacꞌboxuc jun avoꞌntonic ta xchꞌunel ti Diose, yoꞌ jech ta sventa smucꞌul stsatsal ti Chꞌul Espíritue, acꞌo ayanuc más ta avoꞌntonic ta smalael ti cꞌusi ta xavichꞌique.   
\p
\v 14 Quermanotac, ta xcaꞌi ta coꞌnton ti oy yutsilal slequilal avoꞌntonique. Xanaꞌic lec cꞌu sꞌelan ta xabijubtas abaic ta jujun tale.  
\v 15 Pero laj jtsꞌibaboxuc ti jcarta liꞌe, ti jamal laj calboxuc ti cꞌusi scꞌan ta xapasique, yoꞌ jech mu xchꞌay ta avoꞌntonic. Jech laj jpas, yuꞌun ta slequilal yoꞌnton laj yacꞌbun cabtel ti Diose.  
\v 16 Yuꞌun yajtunelun ti Jesucristo ta atojolic ti jyanlumoxuque. Ti cabtel ti ta jpase, jaꞌ ta xcal ti lequil achꞌ cꞌop ti jaꞌ acolebalic ti yacꞌoj ti Diose, yoꞌ jech ti voꞌoxuque coꞌol sꞌelanic matanal ta xcꞌot avaꞌan abaic ta stojol ti Diose, yuꞌun lecubtasbiloxuc xa yuꞌun ti Chꞌul Espíritue.   
\p
\v 17 Ti jech jchꞌunoj ti Jesucristoe, yan yutsil ta xcaꞌi ti liꞌabtej xa yuꞌun ti Diose.  
\v 18 Yuꞌun jaꞌ noꞌox ta xcal ti cꞌusitic cꞌotem ta pasel cuꞌun ta sventa ti Jesucristoe, yoꞌ jech ti jyanlumetique ta xchꞌunic ti Diose. Ti vaꞌi sꞌelan ti laj xchꞌunic ti jyanlumetique, jaꞌ ta sventa ti jcꞌope, ti cꞌusi lec laj jpase.  
\v 19 Jaꞌ jech xtoc ivinaj smucꞌul stsatsal ti Dios ta jtojole ta sventa ti coltabilun yuꞌun ti Chꞌul Espíritue. Ti jech taje, jech icꞌot ta tsutsel cuꞌun ta yalel ti colebal lequil achꞌ cꞌop yuꞌun ti Cristoe, ti ilic talel cuꞌun ta Jerusalene, icꞌot cꞌalal to sjoylej Ilírico banomil.  
\v 20 Tey laj cacꞌ batel persa ta yalel ti colebale ti bu muꞌyuc to yaꞌbinojic scꞌoplal ti Cristoe, yoꞌ jech mu teyuc ta jvaꞌan cabtel ta sba ti sliqueb ti bu liquem xa yuꞌun ti yane.  
\v 21 Ti vuꞌune jech ta jpas jech chac cꞌu chaꞌal ta xal ti tsꞌibabil ta scꞌop Diose:  
\q1 Ta xilic ti buchꞌutic mu to yaꞌbinojic ti scꞌoplale.  
\q1 Ta xlic stucꞌulanic lec ti buchꞌutic muꞌyuc yaꞌbinojic ti scꞌoplale,  
\m xi.   
\s1 Ti Pabloe ta snop ti ta xbat ta Romae  
\p
\v 22 Ta melel, oy ti cabtele, macalun yuꞌun. Jech o xal un, muꞌyuc cꞌusi xcut chtal jqꞌueloxuc, acꞌo mi ep ta velta ta jcꞌan jqꞌueloxuc caꞌie.  
\v 23 Avi tana liꞌ une, tsuts xa ti cabtel ti bu cꞌalal xijoyet batele. Jaꞌ jech xtoc oy xa ep jabil ti ta jcꞌan ta jqꞌueloxuc caꞌie.  
\v 24 Jech o xal un, cꞌalal ta xibat ta Españae, ta xꞌechꞌ jqꞌueloxuc. Cꞌalal mi echꞌ xa jqꞌueloxuc une, tey ta xvinaj mi xuꞌ xacoltaicun batel ta sventa jbe.  
\v 25 Avi liꞌe, ta xibat ta Jerusalén. Yuꞌun ta xquichꞌ batel juteb ti cꞌusi xtun yuꞌunic ti jchꞌunolajeletic teye.  
\v 26 Yuꞌun ti jchꞌunolajeletic ti oyic ta Acaya ta Macedonia banomile laj xa snopic ti ta stsobic ti cꞌusi oy yuꞌunique, yoꞌ jech ta xacꞌbeic batel ti jchꞌunolajeletic ti buchꞌutic abol sbaic tey ta Jerusalene.  
\v 27 Lec laj yaꞌiic ti jech laj spasique. Oy razon ti jech ta spasique. Yuꞌun oy yilic ta stojolic ti jꞌisraelal jchꞌunolajeletique. Yuꞌun ti lequil achꞌ cꞌop ti iꞌacꞌbatic yuꞌun ti Diose, laj yaqꞌuic batel ta stojol ti jyanlumetique. Jech o xal un, jaꞌ yabtelic ti ta scoltaic batel ti jꞌisraelal jchꞌunolajeletic ti cꞌusi oy yuꞌunique.  
\v 28 Cꞌalal mi laj coꞌnton ta yaqꞌuel comel ti cꞌusi laj stsobic ti jyanlumetique, tsꞌacal to un, tey ch-echꞌ jqꞌueloxuc cꞌalal ta xibat ta Españae.  
\v 29 Cꞌalal ta xicꞌot teye, ta xcaꞌi ti coltabilun yuꞌun ti Cristoe, yoꞌ jech ta jcoltaoxuc sventa ti scꞌope.   
\p
\v 30 Quermanotac, ta jcꞌanboxuc vocol ta sventa ti Cajvaltic Jesucristoe, ta sventa ti scꞌuxul coꞌntontic ti yacꞌojbotic ti Chꞌul Espíritue, coltaicun ta scꞌoponel ti Dios ta sventa ti cabtele.  
\v 31 Cꞌanbeic ti Diose ti acꞌo xispojune, yoꞌ jech mu xiyilbajin ti buchꞌu chopol yoꞌntonic ti oy ta Judeae. Jaꞌ jech xtoc, cꞌanbeic ti Diose ti ichꞌbiluc ta mucꞌ acꞌo cꞌotuc ti matanal ti quichꞌoj batel ta stojol ti quermanotic ti oy ta Jerusalene.  
\v 32 Jech xtoc, cꞌanbeic ti Diose, mi jech ta scꞌane, yoꞌ jech ximuyubaj ta xꞌechꞌ jqꞌueloxuque, yoꞌ jech ta jcux coꞌnton ta atojolic.  
\v 33 Ti Dios ti ta xacꞌ jun coꞌntontique, acꞌo xchiꞌinoxuc comel acotolic. Jechuc.   
\c 16  
\s1 Ti chabanuc ta jujun tale  
\p
\v 1 Tey ta jcꞌubanboxuc ta atojolic ti quermanatic ants Febee, ti lec iꞌabtej ta stojolic ti jchꞌunolajeletic ta Cencrea jteclume.  
\v 2 Ta sventa ti Cajvaltique, ichꞌbeicun ta mucꞌ. Yuꞌun jaꞌ jech cabteltic ta jpastic ti voꞌotic jchꞌunolajelotique. Coltaic me ti cꞌusi ta xtun yuꞌune. Yuꞌun ti stuque ep xa icoltavan. Jaꞌ jech xtoc laj scoltaun ec.   
\p
\v 3 Chabanuc xavalbe yaꞌi ti Priscilae, ti Aquilae, ti jaꞌ jchiꞌiltac ta abtel ta sventa ti Cristo Jesuse.  
\v 4 Ti stuquique jutuc mu ilajic ta milel yoꞌ jech ta xispojicun. Coliyalbun ti jech laj spasique. Pero maꞌuc noꞌox ti vuꞌune. Jaꞌ jech ta xalic scotolic ti jyanlum jchꞌunolajeletique.  
\v 5 Chabanuc xavalbe yaꞌiic xtoc ti jchꞌunolajeletic ti ta stsob sbaic ta sna ti Priscilae, ti Aquilae. Chabanuc xavalbe yaꞌi ti Epeneto ti lec ta xquil jbacutique, ti baꞌyel laj xchꞌun ti Cristo ti ta Acaya banomile.  
\v 6 Chabanuc xavalbe yaꞌi ti Maríae ti ep iábtej ta atojolique.  
\v 7 Chabanuc xavalbe ti jvinqueleltac Andrónicoe schiꞌuc ti Juniase ti jaꞌ jchiꞌiltac ta chuquel to oxe. Jaꞌic ti buchꞌutic lec ojtiquinbilic yuꞌun ti jcholcꞌopetique. Jaꞌic ti buchꞌutic ti baꞌyel lic xchꞌunic ti Cristoe, tsꞌacal to ti vuꞌune.   
\p
\v 8 Chabanuc xavalbe yaꞌi ti Ampliase ti lec ta xquil jbacutic ta sventa ti Cajvaltique.  
\v 9 Chabanuc xavalbe yaꞌi ti Urbanoe ti jaꞌ jchiꞌiltic ta abtel ta sventa ti Cristo Jesuse. Chabanuc xavalbe yaꞌi ti Estaquise, jaꞌ ti lec ta xquil jbacutique.  
\v 10 Chabanuc xavalbe yaꞌi ti Apelese ti ep laj yacꞌ iluc ta melel ti xchꞌunoj ti Cristoe. Chabanuc xavalbe yaꞌiic ti cꞌu yepal oy ta sna ti Aristóbuloe.  
\v 11 Chabanuc xavalbe yaꞌi ti jvinquelel Herodione schiꞌuc ti cꞌu yepal oy ta sna ti Narcisoe ti ta xchꞌunic ti Cajvaltique.  
\v 12 Chabanuc xavalbe yaꞌiic ti Trifenae, ti Trifosae ti jaꞌ ta xꞌabtejic ta yabtel ti Cajvaltique schiꞌuc ti Quermanatic Pérsidae ti ep iꞌabtej ta yabtel ti Cajvaltique.  
\v 13 Chabanuc xavalbe yaꞌi ti Rufoe ti jaꞌ lequil jchꞌunolajel yuꞌun ti Cajvaltic ta xꞌilat yuꞌun ti jchꞌunolajeletique. Chabanuc xavalbe yaꞌi ti smeꞌe ti coꞌol sꞌelan jmeꞌ ta xcaꞌie.  
\v 14 Chabanuc xavalbe yaꞌiic ti Asíncritoe, ti Flegontee, ti Hermase, ti Patrobase, ti Hermese, schiꞌuc ti yan jchꞌunolajeletic ti jmoj ta stsob sbaique.  
\v 15 Chabanuc xavalbe yaꞌiic xtoc ti Filólogoe, ti Juliae, ti Nereoe, schiꞌuc ti schiꞌil ta voqꞌuel ti Nereoe, ti Olimpase, schiꞌuc scotol ti jchꞌunolajeletic ti jmoj ta stsob sbaic schiꞌuque.   
\p
\v 16 Chabanuc xavalbe abaic ta jujun tal. Tsacbo abaic acꞌobic. Chabanucoxuc xayalboxuc scotol ti jchꞌunolajeletic yuꞌun ti Cajvaltic ti oyic ta jujun tsobobbail ti bu oyune.   
\p
\v 17 Ta jcꞌanboxuc vocol, Quermanotac, qꞌuelic me lec ti buchꞌu ta xchꞌac svinique, ti ta xchibajesoxuque. Yuꞌun ti buchꞌu jech ta spas taje, ta scrontain ti cꞌu sꞌelan laj avichꞌic chanubtasele. Jaꞌ yuꞌun un, mu xachanbeic yoꞌntonic.  
\v 18 Yuꞌun ti buchꞌutic jech taje, maꞌuc yajtuneltac ti Cajvaltic Jesucristoe. Yuꞌun jaꞌ noꞌox ta spasic ti cꞌusi ta scꞌan ti yoꞌnton stuquique. Yuꞌun ta sloꞌlaic ti buchꞌutic coꞌol sꞌelan ololetic ti yoꞌntonic ta sventa ti lec xa ti scꞌope, ti jun xa yutsil ta aꞌyele.  
\v 19 Yuꞌun vinajem acꞌoplalic ti achꞌunojic ti Cajvaltique. Jech o xal ximuyubaj xa avuꞌunic. Ta jcꞌan ti oyuc abijilic ta spasel ti leque. Maꞌuc ta jcꞌan ti ta xapasic ti chopole.  
\v 20 Ti Dios ti ta xacꞌ jun avoꞌntonique poꞌot xa ta xacꞌ apechꞌic ta teqꞌuel ti pucuje. Acꞌo svaꞌan sba ta atojolic ti Cajvaltic Jesucristoe.   
\p
\v 21 Chabanuc xayalboxuc ti Timoteoe ti jaꞌ jchiꞌil ta abtele. Chabanuc xayalboxuc ti jvinqueleltac Lucioe, ti Jasone, ti Sosípatere.  
\v 22 Chabanuc xcalboxuc ta sventa ti Cajvaltique ti vuꞌun Tercioun ti ta jtsꞌiba ti carta liꞌe.   
\p
\v 23 Chabanuc xayalboxuc ti Gayoe, jaꞌ ti tey jchꞌamunojbe ti snae. Jaꞌ jech xtoc ta xacꞌ ta chꞌom ti snae ti tey ta stsob sbaic ti jchꞌunolajeletique. Chabanuc xayalboxuc ti Erastoe ti jaꞌ jchabiej taqꞌuin yuꞌun ti jteclum liꞌe. Chabanuc xayalboxuc ti quermanotic Cuartoe.   
\p
\v 24 Acꞌo svaꞌan sba ti Cajvaltic Jesucristo ta atojolic acotolique. Jechuc.   
\s1 Jaꞌ scꞌoplal ti jun yutsil ti Diose  
\p
\v 25 Avi tana un, laꞌ jlequil-cꞌoptatic ti Diose ti Buchꞌu xuꞌ yuꞌun ta stsatsubtas avoꞌntonic coꞌol schiꞌuc ti lequil achꞌ cꞌop ti jaꞌ colebale ti vuꞌun ta xcale, ti jaꞌ scꞌoplal ti Jesucristoe. Ti lequil achꞌ cꞌope coꞌol schiꞌuc ti cꞌusi snopoj talel ti Dios ti cꞌalal muꞌyuc to ox meltsajem ti banomile. Pero mucul to ox.  
\v 26 Pero avi tana un, laj xa yacꞌ ta naꞌel coꞌol schiꞌuc ti laj stsꞌiba comel ti jꞌalcꞌopetique, coꞌol schiꞌuc smantal ti cuxul Diose. Ti cꞌusi mu xvinaj to ox ti snopoj ti Diose, laj xa yacꞌ ta ojtiquinel ta stojol scotol ti cristianoetic ti oy ta sjoylej banomile, yoꞌ jech ta xchꞌunic.   
\p
\v 27 Ti Dios ti jelavem sbijile, ichꞌbiluc ta mucꞌ sbatel osil ta sventa ti Jesucristoe. Jechuc.