\id 1CO  
\h 1 CORINTIOS 
\toc2 1 CORINTIOS 
\toc1 1 CORINTIOS 
\mt1 1 Corintios  
\c 1  
\s1 Ti Pabloe ta stsꞌiba batel scarta ta stojol ti jchꞌunolajeletic ta Corintoe  
\p
\v 1-2 Vuꞌun ti Pabloune. Ta yoꞌnton stuc laj yicꞌun ti Diose, yoꞌ jech liꞌoch ta jcholcꞌop yuꞌun ti Jesucristoe. Jmoj schiꞌuc ti quermanotic Sóstenese ta jtsꞌibaboxuc talel ti jcarta liꞌe, ti voꞌoxuc jchꞌunolajeloxuc yuꞌun ti Diose, ti liꞌ nacaloxuc ta jteclum Corintoe. Yuꞌunoxuc xa ti Diose ta sventa ti junoxuc xa schiꞌuc ti Jcoltavanej Jesuse. Dios laj yicꞌoxuc yoꞌ jech ta xacomic ta yuꞌun coꞌol schiꞌuc ti yantic ti buchꞌutic ta scꞌanbeic vocol ti Cajvaltic Jesucristoe, ti jaꞌ yajvalic ec jech chac cꞌu chaꞌal ti jaꞌ Cajvaltique.  
\v 3 Ichꞌic sbendición ti Jtotic Diose schiꞌuc ti Cajvaltic Jesucristoe. Acꞌo yacꞌboxuc jun avoꞌntonic.   
\s1 Bendición yuꞌun ti Diose ta sventa ti Jesucristoe  
\p
\v 4 Tey onoꞌox ta xcalbe vocol ti Dios ta atojolique, ti jech yacꞌojboxuc sbendición ti Dios ta sventa ti Jcoltavanej Jesuse.  
\v 5 Ti jech junoxuc xa schiꞌuc ti Cristoe, ti Diose laj yacꞌboxuc ti ep ta tos ti schꞌul-cꞌulejale, ti xanaꞌic yalbel ti scꞌoplale, ti xavaꞌibeic ti smelole.  
\v 6 Jech o xal scꞌoplal ti Cristo ti laj calboxuque, vinajem ta melel ti icꞌot ta avoꞌntonique.  
\v 7 Ti jech taje, laj xa ataic scotol ti cꞌusi ta xacꞌ ti Diose. Jaꞌ xa noꞌox ta xamalaic cꞌusi ora ta xchaꞌtal ti Cajvaltic Jesucristoe.  
\v 8 Ti Diose ta xacꞌboxuc yip avoꞌntonic ti cꞌu sjalil liꞌ oyoxuque, yoꞌ jech muꞌyuc amulic cꞌalal ta xtal ti Cajvaltic Jesucristoe.  
\v 9 Ti cꞌusi yaloj ti Diose ta xcꞌot ta pasel yuꞌun. Yuꞌun stuc laj xa yicꞌoxuc yoꞌ jech ta xacꞌotic jech chac cꞌu chaꞌal ti Snichꞌone, jaꞌ ti Jesucristo ti Cajvaltic cuꞌuntique.   
\s1 Mu jmojuc yoꞌntonic ti jchꞌunolajeletique  
\p
\v 10 Quermanotac, ta jcꞌanboxuc vocol ta sventa ti Cajvaltic Jesucristoe ti jmojuc avoꞌntonique. Altic ti chꞌacaloxuque. Jaꞌ lec ti junuc avoꞌntonic cuxianique. Coꞌoluc ti cꞌusi ta xanopique, ti cꞌusi ta xavaꞌiique.  
\v 11 Ti jech ta xcalboxuc avaꞌiic taje, Quermanotac, yuꞌun ti buchꞌutic oy ta sna ti Cloee laj yalbun caꞌi ti itꞌix ta xavaꞌi abaique.  
\v 12 Yuꞌun ta xcaꞌi ti jech ta xavalbe abaique: “Yuꞌunun ti Pabloe. Yuꞌunun ti Apolose. Yuꞌunun ti Pedroe. Yuꞌunun ti Cristoe”, ti xachiique.  
\v 13 Ti jech taje, ¿mi yuꞌun oy jayvoꞌ ti Cristo avalojique? ¿Mi yuꞌun jaꞌ laj yichꞌ jipanel ta cruz ti Pablo ta sventa ti acolelique? ¿Mi yuꞌun jaꞌ ta sventa Pablo ti laj avichꞌic voꞌe?  
\v 14 Coliyalbun ti Diose ti muꞌyuc buchꞌu junucal ti laj cacꞌbe yichꞌ ti voꞌe. Jaꞌ noꞌox laj cacꞌbe yichꞌ voꞌ ti Crispoe, ti Gayoe.  
\v 15 Jech o xal un, muꞌyuc buchꞌu junucal avuꞌunic ti xuꞌ ta xal ti laj cacꞌ avichꞌic ti voꞌe.  
\v 16 Oy to yan ti buchꞌu laj cacꞌbe yichꞌic ti voꞌe. Jaꞌ laj cacꞌbe yichꞌic voꞌ ti cꞌu yepal oy ta sna ti Estéfanase. Pero mu jnaꞌ mi oy to buchꞌu laj cacꞌbe yichꞌ voꞌ yan.  
\v 17 Yuꞌun maꞌuc cabtel laj yacꞌbun ti Cristo ta yaqꞌuel ti ichꞌ voꞌe. Jaꞌ noꞌox cabtel laj yacꞌbun ta yalel ti lequil achꞌ cꞌop yuꞌune. Pero mu yuꞌunuc jun xa yutsil ti que ti cꞌalal laj jchanubtasoxuque. Yuꞌun jaꞌ noꞌox ta jcꞌan ti acꞌo cꞌotuc ta avoꞌntonic ti icham ta cruz ti Cristo ta scoj ti jmultique.   
\s1 Ti Cristoe jaꞌ sbijil, smucꞌul stsatsal ti Diose  
\p
\v 18 Ti ta xijcol ti jech icham ta cruz ti Cristoe, loꞌil noꞌox ta xaꞌiic ti buchꞌutic ta xbatic ta chꞌayele. Pero ti voꞌotic ti jchꞌunojtic ti jech ta xijcolotique, jaꞌ smucꞌul stsatsal ti Dios ta xcaꞌitique.  
\v 19 Yuꞌun jech ta xal ti tsꞌibabil ta scꞌop Diose:  
\q1 Vuꞌun ta jchꞌaybe sbijilic ti buchꞌutic bijique.  
\q1 Ti jech xtojobic ta xalique, ta jmacbe ta be,  
\m xi.   
\p
\v 20 ¿Cꞌusi bal o ti oy sbijilique? ¿Cꞌusi bal o ti jchanubtasvanejetique? ¿Cꞌusi bal o ti jaꞌ noꞌox ta sloꞌiltaic scꞌoplal ti cꞌusi oy ta sba banomile? Ti Diose laj sjoybin ta bol cristiano ti bijic liꞌ ta sba banomile.  
\v 21 Ti Dios ti snaꞌoj ti cꞌusi ta spase, yiloj onoꞌox ti mu sta scoltaelic ta sbijil noꞌox stuquic ti cristianoetique. Jech o xal ti Diose laj xa snop stuc ti ta sta scolelic ti buchꞌutic ta xchꞌunic ti lequil achꞌ cꞌop yuꞌune, acꞌo mi loꞌil cꞌop noꞌox ta xaꞌiic ti yane.   
\p
\v 22 Yuꞌun ti jꞌisraeletique jaꞌ noꞌox ta scꞌan ta sqꞌuelic yaꞌiic smucꞌul stsatsal ti Diose, yoꞌ jech ta xchꞌunic ti Cristo yalojique. Yan ti jyanlumetique jaꞌ noꞌox ta saꞌic batel ti sbijilic liꞌ ta sba banomile.  
\v 23 Yan ti vuꞌuncutique jaꞌ noꞌox ta xcalcutic batel scꞌoplal ti Cristo ti jipil ta cruz ichame. Ti jꞌisraeletique, qꞌuexlal sba ta xaꞌiic ti jech ta xꞌalbatique. Ti jyanlumetique, bol loꞌil noꞌox ta xaꞌiic ti jech ta xꞌalbatique.  
\v 24 Pero ti buchꞌutic icꞌbilic yuꞌun ti Diose, acꞌo mi jꞌisraeletic, acꞌo mi jyanlumetic, pero ta xaꞌiic ti jaꞌ sbijil, smucꞌul stsatsal Dios ti jech icham ta cruz ti Cristoe.  
\v 25 Manchuc mi bol loꞌil noꞌox ta xaꞌiic ti cristianoetic ti jech laj snop ti Diose, pero jaꞌ jelavem sbijil. Jaꞌ mu sta sbijil ti cristianoetique. Acꞌo mi muꞌyuc smucꞌul stsatsal ti Dios laj yilique, pero jelavem smucꞌul stsatsal. Jaꞌ mu sta ti cꞌusi xuꞌ yuꞌunic ti cristianoetique.  
\v 26 Quermanotac, naꞌic me ti icꞌbiloxuc yuꞌun ti Diose, acꞌo mi oy jlomoxuc jutuc ti abijilic ti liꞌ ta sba banomile. Jun chiboxuc noꞌox ti avichꞌojic tsots abtelique. Jun chiboxuc noꞌox ti ichꞌbiloxuc ta muqꞌue.  
\v 27 Jech laj spas ti Dios ti laj stꞌujoxuc ti jecheꞌ cristianooxuque, yoꞌ jech qꞌuexlal ta xcꞌotic ti buchꞌu oy sbijilic ta xalique. Manchuc mi muꞌyuc cꞌusi baloxuc o ta xil ti cristianoetique, pero laj stꞌujoxuc ti Diose, yoꞌ jech qꞌuexlal ta xcꞌotic ti buchꞌutic xuꞌ yuꞌun ta xalique.  
\v 28 Ti buchꞌutic muꞌyuc stu ta xꞌilatique, ti bajbilic yuꞌun ti yane, jaꞌ tꞌujbilic yuꞌun ti Diose, yoꞌ acꞌo vinajuc ti muꞌyuc stu ti buchꞌu jtunel ta xalique.  
\v 29 Jech icꞌot ta pasel, yoꞌ muꞌyuc buchꞌu xuꞌ ta stoy sba ta stojol ti Diose.  
\v 30 Pero ti Diose laj spasoxuc ta jun schiꞌuc ti Cristo Jesuse. Jaꞌ icꞌot ta jbijiltic ti Cristoe. Ta sventa ti Cristoe laj jtatic ti lec xijꞌilatotic yuꞌun ti Diose. Lecubtasbilotic, lijcolotic yuꞌun.  
\v 31 Jech o xal un: “Mi oy buchꞌu ta xaꞌi sba ti lec oy ta jꞌechꞌele, jaꞌ lec, acꞌo yacꞌ ta ichꞌel ta mucꞌ ti Cajvaltique”, xi ta xal ti scꞌop Diose.   
\c 2  
\s1 Scꞌoplal ti Cristo ti jipil ta cruze  
\p
\v 1 Quermanotac, cꞌalal ay calboxuc avaꞌiic ti ta melel ta xijcol yuꞌun ti Diose, jaꞌ laj cal avaꞌiic ti stacꞌ noꞌox aꞌyibel ti smelole.  
\v 2 Cꞌalal tey oyun ta atojolique, muꞌyuc cꞌusi yan laj jnop. Jaꞌ noꞌox laj calboxuc avaꞌiic scꞌoplal ti Jesucristo ti jipil ta cruz ichame.  
\v 3 Xinicnun ta xiꞌel ti cꞌalal liꞌay ta atojolique.  
\v 4 Cꞌalal laj calboxuc avaꞌiic ti lequil achꞌ cꞌope, mu jechuc laj jpas jba jech chac cꞌu chaꞌal ta spas jun vinic ti oy sbijile. Jaꞌ noꞌox ta sventa smucꞌul stsatsal ti Chꞌul Espíritu ti jech laj calboxuc ti scꞌop Diose.  
\v 5 Jaꞌ jech laj jpas yoꞌ jech ta sventa smucꞌul stsatsal ti Diose ta xachꞌunic ti jaꞌ Jcoltavanej ti Cristoe. Maꞌuc ta sventa sbijil ti viniquetic noꞌoxe.   
\s1 Ti Diose ta xacꞌ sba ta ojtiquinel ta sventa ti Schꞌul Espíritue  
\p
\v 6 Oy bu ta xcalcutic ti scꞌop Diose ti tsots ta aꞌyibel ti smelol ta stojolic ti buchꞌutic chꞌiemic xa ta stojol ti Cajvaltique. Ti jbijilcutic taje, mu xcoꞌolaj schiꞌuc sbijil ti jpasmantaletic liꞌ ta sba banomile, ti poꞌot xa sta yorail ta xlaje.  
\v 7 Ti cꞌusi ta xcalcutique, jaꞌ ti cꞌusi mucul to ox yuꞌun ti Diose. Jaꞌ ti snopoj onoꞌox ti ta xijcolotic sbatel osil ti cꞌalal muꞌyuc to ox meltsajem ti banomile.  
\v 8 Mi junuc ajvaliletic liꞌ ta sba banomil ti laj yaꞌibeic ti smelol taje. Ti lajuc yaꞌiique, muꞌyuc laj sjipanic ta cruz ti Chꞌul Ajvalil jechuque.  
\v 9 Pero icꞌot ta pasel jech chac cꞌu chaꞌal ta xal ti scꞌop Diose:  
\q1 Ti cꞌusi muꞌyuc to ilbile, ti cꞌusi muꞌyuc to aꞌyinbile, ti cꞌusi muꞌyuc to nopbile,  
\q1 chapal xa yuꞌun ti Dios ta sventa ti buchꞌutic cꞌux ta xaꞌi ti Diose,  
\m xi.  
\v 10 Scotol ti cꞌusi snopoj ti Dios taje, jaꞌ ta xacꞌbotic jnaꞌtic ti Dios ta sventa ti Chꞌul Espíritue. Yuꞌun ti Chꞌul Espíritue jaꞌ ta xil scotol. Jaꞌ snaꞌ scotol ti cꞌu sꞌelan ti Dios stuque.   
\p
\v 11 Ti cristianoetique muꞌyuc buchꞌu snaꞌbe sba ti yoꞌntonique. Jaꞌ noꞌox snaꞌ cꞌu sꞌelan ti yoꞌnton stuque. Jaꞌ jech xtoc ti Chꞌul Espíritue jaꞌ noꞌox snaꞌbe ti cꞌu sꞌelan yoꞌnton ti Diose.  
\v 12 Ti Chꞌul Espíritu ti quichꞌojtique, maꞌuc liꞌ liquem ta sba banomile. Jaꞌ liquem talel ta stojol ti Diose, yoꞌ jech ta xcaꞌitic ti oy cꞌusi yacꞌojbotic ta scꞌuxul yoꞌnton ti Diose.  
\v 13 Ti cꞌusi ta xcalcutique, jaꞌ chanubtasbiluncutic yuꞌun ti Schꞌul Espíritu ti Diose. Maꞌuc ta jbijil jtuccutic ti cꞌusi ta xcalcutique. Ti buchꞌutic ventainbilic yuꞌun ti Chꞌul Espíritue, jaꞌ ta xcalbecutic yaꞌiic ti cꞌu sꞌelan ta xiyacꞌbun jnaꞌcutic ti Chꞌul Espíritue.   
\p
\v 14 Ti buchꞌutic muꞌyuc ventainbilic yuꞌun ti Chꞌul Espíritue, mu xichꞌic ta mucꞌ ti cꞌusi ta xacꞌ ta naꞌel ti Chꞌul Espíritu yuꞌun ti Diose. Yuꞌun bol loꞌil noꞌox ta xaꞌiic. Mu xuꞌ ta xaꞌibeic smelol ti cꞌusi ta xꞌalbat yuꞌun ti Chꞌul Espíritue. Jaꞌ to xuꞌ ta xaꞌibeic smelol ti mi ta xꞌabtej ti Chꞌul Espíritu ta yoꞌntonique.  
\v 15 Pero ti buchꞌutic ventainbilic yuꞌun ti Chꞌul Espíritue, snaꞌic lec snopel scotol. Pero ti yane mu stacꞌ aꞌyeluc ta xaꞌi cꞌu chaꞌal jech yoꞌnton ti jchꞌunolajeletique.  
\v 16 Yuꞌun jech tsꞌibabil ta scꞌop Diose: “Muꞌyuc buchꞌu yaꞌbinoj cꞌu sꞌelan snopobil yuꞌun ti Diose. Muꞌyuc buchꞌu xuꞌ ta xchanubtas ti Diose”, xi. Pero ti voꞌotique oy ta jtojoltic ti snopobil yuꞌun ti Cristoe.   
\c 3  
\s1 Jchiꞌil jbatic ta abtel ti ta xijtun yuꞌun ti Diose  
\p
\v 1 Quermanotac, cꞌalal liꞌay ta atojolique, laj quiloxuc ti muꞌyuc ventainbiloxuc yuꞌun ti Chꞌul Espíritue. Laj quiloxuc xtoc ti ataoj o avavic ti stalel noꞌox ti cristianoetique. Jech o xal un, coꞌol aꞌelanic ololoxuc laj calboxuc avaꞌiic scꞌoplal ti Cristoe.  
\v 2 Jech o xal un, cꞌun ta aꞌyibel smelol scꞌop Dios laj jchanubtasoxuc jech chac cꞌu chaꞌal ti jchuꞌnel olol ti chuꞌil noꞌox yipanoje, ti mu to xuꞌ yuꞌun slajesel ti cꞌusi yijique. Avi tana un, ataoj to avavic ti stalel noꞌox ti cristianoetique.  
\v 3 Yuꞌun ti voꞌoxuque oy to yitꞌixal avoꞌntonic. Ta to xatsac abaic ta cꞌop. Mu jmojuc avoꞌntonic. Jaꞌ noꞌox ta xapasic jech chac cꞌu chaꞌal ta spasic scotol ti yan cristianoetique.  
\v 4 Yuꞌun jech ta xavalic jlom: “Yuꞌunun ti Pabloe”, xachiic. Ti yan xtoque jech ta xalic: “Yuꞌunun ti Apolose”, xachiic. Ti jech taje, jaꞌ svinajeb ti stalel noꞌox cristiano ta xanopique.   
\p
\v 5 ¿Buchꞌu ti Pablo chaꞌe? ¿Buchꞌu ti Apolose? Jaꞌ noꞌox yajtuneluncutic ti Diose. Jaꞌ ta jventacutic ti jech laj achꞌunic ti Cajvaltique. Ti jujununcutique jaꞌ noꞌox laj jpascutic ti cabtelcutic ti liꞌacꞌbatcutic yuꞌun ti Cajvaltique.  
\v 6 Vuꞌun laj jtsꞌun ti tsꞌunobale. Jaꞌ laj smalta ti Apolose. Pero jaꞌ laj stsꞌites ti Diose.  
\v 7 Jech o xal un, ti buchꞌu ta stsꞌune, ti buchꞌu ta smalta ti tsꞌunobale, jaꞌ noꞌox jech yepal xuꞌ yuꞌunic. Pero ti Diose jaꞌ xuꞌ yuꞌun scotol. Ta stsꞌites ti tsꞌunobale.  
\v 8 Ti buchꞌu ta stsꞌune, ti buchꞌu ta smaltae, coꞌol noꞌox ta xꞌilatic yuꞌun ti Diose. Pero ti cꞌu seꞌelan ta xꞌabtejique, jaꞌ jech ta xꞌacꞌbatic ti stojol ta jujun tale.  
\v 9 Yajꞌabteluncutic, yajtuneluncutic ti Diose. Yan ti voꞌoxuque coꞌol aꞌelanic sbanomil ti Dios ti yacal ta xꞌabtej ta atojolique.  
\p Jaꞌ jech xtoc ti voꞌoxuque coꞌol aꞌelanic jech chac cꞌu chaꞌal jun na ti yacal ta smeltsan ti Diose.  
\v 10 Ti vuꞌune coꞌol jꞌelan jech chac cꞌu chaꞌal ti jchanubtasvanej yuꞌun ti jꞌalbañiletique, ti bu laj yacꞌbun ti Dios ti ta jliques sliqueb ti nae. Yan o ti buchꞌu ta svaꞌan batele. Pero bijicuc ti cꞌu sꞌelan ta xlic slatsic muyel ti spacꞌobale.  
\v 11 Muꞌyuc xa buchꞌu xuꞌ ta sticꞌbe yan sliqueb ti cꞌalal tey xa oy ti sliquebe. Ti sliqueb nae, jaꞌ ti Jesucristo stuque.  
\v 12 Pero ti spacꞌobal ti nae xuꞌ ta jlatstic muyel ti oroe, ti platae, ti ton ti yan yutsile. Mi moꞌoje, xuꞌ ta jlatstic muyel ti teꞌe, ti cꞌajbene, ti jobele.  
\v 13 Ti yabtelic jujune tey ta xvinaj ti cꞌalal ta xichꞌ qꞌuelel ti scꞌacꞌalil ti chapanele. Yuꞌun ta xtal ti cꞌoqꞌue. Jech ti cꞌoqꞌue jaꞌ ta svinajesbe ti cꞌu sꞌelan ti yabtelic laj spasic ta jujune.  
\v 14 Ti mi ta xcuch yuꞌun cꞌocꞌ ti cꞌu sꞌelan laj svaꞌan ti yabtele, ta xichꞌ ti stojole.  
\v 15 Pero mi ta xcꞌacꞌ ti yabtel ti laj svaꞌane, ta xchꞌay scotol. Acꞌo mi ta xcol ti stuque, pero meꞌun ta xcom jech chac cꞌu chaꞌal ti buchꞌu ta xjatav loqꞌuel ti cꞌalal ta xcꞌacꞌ ti snae.   
\p
\v 16 Ti voꞌoxuque, ¿mi mu xanaꞌic ti stemplooxuc ti Diose, ti snacanoj sba ti Schꞌul Espíritu ta atojolique?  
\v 17 Ti mi oy buchꞌu ta soquesbe stemplo ti Diose, ta soquesat yuꞌun Dios ti vinic taje. Yuꞌun ti templo yuꞌun ti Diose lecubtasbil xa. Ti templo taje, jaꞌ ti voꞌoxuque.   
\p
\v 18 Mu me buchꞌu sloꞌla sba. Mi oy buchꞌu bij ta xaꞌi sba yuꞌun ti sba banomile, acꞌo sbis sba ti muꞌyuc cꞌusi snaꞌe, yoꞌ jech ta sta sbijil ta melel.  
\v 19 Yuꞌun ti sbijil cristianoetic ti jaꞌ sventa noꞌox sba banomile, bol ta xil ti Diose. Yuꞌun jech tsꞌibabil ta scꞌop Dios: “Ti Diose ta stunesbe sbijil ti buchꞌu bij ta xale, yoꞌ jech ta xꞌoch ta petsꞌ yuꞌun ti sbijil stuquique”, xi.  
\v 20 Jech tsꞌibabil xtoc: “Ti Cajvaltique snaꞌoj lec ti muꞌyuc cꞌusi xtun o ti snopobil yuꞌunic ti buchꞌu bij yalojique”, xi.  
\v 21 Jech o xal un, muꞌyuc buchꞌu xuꞌ ta stoy sba ta stsꞌacliel jun vinic noꞌox. Yuꞌun scotol ti cꞌusi oye jaꞌ ta xtun avuꞌunic.  
\v 22 Jaꞌ alequilalic scotol. Ti Pabloe, ti Apolose, ti Pedroe, ti banomile, ti cuxlejale, ti chijchame, ti cꞌusi liꞌ xa oye, ti cꞌusi ta to xtale, scotol taje, jaꞌ alequilalic.  
\v 23 Pero maꞌuc noꞌox ti jech taje. Jaꞌ jech xtoc ti voꞌoxuque, yuꞌunoxuc xa ti Cristoe. Ti Cristoe, yuꞌun ti Diose.   
\c 4  
\s1 Yabtelic ti jcholcꞌopetique  
\p
\v 1 Jech o xal un, bisuncutic noꞌox ta yajcoltobba ti Cristoe, ti jbainojcutic ta yalel ti cꞌusi mucul to ox snopoj ti Diose.  
\v 2 Ti buchꞌu acꞌbil yabtel yuꞌun ti Diose, acꞌo yacꞌ ta qꞌuelel ti stucꞌulanoj sba lec schiꞌuc ti yabtele.  
\v 3 Ti vuꞌune, mu labaluc ta xcaꞌi ti cꞌu sꞌelan ti jcꞌoplal avuꞌunique, ti cꞌu sꞌelan ti jcꞌoplal yuꞌun ti yane. Mi jaꞌuc jpatoj coꞌnton yuꞌun ti cꞌusi ta jnop jtuque.  
\v 4 Acꞌo mi ta xcaꞌi ta jol ta cꞌonton ti muꞌyuc jmul ti cꞌu sꞌelan ta xbat ti cabtele, pero mu xuꞌ ta xcal ti chꞌabal ti jmule. Yuꞌun jaꞌ ta xischapan stuc ti Cajvaltique.  
\v 5 Jech o xal un, mu xacajchapanbeic yabtel ti yane. Malaic ora. Cꞌalal ta xtal ti Cajvaltique, ta sloqꞌues ta saquil osil ti cꞌusi mucul toe. Ti Cajvaltique ta xacꞌ ta ojtiquinel ti cꞌu sꞌelan oy ta yut yoꞌntonic ta jujun tale. Tey ta xacꞌ ta ilel cꞌu sꞌelan ta xꞌilatic yuꞌun Dios ta jujun tal.   
\p
\v 6 Quermanotac, ti vaꞌi sꞌelan ta xcalboxuc avaꞌiic ti jcꞌoplalcutic schiꞌuc ti Apolose, jaꞌ alequilalic, yoꞌ jech ti voꞌoxuque ta xacoꞌoltas abaic schiꞌuc ti cꞌusi tsꞌibabil ta scꞌop Diose, yoꞌ jech mu xatoy abaic schiꞌuc ti june, ta xabajic ti yane.  
\v 7 ¿Mi yuꞌun ta xanop ti más lec oyote, ti jaꞌ mu sta ti yane? Ti abijile, ¿buchꞌu laj yacꞌbot? Ti mi jaꞌ laj yacꞌbot ti Diose, ¿cꞌu chaꞌal ti ta xatoy abaic schiꞌuc ti cꞌusi laꞌacꞌbate, ti coꞌol sꞌelan laj avacꞌbe aba atuque?   
\p
\v 8 Coꞌol to sꞌelan jcꞌulej xavaꞌi abaic, ti laj xa ataic scotol ti cꞌusi ta xacꞌanique. Ajvalil xavaꞌi abaic. Mu xa xacꞌan xavacꞌuncutic ta venta. Ti ajvalilucoxuc ta melele, coꞌol ta jpastic mantal ti jechuque.  
\v 9 Ti vuꞌuncutic jcholcꞌopuncutique ta jnop ti ta slajeb xa ti bu acꞌbil ti cavilcutic yuꞌun ti Diose. Coꞌol jcꞌoplalcutic jech chac cꞌu chaꞌal ti viniquetic ti ta xichꞌic milele. Jꞌacꞌ-elovuncutic ta sba ta sat ti cristianoetique, ti ángeletic xtoque.  
\v 10 Ti jech ta jventaincutic ti cꞌusi oy yuꞌun ti Cristoe, bolat ta xiꞌilatcutic yuꞌun ti cristianoetique. Yan ti voꞌoxuque ta xavalic ti ta xavaꞌibeic lec smelol ti cꞌusi oy yuꞌun ti Cristoe. Ti vuꞌuncutique muꞌyuc quip ta xcaꞌicutic. Yan ti voꞌoxuque oy avip ta xavaꞌiic. Ti vuꞌuncutique bajbiluncutic yuꞌun ti cristianoetique. Yan ti voꞌoxuque ichꞌbiloxuc ta mucꞌ yuꞌun.  
\v 11 Ti vuꞌuncutique oyuncutic ta viꞌnal avi liꞌe. Ta xcaꞌicutic taqui tiꞌil. Chꞌabal jcꞌuꞌcutic. Ilbajinbiluncutic yuꞌun ti cristianoetique. Chꞌabal jnacutic.  
\v 12 Lubemuncutic ta abtel yoꞌ ta jmalqꞌuin jbacutic. Ti cristianoetique ta xischopol-cꞌoptauncutic, pero ta jtacꞌbecutic sutel ti acꞌo acꞌbaticuc bendicione. Nutsbiluncutic yuꞌun, pero tey tsꞌiquem cuꞌuncutic.  
\v 13 Ta soquesbun jcꞌoplalcutic, pero ta yutsil coꞌntoncutic ta jbijubtascutic. Staoj to yav avi ti cꞌacꞌal liꞌe coꞌol sꞌelan cꞌaꞌep ta xiꞌilatcutic. Muꞌyuc jtucꞌcutic ta xiyiluncutic ti cristianoetique.   
\p
\v 14 Ti jech ta jtsꞌibaboxuc talel ti jcartae, maꞌuc ta jcꞌan ta xcacꞌoxuc ta qꞌuexlal. Yuꞌun ta jbijubtasoxuc jech chac cꞌu chaꞌal jnichꞌnaboxuc.  
\v 15 Manchuc mi tey oy ta atojolic lajunmil (10,000) jchanubtasvanejetic ti ta xalboxuc scꞌoplal ti Cristoe, pero mu epuc ti atotique. Ti jech baꞌyel laj calboxuc avaꞌiic ti lequil achꞌ cꞌop ti jaꞌ colebale, jech o xal un, vuꞌun licꞌot ta atotic ti jech achꞌunojic ti Jcoltavanej Jesuse.  
\v 16 Jech o xal un, Quermanotac, ta jcꞌanboxuc vocol, chanbeicun coꞌnton.   
\p
\v 17 Tey ta jtacboxuc talel ta atojolic ti Timoteoe, ti jaꞌ jun jlequil-nichꞌon ta sventa ti Cajvaltique. Jaꞌ chtal svulesboxuc ta avoꞌntonic ti cꞌu sꞌelan cuxulun ti jech jchꞌunoj ti Cristoe, ti jech ta jchanubtas ti jchꞌunolajeletic ta jujun tsobobbail ti buꞌyuc noꞌoxe.  
\v 18 Oy jlomoxuc ti toyobba ta xcꞌopojic ti ta snopic ti muꞌyuc ta xtal jvuꞌlanoxuque.  
\v 19 Pero mi jech ta scꞌan ti Cajvaltique, ta ora noꞌox ta xtal jqꞌueloxuc. Tey ta jqꞌuel mi lec cꞌusi ta spasic ti toyobbaetique, mi jaꞌ noꞌox ti yeic xvulvunique.  
\v 20 Yuꞌun ti mi ventainbilotic yuꞌun ti Diose, oy smucꞌul stsatsal Dios ta jtojoltic. Maꞌuc noꞌox ti sba quetique.  
\v 21 Cꞌalal xtal jqꞌueloxuque, ¿cꞌusi ta xacꞌanic? ¿Mi jaꞌ ta xacꞌanic ti ta jtsitsoxuque? ¿Mi jaꞌ ta xacꞌanic ti cꞌux ta xcaꞌioxuque?   
\c 5  
\s1 Ta xichꞌ chapanel ti jmulivajele  
\p
\v 1 Oy bu vinajem acꞌoplalic ti oy jun vinic ta atojolic ti yicꞌoj ti schaꞌmeꞌe. Ti jech taje, toj echꞌem tsots mulil. Mi jaꞌuc tey sqꞌuelojic ti buchꞌu jech ta spas ti buchꞌu mu xojtiquinic ti Diose.  
\v 2 Ti jechuque, oyoxuc ta at oꞌnton. Pero leꞌ une, jaꞌ noꞌox atoyoj abaic. Ti buchꞌu jech laj spas taje, jipic loqꞌuel ti jech oy ta atojolique.  
\v 3 Manchuc mi muꞌyuc tey oyun ta atojolic, pero tey oy ti jchꞌulele. Jech o xal un, laj xa jchapan ti mulil taje, ti coꞌol sꞌelan jaꞌ jtuc tey vaꞌalun ta atojolique.  
\v 4 Jech o xal un, tsobo abaic ta sventa ti Cajvaltic Jesucristoe. Tey oy ti jchꞌulel ta atojolique. Jaꞌ jech xtoc tey ta svaꞌan sba ta atojolic smucꞌul stsatsal ti Cajvaltique.  
\v 5 Cꞌalal jech tsoboloxuque, aqꞌuic batel ta scꞌob pucuj ti vinic taje. Acꞌo yichꞌ svocol yuꞌun ti smule, yoꞌ jech ta xcol ti schꞌulel ti cꞌalal ta xtal ti Cajvaltic Jesuse.   
\p
\v 6 Altic ti toyobbaoxuc ti jech ta xapasic taje. ¿Mi muꞌyuc bu xavaꞌiic ti jech xꞌale ti cꞌope?: “Ti juteb noꞌox spajubtasobil ti pane ta xpajub yuꞌun scotol ti cꞌu yepal ti votsꞌbile”, xi.  
\v 7 Jech o xal un, jipic loqꞌuel ti pocoꞌ spajubtasobil pan ti ta soquesoxuque, yoꞌ jechuc aꞌelanic jech chac cꞌu chaꞌal ti achꞌ pan ti ta xichꞌ veꞌel ta qꞌuin Colebale, ti pasbil ta achꞌ votsꞌbil jarinae, ti muꞌyuc yichꞌoj ti spajubtasobile. Yuꞌun jaꞌ jech aꞌelanic ta melel ti voꞌoxuque. Yuꞌun ti Cristoe laj yichꞌ svocol, icham cuꞌuntic, jaꞌ ti Colebal chꞌiom chij cuꞌuntique.  
\v 8 Jech o xal un, jaꞌ ta scꞌan ti ta sjunul coꞌntontic ta xquichꞌtic ta mucꞌ ti Cajvaltique. Ti mi jech ta jpastique, coꞌol jꞌelantic jech chac cꞌu chaꞌal ti pan ti chꞌabal yichꞌoj ti spajubtasobile. Maꞌuc jech ta ichꞌel ta mucꞌ ti Cajvaltic ti oy mulile, ti chopol ta qꞌuelele jech chac cꞌu chaꞌal ti spocoꞌ-pajubtasobil ti pane.   
\p
\v 9 Ti ta yan jcartae, laj calboxuc avaꞌiic ti mu xachiꞌinic ti buchꞌutic ta xmulivajique.  
\v 10 Ti jech laj calboxuc taje, maꞌuc laj calboxuc avaꞌiic ti ta xachꞌac abaic loqꞌuel ta stojolic ti cristianoetic liꞌ ta sba banomil ti buchꞌutic ti ta xmulivajique, ti ta xyuꞌninic yaꞌiic ti cꞌusi maꞌuc yuꞌunique, ti ta xꞌelcꞌajique, ti ta xrioxinic ti cꞌusitic meltsanbil ta cꞌabale. Yan ti mi jech ta xaqꞌuej abaic loqꞌuel ta stojol ti buchꞌutic jech chopol ta spasique, jaꞌ to ti mi mu xa liꞌuc ta xanaquiic liꞌ ta banomile.  
\v 11 Ti laj calboxuc ti mu xachiꞌinic ti xacutique, jaꞌ ti buchꞌu ti quermano ti xie, ti cꞌalal jaꞌ jun jmulivajele, ti ta xyuꞌnin ti cꞌusi maꞌuc yuꞌune, ti ta xrioxin ti cꞌusi meltsanbil ta cꞌabale, ti ta xloꞌiltavane, ti ta xyacube, ti ta xꞌelcꞌaje. Ti buchꞌu jech taje, mu xuꞌ ti jmoj ta xaveꞌic schiꞌuque.  
\v 12-13 Yuꞌun maꞌuc cabtel ta jchapan ti buchꞌu maꞌuc jchꞌunolajeletique, jaꞌ ta xchapanatic yuꞌun ti Diose. Jech o xal jaꞌ avabtel ti ta xachapanic ti jchꞌunolajeletique. Jech o xal un, jipic loqꞌuel ta atojolic ti vinic ti oy smule.   
\c 6  
\s1 Mu lecuc ti ta xcacꞌ jbatic ta chapanel ta stojol ti buchꞌutic maꞌuc jchꞌunolajeletique  
\p
\v 1 Cꞌalal oy acꞌopic schiꞌuc ti avermanoe, ¿cꞌu chaꞌal tey chba acꞌanic parte ta stojol ti juezetic ti maꞌuc jchiꞌiltic ta xchꞌunel ti Cristoe? ¿Cꞌu chaꞌal mu jaꞌuc xavacꞌ abaic ta chapanel ta stojol ti buchꞌutic xchꞌunojic ti Diose?  
\v 2 ¿Mi mu xanaꞌic ti voꞌoxuque ti ta sta yorail ti ta xachapanic ti cristianoetique? Ti mi jech ta xachapanic ti cristianoetique, ¿mi yuꞌun jaꞌ mu xuꞌ avuꞌunic xchapanel ti cꞌusiuc noꞌox uni bicꞌtal cꞌopetique?  
\v 3 ¿Mi mu xanaꞌic ti ta jchapantic xtoc ti ángeletique? Ti mi jeche, más to xuꞌ avuꞌunic ta xchapanel ti jutuc cꞌop liꞌ ta sba banomile.  
\v 4 Ti mi oy acꞌopic ti ta scꞌan chapanele, ¿cꞌu chaꞌal tey chba avacꞌ abaic ta chapanel ta stojol ti buchꞌutic altic ta xilic ti jchꞌunolajeletique?  
\v 5 Ti jech ta xacalboxuque, yoꞌ jech xaqꞌuexavic. ¿Mi yuꞌun muꞌyuc buchꞌu junucal avuꞌunic ti oy sbijil ta xchapanel ti yermanotaque?  
\v 6 Cꞌalal oy acꞌopic schiꞌuc ti yane, ¿mi yuꞌun jaꞌ tsots scꞌoplal chba acꞌanbeic parte ta stojol ti juezetic ti maꞌuc jchꞌunolajeletique?   
\p
\v 7 Ti jech ta xavacꞌ abaic ta chapanele, lachꞌayic ta be ta jꞌechꞌel. ¿Mi mu jaꞌuc lec xanaꞌ ti cuchuc avuꞌunic ti ilbajinele? ¿Mi mu jaꞌuc lec xanaꞌ ti acꞌo yelcꞌanoxuque?  
\v 8 Pero ti leꞌ une, muꞌyuc atuqꞌuilic ti cꞌusi ta xapasbe abaique. Yuꞌun avermano noꞌox abaic ti ta xavilbajin abaique, ti ta xavelcꞌan abaique.   
\p
\v 9 Ti voꞌoxuque ¿mi yuꞌun mu xanaꞌic lec ti buchꞌutic toj chopolique, mu xꞌochic batel ti bu ta xventainvan ti Diose? Jech o xal un, bijanic me. Mu me xavacꞌ abaic ta loꞌlael. Yuꞌun ti buchꞌu ta xmulivaje, ti ta xrioxinic ti cꞌusi meltsanbil ta cꞌabale, ti ta stsac schiꞌil ta vinicale,  
\v 10 ti ta xꞌelcꞌaje, ti ta xyuꞌnin ti maꞌuc yuꞌune, ti jyacubele, ti jloꞌiltavaneje, ti jloꞌlaej ta qꞌuine, scotol ti jech taje, mu xuꞌ ta xꞌochic batel ti bu ta xventainvan ti Diose.  
\v 11 Naꞌic me ti jech aꞌelanic to ox jlom ti voꞌoxuque. Avi tana un, pocbiloxuc xa, chꞌacbiloxuc xa ta yajtunel ti Diose. Laj xa ataic ti lec xaꞌilatic yuꞌun ti Dios ta sventa ti Cajvaltic Jesuse schiꞌuc ti Schꞌul Espíritu ti Dios cuꞌuntique.   
\s1 Maꞌuc sventa mulil ti jbecꞌtaltique  
\p
\v 12 Oy buchꞌutic ta xalic ti libreotic ta spasel ti cꞌusiuc noꞌox lec ta xcaꞌitique. Jech melel, xuꞌ ta jpastic scotol, pero mu scotoluc ti lec ti cꞌusi ta jtatic yuꞌune. Manchuc mi libreotic ta spasel ti cꞌusi lec ta xcaꞌitique, pero ti vuꞌune mu xcacꞌ jba ta mosovinel yuꞌun.  
\v 13 Melel, ti jveꞌeltique jaꞌ ta xtun yuꞌun ti jchꞌutique. Ti jchꞌutique jaꞌ yavil ti jveꞌeltique. Pero ti schibal taje ta xꞌechꞌ scꞌoplal yuꞌun ti Diose. Pero mu meleluc ti jaꞌ sventa mulivajel ti jbecꞌtaltique. Ti jbecꞌtaltique, jaꞌ yuꞌun ti Cajvaltique. Ti Cajvaltique, jaꞌ yuꞌun ti jbecꞌtaltique.  
\v 14 Jech chac cꞌu chaꞌal ichaꞌcuxesat yuꞌun Dios ti Cajvaltique, jaꞌ jech ta xischaꞌcuxesotic ti Dios ta sventa ti smucꞌul stsatsale.   
\p
\v 15 ¿Mi mu xanaꞌic ti abecꞌtalic jujunoxuque ti jaꞌ sbecꞌtalinoj ti Cristoe? ¿Mi yuꞌun xuꞌ ta xcacꞌbe xchiꞌin jmulivajel ants ti jbecꞌtal ti jaꞌ yuꞌun ti Cristoe? ¡Bu xata ti staqꞌue!  
\v 16 ¿Mi yuꞌun mu xanaꞌic xtoc, ti jun vinic ti ta xchiꞌin ti jmulivajel antse ti jun sbecꞌtalic ta xcꞌotic ti schibalique? Jaꞌ jech ta xal xtoc ti scꞌop Diose: “Ti schibalique jun ta xcꞌotic”, xi.  
\v 17 Cꞌalal mi oy buchꞌu ipasic xa ta jun schiꞌuc ti Cajvaltique, ti schibalique jun xa snopobil icꞌot yuꞌunic.   
\p
\v 18 Jech o xal un, jꞌechꞌel comesic ti mulivajele. Yuꞌun ti mulivajele jaꞌ ta soques ta jꞌechꞌel ti jbecꞌtaltique. Cꞌusiuc noꞌox ti yan mulile, jaꞌ mu sta.  
\v 19 ¿Mi mu xanaꞌic ti abecꞌtalique ti jaꞌ templo yuꞌun ti Chꞌul Espíritu ti laj yacꞌboxuc ti Diose? Jech ti Chꞌul Espíritue nacal ta atojolic. Jech o xal un, mu avuꞌunuc aba atuquic.  
\v 20 Yuꞌun ti Diose, toyol atojolic laj smanoxuc. Jech o xal un, aqꞌuic ta ichꞌel ta mucꞌ ti Dios yuꞌun ti abecꞌtalique schiꞌuc ti achꞌulelique. Ti schibal taje, jaꞌ yuꞌun ti Diose.   
\c 7  
\s1 Bijubtasel yuꞌun ti nupunele  
\p
\v 1 Avi tana un, ta jtacꞌboxuc avaꞌiic ti cꞌusi laj ajacꞌbeicun ta acartae. Melel, lec ti mi mu xnupun ti viniquetique.  
\v 2 ¡Cꞌu stu un! ti jech mu vocoluc ta xijyacꞌotic ta mulil ti jbecꞌtaltique, jech o xal jaꞌ lec mi oy yajnilic ti jujun viniquetique, mi oy smalalic ti jujun antsetique.  
\v 3 Ti malalile, mu me sjalan sba ta stojol ti yajnile. Jaꞌ jech xtoc ti ajnilile, mu me sjalan sba ta stojol ti smalale.  
\v 4 Ti ajnilile, mu yuꞌunuc stuc ti sbecꞌtale. Yuꞌun jaꞌ yuꞌun ti smalale. Jaꞌ jech xtoc ti malalile, mu yuꞌunuc stuc ti sbecꞌtale. Yuꞌun jaꞌ yuꞌun ti yajnile.  
\v 5 Jech o xal un, mu me smacbe sba yoꞌntonic. Jaꞌ noꞌox xuꞌ ta spajes sbaic jayib cꞌacꞌal ti mi coꞌol ta snopic schibalic ti ta staic ta cꞌoponel ti Diose. Tsꞌacal to un, acꞌo xchiꞌin sbaic yan velta. Yan ti mi jal ta smacbe sba yoꞌntonique, xuꞌ ta stsalatic yuꞌun ti pucuje.   
\p
\v 6 Ti vaꞌi sꞌelan ta xcalboxuc taje, maꞌuc ta jpasoxuc ta mantal, jaꞌ noꞌox ti mi jech ta xacꞌanique.  
\v 7 Ti vuꞌune jcꞌanuc caꞌi ti jechuc aꞌelanic jech chac cꞌu chaꞌal ti vuꞌune. Pero ti Diose, yalel toyol ti cꞌu sꞌelan yacꞌojbotic ti jbijiltic ta jujun tale.   
\p
\v 8 Ti vuꞌun ta xcale, ti tojol tseb queremetique schiꞌuc ti meꞌunal antsetique, lec ti mu xnupunic jech chac cꞌu chaꞌal ti vuꞌune.  
\v 9 Pero mi mu xuꞌ yuꞌunic ti jech stuquic noꞌoxe, acꞌo nupunicuc. Yuꞌun más lec ti mi ta xnupune, jaꞌ toj chopol ti stsꞌicoj ti svocole.   
\p
\v 10 Ti buchꞌutic nupunemic xae, ta xcalbe mantal ti mu me xicta comel smalal ti antse, ti mu me xicta comel yajnil ti vinique. Ti vaꞌi sꞌelan laj cal taje, maꞌuc jmantal jtuc, jaꞌ smantal ti Cajvaltique.  
\v 11 Ti mi oy bu icꞌot ta pasel ti laj yicta comel smalal ti antse, tey me vaꞌvunuc o. O mi moꞌoje, acꞌo slajesbe sba yoꞌntonic schiꞌuc ti smalale. Jaꞌ jech xtoc ti malalile mu me sbaj o ti yajnile.   
\p
\v 12 Ti yan liꞌ ta xcalboxuc talele, maꞌuc smantal ti Cajvaltique, jaꞌ vuꞌun jtuc ta xcaꞌi ti jech ta scꞌan pasele. Ti mi oy jun jchꞌunolajel ti maꞌuc jchꞌunolajel ti yajnile, pero mi jun yoꞌnton schiꞌuc ti smalale, mu me sbaj yajnil ti vinique.  
\v 13 Ti mi oy jun jchꞌunolajel ants ti maꞌuc jchꞌunolajel ti smalale, pero mi jun ti yoꞌntonique, mu me sbaj smalal ti antse.  
\v 14 Manchuc mi maꞌuc jchꞌunolajel ti malalile, pero ta smaquibe syaxal ti yajnil ti jech jchꞌunolajel yicꞌoje. Jech xtoc mi maꞌuc jchꞌunolajel ti antse, pero ta smaquibe syaxal ti smalal ti jech jchꞌunolajel yicꞌoje. Ti manchucuc jech sꞌelan taje, coꞌol sꞌelan maꞌuc snichꞌnab jchꞌunolajel ti snichꞌnabique. Pero leꞌe, snichꞌnab jchꞌunolajel ta xꞌilatic yuꞌun ti Diose.  
\v 15 Pero mi ta onoꞌox scꞌan ta xbajvan ti buchꞌu maꞌuc jchꞌunolajele, acꞌo me schꞌac sbaic. Ti buchꞌu bajbile libre ta xcꞌot, mi jaꞌ ti vinique, mi jaꞌ ti antse. Yuꞌun ti jech laj yicꞌotic ti Diose, jaꞌ ta scꞌan ti jun coꞌntontique.  
\v 16 ¿Cꞌusi xavut xanaꞌ ti voꞌote, ajnilil, ti xuꞌ ta xcol avuꞌun ti amalale? ¿Cꞌusi xavut xanaꞌ ti voꞌote, malalil, ti xuꞌ ta xcol avuꞌun ti avajnile?   
\p
\v 17 Ti cꞌu aꞌelanic cuxuloxuc cꞌalal lataatic ta iqꞌuel yuꞌun ti Dios ta jujun tale, jechuc me comanic o. Jaꞌ jech ta xcalbe scotol ti jchꞌunolajeletic ta jujun tsobobbaile.  
\v 18 Ti mi yichꞌoj circuncisión ti cꞌalal itaat ta iqꞌuel yuꞌun ti Diose, jechuc me comuc o ti yichꞌoj ti circuncisione. Mi muꞌyuc to ox yichꞌoj circuncisión ti cꞌalal itaat ta iqꞌuel yuꞌun ti Diose, mu me xacꞌbe sba ti circuncisione.  
\v 19 Yuꞌun maꞌuc tsots scꞌoplal mi quichꞌojtic ti circuncisione, mi muꞌyuc. Ti tsots scꞌoplale, ti acꞌo jpastic ti cꞌusi scꞌan ti Diose.  
\v 20 Ti cꞌu sꞌelan itaatic ta iqꞌuel yuꞌun ti Dios ta jujun tale, jechuc me comuc o.  
\v 21 Mi chonbilot ta mosovil ti cꞌalal laj staot ta iqꞌuel ti Cajvaltique, mu xavul avoꞌnton yuꞌun. Pero ti mi oy bu ta xcꞌot ta pasel ti ta scoltaot loqꞌuel ta mosovil ti avajvale, ichꞌo me ta mucꞌ. Yavil ti coltabilot xa yuꞌun ti Cajvaltique.  
\v 22 Ti buchꞌu tiqꞌuil ta mosovil ti cꞌalal itaat ta iqꞌuel yuꞌun ti Cajvaltique, avi tana un, colem xa, ochem xa ta yajtunel ti Cajvaltique. Jaꞌ jech xtoc ti buchꞌu muꞌyuc tiqꞌuil ta mosovil ti cꞌalal itaat ta iqꞌuel yuꞌun ti Cajvaltique, avi tana un, ochem xa ta yajmosov ti Cajvaltique.  
\v 23 Yuꞌun toyol atojolic laj smanoxuc ti Diose. Jech o xal un, mu me xarioxinic ti cristianoetique.  
\v 24 Jech o xal un, Quermanotac, junuc me avoꞌntonic ti cꞌu sꞌelan lataatic ta iqꞌuel yuꞌun ti Cajvaltic ta jujun tale.   
\p
\v 25 Yan ti buchꞌu muꞌyuc to nupunemique, muꞌyuc yan mantal ti laj yacꞌbun jnaꞌ ti Cajvaltic ti ta xcalbee. Pero ti jech laj xcꞌuxubinun ti Cajvaltique, xuꞌ xachꞌun ti cꞌu sꞌelan ta jbijubtasoxuque.  
\v 26 Ta scoj ti liquem xa ti vocole, ti vuꞌun ta xcale, ti jechuc me staojuc yav ti cꞌu sꞌelan oy ti viniquetique.  
\v 27 Ti buchꞌu nupul tsꞌacalic xae, mu me xchꞌac sbaic. Ti mi muꞌyuc to nupul tsꞌacalique, mu to me saꞌic.  
\v 28 Pero ti mi ta xanupunique, maꞌuc ta xata o amulic. Mi ta xnupunic ti tojol tsebetique, maꞌuc ta sta o smulic. Pero ti buchꞌu ta xnupij stsꞌaquie ta xꞌayan svocolic ti liꞌ cuxulique. Jcꞌanuc caꞌi ti mu me xataic ti avocolique.   
\p
\v 29 Quermanotac, ti cꞌusi ta jcꞌan ta xcale, jaꞌ liꞌe: Mu xa jaluc batel ti cꞌacꞌale. Jech o xal ti buchꞌu oy yajnile, coꞌoluc sꞌelan ti muꞌyuc yajnil ta xaꞌie.  
\v 30 Ti buchꞌutic oyic ta meꞌinale, coꞌoluc sꞌelan ti muꞌyuc ti at oꞌnton ta xaꞌie. Ti buchꞌutic xmuyubajique, coꞌoluc sꞌelan ti muꞌyuc xmuyubajique. Ti buchꞌutic ta xmanolajique, coꞌoluc sꞌelan ti maꞌuc yuꞌunic ti cꞌusi laj smanique.  
\v 31 Ti buchꞌutic staojic scotol yoꞌ lec oyic liꞌ ta sba banomile, coꞌoluc sꞌelan ti muꞌyuc cꞌusi staojique. Yuꞌun scotol ti cꞌusi ti liꞌ oy ta sba banomile yantic xa xlaj scꞌoplal.   
\p
\v 32 Jaꞌ jech ta jbijubtasoxuc, yuꞌun ta jcꞌan ti mu oyucoxuc ta vul oꞌntone. Yuꞌun ti vinic ti buchꞌu chꞌabal ti yajnile, jaꞌ noꞌox oy ta yoꞌnton ti cꞌusi ta scꞌan ti Cajvaltique, ti lec ta xꞌilat yuꞌune.  
\v 33 Pero ti cꞌalal oy xa ti yajnile, ta suj sba ta saꞌel ti cꞌusitic ta xtun yuꞌunic liꞌ ta banomile, yoꞌ jech lec oy schiꞌuc ti yajnile.  
\v 34 Jaꞌ jech xtoc ti ants ti malijeme, mu xcoꞌolaj schiꞌuc ti buchꞌu muꞌyuc malijeme. Yuꞌun ti buchꞌu muꞌyuc malijeme, jaꞌ noꞌox ta spas ti cꞌusi ta scꞌan ti Cajvaltique, yoꞌ jech sjunul yoꞌnton yacoj sba ta tunel yuꞌun ti Diose. Pero ti buchꞌu malijem xae, ta suj sba ta saꞌel ti cꞌusi ta xtun yuꞌunic liꞌ ta sba banomile, yoꞌ jech lec oy schiꞌuc ti smalale.   
\p
\v 35 Ti vaꞌi sꞌelan ta xcal taje, jaꞌ alequilalic. Mu yuꞌunuc ta jmac avoꞌntonic. Jaꞌ noꞌox ta jcꞌan ti junuc avoꞌntonique, ti libre acꞌo abaic ta tunel yuꞌun ti Cajvaltique.   
\p
\v 36 Ti mi oy jun vinic ti ta snop ti chopol ti ta xmalij ti stsebe, pero mi ta xil ti jvaꞌlej xa ti stsebe, ti ta xmalij yaꞌie, acꞌo yacꞌ ta malijel. Maꞌuc mulil.  
\v 37 Pero mi oy buchꞌu ta snop lec ti mu xacꞌ ta malijel ti stsebe, yuꞌun ta xil ti mu scꞌan ta xmalije, lec onoꞌox xtoc.  
\v 38 Jech o xal un, ti buchꞌu ta xacꞌ ta malijel ti stsebe, lec ti jech ta spase. Jaꞌ jech xtoc ti buchꞌu mu xacꞌ ta malijel ti stsebe, jaꞌ más to lec ti jech ta spase.   
\p
\v 39 Ti ants ti nupunem xae, persa yicꞌoj sbaic ta xcomic ti cꞌu sjalil cuxul ti vinique. Ti mi cham ti vinique, libre ta xcꞌot yuꞌun ti mantale. Mi scꞌane, xuꞌ ta xnupij yan velta. Yavil ti mi coꞌol jchꞌunolajeletique.  
\v 40 Pero ti vuꞌune ta jnop ti jaꞌ más xmuyubaj ti mu xa xmalij yan velta ti antse. Ti jech ta xcal taje, yuꞌun jchꞌulelinojbe schꞌulel ti Diose.   
\c 8  
\s1 Ti veꞌliletic ti acꞌbil ta smoton ti cꞌusitic meltsanbil ta cꞌabale  
\p
\v 1 Ti liꞌe, ta xcalboxuc avaꞌiic scꞌoplal ti veꞌlil ti acꞌbil ta smoton ti cꞌusi meltsanbil ta cꞌabale. Ti jujunotique ta jnoptic ti oy smelol ti cꞌusi ta xcaltique. Ti cꞌusi jnaꞌtic calojtique, jaꞌ noꞌox ta jtoy jbatic schiꞌuc. Yan ti scꞌuxul oꞌntonale, jaꞌ ta xistsꞌitesotic ta stojol ti Cajvaltique.  
\v 2 Mi oy buchꞌu ta snop ti ta snaꞌ scotol yaloje, mu to laj sta ti cꞌusi lec ta nopele.  
\v 3 Mi oy buchꞌu cꞌux ta xaꞌi ti Diose, xꞌojtiquinat yuꞌun ti Diose.   
\p
\v 4 Jaꞌ yuꞌun un, ¿mi stacꞌ tiꞌel ti beqꞌuet ti acꞌbil ta smoton ti cꞌusi meltsanbil ta cꞌabale? ¿Mi mu stacꞌ tiꞌel? Jnaꞌtic lec ti mu cuxuluc ti cꞌusi meltsanbil ta cꞌabale. Yuꞌun jun noꞌox ti Diose. Muꞌyuc yan.  
\v 5 Ti liꞌ ta banomile, ep ti buchꞌutic sbisojic ta rioxetic ti cꞌusitic oy ta vinajele, ti oy ta banomile. Ti jech taje, coꞌol to sꞌelan ti ep ti rioxetique, ti jcoltavanejetique.  
\v 6 Pero ti voꞌotique mu jechuc ta jchꞌuntic. Yuꞌun jnaꞌtic ti jun noꞌox ti Diose, jaꞌ ti Totile. Jaꞌ laj spas scotol ti cꞌusitic oye. Cuxulotic ta sventa. Jaꞌ jech xtoc jun noꞌox ti Cajvaltique, jaꞌ ti Jesucristoe, ti jaꞌ ta sventa ti cꞌusi oy scotole schiꞌuc ti voꞌotique.   
\p
\v 7 ¡Cꞌu stu un! mu scotoluc snaꞌic ti muꞌyuc cuxul ti cꞌusi meltsanbil ta cꞌabale. Oy jlom ti buchꞌu laj to ox yichꞌic ta mucꞌ ti cꞌusi meltsanbil ta cꞌabale, cꞌalal ta slajesic ti veꞌlil ti acꞌbil ta smotone, ta sventa ti muꞌyuc to yip ti yoꞌntonique, ta xaꞌiic ti ta sta ti smulique.  
\v 8 Ta melel, ti cꞌusi ta jlajestique, maꞌuc ta sventa ti ta jtatic ti lec xijyil ti Diose. Mi jaꞌuc yantic xijlecub batel, mi jaꞌuc yantic xijsoc batel ti mi ta jlajestique, mi muꞌyuc ta jlajestic ti beqꞌuete.  
\v 9 Pero bijanic me yuꞌun ti jech xuꞌ xatiꞌic scotole, yoꞌ jech mu xasoquesbeic yoꞌnton ti buchꞌu muꞌyuc to yip yoꞌnton xchꞌunoj ti Cajvaltique.  
\v 10 Xcaltic noꞌox avaꞌiic jech chac cꞌu chaꞌal liꞌe. Ti voꞌot ti xanaꞌ scotol taje, ti mi tey chotolot ta stiꞌel ti veꞌlil ti acꞌbil ta smoton ti cꞌusi meltsanbil ta cꞌabale, ti mi tey ta xayil ti avermano ti muꞌyuc to yip ti yoꞌntone, xuꞌ nan ta xlic stiꞌ ti veꞌlil ti acꞌbil ta smoton ti locꞌtabil rioxe.  
\v 11 Ti mi jech ta xapas taje, ti xanaꞌ ti mu cuxuluc ti locꞌtabil rioxetique, xuꞌ ta xavacꞌ ta chꞌayel ti avermano ti chꞌabal to yip ti yoꞌntone, ti cꞌalal icham ti Cristo ta sventa eque.  
\v 12 Cꞌalal jech ta xasoquesbe yoꞌnton ti avermano ti cꞌalal muꞌyuc to yip ti yoꞌntone, jech o xal ti voꞌote ta xata amul ta stojol ti Cristoe.  
\v 13 Jech o xal un, ti mi ta jyanijesbe yoꞌnton ti quermano ta scoj ti ta jtiꞌ ti beqꞌuete, jaꞌ lec mu jtiꞌ o ta jꞌechꞌel ti beqꞌuete, yoꞌ jech mu sta smul ti quermanoe.   
\c 9  
\s1 Yoꞌnton ti Pabloe  
\p
\v 1 Ti jech yajcholcꞌopun ti Diose, xuꞌ ta jcꞌanboxuc ti cꞌusi ta xtun cuꞌun ti jechuque. Laj xa quilbe sat ti Cajvaltic Jesucristoe. Ti Cajvaltic taje laj xa sjeltaboxuc acuxlejalic ta sventa ti liꞌabtej ta atojolique.  
\v 2 Oy nan jlom cristianoetic ti mu xisbisicun ta jcholcꞌope. Pero ti voꞌoxuque, bisicun ta jcholcꞌop. Yuꞌun ti jech achꞌunojic ti Cajvaltique, jaꞌ cabtel, jaꞌ svinajeb ti jcholcꞌopun yuꞌun ti Cajvaltic ta melele.   
\p
\v 3 Jaꞌ jech sꞌelan ta jpac jcꞌoplal ta stojol ti buchꞌu ta xal ti maꞌuc yajtacbolalun ti Diose.  
\v 4 Ti mi ta xavacꞌbun ti jveꞌel cuchꞌome, xuꞌ ta jtsac, ¿cꞌu chaꞌal moꞌoj?  
\v 5 Jaꞌ jech xtoc ti tauc jcꞌane, xuꞌ ta jsaꞌ cajnil ti jaꞌ jun jchꞌunolajel antse. Xuꞌ ta jchiꞌin ta yalel ti scꞌop Diose jech chac cꞌu chaꞌal ta spasic ti yan jcholcꞌopetique, ti yitsꞌinabtac ti Cajvaltique, ti Pedroe.  
\v 6 ¿Mi yuꞌun ta xanopic ti jaꞌ noꞌox jtuccutic schiꞌuc ti Bernabee ti ta persa ta xiꞌabtejcutic yoꞌ jech ta jmalqꞌuin jbacutic cꞌalal ta xcalcutic ti lequil achꞌ cꞌope?  
\v 7 Muꞌyuc buchꞌu junucal soldadoetic ti ta sbain stuc ti cꞌusi xtun yuꞌune. ¿Buchꞌu van ta stsꞌun uva ti mu ta sloꞌbe ti sate? ¿Buchꞌu van ta stsꞌun ti chijetic ti mu xuchꞌbe ti schuꞌ ti ta spitsꞌe?  
\v 8 Mu xanopic ti ta jol noꞌox jtuc ti jech ta xcale. Yuꞌun jech ta xal xtoc smantal ti Moisese.  
\v 9 Yuꞌun jech tsꞌibabil ta libro yuꞌun ti mantale: “Mu xavacꞌbeic svosal ti jmajtrigo vacaxe”, xi. Ti vaꞌi sꞌelan laj yal ti Dios taje, maꞌuc noꞌox cꞌux ta yoꞌnton ti vacaxe.  
\v 10 Jaꞌ jcꞌoplaltic ec. Jaꞌ jlequilaltic ti jech tsꞌibabil ti ta mantale. Yuꞌun ti buchꞌu ta sloc ti banomile schiꞌuc ti buchꞌu ta smaj ti tsꞌunobale, jech ta spasic yuꞌun spatoj yoꞌntonic ti tey ta xlocꞌ talel ti sveꞌelique.  
\v 11 Jaꞌ jech ti vuꞌune, laj jtsꞌun ta avoꞌntonic ti scꞌop Diose. ¿Mi yuꞌun toj ep avocolic ta xavichꞌic ti mi xavacꞌbeicun ti cꞌusi ta xtun cuꞌune?  
\v 12 Ti jech malqꞌuinbilic avuꞌunic ti yan jcholcꞌopetique, jaꞌ yuꞌun un, xuꞌ ta xcal ti acꞌo amalqꞌuinicun eque.  
\p Pero muꞌyuc quichꞌoj malqꞌuinel avuꞌunic. Tey tsꞌiquem talel cuꞌun ti jvocole, yoꞌ jech mu xcꞌot ta avoꞌntonic ti manbil avuꞌunic ti lequil achꞌ cꞌop yuꞌun ti Cristoe.  
\v 13 Ti voꞌoxuque xanaꞌic lec ti buchꞌutic ta xꞌabtejic ta temploe, jaꞌ tey ta staic ti sveꞌelic ti jech sbainojic ta yacꞌbel smoton ti Diose. Tey ta stiꞌic ti sbecꞌtal ti animaletic ti tey ta smilique.  
\v 14 Jaꞌ noꞌox jechic ec ti buchꞌutic ta xꞌabtejic ta yalel ti lequil achꞌ cꞌope. Nopbil yuꞌun ti Cajvaltique ti tey ta sta ti sveꞌelic ti bu ta xꞌabtejique.  
\v 15 Pero mu jechuc laj jpas ta atojolic ti xuꞌ ta jcꞌan ti cꞌusi xtun cuꞌune. Mu yuꞌunuc ta jtsꞌibaboxuc talel ti jcarta liꞌe, yoꞌ jech ta jcꞌan ti cꞌusi ta xtun cuꞌune. Ti mi jech ta jpase, jaꞌ lec acꞌo chamcun yoꞌ jech muꞌyuc buchꞌu ta xismacbun ta be ti jech ta matanal ta xcal ti lequil achꞌ cꞌope.   
\p
\v 16 Ti jech ta xcal ti lequil achꞌ cꞌope, mu xuꞌ ta jtoy jba, yuꞌun jaꞌ laj yacꞌbun cabtel ti Cajvaltique. Toj abol jba ti mi mu xcal ti lequil achꞌ cꞌope.  
\v 17 Ti yuꞌunuc lajuc jtꞌuj jtuc ti cabtele, xuꞌ ta xcal ti oy jtojol ta xquichꞌe. ¡Cꞌu stu un! maꞌuc laj jtꞌuj jtuc. Jaꞌ acꞌbilun yuꞌun ti Cajvaltique.  
\v 18 Pero ti jtojol ti ta xcaꞌie, jaꞌ ti ximuyubaj xa yuꞌun ti muꞌyuc ta jcꞌanbe stojol ti lequil achꞌ cꞌop ti ta xcale, jaꞌ ti muꞌyuc ta xcacꞌ ta bainel ti cꞌusi xtun cuꞌun ti jech jcholcꞌopune.   
\p
\v 19 Manchuc mi muꞌyuc buchꞌu smosovinojun, pero ta xcacꞌ jba ta mosovinel yuꞌunic scotol, yoꞌ jech más ep ta xquicꞌan talel ti cristianoetic ta stojol ti Cristoe.  
\v 20 Ti cꞌalal oyun ta stojol ti jchiꞌiltac ti tsots scꞌoplal ta xaꞌi smantal ti Moisese, ta jcoꞌoltas jba jech chac cꞌu chaꞌal ti stuquique. Ta jpas ti mantale, manchuc mi mu xa jchꞌunojuc ti jech ta xicole. Jaꞌ jech ta jcoꞌoltas jba schiꞌuc yoꞌ jech ta xchꞌunic ti coltaele.  
\v 21 Ti cꞌalal oyun ta stojol ti jyanlumetic ti muꞌyuc yaꞌbinojic smantal ti Moisese, ta jcoꞌoltas jba jech chac cꞌu chaꞌal ti stuquique, yoꞌ jech ta xchꞌunic ti coltaele. Ati vaꞌi sꞌelan ta xcale, mu yuꞌunuc ta jbajbe smantal ti Diose, yuꞌun oyun ta stojol ti Cristoe.  
\v 22 Ti cꞌalal oyun ta stojol ti quermanotic ti buchꞌutic muꞌyuc yip ti yoꞌntonique, ta jcoꞌoltas jba jech chac cꞌu chaꞌal ti stuquique, yoꞌ jech más ta xꞌayan ta yoꞌntonic ta xchꞌunel ti coltael ti ta xcalbe yaꞌiique. Jaꞌ jech ta jcoꞌoltas jba ti cꞌu sꞌelan ti jujuchope, yoꞌ jech ta xchꞌunic ti coltaele.  
\v 23 Jech ta jpas ta sventa ti lequil achꞌ cꞌop ti jaꞌ colebale, yoꞌ jech jmoj ta jtatic ti ta xijcolotic yuꞌun ti lequil achꞌ cꞌope.   
\p
\v 24 Xanaꞌic lec, ti jtajimol ti ta xꞌanilajique, scotolic ta xꞌanilajic. Pero jun noꞌox ti buchꞌu ta xichꞌ ti matanale. Jaꞌuc me jechucoxuc yoꞌ jech ta xavichꞌic ti matanal yuꞌun ti Cajvaltique.  
\v 25 Scotolic ti buchꞌutic ta xchapan sbaic ta tsalvanej ta tajimole, mu xacꞌbe sbaic ti cꞌusi ta soquesatique. Jaꞌ jech ta spasic yoꞌ jech ta xichꞌic ti matanale, acꞌo mi jaꞌ noꞌox xotbil muil nichim ti mu jaluc xtune. Yan ti voꞌotique cacꞌojtic batel persa ta stsalel ti cajcrontatique, yoꞌ ta jtatic ti matanal ti mu snaꞌ soc sbatel osile.  
\v 26 Ti vuꞌune tucꞌ ta xiꞌanilaj batel ti bu ti spajebe. Jaꞌ jech xtoc mu ta icꞌuc ta xjelav ti jcꞌob cꞌalal ta jmaj ti cajcrontae.  
\v 27 Ti vuꞌune mu xcacꞌbe spas ti jbecꞌtal ti cꞌusi ta scꞌane. Ta xꞌoch ta be cuꞌun. Jech ta jpas, naca mi albatcun ti mu jta ti jmotone ti cꞌalal laj xa calbe yaꞌi ti yane ti xuꞌ ta staic ti smotonique.   
\c 10  
\s1 Scꞌoplal ti cꞌusitic meltsanbil ta cꞌabale  
\p
\v 1 Quermanotac, ta jcꞌan ti ta xanaꞌic ti scotol ti jmolmucꞌtotcutic ta voꞌnee icꞌbilic batel yuꞌun ti toque. Scotolic echꞌ xtuchꞌic ti Tsajal Nabe.  
\v 2 Jech o xal un, scotolic laj yacꞌ sba ta stojol ti Moisese, ti jech icꞌbilic yuꞌun ti toque, ti jech ijelavic ta nabe, ti jaꞌ señail ti jmoj icom schiꞌuc ti Moisese.  
\v 3 Jaꞌ jech xtoc scotolic laj sveꞌic ti veꞌlil ti iꞌacꞌbatic yuꞌun ti Diose.  
\v 4 Scotolic laj yuchꞌic ti chꞌul voꞌ ti ilocꞌ talel ta chꞌene. Ti voꞌ ti ilocꞌ ta chꞌen taje, jaꞌ yabtel ti Cristo stuque ti schiꞌuquic batel ta yalel muyel ti jmolmucꞌtotcutique.  
\v 5 Acꞌo mi scotolic icoltaatic yuꞌun ti Diose, pero ichamic ta xocol banomil. Yuꞌun ti cꞌu sꞌelanique, mu lecuc iꞌilatic yuꞌun ti Diose.   
\p
\v 6 Scotol ti vaꞌi sꞌelan icꞌot ta pasel taje, jaꞌ ta xacꞌ jnaꞌtic ti mu me xbat ta coꞌntontic ta scꞌanel ti chopole jech chac cꞌu chaꞌal laj spas ti stuquique.  
\v 7 Jech o xal un, mu xarioxinic ti cꞌusi meltsanbil ta cꞌabale jech chac cꞌu chaꞌal laj spasic jlom ti jmolmucꞌtotcutic ta voꞌnee: “Chotiic ta veꞌel uchꞌ voꞌ ti cristianoetique. Tsꞌacal to un, lic smuyubtaic ti yajrioxique”, xi ta xal ti scꞌop Diose.  
\v 8 Jaꞌ jech xtoc, mu me jpastic ti mulivajele jech chac cꞌu chaꞌal laj spasic jlom ti jmolmucꞌtotcutic ta voꞌnee. Jech o xal un, ta jun noꞌox cꞌacꞌal, ichamic oxib schaꞌvinic ta mil (23,000).  
\v 9 Mu me jpastic ti ta jqꞌuelbetic yutsil yoꞌnton ti Diose jech chac cꞌu chaꞌal laj spas jlom ti jmolmucꞌtotcutique. Jech o xal ti stuquique tiꞌbil ta chon ilajic.  
\v 10 Mu me xcaltic ti taꞌlo xcaꞌitic ti cꞌu sꞌelan ta spas ti Dios ta jtojoltique jech chac cꞌu chaꞌal laj spasic jlom ti jmolmucꞌtotcutique. Tey imilatic yuꞌun ti ángel ti sbainoj ti lajebale.   
\p
\v 11 Scotol ti cꞌusi icꞌot ta pasel ta stojol ti jmolmucꞌtotcutic ta voꞌnee, ti tey tsꞌibabil icom ta scꞌop Diose, jaꞌ jbijubtaseltic yuꞌun, ti jech liꞌ to cuxulotic ti slajebtic xa batel ti cꞌacꞌale.  
\v 12 Jech o xal un, ti buchꞌu ta xal ti oy yip coꞌnton ta stojol Dios ti xie, bijuc me, naca me yaluc ta mulil.  
\v 13 Ti jech ta xavichꞌ avocolic yuꞌun ti lajeltsaele, mu yanuc. Coꞌol sꞌelan jech chac cꞌu chaꞌal ta xaꞌiic scotol ti yan cristianoetique. Ti voꞌoxuque pato avoꞌntonic ta stojol ti Diose. Yuꞌun ti stuque mu teyuc noꞌox sqꞌueloj ti ch-epaj batel ti mu xa xcuch avuꞌun ti lajeltsaele. Cꞌalal ta xtal ti lajeltsaele, jaꞌ stuc ti Dios ta xacꞌ jnaꞌtic cꞌu sꞌelan ta xalocꞌ yuꞌun ti lajeltsaele. Jaꞌ jech tsalbil ta xcꞌot avuꞌun.   
\p
\v 14 Jech o xal un, Quermanotac, qꞌuejo abaic ta xrioxinel ti cꞌusi meltsanbil ta cꞌabale.  
\v 15 Ti jech ta xajcꞌoponoxuque, yuꞌun oy xa snopobil avuꞌunic. Xuꞌ xanopic ti oy smelol ti cꞌusi ta xcale.  
\v 16 Cꞌalal ta xcalbetic vocol ti Dios ti ta xcuchꞌtic ti yaꞌlel uva ti ta jpastic snaꞌobil ti Cajvaltique, jaꞌ svinajeb ti jun coꞌntontic schiꞌuc ti Cristo ti jech laj smal ti schꞌichꞌele. Jaꞌ jech xtoc ti cꞌalal ta jchꞌacolanbe jbatic ta sveꞌel ti pane, jaꞌ svinajeb ti jun coꞌntontic schiꞌuc ti Cristo ti jech laj yacꞌ sba ta milele.  
\v 17 Manchuc mi epotic, pero jun noꞌox ti pan ti ta jveꞌtic jcotoltique. Ti jech taje, jaꞌ svinajeb ti junotic jcotoltic ta stojol ti Cristoe.   
\p
\v 18 Nopic lec cꞌu sꞌelan laj spasic ti jꞌisraeletique. Ati buchꞌutic laj stiꞌic ti smoton Dios ti ta xchiqꞌuique, jaꞌ svinajeb ti jun yoꞌntonic schiꞌuc ti Diose.  
\v 19 Ti beqꞌuet ti acꞌbil ta smoton ti cꞌusi meltsanbil ta cꞌabale, mu yuꞌunuc ta xcal ti isoquesat yuꞌun ti cꞌusi meltsanbil ta cꞌabale. Staoj yav beqꞌuet onoꞌox.  
\v 20 Ti cꞌusi ta xcale, jaꞌ liꞌe. Ti cꞌalal ta xacꞌbeic smoton rioxetic ti buchꞌutic mu xojtiquinic ti Diose, jaꞌ ta xacꞌbeic smoton ti pucuje, maꞌuc ti batsꞌi Diose. Jaꞌ mu lecuc ta xcaꞌi ti ta xacoꞌoltas avoꞌntonic schiꞌuc ti pucuje.  
\v 21 Yuꞌun mi jun avoꞌntonic ta xavuchꞌic ti yaꞌlel uvae schiꞌuc ta xaveꞌic ti pan ti ta xapasic snaꞌobil ti Cajvaltique, mu smeloluc ti cꞌalal jun avoꞌntonic chotoloxuc ta xalajesic ti veꞌlil ti acꞌbil ta smoton ti pucujetique.  
\v 22 ¿Mi lec xanaꞌic ti ta xcacꞌtic ilinuc ti Diose? ¿Mi yuꞌun voꞌotic echꞌem cajal xcaꞌi jbatic?   
\s1 Ti cꞌusi ta jpastique jaꞌuc me scꞌuxubinel ti yane  
\p
\v 23 Melel ti cꞌusi ta xalique ti libreotic ta spasel ti cꞌusi lec ta xcaꞌitique. Pero mu scotoluc ti lec ti cꞌusi ta jtatic yuꞌune. Jech melel, libreotic ta spasel ti cꞌusi lec ta xcaꞌitique. Pero mu scotoluc ti ta xijchꞌi yuꞌun ta yichꞌel ta mucꞌ ti Cajvaltique.  
\v 24 Ti cꞌusi ta xapasique, jaꞌuc slequilal ti yan cristianoetique. Mu me jaꞌuc noꞌox ta xapasic ti cꞌusi lec ta xavaꞌi atuquique.   
\p
\v 25 Tunesic scotol ti veꞌlil ti ta xchon ta chꞌivite. Pero mu xajacꞌolanic un, yoꞌ jech mu xanaꞌeticuc ta xatiꞌic.  
\v 26 Yuꞌun ti banomile schiꞌuc scotol ti cꞌusitic ta xchꞌi yuꞌune, jaꞌ yuꞌun ti Cajvaltique.   
\p
\v 27 Mi ta xaꞌicꞌatic ta veꞌel yuꞌun ti maꞌuc jchꞌunolajele, ti mi labatique, lajesic scotol ti cꞌusitic ta xaꞌacꞌbatique. Pero mu xajaqꞌuic ti cꞌusi ta xalajesique, yoꞌ jech muꞌyuc cꞌusi xal avoꞌntonic.  
\v 28 Pero mi oy buchꞌu ta xalbot: “Ti beqꞌuet liꞌe, jaꞌ acꞌbil ta smoton ti cꞌusi meltsanbil ta cꞌabal”, mi xayute, mu me xatiꞌic, yoꞌ jech mu xyanij yoꞌnton avuꞌun ti buchꞌu jech laj yale, yoꞌ mu xloꞌilaj ti oꞌntonale.  
\v 29 Ti jech ta xcal ti ta xloꞌilaj ti oꞌntonale, jaꞌ ti yane, maꞌuc ti voꞌote.  
\p Pero oy buchꞌu xuꞌ jech ta sjacꞌboxuc: “¿Cꞌu chaꞌal ta jmacbe jba ta slajesel veꞌlil ta sventa yoꞌnton yan ti cꞌalal libre oyune, ti xuꞌ ta jlajese?  
\v 30 Yuꞌun ti vuꞌune ta xcalbe vocol ti Dios ti cꞌusi ta jlajese. Jech o xal un, ¿cꞌu chaꞌal ta xisnaꞌleicun ti ta jlajese?”, xi.  
\v 31 Ta scꞌan ti bijanique. Yuꞌun ti ta xaveꞌique, ti ta xavuchꞌic voꞌe, cꞌusiuc noꞌox yan ti ta xapasique, jaꞌuc me yichꞌel ta mucꞌ ti Dios ti cꞌusi ta xapasique.  
\v 32 Tucꞌulano me abaic yoꞌ jech mu junuc ta xasoquesbe yoꞌntonic ti jꞌisraeletique, ti jyanlumetique, ti jchꞌunolajeletique.  
\v 33 Yuꞌun ti vuꞌune ta xcacꞌ persa ta spasel ti cꞌusi leque, yoꞌ jech ta xcol ti yane. Maꞌuc noꞌox ta jpas ti cꞌusi lec ta xcaꞌi jtuque.   
\c 11  
\p
\v 1 Jech o xal un, ti voꞌoxuque pasic ti cꞌu sꞌelan ta jpase. Yuꞌun ti vuꞌune ta jpas jech chac cꞌu chaꞌal laj spas ti Cristoe.   
\s1 Ti antsetic ti oy ta tsobobbaile  
\p
\v 2 Ximuyubaj xa avuꞌunic, Quermanotac, ti muꞌyuc achꞌayojicun ta avoꞌntonique, ti staoj yav achꞌunojic ti cꞌu sꞌelan laj jchanubtasoxuque.  
\v 3 Pero aꞌyic lec un, ti jujun vinique, jaꞌ sjolinojbe sjol ti Cristoe. Jaꞌ jech xtoc ti jujun ajnilile, jaꞌ sjolinojbe sjol ti smalalique jech chac cꞌu chaꞌal Cristo ti jaꞌ sjolinojbe sjol ti Diose.  
\v 4 Mi slapoj spixol jun vinic ti cꞌalal ta sta ta cꞌoponel ti Dios ta tsobobbaile, o ti cꞌalal ta xacꞌ ta naꞌel ti cꞌusi ch-acꞌbat snaꞌ yuꞌun ti Diose, jech ta xacꞌ ta qꞌuexlal ti Cristoe.  
\v 5 Jaꞌ jech xtoc mi muꞌyuc smacoj sjol jun ants ti cꞌalal ta sta ta cꞌoponel ti Diose, o ti cꞌalal ta xacꞌ ta naꞌel ti cꞌusi ch-acꞌbat snaꞌ yuꞌun ti Diose, jech ta xacꞌ ta qꞌuexlal ti smalale. Ti jech taje, coꞌol to sꞌelan ti setoj scotol ti stsotsil sjole.  
\v 6 Mi mu smac sjol ti antse, acꞌo set loqꞌuel ti stsotsil sjol ta jꞌechꞌele. Pero mi qꞌuexlal sba ta xaꞌi ti jech tꞌanal ti sjole, jaꞌ lec acꞌo smac ti sjole.  
\v 7 Yan ti vinique mu xuꞌ ta smac ti sjole. Yuꞌun ti stuque jaꞌ slocꞌobbail ti Diose, xojobin yutsilal ti Dios ta stojole. Yan ti antse xojobin yutsilal ti smalal ta stojole.  
\v 8 Ti sba vinic ti imeltsanat yuꞌun ti Diose maꞌuc tey ital ta stojol ti antse. Yuꞌun ti ants ti laj smeltsan ti Diose, tey ilocꞌ talel ta stojol ti vinique.  
\v 9 Ti jech imeltsanat ti antse, yoꞌ jech oy schiꞌil ti vinique. Mu yuꞌunuc jaꞌuc laj scꞌan schiꞌil ti antse, jaꞌ ti muꞌyuc to ox ti antse.  
\v 10 Jech o xal ti antse tsots scꞌoplal ti ta smac ti sjole, yoꞌ jech ta xvinaj ti ta snijan sba ta stojol ti smalale, yoꞌ jech lec ta xꞌilat yuꞌun ti ángeletique.  
\v 11 Acꞌo mi jech taje, pero nopbil yuꞌun ti Dios ti coꞌol ta xtun yuꞌun sbaic ti schibalique.  
\v 12 Melel, ti antse ilocꞌ talel ta stojol ti sba vinique. Pero jaꞌ jech xtoc ti jujun vinique ta xꞌayan talel ta stojol ti antsetique. Scotol ti vaꞌi sꞌelan taje, ta xlic talel ta stojol ti Diose.   
\p
\v 13 Nop avaꞌiic, ¿mi lec ti muꞌyuc smacoj sjol ti ants cꞌalal ta sta ta cꞌoponel ti Diose?  
\v 14 Cꞌalal natic ti joltic ti voꞌotic vinicotique, jnaꞌtic lec ti qꞌuexlal sbae.  
\v 15 Ti jech natic sjolic ti antsetique, jun yutsil. Yuꞌun jaꞌ smac sjol acꞌbilic ti jech natic ti sjole.  
\v 16 Pero mi oy buchꞌu mu lecuc ta xaꞌi ti vaꞌi sꞌelan ta xcal taje, acꞌo me snaꞌic ti muꞌyuc xa yan jtaleltic ti buꞌyuc noꞌox ta stsob sbaic ti jchꞌunolajeletique.   
\s1 Laj syanijesbeic smelol snaꞌobil ti Cajvaltique  
\p
\v 17 Ta jtsꞌibaboxuc talel ti juteb jcarta liꞌe ti ta xcalboxuc avaꞌiic ti mu ximuyubaj xa avuꞌunique. Yuꞌun ti cꞌalal ta xatsob abaique, maꞌuc ta xalecubic yuꞌun. Jaꞌ noꞌox ta xasoques abaic.  
\v 18 Yuꞌun oy bu liꞌalbat acꞌoplalic ti cꞌalal ta xatsob abaic ti ta xapasic snaꞌobil ti Cajvaltique, jeltos avoꞌntonic. Ta jchꞌun ti jech ta xapasique.  
\v 19 Yuꞌun ti jech jeltos avoꞌntonique, ta onoꞌox xcꞌot ta pasel ti ta xachꞌac abaique, yoꞌ jech ta xvinaj ti buchꞌu ti batsꞌi jchꞌunolajeletique.  
\v 20 Ti vaꞌi sꞌelan chaꞌchꞌacoxuque, yuꞌun maꞌuc xa ti snaꞌobil ti Cajvaltic ta xapasic ti cꞌalal ta xatsob abaique.  
\v 21 Cꞌalal ta sta xa yorail ti veꞌele, jujunoxuc ta xajelavic ta slajesel ti aveꞌelique. Ti yane tey stsꞌicoj viꞌnal ta xcom avuꞌunic. Ti yan xtoque oy bu ta xcꞌot ta pasel ti tey ta xyacube.  
\v 22 Ti jech ta xapasic taje, ¿mi yuꞌun muꞌyuc anaic ti tey ta xaveꞌic chavuchꞌic voꞌe? Ti jech ta xapasic taje, mu xavaqꞌuic ta venta ti junoxuc xa ta xayiloxuc ti Diose. Jaꞌ jech xtoc ta xavaqꞌuic ta qꞌuexlal ti quermanotic ti buchꞌutic muꞌyuc cꞌusi xꞌayan yuꞌunique. Ta jbel scꞌoplal mu xlocꞌ ta que ti ximuyubaj xa avuꞌunic ti jech ta xapasic taje.   
\s1 Jech ilic snaꞌobil ti Cajvaltique  
\r (Mt 26:26‑29; Mr 14:22‑25; Lc 22:14‑20)  
\p
\v 23 Jaꞌ stuc ti Cajvaltic laj yacꞌbun jnaꞌ ti cꞌu sꞌelan laj jchanubtasoxuque. Ti yacꞌobalil ti iꞌacꞌat ta cꞌabal ti Cajvaltic Jesuse, laj stsac ti pane.  
\v 24 Cꞌalal laj yalbe vocol ti Diose, laj xetꞌ ti pane. Jech laj yal: “Veꞌanic ti pan liꞌe. Jaꞌ ti jbecꞌtal ti ta xyayij ta sventa alequilalique. Jech me xapasic o, yoꞌ ta xavulesicun ta avoꞌntonic”, xi.  
\v 25 Jaꞌ jech xtoc ti cꞌalal laj yoꞌntonic ta veꞌele, ti Cajvaltic Jesuse laj stsac ti sbisol yaꞌlel uvae. Jech laj yal: “Ti yaꞌlel uva liꞌe, jaꞌ xa ti icꞌot ta pasel ti achꞌ trate ta sventa ti ta xmal ti jchꞌichꞌele. Ti jujun velta ti ta xavuchꞌique, pasic me yoꞌ ta xavulesicun ta avoꞌntonic”, xi.  
\v 26 Ti jech jujun velta ta xapasic snaꞌobil ti Cajvaltique, ti ta xaveꞌic ti pane, ti ta xavuchꞌic ti yaꞌlel uvae, jaꞌ ta xavaqꞌuic ta naꞌel ti icham ti Cristoe. Jech me xapasolanic o ti cꞌu sjalil mu to ta xtal ti Cajvaltique.   
\s1 Ti cꞌu sꞌelan ta pasel snaꞌobil ti Cajvaltique  
\p
\v 27 Jaꞌ yuꞌun un, buchꞌuuc noꞌox ta sveꞌ ti pane, ta xuchꞌ ti yaꞌlel uvae, jaꞌ ti snaꞌobil ti Cajvaltique, mi maꞌuc yichꞌel ta mucꞌ ti Dios ti jech ta spase, ta sta smul ti cꞌalal ta slajesbe sbecꞌtal schꞌichꞌel ti Cajvaltique.  
\v 28 Jech o xal ti cꞌalal mu to xlic jveꞌtic ti pane, ti ta xcuchꞌtic ti yaꞌlel uvae, jaꞌ ta scꞌan ti acꞌo caꞌi jbatic lec cꞌu sꞌelan ti snopobil cuꞌuntique.  
\v 29 Yuꞌun mi jaꞌ noꞌox ta jveꞌtic ti pane, ti ta xcuchꞌtic ti yaꞌlel uvae, pero mi mu jnoptic lec smelol ti jaꞌ iyayij sbecꞌtal ti Cajvaltique, jaꞌ noꞌox castigo ta jsaꞌtic ti jech ta jpastique.  
\v 30 Jech o xal un, ep ti jchameloxuque, ti lubul pichꞌil ti abecꞌtalique. Oy jlom lachamic xa.  
\v 31 Ti tauc jtucꞌulan jbatique, mu jechuc ta stsitsotic ti Cajvaltique.  
\v 32 Cꞌalal ta xil ti Cajvaltic ti mu jtucꞌulan jbatique, ta stsitsotic yoꞌ jech mu jmojuc ta xijbat ta chꞌayel schiꞌuc ti buchꞌutic ti ventainbilic yuꞌun ti sba banomile.   
\p
\v 33 Jech o xal un, ti cꞌalal ta xapasbeic snaꞌobil ti Cajvaltique, Quermanotac, malao abaic yoꞌ jech jmoj tsoboloxuc ta xaveꞌic.  
\v 34 Ti mi oy buchꞌu ta xviꞌnaje, acꞌo veꞌuc ta sna, yoꞌ jech mu xꞌacꞌbat tsitsel yuꞌun ti Diose ti toj yan o avoꞌntonic cꞌalal ta xatsob abaique. Ti cꞌusi yan ti ta scꞌan chapanele, jaꞌ to ta jchapan cꞌalal mi licꞌot ta atojolique.   
\c 12  
\s1 Ti jbijiltic ti ta xijyacꞌbotic ta jujuntal ti Chꞌul Espíritue  
\p
\v 1 Avi tana lie, Quermanotac, ta jcꞌan ta xcalboxuc avaꞌiic scꞌoplal ti jbijiltic ti yacꞌojbotic ti Chꞌul Espíritu ta jujun tale.  
\v 2 Xanaꞌic lec ti cꞌalal maꞌuc to ox jchꞌunolajeloxuque, jaꞌ noꞌox laj arioxinic ti cꞌusitic meltsanbil ta cꞌabal ti mu xcꞌopoje.  
\v 3 Ti buchꞌu ta xale: “Mu xtun ti Jesús”, ti xie, naꞌic me lec ti maꞌuc acꞌbil snaꞌ yuꞌun smucꞌul stsatsal ti Chꞌul Espíritu ti jech ta xale. Yan ti buchꞌu ta xale: “Jaꞌ Cajval ti Jesús”, ti xie, naꞌic me lec ti jaꞌ acꞌbil snaꞌ yuꞌun smucꞌul stsatsal ti Chꞌul Espíritu ti jech ta xale.  
\v 4 Ti jujun viniquetique yalel toyol ti sbijilic ta xꞌacꞌbatique. Pero jun noꞌox ti yajval ta xaqꞌue, jaꞌ ti Chꞌul Espíritue.  
\v 5 Yalel toyol ti cꞌu sꞌelan ta xijtunotique. Pero jun noꞌox ti Cajvaltic ti jech ta xijtun yuꞌune.  
\v 6 Yalel toyol ti cꞌusi xuꞌ cuꞌuntique. Pero jun noꞌox ti Dios ti jech yacꞌojbotique.  
\v 7 Jaꞌ stuc ti Dios ta xacꞌ iluc yabtel ti Chꞌul Espíritu ta jtojoltic ti jujun tale, yoꞌ jech ta jcoltaan jbatic.  
\v 8 Ta sventa ti Chꞌul Espíritue, oy jlom acꞌbilic sbijilic ti ta xalic ti cꞌusi ta scꞌan ti Dios ti ta jpastique. Oy jlom xtoc acꞌbilic sbijilic yuꞌun ti Chꞌul Espíritue ti ta xalbeic smelol ti cꞌusitic vocol ta aꞌyibel ti smelole. Jun noꞌox ti Chꞌul Espíritu ta xaqꞌue.  
\v 9 Oy jlom xtoc acꞌbilic sbijilic ta xchꞌunel ti Cajvaltique. Oy jlom xtoc acꞌbilic yipic ta scolesel ti jchameletique.  
\v 10 Oy jlom xtoc acꞌbilic sbijilic yoꞌ jech ta svinajesic smucꞌul stsatsal ti Diose. Oy jlom xtoc acꞌbilic sbijilic yoꞌ jech ta xalic ti cꞌusi ch-acꞌbat snaꞌic yuꞌun ti Diose. Ti jlom xtoque acꞌbilic sbijilic yuꞌun ti Diose ta yojtiquinel mi jaꞌ yabtel pucuj, o mi yabtel ti Chꞌul Espíritu ti cꞌusi ta xalique. Oy jlom xtoc acꞌbilic sbijilic ti xuꞌ ta xcꞌopojic ta yan cꞌopetique. Oy to jlom xtoc acꞌbilic sbijilic yoꞌ jech xuꞌ ta svinajesbe smelol ti cꞌusi laj yichꞌ alel ta yan cꞌopetique.  
\v 11 Scotol taje, jaꞌ yabtel stuc ti Chꞌul Espíritue, jaꞌ ti Buchꞌu ta xacꞌ ti yalel toyol jbijiltic ti cꞌu sꞌelan ta scꞌan stuque.   
\s1 Lijpas ta jun jcotoltic  
\p
\v 12 Ti jbecꞌtaltique jun noꞌox. Pero ep ta tos ti cꞌu sꞌelan stsacanojan sbae. Jaꞌ jechotic ec ti oyotic ta stojol ti Cristoe.  
\v 13 Manchuc mi jꞌisraelotic, mi jyanlumotic, mi mosovinbilotic, mi maꞌuc mosovinbilotic, pero cꞌalal laj quichꞌtic ti voꞌe, lijcꞌototic ta jun jcotoltic ta sventa ti jun noꞌox ti Chꞌul Espíritue. Jaꞌ jech xtoc laj quichꞌtic ti Chꞌul Espíritu jcotoltique.   
\p
\v 14 Ti jbecꞌtaltique mu jtosuc noꞌox. Yuꞌun ep ta tos stsacanojan sba.  
\v 15 Ti tauc xalbe sba ti oquile: “Ti vuꞌune moꞌcun ti cꞌobile, jech o xal maꞌuc cavil ti liꞌ oyune”, ti xiuque, pero tey onoꞌox tiqꞌuil un.  
\v 16 Ti tauc xalbe sba ti chiquinale: “Ti vuꞌune moꞌcun ti satile, jech o xal maꞌuc cavil ti liꞌ oyune”, ti xiuque, pero tey onoꞌox tiqꞌuil un.  
\v 17 Ti satiluc sjunul ti jbecꞌtaltique, ¿cꞌusi xcutic ta xcaꞌi ti cꞌope? Ti chiquinaluc sjunul ti jbecꞌtaltique, ¿cꞌusi xcutic ta xijtasicꞌtavan?  
\v 18 Pero jaꞌ stuc ti Diose laj xa saꞌbe yavil ti bu ta xcom jujutos ti jbecꞌtaltique.  
\v 19 Ti jtosuc noꞌoxe, chꞌabal yan jbecꞌtaltic ti jechuque.  
\v 20 Manchuc mi jech ep ta tos stsacanojan sba, pero jun noꞌox cꞌotem ti jbecꞌtaltique.   
\p
\v 21 Ti satile mu xuꞌ ta xalbe yaꞌi ti cꞌobile: “Ti voꞌote mu xatun cuꞌun”, ti xute. Jaꞌ jech xtoc ti jolile mu xuꞌ ta xalbe yaꞌi ti acanile: “Ti voꞌote mu xatun cuꞌun”, ti xute.  
\v 22 Yuꞌun ti bu mu xa másuc jtunel yilel yuꞌun ti jbecꞌtaltique, jaꞌ más jtunel.  
\v 23-24 Ti bu mu másuc lec ta qꞌuelel ti jbecꞌtaltique, jaꞌ ta jmactic ta cꞌuꞌil. Jaꞌ jech xtoc ti bu qꞌuexlal sba ta qꞌuelel ti jbecꞌtaltique, jaꞌ ta jmactic lec ta cꞌuꞌil, jaꞌ ti mu stacꞌ qꞌuelele, yuꞌun maꞌuc yelob osil. Jech laj spas jbecꞌtaltic ti Diose yoꞌ jech ichꞌbil ta mucꞌ ta xcꞌot ti bu xa mu másuc lec ta qꞌuelele.  
\v 25 Jech laj spas ti Diose, yoꞌ jech mu scrontain sbaic ti jujutos ti jbecꞌtaltique, yoꞌ jech comon ta scolta sbaic.  
\v 26 Mi oy bu jtos ta xichꞌ svocol ti jbecꞌtaltique, jech ti yane ta xichꞌ svocolic ec. Jaꞌ jech xtoc mi oy bu jtos ichꞌbil ta mucꞌ ti jbecꞌtaltique, scotolic xmuyubajic xa.   
\p
\v 27 Jaꞌ jech ti voꞌoxuque, sbecꞌtaloxuc ti Cristo cꞌotemoxuc yoꞌ jech ta xatunic yuꞌun ta jujun tale.  
\v 28 Jech o xal un, ti Diose laj xa svaꞌan yajꞌabteltac ta stojol ti jchꞌunolajeletique. Baꞌyel laj svaꞌan ti jcholcꞌopetique. Tsꞌacal to laj svaꞌan ti buchꞌutic ta xalic ti cꞌusi ch-acꞌbat snaꞌic yuꞌun ti Diose. Tsꞌacal to xtoc laj svaꞌan ti jchanubtasvanejetique schiꞌuc xtoc ti buchꞌutic ta xaqꞌuic ta ilel smucꞌul stsatsal ti Diose. Laj svaꞌan xtoc ti buchꞌutic ta scolesic jchameletique, ti buchꞌutic ta xcoltavanique, ti buchꞌutic ta xtojobtasvanique, ti buchꞌutic ta xcꞌopojic ta yan cꞌopetique.  
\v 29 Yuꞌun mu scotoluc ti jaꞌ jcholcꞌopetique. Mu scotoluc ta xalic ti cꞌusi ch-acꞌbat snaꞌic yuꞌun ti Diose. Mu scotoluc ti jaꞌ jchanubtasvanejetique. Mu scotoluc ta xaqꞌuic ta ilel smucꞌul stsatsal ti Diose.  
\v 30 Mu scotoluc ti ta xcol yuꞌunic ti jchameletique. Mu scotoluc ti ta xcꞌopojic ta yan cꞌopetique. Mu scotoluc ti xuꞌ ta xalbeic smelol ti cꞌusi ta xalic ta yan cꞌopetique.  
\v 31 Aqꞌuic persa ta yichꞌel ti abijilic ti bu más ta xtun ti ta xacꞌboxuc ti Diose. Pero oy to yan ti cꞌusi más to lec ta xcacꞌboxuc anaꞌique.   
\c 13  
\s1 Ti scꞌuxul oꞌntonale  
\p
\v 1 Manchuc mi xuꞌ ta xicꞌopoj ta yan cꞌopetique, manchuc mi coꞌol to sꞌelan scꞌopojel ángel ti ta xicꞌopoje, pero mi muꞌyuc scꞌuxul coꞌntone, coꞌol jꞌelan jech chac cꞌu chaꞌal ti tampol ti xtantun ta jech yepale. O mi moꞌoje, coꞌol jꞌelan jech chac cꞌu chaꞌal ti setset taqꞌuin ti xchijchune.  
\v 2 Manchuc mi xuꞌ cuꞌun ta yalel ti cꞌusi ta xiyacꞌbun jnaꞌ ti Diose, manchuc mi jnaꞌ yalel scotol ti cꞌusi mucul yuꞌun ti Diose, manchuc mi ven ti jbijil ta jꞌechꞌele, manchuc mi jchꞌunoj ta jꞌechꞌel ti xuꞌ ta jloqꞌues batel ta yavil ti bu oy ti vitse, pero mi muꞌyuc scꞌuxul coꞌntone, muꞌyuc cꞌusi balun o.  
\v 3 Manchuc mi ta jqꞌuelan scotol ti cꞌusi oy cuꞌune, manchuc mi ta xcacꞌ ta chiqꞌuel ti jbecꞌtal ta sventa scolel ti yane, pero mi muꞌyuc scꞌuxul coꞌntone, jecheꞌ, muꞌyuc cꞌusi ta jta o.   
\p
\v 4 Ti buchꞌu oy scꞌuxul yoꞌntone stsꞌic yuꞌun scotol. Oy slequilal yoꞌnton. Maꞌuc itꞌix oꞌnton. Mu xacꞌ sba ta ichꞌel ta mucꞌ. Maꞌuc toyobba.  
\v 5 Maꞌuc ta spas ti mu xichꞌ smelol xcꞌopoje. Maꞌuc ta scꞌan ti jaꞌ noꞌox lec oy ti stuque. Mu xꞌilin. Mu teyuc xchabioj scꞌacꞌal yoꞌnton.  
\v 6 Mu xmuyubaj xa yuꞌun ti ta sta smul ti yane. Jaꞌ noꞌox xmuyubaj xa yuꞌun ti acꞌo sta slequilal ti Diose.   
\p
\v 7 Ti buchꞌu oy scꞌuxul yoꞌntone, cꞌuc noꞌox sꞌelan stalel ti schiꞌile, xcuch yuꞌun scotol. Yuꞌun oy smucꞌul yoꞌnton, spatoj yoꞌnton, smalaoj ti oy cꞌusi lec ta stae.  
\v 8 Ti scꞌuxul oꞌntonale, mu snaꞌ xlaj. Pero ti jbijiltique, ta sta yorail ti ta xꞌech scꞌoplale, ti muꞌyuc xa buchꞌu ta xal ti cꞌusi ch-acꞌbat snaꞌ yuꞌun ti Diose, ti muꞌyuc xa buchꞌu ta xcꞌopoj ta yan cꞌopetique.  
\v 9 Yuꞌun ti cꞌusi ta jnaꞌtic yuꞌun ti Diose, mu scotoluc. Ti ta xcaltic ti scꞌope, mu jnaꞌtic lec scotol.  
\v 10 Pero cꞌalal ta sta yorail ti ta xcojtiquintic scotole, tey echꞌ scꞌoplal ti cꞌusi jnaꞌtic jutuque.   
\p
\v 11 Cꞌalal ololun to oxe, jech ta xicꞌopoj, jech ta jnop jech chac cꞌu chaꞌal ta spas ti olole. Pero ti cꞌalal lipas ta vinique, laj quicta comel ti stalel olol ta jpase.  
\v 12 Jaꞌ jechotic avi tana liꞌe. Yuꞌun mu xquiltic lec ti cꞌusitic jaꞌ yuꞌun ti Diose. Coꞌol sꞌelan ti ta jqꞌuel jsatic ta nen ti oy ta queovaltique. Pero tsꞌacal to ta xquiltic lec ti cꞌalal ta sta yoraile. Yan liꞌe, jutuc noꞌox ta jnaꞌbetic smelol. Pero ta sta yorail ti ta xcojtiquintic scotol jech chac cꞌu chaꞌal ta xijyojtiquinotic ti Diose.  
\v 13 Jaꞌ yuꞌun un, oxib ti cꞌusi mu snaꞌ xlaj sbatel osile, jaꞌ ti jchꞌunojtic ti Cajvaltique, ti patob oꞌntonale, ti scꞌuxul oꞌntonale. Ti oxtos taje, oy jun ti más tsots scꞌoplale, jaꞌ ti scꞌuxul oꞌntonale.   
\c 14  
\s1 Ti cꞌopojel ta yan cꞌope  
\p
\v 1 Jech o xal un, aqꞌuic persa ti ayanuc ti scꞌuxul avoꞌntonique. Jaꞌ jech xtoc, cꞌanic ti achꞌul-bijilic ti ta xacꞌboxuc ti Diose. Ti tsots scꞌoplal ti ta xacꞌanique, jaꞌ ti ta xavalic ti cꞌusi ta xaꞌacꞌbat anaꞌic yuꞌun ti Diose.  
\v 2 Ti buchꞌu ta xcꞌopoj ta yan cꞌopetique, jaꞌ ta scꞌopon sba schiꞌuc ti Diose. Maꞌuc ta scꞌoponan ti cristianoetique. Muꞌyuc buchꞌu ta xaꞌibe smelol ti cꞌusi ta xale. Yuꞌun yan cꞌop ti mu aꞌyibaj smelol ti cꞌusi ta xal ta sventa ti Chꞌul Espíritue.  
\v 3 Pero ti buchꞌu ta xal ti cꞌusi ta xꞌacꞌbat snaꞌ yuꞌun ti Diose, jech ta xcꞌopoj yoꞌ ta sjambe sat, ta stsatsubtasbe yoꞌntonic, ta spatbe yoꞌntonic ti yane.  
\v 4 Ti buchꞌu ta xcꞌopoj ta yan cꞌopetique, jaꞌ noꞌox ta stsꞌites sba stuc. Yan ti buchꞌu ta xal ti cꞌusi ta xꞌacꞌbat snaꞌ yuꞌun ti Diose, jaꞌ ta stsꞌites scotol ti jchꞌunolajeletique.   
\p
\v 5 Jcꞌanuc caꞌi ti acotolicuc ti xuꞌuc avuꞌunic ta xacꞌopojic ta yan cꞌopetique. Pero jaꞌ más tsots scꞌoplal ta xcaꞌi ti xuꞌuc avuꞌunic ti ta xavalic ti cꞌusi ta xaꞌacꞌbat anaꞌic yuꞌun ti Diose. Jaꞌ más lec ti jechuque. Jaꞌ mu sta ti ta xacꞌopojic ta yan cꞌopetique. Yan ti mi oy buchꞌu ta xalbe smelol ti cꞌusi ta xavalic ta yan cꞌopetique, lec, yuꞌun jech ta xjam sba satic ti jchꞌunolajeletique.  
\v 6 Jech o xal un, Quermanotac, cꞌalal ta jvuꞌlanoxuque, ti mi jaꞌ noꞌox ta xicꞌopoj ta yan cꞌopetique, ¿cꞌusi bal o? ¿Cꞌusi xtun o avuꞌnic cꞌalal mu xavaꞌibeic ti smelole? Pero mi ta xcalboxuc avaꞌiic ta acꞌop atuquic ti cꞌusi liꞌacꞌbat jnaꞌ yuꞌun ti Diose, ti mi ta xcalboxuc avaꞌiic ti oy cꞌusi ta xcꞌot ta pasel yuꞌun ti Diose, ti mi ta xcalboxuc avaꞌiic ti cꞌu sꞌelan ta scꞌan ti Dios ti ta jpastique, ta melel umbi, bal. Xloc venta. Xtun avuꞌunic.   
\p
\v 7 Caltic noꞌox avaꞌiic liꞌe jech chac cꞌu chaꞌal ti musicae. Ti amae, ti arpae ti chꞌabal scuxlejale, mi muꞌyuc smelol ta xichꞌ tijele, ta xichꞌ oqꞌuisanele, mu xvinaj cꞌusi qꞌuejojal ta sliquesic.  
\v 8 Jaꞌ jech xtoc yoqꞌues ti soldadoetique. Mi muꞌyuc smelol ta xichꞌ oqꞌuisanele, mu snaꞌ cꞌu sꞌelan ta xchapan sbaic ta pas leto ti soldadoetique.  
\v 9 Jaꞌ jech ti voꞌoxuc eque, mi jaꞌ noꞌox ta xacꞌopojic ta yan cꞌopetic ti mu stacꞌ aꞌyiel ti smelole, muꞌyuc buchꞌu xuꞌ ta xaꞌi ti cꞌusi ta xavalique. Jecheꞌ noꞌox ta xaloꞌilajic.  
\v 10 Ta melel avaꞌuquic, oy ep ta tos cꞌopetic liꞌ ta sba banomile. Scotol oy smelol.  
\v 11 Ti mi oy buchꞌu ta xiscꞌopon ta yan cꞌop ti mu xcaꞌie, coꞌol schiꞌuc jyanlumun ta stojol ti buchꞌu jech ta xiscoponune. Jaꞌ jech ti stuque coꞌol sꞌelan jyanlum ta jtojol ec.  
\v 12 Jech o xal un, ti mi oy ta avoꞌntonic ti ta xacꞌanic abijilic ti ta xaꞌacꞌbatique, jaꞌ me cꞌanic abijilic yoꞌ jech xuꞌ ta xajambe sba sat ti jchꞌunolajeletique, yoꞌ jech ta xchꞌiic.   
\p
\v 13 Jech o xal un, ti buchꞌu ta xcꞌopoj ta yan cꞌope, acꞌo scꞌanbe sbijil ti Diose yoꞌ jech xuꞌ ta svinajesbe smelol ti cꞌusi ta xal ta yan cꞌope.  
\v 14 Yuꞌun mi ta jta ta cꞌoponel ti Dios ta yan cꞌopetique, melel ta scꞌopon Dios ti coꞌntone. ¡Cꞌu stu un! mu xcaꞌibe smelol ti cꞌusi ta xcale.  
\v 15 ¿Cꞌusi scꞌan ta jpas un chaꞌe? Ta jcꞌopon Dios ta yan cꞌop ta sventa ti Chꞌul Espíritue. Jaꞌ jech xtoc ta jcꞌopon Dios ta jcꞌop jtuc yoꞌ jech ta xvinaj smelol. Ta xiqꞌuejin ta yan cꞌop. Jaꞌ jech xtoc ta xiqꞌuejin ta jcꞌop jtuc yoꞌ jech ta xvinaj smelol.  
\v 16 Yan ti mi jaꞌ noꞌox ta xalequil-cꞌopon ti Dios ta yan cꞌope, jech ti buchꞌu tey ta xaꞌie, mu xuꞌ ta xchiꞌinot ta scꞌoponel ti Diose, jaꞌ ti mu xaꞌi ti cꞌusi ta xavale.  
\v 17 Cꞌalal ta xata ta cꞌoponel ti Dios ta yan cꞌope, xuꞌ nan ti jun yutsile. ¡Cꞌu stu un! muꞌyuc cꞌusi ta staic o ti yane.  
\v 18 Coliyalbun ti Diose ti jech xuꞌ cuꞌun ti ta xicꞌopoj ta yan cꞌopetique, ti jaꞌ mu sta ti voꞌoxuque.  
\v 19 Pero cꞌalal oyun ta tsobobbail schiꞌuc ti jchꞌunolajeletique, altic ti ta xcal lajunmil ta bel yan cꞌop ti mu aꞌyibaj ti smelole. Jaꞌ más lec ta xcaꞌi, acꞌo mi voꞌbel noꞌox cꞌop ti ta xaꞌibeic ti smelole, yoꞌ jech ta staic chanubtasel ti yane.   
\p
\v 20 Quermanotac, mu me snopbenuc ololetic ti cꞌusi ta xanopique. Yoꞌntonuc me ololetic sꞌelan ti avoꞌntonic ta stojol ti chopole. Pero snopbenuc me yijil viniquetic ti cꞌusi ta xanopique.  
\v 21 Yuꞌun jech tsꞌibabil ta scꞌop Dios sventa ti mantale: “Ta jcꞌopon ta yan cꞌop ti jteclum liꞌe ta sventa ti jyanlumetique. Acꞌo mi jech ta xilic, pero mu xichꞌic ta mucꞌ”, xi ti Cajvaltic Diose.  
\v 22 Ti jech acꞌbil jbijiltic ti ta xijcꞌopoj ta yan cꞌopetique, jaꞌ ta xtun yoꞌ ta svinajes ti buchꞌutic maꞌuc jchꞌunolajeletique, maꞌuc ti buchꞌu jchꞌunolajeletique. Pero ti jbijiltic ti ta xcaltic ti cꞌusi acꞌbil jnaꞌtic yuꞌun ti Diose, jaꞌ ta xtun yoꞌ ta svinajes ti buchꞌu jchꞌunolajeletique, maꞌuc ti buchꞌu mu xchꞌunique.  
\v 23 Mi acotolic ta xacꞌopojic ta yan cꞌopetic ti cꞌalal tsoboloxuque, chuvajibemic leꞌe, xi ta xalic ti buchꞌu muꞌyuc xchꞌunojic ti ta xꞌochic talele.  
\v 24 Pero mi acotolic ta xavalbe abaic smelol ti cꞌusi laꞌacꞌbat anaꞌic yuꞌun ti Diose, cꞌalal tey ta xꞌoch batel ti maꞌuc jchꞌunolajele, ta xaꞌi ti cꞌusi ta xavalique. Jaꞌ yuꞌun un, ti stuque tey ta xlic yaꞌi sba ti oy smule.  
\v 25 Ti cꞌusi oy ta yut yoꞌntone, tey ta svinajesbat yuꞌun ti cꞌusi ta xavalique. Jech o xal un, ta xlic squejan sba ta yichꞌel ta mucꞌ ti Diose. Tey chlic yal ti tey oy ti Dios ta atojolique.   
\s1 Oyuc smelol scotol ti cꞌusi ta xapasic ti cꞌalal tsoboloxuque  
\p
\v 26 Jech me xapasic jech chac cꞌu chaꞌal liꞌe, Quermanotac: Cꞌalal ta xatsob abaique, lec ti oy jlom avuꞌunic ta xqꞌuejinique, ti ta xchanubtasvane, ti ta xal cꞌusi ch-acꞌbat snaꞌ yuꞌun ti Diose, ti oy cꞌusi ta xal ta yan cꞌopetique, ti ta svinajesbe smelol ti cꞌusi laj yichꞌ alele. Pero jaꞌuc me ta sventa yoꞌ jech ta xchꞌi ti jchꞌunolajeletique.  
\v 27 Ti mi oy buchꞌu ta xcꞌopoj ta yan cꞌopetique, xuꞌ ta svaꞌan sbaic chib, o mi oxib. Pero ta jujun tal ta xꞌechꞌic. Jaꞌ jech xtoc ta scꞌan ti oy buchꞌu ta xalbe smelol ti cꞌusi laj yalic ti ta yan cꞌope.  
\v 28 Yan ti mi muꞌyuc buchꞌu xuꞌ ta svinajesbe smelol ti cꞌusi laj yalic ta yan cꞌope, jaꞌ lec ti mu me buchꞌu ta xcꞌopoj ta yan cꞌop ti cꞌalal tsoboloxuque. Mi moꞌoje, acꞌo loꞌilajuc schiꞌuc ti Dios ta yoꞌnton stuque.  
\v 29 Jaꞌ jech xtoc ti buchꞌutic ta xalic ti cꞌusi iꞌacꞌbat snaꞌic yuꞌun ti Diose, acꞌo cꞌopojicuc chib, o mi oxib. Jaꞌ jech xtoc ti buchꞌutic laj yaꞌiique, acꞌo snopilan lec ti cꞌusi laj yichꞌ alele.  
\v 30 Yan ti mi oy cꞌusi iꞌacꞌbat snaꞌ yuꞌun ti Dios ti buchꞌu chotole, jech ti buchꞌu ta xcꞌopoj to oxe, acꞌo to spajtsan sba.  
\v 31 Jech o xal un, ti voꞌoxuque ti mi oy cꞌusi laꞌacꞌbat anaꞌic yuꞌun ti Diose, xuꞌ ta xavalic ta jujun tal, yoꞌ jech acotolic ta xachanic, ta xatsatsubtasbe aba avoꞌntonic.  
\v 32 Jech ti buchꞌu oy cꞌusi ta xꞌacꞌbat snaꞌ yuꞌun ti Diose, acꞌo smala ora.  
\v 33 Yuꞌun ti Diose mu lecuc ta xil ti vochvoch cꞌope. Ti Diose jaꞌ ta scꞌan ti jun coꞌntontique.  
\p Jech me xapasic jech chac cꞌu chaꞌal ta spasic ti jchꞌunolajeletic ti buꞌyuc noꞌox ta stsob sbaique.  
\v 34 Jech o xal ti antsetique, mu me xtuchꞌ ta be ti cꞌop ti cꞌalal oyic ta tsobobbaile. Yuꞌun mu xuꞌ ti jech ta spasique. Yuꞌun jaꞌ ta scꞌan ti acꞌo snijan xchiman sbaic jech chac cꞌu chaꞌal ti ta xal smantal ti Diose.  
\v 35 Yuꞌun mi oy cꞌusi ta scꞌan ta sjacꞌ yaꞌie, acꞌo sjacꞌbe ti smalal cꞌalal oy xa ta snaique. Yuꞌun ti jech ta xtuchꞌ ta be cꞌop ti ants ti ta tsobobbaile, mu lecuc ta qꞌuelel.   
\p
\v 36 Vuleso me ta ajolic ti maꞌuc tey ilic ta atojolic ti scꞌop Diose. Jaꞌ jech xtoc maꞌuc noꞌox atuquic ti laj achꞌunic ti scꞌop Diose.  
\v 37 Mi oy buchꞌu xchꞌunoj ti jaꞌ acꞌbil sbijil ti xuꞌ yuꞌun ta xal ti cꞌusi ch-acꞌbat snaꞌ yuꞌun ti Diose, mi xchꞌunoj ti jaꞌ tojobtasbil yuꞌun ti Chꞌul Espíritu yaloje, acꞌo yaꞌi ti jaꞌ me smantal ti Cajvaltic ti jech ta jtsꞌibaboxuc talel ti jcarta liꞌe.  
\v 38 Mi mu xacꞌ ta venta ti cꞌusi laj jtsꞌibaboxuque, jaꞌ jech ti stuque, mu me xavaqꞌuic ta venta ec.   
\p
\v 39 Jech o xal un, Quermanotac, aqꞌuic persa yoꞌ xuꞌ avuꞌunic ta yalel ti cꞌusi ta xaꞌacꞌbat anaꞌic yuꞌun ti Diose. Jaꞌ jech xtoc ti buchꞌu ta xcꞌopoj ta yan cꞌopetique, mu me xamacbeic yoꞌnton.  
\v 40 Pero oyuc me smelol scotol ti cꞌusi ta xapasique.   
\c 15  
\s1 Ti schaꞌcuxiebal ti Cristoe  
\p
\v 1 Avi tana liꞌe, Quermanotac, ta jcꞌan ti ta xavules ta avoꞌntonic ti colebal lequil achꞌ cꞌop ti laj calboxuque, ti laj achꞌunique, ti staoj yav jun avoꞌntonic ta stojole.  
\v 2 Jaꞌ jech xtoc ta sventa ti lequil achꞌ cꞌope jaꞌ lacolic yuꞌun, ti mi staoj yav achꞌunojic ti cꞌusi laj calboxuc avaꞌiique, ti mu jecheꞌuc noꞌox ti achꞌunojique.   
\p
\v 3 Yuꞌun jaꞌ baꞌyel laj calboxuc avaꞌiic ti cꞌu sꞌelan liꞌacꞌbat jnae. Yuꞌun laj jchanubtasoxuc ti icham ti Cristo ta scoj ti jmultique jech chac cꞌu chaꞌal ti ta xal ti tsꞌibabil ta scꞌop Diose.  
\v 4 Laj calboxuc ti laj yichꞌ muquele, ti ichaꞌcuxi ta yoxibal cꞌacꞌal jech chac cꞌu chaꞌal ta xal ti tsꞌibabil ta scꞌop Diose.  
\v 5 Laj calboxuc xtoc ti baꞌyel tey laj yacꞌ sba iluc ta stojol ti Pedroe. Tsꞌacal to un, laj yacꞌ sba iluc ta stojol ti yan yajcholcꞌoptaque.  
\v 6 Tsꞌacal to tey laj yacꞌ sba iluc ta stojol más ta voꞌob cien (500) ti jchꞌunolajeletique. Oy to ep ti cuxajtique. Oy jlom chamic xa.  
\v 7 Jaꞌ jech xtoc tey laj yacꞌ sba iluc ta stojol ti Jacoboe. Tsꞌacal to un, tey laj yacꞌ sba iluc ta stojol scotol ti jcholcꞌopetic yuꞌune.   
\p
\v 8 Ta slajeb xa un, laj yacꞌ sba iluc ta jtojol ti vuꞌune ti coꞌol sꞌelan chꞌabal tsꞌacal cuꞌal livoqꞌue.  
\v 9 Yuꞌun ti vuꞌune jaꞌ ti más pequelun yuꞌun ti yan jcholcꞌopetique. Altic ti jech jbiinoj ti jcholcꞌopune, yuꞌun laj quilbajin ti jchꞌunolajeletic yuꞌun ti Diose.  
\v 10 Pero ti vi jꞌelan tana liꞌe, yuꞌun laj xcꞌuxubinun ti Diose. Ti scꞌuxul yoꞌnton Dios ta jtojole, mu jecheꞌuc ichꞌay. Yuꞌun ti vuꞌune ep xa liꞌabtej ta sventa ti Cajvaltique. Jaꞌ mu sta iꞌabtejic ti yane. Ti vaꞌi sꞌelan ta xcal ti ep xa liꞌabtej yuꞌun ti Cajvaltique, maꞌuc ta jtsatsal jtuc. Yuꞌun laj xchiꞌinun ti Dios ta sventa ti cꞌuxun ta yoꞌntone.  
\v 11 Pero muꞌyuc ta alel mi vuꞌun, mi jaꞌ ti yan jcholcꞌopetique, pero jmoj ti lequil achꞌ cꞌop ti ta xcalcutique, ti jaꞌ achꞌunojique.   
\s1 Ti schaꞌcuxiebalic ti animaetique  
\p
\v 12 Ti jech ta xcalcutic ti ichaꞌcuxi ti Cristoe, ¿cꞌu chaꞌal ti ta xalic jlom avuꞌunic ti muꞌyuc ta xchaꞌcuxiic ti animaetique?  
\v 13 Ti muꞌyucuc ta xchaꞌcuxiic ti animaetique, mi jaꞌuc ichaꞌcuxi ti Cristo jechuque.  
\v 14 Ti mi muꞌyuc ichaꞌcuxi ti Cristoe, jech ti lequil achꞌ cꞌop ti ta xcalcutique, jecheꞌ noꞌox. Muꞌyuc cꞌusi bal o ti achꞌunojique.  
\v 15 Ti mi jech taje, jutcꞌop cꞌotemuncutic ta stojol ti Diose. Yuꞌun laj xa jcalcutic ti ichaꞌcuxesat yuꞌun Dios ti Cristoe. Mi mu meleluc ti ta xchaꞌcuxi ti animaetique, jaꞌ jech xtoc umbi, mu meleluc ti ichaꞌcuxesat yuꞌun Dios ti Cristoe. Jutbil ti jechuque.  
\v 16 Yuꞌun mi muꞌyuc ta xchaꞌcuxesat ti animaetique, jaꞌ jech xtoc muꞌyuc laj yichꞌ chaꞌcuxesel ti Cristo stuc jechuque.  
\v 17 Ti muꞌyucuc laj yichꞌ chaꞌcuxesel ti Cristoe, muꞌyuc cꞌusi bal o ti jech achꞌunojique. Staoj to yav ti acuchoj ti amulic jechuque.  
\v 18 Ti mi jech taje, jech xtoc ti buchꞌutic xchꞌunojic ti Cristo ichamic xae, chꞌayel ibat ti jechuque.  
\v 19 Ti mi jaꞌ noꞌox jpatoj coꞌntontic yuꞌun ti Cristo ti jayib cꞌacꞌal ta xijcuxi liꞌ ta banomile, jcotoltic toj abol jbatic ta jꞌechꞌel. Jaꞌ mu sta ti yane.   
\p
\v 20 Ta melel, laj yichꞌ chaꞌcuxesel ti Cristoe. Jaꞌ sliquebal ti chaꞌcuxesel yuꞌun ti animaetic ti jech onoꞌox scꞌoplal ta xchaꞌcuxiique.  
\v 21 Ti jech ta xijchamotic liꞌ ta sba banomile, ilic ta scoj jun vinic. Jaꞌ jech xtoc ti jech ta xijchaꞌcuxiotique, ilic ta sventa jun vinic.  
\v 22 Ti jech jcotoltic ti ta xijchamotique, jaꞌ ti tey lijꞌayanotic talel ta stojol ti Adane. Ti jech ta xijcuxiotique, jaꞌ ta sventa ti lijvocꞌotic yuꞌun ti Cristoe.  
\v 23 Ti chaꞌcuxiebale jech liꞌe: Ti Cristoe jaꞌ sliquebal ti chaꞌcuxesel yuꞌun ti animaetique. Cꞌalal mi tal ti Cristoe, ta xchaꞌcuxesat ti buchꞌutic jaꞌ yuꞌuntaque.  
\v 24 Ti jech taje, jaꞌ o ti slajeb cꞌacꞌale, cꞌalal ti Cristo ta xacꞌbe ta yoc ta scꞌob ti Jtotic Diose scotol ti cristianoetic ti ventainbilique. Yuꞌun ti Cristoe laj xa spas ta canal scotol ti yajcrontae, jaꞌ ti pucujetic ti oy ta vinajele, ti ajvaliletic liꞌe.  
\v 25 Pero ti Cristoe yacal to ta xisventainotic, jaꞌ to ti mi iꞌacꞌbat ta yoc ta scꞌob scotol ti yajcronta yuꞌun ti Diose.  
\v 26 Ti slajeb yajcronta ti Cristo ti ta stubbe scꞌoplale, jaꞌ ti chamebale.  
\v 27 Scotol ti cꞌusitic oye, iꞌacꞌbat ta yocꞌ ta scꞌob ti Cristo yuꞌun ti Diose. Pero ti vaꞌi sꞌelan ta xal ti scꞌop Dios ti scotol acꞌbil ta yoc ta scꞌobe, mu teyuc ochem ta venta ti Diose. Yuꞌun jaꞌ stuc ti Diose yacꞌojbe scotol ta yoc ta scꞌob ti Cristoe.  
\v 28 Cꞌalal mi tsalbil xa yuꞌun ti Cristo scotol ti cꞌusitic oye, jech ti Cristo ti jaꞌ Nichꞌonile, ta xacꞌ sba ta yoc ta scꞌob ti Diose. Jaꞌ ti iꞌacꞌbat baꞌyel ta yoc ta scꞌob scotol ti cꞌusitic oye. Jech o xal un, jaꞌ ta xcꞌot ta Dios yuꞌunic scotol ti cꞌusitic oye.   
\p
\v 29 Caꞌyioj ti oy buchꞌu ta slocꞌtaic ta yichꞌel voꞌ ti buchꞌu muꞌyuc yichꞌoj voꞌ ichame. ¿Cꞌu chaꞌal jech ta spasic xanaꞌ? ¿Cꞌu chaꞌal oy jlom cristianoetic ti ta slocꞌtaic ta yichꞌel voꞌ ti mi muꞌyuc ta xchaꞌcuxi ti animaetique?   
\p
\v 30 ¿Cꞌu chaꞌal ti jech cacꞌoj jbatic ta ichꞌ vocol scotol cꞌacꞌal ti mi mu jechuque?  
\v 31 Ti vuꞌune scotol cꞌacꞌal oyun ta vocol ti xuꞌ ta xquichꞌ ta jꞌechꞌel oe. Ti jech taje, Quermanotac, melel onoꞌox jech chac cꞌu chaꞌal ti ximuyubaj xa ti jaꞌ jchꞌunolajeloxuc xa yuꞌun ti Cajvaltic Jesucristoe.  
\v 32 Ti jech laj calboxuc ti vaꞌi sꞌelan taje, yuꞌun laj xa quichꞌ vocol yuꞌun ti cristianoetic liꞌ ta jteclum Efeseo ti coꞌol sꞌelan ti jtiꞌoval chonetique. Pero, ¿cꞌusi ta jta yuꞌun jech taje? Ti jechuc ta melel ti mu xchaꞌcuxi ti animaetique, oy srazonic ti jech ta xalic ti yane: “Veꞌcutic, cuchꞌtic voꞌ. Yuꞌun mi lijcham ocꞌome, mu xa xtal veꞌcutic”, ti xiique.   
\p
\v 33 Mu xavacꞌ abaic ta loꞌlael: “Ti mi ta xachiꞌinic ti jchopol-joletique, ta soques ti cꞌusi lec achꞌunojique”, xi me xꞌale ti cꞌop xavaꞌiique.  
\v 34 Chaꞌtamic lec ti cuxlejale. Mu xasaꞌ amulic. Yuꞌun oy jlom avuꞌunic ti mu xojtiquinic ti Diose. Ti jech ta xcalboxuc taje, yoꞌ jech xaqꞌuexavic.   
\s1 Ti cꞌu sꞌelan ta xchaꞌcuxi ti animaetique  
\p
\v 35 Oy nan jlom ti jech ta sjaqꞌuique: “¿Cꞌusi xut ti ta xchaꞌcuxi ti animaetique? ¿Cꞌu sꞌelan ta xichꞌ ti sbecꞌtalique?”, ti xiique.  
\v 36 Toj bolat ti buchꞌu jech ta sjaqꞌuique. Ti cꞌalal ta xichꞌ tsꞌunel ti jun tsꞌunubile, jech ti tsꞌunubil taje persa ta xcꞌaꞌ yoꞌ jech ta xchꞌi ta xcuxi talel ti tsꞌunobale.  
\v 37 Ti tsꞌunubil ti ta xichꞌ tsꞌunele, maꞌuc ti cꞌusi teqꞌuel xae, jaꞌ ti sate, mi jaꞌ ti trigoe, o mi yan tsꞌunubile.  
\v 38 Tsꞌacal to un, ti cꞌu sꞌelan ta scꞌan ti Diose, ta xacꞌbe sbecꞌtal ti cꞌu sꞌelan yichꞌoj jujutos ti tsꞌunobaletique.  
\v 39 Jaꞌ noꞌox jech ti voꞌotic eque, ti jbecꞌtaltique mu xcoꞌolaj schiꞌuc sbecꞌtal ti cꞌusitic xcotlajan ta banomile. Yan o sbecꞌtal ti cristianoetique. Yan o sbectal ti cꞌusitic xcotlajan ta banomile. Yan o sbectal ti mutetique. Yan o sbectal ti choyetique.  
\v 40 Jaꞌ jech xtoc ti cꞌusitic oy ta vinajele, mu xcoꞌolaj schiꞌuc ti cꞌusitic liꞌ ta banomile. Ti cꞌusitic oy ta vinajele, yan o sꞌelan ti yutsile. Ti cꞌusitic oy ta banomile, yan o sꞌelan ti yutsile.  
\v 41 Ti xojobal ti cꞌacꞌale, mu xcoꞌolaj schiꞌuc xojobal ti ue. Ti xojobal ue, mu xcoꞌolaj schiꞌuc xojobal ti cꞌanaletique. Jaꞌ jech xtoc ti cꞌanaletique, yalel toyol ti xojobale. Mu xcoꞌolaj ti xojobal scotolique.  
\v 42 Jaꞌ jech sꞌelan ta xcꞌot ta jtojoltic ti cꞌalal ta xijchaꞌcuxie. Ti jbecꞌtaltic ti ta xichꞌ muquele, ta xcꞌaꞌ. Pero ti cꞌalal jech ta xchaꞌcuxie, mu xa xcham.  
\v 43 Ta xichꞌ muquel ti jbecꞌtaltic ti mu xtune. Pero jun xa yutsil ta xchaꞌcuxi talel. Cꞌun ti jbecꞌtaltic ti ta xichꞌ muquele. Pero ti cꞌalal ta xchaꞌcuxi talele, xuꞌ xa yuꞌun.  
\v 44 Ti jbecꞌtaltic ti ta xichꞌ muquele, sba banomil noꞌox. Cꞌalal ta xchaꞌcuxie, jaꞌ sventa sbatel osil. Ti jech oy jbecꞌtaltic sventa sba banomile, jaꞌ jech xtoc oy jbecꞌtaltic sventa sbatel osil.   
\p
\v 45 Yuꞌun jech ta xal ti tsꞌibabil ta scꞌop Diose: “Ti sba vinic Adane iꞌacꞌbat schꞌulel, icuxi liꞌ ta banomile”, xi. Pero ti schibal Adane jaꞌ stuc ta xacꞌbotic ti jcuxlejaltic sventa sbatel osile, yuꞌun stalel o ti cuxule.  
\v 46 Pero maꞌuc baꞌyel ta xquichꞌtic ti jcuxlejaltic sventa sbatel osile. Jaꞌ baꞌyel ta xquichꞌtic ti jcuxlejaltic liꞌ ta banomile. Tsꞌacal to un, ta xquichꞌtic ti jcuxlejaltic sventa sbatel osile.  
\v 47 Ti sba vinic ti pasbil ta lume, sba banomil noꞌox. Yan ti schibal vinique, jaꞌ ti Cajvaltique, liquem tal ta vinajel.  
\v 48 Ti jbecꞌtaltic ti quichꞌojtic liꞌ ta sba banomile, lum achꞌel onoꞌox jech chac cꞌu chaꞌal ti sba vinic ti imeltsanat ta lum achꞌele. Yan ti jbecꞌtaltic ti ta xquichꞌtic sventa vinajele, coꞌol sꞌelan jech chac cꞌu chaꞌal achꞌ sbecꞌtal ti Cristo ti liquem talel ta vinajele.  
\v 49 Ti jech sꞌelan laj quichꞌtic jbecꞌtaltic jech chac cꞌu chaꞌal ti sliqueb vinic ti pasbil ta lum achꞌele, jech ta jtatic xtoc jech chac cꞌu chaꞌal ti Cristo ti oy ta vinajele.   
\p
\v 50 Ta jcꞌan ta xcalboxuc avaꞌiic, Quermanotac, ti bu ta xventainvan ti Diose, mu xuꞌ ta xijꞌoch batel schiꞌuc ti jbecꞌtaltique. Yuꞌun ti cꞌusi snaꞌ xlaje, mu xuꞌ ta scoꞌoltas sba schiꞌuc ti cꞌusi mu snaꞌ xlaj sbatel osile.  
\v 51 Oy cꞌusi mucul to ti ta jcꞌan ta xcacꞌ anaꞌique. Mu jcotolticuc chamemotic xa ox ti ta xtal ti Cajvaltique. Pero jcotoltic ta xquichꞌtic jeltael  
\v 52 ta uni jliquel noꞌox coꞌol sꞌelan jech chac cꞌu chaꞌal ta jvicꞌ ta jmutsꞌ ti jsatique ti cꞌalal ta xichꞌ oqꞌuisanel slajeb yoqꞌuisanel ti oqꞌuese. Ti cꞌalal ta xꞌocꞌ ti oqꞌuese, jech ti animaetique ta xichꞌic chaꞌcuxesel yoꞌ jech mu xa xchamic o. Yan ti mi cuxulotic toe, ta xquichꞌtic jeltael.  
\v 53 Yuꞌun ti jbecꞌtaltic ti liꞌ quichꞌojtic ti mu jaluc cuxule, tsots scꞌoplal ti ta xquichꞌtic yan jbecꞌtaltic ti jaꞌ sventa sbatel osile. Ti jbecꞌtaltic ti snaꞌ xchame, tsots scꞌoplal ta xquichꞌtic yan jbecꞌtaltic ti mu snaꞌ xchame.  
\v 54 Cꞌalal mi laj xa yichꞌ achꞌubtasel ti jbecꞌtaltic ti snaꞌ xcham xcꞌaꞌe, jaꞌ xa icꞌot ta pasel jech chac cꞌu chaꞌal ta xal ti scꞌop Diose: “Ti chamebale, pasat xa ta canal, tub xa scꞌoplal.  
\v 55 ¡Ooo! lajebal, chamebal, ¿bu oy ibat ti avip ti ta xichamcutic avuꞌune? ¿Bu ibat avuꞌun ti apasoj xa ox canal yilele?”, ti xie.  
\v 56 Ti jech oy yip ti chamebale, jaꞌ ta scoj ti mulile. Jech xtoc ti mulile oy yip ta sventa ti voꞌne mantale.  
\v 57 Pero coliyal ti Diose ti laj xa yacꞌ jtsaltic ti lajebal ta sventa ti Cajvaltic Jesucristoe.   
\p
\v 58 Jech o xal un, Quermanotac, tsatsubuc avoꞌntonic. Aqꞌuic persa ta yabtelanel yabtel ti Cajvaltique. Yuꞌun xanaꞌic lec, ti avabtel ti ta xapasic ta sventa ti Cajvaltique, mu ta jecheꞌuc noꞌox.   
\c 16  
\s1 Ta stsobic ti cꞌusi oy yuꞌunic yoꞌ jech ta xcoltavanic  
\p
\v 1 Ti jech ta xatsobic ataqꞌuin yoꞌ ta xacoltaic ti yan jchꞌunolajeletique, jech me xapasic jech chac cꞌu chaꞌal laj calbe yaꞌiic ti jchꞌunolajeletic ti oyic ta jujun tsobobbail ta Galacia banomile.  
\v 2 Ti jujunoxuc ti ta sliqueb cꞌacꞌal ti jujun xemunae, ti cꞌu yepal ti laj apasic canale, chꞌaquic loqꞌuel ti cꞌu yepal ti ta xlocꞌ ta avoꞌntonic yoꞌ jech ta xacoltavanique. Tey chabiic yoꞌ jech tsobol xa avuꞌunic cꞌalal ta xicꞌote.  
\v 3 Cꞌalal ta xivul ta atojolique, tey ta jtac batel ta Jerusalén ti viniquetic ti voꞌoxuc ta xatꞌujique. Tey ta xcacꞌbeic batel scartaic schiꞌuc ti scoltaobilic ti jchꞌunolajeletic ti laj atsobique.  
\v 4 Ti mi ta xcaꞌi ti xuꞌ ta xibat eque, tey ta xchiꞌinicun batel.   
\s1 Ti Pabloe ta snop ti ta xlocꞌ batel ta svuꞌlanel ti jchꞌunolajeletique  
\p
\v 5 Cꞌalal ta xital ta atojolique, mu tucꞌuc ta xicꞌot. Yuꞌun baꞌyel ta xibat ta Macedonia banomil. Tsꞌacal to ta xicꞌot ta ateclumalic Corinto.  
\v 6 Xuꞌ van ti tey ta xijalij ta atojolique. Xuꞌ van ti tey ta xꞌechꞌ cuꞌun ti yorail sique. Ti mi lijalij teye, xuꞌ nan ta xacoltaicun ta sventa stojol ti jbe ti bu ta xibat ta tsꞌacal toe.  
\v 7 Yuꞌun mu ta jcꞌan ti naca noꞌox ch-echꞌ jqꞌueloxuque. Yuꞌun ta jcꞌan ti tey ta xijalij ta atojolic ti mi jech ta scꞌan ti Cajvaltique.  
\v 8 Liꞌ to ta xicom ta jteclum Efesoe. Jaꞌ to ta xilocꞌ batel cꞌalal mi echꞌ ti qꞌuin Pentecostese.  
\v 9 Yuꞌun lec to jamal ti jbe ti jech ta xiꞌabtej yuꞌun ti Cajvaltique, ti xlocꞌ venta ta jꞌechꞌele. Pero ep ti crontainel xtoque.   
\p
\v 10 Ti mi tey ta xcꞌot ta atojolic ti Timoteoe, aqꞌuic persa ti junuc yoꞌnton ta atojolic yoꞌ jech muꞌyuc cꞌusi ta xal yoꞌnton. Yuꞌun ti stuque ta xꞌabtej yuꞌun ti Cajvaltique jech chac cꞌu chaꞌal ti vuꞌune.  
\v 11 Jech o xal un, mu me buchꞌu junucal ta sbaj avuꞌunic ti Timoteoe. Coltaic me yuꞌun ti stojol sbee, yoꞌ jech jun yoꞌnton ta xtal sqꞌuelun. Yuꞌun liꞌ ta jmalacutic schiꞌuc ti yan quermanotique.  
\v 12 Yan ti quermanotic Apolose laj xa jcꞌanbe ep vocol ti acꞌo xtal sqꞌueloxuque schiꞌuc ti yan quermanotaque. Avi liꞌe, mu to scꞌan xtal. Jaꞌ to chtal sqꞌueloxuc ti mi oy bu xocobe.   
\s1 Ti slajeb chabanuque  
\p
\v 13 Vicꞌluc me ti asatique. Staojuc me yav chꞌunic ti Cajvaltique. Tsotsanic me. Vinicuc me xavaꞌi abaic.  
\v 14 Ti cꞌusi ta xapasique, pasic me ta scꞌuxul avoꞌntonic scotol.   
\p
\v 15 Xanaꞌic, Quermanotac, ti Estéfanase schiꞌuc ti cꞌu yepal oyic ta snae, jaꞌic ti baꞌyel laj xchꞌunic ti lequil achꞌ cꞌop ti tey ta Acayae. Avi tana un, ti stuquique yacꞌoj sbaic ta tunel yuꞌun ti jchꞌunolajeletique.  
\v 16 Ti jech jchꞌunolajeletic taje, ti buchꞌu ta xꞌabtejique, ti buchꞌu ta xcoltavanique, ta jcꞌan ti tey ta xachꞌunic ti cꞌusi ta xalboxuque.  
\v 17 Ximuyubaj ti liꞌ ital ta jtojol ti Estéfanase, ti Fortunatoe, ti Acaicoe. Yuꞌun ti stuquique jaꞌ ta xiscoltaicun ti cꞌusi mu xuꞌ avuꞌunic ti ta xacoltaicun ti jech nom oyoxuque.  
\v 18 Ti stuquique jaꞌ laj stsatsubtasbun coꞌnton. Jaꞌ jech laj spasic ta atojolic xtoc. Mu chꞌaybaj ta oꞌntonal ti jech jchꞌunolajeletic taje.   
\p
\v 19 Chabanuc xayalboxuc ti jchꞌunolajeletic ti oyic ta jujun tsobobbail liꞌ ta Asia banomile. Jaꞌ jech xtoc ti Aquilae, ti Priscilae, schiꞌuc ti cꞌu yepalic jchꞌunolajeletic ti ta stsob sbaic ta snae, chabanucoxuc xayalbe ta sventa ti Cajvaltique.  
\v 20 Scotol ti jchꞌunolajeletic ti liꞌ oyic ta jtojole, chabanuc xayalboxuc. Jaꞌ jech xtoc, chabanuc xavalbe abaic ta jujun tal. Tsacbo abaic acꞌobic.   
\p
\v 21 Vuꞌun Pabloun, ta jcꞌob ta jletra jtuc ti ta xcalboxuc ti chabanucoxuque.   
\p
\v 22 Mi oy buchꞌu mu scꞌan ti Cajvaltic Jesucristoe, acꞌo batuc ta chꞌayel. Laꞌ me, Cajval.   
\p
\v 23 Acꞌo svaꞌan sba ta atojolic ti Cajvaltic Jesucristoe.  
\v 24 Tey ta jtac talel ta atojol acotolic ti scꞌuxul coꞌnton ta sventa ti Cajvaltic Jesucristoe. Jechuc.