\id PHP  
\h FILIPENSES 
\toc2 FILIPENSES 
\toc1 FILIPENSES 
\mt1 Filipenses  
\c 1  
\s1 Ti cꞌalal tiqꞌuil ta chuquel ti Pabloe, ta stac batel scarta ta stojol ti jchꞌunolajeletic ti oy ta Filipose  
\p
\v 1 Vuꞌun Pabloun schiꞌuc ti Timoteoe, yajtuneluncutic ti Jesucristoe. Ta jtsꞌibaboxuc talel ti jcartacutic liꞌe ti voꞌoxuc jchꞌunolajeloxuc ti nacaloxuc ta jteclum Filipose, ti ancianooxuque, schiꞌuc ti diacanooxuque, ti yuꞌunoxuc xa ti Diose ta sventa ti oyoxuc xa ta stojol ti Jesucristoe.  
\v 2 Ichꞌic bendición yuꞌun ti Jtotic Diose schiꞌuc ti Cajvaltic Jesucristoe. Acꞌo yacꞌboxuc jun avoꞌntonic.   
\s1 Ti Pabloe ta scꞌoponbe Dios ti jchꞌunolajeletique  
\p
\v 3 Cꞌalal jujun velta ta jvulesoxuc ta coꞌntone, colaval, xichi ta stojol ti Diose.  
\v 4 Cꞌalal ta jta ta cꞌoponel ti Dios ta atojolique, ximuyubaj xa.  
\v 5 Yuꞌun ta sliquebal onoꞌox lic acoltaicun ta sventa ti lequil achꞌ cꞌope. Jech to staoj yav ta xapasic avi tana liꞌe.  
\v 6 Cꞌalal lic sliques ti lequil abtel ti Dios ta atojolique, jnaꞌ lec ti lec xvul staoxuc ti Cajvaltic ti cꞌalal ta xchaꞌsut talele.  
\v 7 Toj cꞌuxoxuc ta coꞌnton. Jech o xal toj lec ti jech ta jnop acꞌoplalique. Yuꞌun coꞌol ta xquichꞌtic bendición ta sventa ti jech coꞌol ti cabteltique, acꞌo mi tiqꞌuilun ta chuquel o mi icꞌbilun ta stojol ti jchapanvanejetique, yoꞌ jech ta xcacꞌ ta aꞌyiel ti melel ta xijcolotic yuꞌun ti lequil achꞌ cꞌope.  
\v 8 Snaꞌ lec ti Diose ti ep cꞌuxoxuc ta coꞌntone jech chac cꞌu chaꞌal scꞌuxul yoꞌnton stuc ti Jesucristoe.  
\v 9 Cꞌalal ta jcꞌopon ti Diose, ta jcꞌanbe ti acꞌo xayacꞌboxuc más ti scꞌuxul avoꞌntonique schꞌiuc ti ayanuc abijilic ta yojtiquinel scotole,  
\v 10 yoꞌ jech ta xanaꞌic lec stꞌujel ti cꞌusi leque, yoꞌ jech lec oyoxuc, muꞌyuc amulic xvul staoxuc ti Cajvaltic cꞌalal ta xtale.  
\v 11 Jaꞌ yuꞌun un, jech ta xꞌabtej ti Jesucristo ta atojolique, yoꞌ jech ta xꞌayan ta atojolic ti lec ta xapasique, yoꞌ jech ichꞌbil ta mucꞌ, lec scꞌoplal ti Dios avuꞌunique.   
\s1 Ti vuꞌune jaꞌ jcuxlejal ta xcaꞌi ti Cristoe  
\p
\v 12 Ta jcꞌan ta xavaꞌic, Quermanotac, ti cꞌusi icꞌot ta jtojole ilocꞌ venta ta jꞌechꞌel ta yalel batel ti colebal lequil achꞌ cꞌope.  
\v 13 Yuꞌun scotol ti soldadoetic ta cabiltoe schiꞌuc ti yan cristianoetique snaꞌic lec ti tiqꞌuilun ta chuquel ta sventa ta jtsꞌacli ti Cristoe.  
\v 14 Jaꞌ jech xtoc cꞌalal laj yilic ti jchꞌunolajeletic ti ochemun ta chuquele, jutuc xa mu scotolicuc ti mu ta xiꞌeluc ta xalic ti scꞌop Diose. Yuꞌun más to laj spat yoꞌntonic ta stojol ti Cajvaltique.   
\p
\v 15 Oy jlom, ta melel ta soquemal yoꞌntonic, ta yitꞌixal yoꞌntonic, ta xalic scꞌoplal ti Cristoe. Pero oy jlom xtoc ti ta slequil yoꞌntonic ta xalique.  
\v 16 Oy jlom mu ta slequilaluc yoꞌntonic ta xalic scꞌoplal ti Cristoe. Jaꞌ noꞌox oy ta yoꞌntonic ti cꞌusi ta scꞌan stuquique. Yuꞌun ta scꞌan ta xilbeicun yaꞌi jvocol ti jech tiqꞌuilun ta chuquele.  
\v 17 Pero ti yan xtoque ta spasic ta scꞌuxul yoꞌntonic. Yuꞌun ti jech tiqꞌuilun ta chuquele, snaꞌic lec ti jaꞌ cabtel ta xcacꞌ ta aꞌyiel ti colebal lequil achꞌ cꞌope.  
\v 18 ¿Cꞌusi chcal un chaꞌe? Yuꞌun ta onoꞌox xtanij batel scꞌoplal ti Cristoe, acꞌo mi ta soquemal yoꞌntonic o mi ta slequilal yoꞌntonic, ximuyubaj ti jech taje.   
\p
\v 19 Jaꞌ jech xtoc más to ximuyubaj xa ti oy cꞌusi lec ta jtae ta sventa ti ta xataic ta cꞌoponel ti Diose, ti jech ta xiscoltaun ti Chꞌul Espíritu yuꞌun ti Jesucristoe.  
\v 20 Ti cꞌusi ta jcꞌane, ti ta jmalae, jaꞌ ti mu xiqꞌuexave, ti jamaluc que ta yalel scꞌoplal ti Cristoe, yoꞌ jech staojuc yav ta xvinaj o batel smucꞌul stsatsal ti Cristo ta sventa ti cꞌusiuc noꞌox ta jpase, acꞌo mi ta xicham o cuxul ta xicom.  
\v 21 Yuꞌun ti mi jech cuxulun toe, jaꞌ ta xcacꞌ ta ichꞌel ta mucꞌ ti Cristoe. Pero mi lichame, laj xa jpas canal umbi.  
\v 22 Yan ti mi cuxulun ta xicome, xuꞌ ta xiꞌabtej yuꞌun ti Cajvaltique. Jech o xal mu stacꞌ aꞌyeluc chcaꞌi ti cꞌusi xuꞌ ta jtꞌuje.  
\v 23 Yuꞌun lec ti chaꞌtos taje. Pero mu jnaꞌ bu junucal ta jtꞌuj. Ti jun coꞌntone, jcꞌan chamcun caꞌi, yoꞌ jech chba jchiꞌin ti Cristoe. Yuꞌun jaꞌ más lec chcaꞌi ti teyucun xae.  
\v 24 Pero ti jun coꞌntone, tsots scꞌoplal chcaꞌi ti jech cuxulucun toe, yoꞌ jech ta xitun avuꞌunic.  
\v 25 Yuꞌun ti jech ta xcaꞌi ti ta to xitun avuꞌunique, jech o xal cuxul to ta xicom, yoꞌ jech ta jcoltaoxuc ta yaqꞌuel batel persa, yoꞌ jech más to xamuyubajic ta xchꞌunel ti Cajvaltique.  
\v 26 Jaꞌ yuꞌun un, tey xamuyubajic ta stojol ti Jesucristoe cꞌalal tey ta xicꞌot ta atojolique.   
\p
\v 27 Jaꞌ noꞌox un, aqꞌuic persa, cuxianic coꞌol schiꞌuc jech chac cꞌu chaꞌal ta xal ti lequil achꞌ cꞌop yuꞌun ti Cristoe. Jaꞌ yuꞌun un, acꞌo mi ta xicꞌot ta atojolic, o mi nom oyun, pero ta jcꞌan ti ta xcaꞌi acꞌoplalic ti jech staoj yav avoꞌntonique, ti jun avoꞌntonic ta xavaqꞌuic persa acotolic ta xchꞌunel ti colebal lequil achꞌ cꞌope.  
\v 28 Pero mu xavacꞌ abaic ta sibtasel yuꞌun ti avajcrontaique. Ti jech mu xaxiꞌic taje, jaꞌ svinajeb ti chꞌayel ta xbat ti stuquique. Jaꞌ jech xtoc jaꞌ svinajeb ti ta xlic talel acoltaelic ta stojol ti Diose.  
\v 29 Ti jech oyoxuc ta stojol ti Cristoe, laj ataic ti ta xatunique. Pero maꞌuc noꞌox ti jech ta xachꞌunique. Jaꞌ jech xtoc ti jech ta xavichꞌ avocolic ta sventae.  
\v 30 Ti vuꞌune schiꞌuc ti voꞌoxuque coꞌol ta xquichꞌtic ti crontainele. Avilojic xa cꞌu sꞌelan laj quichꞌ crontainel ta voꞌne. Jech to ta xquichꞌ crontainel avi tana liꞌe.   
\c 2  
\s1 Ti Cristoe laj sbicꞌtajes sba, tsꞌacal to iꞌacꞌat ta ichꞌel ta mucꞌ  
\p
\v 1 Jaꞌ yuꞌun un, mi jaꞌ ti Cristo ta stsatsubtas avoꞌntonique, mi jaꞌ ta spatboxuc avoꞌntonic ti scꞌuxul yoꞌntone, mi oy ta atojolic ti Chꞌul Espíritue, mi xavaꞌi ti cꞌux ta xavaꞌi abaique, ti ta xacolta abaique, xmuyubaj xa coꞌnton ti jech taje.  
\v 2 Pero ta jcꞌan ti jꞌechꞌeluc xmuyubaj coꞌnton avuꞌunique, ti junuc avoꞌntonic cuxianique, ti jmojuc cꞌux ta xavaꞌi abaique, ti junuc ti cꞌusi ta xanopique, ti cꞌusi ta xavalique.  
\v 3 Maꞌuc xapasic ti cꞌusi lec ta xavaꞌi atuquique, ti ta xacꞌanic ichꞌel ta muqꞌue. Pasic ta slequilal avoꞌntonic ti cꞌusi ta xapasique. Bicꞌtajeso abaic ta stojol ti yane, ichꞌvananic me ta mucꞌ.  
\v 4 Jaꞌ me pasic ti cꞌusi ta xtun yuꞌun ti yane. Mu me jaꞌuc noꞌox xapasic ti cꞌusi ta xtun avuꞌun atuquique.   
\p
\v 5 Jechuc me xanopic jech chac cꞌu chaꞌal laj snop ti Cristoe.  
\v 6 Ti stuque, acꞌo mi jaꞌ Dios onoꞌox, pero muꞌyuc laj yal ti mu scꞌan ta xicta comel ti jech Dios onoꞌoxe.  
\v 7 Ti stuque laj yicta comel ti stalel onoꞌox Diose. Icꞌot ta jtunel cꞌalal ivocꞌ jech chac cꞌu chaꞌal cristiano.  
\v 8 Cꞌalal jech laj yichꞌ sbecꞌtal jech chac cꞌu chaꞌal cristianoe, laj xchꞌun ti cꞌusi ta scꞌan ti Diose. Laj sbicꞌtajes sba. Icham, acꞌo mi qꞌuexlal sba ti jech icham ta cruze.  
\v 9 Jaꞌ yuꞌun un, iꞌacꞌat ta ichꞌel ta mucꞌ yuꞌun ti Diose, ti jaꞌ más ichꞌbil ta mucꞌ ti sbi ta scotole.  
\v 10 Cꞌalal ta xaꞌiic Jesús ti xi scꞌoplale, scotol ti buchꞌutic oy ta vinajele, ti oy ta banomile, ti oy ta cꞌatimbaque, tey ta squejan sbaic.  
\v 11 Tey jamal ta xalic ti jaꞌ Ajvalil ti Jesucristoe, yoꞌ jech ichꞌbil ta mucꞌ ta xcꞌot ti Dios Totile.   
\s1 Ti jchꞌunolajeletique coꞌol sꞌelan luz cꞌotemic yuꞌun ti cristianoetique  
\p
\v 12 Qꞌuel avilic, Quermanotac, cꞌalal jech oyun to ox ta atojolique, laj achꞌunbeicun ti cꞌu sꞌelan laj jchanubtasoxuque. Avi tana un, ti nom oyun ta atojolique, más to me chꞌunbeicun. Xiꞌanic, bicꞌtajes abaic, tijo avoꞌntonic yuꞌun ti acoltaelique.  
\v 13 Yuꞌun ti Diose ta xacꞌboxuc yutsilal avoꞌntonic yoꞌ jech ta xapasic ti cꞌusi ta scꞌane, yuꞌun jaꞌ ta scoltaoxuc ta spasel ti cꞌusi lec ta xaꞌie.   
\p
\v 14 Mu ta ijeteluc, mu ta vulvul cꞌopuc ti cꞌusi ta xapasique.  
\v 15 Jech mu xatabat amulic, apaltaic. Jech ti chopol cristianoetic ti muꞌyuc stuqꞌuilique ta xilic ti batsꞌi yalab snichꞌnaboxuc ti Diose. Tey xaxojobinic ta stojolic. Jaꞌ yuꞌun un, coꞌol aꞌelanic jech chac cꞌu chaꞌal ti cꞌanal ti xojobin ta icꞌal osile  
\v 16 ti cꞌalal ta xavalbeic yaꞌiic ti cuxlejal achꞌ cꞌope. Jaꞌ yuꞌun un, cꞌalal ta xchaꞌsut tal ti Cristoe, tey ximuyubaj ta atojolic, jaꞌ ti jnaꞌ lec ti mu ta jecheꞌuc noꞌox ti iꞌechꞌ vocol ti liꞌabej ta atojolique.  
\v 17 Xuꞌ van ta xmal ti jchꞌichꞌele yoꞌ jech ta xcꞌot ta pasel ti lec ta xachꞌunic ti Cajvaltique, ti jaꞌ matanal ta xil ti Diose. Ti mi jech ta xcꞌot ta pasele, ximuyubaj xa. Jaꞌ jech ti voꞌoxuc eque ta xataic cuꞌun ti xamuyubajique.  
\v 18 Muyubajanic ec jech chac cꞌu chaꞌal ximuyubaj ti vuꞌune.   
\s1 Ti Timoteoe schiꞌuc ti Epafroditoe  
\p
\v 19 Ti mi jech ta scꞌan ti Cajvaltic Jesuse, tey ta jtacboxuc talel ta atojolic ta ora noꞌox ti Timoteoe, yoꞌ jech ta sqꞌueloxuc, yoꞌ jech ximuyubaj xa cꞌalal ta xiyalbe caꞌi ti acꞌoplalique.  
\v 20 Yuꞌun muꞌyuc buchꞌu yan ti jech ta snop jech chac cꞌu chaꞌal ta jnop ti vuꞌune, ti jaꞌ noꞌox ta scꞌan ti lec oyoxuque.  
\v 21 Yuꞌun scotol ti yane, jaꞌ noꞌox ta saꞌic ti cꞌusi ta xtun yuꞌun ti stuquique. Jaꞌ mu tsotsuc scꞌoplal ta xaꞌiic ti cꞌusi oy ta yoꞌnton ti Jesucristoe.  
\v 22 Pero ti voꞌoxuque anaꞌojic xa ti cꞌu sꞌelan ta xꞌabtej ti Timoteoe, ti coꞌol sꞌelan nichꞌonil ti ta scolta ti stot ta abtele. Jaꞌ jech ti Timoteoe jmoj ta xiꞌabtejcutic schiꞌuc ta yalel ti lequil achꞌ cꞌope.  
\v 23 Jaꞌ yuꞌun un, cꞌalal mi laj caꞌi cꞌu sꞌelan ta xbat ti jcꞌoplale, tey ta jtacboxuc talel ta atojolic ti Timoteoe.  
\v 24 Pero jpatoj coꞌnton yuꞌun ti Cajvaltique ti ta xtal jqꞌueloxuc ta ora noꞌoxe.   
\p
\v 25 Jaꞌ jech xtoc tsots scꞌoplal ti tey ta jtacboxuc talel ta atojolic ti quermanotic Epafroditoe, ti jaꞌ jchiꞌil ta abtele, ti jaꞌ jchiꞌil ta ichꞌ vocole, ti voꞌoxuc laj ataquic talel ti jaꞌ ta xiscoltaun ta sventa ti cꞌusi ta xtun cuꞌune.  
\v 26 Yuꞌun ti stuque oy ta yoꞌnton ta xtal sqꞌueloxuc acotolic. Jaꞌ jech xtoc oy ta vul oꞌnton, jaꞌ ti laj yaꞌi ti laj avaꞌiic ti ipaje.  
\v 27 Melel onoꞌox ti iꞌipaje, jutuc xa mu icham. Pero icꞌuxubinat yuꞌun ti Diose. Pero maꞌuc noꞌox icꞌuxubinat ti stuque. Jaꞌ jech xtoc laj xcꞌuxubinun ti Dios eque, yoꞌ jech mu xa xichꞌ schiꞌil ti at oꞌnton cuꞌune.  
\v 28 Jech o xal un, más to oy ta coꞌnton ti tey ta jtac talel ta atojolic yoꞌ jech xamuyubajic ti ta xavilic yan veltae. Jaꞌ jech xtoc yoꞌ mu teyuc noꞌox oyucun ta at oꞌnton avuꞌunic.  
\v 29 Muyubajanic, ichꞌic ta mucꞌ ti quermanotic Epafroditoe, ti jech avermano abaic ta sventa ti Cajvaltique. Ti jchꞌunolajeletic ti buchꞌutic coꞌol sꞌelan yoꞌntonic jech chac cꞌu chaꞌal ti stuque, ichꞌic me ta mucꞌ ta sjunul avoꞌntonic.  
\v 30 Yuꞌun ti stuque jutuc xa mu icham ti jech ta xtun yuꞌun ti Cristoe. Jaꞌ jech xtoc sjunul yoꞌnton itsꞌic yuꞌun svocol ti jech laj yacꞌ sba ta tunel cuꞌune ti cꞌalal mu xuꞌ avuꞌunic ta xacoltaicune.   
\c 3  
\s1 Ti cꞌusi ta xlocꞌ venta ta melele  
\p
\v 1 Avi tana un, Quermanotac, muyubajanic yuꞌun ti Cajvaltique. Ti vuꞌune maꞌuc vocol ta xcaꞌi ti ta jchaꞌalboxuc ti cꞌusi laj xa onoꞌox calboxuque. Yuꞌun jaꞌ ta xtun avuꞌunic.  
\v 2 Bijanic me yuꞌun ti buchꞌutic coꞌol sꞌelan tsꞌiꞌ ti stalelique, ti buchꞌu ta xaqꞌuic ta ichꞌel ti circuncisione, ti buchꞌutic toj chopol ti cꞌusi ta spasique.  
\v 3 Yuꞌun ti buchꞌutic acꞌbilic ti batsꞌi circuncisione, jaꞌ ti voꞌotique. Yuꞌun ta xquichꞌtic ta mucꞌ ti Dios ta yut coꞌntontic ta sventa ti Chꞌul Espíritue. Xijmuyubajotic ti jech oyotic ta stojol ti Cajvaltic Jesucristoe. Mu ta jpat coꞌntontic ti lec oyotic ta sventa ti cꞌusi ta jpastic ta spat xocon noꞌoxe.  
\v 4 Ati lecuc oyucun yuꞌun ti vaꞌi sꞌelan spat xocon noꞌoxe, muꞌyuc buchꞌu más lec oy ti jechuque. Jtuc noꞌox ti más jpatoj coꞌntone, ti más lec oyun jechuque.  
\v 5 Yuꞌun cꞌalal quichꞌoj svaxaquibal cꞌacꞌal jvoqꞌuele, liꞌacꞌbat quichꞌ circuncisión. Jaꞌ jech xtoc stsꞌunubalun ti Israele. Snitilulun ti Benjamine. Jaꞌ jech xtoc snichꞌonun hebreo, yuꞌun hebreoetic ti jtot jmeꞌe. Batsꞌi jfariseo xcaꞌi jba ti cꞌu sꞌelan ta xal ti mantal yuꞌun ti jꞌisraeletique.  
\v 6 Yuꞌun ta sventa ti mantale, muꞌyuc buchꞌu xuꞌ xisaꞌbun jmul tey. Yuꞌun laj jchꞌun ti cꞌusi ta xale. Mi jaꞌuc jcꞌan ti ta xyanije. Jech o xal un, laj quilbajin ti jchꞌunolajeletique.  
\v 7 Scotol ti vaꞌi sꞌelan laj jpas talele ti tsots scꞌoplal laj caꞌi ti jech scꞌan pasele, avi tana un, mu xa tsotsuc scꞌoplal ta xcaꞌi. Yuꞌun jaꞌ xa tey jpatoj coꞌnton ta stojol ti Cristoe.  
\v 8 Pero maꞌuc noꞌox jech yepal taje. Acꞌo mi oy to cꞌusi xuꞌ ta jpas ti caloje, pero muꞌyuc stu. Yuꞌun jaꞌ toj echꞌem xlocꞌ venta ta xcaꞌi ti jech laj cojtiquin ti Cajval Cristo Jesuse. Ta sventa ti Cristoe, laj xa jten scotol, laj xa jbis ta cꞌaꞌep scotol, yoꞌ jech ta xicom ta stojol ti Cristoe,  
\v 9 yoꞌ jech jun ta xicom schiꞌuc. Pero maꞌuc laj jta jlequilal jtuc ta sventa ti laj jchꞌun ti mantale. Ti jech laj jta ti jlequilale, jaꞌ noꞌox ta sventa ti Cristoe, ti jech yaloj ti Dios ti ta xacꞌbe ti buchꞌu ta xchꞌunique. Yuꞌun jech ta sta ti buchꞌu ta xchꞌun ti Cristoe.  
\v 10 Ti cꞌusi ta jcꞌane, jaꞌ ti ta xcojtiquin caꞌi ti Cristoe, ti acꞌo caꞌi lec ti smucꞌul stsatsal ti ichaꞌcuxie, ti coꞌntonuc quichꞌ ti jvocole jech chac cꞌu chaꞌal ti cꞌalal icham ti stuque,  
\v 11 yoꞌ jech ta jpat coꞌnton ti ta xichaꞌcuxi eque.   
\s1 Cacꞌtic batel persa yoꞌ jech ta jtatic ti spajebe  
\p
\v 12 Mu yuꞌunuc ta xcal ti tey xa cꞌotemune, ti yan xa cutsile. Pero cacꞌoj batel persa ta stael ti jech laj yicꞌun ti Cristo Jesús baꞌyele.  
\v 13 Quermanotac, mu yuꞌunuc ta xcal ti jtaoj scotol taje. Pero ti cꞌusi ta jpase, jaꞌ ta jchꞌay ta coꞌnton ti cꞌusi comem ta jpate. Jaꞌ ta xcacꞌ batel persa ta stael ti cꞌusi mu to jtaoje.  
\v 14 Yuꞌun ta jcꞌan ta xicꞌot ti bu ti spajebe, yoꞌ jech ta xquichꞌ ti jmoton ti jech icꞌbilun yuꞌun ti Dios ti oy ta vinajele ta sventa ti oyun ta stojol ti Cristo Jesuse.   
\p
\v 15 Jcotoltic ti jchꞌunojtic lec ti Cajvaltique, jech me acꞌo jnoptic o batel. Mi oy to yan ti cꞌusi ta xanopique, Dios ta xayacꞌboxuc avilic xtoc.  
\v 16 Pero junuc xa me coꞌntontic cuxicutic schiꞌuc ti cꞌu yepal laj xa jtatique.   
\p
\v 17 Quermanotac, chanic ti cꞌu sꞌelan ta jpase. Jaꞌ jech xtoc chanbeic stalelic ti buchꞌutic ta snopic ta spasic jech chac cꞌu chaꞌal ti laj cacꞌcutic avilique.  
\v 18 Ep ta velta laj xa calboxuc avaꞌiic, ta yaꞌlel jsat ta jchaꞌalboxuc yan velta xtoc, yuꞌun oy ep ti buchꞌutic ti jech ta scrontainic ti icham ta cruz ti Cristoe.  
\v 19 Pero ta onoꞌox xbatic ta chꞌayel ti jech ta spasique. Yuꞌun jaꞌ xrioxinojic ti cꞌusitic lec ta xaꞌi ti stuquique. Yuꞌun cajal ta xaꞌi sbaic schiꞌuc ti cꞌusi xuꞌ ta xꞌacꞌatic ta qꞌuexlal ti jechuque. Yuꞌun jaꞌ noꞌox cꞌupil ta xaꞌiic ti cꞌusitic oy liꞌ ta sba banomile.  
\v 20 Pero ti voꞌotique jaꞌ cosilaltic ti vinajele. Jmalaojtic ti ta xtal ta vinajel ti Jcoltavaneje, jaꞌ ti Cajvaltic Jesucristoe.  
\v 21 Yuꞌun jaꞌ ta sjeltabotic ti jsaꞌmulil beqꞌuete, ti snaꞌ xchame, yoꞌ jech ta xquichꞌtic ti jbecꞌtaltic jech chac cꞌu chaꞌal ti stuc ti yan yutsile. Jech ta spas ta smucꞌul stsatsal stuc. Yuꞌun jaꞌ oy ta yoc ta scꞌob scotol ti cꞌusitic oye.   
\c 4  
\s1 Muyubajanic o ta stojol ti Cajvaltique  
\p
\v 1 Jech o xal un, Quermanotac, ti oyoxuc ta coꞌnton ta jqꞌueloxuc caꞌie, ti voꞌoxuc ximuyubaj avuꞌunique, ti matanaloxuc cuꞌun ta xcaꞌie, junuc me avoꞌntonic ta stojol ti Cajvaltique, ti voꞌoxuc oyoxuc ta coꞌntone.   
\p
\v 2 Ta jcꞌanbe vocol ti Evodiae schiꞌuc ti Síntiquee ti acꞌo coꞌoluc ti yoꞌntonique, yuꞌun yermano sbaic ta sventa ti Cajvaltique.  
\v 3 Jech ti voꞌote, Quermano, ti jchiꞌil jbatic ta abtele, avocoluc coltao ti chaꞌvoꞌ antsetic taje. Yuꞌun ti stuquique laj yaqꞌuic persa ta scoltaelun ta yalel ti colebal lequil achꞌ cꞌope, jmoj schiꞌuc ti Clementee, schiꞌuc ti yan jchiꞌiltac ta abtele. Ti stuquic taje tey xa tsacal ti sbiic ta libro yuꞌun ti cuxlejale.   
\p
\v 4 Muyubajanic scotol cꞌacꞌal ta stojol ti Cajvaltique. Ta jchaꞌalboxuc avaꞌiic, muyubajanic noꞌox.  
\v 5 Aqꞌuic ta ilel ti slequilal avoꞌntonic ta stojol scotol ti cristianoetique, yuꞌun nopol xa talel ti Cajvaltique.   
\p
\v 6 Mu xavulilan avoꞌntonic yuꞌun ti cꞌusi ta xvul ta atojolique. Albeic yaꞌi ti Dios scotol ti cꞌalal ta xacꞌoponique. Cꞌanbeic, jaꞌ jech xtoc, colaval, utic.  
\v 7 Jech ti Diose ta xacꞌboxuc jun avoꞌntonic ti jaꞌ jelavem ti yutsil smucꞌule, ti jaꞌ mu sta snopbenal yuꞌun ti cristianoetique. Ti jpat-oꞌntonal taje, jaꞌ ta xchabiboxuc ti avoꞌntonique, ti cꞌusi ta xanopique, yuꞌun oyoxuc ta stojol ti Cristo Jesuse.   
\s1 Nopic ti cꞌusi leque  
\p
\v 8 Jaꞌ jech ti slajeb ta xcalboxuc avaꞌiique, Quermanotac. Jaꞌ me nopic scotol ti cꞌusi melele, scotol ti cꞌusi ichꞌbil ta muqꞌue, scotol ti cꞌusi leque, scotol ti cꞌusi yan yutsile, scotol ti cꞌusi lec ta qꞌuelele, scotol ti cꞌusi lec ta xvinaj scꞌoplale. Nopic scotol ti cꞌusi leque, ti cꞌusi lec scꞌoplale.  
\v 9 Aqꞌuic me persa ta spasel ti cꞌu sꞌelan laj jchanubtasoxuque, ti cꞌu sꞌelan laj jbijubtasoxuque, ti cꞌu sꞌelan laj avaꞌiic laj cale, ti cꞌu sꞌelan laj avilic laj jpase. Pasic me jech. Jech ti Dios ti ta xacꞌ jun avoꞌntonique, ta xchiꞌinoxuc.   
\s1 Ti matanal ti acꞌbat ti Pablo yuꞌun ti jchꞌunolajeletic tey ta Filipose  
\p
\v 10 Ximuyubaj xa ta stojol ti Cajvaltique ti laj achaꞌvulesun ta avoꞌntonique. Ti jech taje, mu yuꞌunuc ta xcal ti laj achꞌayun ta avoꞌntonique, jaꞌ ti mu cꞌusi xavutic ta xacoltaicune.  
\v 11 Mu yuꞌunuc ta xcalboxuc avaꞌiic ti ta jcꞌan coltaele. Yuꞌun laj xa jchan ti ximuyubaj noꞌox yuꞌun ti cꞌu yepal oy cuꞌune.  
\v 12 Yuꞌun jnaꞌ lec ti cꞌu sꞌelan ti meꞌonale, ti cꞌusi oy ep xꞌayane. Mi ta xiviꞌnaj, mi noj jchꞌut, mi oy cꞌusi xꞌayan cuꞌun, mi muꞌyuc, laj xa jchan ti cꞌusiuc noꞌox cꞌotuc ta jtojole.  
\v 13 Xuꞌ cuꞌun scotol yuꞌun Cristo ta xiyacꞌbun quip.  
\v 14 Acꞌo mi jech ta xcal, pero lec ti jech laj acoltaicun yuꞌun ti jvocole.  
\v 15 Cꞌalal lilocꞌ batel ta alumalic Macedoniae, yoꞌ chba cal ti colebal lequil achꞌ cꞌop ta yan partee, xanaꞌic lec ti muꞌyuc yan jchꞌunolajeletic laj scoltaicune. Jaꞌ noꞌox ti voꞌoxuc jfiliposoxuc ti laj atacbeicun talel ti coltael ta sventa ti laj avaꞌiic ti lequil achꞌ cꞌope.  
\v 16 Cꞌalal tey oyun to ox ta Tesalónicae, tey laj ataquic batel jayib velta ti cꞌusi ta xtun cuꞌune.  
\v 17 Ti jech ta xcal taje, maꞌuc noꞌox ta jcꞌan ti oy cꞌusi ta xquichꞌe. Jaꞌ ta jcꞌan ti acꞌo epajuc ti acꞌulejalic ta stojol ti Diose.  
\v 18 Yuꞌun laj xa quichꞌ scotol. Muꞌyuc xa cꞌusi scꞌan. Ti cꞌu yepal laj atacbeicun talel ta stojol ti Epafroditoe xilocꞌ o lec schiꞌuc. Yuꞌun oy to sobrail. Ti cꞌu yepal laj atacbeicun talele, coꞌol schiꞌuc smuil pom ti ta xichꞌ chicꞌbel ta stojol ti Dios ti lec ta xile.  
\v 19 Ti Dios cuꞌune, yuꞌun jaꞌ ta xacꞌboxuc scotol ti cꞌusi ta xtun avuꞌunique ti coꞌol schiꞌuc ti slequil cꞌulejal ti tey oy ta stojol ti Cristo Jesuse.  
\v 20 Ichꞌbiluc o ta mucꞌ sbatel osil ti Jtotic Diose. Jechuc.   
\s1 Slajeb chabanuc  
\p
\v 21 Ta sventa ti Jesucristoe, chabanuc xavalbe yaꞌi scotol ti buchꞌu yuꞌuntac ti Diose. Chabanuc xayalboxuc ti quermanotic ti liꞌ jchiꞌinoje.  
\v 22 Jaꞌ jech xtoc chabanuc xayalboxuc ti buchꞌutic ti tey oy ta sna ti ajvalil Romanoe. Chabanuc xayalboxuc scotol ti buchꞌu yuꞌuntac ti Dios ti liꞌ oyique.   
\p
\v 23 Acꞌo yacꞌboxuc bendición acotolic ti Cajvaltic Jesucristoe. Jechuc.