\id 2TH - Mutu (Saveeng-Oov) NT [tuc] -Papua New Guinea 2011 (web version -2013) 
\h 2 Tesalonika 
\toc1 Rau Ite Inim Ru To Paulus Imbooda Ila To Yes Tesalonika 
\toc2 2 Tesalonika 
\toc3 2Tes 
\mt1 Rau Ite Inim Ru To Paulus Imbooda Ila To Yes Tesalonika  
\mt2 2 Tesalonaika—2 Thessalonians  
\c 1  
\p
\v 1 You Paulus. Yeru Silas ve Timoti nimbood rau tonene ilat to lupuuŋ to Krisi to aneep izi ndug Tesalonika. Yam tamtoghon to aneep tuŋia ila to Tamaan Maaron ve Tiina toit Yesu Krisi. \rq Mbaŋ 17:1 \rq*   
\p
\v 2 Poia toman luuma to Tamaan Maaron ve Tiina toit Yesu Krisi iza tiam, ve tiŋgin gham aneep pooi toman lolomim luuma. Onoon.   
\s1 Yes Tesalonika tiyoon ariaŋa pa badooŋ pataŋani  
\p
\v 3 Yam toŋvetaz, sawa isob, yei lolomai poia pa Maaron ve nipaiti payam. Ve ighaze nigham tovene, nene deŋia. Pasa, ghurla tiam ivot le ighaze iyaryaaŋ tonene. Ve ŋgar to lolomim pa taumim ve agham poian taumim, tovene paam. Nene ivotvot inim tiina ila lolomim, le yam asob ataghoni kat. \rq 2Tes 2:13 \rq*   
\m
\v 4 Pughu tonene to nipapait varumim ila lupuuŋ to Maaron lolodi irau ndug ndug. Yei nipaesia varumim padi nighaze onoon, yam ambaad pataŋani naol, ve tamtoghon tighamgham samin gham pasa, yam ataghon Krisi. Eemoghon ayoon ariaŋa, ve akis ghurla tiam tuŋia. \rq Mbaŋ 14:22; 1Tes 2:14 \rq*   
\s1 Maaron pale ighur atia pa yes to tizorzoor varu  
\p
\v 5-6 Onoon, aazne yam ambaad pataŋani pasa, ataghon pooz to Maaron. Ŋgar tiam tonanan ipatooŋ gham ighaze muri, sawa to Maaron ipatooŋ pooz toni ivot ighazooŋ, ve iŋgabiiz tamtoghon ve ighur atia padi, ye pale ipait gham ighaze yam popoiamim irau to alooŋ ala ndug toni. Pasa, Maaron gabizooŋ toni, nene deŋia moghon. Tovenen yes to tighurghur pataŋani payam, ye pale ighur pataŋani padi, leso iyat ŋgar todi tonowen.  
\v 7 Ve yam to ambadbaad pataŋani, ye pale ipas gham avot pa pataŋani tiam, ve igham gham atemim izi. Ve yam moghon maau. Yei paam. Sawa to Tiina toit Yesu imuul inim, ve Maaron ipatooŋa ivot ighazooŋ, nene pale mbeb tonenen ivot. Yesu yesŋa aŋela toni ariaŋadi, pale tipul sambam, ve tizi tinim toman mbalmbali to Maaron to ighanghan inimale yab. \rq Mt 25:31; 1Tes 3:13, 4:16; Syg 14:13 \rq*   
\m
\v 8-9 Ghoro iyat ŋgar samsamia to tamtoghon, ve ighur atia padi tovene: Yes irau tila tineep toman Tiina toit, ve tighita ŋguruba ve tapiri ne maau. Ye pale izurun di tila saguan, ve pataŋani tiina igham di itaghoni taghoni gha ila. Irau isob maau. Atia tonowen pale iŋarua tamtoghon tisob to tiwatag Maaron maau, ve tizorzoor varu poia to Tiina toit Yesu. \rq Mt 25:41; Ro 2:8; 2Pe 3:7; Syg 20:15 \rq*   
\m
\v 10 Mboŋ Muri, mbeb tonowen pale ivot. Sawa tonenen, Tiina toit Yesu pale imuul inim. Leso tamtoghon toni patabuaŋa to tighur ila toni ne, tipakuri ve tipait iza pa tapiri ve poia toni. Pale tighaze le tighitghita moghon. Ve yam paam pale aneep toman di. Pasa, sawa to nivotia saveeŋ to Krisi payam ve nipariaaŋ gham pa aghur ila toni, yam alooŋ saveeŋ tiei, ve aghur ila. \rq Mbaŋ 1:11; Kol 3:4 \rq*   
\s1 Suŋuuŋ to Paulus iŋaŋarua Maaron pa yes Tesalonika  
\p
\v 11 Yei nigham ŋgar pa mbeb naol tonenen, tauto sawa isob, suŋuuŋ tiei iŋaŋarua Maaron toit nighaze ighita gham popoiamim ila mata, ve irau agham nepooŋ poia to ye ipoi gham pani. Ve nighaze Maaron ipalot gham pa tau tapiri. Leso yam irau agham ŋgar popoiadi tisob to aghaze agham di, ve apatooŋ ghurla tiam ila uraat popoia naol. \rq Ep 4:1; 2Pe 1:10 \rq*   
\m
\v 12 Ighaze agham tovene, nene pale agham tamtoghon tighilaal tighaze Tiina toit Yesu, ye iza tiina pa tapiri ve poia toni. Ve ye pale ipakur gham paam, ve igham gham aneep ila ŋguruba lolo. Ŋgar tovene pale ivot payam itaghon poia to Tamaan Maaron yesuru Tiina toit Yesu Krisi. Onoon. \rq Yo 17:10; Pil 1:27+, Pil 2:13; Kol 1:9; 1Tes 1:2+ \rq*   
\c 2  
\s1 Ŋgeu Samia Kat pale ivot ve izoor tutuuŋ to Maaron  
\p
\v 1 Yam toŋvetaz, aazne yei nighaze nipaes payam pa sawa to pale Tiina toit Yesu Krisi imuul inim ve tiyou ghiit tala toni, leso itiŋa taneep. Tovenen nighason gham nighaze aghur taliŋamim pooi pa saveeŋ tiei tonene. \rq 1Tes 4:15+ \rq*   
\m
\v 2 Onoon, ndiran pida avaat tisaav payam tighaze sawa to Tiina toit Yesu, nene ivot wa. Eemoghon ruŋamim iza ve agham ŋgar naol pa saveeŋ todi malep. Ighaze ndiran tonowen tighaze Avuvu Patabuaŋ ipamundigin di ve tisavsaav tinimale propet, ma tighaze saveeŋ to tisavia payam, nene Maaron aliŋa, ma tighaze yei nimbood saveeŋ tovene ila rau eta, nene matamim ila pa saveeŋ todi malep. \rq Mt 24:4; 1Yo 4:1 \rq*   
\m
\v 3 Tovenen apul tamtoghon eta itombaan gham malep. Pasa, sawa tonenen irau ivot sorok maau. Tamtoghon pale tighur muridi pa Maaron, ve tizoor aliŋa kat, ve Ŋgeu To Izorzoor Tutuuŋ To Maaron ivot. Le isob, ghoro sawa tonenen ivot. Ŋgeu tonowen, muri pale ila ndug samia ve ilale kat. \rq Mk 13:22; Syg 19:20 \rq*   
\m
\v 4 Pasa, ye pale ighur koi pa Maaron tau toman mbeb tisob to tamtoghon tiwatwaat di tighaze maaron todi ve timbesmbees padi. Ve ye pale ipait tau ighaze ilib padi. Ve ilooŋ ila Rumai to Maaron, ve mbole izi tonowe, ve ighaze: “You to Maaron tau.” \rq Dan 7:25, 11:36; Mk 13:14; Syg 13:5+ \rq*   
\p
\v 5 Saveeŋ tonene, paghu maau. Matamim iŋgal. Sawa to itiŋa tanepneep, you nasavia mbeb tonene payam.  
\v 6 Ve yam awatag: Sawa tonene, mbeb eez iponpoon ataam pa ŋgeu samia tonowen.\f + \fr 2:6 \ft  Ŋgara pida tigham ŋgar tighaze mbeb to iponpoon ataam pa Ŋgeu To Izorzoor Tutuuŋ To Maaron, nene uraat to votiaaŋ varu poia, ve lupuuŋ to Krisi. \f*  
\m Leso ivot rikia sob. Ve tala tala le taza pa sawa toni kat, ghoro ipatooŋ tau ivot ighazooŋ. \rq Syg 20:1+ \rq*   
\m
\v 7 Pasa, ŋgar to zoraaŋ tutuuŋ ighaze ivot tonene itaghon ŋgar yoŋgaaŋ to Maaron. Eemoghon ivot ighazooŋ kat sone. Ve pale ivotvot tovene le mbeb to iponpoon ataam pani ighau, ghoro ivot ighazooŋ.  
\v 8 Ŋgeu To Izorzoor Tutuuŋ To Maaron, sawa to ipatooŋ tau ivot ighazooŋ, nene pale Tiina toit Yesu inim toman ŋguruba ve tapiri tiina, ve iwaghamuni. Pale ivibi moghon, ve imaat ve ilale. \rq Is 11:4 \rq*   
\m
\v 9 Ŋgeu To Izorzoor Tutuuŋ To Maaron, sawa to ipatooŋ tau ivot ighazooŋ, Ŋgeu Samia pale ighur tapiri iza toni. Tovenen ye pale igham uraat toman tapiri tiina, ve ipatooŋ uraat tintina ve mbeb gharatooŋadi naol naol, leso itombaan tamtoghon. \rq Mt 24:24; Mk 13:22; Syg 13:11+ \rq*   
\m
\v 10 Tovenen ye pale itombaan tamtoghon pa ŋgar samsamia naol to deŋiadi maau. Ve tamtoghon to titaghon ataam to timaat ve tilaledi, yes pale tighur ila saveeŋ toni. Pasa, lolodi pa saveeŋ onoon maau. Ve inimale lolodi pani, tone tighur ila, ve Maaron igham mulin di ve tineep pooi. Eemoghon maau.  
\v 11 Tovenen Maaron pale ighamun ŋgar todi kat, leso tighur ila saveeŋ kaarom tonenen.  
\v 12 Ye pale igham tovene pa tamtoghon tisob to tighur ila saveeŋ onoon maau, ve tinidi iza pa ghamuuŋ ŋgar samia. Leso muri ipayoon di, ve ighur atia padi ve tilaledi. \rq Ro 2:8 \rq*   
\s1 Maaron isia yes Tesalonika tinim le, leso igham mulin di  
\p
\v 13 Yam toŋvetaz, sawa isob, yei irau lolomai poia pa Maaron ve nipaiti pa ŋgar to igham payam. Ye lolo payam kat. Aghita. Muuŋ kat, ye isia gham ila tamtoghon lolodi, leso igham mulin gham. Ve Avuvu Patabuaŋ igham uraat payam, tauto aghur ila saveeŋ onoon, ve ataghon ŋgar patabuaŋ. Ila ataam tonene, yam anim aniiŋ mata to tamtoghon tigham pa Maaron inimale paitooŋ. \rq Ep 1:4; 1Tes 1:4, 5:9 \rq*   
\m
\v 14 Maaron ighaze ŋgar tovene ivot payam, leso muri igham gham aneep toman Tiina toit Krisi izi ndug sambam ila ŋguruba lolo. Tauto sawa to yei nivotia varu poia payam, ye ipoi gham anim le.   
\s1 Paulus ipalot yes Tesalonika  
\p
\v 15 Tovenen yam toŋvetaz, ayoon tuŋia pa ghurla tiam. Ve Maaron aliŋa to tisavia payei ve anamai nipaesia payam ila avomai, ma nimbooda ila rau, nene matamim kisini, ve ataghoni kat. \rq 1Kor 16:13 \rq*   
\p
\v 16-17 Tamaan Maaron lolo pait kat, ve poia toni ipapalot ghiit. Tauto lolood poia irau sawa isob, ve taghurghur mataad pa nepooŋ poia toman Maaron izi ndug toni sambam. Yesuru Tiina toit Yesu Krisi pale tirab atemim, ve tipalot gham. Leso ataghon ŋgar popoia to naol ne, ve asavia saveeŋ popoia moghon. Onoon. \rq 1Tes 3:13; 1Pe 5:10 \rq*   
\c 3  
\s1 Paulus ighason yes Tesalonika ighaze tighuri ila suŋuuŋ todi  
\p
\v 1 Yo, yam toŋvetaz, nisavia saveeŋ tonene, ve isob. Yei nighaze yam aghur ghei ila suŋuuŋ tiam, ve aghason Maaron pa iuul ghei pa uraat tiei. Leso saveeŋ to Tiina toit ilaan rikia irau ndug, ve tamtoghon tighita inimale mbeb tiina padi, ve titaghoni tinimale yam.  
\v 2 Ve aghasoni paam pa ipaghau ghei pa ndiran samsamiadi to ŋgar todi poia maau. Pasa, yam awatag: Tamtoghon tisob tighur ila sone. \rq Mk 13:10; Ro 15:30+ \rq*   
\p
\v 3 Eemoghon iit irau tanumeer Tiina toit. Pasa, ye itaghon saveeŋ toni irau sawa isob. Ye tau pale ipalot gham, ve ipoon gham pa Ŋgeu Samia. \rq Yo 17:15; 1Kor 10:13; 1Tes 5:24; 2Pe 2:9 \rq*   
\m
\v 4 Tiina toit igham ghei nighur ila kat tovene: Ŋgar isob to yei nisavia payam nighaze ataghoni, nene yam pale ataghoni. To aazne, ve itaghoni taghoni gha ila.   
\p
\v 5 Ve nighaze Tiina toit ipaghazoŋan ŋgar tiam, leso aghilaal kat ila lolomim aghaze: Maaron lolo payam. Ve nighaze Krisi ipalot gham, leso ayoon ariaŋa pa badooŋ pataŋani animale ye tau.   
\s1 Taneep sorok malep. Tagham uraat  
\p
\v 6 Yam toŋvetaz, yei nisaav ariaŋa payam ila Tiina toit Yesu Krisi iza tovene: Ighaze toŋvetaz eta to Krisi igham uraat maau, ve inepneep sorok, yam agharaui malep. Aneep saguan pani. Pasa ŋgar tovene, nene deŋia pa Maaron aliŋa to nisavia payam ne maau. Saveeŋ tonene, paghu maau. Ineep muuŋ ve inim.  
\v 7 Yam awatag: Sawa to ninepneep toman gham, yei nineep sorok maau. Nigham uraat. Ŋgar tiei tonene, yam irau ataghoni.  
\v 8 Ve nighan aniiŋ to tamtoghon eta sorok maau. Nigholghol aniiŋ ve nighanghan. Pasa, lolomai pa nigham pataŋani pa tiam eta maau. Tauto mboŋ ve ndag, nirab taumai pa uraat, leso nindeeŋ lemai yaam ris pa iuul ghei. \rq Mbaŋ 18:3; 2Kor 11:9; 1Tes 2:9 \rq*   
\m
\v 9 Onoon, sawa tonenen, yei irau nighur matamai payam pa ulaaŋ pida. Eemoghon nighason gham maau. Pasa, nighaze nipatooŋ gham pa ŋgar poia, leso aghita ve ataghoni. \rq Lu 10:7; 1Kor 9:4 \rq*   
\m
\v 10 Ve sawa to nineep toman gham, yei nighur tutuuŋ ariaŋa payam tovene: Ighaze tamtoghon eta lolo pa ghamuuŋ uraat maau, ye irau ighan maau. \rq Mbnp 3:19; 1Tes 4:11 \rq*   
\m
\v 11 Eemoghon nilooŋ tighaze tamtoghon tiam pida tigham uraat maau. Tinepneep sorok, ve tiwalaghlaagh taghon ruum ruum, ve tisia ledi savsaveeŋ to nditadi. \rq 1Tim 5:13 \rq*   
\m
\v 12 Ndiran tovene, yei nisaav ariaŋa padi ila Tiina toit Yesu Krisi iza nighaze tiput taudi, ve nimadi iyaryaaŋ pa uraat todi. Leso tiŋgin taudi pa ledi mbeb. \rq Ep 4:28 \rq*   
\p
\v 13 Ve yam toŋvetaz, tinimim imum pa ghamuuŋ ŋgar poia malep. \rq Ga 6:9 \rq*   
\p
\v 14 Saveeŋ to nimbooda ila rau tonene, ighaze tiam eta itaghoni maau, yam aghita ve aneep saguan pani. Agharaui malep. Leso ighilaal sosor toni ve maya. \rq Mt 18:17 \rq*   
\m
\v 15 Eemoghon aghita inimale koiamim malep. Aghita inimale toŋvetaz to Krisi, ve apasaluŋgani. \rq Ga 6:1; 1Tes 5:14 \rq*   
\s1 Paesiiŋ pida to Paulus  
\p
\v 16 Tiina toit Yesu, ye ŋgar luuma pughu. Sawa isob, ye tau pale igham gham aneep poia pa mbeb to naol ne, ve aneep toman lolomim luuma. Ve ye pale ineep toman gham asob. \rq Ro 15:33; 1Tes 5:23 \rq*   
\p
\v 17 You Paulus, taug nimag ve nambood ndag poia tiou ilat payam. You napasob rau tiou to naol ne tovene, leso tamtoghon tighilaal tighaze taug to nambood di. Nene bodeeŋ tiou tovene.   
\p
\v 18 Poia to Tiina toit Yesu Krisi ineep toman gham asob. Onoon. \rq 1Kor 16:23 \rq*