\id MAL - Toma Bible
\ide UTF-8
\h Malasi
\toc1 Malasi Ná-Sɛʋɛi
\toc2 Malasi
\toc3 Mal
\mt1 Malasi
\mt2 Ná-sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Malasi ná-GALA gooiti ka ti sɛʋɛi nii zu. Eɓulu wooi zu Malasi laaseigi ʋoluʋɛ ɠa ga «nà-keelai». Naa maaʋele ma, faaɠwɛ nu wolai tanigaa ti ɠɛ Malasi ɠa ga woo ungi ta, kɛlɛ nu laasei taade. GALA goo wo nui laasei pɛɛʋɛ «nà-keelai» (\xt 2:7\xt*). GALA gooiti ti sɛʋɛi nii zu, ti leʋega ɠɛni de Izilayɛle nuɓusɛiti ma, siɛgi zu ti ɠaleni la ma, ti ɠula duɔlai zu Ɓaɓilɔne, ta ti ɓegai ma ga GALA sei ʋɛlɛi lo.
\ip Malasi ná-GALA gooiti su, goomaaɠaali mɔinmɔin ná GALA ta Izilayɛle nuɓusɛiti zɔɠɔzu. Naa ta ɠa ga GALA ge dɛɛʋɛ ga Izilayɛle nuiti ta ga wooʋalada nuiti, siɛgi zu ti togani ɠaɲaiti kulazu la ga zalaɠai (\xt 1:8\xt*), ta ti ɗa anzanuiti fulu, niiti ti nɔkɔsu kɔɔɠɔ ganigiti bu (\xt 2:11\xt*). Kɛlɛ Izilayɛle nui mɔtai tanigaa ti ti-ziɛ ʋeleiti maavaliboni. GALA gooi Malasi boni, naa ɠa bosu ga GALA ná-tukpɔɠaaleʋe voloi ɠa ʋaazu. Naama voloi telebo nuiti ta undaanɛɛi zɔlɔɔ, kɛlɛ nu ɲɔiti ta ɠala.
\iot Unsosuʋɛ
\io1 1. Malasi ná-GALA gooi ma woo lɔɔzei mɔungiti bogɛ (\xt 1:1\xt*).
\io1 2. Goomaaɠaaliiti ti GALA ta Izilayɛle nuɓusɛiti zɔɠɔzu (\xt 1:2—3:18\xt*).
\io1 3. Maliɠii ná-tukpɔɠaaleʋe voloi ʋaa vai (\xt 3:19-24\xt*).
\c 1
\s Nuɓusɛiti ta-vaanɛɛ wuuɠwɛɛtalai
\p
\v 1 Ɠɔoɠɔ GALAGI ná-keela wooi, é boni Izilayɛle nuiti ma, é ɠula Malasi la.
\p
\v 2 Ɠɔoɠɔ GALAGI ɠɛ ma: «Nɔ̀un, gè wo nɛɛʋɛ ʋɛ. Kɛlɛ wa gàazaɠasu, wo ɗa ɠɛ ma: ‹Lee ɠa gá kwɛɛ ba ga è gi nɛɛʋɛ ʋɛ?› » Ɠɔoɠɔ GALAGI gooɠaaʋotegi veeʋɛ, é ɠɛ ma: «Ezawu la ɠɛni ga Zakɔɓe kɛɛɠɛloin ɓaa? Anɛɛ naa ʋe, gè yiimazeɠeʋɛ ga Zakɔɓe, 
\v 3 gè Ezawu likpi. Gè ná-gize yooi ɠɛa ga fuagi, gè ná-poganiiti kwɛa koʋeiti ma teʋebai zu.» 
\v 4 Ezawu mavofodai, Edɔme, ɠa zoo, é ɠɛ ma: «Gi ɠoloɠologa, kɛlɛ gá ada woloaiti tosu ʋolu.» Kɛlɛ Ɠɔoɠɔ GALAGI, Fai-Pɛ-Maliɠii wooi ɠaa: «Ti náti to, nà náti toka nɔ, ta-yooi ɠa loli ga zooi nii faa ɲɔi masadai ɠɛɛzu su, ta nuɓusɛiti niiti Ɠɔoɠɔ GALAGI ti laalɔɠɔma yeenɔpɛ. 
\v 5 Izilayɛle nuɓusɛiti, wo-ɠaazuʋɛ ɠa naati pɛ ka, wo ɗa ɠɛ ma: ‹Ɠɔoɠɔ GALAGI wɔɔlɔʋɛ Izilayɛle nà-zou ɠwɛpelegiti pɛ poluʋeleiti!› »
\s Lɛbiyai nii maanɛai é ve Ɠɔoɠɔ GALAGI ʋɛ
\p
\v 6 Ɠɔoɠɔ GALAGI, Fai-Pɛ-Maliɠii ɠa é nii wosu zalaɠa ɠula nuiti ma: «Doin ɠa ɗa kɛɛɠɛ lɛbi, botiɠɛ nui ɓalaa maliɠii lɛbi. Ni nà ga ɠɛɛɠɛi, lɛbiyai ɓɛgele ɠa é veezu bɛ̀? Ni nà ga maliɠii, unfemai ɓɛgele ɠa é bɛ̀? Wa dàaseigi ʋɛlɛʋilisu. Kɛlɛ wa gàazaɠasu, wo ɗa ɠɛ ma: ‹Leeni ɠa gi è-laaseigi ʋɛlɛʋilisu da?› 
\v 7 Wa ʋaazu ga kɔzɔba laamianigiti nà-zalaɠa ɠulazuʋɛti. Kɛlɛ wa gàazaɠasu, wo ɗa ɠɛ ma: ‹Leeni ɠa gi è ɠɔzɔa la?› Wo ɠɛɛ vai zu ma: ‹Ɠɔoɠɔ GALAGI ná-taɓalii ɠa ga fuun gani.› 
\v 8 Siɛgi zu wo ʋaazu la wo gaazuɠole logani ɠula ga zalaɠai, faa ɲɔu la ga naa ɓaa? Siɛgi zu wo ʋaazu la ga dɛkpu gelei ta seeɓɛ geleiti, faa ɲɔu la ga naa ɓaa? Naa ve lɛɛ ɗa-you zɛʋɛ ɠundiɠii ya! Toɠa yeezei nɛi è wu, é è zuzo ga pagɔ?» Ɠɔoɠɔ GALAGI, Fai-Pɛ-Maliɠii ɠa é boga. 
\v 9 «Niima ziɛgi zu, à kɔɠɔ mu ga wo màanɛɛnɛ, nɛ̀i gè ga wa-ƓALAGI, nii a kɛ gè nà-nuɓusɛiti wo maawɔinɠa! Naati fea ʋoluma, wa kaazu ga nà wo zuzo ga pagɔ ɓaa?» Ɠɔoɠɔ GALAGI, Fai-Pɛ-Maliɠii ɠa é boga. 
\v 10 «Fizɔgɛ mu ga wo zaama, nu ɠila ge sèi ʋɛlɛi ma ɓogiti daaɠulu, nii a kɛ wo mina abui ɠaazo wafuun nà-zalaɠa ɠulazuʋɛ.» Ɠɔoɠɔ GALAGI, Fai-Pɛ-Maliɠii ɠɛ ma: «Zìima nɔpɛ ge la ga woye, gè la yeezeizu wa-vebɛani nɔpɛ bu. 
\v 11 Mazɔlɔɔ tɔ̀ɠɔi wɔɔlɔʋɛ zii ɠiligiti saama, é zo folo ɠulazu, é li folo liizu. Mini-o-mini, ta ansansegiti galazu dɛ̀bi vai ma, ti ɗa ʋa ga vebɛani ɲadegaiti, mazɔlɔɔ tɔ̀ɠɔi wola ɠa wɔɔlɔ zii ɠiligiti saama.» Ɠɔoɠɔ GALAGI, Fai-Pɛ-Maliɠii ɠa é boga. 
\v 12 «Kɛlɛ wɔun, wa bɛ̀lɛlalazu, wa ɠɛna ɠɛa ma: ‹Maliɠii ná-taɓalii ɠɔzɔʋɛ, daamianigi é zɔlɔɔsu gaa, kulanuma nɔpɛ ge la naa ʋa.› » 
\v 13 Ɠɔoɠɔ GALAGI, Fai-Pɛ-Maliɠii ɠɛ ma: «Wa laaɓeluzu ga ze, wo ɗa ɠɛ ma: ‹Ɓɔɠɔ ɓɔlɔ vaa ɠa ga nii!› Wo ɗa ʋa ga toganii niiti ti unmaai, niiti ti lɛkpuzu, ɓaa ti zeeɓɛzu, vebɛaniiti kana wo ti veezu! Wa kaazu ga nà yeezei nɛi naati bu ɓaa?» Ɠɔoɠɔ GALAGI ɠa é boga. 
\v 14 «Foovooi ɠa yaava nui ʋɛ, nii togani zinɛ ʋagɔi ta zea ná-togani ɓulugi zu, é minazeɠeai la GALA bɛ, é naa yɛ ná, é zɛba é ʋa ga taɠili nii daa la zeelini, é naa ɠɛ ga zalaɠai Maliɠii ʋɛ! Mazɔlɔɔ nà ga masa gola, dàaseigi maayikiai zii ɠiligiti saama.» Ɠɔoɠɔ GALAGI, Fai-Pɛ-Maliɠii ɠa é boga.
\c 2
\s Zalaɠa ɠula nuiti tɛnɛ fai
\p
\v 1 «Zalaɠa ɠula nuiti, devei ɠa niizu é veezu wo ya.» 
\v 2 Ɠɔoɠɔ GALAGI, Fai-Pɛ-Maliɠii ɠɛ ma: «Ni wo la woiloni, wo ʋa so ga ɠigi, wo ʋa dàaseigi lɛbi, nà wo voovoozu, gè wa-undaanɛɛiti maavalibo ga maanɔɠɔi. Ungo, nà wo-laa luyaiti maavalibo ga foovooi, tɔɔzei wo tanɔpɛ ge la seɠeni ga yii, é ʋa dɛ̀bi.
\p
\v 3 «Nà wo-mavofodai ɠoloɠolosu. Nà togani ɓooiti fazasu wo-ɠaazuʋɛ, suaiti wo ti ɠulazu ga zalaɠai wa-vɛti voloiti su, wo ʋɛɛ ma ɓooiti ba, ti wo laaʋili etea ʋelei. 
\v 4 Wa kwɛɛ naazu ga gè devei nii veeʋɛ wo ya, naa ɠa a kɛ naama minazeɠegi yɛna ɠɔ, nii gè seɠeni Levi mavofodai ʋɛ.» Ɠɔoɠɔ GALAGI, Fai-Pɛ-Maliɠii ɠa é boga. 
\v 5 «Minazeɠegi naa maaʋele ma, gè zɛnvui ta undaanɛɛi veeʋɛ ti ʋɛ. Gè ti veeni zea, nii a kɛ é unfe mà, tama é unfeni mà, sasu ɗa ɓali gàazu. 
\v 6 É ɠɛni kalagi wosu ga gaamai, telebotala vaa la ɠɛni dakɔlɔgiti su ɲɛgɛlɛin. É ɠɛni ziɛzu pɔ̀ ziilɛigi zu ta sɔledai. É nu ma mɔinmɔin seɠeni faaɠaaza golai ʋolu. 
\v 7 Mazɔlɔɔ zalaɠa ɠula nui ɠa ɗa makɛ faaɠwɛgi ma, tɔ ɠa ta ɗa tɔgi maaɠaazaɠabo ma, tɔɔzei toɠa ga Ɠɔoɠɔ GALAGI, Fai-Pɛ-Maliɠii ná-keelai. 
\v 8 Kɛlɛ wɔun wa, wo ɠakaga, wo zeɠe pele ʋagɔi ʋa, wa-ɠala bo pelei ɠɛa ga ma mɔinmɔin too zaɓui. Wo Levi ná-minazeɠegi ɠoloɠologa.» Ɠɔoɠɔ GALAGI, Fai-Pɛ-Maliɠii ɠa é boga. 
\v 9 «Nà Izilayɛle nuɓusɛiti kpein buzeɠezu wo laalɔɠɔma, ga ti wo ʋɛlɛʋili, ti wo ʋɛlɛʋɛlɛ, tɔɔzei wo la ziɛzu ga zìima, wa zeelɔzɔɠɔzui ɠɛɛzu, wa ɠɛna nuiti kalaga ga tɔgi.»
\s GALA ná-tɔgi ɠoloɠolo pele felegɔi
\p
\v 10 Ade-ɠɛɛ la ɠila nɔ ɓaa? GALA gilagi nɔ laade, é ʋa ade ɓɛtɛ ɓaa? Leeni vaa zu ade ɓɔɠɔ yaavazu, de ɗa de-mɛmɛwolani ta-minazeɠegi ɠoloɠolo? 
\v 11 Zuda nuiti ti wooʋaladai ɠɛa, ti ɗa kɔzɔba vai ɠɛ, Izilayɛle yooi ta Zeluzalɛme. Zuda nuiti ti seizu ɲadegai ɠɔzɔa, ʋɛ ná nɛai Ɠɔoɠɔ GALAGI ʋɛ, ga ti lii ʋelei, ti ɗa zii ɠili anzaiti fulu, ti ɗa nɔkɔ kɔɔɠɔ ganigiti bu. 
\v 12 Zunui nii é naa ɠɛɛzu, Ɠɔoɠɔ GALAGI ɠa ma zuwu ɠaaleʋe Zakɔɓe ná-pɛlɛyeɠei wu. Naama nui doun la mɔ ɠɛa zea, ɓaa mavofoda, ɓaa nu nɔpɛ nii a ɠɛ vebɛani veezu Ɠɔoɠɔ GALAGI, Fai-Pɛ-Maliɠii ʋɛ.
\p
\v 13 Wɛlɛ, faaɠaazagi taɠili ba, nii wo kɛɛzu mɔnɔ: Wa Ɠɔoɠɔ GALAGI ná-zalaɠa ɠulazuʋɛ maaɓɔlesu ga wo-ɠaazuɗɛiti, naa ʋɛɛ gɔlɔiti ta kpalagiti ba, tɔɔzei Ɠɔoɠɔ GALAGI la mɔ wɛlɛzu wa-zalaɠaiti ba, ta é la yeezeizu wa-vebɛaniiti bu. 
\v 14 Wo ɗa gaazaɠagi wo ga: «Leeni vaa zu naa ɠɛɛzu?» Tɔɔzei Ɠɔoɠɔ GALAGI ɠɛni ga zeelei wo ɠilagilagi wo yɔɠɔzu wa wo-anzaiti, niiti wo ti zeini wa-zunu loungo ziɛgi zu, niiti wo ɠɛai ti ʋɛ ga wooʋalada nuiti, anɛɛ ni ti ɠɛɛʋɛ ga wa-ziɛpolu nuiti ta wa-minazeɠe anzaiti. 
\v 15 Ɠɔoɠɔ GALAGI la wo felegɔ wo ɠɛɛni ga kpusɛ ɠila ta zɛnvu ɠila wa tɔ? Lee ɠa é ga naama ɓɔsu vai ʋoluʋɛ? É la ga wo-mavofodai zɔlɔɔ nɔ ɓaa, nii GALA ge feezu? À dama ga ɓɔɠɔ, wa ʋa ɠɛlɛ anzanui ʋa, nii wo seiɗai wa-zunu loungo ziɛgi zu! 
\v 16 Ɠɔoɠɔ GALAGI, Izilayɛle ná-GALAGI ɠɛ ma: «Anza ɠɛlɛ ba vai maayo ge la bɛ̀. Zɔi é ɠɛlɛzu anzai ʋa, kulaʋɛ eɠɛ nui, nii é ná-seɠei zulaavesu ga ɲamai, a ɠɛna toosu vaiti kɛa.» Ɠɔoɠɔ GALAGI, Fai-Pɛ-Maliɠii ɠa é boga. À dama ga wo-yɛnvui, wo mina ɠɛ ga wooʋalada nu!
\s Maliɠii ɠa ná-keelai leʋesu
\p
\v 17 Wa Ɠɔoɠɔ GALAGI ɓɔlɔzu ga wa-ɓɔɛzuɠulaiti. Kɛlɛ wa gaazaɠagi wosu, wo ɗa ɠɛ ma: «Leeni ɠa gi kpɔlɔzu la?» Wa kpɔlɔzu, wa ɠɛna ɠɛa ma: «Nu-o-nu nii é faa ɲɔi ʋolu, naa ɠa pagai Ɠɔoɠɔ GALAGI ɠaazu, toɠa losu naama nuiti polu.» Ɓaa mu: «Telebo GALAGI ɠa mini?»
\c 3
\p
\v 1 Ɠɔoɠɔ GALAGI, Fai-Pɛ-Maliɠii ɠɛ ma: «Nà nà-keelai leʋesu, ga é pelei ɓɛtɛ tùɠɔ. Maliɠii nii wo kpɔunsu, naa ɠa ʋa, é lɛ gaamanɔ GALA sei ʋɛlɛi wu, ʋɛ ná ga nɔnɔi. Minazeɠegi ma ɠeelai wo wɔin ɠɛɛzu, wɛlɛ, tɔ ɠa é ʋaazu.»
\p
\v 2 Kɛlɛ ɓɛ ɠa a ziɛ paa voloi wu? Ɓɛ ɠa a yɛ lo kɔɠɔa, siɛgi zu é ɠulazu la kɛlɛma? Mazɔlɔɔ kulaʋɛ ga ɠain bo nui ná-abui, eɠɛ sɛɠɛ ɗɛi zeeɠaaɓaai. 
\v 3 Toɠa zei ga ɠain bo nui ɠɛʋele, nii a ɗa kɔlui ɓɔi, é gaawuun, é wali ɠaei ɲade. Toɠa Levi mavofodai ɲade, eɠɛʋelei nu a ɗa zanugi ta walii ɲade da. Naazu ta ɠɛ ga Ɠɔoɠɔ GALAGI nɔnɔiti, ti ɠɛ ga nuiti ti ʋaazu ga vebɛaniiti, eɠɛʋelei é la tɔgi zu. 
\v 4 Ɠɔoɠɔ GALAGI ɠa yeezei naazu Zuda nuiti ta Zeluzalɛme nuiti ta-vebɛaniiti bu, eɠɛʋelei zɔɔma voloiti ti ɠɛni la, kona mɔungiti su.
\p
\v 5 Ɠɔoɠɔ GALAGI, Fai-Pɛ-Maliɠii ɠɛ ma: «Nà ʋaazu wo zaama, nii a kɛ gè wo lukpɔ. Gè zuvilɛ ga gè zoɠoiti ta wɛɛnzo nuiti peelala, ta niiti ti zɛɛ ɠonaiti bosu, ta niiti ti la botiɠɛ nuiti salai veezu. Nà ɠɛ ɓalaa naati daalɔɠɔma, niiti ti la luazu bà, ti poanzaiti ta podointi kpɔlɔzu, naa ʋɛɛ seikɔɠɔma nuiti ba.»
\s Puusiɛiti ta GALA kɔɔiti ta-vai
\p
\v 6 «Nà ɠa gè ga Ɠɔoɠɔ GALAGI, gè la zeɠea ɠɛʋele ma pɛ! Naa maaʋele ɠa é kɛɛni, wɔi wo ga Zakɔɓe mavofodaiti, wo ma zuwui ɠaa la leʋeni. 
\v 7 Kaite wo-mɛmɛwolani ta-ziɛgiti su, wo ʋoluaveni nà-deveiti ba, wo la ɠoloni ti ʋɛ. À ɠale ma pɔ̀, nà ɠale ma wo ʋɔ.» Ɠɔoɠɔ GALAGI, Fai-Pɛ-Maliɠii ɠa é boga. «Kɛlɛ wa gàazaɠasu, wo ɗa ɠɛ ma: ‹Gá ɠale ma è ʋɔ ɠale?› 
\v 8 Nà wo wooɠaaʋotesu ga nii: Nu ɠa zoo nɛi é GALA unma? Mazɔlɔɔ wa ùnmazu. Kɛlɛ wa gàazaɠasu, wo ɗa ɠɛ ma: ‹Gi è unmaʋɛ ɠale?› Wa ùnmazu, siɛgi zu wo ɠɛlɛzu la wa-ʋuusiɛiti ta wa-ƓALA kɔɔiti feezu la. 
\v 9 Foovooi zeeliʋɛ wo ma, mazɔlɔɔ nà ɠa wo pɛ wo ùnmazu, wɔi wo ga nuɓusɛiti. 
\v 10 À ʋa mu ga wa-ʋuusiɛiti kpein naavolo makɛsuʋɛ GALA sei ʋɛlɛi wu, naa ɠa a kɛ, daamianigi mina ʋala nà-pɛlɛi wu.» Ɠɔoɠɔ GALAGI, Fai-Pɛ-Maliɠii ɠɛ ma: «À pòluɠula lɛ ga naama ʋelei, wa pɛtɛ, ni gè la geeɠɔlɔgi ma ʋɛlɛlaʋɛti daalaoni wo ʋɛ, gè ʋa tuya loo wo ʋɛ, é ʋooʋa ma.» 
\v 11 Ɠɔoɠɔ GALAGI, Fai-Pɛ-Maliɠii ɠɛ ma: «Nà kotogiti koloɠolo wo ʋɛ. Ti la mɔ wa-yooi ɠaawaaiti koloɠologa pɛ. Ta wa-leezɛn ɓeleiti ta yɛ waazu ɠɔ wa-ɓalaɠaiti su.» 
\v 12 Ɠɔoɠɔ GALAGI, Fai-Pɛ-Maliɠii ɠɛ ma: «Zii ɠiligiti kpein ta ɠɛ wo ma undaanɛ nuiti, mazɔlɔɔ wa ɠɛ zou nɛai zu.»
\s GALA ka ná-telebodai lɛɛzu
\p
\v 13 Ɠɔoɠɔ GALAGI ɠɛ ma: «Wa bɛlɛlala ɓɔɛzuɠulaiti bosu dàalɔɠɔma. Kɛlɛ wa gàazaɠasu, wo ɗa ɠɛ ma: ‹Lee ɓɔɠɔɓɔɠɔ ka gi bogai ɗɔun è laalɔɠɔma?› 
\v 14 Wa ɠɛɛzu ma: ‹Nu ɠa botii ɠɛɛzu GALA bɛ nɔ fuun. Gi ná-deveiti soga, gi ɓɔɠɔ maawɔin, nii a kɛ gi Ɠɔoɠɔ GALAGI, Fai-Pɛ-Maliɠii ná-kpɔbai zɔlɔɔ, kɛlɛ lee ɠulanuma ɠa gi sɔlɔɔgai naa zu? 
\v 15 Naa ɠa é ba, gi ɠida bu ga waso nuiti ka ti ga undaanɛ nuiti. Ungo! Nuiti ti faa ɲɔi ʋolu, naati ka ti kulagaanɛɛzui zu. Anɛɛ ni ta GALA suɠɔɠɔsu, faa nɔpɛ ge la ti ʋa, ta ɠulazu su.› »
\p
\v 16 Kɛlɛ, niiti ti Ɠɔoɠɔ GALAGI ʋɛ ga wooɠɛɠila nuiti, naati ti woolaani ma ga pagɔ, Ɠɔoɠɔ GALAGI ɠidaani ti ɓɔɛ wooiti bu, é ti woomɛnini. Sɛʋɛi ɠɛɛni ga ɠizɛsui Ɠɔoɠɔ GALAGI ɠaazu, naati ta-vaa zu, niiti ti bɛ ga wooɠɛɠila nuiti, ti ɗa dɛbi. 
\v 17 Ɠɔoɠɔ GALAGI, Fai-Pɛ-Maliɠii ɠɛ ma: «Yeei nɔpɛ gè ʋaazu nà-zobogi ɠulazu la kɛlɛma, naama nuɓusɛiti ta ɠɛ ga nɔ̀nɔiti, ta nà-nu ɠiteɠitegiti, nà ti ɠaazumaawɔinɠa, eɠɛʋelei doun kɛɛɠɛi a ɗa ná-doun zunui ɠaazumaawɔinɠa la, nii é botii ɠɛɛzu bɛ. 
\v 18 Wa wɛlɛ naazu, wo ka mɔnɔ ga zɔɠɔzu ɠa telebo nuiti ta nu ɲɔiti ba, ta zɔɠɔzu ɠa naati ba ti botii ɠɛɛzu GALA bɛ, ta niiti ti la botii ɠɛɛzu bɛ.»
\c 4
\p
\v 1 Ɠɔoɠɔ GALAGI, Fai-Pɛ-Maliɠii ɠɛ ma: «Foloi ta ɠa ʋaazu, toɠa ɠɛ eɠɛ abu ɓɔi golai, nii kpadiai. Naama volo ná, waso nuiti kpein, ta niiti ti ga faa ɲɔu ɠɛ nuiti, ta ɠala abui zu, eɠɛʋelei molo ɓaɠai a ɗa ɠala la, ma laagi, ɓaa ma zapei tanɔpɛ ge la yɛga ná. 
\v 2 Kɛlɛ, wɔiti wo bɛ̀ ga wooɠɛɠila nuiti, telebo foloi ɠa ɠulazu kɛlɛma wo ʋɛ, ma zezei ɠa ʋa ga kɛdɛgi. Naazu wa ɗa ɠula, wo ɗa lɛ, wo ɗa ʋili ga koozunɛɛi, eɠɛʋelei nikɛ yiʋoiti ta ɠɛna ɠulaa la sasai zu. 
\v 3 Voloi gè nà-zeeɠaaɓaai lɛɛzu la, wa ziɛ faa ɲɔu ɠɛ nuiti ma, ti ɠɛ ga zuʋui wo ɠɔɠɔwu.» Ɠɔoɠɔ GALAGI, Fai-Pɛ-Maliɠii ɠa é boga.
\s Eli ʋaa vai ʋolu
\p
\v 4 «À ɠizɛ Moize ná-tɔgi ta deveiti su, nà-botiɠɛ nui nii gè ti veeni zea Wolɛɓe gizei ma, Izilayɛle nuɓusɛiti kpein bɛ.
\p
\v 5 «À wɛlɛ: Nà GALA goo wo nui Eli leʋesu wo ma, aisa Ɠɔoɠɔ GALAGI ná-foloi ʋa zeeli, naama volo wolai nii maayikiai. 
\v 6 Toɠa doun kɛɛɠɛiti zɔɠɔzuɓɛtɛ ta ti-lointi, é lointi zɔɠɔzuɓɛtɛ ta ti-ɠɛɛni, naa ɠa a kɛ gè mina ʋa gè ʋa faa ɲɔu la zooi ma, é ʋa ɠoloɠolo.»