\id COL  
\h COLOSENSES 
\toc2 COLOSENSES 
\toc1 COLOSENSES 
\mt1 Colosenses  
\c 1  
\s1 Ti Pabloe ta stsꞌiba batel scarta ta stojol ti jchꞌunolajeletic ti oyic ta Colosase  
\p
\v 1 Vuꞌun Pabloun, ilocꞌ iꞌayan ta yoꞌnton ti Dios ti jech jcholcꞌopune, ti tacbilun yuꞌun ti Jesucristoe. Ti vuꞌune schiꞌuc ti quermanotic Timoteoe  
\v 2 ta jtsꞌibaboxuc talel ti jcartacutique, Quermanotac, ti voꞌoxuc ti jun avoꞌntonic ta stojol ti Cristoe, ti yuꞌunoxuc xa ti Dios ti liꞌ nacaloxuc ta jteclum Colosase. Ti Jtotic Diose, acꞌo yacꞌboxuc bendición. Acꞌo yacꞌboxuc jun avoꞌntonic.   
\s1 Ti Pabloe ta scꞌoponbe Dios ta stojol ti jchꞌunolajeletique  
\p
\v 3 Colaval, xcutcutic onoꞌox ti Diose, ti jaꞌ Stot ti Cajvaltic Jesucristoe, ti cꞌalal ta jtacutic ta cꞌoponel ta atojolique.  
\v 4 Yuꞌun laj caꞌi acꞌoplalic ti jun avoꞌntonic achꞌunojic ti Cristo Jesuse. Jaꞌ jech xtoc ti cꞌux ta xavaꞌiic scotol ti buchꞌutic yuꞌuntac ti Diose.  
\v 5 Ti jech atalelic taje, yuꞌun apatoj avoꞌntonic yuꞌun ti cꞌusi tey qꞌuejbil ta vinajel ti jaꞌ avuꞌunique. Ti jech lic apat avoꞌntonic taje, jaꞌ o cꞌalal lic avaꞌiic ti colebal lequil achꞌ cꞌope.  
\v 6 Ti lequil achꞌ cꞌop ti laj avichꞌic albele, yacal ta xꞌepaj batel ta sjoylej banomil jech chac cꞌu chaꞌal icꞌot ta pasel ta atojolic ti cꞌalal laj avaꞌiic ti scꞌuxul yoꞌnton ti Diose, ti jaꞌ laj avaꞌiic ti jaꞌ melel ti scꞌuxul yoꞌntone.  
\v 7 Ti lequil achꞌ cꞌop taje, jaꞌ laj xchanubtasoxuc ti quermanotic Epafrase, ti jaꞌ jchiꞌilcutic ta abtele, ti jun yoꞌnton ta xtun yuꞌun ti Cajvaltic ta atojolique.  
\v 8 Jaꞌ laj yalbun caꞌicutic acꞌoplalic ti cꞌux ta xavaꞌi abaic ta sventa ti Chꞌul Espíritue.  
\v 9 Jech o xal un, ti cꞌalal jech laj caꞌicutic ti acꞌoplalique, mu xquicta jbacutic ta scꞌoponel, ta scꞌanbel ti Diose ti acꞌo yacꞌboxuc avilic ti cꞌusi ta scꞌan ti stuque, ti acꞌo yacꞌboxuc ep ta tos ti abijilique, ti acꞌo yacꞌboxuc sbijil ajol avoꞌntonique.  
\v 10 Jech ta xavaqꞌuic ta qꞌuelel ti lec ta xapasic jech chac cꞌu chaꞌal ti buchꞌu yuꞌuntac ti Cajvaltique. Tey onoꞌox ta xapasic ti cꞌusi lec ta xile. Tey ta xꞌayan ep ta tos slequilal avoꞌntonic ta spasel ti cꞌusi leque. Tey xlic avojtiquinic lec ti Diose.  
\v 11 Ta jcꞌanbecutic ti Diose ti acꞌo yacꞌboxuc avipic ta sventa jun yutsil ti smucꞌul stsatsale, yoꞌ jech oy smucꞌul avoꞌntonic xamuyubajic ta xcuch avuꞌunic ti cꞌusiuc noꞌox ta xcꞌot ta atojolique.  
\v 12 Jaꞌ jech xtoc yoꞌ jech xamuyubajic ta xavalbeic vocol ti Jtotic Diose. Yuꞌun chapal xa jcꞌoplaltic yuꞌun ta yichꞌel ti cꞌusi ta xiyacꞌbotique schiꞌuc ti buchꞌutic yuꞌuntac ti oyic ta saquilal osile.  
\v 13 Ti Diose laj spojotic loqꞌuel ta yoc ta scꞌob ti icꞌal osile. Laj xa yicꞌotic ochel ti bu ta xventainvan ti scꞌuxubinbil Nichꞌone.  
\v 14 Jech lijcolotic ta sventa ti jech ichame. Tey laj yacꞌbotic perdón yuꞌun ti jmultique.   
\s1 Lec ta xquil jbatic schiꞌuc ti Diose ta sventa ti icham ti Cristoe  
\p
\v 15 Ti Dios ti mu xvinaj ta qꞌuelele tal yacꞌ sba ta qꞌuelel ta sventa ti Snichꞌone. Yuꞌun ti Snichꞌone tey xa onoꞌox oy ti cꞌalal lic meltsajuc talel scotol ti cꞌusitic oye.  
\v 16 Ta sventa Cristo imeltsaj yuꞌun ti Dios scotol ti cꞌusitic oy ta vinajele, ti oy ta banomile, ti cꞌusitic mu xvinaj ta qꞌuelele, ti cꞌusitic xvinaj ta qꞌuelele. Scotol ti jpasmantaletique, ti jꞌabteletique, ti buchꞌu tsots xuꞌ yuꞌunic ti mu xvinaj ta qꞌuelele, scotol imeltsaj yuꞌun ti Dios ta sventa ti Cristoe, yoꞌ jech ta xtun yuꞌun ti stuque.  
\v 17 Yuꞌun ti Cristoe tey onoꞌox oy cꞌalal muꞌyuc to ox scotol ti cꞌusitic oye. Jaꞌ ta sventa stuc ti lec ta xanav scotol ti cꞌusitic oye.  
\v 18 Pero maꞌuc noꞌox taje. Yuꞌun oy to yan. Yuꞌun ti Cristoe jaꞌ jolil cꞌotem cuꞌuntic ti sbecꞌtalotic ti voꞌotic jchꞌunolajelotique. Ti Cristo ti ta xacꞌbotic jcuxlejaltique, baꞌyel ichaꞌcuxi yoꞌ jech icꞌot ta totil yuꞌun scotol.  
\v 19 Yuꞌun ti Diose jech laj scꞌan ti tey cꞌotuc scotol ti stalel stuc ta stojol ti Cristoe.  
\v 20 Jech laj scꞌan xtoc ti ta sventa Cristo ti acꞌo lecubuc scotol ti cꞌusitic oye, ti liꞌ ta banomile, ti tey ta vinajele. Jaꞌ o tey ilecub scotol ti cꞌalal icham ta cruz ti Cristoe.   
\p
\v 21 Ti ta voꞌnee, jyanlumoxuc to ox, chopol avoꞌntonic. Laj acrontainic ti Dios ta avoꞌntonique. Yuꞌun chopol ti cꞌusitic laj apasique. Avi tana un, lec xa xayiloxuc ti Diose  
\v 22 ta sventa ti laj yichꞌ svocol schiꞌuc sbecꞌtal cꞌalal icham ta cruz ti Cristoe. Jaꞌ jech laj spas ti Diose, yoꞌ jech muꞌyuc amulic, ti lecubtasbiloxuc ta xcꞌot avaꞌan abaic ta stojole.  
\v 23 Yoꞌ jech ta xataic taje, jaꞌ ta scꞌan ti junuc avoꞌntonic achꞌunojic ti Cajvaltique. Jaꞌ ta scꞌan ti atsꞌunoj lec ta avoꞌntonic ti ta xacolic ta sventa ti colebal lequil achꞌ cꞌop ti laj avaꞌiique. Ti lequil achꞌ cꞌop taje ta xichꞌ alel ta sjoylej banomil. Yuꞌun vuꞌun Pabloun ta jcolta jba ta yalel.   
\s1 Ti Pabloe sbainoj ti jchꞌunolajeletique  
\p
\v 24 Ximuyubaj xa ti jech ta xquichꞌ jvocol ta aventaique. Yuꞌun ti jech ta xquichꞌ ti jvocole, tey ta jtsacubtas batel ti jvocol ti mu to caꞌioje jech chac cꞌu chaꞌal laj yichꞌ svocol ti Cristo yuꞌun ti jchꞌunolajeletique, ti jaꞌ sbecꞌtale.  
\v 25 Yuꞌun jaꞌ cabtel laj yacꞌbun ti Diose yoꞌ jech ta xitun yuꞌun ti jchꞌunolajeletique, yoꞌ jech lec oyoxuc. Jech o xal un, jamal ta xcal ti scꞌop Diose.  
\v 26 Ti scꞌop Dios taje, jaꞌ ti cꞌusi muꞌyuc to ox vinajem talele, ati mucul to ox yuꞌun ti Dios ta voꞌne ti sjaylajunchopal laj echꞌuc talel ti cristianoetique. Avi tana un, laj xa yacꞌbe yojtiquin ti buchꞌu yuꞌuntaque.  
\v 27 Jech laj scꞌan ti Diose ti ta xacꞌbotic jnaꞌtic ti cꞌusi yan yutsil ta xavichꞌ ti voꞌoxuc jyanlumoxuc ti jaꞌ mucul to oxe. Ti cꞌusi mucul to oxe, jaꞌ ti Cristo oy ta atojolique. Jaꞌ ta sventa ti Cristoe xuꞌ xanopic ti tey ta xataic ti yutsilal ti Diose.   
\p
\v 28 Jaꞌ yuꞌun un, ti vuꞌuncutique ta xcalbecutic scꞌoplal ti Cristoe. Ta jbijubtascutic scotolic. Ta jchanubtascutic scotolic, yoꞌ jech ta xaꞌibeic lec ti smelole, yoꞌ jech chꞌiemic lec ti jech junic schiꞌuc ti Cristoe.  
\v 29 Jech o xal un, ta xiꞌabtej. Cacꞌoj persa ta sjunul quip, ta sjunul jtsatsal ti yacꞌojbun ti Cristoe.   
\c 2  
\p
\v 1 Ta jcꞌan ta xanaꞌic ti tey onoꞌox cacꞌoj persa ta atojolic yoꞌ lec oyoxuque schiꞌuc xtoc ti cꞌu yepal oyic ta Laodiceae, schiꞌuc xtoc ti cꞌu yepal mu to xiyojtiquinique.  
\v 2 Ta xcacꞌ persa yuꞌun ta jcꞌan ti oyuc yip ti yoꞌntonique, ti coꞌoluc cꞌux ta xaꞌi sbaique, ti jech lec jamaluc ti sba satique, yoꞌ jech ta xojtiquinic smelol ti cꞌusi mucul to ox yuꞌun ti Diose, jaꞌ ti Cristo stuque.  
\v 3 Yuꞌun jaꞌ oy ta yoc ta scꞌob Cristo scotol ti jbijiltique, ti snopobil cuꞌuntique.  
\v 4 Ti jech ta xcalboxuc taje, yoꞌ jech mu xalajic ta loꞌlael yuꞌun ti buchꞌutic jun xa yutsil ti scꞌopic yaꞌyele.  
\v 5 Acꞌo mi muꞌyuc tey vaꞌalun ta atojolic, pero tey oy ti coꞌnton ta atojolique. Ximuyubaj xa avuꞌunic ti jmoj avoꞌntonique schiꞌuc ti jun avoꞌntonic achꞌunojic ti Cristoe.   
\p
\v 6 Jech o xal un, junuc me avoꞌntonic cuxianic o ta stojol jech chac cꞌu chaꞌal ti laj achꞌunic talel ti Cajvaltic Jesucristoe.   
\p
\v 7 Jech chac cꞌu chaꞌal laj avichꞌic chanubtasele, chꞌunic o jech, yoꞌ jech ta xachꞌiic ta xavibelinic ti Cristoe. Teyuc onoꞌox me, albeic vocol ti Diose.   
\s1 Ti achꞌ jcuxlejaltic ta sventa ti Cristoe  
\p
\v 8 Bijanic me, mu me xavacꞌ abaic ta loꞌlael yuꞌun ti buchꞌutic melel xa yaꞌyel ti cꞌusi ta xalique. Yuꞌun ti stuquique maꞌuc ta xalbeic scꞌoplal ti Cristoe. Yuꞌun jaꞌ noꞌox ta xalic ti cꞌu sꞌelan liquem yuꞌunic ti cristianoetique, ti snopbenic noꞌox stuquique.   
\p
\v 9 Yuꞌun scotol stalel ti Diose tey oy ta stojol ti Cristoe.  
\v 10 Jech ti voꞌoxuque nojemoxuc ta yutsilal ti Diose, yuꞌun junoxuc xa schiꞌuc ti Cristoe. Yuꞌun ti stuque jaꞌ ta spas ta mantal scotol ti jꞌabteletique schiꞌuc ti buchꞌu tsots xuꞌ yuꞌunic ti mu xvinaj ta qꞌuelele.  
\v 11 Jaꞌ jech xtoc ti jech junoxuc xa schiꞌuc ti Cristoe, laj xavichꞌic ti circuncisione. Pero mu xcoꞌolaj schiꞌuc ti circuncisión ti ta xichꞌ setel ti abecꞌtalique. Yuꞌun ti circuncisión ti laj avichꞌique, jaꞌ ti coltael yuꞌun ti amulique ti jech chopol ti atalelique. Jaꞌ laj spas stuc ti Cristoe.  
\v 12 Yuꞌun cꞌalal jech laj avichꞌic voꞌe, jmoj lamucatic schiꞌuc ti Cristoe. Jaꞌ jech xtoc jmoj lachaꞌcuxiic schiꞌuc. Yuꞌun laj achꞌunic ti oy smucꞌul stsatsal ti Diose ti jech laj xchaꞌcuxes ti Cristoe.  
\v 13 Ta voꞌnee, chamemoxuc to ox ta sba ta sat ti Dios ta scoj ti amulique. Yuꞌun muꞌyuc to ox avichꞌojic ti circuncisione. Pero avi tana un, ti Diose laj xa yacꞌboxuc acuxlejalic jmoj schiꞌuc ti Cristoe, yuꞌun laj xa ataic perdón yuꞌun ti amulique.  
\v 14 Ti Diose laj xa stubbotic quiltic ti oy scꞌoplal ta jtojtic ta scoj ti mu xchꞌun cuꞌuntic ti mantaletique. Yuꞌun tey itub ti quiltique ti cꞌalal jipil icham ta cruz ti Cristoe.  
\v 15 Cꞌalal icham ta cruz ti Cristoe, tey tsalbil icꞌotic ti jꞌabteletique, ti jpasmantaletique, jaꞌ ti buchꞌu tsots xuꞌ yuꞌunic ti mu xvinaj ta qꞌuelele. Tey iꞌacꞌatic ta qꞌuexlal ti mu xuꞌ yuꞌunique. Tey icꞌbil ibatic jech chac cꞌu chaꞌal jchuqueletic ti cꞌalal tsalbil icꞌotique.   
\s1 Jaꞌ me saꞌic ti cꞌusi sventa vinajele  
\p
\v 16 Jech o xal un, ti cꞌusi ta xavuchꞌique, ti cꞌusi ta xaveꞌique, ti xchabiel scꞌacꞌalil ti qꞌuine, ti achꞌ ue, ti scꞌacꞌalil cuxob oꞌntonale, mu me xanaꞌle abaic yuꞌun ti buchꞌu jech ta xalic ti tsots scꞌoplale.  
\v 17 Scotol ti jech taje, jaꞌ svinajeb ti oy Buchꞌu ta xtal onoꞌoxe, ti jaꞌ ti Cristoe.  
\v 18 Mu xavaqꞌuic ta pojel ti amotonic yuꞌun ti buchꞌutic biqꞌuit yacꞌoj sbaic yilele, ti cꞌalal yichꞌojic ta mucꞌ ti ángeletique. Yuꞌun ti stuquique tey chba sticꞌ sbaic ti bu mu xojtiquinique. Jaꞌ jech xtoc stoyoj sbaic yuꞌun ti sbijil stuquic noꞌoxe.  
\v 19 Yuꞌun ti stuquique mu staojuc yav ti junic schiꞌuc ti Cristoe, cꞌalal ti stuque jaꞌ jolil cuꞌuntic. Yuꞌun ta xistsꞌitesotic. Ta xismalqꞌuinotic. Ta xispasotic ta jun ti jujunotic schiꞌuque coꞌol jech chac cꞌu chaꞌal snopoj onoꞌox ti Diose.   
\p
\v 20 Ti voꞌoxuque jmoj lachamic schiꞌuc ti Cristoe. Tey laj scꞌoplal avuꞌunic ta snopilanel jech chac cꞌu chaꞌal ta snopic ti cristianoetique. ¿Cꞌu chaꞌal yaꞌyel un chaꞌe ti tey avacꞌojic persa ta snopel jech chac cꞌu chaꞌal ta snopic ti cristianoetic liꞌ ta sba banomile?  
\v 21 Yuꞌun qꞌuel avilic ti cꞌusi ta xapasique. Yuꞌun tey to achꞌunojic jech chac cꞌu chaꞌal liꞌe: “Mu xapiquic leꞌe. Mu xalajesic leꞌe. Mu xatsaquic leꞌe”, ti xaꞌutatique.  
\v 22 Scotol ti vaꞌi sꞌelan taje, smantal snopben noꞌox cristianoetic ti ta xꞌechꞌ ta xlaj scꞌoplal noꞌoxe.  
\v 23 Ta melel, oy sbijil yaꞌyel ti cꞌusi ta xalique. Yuꞌun ta sujvan ta yichꞌel ta mucꞌ ti cꞌusi xchꞌunojique. Yuꞌun ta snijan sbaic. Ta xacꞌbe yichꞌ svocol ti sbecꞌtaltique. Pero scotol taje, mu xlecub yuꞌun ti schopolal coꞌntontique.   
\c 3  
\p
\v 1 Yuꞌun ti voꞌoxuque, ti jech lachaꞌcuxiic xa schiꞌuc ti Cristoe, jech o xal un, saꞌic ti cꞌusi jaꞌ sventa vinajele, ti bu chotol ti Cristo ta sbatsꞌi cꞌob ti Diose.  
\v 2 Jaꞌ nopic ti cꞌusi jaꞌ sventa ti vinajele. Maꞌuc xanopic ti cꞌusi sba banomil noꞌoxe.  
\v 3 Yuꞌun jmoj lachamic schiꞌuc ti Cristoe. Avi tana un, tey xa qꞌuejel ti acuxlejalic schiꞌuc ti Cristo ta stojol ti Diose.  
\v 4 Yuꞌun ti Cristoe jaꞌ jcuxlejaltic stuc. Cꞌalal ta xchaꞌsut talele, jech ti voꞌoxuque tey jmoj ta xavinajic schiꞌuc. Ti cꞌu sꞌelan ti yutsilal slequilale, jech ta xavichꞌic ec.   
\s1 Ti pocoꞌ cuxlejale schiꞌuc ti achꞌ cuxlejale  
\p
\v 5 Ta jꞌechꞌeluc o acꞌo chamuc scotol ti cꞌusi oy ta avoꞌntonic ti jaꞌ noꞌox sventa sba banomile, ti mulivajele, ti cꞌusi ta soquesvane, ti scꞌupijel avoꞌntonique, ti chopol cꞌusi ta xanopique. Ti ta yuꞌuninel ti cꞌusi maꞌuc avuꞌunique, yuꞌun taje, coꞌol sꞌelan jaꞌ arioxinojic ti cꞌusi meltsanbil ta cꞌabale.  
\v 6 Ti buchꞌutic jech yoꞌntonic taje, chapal xa scꞌoplal ta xichꞌic tsots castigo yuꞌun ti Diose ta scoj ti mu xchꞌunique.  
\v 7 Yuꞌun jech to ox laj apasic ta voꞌne ti voꞌoxuque.  
\v 8 Avi tana un, ictaic scotol jech chac cꞌu chaꞌal liꞌe, ti ile, ti scꞌacꞌal avoꞌntonique, ti ta xasaꞌbe aba amulique, ti jecheꞌ noꞌox ta xatsacvanic ta cꞌope, ti chopol cꞌopetic ti ta xlocꞌ ta aveique.  
\v 9 Mu xajutbe abaic cꞌop ta jujun tal. Yuꞌun laj xa ajipic comel ti apocoꞌ cuxlejalic ti mu xtun ti cꞌusi laj apasic to oxe.  
\v 10 Yuꞌun laj xa acꞌuꞌinic ti achꞌ cuxlejale, ti ta xꞌachꞌub batel jech chac cꞌu chaꞌal stalel stuc ti Diose, yoꞌ jech ta xavojtiquinic batel ti cꞌu sꞌelan ti stuque, jaꞌ ti pasbil xa yuꞌune.  
\v 11 Jech o xal un, maꞌuc xa tsots scꞌoplal mi jꞌisrael, mi maꞌuc, mi yichꞌoj circuncisión, mi muꞌyuc, mi jyanlum, mi muꞌyuc chanubtasbil, mi mosovil, mi maꞌuc. Ti cꞌusi tsots scꞌoplale, jaꞌ ti oyotic ta stojol ti Cristoe ti ta sventainotic jcotoltique.   
\p
\v 12 Yuꞌun ti Diose ta xcꞌuxubinoxuc. Laj stꞌujoxuc yoꞌ jech ta xacomic ta yuꞌuntac. Jech o xal un, cuxianic ta spasel ti yutsil avoꞌntonique, ti biqꞌuit ta xavacꞌ abaique, ti lec acꞌopojelique, ti oy smucꞌul avoꞌntonique.  
\v 13 Tsꞌicbo abaic ta jujun tal. Acꞌbo abaic perdón ti mi oy buchꞌu ta xjelav ta atojolique. Jech chac cꞌu chaꞌal laj yacꞌboxuc perdón ti Cristoe, jaꞌ jech xapasic ti voꞌoxuque.  
\v 14 Pero ti tsots scꞌoplale, jaꞌ ti cꞌux ta xavaꞌi abaique. Yuꞌun tey ta xataic ti jun avoꞌnton acotolique.  
\v 15 Acꞌo sventain avoꞌntonic ti yutsilal yoꞌnton ti Diose, jaꞌ ti jech onoꞌox oy ta yoꞌnton ti laj yicꞌoxuc ti jun ta xacomic ta stojole. Jaꞌ jech xtoc, colaval, utic ti Diose.   
\p
\v 16 Acꞌo nojuc lec ta avoꞌntonic scꞌop ti Cristoe. Chanubtaso abaic, tsatsubtasbo aba avoꞌntonic ta jujun tal yuꞌun scotol ti abijilique. Colaval, Dios, xavutic ta avoꞌntonic ti jech ta xaqꞌuejinic yuꞌun ti scꞌop Diose, yuꞌun ti sqꞌuejoj Diose.  
\v 17 Cꞌusiuc noꞌox ti ta xapasique schiꞌuc ti ta xavalique, pasic ta sventa ti Cajvaltic Jesuse. Colaval, utic ti Jtotic Dios ta sventa ti Jesuse.   
\s1 Jech ta scꞌan ta spasic ti jchꞌunolajeletique  
\p
\v 18 Ajnililetic, coꞌoluc me avoꞌntonic schiꞌuc ti amalalique. Yuꞌun jaꞌ jech scꞌan ta xapasic ti voꞌoxuc ti avichꞌojic ta mucꞌ ti Cajvaltique.  
\v 19 Malaliletic, cꞌux me xavaꞌiic ti avajnilique. Mu me xcꞌaqꞌuetuc aveic ta stojol.  
\v 20 Alab nichꞌnabiletic, chꞌunbeic scotol smantal ti atot ameꞌique. Yuꞌun ti mi jech ta xapasique, lec ta xayilic ti Cajvaltique.  
\v 21 Totil meꞌiletic, mu me xcꞌaqꞌuetuc aveic ta stojol ti avalab anichꞌnabique, yoꞌ jech mu soc yoꞌntonic.  
\v 22 Mosoviletic, chꞌunbeic scotol smantal ti avajvalic ti liꞌ ta banomile. Mu me jaꞌuc noꞌox lec ta xachꞌunic yilel ti cꞌalal tey sqꞌuelojoxuque. Pasic ta sjunul avoꞌntonic ti jech axiꞌtaojic ti Diose.  
\v 23 Cꞌusiuc noꞌox ti ta xapasique, pasic ta slequilal avoꞌntonic ti coꞌoluc sꞌelan ti tey avacꞌoj abaic ta tunel yuꞌun ti Cajvaltique. Yuꞌun maꞌuc noꞌox ta xatun yuꞌun ti cristianoetique.  
\v 24 Yuꞌun xanaꞌic lec ti ta xaꞌacꞌbatic amotonic yuꞌun ti Cajvaltique, jaꞌ ti arextoique. Yuꞌun tey avacꞌoj abaic ta tunel yuꞌun ti Cristoe, ti jaꞌ Avajvalic ta melele.  
\v 25 Yan ti buchꞌu chopol ta spasique, tey ta xꞌacꞌbatic stojolic yuꞌun Dios ti cꞌusi chopol laj spasique. Yuꞌun mu jeltosuc yoꞌnton ta stojol ti cristianoetique.   
\c 4  
\p
\v 1 Ti voꞌoxuc ajvaliloxuque, oyuc slequilal avoꞌntonic, oyuc arazonic ta stojol ti amosovique. Vuleso me ta avoꞌntonic xtoc ti oy jun Avajvalic ti tey oy ta vinajele.   
\p
\v 2 Mu xavicta abaic ta scꞌoponel ti Diose. Julavanic. Jaꞌ jech xtoc, colaval, xavutic ti Diose.  
\v 3 Jaꞌ jech xtoc, cꞌoponic ti Dios ta jtojolcutique, yoꞌ jech ti Cajvaltique ta sjam batel ti be ta yalel ti lequil achꞌ cꞌop yuꞌune, ti jaꞌ scꞌoplal ti Jesucristo ti mucul to oxe. Yuꞌun jaꞌ ta sventa ti jech liꞌ tiqꞌuilun ta chuquele.  
\v 4 Cꞌoponic ti Dios ta jtojole, yoꞌ jech jamal ta xcal scꞌoplal ti Cristo jech chac cꞌu chaꞌal ta scꞌan ta jpase.   
\p
\v 5 Bijanic me yuꞌun ti maꞌuc jchꞌunolajeletique. Mu me jecheꞌuc noꞌox xꞌechꞌ avuꞌunic ti jujun cꞌacꞌale.  
\v 6 Ti cꞌusi ta xavalique, lecuc me, oyuc me yutsil ta aꞌyiel. Scꞌan xanaꞌic cꞌu sꞌelan ta xatacꞌavic ta jujun tal.   
\s1 Slajeb chabanuc  
\p
\v 7 Ti quermanotic Tíquicoe ti lec xquiltique, ti jaꞌ cajcoltobbae, ti jmoj ta xituncutic yuꞌun ti Cajvaltique, jaꞌ ta xalboxuc avaꞌiic ti cꞌu sꞌelan ta xbat ti jcꞌoplale.  
\v 8 Jech o xal un, tey ta jtac talel ta atojolic yoꞌ jech ta xavaꞌiic cꞌu jꞌelancutic, yoꞌ jech ta stsatsubtas avoꞌntonic.  
\v 9 Jaꞌ jech xtoc tey ta xchiꞌin talel ti quermanotic Onésimoe, ti lec xquil jbatic schiꞌuque, ti jun yoꞌntone, ti jaꞌ avinquilelique. Jech ti stuquique jaꞌ ta xayalboxuc avaꞌiic ti cꞌusi ta xcꞌot ta pasel liꞌe.   
\p
\v 10 Ti jchiꞌil ta chuquel Aristarcoe, chabanuc xayalboxuc. Chabanuc xayalboxuc ti Marcos xtoque, ti jaꞌ snichꞌon sjun tot ti Bernabee. Mi tey ta xcꞌot ta atojolic ti Marcose, calojboxuc xa onoꞌox avaꞌiic ti cꞌusi xuꞌ ta xapasique, ichꞌic me ta mucꞌ.  
\v 11 Chabanuc xayalboxuc ti Jesuse, ti jaꞌ Justo ti yan sbi xtoque. Ti ta scotol ti jchꞌunolajel jꞌisraeletique, jaꞌ noꞌox jech yepal taje ti ta scoltaicun ta yabtelanel ti ventainel yuꞌun ti Diose. Yuꞌun jaꞌ jpatoj coꞌnton yuꞌunic.  
\v 12 Chabanuc xayalboxuc ti Epafrase, ti jaꞌ jun achiꞌilic ti ta xtun yuꞌun ti Cristoe. Ti stuque tey onoꞌox ta scꞌopon ti Dios ta atojolique yoꞌ jech jun avoꞌntonic, yoꞌ jech tey avacꞌojic persa ta spasel ti cꞌusi ta scꞌan yoꞌnton ti Diose.  
\v 13 Vuꞌun rexticoun, quiloj lec ti tey onoꞌox ta xvul yoꞌnton ti Epafras ta atojolique schiꞌuc xtoc ti buchꞌu oyic ta jteclum Laodiceae, schiꞌuc xtoc ti oyic ta Hierápolise.  
\v 14 Chabanuc xayalboxuc ti jpoxtavanej Lucase, ti lec cꞌanbile, schiꞌuc xtoc ti Demase.   
\p
\v 15 Chabanuc xavalbe yaꞌi ti quermanotic ti oyic ta Laodiceae. Jaꞌ jech xtoc chabanuc xavalbe ti Nínfase schiꞌuc ti jchꞌunolajeletic ti tey ta stsob sbaic ta snae.  
\v 16 Cꞌalal mi laj aqꞌuelic ti jcarta liꞌe, tsꞌacal to un, taquic batel ta Laodiceae, yoꞌ jech ta sqꞌuelic ti jchꞌunolajeletic teye. Jaꞌ jech xtoc qꞌuelic me ti jcarta ti ta xlic talel ta Laodiceae.  
\v 17 Jech xavalbeic ti Arquipoe: “Tucꞌulano la me lec ti avabtel ti laꞌacꞌbat yuꞌun ti Cajvaltique.”   
\p
\v 18 Vuꞌun Pabloun, ta jcꞌob jtuc laj jtsꞌiba talel ti chabanucoxuque. Mu me xachꞌay ta avoꞌntonic ti tiqꞌuilun ta chuquele. Acꞌo yacꞌboxuc bendición ti Diose. Jechuc.