\id HAG  
\h Agai 
\toc2 Agai 
\toc1 Agai ana lelelele 
\mt1 Agai  
\mt3 ana lelelele  
\is1 Walo bagubagunana  
\ip Tomo Isileli sipileyoimako Babilon koina yo simiyamiya Yelusalema koina. Ali nume sikabiliko na iyamo Nume Tabu nigele, nige sikakabiyoi. Mwa Yeoba Yaubada iwalo palopita Agai gamwana mena na tomo ikabi-yakaiweli tem Nume Tabune sikabiyoi.  
\c 1  
\s1 Yaubada iwalo tomo Nume Tabu sikabiyoi  
\p
\v 1 Kin Daliyasi ana sauga kin bolime labuina kalona mena iloiloina, waikena sikisi (6) na kaliyate bagubagunana koina Yaubada iwalo yau Agai gamwagu mena. Mwa Yaubada ana walo yawalowen Yudiya ali gavana Selubabeli, iya Siyalitieli natuna, yo topwaoli lalakina Yosuwa, iya Yeosidaki natuna, kolili.  
\v 2-5 Yawalo bwaite besiele yaba, “Yaubada Tomiyasaesosi iwaloba, ‘Bwagana tomo siwalo yakato sauga bwaite nige sauga namwanamwana yagu nume sikabi, na yau yaneli, Yakato yagu nume imiya-tata-gwaligwali na komiu kwamiyamiya nume namwanamwali kolili? Kwanuwatu namwanamwa mumugamiu kaiwena.’  
\v 6-7 Like ilalaki wakumai na iyamo ami kelikeli ikikiu. Wakekanko na iyaelemo waguliguliyam yoi. Kwanumako na nagamo galogalomiu simagumagu. Kami kaleko ele na tulutulu kana sauga koina kwatulutulu. Ami mane kwalobaili ami paisowa koina na iyamo mwayamwayau wagabaeni. Na yawaloyoi, mumugamiu wagitaiyoili.  
\v 8 Koinaele kwalau koya kolili na mayau wakoili siguli wakalailima na yagu nume wakabi. Kabo muli mena kani numene kaiwena yayaliyaya yo esagu sikeleisinan.  
\v 9 Kwabatoko kelikeli koina kan lalakina kwalobai na nigele, kikiuna kwalobai. Tem witi kwalobai na wakalaiyama yayui-kalai kamwasa mena. Tawae kaiwena? Kaiwena komiu kaigeda kaigeda ami nume wakabikabili na yau yagu nume iyaelemo metata-gwaligwalina.  
\v 10 Bwaite iya kaiwena mwa nige galewa kwalolobai yo nige sowasowana kan kwalolobai.  
\v 11 Tano yo koya yayakasisi-yagili galewa koina kabo guliyam kwalobai kabo witi, wain, olibe olo yo kan meuloina yakausili tomo yo yakayakan kolili na mesabana ami paisowa iyamala ginauli bwagabwaga.”   
\s1 Nume Tabu kana paisowa iyatubu  
\p
\v 12 Kabo Selubabeli yo Yosuwa yo tomo sanasanapuli meuloili siya siyawatagilima Babilon koina Yeoba Yaubada ana walo siobigai. Tomo meuloili me ali matausi mwa yau yagu walo meuloina siobigai, kaiwena sikatai yau Yaubada ana tosagenawasa.  
\v 13 Kabo Yaubada ana walo yawalowen yoi tomo kolili yawaloba, “Yeoba Yaubada iwaloba, ‘Yau mekamikava, bwaite yau yagu waloyameli kolimiu.’”  
\v 14 Kabo kabiyakaiwene kaiwena tomo meuloili me ali katepatu mwa Selubabeli yo Yosuwa yo tomo Isileli siyatubu numene sikabi.  
\v 15 Kaliyate tuwenti powa (24) waikena sikisi kaliyatenane koina kabikabi paisowana siyatubu saugana Daliyasi ana sauga kin koina.   
\c 2  
\s1 Nume waluwaluna kaiwena  
\p
\v 1-2 Waikena seben kaliyate tuwenti wan (21) koina Yaubada iwaloyoi koliyau iba, “Kuwalo Selubabeli, Yosuwa yo boda Isileli kolili,  
\v 3 kuwaloba, ‘Beyabeyana ala Nume Tabu kana koleya inamwanamwasosi. Na analiyao komiu luwamiu mena numene kwanuwatu-kalatan? Na sauga bwaite koina ala Nume Tabu kana koleya inaesosi, awa?  
\v 4 Kabo Selubabeli, ukwaiwe, Yosuwa ukwaiwe, yo tomo meuloimiu yanuwa bwaite koina, wakaiwe. Kwapaisowa, kaiwena yau mekamikava.  
\v 5 Yagu waloyameli yawalowenako tubumiyao kolili ali yawatagilima Itipita koina kani yawalowen yoi kolimiu. Yaluyaluwagu imiyamiya kolimiu, tabu matausi.  
\v 6 Kikiunamo kani bulibuli yo yanuwa yaulina yanukuili, besiele kalita yo bwatano meuloina.  
\v 7 Kaba loinao uloili kani yabui-keileli kabo ali gogo wasawasa yakalailima silaoma bwaite koina na numene bwaite kani yayakalapowoni ali wasawasa koina. Yaubada Tokaiwesosi iwawalo.  
\v 8 Kabo yanuwa yaulina kana siliba yo gole silaoma kani siyamala yau gogo.  
\v 9 Mwa Nume Tabu waluwaluna kani iwasawasasosi kabo muli mena beyabeyanane kana wasawasa. Yo dedei bwaite koina kani yagu daumwali yaolegili na tomo simiya namwanamwa. Yau Yaubada Tokaiwesosi yawalowalo.’”   
\s1 Palopita Agai topwaoli ineli-yagili kan yakayakasisina yo dumdumli kaiweli  
\p
\v 10 Kin Daliyasi iloiloina ana bolime labuina kalona mena waikena naen (9) na kaliyate tuwenti powa (24) Yaubada Tokaiwesosi iwaloyoi koliyau,  
\v 11 iba, “Kulau na topwaoli kuneliyagili bwaite besiele,  
\v 12 Tem tomo yabo miti bulumana yakayakasisina ikalai kaba pwaoli mena na isuma ana kaleko mena na ilawan. Na tem tomo yabo kan yabo ikabitonan kalekone koina, nuwana beledi o wain o nuwana olibe olona, gubesi, kanne kani iyamala kan yakayakasisina o nigele?” Mwa yalau topwaoli kolili yaneli besiele Yaubada ana neli. Kabo kainagu siyamaisa siba, “Nigele.”  
\v 13 Mwa yawaloyoi yaba, “Na tem tomo ilau na tomo yabo boiboitana kwapina ikabitonan. Na ala loina iwawalo yakato tomone iyamala tomo bikibikina. Na tem tomone ilau yo kanne ikabi-tonagili, mwa gubesi, kani kanne siyamala kan bikibikili?” Kabo topwaoline kainagu siyamaisa siba “O, besiele.”  
\v 14 Mwa yawaloyoi yaba, “Yaubada iwawalo yakato tomo Isileli meuloili yo ali tano uweliyao meuloili sibiki, koinaele ginauli meuloina sipwaopwaoli-yagili kaba pwaoli kolili bikibikili tabe.”   
\s1 Yaubada ana waloyameli walo-mulolo kaiwena  
\p
\v 15 Yaubada iwaloyoi iwaloba, “Muliya kabo kwayatubu Nume Tabu wakabi, wagitaiyako tawae iyawatagiliko kolimiu.  
\v 16 Kwalau pegapega tanona koina na yakato tem gwauna kwalobai na iyamo nigele, isaisalimo kwalobaili. Tabe kwalauyoi nuwanuwamiu wain lalakina kwalegu kaba suwe kauli kalona mena na iyamo nigele, kikiunamo kwalobai kwalegu.  
\v 17 Tabe tauna kona yaumai wedowedolina yo ais pokopokoli yayawasa ami tano kolili na mesabana yasibayanaeli. Na iyamo nige kwanunuwabui mumugamiune koina.  
\v 18 Kabona waikena naen (9) yo kaliyate tuwenti powa (24) koina Nume Tabu kana wauwau siyemwawasi. Kabo tagitai tawae kani iyawatagili sauga ilalaoma koina.  
\v 19 Bwagana pegapega imwawasi yo oine, yo mayau tupwaliyao naga ali sauga uwe, na iyamo sauga bwaite koina kani yagu walo-mulolo yaeyawa.”   
\s1 Yaubada ana waloyameli Selubabeli koina  
\p
\v 20 Kaliyatenane koina, Yaubada wasa labuina iyeyama koliyau iwaloba,  
\v 21 “Selubabeli, kowa tomo Yuda ali gavana kaiwena kani bulibuli yo yanuwa yaulina yanukuili,  
\v 22 yo kaba loinao uloili yasibayanaeli na ali kaiwe simwawasi. Ali saliyota waga niuniuli yo ali osi kani yabui-keileli, osi kani siboita yo kali tomwalisae kani sibomayoi siekalekaleya-yagili siboita.  
\v 23 Kaliyatenane koina, kowa Selubabeli, kani yakalaiwo yo yapeiwo toloina lalakina yo kani esagu koina kuloiloina. Kowa yagite-sipwaiwo yagu topaisowa. Yau Yeoba Yaubada yawalowalo.”