\id 1JN  
\h 1 JUAN 
\toc1 JAꞌ LI SBA SCARTA JUAN, JAꞌ LI YAJTACBALAL LI JESUSE 
\toc2 1 JUAN 
\toc3 1 Jn. 
\mt1 JAꞌ LI SBA SCARTA JUAN, JAꞌ LI YAJTACBALAL LI JESUSE 
\c 1  
\s1 Jaꞌ scꞌoplal ti jaꞌ sventainoj cuxlejal sventa sbatel osil li Jesucristoe 
\p  
\v 1 Chajtsꞌibabeic batel cꞌu sba li buchꞌu te onoꞌox oy cꞌalal muꞌyuc toꞌox vinajel balumil ti sventainoj cuxlejal sventa sbatel osile. Yuꞌun icaꞌibecutic scꞌop, iquil ta jsatcutic. Ep cꞌacꞌal iquilcutic. Ijpic ta jcꞌobcutic.  
\v 2 Yuꞌun iyichꞌ sbecꞌtal jech chac cꞌu chaꞌal li joꞌotique, jaꞌ yuꞌun iquilcutic. Jaꞌ yuꞌun ta xcalcutic avaꞌiic li cꞌu sba yoꞌon li buchꞌu sventainoj li cuxlejal sventa sbatel osile. Te onoꞌox schiꞌuc sbaic schiꞌuc li Jtotic Diose, pero a yacꞌ sba ta ilel ta jtojolcutic.  
\v 3 Jaꞌ yuꞌun ta xcalcutic avaꞌiic li cꞌusi iquilcutique schiꞌuc li cꞌusi icaꞌicutique yoꞌ jech jmoj coꞌontic. Li joꞌoncutique ta melel jmoj xa coꞌoncutic schiꞌuc li Jtotic Diose schiꞌuc li Snichꞌone, jaꞌ li Jesucristoe.  
\v 4 Chajtsꞌibabeic liꞌi yoꞌ acꞌo coꞌol xijmuybaj jcotoltic. 
\s1 Jaꞌ scꞌoplal ti tucꞌ yoꞌon li Diose, mu jsetꞌuc cꞌusi chopol tsnop 
\p  
\v 5 Liꞌi jaꞌ scꞌop li Jesucristoe li laj yalbuncutique, jech ta xcalcutic avaꞌiic eꞌuc. Xi lijyalbuncutic: “Li Diose jech chac cꞌu chaꞌal cꞌocꞌ ti sacjamane yuꞌun tucꞌ yoꞌon, mu jsetꞌuc cꞌusi chopol tsnop”, xijyutcutic.  
\v 6 Mi chcaltic ti jmoj xa coꞌontic jchiꞌuctic li Diose, pero mi ta to jpasulantic li cꞌustic chopole, ta jutic cꞌop yaꞌel, yuꞌun maꞌuc ta jpastic li cꞌustic tscꞌan li Diose.  
\v 7 Yan mi jaꞌ noꞌox ta jpasulantic li cꞌustic tscꞌan li Diose, chispasbutic ta jmoj coꞌontic jcotoltic schiꞌuc chispoquilanbutic coꞌontic ta schꞌichꞌel li Snichꞌone, jaꞌ li Jesucristoe. 
\p  
\v 8 Mi chcaltic ti muꞌyuc jmultique, yuꞌun ta jloꞌlo jba jtuctic. Altic ti jech chcaltique.  
\v 9 Yan mi jamal chcalbetic li Dios li cꞌusi jmultique, chispasbutic perton. Chispocbutic scotol li schoplejal coꞌontique. Yuꞌun iyacꞌ ta milel ta scoj jmultic li Snichꞌone, jaꞌ yuꞌun xuꞌ xa chiscoltautic li Diose. Yuꞌun yaloj onoꞌox ti jaꞌ ta sventa Snichꞌon chispasbutic perton yuꞌun li jmultique.  
\v 10 Pero mi chcaltic ti mu bacꞌne jpastic cꞌusi chopole, jaꞌ ta xcꞌot ta jutcꞌop cuꞌuntic yaꞌel li Diose yuꞌun yaloj onoꞌox li Dios ti jpasmulilutique. 
\c 2  
\s1 Jaꞌ scꞌoplal ti te chcꞌopoj cuꞌuntic ta stojol Jtotic Dios li Jesucristoe 
\p  
\v 1 Joꞌoxuc li quitsꞌinaboxuc chcaꞌi, joꞌoxuc ti oyoxuc xa ta scꞌob li Cajvaltique, ti jech la jtsꞌibaboxuc batele, yoꞌ mu xa xasaꞌ amulic. Mi o ata amulique, naꞌic me ti oy buchꞌu te chcꞌopoj cuꞌuntic ta stojol li Jtotic Diose, jaꞌ li Jesucristoe. Yuꞌun muꞌyuc smul li stuque.  
\v 2 Jaꞌ ta sventa ti chijpasbat pertone yuꞌun jaꞌ la stoj li jmultique. Pero maꞌuc noꞌox listojbutic jmultic li joꞌotique, la stojbe smul scotol crixchanoetic. 
\p  
\v 3 Mi ta jchꞌunbetic li smantaltac li Diose, jaꞌ jnaꞌtic o ti xcojtaquintic xa li Diose.  
\v 4 Mi chcaltic ti xcojtaquintic xa li Diose, pero mi mu jchꞌunbetic li smantaltaque, jaꞌ jutcꞌoputic yaꞌel.  
\v 5 Yan mi ta jchꞌunbetic li smantaltaque, ta melel oy ta coꞌontic. Jaꞌ ta jnaꞌtic o ti jmoj xa coꞌon jchiꞌuctique.  
\v 6 Mi chcaltic ti oyutic xa ta scꞌob li Diose, acꞌo me jpastic jech chac cꞌu chaꞌal ispas li Jesucristoe. 
\s1 Jaꞌ scꞌoplal ti acꞌo jcꞌuxubinan jbatique 
\p  
\v 7 Joꞌoxuc li cꞌuxoxuc ta coꞌone, maꞌuc achꞌ mantal li liꞌ chajtsꞌibabeic batele. Jaꞌ onoꞌox li mantal li avaꞌiojic li cꞌalal lic avichꞌic ta mucꞌ li Cajvaltique, jaꞌ ti acꞌo jcꞌuxubinan jbatique.  
\v 8 Ti liꞌ chajtsꞌibabeique, jaꞌ ta xcꞌot ta achꞌ mantal avuꞌunic yuꞌun jaꞌ tsots scꞌoplal. Yuꞌun mi ta jcꞌuxubinan jbatique, jaꞌ chcom cuꞌuntic li cꞌustic chopole. Jaꞌ xa ta xquichꞌbetic yoꞌon li Jesucristoe yuꞌun toj cꞌuxutic ta yoꞌon. 
\p  
\v 9 Mi oy buchꞌu chal ti jaꞌ xa ta spasulan li cꞌusi tscꞌan li Diose, pero mi chopol to chil li schiꞌile, muc to bu comem yuꞌun li cꞌustic chopol yaꞌele.  
\v 10 Yuꞌun mi ta jcꞌuxubinan jbatique, jaꞌ yacutic ta spasel li cꞌusi tscꞌan li Diose. Muꞌyuc xa cꞌusi chopol ta coꞌontic ti jaꞌ chijsocvan oe.  
\v 11 Pero li buchꞌu chopol chil li schiꞌile, yuꞌun muc to bu comem yuꞌun li cꞌustic chopole. Mu xil mi mulil li cꞌusi tspase, jaꞌ yuꞌun más chloꞌloat yuꞌun li cꞌustic chopole. 
\p  
\v 12 Quitsꞌinab, chajtsꞌibabeic liꞌi yuꞌun avichꞌojic xa ta mucꞌ li Cajvaltique. Pasbiloxuc xa perton yuꞌun amulic ta sventa li Jesucristoe.  
\v 13 Mol meꞌeletic, chajtsꞌibabeic liꞌi yuꞌun xavojtaquinic xa li Cristoe, jaꞌ li te onoꞌox oy li cꞌalal muꞌyuc toꞌox vinajel balumile. Vinic antsetic, chajtsꞌibabeic liꞌi yuꞌun mu xa xaspasic ta canal li pucuje. Querem tsebetic, chajtsꞌibabeic liꞌi yuꞌun xavojtaquinic xa li Jtotic Diose. 
\p  
\v 14 Joꞌoxuc li mol meꞌeloxuc xae, chajtsꞌibabeic liꞌi yuꞌun xavojtaquinic xa li Cristoe, jaꞌ li te onoꞌox oy li cꞌalal muꞌyuc toꞌox vinajel balumile. Vinic antsetic, chajtsꞌibabeic liꞌi yuꞌun oy xa stsatsal avoꞌonic. Te oy ta avoꞌonic li scꞌop Diose jech mu xa xaspasic ta canal li pucuje. 
\p  
\v 15 Maꞌuc noj me batem ta avoꞌonic li cꞌustic oy liꞌ ta balumile. Yuꞌun mi jaꞌ noj batem ta coꞌontic li cꞌustic oy liꞌ ta balumile, jaꞌ muꞌyuc ta coꞌontic li Jtotic Diose.  
\v 16 Li buchꞌutic mu xichꞌic ta mucꞌ li Diose, jaꞌ noꞌox batem ta yoꞌonic ta spasel li cꞌustic tscꞌan stuquique, schiꞌuc jaꞌ noꞌox batem ta yoꞌonic tscꞌanic li cꞌustic cꞌupil sba chilique, schiꞌuc stoyoj noꞌox sbaic schiꞌuc li cꞌustic oy yuꞌunique. Li Jtotic Diose jaꞌ mu scꞌan mi jech ta jpastic eꞌuc li joꞌotique yuꞌun sventa noꞌox osil balumil.  
\v 17 Li cꞌustic sventa noꞌox osil balumile, yuꞌun snaꞌ noꞌox xlaj. Altic ti ta jcꞌan ta jpastic jech chac cꞌu chaꞌal ta spas li buchꞌutic muc bu yichꞌojic ta mucꞌ li Diose yuꞌun xlaj noꞌox. Yan mi jaꞌ ta jpastic li cꞌustic tscꞌan li Jtotic Diose, jaꞌ chijcuxiutic o sbatel osil. 
\s1 Jaꞌ scꞌoplal li buchꞌutic chopol chalbe scꞌoplal li Cristoe 
\p  
\v 18 Quitsꞌinab, poꞌot xa li slajeb cꞌacꞌale. Caꞌiojtic ti ta onoꞌox xtal li jun vinic ti jaꞌ yabtel o ta scontrain li Cristo cꞌalal poꞌot xa slajeb cꞌacꞌale. Li avie oy xa ep yajcontra li Cristoe. Jaꞌ ta jnaꞌtic o ti poꞌot xa li slajeb cꞌacꞌale.  
\v 19 Yuꞌun oy xa loqꞌuemic li buchꞌutic la jchiꞌintic toꞌoxe, yuꞌun mu xa coꞌoluc jchꞌunojtic. Ti coꞌoluc jchꞌunojtique liꞌ jchiꞌuctic ti jechuque. Ti iloqꞌuique, jaꞌ chquiltic o ti mu coꞌoluc jchꞌunojtique. 
\p  
\v 20 Li joꞌoxuque laꞌacꞌbatic xa avichꞌic li Chꞌul Espíritu li listacbutic talel li Jesucristoe, jaꞌ yuꞌun acotolic xanaꞌic xa li cꞌustic melele.  
\v 21 Ti chajtsꞌibabeic liꞌi, yuꞌun xanaꞌic xa ti melel li scꞌop Diose. Xanaꞌic nojtoc ti jaꞌ jutcꞌop mi oy buchꞌu oy cꞌusi chal ti mu jmojuc schiꞌuc li scꞌop Diose.  
\v 22 Li buchꞌu jutcꞌope jaꞌ li buchꞌutic ta xalic ti maꞌuc tꞌujbil yuꞌun Dios li Jesucristo ti ch‐ichꞌvan ta ventae. Li buchꞌu jech chale jaꞌ yajcontra Cristo yuꞌun tscontrainic li Totile schiꞌuc li Nichꞌonile.  
\v 23 Scotol li buchꞌutic chalic ti maꞌuc Snichꞌon Dios li Jesucristoe, yuꞌun mu to xojtaquinic. Mu xojtaquinbeic nojtoc li Stote. Yan li buchꞌutic jamal chalic ti jaꞌ Snichꞌon Dios li Jesucristoe, yuꞌun xojtaquinic xa. Xojtaquinbeic nojtoc li Stote. 
\p  
\v 24 Li joꞌoxuque ta jꞌechꞌeluc me tec oyuc o ta avoꞌonic li cꞌu yepal avaꞌiic li cꞌalal lic achꞌunbeic scꞌop li Jesucristoe. Mi te oy o ta avoꞌonic li cꞌu yepal avaꞌiic li cꞌalal lic achꞌunique, jech ta jꞌechꞌel te oyoxuc o ta scꞌob li Nichꞌonile schiꞌuc ta scꞌob li Totile.  
\v 25 Li Jesucristoe lijyalbutic ti chacꞌ jcuxlejaltic sbatel osile. 
\p  
\v 26 Laj xa jtsꞌibaboxuc scꞌoplal li buchꞌutic chac sloꞌlooxuque.  
\v 27 Li joꞌoxuque avichꞌojic xa li Chꞌul Espíritu li laj yacꞌbutic li Jesucristoe. Ta jꞌechꞌel te oy o ta avoꞌonic, jaꞌ yuꞌun mu xa persauc ti oy buchꞌu chaschanubtasique yuꞌun jaꞌ chaschanubtasic stuc li Chꞌul Espíritue. Jaꞌ melel scotol li cꞌusi chale, mu snaꞌ sjut cꞌop. Laj xa yal avaꞌiic ti te acꞌo oyanic o ta scꞌob li Jesucristoe, jaꞌ yuꞌun te me oyanic o. 
\p  
\v 28 Quitsꞌinab, ta jꞌechꞌel me te oyanic o ta scꞌob li Jesucristoe yoꞌ cꞌuxi oy o stsatsal avoꞌonic li cꞌalal ta xchaꞌtale. Jech mu xaqꞌuexavic ta stojol.  
\v 29 Yuꞌun xanaꞌic xa ti tucꞌ yoꞌon li Jesucristoe, jaꞌ xanaꞌic o nojtoc ti jaꞌ snichꞌnabtac li buchꞌutic tucꞌ li cꞌustic tspasique. 
\c 3  
\s1 Jaꞌ scꞌoplal ti snichꞌnabutic xa li Diose 
\p  
\v 1 Nop avaꞌiic toj cꞌuxutic ta yoꞌon li Jtotic Diose jaꞌ yuꞌun “jnichꞌnaboxuc xa o”, xijyututic. Jaꞌ melel ti snichꞌnabutic xa oe. Li buchꞌutic mu xichꞌic ta mucꞌ li Diose, mu snaꞌic cꞌu sba coꞌontic yuꞌun mu snaꞌic cꞌu sba yoꞌon li Jtotic Diose.  
\v 2 Joꞌoxuc li cꞌuxoxuc ta coꞌone, snichꞌnabutic xa o li Diose, pero mu to bu quilojtic cꞌu sba chijbat. Jaꞌ noꞌox caꞌiojtic ti ta to xijcoꞌolajutic jchiꞌuctic li Cristo li cꞌalal ta xchaꞌtale, yuꞌun ta to xcojtaquinbetic schꞌulsat li Cristoe.  
\v 3 Scotol buchꞌu ta smalaic ta xtal li Cristoe, ta xacꞌulanic ta poquel schoplejal yoꞌonic, jech chtuqꞌuib yoꞌonic jech chac cꞌu chaꞌal tucꞌ yoꞌon li Cristoe. 
\p  
\v 4 Scotol buchꞌu ta saꞌ smulique ta stoy sbaic ta stojol li Diose, yuꞌun ta spꞌajbeic smantal.  
\v 5 Joꞌoxuque xanaꞌic xa ti jaꞌ ta sventa a schꞌaybutic jmultic ti iꞌay ta balumil li Cristoe. Yuꞌun li stuque muꞌyuc onoꞌox smul.  
\v 6 Mi oyutic xa ta scꞌob li Cristoe, mu xa jsaꞌ jmultic. Mi ta to jsaꞌ jmultique, yuꞌun mu to xcojtaquintic li Cristoe, jaꞌ yuꞌun mu jnaꞌtic li cꞌu sba tscꞌane.  
\v 7 Quitsꞌinab, mu me xaloꞌloatic. Mi lec li cꞌustic ta jpastique, yuꞌun tucꞌ coꞌontic jech chac cꞌu chaꞌal tucꞌ yoꞌon li Cristoe.  
\v 8 Mi ta to jsaꞌ jmultique, yuꞌun te to oyutic ta scꞌob li pucuje. Yuꞌun li pucuje jaꞌ la sliques scotol li cꞌustic chopole. Yuꞌun naca mulil ta snopilan o cꞌalal ilic li balumile, jaꞌ jech cꞌalal tana. Jaꞌ yuꞌun iꞌay ta balumil li Snichꞌon Diose yuꞌun jaꞌ a schꞌaybe stsatsal li yabtel li pucuje. 
\p  
\v 9 Yuꞌun snichꞌnabutic xa li Diose, mu xa jsaꞌ jmultic. Yuꞌun liꞌ xa oy ta coꞌontic li Diose, jaꞌ yuꞌun mu xa jsaꞌ jmultic.  
\v 10 Jaꞌ ta xvinaj o li buchꞌutic oy ta scꞌob li Diose schiꞌuc li buchꞌutic oy ta scꞌob li pucuje. Yuꞌun scotol li buchꞌutic chopol li cꞌustic tspasique, mi chopol chil li schiꞌile, yuꞌun maꞌuc snichꞌon Dios. 
\p  
\v 11 Li scꞌop Dios li avaꞌiic li cꞌalal lic achꞌunique, ta xal ti acꞌo jcꞌuxubinan jbatique.  
\v 12 Mu me xapasic jech chac cꞌu chaꞌal la spas li Caine. Li Caine ta scꞌob pucuj oy, jaꞌ tscoj ti la smil li yitsꞌine. ¿Mi xanaꞌic cꞌu chaꞌal la smil li yitsꞌine? La smil yuꞌun jaꞌ chopol li cꞌustic tspas li stuque, jaꞌ lec li cꞌustic tspas li yitsꞌine. 
\p  
\v 13 Li joꞌoxuc li coꞌol quichꞌojtic ta mucꞌ li Cajvaltique, mu me xchꞌay o avoꞌonic mi chopol chayilic li buchꞌutic mu xichꞌic ta mucꞌ li Cajvaltique.  
\v 14 Mi ta jcꞌuxubintic li buchꞌutic coꞌol quichꞌojtic ta mucꞌ li Cajvaltic jchiꞌuctique, jaꞌ ta jnaꞌtic o ti mu xa teuc oyutic li bu sventa chꞌayel chijbat o yuꞌune. Jaꞌ xa te oyutic ta sventa li bu chijcuxiutic o sbatel osile. Yan mi mu jcꞌuxubintic li buchꞌutic coꞌol quichꞌojtic ta mucꞌ li Cajvaltic jchiꞌuctique, yuꞌun te to oyutic ta sventa chꞌayel.  
\v 15 Scotol buchꞌu chopol chil li yermanotaque, coꞌol schiꞌuc jmilvanej. Pero li jmilvaneje jnaꞌojtic ti muc bu yichꞌoj scuxlejal sventa sbatel osile.  
\v 16 Li Jesucristoe iyacꞌ quiltic li cꞌu sba ta jcꞌuxubinan jbatique yuꞌun iyacꞌ sba ta milel ta jcojtic. Jaꞌuc me jechucutic eꞌuc, acꞌo me jcoltatic li jchiꞌiltactique manchuc mi te chijlaj ta milel ta scojic.  
\v 17 Mi oy cꞌustic oy cuꞌuntic liꞌ ta balumile, mi chquiltic ti oy buchꞌu mu cꞌusi oy yuꞌune, mi mu jqꞌuelanbetic jutuc li cꞌusi oy cuꞌuntique, altic chcaltic ti oy ta coꞌontic li Diose.  
\v 18 Quitsꞌinab, mu me alticuc noꞌox chlocꞌ ta quetic ti chijcꞌuxubinvane, mu me jutic cꞌop. Acꞌo vinajuc ta sventa li cꞌustic ta jpastic schiꞌuc li cꞌustic chcacꞌtic ti ta melel chijcꞌuxubinvanutique. 
\p  
\v 19-20 Mi chijcꞌuxubinvanutique, jaꞌ chcaꞌi o jbatic ti snichꞌnabutic li Diose. Jaꞌ yuꞌun mu xcꞌopoj coꞌontic mi oy chtal ta coꞌontic ti maꞌuc snichꞌonutique. Yuꞌun li Diose snaꞌoj mi ta melel mi staoj o yav coꞌontic ti chijcꞌuxubinvane.  
\v 21 Joꞌoxuc ti cꞌuxoxuc ta coꞌone, mi muꞌyuc cꞌusi chal coꞌontique, jech muc bu chijxiꞌ li cꞌalal ta jtatic ta naꞌel li Diose.  
\v 22 Jech scotol li cꞌusi ta jcꞌanbetique, chijyacꞌbutic yuꞌun ta jchꞌunbetic li smantaltaque schiꞌuc ta jpasbetic li cꞌustic tscꞌane.  
\v 23 Jaꞌ smantal Dios ti acꞌo jchꞌuntic ti jaꞌ Cajcoltavanejtic li Snichꞌone, jaꞌ li Jesucristoe. Jaꞌ smantal nojtoc ti acꞌo jcꞌuxubinan jbatique.  
\v 24 Mi jaꞌ ijchꞌunbetic li smantaltaque, te oyutic o ta scꞌob. Liꞌ oy o ta coꞌontic eꞌuc li Diose. Ta jnaꞌtic ti liꞌ oy ta coꞌontic li Diose yuꞌun jaꞌ chacꞌ jnaꞌtic li Chꞌul Espíritu li yacꞌojbutique. 
\c 4  
\s1 Jaꞌ scꞌoplal li buchꞌutic yichꞌojic li Chꞌul Espíritu schiꞌuc li buchꞌutic muc bu yichꞌojique 
\p  
\v 1 Li joꞌoxuc li coꞌol quichꞌojtic ta mucꞌ li Cajvaltique, ti cꞌuxoxuc ta coꞌone, mu me xachꞌunic cꞌusiuc noꞌox chaꞌalbatique. Aꞌiic lec baꞌi mi jmoj schiꞌuc scꞌop Dios li cꞌusi ta xalique. Yuꞌun oy ep jloꞌlovanejetic liꞌ ta balumile ti scꞌop Dios chalic spꞌisoj sbaique.  
\v 2 Ta sventa li cꞌusi chalique, jaꞌ ta xvinaj o mi jaꞌ yichꞌojic li Chꞌul Espíritu ti junic schiꞌuc li Diose. Mi jamal chalic ti iꞌay ta balumil li Jesucristoe, ti iyichꞌ sbecꞌtal jech chac cꞌu chaꞌal li joꞌotique, jaꞌ yichꞌojic li Chꞌul Espíritu ti junic schiꞌuc li Diose.  
\v 3 Yan mi mu jamaluc chalic ti iꞌay ta balumil li Jesucristoe, ti iyichꞌ sbecꞌtal jech chac cꞌu chaꞌal li joꞌotique, muc bu yichꞌojic li Chꞌul Espíritu ti junic schiꞌuc li Diose. Jaꞌ coꞌol yoꞌonic yaꞌel schiꞌuc li yajcontra li Cristoe. Avaꞌiojic ti ta onoꞌox xtal li yajcontra li Cristoe. Oy xa liꞌ ta balumil li avie li buchꞌu jech yoꞌonic jech chac cꞌu chaꞌal li yajcontra Cristoe. 
\p  
\v 4 Quitsꞌinab, joꞌotique snichꞌnabutic xa li Diose, jaꞌ yuꞌun jpasojtic xa ta canal li jloꞌlovanejetique. Yuꞌun scotol xuꞌ yuꞌun li Dios ti liꞌ oy ta coꞌontique. Yan li pucuj li te oy ta yoꞌon li buchꞌutic muc bu yichꞌojic ta mucꞌ li Diose, mu xuꞌ yuꞌun.  
\v 5 Li scꞌop Dios ti chalic ti yalojique yuꞌun stuc noꞌox snopojic. Scꞌop noꞌox crixchano li ta xalique. Li crixchanoetique jaꞌ lec chaꞌiic li cꞌustic ch‐albatique yuꞌun sventa noꞌox osil balumil.  
\v 6 Yan li joꞌoncutique acꞌbil cabtelcutic yuꞌun Dios, jaꞌ yuꞌun jaꞌ scꞌop Dios li chcalcutique. Li buchꞌutic xojtaquinic xa li Diose chaqꞌuic ta venta li jcꞌopcutique. Yan li buchꞌutic mu xojtaquinic li Diose mu xaqꞌuic ta venta li jcꞌopcutique. Jaꞌ yuꞌun ta xcojtaquintic o li buchꞌutic ta melel jaꞌ scꞌop Dios ti chalique. Ta xcojtaquintic o nojtoc li buchꞌutic jloꞌlovanejetique. 
\s1 Jaꞌ scꞌoplal ti acꞌo cꞌuxubinvancutic jech chac cꞌu chaꞌal li Diose 
\p  
\v 7 Li joꞌoxuc li coꞌol quichꞌojtic ta mucꞌ li Cajvaltique, ti cꞌuxoxuc ta coꞌone, acꞌo me jcꞌuxubinan jbatic. Li Diose chiscoltautic ti acꞌo jcꞌuxubinan jbatique. Mi chijcꞌuxubinvanutique, yuꞌun snichꞌnabutic xa li Diose, xcojtaquintic xa.  
\v 8 Yan mi mu xijcꞌuxubinvanutique, yuꞌun mu to xcojtaquintic Dios yaꞌel, yuꞌun stalel onoꞌox li Dios ti chcꞌuxubinvane.  
\v 9 Li Diose laj yacꞌ quiltic ti chiscꞌuxubinutique yuꞌun la stac talel ta balumil li Snichꞌone. Pero cꞌajomal jun Snichꞌon oy. Ti la stac talele, jaꞌ sventa chijcuxiutic o sbatel osil.  
\v 10 Jaꞌ iyacꞌ ta ilel li cꞌu sba ta jcꞌuxubinan jbatique. Yuꞌun mu joꞌcuticuc baꞌi oy ta coꞌontic li Diose; joꞌotic baꞌi cꞌuxutic ta yoꞌon. Jaꞌ yuꞌun la stac talel li Snichꞌone, a stojbutic jmultic. 
\p  
\v 11 Joꞌoxuc ti cꞌuxoxuc ta coꞌone, ti cꞌuxutic ta yoꞌon li Diose, jech me acꞌo jcꞌuxubinan jbatic eꞌuc.  
\v 12 Acꞌo mi mu xquiltic li Diose, pero mi ta jcꞌuxubinan jbatique, liꞌ oy ta coꞌontic li Diose. Jaꞌ yuꞌun xuꞌ cuꞌuntic chijcꞌuxubinvanutic jech chac cꞌu chaꞌal chcꞌuxubinvan li Diose.  
\v 13 Ti ta jnaꞌtic o ti oyutic ta scꞌob li Diose, schiꞌuc ti ta jnaꞌtic o ti liꞌ oy ta coꞌontique, jaꞌ ta sventa li Chꞌul Espíritu li yacꞌojbutique ti junic schiꞌuc li Diose.  
\v 14 Li joꞌoncutique iquilcutic, jnaꞌcutic ti ta melel la stac talel ta balumil li Snichꞌon li Jtotic Diose. Jaꞌ Jcoltavanej ta sventa scotol crixchanoetic.  
\v 15 Li buchꞌu jamal chal ti jaꞌ Snichꞌon Dios li Jesuse, yuꞌun te oy ta yoꞌon li Diose. Ta scꞌob Dios oy. 
\p  
\v 16 Jnaꞌojtic xa, jchꞌunojtic ti cꞌuxutic ta yoꞌon li Diose. Li Diose stalel onoꞌox ti chcꞌuxubinvane. Mi chijcꞌuxubinvan eꞌuque, yuꞌun oyutic ta scꞌob. Liꞌ oy ta coꞌontique.  
\v 17 Jech xuꞌ cuꞌuntic ta jcꞌuxubinan jbatic. Jaꞌ yuꞌun mu xijxiꞌ li cꞌalal ta xcꞌot scꞌacꞌalil ta xꞌichꞌbat scꞌop scotol li crixchanoetique, yuꞌun cꞌalal liꞌ oyutic ta balumile, jech coꞌontic jech chac cꞌu chaꞌal yoꞌon li Diose.  
\v 18 Li buchꞌu ta schꞌun ti cꞌuxubinbil o yuꞌun li Diose, muc bu ta xiꞌ. Ta xcom yuꞌun li xiꞌele yuꞌun snaꞌoj ti cꞌanbil oe. Yan li buchꞌu ta to xiꞌe, yuꞌun ta to snop ti ch‐acꞌbat yichꞌ vocol yuꞌun li Diose. Yuꞌun mu schꞌun ti cꞌanbil oe. 
\p  
\v 19 Ti oy xa ta coꞌontic li Diose, yuꞌun jaꞌ baꞌi cꞌuxutic ta yoꞌon.  
\v 20 Mi chcaltic ti oy ta coꞌontic li Diose, pero mi chopol chquiltic li jchiꞌiltique, jutcꞌoputic. Yuꞌun mi mu jcꞌuxubintic li jchiꞌiltic ti liꞌ jqꞌuelojtique, ¡mi la jaꞌ xa oy ta coꞌontic li Diose ti muc bu liꞌ jqꞌuelojtique!  
\v 21 Li smantal li Dios li albilutic comele jech chal: “Oyuc me ta avoꞌonic li Diose, cꞌuxubinic nojtoc la achiꞌiltaquique”, xi. 
\c 5  
\s1 Jaꞌ scꞌoplal ti jaꞌ to jech ta jpastic o ta canal li cꞌustic sventa noꞌox osil balumile 
\p  
\v 1 Mi jchꞌunojtic ti jaꞌ tꞌujbil yuꞌun Dios ti chventainvan li Jesucristoe, snichꞌnabutic xa Dios. Jech chac cꞌu chaꞌal mi cꞌux chcaꞌitic li jvoqꞌuebal totic liꞌ ta balumile, jaꞌ noꞌox jech cꞌux chcaꞌitic li jchiꞌiltactic ta voqꞌuele.  
\v 2 Jaꞌ noꞌox jech nojtoc, mi oy ta coꞌontic li Diose, schiꞌuc mi jchꞌunojbetic li smantaltaque, jech cꞌux ta coꞌontic li buchꞌutic coꞌol quichꞌojtic ta mucꞌ li Dios jchiꞌuctique.  
\v 3 Yuꞌun mi oy ta coꞌontic li Diose, ta jchꞌunbetic li smantaltaque. Mu xa vocluc ta chꞌunel chcaꞌitic li smantale yuꞌun oy ta coꞌontic li Diose.  
\v 4-5 Yuꞌun snichꞌnabutic xa li Diose, jaꞌ to jech ta jpastic o ta canal li cꞌustic sventa noꞌox osil balumile. Ti jech ta jpastic o ta canal li cꞌustic sventa noꞌox osil balumile, yuꞌun jchꞌunojtic ti jaꞌ Snichꞌon Dios li Jesuse. 
\s1 Jaꞌ scꞌoplal ti jaꞌ li Chꞌul Espíritu chijyacꞌbutic jnaꞌtic ti jaꞌ Snichꞌon Dios li Jesucristoe 
\p  
\v 6 Jaꞌ Snichꞌon Dios ti laj yichꞌ joꞌ li cꞌalal lic stsac yabtele, schiꞌuc li la smal schꞌichꞌel li cꞌalal ilaj li yabtele. Jaꞌ li Jesucristoe. Maꞌuc noꞌox Snichꞌon Dios ti cꞌalal iꞌabtej liꞌ ta balumile. Jaꞌ Snichꞌon Dios o ti cꞌalal la smal schꞌichꞌel ta cruze. Li Chꞌul Espíritue jaꞌ chacꞌ jnaꞌtic ti jaꞌ Snichꞌon li Diose. Melel li cꞌusi chale.  
\v 7 Te ta vinajele oy oxvoꞌic yaꞌel ti chijyalbutic ti jaꞌ Snichꞌon Dios li Jesucristoe. Li Jtotic Diose yaloj ti jaꞌ Snichꞌon li Jesucristoe. Schiꞌuc li Jesucristoe ti a yalbutic cꞌu sba yoꞌon li Diose, laj yal ti jaꞌ Stot li Diose. Schiꞌuc li Chꞌul Espíritue itaque yalel ta sventa chijyalbutic eꞌuc ti jaꞌ Snichꞌon Dios li Jesucristoe.  
\v 8 Liꞌ ta balumile oy oxchop nojtoc li cꞌusi iquilcutic oe ti jaꞌ Snichꞌon Dios li Jesucristoe. Jaꞌ te ivinaj o li cꞌalal laj yichꞌ joꞌe, schiꞌuc li cꞌalal ismal schꞌichꞌel ta cruze. Schiꞌuc li Chꞌul Espíritue chijyalbutic ti jaꞌ Snichꞌon Dios li Jesuse.  
\v 9 Li cꞌusi chijyalbutic li crixchanoetique ti chalic ti melel yilojique, ta jchꞌuntic, pero jaꞌ más to tsots scꞌoplal ta jchꞌuntic li cꞌusi chijyalbutic li Diose. Yuꞌun li Diose laj xa yalbutic ti jaꞌ Snichꞌon li Jesuse.  
\v 10 Mi jchꞌunojtic ti jaꞌ Cajcoltavanejtic li Jesuse, jaꞌ ta jnaꞌtic o ti jaꞌ Snichꞌon Diose. Mi mu jchꞌuntic ti jaꞌ Cajcoltavanejtic li Jesuse, jaꞌ chcꞌot ta jutcꞌop cuꞌuntic li Diose, yuꞌun mu jchꞌuntic ti yaloj ti chijcuxiutic sbatel osil ta sventa li Snichꞌone.  
\v 11 Chvinaj ti ta melel jech yaloje yuꞌun quichꞌojtic xa jcuxlejaltic sventa sbatel osil ta sventa li Snichꞌone.  
\v 12 Mi icojtaquintic xa li Snichꞌon li Diose, quichꞌojtic xa jcuxlejaltic sventa sbatel osil. Mi mu to xcojtaquintic li Snichꞌon li Diose, muc bu quichꞌojtic jcuxlejaltic sventa sbatel osil. 
\s1 Jaꞌ scꞌoplal ti cꞌu sba ta jnaꞌtic o ti chijcuxiutic sbatel osile 
\p  
\v 13 Joꞌoxuc ti achꞌunojic ti jaꞌ Avajcoltavanejic li Snichꞌon li Diose, la jtsꞌibaboxuc liꞌi yoꞌ jech chanaꞌic o ti chacuxiic o sbatel osile. 
\p  
\v 14 Yuꞌun snichꞌnabutic xa li Diose, jaꞌ yuꞌun mu xijxiꞌ li cꞌalal oy cꞌusi ta jcꞌanbetique, yuꞌun ta jnaꞌtic ti chijyaꞌibutic jcꞌoptic mi jech tscꞌan stuc li cꞌusi ta jcꞌantique.  
\v 15 Mi ta jnaꞌtic ti chijyaꞌibutic jcꞌoptique, ta jnaꞌtic nojtoc ti chijyacꞌbutic li cꞌusi ta jcꞌanbetique. 
\p  
\v 16 Mi oy chquiltic ti chopol li cꞌusi tspasulan jun quermanotic ti mu ta chꞌayeluc chbat oe, jaꞌ scꞌan acꞌo jcꞌoponbetic Dios ti acꞌo yicta li cꞌusi chopol tspase. Li Diose chacꞌ chcuxi sbatel osil. Yan ti mi jaꞌ tspasulan li cꞌusi chopol ti ta chꞌayel chbat oe, muc bu chacalbeic ti acꞌo xacꞌoponbeic Dios ta stojole.  
\v 17 Scotol li cꞌustic chopole jaꞌ mulil, pero oy mu xijbat o ta chꞌayel yuꞌun. 
\p  
\v 18 Li joꞌotic ti cacꞌoj jbatic ta scꞌob li Diose, mu xa jsaꞌ jmultic. Jaꞌ schabiojutic li Snichꞌon li Diose jaꞌ yuꞌun mu xa xispasutic ta canal li pucuje.  
\v 19 Jnaꞌojtic ti oyutic xa ta scꞌob li Diose. Jnaꞌojtic nojtoc ti jaꞌ oyic ta scꞌob pucuj li buchꞌutic mu xichꞌic ta mucꞌ li Diose.  
\v 20 Jnaꞌojtic ti iꞌay liꞌ ta balumil li Snichꞌon li Diose. Yuꞌun laj xa sjambutic jsatic jchiquintic, jaꞌ yuꞌun icojtaquintic xa li batsꞌi cuxul Diose. Oyutic xa ta scꞌob li Diose yuꞌun oyutic xa ta scꞌob li Snichꞌone, jaꞌ li Jesucristoe. Jaꞌ batsꞌi cuxul Dios stuc, muꞌyuc yan. Jaꞌ ta sventa ti chijcuxiutic o sbatel osile.  
\v 21 Quitsꞌinab, qꞌuelo me abaic, mu me cꞌusi yan xavichꞌic ta mucꞌ.