\id COL  
\h Kolose 
\toc1 Paulus susuran soa-neu hatahori kamaherek kara marai kota Kolose 
\toc2 Kolose 
\toc3 Kol 
\mt2 Paulus susuran soa-neu  
\mt2 hatahori kamaherek kara marai kota  
\mt1 Kolose  
\c 1  
\s1 Paulus buka susuran  
\p
\v 1 Hara masodak numa au mai, Paulus. Manetualain mesa kana ndia here nala au fo dadi uu Yesus Karistus nedenun. Nai ia oo hambu ita toranoon Timotius haitua hara masodak soa-neu ei boe.   
\p
\v 2 Au surak susurak ia fee ei, ndia Manetualain hatahorin nara marai kota Kolose, fo mana tao tungga Yesus Karistus eno-dala masodan taa-taa.  
\p Ai moke fo Manetualain, ita Aman, natudu Ndia dale susuen neu ei, mita fo ei leo-laꞌo no mole-damek ma lino-lendek.   
\s1 Paulus hule-haradoi soa-neu hatahori kamaherek kara marai kota Kolose  
\p
\v 3 Tungga-tungga ai hule-haradoi nai ia soa-neu ei, ai moke makasi neu Manetualain, fo ita Lamatuan Yesus Karistus Aman.  
\v 4 Ai mamanene dedeꞌak noꞌuk ka laꞌe-neu ei nemeheherem neu Yesus Karistus, ma laꞌe-neu ei susue-lalaim ma dale susuem soa-neu basa hatahori kamaherek kara ena.  
\v 5 Ei tao talo naa, nahuu ei bubuluk hambu hata fo neulauk kara, fo neni mbedak soa-neu ei nai nusa tetuk do inggu temak. Hata fo neulauk kara iar, ei mamanene mita sara numa dedeꞌa-kokola ndoos mai ena, ndia Lamatuak Hara Lii Malolen,  
\v 6 fo hatahorir reti tui-bengga neu ei numa lele uluk mai ena. Hara Lii Malole naa natanggela sudi bee neu nai dae-bafok ia, ma hambu buna-boa neulauk ena, nahuu ana tao nasafali hatahori masodan dadi malole. Ei masodam oo nasafali dadi malole talo naa, mulai numa fai makasososan ei mamanene Hara Lii Malole naa mai, ma ei malela tebe-tebe mala Manetualain dale susuen boe.   
\p
\v 7 Ei manori mala dedeꞌak kara iar ruma kaꞌa Epafras mai ena, ndia ai nonoo mana maue-osan fo ai suen. Ana manggate nakalalaꞌok nakandoo Karistus ue-osan nai ei taladam.\x + \xo 1:7 \xt Kolose 4:12; Filmon 23\x*  
\v 8 Ana tui fee ai marai iar laꞌe-neu ei susue-lalaim, fo Manetualain Dula-dalen baꞌe feen neu ei ena.   
\p
\v 9 Huu naa de, mulai numa makasososan mai ai mamanene laꞌe-neu ei, ai hule-haradoi taa-taa fee ei. Ai moke Manetualain fo ei bisa malela Ndia hihii-nanaun no tebe-tebe, ma ei bisa malela dedeꞌak noꞌuk ka, tungga hata fo Manetualain Dula-dalen nanori ei.  
\v 10 No dalak naa, ei bisa leo-laꞌo ndaa no dala-hadak ma meni Manetualain nade malolen. Ma ei oo bisa tao mamahoko Manetualain dalen nai basa dedeꞌak kara boe. Mete ma ei matudu dale malolem mara neu hatahorir, neu ko Manetualain tao nala ei boe tamba tao dedeꞌa maloler. No dalak naa, ei bisa tamba malela Manetualain.   
\p
\v 11-13 Ai oo hule-haradoi moke Manetualain fee Ndia koasan ta neni babanggak, fo ei bisa lemba-masaa basa manggataꞌak lalaꞌen no dale naruk boe. Ai moke fo ei dalem mara bisa sofek no nemehokok, fo ei moke makasi taa-taa neu Amak Manetualain. Ana soi dalak ena, fo ei bisa simbo mala babaꞌek numa ei pusakam nai nusa tetuk do inggu temak mai. Pusaka naa, Ana feen neu basa hatahorir fo mana ramahere neu Yesus Karistus. Ana nakamboꞌik ita numa koasa makiuk mai ena, basa de fee ita maso dadi teu Yesus Karistus hatahorin, fo leo nai manggaledok dale. Ana oo soꞌuk nala Yesus Karistus boe, fo dadi neu ita Manen. Yesus naa, Manetualain Ana susuen.  
\v 14 Manetualain loo lima Ndia Anan naa ena, fo tefa-soi nala ita ma koka heni ita sala-singgon nara.\x + \xo 1:14 \xt Epesus 1:7\x*   
\s1 Karistus naa, demak mateꞌen lena heni basa-basan  
\q1
\v 15 Karistus naa, mata-aok esa no Manetualain,  
\q2 fo hatahori dae-bafok ta bisa mete-ritan.  
\q1 Ana nakahuluk numa basa-basan mai ena,  
\q2 ma Ana dadi neu Lamatuak numa basa hata fo Manetualain adu nalak kara mai ena.   
\q1
\v 16 Manetualain pake Yesus Karistus,  
\q2 fo nakadadadik nala lalai no dae-inak ma basa isi-oen nara lalaꞌen.  
\q1 Ana adu basa hata fo hatahori dae-bafok bisa mete-rita sara.  
\q2 Ndia leo, sira mana toꞌu parenda, sira mana toꞌu koasa,  
\q3 mane-manek kara ma malanggan nara.  
\q3 Ma basa koasar do basa hata fo hatahori dae-bafok ta bisa mete-rita sara.  
\q1 Basa hata fo Manetualain taok kara raa,  
\q2 Ana tao soa-neu Yesus Karistus,  
\q3 ma Yesus oo ndia adu basa naar boe.   
\q1
\v 17 Neu lelek fo basa hata laen bei ta nekedadadik kasa,  
\q2 tehuu Ndia hambu memak kana ena.  
\q1 Basa hata mandadik rakaesa roon,  
\q2 ma Ana ndia koladu sara.   
\q1
\v 18 Ana dadi neu Langgak soa-neu basa hatahori kamaherek kara,  
\q2 ma hatahori kamaherek kara dadi sama leo Ndia ao-inan.  
\q1 Huu Ana ndia masodak huun.  
\q1 Numa basa mana matek kara mai, boe ma rasoda fali,  
\q2 Ana ndia lena heni basa-basan,  
\q3 mita fo Ana ndia demak mateꞌen lena heni basa-basan.\x + \xo 1:18 \xt Epesus 1:22-23\x*   
\q1
\v 19 Basa hata fo marai Manetualain aon dale oo,  
\q2 hambu sara rai Karistus aon dale boe,  
\q3 ma naa tao Manetualain namahoko.   
\q1
\v 20 Manetualain pake Yesus Karistus,  
\q2 fo Ana dame no basa hata fo Ana adu nalak kara.  
\q1 Ana fee Ndia Anan,  
\q2 fo dadi neu tunu-hotuk de titi heni daan,  
\q2 ma maten numa ai ngganggek lain,  
\q3 mita fo basa hata marai lalai,  
\q3 ma basa hata marai dae-inak,  
\q3 bisa dame rasafali ro Manetualain.\x + \xo 1:20 \xt Epesus 2:16\x*   
\p
\v 21 Bakahulun ei mesa ngga bei masoda nai dea, leo dook ka numa Manetualain mai. Ei musu mian ma leo lenggo feꞌe numa Ndia mai, nahuu ei dalem mara mburuk ma ei tatao-nonoꞌi manggaraum mara laban neun taa-taa.  
\v 22 Leo mae talo naa oo, tehuu hatematak ia Ana soi dalak ena, fo ita bisa dame to Ndia boe. Ana ndia nadenu Ndia Anan fo dadi sama leo hatahori dae-bafok. Ma Ana fee Ndia Anan naa, fo dadi tunu-hotuk, ma maten numa ai ngganggek lain, fo ita bisa dame toon bali. Yesus Karistus tao talo naa, fo Ana bisa nuni noo ita teu tambariik nai Manetualain matan, fo ita dadi teu hatahori lolo-laok, dale ndoos, fo ta taena sala-singgok hata esa boe na.  
\v 23 Sadi ei muste makatataka makandoo mia ei nemeheherem mara ma toꞌu mahere fo boso babati! Boso makaheok numa Hara Lii Malole naa mai, fo ei simbok kana neu ei mamanene ndia makasososan naa. Ei bisa masarada neu Hara Lii Malole naa. Hatahorir reu tui-bengga Hara Lii Malole naa nai bee a mesan nai dae-bafok ia ena. Ma Lamatuak nadenu au, Paulus, fo au oo uu tui-bengga Hara Lii Malole naa boe.   
\s1 Paulus naue-osa fo naono-lalau Lamatuak hatahorin nara  
\p
\v 24 Neu lelek Karistus leo numa dae-bafok ia, Ana hambu doidosok noꞌuk ka. Ma hatematak ia, au oo lemba-asaa ala doidosok mata-matak kara boe. Leo mae talo naa oo, au daleng namahoko taa-taa boe. Mete ma hambu hatahorir fo muste hambu doidosok, na, naa fo au ndia lemba-asaa ala doidosok naa soa-neu sara, sama leo Karistus lemba-nasaa doidosok soa-neu Ndia hatahorin nara. Ndia hatahorin nara dadi sama leo Ndia ao-inan.  
\v 25 Manetualain baꞌe fee au ues ena fo aono-lalau Ndia hatahorin nara. Huu naa de au fee nenorik laꞌe-neu Ndia Dedeꞌa-kokolan no lutu-lelok fee ei.  
\v 26-27 Numa makasososan mai, hatahorir ramanene Lamatuak Dedeꞌa-kokolan nara. Tehuu ara bei ta bubuluk Dedeꞌa-kokolak kara raa sosoan no manggaledok, huu sosoan naa bei nefunik. Tehuu hatematak ia, Lamatuak naketu nala ena fo buka sosoak naa soa-neu Ndia hatahorin nara. Ma Ndia nanaen fo tui-bengga tutui ta neni babanggak neu basa hatahori nusa-nusak kara marai dae-bafok ia, Yahudir do, ta Yahudir. Tutuik ta neni babanggak naa, ndia:  
\q1 Karistus leo nai ei dalem mara!  
\q2 Naa ndia, tao nala ei mamahere makandoo mae,  
\q3 neu ko Ana tao hata fo lolen mateꞌen soa-neu ei.  
\q2 Ia ndia, ita hatahori dae-bafok tahanik kana numa lele uluk mai.   
\p
\v 28 Dadi ai mafada neu basa hatahorir laꞌe-neu Karistus. Ai manori basa hatahorir, ma fee nesenedak neu sara, pake basa duduꞌa-aꞌafik fo Manetualain baꞌe fee ai. Ai tao talo naa, fo tao tamba matea basa hatahorir fo mana tungga Karistus, losa ara dadi matetu-mandaik fo neu ko ara bisa rambariik nai Ndia matan no ta mae, nahuu sira dalen ndoos taa-taa.  
\v 29 Huu naa de au aote tebe-tebe ma aue-osa fafandek lima-eing nggara soa-neu ei. Au bisa akatataka aue-osa fafandek lima-eik talo naa, nahuu Karistus koasan ndia natetea au. Ndia koasan naa, ta neni babanggak!   
\c 2  
\p
\v 1 Ei mana leo nai kota Kolose, ma sira mana leo marai kota Laodikea, ma sira fo bei ta ratonggo rita ro au. Nenene matalolole! Au nau fo basan bubuluk aue-osa fafandek lima-eing soa-neu ei, ma soa-neu sara.  
\v 2 Au nanaeng oo nau atetea sira dalen nara fo bisa rakaesa boe, nahuu ara leo-laꞌo no esa sue esa ena. Basa de ara dadi ramahere tebe-tebe, nahuu ara bubuluk tebe-tebe Manetualain nanaen ena, fo fai bakahulun bei nefunik. Hata fo neni nemeninok naa, ndia Karistus!  
\v 3 Huu ei makaesa mia Karistus, dei fo Ana baꞌe fee basa duduꞌa-aꞌafik kara fo ei parluu, ma nanori ei pake duduꞌa-aꞌafik kara raa, fo tao hata fo neulauk kara. Duduꞌa-aꞌafik kara iar, sama leo pusaka mabeli.   
\p
\v 4 Au afada ei basa dedeꞌak kara laꞌe-neu Karistus, mita fo boso hambu hatahorir mai pepeko-leleko ei, ro bafa-maa mana laiminan nara.  
\v 5 Memak au dook ka numa ei mai. Leo mae talo naa, tehuu au ta lilii ei, nahuu au daleng nakaesa no ei. Ma au amahoko, nahuu au bubuluk ei leleo-lalaꞌom ndaa no dala-hadak, ma ei bei toꞌu mahere ei nemeheherem mara neu Karistus.   
\s1 Ita fo mana takaesa to Karistus, hambu masodak tetebes  
\p
\v 6 No fai bakahulun ei simbo mala Yesus Karistus dadi neu ei Lamatuam ena, huu naa de hatematak ia ei muste nenene makandoo neun. Huu Ndia bei dadi neu ei Lamatuam fo naena haak parenda ei.  
\v 7 Mete ma ei leo-laꞌo makaesa mian talo naa, ei sama leo ai huuk fo tamba natea, nahuu okan saindoro seku neni dae dale neu. Ma ei sama leo uma matea, nahuu nambariik nai fanderen matea lain. Ei tao mahere makandoo nai ei nemeheherem dale, sama leo ei manori mitak kara ena. Ela leo bee na, ei dalem mara soꞌuk makasi taa-taa, nahuu basa hata fo Manetualain tao fee ei ena.   
\p
\v 8 Besa-besa fo ei boso tungga hatahori laen fo mana pake kada hatahori dae-bafok duduꞌa-aꞌafin, fo nuni reni ei sio laꞌo ela eno-dala ndoos. Ma boso tungga hatahori dae-bafok nenori malelan nara, fo huu-suꞌu taak. Sira nenorin nara raa, ruma kada hatahori dae-bafok duduꞌa-aꞌafin nara mai, ma ruma dae-bafok hohoro-lalanen nara mai. Tehuu nenorik kara raa, ta raoka nai Karistus dale.   
\p
\v 9 Basa hata fo marai Manetualain aon dale oo hambun nai Karistus aon dale boe. Ma Karistus oo dadi neu hatahori dae-bafok sama leo ita boe.  
\v 10 No ei makaesa mia Karistus, ma dadi miu Ndia hatahorin, huu naa de Ana tao ei dadi matetu-mandaik. Huu Ndia dema lena heni basa koasar ma basa mana toꞌu parendar, leo mae malole do manggarauk, ndia koasa neni nitak do ta neni nitak.   
\p
\v 11 Neu faik fo sunat, hatahori Yahudir kedi heni sira ‘mamaen’ suꞌun roun fo dadi neu tanda nae, sira raa, Manetualain hatahorin. Neu ei maso dadi miu Karistus hatahorin, ei oo neni ‘sunat’ boe. Talo ia: Sunat ia, ta laꞌe-neu hatahori kedi heni roun nai ao-inan, tehuu laꞌe-neu Karistus kedi heni basa manggarauk numa ita dalen mai. Ndia, hata fo manggarauk kara fo ita hii tao, nahuu ita iar, hatahori dae-bafok.   
\p
\v 12 Neu ara sarani ei pake oe, naa sama leo ei neni netoik kara sama-sama mia Karistus. Basa de ei oo hambu masoda beuk boe, sama leo Ndia oo hambu masoda beuk boe. Ei hambu leo naak, nahuu ei mamahere mae, Manetualain pake Ndia koasan ta neni babanggak, fo tao nasoda falik Yesus Karistus numa mamaten mai. Ana oo pake koasa naa fo oꞌofe-fafae ei dalem mara boe.\x + \xo 2:12 \xt Roma 6:4\x*   
\p
\v 13 Fai bakahulun, nok bali ei mate ena, nahuu ei salam mata-matak kara, ma ei bei ta maso dadi miu Manetualain hatahorin. Leo mae talo naa, tehuu Ana koka heni basa ei sala-singgom mara, ma fee ei masoda beuk sama leo Ana tao nasoda falik Karistus numa mamaten mai.\x + \xo 2:13 \xt Epesus 2:1-8\x*  
\v 14 Ndondoon ndia naa, ita muste hambu huku-dokik, nahuu ita lena-langga Manetualain hohoro-lalanen nara ena. Tehuu Ana koka heni ita huku-dokin nara ena, neu faik fo ara paku Karistus numa ai ngganggek lain.\f + \fr 2:14 \ft Susura Malalaok dedeꞌa Yunani surak nae, “Tehuu Ana koka heni ita huku-dokin nara ena, nahuu Ana paku nala huku-dokik kara raa reu Karistus ai ngganggen ena.”\f* \x + \xo 2:14 \xt Epesus 2:15\x*  
\v 15 Numa naa, Ana tao nasenggi basa koasa makiuk kara, ma basa mana makalalaꞌok parendar no manggarauk. Basa de Ana nakamamaek kasa numa hatahori noꞌuk matan. Naa, sama leo soldadu mana senggi netatik, fo fali tao nononggok ndule basa mamanak kara, ratudu sira musun nara fo ara tao senggik kara ena.   
\p
\v 16 Mete ma hatahori nae nakatutudak ei laꞌe-neu nanaꞌa-nininuk hohoro-lalanen nara, na, boso mbali sara. Mete ma hatahori nae tao dedeꞌak no ei laꞌe-neu fai maloler, do, feta bula beuk, do, hatahori Yahudir fai hahae tao ue-osan, na, boso nenene sara.\x + \xo 2:16 \xt Roma 14:1-6\x*  
\v 17 Dedeꞌa leo naak kara, nenenin taa! Dedeꞌak kara raa sama leo kada lalaok, fo neu ko mopo henin. Tehuu Karistus naa ndia isi-isik. Ana ndia mahanik seku neu.   
\p
\v 18 Mete ma hatahorir rae rakatutudak ei, nahuu ei ta tungga hohoro-lalanek kara fo sira mesa kasa taok, na, boso mamanene sara. Mete ma ei mamanene sara, na, ei ta bisa simbo hata fo neulauk kara fo Manetualain nae fee ei. Tehuu besa-besa, ee! Memak hambu hatahorir hii sangga dalak fo rakatutudak ei. Ara nau ei muste makaloloek aom mara, ma songgo-tanggu neu Manetualain atan nara marai nusa tetuk do inggu temak, nahuu ara duꞌa rae, sira hambu meꞌis fo natudu sara talo naa. Ara tao aon nara neulaun lena heni hatahori laen nara. Naa te ta leo naak! Huu sira duduꞌan sama leo kada hatahori dae-bafok biasa.  
\v 19 Ara ta rakaesa ro Karistus. Naa te Ana ndia Langgak. Ma Ndia hatahorin nara, sama leo Ndia ao-inan fo Ana koladun. Ana tao nala hatahorin nara tamba barakai, pake Manetualain koasan. No dalak naa, ara dadi sama leo uak no duik ratoꞌu rahere, fo esa sou esa losa ao-mbaak katematuan bisa naue-osa no neulauk!\x + \xo 2:19 \xt Epesus 4:16\x*   
\s1 Mete ma ita takaesa to Karistus, ita hambu masoda beuk  
\p
\v 20 Ei mate sama-sama mia Karistus ena. De ei ta makaesa bali mia koasa makiuk kara nai dae-bafok ia. Dadi tao hata de ei bei tungga makandoo dae-bafok hohoro-lalane mata-matan nara? Ara rae leo ia:  
\v 21 “Boso toꞌu ia; boso miꞌa naa; boso mafaroe ia.”  
\v 22 Tehuu hohoro-lalanek kara raa, kada hatahori dae-bafok ndia taok, fo ara ranori hatahorir. Naa te hohoro-lalanek kara raa, kada koladu hata fo neu ko mopo heni sara!  
\v 23 Mete ma hatahorir bisa tao tungga hohoro-lalanek kara raa, ara duꞌa rae, neu ko hatahorir fee hada-horomatak neu sira, huu nai hatahori memeten rae, sira malelan nara seli, hatahori mana matu-matuk tetebes, hatahori dale makaloloe aok kara, hatahori mana nakahehedik ao-ina heli-helin, ma mana songgo fo mangganten seli. Naa te taa! Hohoro-lalanek kara raa ta bisa tao ralole hatahori dae-bafok duduꞌan ma dalen fo hii tao manggarauk!   
\c 3  
\p
\v 1 Manetualain fee ei masoda beuk ena, sama leo Ana tao nasoda falik ei sama-sama mia Karistus. Hatematak ia Karistus nanggatuuk nai mamana hada-horomatak mateꞌen, nai Manetualain boboa konan. Huu naa de ei muste duduꞌa basa hata fo tao namahoko Manetualain dalen.\x + \xo 3:1 \xt Sosoda Kokoa-kikiok kara 110:1\x*  
\v 2 Duduꞌa makandoo laꞌe-neu basa hata fo Manetualain hii. Boso tao matak mia hata fo kada tao namahoko hatahori dae-bafok dalen.  
\v 3 Neu faik fo Karistus mate, ei oo mate tungga boe. Ei masoda beum naa, lino-lendek, nahuu ei makaesa mia Karistus ena, fo mana sama-sama no Manetualain nai nusa tetuk do inggu temak.  
\v 4 Karistus nasoda nai ei dalem mara, ma Ana oo tao nala ei hambu masodak tetebes boe. Neu ko neu faik fo Ana fali mai, ei oo sou sama-sama mian boe. Basa naar, sudi selik kana!   
\s1 Masoda raak, ma masoda beuk  
\p
\v 5 Huu naa de ei muste nggari heni ei hihiim fo mana hii tao kada manggarauk kara. Haꞌi netuduk leo: dale hii makaminak mia hatahori fo ta o saom; dale hii tao hata fo manggenggeok kara; dale hii tao tungga ao-mbaak hihii-nanaun; dale hii tao manggarauk mata-matak kara; ma dale hedik fo nau basan dadi neu kada o enam, (naa te, naa sama leo o songgo-tanggu, huu o makadedemak dedeꞌak laen, fo seti heni Manetualain).  
\v 6 Dedeꞌak kara raa ndia tao rala Manetualain namanasa nalan seli, losa Ana nae huku-doki basa hatahorir fo ta mana nau nenene neun.  
\v 7 Fai bakahulun ei oo leo-laꞌo talo naa boe, huu dalem mara rakaesa ro dedeꞌa manggarauk kara raa.   
\p
\v 8 Tehuu hatematak ia, ei muste nggari heni basa ei dalem mana hii tao manggarauk lalaꞌen. Haꞌi netuduk leo: hii mamanasa; dale katobik; mbeda dalek; kokolak makabobook hatahori nade malolen; ma bafa sesesu taak.  
\v 9-10 Ma ei boso pepeko-leleko esa mbali esa. Huu ei nggari heni ei dalem fo mana hii tao manggarauk kara, ma laꞌo ela ei dala masoda raam ena.\x + \xo 3:9-10 \xt Epesus 4:22\x*  
\p Ma hatematak ia ei nggatin, pake dale beuk ena. Naa, sama leo hatahori nggari heni ndia bua-loꞌa raan fo manggenggeok kara, de pake bua-loꞌa beuk fo laok. Manetualain ndia adu nala ei. Ma hatematak ia Ana oo ndia adun, de ei tamba malela neun, ma doo-doo bali te tao nala ei, dadi miu mata-aok esa sama leo Ndia boe.\x + \xo 3:9-10 \xt Tutui Makasososak 1:26; Epesus 4:24\x*  
\v 11 Nai masoda beuk ia dale, ita ta bisa henggenee hatahori numa kada rou dean mai tae, sira raa, hatahori Yahudir do, hatahori ta Yahudir; hatahori mana sunat do, hatahori ta mana sunat; hatahori feꞌek do, hatahori ta mana malela hadak do;\f + \fr 3:11 \ft Susurak Malalaok dedeꞌa Yunani surak nae, “hatahori Barbar ma hatahori Skutia”. Ara henggenee hatahori Barbar naa, hatahori feꞌek manai man-parenda Roma koasan dea. Ma ara henggenee hatahori Skutia naa, hatahori ta malela hadak.\f* ata-dato do, ta ata-dato. Naa, nenenin taa! Tehuu nenenin lenak ndia, mete ma ara rakaesa ro Karistus, ma mete ma Ana nasoda nai sira dalen.   
\p
\v 12 Manetualain tengga nala ei ena, nahuu Ana sue-lai ei. Ndia nanaen, na, ei dadi miu Ndia hatahori lolo-laon, fo laen numa hatahori dae-bafok biasa mai. Huu naa de ei muste dadi miu hatahori fo naena dale neulauk, dale malole, nekeloloe aok, dale bangganaꞌuk, ma dale naruk.  
\v 13 Ei muste madale loak ma malela esa no esa. Mete ma hambu ei ketuk sangga nehuuk mbali ndia nonoon, na, boso mambeda dalek. Tehuu ei muste lilii heni salak kara raa, ma fee ambon neun, sama leo Manetualain lilii heni ei salam.\x + \xo 3:13 \xt Epesus 4:2, 32\x*  
\v 14 Masanedak te susue-lalaik naa, nenenin lena heni basa-basan. De ei muste pake susue-lalaik naa nai ei dalem, sama leo hatahori pake bua-loꞌa nai ao-inan. Huu susue-lalaik naa tao nala ita dadi teu dalek esa, sama leo abas fo ita tenun dadi neu sidi neulauk mateꞌen.   
\p
\v 15 Ita bisa mole-dame to Manetualain, nahuu Karistus. Dadi ei muste fee lelak neu Karistus mole-damen oꞌofe-fafae ei dalem. Manetualain nau fo ei basa ngga leo-laꞌo no mole-damek esa no esa, nahuu ei basa ngga makaesa dadi miu ao-inak esa. Ma ei dalem mara muste moke makasi makandoo, nahuu Ana ndia here nala ei ena.   
\p
\v 16 Karistus Dedeꞌa-kokolan nara oo muste oꞌofe-fafae ei dalem ma ei masodam. Dedeꞌa-kokolak kara raa, sama leo pusaka mabeli, fo Ana baꞌe fee ei. Ara ratudu dalak fo ei bisa malela dedeꞌak noꞌuk ka tungga Manetualain duduꞌan. De ei bisa pake sara fo fee nenorik ma fee nesenedak neu ei esa no esa. Mete ma manori ei hatahorim mara, boso fee nenorik no barakaik, tehuu pake dale neulauk fo sofek no makasi. Pake sosoda kokoa-kikiok kara, sosoda anggamar, ma sosodak fo ei ndia taok kara, fo koa-kio neu Manetualain.  
\v 17 Eir ia, dadi miu Yesus Karistus lima konan ena. Dadi masanedak te basa hata fo ei kokolak kara raa, pake Ndia naden. Ma basa hata fo ei taok kara oo pake Ndia naden boe. Boso lilii-ndondou tao basa-basan, pake Lamatuak Yesus Karistus “naden”. Ma moke makasi makandoo neu Ndia Aman, Manetualain.\x + \xo 3:17 \xt Epesus 5:19-20\x*   
\s1 Hatahori Saranik kara, esa no esa muste leo-laꞌo talo bee?  
\p
\v 18 Sao inak kara ein! Ei muste nenene neu ei saom, nahuu naa ndia nandaa soa-neu hatahori fo mana tungga Yesus Karistus.\x + \xo 3:18 \xt Epesus 5:22; 1 Petrus 3:1\x*   
\p
\v 19 Sao touk kara ein! Ei muste sue-lai neu ei saom, ma boso tuni-ndenin, fo tao mala dalen hedis.\x + \xo 3:19 \xt Epesus 5:25; 1 Petrus 3:7\x*   
\p
\v 20 Kakanak kara ein! Ei muste tia-rada ma nenene ei ina-amam nai basa dedeꞌak kara dale, huu naa ndia tao namahoko Manetualain dalen.\x + \xo 3:20 \xt Epesus 6:1\x*   
\p
\v 21 Ina-amar ein! Boso kada tuni-ndeni ma barakakai kakanak kara, mita fo dalen nara boso mami ma rambeda dalek neu ei.\x + \xo 3:21 \xt Epesus 6:4\x*   
\p
\v 22 Hatahori mana maue-osar ein! Nai dae-bafok ia, ei muste tao tungga ei lamatuam nai basa dedeꞌak kara dale. Boso kada sorodododo neu ara memete ei. Tehuu maote tebe-tebe fo ei soa tao mamahoko sara. Maue-osa basa-basan no malole, nahuu ei bubuluk mae, Manetualain ndia memete ei.  
\v 23-24 Ei tao hata a mesan, na, maue-osa no dere-dere hiek ta no mbera-maꞌak. Ei muste maue-osa sama leo ei maue-osa soa-neu ei Lamatuam Yesus Karistus, ta soa-neu hatahori dae-bafok. Ei maono-lalau neun. Ma neu ko Ana bala ei sosota-mamanggum, ma baꞌe pusaka fee ei.  
\v 25 Tehuu mete ma ei maue-osa ta no malole, na, neu ko Ana hukun ei. Ana ta mbeu seserik, ma ta memete matak.\x + \xo 3:25 \xt Epesus 6:5-8; Tui Seluk laꞌe-neu Dala Masodak 10:17; Epesus 6:9\x*   
\c 4  
\p
\v 1 Malanggan nara ein! Ei muste koladu ei neondam mara no ndoos ma ta mbeu seserik. Masanedak te ei oo maena Lamatuak nai nusa tetuk do inggu temak fo mana koladu ei boe.\x + \xo 4:1 \xt Epesus 6:9\x*   
\s1 Nenori-nefada mata-matak  
\p
\v 2 Ei muste manggate hule-haradoi makandoo. Ma basa hata fo ei kokolak mia Manetualain, naa tebe-tebe kalua numa ei dalem mara mai, boso duꞌa leli-belak, tehuu hule-haradoi no dalem mara sofek no makasi.  
\v 3 Boso lilii-ndondou hule-haradoi fee ai, ma moke-hule fo Manetualain soi dalak fo ai bisa tui-bengga neu hatahorir hata fo fai bakahulun bei nefunik laꞌe-neu Karistus. Masanedak te au maso bui ia, nahuu au tui-bengga neu hatahorir laꞌe-neu Karistus.  
\v 4 Hule-haradoi fo au bisa tui-bengga Hara Lii Malole naa no manggaledo ndoos, fo hatahorir bisa bubuluk no malole.   
\p
\v 5 Leo-laꞌo no ndoos nai hatahorir fo bei ta ramahere neu Karistus taladan. Pake matalolole tungga-tungga omba-lelak fo Lamatuak fee neu ei.\x + \xo 4:5 \xt Epesus 5:16\x*  
\v 6 Mete ma ei kokolak, na, kokolak no neulauk, ndaa no hatahorir dalen. Boso kokolak hata fo ara mbera nenenen. Pake dedeꞌa-kokola ndoos, fo ei bisa maselu masafali sara no malole, mete ma hambu hatahori ratane ei.   
\s1 Paulus nateꞌe susuran  
\p
\v 7 Dei fo Tikikus mai tui ei laꞌe-neu au nenggetuu-nemberiing. Ndia ia, ai toranoo susuen fo mana maono-lalau Lamatuak hatahorin no dale mahanik. Fai bakahulun, ana oo nakalalaꞌok Lamatuak ue-osan sama-sama no au boe.\x + \xo 4:7 \xt Nedenuk kara Tutuin 20:4; 2 Timotius 4:12\x*  
\v 8 Au adenun talo naa, fo ana bisa neti natetea ei dalem, ma bisa tui laꞌe-neu ai nai ia.\x + \xo 4:8 \xt Epesus 6:21-22\x*  
\v 9 Au oo adenu falik Onesimus fo tungga sama-sama noon boe. Onesimus naa, ita toranoo susuen fo dalen mahanik. Ndia ia, ei hatahori heli-helim. Sira dua sara, neu ko tui ei basa hata fo mandadik kara rai ia ena.\x + \xo 4:9 \xt Filmon 10-12\x*   
\p
\v 10 Aristarkus haitua hara masodak neu ei. Ara kenan nai bui dale, sama-sama no au. Barnabas nufanelun, manade Markus oo haitua hara masodak boe. Fai bakahulun, au helu memak soa-neu ei ena ae, mete ma Markus mai tiro ei, na, simbon no malole.\x + \xo 4:10 \xt Nedenuk kara Tutuin 19:29; 27:2; Filmon 24; Nedenuk kara Tutuin 12:12; 25; 13:13; 15:37-39\x*  
\v 11 Yesus (fo ita token tae, “Yustus”) oo haitua hara masodak soa-neu ei boe. Numa basa nonook kara lalaꞌen fo mana sama-sama rakalalaꞌok Manetualain ue-osan, kada sira telu sara ndia dadi reu hatahori Karisten numa hatahori nusak Yahudi mai. Sira iar, ndia ratetea au daleng.   
\p
\v 12 Ei nonoom Epafras nai ia, ma ana oo haitua hara masodak soa-neu ei boe. Ana dadi neu Yesus Karistus neondan. Ana soa hule-haradoi no tebe-tebe soa-neu ei, ma noke-hule fo Manetualain natetea ei, tao natetu do nakadaik ei ma tao ei bubuluk tebe-tebe Ndia hihii-nanaun.\x + \xo 4:12 \xt Kolose 1:7; Filmon 23\x*  
\v 13 Au afada memak ei ae, Epafras naa, naue-osa fafandek lima-ein nara soa-neu ei, ma fee hatahori Karisten nara marai kota Laodikea ma kota Herapolis.   
\p
\v 14 Hambu hara masodak numa Demas, ma numa doter Lukas mai, fo ita hatahori susuen.\x + \xo 4:14 \xt 2 Timotius 4:10, 11; Filmon 24\x*   
\p
\v 15 Au haitua hara masodak soa-neu toranoo kamaherek kara marai kota Laodikea. Boso lilii-ndondou haitua au hara masodang soa-neu Mama Nimfa no hatahori kamaherek kara fo mana rasiꞌe rakabua rai ndia uman.   
\p
\v 16 Mete ma ei basa ngga marai Kolose lees basa susurak ia ena, na, haitua makandoon neni hatahori kamaherek kara marai kota Laodikea neu, fo ara oo bisa lees boe. Ma ei oo muste lees susurak fo au haitua itan fee sara ena boe.   
\p
\v 17 Fee nesenedak neu Arkipus mae, “Boso lilii-ndondou makalalaꞌok makababasak ues fo o simbo malan numa Lamatuak mai naa ena.”\x + \xo 4:17 \xt Filmon 2\x*   
\p
\v 18 Boso lilii-ndondou mae, ara bei kena au nai bui ia.  
\p Au oke-hule fo Manetualain natudu Ndia dale susuen neu ei.  
\p \it Mete neu te susurak ia, au lima reen pake au lima heli-heling\it*.  
\q2 \it Hara masodak numa au mai\it*,  
\q2 \it Paulus\it*