\id PHM NT0018 Tsishingini (tsw) (Salka Kambari) KLP Feb. 2011 
\h Filimon 
\toc1 Mepepelime ma̱ Bulu a̱ tyo ya̱ Filimon 
\toc2 Filimon 
\toc3 Flm. 
\mt2 Mepepelime ma̱ Bulu a̱ tyo ya̱ 
\mt1 Filimon 
\is1 Ucuɗuwu wa aatagada a nda 
\ip A mantsa ma na Bulu aajiya a ɗanai mepepelime ma nda, u da̱na̱ ta̱ o uꞌwa wa ali adama a na u toniyi Yesu. U ɗana ta̱ mepepelimeꞌe a̱ tyo o toni va̱ Yesu na a̱ tsu ɗe Filimon. 
\ip Bulu na̱ Filimon nꞌutsa̱ n ɗa n da̱na̱i kafu a zuwa Bulu o uꞌwa wa ali. Filimon za vu utsuru ɗa da̱na̱i waru u da̱na̱ ta̱ na agbashi. Aagbashi a na a̱ tsu ɗe Unisima a suma ta̱ e ekere a̱ Filimon. Reve wo oꞌwo Unisima o oꞌwo ta̱ a kambusa Bulu a̱yi a̱tsuma̱ o uꞌwa wa ali, reve wo oꞌwo toni va̱ Yesu adama a adanshi a̱ Bulu. Gogo Bulu ciga ta̱ Unisima ka̱mba̱ uba̱ta̱ wu zavuꞌwa va̱ yi Filimon. Bulu waru u ciga ta̱ Filimon ushi aagbashi a na a̱ ka̱mba̱i o ure u na wuntsayi na wa̱a̱ ta̱wa̱a̱ Yesu na̱ tsugbain. 
\ip Mepepelime ma nda ma yuwan ta̱ uritosu u mayan ma gafura. Waru u rito ta̱ cine zagbain va̱ a̱za̱ e Itoni aa yuwan ulinga wa̱ yi tsa vuma na ka̱ɗa̱toi aciya̱yi, vuma na fara yuwain ili i mejege kafu u damma ozo o ro cine aa yuwan wuma u le. 
\is1 Ili i na i ri pe a̱tsuma̱ a aatagada a nda 
\io1 1. Ica̱su a̱ tyo ya̱ Filimon (1-3) 
\io1 2. Bulu yuwain adanshi o una̱ wa̱ Unisima a̱ tyo ya̱ Filimon (4-22) 
\io1 3. Ica̱su yu ukosu na avasa (23-25) 
\c 1  
\p  
\v 1 Mepepelime ma nda ya̱ꞌa̱ va̱ ɗa wu uta̱i, a̱mu Bulu, na̱ Timoti zawaꞌa tsu. N ta̱ o uꞌwa wa ali adama a na maa yuwusan alajiya a Alabari a Saꞌani e Yesu Kristi Zamawawa. 
\p N ta ɗanasaa Filimon iꞌutsa̱ yu ulinga i tsu, waru tsu ciga yi ta̱ lon.  
\v 2 Waru n ta ɗanasaa fo zawaꞌa tsu vu ka Awufiya, waru n ta̱ fo a ɗanasaa Arikibu, soja vu Zagbain za tsu a̱tsuma̱ o ulinga oɓolo na̱ a̱tsu. N ta̱ fo a ɗanasaa a̱za̱ e Itoni a na oo ɓolotosu o uꞌwa wa̱ wu. 
\p  
\v 3 M pati ta̱ A̱sula̱ Dada tsu na̱ Zagbain Yesu Zamawawa o roco ɗu isaꞌani i le, reve a̱ ta̱wa̱a̱ ɗu na̱ nden mo okolo. 
\s1 Ugodyusho wa̱ Bulu na avasa a̱ yi 
\p  
\v 4 Filimon, nna̱ maa yuwusan avasa adama a̱ wu, n tsu godyo ta̱ A̱sula̱ kuci.  
\v 5 N tsu yuwan ta̱ ne o una̱ u na n ta uwwusa a na vu cayi Zagbain Yesu okolo a̱ wu suru suru, waru vu ciga ta̱ ama a̱ A̱sula̱ suru.  
\v 6 N ta yuwusan avasa ucawu wo okolo u na u ɓolo nuwu na̱ a̱za̱ a̱ wu u lyuwa elime a na vu peɗei ili i saꞌani i na A̱sula̱ a ca ntsu. Lyawa wo oꞌwo ne adama Yesu Zamawawa tsura̱ ica.  
\v 7 Icigi i na vu cigai ama a̱ A̱sula̱ u ca mu ta̱ ma̱za̱nga̱ ma̱ a̱bunda̱ nu ugbamu wa asuvu. A̱vu, zawaꞌa va̱, vu ta̱wa̱a̱ ta̱ ama a̱ A̱sula̱ na̱ a̱bunda̱ wivuwun u saꞌani. 
\s1 Ipati ya̱ Bulu o una̱ wa̱ Unisima 
\p  
\v 8 Adama e ili i saꞌani i na vaa yuwusan n ta pati wu ili i ro. A̱tsuma̱ a ala e Yesu Zamawawa n shi ta yuwaan wu idanshi yu ume e ili i na yi ntsayi vu yuwan, amma maa yuwan ne shi.  
\v 9 Agba, o una̱ u na tsu cigalai, n ta pati wu vu yuwan ili i nda. Gogo, a̱mu iꞌutsa̱ ya̱ wu, Bulu, n ta yuwusan adanshi, za na ri aabara waru n ri o uꞌwa wa ali adama e Yesu Zamawawa. \fig Ipati ya̱ Bulu adama a̱ Unisima|src="Philemon_1_8-12.tif" size="span" loc="Philemon 1:9-10" ref="Flm. 10" \fig* 
\p  
\v 10 Ili i na maa patishi a̱yi ɗa: vu roco Unisima isaꞌani. Gogo nda wo oꞌwo ta̱ mawun ma̱ va̱ adama a na wo oꞌwo ta̱ za vi Itoni a̱mu pa o uꞌwa wa ali.  
\v 11 Ɗe a̱ca̱pa̱ u shi nu urana e ekere a̱ wu shi. Gogo gba u ta̱ nu urana e ekere a̱ tsu ra.  
\v 12 N ta̱ ka̱mbuwa̱ yi ya̱ꞌa̱ wu, okolo a̱ va̱ o to oɓolo na̱ a̱yi lon. 
\p  
\v 13 N ta̱ pa o uꞌwa wa ali adama a alajiya a Alabari a Saꞌani, n shi ta̱ n ciga m kpada yi pa adama u yuwaan mu ulinga u na vu shi a yuwaan mu.  
\v 14 Agba n ciga n yuwan ili i ro ne tsundolo shi, she na̱ vu usu. Waru n ciga m gbagba wu shi, she na̱ vu ciga na asuvu a̱ wu. 
\p  
\v 15 U ta gura wo oꞌwo ili i na i shi i zuwai u lyawa nuwu a mantsa me keꞌen a̱yi ɗa, adama u ta̱wa̱ u da̱nu na̱ a̱vu suru suru.  
\v 16 Gogo u buwa aagbashi shi, amma u laꞌa ta̱ aagbashi, waru wo oꞌwo ta̱ vadamma zawaꞌa tsu macigata. N ciga yi ta̱ lon, a̱vu waru gogo she vu laꞌa ciga yi. Vu ciga yi ana aagbashi waru vu ciga yi ana mawun ma̱ a̱na̱wu a̱tsuma̱ e Itoni yi Zagbain. 
\p  
\v 17 Gogo nda na̱ vu tara mu ta̱ ana za na tsaa yuwusan ulinga u ta̱, ca̱sa̱ yi cine va̱a̱ ca̱sa̱ mu, vu raba yi na̱ cuꞌun vi irabu i na vaa yuwaan mu na̱ n ta̱wa̱ ya̱ꞌa̱ wu.  
\v 18 Nu u nusaan wu ta̱ e ili i ro, ko na̱ vu to tono yi ili i ro, n ta tsupa wu.  
\v 19 A̱mu ɗa Bulu waru ne ekere a̱ va̱ a ɗa n ɗanai idanshi i nda, “N ta tsupa.” Koto n yuwan adanshi a nda shi waru maa yuwan shi, n to tono wu ili na̱ a̱bunda̱ adama a na n kamba wu ta̱ vu tsura̱ wuma u saꞌavu!  
\v 20 Zawaꞌa va̱, vu yuwan ankuri vu yuwan ili i na n dammai nda, vu yuwaan yi gashi vu ta yuwusaan Yesu Zagbain a̱ga̱nda̱. U ta̱ da̱shi zuwa mu ugbamu wa asuvu a̱tsuma̱ e Itoni ya̱ Yesu.  
\v 21 Ko gogo a̱mu a maɗana ma adanshi ma nda n ta zuwusa okolo vu ta yuwan ili i na n dammai, hali waru vu ta yuwan ili i na i laꞌai ne!  
\v 22 Vu foɓoo mu aasula o omocin, adama a na n ta zuwusa okolo A̱sula̱ a̱ ta̱ usu avasa a̱ ɗu a lyawa mu n ka̱mba̱ uba̱ta̱ u ɗu goꞌo. 
\s1 Ica̱su ya̱ Bulu yu ukosu 
\p  
\v 23 Abafara ta̱ lyungusa̱a̱ wu ica̱su. A̱yi fo u ta̱ pa o uꞌwa wa ali oɓolo na̱ a̱mu adama e itoni ya̱ Yesu Zamawawa.  
\v 24 Aza a na tsaa yuwusan ulinga oɓolo, Marku na̱ Arista, na̱ Dima, na̱ Luka, a̱ ta̱ ca̱sa̱sa̱ wu fo. 
\p  
\v 25 Lyawa isaꞌani ya̱ Yesu Zagbain wo oꞌwo oɓolo na asuvu a̱ wu.