\id 2PE NT0022 Tsishingini (tsw) (Salka Kambari) KLP Feb. 2011 
\h 2 Bituru 
\toc1 Mepepelime me Ire ma̱ Bituru 
\toc2 2 Bituru 
\toc3 2 Bit. 
\mt2 Mepepelime me Ire ma̱ 
\mt1 Bituru 
\is1 Ucuɗuwu wa aatagada a nda 
\ip A̱yi nda a̱yi ɗa mepepelime me ire ma na mo uta̱i e ekere a̱ Bituru a̱ tyo a̱za̱ e Itoni a na a̱ ri ubazu ba̱ta̱ suru. 
\ip A̱tsuma̱ e mepepelime ma nda Bituru damma ta̱ aza a na e ɗesununa̱ a̱tsuma̱ a̱ yi a na A̱sula̱ o rono ta̱ aɗanga a ama a na a ɗanai Adanshi a̱ A̱sula̱ a nda, adama o ndolo za vi Itoni suru u reve Adanshi a̱ A̱sula̱ ulobonu lon. Waru u cuɗuwa ta̱ a na munlu me epen n ri lo, waru u roco ta̱ cine ee reve ili ye epen ni ili ya amayun. O ukosu, u damma ta̱ a̱ da̱na̱ nu uzuwu wo okolo o urana u na Yesu Zamawawa a̱a̱ ka̱mba̱. 
\ip Anaꞌan munlu me epen n ta̱ lo na̱ a̱bunda̱ waru uritosu we epen o ta̱ lo na̱ a̱bunda̱. Adama o ndolo, u ta̱ da̱na̱ ulobonu a̱za̱ e Itoni anaꞌan e reve Adanshi a̱ A̱sula̱ ulobonu lon. Na̱ tsu ka̱lyuwa̱ Adanshi a̱ A̱sula̱ tsu te ene Zagbain Yesu ta̱ lo a̱ ka̱mba̱ a̱tsuma̱ o uvaɗi u nda, a̱yi ɗa i zuwai tsu ri nu uzuwu wo okolo u na nanza aa usa yi e ekere a̱ tsu shi. 
\is1 Ili i na i ri pe a̱tsuma̱ a aatagada a nda 
\io1 1. Ica̱su na avasa (1:1-2) 
\io1 2. Cine wu ntsayi a̱za̱ e Itoni yi Zagbain a yuwan wuma (1:3-15) 
\io1 3. Tsugbain tsu Zamawawa (1:16-21) 
\io1 4. Ama̱sula̱ e epen na̱ munlu me epen (2:1-22) 
\io1 5. Uka̱mbu wu Zagbain a̱tsuma̱ o uvaɗi amayun a ɗa (3:1-18) 
\c 1  
\s1 Ucuɗuwu 
\p  
\v 1 A̱mu ɗa Simo Bituru. A̱mu aagbashi e Yesu Zamawawa ɗa waru oɓolo na aajiya a̱ yi. N ɗana ta̱ mepepelime ma nda a̱ tyo ya̱ꞌa̱ ɗu suru aza a na a̱ ri na̱ cuꞌun vu ucawu wo okolo a na tsu ri na̱ a̱yi. Ucawu wo okolo o ndolo u tu ulobonu waru Yesu Zamawawa ɗa ca ntsu a̱yi. A̱yi ɗa A̱sula̱ na̱ Zamawawa tsu, waru u ka̱mba̱to tsu ta̱ veɗe na̱ A̱sula̱. 
\p  
\v 2 N ciga ta̱ A̱sula̱ o roco ɗu isaꞌani na asuvu nden a̱ yi a̱ a̱bunda̱ a na yaa lyuwa elime na̱ mereve me Yesu kuci adama a na a̱yi ɗa A̱sula̱ na̱ Zagbain tsu. 
\s1 Ili i na i zuwai tsu ri nu uzuwu wo okolo 
\p  
\v 3 Ana wo oꞌwoi tsu reve ta̱ Yesu mejege, u ta yuwusan ulinga nu ucira wa zuva wa̱ yi, u ca tsu ta̱ ili suru i na tsu cigai adama tsu yuwain wuma u na waa zuwa A̱sula̱ ma̱za̱nga̱. U ɗe tsu ta̱ tsu ushi tsugbain ni isaꞌani ya̱ yi!  
\v 4 Waru nu ucira u ɗaɗa, u ca ntsu ili i gbagbain na̱ nzuwulai n saꞌani. U yuwan ta̱ nzuwulai n na ya̱a̱ fa̱tsa̱ e ili yi idaba i na i ri uka̱nda̱ruwu na̱ a̱ɗu suru. Ili i ndolo ele ɗa ili i na icigi i lipu i tsu zuwa. Waru u yuwan ta̱ nzuwulai n na yoo oꞌwo vadamma A̱sula̱. 
\p  
\v 5 Adama o ndolo i yuwan ukadu i da̱shi isaꞌani o ucawu wo okolo a̱ ɗu. Wuma wi isaꞌani u tsu zuwa ɗu ta̱ i reve A̱sula̱ lon.  
\v 6 Urevu wa̱ A̱sula̱ u tsu zuwa ɗu ta̱ i gura guza̱ aciya̱ɗu. Uguzu wa aci u tsu zuwa ɗu ta̱ i kaɓa asuvu, waru makaɓa ma asuvu ma tsu zuwa ɗu ta̱ i yuwan wuma suru suru adama a̱ A̱sula̱.  
\v 7 Ni i yuwan wuma tsundolo, i ta ciga a̱za̱ a̱ ɗu, o ukosu i ta ciga vuma suru ni icigi ya amayun.  
\v 8 Ni i lyuwa elime nu uda̱shishi wi ili i saꞌani i nda, a̱ ta̱ geshe ɗu a̱tsuma̱ a mayan me ili ye pere, reve a zuwa ɗu i yuwan ili ya̱ a̱bunda̱ adama o urevu wu Zagbain tsu Yesu Zamawawa.  
\v 9 Amma aza a na a ꞌyuwain a yuwan ili i ndolo nrumba̱ n ɗa waru e tse ene mejege shi. E icina ta̱ ɗe a na A̱sula̱ a̱ ka̱mba̱to nle cece diga a akuci o ure a wuma u le vu unusu. 
\p  
\v 10 Ama a̱ va̱, adama o ndolo i lyuwa elime nu ukadu tsa̱ra̱ i roco ama a na A̱sula̱ e ɗe nɗu, waru i roco le a na a ɗangwa nɗu yoo oꞌwo ama a̱ yi. Ni i yuwan ne ya̱a̱ ta̱ɗa̱tsa̱ shi waru ya̱a̱ puwa̱a̱n shi.  
\v 11 Ne ɗa A̱sula̱ a̱a̱ ushi ɗu ulobonu a̱tsuma̱ o tsugono tsa Zagbain tsu na̱ Zamawawa Yesu. 
\s1 I poloo ikaka ya̱ A̱sula̱ atsuvu 
\p  
\v 12 I reve ta̱ ɗe ili i nda suru, waru i ta̱ mishin nu ucira a̱tsuma̱ a amayun. Suru na̱ ne n ciga ta̱ n da̱na̱ a cuwusaan ɗu ni ili i nda suru.  
\v 13 U lobono ta̱ n da̱na̱ a cuwusaan ɗu adama e ili i nda hali she na̱ n kuwa̱.  
\v 14 Waru Zagbain Yesu Zamawawa roco mu ta̱ na maa jima shi n ta̱ kuwa̱.  
\v 15 Adama o ndolo n ta yuwan ulinga babu uro tsa̱ra̱ n lyawa ɗu i reve ili i nda ulobonu. N ciga ɗu ta̱ i da̱na̱ a cuwusan ne ele a mantsa na̱ a̱bunda̱ a̱ca̱pa̱ a̱ va̱. 
\p  
\v 16 Ana tsu damma nɗu cine Zagbain Yesu Zamawawa a̱a̱ ka̱mba̱ nu ucira, yitele yu ugbozu i na za ro dammai ɗa tsu da̱na̱i a dansaa ɗu shi. Ne ɗa u ri shi! Amma tse ene ta̱ tsugbain tsa amayun tsa̱ yi ne esu a̱ tsu.  
\v 17 A̱sula̱ Dada ɗa ca niyi tsugbain nu ucira ana u ɗeyi nu uɗyo wu ucira u Tsugbain tsa̱ A̱bunda̱ tsa̱ yi adansa, “A̱yi nda macigata ma Mawun ma̱ va̱ ma ɗa, waru n ta̱ ma̱za̱nga̱ na̱ a̱yi.”  
\v 18 Waru a̱tsu na aciya̱tsu tsu da̱na̱ ta̱ oɓolo na̱ Yesu a masasan ma akiza, waru tsu uwwa ta̱ uɗyo u nda a yuwusan adanshi diga ɗe zuva. 
\p  
\v 19 Ili i nda suru i zuwa tsu ta̱ tsu reve ili i na ama̱sula̱ a dammai amayun a ɗa. Adama o ndolo i ka̱mbuwa̱ ugbozu e ikaka i le, cine yaa yuwan na̱ fitila na a daɓai a̱tsuma̱ e irumbu. I lyuwa elime na̱ mayan me ili i nda, hali she urana u na Zamawawa ta̱wa̱i a̱vu ekan a akina a̱ yi e ikana a̱tsuma̱ o okolo a̱ ɗu.\f + \fr 1:19 \ft Ele idanshi i Tsuheleni pa nda ele ɗa “she nu urana u koto reve talyoꞌo vu usana ꞌyon pe a̱tsuma̱ o okolo a̱ ɗu.”\f* 
\v 20 Ili i na i laꞌai suru a̱yi ɗa, i ciga i ꞌyuwan i reve adanshi a na ama̱sula̱ a dammai a majiyan me le ma ɗa wu uta̱i shi.  
\v 21 Ama̱sula̱ꞌa̱ a yuwan adanshi adama a na ele aciyele a cigai a yuwan adanshi a ɗa shi. Oꞌo, ne ɗa u ri shi! Ruhu va Akiza ɗa zuwa nle a yuwan adanshi e ikaka ya̱ A̱sula̱.\f + \fr 1:21 \ft Ure u ro u na aa gura tsura̱ urevu wi idanshi i Tsuheleni pa nda a̱yi ɗa “Ciga ꞌyuwan vu reve babu vuma na aa gura tsura̱ urevu wi ikaka ya ama̱sula̱ na aciya̱yi goon.”\f* 
\c 2  
\s1 Munlu me epen 
\p  
\v 1 Ɗe a̱ca̱pa̱ a yuwan ta̱ ama̱sula̱ e epen a na a yuwayin aza a Israꞌila adanshi, ne ɗa waru munlu me epen ma̱a̱ ta̱wa̱ a̱tsuma̱ a̱ ɗu. Nu ugbozu u ɗa a̱a̱ ta̱wa̱ nu uritosu we epen adama a̱ A̱sula̱ a na wa̱a̱ lungusa̱ ama. A̱ ta̱ ꞌya̱sa̱a̱n Zagbain le na tsupai adama u wawa le aci. Ele na aciyele aa jima shi a̱ ta̱ lungusa̱ le.  
\v 2 Ama na̱ a̱bunda̱ a̱ ta̱ kuru uritosu wi iwuya i le. A̱vu waru a̱ kuru ili yi idaba i wono i le. Reve adama e le ama a yuwan adanshi a vama adama a Zamawawa nu ure wa amayun a̱ yi.  
\v 3 Munlu n nda a̱za̱ o utsa̱n a ɗa, waru a ta yuwusan ulinga nu ugbozu ne epen adama a paala ɗu. Agba A̱sula̱ o kototo le ta̱ ɗe nu ujimu, waru ulungusu u le u ta̱ lo a pura le. 
\p  
\v 4 Ko nlingata ma̱ A̱sula̱, A̱sula̱ a̱ kuɗa̱ a ca le a̱tsuma̱lima̱ shi, ana a yuwain unusu. U ca̱co le ta̱ a̱ tyo a akina reve u zuwa le a̱tsuma̱ a̱ a̱a̱ba̱nu e irumbu. Waru na a ciga a ꞌyuwan a̱ da̱nu pe hali mantsa mo ugeꞌetosu.  
\v 5 Waru A̱sula̱ a̱ kuɗa̱ a ca uvaɗi u mantsa ma̱ Nuhu† a̱tsuma̱lima̱ shi. A̱vu u wawa Nuhu na ama o uꞌwa wa̱ yi ama e cindere. Agba Nuhu rono ta̱ uvaɗi atsuvu adama o ugeꞌetosu wa̱ A̱sula̱ wa̱ a̱ɓula̱. Ɗaɗa gba A̱sula̱ a̱ lungusa̱i uvaɗi wa aza a na a ꞌyuwain A̱sula̱ suru na̱ mini ma gbain. 
\p  
\v 6 Waru u ca ta̱ ilyuci yo Sodom na̱ Gomora† a̱tsuma̱lima̱ na u kula̱to nle na akina reve o oꞌwo okomo. Wo oꞌwoto le ta̱ iroci yi ili i na ya̱a̱ tsura̱ ama a na a̱ kuruyi A̱sula̱ shi.  
\v 7 Agba ko na̱ ne, A̱sula̱ a wawa ta̱ Lutu.† Lutu a̱yi ɗa u shi u da̱nuyi cine A̱sula̱ a cigai, reve ili yi idaba ni iwuya i na ama a na u ri nden ne ele i damaton yi.  
\v 8 Adama a na u shi vuma va̱ a̱ɓula̱ a yuwusaan A̱sula̱ tsutoni, reve a̱tsuma̱ a̱ la̱nga̱sa̱ yi ana we enei iwuya, reve wu uwwa iwuya i na aa yuwusan urana suru. 
\p  
\v 9 Ili i nda i to rocosu A̱sula̱ a ta gura wawa ama a na a̱ kuru niyi mejege ko a̱tsuma̱ a̱ a̱tsuma̱lima̱ a na oo sowuso. Reve waru o roco A̱sula̱ a̱ tsu reme ta̱ ama a na a ca niyi tsugbain shi. Waru u ta casu le a̱tsuma̱lima̱ kuci hali a̱ tyo o urana wu ugeꞌetosu. 
\p  
\v 10 A̱sula̱ a̱ tsu da̱shi ta̱ ama a̱tsuma̱lima̱, aza a na a̱a̱ kurusu ili i iwuya i na lipu le cigai, reve waru a ꞌyuwan a̱ kuru azagbain. Icuꞌun ya ama a nda a̱ ta̱ nu uꞌya̱sa̱sa̱n wa aci no okolo o ugbamu. A̱ ri na̱ wovon shi, hali a tsi isula ta̱ azagbain a zuva, agba ko okolo a̱ tsu jeꞌen le shi.  
\v 11 Agba nlingata ma̱ A̱sula̱ n laꞌa ta̱ icuꞌun i munlu me epen a nda ucira na̱ tsugbain. Agba ko na̱ ne, a tsi isula azagbain a zuva a̱ ma̱ka̱ka̱n ma̱ A̱sulazuva shi. 
\p  
\v 12 Ama o ndolo o rotso ta̱ inama yu una, aza a na a tsu yuwan majiyan shi. A matsan le ta̱ adama o urana u ro e reme o una le la̱nga̱. Ama a nda a tsu yuwan ta̱ adanshi a vama e ekere a̱ A̱sula̱ adama e ili i gbagbain i na e revei aciyele shi. Cuꞌun wuma babu ulobonu u le u ta̱ ta̱wa̱a̱ le nu ukwa̱.  
\v 13 Atsupu e le o to oꞌwo ulungusu adama a wamatowun u na a amatoyin ama. A̱ tsu da̱na̱ ta̱ a̱ ma̱za̱nga̱ a mantsa ma na aa yuwusan iwuya i na a cigai nu urana gayin. A̱ tsu ta̱wa̱a̱ ta̱ na̱ wono a̱tsuma̱ a̱ ɗu, reve a zuwa ɗu yoo oꞌwo ili yi idaba. A tsu lyuwa ta̱ elime na mayan me ili ye epen ma nda a mantsa ma na a lyuwusa ilyalya na̱ a̱ɗu uba̱ta̱ wa̱ a̱buki.  
\v 14 A ta yuwusan tsipere ne esu e le, waru icigi i lipu ye esu e le a̱ tsu cuwa̱n shi. Reve a̱ da̱na̱ o mpolo n na o oto ama a na a̱ ri mishin shi a̱tsuma̱ o unusu. A̱vu o rito aciyele o oꞌwo a̱za̱ o utsa̱n. Ama a nda oɓolo a ama a ɗa aza a na a yuwayin una̱.  
\v 15 A lyawa ta̱ ɗe ure u mejege, reve a̱ kuru ure wa Balam† vumava̱sula̱ ve epen, mawun ma Beyuru.\f + \fr 2:15 \ft A̱tsuma̱ a alabari a Balam a aatagada a na o foɓoi diga KLP “Alabari a Musa” (Mkc. 22:1–24:12), tse ene ta̱ uba̱ta̱ u na Balam dammai Mogono Balak ili i na A̱sula̱ a damma niyi u damma. A̱yi ɗaɗa ne alabari a Balam goon shi. Mantsa mo ro Balam ushi ta̱ ikebe e ekere a Balak reve u ronoo aza a Israꞌila a ɗanga adama a yuwaan a̱ma̱li a̱ga̱nda̱, (Mkc. 31:16). A̱yi aalabari a nda wu pe a̱tsuma̱ a atagada a na KLP yuwain ɗe a̱tsuma̱ a “Alabari a Musa” shi. \f* A̱yi vuma ɗa za na cigai u tsura̱ ikebe o ure u na u ri mejege shi.  
\v 16 Agba reve mololi ma ɓara yi nu uɗyo wu vaɗilima̱. Nama na tsu yuwan adanshi shi, a̱vu u yuwan adanshi u geshe tsulo tsa̱ yi. 
\p  
\v 17 Ama a nda a̱ ta̱ gashi esumini a na e ꞌyewei. O rotso ta̱ eleshe a na a̱ tsu da̱na̱ e igaru zuva a̱tsuma̱ o upepu. Ili i nda i tsu yuwan ta̱ gashi a̱ɓula̱ na̱ a̱bunda̱ agba ko ili a̱ tsu ta̱wa̱a̱ shi. Babu usa̱n A̱sula̱ a̱ ta̱ ca̱co ama o ndolo a̱tsuma̱ o uba̱ta̱ u na u laꞌai irumbu suru suru.  
\v 18 Ama a nda a̱ ta̱ nu uꞌya̱sa̱sa̱n wa aci a̱tsuma̱ o ofoli a adanshi. Na̱ za ro teme ɗe a lyawusa ure wu unusu, ama a nda a tsu yuwan ta̱ ulinga ni ili yu unusu u na vuma ndolo cigai adama a̱ ka̱mba̱to yi a̱tsuma̱ e ili i na i ri ulobonu shi. 
\p  
\v 19 A yuwaan ta̱ ama nzuwulai mu nden fa̱a̱n. Agba ele na aciyele na amayun agbashi a̱ nden mi idaba n ɗa, adama a na ama agbashi a ɗa e ili i na a laꞌa cigai.  
\v 20 Ama a lyawa ta̱ ili yu uvaɗi i na ya̱a̱ lungusa̱ le, a mantsa ma na e revei Zagbain Zamawawa tsu Yesu. Agba ni ili yu uvaɗi i remishe ama o ndolo reve o polo le, a̱tsuma̱lima̱ e le u tsu laꞌa ta̱ a̱tsuma̱lima̱ o ufaru.  
\v 21 U shi ta laꞌaa ama o ndolo na̱ a̱ shi e reve ure wa̱ A̱sula̱ shi suru suru. U tsu laꞌa ta̱ uwuyanu na̱ vuma reve ure u saꞌani, reve u ꞌyuwan ili i cece ni ili i saꞌani i na A̱sula̱ a ca niyi.  
\v 22 Ili i na i ri amayun a̱tsuma̱ o udammu u nda, u ta̱ fo amayun e ekere a ama a na a̱ ri ne: “Musa̱n ma tsu shaama ta̱, reve u ka̱mbisa̱ u lyuwisa tsushaamuꞌu.” Waru, “Ma̱gurusumu ma na a̱ sumba̱i, u tsu ka̱mbisa̱ ta̱ a̱tsuma̱ o yilyoꞌo.” 
\c 3  
\s1 Yesu ta̱ ta̱wisa̱ 
\p  
\v 1 Ncigata n va̱, a̱yi nda a̱yi ɗa mepepelime me ire ma̱ va̱ a na n ɗanaa nɗu. A̱ mpepelimeꞌe n gura ta̱ roco ɗu cine yaa yuwan majiyan ma saꞌani, a̱vu waru i cuwan mejege.  
\v 2 N ciga ɗu ta̱ i cuwan a̱vu i reve ikaka ya ama̱sula̱ a akiza† ɗe nu ujimu, waru n ciga ɗu ta̱ i cuwan a̱vu waru i reve ili i na Zagbain tsu na̱ Zamawawa zuwai ajiya a̱ ɗu a damma ɗu i yuwan. 
\p  
\v 3 U tu ulobonu i reve a na a mantsa mo ukosu a̱za̱ o ulamu a na oo zoꞌoso amayun a̱ ta̱ ta̱wa̱, a̱vu a yuwan cuꞌun vi iwuya i na a cigai a yuwan suru.  
\v 4 A̱vu a damma, “Te ɗa uta̱wu u na u yuwain nzuwulai n na wa̱a̱ ta̱wa̱? Azagbain o ufaru a̱ kuwa̱ ta̱ ɗe, agba ili biti i ta̱ lo ununa a̱ ri diga a mantsa ma na a fara yuwain ili biti.” 
\p  
\v 5 Reve ama a nda e icina a na ɗe nu ujimu, na adanshi a ɗa A̱sula̱ a yuwain zuva. Reve waru a yuwan iɗa a̱tsuma̱ a̱ mini a̱vu mini ma̱ ka̱nda̱ruwa̱ iɗaꞌa.  
\v 6 Ana a tarai mantsa, reve A̱sula̱ a zuwa miniꞌi u soɗu uvaɗi.  
\v 7 Reve waru gba A̱sula̱ a zuwa zuva ni iɗa yo gogo a̱ da̱na̱ lo a̱ nden mi ipiri ma akina a na o foɓoi adama o urana wu ugeꞌetosu, reve u lungusa̱ ama a na e revei A̱sula̱ shi. 
\p  
\v 8 Ama a̱ va̱ ncigata, she yi icina a na A̱sula̱ a tara ta̱ urana u ta̱ una̱ta̱ ana aꞌwan ukpakukupa (1,000) wan, waru u tara ta̱ aꞌwan ukpakukupa una̱ta̱ nu urana u ta̱.  
\v 9 Ama o ro a ta jiyasan gashi Zagbain ta jima, she nu u shiton nzuwulai ma̱ yi suru. Agba Zagbain waa jima ununa ama o ndolo a tarai shi, u ta yuwusaan ɗu ankuri. U ciga ko vuma ta̱ kuwa̱ shi, amma u ciga ta̱ vuma suru vadala† u lyawa unusu.  
\v 10 Urana wu Zagbain u ta̱ ta̱wa̱ babu urevetyowu, cine vivu tsu ta̱wa̱. Zuva ta̱ rukutsa̱ na̱ yisaali i gbain, a̱vu akina o kototo ili biti. U to roco a alanga eteshe cine uvaɗi u ri ni ili i na i ri pe suru.\f + \fr 3:10 \ft Akuci a atagada o ro o koso ta̱ uguzu u nda ni idanshi i nda “waru ili yu uvaɗi i nda i te jeruwe nu usuɗuwu wa̱ a̱bunda̱ lon.”\f* 
\p  
\v 11 Adama a na a̱ ta̱ lungusa̱ ili suru, icuꞌun ya ama a̱ ne a ɗa u lobonoi yo oꞌwo? Adama o ndolo i yuwaan A̱sula̱ a̱ga̱nda̱, i yuwaan yi tsutoni cine yaa yuwusan nden n ɗu.  
\v 12 I zuwa ugbozu u ɗu o urana u ndolo, reve i kamba yi i zuwa yi u rawa goꞌo. A mantsa mo ndolo a̱ ta̱ lungusa̱ zuva na akina, waru ili i na i buwai suru i te jeruwe a̱tsuma̱ o usuɗuwu.  
\v 13 Agba tsu ta̱ ka̱lyuwusa̱ tse ene zuva ni iɗa i saꞌavu na A̱sula̱ a yuwain nzuwulai waa yuwan, uvaɗi u na koyan ɗa aa yuwan ili i na A̱sula̱ a tarai mejege. 
\s1 Ica̱su yu ukosu 
\p  
\v 14 Ama a̱ va̱ ncigata, adama o ndolo i yuwan nden n na moo yoꞌonoto A̱sula̱ okolo, i yuwan ili i na yaa yuwan, i yuwan nden cece babu unusu a̱tsuma̱ a rana na yaa pura ili i nda i fara. 
\p  
\v 15 I cuwan, Zagbain te ipiri adama ama a̱ tsura̱ mantsa ma na a wawa le, cine za tsu Bulu macigata ma ɗanaa nɗu nu urevu u na A̱sula̱ a ca niyi.  
\v 16 Bulu yuwan ta̱ adanshi e ili i nda suru a̱tsuma̱ a̱ mpepelime ma̱ yi. Agba akapi e ili i na u dammai a̱ tu usa̱n u merevee. Ama o ro a̱za̱ o ulambu wu urevu aza a na a̱ ri ugbamu a̱tsuma̱ e itoni shi, reve a vadala ikaka ya̱ yiꞌi a dansa ili i ro koꞌo ni ili i na waa dansa. Ne ɗa waru a yuwusan na akapi a Adanshi a̱ A̱sula̱. Ne ɗa gba oo foɓusoo aciyele ulungusu. 
\p  
\v 17 Nꞌutsa̱ n va̱, o rono ta̱ atsuvu a̱ ɗu kafu mantsaꞌa! I da̱na̱ ufoɓu adama i kuru a̱tsuma̱ o unusu wa ama e iwuya a nda wan. She yu uta̱ a̱tsuma̱ o ucawu wo okolo o ucira u ɗu wan.  
\v 18 I lyuwa elime a̱tsuma̱ e isaꞌani na̱ a̱tsuma̱ o urevu wu Zagbain tsu na̱ Zamawawa Yesu. Tsugbain nu ucira suru wo oꞌwo za va̱ yi babu ukotu. Ami.†