\id JON - Toma Bible
\ide UTF-8
\h Zonase
\toc1 Zonase Ná-Sɛʋɛi
\toc2 Zonase
\toc3 Zon
\mt1 Zonase
\mt2 Ná-Sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Keela ziɛgi nii GALA goo wo nui Zonase leʋeni ma Ninive taa wolai zu, naa ɠa é ga Zonase Ná-Sɛʋɛi zu vai. Zeeɠaaɠwɛɛzuʋɛ é sɛʋɛi nii ʋa, ta GALA goo wo nui zɔiti ta-zɛʋɛiti, naa ɠa ga sɛʋɛi nii wola ɓɔɛʋɛ, é lo GALA goo wo nui ta ná-kɛɛwotiiti ba, é leʋe keela wooi ʋa GALA ge feeni zea. Nu ɠa zoo ɠɛɛzu ma, é ná-botii nii ɠɛɛʋɛ Zeloɓoame velesiɛi ná-masadai ma ziɛgi zu Izilayɛle, é zo kona undɔsaʋai ma, é li ga undɔfela puulɔɔlugɔi ʋɔ pelei (800-750), aisa Yesu Kilista ʋa zɔlɔɔ. Kɛlɛ faaɠwɛ nu wolaiti ti sɛʋɛi nii ɠɛɛ ziɛgi ɠwɛɛ.
\ip GALA ge Zonase leʋeni ga é li, é GALA daawooi laazeeli Ninive nuiti daalɔɠɔma, kɛlɛ Zonase la kɛɛni. É ʋoluaveni feya ná ʋa, é pele ɠili so (\xt 1:1-3\xt*). É lɛɛni kein golai ta zu, nii é ɠɛni liizu ga Taalasise taa wolai zu ʋele. Keingi ɠɛai ma liizu ga Taalasise ʋele, GALA ge tona viilɛ wolai lokoleʋeni. Kein kpizɛ nuiti ti wola luani, ti Zonase ʋili kpoloɗɛi wu, nii a kɛ ti GALA ná-ziiɠaawanai maayei. Zonase maanɛɛnɛi woni, GALA ma ge va bu é yɛ vulua. GALA ge kale wolai ta leʋeni, naa Zonase ɓɔle, naa ʋoluma é unpili da kakei ma. Gaaɓelasu Zonase liini, é GALA daawooi laazeeli Ninive nuiti daalɔɠɔma, naati ma ti ti-ziɛ ʋeleiti maavalibo. Zonase Ná-Sɛʋɛi ɠa dɛɛzu ga GALA ka ga gaazumaawɔinɠaa ƓALAGI, anɛɛ ni Zonase la ɠɛni pɔ ga é ʋa ɠɛ ɠana (\xt 4:2\xt*).
\iot Unsosuʋɛ
\io1 1. Zonase ɠɛni pɔ ga é ʋela GALA ba, kɛlɛ é gaaɓelani ga é ɓɔɠɔ ɠa kalei ta ɠoozu (\xt 1:1—2:1\xt*).
\io1 2. Zonase ná-GALA falii kɛai ma kalei ɠoozu (\xt 2:2-11\xt*).
\io1 3. Zonase GALA daawooi laazeelini Ninive nuiti ma, tama naati ti ti-ziɛ ʋeleiti maavalibo. GALA ma ge deve ga é ti zuvaayɛ (\xt 3:1-10\xt*).
\io1 4. Zonase yiiɠaawanani, tɔɔzei GALA ge gaazumaawɔinɠai ɠula kɛlɛma Ninive nuiti bɛ, tama GALA ge ɠɛ Zonase ma nu vuluiti pɛ nɛɛʋɛ bɛ (\xt 4:1-11\xt*).
\c 1
\s Zonase ʋela vai
\p
\v 1 Yeeta Ɠɔoɠɔ GALAGI ɓɔɛni Amitayi ná-doun zunui Zonase ʋɔ, é ɠɛ ma: 
\v 2 «Wuzeɠe, è li Ninive taa wolai zu, è maalua wooiti bo ti laalɔɠɔma. Mazɔlɔɔ taai naa zu nuiti ta-ɠotoi kula ɠɛa ga ze.»
\p
\v 3 Kɛlɛ Zonase ʋilɛni pelei ma ga é ʋela Ɠɔoɠɔ GALAGI ʋa, é li Taalasise. É liini Zafa, é ɓato ɠila kaani miná, nii é ɠɛni liizu Taalasise. É ɓato zalai ɠulani, é teʋe, é lɛ su ta ɓato zu nuiti, nii a kɛ ti li Taalasise, é ʋela Ɠɔoɠɔ GALAGI ʋa.
\p
\v 4 Kɛlɛ Ɠɔoɠɔ GALAGI fiilɛ wolai lokoleʋeni kpoloɗɛi ɠa, tona viilɛi wuzeɠeni, sɛbɛi wɔɔlɔ ʋelei ma, ɓatoi ɠɛnina ɠoloɠolosu. 
\v 5 Ɓato ɓizɛ nuiti ti wola luani, ɛsɛ gilagilagi ɠɛni ná-galagi lolisu ga é ɓɔ ti ʋa. Naa ʋoluma ti ɠɛni kasɔiti kulazu ɓatoi zu, ti ɗa pili ya kpoloɗɛi wu, nii a kɛ é veɠa. Zonase mu ge yeini ɓatoi ɓomaʋɛ, é la, é ɲi poun. 
\v 6 Ɓato ɓizɛ nuiti ta-ɠundiɠii maaɓuɠani ba, é ɠɛ ma: «Lee vaa zu ɗɔun è ɲiizu? Wuzeɠe, è wooɠula ɗa-ƓALAGI ma, é ɓɔ ade ʋa. Tanisu GALAGI naa ɠa ade maawɔinɠa, ade undaa la ʋiliga.»
\p
\v 7 Ti ɠɛni ɓɔɠɔ ma: «À ʋa, ade kpakutoomai ɠɛ, nii a kɛ ade kwɛɛ nui nii é niima maanɔɠɔi maaloligai ade ma.» Ti kpakui looni, é Zonase zo. 
\v 8 Ti Zonase ɠaazaɠani, ti ɠɛ ma: «Ɓɛ ɠa é maanɔɠɔi nii zeizu gi ma, dɛɛ lɛɛ ga giye? Ɗa-wotii ɠa ga leeni? Mini ɠa è zeɠezu ná? Ɗa ga zooi ɓɛgele zu nu? Zii ɓɛgele ɠa ga ɗe?»
\p
\v 9 Zonase ti wooɠaaʋoteni, é ɠɛ ma: «Nà ga Eɓulu nu. Ɠɔoɠɔ GALAGI, geeɠɔlɔgi zu ƓALAGI, é ga kpoloɗɛi ta zooi ɓɛtɛ ƓALAGI, naa ɠa nà ɗa dɛbi.» 
\v 10 Naa ʋoluma é dɛɛni ga tiye ga toɠa ʋelazu Ɠɔoɠɔ GALAGI ʋa. Nui naati ti wola luani, ti ɠɛ ma: «Toɠa ɠale è naa ɠɛai?»
\p
\v 11 Tɛi kpoloɗɛi ɠɛni ba nɔ é ɗa ɲiikpi ga gola, ti ɠɛni ma: «Leeni ɠa gá kɛ ga ɗe, kpoloɗɛi yiilɛi gi ma?» 
\v 12 É ti wooɠaaʋoteni, é ɠɛ ma: «À sò, wo pìli kpoloɗɛi wu, naa ɠa a kɛ ziɛi ɠaalɛi, tɔɔzei gè kwɛni ga màaʋele ɠa é kɛa niima lona viilɛ wolai lokoleʋea la wo laalɔɠɔma.»
\p
\v 13 Anɛɛ naa ʋe, ɓato ɓizɛ nui niiti ti ɠaaɓaani dɛ ga ti kakei maazɔlɔɔ, kɛlɛ ti la ɠɛni zoosu, tɔɔzei kpoloɗɛi ɠɛni ti laaɠomisu ga zeeɠaaɓaai. 
\v 14 Ti wooɠulani naazu Ɠɔoɠɔ GALAGI ma, ti ɠɛ ma: «Ee, Ɠɔoɠɔ GALAGI, mina gi undaaʋili zunui nii ʋoluʋele zu, mina gi zo ga sɔba nu, sɔbalala nu zaa vaa zu, mazɔlɔɔ, ee, Ɠɔoɠɔ GALAGI, è naa ɠɛa, nii nɛai è ʋɛ.» 
\v 15 Naa ʋoluma ti Zonase zoni, ti pili kpoloɗɛi wu. Tona viilɛ wolai ná-ziiɠaawanai maayeini gaamanɔ kpoloɗɛ ɠa. 
\v 16 Ɓatoi ɓizɛ nuiti ti wola luani Ɠɔoɠɔ GALAGI ʋa. Ti zalaɠaiti kulani bɛ, ti minazeɠegiti kɛ bɛ.
\s Zonase ná-GALA maanɛɛnɛi  //  é boni kalei ɠoozuʋɛ
\p
\v 17 Ɠɔoɠɔ GALAGI kale wolai gila teʋeni, é ʋa, é Zonase ɓɔle. Zonase kɛɛni kalei ɠoozu ga folo saʋagɔ, kpidi saʋagɔ. 
\c 2
\p
\v 1 Zonase yɛni kalei ɠoozu, é Ɠɔoɠɔ GALAGI maanɛɛnɛ, ná-GALAGI. 
\v 2 É ɠɛ ma:
\q «Nà-kidaaʋiligi zu, gè wooɠulani Ɠɔoɠɔ GALAGI ma,
\q tama é gòoɠaaʋoteni.
\q Zɛ̀gɛ gɔvɛalaazu, gè è loli ga è ɓɔ bà,
\q ɗa ma, è gòomɛnini.
\q
\v 3 È pìlini ya kpoloɗɛi ma ʋalii zu,
\q ziɛ veinfeingi màaveleveleni,
\q ziɛ vegiti ta ziɛ lakpatakpagiti ti ɗa leʋe mà.
\q
\v 4 Gè ɠɛni ɓɔɠɔ ma: ‹Wɛlɛ bà, màaɠoozaai na è ʋa,
\q kɛlɛ nà ʋaazu ɠaazulaazu ʋolu è zei ʋɛlɛ ɲadegai ma.›
\q
\v 5 Ziɛi lɛɛni mà, é zeeli kɔ̀daʋɛ,
\q palii màaɓɔleni,
\q ziɛ wu lufaiti ti velevele nɔ̀ungi ma.
\q
\v 6 Gè yeini kpoloɗɛi ɓomaʋɛ, ʋɛ gizeiti kpein tɔɔzeiɗai ná,
\q gɔvɛalaazu ʋɛlɛlaʋɛti ti ʋilisu mà eyɛsu ɠɔ.
\q Kɛlɛ, ee, Ɠɔoɠɔ GALAGI, è zɛ̀nvui yɛga su,
\q è kùla gɔvɛalaazu.
\q
\v 7 Siɛgi zu kì ge la mɔ ɠɛni bà la ga zɛ̀nvui ɠa yɛ sù,
\q kì ge looni Ɠɔoɠɔ GALAGI zu.
\q Nà-maanɛɛnɛ wooi gè daazeelini è ma,
\q naa zeelini è zei ʋɛlɛ ɲadegai wu.
\q
\v 8 Niiti ti ɓɔɠɔ veezu kɔɔɠɔ ganigiti zea, naati ta ɠɛlɛzu è-zaalai ʋa.
\q
\v 9 Kɛlɛ nɔ̀un, nà nà-faanɛɛ wuuɠwɛɛgai loo è ʋɛ ga guyei,
\q gè nà-minazeɠegiti daazeeli.
\q Ɠɔoɠɔ GALAGI ɠa kizogi zɔlɔɔsu zea!»
\p
\v 10 Ɠɔoɠɔ GALAGI ɓɔɛni kalei ʋɔ, é unpili ga Zonase kakei ma.
\c 3
\s Zonase GALA daawooi laazeeli vai Ninive
\p
\v 1 Ɠɔoɠɔ GALAGI ɓɔɛni ʋolu Zonase ʋɔ, é ɠɛ ma: 
\v 2 «Wuzeɠe, è li Ninive taa wolai zu, è naa laazeeli ná, nii gè bogai è ma.»
\p
\v 3 Zonase ʋilɛni pelei ma, é ɗa li Ninive, ʋelei Ɠɔoɠɔ GALAGI boni la ma. Tama Ninive ɠɛni ga taa wolai, kɛni nu a la kɛ ga folo saʋagɔ è ɗa ziɛ, è ʋa maaleʋe. 
\v 4 Zonase folo ɠilagi ɠɛɛni, é ɗa ziɛ taazuʋɛ, é ɗa ɠɛ ma: «É yɛga nɔ ga folo ʋuunaanigɔ (40), Ninive ɠoloɠolo!» 
\v 5 Taai zu nuɓusɛiti ti GALA gooi zoni ga zɔɓela. Ti deveni ga ti zugi zo, ta ti ɠilagilagi pɛ, é zo seizumaanɛgiti ma, é li bala nuiti pɔ, ti ɓɔɠɔ maaɠilini ga saa wɔlɔ wo seɠei.
\p
\v 6 Ninive masagi naama wooi mɛnigai ma, é ɠulani ná-masa kpɔkpɔgi ɠa, é masa seɠei ɠula ɠɔba, é saa wɔlɔ wo seɠei loo ɠɔba, é zei zuʋui zu. 
\v 7 É devei veeni ga ti zeze ga niima wooi Ninive taa wolai zu, ti ɠɛ ma: «Masagi ɠɛ ta ná-botiɠɛ nu wolaiti ti tɔgi loga ga nuiti kpein ta suaiti tanɔpɛ ge mina daami wo, ta mina ɓɔɔle. 
\v 8 Nuɓusɛiti kpein ta suaiti ti maanɛɛʋɛ ga ti saa wɔlɔ wo seɠeiti too ɠɔba, ti wooɠula GALA ma ga zɛbɛi pɛ. Naa ʋoluma ɛsɛ pɛ ge zeɠe zɔ ɲɔi ʋolu ta toomai nii giliai ɛsɛ zeei ʋa. 
\v 9 Tanisu GALA ka zeɠe ná-kisiɛi ʋolu, é ʋɛɛ yiima, é la ade undaaʋiliga.»
\p
\v 10 GALA ge Ninive nuiti kɛʋelei ʋɛtɛni, é kaani ga naati ta zeɠezu ti-zɔ ɲɔiti polu. Naa ɠa é kɛɛni, maanɔɠɔi nii é ɠɛni ɠɛɛzu é kɛ ga tiye, é naama ɠisiɛi maavaliboni, é la mɔ ɠɛni kɛɛni.
\c 4
\s Zonase luʋa ʋelei ta zelii  //  Ɠɔoɠɔ GALAGI toni ma
\p
\v 1 Naa la ɠɛni nɛɛni Zonase ʋɛ ga tago ɓalaa, é wola yiiɠaawanani. 
\v 2 É Ɠɔoɠɔ GALAGI maanɛɛnɛni ɠani, é ɠɛ ma: «Ee, Ɠɔoɠɔ GALAGI, nii nɔ ɠa gè ɠɛni bosu, kɛ̀ai ma dɛ nà-zooi zu, naa ɠa é kɛɛni gè ɠɛni ɠɛɛzu gè ʋela, gè li Taalasise. Gè ɠɛni kwɛɛni ga ɗa ga maawɔinɠaa ƓALAGI, nii é zaalai veezu, zii la ɠulaa fala, kpɛtɛai wooɠɛɠiladai zu, a ɗa zeɠe maanɔɠɔi naa ʋaa vai ʋolu, é ɠɛa deveni ga é ʋaa la. 
\v 3 Naa ɠa é ba, Ɠɔoɠɔ GALAGI, zɛ̀nvui zeɠe niina. Saai vizɔgɛ mà, é leʋe zɛnvui ʋa.» 
\v 4 Ɠɔoɠɔ GALAGI Zonase ɠaazaɠani, é ɠɛ ma: «Gaama ɠa è ya nɛi ga è yiiɠaawana?»
\p
\v 5 Zonase ɠulani taai ʋa, é li, é zei taai letema, folo ɠulazu ʋelei. É kota go loni miná, é zei ma niinigi wu, é ɗa naa maaɓɔun, nii é ʋaazu ɠɛɛzu ga taai. 
\v 6 Ɠɔoɠɔ GALAGI gului ta ʋɔnɔni, gaaɠooza Zonase ʋa, nii a kɛ é ɗa niinigi ve zea, kula vai zu ná-ziiɠaawanai zu. Zonase wola ɠoozunɛɛni gului naa ma.
\p
\v 7 Kɛlɛ poluma voloi, geelaalaogai ma, GALA ge koʋizu ɠoegi ta leʋeni, é zeɠei wɔ gului ʋa, naa vɔ. 
\v 8 Foloi ɠulaai ma, GALA ge ʋaani ga folo ɠulazu ʋele viilɛ ɓadii. Foloi looni Zonase nɔungi zu, su ɠɛ nɔ yɔɔɠɛ. É saai maalolini, é ɠɛ ma: «Saai vizɔgɛ mà, é leʋe zɛnvui ʋa.» 
\v 9 GALA ge Zonase ɠaazaɠani, é ɠɛ ma: «Gaama ɠa è ya nɛi ga è yiiɠaawana gului nii vai zu?» Zonase gooɠaaʋoteni, é ɠɛ ma: «Ungo, gaama ɠa zèa ga gè yiiɠaawana, gè ɠɛ vɔlɔ gè za nɔ.»
\p
\v 10 Ɠɔoɠɔ GALAGI ɠɛni Zonase ma: «Gului ɠana maawɔin è zosu, nii è la mɔɔlɛni ma, ɗa lɛi è ʋa kpɛtɛ, nii pɔnɔgai kpidi ɠila nɔ, é za poluma ɓidi nɔ. 
\v 11 Naa ɠa è ɠɛa ɠɛɛzu, gè mina Ninive taa wolai maawɔinɠa, ʋɛ nuiti ti leʋegai nu waaungila nu waaʋuufelegɔ (120.000) ʋa, niiti ti la yeeza ɠwɛɛ, ti la ɠɔʋɛ ɠwɛɛ, naa ʋɛɛ togani mɔinmɔingiti ba?»