\id 2TH Tutsa: Bible Translation 1st Edition
\ide UTF-8
\ide Unicode (UTF8)
\h 2 Thesoloniite
\toc1 THESOLONIITE suh Pool ih Taklih raang arah Le
\toc2 2 Thesoloniite
\toc3 2Thes
\mt1 THESOLONIITE
\mt2 Suh Pool Ih Taklih Raang Arah Le
\imt Ephangjatjih
\ip Jisu Kristo ngaak raaha ih banthoothak rumta tiit tungthoih Thesoloni Chaas ni moongsaam thok ang ruh ih rumla. \bk Thesoloniite suh Pol liwang leeraang adi\bk* Teesu eraak eha ih hanpi rumta rangwuung ah ejen thok ih taha ih raangha. Pool ih erah tiit ah hukbaat kotsuh thunha, Jisu maang ngaak raara ngakhoh nah, ethih nyia lalangka loong ah phang thok ha, neng phansiitte ah Kristo damdoh thichomuite warah heh men ah “Jootthih Wah” ih poonha.
\ip Heh kaamwah ih arah wette loong asuh neng hanpi nah echam enaang lam ih ang abah uh rongtangtang toom ang rum ih hukbaat korumha, Pool nyia heh joonte loong mota ah likhiik, mootkaat ese ah motheng eah.
\iot Hemong Dowa Jatjih
\io1 Ephangjatjih \ior (1:1-2)\ior*
\io1 Rangphoong nyia Tiitse Baat kot\ior (1:3-12)\ior*
\io1 Kristo Raaha Tiit Lamphan baat kot \ior (2:1-17)\ior*
\io1 Kristaan Reeraang Tiit Baattaan\ior (3:1-15)\ior*
\io1 Hethoonhemat \ior (3:16-18)\ior*
\c 1
\p
\v 1 \x - \xo 1:1 \xo*\xt Esm 17:1\xt*\x* Thesoloni Chaas nawa sen loong wah Rangte nyia Teesu Jisu Kristo mina loong suh—Pool, Silaas, nyia Timothi loong jiin nawa:
\p
\v 2 Sen loong Wah Rangte nyia Teesu Jisu Kristo ih sen suh semroongroong nyia minchan ah toom kohan.
\s Jisu raaha sa doh dande
\p
\v 3 Joon awaan loong, seng ih Rangte suh saapoot rookwet lakookmi ih sen loong thoi eli jih jaat angla. Eno erah epun eah, tumeah sen loong hanpi ah hak ela erah dam ih sen chamchi nah minchan mui ah ehan ih donghoonla. 
\v 4 Erah thoih seng ih sen tiit ah Rangte Chaas rookwih ni khuungpook baat hi. Sen hanpi ah sen chamnaang nyia phate joonnaam di nep latoohaat thang ih naan jahalan asuh seng khooroh eli.
\p
\v 5 Erah loong reetan ah sok adi Rangte ih epun dande eha, erah thoidoh sen loong ah heh Hasong nah wangsuh epun ang an. 
\v 6 Rangte ah epun jaatjaat ih re ah: heh ih sen cham thukte loong ah ewe cham thuk et ah, 
\v 7 eno sen echam etan loong ah takah cham thuk ran sen damdam seng loong asuh nep ah. Teesu Jisu ah rangmong nawa heh chaan aphaan pan rangsah loong damdoh dong raaha sa doh erah loong ah re ah, 
\v 8 eno o ih Rangte thaangju ha nyia Teesu Jisu, Ruurang Ese ah laboichaatte loong ah weeluung nah cham thuk suh raaha. 
\v 9 \x - \xo 1:9 \xo*\xt Isa 2:10\xt*\x*Neng babah uh lathoon theng ethih adoh chamnaang rum ah, Teesu jiin nawa nyia heh chaan aphaan nawa pheehoom cho ang rum ah, 
\v 10 heh erah Sa doh heh mina loong jiin nawa chaan ah thaang raaha doh nyia heh suh hanpiite loong jiin nawa esoomtu theng ah thaang raaha doh, sen uh neng damdoh roong ang an, tumeah sen ih seng ih baatti jengkhaap loong ah ehanpi ehan.
\p
\v 11 Erah raangtaan ih seng ih sen suh saarookwih rangsoom ni tongli. Sen loong songtong suh Rangte ih poon halan adoh jen pun suh sen raang ih Rangte suh rangsoom hi. Sen tuungmaang lan mootkaat ah jen tom mootkaat suh nyia sen tenthun ese ah jen reeraang suh Rangte chaan nawa ih ju toom ang ah. 
\v 12 Emamah ih seng Teesu Jisu men ah sen nawa ih toom rangka ah, eno sen uh heh nawa ih rangka han, seng Rangte nyi Teesu Jisu Kristo minchan ah sen damdoh toom angha.
\c 2
\s Mih lajak
\p
\v 1 \x - \xo 2:1 \xo*\xt 1Thes 4:15-17\xt*\x* Teesu Jisu Kristo raaha tiit nyia seng heh damdoh thutthi theng tiit: Ngah ih sen lasih joh rumhala, joon awaan loong, 
\v 2 Teesu Rangwuung ah ejen thok ih taha ih baatte ih sen ah seek ih naktoom jen mokwaan han adoleh nak toom thungjoong thuk han. Erah loong jengkhaap ah seng ih chiiala tiit baat tokdi, Rangte tiit tumbaat tokdi, adoleh leeraang nawa ih raangmaat erah likhiik mok ih thokbaat tahan bah sen seek ih lapaatja theng nyia ladoonmoh theng. 
\v 3 Marah lam nawa eh uh mih ih sen ah naktoom jen mokwaan han. Erah Rangwuung ah thok suh bah heh damdoh Tootmuite chaak thok ha nyia soolam nah wangte Lajak ah dong eha. 
\v 4 \x - \xo 2:4 \xo*\xt Dan 11:36; Ijk 28:2\xt*\x* Heh ih ranghoh loong rangsoom ah thaangju ano heh teeteewah suh loongtang nang ih echoong thoon ih thiik ah. Heh Rangteenok nah nep tongwang ah eno heteewah ah Rangte ih chaang ah. 
\v 5 Sen ih tatam dokthun kan? Ngah sen damdi ang tokdi kabaat rum taha rah ah? 
\v 6 Enoothong erah amadi lah angthukte tumjih bah uh eje, eno erah tumjih ah sen ih ejat ehan. Heh saapoot doh, erah Lajak mih ah edong eha. 
\v 7 Erah Mikmuh Lajak ah amadi husah ni ejen moh ela, enoothong heh tangjootte wah ah helam nawa maang dok haathaat bah tumjih angjih angta ah tajen ang thukka. 
\v 8 \x - \xo 2:8 \xo*\xt Isa 11:4\xt*\x* Erah linah bah Lajak Mih ah dong ha, enoothong Teesu Jisu ah ra haano, heh tu nawa heh tak ih mot ano tek haat ah nyia heh dong ha doh heh weephaak phaakjaaja rah ih thet haat et ah. 
\v 9 \x - \xo 2:9 \xo*\xt Mat 24:24\xt*\x* Lajak mih ah dong haano Soitaan chaan aphaan nawa ih emoong lamko nawa jaatrep epaatjaajih nyia elaksok etheng loong ah re ah, 
\v 10 eno emat ete loong ah jaatrep ethih lamko nah moong mokwaan ah. Neng emat eah tumeah neng ih neng khopuitheng amiisak tiit ah tanoppoon rumka nyia minchan asuh tanook rumka. 
\v 11 Erah thoih Rangte ih emoong chaan aphaan ah neng dung nah toom moh ah ih daapkaatta tumeah emoong ah neng ih toom hanpi rum ah eah. 
\v 12 O ang abah uh amiisak tiit asuh lahanpi thang ih, rangdah tenroon adi tongte loong ah edut haat etjih ih dong hoon ah.
\s Khopiiroidong raang ih danje tahan
\p
\v 13 Joon awaan loong, sen Teesu ih minchan halan loong thoi, saapoot rookwih seng ih Rangte suh lakookmi liijih jaatjaat. Tumeah Rangte ih sen ah Esa Chiiala chaan nawa ih esa mina ih hoon suh phangkhothoon ih danje halan, sen amiisak asuh tuungmaang thoih ah. 
\v 14 Rangte ih arah tuk ih poon halan langla seng ih sen suh Ruurang Ese ah baattaan thoi; Teesu Jisu Kristo chaan aphaan ah toomroong choh an ih poon halan. 
\v 15 Erah thoih, joon awaan loong, rongrong ih tong an, eno marah amiisak tiit jengkhaap nawa ih nyia le nawa ih maat raang heeno nyootsootti loong ah dangdang ih kap an.
\p
\v 16 Seng Teesu Jisu Kristo heteewah nyia seng loong Wah Rangte, seng minchante wah, seng suh lathoon theng tenchaan tenthun, heh tenthet nyia laalom ah toom kohan, 
\v 17 sen suh saarookwih tenthun chaan theng nyia tathat theng ese reeraang nyia jeng akong ah toom kohan.
\c 3
\s Rangsoom Kohe
\p
\v 1 Hethoondi, joon awaan loong, seng suh rangsoom kohe Teesu tiitkhaap ah seekseek ih toom jaatjaang ah eno sen ih soongraang han ah likhiik toom et soongraang ah. 
\v 2 Rangte ih lajak nyia ethih nawa nep toom panghe suh rangsoom kohe, tumeah warep ih tiitkhaap ah tahanpiika.
\p
\v 3 Enoothong Rangte abah ehanpi Rangte, heh ih sen suh tathat kohanno Ethih Esiit dowa piipang et han. 
\v 4 Sen loong ah moh elan ih Teesu suh kamkam ih laalomli eno emamah ban moh ruh ju ean seng ih marah baat hi rah ah.
\p
\v 5 Seng Teesu ih sen tenthun mongtham ah Rangte minchan nah nyia Kristo ih naanta ah toom jen samthun thuk han.
\s Edem loong suh mootkaat baat
\p
\v 6 Joon awaan loong, Jisu Kristo mendi baat rumhala, hanpiite edem loong jiin nawa sen ah haloh ih tong an, neng suh seng ih jaatrep taat nyootbaatti ang abah uh neng ih taphan rumka. 
\v 7 Seng mame moti erah likhiik sen uh emamah ih mojih ih sen ih naririh jat han. Sen damdi ang tokdi seng ah edem tah angti. 
\v 8 Seng ih thaangmuh ih o dowa uh tathaang phaksati. Erah nang ih seng rangwuung rangphe ih chamnaang moti, sen phoh looso ki ih thun ih no ah. 
\v 9 Seng erah reeti ah langla seng ih tajen jamsuke ebah tah angta, sen ih toom nyootsok he ih reeti. 
\v 10 Seng sen damdi ang tahe adi botseh arah banlam ah kabaatti, “O mootkaat tanookka erah ih laphaksah theng.”
\p
\v 11 Seng ih sengdung ni edem mina mararah ah eje tih nyia tumjih lamoh thang ih wahoh pheehoon mootkaat phaangphakte eje ih chaat ih no baat hi. 
\v 12 Teesu Jisu Kristo mendi seng ih erah mina loong asuh dangdang ih baat hi neng roidong doh biiphaksah rum ano neng hasong ah phanjangjang toom ih tongsong rum ah.
\p
\v 13 Enoothong joon awaan loong, sen ah ese mootkaat moh suh nakmok naang an. 
\v 14 Seng ih arah le maat raang hali dowa jengkhaap ah lakapte uh eje ang ah. Emate je abah, naririh ih ba danjat an, eno neng damdoh tumjih uh lathaam waan theng, eno ba neng rakriiri eah. 
\v 15 Enoothong, sen piiara likhiik nak et thiik an, erah nang ih bah, hanpiite jun ih choophaan baat an.
\s Hethoon jengkhaap
\p
\v 16 Seng Teesu semroongroong kotte wah, ih sen suh jaatrep lampo nah saapoot rookwih semroongroong ah toom kohan. Sen damdam Teesu toomroong tongha. 
\v 17 Arah nga teeteewah lak ih raanghang: \sig Pool jiin nawa Jengkhaapse \sig* Leeraang rookwih ni amah ju kah ih raang ang; erah thoih arah raanghang. 
\v 18 Seng Teesu Jisu Kristo minchan ah sen damdam toom tongha.