\id PHP - Dawei Bible Translation
\usfm 3.0
\ide UTF-8
\ide 65001 - Unicode (UTF8)
\h ဖိလိပ္ပိ
\toc1 ဖိလိပ္ပိ သင်းတော်ဟှို ပေါလုရဲ့ ပေးစာ
\toc2 ဖိလိပ္ပိ
\toc3 ဖိ
\mt1 ဖိလိပ္ပိ
\mt2 ဖိလိပ္ပိ သင်းတော်ဟှို ပေါလုရဲ့ ပေးစာ
\imt နိဒါန်း
\im ပေါလုဟှာ ခရစ်တော် မွီးဘီးန ၆၁ ခုနှစ်လော့‑က်ဟှ ဖိလိပ္ပိဗြို့မာရှိဟှူ ယောင်ကြည်သူလေနားဟှို အယ်စာဟှို ရေးဟှားလေဟှယ်။ သူဟှာ ရောမဗြို့မာ ထောန်က္လနေဒူးမာ အယ်စာဟှို ရေးဟှားဟှယ် (\xt ၁.၁၃\xt*)။ အယ်စာဟှာ ဖိလိပ္ပိဗြို့မာရှိဟှူ သင်းတော်ဟှို ရေးဟှားလေဟှယ်။ ကျွန်တော့်ဟှားလေးဟှာ တမန်တော်လေရဲ့ လောက်ဆောန်ရှင်း ကျမ်းထဲဟှနေ ဖိလိပ္ပိဗြို့ကြောန်းဟှို နဲနဲဟှားဘဲ့ သိနိုင်ဟှယ်။ ဖိလိပ္ပိဗြို့ဟှာ မာကေဒေါနိပြည်နယ်ရဲ့ ဗြို့တော်ဖြစ်ဟှယ်။ အယ်ဘီးဟှာ မာကေဒေါနိပြည်နယ်မာ ပထမဆောင်း သင်းတော်ဟှို တည်ထောန်ဟှူ ဗြို့လည်းဖြစ်ဟှယ်။ အယ်ဗြို့မာရှိနေဒူးမာ ပေါလုန သိလဟှာ တညဉ့်လောင်း ထောန်ထဲမာ လှောန်ဟှားခံရဘေမဲ့လည်း သူးနို့နှေ့ယော့‑က်ဟှာ သင်းတော်ဟှို တူးဒူ စပြုဟှားလေဟှယ် (\xt တ ၁၆\xt*)။
\ip ပေါလုဟှာ အယ်စာဟှို ရည်ရွယ်ချစ်ဘောန်းဇောင်န ရေးဟှားလေဟှယ်။ ပေါလုဟှာ ထောန်က္လနေဟှယ် ဆိုဇာဟှို သင်းဝမ်လူလေဟှာ ဒန်းကြားရဟှူ ခီမာ သူးနို့ဟှာ လတ်ဆောန်ပို့ပေးလိုက်ဟှူကြောန့် သင်းတော်ဟှို ကျေးဇူးတန်ဟှို့တွပ် သူဟှာ သောင်းပြုဟှားဟှယ် (\xt ၄.၁၀–၁၉\xt*)။ သူဟှာ ထောန်ထဲဟှ သူ့ရဲ့ နော့‑က်ဆောင်းခြေနေဟှိုလည်း သူးနို့ဟှို ပြောပြဟှားဘီး သင်းတော်တွပ် တိမောသေန ဧပဖြောဒိတ်ဟှို ထော့‑က်ခံပေးလေဟှယ် (\xt ၂.၁၉–၃၀\xt*) အယ်မျိုးလောက်မှဘဲ့ သူးနို့ဟှာ အယ်လူနှေ့ယော့‑က်ဟှို လတ်ခံဘီး သူးနို့နှေ့ယော့‑က်ရဲ့ ဦးဆောန်ဇာဟှို လေးစားလေ့မယ်။
\iot ကြောန်းရာ ကျဉ်းချောက်
\io1 ၁။ ပေါလုဟှာ ဖိလိပ္ပိဗြို့မာရှိဟှူ သင်းတော်ဟှို နှောက်ဆစ်ရှင်းအားဖြင့် အယ်စာဟှို စပြုဟှားဟှူကြောန်း \ior (၁.၁–၂)\ior*
\io1 ၂။ သူ့ရဲ့ ခြေနေတချို့န သူ့မာဖြစ်နေဟှူ စိုးရိမ်းဇာတချို့ဟှို မျှဝီဟှားဟှူကြောန်း \ior (၁.၃—၂.၃၀)\ior*
\io1 ၃။ အယ်ဘီးန သူဟှာ ခရစ်ယာန်သတ်ရှင်ဟှူဇာ ပေါင်ဇံတွပ် လတ်တွိပြဟှူ လမ်းညွန်ချစ်လေ ဘောန်းဇောင်ဟှို ပေးဟှားဟှူကြောန်း \ior (၃.၁—၄.၉)\ior*
\io1 ၄။ ပေါလုဟှာ သူးနို့ရဲ့ လတ်ဆောန်တွပ် ဖိလိပ္ပိသင်းတော်ဟှို ကျေးဇူးတန်ရှင်းန သူ့ရဲ့ နှောက်ဆစ်စကားပြောရှင်းအားဖြင့် နိဂေါင်းချောက်ဟှားဟှူကြောန်း \ior (၄.၁၀–၂၃)\ior*
\ie
\c 1
\po
\v 1 \x - \xo ၁.၁ \xo*\xt တ ၁၆.၁၂\xt*\x*ယေရှုခရစ်တော်ရဲ့ စေခံဖြစ်ဟှူ ပေါလုန တိမောသေလေဟှနေ —
\po ဖိလိပ္ပိဗြို့မာနေဂေ့ဟှူ သင်းအောက်လေန သင်းတော်လူဂီးလေဟှိုရော၊ ယေရှုခရစ်တော်န တလောင်းတဝဒဲ ဖြစ်ဂေ့ဟှူ သခင်ဘုရားရဲ့ သန့်ရှင်းဟှူလူလေ အားလောင်းဂူနားဟှို စာရေးလိုက်ဟှယ်။
\po
\v 2 နန်းနို့ဟှာ နို့လေရဲ့ဖဖြစ်ဟှူ ဘုရားသခင်န သခင်ယေရှုခရစ်တော်နားဟှနေ ကျေးဇူးတော်န ငြီသတ်ရှင်းလေဟှို ခံစားရပါစေ။
\s ဖိလိပ္ပိသင်းသားလေတွပ် ပေါလု ဆုတောန်းပေးဟှူကြောန်း
\p
\v 3 နန်းနို့ ကြောန်းလေဟှို ဒိရဟှူခီတိုင်းမာ ငါဟှာ ဘုရားသခင်ရဲ့ ကျေးဇူးတော်ဟှို ချီးမွမ်းပါဟှယ်။ 
\v 4 ဝမ်းမြော့‑က်ဟှူစိန နန်းနို့တွပ် ငါဟှာ မြဲဒမ်း ဆုတောန်းပေးနေဟှယ်။ 
\v 5 ဖြားဖြစ်ကြောန့်နူးဆိုဟှာ နန်းနို့ဟှာ ကောန်မြတ်ဟှူ ဒန်းကောန်းတွပ် ပထမနေ့ဟှစဘီး ခုတိုင်အောန် စုပေါန်းဘီးဟှာ ပါဝမ်ကြောန်းဟှို သိဟှူကြောန့် ဘုရားသခင်ရဲ့ ကျေးဇူးတော်ကို ချီးမွမ်းဟှယ်။ 
\v 6 နန်းနို့မာ အယ်မျိုးကောန်းမြတ်ဟှူမှုဟှို စဘီးလောက်ဟှူ ဘုရားသခင်ဟှာ ယေရှုခရစ်တော်ရဲ့ နေ့ရစ် ရော့‑က်လာခီထိ အယ်မှုဟှို ပီးအောန်လောက်မယ်ဆိုဇာဟှို ငါဟှာ ယောင်ကြည်စိခ္လဟှယ်။ 
\v 7 နန်းနို့ဟှို ငါဟှာ ဒိရဟှယ်။ အယ်ကြောန့် ငါဟှာ နန်းနို့န ပတ်သတ်ဘီးဟှာ အယ်မျိုး စိသဘော ထားဟှားဟှယ်။ ခုငါဟှာ တောက်နှောန်ခံရဘီး နေရဟှူခီန ဒန်းကောန်းဟှို လွတ်လွတ်လပ်လပ်ဟှား သတ်သေခံခွမ့် ရဟှူခီဒူးဟှ နန်းနို့ဟှာ ငါ့နတူးဒူ ကျေးဇူးတော်ဟှိုတူးဒူ ဝီမျှခံစားဟှူ လူလေဖြစ်ဟှူကြောန့် နန်းနို့ဟှာ ငါ့ရဲ့ နှလောင်းထဲမာ စိစွဲလမ်းဘီး ရှိဂေ့ဟှယ်။ 
\v 8 ငါဟှာ ယေရှုခရစ်တော်ရဲ့ မြစ်တာကရုဏာန နန်းနို့ဟှို ရရာတိုင်း လွမ်းဟှူကြောန်းဟှို ဘုရားသခင်ဟှာ ငါ့ရဲ့သတ်သေ ဖြစ်ဟှယ်။
\p
\v 9 နန်းနို့ဟှာ ကောန်းဆောင်းဟှို ဝီးချယ်နိုင်ဟှို့တွပ် သိပညာန ပိုင်ခြားဝေဖန်တတ်ဟှူ စွမ်းရည်လေန ပ္လဲ့ဇောင်ဘီး မြစ်တာပါရမီလေဟှာ တိုးတတ်လာဂေ့ဟှို့ နန်းနို့လေတွပ် ငါဟှာ ဆုတောန်းဟှယ်။ 
\v 10 မြင့်မြတ်ဟှူ ဇာလေဟှို နန်းနို့လေဟှာ ပိုင်းခြားဘီး သိနိုင်ဟှို့ကြောန်းန နန်းနို့ဟှာ ခရစ်တော်ကြွလာဟှူ နေ့ရစ်မာ ဖ္လူစင်ဘီး ပြစ်တန်ဇာဟှူမှေ့ဘဲ့ ညစ်ကြေးန ကင်းလေ့မယ်။ 
\v 11 ဘုရားသခင်ရဲ့ ဖောင်းသရေတော် ထွန်းတော့‑က်ဟှို့တွပ်န ဂေါင်တော်ဟှို ချီးမွမ်းဂေ့ဟှို့တွပ် ယေရှုခရစ်တော်ကြောန့် ရနိုင်ဟှူ ဖြောန့်မတ်ဘီး စစ်မှန်ဟှူ ရည်သွေးကောန်းလေန ပ္လဲ့ဇောင်လေ့မယ်။
\s သတ်ရှင်နေဇာဟှာ ခရစ်တော်တွပ် ဖြစ်ဟှူကြောန်း
\p
\v 12 ညီကို မောန်နှမလေ ငါ့မာတွိကြောင်ရဟှူ ဖြစ်ပျစ်လေဟှာ ဒန်းကောန်းဟှို ကြေညာဟှူ ခီမာ တကယ်ဘဲ့ ထော့‑က်ကူပေးကြောန်းဟှို နန်းနို့ဟှို သိစေရှင်ဟှယ်။ 
\v 13 \x - \xo ၁.၁၃ \xo*\xt တ ၂၈.၃၀\xt*\x*ငါဟှာ ခရစ်တော်ရဲ့ စေခံဖြစ်တွပ်ကြောန့် ငါဟှာ တောက်နှောန်ခံရဘီး နေရဟှူကြောန်းဟှို နန်းတော်မာ စောန့်နေဟှူ တပ်သားလေန တခြားသူလေဟှာ သိဂေ့ဟှယ်။ 
\v 14 အယ်မျိုး တောက်နှောန်ခံရဟှူကြောန့် ညီကို မောန်နှမလေဟှ သခင်ဘုရားဟှို ပိုဘီးဟှာ ယောင်ကြည်စိခ္လလာဂေ့ဟှယ်။ အယ်ကြောန့် သူးနို့ဟှာ ကြော့‑က်ဘဲန စကားတော်\f + \fr ၁.၁၄ \fr*\fq စကားတော်၊ \fq*\ft တချို့ မူရင်းလတ်ရေးမူလေမာ \ft*\fqa ဘုရားသခင်ရဲ့ တရားတော်။\fqa*\f*ဟှို ပိုဘီးဟှာ ဟောပြောရဲဂေ့ဟှယ်။
\p
\v 15 တချို့လူလေဟှာ နာလိုဘဲ့ဟှူစိ၊ ရန်ရှာရှင်ဟှူစိလေန ခရစ်တော်ကြောန်းဟှို ဟောပြောဂေ့ဟှယ်။ အယ်ဘေမဲ့ တချို့လူလေဟှ စေတနာစိန ဟောပြောဂေ့ဟှယ်။ 
\v 16 အယ်လူလေဟှာ သခင်ယေရှုကြောန်း ဒန်းကောန်းဟှို ကာကွယ်ဘီးဟောပြောတွပ် ငါ့ဟှို ဘုရားသခင်ဟှ ခန့်ဟှားဟှူကြောန်းဟှို သိဟှူကြောန့် မြစ်တာန ဟောပြောဂေ့ဇာ ဖြစ်ဟှယ်။ 
\v 17 တခြားလူလေဟှ ခရစ်တော်ရဲ့ကြောန်းဟှို ရိုးသားမှုမှေ့ဘဲန ကျော်ကြားရှင်ဟှူစိန ဟောပြောဂေ့ဟှယ်။ သူးနို့ရဲ့ ကြံစည်လေဟှာ တောက်နှောန်ခံနေရဟှူ ငါ့ဟှို ပိုဘီးဟှာ စိဒေါက်ခရော့‑က်စေဟှယ်။
\p
\v 18 ဖယ်မျိုးဟောပြောနူးဆိုဟှာ ရေးကီးဟှ။ မှားယွင်းဟှူ ရည်ရွယ်ချစ်န ဟောပြောရှင်းဖြစ်စေ၊ မှန်ကန်ဟှူ ရည်ရွယ်ချစ်န ဟောပြောရှင်းဖြစ်စေ ခရစ်တော်ကြောန်းဟှိုဘဲ့ ဟောပြောနေဟှူကြောန့် ငါဟှာ ဝန်းသာဟှယ်။ ဆစ်ဘီးဟှာ ဝန်းသာနေဟှယ်။ 
\v 19 ဖြားဖြစ်ကြောန့်နူးဆိုဟှာ နန်းနို့လေရဲ့ ဆုတောန်းရှင်းလေ၊ ယေရှုခရစ်ဝိညာဉ်တော်ရဲ့ ငါ့ဟှို ကူညီမစပေးရှင်းအားဖြင့် အယ်ကြောန်းရာလေဟှာ ငါ့ဟှို ကယ်တန်ဟှူ ကြောန်းရာလေဖြစ်ဟှယ်။ 
\v 20 ငါဟှာ ဖယ်ခါလည်း ကိုယ့်တာဝန်ဟှို ပြစ်ကွပ်ဘဲ့ ခီတိုင်းမာရော၊ ထူးသဖြင့် အယ်မျိုးခီမာရော ရဲရင့်ဟှူသတ်တိန ပ္လဲ့ဇောင်ဘီး ငါဟှာ သတ်ရှင်ဇာဖြစ်စေ၊ သေဇာဖြစ်စေ ငါ့ကိုယ်ခန္ဓာအားဖြင့် ခရစ်တော်ရဲ့ ဖောင်းသရေတော်ဟှို ထန်ရှားလာဟှို့တွပ် မျှော်လင့်ဟှယ်။ 
\v 21 သတ်ရှင်ဇာဟှာ ဖယ်မျိုးနူး။ ငါသတ်ရှင်နေဇာဟှာ ခရစ်တော်ဘဲ့ဖြစ်ဟှယ်။ သေမယ် ဆိုဟှာ ပိုဘီးဟှာ ကျိုးရှိဟှယ်။ 
\v 22 အယ်ဘေမဲ့ ငါဟှာ ကိုယ်ခန္ဓာမာ ဆစ်ဘီးဟှာ သတ်ရှင်မယ် ဆိုဟှာ ကျိုးရှိဟှူမှုဟှို လောက်နိုင်ဟှယ်။ အယ်ခီမာ ဖယ်ဇာဟှို ဝီးချယ်ရဟှို့နူးဆိုဇာ ငါသိဟှ။ 
\v 23 ငါ့မာ စိနှေ့ခွ ဖြစ်ဘီးနေဟှယ်။ ငါဟှာ အယ်ဘဝဟှို စွန့်ဘီးဟှာ ခရစ်တော်နတူးဒူ နေရှင်ဟှယ်။ အယ်မျိုးလောက်ဇာဟှာ ငါ့တွပ် ပိုဘီးကျိုးရှိဟှယ်။ 
\v 24 အယ်ဘေမဲ့ နန်းနို့လေရဲ့ကျိုးလေဟှို ထော့‑က်ဟှူကြောန့် ငါဟှာ အယ်ကိုယ်ခန္ဓာမာ သတ်ရှင်ဘီးနေဟှို့တွပ် ပိုဘီးဟှာ ရေးကီးဟှယ်။ 
\v 25 အယ်မျိုးဘဲ့ ယောင်ကြည်စိခ္လကြောန့် ငါဟှာ နန်းနို့နတူးဒူ နေမယ်၊ နန်းနို့ဟှို ကြီးပွားတိုးတတ် စေရှင်ဟှူကြောန့် ယောင်ကြည်ရှင်းမာ ဝန်းသာဟှို့တွပ် ငါဟှာ နန်းနို့နတူးဒူ နေမယ်။ 
\v 26 ငါဟှာ နန်းနို့န နော့‑က်တခါ နေရမယ် ဆိုဟှာ ယေရှုခရစ်တော်န တလောင်းတဝဒဲ ဖြစ်ဂေ့ဟှူ နန်းနို့ဟှာ ငါ့တွပ်ကြောန့် ပိုဘီးဟှာ ဂေါင်ယူဘီး ကြွားနိုင်ဂေ့လေ့မယ်။
\p
\v 27 ခုနန်းနို့တွပ် ရေးကီးဆောင်းဟှ ခရစ်တော်ရဲ့ တရားတော်နညီ သတ်ရှင်နေဘီး နေနိုင်ဂေ့ဟှို့တွပ် ဖြစ်ဟှယ်။ နန်းနို့နားဟှို ပ္လန်လာဇာဖြစ်စေ၊ လာဘဲ့ဖြစ်စေ၊ နန့်နို့နဝီးနေဘီး နန်းနို့ကြောန်းဟှို ကြားဇာဖြစ်စေ သာသနာတော်ဟှာ ခိုင်မြဲဘီး ကြီးပွားဟှို့တွပ် ခိုင်းခိုင်မားမာဟှားရပ်ဘီး တစိ တသဘောဒဲ၊ ရည်ရွယ်ချစ်တခုဒဲန ဒန်းကောန်းနဆိုင်ဟှူ ယောင်ကြည်ရှင်းတရားတွပ် နန်းနို့လေဟှာ တိုက်ပွဲဝမ်နေဂေ့ကြောန်းဟှို ငါဟှာ ကြားရှင်ဟှယ်။ 
\v 28 နန်းနို့ရဲ့ ရန်သူလေဟှို ကြော့‑က်ဂေ့န။ မြဲဒမ်းဘဲ့ ရဲရဲရင့်ရင့်ဟှာ နေဂေ့ပါ။ အယ်မျိုးနေဇာဟှာ ရန်သူလေဟှ ရှောင်းဟှားဟှူကြောန်းန နန်းနို့ဟှ အောန်မြင်မယ်ဖြစ်ကြောန်း ရန်သူလေဟှို သတ်သေပြဂေ့လေ့မယ်။ ဖြားဖြစ်ကြောန့်နူးဆိုဟှာ နန်းနို့ဟှို အောန်ပွဲခံစေဟှူ သခင်ဟှာ ဘုရားသခင်ဘဲ့ ဖြစ်ဟှယ်။ 
\v 29 နန်းနို့ဟှာ ခရစ်တော်ဟှို ယောင်ကြည်ရှင်းမျှဘဲ့ ကဘဲ့န ခရစ်တော်တွပ်ကြောန့် ဒေါက်ခ ခံရရှင်းနရော၊ ခရစ်တော်ရဲ့မှုတော်ဟှို လောက်ဟှို့တွပ်ရော ခွမ့်ရေးလေဟှို ရဂေ့ဟှယ်။ 
\v 30 \x - \xo ၁.၃၀ \xo*\xt တ ၁၆.၁၉–၄၀\xt*\x*ခုနန်းနို့ဟှာ ငါ့နတူးဒူ တိုက်ပွဲဟှို ဝမ်နိုင်ဟှားဘီး ရင်ဒူးဟှ ငါဟှာ တိုက်ပွဲဝမ်ဇာဟှို နန်းနို့ဟှာ ဗြင်ရဂေ့ဟှယ်။ နန်းနို့ ကြားရဟှူတိုင်းဘဲ့ ခုလည်း ငါဟှာ တိုက်ပွဲဝမ်နေသေးဟှယ်။
\c 2
\s ခရစ်တော်ရဲ့ နှိခ္လရှင်း
\p
\v 1 နန်းနို့ဟှာ ခရစ်တော်ထဲမာ သတ်ရှင်ဟှူကြောန့် ခွန်းအားလေ ရလာဂေ့ဟှယ်။ ကိုယ်တော်ရဲ့ မြစ်တာတော်ဟှာ နန်းနို့ဟှို နှစ်သိမ့်မှုဟှို ပေးဟှယ်။ နန်းနို့ဟှာ ဝိညာဉ်တော်န မိတ်သဟာယဖွဲ့ရဟှူ ခွမ့်ရဂေ့ဟှယ်။\f + \fr ၂.၁ \fr*\fq ဝိညာဉ်တော်န မိတ်သဟာယဖွဲ့ရဟှူ ခွမ့်ရဂေ့ဟှယ်၊ \fq*\ft အယ်မျိုးမှုဘဲ့နေဟှာ \ft*\fqa ဝိညာဉ်တော်ဟှာ ရှင်းရှင်း မိတ်သဟာယဖွဲ့စေဟှယ်။\fqa*\f* နန်းနို့လေဟှာ သနားကြင်နာဟှူ စိရှိဂေ့ပါ။ 
\v 2 အယ်ဘီးဟှာ နန်းနို့ဟှာ စိသဘောတူးဒူရှိရှင်း၊ နန်းနို့ရှင်းရှင်း ရှစ်ရှင်း၊ စိစွဲလမ်းဘီး တူးဒူရှိဂေ့ဇာအားဖြင့် ငါ့ဟှို ရရတိုင်း ဝန်းသာစေဂေ့ပါ။ 
\v 3 ဝါကြွားရှင်ဟှူစိ၊ ကျော်ကြားရှင်ဟှူ စိဟှို တတ်မတ်ဘီးဟှာ ဖြားမှုလည်း လောက်ဂေ့န။ တခြားလူဟှ ကိုယ်ထတ်သာဟှယ် ဆိုဇာဟှို မြဲဒမ်း မှတ်ဟှားဘီးဟှာ စိနှိခ္လဂေ့ပါ။ 
\v 4 ကိုယ်ကျိုးတွပ်ဘဲ့ ကေ့ဘဲ့န ရှင်းရှင်းလေရဲ့ ကျိုးဟှို ရှာဂေ့ပါ။ 
\v 5 ယေရှုခရစ်တော်ထဲမာရှိဟှူ စိသဘောမျိုး နန်းနို့လေမာလည်း ရှိဂေ့ပါ။
\q1
\v 6 ကိုယ်တော်ဟှာ ဘုရားဇာတိတော်န ထာဝရပ္လဲ့ဇောင်ဟှယ်။
\q2 ဘုရားသခင်န ဒန်းဒူဖြစ်ဟှို့တွပ်\f + \fr ၂.၆\fr*\fq ဖြစ်ဟှို့တွပ်၊ \fq*\ft အယ်မျိုးမှုဘဲနေဟှာ \ft*\fqa ဖြစ်လာဟှို့တွပ်။ \fqa*\f* ကြိုးစားအားထုမှုမျိုး စဉ်းစားဟှ။
\q1
\v 7 အယ်မျိုးလောက်ဟှို့ နေနေသာသာ ကိုယ့်ဇာကိုယ်
\q2 ဖောင်းသရေတော်ဟှိုစွန့်ဘီး စေခံကျွန်ရဲ့ ပေါင်ဇံဟှို ခံယူလိုက်ဟှယ်။
\q1 ကိုယ်တော်ဟှာ လူပေါင်ဇံဟှို ဆောန်ဘီးဟှာ လူလေမျိုး မွီးဖွားလာဟှယ်။
\q1
\v 8 သူ့ကိုယ်သူ နှိခ္လဘီးဟှာ လတ်ဝါးကပ်တိုင်ထတ်မာ
\q2 သေခံဟှားဟှူထိ နာခံမှုလမ်းစဉ်ဟှို လိုက်လျှော့‑က်ဟှားဟှယ်။
\q1
\v 9 အယ်ကြောန်းကြောန့် ဘုရားသခင်ဟှာ
\q2 ကိုယ်တော့်ဟှို ရရာတိုင်း ချီးမြှော‑က်ဘီး၊
\q1 ဘွဲ့နာမအားလောင်းဂူထတ် ကီးမြတ်ဟှူ ဘွဲ့နာမဟှို ပေးဟှားဟှယ်။
\q1
\v 10 အယ်ကြောန့် မိုးကောန်းဂန်၊ မ္လေဂီးထတ်န မ္လေဂီးအော့‑က်မာ\f + \fr ၂.၁၀ \fr*\fk မ္လေဂီးအော့‑က်မာ၊ \fk*\ft သေဟှားဟှူလူလေဟှာ မှောန်ထဲမာ ဆစ်ဘီးဟှာ ရှိနေဟှယ် ဆိုဘီး ယူဆဂေ့ဟှယ်။\ft*\f* ရှိနေဟှူ သတ္တဝါအားလောင်းဂူဟှာ
\q2 သခင်ယေရှုရဲ့ နာမတော်ဟှို ရိုသေဦးညွှတ်ဘီးဟှာ၊
\q1
\v 11 ယေရှုခရစ်တော်ဟှာ သခင်ဖြစ်ဟှယ် ဆိုဇာဟှို နှောက်နဝန်ခံဘီး၊
\q2 ခမည်းတော်ဘုရားသခင်ရဲ့ ဖောင်းသရေတော်ဟှို ချီးမြှော့‑က်ထွန်းတော့‑က် စေဂေ့လေ့မယ်။
\s လောကမာ လန်းရောန်မျိုးဘဲ့ ထွန်းလန်းဘီး တော့‑က်ပကြောန်း
\p
\v 12 ရှစ်ရဟှူသူလေ၊ နန်းနို့န ငါဟှာ ရှိနေဟှူခီဒူးဟှ နန်းနို့ဟှာ ငါ့စကားဟှို မြဲဒမ်း နားထောန်မျိုးဘဲ့ ငါ့နော့‑က်ကွယ်မာလည်း မြဲဒမ်းနားထောန်ဘီးဟှာ ရရာတိုင်း ကြော့‑က်ဟှူစိန ကိုယ့်ကိုယ်ကိုယ် ကယ်တန်ဟှို့တွပ် ကိုယ်တိုင် ကြိုးစာအားထုဂေ့ပါ။ 
\v 13 ဖြားဖြစ်ကြောန့်နူးဆိုဟှာ စေတနာစိ ရှိဟှူတိုင်း ဆန္ဒရှိဟှို့န လောက်ဆောင်ဂေ့ဟှို့တွပ် နန်းနို့ထဲမာ လောက်ဆောင်တော်မူဟှူ သခင်ဟှာ ဘုရားသခင်ဖြစ်ဟှယ်။
\p
\v 14 နန်းနို့ဟှာ ဖြားဘဲ့လောက်လောက် ညီးတွားရှင်း၊ ဂြင်းခူရှင်း ရှိဘဲန လောက်ဆောန်ဂေ့ပါ။ 
\v 15 အယ်မျိုးလောက်မှ နန်းနို့ဟှာ ဖော့‑က်ပ္လန်ဘီးဟှာ ပြစ်ကျူးလွန်နေဟှူ လူလေရှိဟှူ အယ်လောကမာ ဘုရားသခင်ရဲ့ ပြစ်တန်ဇာမှေ့ဘဲ့ဟှူ သားမီးနေန စိနှလောင်း ဖ္လူစင်သန့်ရှင်းဘီးဟှာ ပြစ်ကင်းဟှူလူလေ ဖြစ်ဂေ့လေ့မယ်။ 
\v 16 နန်းနို့ဟှာ ထာဝရသတ်န ဆိုင်ဟှူ တရားတော်ဟှို ဟောပြောဘီးဟှာ အယ်လူလေလယ်မာ ကြယ်လေမျိုးဘဲ့ လန်းဘီးဟှာ တော့‑က်ပဂေ့လေ့မယ်။ အယ်မျိုးလောက်မယ် ဆိုဟှာ ငါဟှာ အားထုဘီးဟှာ လောက်ဆောန်ဇာမှန်မျှဟှာ ချည်းနှီးဖြစ်ဘဲန ခရစ်တော်ရဲ့နေ့ရစ်မာ ငါ့မာ ဂေါင်ယူဝါကြွားစရာ ကြောန်းလေ ရှိလေ့မယ်။
\p
\v 17 နန်းနို့ရဲ့ ယောင်ကြည်ရှင်းဟှ ဘုရားသခင်ဟှို ပူဇော်ဟှူယဇ်ထတ်မာ ငါ့ရဲ့ သတ်နသွီးဟှို သွန်းလောင်းရမယ် ဆိုဟှာ ငါဟှာ ဝန်းသာဘီး နန်းနို့နတူးဒူ ဝန်းသာဟှယ်။ 
\v 18 နန်းနို့ဟှာ ဝန်းသာဘီးဟှာ ငါ့နတူးဒူ ဝန်းသာဂေ့ပါ။
\s တိမောသေန ဧပဖြောဒိတ်ကြောန်း
\p
\v 19 ငါဟှာ နန်းနို့ကြောန်း ဒန်းကောန်းဟှို ကြားဘီးဟှာ အားတတ်လာဟှို့ သခင်ယေရှုဟှာ လိုတော်ရှိမယ် ဆိုဟှာ တိမောသေဟှို နန်းနို့နားဟှို ကြာခန်မာ လွှတ်ဟှို့တွပ် ငါဟှာ မျှော်လင့်ဟှယ်။ 
\v 20 တိမောသေ တယော့‑က်ဘဲ့ ငါ့နဘောတူဘီး နန်းနို့ရဲ့ ကျိုးဖြစ်ဟှို့တွပ် မှန်တကယ်လိုရှင်ဟှူ လူဖြစ်ဟှယ်။ 
\v 21 တခြားလူလေဟှာ ကိုယ်ကျိုးဘဲ့ ရှာဂေ့ဟှယ်။ ယေရှုခရစ်တော်ရဲ့ကျိုးဟှို ရှာဂေ့ဟှ။ 
\v 22 တိမာသေန ငါဟှာ သားဖမျိုးဘဲ့ တူးဒူ ဒန်းကောန်းဟှို ပ္လံ့နှံ့ဟှို့တွပ် မှုတော်ဟှို ဖယ်မျိုးစေခံဟှယ်နူး ဆိုဇာဟှို နန်းနို့ဟှာ သိဂေ့ဟှယ်။ 
\v 23 အယ်ကြောန့် ငါ့ရဲ့ မှုကိစလေဟှာ ဖယ်မျိုးဖြစ်နူး ဆိုဇာဟှို သိဟှူ ခီမာ သူ့ဟှို နန့်နို့နားဟှို လွှတ်နိုင်ဟှို့တွပ် ငါဟှာ မျှော်လင့်နေဟှယ်။ 
\v 24 သခင်ဘုရားဟှို ယောင်ကြည် ကိုးစားဘီး ငါကိုယ်တိုင်ဘဲ့ ကြာခန်မာ နန်းနို့နားဟှို လာနိုင်လေ့မယ်။
\p
\v 25 ငါ့ရဲ့ လောက်ဖော်ဆောန်ဖတ်၊ ငါ့နတူးဒူ တိုက်ပွဲဝမ်ဟှူလူ၊ ငါ့ဟှို ပြုစုဟှို့တွပ် နန်းနို့လေ လွှတ်လိုက်ဟှူလူ၊ နို့လေရဲ့ညီ စေတမန်ဖြစ်ဟှူ ဧပဖြောဒိတ်ဟှို နန်းနို့နားဟှို လွှတ်ဟှို့တွပ် လိုအပ်နေဟှယ် ဆိုဇာဟှို ငါဟှ ယူဆဟှယ်။ 
\v 26 သူဟှာ နန်းနို့အားလောင်းဂူဟှို လွမ်းဘီးဟှာ မြဲဒမ်းဒိရနေဟှယ်။ သူဖျားနေဟှူ ဒန်းဟှို နန်းနို့ဟှ ကြားဟှူကြောန့် သူဟှာ စိကောန်းဘဲ ဖြစ်နေဟှယ်။ 
\v 27 သူဟှာ တကယ်ဘဲ့ သေခါနီးဖြစ်အောန် ဖျားနေဟှယ်။ အယ်ဘေမဲ့ ဘုရားသခင်ဟှာ သူ့ဟှို သနားလေဟှယ်။ သူ့ဟှိုဘဲ့ သနားဇာမှုဟှ။ ငါ့ဟှိုလည်း ထတ်ဘီးဟှာ ဝန်းနဲ့ဟှူ ဇာလေန တွိကြောင်ဘဲနေ ရဟှို့တွပ် သနားဟှယ်။ 
\v 28 အယ်ကြောန့် နန်းနို့ဟှာ သူ့ဟှို နော့‑က်တခါ တွိရဟှူကြောန့် ဝန်းသာဂေ့ဟှိုတွပ်ရော၊ ငါ့ရဲ့ ဝန်းနဲဟှူ ဇာလေလည်း ပျော့‑က်ဟှားဟှို့တွပ်ရော သူ့ဟှို နန်းနို့နားဟှို လွှတ်ဟှို့တွပ် ငါဟှာ ပိုဘီးဟှာ စိအားထတ်သန်ဘီး နေဟှယ်။ 
\v 29 နန်းနို့ဟှာ သခင်ဘုရားဟှို ထော့‑က်ဘီး သူ့ဟှို ညီကိုတယော့‑က်နေန ဝန်းသာဘီးဟှာ ကြိုဆိုဂေ့ပါ။ အယ်မျိုးလူဟှိုလည်း ရိုသေဘီးဟှာ လေးစားဂေ့ပါ။ 
\v 30 သူဟှာ နန်းနို့လေကိုယ်တိုင် ပေးနိုင်ဘဲ့ဟှူ ကူညီလေဟှို ငါ့ဟှို ပေးနိုင်ဘီးဟှာ သတ်စွန့်ဘီးဟှာ ခရစ်တော်ရဲ့မှုတော်ဟှို သေခါနီးထိ ကြိုးစားဘီးဟှာ ထမ်းဆောန်ဟှယ်။
\c 3
\s စစ်မှန်ဟှူ ဖြောန့်မတ်ရှင်းကြောန်း
\p
\v 1 ညီကို မောန်နှမလေ၊ နော့‑က်ဆောင်း ပြောရမယ် ဆိုဟှာ သခင်ဘုရားန တလောင်းတဝဒဲဖြစ်ဘီး ဝန်းသာဂေ့ပါ။ ရင်ဟှ ငါရေးဘီးဟှာ ဖော်ပြဟှားဟှူ ကြောန်းရာလေဟှို ခုလည်းထပ်ဘီးဟှာ ဖော်ပြရဟှူဇာဟှာ ဝန်လေးဟှ၊ နန်းနို့လေပိုဘီးဟှာ လောင်ခြောင်ဟှို့တွပ်ဖြစ်ဟှယ်။ 
\v 2 ခွီးဖြစ်ဟှူလူ၊ ကောန်းဘဲ့ဟှူကျင့်ဟှို ကျင့်ဟှူလူ၊ ကိုယ်အင်္ဂါဟှို လှီးဖြတ်ရမယ် ဆိုဘီး ပြောဟှူလူလေဟှို ဒိနရှောန်ဂေ့ပါ။ 
\v 3 ရေဖျားလှီးမင်္ဂလာ စစ်စစ်ခံရဟှူလူလေဟှာ အယ်လူလေမှုဘဲ့န နို့လေဘဲ့ဖြစ်ဟှယ်။ ဖြားဖြစ်ကြောန့်နူးဆိုဟှာ နို့လေဟှာ ကိုယ်တော်ရဲ့ ဝိညာဉ်တော်ကြောန့် ဘုရားသခင်ဟှို ကိုးကွယ်ဝတ်ပြုဘီး ယေရှုခရစ်တော်န တလောင်းတဝဒဲ ဖြစ်ဟှူကြောန့် ရွှင်လန်းဘီး ဝန်းသာဟှူ လူလေ ဖြစ်ဟှယ်။ နို့လေဟှာ ပ္လန်ဟှ လတ်ခဏာလေဟှို ကိုးစားဟှ။ 
\v 4 အယ်ဘေမဲ့ ဇာတိနှိုက် အားကိုးဇာလည်း ငါ့မာ ရှိဟှယ်။ ယော့‑က်ယော့‑က်ဟှ ပ္လန်ဟှ လတ်ခဏာလေဟှို အားကိုးဇာ ရှိမယ် ဆိုဟှာ ငါ့မာလည်း သူ့ထတ်ပိုဘီးဟှာ အားကိုးနိုင်ဟှူ ကြောန်းလေရှိဟှယ်။ 
\v 5 \x - \xo ၃.၅ က \xo*\xt ရော ၁၁.၁; \xt*\xo ခ \xo*\xt တ ၂၃.၆; ၂၆.၅\xt*\x*ငါဟှာ ရှစ်ရစ်မြော့‑က်နေ့မာ ရေဖျားလှီး မင်္ဂလာဟှို ခံဘီးဟှာ ဣသရေလလူမျိုး ဗင်္ယာမိန်နွယ်ဝမ်၊ ယုဒလူမျိုးဖြစ်ဟှူ မိဖလေဟှနေဘီးဟှာ မွီးလာဟှူလူ ဖြစ်ဟှယ်။ ပညတ်တရား စောန့်ထီးဟှူ ဇာန ပတ်သတ်ဘီး ပြောရမယ် ဆိုဟှာ ငါဟှာ ဖာရိရှဲ ဂိုဏ်းဝမ် ဖြစ်ဟှယ်။ 
\v 6 \x - \xo ၃.၆ \xo*\xt တ ၈.၃; ၂၂.၄; ၂၆.၉–၁၁\xt*\x*ဘာသာရေး စိအားကီးဟှူ ဖတ်မာပြောမယ် ဆိုဟှာ သင်းတော်လေဟှို ညှဉ်းဆဲ နှိစစ်ဟှူလူ ဖြစ်ဟှယ်။ ပညတ်တရားဟှို လိုက်ရှော့‑က် ရှင်းအားဖြင့် ဖြောန့်မတ်မယ် ဆိုဟှာ ငါဟှာ ပြစ်တန်ဇာမှေ့ဘဲ့ဟှူ လူဖြစ်ဟှယ်။ 
\v 7 အယ်ဘေမဲ့ အယ်ဇာလေဟှ ငါ့တွပ် မ္လတ်ဖြစ်ဟှယ် ဆိုဘီး ပြောနိုင်ဘေမဲ့ ခုဟှ ခရစ်တော်တွပ်ကြောန့် ရှောင်းဘဲ့ဖြစ်ဟှယ် ဆိုဘီး မှတ်လိုက်ဟှယ်။ 
\v 8 အယ်မျှလော့‑က်ဘဲ့ မှုဘဲန ငါ့ရဲ့ သခင်ခရစ်တော်ဟှို သိကျွမ်းရဇာဟှာ အယ်ဇာလေနရော၊ အားလောင်းလေရဲ့ ထတ်မာ တဂိုးရှိဟှူကြောန့် အယ်ဇာလေဟှိုရော ရှောင်းဘဲ့ဖြစ်ဟှယ် ဆိုဘီး ငါမှတ်ဟှယ်။ ငါဟှာ ကိုယ်တော်တွပ် ရာအားလောင်းဂူဟှို ပစ်လိုက်ဟှယ်။ ယေရှုခရစ်တော်ဟှို မ္လတ်ရဟှို့ရော၊ ကိုယ်တော်န တလောင်းတဝဒဲ ဖြစ်နိုင်ဟှို့ရော အယ်ဇာလေဟှို မှိုက်လေမျိုးဘဲ့ ငါဟှာ သတ်မှတ်ဟှယ်။ 
\v 9 ငါဟှာ ပညတ်တရားဟှို စောန့်ထီးဟှူကြောန့် ဖြောန့်မတ်ဟှူဇာဟှို ရဇာမှုဟှ ခရစ်တော်ဟှို ယောင်ကြည်ကြောန့်ဘဲ့ ဖြောန့်မတ်ရှင်းဟှို ရဟှယ်။ အယ်မျိုးဘဲ့ ဘုရားသခင်ပေးသနားဟှူ ဖြောန့်မတ်ရှင်းဟှာ ယောင်ကြည်ရှင်းမာဘဲ့ ခြေခံဟှယ်။ 
\v 10 ငါဟှာ ခရစ်တော်ဟှို သိကျွမ်းဇာ၊ ရှင်ပ္လန်ထမြော့‑က်ဟှူ တဂိုးတော်ဟှို ခံစားရဟှူဇာ၊ ခရစ်တော်နတူးဒူ ဆင်းရဲဒေါက်ခခံရဟှူဇာ၊ ကိုယ်တော်သေခံဟှူဇာမာ ပါဝမ်နိုင်ဟှို့တွပ် လိုရှင်တောန်းတဟှယ်။ 
\v 11 အယ်မျိုးမှုဘဲ ငါကိုယ်တိုင်သေဘီးဟှာ ရှင်ပ္လန်ထမြော့‑က်ဟှူခွမ့်ဟှို ရမယ် ဆိုဇာဟှို မျှော်လင့်နိုင်ဟှယ်။
\s ပန်းတိုင်ဟှိုကေ့ဘီး ပ္လေးဟှူကြောန်း
\p
\v 12 ငါဟှာ အောန်မြင်ဘီးဟှာ ပြစ်မှေ့ဟှ ဆိုဇာဟှို ပြောရှင်ဇာ မှုဟှ။ အယ်ဘေမဲ့ အယ်ဆုဟှို ငါ့ဟှိုပေးဟှို့တွပ် ယေရှုခရစ်တော်ဟှာ ငါ့ဟှို ဆွဲခေါ်ဘီး ရဟှားဟှူကြောန့် ငါဟှာ အယ်ဆုဟှို ရနိုင်ဟှို့တွပ် ကြိုးစားဘီးနေဟှယ်။ 
\v 13 ညီကို မောန်နှမလေ၊ ငါဟှာ အယ်ဆုဟှို ရဟှားဟှယ် ဆိုဘီး ထန်ဟှ၊\f + \fr ၃.၁၃ \fr*\fq ထန်ဟှ၊ \fq*\ft တချို့ မူရင်းလတ်ရေးမူလေမာ \ft*\fqa ခုထိ ထန်ဟှ။\fqa*\f* ငါလောက်ဟှူ တခုဒဲဖြစ်ဟှူဇာဟှ ငါ့နော့‑က်မာ ရှိနေဟှူဇာလေဟှို မေ့ပစ်ဘီးဟှာ ငါ့ရှေ့မာ ရှိနေဟှူဇာလေနားဟှို ရော့‑က်ဟှို့တွပ် စွမ်းဂူကြိုးစားဟှယ်။ 
\v 14 အယ်ကြောန့် ငါဟှာ ဆုဟှိုရဟှို့တွပ် ပန်းတိုင်ဟှို ရှေ့ရှုဘီးဟှာ ပ္လေးဟှယ်။ အယ်ဆုဟှာ ထတ်ရပ်မာ သတ်ရှင်ဟှို့တွပ် ယေရှုခရစ်တော်ကြောန့် ဘုရားသခင်ဟှ ဖိခေါ်ဇာဘဲ့ ဖြစ်ဟှယ်။
\p
\v 15 အယ်ကြောန့် ဝိညာဉ်ရေးရာမာ ကီးထွားလူလေဟှာ အယ်မျိုးစိသဘောလေဟှာ ရှိသင့်ဟှယ်။ တချို့လေဟှ တူဘဲဟှူ စိသဘောရှိမယ် ဆိုဟှာ ဘုရားသခင်ဟှ အယ်ဇာဟှို ရှင်းရှင်းလန်းလန်းဟှား ဖော်ပြပေးလေ့မယ်။ 
\v 16 ဖယ်မျိုးဘဲ့ဖြစ်ဖြစ် နို့လေဟှာ ခုထတ်ထိ ကိုယ်ရှော့‑က်လာဟှူ ပေါင်ဇံတိုင်းဘဲ့ ကျင့်ဂေ့ဇို့။
\p
\v 17 \x - \xo ၃.၁၇ \xo*\xt ၁ ကော ၄.၁၆; ၁၁.၁\xt*\x*ညီကို မောန်နှမလေ၊ နန်းနို့လေဟှာ ငါ့နားမာ တုယူဂေ့။ နို့လေပြဟှူ စံနမူနာကောန်းလေဟှို သတ်ရှင်ဘီး လိုက်နာဂေ့ဟှူလူလေဟှို ရှုမှတ်ဂေ့ပါ။ 
\v 18 ဖြားဖြစ်ကြောန့်နူးဆိုဟှာ နန်းနို့ဟှို မကြာမကြာ ငါဟှာ ဖော်ပြဖူးဟှယ်။ ခုလည်း မျစ်ရယ်က္လဘီးဟှာ ဖော်ပြဟှယ်။ ခရစ်တော်ရဲ့ လတ်ဝါးကပ်တိုင်ထတ်မာ သေခံရှင်းတရားန ဆန့်ကျင်ဘီးကျင့်နေဟှူ လူလေဘောင်ဂီး ရှိနေဟှယ်။ 
\v 19 အယ်လူလေဟှာ ငရဲမာလမ်းဆောင်းဘီး ပျစ်စီးဂေ့လေ့မယ်။ သူးနို့လေရဲ့ ဘုရားဟှ သူးနို့ဗိုက်ဘဲ့ ဖြစ်ဟှယ်။ သူးနို့ဟှာ ရှစ်ကြော့‑က်ရဟှူဇာလေဟှို ချီးမွမ်းဘီး ကြွားဂေ့ဟှယ်။ လောကဟှ ဇာလေဟှိုဘဲ့ စိစွဲလမ်းဂေ့ဟှယ်။ 
\v 20 နို့လေဟှ ကောန်းဂန်နိုင်ငံသား ဖြစ်ဟှူကြောန့် ကောန်းဂန်ဘောင်မာ နို့လေရဲ့ ကယ်တန်ရှင် သခင်ယေရှုခရစ်တော် ကြွလာဟှူဇာဟှို စောန့်မျှော်ဘီး ရှိနေဂေ့ဟှယ်။ 
\v 21 ကိုယ်တော်ဟှာ ရာအားလာင်းဂူဟှို သူ့ရဲ့ အာဏာစစ်အော့‑က်မာ ရော့‑က်စေဟှူ တဂိုးတော်ကြောန့် နို့လေရဲ့ သေတတ်ဟှူ ကိုယ်ခန္ဓာဟှို ဖောင်းသရေတော်န ပ္လဲ့ဇောင်ဟှူ ကိုယ်ခန္ဓာနတူအောန် ပ္လောန်းလဲပေးလေ့မယ်။
\c 4
\s ညွှန်ကြားချစ်လေကြောန်း
\p
\v 1 အယ်ကြောန့် ငါဝန်းသာဟှူဇာကြောန်းန ငါ့ရဲ့ သရဖူဖြစ်ဟှူ ငါ့ညီကို မောန်နှမလေ၊ နန်းနို့ဟှို ငါဟှာ ရရာတိုင်းရှစ်ဘီးဟှာ လွမ်းနေဟှယ်။ ငါဟှာ နန်းနို့လေကြောန်းကြောန့် ဂေါင်ယူဟှယ်။ ငါရှစ်ရဟှူ ညီကို မောန်နှမလေ၊ သခင်ဘုရားမာ ခိုင်ခိုင်မြဲမြဲဟှား ရပ်နေဂေ့ပါ။
\p
\v 2 ဧဝေါဒိန သုန္တုတ်လေ၊ သခင်ဘုရားရဲ့ တဗဲ့တော်မ ပီသဘီး စိသဘောညီညွတ်ဟှူဇာ ရှိဂေ့ဟှို့တွပ် ငါဟှာ တောန်းဗန်ဟှယ်။ 
\v 3 ငါ့ရဲ့ လောက်ဖော်ဆောန်ဖတ်ဖြစ်ဟှူ နန်ဟှာ အယ်မီးမလေဟှို ကူညီမစပါ။ နန့်ဟှို ငါဟှာ တိုက်တွန်းဟှယ်။ သူးနို့လေဟှာ ဒန်းကောန်းပြောဟှူ ခီမာ ငါ့နတူးဒူ ကြိုးစားဘီး လောက်ဆောန်ဟှူ လောက်ဖော်ဆောန်ဖတ် ဖြစ်ဂေ့ဟှယ်။ အယ်မျိုး လောက်ဆောန်ဟှူ လူလေထဲမာ ကလေမန်းနတူးဒူ ဘုရားသခင်ရဲ့ သတ်စာစောန်မာ နာမယ်ပါဟှူ တခြား ငါ့ရဲ့ လောက်ဖော်ဆောန်ဖတ်လေလည်း ပါဝမ်ဟှယ်။
\p
\v 4 နန်းနို့ဟှာ သခင်ဘုရားန တလောင်းတဝဒဲ ဖြစ်ဟှူကြောန့် ဝန်းသာဂေ့ပါ။ နော့‑က်တခါ ငါပြောမယ် ဝန်းသာဂေ့ပါ။
\p
\v 5 နန်းနို့လေရဲ့ နူးညံ့သိမ်မွေ့ဟှူ စိသဘောဟှို လူလေဟှို ဗြင်စေဂေ့ပါ၊ သခင်ဘုရား ပ္လန်ကြွလာဟှို့ခီ နီးနေဘီ။ 
\v 6 ဖယ်မှုဟှိုလည်း စိုးရိမ်ဘဲ့န ဖြစ်လာဟှူ မှုရာလေတွပ် ကျေးဇူးတော် ချီးမွမ်းရှင်းန ဆုတောန်းဘီးဟှာ နန်းနို့ လိုရှင်ဇာလေဟှို ဘုရားသခင်မာ တောန်းလျှော့‑က်ဂေ့ပါ။ 
\v 7 အယ်မျိုးလောက်မယ် ဆိုဟှာ ဖယ်သူလည်း ကြံစည်တတ်စွမ်းနိုင်ဟှို့ မှီဘဲ့ဟှူ ဘုရားသခင်ရဲ့ ငြီသတ်ရှင်းဟှာ ယေရှုခရစ်တော်န နန်းနို့ဟှာ တလောင်းတဝဒဲ ဖြစ်ဟှူကြောန့် နန်းနို့ရဲ့ စိနှလောင်းန ကြံစည်လေဟှို ကာကွယ်စောန့်ရှော့‑က်လေ့မယ်။
\p
\v 8 ညီကို မောန်နှမလေ၊ နိဂေါင်းချောက် ပြောရမယ် ဆိုဟှာ နန်းနို့ဟှာ ဖြောင့်မတ်ရှင်း၊ မှန်ကန်ရှင်း၊ မွန်မြတ်ရှင်း၊ စင်ကြယ်ရှင်း၊ နှစ်သက်ဖွယ်ကောန်းရှင်းန အသရေရှိရှင်းဖြစ်ဟှူ ကောန်းမြတ်ရှင်းလေန ချီးမွမ်းဖွယ်ဖြစ်ရှင်းလေ ရှိဟှူမျှလေဟှို နှလောင်းသွမ်းဂေ့ပါ။ 
\v 9 ငါ့နားဟှနေ နန်းနို့ကြားဘီး ဗြင်ရဟှူဇာလေဟှို ကျင့်ဂေ့ပါ။ အယ်မျိုးကျင့်မယ် ဆိုဟှာ ငြီသတ်ရှင်းရဲ့သခင် ဘုရားသခင်ဟှာ နန်းနို့နတူးဒူ ရှိလေ့မယ်။
\s လှူလေဟှို လတ်ခံရတွပ် ကျေးဇူးတန်ကြောန်း
\p
\v 10 ခီလေဘောင်ဂီးကြာဘီးမှ နန်းနို့ဟှာ ငါဟှို လေးထားဘီးဟှာ စဉ်းစားပေးဟှူစိဟှာ နော့‑က်တခါ ပြဂေ့ဟှူကြောန့် ငါဟှာ သခင်ဘုရားန တလောင်းတဝဒဲ ဖြစ်ဟှူသူ တယော့‑က်နေန ရရာတိုင်း ဝန်းသာဟှယ်။ ရင်ခါဒူးဟှ နန်းနို့ဟှာ ငါဟှို မြစ်တာစေတနာ ထားဘဲ့နေဟှယ် ဆိုဘီး ငါပြောဟှ။ အယ်စေတနာမြစ်တာဟှို ပြနိုင်ဘဲ့ဟှူကြောန်းဘဲ့ ပြောဇာဖြစ်ဟှယ်။ 
\v 11 ငါ့ဟှို နန်းနို့ဟှ ပယ်ဘီးဟှာ ထားဟှားဟှူကြောန့် ယူဆဘီးဟှာ အယ်စကားဟှို ပြောဟှူဇာလည်း မှုဟှ။ ငါဟှာ ကိုယ်မာရှိဟှူဇာနဘဲ့ ရောက်ရဲဘီး နေနိုင်ဟှို့တွပ် သန်ယူဟှားဟှယ်။ 
\v 12 ငါဟှာ ရရာတိုင်း ငတ်နေဇာဘဲ့ ဖြစ်စေ၊ ရရာတိုင်း စားရဟှူဇာဘဲ့ ဖြစ်စေ၊ ချို့ချို့တတ်တတ်ဘဲ့ ဖြစ်စေ၊ ပိုလျှံနေဟှူဇာဘဲ့ ဖြစ်စေ၊ ဖယ်မျိုးခြေနေ၊ ဖယ်မျိုးနေရာမာဘဲ့ ဖြစ်စေ၊ ကျေကျေနပ်နပ်ဟှား နေနိုင်ဟှို့တွပ် သန်ယူဟှားဟှယ်။ 
\v 13 ခရစ်တော်နားဟှရဟှူ ခွန်အားကြောန့် ငါဟှာ ဖယ်မျိုးခြေနေမျိုးဘဲ့ ကြောင်ရကြောင်ရ ရင်ဆိုင်နိုင်ဟှယ်။
\p
\v 14 ဖယ်မျိုးဘဲ့ဖြစ်ဖြစ် ငါဟှာ ဆင်းရဲဒေါက်ခ တွိကြောင်ရဟှူ ခီမာ နန်းနို့ဟှာ မျှဝီခံစားဘီး ကောန်းကောန်းဟှား ပြုစုဂေ့ဟှယ်။ 
\v 15 \x - \xo ၄.၁၅,၁၆ \xo*\xt ၂ ကော ၁၁.၉\xt*\x*ဖိလိပ္ပိသင်းသားလေ၊ ငါဟှာ မာကေဒေါနိပြည်ဟှနေ ထွပ်ဟှားဘီး ဒန်းကောန်းဟှို စဘီးကြေညာဟှူ ခီမာ နန်းနို့သင်းတော်ဟှဘဲ ငါ့ဟှို ကူညီဟှူကြောန့် မှုတော်ဆောန်လောက်ငန်းမာ နန်းနို့ဘဲ့ ငါ့နတူးဒူတွဲဘီးဟှာ ပေးလှူရှင်းန လတ်ခံရှင်း ရှိဘီးဟှာ ဝီမျှဂေ့ဟှူကြောန်းဟှို နန်းနို့ ကိုယ်တိုင်ဘဲ့ ကောန်းကောန်းသိဟှယ်။ 
\v 16 \x - \xo ၄.၁၆ \xo*\xt တ ၁၇.၁\xt*\x*သက်သာလောနိတ်ဗြို့မာ ရှိဟှူခီဒူဟှ ငါလိုရှင်ဟှူကူညီဟှို နန်းနို့ဟှာ နှေ့ခါတိုင်အောန် ပို့ပေးဂေ့ဟှယ်။ 
\v 17 အယ်မျိုးပြောဇာဟှာ ငါဟှာ လှူဟှို လိုရှင်ဟှူကြောန့် မှုဟှ။ နန်းနို့ရဲ့ ကပ်စာရင်းလေမာ မ္လတ်တိုးလာဇာဟှို ငါဟှာ လိုရှင်ဟှယ်။ 
\v 18 နန်းနို့ပေးလိုက်ဟှူ လှူပစ်စီးအားလောင်းဂူဟှို ရဟှူကြောန်းဟှို အယ်မူဖော်ပြဟှားဟှယ်။ အယ်လှူ ပစ္စည်းလေဟှို ဧပဖြောဒိတ်ဟှ ယူလာပေးဟှူကြောန့် ငါလိုရှင်ဇာလေရဟှယ်။ အယ်ဇာလေဟှာ မွီးကြိုင်ဟှူပူဇော်သကာ၊ ဘုရားသခင်လတ်ခံဘီး နှစ်သက်ဟှူ ယစ်မျိုးဘဲဖြစ်ဟှယ်။ 
\v 19 ငါ့ရဲ့ ဘုရားသခင်ဟှာ ဂေါင်သရေန စည်းဇိမ်အောက်စာ ကြွယ်ဝမျိုး၊ နန်းနို့ဟှို ယေရှုခရစ်တော်ကြောန့် နန်းနို့ လိုရှင်ဇာမှန်မျှဟှို ပေးသနားပါစေ။ 
\v 20 နို့လေရဲ့ဖ ဘုရားသခင်ဟှာ ကမ္ဘာဆစ်ဆစ် ဖောင်းကီးတော်မူပါစေ။ အာမင်။
\s နော့‑က်ဆောင်း နှောက်ဆစ်ဟှူစကား
\p
\v 21 ယေရှုခရစ်တော်နှိုက် ရှိဟှူ သန့်ရှင်းသူလေဟှို နှောက်ဆစ်ပေးဂေ့ပါ။ ငါ့နတူးဒူ ရှိဂေ့ဟှူ ညီကို မောန်နှမလေဟှလည်း နန်းနို့ဟှို နှောက်ဆစ်လိုက်ဟှယ်။ 
\v 22 ယေရှုခရစ်တော်နှိုက် ရှိဟှူ သန့်ရှင်းသူလေဟှို နှောက်ဆစ်ပေးဂေ့ပါ။ ထူးသဖြင့် ကဲသာမန်းဂီးရဲ့ အီမာရှိနေဟှူ ညီကိုမောန်နှလေဟှ နှောက်ဆစ်လိုက်ဟှယ်။
\p
\v 23 သခင်ယေရှုခရစ်တော်ရဲ့ ကျေးဇူးတော်ဟှာ နန်းနို့ ဝိညာဉ်နတူးဒူ ရှိပါစေ။