\id 2PE - Southeast Ambrym NT with Ruth and Jonah [tvk] -Vanuatu (DBL 2015) 
\h 2 Pita 
\toc1 2 Pita 
\toc2 2Pit 
\mt2 Sepinien xa diamu te  
\mt1 2 Pita  
\is1 ?Visi iaxa tetis uvei ak?  
\ip Eloheoh Pita tetis uvei ak\x + \xo 1:0 \xt 2Pit 1:1\x* sangas ni huram hanutap tol e lu e he sav mun AD (huram 67 tetutou ni poten na Iesu). Melele xa Pita tetis uvei nan xa tetiamu, huram tol (3) mei tetavi, di, tetis uvei ak sung.\x + \xo 1:0 \xt 2Pit 3:1\x*  
\is1 ?Visi iaxa tevuli uvei ak tetiamu?  
\ip Pita tetis uvei ak teha mi Kristin xil vus. E 1 Pita, xi tepet rat nenemien nae e tesel xat xil tengan lisoh ixeih ve longpangasien xil xa ti imei. E, e 2 Pita, xi tesel xat xil tengan lipus kil sexien tesa xil na titsa te luvosen xil.  
\is1 ?Pita tetis uvei ak veneh?  
\im \bd Pita ien tehei tengan Kristin xil lihur xat sepinien te reitinen usil Iesu Kristo\bd* - Pita tesel xat moletin xil na Hi tengan mei limatu kuhi e neketen nae\x + \xo 1:0 \xt 2Pit 1:5-11\x* e melele xa di langgusil xat pispisien xil xa be reitin xa di nggusil naha xa di e Vanuvei Eo na Hi.\x + \xo 1:0 \xt 2Pit 1:12-21\x*  
\ib  
\im \bd Pita ien tehei tengan vasel xat Kristin xil linahusil titsa te luvosen xil ti\bd* - Pita tehiteni xa hisit titsa te luvosen xil lateti nousav ngamu,\x + \xo 1:0 \xt 2Pit 2:1-10\x* e holesok xil xa di lapispisi ni mi moletin xil tave reitin ti. Pita tesel xat xil tehit sexien tesa xil xa di lapispisi ni mi moletin xil di bar xat xil.\x + \xo 1:0 \xt 2Pit 2:19\x* E melele xa Iesu itilomun en, mei ilepis rin na titsa xil ak e isa pangasien mi xil.\x + \xo 1:0 \xt 2Pit 2:12\x*  
\ib  
\im \bd Pita ien tehei tengan vapet rat nenemien na Kristin xil xa mei rilomunen na Iesu Kristo be reitin\bd* - Vengan xa titsa te luvosen xil latehiteni xa Iesu natilomun ti mun,\x + \xo 1:0 \xt 2Pit 3:4\x* Pita tesel xat Kristin xil tengan linamaen nenemien nae ti namot vengan xa Iesu Kristo imei rilomun reitin e melele xa Hi teling xati tengan istal en. Misak ni, xil linatemanin ni mei rilomunen nan ti naxoni moletin sav xil.\x + \xo 1:0 \xt 2Pit 3:6-10\x*  
\ib  
\im \bd Pita ien tehei tengan vasel xat Kristin xil xa meulien nae imese tevi\bd* - Vengan xa titsa te luvosen xil di lapispisi mi Kristin xil labit momal tengan ti lihusil eheien te tenbexil,\x + \xo 1:0 \xt 2Pit 2:13\x* Pita tesel xat moletin xil na Hi tengan lihusil sexien xil xa lakila labit momal tevi pe met Hi.\x + \xo 1:0 \xt 2Pit 3:14-15\x*  
\is1 Nenemien tei xa eilep te uvei ak de 2 Pita 3:17  
\ipq E xamim xa mube navan xil li, vengan xa mukil holesok xil xa di nabiteni xiak, mungguxou kuhi tengan moletin tesa xil linatel xamim ti ni pispisien xil xa tamal ti e linasak ni xamim ti munamot e neketen namim ra rute xa bos xa mudi en taxeak.  
\is1 ?Naha iaxa di e uvei ak?  
\io1 1. Selxatien tengan Kristin xil mei limatu kuhi e neketen nae. (1:1-21)  
\io1 2. Selxatien tengan Kristin xil ti linahusil pispisien xil ti na titsa te luvosen xil. (2:1-22)  
\io1 3. Selxatien tengan Kristin xil ti lipol ni sexien xil xa momal e melele xa di ladatil mei rilomunen na Suv Iesu. (3:1-18)  
\c 1  
\s1 Sepkilaen na Pita usil uvei ak  
\p
\v 1 Inou nabe Saemon Pita, moletin te polien na Iesu Kristo e \w eloheoh\w* tei nan.  
\p Di nadis uvei ak bat mi xamim xa mutehur neketen hos xa bos pupu nggoni ngan xa xamem mangguri. Iesu Kristo tesa neketen ak mi xamim texo holesok xil xa xi tepol ni xa temal tevi. Xi iaxa be Hi nar e di miteh meulien e xir.   
\p
\v 2 Nasis tengan eheien hos e tomat na Hi mei ipolu kuhi e meulien namim ixo naha xa mukila usil Hi e Iesu, Suv nar. \x + \xo 1:2 \xt Siud 1:2\x*   
\s1 Hi di mikes moletin xil mei labe nan  
\p
\v 3 Nggo xeihen na Hi, xi tesa holesok xil vus xa ti rihuri tengan riti e meulien xa xi ien bei e rihusil suse xa momal. Di misa ni mi xir melele xa rakil kuh xi, ngan xa tekes xir ve hosien e minehinen te xeihen nan. \x + \xo 1:3 \xt 1Pit 2:9\x*  
\v 4 E nggo hosien e minehinen te xeihen nan, Hi di misa hitxatien tellep xil xa bos pupu mi xir.\f + \fr 1:4 \ft Hitxatien hos xil na Hi labe holu pupu e rute xil labit itep iaxa Hi isa Ninin Eo nan mei ise xat moletin nan xil (\xt Pol 2:14-41\ft ), itep iaxa mei rihe eo ixoni Hi (\xt 1Sion 3:2\ft ), itep iaxa Iesu imei rilomun en (\xt 2Pit 3:4\ft ), e itep iaxa rihur meulien sal e ut nesao (\xt 1Pit 1:4; 2Pit 3:13\ft ).\f* Di misa ni mi xir tengan rikila rilesae ra sexien tesa xil te ut etan xa di purun moletin xil, e ripol ni sexien xil xa momal kuhi ixoni ngan xa Hi mun momal tevi.   
\p
\v 5 Misak ni, vengan xa Hi tepol ni holesok xil ak, xamim musak ixeih tengan musuv xat neketen namim itel sexien hos xil. E musuv xat sexien hos namim itel kilakilen te reitinen na Hi.  
\v 6 E musuv xat kilakilen ak itel nenemien xa muxuxou kuhi ve sexien namim xil. E musuv xat nenemien ak itel nenemien xa tit mupol ixeih ha vuma … ituxoh hoxalit meulien namim. E musuv xat nenemien ak itel sexien xil xa imal ixoni sexien xil na Hi. \x + \xo 1:6 \xt Kal 5:22-23\x*  
\v 7 E musuv xat sexien xa momal ak itel vitueien hos. E musuv xat vitueien hos ak itel sexien te eheien.  
\v 8 E xosxa sexien xil ak ladi e meulien namim e di lamatu kuhi e xamim, ma kilakilen namim e Iesu Kristo, Suv nar, mei ihe mahulong mak mu. E ipisen ni xa kakaoen namim di nggusil neketen namim e meulien namim ihur huite ihe holu.  
\v 9 E xosxa moletin tei tapol ni ti sexien hos xil ak, ngan ak di pisen ni xa nenemien nan be tamure tang, misakras vanem vaha mu, e di ien bovorong ni xa Hi tekas moten ni tuei ra \w tesaen\w* xa tepol ni.   
\p
\v 10 Misak ni, tuxoli xil e neketen, musak pisi ixeih tengan mupol ni sexien xil ak tengan ipisen ni ihe reitin xa Hi tehosei xamim e tekes xamim mei mube nan. Xosxa kakaoen namim ihusil reitinen ak, ma musakras musavut e neketen namim.  
\v 11 Vengan, nggo rin ak, Hi di pol ni suse mei memese tevi tengan ihur pilei xamim mumei e ut xa Iesu Kristo, Suv nar xa teteh meulien e xir, be suv toto en vehakut xa vehakut tang.   
\p
\v 12 Misak ni, neta sav xa xamim mukil holesok xil ak ngamu e di musoh nggeih e reitinen xa mungguri, nanemi nabit bos xa nitit ni ngan taxa ti nihithiteni mi xamim tengan iemim nabong ni ti. \x + \xo 1:12 \xt Siud 1:5\x*  
\v 13 Reitin, e melele xil vus xa nimeul nita, nanemi nabit momal tengan tit nihithiten holesok xil ak mi xamim vehakut. \x + \xo 1:13 \xt 2Kor 5:1; Sion 21:18-19\x*  
\v 14 Vengan xa nakila xa nave nousav ti, nimat ixoni ngan xa Iesu Kristo, Suv nar, tehit lelen ni minou ngamu.  
\v 15 Misak ni, di nadis uvei ak bat mi xamim tengan nipol ni holesok xil xa nakila nipol ni tengan vatutou ni neketen namim. Imak, ma melele xa nimat, xamim mukila munem rilomun ni rin xil ak vehakut.   
\s1 Eloheoh xil e provet xil tetiamu latehit rat reitinen usil Iesu Kristo  
\p
\v 16 Di nadeli rilomun ni nenemien namim tengan mukila xa sepinien navan be reitin. Vengan melele xa xamem eloheoh xil na Iesu Kristo di masepin mi xamim usil xeihen e mei rilomunen na Iesu Kristo, Suv nar, matatumul ti usil tumulen xil xa moletin tei tang tepol ni tengan valihi nenemien na moletin sav xil vaxo en. E‑e, xamim matepus minehinen te xeihen nan ni metemem xati.  
\v 17-18 \x + \xo 1:17-18 \xt Mat 17:1-5; Mak 9:2-7; Luk 9:28-35\x*Reitin, xametel mateti tetel Iesu e vathu na Hi e melele xa Hi Tata tesa merereen e minehinen te xeihen mini. Xametel matelonge melele xa Hi te Xeihen tesep usili tehit, “Ngan ak be Natuxoli reitin xa eheien navan di en. Inou nabesi nou pupu ven.” Reitin mak, xametel vari mattelong rae nen ak xa texo ut nesao.   
\p
\v 19 Mak iaxa, holesok xil vus xa xametel mattepusi e mattelonge di misak ni xir rakil kuhi xa sepinien xa \w provet\w* xil tetiamu latehit lelen ni usil Mesaea be reitin tevi. Bos mak mu xa muhur kuh sepinien nae xil e ti mulong xati, vengan xa sepinien nae di mileluv xol holesok xil nggoni laet xa di mileluv kuhi e ut te maluxoluk. Mak, ma bos mak mu xa mupol itel laet te sepinien ak ituxol melengien hos xa Iesu imei rilomun en xa isak ni nenemien namim mei ileluv kuhi. Reitin, xi imei ixoni Melan, hitu te makoe xa di pisen ni xa ut da milan.  
\v 20 E ngan xa eilep mak mu tengan mukila xiak: sepinien xil vus xa Vanuvei Eo di bit lelen ni tenastal ti tenaxo nenemien na provet xil kestang.  
\v 21 Vengan xa hisit sepinien xa mak taxo moletin xil ti kestang. E be Hi iaxa di misepin nggo vulonge moletin xil e melele xa \w Ninin Eo\w* di mise xat xil.\x + \xo 1:21 \xt 2Tim 3:16; 1Pit 1:11\x*   
\c 2  
\s1 Hi isa pangasien mi titsa te luvosen xil itel ngan xil mun xa di langgusil pispisien nae xil  
\p
\v 1 Tetiamu, \w provet\w* te luvosen xil latestal e hilaep te mol‑Isrel xil. E, usil hisit sexien tak, titsa te luvosen xil ti listal e hilaep te xamim. Xil lileh xuxus ni pispisien te luvosen xil xa ipurun vuol ni neketen na ngan xil vus xa ti lihusili. E ngan xa isa mak mu iaxa xil likavitou ni Suv Iesu xa texal rat xil ra pangasien ve tesaen nae xil. Isak ni, xil ti lilihi pangasien imei itemanon mak mu mi xil mun tang xa lihuri e melele xa ha lisoh pe met Hi. \x + \xo 2:1 \xt Mat 24:11; Siud 1:4\x*  
\v 2 Moletin holu lihusil suse te sexien tesa na titsa te luvosen xil ak. E ve tesaen xil xa di lapol ni, moletin sav xil lisepin isa iha xat Suse te Reitinen xa di ranggusili. \x + \xo 2:2 \xt Aes 52:5\x*  
\v 3 Titsa te luvosen xil ak labe hokan e mei lipurun xamim itel tumulen xil xa di lasa ni tang tengan lakila lalah rat mani namim xil vaxo en. Nousav ngamu, Hi tevue xat xi tengan valepis rin na moletin xil ak. Reitin, xi xa ti ilepis rin na moletin xil ak tapat ti. E isa pangasien mi xil e ihu len vuol ni xil. \x + \xo 2:3 \xt Rom 16:18; 1Tes 2:5\x*   
\p
\v 4 Hi isa pangasien mi titsa xil ak ixoni ngan xa tepol ni tetiamu. Rakila vengan xa, tetiamu, Hi tenastokovein \w masxaxa\w* xil ti tengan litit ni ngan xa ti lipol ni \w tesaen\w*. E Hi tesa pangasien mi xil ven. Reitin, tesil rerat xil latehe Vangavul te Upang xa misakras vamat e tevar xat xil ni sen te xeih e maluxoluken tengan litatil Melengien te Lepisien. \x + \xo 2:4 \xt Siud 1:6; Rev 20:1-3\x*  
\v 5 E, tehusil sexien tak, e melengien xil na \w Noah\w*, Hi tenastokovein moletin xil ti tengan latit ni ngan xa ti lapol ni tesaen nae xil, e xi tesa pangasien mi xil. Reitin, xi tesa oei tei xa mahulong teleh mei tekutaxol ut etan tengan vahu len moletin tesa xil ak. Noah tesa sepinien xa tepisen suse te momalen mi moletin xil, e latesin ni. Tesak ni, teteh meulien e Noah kestang tetel ngenen xil xa latehe lu e he sav (7). \x + \xo 2:5 \xt Sen 6:1-7,17; 8:18; 2Pit 3:6\x*  
\v 6 E melengien xil na Lot, Hi tesa pangasien mi moletin xil xa lateti e taon xalu te hal \w Sodom\w* xal \w Komorah\w*. Reitin, tesa upang xa mei tea len holesok xil vus xa teti e xalu teha vuma … taon xalu ak mei lutehe meas tang. Hi tepol ni temak tengan moletin sav xil lipus kila xa ngan ak be naha xa mei istal mi ngan xil xa di lapol misa. \x + \xo 2:6 \xt Sen 19:24; Siud 1:7\x*  
\v 7 E Hi teteh meulien e \w Lot\w* vengan xa sexien nan xil temal pe meten e xi mun telonge tesa ve sexien tesa na moletin xil xa di latesin rae hos xil. \x + \xo 2:7 \xt Sen 19:1-16\x*  
\v 8 Reitin mak, Lot tetat visal xil, ma melengien xil vus tepus sexien nae xil xa tekavui e telong sepinien tesa nae xil. E vengan xa kakaoen na Lot temal, sexien nae xil tesak ni tinen tepangas ven teha vuma … sangas vatin mei vatalang ni.  
\v 9 Misak ni, di rapus kila xa midep iaxa Hi mikila vateh meulien e ngan xil xa lamal ra melele te xeih xil xa di labisu ni. Rakila mun xa Hi di milepis rin na ngan xil xa di lapol misa e di miso viton pangasien xa xil ti lihuri e Melengien te Lepisien. \x + \xo 2:9 \xt 1Kor 10:13; Siud 1:6\x*  
\v 10 Reitin, Hi ilepis rin na moletin xil vus xa di lapol misa, e ipol ni mak mu mi ngan xil xa di langgusil eheien xil te tenbexil tang xa tamal ti, e di lasin rae na vat nae xil. \x + \xo 2:10 \xt Siud 1:7,8\x*  
\p Titsa te luvosen xil ak, vatixil nggeih e ulixil takan ti tengan laseputut ni ngan xil xa labe eilep mak mu lali xil e ut etan e e ut nesao mun.  
\v 11 Vengan rapusi xa, tave ti neta xa masxaxa xil latellep e langgur xeihen lali titsa te luvosen xil ak, masxaxa xil latanemi ti lavit xil lapin tengan laseputut ni neta ngan. Reitin, pe met Hi, latasa ti sepinien tova vaha xat masxaxa sav xil vaxoni ngan xa titsa te luvosen xil ak di lapol ni. \x + \xo 2:11 \xt Siud 1:9\x*  
\v 12 E titsa xil ak di laseputut xat ngan xil xa latakil ti. E nggoni vongoro xil te ut etan xa ladi tengan mosav xil lital xat xil e lihas vin xil, kilakilen na titsa xil ak tovuol e di langgusil naha xa tenbexil tang di ien bei. \x + \xo 2:12 \xt Siud 1:10\x*  
\v 13 Reitin, Hi isa xoles longpangasien mi xil xa latesa ni mi mosav xil. Titsa te luvosen xil ak labesi xil tang tengan ti lapol ni sexien te hoeasoen xil e melengien tang. E melele xa titsa xil ak di langganien vituei del xamim e anien eo xil, langgoni tan xa di purun eising tei xa mieh. Di lapurun vitueien namim vengan xa di lapol misa tang, e unounen tovuol e xil vari. \x + \xo 2:13 \xt Siud 1:12\x*  
\v 14 Vehakut, mae di nggat xil ve \w tesaen\w* e iexil bei mak mu tengan lasak pisi tengan ha lapol vasa vatel atou xil vus xa di labisu mi xil. Di ladel ngan xil xa neketen nae taxeih ti e suse te tesaen. Labe ho mani e latepispisi kuhi mi xil mun tang ni suse xil xa likila lihur mani na mosav xil ixo en. Halesil de meulien nae e lipus kil ekaten na Hi sung.  
\v 15 Xil latehe reling suse xa momal e latele ras suse nae. Dit langgusil suse na provet \w Balam\w*, nat Beor, xa tehesi xi tengan vahur mani vaxo sexien tesa xil xa di tepol ni. \x + \xo 2:15 \xt Nam 22:7; Siud 1:11; Rev 2:14\x*  
\v 16 E ve sexien tesa ak, Hi tesel xati texo vulonge dongki san. Reitin, Hi tesak ni vongoro votei xiak, xa takil ti sepinien, mei tesepin ni rae moletin tengan vasikoe xol \w provet\w* ak e napol ni ti mun sexien te talangen nan. \x + \xo 2:16 \xt Nam 22:28\x*   
\p
\v 17 Titsa te luvosen xil ak di lasepin votei tang, e lasakras lapol ni naha xa di labiteni. Langgoni vangoei xil xa lames. Langgoni momah votei xil xa votiang di bui, e latasak ni ti us vamus. Hi teling xat vonexil tengan liha liti e ut xa imaluxoluk xa imaluxoluk pupu. \x + \xo 2:17 \xt Siud 1:13\x*  
\v 18 Di lasep koai holu, e sepinien nae be neta sav tang. E di laluvos moletin xil labit bos tengan lipol ni naha xa tenbexil tang di ien bei. E nggo sexien ak, di lalihi ngan xil xa neketen nae be neta hu tengan limot rilomun e sexien tesa xil ixoni moletin xil xa sexien nae xil mikavui. E be hisit sexien tesa xil ak iaxa latemeluv ra ni tave nousav ti.  
\v 19 Titsa te luvosen xil ak labit xati xa lisak ni moletin xil mei limeluv tevi, e xil vari labe slev xil te sexien tesa xil xa di bar xat xil e lasakras lameluv ra xil. Reitin, xil labe slev te sexien tesa nae xil xa di purun xil. Vengan moletin be slev te holesok xil xa be eilep e meulien nan. \x + \xo 2:19 \xt Sion 8:34\x*   
\p
\v 20 ?E midep ni ngan xil xa lakil Iesu Kristo, Suv nar, ngamu, xa tesak ni xil latemeluv ra ao te sexien tesa xil te ut etan, e di, lamaen sexien tesa xil ak tengan mei vavar xat rilomun ni xil? Moletin xil ak likameti xa meulien nae mei isa mak mu ili ngan xa lateti en tetiamu. \x + \xo 2:20 \xt Mat 12:45\x*  
\v 21 Vengan xa pangasien xa ngan xil ak lihuri isa pilei sung, vengan xa latekavitou ni rae eo xil na Hi xa xamem eloheoh xil matesa ni mi xil. Xos vahos mak mu vahit linakil ti suse te momalen ak. \x + \xo 2:21 \xt Luk 12:47-48\x*  
\v 22 Naha xa di lapol ni pisen ni xa sepinien te metisouen xalu ak lube reitin xa lubit,  
\q1 \qt “Kuli tei dilomun ba ngga luluhen nan,”\qt* \rq (Pro 26:11)\rq*  
\q1 e \qt “Vueili xa latekas moten ni dilomun ba pat e mame man.”\qt*   
\c 3  
\s1 Hitxatien usil mei rilomunen na Iesu Kristo  
\p
\v 1 Ngan ak be valu nen xa nadis uvei tei bat mi xamim xa eheien navan di e xamim. E uvei xalu vus natesak pisi tengan namithiten reitinen mi xamim xa mukila ngamu tengan munem rilomun ni holesok xil xa bos e momal.  
\v 2 Ieok bei tengan munem xat sepinien xil xa \w provet\w* eo xil tetiamu latehiteni, e munem xat rae xil na Suv Iesu xa teteh meulien e xamim, xa xamem, \w eloheoh\w* namim xil, matesa ni mi xamim. \x + \xo 3:2 \xt Siud 1:17\x*   
\p
\v 3 Neta tei xa eilep mak mu tengan mukil kuhi xiak: e Melengien Kor xil, moletin xil mei listal xa ti liseputut ni holesok xil xa bos e lihusil sexien tesa xil xa tenbexil tang iexil ihei. \x + \xo 3:3 \xt Siud 1:18\x*  
\v 4 Xil lihit, “?Midep? ?Be reitin xa xi tehit xati xa imei rilomun? ?Xi da xave? Avu nar xil tetiamu latemat ngamu, e neta tovuol vahiles. Holesok xil vus dit mak tang e melele xa Hi tepeas ni ut etan mei duxoh xosali ak.”  
\v 5 Neta sav xa xil lakil reitinen xa Melengien te Lepisien imei, labit linakil ti. Vengan xa tetiamu, Hi tepeas ni ut nesao e ut etan texo sepinien nan. Reitin, texo sepinien nan, xi tepol ni oei mei tehe tan e tesak ni tan ak testal texo oei. \x + \xo 3:5 \xt Sen 1:6-9\x*  
\v 6 E del xat oei ak mun tang, Hi tehu len holesok xil vus xa latemeul lateti e ut etan e melele xa tesak ni oei ak temei tekutaxol ut xil vus. \x + \xo 3:6 \xt Sen 7:11-21; 2Pit 2:5\x*  
\v 7 E xosali, nggo sepinien nen mun tak, Hi di miling kuh ut nesao e ut etan tengan laliti ituxoh melele xa teling xati tengan imaen upang mei ia len xalu vus. Reitin, xi di miserev xalu ve Melengien te Lepisien xa ikin maten mi moletin tesa xil vus.   
\p
\v 8 Ma xamim xa eheien navan de xamim, nasel xat xamim tengan iemim nabong ni netak ti. Pe met Hi Suv, huram taosen tei (1000) nggoni melengien tei tang. Reitin, xalu lupin tang nggusil ketehen nan. \x + \xo 3:8 \xt Sam 90:4\x*  
\v 9 Rut moletin xil lanemi labit Hi di miraru tengan vasak ni hitxatien nan usil mei rilomunen na Iesu vastal, e tave reitin ti. Nenemien nan teviei e rin namim e di misa mesal mi xamim tengan mukila muhiles ra tesaen namim xil, vengan xa ien ti tavei tengan moletin ti vakesae. Ien bei mak mu tengan moletin xil vus lihiles ra tesaen nae xil e mei lihe visali.   
\p
\v 10 E melengien xa Suv Iesu imei istal rilomun mi xamim ixoni meien na moletin te kanen tei xa moletin xil litemanin ni. E melele nen ak, ut nesao ikesae itel tangalen tei xa mahulong; upang xa eilep ia lelen eai, aveti e hitu xil; e ut etan itel holesok xil ngasen xa ladi en ihe tovuol mun.   
\p
\v 11 ?Ma, vengan xa Hi ihu lelen holesok xil vus ixo suse ak, xamim mei muhe hisit moletin eah vari? Meulien namim ihe eo e kakaoen namim ihusil naha xa Hi ien bei.  
\v 12 E mupol ni imak e melele xa di mudatil melengien xa Hi tehit xati xa Iesu imei rilomun en e mupol ni imei itemanon.\f + \fr 3:12 \ft Vanuvei Eo di biteni xa itiamu ni melele xa Iesu itilomun en, moletin xil vus te ut etan lilong longeongen hos usil Iesu Kristo (\xt Mat 24:14\ft ). Misak ni, Hi di tamu misa mesal mi moletin xil tengan likila lilonge e lihiles meulien nae tengan mei lihusil Hi (\xt 2Pit 3:9\ft ). Misak ni, rakila rasak ni mei rilomunen na Iesu mei itemanon mu melele xa di rabithiten longeongen hos usili e rute xil vus, e melele xa kakaoen nar di pisen xeihen na Hi.\f* E melengien nen ak, upang ia len tilang hat, e saluh teni ia len eai, aveti e hitu xil e holesok xil xa ladi e xil lixururi e likesae vari.  
\v 13 E neta sav xa holesok xil mei istal, xir di radatil naha xa Hi tehit xati mi xir. Radatil melele xa ut nesao e ut etan mei lalihe neta hu. E ngan xil kestang xa lamal pe met Hi likila liti en.   
\s1 Selxatien kor e sisen kor  
\p
\v 14 Xamim xa eheien navan di e xamim, vengan xa di mudatil melele nen ak, musak ixeih tengan Hi mei ikameti xa mudi e tomat nan, e di mupol ni kakaoen namim momal e memese tevi pe meten.  
\v 15 Mukila xa nenemien na Hi Suv nar teviei e di misa mesal mi moletin xil tengan iteh meulien e xil. E \w Pol\w*, tua nar e neketen xa eheien nar di en, xi mun di tetis sepinien nen tak mi xamim tehusil kilakilen xa Hi di misa ni mini. \x + \xo 3:15 \xt Rom 2:4; 1Pit 3:9\x*  
\v 16 Reitin, e uvei nan xil vus, Pol di midis usil nenemien ak. Rut sepinien xil xa ladi e uvei nan xil nggeih tengan moletin xil lanem kila. E ngan xil xa iexil ti tavei tengan lakil ti e lataro kat ti e neketen nae, xil labilhiles sepinien nan xil mei be luvosen tang nggoni hisit sexien xa di labilhiles sepinien sav xil xa di e Vanuvei Eo. E melele xa lapol ni mak, di lalihi pangasien bemei e xil mun tang.   
\p
\v 17 E xamim xa mube navan xil li, vengan xa mukil holesok xil xa di nabiteni xiak, mungguxou kuhi tengan moletin tesa xil linatel xamim ti ni pispisien xil xa tamal ti e linasak ni xamim ti munamot e neketen namim ra rute xa bos xa mudi en taxeak. \x + \xo 3:17 \xt Mak 13:5; 1Kor 10:12\x*  
\v 18 E bos mak mu xa mutit ni ngan taxa kilakilen namim usil Suv Iesu Kristo xa di miteh meulien e xamim e eheien hos nan ti meul mei ihe nesao mu. !Risa memesien mini xa minehinen te xeihen di en xosali e vehakut tang! Reitin.