\id 2TH NT0014 Tsishingini (tsw) (Salka Kambari) KLP Feb. 2011 
\h 2 Tasalonika 
\toc1 Mepepelime me Ire ma̱ Bulu a̱ tyo ya Aza a Tasalonika 
\toc2 2 Tasalonika 
\toc3 2 Tas. 
\mt2 Mepepelime me Ire ma̱ Bulu a̱ tyo ya 
\mt1 Aza a Tasalonika 
\is1 Ucuɗuwu wa aatagada a nda 
\ip Bulu ɗanaa ta̱ a̱za̱ e Itoni a na a̱ ri pe a̱tsuma̱ a Tasalonika. A̱yi ɗa mepepelime me ire ma na u ɗanayi a̱za̱ e Itoni a̱tsuma̱ a̱ lyuci na ri na̱ a̱ba̱jini e eden a na a̱ ri a̱ ngeꞌen m mala. U ɗana ta̱ mepepelime ma nda adama a na ama o ro aa yuwusan uritosu u saꞌani shi adama o urana u na Yesu Zamawawa a̱a̱ ka̱mba̱. Ozo o ro e le a damma ta̱ a na a̱ tsura̱ ta̱ mepepelime diga ya̱ Bulu agba epen a ɗa le. 
\ip A̱tsuma̱ e mepepelime ma nda Bulu ɗana ta̱ amayun e ili i na yaa fara a̱ ma̱ka̱mba̱a̱ ma̱ Yesu. U da̱shi ta̱ damma ili i na u dammai ɗe adama a adanshi a nda. Bulu yuwan ta̱ adanshi e ili i taꞌatsu i na i laꞌai ulobonu a̱tsuma̱ e mepepelime ma nda. U damma le ta̱ adama aɗa a mantsa ma na Yesu a̱a̱ ka̱mba̱. Waru u dammisa le ta̱ a̱tsuma̱lima̱ a na o sowuso uba̱ta̱ wa̱ A̱sula̱ a ɗa wo utusa̱ shi. A̱tsuma̱lima̱ a nda o to koto urana u ro reve a̱ tsura̱ wivuwun. A̱ tyo o ukosu, u damma le ta̱ a yuwan ulinga na̱ a̱tyo o ucira u na a̱ ri na̱ a̱yi kafu Yesu ka̱mba̱. 
\ip Ili i nda suru amayun a ɗa hali a̱ tyo anaꞌan, cine a̱ da̱na̱i a mantsa ma ama a Tasalonika a na Bulu ɗanaa nle mepepelime ma nda. 
\is1 Ili i na i ri pe a̱tsuma̱ a aatagada a nda 
\io1 1. Ica̱su (1:1-2) 
\io1 2. Uka̱mbu wu Zagbain amayun a ɗa (1:3-12) 
\io1 3. Koto Zagbain ka̱mba̱ shi (2:1-12) 
\io1 4. Vu yuwan nden ma̱ a̱ɓula̱ (2:13-17) 
\io1 5. Vu yuwan avasa waru vu yuwan ulinga (3:1-15) 
\io1 6. Avasa o ukosu (3:16-18) 
\c 1  
\p  
\v 1 A̱mu Bulu, na̱ Sila na̱ Timoti, a̱tsu ɗa tsaa ɗanasa mepepelime ma nda e tewee a̱za̱ e Itoni ya Tasalonika ama a̱ A̱sula̱ Dada tsu aza a na a̱ ri a̱tsuma̱ e itoni yi Zagbain Yesu Kristi Zamawawa. 
\p  
\v 2 M pati ta̱ Dada A̱sula̱ na̱ Yesu Zamawawa Zagbain u roco ɗu isaꞌani waru u ca ɗu abaꞌun na asuvu nden! 
\s1 Avasa o ugodyusho 
\p  
\v 3 Ama a̱ va̱, u lobono ta̱ tsu godyoo A̱sula̱ adama a̱ ɗu kuci, tsu ta yuwusan ma̱za̱nga̱ adama a na ucawu wo okolo a̱ ɗu a ta kungusa a̱tsuma̱ e itoni nu ucira, waru suru nɗu i ta̱ da̱shishi ncigalai.  
\v 4 Na̱ tsaa yuwusan adanshi a̱ ɗu na̱ a̱za̱ e Itoni ya̱ A̱sula̱ ba̱ta̱ ro, a̱tsu tsu yuwan ta̱ ma̱za̱nga̱ a na yaa kaɓusa asuvu, a̱vu i buwa nu ucawu wo okolo ko na yoo sowuso a̱tsuma̱lima̱ a̱ ma̱lyungwa̱ na awuya. 
\p  
\v 5 A̱tsuma̱lima̱ a nda o to rocosu A̱sula̱ e te geꞌeto koyan mejege. Ne ɗa A̱sula̱ ee kece ɗu a̱tsuma̱ a aza a na aa uwa o tsugono tsa̱ yi, agba gogo adama o tsugono tso ndolo tsa ɗa yoo sowuso a̱tsuma̱lima̱ꞌa̱.  
\v 6 A̱sula̱ a ta yuwusan ili i na i ri ulobonu kuci. U ta ca aza a na a̱ ta̱wusa̱a̱ ɗu na addama a̱tsuma̱lima̱. Waru u ta̱ ta̱wa̱a̱ ɗu na̱ wivuwun a̱tsuma̱ a̱ a̱tsuma̱lima̱ a̱ ɗu.  
\v 7-8 A mantsa ma na Yesu Zamawawa Zagbain a̱a̱ ta̱wa̱ diga zuva na̱ nlingata ma̱ A̱sula̱ mu ucira ma̱ yi oɓolo na akina a̱ ma̱kula̱ u ta ca tsu wivuwun fo. 
\p Zagbain tsu Yesu ta ca aza a na e revei A̱sula̱ shi a̱tsuma̱lima̱ na aza a na a ꞌyuwain a yuwan tsutoni na Alabari a Saꞌani a Zagbain tsu Yesu. \fig Uta̱wu wa̱ Yesu oɓolo na̱ nlingata ma̱ A̱sula̱|src="2 Thessalonians_1_7-8.tif" size="span" loc="2 Thessalonians 1:7" ref="2 Tas. 1:7-8" \fig* 
\v 9 A̱tsuma̱lima̱ a na oo sowo a̱yi ɗa ulungusu suru suru. A ta kasa le na̱ Zagbain waru nu ucira u tsugbain tsa̱ yi suru suru.  
\v 10 Ili i nda i ta fara o urana u ndolo a mantsa ma na Zagbain a̱a̱ ka̱mba̱ adama u ushi ica na̱ tsugbain e ekere a aza a na a ca niyi okolo suru waru a̱ ri a̱za̱ a̱ yi. Iliꞌi oɓolo na̱ a̱ɗu ɗa, adama a na i usu ta̱ ili i na tsu dammai. 
\p  
\v 11 A̱sula̱ a ɗangwa ɗu ta̱, waru tsu ta avasa a na A̱sula̱ a̱a̱ usu ɗu yi ntsaa yoo oꞌwo ama a̱ yi. Tsu ta avasa a na ucira wa̱ A̱sula̱ waa kamba ɗu i yuwan ili i saꞌani i na yaa ciga i yuwan suru. Ucawu wo okolo a̱ ɗu a ɗa waa zuwusa ɗu i ciga mayan me ili i nda.  
\v 12 Ne ɗa za suru aa ca ala a Zagbain tsu tsugbain adama a̱ ɗu, a̱vu a ca ɗu tsugbain oɓolo na̱ a̱yi. A̱yi nda ili i mayuwaan i ɗa e ekere a̱ A̱sula̱ a̱ tsu ne ekere e Yesu Zamawawa Zagbain adama e isaꞌani i le. 
\c 2  
\s1 Vuma Vama na ꞌyuwain Wila̱ 
\p  
\v 1 Ama a̱ va̱, tsu ta damma ɗu ununa Zagbain tsu Yesu Zamawawa a̱a̱ ta̱wa̱, na̱ cine oo ɓoloto tsu uba̱ta̱ wa̱ yi.  
\v 2 She yoo oꞌushi na̱ a̱tsumola̱ngu ko udamu adama a ama a na aa dansa a na urana wu Zagbain u ta̱wa̱ ta̱ ɗe wan. A ta gura damma a uwwa ta̱ ne uba̱ta̱ u tsu o uritosu, ko e ikaka ya adanshi, ko e mepepelime.  
\v 3 She i lyawa a yuwan ɗu ugbozu ni ili i na aa dansa wan. 
\p Amayun a̱yi ɗa urana u ndolo wa̱a̱ ta̱wa̱ shi, she na̱ a̱ba̱jini o uꞌya̱sa̱sa̱n wa aci e ekere a̱ A̱sula̱ a rawa reve waru o roco Vuma Vama na a̱a̱ lungusa̱ suru suru.  
\v 4 U ta̱ ꞌya̱sa̱n aciya̱yi mgbain, reve u tara aciya̱yi u laꞌa ta̱ ili i na a̱ tsu ɗe a̱a̱ma̱li suru. A̱vu waru u lungusa̱ ili i na aa yuwusaan a̱ga̱nda̱ suru. U ta uwa a̱tsuma̱ a̱ A̱a̱ꞌisamapaɗa a̱ A̱sula̱, a̱vu u damma a̱yi na aciya̱yi A̱sula̱ a ɗa. 
\p  
\v 5 I gura cuwan ana n da̱na̱i oɓolo na̱ a̱ɗu, n yuwaan ɗu ta̱ adanshi e ili i nda.  
\v 6 Gogo gba i reve ta̱ ili i na ya̱a̱ guza̱sa̱ yi, adama a na a̱ to uta̱a̱ yi a alanga e eteshe na̱ mantsa ma̱ yi ma rawa.  
\v 7 Agba ko gogo ucira wu ulinga u vuma u na u ri a̱ nla̱ngi na̱ A̱sula̱ u to ulinga usokowu. Agba za na a̱a̱ guza̱ yi ta lyuwa elime na̱ mayan ne hali she na a tawa za na a̱a̱ guza̱sa̱ yiꞌi.  
\v 8 Ɗaɗa Vuma Vama oo uta̱a̱ aciya̱yi, a̱yi ɗa za na Zagbain Yesu Zamawawa oo kototo nu upepu u wivuwun wu una̱ wa̱ yi. A̱yi ɗa za na Yesu Zamawawa a̱a̱ lungusa̱, nu u ta̱wa̱ a̱tsuma̱ a tsugbain tsa̱ yi. 
\p  
\v 9 Vuma vama n nda u ta̱ ta̱wa̱ u yuwan ulinga u Male nu ucira we epen ni iroci ye epen na̱ linga va asalama ve epen.  
\v 10 Waru u ta gura yuwan a̱tyo e iwuya i na waa yuwan wu luma̱ ama a na a̱a̱ lungusa̱. A̱ ta̱ lungusa̱ le adama a na a ꞌyuwan ta̱ a ciga ili ya amayun reve waru a ꞌyuwan iwawi i na i tsu uta̱ uba̱ta̱ wa̱ A̱sula̱.  
\v 11 Adama o ndolo A̱sula̱ a̱ lyunguwa̱ le ta̱ ni ili yu ucira i na ya̱a̱ luluma̱ le, a̱vu u zuwa le a̱ usu epeꞌen.  
\v 12 Ne ɗa oo kototo le adama a na a̱ shi ta̱ a uwwusa uyoꞌo wi iwuya i na a̱ shi a yuwusan, reve a ꞌyuwan a̱ usu amayun. 
\s1 Yi isawan nu ucira 
\p  
\v 13 Ama a̱ va̱, tsu godyoo ta̱ A̱sula̱ adama a̱ ɗu. Zagbain ciga ɗu ta̱ waru A̱sula̱ a ɗangwa ɗu ta̱ ɗe nu ujimu diga o ufaru adama u wawa ɗu. Iwawi i nda i ta̱wa̱ ta̱ adama a na Ruhu va Akiza ka̱mba̱to nɗu cece, waru u ta̱wa̱ ta̱ adama a na i usuyi ikaka ya amayun.  
\v 14 U ɗe ɗu ta̱ i tsura̱ iwawi a mantsa ma na tsu damma nɗu Alabari a Saꞌani. Gogo nda i ta gura uwa a̱tsuma̱ a tsugbain tsu Zagbain tsu Yesu Zamawawa. 
\p  
\v 15 Ama a̱ va̱, adama e ili i nda, i ciga i ꞌyuwan yi isawan mejege, a̱vu i guza̱ ili i na tsu rito nɗu a̱tsuma̱ a adanshi na̱ a̱tsuma̱ a maɗana. 
\p  
\v 16 A̱sula̱ Dada tsu ciga tsu ta̱. Adama e isaꞌani ya̱ yi u ca tsu ta̱ adanshi na asuvu nden nu uzuwu wo okolo u saꞌani u na u ri nu ukotu shi.  
\v 17 Tsu ta avasa Zagbain Yesu Zamawawa na̱ A̱sula̱ Dada tsu a zuwa okolo a̱ ɗu a gbama. Waru tsu ta avasa a ca ɗu ucira u na yaa yuwan ili i saꞌani, reve waru i yuwusan adanshi a saꞌani. 
\c 3  
\s1 I yuwaan tsu avasa 
\p  
\v 1 Ama a̱ va̱, o ukosu u mepepelime ma nda, n te ipati i yuwan avasa adama a̱ tsu. Ili yu ufaru, i yuwan avasa adama e ikaka yi Zagbain i baza goꞌo a̱vu uba̱ta̱ u na u rawai biti, a tara yi na̱ a̱ɓula̱ ununa i yuwain a mantsa ma na ikakaꞌa i rawa nɗu.  
\v 2 Waru i yuwan avasa a wawa tsu e ekere a ama a vama na ama e iwuya, adama a na vuma suru ɗa cayi Zagbain okolo shi.  
\v 3 Amma Zagbain za va̱ a̱ɓula̱ ɗa, u ta gbamato ɗu, a̱vu u geshe ɗu e ekere a za vama.  
\v 4 Tsu ta̱ nu uzuwu wo okolo a̱tsuma̱ a Zagbain a na yaa yuwusan ili i na tsu damma nɗu, waru tsu ta̱ nu uzuwu wo okolo i ta lyuwa elime na̱ mayan ne.  
\v 5 Lyawa Zagbain roco ɗu cine A̱sula̱ a ciga nɗu, waru u roco ɗu cine yaa kaɓa asuvu na̱ a̱tsuma̱lima̱ ununa Zamawawa kaɓai asuvu. 
\s1 Morono ma atsuvu adama a̱ a̱za̱ o ukuɗu 
\p  
\v 6 Gogo gba ama a̱ va̱, tsu ta zuwusa ɗu i yuwan ili i nda a̱tsuma̱ a ala a Zagbain tsu Yesu Zamawawa: Yi kasa na̱ vuma suru na ri nu ukuɗu a̱tsuma̱ a̱ ɗu waru za na aa yuwusan nden ma̱ yi a̱ kurusu uritosu u na i tsura̱i ya̱ꞌa̱ tsu shi.  
\v 7 A̱ɗu na aciya̱ɗu i reve ta̱ cine wuntsayi i toni ili i na tsu yuwain. Ana tsu da̱na̱i na̱ a̱ɗu, tsu da̱na̱ a̱za̱ o ukuɗu shi.  
\v 8 Tsu ushi ilyalya uneꞌe uba̱ta̱ wu za ro shi, shede na̱ tsaa tsupa. Tsu linga ta̱ lon urana na ayin adama tsoo oꞌwo itana a̱ tyo ya̱ꞌa̱ ɗu wan.  
\v 9 Tsu yuwan ta̱ ne ko na tsu ri na tsaa zuwa ɗu i lyuwato tsu, a̱vu gba tsu ꞌyuwan adama tsu lyawaa ɗu iroci i na ya̱a̱ kuru.  
\v 10 A mantsa ma na tsu da̱na̱i oɓolo na̱ a̱ɗu, tsu zuwaa ɗu ta̱ wila̱ u nda: “Za na suru lingai shi, she u lyuwa wan.” 
\p  
\v 11 Gogo gba tsu uwwa ta̱ ozo o ro a̱tsuma̱ a̱ ɗu a̱ ta̱ a̱ nden me pere, reve a ꞌyuwan a linga, reve a uwa e gesheshe ulinga wa akapi a ama.  
\v 12 Adama o ndolo, a̱tsuma̱ a ala a Zagbain tsu Yesu Zamawawa, tsu ta patishi icuꞌun ya ama o ndolo, tsu ta̱ gba waru a dansaa le, e reme ulinga adama a̱ tsura̱ ilyalya waru a̱ da̱nu ben. 
\p  
\v 13 Ama a̱ va̱, she i kuna̱ mayan me isaꞌani wan ko keꞌen. 
\p  
\v 14 I ka̱lyuwa̱ aza a na a ꞌyuwain a̱ kuru ili i na tsu dammai a̱tsuma̱ e mepepelime ma nda ulobonu. Yi kasa ne ele, adama o oꞌwo na̱ wono.  
\v 15 She i tara ama a nda ana nꞌyuwatan n ɗu wan, amma i yuwan adanshi ne ele ununa yaa yuwan adanshi na̱ a̱za̱ a̱ ɗu, za na lobonoi i ɓara yi adama o unusu u na waa yuwusan. 
\s1 Ica̱su yu ukosu 
\p  
\v 16 Lyawa Zagbain va asuvu nden na aciya̱yi u ca ɗu asuvu nden a̱ yi kuci a̱tsuma̱ e ili i na i farai suru. Lyawa Zagbain da̱na̱ oɓolo na̱ a̱ɗu suru. 
\p  
\v 17 Gogo nda apa ica̱su i va̱, a̱mu ɗa n ɗana niyi ne ekere a̱ va̱. A̱mu, Bulu, ne ɗa n tsu yuwan o ukosu wu mpepelime n va̱ suru, waru o to rocosu a̱za̱ a̱ va̱ a ɗa na amayun. \fig Bulu e iɗana|src="2 Thessalonians_3_17.tif" size="span" loc="2Thessalonians 3:17" ref="2 Tas. 3:17" \fig* 
\p  
\v 18 Lyawa isaꞌani yi Zagbain tsu Yesu Zamawawa yo oꞌwo oɓolo na̱ a̱ɗu suru.