\id 2TI  
\h 2 Timotius 
\toc1 Paulus susura kaduan fee nonoon Timotius 
\toc2 2 Timotius 
\toc3 2Tim 
\mt1 2 Timotius  
\mt2 Paulus susura kaduan  
\mt2 fee nonoon Timotius  
\c 1  
\s1 Soda-molek  
\p
\v 1-2 Timotius fo malole!  
\p Susurak ia numa au mai, Paulus, fo Manetualain mesa kana here nalan dadi neu Yesus Karistus nedenun ena. Ara radenu au fo uu afada masoda ndoos naa, fo Manetualain helu-bartaa elak fee neu basa hatahorir fo mana ramahere neu Yesus Karistus ena.  
\p Timotius, ee! O sama leo au ana heli-heling ena. De au hule-haradoi oke fo Manetualain, ita Aman, no Yesus Karistus, ita Lamatuan fo sue-lai o, ratudu dale susuen ma fee o leo-laꞌo no mole-damek ma lino-lendek.\x + \xo 1:1-2 \xt Nedenuk kara Tutuin 16:1\x*   
\s1 Paulus noke makasi neu Lamatuak  
\p
\v 3 Hatu-leledon au hule-haradoi fee o. Au soa oke makasi neu Manetualain, nahuu o tungga makandoo neun. Au aono-lalau Manetualain no dale lolo-laok, sama leo ita baꞌin nara raono-lalaun.  
\v 4 Au asaneda fai bakahulun fo ita tabaꞌek naa, o luu-oem tuda. Huu naa de au daleng hii nalan seli atonggo seluk ua o, mita fo au daleng namahoko.   
\p
\v 5 Au oo asaneda fai bakahulun fo o mulai mamahere tebe-tebe neu Lamatuak Yesus. Nemeheherek matak leo naak naoka memak nai o beim Luisa, ma o inam Eunike dalen. Ma au oo amahere tebe-tebe boe ae, nemeheherek matak leo naak oo, ana mori nai o dalem boe.\x + \xo 1:5 \xt Nedenuk kara Tutuin 16:1\x*   
\s1 Paulus noke fo Timotius pake babanggi-babaꞌek fo Lamatuak feen  
\p
\v 6 Fai bakahulun neu au ndae au limang neu o langgam lain, ma hule-haradoi fee o, faik naa Manetualain tao nala o mabeꞌi tao ue-osa fee Ndia. De hatematak ia au oke fo o makarombe falik o babanggi-babaꞌem naa.  
\v 7 Manetualain Dula-dalen ta tao ita dadi teu hatahori taꞌu tekek. Tehuu Ana tao ita dadi teu hatahori mana nabeꞌik ma namahena aok, mana nalela nasue-laik, ma mana nalela nakatataak aon no malole.  
\v 8 Dadi boso mae kokolak laꞌe-neu ita Lamatuan fo mana naena haak parenda ita. Boso mae nahuu au ia hatahori bui. Au maso bui ia, nahuu au aono-lalau neu Ndia. Mete ma o muu tui-bengga Hara Lii Malolen naa, na, o muste mahehere fo lemba-masaa mala susa-sonak sama leo ai. Mete ma o hambu susa-sonak leo naak, na, neu ko Manetualain fee o bebeꞌi-barakaik.   
\q1
\v 9-10 Manetualain ndia tao nasoi-nasoda ita numa ita sala-singgon nara mai.  
\q2 Ma Ana here nala ita dadi teu Ndia hatahori lolo-laon ena.  
\q1 Ana natudu dale susuen neu ita, nahuu Ana sue-lai ita.  
\q2 Naa te ita ta tao hata esa boe na fo nandaa ita simbo Ndia dale susuen.  
\q1 Manetualain bei ta adu dae-bafok ia, tehuu Ana naketu memak ena fo nadenu Yesus Karistus mai,  
\q2 fo natudu Ndia dale susuen, ma tao nasoi-nasoda ita.  
\q1 Yesus Karistus mai ena, de Ana buka Manetualain nanaen naa isin ena.  
\q2 Ana nakalulutu mamates koasan ena.  
\q3 Ia dadi neu Hara Lii Malole!  
\q2 Dadi see ndia namahere neu Yesus Karistus, neu ko ana nasoda nakandoo no Manetualain.   
\p
\v 11 Huu naa de Manetualain soꞌu nala au dadi uu Yesus Karistus nedenun, fo au tui-bengga Ndia Hara Lii Malolen, ma au anori hatahorir nai bee a mesan.\x + \xo 1:11 \xt 1 Timotius 2:7\x*  
\v 12 Basa naar tao au doidoso nai bui ia dale, huu au akalalaꞌok Yesus Karistus parendan naa. Leo mae talo naa oo, au ta mae, nahuu au bubuluk see ndia au amaheren, ndia Lamatuak Yesus. Ma au oo bubuluk tebe-tebe boe ae, Ana ndia natotoꞌu ues ia neu au limang. Ana ndia nabeꞌi nanea ues ia, ma Ana ndia tao au abeꞌi akalalaꞌok ue-osa ia losa Ana fali mai.  
\v 13 De manori tungga nenorik tetun fo au atudu basan neu o leo. Mete ma o mamahere makandoo ma sue-lai basa hatahorir talo naa, na, naa natudu nae, o dadi esa mua Yesus Karistus ena.  
\v 14 Manetualain fee o suꞌi mabeli esa nai o limam ena, ndia nenori matetuk. De lopo-linu matalolole suꞌi naa! Pake Manetualain Dula-dale Malalaon manai ita dalen, mita fo Ana tulu-fali o lopo-linu ma manea matalolole suꞌi naa.   
\s1 Onesiforus tulu-fali Paulus nai bui dale  
\p
\v 15 Neu ko o mamanene ena rae, Figelus ma Hermogenes, ma hatahori laen nara maruma profensi Asia\f + \fr 1:15 \ft Profensi Asia lele uluk naa, hatematak ia dadi neu negara Turki murin.\f* mai rasadea laꞌo ela au ena.  
\v 16-18 Tehuu Onesiforus laen bali. Ana ta nakaheok numa au mai. O mita no o matam, fai bakahulun neu au bei numa kota Epesus, ana tulu-fali au nakandoo. Hatematak ia ana mai nai kota Roma ia ena. Neu ana losa, ana sangga au ndule sudi nai bee. Mateꞌen, ana natonggo au numa bui dale. Tehuu ana ta mae. Ana mai tiro-dangga au taa-taa nai bui ia, fo natetea au daleng.  
\p De au hule-haradoi fo Manetualain natudu dale susuen neu Onesiforus no basa nufanelun nara. Neu ko ndaa no dae-bafok fai mateꞌen, mete ma Manetualain naketu-naladi hatahori dae-bafok kara dedeꞌan, na, au amahena fo Manetualain naketu-naladi no malole neu Onesiforus asa.   
\c 2  
\s1 Ita mana tungga Karistus, muste leo-laꞌo sama leo soldadu mana tungga nakandoo komedan  
\p
\v 1 Timotius, au ana susueng! Yesus Karistus dalen malole. Ana nae fee seluk o bebeꞌi-barakaik. Dadi o muste simbo malan leo, huu hatematak ia o makaesa muan ena.  
\v 2 Fai bakahulun, au anori o laꞌe-neu Manetualain eno-dala ndoon numa hatahori noꞌuk kara matan ena. De hatematak ia au oke o, fo basa hata fo o mamanene malan numa au mai ena, na, o muu manori seluk kasa bali reu hatahori see fo o bisa mamaheren. Hatahorir raa muste bisa ranori seluk nenorik naa, fee hatahori laen bali.   
\p
\v 3 Ita basa ngga ia, sama leo Yesus Karistus soldadun. De ita basa ngga sama-sama lemba-tasaa tala doidosok sama leo Ndia. Huu o ia soldadu neulauk, de o muste lemba-masaa mala o babaꞌem.  
\v 4 Soldadu mana makalalaꞌok ues, ana ta sorodododo no tataok laen bali. No dalak naa, ana bisa tao namahoko komedan.   
\p
\v 5 Haꞌi netuduk laen numa nekeseseꞌuk mai. Mete ma ita tungga nekeseseꞌuk, na, muste tungga nekeseseꞌuk hohoro-lalanen. Mete ma taa, na, hahae leo! Ta bisa hambu joara. Leo naak boe, mete ma ita tae takalalaꞌok Lamatuak ue-osan, na, muste tungga Ndia hohoro-lalanen.   
\p
\v 6 Mete neu hatahori mana ue daek boe. Ana naue-osa fafandek lima-ein nai ndia osin. Dadi ana ndia makasososan hambu osi naa buna-boan.  
\v 7 Duꞌa matalolole netuduk kara raa. Neu ko Manetualain fee o malela basa naar.   
\p
\v 8 Duꞌa matalolole neu Yesus Karistus. Ndia naa, mane Dauk tititi-nonosin. Ana mate, tehuu Manetualain tao nasoda falik kana numa mamaten mai. Naa, dadi neu Hara Lii Malole fo au laꞌok uu tui-benggan sudi nai bee.  
\v 9 No au tui-bengga Hara Lii Malole naa, huu naa de au hambu doidosok talo ia. Lenak bali ara oka au ma bonggo budi au pake rante, nok bali au ia hatahori manggarauk. Leo mae talo naa oo, ara ta bisa kena-kaꞌi rala Manetualain Hara Lii Malolen boe.  
\v 10 De au sadia lemba-asaa doidosok mata-matak. Sadi Manetualain hatahorin fo Ana here nalak kara ena, bisa hambu masoi-masodak. Neu ko Manetualain nakadedemak kasa rakandoo, nahuu ara dadi reu Yesus Karistus hatahorin nara.  
\v 11 Dedeꞌa deꞌek kara iar memak tetebes:  
\q1 “Mete ma ita simbok tae, Karistus mate nggati ita, na,  
\q2 naa sama leo ita oo mate laꞌo ela ita leleo-lalaꞌo raan boe,  
\q2 basa boe ma ita oo neu ko leo-laꞌo sama-sama toon boe.   
\q1
\v 12 Mete ma ita takatataka tala doidosok sama leo Karistus,  
\q2 ita oo neu ko tanggatuuk toꞌu parenda sama-sama toon boe.  
\q1 Tehuu mete ma ita laka ta talela sana,  
\q2 Ana oo laka ta nalela nasafali ita boe.\x + \xo 2:12 \xt Mateos 10:33; Lukas 12:9\x*   
\q1
\v 13 Leo mae ita dalen ta mahanik toon,  
\q2 tehuu Ndia dalen mahanik no ita seku neu,  
\q3 nahuu Ana ta bisa pepeko. Hata fo Ana kokolak kana, neu ko Ana tao natetun.”   
\s1 Hatahori mana maue-osa fo Manetualain koan  
\p
\v 14 Fee nesenedak neu hatahori kamaherek kara, fo ara boso lilii-ndondou basa dedeꞌak kara iar. Madenu sara no Manetualain naden, fo ara hahae adu bafa-maak laꞌe-neu dedeꞌa deꞌek sosoa-ndandaan. Huu basa naar ta raena sosoa-ndandaak faa boe na. Kada rakalulutu hatahori mana mamanenek kara duduꞌan.  
\v 15 Maote tebe-tebe fo tao o aom sama leo hatahori maue-osak fo nandaa hambu kokoak numa Manetualain mai. Hatahori leo naak, hae mae, nahuu ana tao natetu uen no malole ena. O muste dadi hatahori mana fee nenorik laꞌe-neu Manetualain Dedeꞌa-kokolan no ndoos. Ndia Dedeꞌa-kokolan naa, tetebes!  
\v 16 Makadodook numa kokola huu-suꞌu taak mai, ma numa kokolak ta mana neni hada-horomatak neu Manetualain mai. Huu kokolak kara raa kada tao hatahori boe manggarau.  
\v 17 Sira kokola manggaraun nara ranamak sama leo hedi kangker. Himenius no Filetus kokolan nara, tetar leo naak!  
\v 18 Dua sara fee nenorik sala rae, basa hatahori mates sara rasoda fali ena. Tehuu naa ta ndaa! No dalak naa, ara sio laꞌo dook ka numa hata fo ndoos mai ena. Hata fo ara fee nenorik naa, rakalulutu hatahori ketuk nemeheheren.   
\p
\v 19 Tehuu oka-huuk fo Manetualain nambaririik nalak ena, ta nanggenggo. Nai oka-huuk naa lain, hambu neni surak nae, “Lamatuak nalela Ndia hatahorin nara,” ma “Hatahori mana makaluku-makatele neu Manetualain, muste nakadodook numa manggarauk mai.” Oka-huuk naa, ndia Manetualain hatahorin nara.\x + \xo 2:19 \xt Susura Rerekek 16:5\x*   
\p
\v 20-21 Haꞌi netuduk numa hatahori kamasuꞌik kara uman mai. Hambu bua-baꞌu mata-matak. Ketuk neni dokik numa lilo mbilas ma lilo fulak mai. Tehuu ketuk oo ruma ai ma dae manu taꞌik mai boe. Bua-baꞌur maruma lilor mai, tenu uma namahoko nalan seli pake sara nai feta-dote moꞌok. Tehuu bua-baꞌu biasa, tenu uma mae pake sara nai hatahori matan. Leo naak oo no hatahori dae-bafok boe. Hatahori mana nakadodook aon numa manggarauk mai, ana sama leo bua-baꞌu neulauk kara. Tenu uma namahoko paken, nahuu ana naena sosoak fo tao ue-osa malole mata-matak.   
\p
\v 22 Hatahori muri-soruk kara siik nala sara no muda hiek tungga ao-mbaak hihiin. Tehuu Timotius, o muste manea matalolole aom, fo boso tungga ao-mbaak hihiin talo naa. Maote tebe-tebe fo tao hata fo malole makandoo. Mamahere makandoo neu Lamatuak. Leo-laꞌo no susue-lalaik ma mole-damek neu basa hatahorir. Basa hatahorir fo mana ramahere neu Lamatuak, ma mana leo-laꞌo no dale lolo-laok, ara hii kada tao hata fo malole rakandoo. Dadi Timotius, o muste leo-laꞌo sama leo sara, ee!  
\v 23 Au afada seluk bali! Boso muu sorodododo, do, masimbo bafak neu dedeꞌa huu-suꞌu taak. Basa naar soa tao hatahorir rahuur.  
\v 24 Hatahorir fo mana raue-osa fee Lamatuak, ta randaa dadi reu hatahori mana unda-podek. Tehuu ara muste bangganaꞌu ro basa hatahorir, ralela ranori hatahori, ma raena dale naruk mbali hatahori mana sangga-sangga netofak kara.  
\v 25 Ara muste rakalalaꞌok no dale neulauk neu hatahori mana laban asa. No dalak naa, bisa dadi, Manetualain oꞌofe nasafali dalen nara fo ara sale dalen do tuke tein, de simbo rala hata fo ndoos.  
\v 26 No dalak naa, duduꞌan nara manggaledo bali, de ara bisa rakamboꞌik numa nitur malanggan mai, mana ike nala sara fo tungga hihiin ena.   
\c 3  
\s1 Nai dae-bafok fai mateꞌen hatahorir dadi sama leo hata?  
\p
\v 1 Timotius! Deka-deka no dae-bafok fai mateꞌen, neu ko susa-sonan noꞌun seli. Au afada memak o talo naa.  
\v 2 Neu faik naa, hatahorir sue-lai neu kada sira ao heli-helin ma dale hedi kada doik. Ara koa ao, ma mete rakadadaek hatahori laen, soa rakamuu, ta nau nenene ina-ama, ta hii roke makasi, sesesu taak, ta hii matak bee fo laꞌe-neu Manetualain,  
\v 3 ta nau sue-lai hatahori, ta nau mole-dame ro hatahori, hii rakabobook hatahori nade malolen, ta rakatataka rala aon, manggarau ndoos, ta hii hata fo malole,  
\v 4 hii kada raseꞌo heni toranoon nara, ta raena duduꞌa naruk, tao aon leo hatahori malelak tehuu taa, soa tungga ao-mbaak hihiin lena heni numa tungga Manetualain hihiin mai.  
\v 5 Ara oo tao aon nara leo hatahori mana tungga Manetualain boe, tehuu rouk. Manetualain koasan ta nai sira dalen dale. Boso deka-deka mua hatahori matak leo naak kara.   
\p
\v 6 Hatahori matak leo naak kara, ara maso reni hatahorir uman nara reu ro idu-mata malenggak, fo reu fufudi inak bee fo dalen nara ta matea, ma ara bisa laꞌe soba-douk no muda hiek. Inak matak leo naak kara leo-laꞌo lemba kilu-salak noꞌun seli, ma tungga ao-mbaak hihiin mata-matak.  
\v 7 Ara ramanene meser beuk mai fee nenorik laꞌe-neu nenori beuk, na, ara tungga-tungga a mesan. Tehuu ara ta ralela rita bee ndia ndaa ma bee ndia sala.  
\v 8 O masaneda tutuik Yanes no Yamres, hetu?\f + \fr 3:8 \ft Nadek ‘Yanes no Yamres’ ta hambu sara rai susura \ft \+it Hehelu-bartaa Raak\+it* kara. Tehuu hambu hatahori malela ketuk rae, fama te dua sara raa, hatahori malelak numa Masir mai, fo mana laban Musa neu faik fo ana nuni hatahori Israꞌel kalua numa Masir mai. Lees tutuik naa, nai buku \+it Kalua numa Masir mai\+it* 7:11.\f* Lelek naa, dua sara rareresi ro baꞌi Musa. Meser beuk mana maik hatematak ia oo hihiru-heheon nara sama leo naak boe. Ara laban nenori ndoos. Sira duduꞌan nara ta neulauk, ma nemeheheren nara ta tungga ndoon ena.  
\v 9 Meser mana pepekok matak leo naak kara, ta bisa rakataka rala dook ka. Doo-doo te basa hatahorir bubuluk sira nggoa beben nara! Sama leo fai bakahulun fo hatahorir bubuluk Yanes no Yamres pepeko-lelekon.   
\s1 Toꞌu maherek nenorik fo o simbo malak ena  
\p
\v 10 Timotius, ee! O bubuluk basa au masodang ena. O bubuluk basa hata fo au fee nenorik. O bubuluk au leleo-lalaꞌong. O bubuluk au duduꞌang. O bubuluk hata fo au amaherek. O mete-mita no o mata heli-helim ena, au dale narung neu hatahorir, ma au susueng neu sara. Ma o bubuluk au akatataka talo bee no dale naruk nai au doidosong dale.  
\v 11 O bubuluk mae, ara oo poko-femba rakamiminak au boe, losa au lemba-asaa ala doidosok mata-matak. Au hambu doidosok talo naa nai kota Antiokia, Ikonium, ma Listra. Tehuu Manetualain nakamboꞌik au numa basa naar mai.\x + \xo 3:11 \xt Nedenuk kara Tutuin 13:14-52; 14:1-7, 8-20\x*  
\v 12 Memak, basa hatahorir fo mana ramahere neu Yesus Karistus, ma nau leo-laꞌo no lolo-laok tungga Manetualain hihii-nanaun, neu ko hatahorir tao doidoso sara.  
\v 13 Lenak bali, hatahori manggarauk ma hatahori mana pepekok kara boe tamba manggarau rakandoo. Ara kedi-ira ratuda hatahori laen, naa te ara oo hambu kedi-irak boe.   
\p
\v 14 Dadi o muste toꞌu maherek nenorik fo o simbo malak naa. Ma hata fo o mamaherek naa, tungga makandoon talo naa. Naa, ndia ndaa! O bubuluk tetebes, see ndia fee nenorik basa naar neu o, hetu? O bisa mamahere neu sara.\x + \xo 3:14 \xt 2 Timotius 1:5; 2:2\x*  
\v 15 Mulai numa o bei kadiꞌin mai, o manori Manetualain Susura Malalaon isin ena. Susurak kara raa ratudu dala masoi-masodak, fo o bisa leo-laꞌo makaesa mua Manetualain nai nusa tetuk do inggu temak, nahuu o mamahere neu Yesus Karistus.  
\v 16 Basa hata fo neni surak nai Susura Malalaok naa, memak Manetualain ndia fee hatahori fo surak kasa. Susurak naa sosoan, sira: nanori hatahorir hata fo ndoos, natudu hatahori sala-singgon, leꞌa falik hatahori neni dala ndoos neu, ma didi-bui hatahori fo tungga faik leo-laꞌo tungga Lamatuak hihii-nanaun.  
\v 17 No dalak naa, Susura Malalaok naa bisa tao natetu do nakadaik Manetualain hatahorin nara mita fo ara rabeꞌi tao basa ue-osa neulauk.   
\c 4  
\s1 Muu tui-bengga Manetualain Dedeꞌa-kokolan neu hatahorir  
\p
\v 1-2 Yesus Karistus fali neni dae-bafok ia mai, fo toꞌu parenda sama leo manek. Hatahori bei masodak, ma hatahori mates oo, ara sama-sama reu rataan fo Ana naketu-naladi sira dedeꞌan boe. De au oke tebe-tebe neu o nai Manetualain no Yesus Karistus matan, fo muu tui-bengga Manetualain Dedeꞌa-kokolan neu hatahorir. Mahani a memak! Hae duduꞌa ndia fain malole do taa. Matudu hatahorir salan. Tehuu kaꞌi-ore malole sara no dale naruk. Matetea hatahori dalen pake nenori ndoos.   
\p
\v 3 Huu neu ko mbila-beinesak, hatahorir ta nau nenene nenori ndoos ena bali. Neu ko ara rakabubua rala meser mana bisa kokolak tungga sira hihiin, fo tao kada nemehoko dalen nara.  
\v 4 Ara sena ndiꞌi doon nara fo tola heni nenori ndoos. Tehuu ara pasa ndiꞌi doon nara fo nenene tutui lasik fo ta tetebes sara.   
\p
\v 5 Leo mae talo bee oo, o muste kada matu-matu ma makatataka aon boe. Makatataka nai doidosok dale. Muu tui-bengga Hara Lii Malole fo hatahorir simbok Yesus Karistus. Maono-lalau hatahorir no dale nemehokok losa ue-osa naa basan. Boso no kada dale bibiak.   
\p
\v 6 Hae faduli laꞌe-neu au aong, te au fai mamaten deka-deka ena. Au ia, sama leo nggalas, isin sangga basan ena.\f + \fr 4:6 \ft Neu hatahori Yahudir tao tunu-hotuk numa Uma Huhule-haradoi Ina-huuk, hambu tunu-hotu matak esa, ndia, muste mboꞌa oe anggor neu mei tunu-hotuk lain. Fama te Paulus fee lololek nae, ndia masodan sama leo oe anggor fo sangga neni mboꞌa basak, fo dadi neu fefeek soa-neu Manetualain.\f*  
\v 7 Au akaseseꞌuk basa no malole ena. Au alaik losa too mateꞌen ena. Au tungga taa-taa ua Yesus Karistus, ma ta sio sudi uni bee uu.  
\v 8 Hatematak ia ela kada matak esa fo au ahanin. Ndia, beker joara fo ita Lamatuan mbeda memak kana ena fee basa hatahorir mana leo-laꞌo no ndoos. Ita Lamatuan naa, ndia mana maketu-maladi no matetuk. Ana ta mbeu seserik. Ndaa no fain, neu ko Ana loo lima fee au beker joara naa. Ma ta kada au mesa ngga. Basa hatahorir fo mana sue-lai neun, ma rahani a Ndia mamain, ara oo hambu beker talo naa boe!   
\s1 Paulus fee hara heheluk laꞌe-neu dedeꞌa mata-matak  
\p
\v 9 Timotius, ee! Mai lai-lai fo tiro-dangga au dei!  
\v 10 Hatematak ia kada au mesa ngga. Kreskes laꞌo neni profensi Galatia neu ena. Ma Titus laꞌo neni nggoro Dalmatia neu ena. Tehuu Delmas sue lenak neu hata ta neulauk kara nai dae-bafok ia, de ana laꞌo ela au ena fo neni kota Tesalonika neu.\x + \xo 4:10 \xt Kolose 4:14; Filmon 24; 2 Korentus 8:23; Galatia 2:3; Titus 1:4\x*  
\v 11 Kada Lukas mesa kana leo no au nai ia. Sangga mala Markus fo ei dua ngga mai sama-sama. Huu ana bisa tulun mata-matak neu au nai ia.\x + \xo 4:11 \xt Kolose 4:14; Filmon 24; Nedenuk kara Tutuin 12:12; 25; 13:13; 15:37-39; Kolose 4:10\x*  
\v 12 Au adenu Tikikus neni kota Epesus neu ena.\x + \xo 4:12 \xt Nedenuk kara Tutuin 20:4; Epesus 6:21-22; Kolose 4:7-8\x*  
\v 13 Mete ma o mai, na, boso lilii-ndondou haꞌi muni au badu hanang fo laꞌo elan nai Karpus uman nai kota Troas. Ma boso lilii-ndondou haꞌi muni au susurang nggara, lenak bali neni surak nai banda rouk kara.\x + \xo 4:13 \xt Nedenuk kara Tutuin 20:6\x*   
\p
\v 14 Aleksander, mana tutu riti naa, ana tao manggarauk ta baꞌu anak neu au ena. Elan numa naa te neu ko Lamatuak balan, tungga tatao-nonoꞌi manggaraun naa.\x + \xo 4:14 \xt 1 Timotius 1:20; Sosoda Kokoa-kikiok kara 62:12; Roma 2:6\x*  
\v 15 O muste besa-besa mua hatahori naa, nahuu ana soa laban ita dedeꞌa-kokolan.   
\p
\v 16 Neu makasososan au ambariik asalaꞌe au dedeꞌang numa mana maketu-maladi dedeꞌak matan, ta hambu hatahori esa boe na fo sama-sama no au. Basa sara laꞌo ela au. Mboꞌi sara ruma naa! Elan fo Manetualain lilii heni sira sala-singgon nara.  
\v 17 Leo mae talo naa oo, tehuu Manetualain ta laꞌo ela au boe. Ana fee bebeꞌi-barakaik neu au, mita fo au bisa tui-bengga Ndia Hara Lii Malolen no ta kuran hata esa boe na. Au tui-bengga talo naa, neu basa hatahori ta Yahudir, fo ara ramanene rala Hara Lii Malole naa. Ma au oo akamboꞌik numa sosoe moꞌok mai ena boe.  
\v 18 Neu ko Manetualain nakamboꞌik au numa basa manggarauk kara mai. Ma Ana nakalalaꞌok au no sodak, maso uni nusa tetuk do inggu temak uu. Nai naa, Ana ndia toꞌu parenda.  
\p Manetualain ta neni babanggak sudi selik kana! Au koa-kio akadedemak kana ta mana ketuk! Amin.   
\s1 Paulus nateꞌe susuran  
\p
\v 19 Boso lilii-ndondou fee hara masodak neu susi Priskila,\f + \fr 4:19 \ft Dedeꞌa Yunani nai ia surak nae, ‘Priska’. Priska no Priskila naa, nadek dua, te hatahori esak ka.\f* no saon kaꞌa Akila. Leo naak oo no basa Onesiforus nufanelun lalaꞌen boe.\x + \xo 4:19 \xt Nedenuk kara Tutuin 18:2; 2 Timotius 1:16-17\x*  
\v 20 Erastus bei leo nai kota Korentus. Fai bakahulun au laꞌo ela Trofimus nai kota Miletus, huu faik naa ana namahedi berak.\x + \xo 4:20 \xt Nedenuk kara Tutuin 19:22; Roma 16:23; Nedenuk kara Tutuin 20:4; 21:29\x*  
\v 21 Maote tebe-tebe fo ta bei losa fai makasufuk, na, o losa nai ia ena. Toranook kara marai iar, sira: Ebulus, Pudes, Linus ma susi Klaudia haitua hara masodak neu ei. Leo naak oo no toranoo Karisten laen nara boe.   
\p
\v 22 Au amahena Manetualain sama-sama no o seku neu, ma Ana natudu dale susuen neu ei basa ngga.  
\q2 Baꞌu kada naa,  
\q2 Paulus