\id TIT  
\h Titus 
\toc1 Paulus haitua susurak fee nonoon Titus 
\toc2 Titus 
\toc3 Tit 
\mt2 Paulus haitua susurak fee nonoon  
\mt1 Titus  
\c 1  
\s1 Soda-molek  
\p
\v 1-4 Ana Titus fo malole!  
\p Susurak ia numa au mai, Paulus, Manetualain hatahori neondan no Yesus Karistus nedenun. Ana nadenu au fo atetea hatahorir fo Ndia here nalak kara nemeheheren. Ana oo nadenu au atudu eno-dala ndoos, fo ara bubuluk leo-laꞌo tungga Manetualain hihii-nanaun boe. No dalak naa, Manetualain hatahorin nara ramahena rae, neu ko ara rasoda sama-sama rakandoo roon. Manetualain ta bei adu dae-bafok ia, tehuu Ana helu-bartaa memak ena nae, neu ko Ndia hatahorin nara leo-laꞌo rakandoo roon. Memak Ana ta mana kokola bafa rouk. Ndaa no fain, Manetualain natudu no manggaledon ena nae, Ana nau tao nasoi-nasoda hatahorir ruma sira sala-singgon nara mai, fo ara bisa leo-laꞌo rakandoo roon. De Ana parenda au fo laꞌok uu tui-bengga Hara Lii Malole naa neu basa hatahorir nai bee a mesan.  
\p Titus! O sama leo au ana heli-heling ena, nahuu o mua au sama-sama tamahere neu Karistus ena. Dadi au hule-haradoi neu Amak Manetualain, ma Yesus Karistus mana tao nasoi-nasoda ita, fo ratudu Sira dale susuen neu o, fo o leo-laꞌo no lino-lendek ma mole-damek.\x + \xo 1:1-4 \xt 2 Korentus 8:23; Galatia 2:3; 2 Timotius 4:10\x*   
\s1 Dudu-furak fee hatahori mana dadi malangga saranik  
\p
\v 5 Fai maneuk kara au aketu fo laꞌo ela o numa pulu Kereta, mita fo o koladu mala dedeꞌak hida fo bei parluu nai naa. Naa fo o soꞌuk mala hatahori bee fo randaa rakalalaꞌok saranik kara marai kota esa-esak. Boso lilii-ndondou hohoro-lalanek naa, fo au afada neu o laꞌe-neu hatahori fo mana nakalalaꞌok saranik kara ena. Nae:  
\v 6 mete ma sangga soꞌuk hatahori dadi malangga saranik, ndia leleo-lalaꞌon ta bole hambu salak hata-hata. Ana muste leo-laꞌo dalen mahanik no kada sao inak esak ka. Hatahori naa, anan nara oo muste ramahere neu Yesus Karistus boe. Boso losak hatahorir rae, anan nara raa soa tao mue-anggik, ma soa ralaka.  
\v 7 Huu malangga saranik kara rakalalaꞌok Manetualain ue-osan, de ara muste leo-laꞌo no ndoos ma raena nade malole. Boso soꞌu hatahori mana soa nakadedemak aon, hatahori nasa tuak, hatahori mana ninu mafuk, hatahori mana hii kada nahuur, ma hatahori mana dale hedi doik.  
\v 8 Hatahori mana makalalaꞌok saranik kara, ara muste nau simbok hatahorir nai uman nara no lima nekembelan. Ara muste hii kada neulauk; muste matu-matuk, fo ta mbeu seserik, fo dale lolo-laok, ma bisa nakatataka nala aon.  
\v 9 Ara muste toꞌu rahere Manetualain Dedeꞌa-kokolan, fo fai bakahulun ita tanori sara. No dalak naa, ara bisa ratudu Manetualain eno-dala ndoon neu hatahori laen, ma bisa tao ratetu nenori ta ndoos sara.\x + \xo 1:9 \xt 1 Timotius 3:2-7\x*   
\s1 Laꞌe-neu hatahori mana fee nenori ta ndoos sara  
\p
\v 10 Hambu hatahori noꞌuk ka hii rareresi laꞌe-neu nenori ndoos. Dedeꞌa-kokolan nara huu-suꞌu taak kara, ma ara hii kada pepeko-leleko. Lena-lenak bali hatahori Yahudir mana rae basa hatahorir bee fo nau hambu masoi-masodak kara, muste sunat.  
\v 11 Ara pake sira nenori kasalan nara, fo leꞌa reni nufaneluk kara ketuk losa laꞌo ela Lamatuak nenori ndoon. Hatahori matak leo naak kara raa, sangga kada doik tungga dala pakanaꞌek a mesan! Kaꞌi-ore sara, mita fo ara boso fee nenori ta ndoos rakandoo.  
\v 12 Faik esa, sira mana helo binin esa numa pulu Kereta mai, tui la-e-neu ndia hatahori heli-helin nae,  
\q1 “Hatahori Keretar soa pepeko-lelekok.  
\q2 Ara bare-naꞌok ma mbera-baren nara seli! Tatao-nonoꞌin nara, sama leo busa-bafir.”   
\p
\v 13 Memak hatahorir raa leo naak kara! Dadi o muste leꞌa-nore falik hatahori fo mana hambu kedi-irak kara raa, fo matetea falik sira nemeheheren neu Lamatuak.  
\v 14 Kokoe sara fo boso ramanene seluk hatahori Yahudir tutui lasik fo ta teteben nara. Ara oo muste hahae tungga parenda numa hatahori mana timba heni nenori ndoos mai boe.   
\p
\v 15 Masaneda matalolole! Soa-neu hatahori dale lolo-laok, basa-basan lolo-laok. Tehuu soa-neu hatahori dale manggenggeok, ma ta namahere neu Lamatuak, ta hambu hata esa boe na lolo-laok. Huu sira dalen ma duduꞌan nara manggenggeok memak ena.  
\v 16 Ara manaku rae, sira ralela Manetualain. Tehuu sira leleo-lalaꞌon nara, sama leo ara ta ralela sana. Ara kokolak laen, tao laen. Memak oka-huun hatahori dae-bafo mburu manggarauk! Ara ta nau tungga Lamatuak hihii-nanaun. Boso mamahena mae hatahori matak leo naak kara, bisa tao hata fo neulauk bali!   
\c 2  
\s1 Nenori ndoos dadi oka-huuk numa leleo-lalaꞌo ndoos mai  
\p
\v 1 Tehuu Titus, o boso sama leo sira, ee! O muste leꞌa-nore sara fo leo-laꞌo tungga Manetualain nenori ndoon.  
\v 2 Mafada ama lasik kara, fo leo-laꞌo tungga hohoro-lalanek, ranea nade malole, ma leo-laꞌo no matu-matuk. Ara muste toꞌu rakandoo ma rakatataka tungga Manetualain nenori ndoon. Ma ara muste sue hatahori laen.   
\p
\v 3 Leo naak oo bei lasin nara boe. Mafada sara fo ranea ratalolole sira nenggetuu-nemberiin, ma leo-laꞌo taa-taa tungga Manetualain hihii-nanaun. Boso tao maboboo hatahori naden. Boso ike aon nara ro kada laru-ara. Tehuu ara muste ranori hatahorir fo leo-laꞌo no malole.  
\v 4 No dalak naa, ara ranori ma ratudu dala malole neu basa ina muri anak kara, fo sue-lai sao-anan nara.  
\v 5 Ara muste ranori sara fo leo-laꞌo no matu-matuk, leo-laꞌo no lolo-laok, fo rafafaꞌu uma-loon nara no malole, fee hada-horomatak neu saon nara, ma fee sira saon nara rakalalaꞌok uma-loo. Mete ma ara leo-laꞌo talo naa, neu ko ta hambu hatahori esa boe na bisa kokolak rakatutudak Manetualain Dedeꞌa-kokolan.   
\p
\v 6 Leo naak oo, fee nenori-nefadak neu tou taꞌe anak kara, fo leo-laꞌo no matu-matuk boe.   
\p
\v 7 Titus! O muste leo-laꞌo matalolole, fo dadi neu netuduk soa-neu hatahori laen nara. O tao hata a mesan, o muste taon no tetebes, sama leo hata fo o manorin neu hatahorir. Boso makamiminak mua o ue-osam mara.  
\v 8 Mete ma o manori hatahorir, na, o muste pake oka-huuk matea, mita fo hatahorir ta hambu dalak hata-hata fo bisa raselu kisubalik o. No dalak naa, hatahorir mana laban ita, mesa kasa mae, nahuu ara ta raena oka-huuk fo nggafu fee ita.   
\p
\v 9 Manori hatahori neondak kara, fo ramanene neu sira lamatuan nai dedeꞌak hata a mesan, ma tao ramahoko lamatuan nara dalen. Ara oo boso rasimbo bafak ro lamatuan nara boe.  
\v 10 Ara ta bole ramanaꞌo rala sira lamatuan bua-baꞌun. Ara muste ratudu rae, sira lamatuan bisa namahere sira no katematuan. Sira raa muste dadi reu hatahori neulauk ma dale mahanik. Mete ma hatahori deak kara timba-tai neondak kara leleo-lalaꞌon talo naa, ro basa hata fo ita tanorik, na, neu ko ara manaku rae, nenorik naa ta neni babanggak. Huu ita tanori laꞌe-neu Manetualain mana tao nasoi-nasoda ita ena.   
\p
\v 11 Manetualain natudu Ndia dale susuen neu basa hatahorir ena, ma soi dala masoi-masodak soa-neu hatahorir numa sala-singgon nara mai.  
\v 12 Huu naa de, ita muste timba heni leleo-lalaꞌo ta ndoos, ma basa ao-mbaak hihii manggaraun nara. Ita leo nai dae-bafok hatematak ia, ma muste takatataak aok, leo-laꞌo no lolo-laok, ma ita dalen nara muste mahanik no Manetualain.  
\v 13 Hatematak ia ita tamahena taa-taa neu Yesus Karistus mamain no ta neni babanggak sudi selik kana! Naa, dadi neu babaꞌe-babatik soa-neu ita basa ngga. Ndia naa, ita Lamatuan fo ta neni babanggak, fo mana tao nasoi-nasoda ita ena.  
\v 14 Ana loo lima aon dadi neu tunu-hotuk fo nakamboꞌik ita numa basa ita sala-singgon lalaꞌen mai, fo tao ita dadi teu Ndia hatahorin mana leo-laꞌo no dale lolo-laok, ma mana soa nau tao hata fo neulauk.\x + \xo 2:14 \xt Sosoda Kokoa-kikiok kara 130:8; Kalua numa Masir mai 19:5; Tui Seluk laꞌe-neu Dala Masodak 4:20; 7:6; 14:2; 1 Petrus 2:9\x*   
\p
\v 15 Dadi Titus, fee nenorik basa iar neu saranik kara. Tao mambena dalen nara, fo ara tungga basa nenorik kara raa lalaꞌen. See ndia tao salak, na, matudu dala malole neu sara. Hatahorir boso mete rakadadaek o, nahuu o maena haak fo tao dedeꞌak kara raa.   
\c 3  
\s1 Hatahori Karisten leleo-lalaꞌo ndoon  
\p
\v 1 Fee nesenenedak neu saranik kara, fo ramanene neu man-parendar ma hatahori mana toꞌu koasar. Ara oo muste tao tungga basa hohoro-lalanek kara boe. Ma muste rahani a taa-taa fo tao hata fo neulauk.  
\v 2 Ara boso adu bafa-maan nara fo rakalulutu hatahori nade malolen. Boso hii rasimbo bafak boe. Malole lenak, leo-laꞌo neulauk no dale susuek neu basa hatahorir.   
\p
\v 3 Fai bakahulun, neu lelek fo ita bei ta talela Lamatuak Yesus, ita oo bei ta bubuluk hata-hata, ma hambu kedi-irak no muda hiek boe. Ita ta hii nenene hatahori laen. Ita leo-laꞌo tungga kada ita ao-mbaan hihiin mata-matak. Ita dalen ta neulauk to hatahori laen. Ita leleo-lalaꞌon sofek no dale mana mbirik. Ita soa tambeda dalek, de hatahorir oo rambeda dalek neu ita boe.   
\p
\v 4 Leo mae ita masodan nakalulutu talo naa oo, tehuu Manetualain natudu Ndia susue-lalain ma dale susuen neu ita ena boe, no dalak Ana tao nasoi-nasoda ita.  
\v 5 Ana tao nasoi-nasoda ita, ta huu ita tatao malolen, tehuu Ndia susue-lalain neu ita. Ana safe-sae nalalao ita sala-singgon nara, pake Dula-dale Malalaon fo nabeu ita masodan, sama leo bonggi seluk ita.  
\v 6 No Yesus Karistus maten ena fo tao nasoi-nasoda ita numa ita sala-singgon nara mai, huu naa de Manetualain haitua Ndia Dula-dale Malalaon mai fee ita, ma ta nakatataak kana.  
\v 7 Huu Yesus dale susuen, de Ana tao nalole ita nekeesan to Amak Manetualain, sama leo ita ia, Ndia anan. De ita bubuluk tae, neu ko ita tasoda no ta mana ketuk to Ndia. Masodak naa dadi neu ita pusakan!  
\v 8 Hata fo au kokolak ia, memak tetebes leo naak.  
\p Hata fo au fee nenorik ia, hambu sosoan soa-neu basa hatahorir. Huu naa de o muste fufuꞌa hatahorir fo tungga nenorik kara raa no tebe-tebe. Basa hatahorir fo mana ramahere neu Manetualain, muste sangga dalak taa-taa fo tao hata fo neulauk.  
\v 9 Boso muu sorodododo mua dedeꞌa kokola bafa rouk kara, ndia leo: masimbo bafak no dedeꞌa huu-suꞌu taak, mareresi sadi ndaa mua hatahori, mandundu-tofak laꞌe-neu see tititi-nonosin moꞌon lenak, ma mahuur laꞌe-neu Yahudir hada hohoro-lalanen nara. Tao hata? Basa naar, ta raena sosoak hata-hata. Ngganggari heni kada ledo-fair no hie-hie a mesan!  
\v 10 Muu fee nenori-nefadak neu hatahori mana tao nabingga-baꞌek hatahori saranik kara. Mete ma ana bei tao seluk talo naa, na, kaꞌi-oren no hara berak. Mete ma ana bei tao nakandoo bali, na, boso mbalin bali.  
\v 11 Hatahori matak leo naak, duduꞌan ta natetu ena. Ndia tatao-nonoꞌin mesa kana ndia natudu basa hatahorir nae, ndia sala.   
\s1 Paulus nateꞌe susuran  
\p
\v 12 Au aena nanaek ae adenu Artemas do Tikikus, fo neti natonggo no o nai pulu Kereta. Mete ma ana losa ena, na, o maote mai lai-laik fo matonggo mua au nai kota Nikopolis. Fai makasufuk ia, au hii alan seli uu leo nai naa.\x + \xo 3:12 \xt Nedenuk kara Tutuin 20:4; Epesus 6:21-22; Kolose 4:7-8; 2 Timotius 4:12\x*  
\v 13 O malela hatahori mana malela hukun, manade Senas naa, no nonoon Apolos, hetu? Ara sangga laꞌo reni dae dook reu. Dadi tulun doi-sou sara mita fo ara ta toꞌa-kuran hata-hata nai dalak.\x + \xo 3:13 \xt Nedenuk kara Tutuin 18:24; 1 Korentus 16:12\x*  
\v 14 Hatahori fo mana tungga Lamatuak Yesus, ara ta bole ranggatuuk kada ifa liman nara. Ara muste ranori tao hata fo neulauk kara, ma tulun hatahori mana toꞌa taak tetebes. No dalak naa, sira leleo-lalaꞌon naena sosoak.   
\p
\v 15 Titus, ai basa ngga manai ia, haitua hara masodak neu o. Hara masodak oo neu ita nonoon nara fo sama-sama ramahere neu Lamatuak Yesus boe.  
\p Au hule-haradoi oke fo Manetualain natudu Ndia dale susuen neu ei basa ngga.  
\q2 Baꞌu kada naa,  
\q2 Paulus