\id 1TH  
\h 1 TESALONICENSES 
\toc1 JAꞌ LI SBA SCARTA PABLO LI LA STSꞌIBABE LI BUCHꞌUTIC YICHꞌOJIC TA MUCꞌ LI CAJVALTIC LI TE TA TESALONICAE 
\toc2 1 TESALONICENSES 
\toc3 1 Ts. 
\mt1 JAꞌ LI SBA SCARTA PABLO LI LA STSꞌIBABE LI BUCHꞌUTIC YICHꞌOJIC TA MUCꞌ LI CAJVALTIC LI TE TA TESALONICAE 
\c 1  
\p  
\v 1 Joꞌon Pabloun, schiꞌuc Silas, schiꞌuc Timoteo, chajcꞌoponcutic batel ta carta liꞌi, joꞌoxuc ti avichꞌojic xa ta mucꞌ li Cajvaltic li te ta Tesalónicae. Yuꞌun coꞌol oyutic xa ta scꞌob li Jtotic Diose schiꞌuc li Cajvaltic Jesucristoe. Acꞌo yacꞌboxuc slequilal yutsilal li Jtotic Diose schiꞌuc li Cajvaltic Jesucristoe. Acꞌo spasboxuc ta jun avoꞌonic li jujunoxuque. 
\s1 Jaꞌ scꞌoplal ti ipuc scꞌoplalic ti lec yichꞌojic ta mucꞌ li Cajvaltic li te ta Tesalónicae 
\p  
\v 2-3 Li joꞌoncutique scotol cꞌacꞌal ta xcalbecutic coliyal Dios ta sventa ti lec avichꞌojic ta mucꞌ li Cajvaltic Jesucristoe. Schiꞌuc ti lec chapasic li cꞌustic ta scꞌan li Diose, jaꞌ ti chacꞌuxubinvanique, ti chacoltavanique, ti jun avoꞌonic chamalaic ti ta xchaꞌtal li Cajvaltique acꞌo mi chavichꞌic vocol. Jaꞌ yuꞌun chajtꞌabcutic scotol cꞌacꞌal li cꞌalal ta jtacutic ta naꞌel li Jtotic Dios cuꞌuntique.  
\v 4 Li joꞌoxuc li coꞌol quichꞌojtic ta mucꞌ li Cajvaltique, cꞌuxoxuc ta yoꞌon li Diose. Jnaꞌojcutic ti stꞌujojoxuc onoꞌox ti chacolic o sbatel osile.  
\v 5 Yuꞌun cꞌalal laj calcutic avaꞌiic ti oy coltael ta sventa li Cajvaltique, muc bu xavalic ti loꞌil noꞌoxe. Yuꞌun iꞌabtej ta avoꞌonic li Chꞌul Espíritue, jaꞌ yuꞌun anaꞌic o ti melel jaꞌ scꞌop Dios li laj calcutique. Avilic nojtoc ti mu jechuc coꞌoncutic ti chajloꞌlocutic li cꞌalal te jchiꞌucoxuque, ti jaꞌ noꞌox la jcꞌancutic ti acꞌo xavichꞌic ta mucꞌ li Cajvaltique. 
\p  
\v 6 Jaꞌ yuꞌun achꞌunic li scꞌop Dios ti laj calcutique. Avichꞌic li cꞌu sba coꞌoncutique, schiꞌuc li cꞌu sba yoꞌon li Cajvaltique yuꞌun icuch avuꞌunic eꞌuc li ilbajinele. Jun noꞌox avoꞌonic ti avichꞌojic li Chꞌul Espíritue.  
\v 7 Ti lec icuch avuꞌunique, joꞌoxuc avaqꞌuic ta ilel ti scꞌan jech acꞌo spasic eꞌuc scotol li buchꞌutic yichꞌojic ta mucꞌ li Cajvaltic li te ta Macedonia balumile schiꞌuc liꞌ ta Acaya balumile.  
\v 8 Ti joꞌoxuc avaqꞌuic ta ilele, jaꞌ lic pucuc o li scꞌop Cajvaltic li te ta avosilalique schiꞌuc liꞌ ta Acaya balumile. Pero maꞌuc noꞌox te ta avosilalic schiꞌuc liꞌ ta Acayae ti snaꞌic ti lec avichꞌojic ta mucꞌ li Diose, buyuc xa noꞌox puquem acꞌoplalic. Ta sventa ti jech yaꞌiojic xa scotol crixchanoetique, mu xa persauc ta xcalcutic batel ti achꞌunojique.  
\v 9 Yuꞌun li crixchanoetique ta xalic stuquic ti achꞌunic li cꞌalal a calboxuc avaꞌiic li scꞌop Diose, ti avictaic stael ta naꞌel li rioxetique, ti jaꞌ xa chavichꞌic ta mucꞌ li cuxul Diose.  
\v 10 Schiꞌuc ti chamalaic ti ta xchaꞌsut talel ta vinajel li Snichꞌone, jaꞌ li Jesuse, jaꞌ li la schaꞌcuxes loqꞌuel ta smuquenale. Li Jesuse liscoltautic yoꞌ acꞌo mu xijyacꞌbutic quichꞌtic vocol li Diose li cꞌalal ta sta scꞌacꞌalil ta xichꞌbe scꞌop li crixchanoetique. 
\c 2  
\s1 Jaꞌ scꞌoplal li cꞌusi yabtel li Pablo schiꞌuc schiꞌiltac ta abtel li cꞌalal te oyic ta Tesalónicae 
\p  
\v 1 Li joꞌoxuc li coꞌol quichꞌojtic ta mucꞌ li Cajvaltique, xanaꞌic ti mu alticuc a calcutic avaꞌiic li scꞌop Diose.  
\v 2 Xanaꞌic li cꞌusi lijpasbatcutic li te ta Filipose. Acꞌo mi ep iquichꞌcutic ilbajinel schiꞌuc qꞌuexlaltasel, pero la stsatsubtasbun coꞌoncutic li Dios cuꞌuntique, jech cꞌot calcutic avaꞌiic li scꞌope. Manchuc mi ep lijcontrainatcutic nojtoc li te ta alumalique, muc bu xijxiꞌcutic. Jamal laj calcutic ti jaꞌ noꞌox chijcolutic yuꞌun li Diose.  
\v 3 Ti jech ta jpuccutic li scꞌop Diose, muc bu loꞌlobiluncutic. Muc bu ta xcalcutic yuꞌun ta jcꞌan jtojolcutic. Muc me yuꞌun chijloꞌlovancutic.  
\v 4 Dios tscꞌan ti laj yacꞌbun cabtelcutic ti chcalcutic ti jaꞌ noꞌox chijcolutic ta sventae. Jaꞌ yuꞌun maꞌuc me ta jcꞌancutic ti acꞌo lec xijyilcutic li crixchanoetique; jaꞌ ta jcꞌancutic ti acꞌo lec xijyilcutic li Diose, yuꞌun sqꞌueloj cꞌu sba li coꞌontique.  
\v 5 Anaꞌojic ti mu bacꞌne jechuncutic ti lec xa quecutic yaꞌel ta atojolic ti yoꞌ acꞌo oy cꞌusi chavacꞌbuncutique. Maꞌuc schibal coꞌoncutic laj calboxuc mantal. Snaꞌoj stuc Dios ti muc bu la jpascutic jech li cꞌalal te jchiꞌucoxuque.  
\v 6 Muc bu la jcꞌancutic ichꞌel ta mucꞌ yuꞌun crixchano, mi joꞌoxuc, mi jaꞌuc yan crixchano. Muc bu xcacꞌcutic avocolic yoꞌ acꞌo xavacꞌbuncutic li cꞌusi chtun cuꞌuncutique. Ti jechuc ta jcꞌancutique, xuꞌ ta jpascutic yuꞌun yajtacbalaluncutic li Cristoe. Pero mu jcꞌan jpascutic jech.  
\v 7 Li cꞌalal te oyuncutic ta atojolique, lec la jcꞌuxubinotcutic jech chac cꞌu chaꞌal jun ants ti lec ta scꞌuxubin li yole.  
\v 8 Ta sventa ti cꞌuxoxuc ta coꞌoncutique, jech maꞌuc noꞌox oy ta coꞌoncutic ti laj calboxuc ti jaꞌ chijcolutic ta sventa li Cajvaltique. Oy nojtoc ta coꞌoncutic ti xuꞌ ta xquichꞌcutic vocol ta acojique, yuꞌun ta sloqꞌuel coꞌoncutic la jcꞌancutic ti acꞌo colanique.  
\v 9 Li joꞌoxuc li coꞌol quichꞌojtic ta mucꞌ li Cajvaltique, xanaꞌic ti cꞌu sba la jpascutic li cꞌalal te la jchiꞌinotcutique. Avilic ti cꞌacꞌal acꞌubal tsots lijꞌabtejcutique yoꞌ jech ijta o jveꞌelcutic. Yuꞌun mu jcꞌan xcacꞌcutic avocolic junuc ti chamacꞌlanuncutique li cꞌalal laj calboxuc li scꞌop Diose. 
\p  
\v 10 Li joꞌoxuc li coꞌol quichꞌojtic ta mucꞌ li Cajvaltique, avilic ti jun coꞌoncutic ta stojol li Dios li cꞌalal te oyuncutic ta atojolique, ti naca lec li cꞌustic la jpascutique. Schiꞌuc snaꞌoj stuc li Diose.  
\v 11 Xanaꞌic ti más la jtsatsubtascutic avoꞌonique, ti laj calboxuc li cꞌusi lec ta pasele, jech chac cꞌu chaꞌal li buchꞌu lec ta stsatsubtasbe yoꞌon ti chalbe li cꞌusi lec ta pasel li snichꞌone.  
\v 12 Laj calboxuc ti scꞌan ti lec li cꞌustic chapasique yuꞌun oyoxuc xa ta scꞌob li Dios ti lijyicꞌutic yoꞌ acꞌo ochcutic li yoꞌ bu ta spas mantale, yoꞌ jech ta jqꞌuelbetic li cꞌu sba slequil yutsile. 
\p  
\v 13 Jaꞌ yuꞌun scotol cꞌacꞌal ta xcalbecutic coliyal Dios yuꞌun achꞌunic ti jaꞌ scꞌop Dios ti laj calcutic avaꞌiique. Muc bu xavalic ti scꞌop noꞌox crixchanoe. Yuꞌun ta melel jaꞌ scꞌop Dios jaꞌ yuꞌun ta xꞌabtej ta coꞌontic, joꞌotic li quichꞌojtic xa ta mucꞌ li Cajvaltique.  
\v 14 Yuꞌun li joꞌoxuque icuch xa avuꞌunic ilbajinel yuꞌun la achiꞌiltaquique jech chac cꞌu chaꞌal icuch yuꞌunic li jchiꞌiltacutic ta israelal li te ta Judea balumil li yichꞌojic ta mucꞌ li Jesucristo. Yuꞌun jchiꞌiltacutic li iꞌilbajinvanic li te ta Judea balumile.  
\v 15 Jaꞌ jchiꞌiltacutic ta israelal nojtoc ti la smilic li Cajvaltic Jesuse, schiꞌuc ti la smilic li buchꞌutic iyalic scꞌop Dios ta voꞌonee. Jech lisnutscutic loqꞌuel eꞌuc. Scontrainojic li Diose jech chascontrainic eꞌuc, joꞌoxuc li maꞌuc jꞌisraeloxuque.  
\v 16 Ta scꞌan chispajescutic yoꞌ jech mu xcalcutic avaꞌiic li scꞌop Diose, yuꞌun mu scꞌanic ti chacolique, joꞌoxuc li maꞌuc jꞌisraeloxuque. Scotol cꞌacꞌal ta xꞌepaj smulic li jchiꞌiltacutique. Ta scoj li a sba tspasique ta xꞌacꞌbat yichꞌic tsots vocol yuꞌun li Diose. 
\s1 Jaꞌ scꞌoplal ti tscꞌan chba schaꞌqꞌuel li buchꞌutic yichꞌojic ta mucꞌ li Cajvaltic li te ta Tesalónica li Pabloe 
\p  
\v 17 Cꞌalal lijlocꞌcutic batel ta atojolic ta scoj ti muc bu xiscꞌancutic la achiꞌiltaquique, muc bu onoꞌox chꞌayemoxuc ta coꞌoncutic manchuc mi mu xa bu ta xquil jbatic. Ti jayib cꞌacꞌal muc bu ta jcꞌopon jbatique, liꞌ oyoxuc onoꞌox ta coꞌoncutique. Sloqꞌuel coꞌoncutic ta jcꞌan chba jchaꞌqꞌueloxuc nojtoc cꞌu xaꞌelanic.  
\v 18 Chac ba julaꞌanoxuc. Joꞌon li Pabloune te onoꞌox xiloꞌlun ti chac ba julaꞌanoxuque. Ti manchuc lispajescutic li banquilal pucuje, jaꞌ li Satanase, ijcꞌopon xa jbatic ti jechuque.  
\v 19 Yuꞌun joꞌoxuc ta aventaic ti xijmuybajcutic ta stojol li Cajvaltic cꞌalal chchaꞌtale, yuꞌun lec chayilic. Yuꞌun joꞌoxuc svinajeboxuc ta stojol li Cajvaltic ti lec la jpasbecutic li yabtele.  
\v 20 Yuꞌun li avie joꞌoxuc ta aventaic ti lec chbat jcꞌoplalcutique, schiꞌuc ti xijmuybajcutic noꞌoxe. 
\c 3  
\p  
\v 1 Cꞌalal mu xꞌechꞌ chcaꞌi ti oy xaꞌox scꞌacꞌalil ti muc bu xcaꞌi cꞌu xaꞌelanique, jech la jnop ti xuꞌ jtuc te chicom ta jteclum Atenase.  
\v 2-3 Jaꞌ yuꞌun la jtac batel li Timoteoe yuꞌun jaꞌ yajtunel Dios eꞌuc. Jaꞌ jchiꞌil jbacutic ta yalel ti jaꞌ noꞌox chijcolutic ta sventa li Cristoe. La jtac ba ta atojolic ti ba stsatsubtas avoꞌonic ta sventa li Cajvaltique ti yoꞌ mu xchibaj avoꞌonic ta stojol li Cajvaltic ta sventa ti chavichꞌic vocole. Xanaꞌic ti ta persa onoꞌox ta xquichꞌtic vocole.  
\v 4 Yuꞌun cꞌalal te toꞌox oyuncutique, laj calcutic onoꞌox ti ta onoꞌox xquichꞌtic vocole. Xanaꞌic xa ti ta melel ta xquichꞌtic vocole yuꞌun icꞌot xa ta pasel ta atojolic.  
\v 5 Jaꞌ yuꞌun cꞌalal oy xaꞌox scꞌacꞌalil ti muc bu xcaꞌi cꞌu xaꞌelanique, la jtac batel li Timoteoe, yuꞌun chac caꞌi mi yoquel to avichꞌojic ta mucꞌ li Cajvaltique. Yuꞌun chal coꞌon mi ischibajes avoꞌonic li pucuje, yuꞌun stalel onoꞌox ta sqꞌuel coꞌontic. Yuꞌun altic noꞌox laj cacꞌ jvocolcutic ta atojolic ti mi la sloꞌlooxuc li pucuje. 
\p  
\v 6 Pero li avie icaꞌicutic xa li cꞌu xaꞌelanique yuꞌun ijul xa talel li Timoteoe. Xijmuybajcutic noꞌox yuꞌun icaꞌicutic xa ti yoquel to avichꞌojic ta mucꞌ li Cajvaltique, ti lec chacꞌuxubinvanique. Laj yal nojtoc ti scotol cꞌacꞌal chatꞌabuncutique. Yuꞌun chac aqꞌueluncutic nojtoc jech chac cꞌu chaꞌal chac jqꞌueloxuc eꞌuque.  
\v 7 Toj lec xijmuybajcutic o li cꞌalal icaꞌicutic ti yoquel to avichꞌojic ta mucꞌ li Cajvaltique. Acꞌo mi ta xquichꞌcutic vocol schiꞌuc ilbajinel, xijmuybajcutic noꞌox.  
\v 8 Cꞌalal icaꞌicutic ti jun avoꞌonic avichꞌojic ta mucꞌ li Cajvaltique, xpatet xa coꞌoncutic.  
\v 9 Yuꞌun toj echꞌem xijmuybajcutic o avuꞌunic, mu xlaj calbecutic o coliyal Dios ti avichꞌojic ta muqꞌue.  
\v 10 Cꞌacꞌal acꞌubal ta jcꞌanbecutic Dios ti acꞌo xuꞌuc cuꞌuncutic ti chba jqꞌuelotcutic nojtoque, ti chba calbotcutic li cꞌusi mu to xavaꞌibeic smelole. 
\p  
\v 11 Ta jcꞌanbecutic li Jtotic Dios cuꞌuntique schiꞌuc li Cajvaltic Jesucristoe, ti acꞌo yacꞌ ba jbecutique yuꞌun chba jqꞌuelotcutic nojtoc.  
\v 12 Ta jcꞌanbecutic nojtoc li Cajvaltic ti acꞌo scoltaoxuc yoꞌ más chacꞌuxubinan abaic, schiꞌuc más chacꞌuxubinic nojtoc scotol li crixchanoetique jech chac cꞌu chaꞌal cꞌuxoxuc ta coꞌoncutique.  
\v 13 Jaꞌ ta stsatsub o avoꞌonic ta sventa li Cajvaltique, jech muꞌyuc amulic chayilic li Jtotic Dios cuꞌuntique li cꞌalal chacꞌotic ta stojole. Lec oyoxuc chayilic li cꞌalal ta xchaꞌtal li Cajvaltic Jesucristoe schiꞌuc scotol li buchꞌutic yichꞌojic ta muqꞌue. 
\c 4  
\s1 Jaꞌ scꞌoplal ti tscꞌan Dios ti naca lec li cꞌustic ta jpastique 
\p  
\v 1 Li joꞌoxuc li coꞌol quichꞌojtic ta mucꞌ li Cajvaltique, chacalbeic mantal ta sventa li Cajvaltique. Cꞌalal te toꞌox oyuncutique, laj calboxuc ti cꞌusi scꞌan ti acꞌo xapasique ti yoꞌ lec chayilic o li Diose. La xa achꞌunic. Pero acꞌbeic yipal schꞌunel scotol. 
\p  
\v 2 Xanaꞌic scotol li cꞌustic mantaletic laj calbotcutic comele ta sventa li Cajvaltic Jesucristoe.  
\v 3 Jaꞌ ta scꞌan Dios ti naca lec scotol li cꞌustic ta jpastique, jaꞌ yuꞌun scꞌan ti mu me xijmulivajutique.  
\v 4 Li buchꞌutic ti muꞌyuc to yajnilique scꞌan me ta smeloluc noꞌox me, ta stuqꞌuiluc noꞌox me ta saꞌ yajnilic ta sventa ti yichꞌojic ta mucꞌ li Diose. Acotolique scꞌan ti oyuc noꞌox me amelolic xacuxiic achiꞌuquic la avajnilic ta stojol li Diose.  
\v 5 Mu me jaꞌuc batem ta avoꞌonic spasel li cꞌusi chjul ta ajolique ta stojol la avajnilique jech chac cꞌu chaꞌal ta spasic li yan crixchanoetic ti mu xichꞌic ta mucꞌ li Diose.  
\v 6 Yan li buchꞌu ta sloꞌlobe yajnil li schiꞌiltaque, schiꞌuc li buchꞌu ta sloꞌlobe smalal schiꞌile, jaꞌ me mulil. Mu me xapasic jech. Yuꞌun li buchꞌutic jech ta spasique ta xꞌacꞌbat yichꞌic vocol yuꞌun li Cajvaltique jech chac cꞌu chaꞌal calojboxuc onoꞌoxe.  
\v 7 Yuꞌun li Diose lijyicꞌutic ti jaꞌ acꞌo jpastic li cꞌustic leque. Muc bu la yicꞌutic tspasel li cꞌustic chopole.  
\v 8 Mi oy buchꞌu jaꞌ noꞌox ta snaꞌle li mantal liꞌi, maꞌuc crixchano ti tsnaꞌlee, jaꞌ Dios ti tsnaꞌlee yuꞌun jaꞌ smantal li Diose. Jaꞌ Dios ti laj yacꞌbutic quichꞌtic li Chꞌul Espíritu ti mu scꞌan mulile. 
\p  
\v 9 Li joꞌoxuc li coꞌol quichꞌojtic ta mucꞌ li Cajvaltique, mu xa persauc chajtsꞌibabeic echꞌel ta carta ti acꞌo xacꞌuxubinan abaique. Yuꞌun avaꞌiojbeic xa smelol ta sventa Dios ti chacꞌuxubinan abaique.  
\v 10 Mu atuquicuc noꞌox chacꞌuxubinan abaic li cꞌu avepalic li te oyoxuc ta Tesalónicae. Chacꞌuxubinic nojtoc scotol li buchꞌutic yichꞌojic ta mucꞌ li Cajvaltic li te nacalic ta avosilalic ta Macedonia balumile. Lec ti jech chapasique. Pero chacalbeic, mu me xtavan xavaꞌiic ti chacꞌuxubinan abaique.  
\v 11 Mu me xba aticꞌ abaic ta loꞌil li bu mu aventaicuque. Jaꞌ noꞌox me oꞌoninic spasel la avabtelic ti cꞌuxi chata aveꞌelique jech chac cꞌu chaꞌal laj calbotcutic onoꞌoxe.  
\v 12 Mu xavacꞌ abaic ta macꞌlanel, mu xavilbeic svocol la achiꞌilique. Mi jech chapasique, jaꞌ lec chayilic li crixchanoetique. 
\s1 Jaꞌ scꞌoplal ti cꞌu sba ta xchaꞌtal li Cajvaltique 
\p  
\v 13 Li joꞌoxuc li coꞌol quichꞌojtic ta mucꞌ li Cajvaltique, ta jcꞌan ti xanaꞌic li cꞌusi chcꞌot ta pasel ta stojol li buchꞌutic yichꞌojic ta mucꞌ li Cajvaltic li cꞌalal ichamique, yoꞌ jech mu xavat avoꞌonic jech chac cꞌu chaꞌal chat yoꞌonic li crixchanoetic li cꞌalal oy buchꞌu chcham yuꞌunique, yuꞌun mu cꞌusi spatoj o yoꞌonic.  
\v 14 Yuꞌun jchꞌunojtic ti icham li Jesuse, jchꞌunojtic nojtoc ti ichaꞌcuxesat yuꞌun li Diose. Jaꞌ noꞌox jech eꞌuc li buchꞌutic yichꞌojic ta mucꞌ li Jesús li cꞌalal ichamique, ta xchaꞌcuxesatic yuꞌun li Dios li cꞌalal ta xchaꞌtal li Jesuse. 
\p  
\v 15 Jech chacalbe avaꞌiic yuꞌun jech onoꞌox yaloj comel li Cajvaltique. Mi cuxulutic toꞌox chjul stautic li Cajvaltic li cꞌalal ta xchaꞌtale, mu joꞌcutic baꞌi chijelavutic muyel. Coꞌol chijyicꞌutic muyel schiꞌuc li buchꞌutic yichꞌojic ta mucꞌ li Cajvaltic li cꞌalal ichamique.  
\v 16 Yuꞌun ta xyal talel ta vinajel stuc li Cajvaltique, tsots chcꞌopoj, chal talel mantal. Tsots chcꞌopoj nojtoc li banquilal yajꞌangel Diose schiꞌuc tsots ta xtijbat li yoqꞌues li Diose. Li buchꞌutic yichꞌojic ta mucꞌ li Cajvaltic li cꞌalal ichamique, jaꞌ baꞌi ta xchaꞌcuxiic.  
\v 17 Mi cuxulutic toꞌox chjul stautic li joꞌotique, coꞌol chijyicꞌutic muyel jchiꞌuctic li buchꞌutic chamemic xae. Chijmacutic muyel ta toquetic. Te chcꞌot jnuptic li Cajvaltique jech chba jchiꞌintic o sbatel osil.  
\v 18 Jaꞌ yuꞌun tsatsubtasbe aba avoꞌonic ta sventa li cꞌop liꞌi. 
\c 5  
\p  
\v 1 Avaꞌiojic xa ti mu jnaꞌtic cꞌu ora ta xchaꞌtal li Cajvaltique, jech mu persauc chajtsꞌibabeic.  
\v 2 Yuꞌun ta ora noꞌox ta xtal jech chac cꞌu chaꞌal chtal jun jꞌelecꞌ ti chꞌayal coꞌontic chistautic ta acꞌubale.  
\v 3 Li cꞌalal ta xalic li crixchanoetique: “Muybajcutic noꞌox, mu cꞌusi xiꞌel sba”, mi xiique, jaꞌ o ta xtal tsots vocol ta stojolic. Jaꞌ jech chac cꞌu chaꞌal jun ants ti ta ora noꞌox ta xlic yipal yol li cꞌalal yuꞌun xa chcuxe. Jaꞌ jech ta ora noꞌox ta xtal li tsots vocol ta stojolique. Persa chichꞌic vocol scotol li crixchanoetic li liꞌ ta balumile, mu junuc buchꞌu chcol.  
\v 4 Pero li joꞌoxuc li coꞌol quichꞌojtic ta mucꞌ li Cajvaltique, maꞌuc xa ta icꞌal acꞌubal oyoxuc; oyoxuc xa ta saquil chꞌul osil yaꞌel, yuꞌun maꞌuc xa chapasic li cꞌustic chopole. Jamem xa asat achiquinic yaꞌel. Jech muc bu chꞌayal avoꞌonic chastaic li cꞌalal ta xchaꞌtal li Cajvaltique. Mu jechuc jech chac cꞌu chaꞌal li jꞌelecꞌ ti chꞌayem yoꞌon ta elecꞌ ta acꞌubaltic ti mu xil ti ta xa sacub osile.  
\v 5 Yuꞌun acotolic oyoxuc xa ta saquil chꞌul osil, oyoxuc xa ta cꞌacꞌaltic yaꞌel. Maꞌuc xa ta sventa icꞌal acꞌubal oyutic yuꞌun maꞌuc xa ta jpastic li cꞌustic chopole.  
\v 6 Jech mu me xijvay jech chac cꞌu chaꞌal vayalic yaꞌel li buchꞌutic muc bu yichꞌojic ta mucꞌ li Cajvaltique. Mu me jaꞌuc batem ta coꞌontic ta spasel li cꞌustic chopol jech chac cꞌu chaꞌal ta spasique. Vicꞌluc me jsatic, acꞌo me jnoptic li cꞌusi lec ta jpastique.  
\v 7 Li buchꞌutic chopol li cꞌustic ta spasique, jaꞌ batem ta yoꞌonic ta spasel jech chac cꞌu chaꞌal batem jchꞌuleltic ta vayel ta acꞌubale. Mu snaꞌic mi chopol li cꞌusi ta spasique jech chac cꞌu chaꞌal li jyacubeletique.  
\v 8 Li joꞌotique oyutic xa ta saquil chꞌul osil yaꞌel yuꞌun quichꞌojtic xa ta mucꞌ li Cajvaltique. Jaꞌ yuꞌun scꞌan ti acꞌo jnoptic li cꞌustic lec ta jpastique. Acꞌo jchꞌuntic ti jaꞌ Cajcoltavanejtique, schiꞌuc acꞌo cꞌuxubinvancutic, schiꞌuc acꞌo me junuc noꞌox coꞌontic ta jmalatic chtal yicꞌutic li Cajvaltique. Jaꞌ smac stiꞌ coꞌontic schiꞌuc smac joltic yaꞌel, jech mu xispasutic ta canal li cꞌustic chopole, jech chac cꞌu chaꞌal soltaro ti slapoj lec smac stiꞌ yoꞌone schiꞌuc smac sjole yoꞌ jech mu spase ta canal ti bu chba spas cꞌope.  
\v 9 Ti laj yicꞌutic li Diose, maꞌuc sventa chacꞌ quichꞌtic vocol. Laj yicꞌutic sventa chijcolutic o sbatel osil ta sventa li Cajvaltic Jesucristoe.  
\v 10 Ti icham ta scoj jmultic li Jesucristoe, yuꞌun ta scꞌan ti coꞌol chijcuxiutic o sbatel osil jchiꞌuctique. Mi cuxulutic toꞌox, mi chamemutic xaꞌox li cꞌalal ta xchaꞌtale, ta onoꞌox xijyicꞌutic muyel yuꞌun chba jchiꞌintic o sbatel osil.  
\v 11 Jaꞌ yuꞌun tsatsubtasbe aba avoꞌonic jech chac cꞌu chaꞌal chapasic onoꞌoxe. 
\s1 Jaꞌ scꞌoplal li cꞌalal laj yalbe li cꞌustic lec ta pasel li buchꞌutic yichꞌojic ta mucꞌ li Cajvaltic li Pabloe 
\p  
\v 12 Li joꞌoxuc li coꞌol quichꞌojtic ta mucꞌ li Cajvaltique, avocolicuc ichꞌic me ta mucꞌ li buchꞌutic oy yabtelic li te ta atojolique, jaꞌ li jchabivanejetic avuꞌunique ti chayalbeic li cꞌustic lec ta pasel ta sventa li Cajvaltique.  
\v 13 Cꞌanic me lec ta sventa ti oy yabtelic ta atojolique. Mu me xacontrain abaic, jmojuc me avoꞌonic. 
\p  
\v 14 Avocolicuc albeic me mantal li buchꞌutic chꞌajic ta abtele ti acꞌo abtejicuque. Tsatsubtasbeic yoꞌonic li buchꞌutic ta xchibaj yoꞌonique. Coltaic li buchꞌutic muꞌyuc stsatsal yoꞌonic ta stojol li Diose. Mu me xtavan xavaꞌiic scoltael scotolic li buchꞌutic coꞌol avichꞌojic ta mucꞌ li Cajvaltique. 
\p  
\v 15 Mu me xanupultajesic li buchꞌu chopol li cꞌusi chaspasbeique. Lecuc noꞌox me xapasbe abaic scotol cꞌacꞌal, joꞌoxuc ti coꞌol avichꞌojic ta mucꞌ li Cajvaltique. Jech me xapasbeic nojtoc li buchꞌutic muc bu yichꞌojic ta mucꞌ li Cajvaltique. 
\p  
\v 16 Muybajanic noꞌox scotol cꞌacꞌal.  
\v 17 Taic ta naꞌel Dios scotol cꞌacꞌal.  
\v 18 Scotol li cꞌusi chtal ta atojolique, manchuc mi lec, manchuc mi chopol, scꞌan chavalbeic coliyal li Diose. Yuꞌun jaꞌ jech tscꞌan Dios ti chapasique, joꞌoxuc ti avichꞌojic ta mucꞌ li Jesucristoe. Jaꞌ chascoltaic jaꞌ yuꞌun xuꞌ o avuꞌunic chapasic scotol. 
\p  
\v 19 Mu me xapꞌajic li Chꞌul Espíritu li te ta xꞌabtej ta avoꞌonique, pasic me li cꞌusi ta scꞌane.  
\v 20 Mu me xapꞌajic li buchꞌutic ta xalic li cꞌusi iꞌalbatic yuꞌun li Diose.  
\v 21-22 Aꞌibeic lec smelol mi jmoj schiꞌuc li cꞌu sba ta xal li scꞌop Diose. Jaꞌ to me xachꞌunic ti mi jmoje. 
\p  
\v 23 Li Dios ti chispasbutic ta jun coꞌontique, acꞌo sventainboxuc avoꞌonic li jujunoxuque, schiꞌuc abecꞌtalic achꞌulelic, jech muꞌyuc amulic chjul staoxuc li cꞌalal ta xchaꞌtal li Cajvaltic Jesucristoe.  
\v 24 Yuꞌun li Dios ti laj yicꞌoxuque ta onoꞌox spas li cꞌusi yaloje. Chaschabiic, chasqꞌuelic, mu xayictaic. 
\s1 Jaꞌ stsutseb scarta li Pabloe 
\p  
\v 25 Cꞌoponbecun Dios ta jtojolcutic. 
\p  
\v 26 Chabanuc me xavalbeic scotol li buchꞌutic yichꞌojic ta mucꞌ li Cajvaltique, yuꞌun jaꞌ svinajeb ti cꞌuxoxuc ta coꞌoncutic ta sventa li Cajvaltique. 
\p  
\v 27 Chacalbeic ta sventa li Cajvaltique, qꞌuelbo me yaꞌiic li jcartacutic liꞌi scotol li buchꞌutic yichꞌojic ta mucꞌ li Cajvaltique. 
\p  
\v 28 Acꞌo yacꞌboxuc slequilal yutsilal li Cajvaltic Jesucristoe.