\id 2TI  
\h 2 TIMOTEO 
\toc2 2 TIMOTEO 
\toc1 2 TIMOTEO 
\mt1 2 Timoteo  
\c 1  
\s1 Ti Pablo ta stsꞌiba batel scarta ta stojol ti Timoteoe  
\p
\v 1 Vuꞌun Pabloun, yajcholcꞌopun ti Jesucristoe. Yuꞌun jech scꞌan ti Diose ti tacbilun ta yalel scꞌoplal ti cuxlejal ti albil onoꞌox scꞌoplal ta jtatic ti jech oyotic ta stojol ti Cristo Jesuse.  
\v 2 Ta jtsꞌibabot talel ti jcarta liꞌe, Nichꞌon Timoteo. Ta jcꞌan ti acꞌo yacꞌbot sbendicione, ti acꞌo xcꞌuxubinote, ti acꞌo yacꞌbot jun avoꞌnton ti Jtotic Diose schiꞌuc ti Cajvaltic Jesucristoe.   
\s1 Acꞌo ta aꞌyiel scꞌoplal ti Cristoe  
\p
\v 3 Cꞌacꞌal acꞌobal tey onoꞌox ta jvulesot ta coꞌnton ti cꞌalal ta jcꞌopon ti Diose. Colaval, xcut ti Diose, jaꞌ ti Buchꞌu ta yutsil coꞌnton ta xitun yuꞌune jech chac cꞌu chaꞌal laj spasic ti jmolmucꞌtotac ta voꞌnee.  
\v 4 Tey onoꞌox ta xvul ta coꞌnton ti laꞌoqꞌue. Jaꞌ yuꞌun un, ta jcꞌan ta jqꞌuelot caꞌi, yoꞌ jech ta jta ti xmuyubaj coꞌntone.  
\v 5 Yuꞌun ta xvul ta coꞌnton xtoc ti jun avoꞌnton achꞌunoj ti Cajvaltique. Yuꞌun jaꞌ baꞌyel laj xchꞌunic ti ayaya Loidae schiꞌuc ti ameꞌ Eunicee. Jnaꞌ lec ti jech achꞌunoj eque.   
\p
\v 6 Jech o xal un, ta xajcꞌanbot vocol ti vuleso achꞌulel ta yabtelanel ti avabtel ti laꞌacꞌbat yuꞌun ti Diose ti cꞌalal laj jcajan jcꞌob ta ajole.  
\v 7 Yuꞌun maꞌuc yabtel Dios ti mi oy xiꞌel ta coꞌntontique. Yuꞌun ti Diose ta xacꞌbotic yip coꞌntontic, scꞌuxul coꞌntontic, lec snopobil.  
\v 8 Jaꞌ yuꞌun un, mu me xaqꞌuexav ta yalbel scꞌoplal ti Cajvaltique. Mu me jaꞌuc xaqꞌuexav xtoc ti jech tiqꞌuilun ta chuquel ta sventae. Jaꞌ lec, tsꞌicuc avuꞌun ti avocol ta sventa ti colebal lequil achꞌ cꞌope. Yuꞌun ta scoltaot ti Diose yoꞌ ta xꞌechꞌ avuꞌun ti avocole.  
\v 9 Yuꞌun ti Diose laj scoltaotic, laj yicꞌotic, yoꞌ jech ta xijtun yuꞌun. Pero maꞌuc ta sventa ti oy cꞌusi lec laj jpastique. Yuꞌun jaꞌ ti jech onoꞌox oy ta yoꞌnton stuque. Jaꞌ jech xtoc yuꞌun laj xcꞌuxubinotic ti jech oyotic ta stojol ti Cristo Jesuse. Tey onoꞌox laj xcꞌuxubinotic ti Diose cꞌalal muꞌyuc to ox meltsajem ti banomile.  
\v 10 Avi tana un, vinaj xa ti scꞌuxul yoꞌntone. Yuꞌun ital xa ti Jcoltavanej Jesucristoe. Yuꞌun laj xa stubbe yip ti lajebale. Ta sventa ti colebal lequil achꞌ cꞌope, laj xa yacꞌ ta naꞌel ti ta jtatic ti jcuxlejaltic ti mu snaꞌ xlaje.   
\p
\v 11 Jech ti Diose laj yacꞌbun jbain ta yalel ti lequil achꞌ cꞌope. Jaꞌ jech xtoc laj stacun ta jcholcꞌop yoꞌ jech ta jchanubtas ti jyanlumetique.  
\v 12 Jaꞌ yuꞌun un, ta xquichꞌ jvocol ti jech ta xichanubtasvane. Pero mu xiqꞌuexav yuꞌun. Yuꞌun tey jpatoj coꞌnton ta stojol ti Diose. Yuꞌun jnaꞌ lec ti oy smucꞌul stsatsal ta xchabi ti cꞌusi laj yacꞌbun jbaine jaꞌ to ti mi sta ti mucꞌ ta cꞌacꞌalile.   
\p
\v 13 Jech me xachanubtasvan o jech chac cꞌu chaꞌal ti lequil chanubtasel ti laj cal avaꞌie. Staojuc me yav xtoc, chꞌuno o ti Cajvaltique, ti oyuc scꞌuxul avoꞌntone ti jech jtaojtic xa ta sventa ti jech oyotic ta stojol ti Cristo Jesuse.  
\v 14 Ti jech ta xiscoltaotic ti Chꞌul Espíritu ti nacal ta jtojoltique, jaꞌ yuꞌun un, chabio me ti cꞌusi laꞌacꞌbat abain yuꞌun ti Diose.   
\p
\v 15 Xanaꞌ xa xtoc scotolic ti quermanotic ti oyic ta slumal Asiae, laj xa xchꞌayicun ta yoꞌntonic. Ti ta scotolique, tey oy xtoc ti Figeloe, ti Hermógenese.  
\v 16 Ta jcꞌan ti acꞌo cꞌuxbinatuc yuꞌun Cajvaltic ti cꞌu yepal oyic ta sna Onesíforoe. Yuꞌun ti stuque ep ta velta laj spatbun coꞌnton. Jaꞌ jech xtoc muꞌyuc iqꞌuexav yuꞌun ti jech tiqꞌuilun ta chuquele.  
\v 17 Cꞌajomal ti stuque laj yacꞌ persa ta saꞌolanelun ti cꞌalal oyun ta Romae. Jaꞌ jech laj spas jaꞌ to ti laj staun ta saꞌele.  
\v 18 Cꞌalal ta sta yorail ti jun mucꞌ ta cꞌacꞌale, acꞌo cꞌuxubinatuc yuꞌun ti Cajvaltique. Yuꞌun xanaꞌ lec ti ep laj scoltaotic ti ta Efesoe.   
\c 2  
\s1 Ti jun lequil soldado yuꞌun ti Jesucristoe  
\p
\v 1 Ti voꞌote, Nichꞌon, tsaco me lec avip yuꞌun ti bendición ti jtaojtic xa ta sventa ti jech oyotic xa ta stojol ti Cristo Jesuse.  
\v 2 Ti cꞌusi laj avaꞌi lichanubtasvan ta sba ta sat ti epal rextigoetique, jaꞌ me jech xavacꞌbe sbain ti viniquetic ti buchꞌutic lec yoꞌntonique, ti xuꞌ yuꞌun ta xchanubtasel ti yane.   
\p
\v 3 Ti voꞌote, cuchuc me avuꞌun ti vocole. Yuꞌun yajsoldadoot xa ti Jesucristoe.  
\v 4 Ti cꞌalal tiqꞌuil ta soldadoil ti jun soldadoe, mu xuꞌ xba sticꞌ sba ta yan abtel. Yuꞌun jaꞌ ta scꞌan tey smalaoj ti ta spasat ta mantal yuꞌun ti comandantee.  
\v 5 Jaꞌ jech xtoc ti buchꞌu ta xꞌoch ta tajimole, mu xuꞌ ta xichꞌ smoton ti mi mu xchꞌun ti cꞌu sꞌelan ti smantalil ti tajimole.  
\v 6 Ti buchꞌu ta xꞌabtej ta yosile, xuꞌ ta stsac baꞌyel ti cꞌusi ta xlocꞌ ta yosile.  
\v 7 Nopbo smelol ti vaꞌi sꞌelan laj cal taje. Tey ta xacꞌbot anaꞌ scotol smelol ti Cajvaltique.   
\p
\v 8 Vuleso me ta ajol ti ichaꞌcuxi ti Jesucristoe ti jaꞌ snitilul ti ajvalil Davide. Jaꞌ jech ta xacꞌ jnaꞌtic ti colebal lequil achꞌ cꞌop ti vuꞌun ta xcale.  
\v 9 Ti jech ta xcal ti lequil achꞌ cꞌope, jech o xal un, ep ta xquichꞌ jvocol yuꞌun. Yuꞌun coꞌol to sꞌelan jun jmilvanejun ti chuculun ta cadena yuꞌune. Pero ti lequil achꞌ cꞌop yuꞌun ti Diose, mu chuculuc ta cadena ti stuque.  
\v 10 Jech o xal un, ta xcuch cuꞌun ti jvocole, yoꞌ jech lec oyic ti buchꞌutic tꞌujbilic yuꞌun ti Diose, yoꞌ jech ti stuquique ta staic xtoc scolelic sbatel osil ti yan yutsile ta sventa ti jech oyotic ta stojol ti Cristo Jesuse.   
\q1
\v 11 Jaꞌ melel ti cꞌop liꞌe: Mi jmoj lijchamotic schiꞌuque, jaꞌ jech xtoc jmoj ta xijcuxiotic schiꞌuc.   
\q1
\v 12 Mi chquichꞌ jvocoltic schiꞌuque, jaꞌ jech xtoc ta jchiꞌintic ta pas mantal.  
\q1 Mi mu jamaluc ta xcaltic ti scꞌoplale, jaꞌ jech ti stuque: “Mu xcojtiquin leꞌe”, xi jcꞌoplaltic yuꞌun.   
\q1
\v 13 Mi xchibet coꞌntontic ta stojole, pero ti stuque staoj yav ti tucꞌ yoꞌntone.  
\q1 Yuꞌun ti Diose mu xuꞌ ta syanijes ti yoꞌntone.   
\s1 Ti jꞌabtel ti lec ilocꞌ yuꞌun ti yabtele  
\p
\v 14 Vulesbeic ta yoꞌntonic ti quermanotic ti vaꞌi sꞌelan laj calbot taje. Jaꞌ jech xtoc ta sventa ti Cajvaltique, albo yaꞌiic ti acꞌo yictaic ti ta svul sbaic ta jecheꞌ cꞌopetique. Yuꞌun ti vulvul cꞌope, muꞌyuc cꞌusi xtun o. Yuꞌun jaꞌ noꞌox ta soquesatic ti buchꞌutic ta xaꞌiique.  
\v 15 Acꞌo persa ti jamal ta xaval ti lequil achꞌ cꞌop ti jaꞌ melele, yoꞌ jech ta xcꞌot avaꞌan aba ta stojol ti Diose jech chac cꞌu chaꞌal jun jꞌabtel ti mu xqꞌuexave, ti lec ta xbat yuꞌun ti yabtele.  
\v 16 Mu xatsꞌetan achiquin ta yaꞌyiel ti jecheꞌ cꞌopetic ti muꞌyuc yipe. Yuꞌun ti buchꞌutic jech ta xloꞌilajic taje, yantic xa xꞌuninatic yuꞌun ti mulile.  
\v 17 Ti cꞌusi ta xchanubtasvanique ta xpuc batel jech chac cꞌu chaꞌal junuc bateꞌ chamel. Yuꞌun jaꞌ jech laj spasic ti Himeneoe, ti Filetoe.  
\v 18 Yuꞌun ti stuquique laj xa xchꞌac sbaic ta stojol ti melele. Yuꞌun ta xalic ti echꞌ xa la yorail ti chaꞌcuxiele. Ti jech taje, oy jlom ichibaj xa yoꞌnton ta xchꞌunel ti Cajvaltique.  
\v 19 Acꞌo mi jech ta xcꞌot ta pasel taje, jbel scꞌoplal jech ta xal ti Dios ti tsꞌibabile: “Ti Cajvaltique ta xojtiquin ti buchꞌutic yuꞌuntaque”, xi. Jaꞌ jech xtoc ta xal: “Scotol ti buchꞌutic sbisojic ta yajvalic ti Cristoe, tsots scꞌoplal ta sjipic comel ti mulile”, xi.   
\p
\v 20 Ti tey ta jbej mucꞌ ta nae, maꞌuc noꞌox tey oy trasteetic ti meltsanbil ta oroe, ti meltsanbil ta platae. Tey oy xtoc trasteetic ti meltsanbil ta teꞌe, ti meltsanbil ta lume. Oy jlom ti tsots scꞌoplal ta xtune. Oy jlom ti jaꞌ noꞌox yav cꞌaꞌepe.  
\v 21 Ti mi ta jcꞌantic ti lec ta xijtun yuꞌun ti Cajvaltique, ta scꞌan ti mu me xcacꞌ jbatic ta bolibtasele. Jaꞌ jech umbi, ta xijtunotic ta spasel ti cꞌusi leque.   
\p
\v 22 Mu me jechuc avoꞌnton jech chac cꞌu chaꞌal yoꞌnton ti yan queremetique. Lecuc me ti cꞌusi ta xapase. Lecuc me achꞌunoj. Oyuc me scꞌuxul avoꞌnton. Junuc me avoꞌnton jech chac cꞌu chaꞌal ti buchꞌutic lecuneb yoꞌntonic ta staic ta cꞌoponel ti Cajvaltique.  
\v 23 Jech o xal un, mu xatsꞌetan achiquin ta yaꞌyiel ti cꞌopetic ti chꞌabal smelole, ti chꞌabal yutsile. Yuꞌun xanaꞌ lec ti jaꞌ jliquesejcꞌop taje.  
\v 24 Yuꞌun ti jun yajꞌabtel Diose, maꞌuc yabtel ta sliques cꞌop. Jaꞌ ta scꞌan ti oyuc slequilal yoꞌnton yuꞌun scotol. Jaꞌ ta scꞌan xtoc ti xtojob xchanubtasvane, ti oy smucꞌul yoꞌntone.  
\v 25 Yuꞌun jaꞌ ta scꞌan ti ta slequilaluc yoꞌntone, acꞌo stuqꞌuibtas ti buchꞌutic ta xcrontainvanique. Yuꞌun ta smala ora ti acꞌo jeltabatuc yoꞌnton yuꞌun ti Diose,  
\v 26 yoꞌ jech ta xojtiquinic ti melele. Tey ta spoj sbaic loqꞌuel ta petsꞌ ti bu chucul yuꞌun ti pucuje, jaꞌ ti tey ta spasbatic ti cꞌusi ta scꞌan yoꞌnton ti pucuje.   
\c 3  
\s1 Cꞌu sꞌelan ti cristianoetic ti ta slajebtic xa batel ti cꞌacꞌale  
\p
\v 1 Jaꞌ jech xtoc ta scꞌan xanaꞌ ti cꞌalal slajebtic xa batel ti cꞌacꞌale, yuꞌun xiꞌbal sba, ta xlic ep vocol.  
\v 2 Yuꞌun ti cristianoetique stuc noꞌox ta scꞌan ta xcꞌuxubin sbaic. Yuꞌun jaꞌ noꞌox cꞌupijem yoꞌntonic yuꞌun ti taqꞌuine. Ta stoy sbaic. Stuc xa noꞌox lec ta xaꞌi sbaic. Ta xchopol-cꞌoptaic ti Diose. Mu xchꞌunbeic smantal ti stot smeꞌique. Mu snaꞌ xalic colaval. Mu xichꞌic ta mucꞌ ti cꞌusi chꞌunbile.  
\v 3 Muꞌyuc slequilal yoꞌntonic. Muꞌyuc scꞌuxul yoꞌntonic. Ta xloꞌiltavanic ta jyalel. Mu pajtsanbaj ta xaꞌiic ti cꞌusi ta scꞌan ti yoꞌntonique. Muꞌyuc schꞌulelic ta jꞌechꞌel. Contra ta xil scotol ti cꞌusi leque.  
\v 4 Ta xꞌacꞌvan ta milel. Ta xꞌilin ta ora. Meꞌinem ta yoꞌntonic ti stuc noꞌox lec ta xaꞌi sbaique. Mu scꞌan saꞌic ti Diose. Jaꞌ noꞌox ta saꞌic ti cꞌusi lec ta xaꞌi ti stuquique.  
\v 5 Jun to jchꞌunolajel ta sbis sbaic yilel, pero mu xaqꞌuic ta venta ti smucꞌul stsatsal ti scꞌop Diose.  
\p Mu me xavacꞌ aba ta loꞌlael yuꞌun ti buchꞌutic jechic taje.  
\v 6 Ti ta scotolic ti vaꞌi yepal taje, tey oy jlom viniquetic ti chba sticꞌ sbaic ta naetic ta sloꞌlael ti bol antsetique, ti loꞌlabil yoꞌntonic yuꞌun ti cꞌusi ta scꞌan ti sbecꞌtalique, ti toj lec ta xaꞌiic ti mulile.  
\v 7 Ti antsetic taje, tey onoꞌox yacꞌojic persa ta xchanel, pero mu scꞌan xacꞌ ta yoꞌntonic ti melele.  
\v 8 Jech chac cꞌu chaꞌal laj spasic ti jꞌiloletic, jaꞌ ti Janese schiꞌuc ti Jambrese ti laj scrontainic ti Moisese, jaꞌ jech ti viniquetic taje, ta scrontainic ti melele. Yuꞌun soquem ti sjolique. Yuꞌun mi jaꞌuc juteb xchꞌunojic ti Cajvaltique.  
\v 9 Pero mu staojuc yav ti jech ta xloꞌlavanique. Yuꞌun tey ta xlic yilic scotol ti cristianoetic ti bolinebique jech chac cꞌu chaꞌal ti chaꞌvoꞌic ti laj scrontainic ti Moisese.   
\s1 Ti slajeb ti laj scꞌuban ti Pablo ta stojol ti Timoteoe  
\p
\v 10 Ti voꞌote achanoj lec ti cꞌu sꞌelan lichanubtasvane, ti cꞌu sꞌelan ti jcuxlejale, ti cꞌu sꞌelan jnopoje. Aviloj xtoc ti cꞌu sꞌelan jchꞌunoje, ti oy smucꞌul coꞌntone, ti oy scꞌuxul coꞌntone.  
\v 11 Anaꞌoj lec ti cꞌu sꞌelan cuchem cuꞌun scotol ti ilbajinele, ti vocole. Anaꞌoj lec ti laj jta jvocol ti ta jteclum Antioquíae, ti ta Iconioe, schiꞌuc ti ta Listrae. Pero laj scoltaun ti Cajvaltique.  
\v 12 Melel, ti buchꞌutic ta xacꞌ sbaic ta tunel yuꞌun ti Cristo Jesuse, ta onoꞌox xichꞌic svocolic yuꞌun ti ilbajinele.  
\v 13 Pero ti buchꞌutic toj chopolique, ti jloꞌlavanejetique, yantic xa ta soquic batel. Yuꞌun cꞌalal ta xloꞌlavanique, jech ta xlajic ta loꞌlael ec.   
\p
\v 14 Pero ti voꞌote staojuc me yav chꞌuno ti cꞌusi laj avichꞌ chanubtasele, ti xanaꞌ lec ti jaꞌ melele. Yuꞌun xanaꞌ lec ti buchꞌu laj xchanubtasote.  
\v 15 Yuꞌun ta abicꞌtal onoꞌox lic avojtiquin talel ti schꞌul cꞌop Diose ti jaꞌ ta sbijubtasot yoꞌ jech ta xacol ta sventa ti achꞌunoj ti Cristo Jesuse.  
\v 16 Yuꞌun scotol ti schꞌul cꞌop Dios tsꞌibabile, jaꞌ yacꞌoj ta naꞌel stuc ti Diose. Jaꞌ ta xtun cuꞌuntic. Yuꞌun ta xischanubtasotic, ta xacꞌ jnaꞌtic mi oy jmultic, ta xistuqꞌuibtasotic, ta xistojobtasotic ta spasel ti cꞌusi leque.  
\v 17 Jech ti voꞌotic yajꞌabtelotic ti Diose, bijunebotic xa lec, chapalotic xa lec ta spasel scotol ti cꞌusitic leque.   
\c 4  
\p
\v 1-2 Ta sba ta sat ti Diose schiꞌuc ti Cajvaltic Jesucristoe ti ta xtal ta Ajvalile, ti ta xtal xchapan ti buchꞌutic cuxulic toe schiꞌuc ti chamemic xae, ta jcꞌubanbot ti tsotsuc me scꞌoplal xavaꞌi ta yalel ti lequil achꞌ cꞌope. Acꞌo persa ta yalel, maꞌuc to me lec xavaꞌi mi xocolote, mi mu xocolucote. Acꞌbo snaꞌic ti lequil achꞌ cꞌope. Vaꞌano aba ta yacꞌbel yil ti oy spalta ti cristianoetique. Oyuc me smucꞌul avoꞌnton ti cꞌalal ta xachanubtasvane.  
\v 3 Yuꞌun ta sta scꞌacꞌalil ti ta xtavan xaꞌiic ta yaꞌyiel scꞌop Dios ti cristianoetique. Yuꞌun jaꞌ noꞌox ta spasic ti cꞌusi lec ta xaꞌiique, ti stoyobbailique. Jaꞌ yuꞌun un, ta saꞌic epal jchanubtasvanejetic yuꞌunic ti ta xchanubtasatic coꞌol schiꞌuc ti cꞌu sꞌelan ta scꞌan ti yoꞌnton stuquique.  
\v 4 Ti stuquique ta svalopatinic comel ti melele. Jaꞌ noꞌox lec ta xaꞌiic ta stsꞌet chiquintael ti jecheꞌ loꞌiletique.  
\v 5 Pero ti voꞌote staojuc me yav ti tucꞌuc ti snopobil avuꞌune. Cuchuc me avuꞌun ti avocole. Acꞌo persa ta yalel ti colebal lequil achꞌ cꞌope. Vuꞌuc me avuꞌun ti avabtele.   
\p
\v 6 Yan ti vuꞌune ta xa xiꞌacꞌat ta smoton ti Diose. Yuꞌun poꞌot xa scꞌacꞌalil ta xicham.  
\v 7 Tsal xa cuꞌun comel scotol ti cajcrontae. Tsuts xa cuꞌun ti cabtel ti liꞌacꞌbate. Staoj o yav jchꞌunoj ti Cajvaltique.  
\v 8 Avi tana un, jaꞌ xa noꞌox ta xismalaun ti matanale, jaꞌ ti lequil cuxlejale. Jaꞌ ta xiyacꞌbun ti lequil jchapanvaneje, jaꞌ ti Cajvaltique, ti cꞌalal sta yorail ti mucꞌ ta cꞌacꞌale. Pero maꞌuc noꞌox vuꞌun ti ta xiyacꞌbune. Jaꞌ jech xtoc ta xꞌacꞌbatic ec ti buchꞌutic xmuyubaj xa yoꞌnton smalaojic ti ta xchaꞌsut talele.   
\s1 Ti Pabloe ta scꞌanbe vocol ti Timoteoe  
\p
\v 9 Ta jcꞌan ti chtal noꞌox aqꞌuelun ta ora mi xuꞌ avuꞌune.  
\v 10 Yuꞌun ti Demase laj xa yictaun comel. Yuꞌun jaꞌ más lec laj yaꞌi ti sba banomile. Yuꞌun tey xa ibat ta Tesalónica. Ti Crescentee tey xa ibat ta slumal Galacia. Ti Titoe tey xa ibat ta Dalmacia.  
\v 11 Jaꞌ xa noꞌox liꞌ jchiꞌinoj ti Lucase. Saꞌo ti Marcose. Icꞌo talel. Yuꞌun bal xcaꞌi ti ta xiscolta ta abtele.  
\v 12 Yan ti Tíquicoe laj xa jtac batel ta Efeso.  
\v 13 Cꞌalal mi latale, ichꞌbun talel ti jlic jcꞌuꞌ ti laj jcomtsan ta sna ti Carpoe ti nacal ta Troase. Ichꞌbun me talel xtoc ti jlibrotaque schiꞌuc xtoc ti balbil vun ti tsots scꞌoplal ta xtun cuꞌune.   
\p
\v 14 Ti jtentaqꞌuin Alejandroe toj chopol ti cꞌusi laj xa spasbune. Tey ta xtojbat yuꞌun ti Cajvaltique.  
\v 15 Bijan me yuꞌun ec. Yuꞌun me tsots ta scrontain ti cꞌu sꞌelan ta xijchanubtasvane.   
\p
\v 16 Cꞌalal sba velta ti laj xchapanun ti banquilal ajvalile, muꞌyuc buchꞌu laj scoltaun. Laj yictaicun comel scotolic. Ta jcꞌan ti mu me xꞌichꞌbat yeic yuꞌun Dios ti jech laj spasbeicune.  
\v 17 Yuꞌun jaꞌ noꞌox laj scoltaun ti Cajvaltique. Laj yacꞌbun quip ta yalel ti colebal achꞌ cꞌope, yoꞌ jech ta xaꞌiic scotolic ti jyanlumetique. Jaꞌ yuꞌun un, ti Cajvaltique tey laj scoltaun loqꞌuel ta yoc ta scꞌob ti jtiꞌoval leone.  
\v 18 Tey onoꞌox ta xiscoltaun ti cꞌusiuc noꞌox ta xvul ta jtojole. Ta xischabiun yoꞌ jech ta xiꞌoch batel ti bu ta xventainvan ta vinajele. Ichꞌbiluc o ta mucꞌ sbatel osil. Jechuc.   
\s1 Slajeb chabanuc schiꞌuc bendición  
\p
\v 19 Chabanuc ta xcalbe ti Priscae, ti Aquilae, schiꞌuc ti cꞌu yepal oyic ta sna ti Onesíforoe.  
\v 20 Ti Erastoe tey icom ta Corinto. Yan ti Trófimoe ip laj quicta comel ta Mileto.  
\v 21 Mi xuꞌ avuꞌun, laꞌ me qꞌuelun cꞌalal mu to ta xlic ti yorail sictique. Chabanucot xayalbot ti Eubuloe, ti Pudentee, ti Linoe, ti Claudiae, schiꞌuc ti quermanotique.   
\p
\v 22 Acꞌo xchiꞌinot ti Cajvaltic Jesucristoe. Acꞌo yacꞌboxuc bendición acotolic ti Diose. Jechuc.