\id 1CO  
\h 1 Korentus 
\toc1 Paulus susuran kaesan soa-neu hatahori kamaherek kara marai kota Korentus 1 Korentus 
\toc2 1 Korentus 
\toc3 1Kor 
\mt2 Paulus susuran kaesan  
\mt2 soa-neu hatahori kamaherek kara marai kota Korentus  
\mt1 1 Korentus  
\c 1  
\s1 Soda-molek  
\p
\v 1 Susurak ia numa au mai, Paulus. Manetualain here nala au ena, fo dadi uu Yesus Karistus nedenun. Ma kaꞌa Sostenes oo haitua hara masodak soa-neu ei boe.  
\v 2 Au surak susurak ia fee ei, ndia Manetualain hatahori kamaheren marai kota Korentus. Ana here nala ei ena, fo dadi miu Ndia hatahori lolo-laon, nahuu ei mamahere neu Yesus Karistus ena. Ana oo tao ei dadi lolo-laok sama leo basa hatahori kamaherek laen nara rai bee a mesan boe. Ara oo roke tulun ita Lamatuan Yesus Karistus ena boe, fo Manetualain helu-bartaa memak kana numa lele uluk mai ena fo nae nadenun mai. De Ana oo dadi neu ita Lamatuan ma sira Lamatuan boe.\x + \xo 1:2 \xt Nedenuk kara Tutuin 18:1; Yoel 2:32\x*   
\p
\v 3 Au hule-haradoi neu Manetualain, ita Aman, ma Yesus Karistus, ita Lamatuan. Au oke-hule fo Ara ratudu Sira dale susuen neu ei, mita fo ei bisa leo-laꞌo no mole-damek ma lino-lendek.   
\s1 Paulus noke makasi neu Lamatuak, nahuu hatahori Korentus asa  
\p
\v 4 Tungga-tungga au asaneda ei, au kokolak ua au Lamatuang ae, “Makasi noꞌun seli soa-neu hatahori Korentus asa nemeheheren!” Manetualain natudu Ndia dale susuen soa-neu ei ena, nahuu ei mamahere makandoo neu Yesus Karistus fo Ana nadenun mai ena.  
\v 5 De Ana fee ei mabeꞌi makalalaꞌok ues mata-matak kara ena, nahuu ei makaesa mia Ndia. Naa, tao nala ei mamasuꞌi nai ei dalem. Huu naa de ei malela no tebe-tebe basa hata fo nenenin lenak laꞌe-neu Ndia eno-dala masodan. Ei oo bubuluk dalak bee lolen lenak fo mafada hatahorir laꞌe-neu Karistus boe.  
\v 6 Basa dedeꞌak kara raa ratudu rae, basa hata fo ai mafada ei laꞌe-neu Karistus naa ena, raoka ratea nai ei dalem ena. Huu naa ei bei mamahere mae, basa dedeꞌak kara raa tetebes.  
\v 7 Dadi ei simbo mala basa hata fo neulauk ena, fo Manetualain Dula-dalen baꞌe fee Ndia hatahorin nara. Ta kuran hata esa boe na. De ei mahani a mia faik naa, fo neu ko Manetualain buka natudu ita Lamatuan Yesus Karistus soa-neu basa hatahorir.  
\v 8 Karistus naa, ndia nae tao barakai ei fo makatataka makandoo losa Ana fali mai nai dae-bafok ia. No dalak naa, ei ta tuda, ma ta hambu hatahori fo ndae salak neu ei.  
\v 9 Ita bisa tamahere neu Manetualain Dedeꞌa-kokolan, nahuu hata fo Ana kokolak, na, Ana taon dadi. De neu ko Ana nau tao basa dedeꞌak kara iar fee ei. Ana ndia nasosoi dalak fo ei bisa malela no malole Ndia Anan, ndia ita Lamatuan Yesus Karistus.   
\s1 Ei hatahori saranik muste dadi miu esa; boso mabingga-baꞌek  
\p
\v 10 Toranoo susue nggara ein! Nai dedeꞌak ia, au kokolak unik ita Lamatuan Yesus Karistus naden. De au oke no tebe-tebe fo ei hahae mareresi leo. Tehuu maote tebe-tebe fo ei leo-laꞌo dalek esa, boso mabingga-baꞌek. Ei muste duduꞌa naruk, mita fo ei basa ngga bisa maena duduꞌak esak ka.   
\p
\v 11 Au kokolak talo naa, huu hambu hatahori numa kaꞌa inak Kloe uma isin, mai tui au nae, ei ketuk bei mareresi makandoo.  
\v 12 Ei mareresi, de ketuk rae, “air ia, kaꞌa Paulus hatahorin!” Ma ketuk rae, “air ia, kaꞌa Apolos hatahorin!” Ma ketuk bali, rafafada aok rae, “air ia, tungga kaꞌa Peꞌu!”\f + \fr 1:12 \ft Susura Malalaok dedeꞌa Yunani surak nae, “Kefas”. Kefas naa, nade laen numa Petrus mai.\f* Laen bali rae, “air ia nenene kada Karistus mesa kana!”\x + \xo 1:12 \xt Nedenuk kara Tutuin 18:24\x*   
\p
\v 13 Ei duduꞌam talo bee? Karistus nufanelun ta bisa rabingga-baꞌek. Do, ei duꞌa mae, naa au ndia mate nai ai ngganggek soa-neu ei? Taa! Do, neu sarani ei, ara pake au nadeng fo fee ei maso dadi miu au hatahoring, do? Ta bisa dadi, hetu?  
\v 14 Au oke makasi neu Manetualain, huu neu au ua ei numa naa, au ta sarani hatahori. Kada kaꞌa Krispus no kaꞌa Gayus ndia au sarani.\x + \xo 1:14 \xt Nedenuk kara Tutuin 18:8; 19:29; Roma 16:23\x*  
\v 15 No dalak naa, ta hambu hatahori bisa nae, “Ara sarani au pake Paulus naden, de au dadi uu Paulus hatahorin.”  
\v 16 (Ee, au dei fo asaneda. Au oo sarani hatahori noꞌuk ka numa Stefanus uma isin boe. Tehuu au ta asaneda mete te hambu hatahori laen bali fo au saranin, do taa.)\x + \xo 1:16 \xt 1 Korentus 16:15\x*   
\p
\v 17 Huu Karistus ta nadenu au fo uu sarani hatahori. Au ue huung naa, ndia afada hatahorir laꞌe-neu Ndia Hara Lii Malolen. Tehuu mete ma au afada hatahori talo naa, Ana ta nau au kokolak pake dedeꞌa binir fo atudu au malelang, do, atudu oka-huun fo ta hohoꞌak kara. Mete ma au kokolak talo naa, naa tao nakuran koasa numa tutuik laꞌe-neu Karistus mamaten numa ai ngganggek lain.   
\s1 Karistus simbo Ndia koasan numa Manetualain mai  
\p
\v 18 Hambu hatahori duꞌa nae, basa dedeꞌak fo ita tuik laꞌe-neu Karistus mamaten numa ai ngganggek lain naa, nggoa bebek sudi selik kana. Tehuu hatahori matak leo naak, neu ko ana lenggo feꞌe numa Manetualain mai. Naa te soa-neu ita, Karistus mamaten naa, natudu Manetualain koasan fo tao nasoi-nasoda ita numa ita sala-singgon mai.  
\v 19 Naa, sama leo Manetualain mana toꞌu dedeꞌan, nade Yesaya surak nita nae,  
\q1 “Manetualain nae,  
\q1 ‘Basa hata fo hatahori malelak kara bubuluk,  
\q2 neu ko Au amopo heni basa sara,  
\q3 fo dadi neu hata fo sosoa-ndandaan taak.  
\q1 Sira malelan matak talo bee oo  
\q2 neu ko Au nggari heni basa sara,  
\q3 fo dadi neu hata fo nenenin taak boe.’ ”\x + \xo 1:19 \xt Yesaya 29:14\x*   
\p
\v 20 Fai bakahulun, memak Manetualain kokolak talo naa. De hatematak ia, ana dadi talo bee ena? Hatahori malelak kara dadi talo bee? Meser anggamar dadi talo bee? Ma hatahori mana parani madedeꞌak kara, dadi talo bee? Hena nenene, ee! Manetualain tao nala sara sama leo hatahori nggoa bebek ena! Ana feꞌa heni basa duduꞌa-aꞌafik mana naokak nai dae-bafok ia, ma tao sara sama leo ta raena sosoa-ndandaak hata esa boe na.\x + \xo 1:20 \xt Ayub 12:17; Yesaya 19:12; 33:18; 44:25\x*   
\p
\v 21-22 Manetualain malelan naa, ta neni babanggak sudi selik kana. Leo mae hatahori dae-bafok tao aon malelak, sira duduꞌa-aꞌafin mesa kasa ta manduku-mandaik fo ara bisa ralela tebe-tebe neu Manetualain. Leo mae talo naa, tehuu Manetualain pake Ndia malelan ena, fo sosoi dalak soa-neu hatahori dae-bafok. Fai bakahulun, Ana duꞌa ena nae, “Leo mae hatahori dae-bafok duꞌa nae, Au nedenung nggara kada hatahori nggoa bebek a mesan, tehuu leo mae talo bee oo, Au muste adenu hatahori fo reu rafada sara dedeꞌa ndoos laꞌe-neu Au boe.” Manetualain naketu basa nae pake hara heheluk fo Ndia nedenun nara rafadak naa ena, fo hatahorir bisa ramahere neu Ndia. Ana nau pake dalak naa, fo tao nasoi-nasoda hatahorir numa sala-singgon nara mai.  
\p Tehuu hatahori dae-bafok duꞌa rae Manetualain dalan naa, nggoa bebek. Huu naa de ara ta nau tao matak neu Ndia nedenun. Hatahori Yahudir nau roke kada tanda heran a mesan, fo ara bisa mete-rita Manetualain koasan. Ma hatahori Yunanir nau nenene kada dedeꞌa malelak kara fo mana maso duduꞌa-aꞌafik neulauk a mesan, tungga sira mesa kasa duduꞌan.  
\v 23 Leo mae talo naa, tehuu ai fo mana dadi Lamatuak nedenun nara, kada laꞌok miu mafada hatahorir mae, “Manetualain nadenu Karistus ena, ndia Hatahori fo Ana helu-bartaa memak kana numa lele uluk mai ena, fo nae nadenun mai. Basa de hatahori laen nara paku risan numa ai ngganggek lain.” Neu hatahori Yahudir ramanene tutuik naa, ara rae timba henin, huu tungga sira duduꞌan, Hatahori fo Manetualain nae nadenuk mai naa, ta bisa mate. Neu hatahori Yunanir ramanene tutuik naa, ara duꞌa, “Tutuik nggoa bebek mateꞌen, ee!”  
\v 24 Tehuu hambu hatahori fo Manetualain here memak kana, fo dadi neu Ndia enan. Ketuk ruma hatahori Yahudir mai, ma ketuk ruma hatahori ta Yahudir mai. Tungga sira raa, Karistus mamaten natudu sara ena nae, Manetualain koasan moꞌon sudi selik kana, ma Ndia malelan naa, ta neni babanggak sudi selik kana.  
\v 25 Leo mae hatahori dae-bafok kara duꞌa rae, Manetualain dalan naa nggoa bebek, tehuu Ndia malelan bei lena heni sara. Ma leo mae ara duꞌa rae, Manetualain ta naena koasa hata esa boe na, tehuu Ndia koasan moꞌon bei lena heni sara.   
\p
\v 26 Toranoo susue nggara ein! Mita fo ei bisa malela au kokolang ia, masaneda ei nenggetuu-nemberiim, neu Manetualain here nala ei fo dadi miu Ndia enan. Tungga hatahori dae-bafok timba-tain, nai ei taladam mara ta hambu hatahori malelak noꞌuk ka, ta hambu hatahori ta hohoꞌak noꞌuk ka, ma ta hambu hatahori noꞌuk ka numa nufaneluk mai raena nade moꞌok.  
\v 27 Tehuu Manetualain here nae pake hatahori bee fo hatahori dae-bafok henggenee nae, nggoa bebek sudi selik kana, fo nakamamaek hatahori fo mana tao aon malelak. Ma Ana oo here nau pake hatahori bee fo hatahori dae-bafok henggenee nae, ta naena koasa hata esa boe na, fo nakamamaek hatahori fo mana tao aon naena koasa boe.  
\v 28 Ana here nala hatahori kadiꞌik ta resi fulinggamuk, ma hatahori dae-bafok hii rakaloloek kasa. Manetualain nau pake sara fo tao hatahori bee fo tao aon ta hohoꞌak, dadi sama leo sira ta raena sosoa-ndandaak hata-hata bali.  
\v 29 Dadi, neu hatahorir rasare mbali Manetualain, neu ko ta hambu esa boe na bisa femba tenden nae, ndia naa, ta hohoꞌak.   
\p
\v 30 Manetualain mesa kana ndia nasosoi dalak fo ei bisa maso dadi miu Yesus Karistus hatahorin. Manetualain ndia tao fo Yesus dadi Hatahori fo fee Ndia malelan soa-neu ita. Yesus naa, ndia nasosoi dalak fo ita bisa mole-dame to Manetualain. Yesus naa, ndia tao ita bisa tasoda no ndoos ma lolo-laok. Ma Ana ndia nakamboꞌik ita numa sala-singgok koasan mai.  
\v 31 Dadi ita muste tao sama leo neni surak nai Manetualain Susura Malalaon nae,  
\q1 “See ndia hii soꞌuk kokoa-kikiok,  
\q2 malole lenak, ara soꞌuk kokoa-kikiok neu hata fo ita Lamatuan taok.  
\q2 Boso soꞌuk sira ao heli-helin.”\x + \xo 1:31 \xt Yermia 9:24\x*   
\c 2  
\s1 Ita muste tafada no ledo-ledo basa hatahorir laꞌe-neu Lamatuak Yesus mamaten numa ai ngganggek lain  
\p
\v 1 Toranoo susue nggara ein! Fai bakahulun, neu au uni ei neti, au buka afada ei Manetualain nanae nemeninon, fo fai bakahulun hatahori dae-bafok bei ta ralelan. Tehuu au ta uni dedeꞌa-kokolak naa fo kokolak koa ao. Ma au oo ta pake dedeꞌa binir fo atudu au malela heli-heling boe.  
\v 2 Neu au sama-sama ua ei, au duꞌa talo ia: au nau atudu kada dedeꞌak esa, ndia Yesus Karistus. Ndia naa, Hatahori fo Manetualain helu-bartaa memak kana numa lele uluk mai ena, fo nae nadenun mai. Tehuu neu Yesus mai, hatahorir paku rakanisan numa ai ngganggek lain. Kada dedeꞌak naa mesa kana, ndia au nau kokolak kana akandoo.   
\p
\v 3 Fai maneuk kara, neu au bei sama-sama ua ei, au ameda ta abeꞌi, ma au oo amataꞌu ma dere bebe-bebe boe.\x + \xo 2:3 \xt Nedenuk kara Tutuin 18:9\x*  
\v 4 Au kokolang ma au hara hehelung naa, rofok a mesan, de hatahorir bisa ralelan no muda hiek. Au ta soba pake dedeꞌa-kokolak lena-lenak fo kokoe ei. Taa! Tehuu neu au kokolak naa, manggaledok ena ae, Manetualain Dula-dale Malalaon ndia koladu au, ma Ndia koasan nai au dale.  
\v 5 Au duꞌa, ta malole mete ma ei mamahere neu Manetualain, nahuu ei mamanene kada hatahori dae-bafok dedeꞌa-kokola malelan a mesan. Malole lenak ei mamahere neu Manetualain, nahuu Ana natudu Ndia koasan neu ei.   
\s1 Manetualain nanori ita laꞌe-neu Ndia nanae malelan fo bei nemeninok  
\p
\v 6 Naa te, neu ai makokola aok mia hatahori manggalalasik nai nemeheherem dale, ai manori pake dedeꞌa-kokolak mana maso duduꞌa-aꞌafi neulauk. Tehuu ta mana maso duduꞌa-aꞌafi neulauk tungga hatahori dae-bafok duduꞌan, do tungga hata fo hatahori mana toꞌu parendar hii ranori hatematak ia. Huu sira iar, neu ko ta toꞌu koasa rakandoo.  
\v 7 Tehuu ai manori kada nanae malelak mana konda numa Manetualain mai. Lele uluk neu dae-bafok bei ta dadi, Manetualain nafuni nanaen nara raa. Tehuu Ana naketu basa ena fo hatematak ia Ana nae buka nanae nemeninok naa soa-neu ita, mita fo nesik Ndia ta neni babanggan, ita hambu babaꞌe-babatik noꞌuk ka.  
\v 8 Tehuu hatahorir fo hatematak ia mana toꞌu parenda, ara ta ralela Manetualain malelan teteben. Mete ma ara ralela, ta bisa dadi ara paku rakanisa ita Lamatuan fo ta neni babanggak naa, nai ai ngganggek lain.   
\p
\v 9 Nai Susura Malalaok neni surak laꞌe-neu Manetualain nanae nemeninon fo fai bakahulun bei nefunik nae,  
\q1 “Hambu hata fo hatahori dae-bafok matan bei ta mete-nitan,  
\q2 ma hambu hata fo hatahori dae-bafok ndiꞌi doon bei ta namanene nitan,  
\q2 fo hatahori dae-bafok ta bisa duꞌa nalan.  
\q1 Naa te Manetualain sadia memak basa dedeꞌak kara raa ena,  
\q2 fee hatahori fo mana sue-lai neu Ndia.”\x + \xo 2:9 \xt Yesaya 64:4\x*   
\p
\v 10 Memak fai bakahulun, hatahorir ta ralela dedeꞌak kara raa, tehuu hatematak ia Manetualain pake Ndia Dula-dalen ena, fo tao dedeꞌak kara raa neni bukak soa-neu ita.  
\p Manetualain Dula-dalen naa, nalela basa dedeꞌak kara. Ana oo parisa no lutu-lelon Manetualain dale kuru-eron boe.  
\v 11 Ita esa-esak taena dula-dalek nai ita dale heli-helin dale. Huu naa de ita hatahori dae-bafok duduꞌan ma hihiru-heheon ta sama. Ma ta hambu hatahori laen fo bubuluk no tetuk ita dale kuru-eron, kada ita dula-dalen mesa kana. Leo naak oo no Manetualain boe. Ta hambu hatahori esa boe na, bubuluk Manetualain dale kuru-eron. Kada Ndia Dula-dalen mesa kana ndia bubuluk tebe-tebe.   
\p
\v 12 Ita simbo tala Manetualain Dula-dalen ena, de Ana ndia koladu ita. Huu naa de ita ta tungga hatahori manai dae-bafok ia duduꞌan. De ita bisa talela basa dedeꞌa neulauk kara fo Ana adu nalan fee ita ena, nahuu Manetualain Dula-dalen nai ita dalen.   
\p
\v 13 Dedeꞌak kara raa, ndia ita tasiꞌe kokolak kasa. Ai mafada basa dedeꞌak kara raa fo Manetualain Dula-dalen nanori neu ai. Ai ta fee nenorik pake dedeꞌa-kokolak fo maso duduꞌa-aꞌafi neulauk tungga hatahori dae-bafok duduꞌan. Tehuu ai fee nenorik pake dedeꞌa-kokolak numa Manetualain Dula-dalen mai, soa-neu hatahori mana nalela Lamatuak.  
\v 14 Tehuu mete ma hambu hatahori ta nalela Manetualain Dula-dalen, boe ma ana namanene ai kokolan, ana ta simbok no malole. Ana duꞌa nae, “Hata naa? Ta bisa maso nai duduꞌa-aꞌafik!” Naa te leo mae talo bee oo hatahori naa ta bisa nalela dedeꞌak kara raa, huu ana ta leo-laꞌo nakaesa no Manetualain Dula-dalen boe.  
\v 15 Hatahori fo mana leo-laꞌo nakaesa no Manetualain Dula-dalen, dei fo bisa nalela basa dedeꞌak kara raa, ma bisa bubuluk bee ndia tetebes sara. Tehuu hatahori laen nara ta uku-sudi rala hatahori naa.  
\v 16 Bisa talo bee? Sama leo neni surak nai Susura Malalaok dale nae,  
\q1 “See ndia bisa nalela Manetualain duduꞌan?  
\q2 Do, see ndia bisa koladu Lamatuak,  
\q3 fo Ana tao tungga ita nenori-nefadan?  
\q1 Ta hambu hatahori esa boe na!”\x + \xo 2:16 \xt Yesaya 40:13\x*  
\p Naa te ita bisa talela Manetualain nanaen nara raa, nahuu Karistus tulun fo ita bisa duduꞌa tungga Ndia duduꞌan.   
\c 3  
\s1 Ita hatahori kamaherek kara muste taue-osa dalek esa soa-neu Lamatuak, ma boso tareresi kii-konak  
\p
\v 1 Toranoo susue nggara ein! Fai maneuk kara, neu au numa naa, ei sama leo hatahori fo bei ta makaesa malole mia Manetualain Dula-dalen. Huu ei bubuluk kada tungga ei hihii-nanaum mesa kasa sama leo hatahori dae-bafok biasa. Huu naa de au ta bisa kokolak ua ei sama leo hatahori manggalalasik, huu ei sama leo kada kakana kadiꞌi anar.  
\v 2 Au muste anori ei laꞌe-neu dedeꞌa dakuk a mesan, huu ei bei ta sadia simbo dedeꞌak fo berak, sama leo kakana kadiꞌi anak fo bei ta bisa naꞌa mbaa. Naa te ei muste dadi barakaik sama leo hatahori moꞌok fo nasiꞌe naꞌa mbaa. Tehuu hatematak ia, ei bei leo bali kakana mbimbila anak fo nalela ninu kada susu.\x + \xo 3:2 \xt Ibrani 5:12-13\x*  
\v 3 Huu ei bei duduꞌa sama leo hatahori fo kada nau tungga sira mesa kasa hihii-nanaun. Mete ma hambu hatahori fo lenak numa ei mai, na, ei mbiri ma mareresi kii-konak! Huu naa de au ae ei bubuluk kada tungga ei mesa ngga hihii-nanaun. No dalak naa, ei sama leo kada hatahori dae-bafok biasa manai dae-bafok ia.  
\v 4 Huu ei ketuk mae, “Air ia, kaꞌa Paulus hatahorin!” Ma hambu ketuk rae, “Air ia, kaꞌa Apolos hatahorin!” Tungga-tungga ei kokolak talo naa, ei matudu mae, ei sama tetar mia hatahori dae-bafok biasa fo ta nalela Karistus.\x + \xo 3:4 \xt 1 Korentus 1:12\x*   
\s1 Eir ia, sama leo osi esa  
\p
\v 5 Naa te Apolos naa, see? Ma au, Paulus ia, see? Ai dua ngga ia, kada dadi miu neondak a mesan. Ai ndia matudu dalak fo ei bisa mamahere neu Karistus. Apolos nakalalaꞌok ues tungga Lamatuak parendan. Ma au oo talo naa boe!  
\v 6 Au ndia makasososan afada ei laꞌe-neu Karistus. Naa, sama leo au sele-tande bini-nggees. Basa de Apolos mai nanori ei. Naa, sama leo ana totoli-tetee bini-nggees fo au sele-tandek naa ena. Tehuu Manetualain naa, ndia tao nala bini-nggees naa mori dadi namoꞌo.\x + \xo 3:6 \xt Nedenuk kara Tutuin 18:4-11, 24-28\x*   
\p
\v 7 Dadi hatahori fo mana sele-tande bini-nggees ta naena sosoa-ndandaak. Ma mana totoli-tetee bini-nggees naa oo ta naena sosoa-ndandaak boe. Kada hatahori esa ndia kasosoak, ndia Manetualain. Ana ndia tao nala bini-nggees naa mori.  
\v 8 Hatahori mana sele-tandek ma hatahori mana totoli-teteek, ara raue-osa sama-sama, leo ara rai bua-aok esa dale. Ma basa hatahorir fo mana rakalalaꞌok Manetualain ue-osan, neu ko Ana nae bala sira sosota-mamanggun.  
\v 9a Ai sama-sama dadi miu Manetualain hatahori mana maue-osan. Ma ei dadi sama leo Manetualain osin fo Ana nae nauen.   
\s1 Eir ia, sama leo uma esa  
\p
\v 9b Leo naak oo ei sama leo uma esa fo Manetualain nae nambaririik kana boe.  
\v 10 Manetualain natudu Ndia dale susuen neu au ena. Huu naa de au sama leo ndolu langgak. Manetualain tulu-fali, de au anori dedeꞌa huuk neu ei numa makasososan mai, fo ambaririik ei leleo-lalaꞌom nai fanderen matea lain. Basa de hatahori laen oo ranori ei boe, fo rambaririik kana nai fanderen fo au tao alak naa lain ena. Tehuu tukan esa-esak muste naue-osa natalolole fo nambaririik kana ndaa tetebes.  
\v 11 Fanderen matea hambun ena. Ndia Yesus Karistus. Dadi ta hambu hatahori nambaririik fanderen laen nai ei dalem, huu Lamatuak nambaririik fanderen tetebes ena.   
\p
\v 12 Neu ko hambu hatahori fo nau nambaririik neu fanderen naa lain pake buas mata-matak kara. Ketuk nau pake buas mabeli leo lilo mbilas, lilo fulak, do batu manggadilak. Ketuk nau pake buas biasa leo ai, naꞌu, do fii.  
\v 13 Tehuu tukan esa-esak ue-osan neu ko neni nitak, ma basa hatahorir bubuluk ndia ue-osan naa, neulauk do taa. Te losa dae-bafok mateꞌen, neu ko Manetualain nae foran, sama leo Ana pake aꞌi fo natudu hatahori esa-esak uen nakatataka do taa.  
\v 14 Mete ma fora basa hatahori esa ue-osan pake aꞌi ena, ma buas fo ana pakek bei nakatataka, neu ko Lamatuak feen seseba-babaek nai lalai.  
\v 15 Tehuu mete ma fora basa hatahori ue-osan pake aꞌi ena, ma buas fo ana pake nambaririik neu fanderen lain naa, aꞌi naꞌa henin, na, Lamatuak ta fee hatahori naa, seseba-babaek hata esa boe na. Tehuu tukan naa bei hambu masoi-masodak, leo mae sama leo hatahori fo mana nalai kalua numa uma fo aꞌi naꞌak mai, ma elak ka faa maten.   
\s1 Ei sama leo Manetualain uma huhule-haradoin esa  
\p
\v 16 Ei muste malela mae, ei oo sama leo Manetualain uma huhule-haradoin esa boe, ma Ndia Dula-dalen oo leo nai dale boe.\x + \xo 3:16 \xt 1 Korentus 6:19; 2 Korentus 6:16\x*  
\v 17 Mete ma hambu hatahori fo nakalulutu Manetualain uma huhule-haradoin, fo Ndia mamana leleon naa, na, besa-besa, ee! Neu ko Manetualain oo fee hukun berak neun boe! Manetualain uma huhule-haradoin naa, malalaok. Huu naa de ei oo muste malalaok boe.   
\p
\v 18 Boso kedi-ira ei aom! Mete ma o tao aom malelak, ma malela basa-basan tungga hatahori dae-bafok hatematak ia malelan, manggaledok ena, o ta malela hata esa boe na. Mete ma o mameda mae, o ta malela hata-hata, dei fo o bisa mulai manori fo malela.  
\v 19 Hatahori dae-bafok hatematak ia duduꞌan, Manetualain duꞌa nae kada nggoa bebek a mesan. Sama leo neni surak nai Susura Malalaok nae:  
\q1 “Hambu hatahori fo tao aon leo malelak,  
\q2 tehuu neu ko Lamatuak pake sira mesa kasa duduꞌa-aꞌafi kaboo mburun,  
\q3 de ike falik kasa fo nakalulutu duduꞌa-aꞌafin nara!”\x + \xo 3:19 \xt Ayub 5:13\x*   
\p
\v 20 Nai mamana laen neni surak nae,  
\q1 “Ita Lamatuan bubuluk ena, hata fo hatahori malelak kara duꞌak,  
\q2 ma nae taon talo bee,  
\q1 Ana bubuluk ena, sira duduꞌa kada dedeꞌak fo hie-hie a mesan.”\x + \xo 3:20 \xt Sosoda Kokoa-kikiok kara 94:11\x*   
\p
\v 21-22 Dadi ei boso kada soꞌuk hatahori esa mae, ndia ta hohoꞌak. Lamatuak ndia soꞌuk hatahori fo nalangga ei. Basan dadi neu ei enam ena. Dadi ei malanggam mara, sama leo: au, kaꞌa Apolos, ma kaꞌa Peꞌu,\f + \fr 3:21-22 \ft Susura Malalaok dedeꞌa Yunani surak nae, \ft \+it Kefas\+it*. Kefas naa, Petrus naden laen.\f* ai basa ngga dadi miu ei enam. Ma basa hata manai dae-bafok ia oo dadi neu ei enam boe, leo mae ei bei masoda do mate, leo mae hatematak ia, do fai mana maik, basa-basan dadi neu ei enam.  
\v 23 Tehuu Ei dadi miu Karistus enan. Ma Karistus dadi neu Manetualain enan!   
\c 4  
\s1 Karistus nadenu nedenun neni bee neu a mesan  
\p
\v 1 Dadi ei muste taon neu ai talo ia: boso soꞌu makadedemak ai, huu air ia, kada Karistus neondan a mesan. Ma Manetualain fee nemeheherek neu ai fo manori ma manea matalolole Ndia dedeꞌan nara fo fai bakahulun bei nefunik.  
\v 2 Hatahori mana manea ndia lamatuan hata-heton, ana muste dadi hatahori mana tao tungga hata fo ndoos.  
\v 3 Au talo bee? Au aue-osa tungga hata fo ndoos, do taa? Au ta hosek ei timba-tai au talo bee. Ma au oo ta tao matak neu hatahori laen nara timba-tai au talo bee boe. Au oo ta tao matak neu timba-tai au aong boe.  
\v 4 Huu leo mae au daleng nae au malole ena, mete te bei ta bubuluk sosoa-ndandaan nae au malole. Nenenin lenak ndia, Lamatuak timba-tai au talo bee.  
\v 5 Dadi ei boso tao aom mara leo mana maketu-maladi dedeꞌak fo timba-tai hatahori laen nara. Mahani Lamatuak fali main. Huu neu ko Ana ndia buka basa dedeꞌak kara. Ana ndia leꞌa kalua heni hata fo manggarauk kara fo hatahorir rafuni sara nai makiuk dale. Ana nau natudu basa hata fo hatahorir duduꞌa sara rai sira dalen dale. Ma Manetualain nau koa hatahori esa-esak mana tao hata fo neulauk kara ena.   
\p
\v 6 Toranoo nggara ein! Au kokolak ena laꞌe-neu au ua kaꞌa Apolos, sama leo au fee netuduk fo ei bisa manori dedeꞌak esa numa ai mai, talo ia: \it Tao tungga basa dedeꞌak kara fo neni surak nai Manetualain Susura Malalaon a mesan. Boso tao tungga laen bali\it*. Mete ma ei manori dedeꞌak naa, na, hae miak esa boe na ma kokolak maloloa bafam, nahuu tungga hatahori esa ma makaloloek laen.  
\v 7 Dadi talo bee? Ei tao aom laen numa laen mai, do? Bosok! Huu basa babanggi-babaꞌek fo ei simbok kara, ei hambun numa Manetualain mai. Dadi mete ma talo naa, tao hata de ei koa ao sama leo ei ndia mesa kana aꞌadun?  
\v 8 Nok bali basa hata fo ei toꞌak, ei hambun ena. Leo bali ei kamasuꞌik ena, na! Ei tao aom mara leo hatahori moꞌo-inahuuk sama leo manek, de ai ta miu tia-tamba hata-hata. Naa te Manetualain ndia fee basa hata fo ei toꞌak. Tehuu mete ma ei dadi manek tetebes, fama te ai bisa toꞌu parenda sama-sama mia ei, hetu?   
\p
\v 9 Air ia, ndia Manetualain nadenu fo meni bee miu a mesan nai dae-bafok ia, fo mafada hatahori laꞌe-neu Karistus. Tehuu laꞌe-laꞌe esa, au duꞌa leo bali Manetualain nadenu ai mambariik miu dea mateꞌen, sama leo hatahori buir fo rahani sira hukun mates. Ma Ana fee basa hatahorir marai dae-bafok ia, no Ndia atan nara marai nusa tetuk do inggu temak, fo ara ranilu ai.  
\v 10 Ei ta hohoꞌak sudi selik kana ena! Hambu hatahorir duꞌa rae eir ia, malelak, nahuu ei makaesa mia Karistus. Tehuu ara duꞌa rae air ia, kada nggoa bebek sudi selik kana, nahuu ai dadi miu Karistus hatahorin. Fama te ara duꞌa rae, eir ia, ndia barakaik sudi selik kana ena. Tehuu air ia, kada mana male-kalek. Fama te ara rakadedemak ei. Tehuu ara ta fee hada-horomatak faa boe na neu ai. Sudi selik kana tebe-tebe!  
\v 11 Losa hatematak ia oo ai mameda ndoe ma dale mada boe. Ai bua-loꞌan nara kada sida-saik kara. Hatahori soa popoko-paparu ai. Ai dadi miu hatahori matofa-tarak ta mana maena uma.  
\v 12 Ai sota-bengge maue-osa mia ai lima heli-helin. Mete ma hatahori kokolak mata-matak kara laꞌe-neu ai, na, ai bala mae, “Ai moke-hule fo Manetualain tao hata fo neulauk soa-neu ei.” Mete ma hatahori tao rakasususak ai, na, ai here fo makatataka a leo.\x + \xo 4:12 \xt Nedenuk kara Tutuin 18:3\x*  
\v 13 Mete ma hatahori kokolak rakabobook ai nade malolen, ai here fo bala no kokolak neulauk a mesan. Leo mae talo naa oo, tehuu hatahori bei tao ai leo bali seek boe, do, dafu-dae manggenggeok fo nandaa kada nggari henin leo.\x + \xo 4:13 \xt Ibrani 11:38\x*   
\p
\v 14 Au surak dedeꞌak kara iar, ta ae tao ei dadi mae. Tehuu au nau kaꞌi-ore ei, nahuu au sue ei sama leo au ana heli-heling. Huu naa de au afada ei, fo fali tungga eno-dala ndoos.  
\v 15 Leo mae hambu hatahori rifu-rifuk kara fo bisa ratudu dalak neu ei laꞌe-neu Karistus, tehuu kada au mesa ngga ndia dadi neu ei amam. Huu au ia, hatahori makasososak fo mana nafada ei laꞌe-neu Yesus Karistus Tutui Malolen. Huu naa de ei mamahere neun. Au tao talo naa, nahuu au akaesa malole ua Yesus Karistus.  
\v 16 Dadi au oke fo ei tungga matalolole au netudung.\x + \xo 4:16 \xt 1 Korentus 11:1; Felipi 3:17\x*   
\p
\v 17 Huu naa de au adenu Timotius fo tulun ei. Au sue neun, sama leo au ana heli-heling. Au amaheren, huu ana oo leo-laꞌo nakaesa no ita Lamatuan boe. Neu ko ana tulun ei fo fee nesenedak laꞌe-neu au leleo-lalaꞌong. Au leleo-lalaꞌong talo naa, nahuu au akaesa ua Yesus Karistus fo Lamatuak nadenun mai ena. Ma naa oo, sama leo hata fo au anorik fee hatahori saranik fo mana rakabubua nai bee a mesan boe.   
\p
\v 18 Hambu ketuk ruma ei mai duꞌa rae, au ta dadi uni naa neti. Huu naa de ara koa ao ena.  
\v 19 Tehuu mete ma ita Lamatuan nau, ta dook ka bali te, au uni kota Korentus uu ena. No dalak naa, neu ko au bubuluk memak, mete te hatahori iar kada rabafa loa, do tebe-tebe raena koasa!  
\v 20 Huu Manetualain, Manek mana maena koasa. Ma Ndia hatahorin nara ta pake bafa mana laiminan nara fo fofoꞌa hatahori nemeheren, tehuu ara pake koasa fo tetebes.  
\v 21 Ei hihiim talo bee? Mete ma au mai, na, au kokolak barakaik ma fee hukun neu ei? Do, au mai atudu susue-lalaik ma dale neulauk?   
\c 5  
\s1 Nai saranik dale, hambu hatahori naeok no inak  
\p
\v 1 Au amanene rae, hambu hatahori esa nai ei saranim dale, naeok no inak. Naa te hata fo ana taok naa, manggaraun lena heni hatahori ta mana nalela Manetualain. Huu ana soa sunggu-soro no ndia ina mbala heli-helin!\x + \xo 5:1 \xt Tui Seluk laꞌe-neu Dala Masodak 22:30\x*  
\v 2 Tehuu ei koa aom mara bali, leo bali ei saranim neulauk a mesan! Ndondoon ndia, ei muste mae ma mameda susa. Hatahori matak naa, ei muste husi henin neni dook ka neu!   
\p
\v 3 Leo mae ita takadodook esa no esa, tehuu au daleng leo nai ei. De au aketu hatahori manggarauk naa dedeꞌan ena, sama leo au nai naa memak.  
\v 4 Au aena haak aketu-aladi talo naa, nahuu Yesus dadi neu ita Lamatuan, ma au ia, Ndia nedenun. Ei muste manggatuuk makabua fo maketu-maladi dedeꞌak naa, menik Lamatuak naden. Au daleng oo sama-sama no ei boe.  
\v 5 De ei muste loo lima hatahori naa neni nitur malanggan neu, mita fo doo-doo boe ma hatahori naa nggari heni dedeꞌa manggarauk kara fo manai dalen dale. Mete ma ita Lamatuan fali mai, na, neu ko Ana bisa tao nasoi-nasoda hatahori naa numa ndia sala-singgon mai.   
\p
\v 6 Ta malole, mete ma ei mabafa loa! Boso lilii-ndondou mae, ita babalik laru taꞌik baꞌu anak ka, fo tao kaifuu roti katematuan. Laru taꞌik naa, sama leo hatahori manggaraun. De mete ma elan fo ana tao manggarauk nai ei taladam, neu ko hatahori saranik laen nara oo tungga doꞌo-doꞌo tao manggarauk boe!\x + \xo 5:6 \xt Galatia 5:9\x*  
\v 7 Husi heni hatahori manggarauk naa numa ei saranim mai, sama leo fai bakahulun hatahori Yahudir nggari heni basa laru taꞌik numa sira uman nara mai, fo sadia raꞌa feta Paska. No dalak naa, dei fo ei bisa dadi fali leo hatahori fo ta mana naena manggarauk nai ndia dalen dale bali. Ei muste dadi talo naa. Fai bakahulun, ara hala bibi lombo ana fo ta mana naena salak fo tao feta Paska tunu-hotun. Mai bakahiton, ara hala rakanisa Manetualain Hatahori Malalaon, fo dadi tunu-hotuk mana tao nalalao ita dalen.\x + \xo 5:7 \xt Kalua numa Masir mai 12:5\x*  
\v 8 Fai bakahulun, hatahori Yahudir raꞌa feta Paska pake roti lepa-nggees, ta mana pake laru taꞌik. Hatematak ia ita sama leo roti fo ta mana pake laru taꞌik naa. Huu naa de, muste tanea ita aon fo boso tao dedeꞌa manggarauk kara, ma boso tao makahehedik hatahori laen dalen. Ita muste kokolak tetebes takandoo. No dalak naa, hatahori mete-rita rae, ita tao basa-basan tungga ita dale susuen.\x + \xo 5:8 \xt Kalua numa Masir mai 13:7; Tui Seluk laꞌe-neu Dala Masodak 16:3\x*   
\p
\v 9 Fai bakahulun, au surak ita susurak ae, “Boso makabubua mia hatahori fo mana laꞌok sala no hatahori fo ta sira sao toun do sira sao inan.”  
\v 10 Au ta aena duduꞌak fo ei boso makabubua mia \it basa\it* hatahorir marai dae-bafok ia, fo ta mana tao matak neu Manetualain, do hatahori bare-naꞌo, do hatahori pepeko-lelekok fo kedi-ira nala hatahori bua-baꞌun, do mana songgo-tangguk kara. Mete ma talo naa, na, ei muste tao aom mara lenggo feꞌe numa basa hatahorir marai dae-bafok ia mai.  
\v 11 Tehuu hatematak ia, dedeꞌak fo au kokolak naa, ndia: ei boso makabua mia hatahori fo mana nae ndia dadi hatahori saranik, naa te ana kada laꞌok sala do, mana bare-naꞌo do, mana songgo-tangguk do, mana kokolak nakalulutu hatahori naden do, mana mafu kamaberak do, mana pepeko-lelekok fo nau haꞌi nala hatahori bua-baꞌun. Ita boso takabua to hatahori matak leo naak kara. Boso manggatuuk miꞌa-minu mia sara bali!   
\p
\v 12 Ei maena haak fo timba-tai hatahori saranik kara leleo-lalaꞌon. Tehuu au ta aena haak fo aketu-aladi dedeꞌak fee hatahori fo ta mana namahere neu Manetualain.  
\v 13 Huu Ndia mesa kana ndia neu ko naketu-naladi dedeꞌak fee hatahori fo ta mana namahere neu Ndia. Tehuu ei boso lilii-ndondou neu Manetualain Susura Malalaon mana surak nae, “Hatahori fo mana seseik aon dadi neu Manetualain hatahorin, tehuu ana soa tao dedeꞌa manggarauk kara husi nggari henin leo!”\x + \xo 5:13 \xt Tui Seluk laꞌe-neu Dala Masodak 13:5; 17:7; 19:19; 22:21, 24; 24:7\x*   
\c 6  
\s1 Hatahori kamaherek boso madedeꞌa mia toranoo kamaherek laen nai mamana neketu-neladi dedeꞌak  
\p
\v 1 Mete ma hatahori saranik esa nadedeꞌa no hatahori saranik laen, na, tao hata de ei meni mamana neketu-neladi dedeꞌak nai mana maketu-maladi dedeꞌak matan, fo ta mana nalela Manetualain? Talo bee de bisa talo naa? Malole lenak, mambariik miu hatahori kamaherek kara matan, fo ara parisa ei dedeꞌam!  
\v 2 Nok bali ei ta bubuluk mae, hatahori kamaherek kara, neu ko ara ndia raketu-raladi dedeꞌak soa-neu basa hatahorir marai dae-bafok ia. Dadi talo bee de losa ei mesa ngga ta mabeꞌi maole dedeꞌa kadiꞌi anak kara?  
\v 3 Ndondoon ndia, ita ndia taketu-taladi dedeꞌak fee Manetualain atan nara maruma nusa tetuk do inggu temak mai. De neu ko ei ndia muste maole dedeꞌak tungga faik kara.  
\v 4 Tamba bali, mete ma ei hatahori kamaherek kara madedeꞌa laꞌe-neu dedeꞌa kadiꞌi anak kara, tao hata de ei pake mana maketu-maladi dedeꞌak fo hatahori saranik ta fee hada-horomatak neu sara?   
\p
\v 5 Au ae kokolak dedeꞌak esa fo muste tao nakamamaek ei. Talo bee? Sama leo nai ei taladam mara, ta hambu hatahori esa boe na fo malelan dai fo naole dedeꞌa kadiꞌi anak kara, netuduk leo dedeꞌak fo mana sou nai ita toranoon.  
\v 6 Tehuu hatahori kamaherek esa leꞌa noo ndia toranoo kamaheren, neni mana maketu-maladi dedeꞌak matan neu! Naa te mana maketu-maladi dedeꞌak naa, ta namahere neu Lamatuak!   
\p
\v 7 Ta ndaa, hetu? Senggi ei ena, mete ma ei esa sara esa nai mamana neketu-neladi dedeꞌak. Malole lenak, mete ma o toranoom tao salak mbali o, na, elan numa naa leo. Mete ma o toranoom hatahori kamaherek namanaꞌo nala o bua-baꞌun, malole lenak elan numa naa fo ana haꞌi nala buas naa leo!  
\v 8 Tehuu ei hatahori kamaherek, esa tao salak mbali ndia toranoon, ma esa namanaꞌo mbali esa. Naa te ei sama-sama hatahori kamaherek!   
\p
\v 9 Ei nok bali ta malela dedeꞌak kara iar! Naa te hatahori ta mana hii tao dedeꞌa tetebes, ta bisa dadi, ana maso dadi neu Manetualain nufanelun nara. Boso fee lelak neu aom mara hambu kedi-irak fo ei tao salak! Netuduk leo: mana laꞌok sala no hatahori fo ta ndia sao toun do ndia sao inan, mana songgo-tangguk, mana hohongge-lelena, touk fo mana sunggu-soro no touk,  
\v 10 hatahori naꞌok, mana bare-naꞌo, mana ninu mafuk, mana kokolak naboboo hatahori naden ma mana pepeko-lelekok fo haꞌi nala hatahori bua-baꞌun nara. Boso tao leo naak, huu basa hatahorir matak leo sira, ta bisa maso dadi reu Manetualain hatahorin!   
\p
\v 11 Naa te fai bakahulun, ei ketuk oo leo naak boe! Tehuu Manetualain koka heni ei sala-singgom mara fo tao nalalao ei ena. Ma Ana oo nasosoi dalak fo ei bisa malole fali mia Ndia boe. Ana tao basa naar, nahuu ei makaesa mia ita Lamatuan Yesus Karistus, ma nahuu ei oo makaesa mia Manetualain Dula-dalen boe.   
\s1 Mete ma o manea matalolole o ao-inam, na, naa natudu hada-horomatak neu Lamatuak  
\p
\v 12 Au aena haak fo tao basa-basan. Tehuu basa hata fo au taok naa, bei ta bubuluk neulauk soa-neu au. Ma leo mae au aena haak fo tao basa-basan, tehuu au ta nau dedeꞌa ta malole ndia koasa au.\x + \xo 6:12 \xt 1 Korentus 10:23\x*  
\v 13 Haꞌi netuduk leo, hambu hatahori nae, “Nanaꞌak toꞌa poꞌok, ma poꞌok toꞌa nanaꞌak.” Tehuu masaneda, te neu ko Manetualain nakalulutu dua sara.  
\p Netuduk laen bali, ita boso pake ita ao-inan fo laꞌok sala to hatahori fo ta ita sao toun, do ita sao inan. Tehuu ita pake ita ao-inan fo bisa taue-osa fee ita Lamatuan. Ma ita Lamatuan oo ndia naena ita ao-inan boe.  
\v 14 Neu ita Lamatuan Yesus maten ena, Manetualain ndia tao nasoda falik kana numa mamaten mai. Dadi mete ma ita mate ena, neu ko Ana oo naena koasa fo tao nasoda falik ita numa mamates mai boe.   
\p
\v 15 Ei ao-inam dadi neu Karistus enan, sama leo ei dadi miu babaꞌek esa numa Karistus ao-inan mai. Ei bubuluk dedeꞌak naa ena. Dadi mete ma ita pake babaꞌek numa Karistus ao-inan mai, basa de teu takabua to ina petak ao-inan, na, talo bee? Bosok! Te naa ta nandaa na!  
\v 16 Ei bubuluk ena, mete ma hatahori laꞌok sala fo sunggu-soro nakabua no ina petak talo naa, na, dua sara dadi reu esa ena. Sama leo neni surak nai Susura Malalaok nae, “Dua sara dadi reu esa ena.”\x + \xo 6:16 \xt Tutui Makasososak 2:24\x*  
\v 17 Tehuu hatahori fo mana leo-laꞌo dalek esa no ita Lamatuan, ana dadi esa no Lamatuak ena, sama leo dua sara rakaesa nai dula-dalek esa.   
\p
\v 18 Mete ma o hambu lelak fo laꞌok sala mua ta o sao toum do sao inam, na, malai heok dook ka muu! Hatahori mana tao sala-singgok laen nara, rakalulutu sira mesa kasa, ma rakalulutu hatahori laen boe. Tehuu hatahori fo mana hii hohongge-lelenak naa, nakalulutu ndia ao-ina heli-helin.  
\v 19 O ao-inam naa, sama leo Manetualain Dula-dale Malalaon uma huhule-haradoin. Ndia Dula-dalen naa, ndia leo nai ei dalem mara, huu Manetualain mesa kana ndia fee Ndia Dula-dalen neu ei. Huu naa de ei mesa ngga ta maena haak bali, fo dadi malanggan soa-neu esa-esak ao-ina heli-helim. Tehuu hata de ei bei leo-laꞌo nok bali ei ta bubuluk dedeꞌak ia?\x + \xo 6:19 \xt 1 Korentus 3:16; 2 Korentus 6:16\x*  
\v 20 Karistus tefa-soi nala ei ena, no babaen belin seli. Dadi ei muste leo-laꞌo no hada-horomatak mbali ei ao-ina heli-helim, fo matudu mae, ei oo fee hada-horomatak neu Manetualain boe.   
\c 7  
\s1 Sao touk ma sao inak kara  
\p
\v 1 Hatematak ia, au ae surak laꞌe-neu basa hata fo ei matanek nai ei susuram naa mae, “Talo bee? Malole lenak, touk hae sao, do?”   
\p
\v 2 Talo ia: nai hatahori leleo-lalaꞌon, hambu lelak noꞌuk ka fo hatahori bisa tuda neni nekebuak sao holu-ndaek kasalak neu, huu naa de malole lenak touk esa no sao heli-helin. Leo naak oo inak esa no ndia sao heli-helin boe.   
\p
\v 3 Sao touk kara ein! Boso timba heni o saom haak fo sunggu-soro nakabua no o. Ma sao inak kara ein! Boso timba heni o saom haak fo sunggu-soro nakabua no o.  
\v 4 Huu sao inak fee ndia ao-inan ena, fo dadi neu ndia saon enan. Ma sao touk fee ndia ao-inan ena, fo dadi neu saon enan.  
\v 5 Dadi ei boso mandundu-helak kana, huu ei dua ngga maena haak! Tehuu mete ma ei nau hule-haradoi a mesan, ma ta nau duduꞌa dedeꞌak laen nara, na, bisa makatataka mala faa, fo boso sunggu-soro makabua nai ledo-fai kekeꞌuk. Sadi sao touk ma sao inak makokola aok no malole dei, ma mala harak talo naa. Mete ma ledo-fai huhule-haradoik naa basan ena, na, malole lenak dua sara rakabua fali lai-laik leo. Mete ma ta talo naa, na, manggataꞌak! Huu nitur malanggan no muda hiek soba-dou hatahori ta nabeꞌi nakatataka aon.  
\v 6 Dedeꞌak ia, kada au hahambung, ta Lamatuak hohoro-lalanen.  
\v 7 Tungga au duduꞌang, malole lenak hatahorir ta sao, sama leo au. Tehuu Manetualain fee hatahori esa-esak babanggi-babaꞌek ndaa noon. Boe ma hambu hatahorir fo Ana fee sara sao. Ma hambu hatahori laen fo Ana ta fee sara sao.   
\p
\v 8 Au nau afada touk do inak fo bei ta sao, ma ina falur ae, malole lenak ei ta sao, sama leo au.  
\v 9 Tehuu mete ma ta bisa makatataka mala aom, malole lenak sao leo, te mete ma taa, na, hihii sasao holu-ndae heli-helin bisa naꞌa nasafalin.   
\p
\v 10 Ia ta numa au mesa ngga mai. Au nau afada hata fo ita Lamatuan parendan ena, soa-neu hatahori mana saok kara ena ae, sao inak ta bole namaketu heni saon.  
\v 11 Tehuu mete ma ana ela heni ndia saon, na, ana boso sao seluk bali. Do malole lenak, ana fali fo mole-dame no ndia saon. Leo naak oo, sao touk ta bole namaketu heni ndia saon boe.\x + \xo 7:11 \xt Mateos 5:32; 19:9; Markus 10:11-12; Lukas 16:18\x*   
\p
\v 12 Ia numa au mesa ngga mai, ta numa ita Lamatuan mai. Neu hatahori laen nara, au nau kokolak talo ia: mete ma hambu hatahori saranik fo sao inan ta namahere neu Karistus, na, ana boso namaketu heni saon, mete ma saon bei sadia leo-laꞌo nakandoo no ndia.  
\v 13 Leo naak oo, mete ma hambu sao inak fo saon ta namahere neu Karistus boe, na, ana boso namaketu heni saon, mete ma saon hii fo sira leo-laꞌo sama-sama rakandoo.  
\v 14 Sao touk fo ta mana namahere neu Lamatuak oo dadi malalaok boe, nahuu ana nakaesa no saon. Ma sao inak fo ta mana namahere neu Lamatuak oo dadi malalaok boe, nahuu ana nakaesa no saon. Mete ma taa, na, sira anan nara ta malalaok. Tehuu no dalak ia, ara hambu dededek malalaok nai Lamatuak matan.  
\v 15 Tehuu mete ma hambu sao touk do sao inak fo ta mana namahere neu Lamatuak, ana laꞌo ela ndia saon hatahori kamaherek, na, elan numa naa leo. De sao touk do sao inak mana kamaherek, ara ta rakaesa talo naa bali. Huu Lamatuak noke nala ei fo dadi miu Ndia hatahorin, fo ei bisa leo-laꞌo mia lino-lendek ma mole-damek.  
\v 16 Sao ina kamaherek kara! Fama te ei bisa tao masoi-masoda ei saom. Fama ko ta bisa boe. Ma sao tou kamaherek kara! Fama te ei bisa tao masoi-masoda ei saom. Fama ko ta bisa boe. Ei ta bubuluk no tetuk.   
\s1 Tungga matalolole Lamatuak Eno-dala Masodan  
\p
\v 17 Leo mae talo naa, tehuu hatahori esa-esak nenggetuu-nemberiin leo beek, neu Manetualain nanggou nala ei dadi miu Ndia hatahorin, na, leo-laꞌo makandoo talo naa leo. Hae nggatin bali, huu Lamatuak koladu nalan talo naa ena. Au anori hohoro-lalanek ia neu basa saranik kara.   
\p
\v 18 Haꞌi netuduk, mete ma ei sunat mita fo matudu mae, ei hatahori Yahudir, dei fo bakadean ei mamanene Manetualain nanggou ei, na, haen no laka sunat naa. Ma hatahori fo ta sunat, neu ramanene Manetualain nanggou sara fo dadi reu Ndia enan, na, hae sunat fo dadi tanda rae, sira dadi reu Manetualain hatahorin ena.  
\v 19 Mete ma sunat mita, na, ta naena sosoa-ndandaak hata-hata. Mete ma ta sunat, naa oo ta naena sosoak hata-hata boe. Mana kasosoa-ndandaak ndia: ita tao tungga Manetualain parendan nara.  
\v 20 Neu Manetualain here nala ei dadi miu Ndia hatahorin, Ana ta nadenu ei sunat do ta sunat. Dadi elan fo ei talo kada naa leo. Hae nggatin.   
\p
\v 21 Au fee lololek esa bali. Mete ma o dadi hatahori ata-daton, neu Manetualain nanggou o, na, elan fo o dadi talo kada naa, ta hata-hata. Tehuu mete ma o bisa dadi hatahori nekemboꞌik, na, dadi talo naa leo! Mete ma ta bisa dadi hatahori nekemboꞌik oo, ta hata-hata boe.  
\v 22 Neu Lamatuak nanggou nala ata-dato esa dadi neu Ndia hatahorin, ata-dato naa dadi neu hatahori nekemboꞌik ena, fo naue-osa fee ndia Lamatuan. Ma neu Lamatuak nanggou nala hatahori nekemboꞌik esa dadi neu Ndia hatahorin, hatahori naa hatematak ia, dadi neu Karistus neondan.  
\v 23 Karistus bae ketu ei ena, no babaen, belin sudi selik kana! Dadi ei boso dadi miu ata-dato soa-neu hatahori laen.   
\p
\v 24 Toranoo susue nggara ein! Neu Manetualain nanggou nala ei dadi miu Ndia hatahorin, ei nenggetuu-nemberiim leo beek, na, elan talo kada naa leo. Hae nggatin bali. Elan numa naa leo, soa-neu Manetualain.   
\s1 Laꞌe-neu hatahorir ta mana saok kara  
\p
\v 25 Ei matane au laꞌe-neu taꞌe anak ma feꞌo anak kara fo bei ta sunggu-soro rakabua rita. Lamatuak ta nafada au laꞌe-neu dedeꞌak naa. Tehuu ei bisa mamahere hata fo au kokolak, nahuu Lamatuak natudu Ndia dale kasian neu au. Au duduꞌang talo ia:  
\v 26 Hatematak ia, ita hambu doidosok mata-matak kara. Dadi mete ma hatahorir leo beek, na, elan talo naa leo. Au hahambung talo ia:  
\v 27 Mete ma o makaesa mua o sao inam, na, boso ela henin. Mete ma o ta makaesa mua o sao inam bali, na, hae sangga fo sao seluk ina beuk.  
\v 28 Tehuu leo o dadi sao, o ta tao salak hata-hata. Mete ma hambu inak bei ta sunggu-soro nakabua nita no touk dadi sao, ana oo ta tao salak hata-hata boe. Tehuu masaneda te hatahori mana saok, neu ko hambu susa-sonak mata-matak kara nai dae-bafok ia. Au dale hihiing fo ei boso susa-sona talo naa.   
\p
\v 29 Toranoo susue nggara ein! Tungga au duduꞌang talo ia: ledo-fair tamba kekeꞌu ena, ma dae-bafok fai mateꞌen deka-deka ena. De hatahori kasao inak, boso tao matak neu kada sao inan mesa kana, tehuu ana oo muste tao matak neu Lamatuak boe.  
\v 30 Leo naak oo, mete ma hambu ketuk buꞌi, malole lenak ana natetea fo ana boso buꞌi boe, mita fo ana bisa tao matak neu Lamatuak. Mete ma ketuk dalen mbena sau-sau, malole lenak ana tao aon leo bali ta leo naak, mita fo ana bisa tao matak neu Lamatuak. Mete ma hambu ketuk nabeꞌi hahasa, malole lenak ana leo-laꞌo sama leo hatahori ta naena hata-hata, mita fo ana bisa tao matak neu Lamatuak.  
\v 31 Mete ma hambu ketuk pake bua-baꞌu numa dae-bafok ia mai, malole lenak ana tao aon sama leo ta tai-namahena neu dae-bafok ia bua-baꞌun, mita fo ana bisa tao matak neu Lamatuak. Huu dae-bafok ia lole-ladan, neu ko mopo henin.   
\p
\v 32 Au nau fo ei boso kada duꞌa-duꞌa dedeꞌak kara iar. Huu hatahori ta mana saok naa, ndia ledo-fain lena noꞌuk ka fo ana tao matak laꞌe-neu Lamatuak hihii-nanaun. Huu naa de ana bisa sangga dalak fo naue-osa tao namahoko Lamatuak dalen.  
\v 33-34 Tehuu hatahori fo mana saok ena oo, muste tao matak neu dae-bafok ia hihii-nanaun boe. Ana nau tao matak laꞌe-neu Lamatuak hihii-nanaun, tehuu ana oo muste sangga dalak fo tao namahoko ndia sao inan boe. Naa, ndia tao nala duduꞌan nabingga-baꞌe kii-konak kana.  
\p Leo naak oo, inak fo ta naena sao touk bali ma inak fo bei ta sao nita boe. Ara tao matak laꞌe-neu Lamatuak hihii-nanaun fo ara bisa lolo-laok nai dalen nara ma ao-inan nara. Tehuu inak mana saok ena, dalen dadi nabingga-baꞌek kii-konak kana. Huu ana nae tao matak laꞌe-neu Lamatuak hihii-nanaun, tehuu ana oo, muste sangga dalak fo tao namahoko sao toun boe.  
\v 35 Au afada dedeꞌak ia neu ei, fo ei hambu neulaun. Au ta nau fo ikek nala ei. Au hihiing, ei tao hata fo tetebes, ma tao matak neu Lamatuak hihii-nanaun, fo ei duduꞌam mara ta rabingga-baꞌek.   
\p
\v 36 Mete ma touk naena inak fo nae taon dadi neu saon, teun dai ena fo sao, na, ela sara sao leo. Hata-bali mete ma touk naa ta bisa nakatataka nala aon. No dalak naa, ara ta tao salak hata-hata. Boso losak ara kada ratalongga fair rakandoo, boe ma babasan, touk naa tao dedeꞌak ta ndoos sara.  
\v 37 Tehuu mete ma ana nabeꞌi nakatataka nala aon, ana hae nakasetik sao lai-laik. Huu ana bubuluk, ndia nae tao hata. Elan fo ana nakatataka nala dook ka oo malole boe.  
\v 38 Dadi touk mana sao nala inak fo nae taon dadi neu saon, naa malole. Ma ta mana saok naa, lolen lenak bali.   
\s1 Laꞌe-neu ina falur  
\p
\v 39 Sao inak nakaesa no saon losa mate. Tehuu mete ma saon maten ena, na, ana bole sao seluk, sadi sao beun naa oo, hatahori fo mana namahere neu Karistus boe.  
\v 40 Tungga au duduꞌang, ina falu naa maua-manalen lenak, mete ma ana ta sao bali. Au duꞌa, ia nenori-nefadak numa Manetualain Dula-dalen manai au dale.   
\c 8  
\s1 Laꞌe-neu nanaꞌak fo hatahori paken soa-neu songgo-tangguk ena  
\r (Tui Seluk laꞌe-neu Dala Masodak 4:35, 39; 6:4)  
\p
\v 1 Hatematak ia, au ae kokolak laꞌe-neu mbaa fo hatahorir paken neu sosonggok. Ita basa ngga bubuluk noꞌuk ka laꞌe-neu dedeꞌa kara iar ena. Mana dadi neu dedeꞌak ndia, mete ma hatahori bubuluk noꞌuk ka, ana bisa koa ao, huu ana duꞌa nae, ndia malelan lena heni hatahori laen nara. Malole lenak, ita tasue-laik neu hatahori laen leo. Huu, naa ndia tao nala basa hatahorir dadi barakai fo bisa rakatataka rala dook ka.   
\p
\v 2 Mete ma hambu hatahori tao aon bubuluk ena, naa natudu nae, ndia malelan bei ta matetu-mandaik.  
\v 3 Tehuu mete ma hambu hatahori sue-lai neu Manetualain, na, Lamatuak nalelan ena. Naa, ndia nenenin lenak.   
\p
\v 4 Dadi mete ma hatahori naꞌa mbaa fo pake ritan neu songgo-tangguk, ita basa ngga bubuluk tae, buas sosonggok manai dae-bafok ia, ta Manetualain. Huu ita bubuluk tae, “Hambu kada Manetualain esak ka ndia tetebes.” Ma “basa buas sosonggok fo hatahorir rakaluku-rakatele neun, ta raena sosoa-ndandaak hata-hata.”  
\v 5 Hambu buas noꞌuk ka nai lalai ma dae-inak fo hatahorir seseik rae, ‘lamatuak’.   
\q1
\v 6 Tehuu soa-neu ita, Manetualain kada esak ka.  
\q2 Ndia naa, ita Aman.  
\q1 Basa-basan raoka nai Ndia.  
\q2 Ita tao basa-basan soa-neu Ndia.  
\q1 Ma ita Lamatuan, kada esak ka.  
\q2 Ndia, Yesus Karistus.  
\q1 Manetualain pake Yesus,  
\q2 neu Ana adu basa-basan.  
\q1 Ma ita tasoda,  
\q2 nahuu Yesus ndia fee ita tasoda.   
\p
\v 7 Tehuu hambu hatahori ta bubuluk dedeꞌak kara raa. Ara bei duduꞌa rakandoo laꞌe-neu buas sosonggok kara, sama leo ara duꞌa ritak fai bakahulun. Huu naa de tungga-tungga ara raꞌa mbaa fo hatahorir pake rita neu songgo-tangguk, ara duꞌa rae, “Nanaꞌak ia, dadi tunu-hotuk fo paken neu songgo-tangguk ena. Mete ma au uꞌa nanaꞌak ia, au bei neka-lili ua dedeꞌa manggarauk kara!” Dadi, naa nakalulutu duduꞌan nara losa ara ta bisa duduꞌa ndoos bali, nahuu dalen nara ta ratea.  
\v 8 Ndia dedeꞌa huun hata? Nanaꞌak ta bisa nuni no ita teu tasare Manetualain, hetu? Mete ma ta taꞌa, ita ta tamba manggarauk. Mete ma taꞌa, ta tao nala ita dadi teu hatahori malole, hetu?   
\p
\v 9 Tehuu besa-besa, ee! Leo mae o maena haak fo tao dedeꞌak esa, bei ta bubuluk dedeꞌak naa dadi malole soa-neu o. Leo hambu toranook esa hatahori kamaherek dalen ta matea, mete ma ana mete-nita o tao matak naa, basa de ana nakatunu, na, ta malole!  
\v 10 O mesa ngga bubuluk ena, dedeꞌak naa ta dadi hata-hata. Tehuu mete ma toranoo hatahori kamaherek fo dalen ta matea, mete-nita o manggatuuk muꞌa nai uma sosonggok, neu ko ana duꞌa hata? Ana duꞌa, taꞌa nanaꞌa sosonggok fo ara paken neu songgo-tangguk oo, ta dadi dedeꞌak bali soa-neu ndia boe, de ana naꞌa leo.  
\v 11 O malela dedeꞌak noꞌuk ka ena. Tehuu mete ma o tao talo naa, o makalulutu hatahori dalen fo ta matea. Naa te hatahori naa, o toranoo kamaherem. Karistus oo mate soa-neun boe!  
\v 12 Talo ia: mete ma o toranoo dale ta mateam mara, mete-rita o tao dedeꞌak esa fo ara duꞌa rae sala, na, o tao salak fee sara ena. Ma o tao salak neu Karistus boe.  
\v 13 Dadi mete ma au uꞌa hata fo tao ala au toranoo kamahereng tuda neni salak neu, malole lenak au hae uꞌa mbaa matak leo naak. Leo mae losa doo naa neu oo haen leo boe. Huu au ta nau fo ara tuda reni salak dale reu.   
\c 9  
\s1 Neu Lamatuak nadenu Ndia hatahorin nara, Ana oo fee sara haak ma koasa boe  
\p
\v 1 Boso duꞌa mae, au ta aena haak fo surak talo ia fee ei. Huu Manetualain nadenu au fo uu afada ei laꞌe-neu Ndia. Au oo mete-ita Yesus, ita Lamatuan boe. Au akaesa uan akandoo, huu naa de ei basa ngga mamahere neu Yesus numa au ue-osang mai.  
\v 2 Leo mae hatahori laen ta simbok au dadi uu Lamatuak nedenun, tehuu ei bubuluk ena mae, Lamatuak nadenu au fo afada Ndia hara hehelun soa-neu ei. Mete ma ei nau sangga bukti bali, na, susuri-memete kada ei nenggetuu-nemberiim mara leo. Huu ei bei makaesa mia ita Lamatuan!   
\p
\v 3 Au ae aselu asafali hatahori fo mana soa ndae salak neu au, talo ia:  
\v 4 Ei duꞌa mae, au ua Barnabas ta maena haak fo simbo nanaꞌa-nininuk numa hatahori fo ai fee nenorik mai, do?  
\v 5 Ei duꞌa mae, ai ta maena haak sao ina Karisten, fo bisa tungga sama-sama miu maono-malalau nai mamanak laen, do? Naa te Lamatuak nedenu laen nara, nuni roo sira sao inan nara boe. Lamatuak fadin nara oo leo naak boe. Petrus mesa kana oo tao talo naa boe!\f + \fr 9:5 \ft Susura Malalaok dedeꞌa Yunani surak nae, ‘Kefas’. Kefas naa, Petrus naden laen.\f*  
\v 6 Do, ei duꞌa mae, kada au ua Barnabas mesa ngga ndia muste tao ue-osa sangga doik, mita fo ai bisa masoda fo manori hatahorir?  
\v 7 Ei duduꞌam naa, oka-huun hata? Mete neu soldadur leo. Ara hae hasa sira nanaꞌan ma bua-loꞌan nara. Mete neu hatahori mana maue-osa nai osi anggor dale leo. Ta hambu esa kaꞌin nae, “O ta bole muꞌa anggor boan nara raa!” Mete neu kada mana lolor leo. Ana naena haak fo hee nala susu numa bibi lombo fo ana lolok mai.   
\p
\v 8 Au ta kokolak talo naa kada tungga au, hatahori dae-bafok biasa mesa kana duduꞌan. Manetualain Hohoro-lalanen oo nafada dedeꞌak sama boe.  
\v 9 Nai baꞌi Musa Hohoro-lalanen neni surak nae, “Neu sapi bei roroo hade fo bingga feꞌe hade numa mbulen mai, boso rapa misa bafan fo ana ta bisa naꞌa.” Ei duꞌa mae, Lamatuak nau mboꞌi kada sapi mesa kana ndia bisa naꞌa, do?\x + \xo 9:9 \xt Tui Seluk laꞌe-neu Dala Masodak 25:4; 1 Timotius 5:18\x*  
\v 10-11 Taa! Ana oo kokolak fo tao matak neu ai boe! Sama leo neni surak nae, “Hatahori mana dodoꞌi-dadaꞌu dae, ma hatahori mana bingga hade deꞌen numa mbulen mai, neu ara raue-osa, ara oo bubuluk rae, neu ko sira hambu sira babaꞌen boe.” Leo naak oo malole mete ma hatahori Karisten nedenun nara bisa simbo sira babaꞌen numa sira ue-osan buna-boan mai boe. Neu ai manori ei dedeꞌak kara ruma Manetualain Dula-dalen mai, naa sama leo hatahori mana ue daek esa sele-tande. Dadi, neu ai fee nenorik basa, na, naa ta hata-hata mete ma ai oo simbo nanaꞌa-nininuk do, hata-hata numa ei mai boe. Naa, memak nandaa!\x + \xo 9:10-11 \xt Roma 15:27\x*  
\v 12 Hatahori laen fo mana ranori ei, raena haak fo simbo nanaꞌak ma buas laen numa ei mai, hetu? De mete ma ai, na, talo bee? Ai maena haak lena heni sara!  
\p Tehuu ei bubuluk ena. Ai ta pake mita ai haak fo makasetik talo naa. Ai makatataka nai dedeꞌak mata-matak kara fo boso tao kai-baak soa-neu ei. Huu no dalak naa, ei hii mamanene Karistus Hara Lii Malolen fo ai tuik soa-neu ei.  
\v 13 Duduꞌa sudik kana! Malangga anggamar fo mana raono-lalau hatahorir rai Uma Huhule-haradoi Ina-huuk, soda-ladan nara ruma kolete fo hatahorir renik mai. Ma hatahorir fo mana raono-lalau nai mei tunu-hotuk, ara bisa raꞌa mbaa numa banda fo hatahorir renik mai.\x + \xo 9:13 \xt Tui Seluk laꞌe-neu Dala Masodak 18:1\x*  
\v 14 Leo naak oo, Lamatuak helu ela boe nae, hatahorir fo uen nara ndia rafada Karistus Hara Lii Malolen, soda-ladan nara bisa ruma sira ue-osan buna-boan mai. Naa, ndia ndaa.\x + \xo 9:14 \xt Mateos 10:10; Lukas 10:7\x*   
\p
\v 15 Leo mae au aena haak fo leo-laꞌo sama leo hatahori mana maue-osar, tehuu au ta hii tao talo naa. Au ta duꞌa ae, au surak susurak ia fo ei mulai fee au buas. Doon seli ena, au aono-lalau ei, ma ta oke hata-hata numa ei mai. Dadi malole lenak au mate, mita fo hatahorir boso duduꞌa rae au mulai hule-kai sudi hata.  
\v 16 Leo mae au afada hatahorir akandoo laꞌe-neu Lamatuak Hara Lii Malolen, tehuu naa ta dadi neu oka-huun fo au bisa kokolak aloloa bafang. Au muste afada hatahorir laꞌe-neu Lamatuak, huu Lamatuak ndia nadenu au talo naa. Mete ma au ta tao tungga au ueng talo naa, na, au soe naa! Huu neu ko huku-dokik tuda laꞌe au.  
\v 17 Mete ma au tao ue-osa ia nahuu no kada au hihii-nanau heli-heling, na, hata fo au hambuk naa, sama leo nggadi fo hatahori mana maue-osa simbo a leo. Tehuu mete ma au tao ue-osa ia nahuu Lamatuak ndia nadenu au, naa laen. Ana namahere au fo anea Ndia bua-baꞌu mabelin nara.  
\v 18 Dadi mete ma talo naa, au seseba-babaeng hata? Au ta parluu simbo nggadi! Au tui-bengga Lamatuak Hara Lii Malolen, ma ta oke hata-hata. Naa, ndia tao nala au ameda dai. Ma nemeda daik naa, sama leo au seseba-babaen. Dadi leo mae au aena haak mata-matak sama leo hatahori uen tui-bengga Hara Lii Malole naa, tehuu au mesa ngga ta nau pake basa au haak lalaꞌeng.   
\p
\v 19 Au ia, hatahori nekemboꞌik fo mana naue-osa tungga au hihiing. Hatahorir ta raena haak fo raonda au tao ia, do tao naa. Leo mae talo naa, tehuu au tao aong sama leo ata-dato fo basa hatahorir raena haak raonda au. No dalak naa, au bisa tulun hatahori noꞌun lenak, fo ara rakatataka tungga Manetualain.  
\v 20 Dadi mete ma au akabua ua hatahori Yahudi, na, au tao aong leo hatahori Yahudi, fo tulu-fali hatahori Yahudir ralela Lamatuak. Mete ma au akabua ua hatahori mana toꞌu rahere Manetualain Hohoro-lalanen, na, au tao tungga Manetualain Hohoro-lalanen fo au oo bisa tulu-fali sara fo ralela Lamatuak boe, (leo mae au bubuluk ena ae, tao tungga Hohoro-lalanek naa, ta bisa tao nala au malole ua Lamatuak).  
\v 21 Mete ma au akabua ua hatahori fo ta mana bubuluk Manetualain Hohoro-lalanen, au dadi sama leo sara fo nuni ua sara reni Lamatuak reu. (Au ta akamboꞌik Manetualain Hohoro-lalanen fo Ana nakondan tungga baꞌi Musa, tehuu hatematak ia au leo-laꞌo tungga Karistus Hohoro-lalanen.)\x + \xo 9:21 \xt Mateos 22:34-40; Markus 12:28-34; Lukas 10:25-28; 1 Korentus 13:1-8\x*  
\v 22 Soa-neu hatahori fo dalen ta matea, au tao aong sama leo au daleng oo ta matea boe, fo au bisa kokoe sara reni Manetualain reu. Soa-neu basa hatahorir, au tao aong sama leo sara, mita fo talo bee oo au bisa tulun tao asoi-asoda hatahori ketuk boe.  
\v 23 Au tao basa dedeꞌak kara iar, mita fo basa hatahorir bisa ramahere Lamatuak Hara Lii Malolen. No dalak naa, ai bisa hambu babaꞌek nai basa hata fo neulauk fo Lamatuak hii feen neu ai.   
\p
\v 24 Au fee lololek numa nekeseseꞌuk nelaik mai. Hatahori noꞌuk ka tungga nelaik, tehuu mana hambu joara kaesan, kada hatahori esak ka. Dadi o muste malaik tao tetebe fo dadi joara soa-neu Lamatuak.  
\v 25 Basa hatahorir fo mana tungga nekeseseꞌuk muste tao tebe-tebe nakandoo tungga kada hata fo ndia mesen nenorin, hetu? Ara raue-osa fafandek lima-ein nara talo naa, fo hambu kada solangga joara fo neu ko male-kale henin. Tehuu mete ma ita, na, ita taue-osa fo hambu seseba-babaek mana nakatataka losa doon naa neu.  
\v 26 Dadi au ta alaik sadi ndaa. Tehuu au aote tebe-tebe fo alaik ndoo fido-fidok losa too. Mete ma akasasamak au ua mana matutuk, na, au ta tutu anin, tehuu au tutu laꞌen.  
\v 27 Au tao tingga-tingga atetu basa nenori-nefadak ma anori no tebe-tebe fo au bisa akatataka. Huu ta malole, mete ma au afada hatahori laen laꞌe-neu Manetualain, naa te au mesa ngga lena-langga hohoro-lalanek, boe ma Lamatuak leꞌa heni au numa nekeseseꞌuk mai.   
\c 10  
\s1 Besa-besa mia buas sosonggok kara!  
\p
\v 1 Toranoo susue nggara ein! Ei boso lilii-ndondou heni tutui lele uluk kara, neu ita bei-baꞌin nara ruma mamana nees. Manetualain natudu dalak neu basa sara, pake sosoꞌak mana laꞌok nakahuluk nesik matan nara. Ana tada baꞌe tasi oe, de noo sara resik naa, losa ara kalua reni tasi serik reu ro sodak.\x + \xo 10:1 \xt Kalua numa Masir mai 13:21-22; 14:22-29\x*  
\v 2 Sosoꞌak naa ma tasi naa, dadi reu lololek esa. Ita bei-baꞌin nara ramahere baꞌi Musa fo nakalalaꞌok kasa, de ara tungga sosoꞌak naa, ma nok bali dudi reni tasi oe dale reu sama-sama roon. Naa, sama leo ita hambu sarani fo natudu nae, ita tamahere neu Karistus, de ita dadi teu Ndia hatahorin ma nenene neu Ndia.  
\v 3 Ita bei-baꞌin basa sara raꞌa nanaꞌak fo Manetualain Dula-dalen sadia fee sara.\x + \xo 10:3 \xt Kalua numa Masir mai 16:35\x*  
\v 4 Ma basa sara rinu oe fo Manetualain Dula-dalen sadia fee sara rinu. Oe fo ara rinuk naa, kalua numa batu moꞌok fo Manetualain Dula-dalen natudu neu sara. Ara bee reu a mesan, na, batu naa hambun memak kana ena. Batu naa, ndia Karistus.\x + \xo 10:4 \xt Kalua numa Masir mai 17:6; Susura Rerekek 20:11\x*  
\v 5 Tehuu Manetualain ta hii hatahori noꞌuk kara tatao-nonoꞌin. Neu ara laꞌok ndule mamana nees mana loa naa, na, hambu noꞌuk ka mate numa naa. Dadi ara ratoi sira hatahorin nara rai mamanak noꞌuk ka.\x + \xo 10:5 \xt Susura Rerekek 14:29-30\x*   
\p
\v 6 Basa naar dadi fo fee netuduk, naa fo ita boso hihiik ka tao manggarauk sama leo sara.\x + \xo 10:6 \xt Susura Rerekek 11:4\x*  
\v 7 Boso songgo-tanggu, sama leo sira ketuk. Nai Manetualain Susura Malalaon neni surak nae, “Hatahori Israꞌel iar ranggatuuk raꞌa-rinu rame-rame numa patong sapi ana matan. Basa boe ma ara mulai songgo-tanggu.”\x + \xo 10:7 \xt Kalua numa Masir mai 32:6\x*  
\v 8 Ita boso laꞌok sala to hatahori fo ta ita sao toun do ita sao inan. Huu fai maneuk kara, ara hohongge talo naa, de hambu hatahori 23.000 mate nai kada faik esa dalen.\x + \xo 10:8 \xt Susura Rerekek 25:1-18\x*  
\v 9 Ita boso soba-soba tao manggarauk mata-matak kara dei, fo sangga bubuluk tae, Karistus nae hukun ita, do taa. Huu hatahori Israꞌel asa ketuk rae soba Manetualain talo naa, boe ma Ana haitua fee mengge karasok noꞌun seli mai kiki rakamate sara.\x + \xo 10:9 \xt Susura Rerekek 21:5-6\x*  
\v 10 Ita oo boso unggu-remu boe. Sira ketuk kada unggu-remu rakandoo, basa boe ma Manetualain nadenu atan esa numa nusa tetuk do inggu temak mai, fo nakanisa sara.\x + \xo 10:10 \xt Susura Rerekek 16:41-49\x*   
\p
\v 11 Dedeꞌak naa laꞌe-ndaa hatahori Israꞌel asa, fo dadi netuduk soa-neu ita. Ara surak basa sara ena, fo ita bisa tanori ma boso tao tungga sira sala-singgon nara. Huu dae-bafok fai mateꞌen deka-deka mai ena.   
\p
\v 12 Masanenedak, ee! Hatematak ia, o duꞌa mae, o bisa makatataka mahere ena. Tehuu o muste besa-besa, fo boso tuda.  
\v 13 Tungga-tungga o mameda hihiik ka tao manggarauk, masaneda te hatahori laen oo, rameda rita soba-douk leo naak ena boe. O bisa mamahere neu Manetualain, huu Ana tao natetu hata fo Ana kokolak. Ana ta fee lelak fo hambu mala soba-douk, lena heni hata fo o bisa makatataka malan. Tungga-tungga o hambu mala soba-douk talo naa, na, Ana fee dala sasaik neu o. Ana nau tao o mabeꞌi makatataka fo o boso tuda.   
\p
\v 14 De toranoo susue nggara ein! Mete ma hatahorir rae soba rakasetik ei fo doꞌor neu sosonggok kara, na, malai heok numa naa mai leo! Boso bei maeok bali!   
\p
\v 15 Au kokolak mbali ei fo bei maduduꞌa naruk. Ei mesa ngga muste timba-tai fo bubuluk hata fo au ae kokolak naa, tetebes.  
\v 16 Duꞌa sudik dedeꞌak ia: mete ma ita takabua fo taꞌa nai Lamatuak mein, boe ma haꞌi tala nggalas naa fo toke makasi neun, basa de ita tinu numa nggalas naa mai, naa sosoa-ndandaan nae, ita takaesa to Karistus. Neu Ana mboꞌa heni daan fo mate, naa nok bali ita oo, mate tungga boe. Mete ma ita fifiꞌi baꞌe roti naa, fo ita taꞌa, naa sosoa-ndandaan sama, ndia ita takaesa to Karistus. Dadi neu Ana mate, naa nok bali ita oo mate tungga boe.\x + \xo 10:16 \xt Mateos 26:27-28; Markus 14:22-24; Lukas 22:19-20\x*  
\v 17 Ita basa ngga haꞌi tala babaꞌek numa roti balok esa mai. Dadi basan mana haꞌi babaꞌek numa roti esa naa mai, sama leo ita takaesa dadi teu ao-inak esa, leo mae ita hatahori noꞌuk ka.  
\v 18 Duꞌa sudik hatahori Israꞌel lele uluk kara. Neu ara hala banda nai mei tunu-hotuk lain fo rakaluku-rakatele neu Manetualain, malangga anggama mana halak naa, ndia hambu naꞌa mbaan. Naa sosoa-ndandaan, ara rakaesa ro Manetualain, ma ara oo rakaesa ro hatahori mana neni banda naa, fo taon neu tunu-hotuk boe.\x + \xo 10:18 \xt Malangga Anggamar Hohoro-lalanen 7:6\x*   
\p
\v 19-20 Neu faik hatahori ta mana malela Manetualain nae neni fefeen neu sira bua sosonggon, naa ta naena sosoak hata esa boe na. Huu bua sosonggok naa, kada patong mates a mesan. Tehuu neu hatahori hala banda dadi neu tunu-hotuk fee sira bua sosonggon nara, ara songgo-tanggu neu dula-dale manggarauk kara. Ara ta rakaluku-rakatele neu Manetualain. Dadi au ta nau ei makaesa mia dula-dale manggarauk leo naak.\x + \xo 10:19-20 \xt Tui Seluk laꞌe-neu Dala Masodak 32:17\x*  
\v 21 Ei mana makaesa mia Lamatuak, nahuu minu numa nggalas manai Lamatuak mein mai, na, ei ta bole miu babalik mia dula-dale manggarauk kara, ma minu numa sira nggalan mai, neu hatahori songgo-tanggu sara. Naa sosoa-ndandaan nae, ei makaesa mia dula-dale manggarauk kara. Leo naak oo ei miꞌa nai Lamatuak mein, ei ta bole tungga miꞌa nai sira mein boe. Naa sosoa-ndandaan nae, ei makaesa mia dula-dale manggarauk kara! Nggoa bebek kara ein, ee!  
\v 22 Ei duꞌa talo bee? Nau tao ita Lamatuan horo mbala, do? Manggataꞌak, naa! Fama te ei duꞌa mae ei barakain lena heni Ndia, do?\x + \xo 10:22 \xt Tui Seluk laꞌe-neu Dala Masodak 32:21\x*   
\s1 Tao basa-basan fo makadedemak Manetualain naden  
\p
\v 23 Fama te ei mae, “Au ae tao hata a mesan, bole. Huu, naa au haak.” Tebe! Tehuu masaneda te, ta basa dedeꞌak kara raa, reni malole soa-neu o. Ma ta basa dedeꞌak kara bisa tulun tao ratea o dalem.\x + \xo 10:23 \xt 1 Korentus 6:12\x*  
\v 24 Boso kada sangga nanalak soa-neu o ao heli-helim. Malole lenak, sangga nanalak soa-neu hatahori laen boe.   
\p
\v 25 Dadi talo ia: mete ma hasa mbaa nai pasar, na, muꞌa leo. Hae matane bali, “Ia mbaa sosonggok, do?” Do, duꞌa mae, “Au bole uꞌa mbaa ia, do taa?”  
\v 26 Huu nai Manetualain Susura Malalaon neni surak nae, “Dae-bafok no basa oe-isin lalaꞌen, ita Lamatuan enan.”\x + \xo 10:26 \xt Sosoda Kokoa-kikiok kara 24:1\x*   
\p
\v 27 Mete ma hambu hatahori bei ta namahere neu Manetualain nae, “Mai muꞌa nai uma!” Mete ma ei mae miu, na, miu leo, ma miꞌa basa hata fo ara fee ei. Hae matane mae, “Au bole uꞌa ia, do taa?”  
\v 28 (Tehuu mete ma hambu hatahori mai nakukutuk nae, “Boso muꞌa ia, te ia mbaa sosonggok,” malole lenak o hae muꞌa. O muste tao matak neu hatahori fo mana mai nafada naa, huu ana duꞌa nae, o muꞌa, na, naa sala.  
\v 29 Duduꞌa matalolole tungga hatahori naa duduꞌan, fo ta bole muꞌa. Boso duꞌa kada malole soa-neu o ao heli-helim.)  
\p Naa te au bole tao tungga au hihiing. Tehuu mete ma hatahori laen tao dedeꞌak esa, ma ana duꞌa ta malole, na, hata de au oo ta hambu lelak fo tao tungga au hihiing boe, nahuu kada dedeꞌak naa ta malole soa-neu hatahori naa?  
\v 30 Mete ma au oke makasi neu Manetualain, de au uꞌa, na, hata de hatahorir kokolak rakatutudak au?   
\p
\v 31 Dadi ei mae miꞌa do, minu do, tao hata a mesan, na, tao basa-basan fo ei matudu Manetualain nade malolen.  
\v 32 Boso makasususak hatahori Yahudir, do, hatahori ta Yahudir, do, Manetualain hatahori kamaheren nara.  
\v 33 Tao sama leo au ia. Huu au soba-soba tao amahoko basa sara, nai basa dedeꞌak kara. Au ta kada soba tao hata fo malole soa-neu au mesa ngga. Tehuu au soba tao hata fo malole soa-neu basa sara fo ara oo hambu masoi-masodak boe.   
\c 11  
\p
\v 1 Ei haꞌi netuduk numa au mai, ma tao tungga au leleo-lalaꞌong. Huu au haꞌi netuduk numa Karistus mai, ma tao tunggan.\x + \xo 11:1 \xt 1 Korentus 4:16; Felipi 3:17\x*   
\s1 Mete ma tao ibadat, na, touk ma inak muste matudu hada-horomatak tungga dala-hadak siꞌen  
\p
\v 2 Au koa ei nahuu talo bee oo, ei masaneda neu au taa-taa boe. Ma basa dedeꞌak fo au anorik soa-neu ei, ei bei tao tunggan. Lolen sudi selik kana!  
\v 3 Tehuu hambu dedeꞌak esa fo au nau fee nesenedak neu ei talo ia: boso lilii-ndondou ei dadadin numa bee mai. Touk kamaherek esa-esak naoka nai Karistus fo dadi neu ndia malanggan. Inak dadadin numa touk mai. Ma Karistus numa Manetualain mai.\f + \fr 11:3 \ft Hatahori Yunani mana malela dedeꞌak kara rae, \ft \+it kefale\+it* “langgak” sosoa-ndandaan nae, 1) ao-inak langgan, ma 2) dadadin, okan (huun). Tehuu nai dedeꞌa Yunani, \+it kefale\+it* sosoa-ndandaan, ta “hatahori mana parenda”.\f*   
\p
\v 4 Touk boso mboti langgan neu ana hule-haradoi, do, neu ana nafada Lamatuak hara hehelun. Huu, naa sama leo ana nakamamaek Karistus, nahuu ana ta fee hada-horomatak tungga ita siꞌen.  
\v 5 Tehuu inak muste mboti langgan neu ana hule-haradoi, do, neu ana nafada Lamatuak hara hehelun. Huu mete ma taa, na, naa sama leo ana nakamamaek ndia saon, nahuu ana ta fee hada-horomatak sama leo ita siꞌen. Ma ana oo nakamamaek ndia ao heli-helin, sama leo mete ma inak nggeu namboli langgan boe.  
\v 6 Mete ma hambu inak ta nau mboti langgan fo dadi tanda nae, ana ta fee hada-horomatak neu saon, na, malole lenak ana nggute kekeꞌu ndia langga bulun. Tehuu mete ma nameda langga mbolin naa nakamamaek kana, malole lenak ana mboti langgan leo.   
\p
\v 7 Soba duꞌa sudik kana talo ia: touk hae mboti langgan, huu Manetualain adu touk tungga Ndia mata-aon. Huu naa de touk dadi buna-boak fo natudu Manetualain ta neni babanggan. Ma inak oo dadi buna-boak fo natudu touk ta hohoꞌan boe.\x + \xo 11:7 \xt Tutui Makasososak 1:26-27\x*  
\v 8 Neu Manetualain adu dae-bafok ia, Ana ta adu touk numa inak mai. Tehuu Ana adu inak numa touk mai.  
\v 9 Ma Ana ta adu touk fee inak. Tehuu Ana adu inak fee touk.\x + \xo 11:9 \xt Tutui Makasososak 2:18-19\x*  
\v 10 Dadi malole lenak inak mboti langgan, fo hatahori bubuluk rae, ana pake ndia haak fo hule-haradoi ma nafada Lamatuak hara hehelun, tungga ndoon. Ata numa nusa tetuk do inggu temak mai oo bubuluk talo naa boe.  
\v 11 Tehuu mete ma ara rakaesa ro Lamatuak, inak ma touk ta rambariik mesa kasa.  
\v 12 Makasososan, Manetualain adu inak numa touk mai. Tehuu basa naa, inak bonggi nala touk. Ma Manetualain ndia adu fo basa-basan dadi.   
\p
\v 13 Ei duꞌa sudik kana! Mete ma inak hule-haradoi neu Manetualain, ma ta mboti langgan, na, tungga ei, naa malole, do taa?  
\v 14 Tungga ei hadam nai kota Korentus, mete ma touk langga bulun manaru, naa nakamamaek kana, do?  
\v 15 Tehuu mete ma inak langga bulun manaru, naa lolen sudi selik kana, hetu? Lamatuak feen langga bulu naruk fo mboti nala langgan. Naa, ndia ndaa.   
\p
\v 16 Tehuu mete ma hambu ketuk rareresi rakandoo laꞌe-neu dedeꞌak ia, masanenedak te ia ndia dadi neu ai siꞌem ena numa ai fo dadi malanggan ma numa saranik kara mai.   
\s1 Boso tao mata-matak mete ma miꞌa nai Lamatuak mein  
\p
\v 17 Hatematak ia, au ae kokolak dedeꞌak esa bali. Nai dedeꞌak ia, au ta bisa koa ei. Neu ei bei makabua, ei ta tao tungga hata fo ndoos, tehuu ei boe mamue-anggik bali.   
\p
\v 18 Makasososan, au amanene rae, neu ei makabua tao ibadat, ei mabingga-baꞌek. Numa au amanene tutuik laꞌe-neu ei nebingga-baꞌem naa mai, neu ko hambu dedeꞌak ketuk tetebes.  
\v 19 (Memak, huu no ei tao esa-esak nekebubuan do nekebonggo-bonggon naa, neu ko neni nitak see ndia tebe-tebe namanene neu ita Lamatuan ma see ndia ta nau nenene neun.)   
\p
\v 20 Neu ei hatahori saranik makabua fo miꞌa nai Lamatuak mein, ei muste masaneda neu Lamatuak Yesus. Naa, ndia ndaa. Tehuu ei ta tao talo naa.  
\v 21 Buktin, ndia neu ei manggatuuk miꞌa, hambu ketuk ta rahani hatahori laen, hambu ketuk raꞌa no bare-naꞌon ma hambu laen bali, rinu mafuk. Losa hatahori laen ta hambu babaꞌek, de ara ndoe.  
\v 22 Talo bee ia!? Ei ta maena uma heli-helik fo miꞌa-minu nai naa, do? Do, ei mae makalulutu Manetualain hatahori saranin nade malolen? Do, ei nau makamamaek hatahori mana toꞌa taak kara? Ei nau au kokolak talo bee? Ei nau au koa ei nai dedeꞌak ia, do? Boso mamahena!   
\s1 Roti ma oe anggor dadi tanda fo tao ita tasaneda neu Yesus mamaten  
\r (Mateos 26:26-29; Markus 14:22-25; Lukas 22:14-20)  
\p
\v 23 Lamatuak Yesus mesa kana ndia nafada memak dedeꞌak ia neu au, ma au loo liman bali neu ei. Nae, neu hatahorir rahehere rala fo rae tao risa Ndia, leꞌodaen naa Ana haꞌi nala roti balok esa.  
\v 24 De Ana hule-haradoi noke makasi neu Manetualain. Boe ma nafada ana nunin nara nae, “Miꞌa roti ia. Ia Au ao-mbaang. Neu ko ara rakalulutu Au ao-mbaang fee ei. Dadi ei muste miꞌa roti ia fo masaneda neu Au.”   
\p
\v 25 Neu ara raꞌa basa ena, Ana oo tao sama neu nggalas oe anggor boe nae, “Oe anggor ia, sosoa-ndandaan ndia: Manetualain nau ndara fangga hehelu-bartaa beuk no ei. Ma Au muste mboꞌa heni Au daang losa Au mate dei, dei fo hehelu-bartaak naa bisa dadi. De tungga-tungga ei minu oe anggor talo ia, na, ei muste masaneda neu Au mamateng.”\x + \xo 11:25 \xt Kalua numa Masir mai 24:6-8; Yermia 31:31-34\x*  
\v 26 Tungga-tungga ei manggatuuk miꞌa roti talo ia, ma minu numa nggalas talo ia, losa Lamatuak fali mai, naa sama leo ei tui seluk laꞌe-neu Ndia mamaten.   
\s2 Mete ma o dalem ta ndoos, na, boso manggatuuk muꞌa nai Lamatuak mein  
\p
\v 27 Huu naa de, mete ma hambu hatahori naꞌa roti naa, ma ninu numa nggalas naa mai, fo nasaneda neu ita Lamatuan, tehuu dalen ta ndoos, neu ko Manetualain fee hukun neun. Roti ma oe anggor naa, ndia Lamatuak Yesus ao-mbaan ma daan. Dadi mete ma hatahori dalen ta ndoos, na, ta nandaa ana naꞌa-ninu nai naa, huu naa kada nakadadaek Lamatuak Yesus.  
\v 28 Malole lenak, hatahori esa-esak parisa ndia dale heli-helin dei. Basa, mete ma namahere tebe-tebe ndia dalen ndoos, dei fo ana bisa naꞌa roti naa, ma ninu oe anggor naa.  
\v 29 Tehuu hambu hatahorir raꞌa ma rinu ro dalen nara ta neulauk. Huu ara duꞌa rae, “Yesus mamaten naa, ta naena sosoa-ndandaak hata esa boe na. Yesus ao-mbaan ta naena sosoa-ndandaak soa-neu au.” Hatahori leo naak kara, mesa kasa lemba-rasaa sosoen, nahuu neu ko ara hambu huku-dokik.  
\v 30 Huu naa de, nai ei taladam mara naa, hambu ketuk mana sota-naꞌuk kara, hambu ketuk kamahedik kara, ma hambu ketuk fo mates sara ena.   
\p
\v 31 Tehuu mete ma ita parisa tatalolole ita dalen dei, huku-dokik ta laꞌe nala ita talo naa.  
\v 32 Mete ma ita Lamatuan hukun ita, Ana tao talo naa, fo nanori ita tungga dalak fo ndoos. Ana ta nau huku-dokik laꞌe ita, ma neu ko takalulutu sama-sama to basa hatahorir marai dae-bafok ia.   
\p
\v 33 Dadi toranoo susue nggara ein! Mete ma ei makabua fo miꞌa nai Lamatuak mein, na, esa muste nahani esa.  
\v 34 Mete ma hambu ketuk ndoe ralan seli, na, malole lenak raꞌa rala faa nai uma dei. Basa dei fo, mete ma ei makabua sama-sama, na, huku-dokik boso laꞌe nala ei.  
\p Laꞌe-neu dedeꞌak laen nara fo ei matanek naa, neu ko au uni naa neti, dei fo au koladun.   
\c 12  
\s1 Manetualain Dula-dalen fee koasa neu ita fo tao ues mata-matak  
\p
\v 1 Toranoo susue nggara ein! Au nau fo ei malela laꞌe-neu koasa naa ma babanggi-babaꞌek fo Lamatuak Dula-dalen feen fo ita pake.  
\v 2 Ei bubuluk ena mae, neu ei bei ta dadi Lamatuak hatahorin nara, ei kada songgo-tanggu buas hara taak. Ei tungga no poke-mbakek neu sara.  
\v 3 Huu naa de au nau fo ei malela mae, ta bisa dadi hambu hatahori fo mana nakaesa no Manetualain Dula-dale Malalaon nae, “Neketook neu Yesus naa!” Ma ta bisa dadi hambu hatahori fo ta mana nakaesa no Manetualain Dula-dale Malalaon nae, “Yesus naa, au Lamatuang fo naena haak parenda au!”   
\p
\v 4 Manetualain Dula-dalen fee hatahori esa-esak no ndia babanggi-babaꞌen fo ara rakalalaꞌok sira esa-esak uen. Tehuu basa babanggi-babaꞌek kara ruma Dula-dalek esa mai.  
\v 5 Hatahorir hambu babanggi-babaꞌe mata-matak kara fo raono-lalau hatahorir, tehuu basa sara ramanene numa kada Lamatuak esak ka mai.  
\v 6 Hatahori hambu ues mata-matak kara fo rakalalaꞌok Lamatuak ue-osan, tehuu kada Manetualain ndia tulun asa fo rakalalaꞌok basa ues sara raa lalaꞌen.  
\v 7 Manetualain natudu Ndia Dula-dalen neu hatahori esa-esak leleo-lalaꞌon no dalak mana feꞌek kara. De basa sara raua-ranale sama-sama fo esa bisa tulu-fali esa.  
\v 8 Ana fee babanggi-babaꞌek numa Ndia Dula-dalen koasan mai neu Ndia hatahorin nara. Ketuk simbo koasa duduꞌa naruk fo bisa ralela fee nenori-nefada mandaak tungga Lamatuak hihii-nanaun. Ketuk simbo koasa malelak no mandaik fo nafada laꞌe-neu Lamatuak fo ara ralela no ledo-ledo.  
\v 9 Ketuk bali simbo koasa nemeheherek matea neu Manetualain, nahuu ara rakaesa ratalolole ro Ndia Dula-dalen. Ketuk bali simbo koasa fo tao rahai hatahori kamahedik.  
\v 10 Ketuk bali simbo koasa tao tanda heran mata-matak kara fo ratudu Manetualain ta neni babanggan. Ketuk bali simbo koasa rambarani kokolak fo rafada Lamatuak hara hehelun no matetu-mandaik neu Ndia hatahorin nara. Ketuk bali simbo koasa duduꞌa-aꞌafi neulauk fo bubuluk dula-dalek bee ndia numa Manetualain mai ma bee ndia taa. Ketuk bali simbo koasa deꞌa-deꞌa kola-kola fo bisa kokolak pake dedeꞌak mata-matak kara tungga Dula-dalek hihiin. Ketuk bali simbo koasa fo bisa rafada dedeꞌak kara raa sosoa-ndandaan hata.  
\v 11 Tehuu kada Dula-dalek esa ndia taon fo basa sara bisa tao ues sara raa. Ana fee hatahori esa-esak fo ara rabeꞌi raue-osa tungga Dula-dalek hihii-nanaun.\x + \xo 12:11 \xt Roma 12:6-8\x*   
\s2 Ao-inak esa no ndia babaꞌen mata-matak  
\p
\v 12 Au nau akasasamak hatahori fo mana hambu babanggi-babaꞌek kara raa no hatahori ao-inak esa. Ao-inak naa, naena babaꞌen mata-matak kara. Tehuu babaꞌek mata-matak kara raa, rakaesa dadi neu ao-inak esak ka.\x + \xo 12:12 \xt Roma 12:4-5\x*  
\p Naa, sama leo Karistus hatahorin nara.  
\v 13 Kada Dula-dalek esa ndia nakaesa ita basa ngga. Huu naa de, neu ita hambu sarani, ita dadi sama leo hatahori nusak esa. Leo mae ita hatahori Yahudir, do hatahori ta Yahudir, ata-dato, do hatahori nekemboꞌik, Manetualain fee ita basa ngga Dula-dalek esak ka. Naa, sama leo ita basa ngga tinu oe mana neni masodak, numa oe matak esak ka mai.   
\p
\v 14 Memak ao-inak ta numa kada babaꞌek esak ka mai. Ndia naa, dadi numa babaꞌek noꞌuk ka mai.  
\v 15 Leo o eim nae, “Au ia, ta limak. Dadi au ta dadi babaꞌek numa o ao-inam mai.” Leo mae ana kokolak talo naa, tehuu ndia bei babaꞌek numa o ao-inam mai. Tebe, hetu?  
\v 16 Mete ma o ndiꞌi doom nae, “Au ia, ta mata boak. Dadi au ta dadi babaꞌek numa o ao-inam mai.” Leo mae ana kokolak talo naa, tehuu ndia bei babaꞌek numa o ao-inam mai.  
\v 17 Duduꞌa dei! Mete ma o ao-inam dadi kada mata boak esak ka, talo bee de o bisa mamanene? Mete ma o ao-inam dadi kada ndiꞌi dook esak ka, talo bee de o bisa hae mala book?   
\p
\v 18 Tehuu ei bubuluk ena, Manetualain tao nala ita sama leo ao-inak esa, ma Ana koladu babaꞌek mata-matak tungga Ndia hihiin.  
\v 19 Mete ma ita ao-inan dadi neu kada babaꞌek esa, na, naden ta ‘ao-inak’ ena bali, hetu?  
\v 20 Tehuu ndondoon ndia, ita ao-inan babaꞌen mata-matak. Naa, ndia taon dadi neu ao-ina katemak esa.   
\p
\v 21 Hatahori mata boan ta bisa nakaloloek hatahori naa liman nae, “Au ta toꞌa o!” Ma hatahori langgan ta bisa nafada hatahori naa ein nae, “Au ta toꞌa o!”  
\v 22 Ndondoon ndia, hambu ao-inak babaꞌen fo ita duꞌa tae ta barakaik ma nenenin taa, tehuu ita bei toꞌa sara.  
\v 23 Hambu babaꞌek fo ita duꞌa tae sosoan kada baꞌu anak ka, tehuu ita bei takaboi tatalolole sara. Ma hambu babaꞌek fo ita mae tatudu sara, de ita tatana tatalolole sara.  
\v 24 Tehuu mete ma babaꞌek fo ta tao nakamamaek ita, ita ta tao hata-hata mbali sara.  
\p Manetualain nakabubua nala basa babaꞌek kara fo taon dadi ao-inak esa. De Ana heti fo babaꞌek bee ita duꞌa tae nenenin taa, ita oo takaboi tatalolole sara boe,  
\v 25 huu Ana ta hii ita ao-inan neni bingga-baꞌek. Ana nau fo basa babaꞌek, esa susuri-memete esa.  
\v 26 Mete ma babaꞌek esa hambu susa-sonak, na, basa sara oo rameda boe. Mete ma esa simbo hada-horomatak, na, basa sara oo ramahoko tungga boe.   
\p
\v 27 Soa-neu ei oo leo naak boe. Huu ei sama leo Karistus ao-inan katematuan. Hatahori kamaherek esa-esak dadi sama leo babaꞌek esa numa Karistus ao-inan mai.  
\v 28 Nai hatahori kamaherek kara taladan, Manetualain fee koasa fo tao ues mata-matak kara.  
\q2 Kaesan, Ana nadenu hatahori ketuk reu rafada Ndia hara hehelun.  
\q2 Kaduan, Ana pake hatahori ketuk dadi reu Ndia mana toꞌu dedeꞌan.  
\q2 Katelun, Ana tao hatahori ketuk ralela ranori hatahorir laꞌe-neu Ndia.  
\q2 Ma Ana fee koasa neu hatahori ketuk fo bisa tao tanda heran mata-matak kara fo ratudu Ndia ta neni babanggan.  
\q2 Ketuk bali hambu koasa fo rahai hatahori kamahedik.  
\q2 Ketuk bali hambu babanggi-babaꞌek fo tulu-fali hatahorir.  
\q2 Ketuk bali hambu babanggi-babaꞌek fo bisa koladu hatahorir fo raue-osa sama-sama no malole.  
\q2 Ma Ana fee koasa neu hatahori ketuk bali fo ara bisa kokolak pake dedeꞌak mata-matak kara.\x + \xo 12:28 \xt Epesus 4:11\x*   
\p
\v 29 Ei duduꞌam talo bee? Manetualain nadenu basa hatahorir fo laꞌok reu tui-bengga Ndia hara hehelun, do? Taa. Ana tao basa hatahorir dadi reu Ndia mana toꞌu dedeꞌan, do? Taa. Ana tao basa hatahorir ralela ranori, do? Taa. Ana fee koasa neu basa hatahorir fo bisa tao tanda heran, do? Taa.  
\v 30 Ana fee koasa neu basa hatahorir fo rahai hatahori kamahedik, do? Taa. Ana tao basa hatahorir bisa kokolak pake dedeꞌak mata-matak kara, do? Taa. Ana tao basa hatahorir bisa rafada dedeꞌak kara raa sosoa-ndandaan, do? Taa.   
\p
\v 31 Ei muste mahani a ma nau simbok fo pake babanggi-babaꞌek fo nanalan lenak soa-neu hatahori noꞌuk kara.  
\p Leo mae talo naa, tehuu au bei nau atudu soa-neu ei eno-dalak neulaun lenak.   
\c 13  
\s1 Susue-lalaik tetebes  
\p
\v 1 Leo au bisa kokolak pake basa dedeꞌak mata-matak kara, hatahori dae-bafok dedeꞌan do, Manetualain atan numa nusa tetuk do inggu temak mai dedeꞌan do, tehuu au ta aena susue-lalaik faa boe na, ndia nanalan hata? Au kokolang naa, kada rouk, sama leo meko fo kada nalii dolo-dolo, do darom fo nalii nduka-nduka a mesan.  
\v 2 Leo au aena babanggi-babaꞌek ambarani kokolak fo afada Lamatuak hara hehelun no matetu-mandaik neu Ndia hatahorin, ma au bubuluk basa hata fo bei nemeninok, ma au alela basa hata fo hatahori malelak kara bubuluk, do mete ma au nemehereng neu Lamatuak matea, losa au bisa lali heni letek kara, tehuu au ta aena susue-lalaik faa boe na, ndia sosoan hata? Au tataong naa, ta naena sosoak hata-hata.\x + \xo 13:2 \xt Mateos 17:20; 21:21; Markus 11:23\x*  
\v 3 Mete ma au seꞌo heni basa au hata-hetong, boe ma baꞌe heni basa doin nara fo ahao hatahori mana toꞌa taak kara, do loo lima au ao-mbaang dadi neu tunu-hotuk,\f + \fr 13:3 \ft Hambu susura dedeꞌa Yunani ketuk surak tamba rae, “loo lima au ao-mbaang fo dadi tunu-hotu fo neni hotuk”.\f* tehuu au ta aena susue-lalaik faa boe na, ndia sosoan hata? Au oo ta bisa akadedemak aong boe. Naa kada hie-hie a mesan! Nanalan taa.   
\q2
\v 4 Huu susue-lalaik naa, neulauk.  
\q2 Susue-lalaik naa, dale naruk ta mana namanasa lai-laik.  
\q2 Susue-lalaik naa, ta mana horo mbalak.  
\q2 Susue-lalaik naa, ta mana nakadedema aok.  
\q2 Susue-lalaik naa, ta mana koa aok.   
\q2
\v 5 Susue-lalaik naa, bangganaꞌuk taa-taa.  
\q2 Susue-lalaik naa, ta nau mesa kana senggi.  
\q2 Susue-lalaik naa, ta namanasa raꞌu-raꞌu.  
\q2 Susue-lalaik naa, ta nambeda dalek.   
\q2
\v 6 Susue-lalaik naa, namahoko no hata fo ndoos,  
\q3 ma ta hii hata fo mbeu seserik.   
\q2
\v 7 Susue-lalaik naa, nabeꞌi lenggu-barak.  
\q2 Susue-lalaik naa, namahere nakandoo.  
\q2 Susue-lalaik naa, namahena nakandoo.  
\q2 Susue-lalaik naa, nakatataka nakandoo.   
\q2
\v 8 Susue-lalaik naa, ta nalela hahaek.  
\p Tehuu hata fo Manetualain mana toꞌu dedeꞌan nara rafada naa, doo-doo te ta parluu ena bali. Mete ma hatahori kokolak pake dedeꞌak mata-matak kara, doo-doo boe te ta parluu ena bali. Mete ma hata fo hatahori malelak kara bubuluk, doo-doo te ta hambu sosoan bali.  
\v 9 Hatematak ia, ita talela kada baꞌu anak ka. Mete ma ita dadi teu Manetualain mana toꞌu dedeꞌan, ita tafada kada hata fo bei ta matetu-mandaik.  
\v 10 Tehuu losa fain, neu ko basa-basan dadi matetu-mandaik. Faik naa, basa hata fo ta matetu-mandaik oo, ta raena sosoan bali boe.   
\p
\v 11 Haꞌi netuduk talo ia: neu au bei kadiꞌi ana, au kokolak sama leo kakana anar rasiꞌe kokolak. Au oo duduꞌa sama leo kakana ana rasiꞌe duduꞌak boe. Tehuu hatematak ia, au amoꞌo ena. Huu naa de au hihiru-heheong ta sama leo kakana ana bali.   
\p
\v 12 Netuduk laen bali: hatematak ia, ita bisa mete-tita faa, tehuu bei ta manggaledok sama leo mete pake titiro makalulutuk. Tehuu doo-doo, neu ko basa-basan dadi manggaledok. Ita mete-tita sama leo hambun tetar nai ita idu-matan. Hatematak ia, au alela kada baꞌu anak. Tehuu doo-doo, neu ko au bisa alela basa-basan, sama leo Manetualain nalela basa-basan laꞌe-neu au aong.   
\p
\v 13 Dadi hatematak ia, hambu dedeꞌak telu ndia ita muste tao tunggan takandoo. Ndia:  
\q2 ita muste tamahere takandoo neu Lamatuak;  
\q2 ita muste tamahena takandoo tae, neu ko Ana koladu basa-basan dadi malole;  
\q2 ma ita muste tasue-lai takandoo.  
\p Numa dedeꞌa kateluk kara iar mai, \it susue-lalaik\it*, ndia nenenin lenak. Huu susue-lalaik ndia lolen lena heni basa-basan.   
\c 14  
\s1 Manetualain Dula-dalen fee hatahorin nara, esa-esak no ndia uen  
\p
\v 1 Maote tebe-tebe fo masue-laik nai basa dedeꞌak kara. Ta hambu dedeꞌak laen nenenin lenak bali. Ma sangga dalak fo Manetualain Dula-dalen fee ei koasa ma babanggi-babaꞌek fo ei bisa tao hata fo neulauk kara. Ma lolen ndia, mete ma ei hambu babanggi-babaꞌek fo mafada Manetualain hara hehelun.  
\v 2 Mete ma hatahori hambu babanggi-babaꞌek numa Manetualain Dula-dalen koasan mai fo bisa kokolak pake dedeꞌak laen, de nafada dedeꞌak bei ta manggaledok. Ana ta kokolak no hatahori laen, tehuu ana kokolak no kada Manetualain mesa kana. Ta hambu hatahorir fo mana rakabua rai naa, ndia ralela hatahori naa kokolan.  
\v 3 Tehuu mete ma hatahori naena babanggi-babaꞌek fo nafada Manetualain hara hehelun naa, na, ana fee hara heheluk neu basa hatahorir marai naar. Ana fofoꞌa hatahorir nemeheheren nara reu Manetualain, natetea dalen nara, ma kokoe-nanasi hatahori mana susa-sonak kara.  
\v 4 Hatahori fo mana kokolak pake dedeꞌak laen, ana natetea kada ndia ao heli-helin. Tehuu hatahori fo mana kokolak nafada Manetualain hara hehelun naa, ana natetea basa hatahorir fo mana rakabuak, fo saranik katematuan boe ratea lenak bali.   
\p
\v 5 Au hihiing fo ei basa ngga bisa kokolak pake dedeꞌak laen. Tehuu au hihiing lenak fo ei bisa kokolak mafada Manetualain hara hehelun. Huu hatahori fo mana kokolak nafada Manetualain hara hehelun naa, sosoan lenak numa hatahori fo kada kokolak pake dedeꞌak laen mai. Mete ma kokolak pake dedeꞌak laen, naa oo malole boe, sadi hambu hatahori mana bisa nafada dedeꞌak naa sosoa-ndandaan. No dalak naa, hara heheluk naa bisa tao natetea lenak basa hatahorir marai saranik dale, fo ara bisa ralela.   
\p
\v 6 Toranoo susue nggara ein! Duduꞌa sudik dedeꞌak ia. Leo au mai nai ei, boe ma au kokolak pake dedeꞌak fo ei ta malela sana, na, ei hambu nanalan hata? Ta hambu, hetu? Tehuu mete ma au kokolak soa-neu ei, malole lenak mete ma au afada Manetualain hihii-nanaun. Malole lenak au buka dedeꞌak fo fai bakahulun bei ta manggaledok. Malole lenak au tulun ei fo bubuluk dedeꞌak no neulaun lenak bali. Malole lenak au fee nesenedak laꞌe-neu Manetualain Dedeꞌa-kokolan. Malole lenak au anori ei. Naa, dei fo naena sosoak soa-neu ei, hetu?   
\p
\v 7 Leo naak oo no bua kaliik kara boe. Sira ta horis, tehuu ara tao liik mata-matak kara. Pake suling do, sasandu do, nggitar do, mete ma ndia not ta nggatin, neu ko hatahori ta bisa bubuluk ana nakaminak sosodak bee, hetu?  
\v 8 Mete ma toꞌik liin ta nambaree, talo bee fo soldadur bisa bubuluk ana fee tanda fo rahehere reu ratati? Ta bisa, hetu?  
\v 9 Leo naak oo soa-neu ei boe. Mete ma ei kokolak pake dedeꞌak laen do pake dedeꞌak fo hatahori ta bisa ralela no manggaledok, naa sama leo kada ei kokolak mia anin. Kada hie-hie a mesan, huu hatahorir ta bisa humu rala o dedeꞌa-kokolam sosoa-ndandaan!  
\v 10 Hambu dedeꞌak mata-matak noꞌuk ka nai dae-bafok ia. Dedeꞌak esa-esak no ndia sosoa-ndandaa heli-helin.  
\v 11 Tehuu mete ma au ta bubuluk hatahori laen dedeꞌan, naa ta naena sosoa-ndandaak hata-hata soa-neu au. Au ta alela sira, ma sira oo ta ralela au boe. Ai esa no esa, dadi neu hatahori feꞌek.   
\p
\v 12 Leo naak oo neu ei boe. Ei nau hambu koasa ma babanggi-babaꞌek numa Manetualain mai. Naa malole. Tehuu lolen lenak, ei maote tebe-tebe fo hambu koasa ma babanggi-babaꞌek fo ei bisa paken tulu-fali tao matetea hatahori kamaherek noꞌuk kara!   
\p
\v 13 Dadi hatahori fo mana kokolak pake dedeꞌak laen, malole lenak ana hule-haradoi noke fo Manetualain oo feen babanggi-babaꞌek, mita fo bisa nafada dedeꞌak laen naa sosoa-ndandaan boe.  
\v 14 Mete ma au hule-haradoi pake dedeꞌak laen, au hule-haradoi pake au daleng, tehuu au ta alela au kokolak hata.  
\v 15 Dadi lolen ndia, au tao talo bee? Au pake dua sara, tehuu esa-esak no ndia fain. Au nau hule-haradoi pake dedeꞌak laen fo Manetualain Dula-dalen feen nai au daleng. Ma au oo nau hule-haradoi pake dedeꞌa deꞌek fo au alelan boe. Au nau soda sosodak kokoa-kikiok neu Manetualain pake dedeꞌak laen fo Manetualain Dula-dalen feen nai au daleng. Ma au oo bisa soda pake dedeꞌa deꞌek fo au alelan boe.  
\v 16 Mete ma o soꞌuk kokoa-kikiok no tebe-tebe neu Manetualain pake dedeꞌak laen, ma hambu hatahori numa naa, tehuu ta nalela dedeꞌak kara raa, talo bee fo ana bisa dalek esa no o? Neu o moke makasi neu Manetualain pake dedeꞌak laen, talo bee de ana bisa nakaheik neu o nae, “Tebe, naa!” Ta bisa, hetu? Huu ana ta nalela o dedeꞌa-kokolam naa sosoa-ndandaan.  
\v 17 O moke makasi neu Lamatuak talo naa oo bisa a mesan boe, tehuu naa ta tao natea hatahori laen dalen.   
\p
\v 18 Au oke makasi neu Manetualain, nahuu Ana tao nala au bisa kokolak pake dedeꞌak laen lena heni numa ei basa ngga mai.  
\v 19 Tehuu mete ma hatahori kamaherek rakabua, malole lenak au kokolak do anori sara pake kada dedeꞌa deꞌe kekeꞌuk limak ka, fo ara bisa ralela, lena heni au kokolak do anori sara pake dedeꞌa deꞌek rifu-rifuk kara numa dedeꞌak laen mai, fo ara ta ralela sara.   
\p
\v 20 Toranoo susue nggara ein! Mete ma ei nau soba malela dedeꞌak, na, ei muste manori duduꞌa sama leo hatahori manggalalasin. Boso duduꞌa sama leo kakana anar! Tehuu no dedeꞌa manggarauk, ei muste sama leo kakana anar, ta mana bubuluk tao dedeꞌa manggarauk kara, huu dalen nara lolo-laok.  
\v 21 Nai Manetualain Susura Malalaon neni surak nae:  
\q1 “Ita Lamatuan kokolak nae,  
\q2 ‘Au nau pake hatahori mana kokolak pake dedeꞌak laen nara,  
\q3 fo Au kokolak fee hatahori nusak Israꞌel iar.  
\q1 Tehuu leo mae Au kokolak talo bee oo,  
\q2 ara ta nau nenene Au boe.’ ”\x + \xo 14:21 \xt Yesaya 28:11-12\x*   
\p
\v 22 Dadi ei mete-mita, mete ma hatahori kokolak pake dedeꞌak laen, naa dadi tanda soa-neu hatahorir bei ta ramahere neu Manetualain fo ara mete-rita Ndia koasan. Naa, ta tulun hatahorir fo mana ramahere neu Manetualain ena. Tehuu mete ma hatahori kokolak nafada Manetualain hara hehelun, naa tulun hatahori fo mana namahere neu Manetualain ena. Naa, ta tulun hatahori fo bei ta namahere neu Ndia.  
\v 23 Leo ei basa ngga makabubua, boe ma ei basa ngga kokolak pake esa-esak dedeꞌan, basa de hambu hatahorir ta ramahere do hatahori ta bubuluk dedeꞌak kara iar, maso rai ei taladam, neu ko ara duduꞌa rae leo bee? Neu ko ara rae, “Hatahorir marai iar, ramulu ia ena, ee!”   
\p
\v 24 Ma leo ei basa ngga makokola aok mafada Manetualain hara hehelun, boe ma hambu hatahori ta kamaherek, do hatahori ta mana nalela dedeꞌak kara iar, maso nai ei taladam. Neu ko hatahori naa nau nenene hata fo ei kokolak. Dadi hata fo ei kokolak naa, natudu ndia sala-singgon nara, losa ana nau parisa no lutuk ndia leleo-lalaꞌo heli-helin.  
\v 25 Boe ma basa dedeꞌa manggarauk fo ana nafunin nai ndia dalen, neu ko neni bukak, fo basa hatahorir bubuluk. Basa boe ma hatahori naa neu ko sendek luu-langgan fo nakaluku-nakatele neu Manetualain nae, “Awii! Manggaledok ena, Manetualain nai ei taladam!”   
\s1 Basa hata fo ita taok, na, taon tungga ndoon. Boso mamue-anggik  
\p
\v 26 Dadi toranoo susue nggara ein! Mete ma ei makabua, hatahori esa-esak no ndia babanggi-babaꞌen. Hambu mana soda sosoda kokoa-kikiok neu Manetualain. Hambu mana manori hatahori laꞌe-neu Manetualain. Hambu mana mafada dedeꞌak numa Manetualain mai, fo bakahulun bei nefunik. Hambu mana kokolak pake dedeꞌak laen. Ma hambu mana bisa nafada dedeꞌak laen naa sosoa-ndandaan. Basa dedeꞌak bebeik kara raa, ara muste tao sara fo ratetea hatahori laen nara nemeheheren.   
\p
\v 27 Mete ma hambu mana hii kokolak pake dedeꞌak laen, naa malole. Tehuu elan fo kada hatahori dua do telu, dai ena. Hae noꞌu-noꞌu. Esa kokolak basa, dei fo esa kokolak bali. Ma muste hambu hatahori mana bisa nafada sira dedeꞌan sosoa-ndandaan.  
\v 28 Leo mete ma ta hambu hatahori fo mana bisa nafada dedeꞌak naa sosoa-ndandaan, na, hae kokolak pake dedeꞌak laen nai hatahori noꞌuk kara matan. Naa fo ara kokolak talo naa nai kada sira mesa kasa dalen. Ara oo bisa kokolak ro Manetualain talo naa boe.   
\p
\v 29 Mete ma ei makabua, elan fo kada hatahori dua do telu, ndia rafada Manetualain hara hehelun. Laen nara muste timba-tai ratalolole sira kokolan naa.  
\v 30 Tehuu leo Manetualain buka fee nelelak neu dedeꞌak esa fo bakahulun bei ta manggaledok, soa-neu hatahori esa fo nanggatuuk nenene numa naa, na, hatahori naa muste nafada hara heheluk naa, neu basa hatahorir maruma naa. Ma hatahori mana kokolak manai mata muste hahae fo fee lelak neu hatahori mana bei fo nenene numa Manetualain mai naa, fo ana kokolak.  
\v 31 Ndondoon ndia, ei basa ngga bisa mafada Manetualain hara hehelun. Tehuu elan fo hatahori esak ka kokolak dei, basa dei fo ndia nonoon. No dalak naa, basa hatahorir bisa nenene, basa-basan bisa ranori, ma basa-basan bisa rameda sira dalen nara boe ratea.  
\v 32 Masaneda te, hatahori fo mana kokolak nafada Manetualain hara hehelun oo muste nalela koladu ndia ao heli-helin boe. Esa bisa nahani esa, ma laen nara bisa rakatataka rala aon nara dei.  
\v 33 Huu ta hambu nemue-anggik nai Manetualain. Basa-basan neni heti-totodok no kada lino-lendek.  
\p Nai bee a mesan, mete ma hatahori kamaherek rakabua siꞌen talo ia:  
\v 34 Inak kara muste ranggatuuk matu-matu. Boso ako bafan nara. Ara muste nenene neu malanggan nara. Huu Manetualain Hohoro-lalanen oo surak talo naa boe, hetu?  
\v 35 Mete ma hambu hatahori fo nau natane dedeꞌak esa, na, elan nahani ana fali uma mai dei, dei fo natane kada ndia sao toun. Huu mete ma inak kara ramue nai uma huhule-haradoik dale, na, naa tao kada nekemamaek!   
\p
\v 36 Ei duduꞌam talo bee!? Manetualain Dedeꞌa-kokolan ta numa ei mai! Ma Ndia Dedeꞌa-kokolan ta fee kada ei mesa ngga marai kota Korentus! Duꞌa matalolole dei!  
\v 37 Mete ma hambu hatahori tao aon nae, ana bisa nafada Manetualain hara hehelun, do, duꞌa nae ndia simbo koasa numa Manetualain Dula-dalen mai, na, mesa kana ndia nakaheik nae, dedeꞌak naa, fo au surak fee ei naa, ta hohoro-lalanek numa au mai, tehuu parenda naa numa ita Lamatuan, Yesus mai.  
\v 38 Mete ma hambu hatahori ta nau simbok dedeꞌak bebeik kara iar, na, ei boso simbok kana.   
\p
\v 39 Toranoo susue nggara ein! Maote tebe-tebe fo ei hambu koasa fo bisa kokolak mafada Manetualain hara hehelun. Ma boso kaꞌi hatahorir mae, ara ta bole kokolak pake dedeꞌak laen.  
\v 40 Dadi mete ma ei makabua, na, makalalaꞌok basa-basan no tetebes, tungga hata fo mandaak. Dedeꞌak esa basa dei, dei fo laen tungga. Makalalaꞌok basa-basan no malole. Boso mamue-anggik.   
\c 15  
\s1 Karistus nasoda fali numa mamaten mai ena  
\p
\v 1 Toranoo susue nggara ein! Au nau fo ei masaneda Manetualain Hara Lii Malolen, fo au afada neu ei numa fai bakahulun mai ena. Ei simbo malan, boe ma ei makatataka tungga makandoo Hara Liik naa.  
\v 2 Hara Liik naa, ndia bisa neni masoi-masodak soa-neu ei, sadi ei toꞌu mahere makandoo neun. Tehuu mete ma ei ta mamahere makandoo neu Manetualain, na, ei nemeheherem naa, kada hie-hie a mesan.   
\p
\v 3 Au oo anori ei dedeꞌak kara fo nenenin lenak ena boe, fo fai bakahulun hatahori ranori ritan neu au ena. Ndia: Karistus fo Manetualain nadenun mai naa ena, maten ena fo tao nasoi-nasoda ita numa ita sala-singgon nara mai, ndaa tetar no Manetualain Susura Malalaon surak numa lele uluk mai.\x + \xo 15:3 \xt Yesaya 53:5-12\x*  
\v 4 Boe ma ratoin. Basa de, bei-nesan Manetualain nasoda falik kana numa mamates mai, ndaa tetar no Manetualain Susura Malalaon surak memak kana numa lele uluk mai.\x + \xo 15:4 \xt Sosoda Kokoa-kikiok kara 16:8-10; Mateos 12:40; Nedenuk kara Tutuin 2:24-32\x*  
\v 5 Basa boe ma Karistus natudu aon neu Petrus.\f + \fr 15:5 \ft Susura Malalaok dedeꞌa Yunani surak nae, “Kefas”. Kefas naa, Petrus naden laen.\f* Ana oo natudu aon neu Ndia ana nuni kasalahunu duan nara boe.\x + \xo 15:5 \xt Mateos 28:16-17; Markus 16:14; Lukas 24:34, 36; Yohanis 20:19\x*  
\v 6 Basa de laꞌe esa, Ana oo natudu aon neu hatahori kamaherek natun lima lenak numa mamanak esa boe. Basa sara mete-ritan. Numa sira raa mai, noꞌuk ka bei ta mate. Kada baꞌu anak ka mate sara ena.  
\v 7 Boe ma Ana natudu aon neu kaꞌa Yakobis. Basa de Ana natudu aon neu basa Ndia nedenun nara lalaꞌen.   
\p
\v 8 Au ndia bakahitok mateꞌen oo mete-itan boe. Au sama leo ana muri anak fo neni bonggik tungga dea mateꞌen.\x + \xo 15:8 \xt Nedenuk kara Tutuin 9:3-6\x*  
\v 9 Lamatuak nedenu laen nara, basa sara nenenin lenak numa au mai. Mete ma tungga ndoon, na, au ta andaa dadi neu Ndia nedenun. Fai bakahulun, au ndia tao doidoso ma hese-laka Lamatuak hatahorin nara rai bee a mesan.\x + \xo 15:9 \xt Nedenuk kara Tutuin 8:3\x*  
\v 10 Tehuu Manetualain natudu Ndia dale susuen neu au. De Ana ndia tao au dadi leo hatematak ia. Ana ta piru-nggari heni Ndia susuen no hie-hie, neu Ana tao dedeꞌa malole soa-neu au. Mateꞌen au ndia aote tebe-tebe lena heni basa sara! Naa te au ta ndia aue-osa, tehuu Manetualain dale susuen ndia naue-osa nai au leleo-lalaꞌong.   
\p
\v 11 Dadi nenenin taa mete ma au ndia fee nenorik, do nedenuk laen ndia fee nenorik. Huu ai basa ngga fee nenorik laꞌe-neu dedeꞌak sama. Ai mafada hatahorir laꞌe-neu Manetualain Hara Lii Malolen nakandoo. Huu naa de ei dadi mamahere neu Hara Liik fo bei sama naa.   
\s1 Hatahori mana matek, neu ko nasoda fali numa mamaten mai  
\p
\v 12 Ai masiꞌe manori hatahorir mae, Karistus fo Manetualain nadenun mai naa ena, nasoda fali numa Ndia mamaten mai ena. Dadi tao hata de ei ketuk mae, “Hatahori mana matek kara ta rasoda fali ruma mamaten nara mai”? Ndia oka-huun hata?  
\v 13 Leo hatahori mates ta nasoda fali numa mamaten mai, ndia sosoa-ndandaan nae, Karistus oo ta nasoda fali numa mamaten mai boe!  
\v 14 Mete ma Karistus ta nasoda fali numa mamaten mai, basa hata fo ai masiꞌe mafada hatahorir, sosoan taa. Ma ei nemeheherem neu Ndia, kada hie-hie a mesan!  
\v 15-16 Mete ma tetebes hatahori mates ta nasoda fali numa mamaten mai, ai oo dadi sakasii kokola bafa rouk laꞌe-neu Manetualain boe. Huu ai masiꞌe manori hatahorir mae, “Manetualain ndia tao nasoda falik Karistus numa mamaten mai!” Memak, ai mafada talo naa. Tehuu leo hatahori mates ta nasoda fali numa mamaten mai, ndia sosoa-ndandaan nae, Manetualain ta tao nasoda falik nita Karistus.  
\v 17 Duꞌa sudik dedeꞌak ia: Mete ma Karistus ta nasoda fali numa mamaten mai, na, ei nemeheherem neu Manetualain kada hie-hie a mesan! Huu ei bei lemba-masaa ei sala-singgom mara!  
\v 18 Ta kada naa mesa kana, huu basa hatahorir mana matek kara ena, fo bakahulun rakaesa ro Karistus, mete ma Karistus ta nasoda fali nita numa mamaten mai, na, sira oo mate ma lenggo feꞌe numa Manetualain mai boe.  
\v 19 Ita tasarai teu Karistus tae, neu ko Ana nau tao hata malole soa-neu ita. Tehuu mete ma ita nemehehenan talo naa, dadi nai kada dae-bafok ia, na, naa kada hie-hie a mesan! Ma ita dadi teu hatahori kasian sudi selik kana numa basa-basan mai!   
\s1 Hata ndia neu ko ana dadi, nahuu Karistus nasoda fali numa mamaten mai?  
\p
\v 20 Naa te ta talo naa, hetu? Ndondoon ndia: Karistus fo Manetualain nadenun mai naa ena, Ana nasoda fali numa mamaten mai ena! Ma ta kada Ndia mesa kana, te neu ko hatahori kamaherek mana matek kara ena oo, rasoda fali boe. Karistus sama leo mbule uluk makasososak fo natudu nae, hatahori mates neu ko nasoda fali numa mamaten mai tungga Ndia.  
\v 21 Lele uluk kada hatahori esak ka, ndia Adam, nalena-langga Manetualain parendan. Dadi ndia huku-dokin, ndia mamates. Huku-dokik naa oo tuda laꞌe-ndaa basa ita hatahori dae-bafok boe. Tehuu hatematak ia, hambu hatahori esa bali, ndia Karistus, fo mana nasoda tungga Lamatuak parendan. Dadi hatahori mates bisa nasoda fali numa mamaten mai, nahuu Ndia malolen!  
\v 22 Basa hatahorir fo mana lena-langga Lamatuak parendan oo, hambu hukun mates, sama leo Adam boe. Leo naak oo, basa hatahorir fo mana rakaesa ro Karistus, neu ko Manetualain tao nasoda falik kasa ruma mamates mai boe.   
\p
\v 23 Tehuu esa-esak no ndia fain. Karistus dadi neu hatahori makasososak fo mana nasoda fali numa mamates mai, sama leo mbule uluk makasososak bebeik kara naa. Ma neu ko, mete ma Ana fali mai nai dae-bafok ia ena, dei fo Ndia hatahorin nara oo rasoda fali numa mamates mai boe.  
\v 24 Basa naa, dei fo dae-bafok fai mateꞌen losa. Faik naa, Karistus dadi Manek fo nakalulutu basa koasar, basa parendar, ma basa malelak fo mana musuk ro Lamatuak. Ana oo, dadi Manek fo mana loo lima falik Ndia haak parendan neu Manetualain boe, Ndia Aman.   
\p
\v 25 Ana muste toꞌu parenda nakandoo, losa Manetualain nasenggi basa mana laban Karistus fo ara doꞌor mbalin.\x + \xo 15:25 \xt Sosoda Kokoa-kikiok kara 110:1\x*  
\v 26 Hambu dedeꞌak esa bali mana musu no ita hatahori dae-bafok. Ndia, ita muste mate. Tehuu mateꞌen, Manetualain oo nau nasenggi mamates koasan boe. Ana tao basa talo naa, boe ma ta hambu hatahori fo mate bali.  
\v 27 Nai Manetualain Susura Malalaon neni surak nae, “Manetualain tao basa neni senggik kara fo doꞌor neu Hatahori fo Ana helu-bartaa nae nadenun mai naa.” Neu ana surak nae, “Basa neni senggik kara fo doꞌor neu Ndia Hatahorin”, manggaledok ena nae, Manetualain ta maso nai naa. Huu Manetualain mesa kana ndia soꞌuk kana fo dadi Lamatuak soa-neu basa-basan.\x + \xo 15:27 \xt Sosoda Kokoa-kikiok kara 8:6\x*  
\v 28 Dei fo neu basa-basan namanene tebe-tebe neu Manetualain Anan, neu ko Anak naa ndia loo lima falik basa-basan neu Ndia Aman, mana soꞌuk Ndia dadi neu basa sara Lamatuan ena. Basa boe ma Manetualain toꞌu parenda nakandoo nai basa dedeꞌak kara, soa-neu basa hatahorir.   
\s1 Leo hatahori mates ta nasoda fali numa mamaten mai  
\p
\v 29 Hambu hatahori fo nau sarani, nggati hatahori mates fo bei ta sarani. Tehuu mete ma hatahori mates ta nasoda fali numa mamaten mai, tao hata de ara nau sarani soa-neu hatahori mates?\f + \fr 15:29 \ft Lalanek ia bei ta manggaledok. Dala-hadak leo “hambu sarani fo nggati hatahori mates” ta hambu nai lalanek laen nai ndule buku \ft \+it Manetualain Hehelu-bartaa Beun katematuan\+it*.\f*  
\v 30 Mete ma hatahori mates ta nasoda fali numa mamaten mai, neu ko ai mamataꞌu mate. Naa te ta leo naak.  
\v 31 Tungga faik, au kada ae mate! Toranoo susue nggara ein! Au sumba-soo, au ameda ta hata-hata leo au mate. Au bisa botik au matang, nahuu ei makaesa makandoo mia ita Lamatuan Yesus Karistus, fo Manetualain nadenun mai ena.  
\v 32 Fai maneuk kara, neu au bei nai kota Epesus, au kada aruꞌi-raꞌuk ua hatahorir raa, mana sama leo banda fui manggarauk. Tehuu mete ma au kada ahuur fo bisa senggi soa-neu ao heli-heling, ta soa-neu Lamatuak, naa kada hie-hie a mesan. Nanalan taa! Mete ma tebe-tebe hatahori mates ta nasoda fali numa mamaten mai, malole lenak ita tungga-tungga kada hatahorir kokolan nara leo rae,  
\q1 “Mai fo ita feta rame-rame,  
\q2 ma taꞌa-tinu malada-malada leo,  
\q3 te beꞌe-mai ita mate ena!”\x + \xo 15:32 \xt Yesaya 22:13\x*   
\p
\v 33 Ei boso hambu kedi-irak fo tungga duꞌa talo naa! Masanenedak! Hambu dedeꞌa-kokolak nae,  
\q1 “Mete ma o eik esa mua hatahori manggarauk,  
\q2 naa tao nala o sio laꞌo numa eno-dala ndoos mai.”   
\p
\v 34 Boso tao manggarauk bali! Hahae leo! Koladu o ao heli-helim! Duꞌa matalolole fo tao kada ndoos leo! Ndondoon ndia, ei muste mameda mae, huu nai ei taladam mara, bei hambu hatahori fo bei ta nalela Manetualain.   
\s1 Mete ma ita tasoda fali numa mamates mai, na, ita ao-inan dadi talo bee?  
\p
\v 35 Hambu ketuk ratane, “Dalan talo bee de hatahori mates bisa nasoda fali? Ma sira ao-inan dadi talo bee?”   
\p
\v 36 Nggoa bebek, ee! Mete ma sele-tande bini-nggees, na, bini-nggees naa muste nakalulutu nai dae dale, dei fo ana bisa mori ma nanumbu.  
\v 37 Ma bini-nggees fo ita sele-tandek, mata-aon ta sama leo mana manumbuk ma nadoo. Ndia kada bini-nggees kamatuuk, matak leo nggandum do, hade do, bini-nggees laen.  
\v 38 Esa-esak tungga ndia mata-aon, tungga Manetualain hihii-nanaun. Huu Ana ndia naketu sele-tandek esa-esak mata-aon.   
\p
\v 39 Banda-manur ma hatahori dae-bafok oo leo naak boe. Esa-esak no ndia mata-aon, tungga Manetualain hihii-nanaun. Hatahori dae-bafok ao-inan, tungga hatahori dae-bafok mata-aon. Banda-manur ao-inan nara, esa-esak no ndia mata-aon. Mbuik no ndia enan. Iꞌak no ndia enan. Laen bali no ndia enan.   
\p
\v 40 Hambu buas nai lalai, ma hambu buas nai dae-inak. Manai lalai, hambu sira ta hohoꞌan. Tehuu ta hohoꞌan naa, laen numa marai dae-inak mai. Manai dae-inak oo, hambu sira ta hohoꞌan boe. Tehuu ta hohoꞌan naa, laen numa marai lalai mai.  
\v 41 Nai lalai, ledo ta hohoꞌan laen; bulan ta hohoꞌan laen; ma nduuk kara oo, ta hohoꞌan nara laen boe. Esa-esak no ndia mata-aon. Esa-esak no ndia ta hohoꞌan. Dadi basan ta hohoꞌak kara, hetu?   
\p
\v 42 Mete ma hatahori mates nasoda fali, naa sama leo bini-nggees bebeik kara raa. Mete ma ratoi hatahori mates ena, na, ao-mbaa mamaten nakalulutu henin ena, hetu? Tehuu mete ma ana nasoda fali numa mamaten mai, ana ta sama leo bakahulun bali ena huu ana ta bisa mate bali.  
\v 43 Neu ita tatoi hatahori mates, ita tameda mamates naa manggenggeok. Tehuu mete ma hatahori naa nasoda fali ena, na, ana sudi selik kana! Huu ana dadi lolo-laok! Hatahori mates ta bisa tao hata-hata neu hatahorir ratoin. Tehuu neu lelek nasoda fali, ana dadi barakaik nalan seli!  
\v 44 Mete ma hatahori bei leo-laꞌo, ana kada bisa duduꞌa ma nameda a, hetu? Tehuu neu ana mate fo nasoda fali, Manetualain Dula-dalen feen masodak tetebes. Ma ana ta sama leo bakahulun ena bali.   
\p
\v 45 Hatahori dae-bafok makasososak fo sama leo ita, ndia Adam. Tungga Manetualain Susura Malalaon, hambu neni surak nae, “ana dadi hatahori dae-bafok mana masodak, mana nalela kada duduꞌa ma nameda.” Tehuu hatahori dae-bafok fo mata-aon leo Adam manai lain mateꞌen naa, ndia Karistus. Ndia Dula-dalen ndia bisa fee hatahori nasoda tetebes.\x + \xo 15:45 \xt Tutui Makasososak 2:7\x*  
\v 46 Makasososak naa, ndia hatahori mana nalela kada duduꞌa ma nameda a, boe ma ana bisa mate. Tehuu mana masoda falik naa, ndia hatahori mana hambu masodak tetebes numa Manetualain Dula-dalen mai.  
\v 47 Hatahori dae-bafok makasososak nai dae-inak naa, neni aduk numa dae isik mai. Tehuu mata-aok kaduak naa, ndia Karistus, manuma lalai mai.  
\v 48 Ita fo mana leo-laꞌo nai dae-inak ia, mata-aok sama leo hatahori dae-bafok makasososak, fo Manetualain adun numa dae isik mai. Tehuu hatahori fo mana nakaesa no Manetualain nai lalai, mata-aon sama leo Karistus manuma lalai mai.  
\v 49 Ita hatematak ia, mata-aon sama leo Adam fo Manetualain adun numa dae isik mai. Tehuu doo-doo boe ma ita nggati mata-ao beuk, fo sama leo Karistus manuma lalai mai.   
\p
\v 50 Toranoo susue nggara ein! Au ae afada neu ei, talo ia: ita fo mana dadi hatahori dae-bafok mata-ao makasososak, ita ao-inan numa daak ma duik mai. Dadi ita ta bisa simbo ita pusakan fo dadi teu Manetualain anan nai nusa tetuk do inggu temak. Ta bisa! Ita, hatahori dae-bafok mata-aok leo naak, neu ko ita ao-mbaan noe henin, de ita ta bisa simbo hata fo nakatataka nakandoo.   
\p
\v 51 Dadi nenene matalolole! Au nau buka fee ei dedeꞌa nemeninok esa. Neu ko hambu hatahori kamaherek ketuk ta mate. Tehuu ita basa ngga neu ko nggati mata-ao beuk.  
\v 52 Neu toꞌik nalii bakahiton laꞌe esak kana, basa iar dadi no kada kaiboik. Nggafan lena heni o hate matam. Neu toꞌik nalii, faik naa oo hatahori mates sara rasoda fali ruma mamaten nara mai boe. Mete ma ara rasoda fali ena, ara ta mate seluk bali, ma ta rakalulutu seluk. Leo naak oo soa-neu ita boe. Ita basa ngga dadi mata-ao beuk.\x + \xo 15:52 \xt 1 Tesalonika 4:15-17\x*  
\v 53-54 Ita ao-mbaan hatematak ia bisa nakalulutu, nae nasafali dadi mata-ao beuk fo ta bisa nakalulutu bali! Ma ita fo hatematak ia bisa mate, nae nasafali dadi mata-aok fo ta bisa mate bali! Naa, tao tungga hata fo neni surak memak kana nai Susura Malalaok nae,  
\q1 “Lamatuak nakalulutu mamates koasan ena,  
\q2 ma nasenggin ena!  
\q1 Huu naa de ita ta mate ena bali.”\x + \xo 15:53-54 \xt Yesaya 25:8\x*   
\q1
\v 55 “Hee, Mamates!  
\q2 O nesenggim nai bee?  
\q1 Hee, Mamates!  
\q2 O koasa nekenisam nai bee bali?”\x + \xo 15:55 \xt Hosea 13:14\x*   
\p
\v 56 Tao hata de mamates neni nemeda hedis soa-neu ita hatahori dae-bafok? Naa dadi, nahuu ita tao salak. Ndian ena! Tao hata de ita sala-singgon nara raena koasa talo naa? Naa dadi, nahuu Manetualain Hohoro-lalanen natudu nae, ita sala-singgon nara ralena-langga Ndia Parendan. Ndian ena!  
\v 57 Tehuu hatematak ia basa-basan dadi laen ena! De ita basa ngga toke makasi noꞌun seli neu Manetualain. Huu Ana tao nala ita bisa tasenggi dedeꞌa manggarauk kara, tesik ita Lamatuan Yesus Karistus tataon. Ma Karistus ndia mana senggi tetebes!   
\p
\v 58 Dadi toranoo susue nggara ein! Makatataka mahere! Boso matanggenggo! Ei ue-osam soa-neu Lamatuak muste tamba neulau ma tamba namanoꞌu. Huu ei bubuluk ena mae, ei maue-osa fafandek lima-eim soa-neu ita Lamatuan naa, ta hie-hie.   
\c 16  
\s1 Doik fo hatahorir feek kara fo doi-sou neu Lamatuak hatahorin nara  
\p
\v 1 Hatematak ia au ae surak laꞌe-neu doik naa, fo ei maduduru malak ena, fo doi-sou neu Lamatuak hatahorin nara marai Yerusalem. Au afada hatahori kamaherek kara marai profensi Galatia ena fo ara muste raduduru doik naa. Hatematak ia ei oo muste tao tungga talo naa boe.\x + \xo 16:1 \xt Roma 15:25-26\x*  
\v 2 Tungga-tungga fai menggu, basa hatahorir muste mbeda sira doin baꞌu anak numa sira mbuse titin mai. Boso mahani au mamaing, dei fo ei mulai maote maduduru doik.  
\v 3 Mete ma au mai ena, na, matudu ei hatahorim mara fo ei mamaheren, fo reni doi doi-souk naa, fee Lamatuak hatahorin nara marai Yerusalem. Basa naa, dei fo au surak susurak fo akalelelak kasa reu malangga saranik manai naa.  
\v 4 Mete ma ei duꞌa mae, malole mete ma au oo tungga boe, na, ai bisa miu sama-sama.   
\s1 Paulus ator nanaen fo nae neni mamanak noꞌuk ka neu  
\p
\v 5 Mete ma au laꞌok ndule profensi Makedonia lena, dei fo au uni ei neti. Tehuu au bei nau uni Makedonia uu dei.\x + \xo 16:5 \xt Nedenuk kara Tutuin 19:21\x*  
\v 6 Basa naa, dei fo au nau leo taak ua ei dook ka faa; fama te losa fai makasufuk katemak esa. Basa boe ma ei bisa mia au losa mamanak esa bali.  
\v 7 Au nanaeng uni ei neti, ta kada fai kekeꞌuk ka. Au nau leo ua ei dook ka faa, mete ma naa tungga Lamatuak hihii-nanaun.  
\v 8 Tehuu au bei nau leo nai kota Epesus ia losa fai malole Pentakosta, [fo ndia faik lima hulu numa basa fai malole Paska mai.]\x + \xo 16:8 \xt Malangga Anggamar Hohoro-lalanen 23:15-21; Tui Seluk laꞌe-neu Dala Masodak 16:9-11\x*  
\v 9 Leo mae hambu hatahori noꞌuk ka laban Lamatuak ue-osan, tehuu au bei bisa aue-osa noꞌuk ka, nahuu nai ia bei hambu lelak neulaun seli.\x + \xo 16:9 \xt Nedenuk kara Tutuin 19:8-10\x*   
\p
\v 10 Mete ma Timotius dadi neni ei neti, simbok malan no malole, fo ana hae duduꞌa hata-hata. Huu ndia ia, ita Lamatuan hatahori mana maue-osan, sama leo au.\x + \xo 16:10 \xt 1 Korentus 4:17\x*  
\v 11 Boso elan fo hatahori meten no kada puik kana. Tulun neun, losa ana fali no masodak, fo ana bisa fali neni au mai. Huu au ma toranook laen nara, mahanin.   
\p
\v 12 Hambu dedeꞌak esa bali. Au kokoe ita toranoon Apolos ena fo ana neti tiro ei ma toranook laen nara. Tehuu ana bei ta nau neti hatematak ia. Kada mahani a leo, mete ma ana hambu fai lelak, dei fo ana neti.   
\s1 Tao dedeꞌak esa bali  
\p
\v 13 Ei muste manea aom matalolole! Ei muste makatataka fo mamahere makandoo neu Lamatuak! Boso mamataꞌu! Tao matea aom!  
\v 14 Ei tao hata a mesan, na, natudu dedeꞌak esa ndia susue-lalaik.   
\p
\v 15 Toranoo susue nggara ein! Ei basa ngga bubuluk mae, kaꞌa Stefanus no ndia uma isin dadi reu hatahori makasososak fo mana ramahere neu Karistus nai profensi Akaya naa. Ara raue-osa fafandek lima-ein nara fo raono-lalau basa hatahori kamaherek kara marai naa. Dadi au oke fo\x + \xo 16:15 \xt 1 Korentus 1:16\x*  
\v 16 ei mamanene neu sara ma neu hatahori matak leo naak kara. Ndia, hatahorir fo mana raue-osa no bebeꞌi barakaik fo sama-sama raono-lalau hatahori kamaherek kara.   
\p
\v 17 Au hii alan seli nau mete-ita ei. Au daleng mbena sau-sau, huu kaꞌa Stefanus, kaꞌa Fortunatus, ma kaꞌa Akaikus, ara mai rai ia. No dalak naa, ara nggati ei.  
\v 18 Ara ratetea au daleng, sama leo ara oo ratetea ei dalem boe. Ei muste fee hada-horomatak neu hatahori matak leo naak kara.   
\s1 Paulus haitua hara masodak soa-neu basa sara  
\p
\v 19 Hatahori saranik kara marai profensi Asia haitua hara masodak soa-neu ei. Kaꞌa Akila no saon, kaꞌa inak Priskila,\f + \fr 16:19 \ft Susura Malalaok dedeꞌa Yunani nai ia surak nae, “Priska”. Priska ma Priskila naa, ndia nadek esak ka.\f* ma basa hatahori laen nara mana rasiꞌe rakabua nai sira uman oo haitua hara masodak boe, te sira oo rakaesa rakandoo ro ita Lamatuan boe.\x + \xo 16:19 \xt Nedenuk kara Tutuin 18:2\x*  
\v 20 Basa hatahori kamaherek kara marai ia oo haitua hara masodak boe.  
\p Mete ma ei makabua, na, esa simbok esa pake iꞌidu susue-lalaik mandaak soa-neu hatahori kamaherek kara.   
\p
\v 21 Soba mete dei! Au, Paulus, pake au lima heli-heling fo surak dedeꞌa deꞌek talo ia: \it Soda-molek!\it*   
\p
\v 22 See ta naena susue-lalaik neu ita Lamatuan, neu ko Manetualain fee huku-dokik neun.  
\p Au ateme lole harang mbali hatahori, pake ai hatahori Yahudi dedeꞌa Aram ae, \it “Marana ta!”\it* Sosoa-ndandaan nae, “Lamatuak, ee! Mai leo!”   
\p
\v 23 Au oke-hule fo Yesus, ita Lamatuan natudu Ndia dale susuen neu ei.   
\p
\v 24 Au sue-lai neu ei basa ngga, nahuu ita sama-sama takaesa to Karistus fo Manetualain nadenun mai ena.  
\p Losa kada ia leo. Soda-molek!  
\q2 Numa au mai,  
\q2 Paulus