\id 1TI Tutsa: Bible Translation 1st Edition
\ide UTF-8
\ide Unicode (UTF8)
\h 1 Timothi
\toc1 TIMOTHI suh Pool ih Takkhoh raang arah Le
\toc2 1 Timothi
\toc3 1Tim
\mt1 TIMOTHI
\mt2 Suh Pool Ih Takkhoh Raang Arah Le
\imt Ephangjatjih
\ip Timothi, ah Esia Minor hah liiha dowa Kristaan jaaro angta, heh nuh ah Jehudiite angta heh wah ah Grikte. Heh Pool joonte ih hoonta nyia Rangte mootkaat ni heh saklek ih motte angta. \bk Timothi suh Pool Phangkhoh leeraang \bk* adi jaatjom tiitwaan raangha.
\ip Phangkhothoon le adi Chaas ni tiitmoong nyootte loong suh dangdang ih kapjih baat ha. Jehudi nyia Jehudi lah angte loong neng eroom tenthun jun ih arah nyootsoot hali adi hansi mongrep ah ethih ih hanpi rumha, eno khopiiroidong ah husah lam ih hoondak mongtham jun ih choh ah nyia ethih phak asat toohaat nyia lanook mui thang ih tong adoh choh ah ih nyootsoot ha tiit ah raangha. Arah le adi Chaas mamet phansiit ah nyia Rang mamet soom ah erah tiit ah raangha, erah dam ih chaas phansiitte loong nyia neng chosokte loong ah mamangjih anep raangha. Hethoon adi, Timothi suh Jisu Kristo laksuh ese mamah angtheng ah ih raangmaat ha nyia hanpiite loong damdoh mame mootkaat theng ah nep raangha.
\iot Hemong Dowa Jatjih
\io1 Ephangjatjih \ior (1:1-2)\ior*
\io1 Chaas nyia emootte loong suh nyootsoot tiitwaan\ior (1:3—3:16)\ior*
\io1 Timothi suh heh mookaat tiit nyootsoot \ior (4:1—6:21)\ior*
\c 1
\p
\v 1 Seng Pangte Rangte jengkhaap jun ih Jisu Kristo seng laalomte wah kaamwah Pool jiin nawa arah le ah—
\p
\v 2 \x - \xo 1:2 \xo*\xt Esm 16:1\xt*\x* Hanpiite jun ih amiisak nga sah, Timothi suh:
\p Seng loong Wah Rangte nyia Jisu Kristo seng Teesu ih an suh tenthet, minchan, nyia semroongroong ah toom koho.
\s Tiitmoong nyootte suh echoojih tiit
\p
\v 3 Ngah Mesidonia juungkhuung ko ih katang adi baat taha likhiik, amadoh uh an suh Ephisas samnuthung adoh tong uh ih baat hala. Erah ni maramarah mina ih tiitmoong banlam nyoot rumha, eno erah loong an ih tanghaam jaatjaat etheng. 
\v 4 Neng suh baat rum uh teewah khiikkhi nyia wih ate men loong wootthaam baattaan ah eto toom et rum ah erah ih bah changrook jengdaan ba dongsiit ah, Rangte kaankoong hanpi jun ih mojih ah tabaam jen mothukka. 
\v 5 Arah jengdang hesot hemat abah minchan seng ten nawa ih dong hala, nyia thung atak phanjangjang, erah dam ih seng hanpi loong ah. 
\v 6 Mararah mina ih erah loong ah thiinhaat rum ano thaangmuh tiitwaan ah moong phoongwaan rumla. 
\v 7 Neng ih Rangte Hootthe ah nyoot suh ram rumla, enoothong neng ih tumjih nyoot rumha neng teeteewah ih tasamjat rumka adoleh elang jaat eah ih nyoot rumha ah neng ih botseh tasamjat rumka.
\p
\v 8 Seng ih jat ehi Hootthe ah ese, mamet maaktheng ah erah jat ih bah ah. 
\v 9 Seng ih ejat jaatjaat etheng, Hotthe ah ese mina loong raang ih tah angka, erah nang ih bah hootthe thet haatte nyia ehuh eleek, rangdah nyia rangmuh hasong mina loong raang ih, nyia chiiala adoleh thooroom lajatte loong raang ih, nengnuh nengwah tek haatte nyia mih tek haatte loong raang ih, 
\v 10 mih damdoh roomjup matkapte raang ih, miwah ah miwah damdi, minuh ah minuh damdi muungtuungla loong raang, mih ething et putte raang ih, eleek tiitbaatte raang ih nyia emoong haaki tiitbaatte raang ih adoleh amiisak banlam tiit loong phaakiitte loong raang ih. 
\v 11 Erah loong ah Rangte tiitkhaap nah choh ah, chaan aphaan nyia romseetam kotte Rangte ih erah Ruurang Ese ah ngah suh tumbaat thuk halang.
\s Rangte minchan thoih lakookmi
\p
\v 12 Nga ih Teesu Jisu Kristo suh lakookmi liihang, heh mootkaat raang ih ngah suh tathat kohang no ah. Ngah suh heh mootkaat nah jen pun mojih chaan ah kohang no nyia danpoon hangno lakookmi liihang, 
\v 13 \x - \xo 1:13 \xo*\xt Esm 8:3; 9:4,5\xt*\x* ehak di bah ngah ih heh suh ethih kah ih liitang nyia siiwi chamnaang angno dut haat etang. Enoothong Rangte ih ngah ah minchan et tahang tumeah nga heh suh lahanpi thang ih tumjih reetang rah tajat tang. 
\v 14 Eno seng Teesu ih ngah suh lajen toobaat theng tenthet ah kotahang erah dam ih Jisu Kristo jiin nawa minchan nyia hanpi theng anep kotahang. 
\v 15 Arah amiisak tiit seng ih kamkam et hanpiijih nyia thangjih: Kristo Jisu arah mongrep adi rangdah mina loong pangsuh ra taha. Erah mong dowa ethithoon rangdah mina ah ngah, 
\v 16 enoothong rangdah mina ang ang abah uh Jisu Kristo ih heh minchan ah nga sak ni noisok jatahang, eno erah minchan ah mihoh loong ih nyootsok hangno hanpi rum ah, eno neng ah lathoon theng roidong ah chorum ah. 
\v 17 Babah uh lathoonka luungwang, latekte nyia latuptheng, Rangte heh luulu—asuh roitang roijang ih soongsap theng nyia phoongpha etheng! Amen.
\p
\v 18 Nga sah, Timothi, Ngah suh jaakhoni khowah loong ih an tiit banbaat rum tahang jun ih an suh arah jengdang loong ah baat kohala. Erah jengdang loong ah lang apah dakbi et maak uno ba raamui jen mui uh, 
\v 19 eno an tuungmaang nyia thung atak ah phanjangjang et thun uh. Mararah ih nengthung nengtak ni epun angla ah lakap thang ih neng tuungmaang ah thet haat rumha. 
\v 20 Erah dung dowa ah Himenus nyia Alekjender, erah wanyi ah ngah ih Soitaan lak ni konyu angno chamnaang thuk hang; eno nyi ih erah dowa ih ba jatnyu ah Rangte jeng abah ladaanjih boh ah eah eno kok toohaat nyu ah.
\c 2
\s Chaas nah rangsoom
\p
\v 1 Erah thoih, phangkhothoon et baat rumhala ah langla: mirep raangtaan sen ih lasijoot, rangsoom, esuk nyia lakookmi jengkhaap ah Rangte suh kottheng; 
\v 2 Rangte rangphoong rangsoom nah semroongroong ih tongsong nyia naririh angsuh luungwang nyia ngoong awang loong asuh rangsoom koh an. 
\v 3 Emah ih re ah ese ang ah nyia seng Pangte Rangte uh eroon eah. 
\v 4 Rangte ih warep suh epui toom erum ah nyia amiisak ah toom dongjat rum ah ih jam hali. 
\v 5 Tumeah Rangte ah esiit, eno Rangte nyia mina chamchiini chosiitte mih ah Jisu Kristo, 
\v 6 mina rangdah nawa doksiit raangtaan ih heteewah roidong kotte warah ah. Rangte ih mirep ah epiipang et ang ih chung arah tokdi erah choh noisok jataha, 
\v 7 \x - \xo 2:7 \xo*\xt 2Tim 1:11\xt*\x* erah thoih Ranglajatte loong raang ih ngah ah heh kaamwah nyia nyootte raang ih daapkaat halang, ehanpiijih nyia amiisak tiit ah tumbaat raangtaan ih ah. Nga ih tiit huung tabaat kang; amiimi tiit baat hang!
\p
\v 8 Chaas nah miwah loong warep ih rangsoom tokdoh neng lak ah toon rum ano nengthung nengtak korum, eno ten lakhah thang ih nyia changrook ah larook thang ih rangsoom arah jam rumhang. 
\v 9 \x - \xo 2:9 \xo*\xt 1Ptr 3:3\xt*\x* Minuh loong eh uh nyuh akhat ah phanjangjang nyia naririh toom et kap rum ah ih thunhang, neng khoh ah khoja khangja adoleh hun akom adoleh thaangchaan jong nyia thaangchaanjih nyuh akhat doh naktoom choom rum ah, 
\v 10 erah nang ih bah thooroom et chaangte minuh likhiik ese ah phanjangjang toom ih reeraang rum ah. 
\v 11 Minuh loong ah suusu ih tong rum ano toongtang lam ih toom nyoot rum ah. 
\v 12 Ngah ih minuh loong suh tanyootsoot thukkang adoleh miwah tokkhodoh reejih neng suh chaan takokang, neng ah suusu ih tongjih. 
\v 13 \x - \xo 2:13 \xo*\xt Rangph 2:7; Rangph 2:21,22\xt*\x* Tumeah Adam ah jaakhoh dongsiita, erah lilih Ip ah dongsiitta. 
\v 14 \x - \xo 2:14 \xo*\xt Rangph 3:1-6\xt*\x* Eno emokwaan eta ah Adam tah angta; emokwaan eta nyia Rangte hootthe thet haatte ah minuh rah angta. 
\v 15 Enoothong minuh ah neng sah pusom thungthoih ba puirum ah,\f + \fr 2:15 \fr*\fq neng sah je thungthoih ba pui ah; \fq*\ft adoleh \ft*\fq neng sah tup ano ba puirum ah.\fq*\f* nyia neng\f + \fr 2:15 \fr*\fq neng hanpi ah latoohaat thang ih; adoleh \fq*\fq heh hanpi ah latoohaat thang ih.\fq*\f* hanpi, minchan nyia esa reeraang ah lato thang ih tong rum ano ah.
\c 3
\s Chaas phansiitte
\p
\v 1 Arah amiisak tiit: Miwah ah chaas phansiitte angsuh li abah, heh ih mootse thoon ah moot suh thunha. 
\v 2 \x - \xo 3:2 \xo*\xt Tit 1:6-9\xt*\x*Chaas phansiitte ah moong ataang muh jaatjaat angtheng, heh sanuh ah esiit luulu jaatjaat angtheng, \f + \fr 3:2 \fr*\fq heh sanuh ah esiit luulu jaatjaat angtheng;\fq*\ft adoleh\ft*\fq heh kuhoon ah leksiit hoon arah angtheng. \fq*\f* tenmang angtheng, heteewah jaatrep doh ejen naan ete nyia phanjangjang mina angtheng, heh nok nah sam awen ejen noppoonte jaatjaat angtheng; heh ih mih suh ejen nyootsoot ete jaatjaat etheng; 
\v 3 heh khammokte adoleh changrook mina lajaatjaat angjih, erah nang ih toongtang nyia semroongroong mina angtheng; heh ngun doh lamongnookte jaatjaat angtheng; 
\v 4 heh changka ah naririh jen ih soksamte nyia hesuh hesah heh jeng chaatchaat ih ano heh soomtu arah mina jaatjaat angtheng. 
\v 5 Tumeah heh ih heh changka ah lajen koonchaaka bah, Rangte chaas ah tang mamah maajen ih kooncha ah? 
\v 6 Heh hanpi nah thungsek angtheng, lah angka bah heh ah engaampo lam nah re ano Juungbaan luungwang dut haatta likhiik ih dut haat arah ang ah. 
\v 7 Heh ah chaas nah luulu lah angthang ih nokhoh phohoh nyia hahoh nah uh esoongraang ette mina jaat angtheng, eno ba heh ah rakriijih lampo nyia Juungbaan phoong nah tajen datka ang ah.
\s Chaas roongchosokte
\p
\v 8 Chaas roongchosokte\f + \fr 3:8 \fr*\fq Chaas roongchosokte; \fq*\ft adoleh \ft*\fq Deekoons\fq*\f* loong ah uh neng ese dang ajang mina nyia jeng chaatchaat angtheng; neng khammokte nyia ngun doh nyamnyookte lah angjih jaatjaat; 
\v 9 Neng ih thungsek taksek lam ih amiisak tuungmaang tiit dongjat thuk ha ah rongrong ih kap etjih jaatjaat. 
\v 10 Neng ah chaas roongchosokte ih thiin suh jaakhoh taatsok chaak etjih, eno jen lang eah ih thoijat eno ba erah loong ah mothuk theng. 
\v 11 Neng sanuh\f + \fr 3:11 \fr*\fq Sanuh;\fq*\ft adoleh\ft*\fq Minuh chosokte\fq*\f* loong rah uh ese dang ajang mina angtheng nyia mih joobaatte lah angjih jaatjaat, neng ah tenmang nyia seklilih angtheng. 
\v 12 Chaas roongchosokte loong sanuh ah esiit luulu angtheng,\f + \fr 3:12 \fr*\fq Chaas roongchosokte loong sanuh esiit luulu angtheng;\fq*\ft adoleh \ft*\fq Chaas roongchosokte loong ah ih leksiit kuhoonte angtheng.\fq*\f* eno hesuh hesah nyia heh changka ah naririh ih miisoksamte angtheng. 
\v 13 Erah roongchosokte loong ah ih neng mootkaat ah naririh ih morum abah neng menset ese ang ah, eno Jisu Kristo suh tuungmaang tiitwaan ah lachoolaphaan jen baattaan rum ah.
\s Husah tiit elong ah
\p
\v 14 Ngah an jiinnah seek ih dong ra hangno an japtup suh taat thunhang, ang abah uh arah le maat raang halang ah langla, 
\v 15 lamok jen ra rangdoh, arah le dowa ih sen suh Rangte changka nah mame reeraang pakna jih ah jatthuk han, erah changka ah Ething Rangte chaas, amiisak tiit raang ih thonghong wokong likhiik. 
\v 16 Seng thooroom ah husah ni tumthan rak ah o ih uh tajen daanka ang ah:
\q1 Heh \f + \fr 3:16 \fr*\ft Mararah le adi Rangte ih raangha\ft*\f* ah mina jun ih dong taha,
\q2 Eno Chiiala\f + \fr 3:16 \fr*\fq Chiiala ih amiisak ah noisokta;\fq*\ft adoleh\ft*\fq Chiiala lam ni noisokta.\fq*\f* ih amiisak ih noisokta,
\q2 nyia Rangsah loong ih tup rumta
\q1 Heh tiit ah deek akaan rookwih tumbaatta,
\q2 mongrep thoontang ni heh suh hanpi rumta,
\q2 eno rangmong ni toonsiit wanta.
\c 4
\s Tiitmoong nyootte loong
\p
\v 1 Esa Chiiala ih danduudu ih baat ha, rekam doh mina loong ih neng hanpi ah thiinhaat et rum ah; neng ih tiit huung baatte chiiala nyia chiithih laakhah loong tiit ah chaat rum ah. 
\v 2 Erah likhiik tiitwaan ah eleek loong ih tumbaat ha, nengthung nengtak ah jaan ekhaam ni sok arah likhiik tekmang. 
\v 3 Erah miloong rah ih nyoot rumha, mih suh nook emiit ang ah nyia mararah phaksat ah laphaksah theng eah. Enoothong Rangte ih bah phaksat ah ephaksat et suh dongsiitta, hanpiite nyia amiisak tiit jat suh nookte loong ih Rangte suh lakookmi li ano phaksah theng. 
\v 4 Jaatrep Rangte ih dongsiitta loong ah ese totoh, tumjih uh ehaatjih tajeeka, enoothong jaatrep ah lakookmi jengkhaap jenglam ih thaangtheng, 
\v 5 tumeah, Rangte jengkhaap nyia rangsoom nawa ih erah loong ah Rangte ih ethang etjih ih hoon thuk ha.
\s Jisu Kristo ese laksuh
\p
\v 6 An ih arah nyootsoot hala tiit ah hanpiite loong suh baat ubah, an ah Jisu Kristo laksuh ese mina ang uh, tumeah an ih chiiala ehanpiijih jengkhaap ni anteewah ah haksiit hu nyia amiisak tiitkhaap ah kap hu. 
\v 7 Enoothong thaangmuh teetiit loong ah thiinhaat et an, erah loong ah tumjih maak doh uh tachapka. An teeteewah ah Rangte ih jamha roidong ah raang ih ban nyootsoot ruh et uh. 
\v 8 Hansi sakpuh japja abah sakpuh raang ih amasah hethaang pan, enoothong chiiala lam ni japjaala abah jaatrep lam ni thaangchaan, tumeah erah ih lakngah roidong nyia amah dowa roidong raang kakham hoonha. 
\v 9 Arah jengkhaap ah amiisak tiit, ehanpiijih nyia elang ekah ih thangjih. 
\v 10 Ething Rangte asuh laalom ih no chamnaangli nyia ramcham moli, marah loongtang raang ih Pangte, ehanthoon ah o ih hanpiiha loong raang ih.
\p
\v 11 Arah jengkhaap nyia enyootsoot theng loong ah baat koh uh. 
\v 12 An ah jaaro, erah thoih an mih ih naktoom thaangju rumho, erah nang ih bah an jengkong nah, an reeraang nah, minchan nan, an tuungmaang nah, nyia esa lam nah an ah enyootsok etjih angtheng. 
\v 13 Ngah maang raakraak, an ih Rangteele ah nokwah dung nah wet suh, nyootsoot suh nyia tumbaat suh saapoot ah kap uh. 
\v 14 Khowah jengkhaap jun ih an suh chaas mihak phokhoh loong ih an khoh ni neng lak ih taajoh rum hoono, chiiala ih lakkot kotaho ah nak thet haat uh. 
\v 15 Erah loong ah labeehaat thang ih ban maak ruh et uh, an ese ih dong reeraang urah mirep ih soktheng toom ang ah. 
\v 16 An teewah nyia an ih mamet nyootsoot hu loong ah naririh ih ban sok uh. Erah loong ah latoohaat thang ih reeraang uh, tumeah, an roidong nyia an tiit boichaatte loong ah erah thoih pui ah.
\c 5
\s Hanpiite dung nah pakna reeraang
\p
\v 1 Mihak teekaang ah lakanja theng, erah nang ih bah an wah likhiik ih thiik uno ese lam ih waantiit uh. Jaaro loong ah, anphoh anno et thiik uh, 
\v 2 wikuh loong ah an nuh et thiik uh, eno jaala loong ah anno annah et thiik rum uh, jaatrep esa tenthun lam ih ah.
\p
\v 3 Thaknuh neng luulu ih tongla loong echoomjoot etheng. 
\v 4 Enoothong thaknuh asuh hesuh hesah je abah, neng neng ih neng jaatang ah toom soksam rum ah eno nengnuh nengwah ih neng soksam rumta thaang ah toom ngaakthem rum ah. Neng rangsoom thooroom lam nah emamah jaatjaat ih reeraang rumjih, eno ba Rangte ah tenroon ang ah. 
\v 5 Thaknuh heh luulu, heh soksamte o uh lajeette ih bah, Rangte suh hanpi ano, rangwuung rangphe heh chosok raangtaan ih rangsoom ah ban soom ruh et ah. 
\v 6 Enoothong thaknuh ih heh hansi tenroon ni tongla abah amadi ething taat ang abah uh, etek cho ang ah. 
\v 7 Neng loong ah emoong lam nah latong raangtaan ih arah renbaat hala baat rum uh. 
\v 8 Enoothong o ih heh sano joonte, hedakdak ih heh jaatang loong ah lasoksamka bah heh tuungmaang ah edaan eha, eno erah mina ah lahanpiite loong nang ih ethithoon.
\p
\v 9 Marah thaknuh paang rook arok nang ih ehan lah angka bah thaknuh men nak wak raang an. Erah dam ih heh ah miwah suh jaasiit nook arah angtheng,\f + \fr 5:9 \fr*\fq jaasiit nook arah angtheng;\fq*\ft adoleh \ft*\fq heh sawah suh hanpiite angtheng.\fq*\f* 
\v 10 nyia heh reeraang pakna ah ese ang arah toom ang ah: hesuh hesah naririh ih soksamte minuh, wen anok heh nok ni noppoonte minuh, Kristo mina damdoh roong mootkaatte, chamchoh tokdoh mih chosokte, nyia ese mootkaat ni mote minuh toom ang ah.
\p
\v 11 Enoothong jaalah thaknuh men ah thaknuh le nah laraang theng; tumeah neng mihoh suh nook mok we chung abah, Kristo jiin nawa edok soon eah, 
\v 12 eno jaakhoni heh jeng kakhamta ah thetsiit ha, eno erah thetsiit ha ah moongla. 
\v 13 Erah dam ih noknok doh tumkhoom rum ano neng saapak ah liinsoon thuk rum ah; erah khodoh uh ethithoon reeraang ah, mih joobaat tiitwaan nyia noongrepwih ni neng sak ah lanaangthiin thang ih tum nyoot et rumha, neng lajengjih angta jeng ah nyoot et rumha. 
\v 14 Erah thoih jaalah thaknuh loong abah miwah suh ewe nook eah doh se ih liihang, neng sah ah dong pusom rum ano neng nok nengtap ah soksam lam ih toom tong rum ah, eno ba sengpi sengra ih seng ethih lam nah tajap thet baatri. 
\v 15 Tumeah mararah thaknuh loong ah Soitaan lalih ni ejen kaat ih rumta. 
\v 16 Enoothong, Kristo hanpiite minuh pan changka nah thaknuh mok je abah, erah thaknuh ah neng ih jaatjaat chosok theng, chaaste suh lathaam sootroot baattaan theng, chaaste ih bah neng luulu chamnaangte thaknuh loong ah toom chosok rum ah.
\p
\v 17 Chaas mihak phokhoh mootse mote loong ah ih neng toloop chola erah thanthan ejen boot choh eah, hedakdak ah Rangte tiit tumbaat suh nyia nyootsoot suh chekbekte loong raang ih ah. 
\v 18 \x - \xo 5:18 \xo*\xt Hodb 25:4; Mat 10:10; Luk 10:7\xt*\x* Tumeah Rangteele ni raangha, “Maanpong ah chamnak tokdoh heh tui ah latangkhak theng” nyia “Mootkaatte suh neng toloop ah ekot ettheng.” 
\v 19 \x - \xo 5:19 \xo*\xt Hodb 17:6; 19:15\xt*\x* Chaas mihak tiit thetbaat arah wanyi tokhodoh ehan ih labaatka bah lachaat theng. 
\v 20 O rangdah mola erah nokwah dung nah kanja theng, wahoh loong nep toom cho asuh ah.
\p
\v 21 Rangte nyia Kristo Jisu erah dam ih esa rangsah loong ngathong ni Ngah ih arah jengkhaap loong ah kap an ih baat suh poon rumhala, tumjaat reeraang anbah uh o uh ladande theng nyia lachiik haatmui theng eah. 
\v 22 Teesu mootkaat nah mothuk suh mih khoh nah lak ih taajoh ano rangsoom kot suh lathuuhu theng. Rangdah mote damdoh laroong rooptheng; anteewah ah esa et thiintheng.
\p
\v 23 An khoisat nyia woksat dongsat lu adoh juung lalak nak jok uh, potiik kham amasah ah jok uno an khoisat ah deethuk uh.
\p
\v 24 Mararah mina rangdah ah rangkhoh ni kaptup ha; eno erah rangdah rah ih neng ah dande rum ah; enoothong rukhookho rangdah abah lini chotup ha. 
\v 25 Emamah ese mootkaat ah uh laantup ruh eha, eno mik ih latupka loong ah uh tajen huthiinka.
\c 6
\p
\v 1 O mih dah angla loong rah ih neng changte ah jaatrep lam nah esoomtu etheng, eno ba seng Rangte menset nyia seng ih nyootsoot hi loong asuh ethih eliijih tah angka ang ah. 
\v 2 Marah dah adi heh changte ah Kristaan mina angla loong ih neng changte ah lakaanju theng, tumeah neng uh hanpiite eliili. Erah nang ih, ehan han thong ih boot mootkoh theng, tumeah neng ih marah mina suh dak mokoh ah erah uh hanpiite neng ih minchan theng mina.
\s Tiitmoong nyoot nyia Changteng
\p An ih arah tiit loong ah enyootsoot jaatjaat etheng. 
\v 3 O mina ih Teesu Jisu Kristo amiisak tiitkhaap nyia seng thooroom tiit ah phaaki ano tiitmoong nyootsoot ha 
\v 4 rah ih tumjih uh lajatka di ngaampoola. Hethung hetak adi lalangka jengkhaap nawa ih changrook nyia edaan mui tenthun ah jeela, eno erah tenthun rah ih miksuk, changrook, ekaanju mui, ethih lam ni thetthun mui, 
\v 5 nyia thung atak lakhom thunte nyia amiisak ah lajeete damdi toom jengmui ruh ih ela. Neng ih thun rumha thooroom ah nyamte ih hoon theng lampo eah.
\p
\v 6 Elang eah, thooroom ih nyamte uh ejen hoon etthuk he, amadi sengdi tumjih jeela asuh seng tenchem ih tong ih bah ah. 
\v 7 Mongrep ni seng ih tumjih huijah tahe? Tumjih uh tahuijah ri! Mongrep nawa seng ih tumjih jen huiwan ih? Tumjih uh tajen huiwanke! 
\v 8 Erah ang abah, sengdi phak asat nyia nyuh akhat jeela ah laaleh ang ah. 
\v 9 Enoothong o mina nyamte ehoon suh nookla erah loong ah phate joonnaam nah dat ah, nyia neng ethih nyia lalangka tenthun, nawa ih echiike nyia ethettheng lam nah dat hoom rum ah. 
\v 10 Tumeah ngun suh mongnook ah jaatrep ethih loong hengroop. Mararah ih erah ngun ah chosuh ram rum ano, neng tuungmaang ah thiin haat rum, enooleh jaatrep cham anaang ah ih neng tenthun thun ah thet haat rumha.
\s Ngiija ih enyootsoot tiitwaan
\p
\v 11 Enoothong, Rangte mina, sen bah erah loong dowa epui etheng. Eno epunjih, rangkapjih, tuungmaangjih, minchanjih, enaanjih, nyia toongtang angjih lam adoh tong suh ba ram an. 
\v 12 Tuungmaang theng lam adoh naririh ih soon uno, an teeteewah raang ah lathoon theng roidong adoh thok soon uh, tumeah Rangte ih poon taho adi arah roidong ah chosuh an tuungmaang tiit ah noksong dung ni haaki haana et dokbaattu. 
\v 13 \x - \xo 6:13 \xo*\xt Jn 18:37\xt*\x* Jaatrep suh roidong kotte wah Rangte ngathong ni, nyia Pontius Pilat ngathong ni heh hanpi ese tiit jen dokbaatte wah Kristo Jisu ngathong ni, Ngah ih baat hala 
\v 14 Teesu Jisu Kristo reejih dong ra Sa maang thokthok an ih baattaan uh rah loong ah neng ih dangdang toom ih kap rum ah. 
\v 15 Heh raak Rangwuung ah luungwang loong tokkhodi Luungwang nyia teesu loong tokkhodi Teesu, seng phoongpha theng nyia mongrep Pante wah Rangte ih saapoot ese doh thoksiit ha. 
\v 16 Latekte ah heh luulu juuba angla; o uh lajen thok theng weephaak adi tongla warah ah. O ih uh heh ah thaak japtup muh; nyia o ih uh heh ah etupte tah angka. Lathoon theng chaan nyia esoomtu etheng ah heh juuba! Amen.
\p
\v 17 Arah mongrep dowa nyamte loong asuh baat rum uh, neng roidong doh arah mongrep hukkhaak asuh naktoom ngaampo rum ah, erah nang ih bah seng suh jaatrep tenroonjih kotte wah, Rangte asuh thong toom laalom rum ah. 
\v 18 Neng ese mootkaat toom moh rum ah ih thongbaat rum uh, ese mootkaat nah nyamte toom ang rum ah, neng lakot lakno eje toom ang rum ah nyia echosok mui suh banban toom ang rum ah. 
\v 19 Emamah ih neng nyamka ah neng neng ih lakngah raang ih lomthiin rum ano neng rongkopkop toom ang rum ah. Eno ba neng ih amiisak roidong ah jen choh rum ah.
\p
\v 20 Timothi, an suh ere ejih tiit baat kohala ah naririh ih kap uh. Mararah mina ih Rangte tiit thetbaat nyia lalangka di daanmui theng tiit asuh “Mongtham” ih liiha dowa epui etheng. 
\v 21 Tumeah mararah ih erah loong ah chosuh liirum ano, neng hanpi ah thet haat rumha.
\p Rangte minchan ah sen loong damdam toom ang ha.