\id 2TI - Southeast Ambrym NT with Ruth and Jonah [tvk] -Vanuatu (DBL 2015) 
\h 2 Timoti 
\toc1 2 Timoti 
\toc2 2Tim 
\mt2 Sepinien xa diamu te  
\mt1 2 Timoti  
\is1 ?Visi iaxa tetis uvei ak?  
\ip Pol tetis sepinien ak e huram 67 AD (huram xil tetutou ni poten na Iesu) xa tehe sepinien kor nan. Melele xa tetis tetiamu teha mi Timoti xal Taetas, di tesao ni vanut Kristin xil e taon holu. E melele xa tehe Rom, latetal xati e lateso ni tehe nim te xeih.\x + \xo 1:0 \xt 2Tim 1:8,16\x* Melele xa tehe kot, latelepis rin nan e tehit, nave nousav ti, lihas vini. Melele xa tehur longeongen ak, tetis uvei tei mun teha mi Timoti tehit itemanon mei isao ni vatei mun. Neta sav xa mikila xa imat, tisen kor ak na Pol di pisen ni xa neketen nan nggeih tamu,\x + \xo 1:0 \xt 2Tim 1:3-14\x* e ien bei pupu xa pispisien xil te Sias imal tevi,\x + \xo 1:0 \xt 2Tim 3:10-17\x* e ien bei pupu xa meulien na vat xil te Sias imal imese vehakut.\x + \xo 1:0 \xt 2Tim 2:1-26\x*  
\is1 ?Visi iaxa tevuli uvei ak tetiamu?  
\ip Pol tetis uvei ak teha mi Timoti\x + \xo 1:0 \xt 2Tim 1:2\x*, e ien tehei tengan ngan xil te sias te hal Efeses mun lilonge\x + \xo 1:0 \xt 2Tim 4:22\x*. Sepinien xa Diamu te 1 Timoti di bit kila xa Timoti tehe visi.  
\is1 ?Pol tetis uvei ak veneh?  
\im \bd Pol ien tehei tengan vapus rilomun ni Timoti\bd* - Pol tekila xa navehi ti lihasi imat\x + \xo 1:0 \xt 2Tim 4:6-8\x*, misak ni bit vapus rilomun ni Timoti, iti, imat sung e he mol‑Rom xil\x + \xo 1:0 \xt 2Tim 1:4; 4:9,21\x*.  
\ib  
\im \bd Pol ien tehei tengan vasel xat Timoti ve melele te xeih xil xa di bemei\bd* - Pol tepus kila xa melele te xeih xil di bemei, misak ni ien tehei tengan Kristin xil lisoh ixeih e neketen nae\x + \xo 1:0 \xt 2Tim 1:8; 2:3\x*.  
\ib  
\im \bd Pol ien tehei vasel xat Timoti tengan vaxuxou kuhi ve pispisien nan xil\bd* - Pol tesis Timoti tengan ixuxou kuhi ve pispisien nan xil melele xa di misetu ni sepinien na Hi\x + \xo 1:0 \xt 2Tim 1:14\x*, e itit ni ngan xa ti ihit rat longeongen hos na Hi mi moletin xil\x + \xo 1:0 \xt 2Tim 3:14; 4:2\x*.  
\ib  
\im \bd Pol ien tehei tengan vasel xat Timoti vatei mun usil moletin xil te luvosen\bd* - Moletin xil te luvosen lateti tamu visal Timoti, ma Pol tesel xat rilomun ni tengan nahusil xat xil ti e nangor ti natel xil.\x + \xo 1:0 \xt 2Tim 2:16-26\x*  
\is1 Vatit nenemien tei te uvei ak de 2 Timoti 2:15  
\ipq Mak, ma Timoti, xouk ti usak pisi tengan upispisi ni sepinien te reitinen na Hi mi moletin xil. Mak, ma ukila usoh ixeih be met Hi ixoni moletin te polien tei xa tave unoun ti ni polien nan.  
\is1 Vatit nenemien tei mun te uvei ak de 2 Timoti 3:16-17  
\ipq Sepinien xil vus xa di Vanuvei Eo, nenemien xil vus teni nggo Hi. Sepinien xil ak bos te pispisien, te selxatien, te sepkilaen usil suse xa momal, e tengan vapispisi mi moletin xil xa linapol ni ti mun sexien xil xa misa. Nggo sexien xil ak, Vanuvei Eo di misak xat moletin xil na Hi tengan likila lipol vuol ni polien hos xil vus.  
\is1 ?Naha iaxa di e uvei ak?  
\io1 1. Pispisien xil usil ngan xil xa di langgur polien na Hi (1:1–2:26)  
\io1 2. Selxatien ba mi Kristin xil tengan lisoh ixeih ve melele xil texeih xa di bemei (3:1–4:22)  
\c 1  
\s1 Sepkilaen na Pol usil uvei ak  
\p
\v 1 Inou \w Pol\w* iaxa nadis uvei ak. Inou nabe \w eloheoh\w* tei na Iesu Kristo nggusil nenemien na Hi xa bit xati xa isa meulien sal mi ngan xil xa di laling neketen nae e Iesu Kristo.   
\p
\v 2 Nadis minuk Timoti xa onggoni natuxoli hos tei. Nasis tengan eheien, esaeen, e tomat na Hi Tamer e na Iesu Kristo xa be Suv nar iti e meulien nam.   
\s1 Pol misel xat Timoti tengan ital xat kuh polien xa Hi misa ni mini  
\p
\v 3 Timoti, e vongien del melengien, ieok di tabong ni xouk ti e sisen xil navan e di names Hi ve xouk. Hi ak iaxa di nanggusil xati, nggoni ngan xa avu navan xil tetiamu di latepol ni, e nakila namusil xati nggo sexien xil xa nakila nabit momal pe meten. \x + \xo 1:3 \xt Plp 3:5; Pol 23:1; 24:16\x*  
\v 4 Nanem xat simetom xa temereh melele xa rutetasil, e ieok bei tengan nipusuk rilomun e isak ni nou nipolu ni sien.  
\v 5 Nanem xat neketen hos nam xa be reitin. Neketen ak nggoni neketen hos na avu nam Loes e na ninom Iunis. E nakila xa de xouk mun. \x + \xo 1:5 \xt Pol 16:1\x*  
\v 6 Ve rin ak, nasel xatuk tengan utit ni ngan taxa ti upol itel sanien xa Hi tesa ni minuk melele xa natetuxol xatuk. Sanien ak nggoni upang na Hi e meulien nam e bos xa uhui xati tengan ileluv mei ihe eilep mu. \x + \xo 1:6 \xt 1Tim 4:14\x*  
\v 7 Upol ixeih vengan Ninin Eo xa Hi tesa ni mi xir di misak ni ulixir takan ti. Ninin Eo nan di pol ni xir rapol vituei del xeihen nan, tengan eheien nar iti e mosav e mikila raxuxou kuhi ve sexien nar xil. \x + \xo 1:7 \xt Rom 8:15\x*   
\p
\v 8 Mak, ma onahe unoun ti tengan ovit rat sepinien xil usil Iesu xa be Suv nar. E onahe unoun ni nou ti mun xa nade nim te xeih vengan inou nabe moletin na Iesu. !E‑e! Itel xeihen xa Hi misa ni minuk, xouk mun uhusil suse te longpangasien ixoni nou ve longeongen hos usil Iesu. \x + \xo 1:8 \xt Rom 1:16\x*  
\v 9 Hi mileh rerat xir ra tesaen e misa meulien hu mi xir. Xi mikes xir tengan mei rave moletin nan xil, e tave ti ve naha xa xir di rapol ni. !E‑e! Xi pol ni mak nggusil nenemien nan e ve eheien hos nan mi xir. Tetiamu ni melele xa Hi tepeas ni ut etan, xi tehit xati xa xi isa Iesu mei ihe suse tengan isak ni eheien hos nan mei istal mi xir. \x + \xo 1:9 \xt Efes 2:8-9; Taet 3:5\x*  
\v 10 E xosali, hitxatien nan mei mistal be reitin e melele xa Iesu Kristo temei e ut etan e teteh meulien e xir. Xi tehas tan ni xeihen te maten, e longeongen hos teni pisen suse te meulien hu mi xir. \x + \xo 1:10 \xt 1Kor 15:55,57; Hib 2:14\x*   
\p
\v 11 Ma vengan Hi ien bei tengan longeongen hos ak ihe ut xil vus, xi tehosei nou mei nabe eloheoh nan tengan nihit rati mi moletin xil vus e nipispisi ni reitinen nan mi xil. \x + \xo 1:11 \xt 1Tim 2:7\x*  
\v 12 Ma ve rin ak, iaxa inou di nalong pangas nou ven e nim te xeih ak. Inou natanexo ti vengan xa nakil kuh ngan xa inou di naling nenesien navan da en. E nakil kuhi xa xi nggur xeihen pipin tengan isikoe xol naha xa xi milingi e heok tengan ti nipol ni ituxoh melele Iesu itilomun en.  
\v 13 Xouk mun utal xat kuh sepinien te reitinen xa natepisisi ni minuk ngamu. Holesok xil xa otepus nou natepol ni e otelong nou natehiteni, xouk mun upol ni. E utal xat sexien xil te neketen e eheien ixoni ngan xil xa di langgusil xat Iesu Kristo.  
\v 14 Longeongen hos xa ongguri be neta ngan xa bos pupu. Misak ni, uketeh xole e uxuxou kuhi ven itel tutouen na \w Ninin Eo\w* xa de xir. \x + \xo 1:14 \xt 1Tim 6:20\x*   
\p
\v 15 Xouk otelong kila xa tua navan xil e provins te hal Esia, nggoni Fukelas xal Hemonggenes, xil vus latetasil reling nou ngamu. \x + \xo 1:15 \xt 2Tim 4:16\x*  
\v 16 Onesiforas, xi kestang temei visal nou e melele nen xil ak, e di pet rat nenemien navan. Nasis Hi tengan isa hosien mini itel ngenen xil vengan xa xi tave unoun ti tengan mei vasao ni nou e nim te xeih ak.  
\v 17 Io, melele xa tetuxoh taon xa eilep te hal \w Rom\w* xi telang ni nou ba vuma … tekamet rute xa inou nada en.  
\v 18 E melele sav mun xa di natepol e taon te hal Efeses, xouk okil kuhi mak xa xi tetutou ni nou tehe holu. Misak ni, di nasis tengan Suv Iesu ipisen esaeen mini e melele xa xi imei rilomun en e ilepis moletin xil.\x + \xo 1:18 \xt Siud 1:21\x*   
\c 2  
\s1 Pol misel xat Timoti tengan isoh ixeih e neketen nan  
\p
\v 1 Timoti, natuxoli, usoh ixeih itel tutouen xa Iesu Kristo di misa ni mi xir.  
\v 2 Pispisien xil xa otelong nou natehiteni mi moletin xil, xouk uhuri e ha upispisi ni mi ngan xil xa nenesien nam di e xil. Mak, ma xil mun likila lipispisi ni mi mosav xil.   
\p
\v 3 Melele xa sakpisien xil di bemei, xouk usoh ixeih ixoni moletin hos tei te vaeen na Iesu Kristo.  
\v 4 Melele xa moletin tei te vaeen di pol, xi di tamaen ni ti holesok xil te ut etan tengan valihi nenemien nan ra polien nan vengan ien bei tengan suv nan vamaal ven.  
\v 5 Xouk onggoni moletin te lohen mun. Moletin ak iloh ihusil xat rae xil te lohen. Xosxa xi nahusil xat rae xil vus ti, xi misakras vahur huite teni.  
\v 6 Xouk onggoni moletin te naho mun. Vengan moletin xa nggur vetin e naho san, momal tang tengan xi ihur anien en itiamu ni mosav xil. \x + \xo 2:6 \xt 1Kor 9:7,10\x*  
\v 7 Bos xa unem xat vole xatel ak xa nabiteni minuk, e Hi Suv isak ni xouk ukil kuh koute te xatel.   
\p
\v 8 Unem xat Iesu Kristo: xa temea rilomun ra maten e xa testal texo ra na suv toto \w Deved\w*. Ngan ak be vatit longeongen hos xa di nabit rati. \x + \xo 2:8 \xt 1Kor 15:4,20; Rom 1:3\x*  
\v 9 Ve longeongen hos ak, inou di nanggur longpangasien e labar xat nou ni sen e nim te xeih ak nggoni moletin tei te kanen. E sepinien na Hi, lasakras lavar xati. \x + \xo 2:9 \xt Efes 3:1; Plp 1:12-14\x*  
\v 10 Ve rin ak, namaen nou tengan nihur longpangasien xil ak. Vengan nakila xa melele xa nabit rat longeongen hos mi moletin xil, ngan xil xa Hi tehosei xil, likila lihur meulien hu xa mistal nggo Iesu Kristo. Mak, ma xil likila liti e minehinen te xeihen nan itela vehakut. \x + \xo 2:10 \xt Kol 1:24\x*  
\v 11 Usil nenemien ak, sepinien ak be reitin xa biteni bit:  
\q1 Xosxa ratemat tetel Iesu Kristo,  
\q2 ma rimeul itela.   
\q1
\v 12 Xosxa risoh ixeih ve hisen,  
\q2 ma xir rikila rilaxat ut xil e ut etan itela.  
\q1 E xosxa rihiteni rihit ratakil ti xi,  
\q2 ma xi mun ihiteni ihit takil ti xir.\x + \xo 2:12 \xt Mat 10:33; Luk 12:9\x*   
\q1
\v 13 E tave ti neta xosxa rimot e neketen nar,  
\q2 e xi misakras vastokovein xir,  
\q1 vengan xi misakras vapol vasav  
\q2 ni sexien nan xati xa momal tevi.\x + \xo 2:13 \xt Rom 3:3-4; Nam 23:19; Taet 1:2\x*   
\s1 Moletin te polien hos na Iesu Kristo  
\p
\v 14 Bos tengan vehakut ti upispisi mi moletin xil ni pispisien xil ak. Usel xat xil e his Hi tengan linangor ti ve koute te mavulut sepinien xil vus. Sexien ak misakras vapol ni ti neta vahos. Sexien xil ak di purun moletin xil xa di lalonge. \x + \xo 2:14 \xt 1Tim 6:4; Taet 3:9\x*  
\v 15 Mak, ma Timoti, xouk ti usak pisi tengan upispisi ni sepinien te reitinen na Hi mi moletin xil. Mak, ma ukila usoh ixeih be met Hi ixoni moletin te polien tei xa tave unoun ti ni polien nan. \x + \xo 2:15 \xt 1Tim 4:6; Taet 2:7-8\x*  
\v 16 E onamos ti natel ngan xil xa sepinien nae be neta sav tang e tamal ti. Vengan xa hisit sepinien xil ak di midel moletin xil labe sotin mak mu ra Hi del sexien hos xil xa ien bei xil lavusili. \x + \xo 2:16 \xt 1Tim 4:7\x*  
\v 17 Ve naha xa di lasep usili mikapis mi moletin xil, e di purun nenemien nae. Sepinien nae nggoni menuk tei xa bo xa mistal e moletin, e ngga purun tenben xil vus. Moletin lu xa lumak lube Haemeneas e Faelitas. \x + \xo 2:17 \xt 1Tim 1:20\x*  
\v 18 Xalu di lupispisi ni mi moletin xil lubit mea rilomunen ra maten mistal ngamu. Mak, ma xalu di lupurun neketen na moletin sav xil e di lupisen ni xa lule ras suse te reitinen.  
\v 19 E tave ti neta xa di lupol ni mak, sepinien na Hi di tamu misoh nggeih nggoni simen te nim tei xa lakili ni be tan. Vengan xa xi biteni mak bit, \qt “Iahova mikil kuh ngenen xil.”\qt* \rq (Nam 16:5)\rq* \x + \xo 2:19 \xt Sion 10:14; 1Kor 8:3\x* E biteni mun bit, \qt “Ngan xil xa labit lavusil Iahova listokovein sexien tesa nae xil.”\qt* \rq (Aes 52:11)\rq*   
\p
\v 20 Sias na Hi nggoni nim tei xa eilep xa tre xil e pelet xil holu di en. Rut tre ngan xil, lapol kuhi ni ni neta xil xa minehin, nggoni silva e gol; e rute xil mun, lapol ni ni liei e tan xa pili. Ngan xil xa bos pupu, laserevi datil polien hos tei; e ngan xil xa tavos pupu ti, dit lapol ni muis ba en.  
\v 21 Usil nenemien ak, xosxa moletin tei pol ni xi mese ra hisit sepinien tesa xil xa nasep usili, Hi ise revi ve polien hos xa tehosei ven. E vengan xa xi misa meulien nan mi Hi e misak xat kuh xi bos ve polien, Hi xa be Suv te Sias ihur xati e ipol ni polien hos xil ixo en. \x + \xo 2:21 \xt 2Tim 3:17\x*  
\v 22 Mak, ma Timoti, bos tengan uling sexien tesa xil xa tiram maxoe sav xil di langgusili. !Io! Xouk itel ngan xil xa di mumot mi Hi del nenemien hos, bos xa muloh ve sexien xil xa Hi ien bei nggoni momalen, neketen, eheien, itel tomat. \x + \xo 2:22 \xt 1Tim 6:11\x*  
\v 23 Uhe reling ngan xil xa di lasep talang ve holesok xil xa be neta sav tang, vengan hisit sepinien xil xa mak di pol ni ngongoren xil tang. \x + \xo 2:23 \xt 1Tim 4:7\x*  
\v 24 E vengan xa xouk obe moletin te polien na Hi, onangor ti natel moletin sav xil. Xouk uhos mi moletin xil vus e upispisi kuhi mi xil. Bos tengan utal xat nenemien nam tengan iem nakat ti namanon. \x + \xo 2:24 \xt 1Tim 3:3; Taet 1:7\x*  
\v 25 Ngan xil xa di laseputut ni xouk, xouk upispisi mi xil itel sexien te merouen. Xos Hi isak ni xil lihiles ra tesaen nae xil e mei likil reitinen nan. \x + \xo 2:25 \xt 1Tim 2:4\x*  
\v 26 Mak, ma xil mei lihur nenemien xa bos e lilesae ra voh xa \w Temat\w* di boxol xil ni. Temat di dal xat xil vengan ien bei tengan lapol vahusil nenemien nan.   
\c 3  
\s1 Selxatien usil naha xa istal e Melengien Kor xil  
\p
\v 1 Timoti, bos xa ukil kuhi xa, e Melengien Kor xil, melele te xeih xil holu limei. \x + \xo 3:1 \xt 1Tim 4:1\x*  
\v 2 Vengan e melengien xil ak, moletin xil linem kes ni xil tang: nenemien nae iti e \w mani\w*, lisep xoli xil e lihe koai. Xil lipurun mosav xil e linalong xat ti tamexil. Xil linem male ni tutouen xil xa mosav xil lasa ni e linem male ni holesok xil na Hi. \x + \xo 3:2 \xt Rom 1:29-31\x*  
\v 3 E melele nen ak, xil linanem ti meulien na mosav xil, esaeen nae ihe tovuol. Xil ti lisuhol purun mosav xil e lipol ni vaeen mi xil. Iexil ikat vehakut e liketeh isa ni holesok xil xa bos.  
\v 4 Xil ti lipol ni suse tengan ti lipurun mosav xil e linanem ti meulien nae mu na mosav. Xil lipolu ni nenemien te molepen e eheien nae iti e sien xil te ut etan, e nati ti e Hi.  
\v 5 Xil ti lihusil Hi ixot hilbexil tang, e xeihen nan ihe tovuol e meulien nae. !Hisit moletin xil xa lamak, onaha ti visal xil! \x + \xo 3:5 \xt Mat 7:15,21; Rom 2:20; Taet 1:16\x*  
\v 6 Rut moletin xil ak di lakapis e nim xil vus e di lasep luvos atou xil xa nenemien nae taxeih ti tengan lavusil pispisien nae. Atou xil ak, eheien te holesok xil te ut etan di e xil, e nenemien usil \w tesaen\w* nae xil di bas tan ni xil vehakut. \x + \xo 3:6 \xt Taet 1:11; 2Tim 2:25\x*  
\v 7 E tave ti neta xa hisit atou xil ak di langgur pispisien xil vehakut, lasakras lakil ti reitinen teni.  
\v 8 Xosali ak, moletin xil holu di lasepin misa ba xat longeongen hos na Hi. Nenemien nae tamal ti e neketen nae be te luvosen tang. Xosali nggoni tetiamu, e melele xa provet te luvosen lu na suv toto te hal Isip lutesepin tesa teha mi \w Mosis\w*, hisealu tehe Sanes e Sampres. \x + \xo 3:8 \xt Eks 7:11,22; 1Tim 6:5\x*  
\v 9 E nggoni provet te luvosen xalu ak, polien nae xil mei ihe neta sav tang vengan moletin xil vus lipus kila xa xil dit lapol ni unuen.   
\s1 Selxatien mi Timoti tengan ihusil kuh sepinien na Hi  
\p
\v 10 E xouk, Timoti, okil kuh pispisien xil navan e sexien navan xil ngamu. Okil kuh vatit nenemien xa di napol nggusili. E okil kuh neketen navan, eheien navan, e nenemien navan xa teviei. Okila mun xa inou natangel ti e polien navan.  
\v 11 Xouk okil kuh sakpurunien e longpangasien xil xa natehisu ni e taon xatel ak: Antiok, Aekoniam e Listra. Sakpurunien xil ak tehe holu pupu, e Hi tesikoe xol meulien navan ra xil vus. \x + \xo 3:11 \xt Pol 13:50; 14:5; 14:19; Sam 34:19\x*  
\v 12 Io, moletin xil vus xa iexil bei tengan lavusil Iesu Kristo e suse xil xa momal na Hi, xil lihur sakpurunien xil ven. \x + \xo 3:12 \xt Mat 16:24; Sion 15:20; Pol 14:22\x*  
\v 13 E moletin xil xa lasa e ngan xil xa di laluvos, xil mei lisa pilei sung. Xil ti liluvos mosav xil, e mosav xil mun ti liluvos xil.  
\v 14 E xouk Timoti, onaxoni xil ti, utit ni ngan taxa ti uhusil pispisien xil xa otehuri tetiamu e okila ngamu xa be reitin. Okil kuh hisit pispisien xil xa otehuri ra moletin xil xa nenesien nam di e xil. \x + \xo 3:14 \xt 2Tim 2:2\x*  
\v 15 E okil kuhi xa hisit pispisien xil ak di nggusil naha xa otelonge texo Vanuvei Eo e melele xa otehe horamue tamu mei duxoh xosali. Vanuvei Eo mikila vasak ni moletin xil lale kil suse xa lakila laling neketen nae e Iesu Kristo e lavur meulien hu vaxo en. \x + \xo 3:15 \xt Sion 5:39\x*  
\v 16 Sepinien xil vus xa di Vanuvei Eo, nenemien xil vus teni nggo Hi. Sepinien xil ak bos te pispisien, te selxatien, te sepkilaen usil suse xa momal, e tengan vapispisi mi moletin xil xa linapol ni ti mun sexien xil xa misa. \x + \xo 3:16 \xt 2Pit 1:21; Rom 15:4\x*  
\v 17 Nggo sexien xil ak, Vanuvei Eo di misak xat moletin xil na Hi tengan likila lipol vuol ni polien hos xil vus. \x + \xo 3:17 \xt 2Tim 2:21\x*   
\c 4  
\s1 Pol misel xat Timoti tengan ihithiten sepinien na Hi  
\p
\v 1 Timoti, Iesu Kristo itilomun e mei ihe suv toto. Mak, ma pe met Hi e pe met Iesu Kristo xa ilepis moletin xil xa lameul e ngan xil xa lalel, inou nasa selxatien xil ak minuk. \x + \xo 4:1 \xt Pol 10:42; Rom 14:9-10; 1Pit 4:5\x*  
\v 2 Uti ni ngan taxa ti uhit rat longeongen hos na Hi. E melele xa bos, e melele xa nggeih mun, ti usak xatuk ven. Mi ngan xil xa latakil ti Hi, usak ni xil like reitin en. Mi ngan xil xa di lapol ni tesaen, usel xat xil ni. E mi ngan xil xa di lalonge misa, upet rat nenemien nae ni. E uti ni ngan taxa ti upol ni sexien xil ak itel pispisien hos xil. \x + \xo 4:2 \xt Pol 20:20,31\x*  
\v 3 E melengien xil xa ti imei, moletin xil iexil ti navei tengan lalong pispisien hos te reitinen. !Io! Xil lihusil naha kestang xa iexil bei. Ma lileh viton titsa xil mei liti xorelis xil tengan lisa pispisien xil xa iexil bei tengan ti lilonge. \x + \xo 4:3 \xt 1Tim 4:1\x*  
\v 4 Xil lihiles ra sepinien te reitinen e lilong xat pispisien xil usil tumulen te luvosen xil. \x + \xo 4:4 \xt 1Tim 4:7; Taet 1:14\x*  
\v 5 E xouk, Timoti, uxuxou kuhi ve sexien nam xil. Usoh ixeih e longpangasien xil nam, uhit rat longeongen hos vehakut, e upol ni holesok xil vus xa Hi milingi di e hem.   
\p
\v 6 Nasel xatuk nggeih mak vengan inou, meulien navan sangas vavus xa nggoni sanien kor navan ba mi Hi. Navehi ti, nihe reling ut etan. \x + \xo 4:6 \xt Plp 2:17\x*  
\v 7 Inou nanggoni moletin tei te vaeen e natevae texeih e rin na Iesu Kristo. E nanggoni moletin te lohen mun, xa natnagel ti e lohen te neketen. E taxeak, naduxol xoxalite teni ngamu. Natesoh texeih e neketen navan. \x + \xo 4:7 \xt 1Tim 6:12\x*  
\v 8 Ma taxeak, huit lohen navan datil nou e ut nesao vengan xa nanggusil naha xa Suv ien bei. Xi xa momal isa huite ak minou e melengien xa mei ilepis moletin xil en. E nave nou ti kestang, xi isa huite mun mi moletin xil vus xa iexil bei pupu tengan lipus meien nan. \x + \xo 4:8 \xt 1Kor 9:25; Plp 3:14; 2Tim 2:5; Tem 1:12; 1Pit 5:4; Rev 2:10\x*   
\s1 Pol misis Timoti tengan vatemanon vamei visali  
\p
\v 9 Timoti, usak pisi li utemanon mei upus nou inggak.  
\v 10 Nasisuk tengan omei vengan xa Kresken ba ngamu pol e provins te hal Kalesia, e Taetas mun ba ngamu pol e taon te hal Dalmesia. E Dimas, xa eheien nan di e holesok xil te ut etan, xi milesae ra nou e be taon te hal Tesalonaeka. \x + \xo 4:10 \xt Kol 4:14; Flm 1:24; 2Kor 8:23; Kal 2:3; Taet 1:4\x*  
\v 11 Luk kestang be xamel madi. Mak, ma uhur Mak ihe xamil, vengan xi mikila itutou ni nou e polien navan ixoni ngan xa tepol ni tetiamu. \x + \xo 4:11 \xt Kol 4:14; Flm 1:24; Pol 12:12,25; 13:13; 15:37-39; Kol 4:10; Flm 1:24\x*  
\v 12 Nasil Tikikas di bat ni xamil e taon te hal Efeses. \x + \xo 4:12 \xt Pol 20:4; Efes 6:21-22; Kol 4:7-8\x*  
\v 13 E melele xa umei, bos tengan uhur kot navan xa natelingi tete he Karpas xa de taon te hal Troas. E uleh vanuvei navan xil, e ngan xa eilep mak mu, uleh tisen navan xil itel xat xamil. \x + \xo 4:13 \xt Pol 20:6\x*   
\p
\v 14 Aleksanda xa di pol ni holesok xil ni aean, xi purun pupu ni nou. E Suv Iesu isa rilomun ni naha xa tepol ni minou ihe an.\x + \xo 4:14 \xt Pol 19:33-34; 1Tim 1:20; 2Saml 3:39; Sam 28:4; 62:12; Pro 24:12; Rom 2:6\x*  
\v 15 Ulaxatuk ve moletin ak, vengan xi di bae pupu ba ni longeongen hos xa xir di rabithiteni.   
\p
\v 16 Melele xa latehur kokot ni nou natehe kot, moletin tovuol mei vasoh e rin navan tengan vatutou ni nou ni sepinien. Xil vus latelesae reling nou. E natesis Hi tengan naketeh ti nasa mi xil ve rin ak. \x + \xo 4:16 \xt 2Tim 1:15\x*  
\v 17 E Suv iaxa tesoh e rin navan e tesa xeihen minou. Xi tesak ni nou natesepin kuhi ni longeongen hos nan tengan ngan xil xa latave Siu ti lakila lalonge. Xil sangas lasemae ni tengan lavas vin nou, e Hi tesikoe xol nou ra xil. \x + \xo 4:17 \xt Pol 27:23; 23:11; Sam 22:21; Dan 6:22\x*  
\v 18 E Hi isikoe xol nou ra he ngan xil vus xa lasa xa labit ti lapurun nou. E xi ihur kuh nou tengan ha nite metimal nan xa eilep xa de ut nesao. Ripet rat his Hi ihe nesao e ita vehakut. Reitin.   
\s1 Sepinien kor  
\p
\v 19 Nabit bos makoe mi Prisila del tiramue nan, Akuila. Nabit bos makoe mun mi Onesiforas del ngenen xil. \x + \xo 4:19 \xt Pol 18:2; 2Tim 1:16-17\x*  
\v 20 Erastas dat e ut Korin, e naling Tropimas e ut Maelitas vengan temesei. \x + \xo 4:20 \xt Pol 19:22; Rom 16:23; Pol 20:4; 21:29\x*  
\v 21 Usak pisi utemanon umei vengan an tesa xil di bemei. Epulas, Pudens, Laenus e Klodia, del tua sav xil mun inggak, labit bos makoe minuk.   
\p
\v 22 Nasis tengan Hi iti minuk, Timoti, e eheien hos nan iti mi xamim vus.