\id GAL - Dawei Bible Translation
\usfm 3.0
\ide UTF-8
\ide 65001 - Unicode (UTF8)
\h ဂလာတိ
\toc1 ဂလာတိ သင်းတော်ဟှို ပေါလုရဲ့ ပေးစာ
\toc2 ဂလာတိ
\toc3 ဂလာ
\mt1 ဂလာတိ
\mt2 ဂလာတိ သင်းတော်ဟှို ပေါလုရဲ့ ပေးစာ
\is နိဒါန်း
\im \bk ဂလာတိ သင်းတော်ဟှို ပေါလုရဲ့ ပေးစာ\bk*ဟှို တမန်တော်ပေါလုဟှ ရေးဟှားဟှယ် (\xt ၁.၁\xt*)။ အယ်ပေးစာဟှို ခရစ်တော် မွီးဘီးန ၄၈—၅၇ ခုနှစ်ကြားမာ ပေါလုဟှာ ဂလာတိ သင်းတော်လေဟှို ရေးဟှားဟှယ်။ ဂလာတိ လူလေဟှာ ရောမပြည်ရဲ့ ဂလာတိဗြို့မာ နေဂေ့ဟှယ် ဆိုဘီး ယူဆဂေ့ဟှယ်။ ပေါလုဟှာ အယ်ပေးစာဟှို ဖယ်နေရာဟှနေ ရေးဟှားဟှယ် ဆိုဇာဟှို ကျမ်းစာပညာရှင်လေ သိဂေ့ဟှ။ အယ်ဘေမဲ့ ကောရိန့်ဗြို့န ဧဖက်ဗြို့ဟှနေ ရေးဟှားဟှယ် ဆိုဘီး သူးနို့ဟှ ခန့်မှန်းဂေ့ဟှယ်။
\ip ပေါလုဟှာ ဂလာတိဗြို့ဟှ သင်းတော်လေမာရှိဟှူ ယုဒလူမျိုး ခရစ်ယာန်လေန ယုဒလူမျိုးမှုဘဲဟှူ ခရစ်ယာန်လေနားဟှို ရေးဟှားဟှယ်။ သူဟှာ ဓမ္မဟောန်းကျမ်းထဲဟှ ယုဒလူမျိုးလေရဲ့ ပညတ်တရားတိုင်း ယုဒလူမျိုး ခရစ်ယာန်လေလည်း ရေဖျားလှီးဟှို့ လိုအပ်ဟှယ် ဆိုဘီး မှားယွင်းဟှူ သွန်သန်ဇာဟှို ဆန်ကျင့်ဟှို့ ရေးဟှားဟှယ်။ အယ်နေရာမာ ယုဒလူမျိုး ခရစ်ယာန်လေဟှ ယုဒလူမျိုးမှုဘဲဟှူ ခရစ်ယာန်လေဟှို ရေဖျားလှီးရမယ် ဆိုဘီး တောန်းဆိုနေဂေ့ဟှယ်။ သူးနို့ဟှာ ပေါလုရဲ့ တမန်တော် ခွမ့်အာဏာဟှိုလည်း မေးခွန်းထုဟှားဟှယ်။ ပေါလုဟှာ ဖြစ်ပျစ်တချို့ဟှို ပြောပြဘီး သူ့ရဲ့ တမန်တော် ခွမ့်အာဏာဟှို ခုခံဖြေရှင်းဟှားဟှယ် (\xt ၁.၁၁—၂.၁၄\xt*)။ သူဟှာ ယေရှုခရစ်ဟှို ယောင်ကြည်ဇာအားဖြင့်ဘဲ့ ကယ်တန်ခံရမယ် ဆိုဘီး ရှင်းပြဇာအားဖြင့် ဒန်းကောန်းဟှို ခုခံဖြေရှင်းဟှားဟှယ် (\xt ၂.၁၆\xt*)။ အယ်မျိုးဖြစ်လာဇာဟှာ လူလေရဲ့ လုပ်ဆောန်ဇာကြောန့်မှုဘဲ ဘုရားသခင်ရဲ့ ကရုဏာကြောန့် ဖြစ်ဟှယ်။
\iot ကြောန်းရာ ကျဉ်းချောက်
\io1 ၁။ ပေါလုဟှာ ဂလာတိဗြို့ဟှ သင်းတော်လေဟှို နှော့‑က်ဆစ်ဇာန နိဒါန်းပျိုးဟှားဟှူကြောန်း \ior (၁.၁–၅)\ior*
\io1 ၂။ ပေါလုဟှာ သူ့ရဲ့ မှန်ဟှူ သွန်သန်ဇာဟှ ခုခံဖြေရှင်းဟှို့တွပ် သူ့ရဲ့ နော့‑က်ကြောန်း ရာဇဝင်န ပညတ်တရားထဲမာ သတ်ရှင်ဟှို့ ကြိုးစာဘေမဲ့ ကြိုးစားနိုင်ဟှ ဆိုဘီး ရှင်းပြဟှားဟှူကြောန်း \ior (၁.၆—၂.၂၁)\ior*
\io1 ၃။ သူဟှာ ပညတ်တရားကြောန်းန ကယ်တန်ဇာန ဆိုင်ဟှူ ကျေးဇူးတော်ကြောန်းဟှို နော့‑က်ထပ် ရှင်းပြဟှူကြောန်း \ior (၃.၁—၄.၃၁)\ior*
\io1 ၄။ သူဟှာ ကောန်းဟှူခရစ်ယာန် သတ်ရှင်ပေါင်ဇံတွပ် ညွန်ကြားချစ်လေ တချို့ဟှို ပေးဟှားဟှူကြောန်း \ior (၅.၁—၆.၁၀)\ior*
\io1 ၅။ ပေါလုဟှာ ဘုရားသခင်အားဖြင့် လူသစ်ဖြစ်ပ္လောန်းလဲဇာဟှ ပြင်ပလတ်ခဏာဖြစ်ဟှူ ရေဖျားလှီးဇာထတ် ပိုဘီးရေးကီးကြောန်းဟှို အောက်မေ့ဟှို့ တောန်းဆိုဟှားဘီး အယ်ပေးစာဟှို နှောက်ဆစ်ဇာန နိဂေါင်းချောက်ဟှားဟှူကြောန်း \ior (၆.၁၁–၁၈)\ior*
\ie
\c 1
\po
\v 1 ငါပေါလုဟှာ လူတယော့‑က်အားဖြင့်လည်းမှု၊ လူလေအားဖြင့်လည်းမှုဘဲန ယေရှုခရစ်တော်ရဲ့ အခွမ့်အားဖြင့်နရော အယ်သခင်ဟှို သေရာဟှနေ ပ္လန်ရှင်စေဟှူ ဖဘုရားသခင်ရဲ့ အခွမ့်အားဖြင့်နပါ တမန်တော်ရာဟှို ပေးအပ်ခံရသူဖြစ်ဟှယ်။ 
\v 2 ငါ့နတူးဒူရှိနေဟှူ ယောင်ကြည်သူလေ အားလောင်းဟှာ ဂလာတိပြည်မာရှိဟှူ သင်းတော်လေဟှို နှောက်ဆစ်လိုက်ပါဟှယ်။
\po
\v 3 နို့လေရဲ့ဖဖြစ်ဟှူ ဘုရားသခင်န သခင်ယေရှု ခရစ်တော် ထံတော်ဟှနေ ကျေးဇူးတော်န ငြီသတ်ရှင်းဟှာ နန်းနို့မာရှိပါစေ။
\po
\v 4 နို့လေရဲ့ဖ ဘုရားသခင်ရဲ့ လိုတော်ဟှို နားထောန်ဘီး ခရစ်တော်ဟှာ နို့လေဟှို အယ်မူဆိုးရောက်ဟှူ ပစ္စုပ္ပန်ဘဝဟှ ကယ်တန်နိုင်ဟှို့ နို့လေရဲ့ ပြစ်လေတွပ် ကိုယ့်ကိုယ်ကိုယ် ပေးအပ်တော်မူဟှယ်။ 
\v 5 အယ်ဘုရားသခင်ဟှာ ကမ္ဘာဆစ်ဆစ် ဖောင်းကီးတော်မူပါစေ! အာမင်။
\s တခုဒဲရှိဟှူ ဧဝံဂေလိတရား
\p
\v 6 ခရစ်တော်ရဲ့ ကျေးဇူးတော်အားဖြင့်\f + \fr ၁.၆ \fr*\fq ခရစ်တော်ရဲ့ ကျေးဇူးတော်အားဖြင့်၊ \fq*\ft တချို့ မူရင်းလတ်ရေးမူလေမာ \ft*\fqa ကိုယ်တော်ရဲ့ ကျေးဇူးတော်အားဖြင့်၊ \fqa*\ft ဆိုဘီး ပါရှိဟှယ်။ \ft*\f* နန်းနို့ဟှို ခေါ်တော်မူဟှူသူဟှို အယ်မျိုးဗြန်းဗြန် စွန့်ဘီးဟှာ တခြားဧဝံဂေလိတရားဟှို လတ်ခံလိုက်ဟှူကြောန့် ငါရရာတိုင်း အံ့ဩဟှယ်! 
\v 7 မှန်ဆိုဟှာ “တခြား ဧဝံဂေလိတရား” ဆိုဇာမှေ့ဟှ။ ဖြားဖြစ်ကြောန့် ငါအယ်မျိုးပြောရနူးဆိုဇာဟှ နန်းနို့ဟှို ရှုတ်ထွေးအောန်လောက်ဘီး ခရစ်တော်ရဲ့ ဧဝံဂေလိတရားဟှို မှော့‑က်လှန်ရှင်ဟှူလူတချို့ ရှိနေကြောန့်ဖြစ်ဟှယ်။ 
\v 8 နို့လေဖြစ်ဖြစ်၊ ကောန်းဂန်ဘောင်ဟှနေလာဟှူ ကောန်းဂန်တမန်ဖြစ်ဖြစ် နန်းနို့ဟှို နို့လေဟောပြောဟှားဟှူ ဒန်းကောန်းန တူဘဲဟှူ ဒန်းကောန်းဟှို ဟောပြောမယ် ဆိုဟှာ ဟောပြောဟှူသူဟှာ ဘုရားသခင်ရဲ့ ကီရှင်းဟှို ခံရစေ! 
\v 9 နန်းနို့ခံယူဟှားဟှူ ဒန်းကောန်းနတူဘဲဟှူ ဒန်းကောန်းဟှို ဟောပြောမားဟှာ ဘုရားသခင်ရဲ့ ကီရှင်းဟှို ခံရစေ ဆိုဘီး နို့လေပြောဟှားဟှူတိုင်းဘဲ့ ခု ငါထပ်ဘီး ပြောဟှယ်။
\p
\v 10 ခု ငါဟှာ လူလေရဲ့ ထော့‑က်ခံမှုဟှို လိုက်ဇာလော။ ဘုရားသခင်ရဲ့ ထော့‑က်ခံမှုဟှို လိုက်ဇာလော။ ငါဟှာ လူလေကျေနပ်ဟှို့တွပ်ဘဲ့ စည်းရောင်းနေမယ် ဆိုဟှာ ငါဟှာ ခရစ်တော်ရဲ့ စေခံဖြစ်ဟှို့မှုဟှ။
\s ပေါလုတမန်တော်ဖြစ်လာကြောန်း
\p
\v 11 ယောင်ကြည်သူလေ၊ နန်းနို့ဟှို ငါဟောပြောဟှူဒန်းကောန်းဟှာ လူလေတီထွမ်ဟှားဟှူ ဒန်းကောန်းမှုဟှ ဆိုဇာဟှို နန်းနို့ဟှို ငါသိစေရှင်ဟှယ်။ 
\v 12 အယ်ဒန်းကောန်းဟှို ငါဟှာ ဖယ်သူ့ထံဟှလည်း လတ်ခံဟှားဇာမှုဟှ။ ဖယ်သူဟှလည်း ငါ့ဟှို သန်ပေးဟှားဇာမှုဟှ။ အယ်ဒန်းကောန်းဟှို ယေရှုခရစ်တော်ထံဟှနေ ဖွမ့်ပြမှုအားဖြင့် ငါလတ်ခံရရှိဇာဖြစ်ဟှယ်။
\p
\v 13 \x - \xo ၁.၁၃ \xo*\xt တ ၈.၃; ၂၂.၄,၅; ၂၆.၉–၁၁\xt*\x*ရင်ဟှ ယုဒဘာသာထဲမာ ငါ့ရဲ့ သတ်ရှင်မှု နည်းလမ်းဟှို နန်းနို့ကြားဟှားပီးဘီ။ ငါဟှာ ဘုရားသခင်ရဲ့ သင်းတော်ဟှို ရရာတိုင်း ညှင်းဆဲဘီးဟှာ သင်းတော်ဟှို ဖျစ်ဆီးဟှို့ ကြိုးစားခဲ့ဟှယ်။ 
\v 14 \x - \xo ၁.၁၄ \xo*\xt တ ၂၂.၃\xt*\x*ငါ့ဘိုးဘေးလေရဲ့ ထောင်းဒမ်းစဉ်လာလေဟှို ရရာတိုင်း စိအားထတ်သန်ဘီး ငါ့နရွယ်ဒူ ယုဒလူမျိုးလေထတ် ငါဟှာ ယုဒဘာသာထဲမာ ပိုဘီးကျင်လည်ဟှယ်။
\p
\v 15 \x - \xo ၁.၁၅,၁၆ \xo*\xt တ ၉.၃–၆; ၂၂.၆–၁၀; ၂၆.၁၃–၁၈\xt*\x*အယ်ဘေမဲ့ ငါမွီးခန်ဂဒဲဟှ ဘုရားသခင်ဟှာ ကျေးဇူးတော်အားဖြင့် ငါ့ဟှို ခေါ်တော်မူဟှားဘီး မှုတော်ဆောန်ဟှို့ ဝီးချယ်ဟှားဟှယ်။ အယ်ဘီးဟှာ 
\v 16 လူမျိုးခြားလေဟှို သားတော်ရဲ့ ဒန်းကောန်းဟှို ဟောပြောဟှို့ ကိုယ်တော်ရဲ့ လိုတော်တိုင်း သားတော်ဟှို ငါ့ဟှို ပြတော်မူဟှူ ခီမာ ငါဟှာ သွီးသားတော်စပ်ဟှူသူ ဖယ်သူနလည်း တိုင်ဗန်ဇာဟှို လောက်ဘဲန 
\v 17 ငါ့ထတ်စောဟှူ တမန်တော်လေန တွိဟှို့ ယေရုရှလင်ဗြို့ဟှိုလည်း သွားဘဲန ရှင်းရှင်းဘဲ့ အာရေဗျပြည်ဟှို သွားဘီး ဒမာသက်ဗြို့ဟှို ပ္လန်ဟှားလိုက်ဟှယ်။ 
\v 18 \x - \xo ၁.၁၈ \xo*\xt တ ၉.၂၆–၃၀\xt*\x*သောင်းနှစ်ကြာဘီးန ငါဟှာ ပေတရုဟှို တွိဟှို့ ဆိုဘီး ယေရုရှလင်ဗြို့ဟှို တတ်ဟှားဘီးဟှာ သူ့နတူးဒူ ဆယ့်ငါးရစ် နေခဲ့ဟှယ်။ 
\v 19 ငါဟှာ သခင်ဘုရားရဲ့ညီ ယာကုပ်ဟှလွဲဘီး တခြားတမန်တော်လေဟှို တွိဟှ။\f + \fr ၁.၁၉ \fr*\fq ယာကုပ်ဟှလွဲဘီး တခြားတမန်တော်လေဟှို တွိဟှ၊ \fq*\ft အယ်မျိုးမှုဘဲနေဟှာ \ft*\fqa ယာကုပ်တယော့‑က်ဘဲ့ ငါတွိရဘီး တခြားတမန်တော်လေဟှို တွိရဟှ။\fqa*\f*
\p
\v 20 ငါရေးလိုက်ဇာလေဟှာ တကယ် ဖြစ်ဟှယ်။ ငါဟှာ လီညာနေဇာမှုဟှ ဆိုဇာဟှို ဘုရားသခင် သိတော်မူဟှယ်။
\p
\v 21 အယ်ဘီးန ငါဟှာ ရှုရိပြည်န ကိလိကိပြည်လေဟှို သွားလိုက်ဟှယ်။ 
\v 22 အယ်ခီဒူးဟှ ယုဒပြည်မာရှိဟှူ သင်းတော်လေရဲ့ သင်းဝမ်သူလေဟှာ ငါန ရရာတိုင်း ရင်းနှီးကျွမ်းဝမ်မှု မှေ့သေးဟှ။ 
\v 23 “နို့လေဟှို ညှဉ်းဆဲဖူးဟှူ အယ်လူဟှာ ရင်ဒူးဟှ ဖျစ်ဆီးဟှို့ ကြိုးစားခဲ့ဟှူ ယောင်ကြည်မှု တရားဟှို ခု ဟောပြောနေဟှယ်” ဆိုဘီး သူးနို့ဟှာ တခြားလူလေ ပြောနေဇာဟှိုဘဲ့ ကြားဟှားဂေ့ဟှယ်။ 
\v 24 အယ်ကြောန့် သူးနို့ဟှာ ငါ့ကြောန့် ဘုရားသခင်ဟှို ချီးမွမ်းဂေ့ဟှယ်။
\c 2
\s ပေါလုန တခြားတမန်တော်လေ
\p
\v 1 \x - \xo ၂.၁ \xo*\xt တ ၁၁.၃၀; ၁၅.၂\xt*\x*ဆယ့်လေးနှစ်ကြာဘီးန ငါဟှာ တိတုဟှို ခေါ်ဘီး ဗာနဗနတူးဒူ ယေရုရှလင်ဗြို့ဟှို ပ္လန်တတ်ဟှားလိုက်ဟှယ်။ 
\v 2 ဖြားဖြစ်ကြောန့်နူးဆိုဟှာ ဘုရားသခင်ဟှ ငါသွားရမယ် ဆိုဘီး ငါ့ဟှို ဖွမ့်ပြကြောန့် သွားလိုက်ဇာဖြစ်ဟှယ်။ ခေါန်းဆောန်လေန သီးသန့်တွိဆောန်ဘီး လူမျိုးခြားလေဟှို ငါဟောပြောဟှူ ဒန်းကောန်းဟှို ရှင်းလန်းပြဟှယ်။ ဖြားဖြစ်ကြောန့်နူးဆိုဟှာ လောက်ဆောန်ဟှားဘီးဟှူဇာလေန ခုလောက်ဆောန်နေဇာလေဟှို ချည်းနှီးဖြစ်ရှင်ဘဲကြောန့် ဖြစ်ဟှယ်။ 
\v 3 ငါ့နတူးဒူ ပါလာဟှူ တိတုဟှာ ဂရိလူမျိုးဖြစ်ဘေမဲ့ ငါဟှာ ရေဖျားလှီးဇာဟှို အတင်းခံစေဟှ။ 
\v 4 ယေရှုခရစ်တော်နှိုက် နို့လေရရှိဟှူ လွတ်လပ်မှုဟှို စောင်ဇမ်းဟှို့ နို့လေအောက်စုထဲ တိတိဟှားဝမ်လာဟှူ ယောင်ကြည်သူ တုယောန် တချို့ဟှာ အယ်မျိုး ရေဖျားလှီးဇာဟှို လိုရှင်ဂေ့ဟှယ်။ သူးနို့ဟှာ နို့လေဟှို ကျွန်ပ္လန်ဖြစ်စေရှင်ဘေမဲ့၊ 
\v 5 မှန်ဟှူ ဧဝံဂေလိတရားဟှာ နန်းနို့ထဲမာ တည်ရှိနေကြောန့် နို့လေဟှာ သူးနို့ဟှို ရှစ်ဟှားမျှ လျှော့ပေးဟှ။
\p
\v 6 ခေါန်းဆောန်လေ ဆိုဘီး ထန်မှတ်ရဟှူ လူလေဟှာ ငါ့ရဲ့ ဟောပြောဇာလေဟှို ထပ်ဘီး ဖြားဇာလည်း ဆွေးနွေးဂေ့ဟှမ်း။ သူးနို့ဟှာ တကယ်ဘဲ့ ခေါန်းဆောန်လေ ဖြစ်ဟှယ်၊ ဖြစ်ဟှ ဆိုဇာ ငါ့တွပ်ရေးကီးဟှ။ ဖြားဖြစ်ကြောန့်နူးဆိုဟှာ ဘုရားသခင်ဟှာ ပြင်ပ လတ်ခဏာလေဟှို ကေ့ဘီး စီရင်တော်မူဘဲကြောန့် ဖြစ်ဟှယ်။ 
\v 7 သူးနို့ဟှာ ဆွေးနွေးဟှို့စား ဘုရားသခင်ဟှာ ပေတရုဟှို ရေဖျားလှီးဟှားဟှူ လူလေထံဟှို ဒန်းကောန်းဟောပြောဟှို့ တာဝန်ပေးဟှားဟှယ် ဆိုဘီး ယောင်ကြည်ဂေ့မျိုးဘဲ့ ငါ့ဟှိုလည်း ရေဖျားလှီးဘဲဟှူ လူလေထံဟှို ဒန်းကောန်းဟောပြောဟှို့ တာဝန်ပေးဟှားဟှယ် ဆိုဘီး ဗြင်ဟှားဂေ့ဟှယ်။ 
\v 8 ဖြားဖြစ်ကြောန့်နူးဆိုဟှာ ဘုရားသခင်ရဲ့ တဂိုးတော်အားဖြင့် ပေတရုဟှာ ရေဖျားလှီးဟှားဟှူ လူလေတွပ် တမန်တော်ရာနှိုက် မှုတော်ဆောန်ဘီး ငါဟှာ လူမျိုးခြားလေတွပ် တမန်တော်ဖြစ် မှုတော်ဆောန်ဟှို့ဖြစ်ဟှယ်။ 
\v 9 မဏ္ဍိုင်မျိုးဖြစ်ဟှူ ယာကုပ်၊ ပေတရု၊ ယောဟန်လေဟှာ ငါ့ရဟှားဟှူ ကျေးဇူးတော်ဟှို သိဂေဟှူကြောန့် မိတ်သဟာယဖွဲဘီး နို့လေအားလောင်းဟှာ လောက်ဖော်ဆောန်ဖတ်လေ ဖြစ်ဟှယ် ဆိုဇာဟှို လတ်ခဏာတခုဖြစ် သူးနို့ဟှာ ဗာနဗန ငါ့ဟှို လတ်ဆွဲနှုဆစ်ဂေ့ဟှယ်။ ဗာနဗန ငါဟှာ လူမျိုးခြားလေထဲမာ မှုတော်ဆောန်ဘီး သူးနို့ဟှာ ရေဖျားလှီးဟှူ လူလေထဲမာ မှုတော်ဆောန်ဟှို့ ဘောတူဂေ့ဟှယ်။ 
\v 10 နို့လေဟှာ ဆင်းရဲသားလေဟှို ကူညီမစဟှို့တွပ် သူးနို့လိုရှင်ဘီး အယ်မျိုး လောက်ဆောန်ဟှို့တွပ် ငါလည်း စိအားထတ်သန်မှု ရှိဟှယ်။\f + \fr ၂.၁၀ \fr*\fq ရှိဟှယ်၊ \fq*\ft အယ်မျိုးမှုဘဲနေဟှာ \ft*\fqa ရှိဟှားဟှယ်။\fqa*\f*
\s အန္တိအုတ်ဗြို့မာ ပေါလုဟှာ ပေတရုဟှို ပြစ်တန်ကြောန်း
\p
\v 11 အန္တိအုတ်ဗြို့ဟှို ပေတရုရော့‑က်လာခီမာ သူ့ရဲ့အပြုမှုလေဟှာ မှားနေဇာထန်ရှားကြောန့် ငါဟှာ သူ့ဟှို လူလေရှေ့မာ ပြစ်တန်ဟှယ်။ 
\v 12 ယာကုပ်စေလွှတ်လိုက်ဟှူ လူအချို့ ရော့‑က်လာခန်မာ ပေတရုဟှာ လူမျိုးခြားလေနတူးဒူ စားနေဂေ့ဟှယ်။ အယ်ဘေမဲ့ ယာကုပ်စေလွှတ်လိုက်ဟှူ လူလေရော့‑က်လာဘီးန သူဟှာ လူမျိုးခြားလေနတူးဒူ စားဘဲန ခပ်ခွာခွာဟှား နေဟှယ်။ ဖြားဖြစ်ကြောန့်နူးဆိုဟှာ သူဟှာ ရေဖျားလှီးဟှားဟှူ လူလေဟှို ကြော့‑က်ဟှူကြောန့် ဖြစ်ဟှယ်။ 
\v 13 တခြားယုဒလူမျိုး ယောင်ကြည်သူလေလည်း ပေတရုမျိုးဘဲ့ ဟန်ဆောန်ဟှူ ပြုမူလေဟှို စဘီး လောက်ဆောန်လာဟှူ ခီမာ သူးနို့ရဲ့ သူရဲဘောကြောန်ဟှူ ပြုမူလေအားဖြင့် ဗာနဗလည်း သူးနို့ဖတ်ဟှို ပါဟှားဟှယ်။ 
\v 14 သူးနို့ဟှာ မှန်ဟှူ ဧဝံဂေလိတရားန တည့်တည့်မတ်မတ် သွားဂေ့ဟှ ဆိုဇာဟှို ငါဗြင်ဟှားဟှူ ခီမာ ငါဟှာ ပေတရုဟှို လူလေရဲ့ ရှေ့မာ ပြောလိုက်ဇာဟှ “နန်ဟှာ ယုဒလူမျိုးတယော့‑က်ဖြစ်ဘီး ယုဒလူလေမျိုး သတ်ရှင်ဘဲန လူမျိုးခြားတယော့‑က်လို သတ်ရှင်ဟှယ်။ အယ်ဘီးဟှာ လူမျိုးခြားလေဟှို ယုဒလူမျိုးလို နေထိုင်ဟှို့ ဖြားဖြစ်ဟှိ ကြိုစားနေနူး”
\s ယုဒလူမျိုးလေန လူမျိုးခြားလေဟှာ ယောင်ကြည်မှုအားဖြင့် ကယ်တန်ခံရကြောန်း
\p
\v 15 နို့လေဟှာ မွီးဂဒဲဟှ ယုဒလူမျိုးလေဖြစ်ဘီး “လူမျိုးခြား ပြစ်သားလေ” မှုဟှ။ 
\v 16 \x - \xo ၂.၁၆ က \xo*\xt ရော ၃.၂၀; \xt*\xo ခ \xo*\xt ရော ၃.၂၂\xt*\x*အယ်ဘေမဲ့ လူဟှာ ပညတ်တရားဟှို လိုက်ရှော့‑က်ဟှူဇာအားဖြင့် ဖြောန့်မတ်ဟှားဇာမှုဟှ။ ယေရှုခရစ်ဟှို ယောင်ကြည်ရှင်းအားဖြင့်ဘဲ့ ဖြောန့်မတ်ဟှားဟှယ် ဆိုဇာဟှို နို့လေသိဂေ့ဟှယ်။ အယ်ကြောန့် နို့လေလည်း ပညတ်တရားဟှို လိုက်ရှော့‑က်ဟှူဇာအားဖြင့်မှုဘဲ ခရစ်တော်ဟှို ယောင်ကြည်ရှင်းအားဖြင့်ဘဲ့ ဖြောန့်မတ်ဟှို့တွပ် ခရစ်တော်ယေရှုဟှို ယောင်ကြည်ဂေ့ဟှယ်။ ဖြားဖြစ်ကြောန့်နူးဆိုဟှာ ပညတ်တရားဟှို လိုက်ရှော့‑က်ရှင်းအားဖြင့် ဖယ်သူလည်း ဖြောန့်မတ်မှုဟှို ရနိုင်ဘဲကြောန့်ဖြစ်ဟှယ်။ 
\v 17 အယ်ဆိုဟှာ နို့လေဟှာ ခရစ်တော်နှိုက် ဖြောန့်မတ်ဟှို့တွပ် ကြိုးစားနေခီမာ နို့လေလည်း လူမျိုးခြားလေလို ပြစ်သားလေဖြစ်ကြောန်း တွိရှိဟှားမယ် ဆိုဟှာ ခရစ်တော်ဟှာ နို့လေဟှို ပြစ်လောက်ဟှို့ စေခံဟှယ် ဆိုဘီး ဆိုနိုင်လော။ လောင်းဝ ဆိုနိုင်ဟှ။ 
\v 18 ငါဖျစ်ဆီးဟှားဟှူရာဟှို ပ္လန်တည်ဆော့‑က်မယ် ဆိုဟှာ ငါဟှာ ပညတ်တရားဟှို ခ္လိုးဖော့‑က်မားဖြစ်ဟှယ် ဆိုဇာဟှို ဖော်ပြနေဇာဖြစ်ဟှယ်။ 
\v 19 ဖြားဖြစ်ကြောန့်နူးဆိုဟှာ ငါဟှာ ဘုရားသခင်နှိုက် သတ်ရှင်နိုင်ဟှို့တွပ် ပညတ်တရားအားဖြင့် ပညတ်တရားနှိုက် သေဟှားပီးဘီး။ ငါဟှာ ခရစ်တော်နတူးဒူ လတ်ဝါးကပ်တိုင်မာ သေခံဘီ။ 
\v 20 အယ်ဘေမဲ့ သတ်ရှင်သေးဟှယ်။ အယ်မျိုးဆိုဟှာ ငါဟှာ ကိုယ်တိုင်ရှင်ဇာမှုဟှ ခရစ်တော်ဟှာ ငါနှိုက်ရှင်ဟှူ ဇာဖြစ်ဟှယ်။ ကိုယ်ခန္ဓာနှိုက် ခု ငါရှင်နေဟှူ သတ်ဟှာ ဘုရားသခင်ရဲ့ သားတော်ဟှို ယောင်ကြည်ဇာအားဖြင့် ရှင်နေဟှူ သတ်ဖြစ်ဟှယ်။ သားတော်ဟှာ ငါ့ဟှို ရှစ်ဟှူကြောန့် ငါ့တွပ် သတ်ဟှို စွန့်ပေးတော်မူဟှယ်။ 
\v 21 ဘုရားသခင်ရဲ့ ကျေးဇူးတော်ဟှို ငါပယ်ဟှ။ ဖြားဖြစ်ကြောန့်နူးဆိုဟှာ ပညတ်တရားအားဖြင့် ဖြောန့်မတ်နိုင်မယ် ဆိုဟှာ ခရစ်တော်ဟှာ ချည်းနှီး သေခံတော်မူဘီ။
\c 3
\s ပညတ်တရား အယ်မျိုးမှုဘဲနေဟှ ယောင်ကြည်တရား
\p
\v 1 မိုက်မဲဟှူ ဂလာတိ သင်းသားလေ! နန်းနို့ဟှို ဖယ်လူဟှ ပြုစားဟှားနူး။ လတ်ဝါးကပ်တိုင် ထတ်မာ ယေရှုခရစ်တော် အသေခံတော်မူဇာဟှို နန်းနို့မျစ်စိရှေ့မာ ရှင်းရှင်းလန်းလန်း ဖော်ပြဟှားပီးဘီ! 
\v 2 ပညတ်တရားဟှို လိုက်ရှော့‑က်ဇာအားဖြင့် အယ်မျိုးမှုဘဲနေဟှာ ဧဝံဂေလိတရားဟှို ကြားဘီး ယောင်ကြည်ဇာအားဖြင့် ဘုရားသခင်ရဲ့ ဝိညာဉ်တော်ဟှို လတ်ခံရရှိဇာလော။ အယ်မူဇာ တခုဟှိုဘဲ့ ငါသိရှင်ဟှယ်။ 
\v 3 အယ်မျှလော့‑က် မိုက်မဲဂေ့လော! နန်းနို့ဟှာ ဘုရားသခင်ရဲ့ ဝိညာဉ်တော်အားဖြင့် စပြုဘီးန ခု ဇာတိန ဆောင်းသတ်ဟှို့လော။ 
\v 4 နန်းနို့အားလောင်းရဲ့ တွိကြောင်ခံစားရဇာဟှာ ချည်းနှီး ဖြစ်ဟှားဘီလော။ မှန်ဆိုဟှာ ချည်းနှီး ဖြစ်နိုင်ဟှ! 
\v 5 ဘုရားသခင်ဟှာ နန်းနို့ဟှို ဝိညာဉ်တော်ဟှို ပေးဘီး နန်းနို့ထဲမာ နိမိတ်လတ်ခဏာလေ လောက်နေဇာဟှာ ပညတ်တရားအားဖြင့် လောက်ဇာလော အယ်မျိုးမှုဘဲနေဟှာ ဧဝံဂေလိတရားဟှို ကြားဘီး ယောင်ကြည်ရှင်းအားဖြင့် လောက်ဇာလော။
\p
\v 6 \x - \xo ၃.၆ \xo*\xt ရော ၄.၃\xt*\x*အာဗြဟံရဲ့ တွိကြောင်ခံစားမှုဟှို ကျမ်းစာမာ ပြောဟှားဇာဟှ “အာဗြဟံဟှာ ဘုရားသခင်ဟှို ယောင်ကြည်ဟှူကြောန့် သူ့ရဲ့ ယောင်ကြည်ဇာအားဖြင့် ဘုရားသခင်ဟှာ သူ့ဟှို ဖြောန့်မတ်ဟှူမျိုး လတ်ခံတော်မူဟှယ်။” 
\v 7 \x - \xo ၃.၇ \xo*\xt ရော ၄.၁၆\xt*\x*အယ်ကြောန့် ယောင်ကြည်ရှင်းရှိဟှူ လူလေဟှာ အာဗြဟံရဲ့ မ္လေးမ္လစ်စစ်ဖြစ်ဟှယ် ဆိုဇာဟှို နားလည်ဂေ့ပါ။ 
\v 8 ဘုရားသခင်ဟှာ ယောင်ကြည်ရှင်းအားဖြင့် လူမျိုးခြားလေဟှို ဖြောန့်မတ်စေလေ့မယ် ဆိုဘီး ကျမ်းစာမာ ကြိုတန်ဘီး ပြောဟှားဟှယ်။ အယ်ကြောန့် ကျမ်းစာမာ အာဗြဟံဟှို ဟောဟှားဟှူ ဒန်းကောန်းဟှ “လူမျိုးအားလောင်းဟှာ နန့်အားဖြင့် ကောန်းကြီးမင်္ဂလာဟှို ခံစားရလေ့မယ်။” 
\v 9 အယ်ကြောန့် ယောင်ကြည်ရှင်းရှိဟှူသူလေဟှာ ယောင်ကြည်ဟှူ အာဗြဟံနတူးဒူ ကောန်းကြီးဟှို ခံစားရဟှယ်။
\p
\v 10 ပညတ်တရားဟှို လိုက်ရှော့‑က်ဟှူ လူလေဟှာ ကီဇာန သတ်ဆိုင်ဂေ့ဟှယ်။ ဖြားဖြစ်ကြောန့်နူးဆိုဟှာ ကျမ်းစာဟှ “ပညတ်တရားမာ ပါဇာလေအားလောင်းဂူဟှို လိုက်ရှော့‑က်နိုင်ဘဲဟှူ လူတိုင်းဟှာ ဘုရားသခင်ရဲ့ ကီဇာဟှို ခံရမယ်” ဆိုဘီး ပြောဟှားဟှယ်။ 
\v 11 ပညတ်တရားအားဖြင့် ဖယ်သူလည်း ဘုရားသခင်ရှေ့မာ ဖြောန့်မတ်ဟှ ဆိုဇာ ထန်ရှားဟှယ်။ ဖြားဖြစ်ကြောန့်နူးဆိုဟှာ ကျမ်းစာမာ “ဖြောန့်မတ်ဟှူသူဟှာ ယောင်ကြည်ရှင်းအားဖြင့် သတ်ရှင်လေ့မယ်”\f + \fr ၃.၁၁ \fr*\fq ဖြောန့်မတ်ဟှူသူဟှာ ယောင်ကြည်ရှင်းအားဖြင့် သတ်ရှင်လေ့မယ်၊ \fq*\ft အယ်မျိုးမှုဘဲနေဟှာ \ft*\fqa ယောင်ကြည်ရှင်းအားဖြင့် သတ်ရှင်ဟှူ လူဟှာ ဖြောန့်မတ်လေ့မယ်။\fqa*\f* ဆိုဘီး ပြောဟှားဟှယ်။ 
\v 12 ပညတ်တရားဟှာ ယောင်ကြည်ရှင်းထတ်မာ ခြေခံဟှားဇာမှုဟှ။ အယ်ဘေမဲ့ ကျမ်းစာဟှလည်း “ပညတ်တရားဟှို လိုက်ရှော့‑က်ဟှူလူဟှာ အယ်ပညတ်တရားအားဖြင့်ဘဲ့ သတ်ရှင်လေ့မယ်” ဆိုဘီး အယ်မျိုးဘဲ့ပြောဟှားဟှယ်။
\p
\v 13 “သစ်တိုင်မာ ခိဆွဲခံရဟှူသူဟှာ ဘုရားသခင်ရဲ့ ကီဇာဟှို ခံရဟှူသူဖြစ်ဟှယ်” ဆိုဘီး ကျမ်းစာမာ ပြောဟှားမျိုးဘဲ့ ခရစ်တော်ဟှာ နို့လေတွပ် ကီဇာဟှို ခံဘီးန နို့လေဟှို ပညတ်တရားရဲ့ ကီဇာဟှနေ ဝီးနှုတော်မူဟှယ်။ 
\v 14 အယ်မျိုးလောက်ဇာဟှာ လူမျိုးခြားလေဟှာ ခရစ်တော်ယေရှုနှိုက် အမှီပြုဘီး အာဗြဟံခံစားရဟှူ ကောန်းကြီးဟှို ခံစားရဘီး နို့လေဟှို ဘုရားသခင် ဂဒိပေးဟှားဟှူ ဝိညာဉ်တော်ဟှို ယောင်ကြည်ဇာအားဖြင့် လတ်ခံရရှိဟှို့ဖြစ်ဟှယ်။
\s ပညတ်တော်န ဂဒိတော်
\p
\v 15 ယောင်ကြည်သူလေ၊ နေ့တိုင်း တွိကြောန်နေဇာလေထဲဟှနေ ဥပမာတခုဟှို ပြောရမယ် ဆိုဟှာ လူနှေ့ယော့‑က်ဟှာ ကြောန်းရာတခုဟှို ပဋိညာဉ်ပြုဘီး လတ်မှတ်ရေးထိုးလိုက်ဘီးခီမာ ဖယ်လူလည်း ပယ်ဖျစ်ဟှို့လည်းမရ၊ ထပ်ဖ္လဲ့ဟှို့လည်းရဟှ။ 
\v 16 ဘုရားသခင်ရဲ့ ဂဒိတော်လေဟှာ အာဗြဟံန သူ့ရဲ့ မ္လေးမ္လစ်တွပ် ဖြစ်ဟှယ်။ ကျမ်းစာမာ “မ္လေးမ္လစ်လေ” ဆိုဘီး များကိန်းဟှို သောင်းပြုဘဲန “နန့်ရဲ့မ္လေးမ္လစ်” ဆိုဘီး အနဲကိန်းဟှို သောင်းပြုဟှားကြောန့် လူတယော့‑က်ဟှိုဘဲ့ ဆိုလိုဇာဖြစ်ဘီး အယ်လူဟှာ ခရစ်တော်ဖြစ်ဟှယ်။ 
\v 17 ငါဆိုလိုဇာဟှ ဘုရားသခင်ဟှာ အာဗြဟံန ပဋိညာဉ်ပြုဘီး ပဋိညာဉ်ဟှို စောန့်ထီးဟှို့ ဂဒိပေးဟှားတော်မူဟှယ်။ နှစ်ပေါန်း လေးရာသောင်းဆယ် ကြာဘီးမှ ပေးတော်မူဟှူ ပညတ်တရားဟှာ အယ်ပဋိညာဉ်ဟှို ပယ်နိုင်ဟှ။ ဘုရားသခင်ရဲ့ ဂဒိတော်ဟှို ပယ်နိုင်ဟှ။ 
\v 18 \x - \xo ၃.၁၈ \xo*\xt ရော ၄.၁၄\xt*\x* ဖြစ်ကြောန့်နူးဆိုဟှာ ဘုရားသခင်ရဲ့ မွီတော်ဟှာ ပညတ်တရားထတ်မာ တည်နေမယ် ဆိုဟှာ အယ်မွီတော်ဟှာ ဂဒိတော်ထတ်မာ တည်ဟှ။ အယ်ဘေမဲ့ ဘုရားသခင်ဟှာ ဂဒိတော်အားဖြင့် အာဗြဟံဟှို အယ်မွီတော်ဟှို ပေးတော်မူဟှယ်။
\p
\v 19 အယ်ဆိုဟှာ ပညတ်တရားရဲ့ ရည်ရွယ်ချစ်ဟှ ဖြားဇာနူး။ ဂဒိတော်ခံရဟှူု အာဗြဟံမ္လေးမ္လစ် ရော့‑က်လာခန်ခီထိ ဒုစရိုက်လေဟှို ပြဟှို့တွပ် အယ်တရားဟှို ထပ်ပေးတော်မူဟှယ်။ အယ်ပညတ်တရားဟှို ကောန်းဂန်တမန်လေအားဖြင့် ကြားဝမ်စေ့စပ်မား တယော့‑က်မှတဆင့် ပေးတော်မူဟှယ်။ 
\v 20 အယ်ဘေမဲ့ တယော့‑က်ဒဲဘဲ့ ပါဝမ်လောက်ဆောန်ခီမာ ကြားဝမ်စေ့စပ်မားဟှို လိုအပ်ဟှမ်း။ အယ်ဘီးဟှာ ဘုရားသခင်ဟှာ တပါးဒဲ ဖြစ်တော်မူဟှယ်။\f + \fr ၃.၂၀ \fr*\fq အယ်ဘီးဟှာ ဘုရားသခင်ဟှာ တပါးဒဲ ဖြစ်တော်မူဟှယ်၊ \fq*\ft အယ်မျိုးမှုဘဲနေဟှာ \ft*\fqa အယ်ဘီဟှာ ဘုရားသခင်ဟှာ တပါးဒဲဘဲ လောက်ဆောန်ဟှယ်။\fqa*\f*
\s ပညတ်တရားရဲ့ ရည်ရွယ်ချစ်
\p
\v 21 အယ်မူမျိုးဆိုဟှာ ပညတ်တရားဟှ ဘုရားသခင်ရဲ့ ဂဒိတော်ဟှို ဆန့်ကျင်နေဇာလော။ လောင်းဝမှုဟှ! သတ်ရှင်စေနိုင်ဟှူ ပညတ်တရားဟှို လူသားလေ လတ်ခံရရှိမယ် ဆိုဟှာ အယ်ပညတ်တရားဟှို လိုက်ရှော့‑က်ဇာအားဖြင့် ဖြောန့်မတ်မှုဟှို ရလေ့မယ်။ 
\v 22 အယ်ဘေမဲ့ ယေရှုခရစ်တော်ဟှို ယောင်ကြည်ရှင်းန စပ်ဆိုင်ဟှူ ဂဒိတော်ဟှို ယောင်ကြည်ဟှူ သူလေဟှို ပေးအပ်ဟှို့တွပ် ကျမ်းစာဟှ လူလေ အားလောင်းဂူဟှို ပြစ်တရားအော့'က်မာ ချောက်ဟှားလေဟှယ်။
\p
\v 23 အယ်ယောင်ကြည်မှုတရား လာခန်ထိ ပညတ်တရားဟှာ နို့လေအားလောင်းဟှို ပညတ်တရားရဲ့ ကျဉ်းသားလို ချောက်နှောန်ဟှားဇာဟှို ခံရဟှယ်။ 
\v 24 အယ်ကြောန့် နို့လေဟှာ ယောင်ကြည်မှုအားဖြင့် ဖြောန့်မတ်ဟှို့တွပ် ပညတ်တရားဟှာ ခရစ်တော် ကြွလာခီထိအောန် နို့လေရဲ့ အောက်ထီးမားဖြစ်ဟှယ်။ 
\v 25 ခု အယ်ယောင်ကြည်မှု တရားဟှာ ရော့‑က်လာဘီ နို့လေဟှာ အောက်ထီးမားရဲ့ လတ်အော့‑က်ဟှ လွတ်ဟှားဂေ့ဟှယ်။
\p
\v 26 အယ်ကြောန့် နန်းနို့အားလောင်းဟှာ ခရစ်တော်ယေရှုနှိုက် ယောင်ကြည်မှုအားဖြင့် ဘုရားသခင်ရဲ့ သားမီးလေဖြစ်ဂေ့ဟှယ်။ 
\v 27 ခရစ်တော်နှိုက် ဗတ္တိဇံခံဟှူ လူအားလောင်းဟှာ ခရစ်တော်ဟှို ဝတ်ဆင်ဟှားဟှူ လူလေဖြစ်ဟှယ်။ 
\v 28 အယ်ကြောန့် ယုဒလူမျိုးလေ၊ လူမျိုးခြားလေ၊ ကျွန်လေ၊ လွတ်လပ်ဟှူလူလေ၊ ယော့‑က်ကျားလေ မီးမလေ ဆိုဘီး ခွဲခြားဟှားဇာလေမှေ့ဘဲ နန်းနို့အားလောင်းဟှာ ခရစ်တော်ယေရှုနှိုက် တလောင်းတဝဒဲ ဖြစ်ဂေ့ဟှယ်။ 
\v 29 \x - \xo ၃.၂၉ \xo*\xt ရော ၄.၁၃\xt*\x*နန်းနို့ဟှာ ခရစ်တော်ဟှို ပိုင်ဆိုင်ဟှယ် ဆိုဟှာ အာဗြဟံရဲ့ မ္လေးမ္လစ်လေဖြစ်ဘီး ဘုရားသခင်ရဲ့ ဂဒိတော်ဟှို လတ်ခံရရှိလေ့မယ်။
\c 4
\p
\v 1 ဆစ်ဘီးဖော်ပြရမယ် ဆိုဟှာ ဖရဲ့ အောက်စာလေ အားလောင်းဟှို မွီရဟှူသားဟှာ ပိုင်ဆိုင်သူတယော့‑က် ဖြစ်ဘေမဲ့လည်း ရွယ်ရော့‑က်ခန်ခီထိ ကျွန်တယော့‑က်မျိုး နေရဟှယ်။ 
\v 2 သူဟှာ ငယ်ရွယ်ဟှူ ခီမာ သူ့ရဲ့ဖ သတ်မှတ်ဟှားဟှူ ခီရော့‑က်ခန်ခီထိ အောက်ထီးမားလေန ဘဏ္ဍာထီးလေရဲ့ လတ်အော့‑က်မာနေရဟှယ်။ 
\v 3 အယ်မျိုးဘဲ့ နို့လေလည်း ဝိညာဉ်ရေးရာ ရင့်ကျတ်သေးဘဲဟှူ ခီမာ လောကရဲ့ ခြေခံတရားအော့‑က်မာ ကျွန်ဖြစ်ဂေ့ဟှယ်။ 
\v 4 အယ်ဘေမဲ့ ခီပ္လဲ့ဇောင်ဟှားခီမာ ဘုရားသခင်ဟှာ သူ့ရဲ့ သားတော်ဟှို စေလွှတ်တော်မူဟှယ်။ ကိုယ်တော်ဟှာ ယုဒလူလေရဲ့ ပညတ်တရားအော့‑က်မာ လူမီးမဟှနေ မွီးဖွားဇာဟှို ခံဟှို့တွပ် ကြွလာတော်မူဘီး၊ 
\v 5 \x - \xo ၄.၅–၇ \xo*\xt ရော ၈.၁၅–၁၇\xt*\x*ပညတ်တရား လတ်အော့‑က်မာရှိဟှူ လူလေ အားလောင်းဂူဟှို ဝီးနှုတော်မူလိုက်ဟှူကြောန့်၊ နို့လေဟှာ ဘုရားသခင်ရဲ့ သားလေ ဖြစ်ခွမ့်ရဂေ့ဟှယ်။
\p
\v 6 နန်းနို့ဟှာ ဘုရားသခင်ရဲ့ သားဖြစ်ဟှယ် ဆိုဇာဟှို ပြဟှို့တွပ်\f + \fr ၄.၆ \fr*\fq နန်းနို့ဟှာ ဘုရားသခင်ရဲ့ သားဖြစ်ဟှယ် ဆိုဇာဟှို ပြဟှို့တွပ်၊ \fq*\ft အယ်မျိုးမှုဘဲနေဟှာ \ft*\fqa ဖြားဖြစ်ကြောန့်နူးဆိုဟှာ နန်းနို့ဟှာ ဘုရားသခင်ရဲ့ သားဖြစ်ဟှယ်။\fqa*\f* ဘုရားသခင်ဟှာ “\tl အဗ္ဗ\tl*၊ ဖ” ဆိုဘီး ခေါ်ဟှူသားတော်ရဲ့ ဝိညာဉ်တော်ဟှို နို့လေရဲ့ စိနှလောင်းထဲဟှို စေလွှတ်တော်မူဟှယ်။ 
\v 7 အယ်ကြောန့် နန်းနို့ဟှာ ကျွန်မှုဟှမ်း။ သားဖြစ်ဟှားဘီ။ အယ်ဘီးဟှာ နန်းနို့ဟှာ သားဖြစ်ဟှားကြောန့်၊ ဘုရားသခင်ဟှာ သူ့ရဲ့ သားလေတွပ် မွီအားလောင်းဟှို ပေးတော်မူဟှယ်။
\s ဂလာတိ သင်းတော်တွပ် စိုးရိမ်ကြောန်း
\p
\v 8 နန်းနို့ဟှာ ဘုရားသခင်ဟှို သိသေးဘဲဟှူခီဒူးဟှ နန်းနို့ဟှာ မှန်ဘဲဟှူ ဘုရားလေရဲ့ ကျွန်လေဖြစ်ခဲ့ဟှယ်။ 
\v 9 ခု နန်းနို့ဟှာ ဘုရားသခင်ဟှို သိဟှားဘီ။ မှန်ဆိုဟှာ နန်းနို့ဟှို ဘုရားသခင်ဟှ သိဟှားဇာဖြစ်ဟှယ် ဆိုဘီး ငါပြောရမယ်။ အယ်ဆိုဟှာ နန်းနို့ဟှာ အားနဲဘီး သနားစရာကောန်းဟှူ လောကီတရားရဲ့ ဝိညာဉ်လေထံဟှို ဖယ်မျိုးပ္လန်လှည့်ဟှားဂေ့နူး။ ဖြားဖြစ်ကြောန့် သူးနို့ရဲ့ကျွန်လေ ပ္လန်ဖြစ်ရှင်ဂေ့နူး။ 
\v 10 နန်းနို့ဟှာ နေ့ဂီးရစ်ဂီးလေ၊ လလေ၊ နှစ်လေ၊ ရာသီလေဟှိုဘဲ့ ရရာတိုင်း ရေးပေးနေဂေ့ဟှယ်။ 
\v 11 နန်းနို့တွပ် ငါလောက်ဆောန် ဟှားဇာလေဟှာ ချည်းနှီးဖြစ်ဟှားဘီလော ဆိုဘီး ငါဟှာ နန်းနို့တွပ် စိုးရိမ်မိဟှယ်!
\p
\v 12 ယောင်ကြည်သူလေ နန်းနို့ဟှာ ငါ့မျိုးဖြစ်ဂေ့ဟှို့ ငါတောန်းဗန်ဟှယ်။ ငါဟှာ နန်းနို့မျိုးဘဲ့ဖြစ်ဟှယ်။ နန်းနို့ဟှာ ငါ့ဟှို ဖယ်မျိုးတရားဘဲဟှူဇာလည်း လောက်ဂေ့ဟှ။ 
\v 13 နန်းနို့ဟှို ပထမခါ ဒန်းကောန်း ဟောပြောဒူးဟှ ငါရဲ့ ခန္ဓာဟှာ နာမကျန်းဖြစ်နေဟှယ် ဆိုဇာဟှို နန်းနို့သိဂေ့ဟှယ်။ 
\v 14 ငါ့ရဲ့ ခန္ဓာဟှာ ကျမ်းမာရေးခြေနေကြောန့် နန်းနို့လေတွပ် နှော့'က်ယှစ် ဖြစ်နေဟှူလည်းဘဲ့ နန်းနို့ဟှာ ငါ့ဟှို ထန်သေးဂေ့ဟှ။ ပစ်ပယ်ဂေ့ဟှ။ နန်းနို့ဟှာ ဘုရားသခင်ရဲ့ ကောန်းဂန်တမန်မျိုး၊ ခရစ်တော်ယေရှုမျိုး ငါ့ဟှို လတ်ခံဂေ့ဟှယ်။ 
\v 15 အယ်ခီဒူးဟှ နန်းနို့ဟှာ မင်္ဂလာရှိဘီး ပျော်ဂေ့ဟှယ်! ခု ဖြားမျိုးဖြစ်ဟှားဂေ့နူး။ အယ်ခီဒူးဟှ နန်းနို့ဟှာ ဖြစ်နိုင်မယ် ဆိုဟှာ၊ နန်းနို့ရဲ့ မျစ်စိလေထုဘီးဟှာ ငါ့ဟှို ပေးဟှို့ရမယ် ဆိုဟှာ ပေးရှင်ဂေ့ဟှယ် ဆိုဘီး ငါကိုယ်တိုင် သတ်သေခံဟှယ်။ 
\v 16 ခု ငါဟှာ နန်းနို့ဟှို သမ္မာတရားပြောဟှူကြောန့် နန်းနို့ရဲ့ ရန်သူဖြစ်ဟှားဘီလော။
\p
\v 17 ငါ့ဟှို ဆန့်ကျင်ဟှူ လူလေဟှာ နန်းနို့ဟှို ရရာတိုင်း စိဝမ်စားနေဟှယ်။ အယ်ဘေမဲ့ ကောန်းဟှူစိဝမ်စားဇာမှုဟှ။ နန်းနို့ရဲ့ စိဝမ်းစာဇာဟှို ရယူဘီး နန်းနို့ဟှို ငါ့န ဆစ်ဖြတ်စေရှင်ကြောန့် ဖြစ်ဟှယ်။ 
\v 18 ကောန်းဟှူ ရည်ရွယ်ချစ်ရှိမယ် ဆိုဟှာ အယ်မျိုး စိဝမ်းစားဇာဟှာ ကောန်းဟှယ်။ အယ်ဘေမဲ့ ငါဟှာ နန်းနို့နတူးဒူရှိနေဟှူ ခီမာဘဲ့ စိဝမ်းစားဇာမှုဘဲ မြဲဒမ်း စိဝမ်စားဇာ ဖြစ်ရမယ်။ 
\v 19 ငါ့ရဲ့ ချစ်သားမီးလေ! ခရစ်တော်ရဲ့ စိနေသဘောထားမျိုး နန်းနို့မရမရှင်း ငါဟှာ မွီးခါနီး နာကျင်မှု ခံစားနေရဟှူ မိခင်မျိုးဘဲ့ နော့‑က်တခါ နာကျင်မှုဟှို ခံစားနေရဟှယ်။ 
\v 20 နန်းနို့ဟှို နူးညံ့ဟှူ စကားပြောဟှို့ ငါဟှာ ခုဘဲ့ နန်းနို့နတူးဒူ ရှိရှင်ဟှယ်။ ငါဟှာ နန်းနို့တွပ် ရရာတိုင်း စိုးရိမ်နေဟှယ်။
\s ဟာဂရန စာရာ
\p
\v 21 ပညတ်တရားအော့‑က်မာ နေရှင်ဟှူလူလေဟှို မေးရအူးမယ်။ နန်းနို့ဟှာ ပညတ်တော်ဟှ ပြောဟှားဇာလေဟှို ကြားဂေ့ဟှလော။ 
\v 22 ကျမ်းစာမာပြောဟှားဇာဟှ အာဗြဟံမာ သားနှေ့ယော့‑က်ရှိဘီး တယော့‑က်ဟှ ကျွန်မီးမနရဟှူသား၊ တခြားတယော့‑က်ဟှ ကျွန်မှုဘဲဟှူ မီးမနရဟှူသားဖြစ်ဟှယ်။ 
\v 23 ကျွန်မီးမနရဟှူသားဟှာ ဇာတိအားဖြင့် မွီးလာဘီး ကျွန်မှုဘဲဟှူ မီးမ\f + \fr ၄.၂၃ \fr*\fqa အာဗြဟံရဲ့မယား စာရာ ဖြစ်ဟှယ်၊ \fqa*\ft ဆိုဇာဟှို ရည်ညွှန်းဟှယ်။\ft*\f*နရဟှူသားဟှ ဘုရားသခင်ရဲ့ ဂဒိတော်အားဖြင့် မွီးလာဟှူသားဖြစ်ဟှယ်။ 
\v 24 အယ်မူဇာလေဟှို ဥပမာန နားလည်အောန် ပြောပြဟှားဇာဟှ အယ်မီးမနှေ့ယော့‑က်ဟှာ ပဋိညာဉ်တရား နှေ့မျိုးဖြစ်ဟှယ်။ ဟာဂရဖြစ်ဟှူ မီးမတယော့‑က်ဟှ မွီးလာဟှူသားမီးလေဟှာ ကျွန်ဖြစ်ဂေ့ဟှယ်။ ဟာဂရဟှာ သိနတောန်မာ ပြုဟှူပဋိညာဉ်တရားဟှို ကိုယ်စားပြုဟှယ်။ 
\v 25 ဟာဂရဟှာ အာရေဗျပြည်မာရှိဟှူ သိနတောန်ဟှို ကိုယ်စားပြုဘီး ခုကျွန်ခံနေရဟှူ ယေရုရှလင်ဗြို့န ဗြို့သူဗြို့သားလေဟှို ကိုယ်စားပြုဟှယ်။\f + \fr ၄.၂၅ \fr*\fq ဟာဂရဟှာ အာရေဗျပြည်မာရှိဟှူ သိနတောန်ဟှို ကိုယ်စားပြုဘီး ခုကျွန်ခံနေရဟှူ ယေရုရှလင်ဗြို့န ဗြို့သူဗြို့သားလေဟှို ကိုယ်စားပြုဟှယ်၊ \fq*\ft တချို့ မူရင်းလတ်ရေးမူလေမာ \ft*\fqa သိနဟှာ အာရေဗျမာရှိဟှူ တောန်တတောန်ဖြစ်ဟှယ်၊ \fqa*\ft ဆိုဘီး ပါရှိဟှယ်။\ft*\f* 
\v 26 အယ်ဘေမဲ့ ကောန်းဂန်ဘောင်ဟှ ယေရုရှလင်ဗြို့ဟှာ လွတ်လပ်ဘီး၊ အယ်မီးမှာ နို့လေရဲ့ မိခင်ဖြစ် ဟှယ်။ 
\v 27 ဖြားဖြစ်ကြောန့်နူးဆိုဟှာ ကျမ်းစာဟှ
\q1 “မ္လုံနေဟှူမီးမ၊ ဝန်းသာဂေ့!
\q2 သားမွီးဟှူ နာကျင်မှုဟှို လောင်းဝ မခံစားဖူးဘဲဟှူမီးမ ဝန်းသာအားရ အော်ဟစ်ဂေ့!
\q1 ဖြားဖြစ်ကြောန့်နူးဆိုဟှာ လန်ထားရစ်ဟှူ မီးမဟှာ
\q2 လန်ရှိဟှူ မီးမထတ် ပိုဘီးသားမီးလေဟှို မွီးလေ့မယ်” ဆိုဘီး ပြောဟှားဟှယ်။
\p
\v 28 ယောင်ကြည်သူလေ နန်းနို့ဟှာ ဣဇာက်မျိုးဘဲ့ ဘုရားသခင်ရဲ့ ဂဒိတော်နဆိုင်ဟှူ သားမီးလေဖြစ်ဟှယ်။ 
\v 29 အယ်ခီဒူးဟှ ဇာတိအားဖြင့် မွီးဟှူသားဟှာ ဝိညာဉ်တော်အားဖြင့် မွီးဟှူသားဟှို နိုင်ကျင့်ဘီး ခုလည်း အယ်မျိုးဘဲ့ဖြစ်ဟှယ်။ 
\v 30 အယ်ဘေမဲ့ ကျမ်းစာဟှ ဖြားမျိုးပြောဟှားနူး။ ကျမ်းစာမာ ပြောဟှားဇာဟှ “ကျွန်မီးမန သူ့ရဲ့သားဟှို နှံထုလိုက်။ ဖြားဖြစ်ကြောန့်နူးဆိုဟှာ ကျွန်မရဲ့သားဟှာ လွတ်လပ်ဟှူ မီးမရဲ့သားနတူးဒူ မွီခံရဟှ။” 
\v 31 အယ်ကြောန့် ယောင်ကြည်သူလေ နို့လေဟှာ ကျွန်မီးမရဲ့ သားလေမှုဟှ။ ကျွန်မှုဘဲဟှမီးမရဲ့ သားလေဖြစ်ဟှယ်။
\c 5
\s နန်းနို့ရဲ့ လွတ်လပ်မှုဟှို ထီးသီးဂေ့
\p
\v 1 ခရစ်တော်ဟှာ နို့လေဟှို ကျွန်ဘဝဟှနေ လွတ်မြော့‑က်စေဟှူ လွတ်လပ်မှုဟှာ နို့လေမာရှိဟှယ်! အယ်ကြောန့် လွတ်လပ်ဟှူသူလေမျိုး မားမားမတ်မတ်ရပ်ဂေ့ဘီး ကျွန်ခံဟှူ ထမ်းဘိုးဟှို နော့‑က်တခါ ထမ်းဂေ့န။
\p
\v 2 နားထောန်ဂေ့ပါ! ငါပေါလု ပြောမယ် နန်းနို့ဟှာ ရေဖျားလှီးဇာဟှိုခံမယ် ဆိုဟှာ ခရစ်တော်အားဖြင့် ဖြားကျိုးလည်းရဂေ့မှုဟှ။ 
\v 3 ရေဖျားလှီးဇာဟှို ခံဟှူလူလေဟှာ ပညတ်တရား အားလောင်းဟှို လိုက်ရှော့‑က်ရမယ် ဆိုဇာဟှို ခုထပ်ဘီး ဒိပေးဟှို့တွပ် ငါ့မာ တာဝန်ရှိဟှယ်။ 
\v 4 ပညတ်တရားအားဖြင့် ဖြောန့်မတ်ရာဟှို ရော့‑က်ဟှူနန်းနို့ဟှာ ခရစ်တော်ဟှနေ ကွာဟှားဘီ။ နန်းနို့ဟှာ ဘုရားသခင်ရဲ့ ကျေးဇူးတရားလတ်အော့'က်မာမှေ့ဘီ။ 
\v 5 နို့လေဟှာ ဘုရားသခင်ရဲ့ ဝိညာဉ်တော်တဂိုးဟှို အမှီပြုဘီး ယောင်ကြည်မှုအားဖြင့် ဖြောန့်မတ်ရာဟှို ရော့‑က်လေ့မယ် ဆိုဇာဟှို မျှော်လင့်နေဂေ့ဟှယ်။ 
\v 6 ဖြားဖြစ်ကြောန့်နူးဆိုဟှာ ခရစ်တော်ယေရှုထဲမာ ရေဖျားလှီးဇာလည်း ရေးကီးဟှ။ ရေဖျားလှီးဘဲလည်း ရေးကီးဟှ။ ရေးကီးဇာဟှာ မြစ်တာတရားဟှို ဖော်ပြနိုင်ဟှူ ယောင်ကြည်မှုဘဲ့ဖြစ်ဟှယ်။
\p
\v 7 နန်းနို့ဟှာ ပ္လေးပြိုင်ပွဲမာ ကောန်းဆောင်းပ္လေးဂေ့ဟှယ်။ သမ္မာတရားဟှို ယောင်ကြည်ဘဲနေအောန် နန်းနို့ဟှို ဖယ်သူဟှ တားဆီးနူး။ အယ်သူဟှာ နန်းနို့ဟှို ဖယ်မျိုးသွီးဆောန်နူး။ 
\v 8 အယ်မူမျိုးသွီးဆောန်ဇာဟှာ နန်းနို့ဟှို ခေါ်တော်မူဟှူ ဘုရားသခင်ထံဟှနေ လာဇာမှုဟှ။ 
\v 9 \x - \xo ၅.၉ \xo*\xt ၁ ကော ၅.၆\xt*\x*“တဆေးနဲနဲဟှာ မုညစ်တဗောင်းလောင်းဟှို ဖောန်းပွစေတတ်ဟှယ်” ဆိုဘီး ဆိုရိုးစကားရှိဟှယ်။ 
\v 10 အယ်ဘေမဲ့ နန်းနို့ဟှာ တခြားလူလေရဲ့ ကွဲလွဲဟှူအယူဟှို လတ်ခံလေ့မယ်မှုဟှ ဆိုဇာဟှို ငါဟှာ ခုထိ ယောင်ကြည်စိခ္လမှုရှိဟှယ်။ ငါ့န နန်းနို့ဟှာ သခင်ဘုရားနှိုက် ရှိနေကြောန့် နန်းနို့ဟှာ ကွဲလွဲဟှူအယူဟှို လတ်ခံဂေ့လေ့မယ်မှုဟှ ဆိုဇာဟှို ငါယောင်ကြည်စိခ္လဘီး နန်းနို့ဟှို နှော့‑က်ယှစ်ဟှူ ဖယ်လူဘဲ့ဖြစ်ဖြစ် ဘုရားသခင်ရဲ့ ပြစ်ဒန်ပေးဇာဟှို ခံရလေ့မယ်။
\p
\v 11 ယောင်ကြည်သူလေ၊ ငါဟှာ ရေဖျားလှီးရှင်းတရားဟှို ဟောပြောနေသေးဟှယ် ဆိုဟှာ ဖြားဖြစ်ကြောန့် ညှဉ်းဆဲဇာဟှို ခံနေရသေးနူး။ တကယ်ကြောန့် အယ်မူမျိုးဟောပြောဇာ မှန်ဟှယ် ဆိုဟှာ ခရစ်တော်ရဲ့ လတ်ဝါးကပ်တိုင်ကြောန်းဟှို ငါဟောပြောဇာဟှာ ထိမိဘီးလဲစရာမှေ့ဟှ။ 
\v 12 နန်းနို့ဟှို နှော့‑က်ယှက်ဟှူ လူလေဟှာ ရေဖျားလှီးဇာဟှို ခံယူရောင်မျှမကဘဲ သူးနို့ကိုယ်တိုင် သင်းလိုက်ဇာဟှို ငါလိုရှင်ဟှယ်။
\p
\v 13 ယောင်ကြည်သူလေ၊ လွတ်လပ်မှုရစေဟှို့ ဘုရားသခင်ဟှာ နန်းနို့ဟှို ခေါ်ဟှားဇာဖြစ်ဟှယ်။ အယ်ဘေမဲ့ အယ်လွတ်လပ်မှုဟှို ကြောန်းပြဘီး လူ့ဇာတိလိုဟှို ခွမ့်ပေးဂေ့န။ နန်းနို့ဟှာ ရှင်းရှင်းရှစ်ဘီး စေခံဂေ့ပါ။ 
\v 14 ဖြားဖြစ်ကြောန့်နူးဆိုဟှာ “နန့်ရဲ့အီဇနီးရှင်းဟှို နန့်ကိုယ်နန် ရှစ်မျိုးဘဲ့ ရှစ်ဂေ့ပါ” ဆိုဘီးပြောဟှားဟှူ ပညတ်ဟှာ ပညတ်တရားတခုလောင်းရဲ့ အချောက်ခြာဖြစ်ဟှယ်။ 
\v 15 အယ်ဘေမဲ့ နန်းနိုဟှာ သားရဲလိဆန်လေ ရှင်းရှင်း ကိုက်သတ်ဂေ့မျိုး နန်းနို့ လောက်ဂေ့မယ် ဆိုဟှာ နန်းနို့ ရှင်းရှင်း ဖျစ်ဆီးရာ ရော့‑က်လေ့မယ် ဆိုဇာဟှို ဒိထားဂေ့ပါ။
\s ဝိညာဉ်န လူ့ဇာတိ
\p
\v 16 ငါပြောမယ်။ ဝိညာဉ်တော်ညွှန်ကြားလိုက်တိုင်းဘဲ့ လိုက်ရှော့‑က်ဂေ့ပါ။ လူ့ဇာတိလိုဟှို လိုက်ဂေ့န။ 
\v 17 \x - \xo ၅.၁၇ \xo*\xt ရော ၇.၁၅–၂၃\xt*\x*ဖြားဖြစ်ကြောန့်နူးဆိုဟှာ လူ့ဇာတိလိုဟှာ ဝိညာဉ်တော်လိုန ဆန့်ကျင်နေဘီး ဝိညာဉ်တော် လိုဟှာလည်း လူ့ဇာတိလိုန ဆန့်ကျင်နေဟှူ ကြောန့်ဖြစ်ဟှယ်။ လူ့ဇာတိလိုန ဝိညာဉ်တော်လိုဟှာ ရန်သူလေဖြစ်ကြောန့် နန်းနို့ဟှာ နန်းနို့လောက်ရှင်မျိုး လောက်နိုင်ဂေ့ဟှ။ 
\v 18 အယ်ဘေမဲ့ ဝိညာဉ်တော်ဟှာ နန်းနို့ဟှို ဦးဆောန် လမ်းပြမယ် ဆိုဟှာ နန်းနို့ဟှာ ပညတ်တရား အော့‑က်မာ ရှိဟှို့မှုဘီ။
\p
\v 19 လူ့ဇာတိန ဆိုင်ဟှူ ပြုမူလေဟှာ သိသာထန်ရှားဟှယ်။ အယ်ပြုမူလေဟှ တရားဘဲဟှူမေထုန်ပြုဇာ၊ ညစ်ညူးဇာ၊ ကိလေသာလွန်ကျူးဇာ၊ 
\v 20 ရောက်ထုလေ ကိုးကွယ်ဇာ၊ စုန်းပညာန ပြုစားဇာဖြစ်ဟှယ်။ လူလေဟှာ ရန်သူလေဖြစ်လာဘီး ရန်ဖြစ်ဇာ၊ နာလိုဇာလေဖြစ်လာဘီး ဒေါသထွပ်ဇာ၊ ဂေါင်ပြိုင်ဇာလေဖြစ်လာဟှယ်။ သူးနို့ဟှာ သင်းကွဲဇာ၊ ဂိုဏ်းကွဲဇာ၊ 
\v 21 ငြူစူဇာ၊ မူးယစ်ဇာ၊ သော့‑က်စားပျော်ပါးဇာလေဖြစ်ဟှယ်။ အယ်ပြုမူမျိုး လောက်ဟှူ လူလေဟှာ ဘုရားသခင်ရဲ့ နိုင်ငံတော်ဟှို ဝမ်ရဟှို့မှုဟှ ဆိုဇာဟှို ရင်ဒူးဟှ ငါဒိပေးဟှားတိုင်း ခုလည်း ငါဒိပေးဟှယ်။
\p
\v 22 ဝိညာဉ်တော်ရဲ့ ကျိုးကျေးဇူးလေဟှ ရှစ်ဟှူဇာ၊ ဝန်းသာဇာ၊ ငြီသတ်ဇာ၊ စိရှယ်ဇာ၊ သနားဇာ၊ ကောန်းမြတ်ဇာ၊ သစ်စာစောန့်ဇာ၊ 
\v 23 နူးညံ့ဇာ၊ ကိုယ့်ကိုကိုယ် ထီးချောက်ဇာလေ ဖြစ်ဟှယ်။ အယ်မူဇာလေဟှို ဆန့်ကျင်ဟှူ တရားမှေ့ဟှ။ 
\v 24 ခရစ်တော်ယေရှုဟှို ပိုင်ဆိုင်ဟှူလူလေဟှာ လူ့ဇာတိစိန ဖြစ်ရှင်ဟှူ ဆန္ဒလေဟှို လတ်ဝါးကပ်တိုင်ထတ်မာ သတ်လိုက်ဂေ့ဘီ။ 
\v 25 ဝိညာဉ်တော်ဟှာ နို့လေဟှို သတ်ရှင်စေဘီး ဝိညာဉ်တော်ရဲ့ လမ်းပြဟှူမျိုးဘဲ့ လိုက်ရှော့‑က်ရမယ်။ 
\v 26 နို့လေဟှာ မာန်မာနလေ၊ မျစ်ထွပ်ဇာလေန နာလိုဘဲဇာလေဟှို ရှောန်ရမယ်။
\c 6
\s ရှင်းရှင်း ဝန်ထောက်လေဟှို ကူညီပေးဂေ့ကြောန်း
\p
\v 1 ယောင်ကြည်သူလေ၊ ယော့‑က်ယော့‑က်ဟှ ကောန်းဘဲဟှူ မှုတခုခု ကျူးလွန်နေဇာဟှို နန်းနို့တွိလိုက်ဟှယ် ဆိုဟှာ ဝိညာဉ်တော်အားဖြင့် သတ်ရှင်ဟှူ နန်းနို့ဟှာ နူးညံ့မှုန အယ်လူလေဟှို ပြုပြင်ပေးရမယ်။ အယ်ဘီးဟှာ နန်းနို့ကိုယ်တိုင်လည်း သွီးဆောန်ဇာနော့‑က်ဟှို ပါဘဲ့ဟှို့တွပ် ဒိထားဂေ့ပါ။ 
\v 2 ရှင်းရှင်းရဲ့ ဝန်ထောက်လေဟှို ကူညီပေးဂေ့ပါ။ အယ်မျိုးလောက်ရှင်းဟှာ နန်းနို့ဟှာ ခရစ်တော်ရဲ့ ပညတ်တော်ဟှို ပ္လဲ့ဇောင်စေလေ့မယ်။\f + \fr ၆.၂ \fr*\fq နန်းနို့ဟှာ ခရစ်တော်ရဲ့ ပညတ်တော်ဟှို ပ္လဲ့ဇောင်စေလေ့မယ်၊ \fq*\ft တချို့ မူရင်းလတ်ရေးမူလေမာ \ft*\fqa ပ္လဲ့ဇောင်ဟှယ်၊ \fqa*\ft ဆိုဘီး ပါရှိဟှယ်။\ft*\f* 
\v 3 ယော့'က်ယော့'က်ဟှ ဖြားလည်းမှုဘဲန ကိုယ့်ကိုယ်ကိုယ် ရေးပါရာရော့‑က်ဟှယ် ဆိုဘီး ထန်မှတ်မယ် ဆိုဟှာ သူဟှာ ကိုယ့်ကိုယ်ကိုယ် လှည့်ဖြားဟှူ လူဖြစ်ဟှယ်။ 
\v 4 နန်းနို့လေယော့‑က်တိုင်းဟှာ ကိုယ့်ရဲ့ ပြုမူလေဟှို စစ်ဆေးရမယ်။ အယ်မျိုးဆိုဟှာ သူများဟှိုမှုဘဲ ကိုယ့်ရဲ့ ပြုမူဟှာ ကောန်းဟှယ် ဆိုဘီး နန်းနို့ဟှာ ဂေါင်ယူဝါကြွားနိုင်လေ့မယ်။ 
\v 5 ဖြားဖြစ်ကြောန့်နူးဆိုဟှာ နန်းနို့ယော့‑က်တိုင်းဟှာ နန်းနို့ရဲ့ ဝန်ဟှို လောက်ဆောန်ရဟှို့ ဖြစ်ဟှယ်။
\p
\v 6 နန်းနို့ဟှာ တရားတော်ဟှို သန်ယူဟှူ လူလေဖြစ်ဟှယ် ဆိုဟှာ သန်ပေးဟှူ ဆရာဟှို ကောန်းဟှူ ရာရှိမျှဟှို ဝီမျှရမယ်။
\p
\v 7 လွဲယူဂေ့န။ ဘုရားသခင်ဟှာ ထီမဲ့မြင်ပြုဇာဟှို ခံတော်မူဟှ။ ဖြားဖြစ်ကြောန့်နူးဆိုဟှာ လူဟှာ မျိုးစေ့ကြဲဟှူတိုင်း သီးနှံဟှို ရိရလေ့မယ်။ 
\v 8 နန်းနို့ဟှာ လူ့ဇာတိမ္လေမာ မျိုးစေ့ကြဲမယ် ဆိုဟှာ ပေါက်ပျစ်ဟှူ သီးနှံဟှို ရိသီးရဘီးဟှာ ဝိညာဉ်တော်မ္လေမာ မျိုးစေ့ကြဲမယ် ဆိုဟှာ ထာဝရသတ်ရှင်ဟှူ သီးနှံဟှို ရိသီးရလေ့မယ်။ 
\v 9 အယ်မျိုးလောက်မယ် ဆိုဟှာ နို့လေဟှာ အားငယ်စိပျစ်ဘဲ ကောန်းဟှူ လောက်ဆောန်မှုဟှို လောက်ဆောန်မယ် ဆိုဟှာ နို့လေဟှာ သီးနှံရိဟှို့ခီရော့‑က်လာခီမာ သီးနှံဟှို ရိသီးရလေ့မယ်။ 
\v 10 အယ်ဘီဟှာ နို့လေဟှာ ခွမ့်ရေးရတိုင်း လူတိုင်းရဲ့ကောန်းကျိုးဟှို လောက်ဆောန်ဘီး ထူးအားဖြင့် ယောင်ကြည်သူဖြစ်ဟှူ မိသားစုဝမ်လေရဲ့ ကောန်းကျိုးဟှို လောက်ဆောန်ရမယ်။
\s နော့‑က်ဆောင်းဒိပေးဇာန နှောက်ဆစ်ဇာ
\p
\v 11 ခု ဖယ်မျှကီးဟှူ စာလောင်းလေန နန်းနို့နားဟှို ငါ့လတ်န ရေးလိုက်ဇာဟှို နန်းနို့ကေ့ဂေ့။ 
\v 12 နန်းနို့ဟှို ရေဖျားလှီးဇာခံဟှို့ တင်းတိုက်တွန်းဟှူ လူလေဟှာ ပြင်ပလတ်ခဏာလေဟှို ဝါကြွားရှင်ကြောန့် ဖြစ်ဟှယ်။ သူးနို့လေ အယ်မျိုးလောက်ဇာဟှာ ခရစ်တော်ရဲ့ လတ်ဝါးကပ်တိုင် တရားတော်ကြောန့် ညှဉ်းဆဲနှိစစ်ဇာဟှို ခံရှင်ဘဲကြောန့်ဖြစ်ဟှယ်။ 
\v 13 ရေဖျားလှီးဟှားဟှူ လူလေဟှာ ပညတ်တရားဟှို သူးနို့ကိုယ်တိုင်လည်း လိုက်ရှော့‑က်ဂေ့ဟှ။ ရေဖျားလှီးဟှားဟှူ လူလေဟှာ ပြင်ပလက်ခဏာလေဟှို ဝါကြွားရှင်ကြောန့် နန်းနို့ဟှို ရေဖျားလှီးခံစေရှင်ဇာဖြစ်ဟှယ်။ 
\v 14 ငါဟှာ သခင်ယေရှုခရစ်တော်ရဲ့ လတ်ဝါးကပ်တိုင်တော်ကြောန်း တခုဘဲ့ ဝါကြွားရလေ့မယ်။ ဖြားဖြစ်ကြောန့်နူးဆိုဟှာ ကိုယ်တော်ရဲ့ လတ်ဝါးကပ်တိုင်တော်မာ အယ်လောကဟှာ ငါ့တွပ်သေဟှားဘီ ငါဟှာလည်း အယ်လောကတွပ် သေခံဘီ။ 
\v 15 အယ်ကြောန့် ရေဖျားလှီးလည်း ကျိုးမှေ့ဟှ။ ရေဖျားလှီးဘဲဇာလည်း ကျိုးမှေ့ဟှ။ သတ္တဝါသစ် ဖြစ်ဇာဘဲ့ ကျိုးရှိဟှယ်။ 
\v 16 အယ်နည်းတိုင်း လိုက်ရှော့‑က် သတ်ရှင်ဟှူ လူလေန ဘုရားသခင်ရဲ့ လူမျိုးထတ်ဟှို ငြီသတ်မှုန ကရုဏာတော်ဟှာ သက်ရောက်ပါစေ!
\p
\v 17 နိဂေါင်းချောက်ရမယ် ဆိုဟှာ ငါ့ဟှို ဖယ်လူလည်း နော့‑က်ထပ် နှော့‑က်ယှက်ဂေ့န။ ဖြားဖြစ်ကြောန့်နူးဆိုဟှာ ငါ့ကိုယ်မာရှိဟှူ ဒန်ရာလေဟှာ သခင်ယေရှုခရစ်တော်ရဲ့ ကျွန်ဖြစ်ဟှယ် ဆိုဇာဟှို ပြနေဇာဖြစ်ဟှယ်။
\p
\v 18 ယောင်ကြည်သူလေ၊ နို့လေသခင် ယေရှုခရစ်တော်ရဲ့ ကျေးဇူးတော်ဟှာ နန်းနို့ ဝိညာဉ်နတူးဒူ ရှိပါစေ။ အာမင်။