\id 2PE  
\h 2 PEDRO 
\toc2 2 PEDRO 
\toc1 2 PEDRO 
\mt1 2 San Pedro  
\c 1  
\s1 Ti Pedroe ta stsꞌiba batel scarta ta stojol ti jchꞌunolajeletique  
\p
\v 1 Vuꞌun Simón Pedroun, yajtunelun, yajcholcꞌopun ti Jesucristoe, ti jaꞌ tacbilun yuꞌune. Ta jtsꞌibaboxuc ti jcarta liꞌe ti voꞌoxuc ti laj xa ataic ti jun yutsil achꞌunojic ti Cajvaltique jech chac cꞌu chaꞌal ti vuꞌuncutique. Ti jech jchꞌunojtique, jaꞌ ta sventa ti oy stuqꞌuil yoꞌnton ti Diose schiꞌuc ti Jcoltavanej Jesucristoe.  
\v 2 Ichꞌic ti ep bendicione, ti jun avoꞌntonique ta sventa ti jech laj xavojtiquinic ti Diose schiꞌuc ti Cajvaltic Jesucristoe.   
\s1 Jech stalelic ti jchꞌunolajeletique  
\p
\v 3 Ta sventa smucꞌul stsatsal ti Diose laj xa yacꞌbotic scotol ti cꞌusi xtun cuꞌuntique yoꞌ jech lec ti jcuxlejaltic ta stojole. Yuꞌun laj yacꞌ cojtiquintic ti Buchꞌu laj yicꞌotic ta sventa ti smucꞌul stsatsale schiꞌuc ti schꞌul abtele.  
\v 4 Ta sventa ti jech taje, oy xa ta jtojoltic ti cꞌusi yalojbotic ti echꞌem yutsile, ti tsots scꞌoplale. Ta sventa ti cꞌusi yalojbotic ti Diose, jech o xal un, xuꞌ ta xquichꞌbetic stalel stuc ti Diose, yoꞌ jech xuꞌ ta xquictatic comel ti chopol ti cꞌusi ta jcꞌantic liꞌ ta sba banomile.  
\v 5 Jech o xal un, ta scꞌan ta xavaqꞌuic persa ti ta xavacꞌbeic más schiꞌil ti achꞌunojique. Ti schiꞌil ta xavacꞌbeic ti achꞌunojique, jaꞌ ti lec atalelique. Ti schiꞌil ta xavacꞌbeic ti lec atalelique, jaꞌ ti lec snopobil avuꞌunique.  
\v 6 Ti schiꞌil ta xavacꞌbeic ti lec snopobil avuꞌunique, jaꞌ ti xuꞌ avuꞌunic spajesel abaique. Ti schiꞌil ta xavacꞌbeic ti xuꞌ avuꞌunic spajesel abaique, jaꞌ ti smucꞌul avoꞌntonique. Ti schiꞌil ta xavacꞌbeic ti smucꞌul avoꞌntonique, jaꞌ ti oy ta avoꞌntonic ti Diose.  
\v 7 Ti schiꞌil ta xavacꞌbeic ti oy ta avoꞌntonic ti Diose, jaꞌ ti lec xavil abaic schiꞌuc ti avermanotaque. Ti schiꞌil ta xavacꞌbeic ti lec xavil abaic schiꞌuc ti avermanotaque, jaꞌ ti oy scꞌuxul avoꞌntonique.   
\p
\v 8 Ti mi jech oy ta atojolic ti vaꞌi sꞌelan taje, ti mi jech ta xapasic oe, mu ta jecheꞌuc noꞌox ti acuxlejalique. Jaꞌ jech xtoc mu ta jecheꞌuc noꞌox laj avojtiquinic ti Cajvaltic Jesucristoe.  
\v 9 Yan ti buchꞌu chꞌabal ta stojol ti vaꞌi sꞌelan taje, coꞌol sꞌelan jun maꞌsat, mu nomuc ta xcꞌot ti sate. Ichꞌay ta yoꞌnton ti ichꞌaybat xa ti smul ti voꞌne spasoj talele.  
\v 10 Jech o xal un, Quermanotac, ti jech laj xa yicꞌoxuc laj stꞌujoxuc ti Diose, aqꞌuic persa ti abtejuc ta avoꞌntonic ti vaꞌi sꞌelan taje. Jech o xal umbi, mu xayalic ta lum.  
\v 11 Jaꞌ jech xtoc lec jamal ti abeique, libreoxuc ta xaꞌochic batel ti bu ta xventainvan sbatel osil ti Cajvaltic Jcoltavanej Jesucristoe.   
\p
\v 12 Jech o xal un, tey onoꞌox ta jvules ta ajolic ti vaꞌi sꞌelan taje, acꞌo mi xanaꞌic xa, acꞌo mi jun avoꞌntonic yuꞌun ti melel ti oy ta atojolique.  
\v 13 Yuꞌun jech coꞌnton ta xcaꞌi ti ta xcalboxuc avaꞌiic ti bijubtasel taje ti cꞌu sjalil ti liꞌ to cuxulun ta sba banomile.  
\v 14 Yuꞌun ti Cajvaltic Jesucristoe laj xa yacꞌbun jnaꞌ ti jutuc xa scꞌan ta xquicta comel ti sba banomile.  
\v 15 Pero ta xcacꞌ persa ti cꞌu yepal xuꞌ cuꞌune, yoꞌ jech tey onoꞌox ta xavules ta ajolic ti bijubtasel taje cꞌalal mi lichame.   
\s1 Ti buchꞌutic laj yilic smucꞌul stsatsal ti Cristoe  
\p
\v 16 Ti ta xtal ta smucꞌul stsatsal ti Cajvaltic Jesucristo ti laj calcutic avaꞌiique, mu jecheꞌuc noꞌox loꞌil ti nopbile. Yuꞌun laj quilcutic ta jba ta jsatcutic yutsilal slequilal ti Cajvaltique.  
\v 17 Laj quilcutic ti cꞌalal jun yutsil iꞌacꞌat ta ichꞌel ta mucꞌ yuꞌun ti Jtotic Diose. Laj caꞌicutic ti jech jun yutsil icꞌopoj ti Diose: “Jaꞌ ti jcꞌuxubinbil Nichꞌon liꞌe, ti ximuyubaj xa yuꞌune”, xi.  
\v 18 Yuꞌun vuꞌuncutic laj caꞌicutic ti scꞌopojel ti lic talel ta vinajele. Yuꞌun tey oyuncutic schiꞌuc ti Cajvaltic ti ta chꞌul vitse.   
\p
\v 19 Oy to más tsots scꞌoplal ti ta xacꞌ jnaꞌtic scꞌoplal ti Cajvaltique. Jaꞌ ti lequil cꞌop ti tsꞌibabil yuꞌun ti jꞌalcꞌopetique. Jech o xal un, lec ti tsꞌetel achiquinic ta xavaꞌiic ti lequil cꞌop taje. Yuꞌun coꞌol sꞌelan jun lampara ti xnobet ta icꞌal osile. Tey xnobet jaꞌ to mi sacub ti osile, ti ta xlocꞌ talel ti cꞌanal ta sacubel osile, yoꞌ jech ta xacꞌ xojobal ta atojolic.  
\v 20 Pero jaꞌ me nopic baꞌyel liꞌe. Ti cꞌusi tsꞌibabil ta chꞌul cꞌope, muꞌyuc buchꞌu junucal ti xuꞌ yuꞌun ta stabe smelol ta stuc noꞌoxe.  
\v 21 Yuꞌun ti jꞌalcꞌopetic ta voꞌnee maꞌuc laj snop stuquic ti cꞌusi laj yalique. Yuꞌun ti stuquique jaꞌ viniquetic ti tꞌujbilic yuꞌun ti Diose. Yuꞌun coltabilic yuꞌun ti Chꞌul Espíritue. Jech o xal un, laj yalic ti cꞌusi lic talel ta stojol ti Diose.   
\c 2  
\s1 Ti jutcꞌop jchanubtasvanejetique  
\p
\v 1 Pero jaꞌ jech xtoc iꞌayan jutcꞌop jꞌalcꞌopetic ta stojol ti jꞌisraelal cristianoetic ta voꞌnee. Jaꞌ noꞌox jech xtoc ta xꞌayan jloꞌlavanej jchanubtasvanejetic tey ta atojolic. Yuꞌun ti stuquique ta mucul ta xchanubtasvanic ti cꞌusi nopbil yuꞌun stuquic ti ta soquesvane. Jech o xal laj svalopatinic ti Cajvaltic ti jaꞌ icoltaatic yuꞌune. Ti vaꞌi sꞌelan ta spasic taje, jech o xal ta ora noꞌox ta xacꞌbe sba stuquic ti scastigoique.  
\v 2 Manchuc mi chopol ti scuxlejalique, pero ep ti cristianoetic ta stsꞌacliic batele. Jaꞌ yuꞌun un, jaꞌ ta scojic ti chopol ta xbat scꞌoplal ti lequil achꞌ cꞌop ti jaꞌ melele.  
\v 3 Ti jech ayanem ta yoꞌnton ti taqꞌuine, jech o xal un, ta sloꞌla ti ataqꞌuinic yuꞌun ti cꞌusi mu meleluc ta xchanubtasvanique. Pero mu onoꞌox chaꞌbel xcolic ti ta xichꞌ ti svocolique. Jaꞌ ti voꞌne xa chapanbil scꞌoplal ti ta xichꞌic ti castigoe.   
\p
\v 4 Ti ángeletic ti buchꞌutic laj sta smulique, muꞌyuc onoꞌox xꞌacꞌbatic perdón yuꞌun ti Diose. Jaꞌ noꞌox ijipatic yalel ta cꞌatimbac. Tey chucajtic ta cadena iꞌictaatic comel ti ta icꞌal osile. Tey quejbilic yoꞌ ta xichꞌic chapanel.  
\v 5 Jaꞌ jech xtoc ti voꞌne cristianoetique muꞌyuc onoꞌox xꞌacꞌbatic perdón yuꞌun ti Diose. Cꞌajomal noꞌox itacbatic talel nojel ta voꞌ ta stojolic ti chopol cristianoetic taje. Ti Diose cꞌajomal laj scolta ti Noee schiꞌuc yan vucub cristianoetic. Yuꞌun ti Noee laj yal ti tucꞌ ti cꞌusi ta scꞌan ti Diose.  
\v 6 Jaꞌ jech xtoc ti Diose laj xchapan ta slilinel ti jteclumetic Sodomae schiꞌuc ti Gomorrae. Tey ilajic ta cꞌocꞌ, tan icomic. Jaꞌ jech laj spas ti Diose, yoꞌ jech ta sbijubtasatic ti chopol cristianoetic ti buchꞌutic tsꞌacal to ta xchꞌiique.  
\v 7 Pero ti Diose laj scolta ti Lote, ti jaꞌ jun lequil vinique, ti oy ta at oꞌnton ti cꞌalal laj yil ti chopol scuxlejalic ti chopol cristianoetique.  
\v 8 Ti Lote, ti jech xchiꞌinoj ta naclej ti chopol cristianoetique, scotol cꞌacꞌal oy ta at oꞌnton cꞌalal laj yaꞌi laj yil ti chopol ti cꞌusi ta spasique.  
\v 9 Jech o xal un, ti Cajvaltique snaꞌ scolta ti buchꞌu oyic ta preva ti nabalic ta stojole. Jaꞌ jech xtoc ti Cajvaltique snaꞌ ta xacꞌbe castigo ti buchꞌu chopolique ti cꞌalal ta sta scꞌacꞌalil ti chapanele.   
\p
\v 10 Pero ti Diose jaꞌ más ta xacꞌbe yichꞌ castigo ti buchꞌutic ta xacꞌbe sbaic ti cꞌusi chopol ta scꞌan ti yoꞌntonique, ti ta sbajic ti jech yichꞌoj yabtel ti Cajvaltique. Yuꞌun toj tsots yoꞌntonic. Mu snaꞌ xqꞌuexavic. Mi jaꞌuc ta xiꞌic ta xchopol-cꞌoptael ti chopol ángeletic ti tsots xuꞌ yuꞌunique.  
\v 11 Yan ti lequil ángeletique, acꞌo mi más cajalic, pero mi jaꞌuc ta xchopol-cꞌoptaic ta stojol Cajvaltic ti chopol ángeletique.   
\p
\v 12 Pero ti viniquetic taje coꞌol sꞌelan animaletic ti muꞌyuc schꞌulelique, ti jaꞌ noꞌox cuxulic ta spasel ti cꞌusi lec ta xaꞌiique, ti jaꞌ noꞌox ta xvoqꞌuic yoꞌ jech ta xichꞌic tsaquel ti ta xichꞌic milele. Jaꞌ noꞌox chopol ta xcꞌopojic ta stojol ti cꞌusitic mu xaꞌibeic smelole. Pero jaꞌ noꞌox jech ta xchamic jech chac cꞌu chaꞌal ti animaletique.  
\v 13 Yuꞌun ta xichꞌ svocolic ta scoj ti laj yacꞌbe yichꞌ svocol ti yane. Ti stuquique ta snopic ti xmuyubajic ta xꞌelovajic ta yacꞌbel sbaic ti cꞌusi mu jaluque. Jaꞌ yuꞌun un, ta xꞌacꞌvan ta qꞌuexlal, xvochvun yuꞌun ti cristianoetic ti tey achiꞌinojic ti cꞌalal ta xapasic ti qꞌuine. Tey sjunul yoꞌntonic ta xꞌelovajic ta xloꞌlavanic yuꞌun ti cꞌusi ta scꞌan ti yoꞌntonique.   
\p
\v 14 Ti stuquique jaꞌ noꞌox oy ta yoꞌntonic ti ta scꞌupin yaꞌiic ti antsetic ti bu ta xilique. Mu slumtsajic ta saꞌel ti smulique. Ta scꞌunibtasbe yoꞌntonic ti buchꞌutic muꞌyuc yip ti yoꞌntonique. Xtojobic lec ta saꞌel ti cꞌusi ta scꞌupin yaꞌiique.  
\v 15 Chꞌayemic ta be, yuꞌun laj xa yictaic comel ti tuqꞌuil bee. Yuꞌun jaꞌ noꞌox xchanojbeic yoꞌnton ti jꞌalcꞌop Balaame ti jaꞌ snichꞌon ti Beore. Yuꞌun ti Balaame ta ox spas yaꞌi canal taqꞌuin ta spasel ti cꞌusi chopole.  
\v 16 Ti stuque tey ijajantaat yuꞌun jcot burro yuꞌun ti smule. Yuꞌun tey icꞌopoj ti burro jech chac cꞌu chaꞌal cristiano cꞌalal mu snaꞌ xcꞌopoj onoꞌoxe. Tey muꞌyuc xꞌacꞌbat spas ti jech chuvajineb ti sjole.   
\p
\v 17 Ti chopol jchanubtasvanejetic taje coꞌol sꞌelanic pozo ti chꞌabal yaꞌlele, coꞌol sꞌelanic toc ti icꞌbil ta xbat yuꞌun ti iqꞌue. Tey xa chapal scꞌoplalic ti ta xjelubtasatic sbatel osil ti bu icꞌ ta jmeque.  
\v 18 Yuꞌun cajal ti cꞌusi xlocꞌ ta yeique, pero jecheꞌ noꞌox. Ta xalic ti xuꞌ ta spasic ti cꞌusi scꞌan ti yoꞌntonique, jech o xal ti viniquetic taje ta scꞌunibtasbe yoꞌntonic ti buchꞌutic ti jaꞌ to noꞌox ta xchꞌac sbaic ta stojol ti buchꞌutic cuxulic ta spasel ti chopole.  
\v 19 Ta xalbeic ti colemic xae, pero ti stuquique ochemic ta mosovil yuꞌun ti cꞌusi chopol ta scꞌan ti sbecꞌtalique. Yuꞌun ti jujun viniquetique ta xcomic o ta yajmosov ti bu tsalbil ta xcꞌotique.  
\v 20 Buchꞌuuc noꞌox ti laj xa yojtiquinic ti Jcoltavanej Cajvaltic Jesucristoe, ti laj yictaic ta spasel ti chopol liꞌ ta sba banomile, pero mi tsꞌacal to ta xlic xchuc sbaic ta spasel yan velta ti chopole, ti jech tsalbil ta xcom yuꞌune, jech o xal un, más to echꞌem chopol ta xcomic. Jaꞌ mu sta ti baꞌyel to oxe.  
\v 21 Ati cristianoetic taje yuꞌun jaꞌ más to lec manchucuc laj yojtiquinic ti lequil bee. Jaꞌ toj vocol ti yojtiquinojic xae ti cꞌalal tsꞌacal to ta xchꞌac sbaic ta stojol ti chꞌul mantal ti iꞌacꞌbatique.  
\v 22 Pero jaꞌ icꞌot ta stojolic ta melel jech chac cꞌu chaꞌal xꞌale ti cꞌop xavaꞌiique: “Ti tsꞌiꞌe ta xchaꞌloꞌ ti xenele. Jaꞌ jech xtoc ti chitom ti naca to laj yichꞌ poquele, chba sbalalin sba ta achꞌel yan velta”, xi ti cꞌope.   
\c 3  
\s1 Cꞌalal ta xtal ti Cajvaltique  
\p
\v 1 Quermanotac, jaꞌ schibal jcarta ti jech ta jtsꞌibaboxuc talel liꞌe. Ti ta jbaꞌyel cartae schiꞌuc ti schibal liꞌe, ta jcꞌan ti acꞌo anopic lec ta sventa ti cꞌu sꞌelan laj jbijubtasoxuque.  
\v 2 Vuleso me ta avoꞌntonic ti cꞌusi laj yalic comel ti chꞌul jꞌalcꞌopetic ta voꞌnee. Jaꞌ jech xtoc, vuleso me ta avoꞌntonic smantal ti Jcoltavanej Cajvaltique ti laj yalboxuc comel ti jcholcꞌopetic yuꞌune.   
\p
\v 3 Mu me xachꞌay ta avoꞌntonic ti cꞌusi baꞌyel ta xcalboxuc avaꞌiic liꞌe: Ti cꞌalal slajebtic xa batel ti cꞌacꞌale, ta xvul ta loqꞌuel cristianoetic ti chopol ta xcꞌopojic ta stojol ti cꞌusitic leque. Yuꞌun staoj yav ta xacꞌbe sbaic ti cꞌusi chopol ta scꞌan ti yoꞌntonique.  
\v 4 Jech o xal jech ta sjaqꞌuic: “¿Cꞌusi laj spas ti yaloj ti Cristo ta xtale? Yuꞌun chamic xa ti jmolmucꞌtotique, pero staoj onoꞌox yav jech chac cꞌu chaꞌal lic meltsajuc talel ti banomile”, xiic.  
\v 5 Jech ta xalic ti cristianoetique, yuꞌun mu scꞌan svules ta yoꞌntonic ti ta voꞌne smeltsajel talel ti vinajele. Jaꞌ jech xtoc yuꞌun ta scꞌopojel noꞌox ti Diose ilocꞌ talel ti banomil ta voꞌe, ta sventa voꞌ xtoc ti jech oy ti banomile.  
\v 6 Jaꞌ jech xtoc chꞌay ta yoꞌntonic ti ta sventa ti voꞌe ital ti nojel ta voꞌe. Jech o xal un, icham scotol ti cristianoetique.  
\v 7 Pero ti vinajele, ti banomil ti oy ta ora liꞌe, ta sventa smantal ti Diose ti chapanbil scꞌoplal ti ta xlaj ta cꞌoqꞌue. Ti cꞌocꞌ taje, jaꞌ o ta xchicꞌ ti cꞌalal yorail ti chapanele, ti cꞌalal jaꞌ o xlaj scꞌoplalic ti chopol cristianoetique.   
\p
\v 8 Jaꞌ jech xtoc, Quermanotac, mu me xachꞌay ta avoꞌntonic, ti jun cꞌacꞌale coꞌol sꞌelan jmil jabil ta xaꞌi ti Cajvaltique. Ti jmil jabil xtoque coꞌol sꞌelan jun cꞌacꞌal ta xaꞌi.  
\v 9 Ti jech ti mu to ta xtal ti Cajvaltique, mu yuꞌunuc ta sjalijes ti yaloj ti ta xchaꞌsut talele jech chac cꞌu chaꞌal ta snopic ti jlome. Yuꞌun ta slequil yoꞌnton smalaoj ti acꞌo sjelta yoꞌnton scotolique. Yuꞌun mu scꞌan mi junuc ta xbat ta chꞌayel.   
\p
\v 10 Pero ti scꞌacꞌalil ti ta xtal ti Cajvaltique, mu jnaꞌtic. Jaꞌ to noꞌox xcaꞌitic ti liꞌ xa onoꞌox oye jech chac cꞌu chaꞌal junuc jꞌelecꞌ ti ta xtal ta acꞌobaltique. Jech o xal un, ti vinajele, mu noꞌox albajuc ta xacꞌ xiꞌelal ti xvoꞌoꞌet xa ta sac chꞌay batele. Scotol ti cꞌusitic ti oy ta vinajele ta xlilij ta cꞌocꞌ. Jaꞌ jech xtoc ti banomile ta xichꞌ chiqꞌuel ta cꞌocꞌ schiꞌuc scotol ti cꞌusitic oy yuꞌune.   
\p
\v 11 Yuꞌun ti jech ta xlaj scotol taje, jaꞌ yuꞌun un, junuc avoꞌntonic cuxianic, acꞌo abaic ta tunel yuꞌun ti Diose.  
\v 12 Junuc avoꞌntonic malaic ti scꞌacꞌalil ti ta xtal ti Diose. Lecuc ti cꞌusi ta xapasique yoꞌ jech ta xtal ta ora. Ti jech cꞌacꞌal taje, jech ti vinajele ta xlilij ta cꞌocꞌ. Jaꞌ jech xtoc ti cꞌusitic oye ta xꞌunij ta leb cꞌocꞌ.  
\v 13 Yan ti voꞌotique ta jmalatic ti achꞌ vinajele, ti achꞌ banomile, ti yaloj onoꞌox Dios ti ta xaqꞌue, ti bu jaꞌ lec tucꞌ scotole.   
\p
\v 14 Jech o xal un, Quermanotac, ti jech to ta xamalaic taje, aqꞌuic persa ti jun avoꞌntonique, yoꞌ jech muꞌyuc amulic ta xvul staoxuc ti Diose.  
\v 15 Ti Cajvaltique ta scꞌan ti ta xijcolotique. Jech o xal un, mu me xachꞌay ta avoꞌntonic ti ta slequil yoꞌnton tey to smalaoje. Yuꞌun jaꞌ onoꞌox jech laj stsꞌibaboxuc ti quermanotic Pabloe, jaꞌ ti cꞌu sꞌelan iꞌacꞌbat sbijil yuꞌun ti Diose.  
\v 16 Yuꞌun jech onoꞌox laj yalboxuc avaꞌiic ta scotol scarta, acꞌo mi oy bu jlom ti vocol ta aꞌyibel ti smelole. Ti buchꞌutic muꞌyuc sbijilique, ti muꞌyuc lec xchꞌunojique, ta syanijesbeic smelol jech chac cꞌu chaꞌal ti oy bu ta syanijesbeic smelol ti jlom chꞌul cꞌope. Jech o xal un, ta xacꞌ sba ta chꞌayel stuquic.   
\p
\v 17 Jech o xal un, Quermanotac, ti jech laj avaꞌiic ti jech laj avichꞌic albel taje, jech o xal un, bijanic me, yoꞌ jech mu xalajic ta loꞌlael yuꞌun ti buchꞌutic chopolique, yoꞌ jech mu xavictaic comel ti bu lec oyoxuque.  
\v 18 Pero jaꞌ lec, ojtiquinic lec ti Cajvaltic Jcoltavanej Jesucristoe. Jaꞌ jech xtoc, chꞌianic ta sventa ti scꞌuxul yoꞌntone. Ichꞌbiluc ta muc ti Cajvaltic Jesucristo avi tana liꞌe. Jechuc o sbatel osil. Jechuc.