\id 1JN  
\h 1 Juan 
\toc1 1 Juan 
\mt1 Nihánj me ꞌo̱ yanj cartá quiꞌyaj síí cuꞌna̱j Juan caꞌnéé soꞌ rihaan nij yuvii̱ noco̱ꞌ man Diose̱ a 
\c 1  
\s1 Nana̱ nihánj taj xnaꞌanj se vaa cata̱j xnaꞌanj síí cuꞌna̱j Juan cheꞌé se vaa queneꞌen rihaan maꞌa̱n soꞌ a 
\p  
\v 1 Dan me se núj me se cata̱j xnaꞌanj núj rihaan nij soj cheꞌé ꞌo̱ síí cane ga̱a naá asi̱j guun cheꞌe̱ Diose̱ quiꞌyaj Diose̱ chumii̱, ne̱ ina̱nj se vaa cuno maꞌa̱n núj do̱ꞌ, se vaa queneꞌen rihaan maꞌa̱n núj do̱ꞌ, se vaa cutaꞌ núj raꞌa núj xráá do̱ꞌ, cheꞌé ina̱nj rasu̱u̱n vaa da̱nj cata̱j xnaꞌanj núj rihaan soj a. Dan me se cata̱j xnaꞌanj núj cheꞌé se‑na̱na̱ Diose̱, ne̱ soꞌ me síí quiꞌya̱j ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj ado̱nj.  
\v 2 Dan me se soꞌ me síí quiꞌya̱j ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj, ne̱ caꞌnaꞌ soꞌ, ne̱ queneꞌen núj man soꞌ, ne̱ nihánj me se nataꞌ núj rihaan nij soj cheꞌé soꞌ se vaa asino canicunꞌ soꞌ ga̱ Diose̱ rej ya̱nj Diose̱ ga̱a naá, ga̱a ne̱ ya̱j me se caꞌnaꞌ soꞌ rej ne̱ níꞌ a.  
\v 3 Dan me se nataꞌ núj rihaan maꞌa̱n nij soj cheꞌé se vaa queneꞌen núj do̱ꞌ, cheꞌé se vaa cuno núj do̱ꞌ, cheꞌé rej caꞌve̱e cunu̱u rcuaꞌa̱a̱n soj ga̱ núj, ne̱ dan me se cunu̱u rcuaꞌa̱a̱n níꞌ ga̱ Rej níꞌ Diose̱, ga̱ taꞌníí soꞌ Jesucristó a.  
\v 4 Ne̱ achrón núj nana̱ nihánj rihaan yanj naya̱a̱ soj, cheꞌé rej caꞌve̱e gu̱un niha̱ꞌ uxrá rá taranꞌ níꞌ ado̱nj. 
\s1 Nana̱ nihánj taj xnaꞌanj se vaa ase̱ vaa yaꞌan chuguu̱n roꞌ, da̱nj vaa Diose̱, ne̱ caꞌve̱e cunu̱u sa̱ꞌ nimán níꞌ quiꞌya̱j soꞌ a 
\p  
\v 5 Ne̱ nihánj roꞌ, me nana̱ cataj xnaꞌanj Jesucristó cuno núj, ne̱ nataꞌ núj nana̱ nihánj rihaan soj, ne̱ dan me se ase̱ vaa ꞌo̱ yaꞌan chuguu̱n vaa Diose̱, ne̱ rej va̱j Diose̱ me se nuviꞌ rej rmi̱ꞌ rej va̱j soꞌ maꞌ.  
\v 6 Cheꞌé dan sese cata̱j níꞌ se vaa si̱j chéé ga̱ Diose̱ me níꞌ, ne̱ sese chéé níꞌ rej rmi̱ꞌ, ga̱a ne̱ tuꞌva rmaꞌa̱n níꞌ vaa ga̱a na̱nj ei. Ne̱ ne nocoꞌ níꞌ tucuáán ya̱ yoꞌ ga̱a̱ a̱ maꞌ.  
\v 7 Tza̱j ne̱ sese chéé níꞌ rej chuguu̱n sa̱ꞌ rej va̱j maꞌa̱n Diose̱, ne̱ veꞌé sa̱ꞌ mán taranꞌ níꞌ, ne̱ quinavi̱j nu̱ꞌ cacunꞌ tumé níꞌ, quiꞌya̱j Jesucristó síí caviꞌ cheꞌé níꞌ, ne̱ yoꞌo̱ cunu̱u sa̱ꞌ nimán níꞌ ei.  
\v 8 Dan me se sese cata̱j níꞌ se vaa a̱ doj cacunꞌ ne tumé níꞌ, ne̱ dan me se tihaꞌ yuꞌunj níꞌ vaa ga̱a na̱nj ado̱nj. Ne̱ nuveé si̱j aꞌmii nana̱ ya̱ me níꞌ ga̱a̱ a̱ maꞌ.  
\v 9 Tza̱j ne̱ sese nata̱ꞌ ya̱ níꞌ rihaan Diose̱ cheꞌé cacunꞌ tumé níꞌ, ne̱ Diose̱ me se vaa cheꞌé ga̱a̱ nucua̱j rá níꞌ se vaa nica̱ quiꞌya̱j soꞌ cheꞌé níꞌ, ne̱ dan me se cata̱j soꞌ se vaa navij cacunꞌ tumé níꞌ, ne̱ tinavi̱j soꞌ nu̱ꞌ se chiꞌi̱i̱ ma̱n nimán níꞌ ado̱nj.  
\v 10 Dan me se sese cata̱j níꞌ se vaa a̱ doj ne quiꞌya̱j níꞌ cacunꞌ, ne̱ si̱j tuꞌva rmaꞌa̱n me níꞌ, ne̱ ꞌyaj níꞌ síí ne̱ man nda̱a maꞌa̱n Diose̱ vaa ga̱a̱ na̱nj chugua̱nj. Dan me se a̱j cataj ya̱ Diose̱ se vaa tumé níꞌ cacunꞌ na̱nj ei. Ne̱ sese caꞌmi̱i̱ níꞌ da̱nj, ne̱ nuveé si̱j uno se‑na̱na̱ Diose̱ me níꞌ ga̱a̱ mei. 
\c 2  
\s1 Nana̱ nihánj taj xnaꞌanj cheꞌé nana̱ no̱ xcúún níꞌ cuno̱ níꞌ a 
\p  
\v 1 Ase vaa taꞌníí ꞌu̱nj roꞌ, da̱nj vaa soj, tinu̱j, nocoj. Ne̱ achrón ꞌu̱nj nu̱ꞌ nana̱ nihánj rihaan yanj nihánj, cheꞌé rej se̱ quiꞌyaj soj cacunꞌ mei. 
\p Dan me se sese quiꞌya̱j níꞌ cacunꞌ, ne̱ vaa ꞌo̱ síí nica̱ nimán aꞌmii yuꞌunj cheꞌé níꞌ rihaan Rej níꞌ Diose̱, ne̱ Jesucristó me síí aꞌmii yuꞌunj cheꞌé níꞌ ei.  
\v 2 Ne̱ soꞌ me síí caviꞌ cheꞌé rej caꞌve̱e quinavi̱j cacunꞌ tumé níꞌ ado̱nj. Tza̱j ne̱ nuveé cheꞌe̱ do̱j se‑cacu̱nꞌ níꞌ me caviꞌ soꞌ maꞌ. Caviꞌ soꞌ cheꞌé cacunꞌ tumé cunuda̱nj nij yuvii̱ ma̱n rihaan chumii̱ ado̱nj. 
\p  
\v 3 Dan me se nihánj me rej neꞌen níꞌ se vaa si̱j noco̱ꞌ man Jesucristó me níꞌ a. Dan me se sese ꞌyaj níꞌ nda̱a vaa cataj xnaꞌanj Jesucristó rihaan níꞌ, ne̱ si̱j noco̱ꞌ ya̱ man soꞌ me níꞌ ado̱nj.  
\v 4 Tza̱j ne̱ sese taj yoꞌo̱ soꞌ se vaa si̱j noco̱ꞌ man Jesucristó me soꞌ ne̱ ne ꞌyaj soꞌ nda̱a vaa cataj xnaꞌanj Jesucristó rihaan níꞌ, ne̱ síí ne̱ me soꞌ, ne̱ nuveé si̱j aꞌmii nana̱ ya̱ me soꞌ mei.  
\v 5 Tza̱j ne̱ síí uno se‑na̱na̱ Jesucristó roꞌ, soꞌ me síí ya̱ ya̱ aráj cochro̱j rihaan Diose̱ chugua̱nj. Cheꞌé dan, sese quiꞌya̱j níꞌ da̱nj, ne̱ caꞌve̱e gu̱un ya̱ rá níꞌ se vaa si̱j noco̱ꞌ man Jesucristó me níꞌ ei.  
\v 6 Ne̱ síí taj se vaa yoꞌo̱ nocoꞌ man Jesucristó roꞌ, ase̱ vaa quiꞌyaj Jesucristó roꞌ, da̱nj ina̱nj nó xcúún soꞌ quiꞌya̱j maꞌa̱n soꞌ uún ado̱nj. 
\p  
\v 7 Dan me se ꞌe̱e̱ raj man soj, tinu̱j, nocoj. Ne̱ nihánj me se cachro̱n ꞌu̱nj ꞌo̱ nana̱ naca̱ rihaan yanj nihánj cuno̱ soj chugua̱nj. Tza̱j ne̱ nuveé na̱na̱ naca̱ me nana̱ nihánj maꞌ. Veé nana̱ cuno soj asi̱j guun cheꞌe̱ soj canocoꞌ soj man Jesucristó me nana̱ nihánj na̱nj ado̱nj.  
\v 8 Dan me se cachro̱n uún ꞌu̱nj nana̱ naca̱ nihánj cuno̱ soj, ne̱ ya̱ ya̱ nana̱ naca̱ tucuꞌyón Jesucristó me nana̱ nihánj, ne̱ cuno soj nana̱ naca̱ nihánj ado̱nj. ꞌO̱ se va̱j navi̱j rej rmi̱ꞌ rihaan chumii̱ nihánj, ne̱ Jesucristó roꞌ, me yaꞌan chuguu̱n, ne̱ dan me se guun cheꞌe̱ se‑na̱na̱ soꞌ cuchuguu̱n se‑na̱na̱ soꞌ rihaan chumii̱ nihánj ei.  
\v 9 Ne̱ xa̱ꞌ síí taj se vaa va̱j soꞌ rej chuguu̱n ga̱ se‑na̱na̱ Jesucristó ne̱ nachriꞌ soꞌ niꞌya̱j soꞌ man tinúú soꞌ, ne̱ si̱j va̱j gue̱e̱ rej rmi̱ꞌ me ya̱ soꞌ na̱nj chugua̱nj.  
\v 10 Ne̱ síí ꞌe̱e̱ rá man tinúú me se soꞌ me síí chéé rej chuguu̱n ga̱ se‑na̱na̱ Jesucristó, ne̱ se̱ caꞌvee quiri̱ꞌ soꞌ maꞌ.  
\v 11 Ne̱ xa̱ꞌ síí nachriꞌ man tinúú, tza̱j ne̱ soꞌ me síí va̱j rej rmi̱ꞌ, ne̱ ꞌo̱ chéé gue̱e̱ soꞌ rej rmi̱ꞌ na̱nj á. Ne neꞌen soꞌ me rej va̱j soꞌ a̱ maꞌ. ꞌO̱ se caráán rihaan soꞌ, quiꞌyaj rej rmi̱ꞌ va̱j soꞌ na̱nj ado̱nj. Naꞌvee a̱ doj xca̱j soꞌ cuentá a̱ maꞌ. 
\p  
\v 12 Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, ne̱ ꞌo̱ se cheꞌé se noco̱ꞌ soj man Jesucristó roꞌ, cheꞌé dan quinavij cacunꞌ tumé soj rihaan Diose̱ ei. 
\p  
\v 13 Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, ne̱ ꞌo̱ se a̱j neꞌen soj man síí cayáán ga̱ Diose̱ ga̱a guun cheꞌe̱ Diose̱ quiꞌyaj Diose̱ chumii̱ nihánj a. 
\p Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, ne̱ ꞌo̱ se a̱j quiꞌyaj canaán soj rihaan síí chre̱e ei. 
\p  
\v 14 Achrón ꞌu̱nj nu̱ꞌ nana̱ nihánj naya̱a̱ soj xni̱i, ne̱ ꞌo̱ se a̱j neꞌen soj man Rej níꞌ Diose̱ ado̱nj. 
\p Achrón ꞌu̱nj nu̱ꞌ nana̱ nihánj naya̱a̱ soj si̱j vaa taꞌníí, ne̱ ꞌo̱ se a̱j neꞌen soj man síí cayáán ga̱ Diose̱ ga̱a guun cheꞌe̱ Diose̱ quiꞌyaj Diose̱ chumii̱ nihánj ei. 
\p Achrón ꞌu̱nj nu̱ꞌ nana̱ nihánj naya̱a̱ soj si̱j tachru̱u̱, ne̱ ꞌo̱ nucua̱j ndoꞌo nimán soj rihaan sayuun, ne̱ yoꞌo̱ uno soj se‑na̱na̱ Diose̱, ne̱ a̱j quiꞌyaj canaán soj rihaan síí chre̱e ei. 
\p  
\v 15 Se̱ guun rá soj ni̱ꞌyaj soj chumii̱ nihánj do̱ꞌ, nij rasu̱u̱n ma̱n rihaan chumii̱ nihánj do̱ꞌ mei. ꞌO̱ se xa̱ꞌ síí me rá niꞌya̱j chumii̱ nihánj, tza̱j ne̱ nuveé si̱j aráj cochro̱j rihaan Rej níꞌ Diose̱ me soꞌ man chugua̱nj.  
\v 16 ꞌO̱ se rihaan chumii̱ nihánj vaa ndoꞌo se me rá yuvii̱ quiꞌya̱j yuvii̱ do̱ꞌ, vaa ndoꞌo se me rá yuvii̱ niꞌya̱j yuvii̱ do̱ꞌ, vaa ndoꞌo rasu̱u̱n ꞌyaj uun xta̱ꞌ nimán yuvii̱ do̱ꞌ, tza̱j ne̱ nuveé ra̱su̱u̱n cavii rihaan Rej níꞌ Diose̱ me nu̱ꞌ nij rasu̱u̱n vaa da̱nj maꞌ. ꞌO̱ se na̱nj rasu̱u̱n ma̱n rihaan chumii̱ nihánj me nij rasu̱u̱n yoꞌ na̱nj ado̱nj.  
\v 17 Ne̱ va̱j navi̱j chumii̱ nihánj ei. Ne̱ va̱j navi̱j nu̱ꞌ se vaa me rá nij yuvii̱ ma̱n rihaan chumii̱ nihánj quiꞌya̱j nij soꞌ ei. Tza̱j ne̱ síí ꞌyaj nda̱a vaa me rá Diose̱ me se ca̱yáán soꞌ nu̱ꞌ cavii nu̱ꞌ caꞌanj ga̱ Diose̱ chugua̱nj. 
\s1 Nana̱ nihánj taj xnaꞌanj cheꞌé síí tuꞌva rmaꞌa̱n se vaa si̱j ti̱nanii man yuvii̱ rihaan sayuun me soꞌ a 
\p  
\v 18 Dan me se ase̱ vaa taꞌníj vaa soj, ne̱ me raj cuno̱ soj nana̱ nihánj ei. ꞌO̱ se nichru̱nꞌ quinavi̱j chumii̱ nihánj, ne̱ a̱j cuno soj nana̱ se vaa caꞌna̱ꞌ ꞌo̱ síí quita̱j yuꞌunj, ne̱ cata̱j soꞌ se vaa si̱j caꞌnéé Diose̱ ti̱nanii man yuvii̱ rihaan sayuun me soꞌ, ne̱ nihánj me se a̱j caꞌnaꞌ queꞌe̱e̱ síí tuꞌva da̱nj, ne̱ cheꞌé dan neꞌen ya̱ níꞌ se vaa ya̱ nichru̱nꞌ quinavi̱j chumii̱ nihánj ei.  
\v 19 Dan me se ase̱ vaa tinúú níꞌ vaa nij soꞌ asi̱j rque̱, tza̱j ne̱ caꞌanj yaníj nij soꞌ rihaan níꞌ, ne̱ nuveé ya̱ ya̱ tinu̱j níꞌ me nij soꞌ a̱ maꞌ. ꞌO̱ se caꞌanj yaníj nij soꞌ rihaan níꞌ cheꞌé rej caꞌve̱e xca̱j níꞌ cuentá se vaa nuveé tinu̱j níꞌ me taranꞌ nij soꞌ a̱ man ado̱nj. 
\p  
\v 20 Ne̱ xa̱ꞌ soj, tza̱j ne̱ cuneꞌ Diose̱ man soj, ne̱ guun nucua̱j soj xcaj soj cuentá, quiꞌyaj Diose̱, ne̱ neꞌen soj cunuda̱nj rasu̱u̱n ei.  
\v 21 Nuveé cheꞌe̱ se ne neꞌen soj nana̱ ya̱ me cachrón ꞌu̱nj nana̱ nihánj naya̱a̱ soj maꞌ. Tza̱j ne̱ achrón ꞌu̱nj nana̱ nihánj naya̱a̱ soj cheꞌé se si̱j neꞌen nij nana̱ ya̱ me soj, ne̱ a̱j neꞌen soj se vaa ino̱ doj vaa nana̱ ne̱ ga̱ nana̱ ya̱ nana̱ noco̱ꞌ níꞌ ado̱nj. 
\p  
\v 22 Ne̱ síí ne̱ me se soꞌ me síí taj se vaa nuveé si̱j caꞌnéé Diose̱ ti̱nanii man yuvii̱ rihaan sayuun me Jesucristó chugua̱nj. Dan me se taj soꞌ se vaa maꞌa̱n soꞌ me Cristó caꞌnéé Diose̱, taj soꞌ chugua̱nj. Ne̱ dan me se ne aráj cochro̱j soꞌ rihaan Rej níꞌ Diose̱ do̱ꞌ, rihaan taꞌníí Diose̱ do̱ꞌ maꞌ.  
\v 23 Dan me se xa̱ꞌ síí ne aráj cochro̱j rihaan taꞌníí Diose̱, tza̱j ne̱ si̱j ne nocoꞌ man Rej níꞌ Diose̱ me soꞌ ei. Tza̱j ne̱ síí nataꞌ ya̱ se vaa veꞌé nocoꞌ soꞌ man taꞌníí Diose̱ roꞌ, soꞌ me síí noco̱ꞌ ya̱ man Rej níꞌ Diose̱ uún ado̱nj. 
\p  
\v 24 Ne̱ xa̱ꞌ soj, tza̱j ne̱ yoꞌo̱ cuno̱ soj nana̱ cuno soj ga̱a guun cheꞌe̱ soj canocoꞌ soj man Jesucristó ei. Sese quiꞌya̱j soj da̱nj, ne̱ si̱j noco̱ꞌ man taꞌníí Diose̱ do̱ꞌ, man maꞌa̱n ya̱ Rej níꞌ Diose̱ do̱ꞌ, me soj chugua̱nj.  
\v 25 Ne̱ nihánj me nana̱ cataꞌ tuꞌva maꞌa̱n Jesucristó rihaan níꞌ, se vaa caꞌve̱e ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj ya̱ ei. 
\p  
\v 26 Dan me se cachrón ꞌu̱nj nu̱ꞌ nana̱ nihánj naya̱a̱ soj cheꞌé rej xca̱j soj cuentá cheꞌé nij síí me rá tiha̱ꞌ yuꞌunj man soj ado̱nj.  
\v 27 Ne̱ xa̱ꞌ soj, tza̱j ne̱ cheꞌé se cuneꞌ Diose̱ man soj roꞌ, cheꞌé dan yoꞌo̱ nocoꞌ soj man Diose̱, ne̱ taj cheꞌé tu̱cuꞌyón nii doj nana̱ man soj a̱ maꞌ. Tana̱nj cheꞌé se cuneꞌ Diose̱ man soj, cheꞌé dan a̱j nariꞌ soj nana̱ cheꞌé nu̱ꞌ rasu̱u̱n, ne̱ ina̱nj nana̱ ya̱ nariꞌ soj ei. Nuveé na̱na̱ ne̱ me nana̱ nariꞌ soj, quiꞌyaj Diose̱ maꞌ. Dan me se yoꞌo̱ noco̱ꞌ soj man Diose̱, nda̱a vaa tucuꞌyón ya̱ soꞌ man soj ado̱nj. 
\s1 Nana̱ nihánj taj xnaꞌanj se vaa taꞌni̱j Diose̱ me níꞌ a 
\p  
\v 28 Dan me se ase̱ vaa taꞌníj vaa nij soj rihanj, ne̱ me rá ꞌu̱nj se vaa yoꞌo̱ canoco̱ꞌ raan soj man Jesucristó, cheꞌé rej asa̱ꞌ caꞌnaꞌ uún soꞌ rihaan chumii̱ nihánj, ne̱ se̱ guun naꞌa̱j soj a̱ doj maꞌ. Tana̱nj gu̱un niha̱ꞌ rá soj caꞌmi̱i̱ soj ga̱ soꞌ ei.  
\v 29 Dan me se neꞌen soj se vaa síí sa̱ꞌ ina̱nj me Jesucristó, ne̱ cheꞌé dan neꞌen soj se vaa nu̱ꞌ nij síí ꞌyaj sa̱ꞌ roꞌ, taranꞌ nij soꞌ me síí cunuu sa̱ꞌ nimán quiꞌyaj soꞌ ado̱nj. 
\c 3  
\p  
\v 1 Dan me se xca̱j soj cuentá se vaa cunuu ꞌe̱e̱ uxrá rá Rej níꞌ Diose̱ niꞌya̱j soꞌ man níꞌ, ne̱ nda̱a taꞌníí Diose̱ guun níꞌ, quiꞌyaj Diose̱ chugua̱nj. Ne̱ taꞌni̱j Diose̱ me xa̱ꞌ níꞌ ado̱nj. Cheꞌé dan ne neꞌen nij síí ma̱n rihaan chumii̱ nihánj man níꞌ da̱j si̱j me níꞌ man chugua̱nj. ꞌO̱ se tana̱nj uún, ne̱ ne neꞌen nij soꞌ man maꞌa̱n Diose̱ uún a̱ man ado̱nj.  
\v 2 Dan me se ꞌe̱e̱ raj man nij soj, tinu̱j, nocoj, ne̱ cuano̱ nihánj me se taꞌni̱j Diose̱ me níꞌ, ne̱ ataa xca̱j níꞌ cuentá da̱j si̱j gu̱un níꞌ quiꞌya̱j Diose̱ vaa güii ei. Ma̱a̱n se neꞌen níꞌ se vaa asa̱ꞌ caꞌnaꞌ soꞌ, ne̱ ase̱ vaa soꞌ roꞌ, da̱nj ga̱a̱ maꞌa̱n níꞌ uún ado̱nj. ꞌO̱ se queneꞌe̱n níꞌ man soꞌ, ne̱ xca̱j ya̱ níꞌ cuentá da̱j vaa xa̱ꞌ soꞌ na̱nj ado̱nj.  
\v 3 Ne̱ nij síí nucua̱j rá man nana̱ nihánj se vaa ya̱ vaa nana̱ nihánj me se ya̱ cunu̱u sa̱ꞌ nimán nij soꞌ quiꞌya̱j nij soꞌ, ne̱ ase̱ vaa sa̱ꞌ nimán Jesucristó roꞌ, da̱nj ga̱a̱ sa̱ꞌ nimán nij soꞌ uún ado̱nj. 
\p  
\v 4 Dan me se nu̱ꞌ nij síí ꞌyaj cacunꞌ roꞌ, nij soꞌ me nij síí naꞌvej rá cuno̱ rihaan Diose̱,  
\v 5 ne̱ neꞌen nij soj se vaa caꞌnaꞌ Jesucristó rihaan chumii̱ nihánj, cheꞌé rej caꞌve̱e tinavi̱j soꞌ cacunꞌ tumé yuvii̱, ne̱ a̱ doj cacunꞌ taj tumé soꞌ maꞌ.  
\v 6 Ne̱ taranꞌ nij síí yoꞌo̱ nocoꞌ man soꞌ roꞌ, ne ꞌyaj nij soꞌ cacunꞌ maꞌ. Ne̱ nij síí noco̱ꞌ tucuáán ꞌyaj cacunꞌ roꞌ, nuveé si̱j neꞌen man Jesucristó me nij soꞌ man ado̱nj.  
\v 7 Dan me se ase̱ vaa taꞌníj vaa soj rihanj, tinu̱j, nocoj, ne̱ se̱ guun tiha̱ꞌ yuꞌunj a̱ doj yuvii̱ man soj man chugua̱nj. Síí ꞌyaj sa̱ꞌ roꞌ, síí sa̱ꞌ me soꞌ, ne̱ ase̱ vaa maꞌa̱n Jesucristó vaa soꞌ ado̱nj.  
\v 8 Ne̱ síí ꞌyaj cacunꞌ me se síí noco̱ꞌ se‑tucua̱nj síí chre̱e me soꞌ ei. ꞌO̱ se asi̱j guun cheꞌe̱ Diose̱ quiꞌyaj Diose̱ chumii̱ nihánj, ne̱ si̱j ꞌyaj ina̱nj cacunꞌ me síí chre̱e na̱nj ado̱nj. Ne̱ caꞌnaꞌ taꞌníí Diose̱ rihaan chumii̱ nihánj, cheꞌé rej caꞌve̱e tiri̱ꞌ soꞌ nu̱ꞌ se vaa ꞌyaj síí chre̱e yoꞌ ei.  
\v 9 Ne̱ taranꞌ nij síí cunuu sa̱ꞌ nimán quiꞌyaj Diose̱ roꞌ, ne ꞌyaj nij soꞌ cacunꞌ a̱ maꞌ. ꞌO̱ se Diose̱ me síí quiꞌyaj cunuu sa̱ꞌ nimán nij soꞌ, ne̱ se̱ caꞌvee yoꞌo̱ quiꞌya̱j soꞌ cacunꞌ, ése̱ maꞌa̱n Diose̱ quiꞌyaj caꞌngaa naca̱ nij soꞌ na̱nj ado̱nj.  
\v 10 Ne̱ nihánj me xca̱j níꞌ cuentá ni̱ꞌyaj níꞌ, ga̱a ne̱ cunu̱u ya̱a̱n níꞌ taꞌníí Diose̱ do̱ꞌ, taꞌníí síí chre̱e do̱ꞌ ei. Dan me se nij síí ne ꞌyaj se sa̱ꞌ roꞌ, nuveé si̱j noco̱ꞌ man Diose̱ me nij soꞌ maꞌ. Dan me se nuveé si̱j ꞌe̱e̱ rá man tinúú me nij soꞌ a̱ man ado̱nj. 
\s1 Nana̱ nihánj taj xnaꞌanj se vaa no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ a 
\p  
\v 11 ꞌO̱ se nana̱ nihánj me nana̱ cuno soj asi̱j guun cheꞌe̱ soj canocoꞌ soj man Diose̱, ne̱ nana̱ nihánj taj se vaa no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ chugua̱nj.  
\v 12 Dan me se se̱ quiꞌyaj níꞌ nda̱a vaa quiꞌyaj síí cuꞌna̱j Caín ga̱a naá maꞌ. ꞌO̱ se si̱j noco̱ꞌ tucuáán chiꞌi̱i̱ me soꞌ, ne̱ ticaviꞌ soꞌ tinúú soꞌ ado̱nj. Ne̱ me cheꞌé quiꞌyaj soꞌ da̱nj, rá soj ga̱. ꞌO̱ se nu̱ꞌ rasu̱u̱n quiꞌyaj soꞌ me se ina̱nj chiꞌi̱i̱ ndoꞌo quiꞌyaj maꞌa̱n soꞌ, ne̱ tinúú soꞌ me se sa̱ꞌ ina̱nj vaa rasu̱u̱n quiꞌyaj tinúú soꞌ, ne̱ cheꞌé dan guun xco̱j ruva̱a̱ rá soꞌ niꞌya̱j soꞌ tinúú soꞌ ado̱nj. 
\p  
\v 13 Dan me se se̱ caꞌanj rá soj sese quita̱j riꞌyunj nij síí ma̱n rihaan chumii̱ nihánj ni̱ꞌyaj nij soꞌ man soj, man tinu̱j, man nocoj.  
\v 14 ꞌO̱ se cheꞌé se cunuu ꞌe̱e̱ rá níꞌ man tinúú níꞌ roꞌ, cheꞌé dan neꞌen níꞌ se vaa a̱j tanáj xco̱ níꞌ chrej chiꞌi̱i̱ chrej quiꞌya̱j cavi̱ꞌ níꞌ, ne̱ a̱j cunuu sa̱ꞌ nimán níꞌ, ne̱ caꞌve̱e ca̱yáán níꞌ ga̱ Diose̱ ei. Ne̱ síí ne ꞌe̱e̱ rá man tuviꞌ me se adi̱ꞌ se vaa nij síí caviꞌ roꞌ, vaa nij soꞌ na̱nj ado̱nj.  
\v 15 Dan me se xa̱ꞌ taranꞌ nij síí nachriꞌ niꞌya̱j man tinúú me se ase̱ vaa síí ticaviꞌ man tinúú roꞌ, vaa nij soꞌ, ne̱ neꞌen soj se vaa daj chiha̱a̱ míj se̱ caꞌvee ga̱a̱ iꞌna̱ꞌ síí vaa da̱nj rihaan Diose̱ nu̱ꞌ cavii nu̱ꞌ caꞌanj maꞌ.  
\v 16 Ne̱ Jesucristó roꞌ, me síí caꞌvej rá cavi̱ꞌ cheꞌé níꞌ, ne̱ cheꞌé dan neꞌen níꞌ se vaa ꞌe̱e̱ rá soꞌ man níꞌ ado̱nj. Ne̱ cheꞌé dan no̱ xcúún níꞌ caꞌne̱j nimán níꞌ cavi̱ꞌ níꞌ cheꞌé tinúú níꞌ chugua̱nj. 
\p  
\v 17 Dan me se sese vaa ndoꞌo rasu̱u̱n ma̱n rihaan chumii̱ nihánj ni̱caj yoꞌo̱ soꞌ, ne̱ nda̱ꞌ se neꞌen soꞌ se vaa achiin ndoꞌo rasu̱u̱n man tinúú soꞌ tza̱j ne̱ naꞌvej rá soꞌ ra̱cuíj soꞌ man tinúú soꞌ, ne̱ nuveé si̱j aráj cochro̱j rihaan Diose̱ me soꞌ a̱ man ado̱nj.  
\v 18 Dan me se ase̱ vaa taꞌníj vaa soj chugua̱nj. Dan me se se̱ guun cata̱j u̱u̱n níꞌ nana̱ u̱u̱n se vaa aráj cochro̱j níꞌ rihaan Diose̱ chugua̱nj. Quiꞌya̱j ya̱ ya̱ níꞌ se sa̱ꞌ nda̱a vaa me rá Diose̱ quiꞌya̱j níꞌ, ne̱ ya̱ ya̱ si̱j aráj cochro̱j rihaan Diose̱ me níꞌ ado̱nj. 
\s1 Nana̱ nihánj taj xnaꞌanj se vaa taj cheꞌé gu̱un naꞌa̱j níꞌ ni̱ꞌyaj níꞌ Diose̱ maꞌ 
\p  
\v 19 Dan me se sese quiꞌya̱j níꞌ da̱nj, ne̱ queneꞌe̱n níꞌ se vaa si̱j noco̱ꞌ ya̱ nana̱ ya̱ me níꞌ, ne̱ dan me se gu̱un ya̱ ya̱ rá nimán níꞌ rihaan Diose̱ ei.  
\v 20 ꞌO̱ se nda̱ꞌ se caꞌve̱e quinano̱ rá níꞌ cheꞌé cacunꞌ tumé níꞌ, tza̱j ne̱ sa̱ꞌ doj vaa Diose̱ rihaan nimán níꞌ, ne̱ Diose̱ me síí neꞌen cunuda̱nj ado̱nj.  
\v 21 Dan me se ꞌe̱e̱ raj man nij soj, tinu̱j, nocoj. Ne̱ sese nuviꞌ cacunꞌ tumé níꞌ, ne̱ se̱ cuchuꞌviꞌ níꞌ caꞌmi̱i̱ níꞌ ga̱ Diose̱ maꞌ.  
\v 22 Dan me se me maꞌa̱n rasu̱u̱n cachi̱nj níꞌ rihaan Diose̱, ne̱ rque̱ Diose̱ cunuda̱nj se vaa cachi̱nj niꞌya̱j níꞌ rihaan soꞌ, cheꞌé se si̱j uno se‑na̱na̱ soꞌ me níꞌ, ne̱ uun niha̱ꞌ rá soꞌ niꞌya̱j soꞌ se sa̱ꞌ ꞌyaj níꞌ ei.  
\v 23 Dan me se nihánj me se vaa me rá Diose̱ quiꞌya̱j níꞌ a. Me rá Diose̱ cuchuma̱n rá níꞌ ni̱ꞌyaj níꞌ man taꞌníí soꞌ Jesucristó, ne̱ me rá Diose̱ cunu̱u ꞌe̱e̱ rá níꞌ ni̱ꞌyaj níꞌ man tuviꞌ níꞌ nda̱a vaa caꞌneꞌ Diose̱ suun rihaan níꞌ a.  
\v 24 Ne̱ síí uno se‑na̱na̱ Diose̱ roꞌ, soꞌ me síí yoꞌo̱ nocoꞌ man Diose̱, ne̱ yoꞌo̱ ne Diose̱ ga̱ soꞌ ado̱nj. Ne̱ nihánj me rej neꞌen níꞌ se vaa yoꞌo̱ ne Diose̱ ga̱ níꞌ ei. Cheꞌé se xcaj níꞌ cuentá se vaa ꞌyaj suun Nimán Diose̱ nimán níꞌ, cheꞌé dan neꞌen níꞌ se vaa ne̱ Diose̱ ga̱ níꞌ ado̱nj. 
\c 4  
\s1 Nana̱ nihánj taj xnaꞌanj me nana̱ caꞌve̱e cuno̱ níꞌ a 
\p  
\v 1 ꞌE̱e̱ raj man nij soj, tinu̱j, nocoj. Ne̱ se̱ guun cuno̱ soj me maꞌa̱n nana̱ maꞌ. A̱sino xca̱j soj cuentá sese nana̱ rqué Nimán Diose̱ me nana̱ caꞌmii yoꞌo̱ soꞌ, ne̱ sese Nimán Diose̱ me síí rqué nana̱ yoꞌ, ne̱ caꞌve̱e cuno̱ soj nana̱ yoꞌ ei. ꞌO̱ se a̱j caꞌnaꞌ ndoꞌo síí ne̱, ne̱ taj nij soꞌ se vaa si̱j nataꞌ se‑na̱na̱ Diose̱ me nij soꞌ, tza̱j ne̱ tuꞌva rmaꞌa̱n nij soꞌ na̱nj ei. Dan me se da̱nj tuꞌva nij soꞌ rihaan nij síí ma̱n rihaan chumii̱ nihánj cheꞌé se me rá nij soꞌ cuchuma̱n rá nij síí ma̱n rihaan chumii̱ nihánj chugua̱nj.  
\v 2 Tza̱j ne̱ nihánj me se vaa quiꞌya̱j soj, ga̱a ne̱ caꞌve̱e xca̱j soj cuentá me nana̱ me nana̱ caꞌmii Nimán Diose̱ ei. Sese cata̱j yoꞌo̱ soꞌ se vaa Jesucristó me síí caꞌnéé Diose̱ ti̱nanii man yuvii̱ rihaan sayuun, ne̱ guun Jesucristó yuvii̱ caꞌnaꞌ soꞌ, cata̱j yoꞌo̱ soꞌ, ne̱ nana̱ yoꞌ me se‑na̱na̱ Nimán Diose̱ ado̱nj.  
\v 3 Tza̱j ne̱ nu̱ꞌ nij síí taj se vaa nuveé si̱j caꞌnéé Diose̱ man me Jesucristó me se nuveé na̱na̱ rqué Nimán Diose̱ me yoꞌ maꞌ. ꞌO̱ se se‑na̱na̱ nij síí ne̱ tuꞌva rmaꞌa̱n me yoꞌ, ne̱ dan me se a̱j cuno soj se vaa caꞌna̱ꞌ nij soꞌ, ne̱ cata̱j nij soꞌ se vaa si̱j caꞌnéé Diose̱ ti̱nanii man yuvii̱ rihaan sayuun me maꞌa̱n nij soꞌ ei. Ne̱ ya̱j nihánj me se a̱j mán ndoꞌo nij soꞌ rihaan chumii̱ nihánj ya̱j cuano̱ chugua̱nj. 
\p  
\v 4 Tza̱j ne̱ ya̱j nihánj me se síí cunuu sa̱ꞌ nimán quiꞌyaj Diose̱ me nij soj, tinu̱j, nocoj. Ne̱ a̱j quiꞌyaj canaán soj rihaan nij síí ne̱ cuano̱ ei. ꞌO̱ se nu̱u̱ Nimán Diose̱ nimán soj, ne̱ nucua̱j doj Nimán Diose̱ rihaan síí chre̱e va̱j rihaan chumii̱ nihánj chugua̱nj.  
\v 5 Ne̱ nij síí ne̱ yoꞌ, tza̱j ne̱ síí ma̱n rihaan chumii̱ nihánj me nij soꞌ, ne̱ cheꞌé dan ina̱nj aꞌmii nij soꞌ nda̱a vaa nariꞌ nij soꞌ rihaan chumii̱ nihánj, ne̱ uno nij síí ma̱n rihaan chumii̱ nihánj se‑na̱na̱ nij soꞌ ei.  
\v 6 Tza̱j ne̱ síí cunuu sa̱ꞌ nimán quiꞌyaj Diose̱ me níꞌ, ne̱ nij síí neꞌen man Diose̱ roꞌ, uno nij soꞌ se‑na̱na̱ níꞌ ado̱nj. Ne̱ xa̱ꞌ síí ne cunu̱u sa̱ꞌ nimán quiꞌyaj Diose̱, tza̱j ne̱ ne uno nij soꞌ se‑na̱na̱ níꞌ a̱ maꞌ. Cheꞌé dan neꞌen níꞌ me síí nu̱u̱ Nimán Diose̱ nimán, ne̱ neꞌen níꞌ me síí nu̱u̱ nana̱ tihaꞌ yuꞌunj nimán chugua̱nj. 
\s1 Nana̱ nihánj taj xnaꞌanj se vaa no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ, cheꞌé se ꞌe̱e̱ rá Diose̱ man níꞌ a 
\p  
\v 7 ꞌE̱e̱ raj man nij soj, tinu̱j, nocoj. Ne̱ no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ ado̱nj. ꞌO̱ se Diose̱ me síí rqué rej nucua̱j rihaan níꞌ cunu̱u ꞌe̱e̱ rá níꞌ man tuviꞌ níꞌ a. Cheꞌé dan nu̱ꞌ síí ꞌe̱e̱ rá man tuviꞌ me se síí cunuu sa̱ꞌ nimán quiꞌyaj Diose̱ me nij soꞌ ado̱nj. Ne̱ neꞌen nij soꞌ man Diose̱ ado̱nj.  
\v 8 Ne̱ síí ne ꞌe̱e̱ rá man tuviꞌ me se ataa xca̱j nij soꞌ cuentá cheꞌé Diose̱ ei. ꞌO̱ se ataa xca̱j nij soꞌ cuentá se vaa Diose̱ me síí ꞌe̱e̱ ina̱nj rá man níꞌ ado̱nj.  
\v 9 Ne̱ nihánj me cata̱j xnaꞌanj ꞌu̱nj rihaan soj me cheꞌé neꞌen níꞌ se vaa ꞌe̱e̱ rá Diose̱ man níꞌ a. Dan me se nda̱ꞌ se o̱rúnꞌ ya̱ taꞌníí Diose̱, tza̱j ne̱ caꞌnéé Diose̱ man taꞌníí maꞌa̱n ya̱ Diose̱ rihaan chumii̱ nihánj, cheꞌé rej caꞌve̱e ga̱a̱ iꞌna̱ꞌ nimán níꞌ nu̱ꞌ cavii nu̱ꞌ caꞌanj quiꞌya̱j soꞌ a.  
\v 10 Ne̱ vaa cheꞌé xca̱j níꞌ cuentá se vaa ne cara̱a̱ cochro̱j níꞌ rihaan Diose̱ asino ya̱a̱n maꞌ. Tana̱nj asino ya̱a̱n me se cunuu ꞌe̱e̱ rá Diose̱ niꞌya̱j Diose̱ man níꞌ, ga̱a ne̱ caꞌnéé soꞌ man taꞌníí soꞌ cheꞌé rej cavi̱ꞌ taꞌníí soꞌ ne̱ tinavi̱j taꞌníí soꞌ cacunꞌ tumé níꞌ a.  
\v 11 Ne̱ cheꞌé se cunuu ꞌe̱e̱ rá Diose̱ man níꞌ roꞌ, cheꞌé dan no̱ xcúún níꞌ cunu̱u ꞌe̱e̱ rá níꞌ man tuviꞌ níꞌ, tinu̱j, nocoj.  
\v 12 A̱ doj yuvii̱ ne queneꞌe̱n rihaan man Diose̱ nu̱ꞌ cavii nu̱ꞌ caꞌnaꞌ maꞌ. Tza̱j ne̱ sese ga̱a̱ ꞌe̱e̱ rá níꞌ man tuviꞌ níꞌ, ne̱ ya̱ ne Diose̱ ga̱ níꞌ, ne̱ a̱j cunuu sa̱ꞌ nimán níꞌ nda̱a vaa guun rá Diose̱ ga̱a cunuu ꞌe̱e̱ rá Diose̱ man níꞌ a. 
\p  
\v 13 Dan me se cheꞌé se rqué Diose̱ Nimán Diose̱ rihaan níꞌ roꞌ, cheꞌé dan neꞌen níꞌ se vaa si̱j noco̱ꞌ man Diose̱ me níꞌ ne̱ yoꞌo̱ ne soꞌ nimán níꞌ a.  
\v 14 Ne̱ a̱j neꞌen núj se vaa caꞌnéé Rej níꞌ Diose̱ man taꞌníí soꞌ rihaan chumii̱ nihánj cheꞌé rej ti̱nanii soꞌ man nij síí ma̱n rihaan chumii̱ nihánj rihaan sayuun, ne̱ a̱j nataꞌ núj nana̱ yoꞌ rihaan yuvii̱ ei.  
\v 15 Ne̱ síí taj rihaan tuviꞌ se vaa taꞌníí Diose̱ me Jesucristó roꞌ, soꞌ me síí ꞌo̱ nocoꞌ man Diose̱, ne̱ ꞌo̱ ne Diose̱ ga̱ soꞌ chugua̱nj.  
\v 16 Ne̱ a̱j neꞌen núj se vaa ꞌe̱e̱ rá Diose̱ man níꞌ, ne̱ amán rá núj se vaa ꞌe̱e̱ rá soꞌ man níꞌ ei. 
\p Diose̱ me síí ꞌe̱e̱ rá man níꞌ ei. Ne̱ si̱j ꞌo̱ ꞌe̱e̱ rá man tuviꞌ roꞌ, soꞌ me síí ꞌo̱ nocoꞌ man Diose̱, ne̱ ꞌo̱ ne Diose̱ ga̱ soꞌ ei.  
\v 17 Ne̱ cheꞌé dan sese ꞌe̱e̱ rá níꞌ man tuviꞌ níꞌ, ne̱ asa̱ꞌ quisíj güii caꞌne̱ꞌ Diose̱ cacunꞌ cheꞌé yuvii̱, ne̱ se̱ cuchuꞌviꞌ níꞌ maꞌ. ꞌO̱ se queneꞌe̱n níꞌ se vaa ase vaa quiꞌyaj Jesucristó ga̱a va̱j soꞌ rihaan chumii̱ nihánj roꞌ, da̱nj quiꞌyaj maꞌa̱n níꞌ uún ado̱nj.  
\v 18 Cheꞌé dan síí ya̱ ya̱ ꞌe̱e̱ rá man tuviꞌ roꞌ, a̱ doj ne chuꞌviꞌ soꞌ maꞌ. Síí chuꞌviꞌ me síí uun rá se vaa quiꞌya̱j Diose̱ sayuun man soꞌ, ne̱ nuveé si̱j ya̱ ya̱ ꞌe̱e̱ rá man tuviꞌ me síí guun da̱nj rá maꞌ.  
\v 19 Dan me se ꞌe̱e̱ rá níꞌ man tuviꞌ níꞌ cheꞌé se asino cunuu ꞌe̱e̱ rá maꞌa̱n Diose̱ man níꞌ a.  
\v 20 Ne̱ sese cata̱j yoꞌo̱ soꞌ se vaa aráj cochro̱j soꞌ rihaan Diose̱, ne̱ sese nachriꞌ soꞌ niꞌya̱j soꞌ tinúú soꞌ, ne̱ síí ne̱ me soꞌ ei. ꞌO̱ se sese ruviꞌ ya̱ tinúú soꞌ niꞌya̱j soꞌ tza̱j ne̱ ne ꞌe̱e̱ rá soꞌ man tinúú soꞌ, ne̱ asa̱ꞌ caꞌve̱e cara̱a̱ cochro̱j soꞌ rihaan Diose̱, sese ne ruviꞌ Diose̱ niꞌya̱j soꞌ ga̱.  
\v 21 Ne̱ nihánj me nana̱ cataj xnaꞌanj Jesucristó rihaan níꞌ, ne̱ cataj soꞌ se vaa síí aráj cochro̱j rihaan Diose̱ roꞌ, no̱ xcúún soꞌ ga̱a̱ ꞌe̱e̱ rá soꞌ man tuviꞌ soꞌ uún ado̱nj, taj Jesucristó a. 
\c 5  
\p  
\v 1 Cunuda̱nj nij síí amán rá se vaa me Jesucristó síí caꞌnéé Diose̱ ti̱nanii man yuvii̱ rihaan sayuun roꞌ, a̱j cunuu sa̱ꞌ nimán nij soꞌ, quiꞌyaj Diose̱ chugua̱nj. Ne̱ cheꞌé dan sese aráj cochro̱j níꞌ rihaan Diose̱, ne̱ no̱ xcúún níꞌ ga̱a̱ ꞌe̱e̱ rá níꞌ man nij síí cunuu sa̱ꞌ nimán yoꞌ ei.  
\v 2 Ne̱ sese aráj cochro̱j níꞌ rihaan Diose̱, ne̱ sese uno níꞌ nana̱ cataj xnaꞌanj Diose̱ rihaan níꞌ, ne̱ veé síí aráj cochro̱j rihaan taꞌníí Diose̱ me uún níꞌ ado̱nj.  
\v 3 Ne̱ sese uno níꞌ nana̱ cataj xnaꞌanj Diose̱ rihaan níꞌ, ne̱ si̱j aráj cochro̱j rihaan Diose̱ me níꞌ chugua̱nj. 
\s1 Nana̱ nihánj taj xnaꞌanj se vaa sese cuchuma̱n rá níꞌ ni̱ꞌyaj níꞌ man Jesucristó, ne̱ quiꞌya̱j canaán níꞌ rihaan se nij ma̱n rihaan chumii̱ nihánj a 
\p Ne̱ ne sayu̱u̱n vaa cuno̱ níꞌ rihaan Diose̱ maꞌ.  
\v 4 ꞌO̱ se cunuda̱nj nij síí cunuu sa̱ꞌ nimán quiꞌyaj Diose̱ roꞌ, quiꞌya̱j canaán nij soꞌ rihaan se nij ma̱n rihaan chumii̱ nihánj, ne̱ cheꞌé se amán rá níꞌ niꞌya̱j níꞌ man Jesucristó roꞌ, cheꞌé dan a̱j quiꞌyaj canaán níꞌ rihaan chumii̱ nihánj na̱nj ei.  
\v 5 Dan me se síí amán rá se vaa Jesucristó me taꞌníí Diose̱ roꞌ, soꞌ me síí ꞌyaj canaán rihaan se nij ma̱n rihaan chumii̱ nihánj ado̱nj. 
\p  
\v 6 Nihánj me Jesucristó síí caꞌnaꞌ cata̱ꞌ ne, ne̱ ꞌo̱ se ne caꞌna̱ꞌ soꞌ cata̱ꞌ ne u̱u̱n soꞌ maꞌ. Dan me se caꞌnaꞌ soꞌ cata̱ꞌ ne soꞌ, ne̱ caꞌnaꞌ soꞌ cavi̱ꞌ soꞌ cheꞌé níꞌ uún ado̱nj. ꞌO̱ se Nimán Diose̱ me se taj xnaꞌanj Nimán Diose̱ rihaan níꞌ, ne̱ amán ya̱ rá níꞌ, ése̱ ya̱ uxrá aꞌmii Nimán Diose̱ ado̱nj.  
\v 7 ꞌO̱ se vaꞌnu̱j nij rasu̱u̱n taj xnaꞌanj rihaan níꞌ cheꞌé Jesucristó ei.  
\v 8 Dan me se Nimán Diose̱ taj xnaꞌanj rihaan níꞌ cheꞌé Jesucristó, ne̱ cheꞌé se cataꞌ ne Jesucristó, cheꞌé dan xcaj níꞌ cuentá cheꞌé soꞌ, ne̱ cheꞌé se caviꞌ Jesucristó, cheꞌé dan xcaj níꞌ cuentá cheꞌé soꞌ, ne̱ cuya̱a̱n aꞌmii vaꞌnu̱j nij rasu̱u̱n yoꞌ a.  
\v 9 Dan me se uno níꞌ nana̱ nataꞌ tuviꞌ níꞌ síí ma̱n rihaan chumii̱ nihánj rihaan níꞌ, ne̱ cheꞌé dan vaa cheꞌé cuno̱ níꞌ nana̱ nataꞌ Diose̱ rihaan níꞌ a. ꞌO̱ se sa̱ꞌ doj vaa Diose̱ rihaan yuvii̱, ne̱ nataꞌ soꞌ rihaan níꞌ cheꞌé taꞌníí soꞌ a.  
\v 10 Dan me se síí amán rá niꞌya̱j man taꞌníí Diose̱ roꞌ, soꞌ me síí cuno se‑na̱na̱ Diose̱ a. Tza̱j ne̱ síí naꞌvej rá cuchuma̱n rá se‑na̱na̱ Diose̱ roꞌ, soꞌ me síí uun rá se vaa síí ne̱ me Diose̱ a. ꞌO̱ se ne cuchuma̱n rá soꞌ nana̱ nataꞌ Diose̱ rihaan soꞌ cheꞌé taꞌníí Diose̱ maꞌ.  
\v 11 Ne̱ nana̱ nataꞌ Diose̱ rihaan níꞌ taj se vaa caꞌve̱e ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj, quiꞌyaj Diose̱, cheꞌé rej caviꞌ taꞌníí Diose̱ cheꞌé níꞌ a.  
\v 12 Síí noco̱ꞌ man taꞌníí Diose̱ me síí ca̱yáán ga̱ Diose̱ nu̱ꞌ cavii nu̱ꞌ caꞌanj ya̱ ei. Tza̱j ne̱ síí naꞌvej rá canoco̱ꞌ man soꞌ taj maꞌ. Se̱ cayáán soꞌ ga̱ Diose̱ maꞌ. 
\s1 Nana̱ nihánj taj xnaꞌanj se vaa xca̱j níꞌ cuentá se vaa caꞌve̱e ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj a 
\p  
\v 13 Dan me se a̱j cachronj nana̱ nihánj naya̱a̱ nij soj, cheꞌé rej queneꞌe̱n soj se vaa ca̱yáán soj ga̱ Diose̱ nu̱ꞌ cavii nu̱ꞌ caꞌanj, cheꞌé rej me soj síí amán rá niꞌya̱j man taꞌníí Diose̱ ei.  
\v 14 Ne̱ cuano̱ nihánj me se a̱ doj ne chuꞌviꞌ níꞌ cachi̱nj niꞌya̱j níꞌ ꞌo̱ rasu̱u̱n rihaan Diose̱ a̱ maꞌ. ꞌO̱ se a̱j neꞌen ya̱ níꞌ se vaa sese caꞌve̱j rá soꞌ ni̱caj níꞌ rasu̱u̱n cachíín niꞌya̱j níꞌ rihaan soꞌ, ne̱ rque̱ soꞌ ado̱nj.  
\v 15 Ne̱ cheꞌé se neꞌen níꞌ se vaa cuno̱ soꞌ me maꞌa̱n nana̱ cachi̱nj niꞌya̱j níꞌ rihaan soꞌ, cheꞌé dan neꞌen níꞌ se vaa quiꞌya̱j soꞌ nda̱a vaa cachi̱nj niꞌya̱j níꞌ rihaan soꞌ ei. 
\s1 Nana̱ nihánj taj xnaꞌanj cheꞌé cacunꞌ a 
\p  
\v 16 Dan me se sese neꞌen níꞌ tinúú níꞌ ꞌyaj soꞌ me maꞌa̱n cacunꞌ, ne̱ cachi̱nj niꞌya̱j níꞌ cheꞌé soꞌ rihaan Diose̱, ne̱ Diose̱ me síí cara̱a̱ xꞌnaa cheꞌé cacunꞌ quiꞌyaj soꞌ ado̱nj. Tza̱j ne̱ sese neꞌen níꞌ man tinúú níꞌ ꞌyaj soꞌ cacunꞌ noco̱o ndoꞌo cacunꞌ quiꞌya̱j cavi̱ꞌ nu̱ꞌ soꞌ rihaan Diose̱, ne̱ taj cheꞌé cachi̱nj niꞌya̱j níꞌ rihaan Diose̱ cheꞌé soꞌ a̱ maꞌ. Dan me se vaa cacunꞌ u̱u̱n, ne̱ vaa cacunꞌ noco̱o ndoꞌo quiꞌya̱j cavi̱ꞌ nu̱ꞌ níꞌ rihaan Diose̱ ado̱nj. Tza̱j ne̱ cheꞌé cacunꞌ noco̱o yoꞌ me se se̱ cachíín niꞌya̱j soj mei.  
\v 17 Dan me se me maꞌa̱n se nij ꞌyaj níꞌ me cacunꞌ chugua̱nj. Tza̱j ne̱ se̱ caviꞌ nu̱ꞌ níꞌ rihaan Diose̱ quiꞌya̱j me maꞌa̱n cacunꞌ yoꞌ maꞌ. ꞌO̱ se caꞌve̱e tinavi̱j Diose̱ cacunꞌ yoꞌ ei. 
\p  
\v 18 Dan me se neꞌen níꞌ se vaa nu̱ꞌ nij síí caꞌngaa nimán quiꞌyaj Diose̱ roꞌ, daj chiha̱a̱ míj ne chéé nij soꞌ xrej síí chre̱e maꞌ. ꞌO̱ se tumé taꞌníí Diose̱ man nij soꞌ, ne̱ se̱ caꞌvee quiꞌya̱j chiꞌi̱i̱ síí chre̱e man nij soꞌ a.  
\v 19 Ne̱ neꞌen níꞌ se vaa síí noco̱ꞌ man Diose̱ me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj nocoꞌ man síí chre̱e ei.  
\v 20 Ne̱ neꞌen níꞌ se vaa a̱j caꞌnaꞌ taꞌníí Diose̱, ne̱ quiꞌyaj suun soꞌ cheꞌé níꞌ, cheꞌé rej caꞌve̱e xca̱j níꞌ cuentá cheꞌé Diose̱ ya̱, ne̱ neꞌen níꞌ se vaa me níꞌ síí noco̱ꞌ man maꞌa̱n ya̱ taꞌníí soꞌ Jesucristó, ne̱ Jesucristó roꞌ, me maꞌa̱n ya̱ Diose̱, ne̱ soꞌ me síí quiꞌya̱j ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj ado̱nj. 
\p  
\v 21 Ase vaa taꞌníj vaa nij soj rihanj, tinu̱j, nocoj. Dan me se cata̱j ꞌu̱nj rihaan soj, ne̱ cu̱tumé ndoꞌo soj man soj rihaan yaꞌanj acój yuvii̱ ma̱n rihaan chumii̱ nihánj ei. Ne̱ se̱ guun gu̱un rá soj ni̱ꞌyaj soj a̱ ꞌó rasu̱u̱n vaa da̱nj maꞌ.