\id 1TH  
\h 1 TESALONICENSES 
\toc1 Yu Xapꞌunaj Karta yu Jalaqtsꞌoqnil Pablo Ixlapanakni Dios yu Tavilanal Tesalónica 
\toc2 1 TESALONICENSES 
\toc3 1 Ts. 
\mt2 Yu Xapꞌunaj Karta yu Jalaqtsꞌoqnil Pablo Ixlapanakni Dios yu Tavilanal Tesalónica 
\c 1  
\s1 Ni Pablo jalakmastakꞌay ixlapanakni Dios yu tavilanal Tesalónica 
\p  
\v 1 Yu kijnankꞌan, ni Pablo ali Silvano ali Timoteo, aniy klatsꞌoqniyau taun chivinti uxiknan yu ixlapanakni kimPay Dioskꞌan ali kiJalhachimoꞌonukꞌan Jesucristo yu vilanantꞌik laka putaulan Tesalónica. Katamapaynin y oxamaktaun katamakan. 
\p  
\v 2 Va tacha ikxtaqniꞌalhiyaucha lhimalaqpuchuncha ni Dios por tachun uxiknan. Tejkan iktapayniniyau ni Dios vachu si klalhitapayniyau por uxiknan.  
\v 3 Tejkan iktꞌachivinanau kimPay Dioskꞌan va klapastakniyau yu makꞌaniyatꞌik ni Dios por milhakapuꞌatkꞌan. Vachu yu makꞌayatꞌik por ayaj achꞌaniyatꞌik ni Dios, vachuꞌ ox maqantꞌaqniyatꞌik y pꞌakxanꞌiyatꞌik ni kaminchoqoyaꞌ kiJalhachimoꞌonukꞌan Jesucristo.  
\v 4 Ketꞌalaqaunin yu Dios tapaxkatan, ijkꞌatsayau ni Dios talaksaktan.  
\v 5 Tejkan klalaqputeꞌeniu ni ox chivinti, jantu valiꞌiy chivinti kaval. Va kun ixtapꞌasta ni Dios ali ni Espíritu Santo ox tamakꞌatsanin ni va laqsaval. Kꞌatsꞌayatꞌik tejkan xaklatꞌavilanau va para klaꞌaqtayjuu ni uxiknan. 
\p  
\v 6 Aqtꞌaynitꞌik tiꞌukxuntayaniy tacha kijnankꞌan y tacha ni kiJalhachimoꞌonukꞌan. Laꞌaꞌitꞌik ni ox chivinti kun achati yu xtaꞌa ni Espíritu Santo mas yu alati ixtamamaqanlqajnivayan.  
\v 7 Ex tachun yu talhakapuꞌan yu tavilanal xaꞌestado Macedonia kun Akaya, yuꞌuncha lay talaqtsꞌiꞌiyan tas maqskꞌiniy katatijuntayal.  
\v 8 Ixchivinti kiJalhachimoꞌonukꞌan va minchal kun uxiknan y talaqpuꞌayal xaꞌestado Macedonia ali Akaya. Vachu takꞌatsaꞌol ni lapanakni taꞌakapuchun ni ox lhakꞌapꞌupꞌinatꞌik ni Dios. Ex chuncha jantucha maqskꞌiniy kajkamakꞌatsanil ni lapanakni tas untꞌatꞌikcha.  
\v 9 Va yuꞌuncha kintajunan ni ox kilalaqaꞌiu y makꞌauntꞌik yu midioseskꞌan yu tamakay lapanakni. Va tꞌapꞌatsꞌaniyatꞌik ni Dios yu laqsaval kujta.  
\v 10 Vachu pꞌakxanꞌiyatꞌik ni kaminchoqotachal laktꞌiyan Sasꞌatꞌa ni Dios yu majkujuchoqol la ixlhinin. Yucha ni Jesús yu kintamalaqtaxtuyan la ixlhilukuj ni Dios yu kaꞌalina. 
\c 2  
\s1 Ni lhitapatsa yu makal Pablo laka Tesalónica 
\p  
\v 1 Ketꞌalaqaunin, kꞌatsꞌayatꞌik ni tejkan klalaqkilau jantu valiꞌiy kaval.  
\v 2 Laka putaulan Filipos ikmaqanlqajnau y klaktanchanikau pero klajuniu ni ox chivinti yu kintaxtaqnin Dios. Yucha kintamaꞌayajnin, xlhiyucha klaqputeꞌeu mas kintaxkajin ni lapanakni.  
\v 3 Tejkan klaxaqalau va klajuniu yu laqsaval. Jantu klajuniu yu jantu ox kaval y jantu klamakanuu.  
\v 4 Ni Dios ox lhilay kilhitapatsakꞌan xlhiyucha kintamalaqachan puteꞌenin ni ox chivinti. Xlhiyucha jantu ikputeꞌeyau para katalhipaꞌinil ni lapanakni, va para kalhipaꞌinil ni Dios yu kintalaqtsꞌintanuniyan kelhanutkꞌan.  
\v 5 Kꞌatsꞌayatꞌik ni jantu aqtaun klaxaqalau kun valiꞌiy kꞌus chivinti para kalhiꞌachꞌantꞌaꞌutꞌik, vachu jantu klamakanuu kun chivinti para kaklhajau tumin. Ni Dios yucha kꞌatsaycha.  
\v 6 Jantu kaknajuu kilatoꞌoyau uxiknankꞌan vachu jantu kaknajuu kintatoꞌoyan alati lapanakni, mas lay kaknajuu kaktoꞌoyakau va por ixtamalaqachan Cristo kuntau.  
\v 7 Ni kijnankꞌan va laka laksniy kꞌukxuyanau kun uxiknan vachu va tacha qayntaun ox xanati laklhistakꞌa sasꞌatꞌan.  
\v 8 Va ayaj ox klapaxkau. Xlhiyucha jantu vamun klaxtaqniu ni ox chivinti, va klaxtaqniu tus la ketsukuntikꞌan, va por ayaj klaꞌachaniu.  
\v 9 Ketꞌalaqaunin, pꞌastꞌakꞌatꞌik yu lhitaꞌay lhitapatsa yu ikmakau. Va iktapatsau tsꞌis, tunkuj para kaꞌalil yu xakmaqskꞌiniyau. Va para jantu klamaqanchapuu tejkan xaklalaqputeꞌeniyau ni ox chivinti yu lhinajun Dios. 
\p  
\v 10 Uxiknankꞌan kꞌatsꞌayatꞌik y vachu yu Dios kꞌatsay ni xaktiꞌukxuyanau tacha paxtoqniy ixlapanakni Dios. Vas xakꞌukxuyanau, jantu tuꞌuchun laqtaqal xakmakayau.  
\v 11 Klaxtaqniu jatapastakꞌati y klamalakaꞌulau tachun uxiknan vachu va tacha qayntaun xapay kun sasꞌatꞌan.  
\v 12 Klalhixaqalau katꞌiꞌukxuntꞌayatꞌik tacha paxtoqniy yu ixnavin Dios. Yucha tajuntaꞌiyan para kꞌatꞌanutꞌik taꞌan lhachimoꞌonun taꞌan tasuy kun tachun ixꞌayaxtu.  
\v 13 Xlhiyucha va tacha ikxtaqniyau lhimalaqpuchuncha ni Dios. Tejkan asmaktꞌik ni chivinti yu klalaqputeꞌeniu va laꞌaꞌitꞌik jantu tacha valiꞌiy ixchivinti lapanakni. Va laꞌaꞌitꞌik tacha yu laqsaval ixchivinti Dios. Yucha taꞌaqtayjuyan la metsukuntikꞌan yu lhakꞌapꞌupꞌinatꞌik.  
\v 14 Uxiknan, ketꞌalaqaunin, aqtꞌaynitꞌik tiꞌukxuntayaniy vachu va tacha yu alati ixlapanakni Dios xalakatꞌun Judea yu talhakapuꞌan Jesucristo. Uxiknan maꞌanlꞌajnantꞌik la ixtamakakꞌan mintꞌamachaqankꞌan vachu va tacha ancha Judea ixtꞌaꞌisraelitaskꞌan tamaqanlqajnal.  
\v 15 Yuꞌuncha tamaqnil ni kiJalhachimoꞌonukꞌan Jesucristo y jalaqmaqnil yu maqancha ixtalaqputeꞌey ixchivinti Dios. Vachuꞌ kintatixkaulhaꞌan. Jantu lhipaꞌiniy ni Dios yu tamakay, va taxkajiy tachun ni lapanakni.  
\v 16 Laqatapꞌasta tamakay para jantu lay kaklaqputeꞌeniu tas lay katapulaqtaxtul yu lapanakni yu jantu israelitas kataval. Ex chuncha yu anchanu israelitas yu jantu talhakapuꞌan va apalay talhavay ixlaqtaqalkꞌan. Pero chavaycha ni Dios laqtalqauniycha. 
\s1 Ni Pablo laqꞌuxaꞌanchoqoy yu machaqan Tesalónica 
\p  
\v 17 Ketꞌalaqaunin, jantukaꞌ maqan jun tejkan klamakajuu. Mas jantu klatꞌataulau pero va chꞌantaun kelhanutkꞌan. Kmakau laqatapꞌasta para kaklalaqꞌanchoqoo. Ayaj xaknaunau klalaqapulaqtsꞌinchoqoo pero jantu kalal.  
\v 18 Va xaklalaqꞌuxaꞌanchoqoyau. Ni kitꞌin Pablo aqlhuvaj xakꞌuxaꞌanachal pero ni Satanás makal para jantu lay kajkꞌanchaꞌau.  
\v 19 Va ikpakxanꞌiyau ni achati ali ayaxtu yu kaklhajayau. ¿Valiꞌiycha kaklalhiꞌachantajuyau y ox kajkꞌatsanau? Va por ox kaꞌunapitik anchanu julchan tejkan kaminchoqoyaꞌ ni kiJalhachimoꞌonukꞌan Jesús.  
\v 20 Chuncha va ox ijkꞌatsanau y kꞌachanau por uxiknan. 
\c 3  
\p  
\v 1 Va keꞌemankꞌan iktamakajuu laka putaulan Atenas, pero jantucha xaktayaniyau por ayaj xaklalaqꞌuxaꞌanau.  
\v 2 Ex chuncha ikmalaqachau katalaqꞌan kilaqajkꞌan Timoteo. Yucha ixꞌoqxtamati Dios y kintatꞌatapatsayan para kalaqputeꞌekal yu ox chivinti yu lhichiviniy Cristo. Ikmalaqachau para kataxaqalan para apalay ox kaval milhakapuꞌatkꞌan.  
\v 3 Ex jantu matichun lay katamamakaunin milhakapuꞌatikꞌan por yu jamaqanlqajnati. Kꞌatsꞌayatꞌikcha ni kintapaxtoqniyan jamaqanlqajnati.  
\v 4 Tejkan ancha xaklatꞌavilanau va xaklajunau ni kaꞌalinaꞌ taun maqanlqajnati. Kꞌatsꞌayatꞌikcha ni va chuncha val.  
\v 5 Ayaj xaklalaqꞌuxaꞌanau va tus jantucha lay kaktayanil, va klamalaqachaniu ni Timoteo para kajkꞌatsal tas junitacha milhakapuꞌatikꞌan. Xaktalhananau incha katamakanun ni aqmoqxnuꞌ, ex valiꞌiy kaval kilhitapatskꞌan kun uxiknankꞌan. 
\p  
\v 6 Pero chavaycha va chinchoqol ni Timoteo. Lhimil taun ox chivinti va kintajunan va la ox alintꞌatꞌik por milhakapuꞌatkꞌan ali mijapaxkantikꞌan. Vachu kintajunan va kilapastakꞌau kijnankꞌan y ayaj kilalaqtsꞌinputunau vachu va chun tacha kijnankꞌan klalaqtsꞌinputunau ni uxiknankꞌan.  
\v 7 Xlhiyucha, ketꞌalaqaunin, mas va lhitaꞌaycha iktapasayau y ikmaqanlqajnanau, va oxamaktaun ijkuu tejkan ijkꞌatsau ni ox milhakapuꞌatkꞌan.  
\v 8 Chavaycha klhiꞌachantajuyau ni ox tꞌaylhipꞌintꞌatꞌik kun ni kiJalhachimoꞌonukꞌan Dios.  
\v 9 Va ikxtaqniyau lhimalaqpuchuncha ni Dios por uxiknan y ayaj klalhiꞌachantajuyau tejkan ikskꞌinau Dios.  
\v 10 Mas va putsꞌis mas va tunkuj, va ikskꞌinau Dios para lay kaklalaqtsꞌinchoqoo y kaklaꞌaqtayjuu yu vananaj tsꞌanqay la milhakapuꞌatkꞌan.  
\v 11 Chavaycha va iknaunau kintaꞌaqtayjun ni kimPay Dioskꞌan ali kiJalhachimoꞌonukꞌan Jesucristo para kaklalaqꞌanchoqoo.  
\v 12 Vachu ikskꞌinau ni Jalhachimoꞌonu para apalay ox kalapꞌaxkꞌatꞌik y vachu ox kꞌalakpꞌaxkꞌatꞌik tachun ni lapanakni, vachu va chun tacha kijnankꞌan klapaxkayau.  
\v 13 Ex chuncha lay katꞌayanitꞌik y la melhanutkꞌan, jantu kaꞌalil tuꞌuchun laqtaqal. Chuncha katalaqaꞌiyan kimPay Dioskꞌan tejkan kaminchoqoyaꞌ ni kiJalhachimoꞌonukꞌan Jesucristo kun tachun ixlapanakni. 
\c 4  
\s1 Ni putsuku yu lhipaꞌiniy Dios 
\p  
\v 1 Chavay, ketꞌalaqaunin, klalhijunau y klatapayniniyau por kiJalhachimoꞌonukꞌan Jesús ni katꞌiꞌukxuntꞌayatꞌik tacha klamasuniu. Maqskꞌiniy katꞌiꞌukxuntꞌayatꞌik tacha kalhipaꞌinil ni Dios. Chuncha katꞌaylhipꞌintꞌik tacha tꞌiꞌukxuyanantꞌik pero chavay apalay ox kꞌamakꞌatꞌik.  
\v 2 Kꞌatsꞌayatꞌik yu klalhijuniu la ixtaqaꞌuti ni kiJalhachimoꞌonukꞌan Jesús.  
\v 3 Dios najun ni katꞌatꞌiꞌukxuntꞌayatꞌik tacha paxtoqniy ixlapanakni Dios. Jantu katꞌatꞌamatꞌik matichun yu jantu minavinkꞌan.  
\v 4 Kꞌamispꞌatꞌik tacha maqskꞌiniy kꞌalhitsꞌukꞌu mixanati para ixnavin Dios kꞌaꞌuntꞌik y ox katꞌoꞌoyatꞌik.  
\v 5 Jantu valiꞌiy kꞌamakꞌatꞌik yu makꞌapꞌutꞌunatꞌik la milakatunajkꞌan tacha tamakay yu jantu tamispay Dios.  
\v 6 Ex chuncha jantu matichun kamakanumaxtunil yu ixnavin ixlaqaj. Ni kiJalhachimoꞌonukꞌan kalaqmamaqanlqajnivayaꞌ yu chuncha talay. Va chuncha klalhixaqalau y chuncha klalhichimoꞌoo.  
\v 7 Ni Dios jantu kintajuntaꞌin para kalaktuꞌunuu, va kintajuntaꞌin ni katiꞌukxuntayau tacha paxtoqniy ixlapanakni.  
\v 8 Yu akchꞌintamay ni aniy chivinti yucha jantu lapanaki akchꞌintamay. Yucha akchꞌintamay Dios yu kintaxtaqnin ni Espíritu Santo. 
\p  
\v 9 Jantu maqskꞌiniy klatsꞌoqniyau para kꞌalapꞌaxkꞌatꞌik mintꞌalaqauninkꞌan. Ni Dios yucha tamalanin para kꞌalapꞌaxkꞌatꞌik.  
\v 10 Laqsaval ayaj japꞌaxkꞌayatꞌik tachun mintꞌalaqauninkꞌan yu xalakatꞌun Macedonia. Pero klalhitapayniyau ni apalay kapꞌaxkꞌanantꞌik.  
\v 11 Oxamaktaun kꞌalatꞌatꞌaulatꞌik, kꞌamakꞌatꞌik milhitapatsakꞌan yu tapaxtoqniyan, kꞌatꞌapꞌatsꞌatꞌik la mimakakꞌan tacha yu klajuntau.  
\v 12 Ex chuncha katatoꞌoyayan yu jantu talhakapuꞌan y jantu tuꞌuchun katatsꞌanqaniyan. 
\s1 Kaminchoqoyaꞌ ni Jesucristo 
\p  
\v 13 Ketꞌalaqaunin, va iknaunau kakꞌatsꞌatꞌik tisuncha tatapasay yu jantucha katakujlhi para jantu kamaꞌaninintꞌik tacha lapanakni yu jantu tuꞌuchun tapakxanꞌiy.  
\v 14 Va lhakapuꞌanau ni Jesús va nil y kujchoqol. Vachu va chun lhakapuꞌanau ni Dios kalaklhiminaꞌ tachun yu tanitacha yu ixtalhakapuꞌan Jesús.  
\v 15 Xlhiyucha klajunau yu naul ni kiJalhachimoꞌonukꞌan. Ni kijnankꞌan yu vananaj tꞌaunau tejkan kaminchoqoyaꞌ ni Jesús jantu kapꞌulayau kun yu tanitacha.  
\v 16 Ni kiJalhachimoꞌonukꞌan kaminanta laktꞌiyan, kamatꞌasananaꞌ y yu xaꞌukxtin ixmayulnin la pꞌas kachivinaꞌ y kasqolkanaꞌ isqol Dios. Ex chuncha pꞌunaj yu tanitacha yu talhakapuꞌal ni Cristo yuꞌuncha katakujꞌelayaꞌ.  
\v 17 Ex kijnankꞌan yu vananaj kujtau vachu kalhaꞌankanau chꞌantaun kun yuꞌuncha laka taputsꞌi. Ex chuncha kapaxtoꞌau ni kiJalhachimoꞌonukꞌan laktꞌiyan. Ex mas va tavanancha katꞌaꞌalinau ni kiJalhachimoꞌonukꞌan.  
\v 18 Xlhiyucha kalamalakꞌaꞌulatꞌik kun yu aniy chivinti. 
\c 5  
\p  
\v 1 Jantu maqskꞌiniy kaklatsꞌoqniu tavanancha chuncha katapasayaꞌ u tas kunacha.  
\v 2 Ox kꞌatsꞌayatꞌikcha ni jantu lhikꞌatsan tavanancha kaminaꞌ ni kiJalhachimoꞌonukꞌan. Ni anchanu julchan vachu va tacha qayntaun alhavanaꞌ yu min laka putsꞌisni.  
\v 3 Tejkan tanajun ni lapanakni: “Oxamaktaun juntau, jantu tuꞌuchun kaꞌalinaꞌ”, exnicha kalaktꞌilhiꞌokanaꞌ. Va kunaꞌ vachu va tacha tejkan qayntaun xanati yu maqlaqavananputun. Jantucha kaꞌalina toꞌoxtaycha katapuqoslhi.  
\v 4 Pero uxiknankꞌan, ketꞌalaqaunin, jantucha tꞌiꞌukxuyanantꞌik taꞌan putsꞌista. Tejkan kaminaꞌ ni anchanu julchan jantu vak kakꞌatsꞌanapitik tacha kamil qayntaun alhavanaꞌ.  
\v 5 Uxiknankꞌan va tacha alintꞌatꞌik laka jatunkunuꞌ va por malaꞌasiyatꞌik ixchivinti Dios. Jantu kajuu tacha yu taꞌukxuyanal laka putsꞌisni yu jantu talhakapuꞌan ni Dios.  
\v 6 Xlhiyucha jantu maqskꞌiniy kaltatau la kijatapastakꞌatkꞌan tacha yu jantu talhakapuꞌan. Maqskꞌiniy kakujvi y ox kalakpastaknau tacha yu laqa aqstunkuj lapanakni.  
\v 7 Yu jantu talhakapuꞌan Dios va tacha ni lapanakni yu taltatay laka putsꞌisni. Jantu takꞌatsay suncha katapasayaꞌ. Vachu va tacha lapanakni yu tataꞌapꞌay laka putsꞌisni. Jantu takꞌatsay yu tamakay.  
\v 8 Pero kijnankꞌan va alintau laka jatunkunuꞌ. Xlhiyucha maqskꞌiniy ox kalakpastaknau tacha yu laqa aqstunkuj lapanakni. Ox kapaxkanau y ox kalhakapuꞌau ni Dios, va tacha kaꞌulau kilaqchꞌitkꞌan yu tsasnati para jantu lay katꞌalkau. Vachu maqskꞌiniy ox kapakxanꞌiu kalaqtaxtuu, va tacha kꞌaqtanuu tsasnati para jantu lay katꞌalkau.  
\v 9 Ni Dios jantu najun kamaqanlqajnau la ixlhilukuj, va najun katalaqtaxtuu por yu makal ni Jalhachimoꞌonu Jesucristo.  
\v 10 Yucha nil por kijnankꞌan para katꞌataultachaꞌau kun yucha tejkan kaminchoqoyaꞌ, mas va kakujvi u mas va kaniu.  
\v 11 Ex chuncha kun yu aniy chivinti kalamakꞌuvilatꞌik y kꞌalamaꞌayajnitꞌik la milhakapuꞌatkꞌan vachu va tacha tꞌaunatꞌik makanan. 
\s1 Ni Pablo jaxaqalay ixlapanakni Dios 
\p  
\v 12 Ketꞌalaqaunin, klatapayniniyau kalaktꞌoꞌoyatꞌik yu ayaj tatapatsay kun uxiknan. Talhijunan tacha najun ni Jalhachimoꞌonu Jesús y taxtaqniyan jatapastakꞌati.  
\v 13 Va ox kalaktꞌoꞌoyatꞌik y kalakpꞌaxkꞌatꞌik por ni lhitapatsa yu tamakaniyan. Laqa lajꞌoxi kaꞌalintꞌik.  
\v 14 Ketꞌalaqaunin, vachu klalhijunau kꞌalaqxtꞌaqnitꞌik jatapastakꞌati yu jantu tatapatsay, kꞌalakmaꞌayajnitꞌik yu tatalhanan, kalaqꞌaqtꞌayꞌutꞌik yu tatsꞌanqaniy tapꞌasta la ixjatsukuntikꞌan y kamaꞌantꞌaulnitꞌik tachun ni lapanakni.  
\v 15 Kꞌalhistꞌajkꞌantꞌik. Jantu tuꞌuchun kꞌamakꞌanichꞌoꞌotꞌik yu tamakaniyan yu jantu lajꞌoxi. Kꞌalamakꞌaniꞌalhitꞌik yu lajꞌoxi siya uxiknan y vachu kun tachun yu alati lapanakni.  
\v 16 Kaꞌachꞌanꞌalhitꞌik.  
\v 17 Kaskꞌinꞌalhitꞌik ni Dios.  
\v 18 Mas va tisuncha yu tapasaycha kaxtꞌaqnitꞌik lhimalaqpuchuncha ni Dios. Chuncha najun Dios kamakꞌatꞌik va por ixnavin Cristo Jesús untꞌatꞌik.  
\v 19 Jantu kalaktꞌanchꞌanitꞌik ixlhitapatsa ni Espíritu Santo.  
\v 20 Jantu kalaktꞌanchꞌanitꞌik tejkan laqputeꞌekan ixchivinti Dios.  
\v 21 Kꞌapꞌuxkꞌaulaqtsꞌintꞌik tachun ni chivinti, incha laqsaval ex ox kꞌalaꞌaꞌitꞌik.  
\v 22 Jantu kꞌatꞌanutꞌik tuꞌuchun yu jantu ox kaval. 
\p  
\v 23 Ni Dios yu lakmaꞌoxamaktamiy lapanakni va yucha katamakanin ixnavin tachun metsukuntikꞌan. Va najun katꞌaꞌayntsꞌatꞌik y jantu kaꞌalil tuꞌuchun laqtaqal la metsukuntikꞌan ali milhitsukunukꞌan ali milakatunajkꞌan tejkan kaminaꞌ kiJalhachimoꞌonukꞌan Jesucristo.  
\v 24 Dios yu tajuntaꞌitan yucha lay lhakapuꞌanikan, si makay tacha yu najun. 
\s1 Ni Pablo jalakmastakꞌachoqoy 
\p  
\v 25 Ketꞌalaqaunin, kaskꞌinitꞌik Dios para kintaꞌaqtayjun. 
\p  
\v 26 Kalakmastꞌakꞌatꞌik tachun yu talhakapuꞌan kun taun jakiltastuknuti tacha paxtoqniy yu ixnavin Dios. 
\p  
\v 27 Kitꞌin klalhijunau kun ixtapꞌasta kiJalhachimoꞌonukꞌan ni kꞌalaqpꞌutꞌeꞌenitꞌik ni aniy karta tachun yu alati ketꞌalaqauninkꞌan. 
\p  
\v 28 Katamapaynin ni kiJalhachimoꞌonukꞌan Jesucristo. Va chuncha kaval.