\id OBA - Toma Bible
\ide UTF-8
\h Aɓediyase
\toc1 Aɓediyase Ná-Sɛʋɛi
\toc2 Aɓediyase
\toc3 Aɓd
\mt1 Aɓediyase
\mt2 Ná-Sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Aɓediyase ná-GALA gooiti ka ti sɛʋɛi nii zu. Aɓediyase ná-keela wooi ɠɛni ga tukpɔɠaaleʋe wooiti Edɔme nuɓusɛiti daalɔɠɔma, Ezawu mavofodaiti. Faaɠwɛ nu wolaiti ti la Aɓediyase ná-sɛʋɛi ɠɛɛ yeeɠɛɠalai ɠwɛɛ. Kɛɛʋɛ eɠɛ tukpɔɠaaleʋei ma vaa wosu, toɠa ɓɔɛzu é lo Ɓaɓilɔne nuiti dɔɔ ziɛgi ʋa Zeluzalɛme, naama ziɛgi zu Edɔme nuiti ti la ɠɛni kɛɛni ti ʋa ɓɔ Izilayɛle nuiti ba. Ni naama be, nu ɠa ɠɛ ma sɛʋɛʋɛ kona undɔzitai (600) ma ziɛgi zu, aisa Yesu Kilista ʋa zɔlɔɔ.
\ip Tɔɔzeizuʋɛ Aɓediyase tukpɔɠaaleʋei ma vaa wogɛ Edɔme nuiti gila nɔ laalɔɠɔma, kɛlɛ ná ʋoluma é zii ɠiligiti pɛ pɛɛʋɛ ba (\xt 1:15\xt*). Gaaɓelasu, Aɓediyase ɠɛɛʋɛ, foloi ta Izilayɛle ɠɔɔ luɔiti ta ɠale ma ta-yooi zu, ta ti-zeizuʋɛti ta ve ti ya ʋolu.
\iot Unsosuʋɛ
\io1 1. Tukpɔɠaaleʋei ma vaa wogai Edɔme laalɔɠɔma (\xt 1:1-14\xt*).
\io1 2. Zii ɠiligiti pɛ tukpɔ ɠaa ɠa leʋe tɔɔzei ta-wasogi ʋa, ta Izilayɛle nuiti ta ɠale ma, nii a kɛ ti ti-zeizuʋɛti sɔlɔɔ ʋolu. Ta masadai ɠɛ vɔlɔ Edɔme yooi unda (\xt 1:15-21\xt*).
\c 1
\p
\v 1 Kulakɛlɛmai Aɓediyase sɔlɔɔni.
\p Maliɠii Ɠɔoɠɔ GALAGI wooi ɠa é ga nii, é ʋilɛ Edɔme yooi ʋa:
\q «Gi woo niinɛ mɛnigɛ, é zeɠe Ɠɔoɠɔ GALAGI ʋɔ bɛ,
\q keelai leʋegɛ zii ɠiligiti saama, é ɠɛ ma: ‹À wuzeɠe,
\q ade li, de laalɛ Edɔme nuiti bu.› »
\s Edɔme yooi ɠoloɠolo fai
\q
\v 2 «Wɛlɛ, Edɔme, nà è ɠaalɔizu ziiti saama,
\q ɠaazu unfe ge la ɠɛa è ʋɛ ɲɛgɛlɛin.
\q
\v 3 Ɗa-wasogi è ɠakaga,
\q ɗɛi è-laazuʋɛ ga fasa yeɠeiti su,
\q è zeini unga munu,
\q è ɗa ɠɛ ɓɔɠɔ ma:
\q ‹Ɓɛ ɠa a tòo bu zooi ma?›
\q
\v 4 Anɛɛ ni ɗa lɛɛzu geezu munu eɠɛ koɠɛi,
\q anɛɛ ni è-laɠagi ɠa zɛlɛsu somideɠaiti saama,
\q nà è loo bu,»
\q Ɠɔoɠɔ GALAGI wooi ɠana.
\q
\v 5 «Ni unma nuiti ta toosu nuiti ta ʋaana,
\q ti ɠula è viliba kuai,
\q nii kpein ta ziɛ bu, ti naa zeɠe,
\q ɗa ɠoloɠolo mɛtu!
\q Ni leezɛn ɠula nuiti ta ʋaana è ʋɔ bɛ,
\q kɛni ma ɠɔpɔ gilagila nɔ ɠa ta zɛ ná.
\q
\v 6 Ee! Ezawu mavofodaiti, ti wo ʋɔ bɛ zuwoga!
\q Anɛɛ wa-naavoloiti ti lɔɔɠuni, ti loa kɛlɛzu.
\q
\v 7 Niiti wa ɗa ɓɔ faa ma wa tiye, naati ti è ɓɛa ɗa-yooi ɠa.
\q È-wɔɔlaiti pɛ ti è yaavaa, ti è lɔ ta-zobogi wu.
\q Niiti wo ɠɛa daamii wosu ʋɔɔma wa tiye, naati ti balii laa è-ɠɔɠɔi wu.
\q Ti ɠɛ ma: ‹Ɠima nu nɔpɛ ge la Edɔme.›
\q
\v 8 Naama volo ná, nà ɠima nuiti pɛ undaaʋili Edɔme yooi ɠa,
\q gè la keleɠele nu ɠila kpalaa yɛga Ezawu ɠizeiti ma,»
\q Ɠɔoɠɔ GALAGI wooi ɠana.
\q
\v 9 «Ee, Teman taa wolai, ɗa-ɠɔɔɠɔ ɠuluɓaiti ta ɠɛ unga wuulee,
\q Ezawu ná-gizei ná-salaʋusuiti pɛ ta za.»
\s Nuiti daalɔɠɔma,  //  niiti ti wɔinɗai ga zɔiti ta-maanɔɠɔi
\q
\v 10 «Wo toomai woni, wo wo-ɠɛɛleaiti paa, niiti ti ɠɛni ga Zakɔɓe mavofodaiti,
\q tama, unfegi ɠa wo maaɓɔle,
\q wo ma zuwu ɠaaleʋe eyɛsu ɠɔ!
\q
\v 11 Mazɔlɔɔ è ɠɛni ná, naama yee ná,
\q yeei wɛɛinti ti ɠɛni liizu la ga ná-naavoloiti,
\q siɛgi zu wɛɛinti ti ɠɛni lɔɔzu la ná-taa wolai zu,
\q ti ɗa kpakutoomai ɠɛ,
\q ti ɗa Zeluzalɛme ɠɔɔzoganiiti gaaɠwɛ ɓɔɠɔ ʋa.
\q Wa ɓalaagi wo kɛɛni ɠana nɔ ga ti ɠɛʋele.
\q
\v 12 Edɔme, è maa la ɠɛni nɛɛni ga è ʋa ɠoozunɛ
\q è-ɠɛɛleaiti Zuda nuiti ta-maanɔɠɔ voloi.
\q Maa la ɠɛni nɛɛni ga è ʋa ɠoozunɛ,
\q ti ɠɛai ma ti ɠoloɠolosu,
\q ɓaa poomu gooi ʋa ɠɛ è la ta-ɠidaaʋili foloi.
\q
\v 13 È maa la ɠɛni nɛɛni è ʋa lɛ nà-nuɓusɛiti ta-laa wolai zu,
\q yeei ti ɠɛni ti ɠoloɠolosu da.
\q È maa la ɠɛni nɛɛni ga è ʋa ɠoozunɛ ta-maanɔɠɔi ma vaa zu,
\q yeei ti ɠɛni ti ɠoloɠolosu da.
\q È maa la ɠɛni nɛɛni è ʋa loo ta-naavoloiti su,
\q yeei ti ɠɛni ti ɠoloɠolosu da.
\q
\v 14 È maa la ɠɛni nɛɛni è lo pele zaɠalaʋɛti,
\q è ʋa ɗa kɔɔʋelaiti paa,
\q ɓaa è ʋa ɗa kɔɔʋelaiti teʋe ti zili nuiti pɔ,
\q maanɔɠɔi ma ziɛgi zu.»
\s Ɠɔoɠɔ GALAGI ná-foloi
\q
\v 15 «Mazɔlɔɔ Ɠɔoɠɔ GALAGI ná-foloi maaɓuɠaa gola,
\q foloi é ʋaazu, nuɓusɛiti pɛ tukpɔɠaaleʋezu la.
\q Naazu ta è zo eɠɛʋelei è zɔiti soni da.
\q Faa ɲɔi nii è kɛɛni, naama ɠasɔi ɠa la è unma.
\q
\v 16 Wa, Izilayɛle nuiti, wo ɓɔɔleʋɛ na ga nà-ziiɠaawana ɗaawɔi
\q nà-gize ɲadegai ma.
\q Naa ma, zɔɔma nuɓusɛiti ti la ɓega ga ɓɔɔle la,
\q ta ɓɔɔle la eyɛsu é ti zo,
\q naa ʋolu ta ɲɛɛlɛ, eɠɛ ti la vɔlɔ ɠɛni etea pɛ.
\q
\v 17 Kɛlɛ kɔɔ ʋoolabaiti ta ɠɛ Siyɔn gizei ma,
\q ná ɠa ɠɛ ga ada ɲadegai.
\q Zakɔɓe ná-nuɓusɛiti ta naa zeɠe ʋolu nii é ga tɔnɔi.
\q
\v 18 Zakɔɓe mavofodaiti ta ɠɛ ga abui,
\q Zozɛfe mavofodaiti ti ɠɛ ga abuzogi,
\q Ezawu mavofodaiti ti ɠɛ eɠɛ kpaku vɔɔi,
\q ta so ba, ti gala mɛtu,
\q ti la fulu nu ɠila kpalaa zɛga ná Ezawu ná-dointi saama,
\q mazɔlɔɔ Ɠɔoɠɔ GALAGI ɠa é boga.»
\s Masadai ɠa ga Ɠɔoɠɔ GALAGI nɔnɔ
\q
\v 19 Zuda nuiti ti lɛkpɛma nu yeezazuʋɛ, ta Ezawu ɠizeiti so,
\q zɔiti ti zeini ziɛlaʋɛ ma nɛmɛi zu, naati ti Filisiti yooi zo,
\q ti ʋa, ti zei Efelayime yooi ɠa ta Samali.
\q Ɓɛnzamɛn mavofodaiti ta Galaade zo.
\q
\v 20 Izilayɛle ɠɔɔ luɔiti ti lɛkpɛmaʋɛ nu ɠɔʋɛzu ʋelei,
\q ti ga kɔɔɓɔ kiteɠitegi,
\q ta Fenisi zo eyɛsu ti zeeli Salɛpɛta.
\q Zeluzalɛme ɠɔɔ luɔiti ti Sefalade,
\q naati ta nu yeezazu ʋele laaiti so.
\q
\v 21 Pilɛ sɔlɔɔ nuiti ta lɛ Siyɔn gizei ma,
\q miná ɠa ta zei ná Edɔme unda, Ezawu ɠizei.
\q Masadai ɠa ɠɛ ga Ɠɔoɠɔ GALAGI nɔnɔ!