\id 1TI - Kayapó NT -Brazil 2011 (DBL -2013) 
\h Ximoxi kumrẽx 
\toc1 Paur kute Ximoximã pi'ôk kumrẽx no'ôk ne ja. 
\toc2 Ximoxi kumrẽx 
\toc3 Xim k 
\mt1 Paur kute Ximoximã pi'ôk kumrẽx no'ôk ne ja. 
\ip Paur ne krabê Ximoximã pi'ôk no'ôk ne. Mỳjkôt ne o kra? Jejukôt. Kute kum arẽnh nhym kute tu amim markumrẽxkôt ne o kra. Nhym kam arkum aben kĩnhkumrẽx ne. 
\ip Nhym kam Paur kumrẽx ne krĩraxbê Epexukam bôx ne kam ar memã Metĩndjwỳnh'ã ujarẽnh ba ne kam tẽ. Nhym kam Ximoxidjwỳ arỳm kam bôx. Kam tẽn bôx ne kam ar kam memã 'ã ujarẽnh ba, memã Jeju jarẽnho ba. Nhym me kwỳ arỳm prĩne amikajmãtã Jeju ma. Nhym bep ar kwỳ ne ar arĩk 'êx ne kute amijo Jeju mar. Ar kute mar kêtkumrẽx ne arĩk 'êx ne memã mỳjja jarẽ. Nãm we ar, 
\ip —Kwãrĩk wãnh abenwỳr mõr kêt, ane. Ne, 
\ip —Mrywã kur kêt, ane. Nãm ar ã kupa'ã me akre ar o bao ane. Ar ja 'ã ne Paur Ximoximã kum, 
\ip —Dja ga akabẽno ar ity gê ar anhikrê, ane. Ne kam ajte me kute amim Jeju mar'ã kum karõ ne kum, 
\ip —Ẽ, Jeju nhõ me jao ba djwỳnhmẽ me atãri àpênhjamẽ gêdja ar katàt mrãn memã Metĩndjwỳnh'ã ajarẽ, ane. Ne kam Ximoximãdjwỳ kum, 
\ip —Ẽ, gadjwỳ, gadjwỳ dja ga katàt mrãn Metĩndjwỳnh kabẽnkôt prĩne memã arẽ, ane. 
\ip Ne kam ajte me'ã kum karõ, me Metĩndjwỳnh kabẽnkôt katàt mrãnhmã, me mymẽ me niremẽ me ari memã àpênh kajgo ar bajamẽ me 'uwtĩmẽ, me kunĩ. Me kunĩ ne me Metĩndjwỳnh kabẽnkôt katàt mrãnhmã ajte Ximoximã me'ã karõ. Ne kam me'ã kum pi'ôk no'ôk ne kum ano. Tãm ne ja. 
\c 1  
\p  
\v 1-2 Akmere Ximoxi, ba ibê Paur ne ba amã pi'ôk no'ôk ne. Ximoxi, ikra djwỳnh, amã ne ba pi'ôk no'ôk ne. Ije amã Jeju jarẽnh ga tu aje amim markumrẽx kôt ne ba arỳm ajo ikrakumrẽx ne. Ba ibê Paur, ne ba amã pi'ôk no'ôk ne. Djãm ba ne ba Jejumã idjàpênh? Kati, Metĩndjwỳnhmẽ Kritu Jeju ar ta ne ar imã idjàpênh jarẽn ijano, ije memã 'ã idjujarẽnhmã ijano. Metĩndjwỳnh, kute gu bapytàr djwỳnhjamẽ Kritu Jeju gu baje amiwỳr kam amakjamẽ, ar ta ne ar imã kabẽn jarẽ ba kam arkum idjàpênh iba. 
\p Be, gê Metĩndjwỳnh ajo djuw mex. Kritu Jeju gu banhõ Bẽnjadjwỳrmẽ Bãmbê Metĩndjwỳnh ar ukaprĩkôt ajo djuw mex ne ar ajo ba. Gê arkum akaprĩ ne amã umar mex jarẽ, ga kam adjumar mex ne ar aba. 
\s1 Kute Metĩndjwỳnh kabẽn jarẽnh djwỳnh 'êxnhĩ bôxmã arẽnh. 
\r Rô 16.17; Xim k 6.3; Xit 1.10 
\p  
\v 3 Ẽ, dja ga arek Epexukam djan nêje ar kukrà. Wãnh ne ar kwỳ arĩk kupa'ã ar memã arẽnho ba, Metĩndjwỳnh kabẽn kupa'ã ar memã arẽnho ba. Dja ga nêje akabẽno ar ity. Nã bãm itẽm kutã, pykabê Matenimã itẽm kutã amã ikabẽn jarẽn kam arỳm ajbir ajte ar'ã amã pi'ôk no'ôk ne ano. 
\p  
\v 4 Dja ga arkum, 
\p —Kwãrĩk wãnh ar me tũmre'ã ujarẽnh kajgomẽ me akukãmãre nhidji me kute tũmràm abenmã arẽnhja kwãrĩk on wãnh nõ. Kôt ne me abenmã kabẽn ar ban kam me kute amim Metĩndjwỳnh mar ne 'ãno ãm kêt. Tãm dja on wãnh nõ, ane. 
\p  
\v 5 Akmere Ximoxi, mỳj kadjy ne ba amã ikabẽn ja jarẽ? Bir, me kum aben jabê kadjy. Godja me õkre kadjwỳnhbê axwe 'õ nõr kêt ne kute amikam axwe 'õ mar kêtkam arỳm kôt kum aben jabê. Ne kam ajte me kute mrãmri amim Jeju markumrẽx kôt ne me kum aben jabê. Kadjy ne ba amã ikabẽn ja jarẽ. 
\p  
\v 6 Bir be, me kwỳ arỳm kute ja mar prãm kêtkam arỳm kabẽn kajgoo kumex, ne abenkam kangao kumex. Jabit ne me kuma.  
\v 7 Djãm me ja kute mỳjja mar got. Kute Môjdjê kukràdjà mar kêtjakam kukràdjà kupa'ã ar memã arẽnho ba. Ar ta ne ar amijo memã mỳjja'ã ujarẽnh djwỳnh ne. Ne kute memã, 
\p —Mrãmri ne ba ije me amã arẽnhja. Kôt ne ba me amã arẽ, anhỹr ar o ba. Bep kati, ar kute ta amikabẽn mar kêt ne Môjdjê kukràdjà mar kêt. 
\p  
\v 8 Be, Môjdjê kukràdjàja ne mexkumrẽx. Gu arỳm kuma. Ne ren ar kuman kôt ar amijo ba nhym arỳm rãn mexkumrẽx. Nhym bep kati, ar ja kute mar kêt ne ar kupa'ã memã arẽnh ar o ba. 
\p  
\v 9 Be, nhỹnh me jamã ne Môjdjê kukràdjàja? Djãm me kute katàt amijo bajamã? Kati, me kute axweo amiptàrjamẽ, me amakkre kêtjamẽ, me kute Metĩndjwỳnh mar prãm kêtjamẽ, me axwejamẽ, me kute mỳjja punubit mar prãmjamẽ, me kute Metĩndjwỳnh japrỳjamẽ, me kute nãmẽ bãm ar parjamẽ, me kute me parjamẽ  
\v 10 me prõ nàr mjên prãmjamẽ, me my ta kute aben nĩnho bajamẽ, me kute mekbê krao àkĩnhjamẽ, me 'êxnhĩjamẽ, me kute me kà mex jarẽnhjamẽ, nàr me kute mỳjjao amiptàr, Metĩndjwỳnh kute katàt memã amikukràdjà jarẽnh ne mekbê mỳjja pyma nhym me kute o amiptàrjamẽ. Me ja kunĩ kadjy ne Môjdjê kukràdjàja. Gu arỳm kuma. 
\p  
\v 11 Nà, Metĩndjwỳnh amikabẽn nykôt katàt memã amikukràdjà jarẽ. Djãm kabẽn ny punu got. Axwe mextire. Metĩndjwỳnh ne mexo, umao me rer mex ne. Nhym kabẽn nydjwỳ ã mexo, umao ane. Nhym kam ta, Metĩndjwỳnh kĩnhtire ta ne imã amijã ujarẽnh ny jarẽn ijano ba kam ô'ã memã arẽnho tẽ, memã 'ã idjujarẽnh tẽ. 
\s1 Kritu kum Paur kaprĩ ne kute àpênh 'ã mẽnh. 
\p  
\v 12 Ẽ, akmere, mrãmri ne Kritu Jeju gu banhõ Bẽnjadjwỳr amim idja. Kum idjàpênhmã ne amim idja. Nãm amikajmã'ã ima, ije 'ã ingrà tỳx ne kanga kêtmã kôt tu iman amim idjan imã idjàpênh jarẽ. 
\p —Dja ga imã apê, ane. Ne kam kadjy imã tỳx jadjà ba kam kum idjàpênh mex ar iban kôt kum amikĩnh jarẽ. Mrãmri ne Kritu Jeju imã mexkumrẽx ba kam kum amikĩnh jarẽ. 
\p  
\v 13 Amrẽbê ne ba Jeju japrỳ ar o iban arĩk ũno iban Jeju nhõ me jao ibikẽnho iba. Nã bãm te Jejukam ijaxwe nhym tu kum ikaprĩn kam amim idja. Nà, mrãmri ne tu kum ikaprĩ. Kraxje ije amikajmã'ã Jeju mar kêtkam ije amimar kêt nhym bi kum ikaprĩ.  
\v 14 Nãm gu banhõ Bẽnjadjwỳr tu ukaprĩkôt kum ikaprĩ raxkumrẽx ne prĩne ijo djuw mex. Djãm ukaprĩ kêt got. Kum ikaprĩ rax ba arỳm jakam ije amikajmã'ã amim markumrẽx. Ije amikajmã'ã Kritu Jeju markumrẽx ne imã abê:kumrẽx. 
\p  
\v 15 Ẽ, mrãmri ne me abenmã kum, 
\p —Kritu Jeju arỳm pykamã ruw, kute me axwe pytàrmã ne ruw, ane. Mrãmri ne me abenmã arẽ. Kabẽn ja dja me tu markumrẽx ne amijamakkrekam kunhô. Be, kute me axwe pytàrmã ne pykamã ruw. 
\p Ba ne ba ijaxweo me axwe kunĩ jakre.  
\v 16 Te ijaxwe rax nhym bi kum ikaprĩ rax ne. Jeju Kritu kute akrànmã meo tẽm nhym me kute mar kadjy. Te ijaxwe raxo ije me kunĩ jakrenh nhym mã Jeju kute akrànmã prĩ'ã ijo tẽmja pumũ. Mỳkam? Godja me'õ kute ijaxwe pyràk ne kute Jeju japrỳ jabej dja ikôpdji'ã ã ikudjwa anen tu amim Jeju kamnhĩxkumrẽx ne kam ikudjwa tyk nhijukri tĩn rã'ã rã'ã kadjy. Kadjy ne Jeju kum ikaprĩn akrànmã prĩ'ã ijo tẽ. Kam ne ba amã, 
\p —Jeju kute me axwe pytàrmã ne pykamã ruw, ane. 
\p  
\v 17 Be, Metĩndjwỳnh djukaprĩja pumũ. Kumã dja me rax jarẽ. Djãm bẽnjadjwỳr ngri got. Dja memã Bẽnjadjwỳr rax rã'ã: rã'ã Bẽnjadjwỳr rax. Dja tyk kêtkumrẽx ne. Me kute noo omũnh kêtkumrẽx ne. Kubê Metĩndjwỳnh pydji. Atemã 'õ kêtkumrẽx. Kumã dja me rax jarẽn kum uma jarẽn mex jarẽ. Dja me kum arẽnh rã'ã: rã'ã ne. Mrãmri. Tãm ne ja. 
\p  
\v 18 Ẽ, ikra Ximoxi, akmere, ba arỳm amã ikabẽn jarẽ. Gora ikabẽn ja ma. Amrẽbê ne me Metĩndjwỳnh kabẽn jarẽnh djwỳnh adjàpênhmã akabin prĩne adjàpênh'ã amã karõ. Kôt ne ba amã ikabẽn ja jarẽ. Ẽ, dja ga ar ikabẽn ja man kôt atỳx ne. Ẽ, ba me abenwỳr prõt'ã atỳx jakre. Ẽ, gora atỳx. Gora atỳx ne amã me uma kêt ne kàj bê memã Metĩndjwỳnh kabẽn jarẽ gê me amikajmãtã kuma. Kute me tỳx kum me uma kêt ne tu kute abenwỳr prõtja pyràk. 
\p  
\v 19 Nà, dja ga ã anen Jeju'ã angrà tỳx ne amim mỳjja mexbit man kôt amijo aban kam amikam ajaxwe 'õ mar kêtkumrẽx ne ar aba. 
\p Nhym bep me kwỳ ne me arỳm Jeju'ã ngrà tỳx kêt ne kôt amijo ba kêt ne kam arỳm kangan amijo ajkẽ.  
\v 20 Be, Imenemẽ Arexãrimẽ ne ar arỳm Jeju kangan amijo ajkẽ. Arỳm ne ar amijo ajkẽ. Kam ne ba arỳm Xatanajmã ar kanga, ar kute Jeju japrỳ kêt kadjy ne ba arỳm kum ar kanga. 
\c 2  
\p  
\v 1 Be, akmere, ba amã arẽ ga aman amũ idjô'ã memã arẽ. Dja me Metĩndjwỳnhmã mã kabẽn ne kum me kunĩ jarẽ. Mã ne mete Metĩndjwỳnhmã kabẽn kute? Dja me kum aben jarẽn kum abeno a'uw. Ne kam jãm meo akẽx ne me jadjwỳ kum meo a'uw. Ne kôt kum õdjành jarẽn kum amikĩnh jarẽ.  
\v 2 Nà, dja gu me kum pykakam me bẽnjadjwỳr rũnhjao a'uw ne kam ajte me bẽnjadjwỳr kry kute meo ba jadjwỳo a'uw. 
\p Mỳkam? Bir, me kute akrànmã me bajo ba gu me badjumar mex ne ar baba kadjy. Kam dja gu me Metĩndjwỳnh kabẽnkôt ar baba ne kôt ar amijo baba katàt ne.  
\v 3 Be, me ã kute Metĩndjwỳnhmã kabẽno anhỹrkam mexkumrẽx. Kam dja Metĩndjwỳnh mekam kĩnhkumrẽx. Metĩndjwỳnh kubê me bapytàr djwỳnh dja mekam kĩnhkumrẽx. 
\p  
\v 4 Nà, kute me kunĩ pytàr prãmkumrẽx. Nãm arỳm memã katàt kabẽn nhym me kute tu markumrẽxmã.  
\v 5 Nà, Metĩndjwỳnh pydjii ne kam ajte kute Bãm'ã me bamẽnh djwỳnh pydjii, kubêngôkre,\f + \fr 2:5 \ft Kritu ne amijo kubêngôkre kute mrãmri ne apỹnh me õ pyka djàri kunĩkôt me kunĩ: bêngôkreja pyràk. Kubẽ kà jakamẽ me kakrãtykmẽ me babêngôkremẽ ne me kunĩ: bêngôkre. Me kamrômẽ me kukràdjà kunĩ kubêngôkreo aben pyràk. Jakam dja ga Karõ 17.26 jarẽn ama.\f* kubê ne Kritu Jeju. Me bajaxwekam ne gu me Metĩndjwỳnh'ỳr babôx kêt ne. Nhym kam kra ta amijo kubêngôkren me bawỳr bôx ne kam Bãm'ỳr me bajo bôx. Gu me kam arkôt baba. Kute Bãm'ỳr me bajo bôx djwỳnh pydjii. Atemã 'õ kêt, kubêngôkre, kubê ne Kritu Jeju. 
\p  
\v 6 Jeju ta, kute memã amikangan me kunĩ pãnh tyk, tãm ne amrẽbê Metĩndjwỳnh 'ã akati jakre nhym arỳm 'ỳr bôx nhym kam arỳm amijo aptàn memã amikangan me kunĩ pãnh ty, me kunĩ kute mar kadjy. Me kunĩ kute, 
\p —Mrãmri Metĩndjwỳnh kum me bajabên kute me bapytàrmã, anhỹr kadjy. Kadjy ne ty. 
\p  
\v 7 Kam ne Metĩndjwỳnh ijano ba tẽ. Ba ikumrẽx itẽm ne ije memã Metĩndjwỳnh kute me utàr jarẽnhmã. Jeju kute ijanorkôt ne ba me bajtemdjwỳ'ỳr tẽn bôx ne memã kàj bê Metĩndjwỳnh'ã ajarẽ. Nã bãm memã Metĩndjwỳnh kabẽn katàtja, 'êxnhĩ kêtja jarẽ nhym me amikajmã'ã kuma. Kadjy ne ijano ba tẽ. Mrãmri ne ikabẽnja. Ijêxnhĩ kêtkumrẽx. 
\p  
\v 8 Ije, ije ar amã Metĩndjwỳnh jarẽnh gar aje kum akabẽnmã ba ate o akno. Ba akubyn ar amã arẽ gar ama. 
\p Dja pyka kunĩkôt mete abeno bikprõnhkam me my Metĩndjwỳnhmã kabẽn. Dja me prĩne Metĩndjwỳnhmã amijarẽ. Me mexo mexkumrẽx, me kute mỳjja punu 'õ mar prãm kêt, me ja dja me kum kabẽn. Nhym bep me ngryknhĩ, me kute kabẽno aben japanh, me tãm dja me kum kabẽn kêt ne. 
\s1 Me nire kute akrànmã amijo bamã. 
\r Kô k 14.34; Xit 2.3; Ped k 3.1 
\p  
\v 9-10 Nhym me niredjwỳ. Dja me nire kute Jeju marja akrànmã amijo ba mexkumrẽx, kwãrĩk wãnh amimex ne me my nokam mrãnh kêt. Dja ga me apijàm ne ar aba. Mỳkam dja ga me akrãkàbito mex? Nã gãm me amikakrwỳnhmẽ akunhêrmẽ angàmẽ kubẽkà mexmẽ o amimex ne ar aba. Me akrãkàbit ne mex. Me my nomã amrãnh kadjybit aje amikrã ngrành, amikakrwỳnh, ne amimex, ja ne punu. Bep kati, me nire kute, 
\p —Ba ije Jeju mar, anhỹrja dja apỹnh kabẽn mexo amiptàn o amimex. 
\p  
\v 11 Me kute Metĩndjwỳnhkôt abeno bikprõnhkam dja me nire anhikrên nhỹn Metĩndjwỳnh kabẽn maro nhỹ. Akrànmã dja me Jeju nhõ me jao ba djwỳnh kabẽn maro nhỹn amijamakkrekam kunhô.  
\v 12 Kwãrĩk wãnh me nire dja me me my jakre kêt ne me mymã kabẽn jarẽnh kêt ne. Nhym bep me my gêdja me me niremẽ me mymẽ me akre nhym me nire anhikrên me kabẽn maro nhỹ. 
\p  
\v 13 Mỳkam? Bir, Metĩndjwỳnh ne mybê Adão kumrẽx nhipêx ne kam atãri nibê Ewa nhipêx ne.  
\v 14 Be djãm Xatanaj ne Adão noo akno? Kati, nija ne noo akno. Nhym kam nija arỳm Metĩndjwỳnhkam amikrà. Be, kam ne ba amã, 
\p —Kwãrĩk wãnh me nire dja me me my jakre kêt, ane. 
\p  
\v 15 Nija ne te Metĩndjwỳnhkam amikrà nhym mã Metĩndjwỳnh kum me nire jabêkumrẽx ne me kra bixadjwỳr kutã me utà. Me nire kute Jeju marja gêdja me Jeju 'ãno dja ne mã kum me abêkumrẽx ne kute mỳjja punu 'õ mar prãm kêtkam gêdja mexo mexkumrẽx ne mã me my nomã mrãnh kêt. Godja me ã kute anhỹr jabej nhym Metĩndjwỳnh me kra bixadjwỳr kutã me utà nhym me kra me bĩn kêt ne. 
\c 3  
\s1 Kute ar kute Jeju nhõ me jao ba djwỳnhmã 'ã karõ. 
\r Xit 1.6 
\p  
\v 1 Be mrãmri ne me abenmã kum, 
\p —Gêdja me'õ kute meo ba prãm jabej, kute Jeju nhõ me jao ba prãm jabej, mrãmri mexkumrẽx. Nà, mrãmri mexkumrẽx. Nà, kôt ne me kute arẽnhja. 
\p  
\v 2 Be, mã gêdja Jeju nhõ me jao ba djwỳnh kute? Me axwe kêt ne kute amijo ba mextire nhym kam me me'ã kabẽn kêtja, me prõ pỹnh, me bixaêr punu kêt, me kute amipnênh ne ar ba, me kabôt kati, me kute meo djuw mex prãm, me kute memã Metĩndjwỳnh'ã ujarẽnh prãm, me ja gêdja me Jeju nhõ me jao ba. 
\p  
\v 3 Kwãrĩk wãnh me kum kadjwati kangô\f + \fr 3:3 \ft Mỳjja me kute o kõm ne kôt bibãnh kunĩja, kadjwati kangômẽ uba kangômẽ, mỳjja kangô kunĩ ne me kum kadjwati kangô jarẽ.\f* djành, me àkrê, me kute kabẽno me apanh prãmja, me kute pi'ôk kaprĩbit mar ne kute amim o àptàrja, kwãrĩk wãnh me ja gêdja me meo ba kêt ne. Bep kati, me ukaprĩmẽ, me kute umar mex marja dja me Jeju nhõ me jao ba. 
\p  
\v 4 Dja me'õ meo ba prãm jabej dja kumrẽx amim prõmẽ kra jakre, ne arkum mrãnh mextire gê ar omũn kam adjwỳnhdjwỳ kôt mrãnh mexkumrẽx. Dja amim ar jao ba mex nhym kra amakkre mex ne kabẽnkôt ar amijo ba nhym kam arỳm kôt Jeju nhõ me jao ba.  
\v 5 Nok ren me'õja ar meo ban kam prõmẽ kra jakre kêtkumrẽx ne kam Metĩndjwỳnh nhõ me jabit me akre, mã gêdja on? Mã gêdja kam nẽ? Ije, mỳkam ne prõmẽ kraja ar o ba mex kêt nhym kra jaxwe rã'ã? Ije kum bep nãm ren amim prõmẽ krawã kumrẽx jakren kam ren kôt Metĩndjwỳnh nhõ me ja jakre. Mỳkam ne prõmẽ krawã ar o ba kêt ne kam Metĩndjwỳnh nhõ me jabit ar o ba? 
\p  
\v 6 Kwãrĩk wãnh me'õ ajbir kute Jejuo aminhõ ny'õ'ã Jeju nhõ me jao ba djwỳnh mẽnh kêt. Mỳkam? Bir, kute amiraxo àmra nhym kam ren Metĩndjwỳnh kute o bikẽnh karõ dja me kute Jejuo aminhõ ny'õ'ã meo ba djwỳnh mẽnh kêt. Ne ren amiraxo amra nhym ren Metĩndjwỳnh o ajkẽ. Mrãmri kute Xatanajo bikẽnhja pyràk. Xatanaj kute amiraxo àmra nhym kam Metĩndjwỳnh kute prĩne o bikẽnhja pyràk. Ne ren me'õ ajbir kute Jejuo aminhõ ne ren meo ban ren amijo amra, Xatanajkôt amijo amra nhym ren Metĩndjwỳnh adjwỳnhdjwỳ o ajkẽ. 
\p  
\v 7 Nhym bep kati, Jeju nhõ me jao ba djwỳnh dja amijo ba mextire nhym kam me kàtàmdjwỳ kum kĩnh ne kum mex jarẽ. Nãm ren arĩk ar ba nhym kam me kàtàm rãn 'ã kabẽn ne. 'Ã kabẽn nhym kam rãn Xatanaj ikôta, Xatanaj meo ba djwỳnhja nhikôta. 
\p  
\v 8 Nhym Jeju nhõ me jao ba djwỳnh jatãri me àpênhjadjwỳ dja me katàt mrã gê me me'ã kabẽn kêt. Dja me kabẽn mexmẽ me kabẽn punuo aben nhikjê kêt. Dja me kum kadjwati kangô\f + \fr 3:8 \ft Mỳjja me kute o kõm ne kôt bibãnh kunĩja, kadjwati kangômẽ uba kangômẽ, mỳjja kangô kunĩ ne me kum kadjwati kangô jarẽ.\f* djành kêt. Kwãrĩk wãnh gê me pi'ôk kaprĩ prãmebit me noo biknor prãm kêt.  
\v 9 Dja me amim Metĩndjwỳnh kukràdjà markumrẽx ne 'ã ngrà tỳx ne. Metĩndjwỳnh kute me bamãbit amikukràdjào amirĩtja, kukràdjà tãmbit dja me 'ã ngrà tỳx ne maro ba ne mỳjja mexbit mar ar o ba. Mỳjja mexbit mar ar o ban kam amikam axwe 'õ mar kêt. Kadjy dja me Metĩndjwỳnh kukràdjà'ã ngrà tỳx ne ar o ba.  
\v 10 Dja me Jeju nhõ me jao ba djwỳnh jatãri me àpênhja kumrẽx kabi nhym me kabẽn mex ne kam ar kôt àpênh ba. Godja me mrãmri mexkumrẽx jabej ne kam arỳm àpênh ar ba. 
\p  
\v 11 Nhym Jeju nhõ me jao ba djwỳnh jatãri me àpênh prõjadjwỳ. Me adjwỳnhdjwỳ dja me katàt mrã gê me me'ã kabẽn kêt. Dja me me kà mex jarẽnh prãm kêt. Dja me bixaêr punu kêt ne ar ba. Dja me prĩne mrãnh mextiren kabẽn pỹnh ne arẽ. Dja ã Jeju nhõ me jao ba djwỳnh jatãri me àpênh prõja ã ane. 
\p  
\v 12 Be, Jeju nhõ me jao ba djwỳnh jatãri me àpênh gêdja me prõ pỹnh ne. Dja me õ kikre kumrẽxkam amim ar ja jakren arkum mrãnh mexkumrẽx gê ar omũn kam adjwỳnhdjwỳ kôt mrãnh mexkumrẽx. Dja me amim krao ba mexkumrẽx gê ar kabẽn mexkumrẽx ne ar ba.  
\v 13 Godja me atãri me àpênhja mrãmri àpênh mex ne kam arỳm memã amimexo amirĩt nhym me kàtàmja arỳm me mex pumũn kam kum me kĩnh. Gêdja mekam amikam pijàm kêt ne kàjmã djan tu memã Jeju'ã ajarẽ. Me kute amim Kritu Jeju mar tũmkam tu memã 'ã ajarẽ. Bir be, dja ã Jeju nhõ me jao ba djwỳnhmẽ atãri me àpênhmẽ ã ane. 
\p  
\v 14 Be, nã bãm amã ikabẽn'ã pi'ôk no'ôk ne amikukãm ano. Dja ba ĩ wãm kôt tẽ. Nã bãm amim itẽm djà ma.  
\v 15 Nàr kon birãm dja ba amikrà ga prĩne omũn kam kôt memã arẽ, me kute mar kadjy. Metĩndjwỳnh kra kunĩ kute kôt ar amijo ba mar kadjy. Kadjy ne ba amã pi'ôk no'ôk jano. Apỹnh pyka kunĩkôt ne me bakwỳ arỳm amijo Jeju pytà nhym Metĩndjwỳnh arỳm kôt me bajo kra. Gu me kôt arỳm apỹnh banhõ pyka djàri kam aprakamã kôt aben pydji, Metĩndjwỳnh tĩnjakôt mã pyka kunĩkôt aben pydji. Ne me kàtàmmã Metĩndjwỳnh kabẽn jarẽnh ar o baba, Metĩndjwỳnh 'êxnhĩ kêt ne kute katàt kabẽn jarẽnhja memã arẽnh ar o baba. 
\p  
\v 16 Bir be, djãm mỳjja kakrit, djãm mỳjja prĩre, djãm mỳjjao bikẽnh ne gu me arỳm amim kuman kam amim kamnhĩxbê ar baba? Djãm mỳjja ngri: got me tebê kute mar ne ate krãmã? Mrãmri ne Jeju ra:xi. 
\q1 Nãm amijo kubêngôkren\f + \fr 3:16 \ft Kritu ne amijo kubêngôkre kute mrãmri ne apỹnh me õ pyka djàri kunĩkôt me kunĩ: bêngôkreja pyràk. Kubẽ kà jakamẽ me kakrãtykmẽ me babêngôkremẽ ne me kunĩ: bêngôkre. Me kamrômẽ me kukràdjà kunĩ kubêngôkreo aben pyràk. Jakam dja ga Karõ 17.26 jarẽn ama.\f* kato. 
\q1 Nhym Metĩndjwỳnh Karõ kabin axwe kêtmã katon kôt memã arẽ. 
\q1 Nhym kadjy mrãnh djwỳnhdjwỳ arek omũnh ar o ba. 
\q1 Nhym me apỹnh me õ pyka djàri kàj bê memã 'ã ujarẽnho ajmà. 
\q1 Nhym me kam pyka kunĩkôt tu amim markumrẽx ne. 
\q1 Nhym kam Metĩndjwỳnh kàjkwamã o wabi, õ kàjkwa mextiremã o wabi. Õ kàjkwa mexo kute pykabê mỳjja kunĩ jakrenhjamã o wabi. 
\m Nãm ã Jeju raxo ane. 
\c 4  
\s1 Kubê me kabẽn 'êxnhĩ pyma. 
\p  
\v 1 Be, akmere. Anhỹr djwỳnhràm ne Metĩndjwỳnh Karõ arỳm prĩne me bamã arẽ, ne, 
\p —Pyka kute o ino rer 'ỳrkam dja me kwỳ amibê Jeju kangan ate amijo ba. Arỳm kum kĩnh kêt ne kam ate me karõ 'êxnhĩja kabẽn ma, me karõ djujarẽnh punubit man kôt amijo ba, ane. 
\p  
\v 2 Nà, mrãmri me kwỳ dja me me karõ djô'ã me akre. Me ajkwao bit kute Jeju mar ne 'êxja, me tãm ne me õkre kadjwỳnhbê kute mỳjja punubit markam pijàm kêt mex ne arĩk 'êx ba ne me karõ 'êxnhĩ djô'ã me akre ne memã kum, 
\p  
\v 3 —Kwãrĩk wãnh abenwỳr mõr kêt. Dja ga me tu akuprỳkumrẽx ne ar aba, ane. Ne ajte mry'õ nàr me àkur djà'õ mekbê uman memã, 
\p —Kwãrĩk wãnh krẽn kêt, ãm omũ, ane. Nhym bep kati, Metĩndjwỳnh ta ne me bamã mry, me badjàkur djà nhipêx, me baje 'ã kum amikĩnh jarẽnh ne krẽn kadjy ne me bamã ipêx. Me baje amim Jeju markumrẽx ne kam kôt baje mỳjja marja, me bamã ne Metĩndjwỳnh me banhõ kwỳ krẽn djà'ã apỹnh mỳjja nhipêx. 
\p  
\v 4 Be, mỳjja kunĩ Metĩndjwỳnh kute ipêxja ne mexkumrẽx. Djãm mete mry nàr djwỳ'õ kanga kadjy ne Metĩndjwỳnh ipêx? Arkati, me kute Metĩndjwỳnhmã 'ã amikĩnh jarẽnh ne tu kute amim byr ne krẽnmã ne ipêx.  
\v 5 Metĩndjwỳnh kabẽnkôt arỳm mrymẽ apỹnh me badjàkur djà mexkumrẽx. Mỳjja kunĩ ne arỳm mexkumrẽx. Gu me arỳm 'ã kum amikĩnh jarẽ nhym arỳm mexkumrẽx. 
\p  
\v 6 Akmere, dja ga memã arẽ, me kute Jejukôt abeno kamymã ikabẽn ja jarẽ. Godja ga memã ikabẽn ja jarẽn arỳm mrãmri abê Kritu Jeju nhõ àpênhkumrẽx. Nà, Metĩndjwỳnh kabẽn ne gu baje tu amim markumrẽxja, kôt dja ga arek amijo tẽn amijo tẽn kam atỳxkumrẽx. Jeju kukràdjà mexkumrẽx, tãm ne ga arỳm kôt amijo tẽ. Dja ga arek kôt amijo tẽn amijo tẽn arỳm atỳxkumrẽx. Atỳx ne arỳm Kritu Jejumã adjàpênh mex ne. 
\p  
\v 7 Nhym bep me tũmre'ã ujarẽnh kajgoja dja wãnh nõ. Tãm ne punu. Kati, dja ga prĩne Metĩndjwỳnh kukràdjàkôt amijo tẽ. Katàt amrãnh kadjy dja ga arek amijo tẽn arek amijo tẽn kam amitỳxmã amijakre. Djãm akrãkà'ã ne ba amã ane? Kati, akadjwỳnhbê atỳx'ã ne ba amã ane. 
\p  
\v 8 Mrãmri ne me ĩ krãkà tỳx kadjybit amijo djuw mex. Ja ne kàjbê mex. Nhym bep me kadjwỳnhbê me tỳxja mete Metĩndjwỳnh kukràdjàkôt amijo tẽmkam tỳx, ja ne mrãmri mexkumrẽx, tũmràm mexkumrẽx. Pyka jakam gu badjumar mex ne ar baba kadjy mex. Ne kam ajte batyk nhijukri akubyn batĩnkam kadjy mexkumrẽx. Kadjy ne ba amã, 
\p —Metĩndjwỳnh kukràdjàkôt amijo tẽn kam kôt atỳx, kôt amex, ane. 
\p  
\v 9 Mrãmri ne kabẽnja nhym me abenmã arẽ. Kabẽn ja dja me tu markumrẽx ne amijamakkrekam nhôrkumrẽx.  
\v 10 Metĩndjwỳnh kute me kunĩ pytàr djwỳnh, bep me baje amikajmãtã marja ne mrãmri kubê me bapytàr djwỳ:nhkumrẽx. Mrãmri ne gu me amim Metĩndjwỳnh kamnhĩxbê ar baba, Metĩndjwỳnh tĩnja kamnhĩxbê ar baba. Kam ne gu amikukãm kuman kam badjàpênh rax ne memã arẽnho tẽ, batyk djà kêt ne memã arẽnho tẽ. 
\s1 Metĩndjwỳnhmã àpênhkumrẽxmã kum 'ã karõ. 
\p  
\v 11 Be, akmere, dja ga apijàm kêt ne tu memã ikabẽn ja jarẽn memã Metĩndjwỳnh kukràdjà jarẽ.  
\v 12 Kwãrĩk wãnh gê me amã, 
\p —Ỹgê, e kum djãm ajabatành ne ga ar me akreo aba, anhỹr kêt. Bep kati, dja ga te ajbir ajabatành ne mã katàt mrã gê me ajã amijakre, me kute amim Jeju marja ajã amijakre. Kadjy dja ga akabẽn mexbit jarẽnh ar o aban amrãnh mex ne amã me abên amim Jeju markumrẽx ne 'ã angrà tỳx ne aprõ prãm kêt ne ar aba. Dja ga ã ane nhym me ajã amijakren ã akudjwa amijo anhỹro bao ane. 
\p  
\v 13 Dja ga kàj bê memã Metĩndjwỳnh kabẽn jarẽn memã Metĩndjwỳnh kabẽno amirĩt ne memã kukràdjà jarẽ. Ja dja ga 'ãno adjãm rã'ã ba awỳr bôx. Ba ibê Paur dja ba awỳr bôx. 
\p  
\v 14 Amrẽbê ne me kute Metĩndjwỳnh kabẽn jarẽnh djwỳnh arỳm Metĩndjwỳnhmã adjan amã, 
\p —Ẽ, Metĩndjwỳnh ne arỳm amijo apytà ga kum adjàpênhmã. Ta dja amã tỳx jadjà ga kam atỳx ne ar kum adjàpênh aba, ane. Nhym kutã Jeju nhõ me jao ba djwỳnh akrã'ã ikra jadjuw, ga kam Metĩndjwỳnhmã adjàpênh ar aba. Kwãrĩk wãnh Metĩndjwỳnh kute amim adjarwão abiknor kêt. Memã Metĩndjwỳnh kukràdjà jarẽnh 'ãno dja ne mã memã 'ã adjujarẽnh aba. 
\p  
\v 15 Be, dja ga ikabẽnja tu markumrẽx ne amijamakkrekam anhôn kôt amijo mõ. Dja ga ã amijo atẽmo anen arỳm amrãnh mexkumrẽxo tẽn o tẽ nhym me kunĩ arỳm amrãnh mexkôt apumũn kôt amã kato.  
\v 16 Ẽ, ajaxwebê amipnên amrãnh katàt kadjybit amima. Gora memã Metĩndjwỳnh kabẽn jarẽ. Gora memã arẽnh 'ãno dja. Godja ga anen arỳm amiptàn kam o me jadjwỳ pytà, me kute akabẽn maro ỹrjadjwỳ pytà. Tãm ne ja. 
\c 5  
\s1 Mebêngêttemẽ me 'uwtĩ'ã kum karõ. 
\r A Xim 2.24 
\p  
\v 1 Ẽ, godja me kute amim Jeju marwã 'õ, mebêngêtte 'õ, me'õkam amikrà, kwãrĩk wãnh ga kum abẽn tỳx kêt ne akrànmã kum akabẽn ne kum, 
\p —Kwãrĩk wãnh ga ã anhỹr kêt, ane. Mrãmri ne me kra djwỳnh kute bãmmã kabẽnja pyràk, akrànmã kum akabẽn. Dja ga me kraremẽ me nõr nyreo akamyn me adjwỳnhdjwỳmã akabẽn mex jarẽ.  
\v 2 Dja ga mebêngêxteo anãn me adjwỳnhdjwỳmã akrànmã akabẽn. Dja ga me kra pỹnhmẽ me kurerero akanikwỳnhkumrẽx ne memãdjwỳ katàt akabẽn jarẽn mekam apijàm ne meo akanikwỳnhkumrẽx. Dja ga ã me kute amim Jeju mar kunĩmã akabẽn jarẽnho ane. 
\p  
\v 3 Ẽ, akmere, ba amã me 'uwtĩ'ã karõ, ga amũ idjô'ã memã arẽ. Me kute amim Jeju marwã kute akrànmã mebê mjên tykjao djuw mexmã. Me kute amim Jeju marwã dja me me 'uwtĩbito djuw mex.  
\v 4 Nhym bep djãm me'õbê mjên ty nhym arỳm kra nàr kon tàmdjwỳ 'õ arỳm ta amim o djuw mex ne. Me'õ kra 'õ nã kute amim o djuw mex nhym abatành ne arỳm amipãnh amim não djuw mex ne. Ne me'õ tàmdjwỳ 'õ kwatynh 'õ amim tàmdjwỳo djuw mex ne. O djuw mex nhym abatành ne kam amipãnh kwatynho djuw mex ne. Me kute mrãmri Metĩndjwỳnh mar jabej dja ã õ kikre kumrẽxkam amim me 'uwtĩo djuw mexo anen kam atãri amũ me jadjwỳ o djuw mex ne. Kam ne Metĩndjwỳnh arỳm mekam kĩnhkumrẽx ne. 
\p  
\v 5-6 Ate gêdja me'õbê mjên ty nhym arĩk ar ba. Nãm amidjwỳnhbit amiman ar amijo ba. Ne kam kute me'õ tyk pyràk. Tĩnri kute me'õ tyk pyràk, kute Metĩndjwỳnh mar kêtkam, arĩk ar bakam. 'Uwtĩ kajgo ne wã. Kwãrĩk wãnh me wã. Me tãm dja gar aje Jeju marwã o djuw mex kêt. Nhym bep atemã me'õ mjên kubê tyk nhym kam ate: ar ba ne kam amijã Metĩndjwỳnh kamnhĩxkumrẽx ne kam kum kabẽn ne kum amijo a'uwn kam ajte jãm me jao akẽx ne ajte kum meo a'uw. Akamàtkammẽ a'urimẽ kum kabẽn 'ãno dja. Me'õ tãm ne mrãmri 'uwtĩkumrẽx. Tãmbit dja gar aje Jeju marwã o djuw mex ne. 
\p  
\v 7 Dja ga memã ikabẽn ja jarẽ gê me'õ kra nàr kon me'õ tàmdjwỳ õbikwa 'uwtĩo djuw mex. Dja o djuw mex gê me 'ã kabẽn kêt.  
\v 8 Godja me kute amim Jeju mar 'õ ta ũrkwã djwỳnhkam amim me jao djuw mex kêt ne kam arỳm mrãmri axwen arỳm Jeju kabẽn kanga, ne kute axweo me kàtàmja, me kute Jeju mar kêtja jakrenh mex ne. 
\p  
\v 9 Ẽ, ba amã me 'uwtĩ nhõ pi'ôk'ã karõ. Dja ga me 'uwtĩ nhidji pi'ôk no'ôkkam anhô, me kute amim Jeju marwã kute kôt meo djuw mex kadjy. Ẽ, kwãrĩk wãnh me abatành nybê mjên tykwã kwãrĩk wãnh me 'uwtĩkôt pi'ôk no'ôkkam idji nhôr kêt. Kubê mjên tyk bêngêxtebit dja ga idji nhô gê me kute amim Jeju mar meo djuw mex. 
\p Djãm ori arỳm 'ã amex 60 apêx jabej? Djãm ori mjên tĩnri krô'ã mjên kêt nhym kam kubê mjên tyk nhijukri me kute krô'ã o prõ kêt jabej?  
\v 10 Djori kum mỳjja mexbit kĩnh ne ar o ba nhym me kunĩ arỳm kôt omũn abenmã arẽnh jabej? Djori amikôpdji'ã kra jakreo tẽ nhym kudjwa mexkumrẽx jabej? Djori õbikwa kêtkam meo djuw mex jabej? Djori prĩne Metĩndjwỳnh nhõ me wão djuw mex ne memã õdjành jabej? Djori kum me umar punu kaprĩ jabej? Djori kute mỳjja mexo amiptàrkôt kute mỳjja mexbit mar jabej? Djãm ori ã kute anhỹr jabej mrãmri mexkumrẽx, me 'uwtĩkôt pi'ôk no'ôkkam idji nhô, me kute amim Jeju marja kunĩ kute me 'uwtĩ jao djuw mex kadjy. 
\p  
\v 11-12 Nhym bep kwãrĩk wãnh ar abatành nybê mjên tykja kwãrĩk wãnh pi'ôk no'ôkkam me 'uwtĩ ro'ã idji nhôr kêt. Mỳkam? Bir, ar 'uwtĩja kute õbê, 
\p —Ba ikuprỳ gê me'õ iwỳr mõr kêtkumrẽx. Ba tu Kritumã idjàpênhbit, anhỹrja tu o aknon ajte kum me my kĩnh nhym me'õ 'ỳr mõr prãme kum Kritu kĩnh kêt ne kubê amijo akẽx nhym me arỳm 'ã kabẽn ne. 
\p  
\v 13 Nhym ar kam kum ukangabit ma ne kam kikremã ipôko tẽ. Djãm arkum ukangabit? Kati, nãm ar kabẽn prãmdjwỳ, ne me'ã kabẽn tẽ, me pijàm djàbit, mỳjja punubit jarẽnho tẽ. 
\p  
\v 14 Kam ne ba memã kum, 
\p —Dja ar abatành nybê mjên tyk ajte mjên ne kam amim kra mỳ ne kramẽ mjêno djuw mex ne akrànmã àpênh ar ba. Be, nã bãm ã ar abatành nybê mjên tykjamã ane. Mỳkam? Bir, me bakurê djwỳnh kute me bajã kabẽn kêt kadjy.  
\v 15 Bir be, Ar kubê mjên tyk kwỳ arỳm Jeju kangan Xatanajkôt amijo ba. Kam ne ba amã arẽ. 
\p  
\v 16 Nhym bep me kute amim Jeju mar ni 'õ nàr my 'õ õbikwabê mjên tyk jabej ta dja amim õbikwa 'uwtĩo djuw mex. Nhym ate me kute Jejukôt aben pydjija gêdja me'õ 'uwtĩkumrẽx ne ate: ar bajao djuw mex ne. 
\s1 Me kute kàjmã meo ba djwỳnh kamẽnhmã. 
\p  
\v 17 Ẽ, me jadjwỳ. Jeju nhõ me jao ba djwỳnh kute prĩne meo baja, ar tãm dja me kàjmã me kamẽ. Jeju nhõ me jao ba djwỳnh kute memã Metĩndjwỳnh kabẽn jarẽnh ne kute memã o amirĩtkam àpênh rax. Me tãm dja me mrãmri kàjmã me kamẽn memã o pãnh mex ne. Ar kute memã Metĩndjwỳnh kabẽn jarẽnh pãnh. 
\p  
\v 18 Kam ne Metĩndjwỳnh kabẽn'ã pi'ôk no'ôkkam memã, 
\p —Mryti kute amã àpênh ar ba ne kute amã bàygogo 'ykà ka'uko ipôko ãmja kwãrĩk wãnh inhu djuwpre kêt gê ta àpênh pãnh àkur tẽ. Nãm mryti'ã Metĩndjwỳnh nhõ me jao ba djwỳnh jakren àkur'ã kum pãnh jakre. Jeju nhõ me jao ba djwỳnhmã me kute o pãnhmã. Ne ajte Metĩndjwỳnh kabẽnkam ne, 
\p —Me àpênh ne pãnh, ane. Me àpênh me mãnhkutã tãm gêdja memã o pãnh, ane. Kam ne ba amã, 
\p —Dja me Jeju nhõ me jao ba djwỳnhmã o pãnh mex, ane. 
\p  
\v 19 Ẽ, mỳjja 'õdjwỳ dja ba amã arẽ. Gêdja me Jeju nhõ me jao ba djwỳnh'ã kabẽn ne arĩk me kàtàm jarẽ ga tu ate akrã. Djãm me 'êxnhĩ kêt got. Nhym bep me'õ ar amãnhkrut nàr kon amãnhkrut ne ikjê kêt ne mrãmri kute noo axwekôt omũnh ne axikôt arẽnh ga kam arỳm tu 'ỳr tẽn kum akabẽn jarẽ gê amim kato.  
\v 20 Godja mrãmri Jeju nhõ me jao ba djwỳnh kute mekam axwe jabej dja ga tu me kute amim Jeju mar nhipôkri kum abẽn tỳx, me kute maro ỹrja tĩn prãm ne axwe kêt kadjy. 
\p  
\v 21 Ẽ, ba amã mỳjja 'õdjwỳ jarẽ. Dja ga tu memã akabẽno aben pyràk. Dja ga tu me kunĩmã axikôt akabẽn. 
\p Ẽ, Metĩndjwỳnhmẽ Kritu Jejumẽ Metĩndjwỳnh kute amijo kadjy mrãnh djwỳnh pytàr ja, ar kute ikabẽn mar ne ikôt kabẽnkam ne ba mrãmri tu amã ikabẽn jarẽ. 
\p Ẽ, gora ikabẽn ja ma. Ikabẽn kunĩ ma, prĩne ikabẽn ja ma. Ẽ, dja ga me kunĩmã akabẽno aben pyràk. Kwãrĩk wãnh me umaje anhõkre kadjwỳnhbê amim, 
\p —Be, inhõbikwa ne ja. Ba kum ikabẽn kêt, anhỹr kêt. Dja te anhõbikwa, ga tu kum akabẽn jarẽ, apijàm kêt ne tu kum akabẽn jarẽ. 
\p Nàr kon, kwãrĩk wãnh anhõkre kadjwỳnhbê amim, 
\p —Be, tãwã ne õbikwa krãptĩ. Ba kum ikabẽn kêt, anhỹr kêt. Dja te õbikwa krãptĩ ga tu kum akabẽn jarẽ, amã me uma kêt ne tu kum akabẽn jarẽ. Dja ga tu me kunĩmã akabẽno aben pyràk. 
\p  
\v 22 Ẽ, kwãrĩk wãnh ga arĩk aje me kabi kêtkam Metĩndjwỳnhmã me umjỳr kêt, kum àpênh kadjy kum me umjỳr ne 'ã anhikra jadjwỳr kêt. Dja ga anen ano katon tu mar kêt ne Metĩndjwỳnhmã me'õ dja nhym arỳm mekam amikrào ba jabej ga kam ga mãn kute ajaxwe pyràk. Kwãrĩk wãnh ã anhỹr kêt ne mekôt ajaxwe kêt. Ga dja ga tu katàt mrã. 
\p  
\v 23 Ẽ, atikkrekam akanê prãmkam ne ga akanê prãm ne. Kadjy dja ga uba kangô kwỳ ikõ. Uba kangômẽ ngômẽ apỹnh dja ga o akõmo tẽ. 
\p  
\v 24 Ẽ, me kwỳ ne me axwekam amirĩtkumrẽx. Nhym me kunĩ kôt omũn arẽnho kumex. Nhym kam me memã axwe pãnh jarẽ. Nhym bep me kwỳ ne me axwekam amirĩt kêt ne. Metĩndjwỳnh gêdja tũmràm memã o amirĩt ne memã kum katon memã pãnh jarẽ nhym me kam kôt omũ.  
\v 25 Nhym me mexdjwỳ ne me amirĩt ne. Nhym me abenmã me arẽ. Nhym me kwỳ apdju ne. Djãm mrãmri tu bipdjurkumrẽx? Kati, Metĩndjwỳnh gêdja tũmràm memã me mexo amirĩt ne, nhym me arỳm kôt omũ. 
\c 6  
\s1 Me õ àpênh kajgoja'ã kum karõ. 
\r Ep 6.5; Kor 3.22; Xit 2.9; Ped k 2.18 
\p  
\v 1 Ẽ, akmere, dja ga me memã àpênh kajgo ar bawã, me kute meo pãnh ne amim me pa 'amỳnh nhym me memã àpênh kajgo ar ba ne kute amim Jeju mar wãdjwỳmã arẽ gê me õ bẽnjadjwỳr kabẽn kôt amijo ban prĩne kabẽn ma. Mỳkam? Bir, me kàtàm kute Metĩndjwỳnh japrỳ kêt kadjy, ne kute Metĩndjwỳnh kukràdjàdjwỳ japrỳ kêt kadjy.  
\v 2 Dja ga ajte me memã àpênh kajgo ar bawãmã kum, 
\p —Ẽ, djori ar anhõ bẽnjadjwỳrwã ar akudjwa kute Jeju mar jabej kwãrĩk wãnh gar amã kurê kêt. Djãm ar aje Jejukôt abeno akamykam amã kurêmã got. Arkati. Dja gar tu kum adjàpênh mextire ne ar aba. Mỳkam? Bir, ar akamymã ne gar apê. Kute Jeju mar 'õ, Metĩndjwỳnh kum abê 'õ, kumã ne gar apê. Kam dja gar kum adjàpênh mextire ne ar aba, ane. Ã me pardjamã ane. 
\p Ẽ, gora prĩne memã ikabẽn ja jarẽn ikabẽn jao amirĩto aba. 
\s1 Nêkrêxkôtbit me umarja ne me umar mex kêtkumrẽx. 
\p  
\v 3-4 Godja me'õ atemã kabẽn 'õ jarẽnho ku'ê prãm jabej arỳm amijo ajkẽn kam Bẽnjadjwỳr Jeju Kritu kabẽn mexja kubê kĩnh no kati ne kam kôt kabẽn kêt ne. Ne ajte Metĩndjwỳnh kute katàt gu bakrã pymjỳr'ã ujarẽnhja kubê kĩnh no kati ne kam kôt kabẽn kêt ne. Mrãmri ne 'êx ne amiraxbito amran kam kute mỳjja mar kêt mexi. Nãm ajbãn ajmãn me kukràdjà kajgo mex mỳr jabej memã akij. Ne kam kabẽno me apanhbit mar prãm. Ã me kute anhỹr ne punu. Nãm me ã anhỹr ban kam mỳjja kukràdjà'ã ngryk ne abenbê meo bikjêro ban aben japrỳ ne aben kamnhĩx ar o ban  
\v 5 mã kabẽno aben japanh ar o ba. Mỳjwã ne arỳm me ja djumar djà ajmã o nhym me arỳm katàt kabẽnkumrẽxja mar kêt. Nãm me nêkrêx prãme 'êx ne we, 
\p —Be, ba amijo Jeju mar gê inhõ nêkrêx kumex ba kam amimexkumrẽx ne, ane. Nãm me ã nêkrêx prãme amim 'ã karõo ane. Kam ne me abenkam axwe ar baja. 
\p  
\v 6 Mỳjkôt ne me umar mex ne amimex ar o ba? Bir, me kute Metĩndjwỳnh kukràdjàkôt amijo ba ne nêkrêx jabej umar kêtkam ne me umar mex ne ba. Ne amidjumar mexwão amimex ar o ba.  
\v 7 Mỳj ne gu me banã tikkre kurũm amỳn o axidjuw? Kati, nã gu me banhỹkam axidjuw. Me batykkamdjwỳ, mỳj ne gu me amỳn o banhikwãn ty? Kati, nãm gu me banhỹkam banhikwãn ty. 
\p  
\v 8 Bir be, dja me banhõ kwỳ krẽn djàmẽ me banhõ kubẽkà jabej, mrãmri, me bamãnhkutã. Kam dja gu me badjumar mex ne atemã mỳjja 'õ jabej kêt. Metĩndjwỳnh dja me bajo djuw mex ne.  
\v 9 Nhym bep me kute amim nêkrêx nàr pi'ôk kaprĩo àptàr ne kute o amimexja dja me amijo ajkẽ. Nãm me nêkrêx prãme ar axwe ba ne kam te kum nêkrêx prãm kêtmã ne mã nêkrêxbit ma. Ne kum mỳjja kakritmẽ mỳjja punubit kĩnh ne kôt arỳm amijo ajkẽ ne kam arỳm tu biknorkumrẽx ne. 
\p  
\v 10 Bir be, nãm me ã kum nêkrêx nàr pi'ôk kaprĩbit kĩnh ne ã amijo ane. Ne arỳm amijo bikẽnh mex ne. Mỳkam? Bir, nãm me kum nêkrêxbit kĩnh ne kam ajbit man kam kôt apỹnh axwe djàri kunĩkôt amijo ba. Memã nêkrêx prãm kwỳ ne me arỳm Jeju mar kangan kam arỳm amijo ajkẽ, kaprĩo prĩne amijo ajkẽ. 
\s1 Akubyn Ximoximã kute katàt amijo bamã 'ã karõ. 
\p  
\v 11 Nhym bep ga, akmere, ga abê Metĩndjwỳnh nhõ àpênhkam dja ga mỳjja ja kunĩmã akre rax ne. Katàt amrãnh kadjy mỳjja jamã akre rax. Katàt amrãnh ne aje Metĩndjwỳnh kukràdjàkôt amijo aban aje amim Jeju kamnhĩxbê ar aban amã me abên aje akrànmã amijo atẽm, kam dja me ajo ajkẽ ga mã aje akrànmã amijo atẽm ne anhĩ djuwbôn ar abamã, tãm dja ga ama. 
\p  
\v 12 Me kute amim Jeju mar ne kôt amijo tẽm ne kute me kute aben rer pyràk. Me kute aben rerkam ne me tỳx ne prõtobit prõt ne mebê apôx. Kam dja ga 'ã amijakren ã atỳxo anen mã Jejukôt amijo tẽ, kute me prõtja pyràk. Gora ga ã anen kam atyk nhijukri atĩn rã'ã rã'ã rã'ã 'ỳr tu abôxkumrẽxmã. Kadjy ne Metĩndjwỳnh amiwỳr ajuw. Kadjy ne ga me ipôkri memã katàt amijarẽnh mex ne. Nã gãm memã kum, 
\p —Be, arỳm ne ba tu amikajmã'ã Jeju markumrẽx, ane. Nã gãm ane, nhym me apumũ. Kam ne ba amã, 
\p —Arek amijo tẽn kam atyk nhijukri atĩn rã'ã rã'ã rã'ã 'ỳr tu abôxkumrẽx, ane. 
\p  
\v 13 Ẽ, Metĩndjwỳnhmẽ Jeju Kritu ar kute ikabẽn mar ne ikôt kabẽnkam ne ba amã ikabẽn jarẽ. Metĩndjwỳnh ne mỳjja kunĩo tĩn djwỳnh. Ta ne kute ikabẽn mar ne ikôt kabẽn. Kam ne ba amã ikabẽn jarẽ. Nhym Kritu Jejudjwỳ kute katàt amijarẽnh mexja, kute bẽnjadjwỳrbê Põxu Piratu kabem katàt amijarẽnh mexja. Ar kute ikabẽn mar ne ikôt kabẽnkam ne ba amã ikabẽn jarẽ ne amã, 
\p  
\v 14 —Ẽ, gora prĩne ikabẽn man kôt amijo aban kudjar kêt ne amrãnh mextire gê me ajã kabẽn kêt. Dja ga mã ã anhỹro aba rã'ã nhym arỳm Jeju Kritu gu banhõ Bẽnjadjwỳr kato.  
\v 15 Dja õ akati arỳm 'ỳr bôx nhym Metĩndjwỳnh dja kum arẽ nhym arỳm bôx. Nà, Metĩndjwỳnh ta pydji ne memã Bẽnjadjwỳr rax ne meo ba. Atemã 'õ kêt. Metĩndjwỳnh umar mex ne kĩnhkumrẽx tãm ne Bẽnjadjwỳr raxbê kumkatiti:. Kute bẽnjadjwỳr raxo pykabê me bẽnjadjwỳrja kunĩ jakrenh mexi. Kam ne kubê Bẽnjadjwỳr raxbê kumkatiti: ne meo ba.  
\v 16 Ajbit pydji ne tyk prãm kêtkumrẽx, tĩn rã'ã: tĩn djwỳnh. Ne irãkam ar ba, arngrokam ar ba. Nãm kam axwe 'õ kêt. Kam gêdja me têp kêtkumrẽx. Nhỹnh got me'õ arỳm noo omũ? Arkati. Me'õ kute noo omũnh kêtkumrẽx. Dja tũmràm omũnh kêt rã'ã. Kumã dja me uma jarẽnh rã'ã: rã'ã. Tãm dja me kàjmã kamẽnh rã'ã rã'ã. Gêdja memã Bẽnjadjwỳr ne meo ba rã'ã rã'ã. Mrãmri. 
\p  
\v 17 Ẽ, me pykakam õ nêkrêx kumexmã dja ga, 
\p —Amijo arax kêt. Djãm nêkrêx kute me apytàrmã ne ga me nêkrêx kanàrràm ar aba? Kati, kwãrĩk wãnh. Nêkrêx ne kajgo ne me abê biknor prãm. Kati, dja ga me Metĩndjwỳnh kanàrràm ar aba. Metĩndjwỳnh ta ne kute õdjànhkôt me bamã mỳjja kunĩ nhõr, o kute me bakĩnh kadjy, ta kanàrràm dja ga me ar aba, ane.  
\v 18 Gora me akabẽn mexbit jarẽ ne mekam adjukaprĩn ar meo aba, ne memã anhõdjành ne memã anhõ mỳjja ngrà, ane. 
\p  
\v 19 Dja ga ã me õ nêkrêx krãptĩjamã arẽnho ane gê me ã anen kam arỳm amityk nhijukri kadjy atemã kàjkwakam nêkrêxo aptà. Nêkrêx tãm ne mekbê biknor prãm kêt ne memã nõr rã'ã. Dja me kam arỳm 'ỳr bôx, mrãmri tu amitĩnkumrẽx ja'ỳr bôx. 
\p  
\v 20 Ẽ, Ximoxi, Metĩndjwỳnh kute amã kukràdjà rerja gora prĩne omũ. Gora 'ãno djan omũnh tỳx. Me kabẽn kajgo, me kabẽn tũm dja wãnh nõ. Rũm kum akre rax. Nhym me 'êxri amijo kute mỳjja mar ne kam mỳr jabej abenkam kangati dja adjwỳnhdjwỳ wãnh nõ.  
\v 21 Mrãmri ne me kwỳ kupa'ã, 
\p —Ije mỳjja mar, anen kam ajbit mar ar o ba ne kam amibê arỳm Jeju mar kanga ne. Gê Metĩndjwỳnh ukaprĩkôt prĩne ajo djuw mex. Tãm ne ja.