\id 1JN  
\h 1 JUAN 
\toc2 1 JUAN 
\toc1 1 JUAN 
\mt1 1 San Juan  
\c 1  
\s1 Ti Buchꞌu ta sventain ti cuxlejale  
\p
\v 1 Ta jtsꞌibaboxuc talel scꞌoplal ti Buchꞌu tey xa onoꞌox oy cꞌalal lic ayanuc talel scotol ti cꞌusitic oye. Ti vuꞌuncutique laj quilcutic ta jsatcutic. Laj caꞌibecutic ti scꞌopojele, yuꞌun laj quilcutic, laj jpiccutic. Taje, jaꞌ ti Buchꞌu yichꞌoj ta sventa ti cuxlejale.  
\v 2 Ti Buchꞌu yichꞌoj ta sventa ti cuxlejale laj yacꞌ sba ta ojtiquinel. Laj quilcutic. Jech o xal ta jvinajesbecutic scꞌoplal. Ta xcalcutic avaꞌiic scꞌoplal ti Buchꞌu yichꞌoj ta sventa ti cuxlejal sbatel osile, ti tey to ox xchiꞌinoj ti Dios Totile. Avi tana liꞌe, laj yacꞌ sba ta ilel ta jtojolcutic.  
\v 3 Jech o xal un, jamal ta xcalcutic avaꞌiic ti laj xa quilcutique, ti laj xa caꞌibecutic ti scꞌopojele, yoꞌ jech jun avoꞌntonic ta jtojolcutic jech chac cꞌu chaꞌal ti vuꞌuncutique ta melel jun coꞌntoncutic ta stojol ti Jtotic Diose schiꞌuc ti Snichꞌone, jaꞌ ti Jesucristoe.  
\v 4 Jaꞌ yuꞌun un, ta jtsꞌibaboxuc talel taje, yoꞌ jech xamuyubajic ta jꞌechꞌel.   
\s1 Sac Jaman xojobal ti Diose  
\p
\v 5 Jaꞌ jech laj xchanubtasuncutic ti Jesucristoe ti jaꞌ jech ta xcalcutic avaꞌiique: Ti Diose sac jaman xojobal ti stuque. Mi jaꞌuc jutebuc oy icꞌal osil ta stojol.  
\v 6 Mi ta xcaltic ti junotic schiꞌuque cꞌalal oyotic ta icꞌal osile, jutbil ti cꞌusi ta xcaltique, ti cꞌusi ta jpastique.  
\v 7 Pero mi oyotic ta saquilal osil jech chac cꞌu chaꞌal ti Dios ti oy ta saquilal osile, jaꞌ yuꞌun umbi, jun coꞌnton jcotoltic. Jaꞌ jech xtoc schꞌichꞌel ti Snichꞌone, jaꞌ ti Jesucristoe, ta spoc ti cꞌusiuc noꞌox mulil ti oy ta jtojoltique.   
\p
\v 8 Yan mi ta xcaltic ti muꞌyuc ti jmultique, ta jloꞌla jba jtuctic, jecheꞌotic.  
\v 9 Pero mi jamal ta xcaltic ti jmultique, ta jpat coꞌntontic ta stojol ti Dios ti ta spas ti cꞌusi lec ta xile. Jech o xal un, ta xijyacꞌbotic perdón yuꞌun ti jmultique. Jaꞌ jech xtoc ta xispocbotic scotol ti jchopolaltique.  
\v 10 Pero mi ta xcaltic ti muꞌyuc jtaoj jmultique, ta jbistic ta jutcꞌop ti Diose ti cꞌalal ta xal ti jsaꞌmulilotique.   
\c 2  
\s1 Jꞌetꞌesejcꞌop cuꞌuntic ti Cristoe  
\p
\v 1 Jech ta jtsꞌibaboxuc talel liꞌe, Jnichꞌnabtac, yoꞌ jech mu xasaꞌ amulic. Pero mi oy buchꞌu junucal avuꞌunic ti laj sta ti smule, oy jun Jꞌetꞌesejcꞌop cuꞌuntic ta stojol ti Jtotic Diose, jaꞌ ti Jesucristo ti tucꞌ yoꞌntone.  
\v 2 Jaꞌ ta sventa ti Jesucristoe ti jech lijꞌacꞌbat perdón yuꞌun ti jmultique. Pero maꞌuc noꞌox ti voꞌotique. Yuꞌun laj staic perdón ec scotol ti cristianoetic ti oyic ta sjoylej banomile.   
\p
\v 3 Mi ta jchꞌunbetic smantal ti Diose, jech o xal umbi, ta jnaꞌtic ti laj xa cojtiquintique.  
\v 4 Pero mi oy buchꞌu ta xal: “Ti vuꞌune ta xcojtiquin ti Diose”, mi xie, pero mi muꞌyuc ta xchꞌunbe ti smantale, jaꞌ jun jutcꞌop, jecheꞌ ta jꞌechꞌel.  
\v 5 Yan ti buchꞌu ta spas ti cꞌusi ta xale, cꞌux ta xaꞌi ti Dios ta melele. Jaꞌ jech ta jnaꞌtic ti junotic schiꞌuc ti Diose.  
\v 6 Ti buchꞌu ta xal ti junic schiꞌuc ti Diose, jechuc me yoꞌnton cuxiuc jech chac cꞌu chaꞌal ay cuxiuc ti Jesucristoe.   
\s1 Ti achꞌ mantale  
\p
\v 7 Quermanotac, mu yuꞌunuc ta jtsꞌibaboxuc talel achꞌ mantal. Yuꞌun jaꞌ onoꞌox ti mantal ti oy onoꞌox ta atojolic ta sliquebe. Ti mantal ti laj avaꞌiic scꞌoplale, jaꞌ onoꞌox ta voꞌne.  
\v 8 Manchuc mi jech un, pero ti jech ta jtsꞌibaboxuc talel liꞌe, coꞌol sꞌelan achꞌ mantal ta xcꞌot ta atojolic. Jaꞌ ti laj svinajes ti Cristo ti jaꞌ melel ti achꞌ mantale jech chac cꞌu chaꞌal ti oy ta atojolique. Yuꞌun ti icꞌal osile ta xa xꞌechꞌ batel. Yuꞌun xojobin xa ta melel ti saquilal osile.   
\p
\v 9 Mi oy buchꞌu ta xal ti oy ta saquilal osile, pero mi xtiꞌet to sjol ta stojol ti yermanoe, oy to ta icꞌal osil.  
\v 10 Yan ti buchꞌu cꞌux ta xaꞌi ti yermanoe, oy ta saquilal osil. Muꞌyuc cꞌusi chopol tey ta stojol yoꞌ ta xyalesat ta mulil.  
\v 11 Yan ti buchꞌu xtiꞌet sjol ta stojol ti yermanoe, oy ta icꞌal osil ta xanav. Mu snaꞌ bu ta xbat. Yuꞌun ipasat ta maꞌsat yuꞌun ti icꞌal osile.   
\p
\v 12 Ta jtsꞌibaboxuc talel liꞌe, Jnichꞌnabtac, yuꞌun ti Diose laꞌacꞌbatic xa perdón yuꞌun amulic ta sventa ti Jesucristoe.  
\v 13 Ta jtsꞌibaboxuc talel liꞌe, totil meꞌiletic, yuꞌun laj xa avojtiquinic ti Buchꞌu oy xa onoꞌox cꞌalal lic meltsajuc talel scotole.  
\p Ta jtsꞌibaboxuc talel liꞌe, querem tsebetic, yuꞌun laj xa apechꞌic ta teqꞌuel ti pucuje.  
\p Ta jtsꞌibaboxuc talel liꞌe, Jnichꞌnabtac, yuꞌun laj xa avojtiquinic ti Jtotic Diose.   
\p
\v 14 Ta jtsꞌibaboxuc talel liꞌe, totil meꞌiletic, yuꞌun laj xa avojtiquinic ti Buchꞌu oy xa onoꞌox cꞌalal lic meltsajuc talel scotole. Jech ta jtsꞌibaboxuc talel xtoc liꞌe, querem tsebetic, yuꞌun tsotsoxuc, yuꞌun oy ta avoꞌntonic ti scꞌop Dios ti laj achꞌunique, yuꞌun laj xa apechꞌic ta teqꞌuel ti pucuje.   
\p
\v 15 Mu me xbat avoꞌntonic yuꞌun ti sba banomile schiꞌuc ti cꞌusitic oy yuꞌune. Yan ti buchꞌu ta xbat yoꞌnton yuꞌun ti sba banomile, muꞌyuc cꞌux ta xaꞌi ti Jtotic Diose.  
\v 16 Yuꞌun ti cꞌusi ta xacꞌ ti sba banomile, maꞌuc liquem talel ta stojol ti Jtotic Diose. Yuꞌun jaꞌ yuꞌun stuc ti sba banomile. Yuꞌun ti oy cꞌusi chopol ta scꞌan ti scꞌupijel coꞌntontique, ti ta jcꞌan caꞌitic ti cꞌusi lec ta xil ti jsatique, ti ta jtoy jbatic yuꞌun ti cꞌusi xꞌayane, scotol ti vaꞌi sꞌelan taje, jaꞌ ta xacꞌ ti sba banomile.  
\v 17 Yuꞌun ti sba banomile ta xa xlaj batel ti cꞌusi oy yuꞌune schiꞌuc scotol ti chopol scꞌupijel coꞌntontique. Yan ti buchꞌu ta spas ti cꞌusi ta scꞌan yoꞌnton ti Diose, ta xcuxi o sbatel osil.   
\s1 Ti melele schiꞌuc ti jutbile  
\p
\v 18 Jnichꞌnabtac, sta xa yorail ti slajebal cꞌacꞌale. Ti voꞌoxuque avaꞌbinojic xa ti ta xtal jun ti ta scrontain ti Cristoe. Avi tana liꞌe, oy ep ti cristianoetic ti ta scrontainic ti Cristoe. Jech o xal un, ta jnaꞌtic ti slajebtic xa batel ti cꞌacꞌale.  
\v 19 Ti stuquic taje, liꞌ ilocꞌ ta jtojoltique. Yuꞌun maꞌuc onoꞌox jchiꞌiltic ta melel. Ti jaꞌuc jchiꞌiltique, liꞌ oy ta jtojoltic ti jechuque. Pero ti jech icꞌot ta pasele, yoꞌ jech ta xvinaj ta melel ti maꞌuc jchiꞌiltic scotole.   
\p
\v 20 Yan ti voꞌoxuque laj xa yacꞌboxuc Chꞌul Espíritu ti Cristoe. Jech o xal un, jamal aba asatic acotolic.  
\v 21 Jech ta jtsꞌibaboxuc talel liꞌe, yuꞌun laj xa avojtiquinic ti melele. Pero mu yuꞌunuc ta xcal ti mu xavojtiquinique. Yuꞌun xanaꞌic lec ti mu xlocꞌ talel jutbil cꞌop ta stojol ti melele.   
\p
\v 22 ¿Buchꞌu ti jutcꞌop un chaꞌe? Jaꞌic ta melel ti buchꞌu ta xal ti Jesuse maꞌuc ti Cristoe. Jaꞌ me ti yajcronta Cristo taj une. Yuꞌun ta scrontainic ti Dios Totile schiꞌuc ti Nichꞌonile.  
\v 23 Yuꞌun scotol ti buchꞌutic ta scrontainic ti Nichꞌonile, muꞌyuc oy ta stojolic ti Dios Totile. Yan ti buchꞌu ta xal ti xchꞌunoj ti Nichꞌonile, jaꞌ jech xtoc umbi, xchꞌunoj ti Dios Totile.   
\p
\v 24 Jech o xal un, tey me oyuc o ta avoꞌntonic ti lequil achꞌ cꞌop ti laj avaꞌiic talel ta sliquebale. Ti mi jech tey oy ta avoꞌntonic ti cꞌusi laj avaꞌiic talel ta baꞌyele, jaꞌ jech ti voꞌoxuque junoxuc xa schiꞌuc ti Nichꞌonile schiꞌuc ti Dios Totile.  
\v 25 Yuꞌun ti Jesucristoe yalojbotic onoꞌox ti ta xacꞌ ti cuxlejal sbatel osile.   
\p
\v 26 Jaꞌ jech laj jtsꞌibaboxuc avaꞌiic scꞌoplal ti jloꞌlavanejetic taje.  
\v 27 Pero ti voꞌoxuque avichꞌojic xa ti Chꞌul Espíritu ti laj yacꞌboxuc ti Cristoe. Jaꞌ yuꞌun un, mu persauc ti oy buchꞌu ta xaschanubtasoxuque. Yuꞌun jaꞌ stuc ti Chꞌul Espíritu ti ta xaschanubtasoxuc scotole. Ti cꞌu sꞌelan ta xaschanubtasoxuque, jaꞌ melel onoꞌox, muꞌyuc jutbil. Jech o xal un, junuc avoꞌntonic cuxianic ta stojol ti Cristoe jech chac cꞌu chaꞌal ta xaschanubtasoxuc ti Chꞌul Espíritue.   
\p
\v 28 Jaꞌ yuꞌun un, Jnichꞌnabtac, junucoxuc me ta stojol ti Cristoe, yoꞌ jech jun coꞌntontic ta stojol ti cꞌalal ta xvul ta loqꞌuele, yoꞌ jech mu xijqꞌuexav ta stojol ti cꞌalal ta xtale.  
\v 29 Yuꞌun ti voꞌoxuque anaꞌojic xa ti lec yoꞌnton ti Jesucristoe. Jech o xal un, ta scꞌan ta xanaꞌic xtoc, scotol ti buchꞌutic lec ta spasique, jaꞌ me snichꞌnabtac ti Diose.   
\c 3  
\s1 Snichꞌnabtac ti Diose  
\p
\v 1 Qꞌuel avilic ti cꞌu yepal cꞌuxotic ta yoꞌnton ti Jtotic Diose ti jech ta xisbisotic ta snichꞌone. Jech onoꞌox melel. Jech o xal un, ti buchꞌutic sventainojic ti sba banomile, mu xaꞌibeic smelol ti jech snichꞌonotic ti Diose. Yuꞌun ti stuquique mu xojtiquinic ti Diose.  
\v 2 Quermanotac, jnaꞌtic xa ti snichꞌnabotic ti Diose. Jaꞌ noꞌox ti mu to bu acꞌbil quiltic ti cꞌu sꞌelan ta xijcꞌototic ta slajeb cꞌacꞌale. Jaꞌ noꞌox jnaꞌtic ti cꞌalal mi tal ti Jesucristoe, jech ta xijcꞌototic jech chac cꞌu chaꞌal ti stuque, yuꞌun ta xquiltic ti cꞌu sꞌelan ti stuque.  
\v 3 Scotol ti buchꞌutic jech spatoj yoꞌntonic ta stojole, jech o xal un, stuc ta scomtsan ti mulile, yuꞌun snaꞌ ti lec yoꞌnton ti Jesucristoe.   
\p
\v 4 Scotol ti buchꞌutic ta saꞌ ti smulique ta sbajbeic smantal ti Diose. Yuꞌun ti mulile, jaꞌ jbajmantal.  
\v 5 Ti voꞌoxuque anaꞌojic xa ti ital ta sba banomil ti Jesucristoe, yoꞌ jech tal stub ti jmultique. Ti stuque mi jaꞌuc jutebuc oy ti smule.  
\v 6 Jaꞌ yuꞌun un, buchꞌuuc noꞌox ti staoj yav junic schiꞌuc ti Jesucristoe, mu xa ta saꞌolan ti smulique. Yan ti buchꞌutic ti tey onoꞌox ta saꞌolan ti smulique, muꞌyuc yiloj, muꞌyuc yaꞌbinoj cꞌu sꞌelan yoꞌnton ti Jesucristoe.  
\v 7 Jnichꞌnabtac, mu me buchꞌu xasloꞌlaic. Yuꞌun ti buchꞌu ta spas ti leque, yuꞌun onoꞌox lec jech chac cꞌu chaꞌal ti Jesucristoe.  
\v 8 Yan ti buchꞌu tey onoꞌox ta saꞌolan ti smule, jaꞌ yuꞌun ti pucuje. Yuꞌun ti pucuje, jaꞌ noꞌox jsaꞌmulil ta sliquebal. Jech o xal un, jaꞌ smelol ti ital Snichꞌon ti Diose, yoꞌ jech ta slilinbe yabtel ti pucuj ti sliquesoj xae.   
\p
\v 9 Yan ti buchꞌutic snichꞌnabtac ti Diose, mi junuc ti tey onoꞌox ta saꞌolanic ti smulique. Yuꞌun acꞌbilic scuxlejal Dios ta stojolic. Jech o xal un, mu teyuc onoꞌox ta saꞌolan ti smulique. Yuꞌun snichꞌon Dios xa.  
\v 10 Yuꞌun xvinaj lec buchꞌutic snichꞌnab ti Diose, buchꞌutic snichꞌnab ti pucuje. Yuꞌun buchꞌuuc noꞌox ti muꞌyuc cꞌusi lec ta spasique, ti mu xcꞌuxubin ti yermanoe, maꞌuc snichꞌon ti Diose.   
\s1 Cꞌuxuc me xcaꞌi jbatic ta jujun tal  
\p
\v 11 Ti lequil cꞌop ti lic avaꞌiic talel ta sliquebale, jech chac cꞌu chaꞌal liꞌe: Cꞌuxuc me xcaꞌi jbatic ta jujun tal.  
\v 12 Mu me jechucotic jech chac cꞌu chaꞌal ti Caine ti jaꞌ stotinoj ti pucuje, ti laj smil ti yitsꞌine. ¿Cꞌu chaꞌal laj smil un? Yuꞌun ti cꞌusi ta spas ti Caine, toj chopol. Yan ti cꞌusi ta spas ti yitsꞌine, lec.   
\p
\v 13 Quermanotac, mu me chꞌayaluc xcꞌot avoꞌntonic yuꞌun ti xtiꞌet sjolic ta atojolic ti buchꞌutic sventainojic ti sba banomile.  
\v 14 Ti voꞌotique lijelavotic xa batel ta cuxlejal ti jech chamemotic to oxe. Jaꞌ jech ta jnaꞌtic, yuꞌun cꞌux ta xcaꞌitic ti quermanotique. Yan ti buchꞌu muꞌyuc cꞌux ta xaꞌi ti yermanoe, staoj yav chamem.  
\v 15 Scotol ti buchꞌu xtiꞌet sjol yuꞌun ti yermanoe, jaꞌ jun jmilvanej. Xanaꞌic lec ti voꞌoxuque, ti jun jmilvaneje muꞌyuc ta yoꞌnton ti oy cuxlejal sbatel osile.  
\v 16 Jnaꞌtic lec cꞌu sꞌelan ti cꞌuxul oꞌntonale, yuꞌun ti Jesucristoe laj xa yacꞌ sba ta milel cuꞌuntic. Jaꞌ me jechuc ti voꞌotique, laꞌ me jcoltatic ti yan quermanotique manchuc mi ta xijlaj ta milel.  
\v 17 Ti mi oy buchꞌu staoj scotol ti cꞌusi ta xtun yuꞌun yoꞌ jech ta xcuxie, pero ti mi mu xcꞌuxubij yoꞌnton yuꞌun ti yermano ti mi ta xil ti oy cꞌusi tsots scꞌoplal ta xtun yuꞌune, ¿cꞌusi xut ta xaꞌi ti oy scꞌuxul yoꞌnton ti Dios ta stojole?  
\v 18 Jnichꞌnabtac, maꞌucuc noꞌox me ta xlocꞌ ta quetic ti cꞌux ta xcaꞌi jbatique. Acꞌo vinajuc ta sventa ti cꞌusi lec ta jpastique.   
\s1 Junuc coꞌntontic ta stojol ti Diose  
\p
\v 19 Mi cꞌux ta xcaꞌi jbatique, jaꞌ jech ta jnaꞌtic ti oyotic ta stojol ti melele, schiꞌuc ta xcaꞌitic ti jun coꞌntontic vaꞌalotic ta stojol ti Diose.  
\v 20 Yuꞌun ti mi ta xacꞌ jnaꞌ ti coꞌntontic ti oy jpaltatique, jaꞌ jelavem snaꞌ scotol ti Diose, jaꞌ mu sta ti coꞌntontique.  
\v 21 Jech o xal un, Quermanotac, mi muꞌyuc ta xacꞌ jnaꞌ ti coꞌntontic ti oy jpaltatique, jech o xal un, jun coꞌntontic ta stojol ti Diose.  
\v 22 Jech ti stuque ta xijyacꞌbotic scotol ti cꞌusi ta jcꞌanbetique. Yuꞌun ta jchꞌunbetic ti smantale, ta jpastic ti cꞌusi lec ta xile.  
\v 23 Ti smantale, jaꞌ ti acꞌo jchꞌuntic ti Nichꞌonil Jesucristoe, ti cꞌuxuc caꞌi jbatic ta jujun tal jech chac cꞌu chaꞌal laj yalbotique.  
\v 24 Mi ta jchꞌunbetic smantal ti Diose, tey oyotic ta stojol. Jech ti Diose tey oy ta jtojoltic ec. Jnaꞌtic ti oy ta jtojoltic ti Diose, yuꞌun ta xacꞌ jnaꞌtic ti Chꞌul Espíritu ti laj xa yacꞌbotique.   
\c 4  
\s1 Ti buchꞌu yichꞌojbe schꞌulel ti Diose schiꞌuc ti buchꞌu yichꞌojbe schꞌulel ti yajcronta ti Cristoe  
\p
\v 1 Quermanotac, mi ta xalic ti ventainbilic yuꞌun ti Chꞌul Espíritue, mu to xachꞌunic scotol. Aꞌyibeic yoꞌnton baꞌyel. Tey ta xavaꞌiic mi jaꞌ yichꞌojic ti Chꞌul Espíritu yuꞌun ti Diose, mi maꞌuc. Yuꞌun ti liꞌ ta sba banomile, yantic xa ta xꞌepaj batel ti jutcꞌopetique, ti ta xalic ti jaꞌ ta xcꞌopojic ta sventa ti Diose.  
\v 2 Jech sꞌelan ta ojtiquinel liꞌe ti mi oy buchꞌu yichꞌoj ti Chꞌul Espíritu yuꞌun ti Diose: Mi ta xalic ti coꞌol sꞌelan vinic ital ti Jesucristoe, yichꞌoj ti Chꞌul Espíritu yuꞌun ti Diose.  
\v 3 Pero ti buchꞌutic mu jechuc ta xalbe scꞌoplal Jesús ti vaꞌi sꞌelan taje, muꞌyuc yichꞌoj ti Chꞌul Espíritu yuꞌun ti Diose. Yuꞌun jaꞌ noꞌox yichꞌojbe schꞌulel ti yajcronta ti Cristoe. Ti voꞌoxuque avaꞌbinojic xa ti ta xtal ti yajcronta ti Cristoe. Lec un chaꞌe, avi tana un, liꞌ xa oy ta sba banomile.   
\p
\v 4 Jnichꞌnabtac, yuꞌunoxuc xa ti Diose. Jaꞌ yuꞌun un, laj xa atsalic ti jutcꞌopetic taje. Yuꞌun ti Buchꞌu oy ta atojolique, jelavem ti smucꞌul stsatsale. Jaꞌ mu sta ti buchꞌu oy ta stojolic ti buchꞌutic sventainojic ti sba banomile.  
\v 5 Yuꞌun ti stuquique sventainojic ti sba banomile. Jech o xal un, jaꞌ noꞌox ta xalbeic scꞌoplal ti sba banomile. Jech o xal un, ti buchꞌutic sventainojic ti sba banomile ta xaꞌibeic ti scꞌope.  
\v 6 Yan ti voꞌotique, yuꞌunotic ti Diose. Ti buchꞌu ta xojtiquin ti Diose ta xaꞌi ti jcꞌoptique. Yan ti buchꞌu maꞌuc yuꞌun ti Diose, mu scꞌan xaꞌi ti jcꞌoptique. Jaꞌ yuꞌun un, jaꞌ jech yoꞌ ta xcojtiquintic ti buchꞌu snichꞌnabtac ti Diose schiꞌuc ti buchꞌu snichꞌnabtac ti jloꞌlavaneje.   
\s1 Cꞌux ta xaꞌiotic ti Diose  
\p
\v 7 Quermanotac, tsots scꞌoplal ti cꞌux ta xcaꞌi jbatique. Yuꞌun ti jech taje, jaꞌ liquem talel ta stojol ti Diose. Buchꞌuuc noꞌox ti oy scꞌuxul yoꞌntone, jaꞌ snichꞌon Dios, xojtiquin ti Diose.  
\v 8 Yan ti buchꞌu muꞌyuc scꞌuxul yoꞌntone, mu xojtiquin ti Diose. Yuꞌun ti Diose jaꞌ Jcꞌuxubinvanej.  
\v 9 Yuꞌun ti Diose laj yacꞌ ta ilel ti scꞌuxul yoꞌnton ta jtojoltique. Yuꞌun laj stac talel liꞌ ta sba banomil ti jun noꞌox Snichꞌone, yoꞌ jech oy jcuxlejaltic ta sventa.  
\v 10 Ti cꞌuxubinele, jech liꞌe. Ti voꞌotique, maꞌuc baꞌyel ti cꞌux laj caꞌitic ti Diose. Yuꞌun jaꞌ stuc baꞌyel laj xcꞌuxubinotic. Jech o xal un, laj stac talel ti Snichꞌone, yoꞌ jech ta jtatic perdón yuꞌun ti jmultic ta sventae.   
\p
\v 11 Ti mi jaꞌ jech laj xcꞌuxubinotic ti Dios taje, Quermanotac, jech o xal un, jaꞌ me jech acꞌo cꞌux caꞌi jbatic ta jujun tal.  
\v 12 Muꞌyuc buchꞌu junucal yiloj ti Diose. Pero mi cꞌux ta xcaꞌi jbatic ta jujun tale, oy ti Dios ta jtojoltique. Jaꞌ jech xtoc ta jtatic batel ti ta xijcꞌuxubinvane jech chac cꞌu chaꞌal ti stuque.  
\v 13 Ti svinajeb ti oyotic ta stojol ti Diose, ti oy ti Dios ta jtojoltic eque, yuꞌun laj xa yacꞌbotic ti Chꞌul Espíritu yuꞌune.  
\v 14 Ti vuꞌuncutique jamal ta xcalcutic, yuꞌun laj quilcutic, ti Jtotic Diose laj stac talel ti Snichꞌone, yoꞌ jech tal scolta ti cristianoetique.  
\v 15 Jech o xal un, buchꞌuuc noꞌox ti jamal ta xal ti Jesuse jaꞌ Snichꞌon Dios ti xie, oy ta stojol ti Diose, ti Diose oy ta stojol ec.   
\p
\v 16 Jaꞌ yuꞌun un, jech ta jnaꞌtic, jech ta jchꞌuntic ti cꞌux ta xijyaꞌiotic ti Diose. Yuꞌun ti Diose jaꞌ Jcꞌuxubinvanej. Jech o xal un, buchꞌuuc noꞌox ti oy scꞌuxul yoꞌntone, oy ta stojol ti Diose. Jaꞌ jech xtoc tey oy ti Dios ta stojol eque.  
\v 17 Jaꞌ jech ta jtatic ti ta xijcꞌuxubinvan ta melele. Yuꞌun ti cꞌalal scꞌacꞌalil ti chapanele, muꞌyuc cꞌusi xal coꞌntontic. Yuꞌun ti voꞌotic ti liꞌ oyotic ta sba banomile coꞌol jcuxlejaltic schiꞌuc ti Jesucristoe.  
\v 18 Ti buchꞌu oy ta yoꞌnton ti cꞌuxubinbil yuꞌun ti Diose, mu xiꞌ. Yuꞌun chꞌabal ti xiꞌel ta xaꞌie. Yuꞌun ta xaꞌi ti cꞌuxubinbil ta melele. Yuꞌun ti buchꞌu ta xiꞌe, yuꞌun ta snop ti ta xꞌacꞌbat castigoe. Jech o xal un, ti buchꞌu oy to xiꞌel ta xaꞌie, mu to cꞌotem lec ta yoꞌnton ti cꞌuxubinbil onoꞌox yuꞌun ti Diose.   
\p
\v 19 Ti voꞌotique cꞌux ta xcaꞌitic ti Diose, yuꞌun baꞌyel lic xcꞌuxubinotic ti stuque.  
\v 20 Pero mi oy buchꞌu ta xal: “Ti vuꞌune cꞌux ta xcaꞌi ti Dios”, mi xie, pero mi xtiꞌet sjol yuꞌun ti yermanoe, jaꞌ jun jutcꞌop. Yuꞌun ti buchꞌu mu cꞌuxuc ta xaꞌi ti yermano ti xvinaj ta qꞌuelele, mi jaꞌuc cꞌux ta xaꞌi ti Dios ti mu xvinaj ta qꞌuelele.  
\v 21 Jaꞌ jech ti smantal ti yalojbotic ti Cajvaltique: “Ti buchꞌu cꞌux ta xaꞌi ti Diose, jaꞌ jech xtoc tscꞌan ti cꞌux ta xaꞌi ti yermanoe”, xi.   
\c 5  
\s1 Ti quiptic ta stsalel ti sba banomile  
\p
\v 1 Scotolic ti buchꞌu xchꞌunojic ti jaꞌ Cristo ti Jesuse, jaꞌ snichꞌon ti Diose. Cꞌalal cꞌux ta xaꞌi ti Totile, jaꞌ jech xtoc cꞌux ta xaꞌibe snichꞌnab ti Totil taje.  
\v 2 Cꞌalal cꞌux ta xcaꞌitic ti Diose, cꞌalal ta jpastic ti cꞌusi ta scꞌane, jech ta jnaꞌtic ti cꞌux ta xcaꞌibetic snichꞌnabtac ti Diose.  
\v 3 Ti jech cꞌux ta xcaꞌitic ti Diose, jech ta jchꞌuntic ti smantale. Jaꞌ jech xtoc ti smantaltaque mu vocoluc ta chꞌunel.  
\v 4 Yuꞌun scotol ti buchꞌutic snichꞌnabtac ti Diose ta stsalic ti sba banomile. Ti jech stsal cuꞌuntic ti sba banomile, jaꞌ ta sventa ti ta jchꞌuntic ti Jesucristoe.  
\v 5 Ti buchꞌu ta stsal ti sba banomile, jaꞌ noꞌox ti buchꞌu ta xchꞌun ti jaꞌ Snichꞌon Dios ti Jesuse.   
\s1 Ti rextigoetic ti laj yalbe scꞌoplal Snichꞌon ti Diose  
\p
\v 6 Ivinaj ti jaꞌ Snichꞌon Dios ti Jesús ti itale cꞌalal laj yichꞌ voꞌe, cꞌalal imal ti schꞌichꞌele. Pero maꞌuc noꞌox ti cꞌalal laj yichꞌ voꞌe, cꞌalal imal schꞌichꞌel xtoque. Ti jaꞌ Snichꞌon Dios ti Jesuse, jaꞌ yajrextigo stuc ti Chꞌul Espíritu ti jaꞌ melele.  
\v 7 Yuꞌun ti oxib rextigo taje, oyic ta vinajel, jaꞌ ti Dios Totile, ti Chꞌul Nichꞌonile, ti Chꞌul Espíritue. Ti oxib taje, junic.  
\v 8 Jaꞌ jech xtoc oy oxib rextigo liꞌ ta sba banomiile, jaꞌ ti Chꞌul Espíritue, ti voꞌe, ti schꞌichꞌele. Ti oxib taje, jun ti scꞌopique.  
\v 9 Ti voꞌotique ta xquichꞌtic ta mucꞌ scꞌop ti viniquetique. Pero ti cꞌusi ta xal ti Diose, jaꞌ jelavem scꞌoplal. Yuꞌun jaꞌ scꞌop stuc ti Diose ti ta xalbotic ti jaꞌ Snichꞌon ti Jesuse.  
\v 10 Ti buchꞌu ti xchꞌun ti Snichꞌon ti Diose, oy ta yoꞌnton ti jech iꞌacꞌbat snaꞌ yuꞌun ti Diose. Yan ti buchꞌu mu xchꞌun ti jech laj yal ti Diose, ta sbis ta jutcꞌop. Jaꞌ ti mu xchꞌun ti jaꞌ stuc ti Dios ta svaꞌan sba ta rextigo yuꞌun ti Snichꞌone.  
\v 11 Ti scꞌoplal taje, jaꞌ ti laj xa yacꞌbotic jcuxlejaltic sbatel osile. Ti jcuxlejaltic taje, oy ta stojol ti Snichꞌone.  
\v 12 Ti buchꞌu oy ta stojol ti Snichꞌon ti Diose, oy scuxlejal sbatel osil. Yan ti buchꞌu muꞌyuc oy ta stojol ti Snichꞌon ti Diose, muꞌyuc ti scuxlejal sbatel osile.   
\s1 Slajeb bijubtasel  
\p
\v 13 Jech ta jtsꞌibaboxuc talel ti jcarta liꞌe ti voꞌoxuc ti achꞌunojic ti Snichꞌon ti Diose, yoꞌ jech xanaꞌic ti oy acuxlejalic sbatel osile.  
\v 14 Jpatoj coꞌntontic ta stojol ti Diose, yuꞌun ta jnaꞌtic ti cꞌalal oy cꞌusi ta jcꞌantic jech chac cꞌu chaꞌal ta scꞌan ti stuque, ta xaꞌi ti jcꞌoptique.  
\v 15 Ti jech jnaꞌtic ti ta xaꞌi jcꞌoptic ti Diose, jaꞌ jech umbi, jnaꞌtic ti laj xa jtatic ti cꞌusi laj jcꞌanbetique.   
\p
\v 16 Ti mi ta xavilic jun avermanoic ti ta saꞌ ti smul ti maꞌuc sventa chꞌayele, cꞌoponbeic Dios ta stojol, yoꞌ jech ta xꞌacꞌbat scuxlejal yuꞌun ti Diose, ti mi maꞌuc jun mulil ti chꞌayel ta xbat yuꞌune. Oy mulil ti ta xꞌacꞌvan ta chꞌayele. Taje, mu ta xcalboxuc avaꞌiic ti ta xacꞌoponbeic Dios ta stojole.  
\v 17 Scotol ti cꞌusi chopole jaꞌ mulil onoꞌox. Pero oy mulil ti mu ta xꞌacꞌvan ta chꞌayele.   
\p
\v 18 Jnaꞌtic ti buchꞌu stotinoj ti Diose mu ta saꞌolan ti smule. Yuꞌun chabibil yuꞌun ti Snichꞌon Diose. Jaꞌ jech xtoc mu xpicat yuꞌun ti pucuje.   
\p
\v 19 Jnaꞌtic ti yuꞌunotic ti Diose. Jaꞌ jech xtoc jnaꞌtic ti scotol ti cristianoetique pasbilic ta mantal yuꞌun ti pucuje.   
\p
\v 20 Jnaꞌtic lec ti ital ti Snichꞌon Dios liꞌ ta sba banomile. Jaꞌ jech xtoc tal sjam ti jba jsatique, yoꞌ jech ta xcojtiquintic ti cuxul Diose. Cuxulotic ta stojol ti Buchꞌu melel onoꞌoxe, jaꞌ ti Nichꞌonil Jesucristoe. Taje, jaꞌ ti cuxul Diose, ti jaꞌ jcuxlejaltic sbatel osile.  
\v 21 Jnichꞌnabtac, mu me cꞌusi yan xarioxinic. Jechuc.