\id 1PE  
\h 1 Petrus 
\toc1 Petrus susura kaesan 
\toc2 1 Petrus 
\toc3 1Pet 
\mt1 1 Petrus  
\mt2 Petrus susura kaesan  
\c 1  
\s1 Soda-molek  
\p
\v 1-2 Susurak ia numa au mai, Petrus, ndia Yesus Karistus nedenun.  
\p Au surak susurak ia fee ei basa ngga fo Manetualain here nalak kara dadi neu Ndia hatahorin ena. Ei dadi miu hatahori feꞌek fo mana leo natanggela nai mamanak noꞌuk ka nai profensi Pontus, profensi Galatia, profensi Kapadokia, profensi Asia ma profensi Bitinia.  
\p Toranoo susue nggara ein! Numa makasososan mai, Amak Manetualain here memak nala ei ena, fo dadi neu Ndia hatahorin. Ndia Dula-dalen oo tao nala ei dadi malalaok soa-neu Ndia boe, mita fo ei bisa tao tungga basa parendar fo Yesus Karistus feen neu ei. Mete ma ei tao tungga basa Ndia parendan nara raa, naa sama leo Manetualain bibiru Yesus daan neu ei fo dadi tanda nae, ei dadi malalaok soa-neu Ndia ena.  
\p Au hule-haradoi fo Manetualain natudu Ndia dale susuen neu ei, mita fo ei bisa leo-laꞌo tamba faik, tamba lino-lendek ma mole-damek.   
\s1 Mete ma ita tamahere neu Lamatuak, ita tasarai-tasarada neu Ndia  
\p
\v 3 Basa kokoa-kikiok soa-neu Manetualain! Ndia naa, ita Lamatuan Yesus Karistus Aman. Manetualain madale lilok, huu naa de Ana kasian nalan seli neu ita. Yesus Karistus maten, basa de Ana tao nasoda falik kana numa mamaten mai. Dadi mete ma Karistus tao nala ita tasoda, Ana fee ita masoda beuk fo malole fali to Manetualain, sama leo ita neni bonggi seluk. Huu naa de ita tamahere neu Karistus takandoo, de ita tamahena ma tamahere tebe-tebe tae, neu ko Ana nakaboi-nasamao natalolole ita.  
\v 4 Nai dae-bafok ia, mete ma amak esa mate, na, ana laꞌo ela ndia hata-heton soa-neu ndia anan nara. Leo naak oo Yesus mbeda ela pusaka soa-neu ita nai lalai ena boe. Pusaka naa ta bisa nakararafu, ta bisa nakalulutu ma ta bisa mopo henin.  
\v 5 Ei mamahere mae, Manetualain naena koasa fo tulu-fali nala ei. Ana nakaboi-nasamao ei ma nanea ei fo boso hambu mana nakalulutu ei. Mete ma neu dae-bafok fai mateꞌen, Ana nau natudu dalak talo bee fo Ana tao nasoi-nasoda ei.   
\p
\v 6 Huu naa de ei dalem mara ramahoko, leo mae hatematak ia ei mameda berak, nahuu ei muste hambu mala susa-sonak mata-matak.  
\v 7 Manetualain fee lelak neu ita mana hambu tala soba-douk fo sangga fora ita nemeheheren neu Ndia. Mete ma ita takamboꞌik numa soba-douk mai, naa natudu nae, ita nemeheheren naa, matea ma tetebes. Ita bisa takasasamak kana no lilo mbilas. Ita muste hotun neu aꞌi, mita fo nggeon kalua henin, dei fo ita hambu lilo mbilas isi-isik. Naa te tungga Manetualain duduꞌan, ita nemeheheren belin lena heni lilo mbilas. Dadi mete ma ita nemeheheren nakamboꞌik numa soba-douk talo naa mai, neu ko neu Yesus Karistus fali mai, Manetualain koa ita, boe ma Ana natudu ita ta hohoꞌan ma fee ita hada-horomatak.   
\p
\v 8 Leo mae ei bei ta mete-mita Yesus no ei matam mara, tehuu ei sue-lai neun. Leo mae ei bei ta mete-mitan hatematak ia, tehuu ei mamahere neun. Ei dalem mara oo mbena sau-sau lenak boe, leo mae ta hambu dedeꞌa deꞌek mandaak fo mafada hatahorir laꞌe-neu ei dale nemehokom mara.  
\v 9 Manetualain tao nasoi-nasoda ei numa ei sala-singgom mara mai, dadi neu ei seseba-babaem, nahuu ei mamahere neun.   
\p
\v 10 Manetualain mana toꞌu dedeꞌa lele ulun nara sangga bubuluk fo nau ralela no neulaun lenak, talo bee fo Manetualain tao nasoi-nasoda hatahorir numa sala-singgon nara mai. Mana toꞌu dedeꞌak kara raa rafada memak laꞌe-neu Manetualain natudu Ndia dale susuen neu ei, nahuu Ana nahani memak kana ena fo tao nasoi-nasoda ei.  
\v 11 Karistus Dula-dalen naote nai sira dalen nara fo nafada memak kana nae, neu ko Karistus muste hambu susa-sonak ma Ana muste hambu doidosok talo bee. Basa naar lalaꞌen dadi, dei fo Manetualain nakadedemak kana. Huu naa de mana toꞌu dedeꞌak kara raa nau sangga bubuluk faik bee dedeꞌak kara iar mori-dadi.  
\v 12 Boe ma Karistus Dula-dalen naa oo nafada mana toꞌu dedeꞌak kara raa boe nae, ta sira ndia mete-rita, tehuu ei ndia mete-mita dedeꞌak kara iar. Hatematak ia ei oo mamanene laꞌe-neu dedeꞌak kara iar boe, nahuu Manetualain Dula-dale Malalaon numa nusa tetuk do inggu temak mai nadenu hatahori laen, fo neu tui-bengga Lamatuak Hara Lii Malolen neu ei. Naa te Manetualain atan nara ruma nusa tetuk do inggu temak mai oo hii ralan seli mete-rita dedeꞌak kara iar boe.   
\s1 Lamatuak nadenu fo ita leo-laꞌo lolo-laok  
\p
\v 13 Huu naa de ei muste sadia mahani a fo malela matalolole basa dedeꞌak kara iar. Manea matalolole fo ei duduꞌa no ndoos. Sadia tahani a fo tamahere takandoo neu Yesus Karistus losa Ana fali mai, nahuu neu faik naa, Manetualain nae natudu Ndia dale susuen neu ei.  
\v 14 Ei muste nenene neu Manetualain, sama leo kakanak kara nenene neu sira ina-aman. Fai uluk ei bei ta malela Manetualain eno-dala masoda teteben. Tehuu hatematak ia, ei malela ena. De boso leo-laꞌo tungga ei hihii-nanaum fo tao manggarauk bali. Naa, ei leleo-lalaꞌo raam.  
\v 15 Huu naa de hatematak ia ei muste leo-laꞌo malalaok. Huu Manetualain naa, malalaok. Ana ndia noke nala ei fo dadi miu Ndia anan. Huu naa de ei muste malalaok nai basa ei leleo-lalaꞌom katematuan.  
\v 16 Sama leo neni surak nai Manetualain Susura Malalaon dale nae, “Ei muste malalaok, nahuu Au malalaok.”\x + \xo 1:16 \xt Malangga Anggamar Hohoro-lalanen 11:44-45; 19:2; 20:7\x*   
\p
\v 17 Ei hii kokolak mia Manetualain sama leo Ndia naa, ei Amam. Ana oo dadi Mana Maketu-maladi Dedeꞌak fo neu ko parisa hatahori esa-esak leleo-lalaꞌon. Tehuu Ndia laen numa mana maketu-maladi dedeꞌak laen nara mai. Huu Ana naketu-naladi hatahorir dedeꞌan nara no matetuk ma ta mbeu serik. Huu naa de ei muste leo-laꞌo no besa-besa. Te ei sama leo hatahori feꞌek mana leo taak a mesan nai dae-bafok ia.   
\p
\v 18 Ei bubuluk ena mae, Karistus bae ketu ena fo tefa-soi nala ei numa ei leleo-lalaꞌom fo sosoa-ndandaa taak mai. Leleo-lalaꞌo rupak leo naak naa, ei simbo malan numa ei bei-baꞌim mara mai, nok bali pusaka esa. Tehuu masaneda, te Karistus bae ketu soa-neu ei, ta pake lilo mbilas do lilo fulak fo neu ko mopo heni sara.  
\v 19 Tehuu Ana bae nala ei nenik Ndia daa heli-helin. Naa, belin sudi selik kana. Ana mate nok bali ara hala bibi lombo ana maro ta kambiꞌe-toꞌik esa, fo ara halan dadi neu tunu-hotuk.   
\p
\v 20 Neu lelek Manetualain bei ta adu dae-bafok ia, Ana bubuluk memak ena basa-basan fo neu ko Karistus taok. Tehuu lele uluk Manetualain bei ta natudu Karistus neu hatahori manai dae-bafok ia. Hatematak ia dei de Ana natudu Karistus fo dadi neu babaꞌe-babatik soa-neu ei.  
\v 21 No hata fo Karistus taok, huu naa de ei bisa mamahere neu Manetualain. Ana tao nasoda falik Karistus numa mamaten mai ena ma nakadedemak kana. Manetualain tao talo naa, mita fo ei mamahere neu Ndia ma mamahena fo Ana tao natetu hata fo Ana helu memak kana ena.   
\p
\v 22 Ei tao tungga hata fo tetebes. Dadi hatematak ia, ei bisa maue-osa no basa ei bebeꞌi-barakaim soa-neu Lamatuak. Naa, tao nala ei sue-lai tebe-tebe neu ei toranoo kamaherem mara. Ei susue-lalaim naa muste boe natea, nahuu ei dalem mara lolo-laok.  
\v 23 Hatematak ia ei hambu masoda beuk ena. Tehuu masoda beuk ia, ei ta hambu sana numa ei ina-amam fo neu ko ara mate nai dae-bafok ia mai, tehuu ei hambun numa ita Aman manai nusa tetuk do inggu temak fo ta mana matek mai. Ei masoda beum naa, ei hambun nesik Manetualain Dedeꞌa-kokolan. Ndia Dedeꞌa-kokolan ia, neni masodak tetebes ma natea nakandoo.  
\v 24 Sama leo Manetualain Susura Malalaon surak nae,  
\q1 “Hatahori dae-bafok naa, nok bali naꞌu esa do, bungga esa.  
\q2 Huu sira lolen naa, ta rakatataka rakandoo.  
\q1 Naꞌu, male-kale henin.  
\q2 Bungga bunan oo moꞌu henin boe.  
\q1 Doo-doo te ara mate, boe ma mopo heni sara.   
\q1
\v 25 Tehuu ita Lamatuan Dedeꞌa-kokolan,  
\q2 naoka nahere nakandoo ma ta mana ketuk.”  
\p Lamatuak Dedeꞌa-kokolan naa, ndia Hara Lii Malole fo ai mafada neu ei ena.\x + \xo 1:25 \xt Yesaya 40:6-8\x*   
\c 2  
\s1 Ita dadi teu Manetualain hatahori malalaon  
\p
\v 1 Dadi ei boso tao manggarauk hata esa boe na. Boso kada puta-paik mia hatahori. Boso dea-matak. Dalem mara boso mbiri. Boso kokolak makabobook hatahori nade malolen. Nggari heni basa naar leo!  
\v 2 Kakana mbimbila anak kara dokodoe rae rinu susu numa sira inan mai. Leo naak oo ei dalem mara muste hii ralan seli fo nau bubuluk Manetualain Dedeꞌa-kokolan boe. Naa ndia tao nala ei nemeheherem mara boe ratea tungga-tungga faik. No dalak naa, ei bisa mamoꞌo dadi miu hatahori lasik, fo mana leo-laꞌo tungga Manetualain hihii-nanaun.  
\v 3 Ma ei mameda mala ita Manetualain dale susuen ena.\x + \xo 2:3 \xt Sosoda Kokoa-kikiok kara 34:10\x*   
\p
\v 4 Makaesa aom mara mia Karistus. Te Ana sama leo batu esa, tehuu Ndia naena masodak. Tukan nara nggari heni batu naa ena, nahuu ara duꞌa rae, batu naa nanalan taa. Tehuu Manetualain henggenee Ndia belin sudi selik kana, de here nalan ena fo dadi batu netehuuk fo nenenin lenak.  
\v 5 Ei oo muste makaesa mia Karistus boe, mita fo Manetualain oo pake ei boe. No dalak naa, ei sama leo batu fo Manetualain here nalan fo nambaririik uma soa-neu Ndia Dula-dalen. Ei oo sama leo batu mana maena masodak, sama leo Karistus boe. Ei sama leo malangga anggamar, mana leo-laꞌo no malalaok soa-neu Manetualain. Naa, sama leo ei meni tunu-hotuk soa-neun. Ei tunu-hotum tao namahoko Manetualain dalen, nahuu Yesus Karistus maten ena soa-neu ei basa ngga.  
\v 6 Sama leo neni surak nai Manetualain Susura Malalaon dale nae,  
\q1 “Mete dei! Te Au tao batu makasososan,  
\q2 nai kota Yerusalem ia,  
\q3 fo ara seseik kana rae, ‘kota Sion’.  
\q1 Au ndia here ala batu naa ena.  
\q2 Ndia belin seli soa-neu Au.  
\q1 Dadi hatahori mana ramahere neu Ndia,  
\q2 neu ko ara ta hambu mamaek hata esa boe na.”\x + \xo 2:6 \xt Yesaya 28:16\x*   
\p
\v 7 Yesus naa, sama leo batu naa. De soa-neu hatahori fo mana namahere neun, Yesus belin sudi selik kana. Tehuu soa-neu hatahori fo ta mana namahere neun, Manetualain Susura Malalaon surak nae,  
\q1 “Batu naa, fo tukan nara nggari henin ena,  
\q2 hatematak ia dadi neu batu makasososak ena,  
\q3 fo nenenin lenak.”\x + \xo 2:7 \xt Sosoda Kokoa-kikiok kara 118:22\x*   
\p
\v 8 Neni surak boe nae,  
\q1 “Hambu batu fo tao nala hatahorir rakatunu.  
\q2 Hambu batu fo tao nala sara tuda.”\x + \xo 2:8 \xt Yesaya 8:14-15\x*  
\p Ara tuda, nahuu ta tao tungga Manetualain Dedeꞌa-kokolan. Huu Manetualain henggenee memak kana ena fo ara tuda talo naa.   
\p
\v 9 Tehuu ei ta leo naak. Huu ei dadi miu hatahori fo Manetualain mesa kana here nalan ena. Ei dadi miu Ndia enan. Ei sama leo malangga anggama mana maono-lalau manek. Ei oo sama leo hatahori nusak esa mana leo-laꞌo no malalaok soa-neu Manetualain boe. Ei dadi talo naa, mita fo ei bisa tui-bengga neu basa hatahorir laꞌe-neu Manetualain dale susuen, fo Ana taon soa-neu ei. Huu Ana nadenu ei ena fo laꞌo ela hata fo manggarauk ma leo-laꞌo tao malole. Naa, nok bali ei kalua numa makiuk mai, fo leo-laꞌo nai Ndia manggaledon fo neulaun seli.\x + \xo 2:9 \xt Kalua numa Masir mai 19:5-6; Yesaya 43:20, 21; Tui Seluk laꞌe-neu Dala Masodak 4:20; 7:6; 14:2; Titus 2:14; Yesaya 9:2\x*  
\v 10 Fai bakahulun ei dadi sama leo nufaneluk esa ta naena sosoa-ndandaak faa boe na. Tehuu hatematak ia ei maso dadi miu Manetualain nufanelun ena. Fai bakahulun ei ta nau simbok Manetualain dale kasian neu ei. Tehuu hatematak ia ei simbo malan ena.\x + \xo 2:10 \xt Hosea 2:23\x*   
\s1 Manea matalolole fo ita leo-laꞌo no ndoos  
\p
\v 11 Toranoo susue nggara ein! Eir ia, kada dadi fuik nai dae-bafok ia. Huu ei nok bali hatahori nusa deak mana nggoro naꞌu nai hatahori nusan. Huu naa de au oke taa-taa fo ei boso sama leo hatahori dae-bafok laen nai dae-bafok ia, mana tao manggarauk tungga sira hihii-nanaun nara. Huu nai ei dalem mara hambu netatik esa. Ndia, hihiik fo tao manggarauk natati laban hihiik fo tao malole. Dadi boso makamboꞌik hihiik fo tao manggarauk naa, nasenggi ei. Mete ma talo naa, na, ei makalulutu!  
\v 12 Manea matalolole fo ei leo-laꞌo no ndoos nai hatahori fo ta mana nalela Manetualain naa matan. No dalak naa, leo ara nau rakasasaꞌek salak neu ei sadi ndaa, na, ara mete-rita kada ei neulaum a mesan. De mete ma Karistus fali mai, neu ko sira mesa kasa ndia rakadedemak Manetualain, nahuu ei tatao neulaum naa.   
\s1 Ita muste nenene neu hatahori mana toꞌu koasa  
\p
\v 13 Ita Lamatuan hihii-nanaun fo ei nenene neu basa hatahorir mana toꞌu koasa. Haꞌi netuduk leo: nenene neu manek, huu ana dadi malangga mandema.  
\v 14 Nenene neu nggubenor, huu manek nadenun ena, fo ana naketu-naladi huku-dokik soa-neu hatahori mana tao manggarauk kara ma ana soꞌuk kokoak soa-neu hatahori mana tao ndoos sara.  
\v 15 Huu naa de Manetualain nau fo ei tao hata fo ndoos sara, mita fo hatahori nggoa bebek ta mana bubuluk hata-hata, ta naena dalak fo nakasasaꞌek salak neu ei.  
\v 16 Leo mae ei dadi hatahori nekemboꞌik mana maena haak fo tao tungga ei hihiim, tehuu boso pake sadi ndaa ei haak naa, fo tao manggarauk. Pake haak naa, fo maue-osa fee Manetualain huu ei dadi miu Ndia pusakan.  
\v 17 Ei muste fee hada-horomatak neu basa hatahorir. Ei muste sue-lai basa hatahorir fo mana ramahere neu Karistus. Ei muste leo-laꞌo no mandaak nai Manetualain matan, te neu ko Ana ndia naketu-naladi huku-dokik soa-neu ei. Ma ei muste fee hada-horomatak neu basa hatahorir mana toꞌu parenda.   
\s1 Hatahori neondak kara muste rakatataka nai susa-sonak dale tungga Karistus netudun  
\p
\v 18 Hatahori neonda nggara ein! Mamanene neu ei malanggam mara, ma fee hada-horomatak neu sara. Boso mamanene neu kada malanggan fo naena dale malole ma neulauk a mesan. Tehuu leo ei malanggam manggaraun seli oo ei muste nenene neun boe.  
\v 19 Mete ma ei hambu huku-dokik sadi ndaa numa ei malanggam mai leo mae ei ta tao salak hata-hata, ma mete ma ei makatataka mala nai susa-sonak naa, nahuu ei masaneda mala Manetualain hihii-nanaun soa-neu ei, na, neu ko Manetualain natudu Ndia dale susuen neu ei.  
\v 20 Leo ei tao salak, de hambu fefembak, na, nanalan hata, mete ma ei makatataka nai susa-sonak naa? Ta hambu, hetu? Tehuu mete ma ei hambu susa-sonak nahuu ei tao hata fo malole, boe ma ei makatataka, na, Manetualain loti-mete neu ei.  
\v 21 Karistus oo hii nalan seli boe fo ei leo-laꞌo tao hata fo ndoos, leo mae ei hambu susa-sonak. Huu Ana oo lemba-nasaa susa-sonak soa-neu ita boe. No dalak naa, Ana dadi netuduk fo ita tungga Ndia, sama leo ita laꞌok tungga Ndia ei tatabun.  
\v 22 Sama leo Manetualain Susura Malalaon surak nae,  
\q1 “Ana ta tao nita salak.  
\q2 Ta hambu pepeko-lelekok kalua numa Ndia bafan mai.”\x + \xo 2:22 \xt Yesaya 53:9\x*   
\p
\v 23 Neu ara kokolak rakadadaek kana, Ana ta bala. Neu Ana hambu susa-sonak ma doidosok, Ana ta ndindia nae bala. Tehuu Ana loo lima aon neu Manetualain liman. Huu Ana namahere nae, Manetualain naa, Mana Maketu-maladi Dedeꞌak fo ta mbeu seserik.\x + \xo 2:23 \xt Yesaya 53:7\x*  
\v 24 Karistus naa, ndia lemba-nasaa ita sala-singgon neu faik fo Ana mate numa ai ngganggek lain. Ana tao talo naa, mita fo ita hae leo-laꞌo tao salak bali. De hatematak ia, ita ta leo-laꞌo no tao salak, tehuu ita leo-laꞌo no kada tao hata fo ndoos a mesan. Huu Ana nggati ita ena fo simbo nala ita huku-dokin. Huku-dokik naa, tao nala Ana nakahina losa maten. Huu hinak fo tao nala Ana mate naa, tao nahai ei ena.\x + \xo 2:24 \xt Yesaya 53:6\x*  
\v 25 Ei sama leo bibi lombo fo fai bakahulun sio laꞌo ela dalak ena. Tehuu hatematak ia ei fali meni Lamatuak eno-dala ndoon mai ena. Huu Ana ndia nanea ma nakaboi-nasamao natalolole ei, sama leo mana lolo esa nanea ma nakaboi-nasamao ndia bibi lombon nara.   
\c 3  
\s1 Nenori-nefadak soa-neu sao holu-ndaek kara  
\p
\v 1 Sao inak kara ein! Bebeik kara au ae, ita muste nenene neu hatahori mana toꞌu koasa. Dadi ei muste nenene neu ei saom. Masaneda te hambu sao touk ketuk fo ta nau tao tungga Manetualain Dedeꞌa-kokolan. Leo mae ara ta nau nenene ei dedeꞌa-kokolam, tehuu neu ko ara nau ramahere Karistus, nahuu ei leleo-lalaꞌom.\x + \xo 3:1 \xt Epesus 5:22; Kolose 3:18\x*  
\v 2 Huu ara mete-rita basa ei hihiru-heheom ma ei dale lolo-laom natudu hada-horomatak neu Manetualain.   
\p
\v 3 Inak manaꞌa hien naa, ta numa hata fo neni nitak numa dea mai. Haꞌi netuduk leo: heti aon tao langga bulu fefeon mata-matak do, ramasosoa lena-lenak pake lilo mbilas ma lilo fulak do, pake bua-loꞌa mabelir ta nandaa no dala-hadak.\x + \xo 3:3 \xt 1 Timotius 2:9-10\x*  
\v 4 Tehuu mana tao inak dadi manaꞌa hiek tebe-tebe ndia: sira dalen nara fo ta neni nitak numa dea mai. Haꞌi netuduk leo: dale neulauk ma mana matu-matuk. Manaꞌa hiek matak leo naak naa ta mopo henin, leo mae inak nambalasi ena. Tungga Manetualain timba-tain, manaꞌa hiek matak leo naak naa belin seli.  
\v 5 Huu lele uluk ina dale malalaok kara fo mana ramahere Manetualain, manaꞌa hien nara oo leo naak boe. Ara oo nenene neu sira saon boe.  
\v 6 Haꞌi netuduk numa bei Sara mai. Ana nenene neu saon Abraham. Ana oo fee lelak saon koladun boe. Ei inak kara oo muste tungga ndia netudun boe, nahuu mete ma ei tao hata fo ndoos, na, ei hae mamataꞌu hata esa boe na.\x + \xo 3:6 \xt Tutui Makasososak 18:12\x*   
\p
\v 7 Sao touk kara ein! Leo-laꞌo dalek esa mia ei saom. Timba-tai matalolole hata fo neulauk soa-neun ma tao tunggan. Matudu hada-horomatak soa-neun nai basa dedeꞌak kara, nahuu inak barakain ta sama leo touk barakain. Huu ei sama-sama simbo mala pusaka fo Manetualain nae fee ei. Ndia, ei sama-sama simbo mala masoda beuk fo Manetualain fee ei numa Ndia dale susuen mai. Tehuu ei sao touk kara muste leo-laꞌo dalek esa mia ei saom leo naak, mita fo neu faik fo ei dua ngga soꞌuk dalem fo hule-haradoi moke hata esa numa Manetualain mai, na, Ana nau namanene ei.\x + \xo 3:7 \xt Epesus 5:25; Kolose 3:19\x*   
\s1 Leo mae ei tao hata fo ndoos, neu ko ei oo hambu susa-sonak boe  
\p
\v 8 Toranoo susue nggara ein! Neu mateꞌen te, au ae kokolak dedeꞌak esa. Ei basa ngga oo muste leo-laꞌo dalek esa boe. Mete ma hatahori esa nameda susa do namahoko, na, ei laen nara oo muste mameda leo naak boe. Ei muste sue-lai neu hatahorir fo mana ramahere Karistus, ma matudu dale neulaum mara esa mbali esa. Boso makadedemak aom mara, tehuu ei muste makaloloek aom mara.  
\v 9 Boso bala manggarauk no manggarauk. Mete ma hatahori kada raselu kisubalik ei, boso maselu kisubalik hatahori naa bali. Tehuu moke-hule fo Manetualain fee babaꞌe-babatik neun. Manetualain noke nala ei ena dadi miu Ndia hatahorin, mita fo ei bisa simbo mala babaꞌe-babatik numa Ndia mai.  
\v 10 Sama leo neni surak nai Manetualain Susura Malalaon nae,  
\q1 “Hatahori mana sangga nasoda no neulauk,  
\q2 ma mana sangga nasoda nala dook ka nai dae-bafok ia,  
\q1 hatahori naa muste nanea ndia bafan fo boso bafa lafok,  
\q2 ma boso kokolak pepeko-lelekok.   
\q1
\v 11 Ana muste sale dalen do tuke tein, fo boso tao manggarauk bali,  
\q2 tehuu fali fo tao kada ndoos leo.  
\q1 Ana muste nanori fo leo-laꞌo mole-dame no basa hatahorir,  
\q2 boe ma sangga dalak fo malole fali no sara.   
\q1
\v 12 Huu ita Lamatuan tao matak neu  
\q2 hatahori mana leo-laꞌo no ndoos.  
\q2 Ma Ana oo nau namanene sira hule-haradoin boe.  
\q1 Tehuu ita Lamatuan laban nakandoo  
\q2 neu hatahori mana leo-laꞌo tao manggarauk.”\x + \xo 3:12 \xt Sosoda Kokoa-kikiok kara 34:12-17\x*   
\p
\v 13 Mete ma ei tao hata fo ndoos no dere-dere hiek, see nau tao manggarauk mbali ei bali? Taa, hetu?  
\v 14 Tehuu leo mae ei tao hata fo ndoos ma hambu ketuk tao nakasususak ei, ei hambu nanalak. Mete ma hambu hatahori ta nalela Karistus dadi namataꞌu nahuu hata esa, na, ei boso tungga mamataꞌu talo naa. Ei duduꞌam boso namue-anggik ma dalem mara sona sama leo sara.\x + \xo 3:14 \xt Mateos 5:10\x*  
\v 15 Tao ei dalem mara kada lino-lendek, nahuu ei soꞌuk mala Karistus nai ei dalem mara ena fo dadi neu ei Lamatuam fo malalaok.  
\p Leo hatahorir roke ei fo mafada ei nemeherem, ma tao hata de ei mamahena mae, neu ko Karistus tao basa-basan dadi malole, na, ei muste sadia mahani a fo maselu neu sara.\x + \xo 3:15 \xt Yesaya 8:12-13\x*  
\v 16 Tehuu ei muste maselu numa ei dale neulaum mai ma matudu hada-horomatak neu sara, mita fo ara bubuluk ei tao hata fo ndoos numa dale lolo-laom mai. Leo mae ei tao hata fo neulauk talo naa, tehuu neu ko hambu ketuk nau kokolak rakatutudak ei, nahuu ei makaesa mia Karistus. Dadi mete ma ei tao hata fo neulauk makandoo, na, sira mana makatitiik ei neu ko ara mae.  
\v 17 Mete ma naa tungga Manetualain hihii-nanaun, na, boso lilii-ndondou te malole lenak ei hambu susa-sonak nahuu tao hata fo ndoos; boso huu ei tao salak.   
\q1
\v 18 Karistus mate laꞌe esak ka,  
\q2 nahuu ita hatahori dae-bafok tao salak.  
\q1 Ndia mana leo-laꞌo ndoos,  
\q2 maten soa-neu ita ena fo mana leo-laꞌo manggenggeok.  
\q1 Ana mate, mita fo ita bisa malole fali to Manetualain.  
\q1 Karistus naa oo hatahori dae-bafok sama leo ita boe.  
\q2 Hatahorir rakanisan,  
\q2 tehuu basa de Manetualain Dula-dalen tao nasoda falik kana numa mamaten mai.   
\p
\v 19 Dula-dalek naa oo nuni no Ndia neu nanori hatahori mana matek dula-dalen nara boe, fo neni ronggak nai mamanak esa, nok bali bui.  
\v 20 Sira raa, ndia hatahori lele uluk ta mana nau nenene neu Manetualain. Lelek naa, baꞌi Noh tao ofa moꞌok. Manetualain nahani memak kana fo nae nita hatahorir tao tungga Ndia hihii-nanaun, tehuu ara ta nau tao tungga. Huu naa de kada hatahori falu ndia hambu masoi-masodak numa faa moꞌok naa mai.\x + \xo 3:20 \xt Tutui Makasososak 6:1—7:24\x*  
\v 21 Faa naa dadi neu netuduk esa, sama leo faik fo ei sarani. Sarani naa natudu nae, Manetualain nakamboꞌik ei numa ei sala-singgom mai, nahuu Yesus Karistus nasoda fali numa mamaten mai ena. Neu ara sarani ei naa, ara ta radiu ei fo tao ralalao ei ao-inam mara. Ndondoon ndia, ei ndara fangga hehelu-bartaak mia Manetualain, fo nau tao nalalao ei dalem mara. No dalak naa, ei bisa leo-laꞌo ma tao hata fo ndoos.  
\v 22 Hatematak ia Yesus hene fali neni nusa tetuk do inggu temak neu ena. Nai naa, Ana nanggatuuk nai mamana hada-horomatak mateꞌen lain, nai Manetualain boboa konan. De atar marai nusa tetuk do inggu temak, basa koasar ma mana toꞌu koasar muste nenene neu Karistus rakandoo.   
\c 4  
\s1 Karistus hatahorin nara muste leo-laꞌo ndaa no dala-hadak  
\p
\v 1 Karistus naa, hatahori dae-bafok sama leo ita. Ana hambu doidosok noꞌun seli ena, de ei oo muste sadia fo hambu doidosok sama leo Ndia boe. Tehuu masaneda te hatahori mana sadia fo hambu susa-sonak nahuu nakaesa no Karistus, ana naketu ena fo ta nau tao salak bali.  
\v 2 Leo mae ana bei leo-laꞌo nai dae-bafok ia, tehuu ana ta leo-laꞌo tao salak bali sama leo hatahori dae-bafok laen nara. Huu ana leo-laꞌo tungga Manetualain hihii-nanaun.   
\p
\v 3 Fai bakahulun ei maena faik dai mete ma ei mae tao manggarauk hata a mesan, nok bali hatahori ta mana malela Manetualain. Haꞌi netuduk leo: ara tao sadi ndaa. Ara laꞌok sala ro hatahori ta sira saon. Ara tungga sira hihiin tao manggarauk. Ara rinu mafuk. Ara tao feta setelelek. Ara tao feta sao holu-ndaek sadi ndaa. Ara kada songgo-tanggu fo bisa tao rala ita aon mumuru.  
\v 4 Ara kokolak raboboo ei nade malolem, huu ei ta tungga mabali mia sira manggaraun nara fo mana seli susudik, nahuu ara ta ralela ei leleo-lalaꞌom leo beek.   
\p
\v 5 Tehuu masaneda te neu ko ara muste rasare Manetualain, fo mana dadi neu Mana Maketu-maladi Dedeꞌak. Ara muste rafadan, tao hata de sira leo-laꞌo manggarauk talo naa. Boso lilii-ndondou, huu basa hatahorir muste rasare reu Ndia, hatahori bei masodak, ma hatahori mates.  
\v 6 Tebe! Manetualain nae parisa hatahori mana matek kara, sama leo Ana parisa hatahori dae-bafok laen nara. Huu Ana nae mete-nita sira leleo-lalaꞌon fai uluk. Huu naa de Yesus neu tui-bengga Manetualain Hara Lii Malolen neu sara, mita fo sira oo bisa hambu masodak tetebes, fo tao tungga Manetualain hihii-nanaun boe.   
\s1 Ita muste takaboi-tasamao tatalolole basa hata fo Manetualain fee ita ena  
\p
\v 7 Dae-bafok fai mateꞌen deka-deka mai ena. Huu naa de ei muste duduꞌa naruk ma matu-matu fo ei bisa hule-haradoi no malole.  
\v 8 Nenenin lenak ndia, ei muste leo-laꞌo masue-laik esa no esa makandoo. Leo mae hatahori laen tao salak makadoto ndoos, tehuu ei bei bisa manonoo mian mete ma ei sue-lai neun.\x + \xo 4:8 \xt Dedeꞌa Lasik 10:12; Yohanis 13:34-35\x*  
\v 9 Makambela limam fo simbok mala hatahori numa mamanak laen mai leo taak nai ei umam. Tehuu masaneda fo boso simbok no unggu-remuk.   
\p
\v 10 Hatahori esa-esak fo mana simbo babanggi-babaꞌek numa Manetualain mai ena muste pake babanggi-babaꞌek naa, fo naono-lalau ndia toranoo kamaheren nara. Makaboi-masamao ma pake matalolole babanggi-babaꞌek naa, fo neni nanalak soa-neu Manetualain.  
\v 11 Haꞌi netuduk leo: mete ma hambu babanggi-babaꞌek manori hatahorir, na, masaneda te ei muste manori hatahorir pake Manetualain Dedeꞌa-kokola heli-helin. Mete ma hambu babanggi-babaꞌek maono-lalau hatahorir, na, maono-lalau pake bebeꞌi-barakaik fo Manetualain feek. No dalak naa, basa hatahorir mete-rita eir ia, Yesus Karistus hatahorin. Huu naa de ara rakadedemak Manetualain. Ndia naa, ta neni babanggak! Ma Ana naena koasa fo toꞌu parenda ta mana ketuk! Tebe leo naak!   
\s1 Ita hambu doidosok nahuu dadi teu hatahori Karisten  
\p
\v 12 Toranoo susue nggara ein! Boso heran mete ma hambu soba-douk beran seli. Naa ndia fora ei nemeheherem mara. Boso duduꞌa mae, kada o mesa ngga ndia hambu soba-douk talo naa.  
\v 13 Tehuu ei dalem bisa mbena sau-sau, huu ei hambu mala doidosok sama leo Karistus oo hambu doidosok boe. No dalak naa, neu ko ei dalem mara mbena sau-sau tebe-tebe, neu faik fo basa hatahorir mete-rita Karistus ta neni babanggan.  
\v 14 Neu hatahorir kokolak rakadadaek ei nahuu ei makaesa mia Karistus, ei maua nahuu Manetualain Dula-dalen ta neni babanggan nai ei dale.  
\v 15 Tehuu mete ma ei muste hambu doidosok, na, boso huu ei dadi miu mana makanisa hatahori do, naꞌok do, hatahori manggarauk do, mana sorodododo rala hatahori laen ena uma dalen.  
\v 16 Tehuu mete ma hatahori hambu nala susa-sonak, nahuu dadi neu Karistus hatahorin, ana hae mae faa boe na. Malole lenak, ara soꞌuk kokoa-kikiok neu Manetualain, nahuu ara dadi reu hatahori Karisten.   
\p
\v 17 Fain losa ena fo hatahori reu rasare mbali Manetualain. Ana mulai parisa numa Ndia hatahori heli-helin nara leleo-lalaꞌon mai. Dadi duduꞌa leo! Mete ma Ana mulai ena no ita hatahori Karisten, na, talo bee soa-neu hatahori fo ta mana nau simbok Ndia Hara Lii Malolen? Neu ko sira huku-dokin beran lena, ee!  
\v 18 Sama leo neni surak nai Manetualain Susura Malalaon nae,  
\q1 “Mete ma hatahori fo mana leo-laꞌo no ndoos a mesan, ela baꞌuk ka ta hambu masoi-masodak,  
\q2 na, talo bee bali neu hatahori fo ta mana tao matak mbali Manetualain?  
\q2 Ma talo bee boe no hatahori fo mana leo-laꞌo tao salak?”\x + \xo 4:18 \xt Dedeꞌa Lasik 11:31\x*   
\p
\v 19 Dadi mete ma Manetualain nakamboꞌik Ndia hatahorin nara hambu rala susa-sonak tungga Manetualain hihii-nanaun, na, ara bisa ramahere rae, neu ko Ana oo nanea sara boe. Huu Ana ndia adu sara ma Ana oo tao tungga hata fo Ndia kokolak ena boe. De ara bei bisa tao hata fo ndoos rakandoo, nahuu Ana nanea sara talo naa.   
\c 5  
\s1 Nenori-nefadak soa-neu malangga saranik kara  
\p
\v 1 Au mesa ngga dadi uu malanggan esa. Fai bakahulun neu Karistus lemba-nasaa Ndia doidoson, au mete-ita no au mata heli-heling. Neu faik fo basa hatahorir mete-rita Manetualain ta neni babanggan, au oo ae tungga mete-itan no au mata heli-heling boe. Dadi au ae fee nenori-nefadak neu malanggan laen nara, talo ia:  
\v 2 Ei sama leo mana lolo fo mana nakaboi-nasamao sira bibi lombon nara. Dadi ei muste makaboi-masamao matalolole hatahorir fo Manetualain fee sara neu ei ena. Koladu sara no malole. Boso huu ei uem naa, tehuu ei hii tao talo naa. Koladu sara no malole tungga Manetualain hihii-nanaun. Boso sangga nanala lenak soa-neu ao heli-helim, tehuu maue-osa no dere-dere hiek fo tulu-fali Manetualain hatahorin nara.\x + \xo 5:2 \xt Yohanis 21:15-17\x*  
\v 3 Boso kada parenda sadi ndaa fo tao mamabera hatahorir fo Manetualain fee ei koladuk ena. Tehuu ei muste dadi netuduk malole, fo mana matudu dalak neu sara.  
\v 4 Yesus naa, sama leo Malangga Mana Lolo. Mete ma Ana fali mai ena, neu ko Manetualain fee ei seseba-babaek, nahuu ei koladu hatahorim mara no malole. Seseba-babaek naa, ta bisa nakalulutu henin, te ana nakatataka nakandoo.   
\s1 Nenori-nefadak soa-neu hatahori muri anak kara  
\p
\v 5 Hatahori muri ana nggara ein! Ei oo muste nenene neu saranik malanggan nara boe. Ei basa ngga boso soꞌuk aom mara. Sama leo Manetualain Susura Malalaon surak nae,  
\q1 “Manetualain laban neu hatahori fo mana nakadedemak aon nara,  
\q2 tehuu Ana hii natudu Ndia dale susuen neu hatahori dale nekeloloek aon.”\x + \xo 5:5 \xt Dedeꞌa Lasik 3:34\x*   
\p
\v 6 Huu naa de ei basa ngga muste masaneda Manetualain koasan, mita fo ei boso koa ao. Doo-doo te ndaa no fain, boe ma Manetualain nae soꞌuk kokoak neu ei.\x + \xo 5:6 \xt Mateos 23:12; Lukas 14:11; 18:14\x*  
\v 7 Soꞌuk dalem mara, mita fo Manetualain ndia koladu basa hata fo mana tao ei duduꞌam ta namaneu. Huu Ana natudu dale susuen neu ei.   
\p
\v 8 Besa-besa, ee! Duduꞌa naruk! Manea matalolole huu ita musun, ndia nitur malanggan nae nakalulutu ei. Ana nae kodo katemak ei, nok bali singa esa mana lakamarak, nae sangga banda fo naꞌan.  
\v 9 Tehuu boso mamataꞌu. Ei muste laban nitur malanggan naa. Ei oo muste makatataka fo mamahere neu Manetualain makandoo boe. Te ei bubuluk ena mae, ei toranoo kamaherem mara rai bee a mesan nai dae-bafok ia oo muste hambu rala susa-sonak sama leo ei boe.  
\v 10 Tehuu masaneda te Manetualain hii natudu Ndia dale susuen neu ita. Ana ndia noke nala ei fo dadi miu Ndia hatahorin, nahuu ei simbo mala Karistus ena. Huu naa de Ana nau nakadedemak ei fo bisa leo-laꞌo mia Ndia makandoo. Tehuu mete ma ei hambu mala susa-sonak nai dae-bafok ia kada ta dook ka, na, Manetualain nae tao nalole falik ei. Ana nae natetea ei ma tao nala ei makatataka. Ana oo nambaririik ei miu fanderen matea boe.  
\v 11 Ita toke fo basa koasar rai Manetualain liman dale, losa doon naa neu. Tebe!   
\s1 Petrus nateꞌe susuran  
\p
\v 12 Silas\f + \fr 5:12 \ft Susura dedeꞌa Yunani nai ia nae, \ft \+it Silvanus\+it*. Silvanus naa, Silas naden laen. Lees ndia tutuin mulai nai \+it Nedenuk kara Tutuin\+it* 15:22, 40\f* ndia tulun au fo surak susura kekeꞌuk ia. Ndia ia, ita toranoo kamaheren ma au hatahori lima konang. Au fee nenori-nefadak neu ei fo makatataka mahere, huu Manetualain hii natudu Ndia dale susuen neu ita nakandoo. Dadi ei muste mambariik mahere fo boso makaheok.   
\p
\v 13 Hatahori kamaherek mana makabua rai kota Babel oo haitua hara masodak fee ei boe. Manetualain here nala sara ena, sama leo Ana here nala ei boe.  
\p Au anang Markus oo haitua hara masodak boe.\x + \xo 5:13 \xt Nedenuk kara Tutuin 12:12; 25; 13:13; 15:37-39; Kolose 4:10; Filmon 24\x*   
\p
\v 14 Mete ma ei matonggo, na, esa lole haran mbali esa menik iꞌidu susuek fo natudu ei susue-lalaim.  
\p Au nau fo ei basa ngga fo mana mamahere neu Karistus bisa leo-laꞌo no lino-lendek ma mole-damek.  
\q2 Soda-molek,  
\q2 Petrus