\id JOL - Toma Bible
\ide UTF-8
\h Zowɛle
\toc1 Zowɛle Ná-Sɛʋɛi
\toc2 Zowɛle
\toc3 Zow
\mt1 Zowɛle
\mt2 Ná-Sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Zowɛle ná-GALA gooiti ka ti sɛʋɛi nii zu. Nu la faa mɔinmɔin kwɛɛ, é ʋa lo Zowɛle ʋa, ɓaa é ʋa lo kɛɛɠɛ Petuwɛle ʋa. GALA Daawoo Zɛʋɛi zu ná pɛ, sɛʋɛi nii zu nɔ ɠa ná-faa wogai ná ta Keelaiti Kɛɛwotiiti su (\xt KKw 2:16-21\xt*). Faaɠwɛ nu wolaiti ti la kwɛɛ yeeɠɛɠalai Zowɛle ná-eteai ziɛni la, ta ná-sɛʋɛi ɠɛɛ ziɛgi. Zowɛle laaʋilɛgɛ Zuda ta Zeluzalɛme ʋa, tanisu miná ɠa é ná-botii ɠɛɛni ná.
\ip Ʋelei nɔ GALA goo wo nui zɔiti ti la GALA Daawoo Zɛʋɛi zu, Zowɛle ɓɔɛʋɛ é ʋilɛ tukpɔɠaaleʋei ʋa, é ʋaazu ziiti daalɔɠɔma eteai zu ta Zuda ɓalaa daalɔɠɔma. É ɛsɛ pɛ tɛnɛgɛ ga ti ti-ziɛ ʋeleiti maavalibo, ti ɓɔɠɔmaayei, ti GALA gaiziɛ (\xt 2:12\xt*). GALA ge zɛba é minazeɠe ga toɠa ná-Zɛnvui yei nuɓusɛi pɛ ma (\xt 3:1-5\xt*). GALA keelai Piyɛlɛ boni ga minazeɠegi naa daa ɠɛni zeelizu Pantekote voloi (\xt KKw 2:16-21\xt*).
\iot Unsosuʋɛ
\io1 1. Koto kpulugi vaza fai zooi zu (\xt 1:1—2:17\xt*).
\io1 2. GALA ka ʋaazu ná-nuɓusɛiti ta ta-yooi ɠizosu (\xt 2:18—4:21\xt*).
\c 1
\s Kotogi ta fɔɔvɔgi ʋaa vai
\p
\v 1 Wɛlɛ keela wooi ʋa Petuwɛle ná-doun zunui Zowɛle sɔlɔɔni Ɠɔoɠɔ GALAGI ya.
\b
\q
\v 2 À nii mɛni, wɔi wo ga kɛwolaiti!
\q À woilo nii ma, zooi zu nuɓusɛiti pɛ.
\q Anɠɛ nɛi nii ɠɛɠala vai ta ɠɛɛni wa-yeeɠɛɠalai zu,
\q ɓaa wo-mɛmɛwolani ta-ziɛgi zu?
\q
\v 3 À suɠula wo-lointi ma,
\q naati ɓalaa ti daazeeli ti-lointi ma,
\q tɔnɔ ma lointi ɓalaa ti ʋa ɗa bo ʋelela ʋele yeeɠɛɠalai zu nuiti ma.
\q
\v 4 Nii kotokɔliiti ti zɛgai ná,
\q kotogiti ti naa mia,
\q nii kotogiti ti zɛgai ná,
\q kolegiti ti naa mia,
\q nii kolegiti ti zɛgai ná,
\q kpazinɛgiti ti naa mia.
\b
\q
\v 5 À wuun, wo wɔlɔ, wɔigiti dɔɔi wo zogai!
\q Dɔɔ ɓɔle nuiti, wo pɛ à kpee lo,
\q tɔɔzei dɔɔ niinɛi ɠula vai ʋa wo-la.
\q
\v 6 Mazɔlɔɔ ani vului ma ɠɔɔɓɔ kiligaa ti wuzeɠea nà-zooi laalɔɠɔma.
\q Ti mɔinʋɛ gola, ti-zɛbɛi wɔɔlɔ,
\q ti-ɲiigaiti kulaʋɛ ga zala zinɛi ɲiigaiti,
\q ti-ɓalɔɠaegiti kulaʋɛ ga zala zaai ɓalɔɠaegiti.
\q
\v 7 Ti nà-leezɛn ɓelei ɠɛa ga teʋebai,
\q ti nà-kooleɠoole guluiti suɠoloɠolo.
\q Ti naati suɠaleɠalea mɛtu, ti ti laaziɛ zooi ma,
\q naati kpekegiti ti ɠolekolega tɔɔzei ani vuluiti ti maamiiʋɛ.
\b
\q
\v 8 Nà-nuɓusɛiti, à wɔlɔ,
\q eɠɛ anzalopoi nii é saa wɔlɔ wo seɠei loai ɠɔba,
\q é ɗa sinigi zaa wɔlɔi wo, nii seiɗai bɛ nɔ feya.
\q
\v 9 Vebɛ zalaɠai ta puya zalaɠa vai ɓega Ɠɔoɠɔ GALAGI zei ʋɛlɛi wu.
\q Zalaɠa ɠula nui niiti ti botii ɠɛɛzu Ɠɔoɠɔ GALAGI ʋɛ, naati ta gaalɛi zu.
\q
\v 10 Kpalagiti suɠoloɠologɛ,
\q zooi ɗa wɔlɔ,
\q mazɔlɔɔ moloiti suɠoloɠologɛ,
\q dɔɔ niinɛi ɓega,
\q gulɔi vɔa.
\q
\v 11 Tii ɠɛ nuiti ti ɓɔlɔa,
\q leezɛn ɓelei makɛ nuiti ta wɔlɔzu ga iɲɔteʋei moloi ta wɔɔlezegi vaa zu,
\q tɔɔzei nii kpein teʋeai kpalagi zu,
\q ti pɛ ti ɠoloɠologa.
\q
\v 12 Leezɛn ɓelei vɔa,
\q kooleɠoole guluiti ti ʋooloa,
\q gelenade gului ɓalaa, ta dɔɔ wului, naa ʋɛɛ pɔme gului ʋa,
\q gwaa wuluiti pɛ ti vɔa,
\q koozunɛ ɲɛɛlɛa nuɓusɛiti saama.
\s Toligi é lo zu so fai ʋa  //  ta maanɛɛnɛ vai
\q
\v 13 À ɓɔɠɔ maaɠili ga saa wɔlɔ wo seɠei, wo ɠɛ gaalɛi zu,
\q wɔi wo ga zalaɠa ɠula nuiti, wo botii ɠɛɛzu zalaɠa ɠulazuʋɛ.
\q À ɲi piin gaazuɠili zu,
\q wɔi wo botii ɠɛɛzu nà-GALAGI ʋɛ,
\q mazɔlɔɔ ti la mɔ ʋaazu ga vebɛ zalaɠa ta puya zalaɠa wa-ƓALAGI zei ʋɛlɛi wu.
\q
\v 14 À zu so kui lo, wo nuiti toli.
\q À kɛwolaiti gaalɛ ba ta nuɓusɛi mɔtaiti pɛ
\q Ɠɔoɠɔ GALAGI wa-ƓALAGI zei ʋɛlɛi ma ɠoizuʋɛ.
\q À wa-maanɛɛnɛ wooiti daazeeli ma.
\b
\q
\v 15 Ee, maanɔɠɔ volo ɠaa!
\q Mazɔlɔɔ Ɠɔoɠɔ GALAGI ná foloi ná-foloi wola maaɓuɠaa,
\q toɠa ʋaazu ga faa zuɠoloɠologi,
\q nii tokoleʋeai GALA Zɛbɛi-Pɛ-Maliɠii ʋɛ.
\q
\v 16 Gi-ɠaazu ɠa gi-ɠɔnɔgi ʋa, é ɗa ɲɛɛlɛ,
\q koozunɛɛi ta kɔkɔi maa ɗa ɠooza ada-ƓALAGI zei ʋɛlɛi ʋa.
\q
\v 17 Ani zuwuiti ti ɗa vɔ pɔlɔ ɓui wu.
\q Molo ɠotaiti suɲakaiti be,
\q ani makɛsuʋɛti ti ɠoloɠologa,
\q mazɔlɔɔ moloi ɓega tɛtɛ.
\q
\v 18 À woilo dɛɛ toganiiti goo ma, ʋelei ti ɓalasu da!
\q Togani ɓulugiti ta ʋilɛni unba, ti la liizu ɠwɛɛ,
\q mazɔlɔɔ ti la mɔ tufa lɛnu sɔlɔɔsu,
\q baala kpulugiti ta boliiti ɓalaa ta vɔɔzu ɠae ma.
\b
\q
\v 19 Ee, Ɠɔoɠɔ GALAGI, ɗa ɠa gè wooɠulazu è ma!
\q Mazɔlɔɔ abui tufa lɛnugiti mia nɔ muluu teʋebai zu,
\q abuzogi dɔɓɔ wului kpein gala.
\q
\v 20 Dɔɓɔ zuaiti ɓalaa ti ɠaaʋotega è ma,
\q mazɔlɔɔ ziɛ laazuʋɛti kpein ti vɔa,
\q tama abui tufa lɛnugiti mia nɔ muluu teʋebai zu.
\c 2
\s Maliɠii ná-foloi wola maaɓuɠaa
\q
\v 1 À koolei vɛ Siyɔn,
\q wo kidaaʋili kpee loo nà-gize ɲadegai ma!
\q Zooi ɠa zei wo nuiti kpein ti ɓali,
\q mazɔlɔɔ Ɠɔoɠɔ GALAGI ná-foloi ɠa ʋaazu, gola maaɓuɠaa.
\q
\v 2 Toɠa ga kpidi ɓɔi volo wolai,
\q buulaavegai ga tonaɓiingi ta ɓumugi.
\q Zɛbɛsu ɠɔɔʋɛbɛ wolai ʋɛtɛ, é ʋaazu,
\q ti ʋaazu, eɠɛʋelei wozai a ɗa seɠe la ma fuaa gizeiti ma.
\q Kaipa kɛɠala vaa la dɛ ɠaani,
\q tama eyɛsu pɛ kɛɠala vaa la mɔ ɠaa ʋelela ʋelei.
\b
\q
\v 3 Abui ɠa faa zuɠoloɠolo ɠɛɛzu tuɠɔʋelei,
\q abuzogi ɗa galai wo mulututu poluʋelei.
\q Aisa ti ʋa ʋa, zooi ɠɛa ɠɛɛni eɠɛ Edɛn kpelei.\f + \fr 2:3 \fr*\ft Wɛlɛ ʋɛ: \+xt Zen 2:8-9\+xt*.\ft*\f*
\q Ti leʋegai ma, ná ɠɛa ga teʋebai maaluai,
\q ani nɔpɛ ge la ɠulazu ti yeewu.
\q
\v 4 Ɗa ti ɠaana, ɗa ɠɛ nɔ sooiti,
\q eɠɛ kɔɔɠɔ nuiti ti ɓizɛzu sooiti kɔma.
\q
\v 5 Ti-maalugi ɠɛɛʋɛ eɠɛ kɔɔɠɔ wotolo mɔinmɔingi lugi,
\q niiti ti ʋilisu kpɔɔnkpɔn gizeiti ma,
\q ɓaa eɠɛ abuzogi lugi, nii é kpataɠala fɔɔi ɠalazu,
\q ɓaa eɠɛ kɔɔɓɔ golai nii zeeɠaaɓaai, é lopele ɓɛtɛzu kɔɔɠɔ vai ma.
\q
\v 6 Ti maaɓuɠazuʋɛ, ɛsɛ pɛ ka luazu,
\q nuiti gaazu ɗa ɓɔi yɔlɛ.
\q
\v 7 Ta ɓizɛzu eɠɛ ɠuluɓaiti,
\q ta ʋilisu siɠigiti ga eɠɛ kɔɔɠɔ nuiti,
\q ɛsɛ ge ɗa li ga letegi nɔ,
\q ta la zeɠezu ná-pelei ʋa.
\q
\v 8 Ta la bɔɔla laaʋilisu,
\q mazɔlɔɔ ɛsɛ ka nɔnɔ ma ʋele ʋa.
\q Ta faaɓaagi kpein maazuɓudɛzu, niiti ti ti luɠɔ,
\q faa nɔpɛ ge la zooga pele leʋesu ti luɠɔ.
\q
\v 9 Ta taai maaleʋesu,
\q ti ɗa ɓizɛ siɠigiti ga,
\q ti ɗa lɔ pɛlɛiti bu ga fenɛtɛlɛ laa ʋelei eɠɛ unma nu.
\q
\v 10 Zooi ɠa ɓalizu ti luɠɔ,
\q geeɠɔlɔgi ɗa ɲiikpi,
\q foloi ta alugi ti ɓidi,
\q somideɠaiti ta-wozakalagi lɔɔɠu.
\q
\v 11 Naama ziɛ su Ɠɔoɠɔ GALAGI ɠa loni ná-kɔɔʋɛbɛi luɠɔ,
\q é ɗa ɓɔɛ ti ʋɔ ga woo wola.
\q Mazɔlɔɔ zɔiti ti ná-devei zosu, ti mɔinʋɛ, ti maayiki.
\q Ɠɔoɠɔ GALAGI ná-foloi ɠa ga folo wola, maayikiai,
\q ɓɛ ɠa a zoo é lo daawu?
\s Galemai Ɠɔoɠɔ GALAGI ʋɔ
\q
\v 12 «À ɠale ma pɔ̀ ʋolu.
\q À ʋa pɔ̀ ʋolu ga wo-yii pɛ,
\q ga zu sogai, ta gɔlɔi, naa ʋɛɛ kidaaʋili kpeeiti ba,»
\q Ɠɔoɠɔ GALAGI wooi ɠana.
\q
\v 13 Wo ɠɔba zeɠeiti tɛi wa ti ʋali ga, kɛni wo-yiiti.
\q À ɠale ma Ɠɔoɠɔ GALAGI ʋɔ, wa-ƓALAGI,
\q mazɔlɔɔ toɠa ga maawɔinɠa ƓALAGI, nii é zaalai veezu,
\q zii la ɠulaa fala, kpɛtɛai wooɠɛɠiladai zu,
\q a ɗa zeɠe maanɔɠɔi naa ʋaa vai ʋolu, é ɠɛa deveni ga é ʋaa la.
\q
\v 14 Ɓɛ ɠa é kwɛɛ ni tanisu kigi la valiboga,
\q é ʋa tuyai loo wo ʋɛ ga pooʋaa?
\q Wa zoo naazu wo ʋa pɔ ga vebɛaniiti ga moloi ta dɔɔi.
\b
\q
\v 15 À koolei vɛ Siyɔn,
\q wo zu so kui lo, wo gaalɛbai maaloli.
\q
\v 16 À nuɓusɛi ɠaalɛ ba,
\q wo maaɓɔ ɲadegai wo.
\q À nu wɔlɔiti gaalɛ ba,
\q ta buzeɠe niinɛgiti,
\q naa ʋɛɛ ɲiimiɓɔlegiti ɓalaa ba.
\q Anzazini niinɛi ɠula daa ʋɛlɛi wu.
\q Anzalopo vulua niinɛi ɓalaa ɠula maazaa pɛlɛi wu.
\q
\v 17 Zalaɠa ɠula nuiti ti wɔlɔ tɛɛ wosuʋɛ ta zalaɠa ɠulazuʋɛ yɔɠɔzuʋɛ,
\q tɛiti ti botii ɠɛɛzu Ɠɔoɠɔ GALAGI ʋɛ,
\q ti GALA fali ɠani: «Ɠɔoɠɔ GALAGI, gi maawɔinɠa, gɛi gi ga ɗa-nuɓusɛiti,
\q mina ɗɔnɔiti dɔ unfegi zu,
\q ti mina ɠɛ ga zii ɠiligiti ta-ɲɛɛɠulasu anii,
\q ti ʋa ɗa ɠɛ ma: ‹Mini ɠa ta-ƓALAGI ná?› »
\s Gooɠaaʋotegi
\q
\v 18 Ɠɔoɠɔ GALAGI wɔinʋɛ ga ná-zooi,
\q ná-nuɓusɛiti maawɔin soga.
\q
\v 19 Ɠɔoɠɔ GALAGI ná-nuɓusɛiti gooɠaaʋotegɛ,
\q é ɠɛ ti ma: «Nà moloi ta dɔɔi leʋesu wo ma,
\q naa ʋɛɛ gulɔi ʋa, wo-yii ɠa lɛi.
\q Gè la mɔ wo ɠɛa pɛ ga zii ɠiligiti ta-ɲɛɛɠulasu anii.
\q
\v 20 Nà wo zili nui maaɠooza wo ʋa,
\q nii é lɛkpɛmaʋɛ nu ɠɔʋɛzu ʋelei,
\q gè daaʋili teʋebai ta fɔɔvɔ zooi zu,
\q ná-kɔɔʋɛbɛi é ʋelelaʋɛ,
\q gè naa ʋili folo ɠulazu ʋele ɓoloɗɛi wu,
\q zɔi é ʋoluzuʋɛ,
\q gè naa ʋili folo liizu ʋele ɓoloɗɛi wu.
\q Maku ɲɔuɲɔugi ɠa lɛ, é fiilɛi vɛɛlo,
\q mazɔlɔɔ é faa ɲɔu wolaiti kɛɛʋɛ ga woye.»
\b
\q
\v 21 Ɗɛigi è ga zooi, mina mɔ lua, ɠoozunɛ, è ɠɔkɔ!
\q Mazɔlɔɔ Ɠɔoɠɔ GALAGI faa wolaiti kɛɛʋɛ.
\q
\v 22 Wa ɓalaa, dɔɓɔ zuaiti, à mina mɔ lua pa.
\q Teʋebai zu lufai ɓalaa ʋɔnɔ ʋolu,
\q guluiti ti waa,
\q kooleɠoole guluiti ta leezɛn ɓeleiti gaalaavega kpekpe.
\q
\v 23 Siyɔn zei wo nuiti, à ɠɔkɔ ga koozunɛɛi,
\q à ɠoozunɛ Ɠɔoɠɔ GALAGI ná-faa zu, wa-ƓALAGI.
\q Samai, toɠa tonai ʋuuzu wa-yooi zu, ʋelei soloogai la,
\q toɠa sabala tonaiti puuzu wo ʋɛ, samai ta foɠoi,
\q ʋelei é ɠɛni kɛɛzu la mɔungi.
\q
\v 24 Molo loɠazuʋɛti daa ɠa ve ga molo ɠae,
\q diɠi wolaiti daa ɠa ve ga dɔɔi ta gulɔi, é ʋooʋa ma.
\b
\q
\v 25 «Konagi niiti kpein kotogiti ti koloɠologa wo ma,
\q ta kolegiti, ta kpazinɛgiti, naa ʋɛɛ kotokɔliiti ba,
\q nà-kɔɔʋɛbɛ wolai naa, nii gè teʋeni wo laalɔɠɔma,
\q nà ti kpein potogi ve wo ya.
\q
\v 26 Wa laami, wo yiɠo,
\q wa Ɠɔoɠɔ GALAGI laaseigi maamusɛ, wa-ƓALAGI,
\q nii é laavɔɔ vaiti kɛai wo ʋɛ.
\q Nà-nuɓusɛiti ti la mɔ lɔa pɛ unfegi zu.
\q
\v 27 Wa suɠwɛɛ naazu ga nà wo zaama, Izilayɛle nuiti,
\q nɔ̀un nà, Ɠɔoɠɔ GALAGI, wa-ƓALAGI,
\q taɠili nɔpɛ ge la ná nɔ̀un polu.
\q Nà-nuɓusɛiti ti la mɔ lɔa pɛ unfegi zu.»
\s GALA Zɛnvui yei vai  //  ma minazeɠegi
\q
\v 28 «Naama vaiti poluma,
\q nà nà-Zɛnvui yeizu nuɓusɛi pɛ ma.
\q Wo-loun zunuiti ta wo-loun anzanuiti ta GALA gooiti bo,
\q wa-ɠɛwola wɔlɔiti ta segiti bo,
\q wa-wuzeɠe niinɛgiti ta kulakɛlɛmaiti ka.
\q
\v 29 Naama voloiti su, nà nà-zɛnvui yei ɓalaa
\q botiɠɛ zunuiti ta botiɠɛ anzanuiti ma.
\q
\v 30 Nà maaɓɛlɛ vaiti kɛ geeɠɔlɔgi zu ta zooi ma,
\q ɲamai ta abui ɠa ɠɛ ná, naa ʋɛɛ abu luului ma lonaɓiingi ʋa.
\q
\v 31 Foloi ɠa ʋote ga kpidii,
\q alugi ɓɔi eɠɛ ɲamai,
\q aisa Ɠɔoɠɔ GALAGI ná-foloi ʋa zeeli,
\q folo wolai nii maayikiai.
\q
\v 32 Naazu zɔi nɔpɛ a wooɠula Maliɠii ma, toɠa ɠizo.
\q Mazɔlɔɔ ʋelei Ɠɔoɠɔ GALAGI bogai la,
\q kɔɔ ʋoolabaiti ta ɠɛ Siyɔn gizei ma, ta Zeluzalɛme,
\q niiti Ɠɔoɠɔ GALAGI ɠa ti loli,
\q ta ɠɛ nui mɔtaiti saama, ta yɛ vulua.»
\c 3
\s Zii ɠiligiti ta-lukpɔi ɠaaleʋe vai  //  GALA bɛ
\q
\v 1 «Gaamazu, naama voloiti,
\q siɛgi zu gè Zuda ta Zeluzalɛme nuiti gaaɠalesu da ma ta-you wɔlɔmai zu,
\q
\v 2 nà zii ɠiligiti kpein gaalɛ ba,
\q gè ti yei pɛtugi zu, nii daaseigi ga: ‹Ɠɔoɠɔ GALAGI ɠa tukpɔɠaaleʋezu›.
\q Nà tukpɔi laalɛ ti wu miná,
\q tɔɔzei nà-nuɓusɛiti ta nà-pogani vaa zu, Izilayɛle nuiti,
\q niiti ti ɠɛa ti vazani zii ɠiligiti saama,
\q ta nà-zooi vaa zu, nii ti ɠɛa gaaɠwɛɛni ʋa.
\q
\v 3 Ti nà-nuɓusɛiti gaaɠwɛɛʋɛ ʋa ga kpakutoomai,
\q ti zunu loungoiti pɔdiʋɛ, ti koloɠolo anzanuiti geya ga ma walii,
\q ti anzanu loungoiti pɔdi, ti dɔɔi ɠeya ga ma walii, ti kpɔle.
\b
\q
\v 4 «Wa ɓalaa, Tiil ta Sidɔn laa wolaiti,
\q naa ʋɛɛ Filisiti ɠoʋi laaiti kpein ba,
\q leeni ɠa wo kolizu mà?
\q Wa pɔ wo potokula ɠɛ ga ze ɓaa? Ɓaa wo laalɛ bù?
\q Ni naa ʋe, su la ɠooza,
\q gè wa-ɠɛɛwotiiti ma ɠasɔi laa wo unma.
\q
\v 5 Wo nà-walii ta nà-zanugi unmaʋɛ,
\q naa ʋɛɛ nà-sɔɔla ɓiigiti ba,
\q wo li ga tiye wa-ɠala pɛlɛiti bu.
\q
\v 6 Wo Zuda ta Zeluzalɛme zei wo nuiti pɔdiʋɛ Gɛlɛki nuiti ma,
\q nii a kɛ wo ti maaɠooza ta-yooi ʋa.
\q
\v 7 Kɛlɛ nɔ̀un, ʋɛ wo ti ʋɔdiai ná,
\q nà ti zeɠezu miná, gè ʋa ga tiye,
\q wa ma, faa ɲɔi nii wo kɛa ga tiye,
\q gè naa ɠaaɠale ma wo ma.
\q
\v 8 Nà wo-loun zunuiti ta wo-loun anzanuiti pɔdi Zuda nuiti ma.
\q Tiya ɓalaa ti naati pɔdi Saɓa zei wo nuiti ma,
\q zooi naa zu nii maaɠoozaai.»
\q Mazɔlɔɔ Ɠɔoɠɔ GALAGI ɠa é boni.
\s Ɲɛpi ɠaaɓelagi ta tukpɔi
\q
\v 9 À zeze ga nii zii ɠiligiti saama:
\q À kɔɔi ɠɛʋele ɓɛtɛ!
\q À kɔɔɠuluɓaiti buzeɠe!
\q Salaʋusuiti nuiti kpein, ti li kɔɔɠɔzuʋɛ,
\q ti lɛ, ti ɲɛpii ɠɔ.
\q
\v 10 À wa-ɠaliiti gain ga boɠa zɔkpɔiti.
\q À wa-molo leʋe woɠaiti gain ga kpɛɛinti.
\q Zɛbɛsulala nui ɠɛ ma: «Nà ga kɔɔɠuluɓai!»
\q
\v 11 À suvilɛ, wo ʋa,
\q wɔi kpein wo ga zii ɠiligiti, wo ná maaɠoolii zu,
\q wo ɠaalɛ ba.
\q Ee, Ɠɔoɠɔ GALAGI,
\q ɗa-ɠɔɔɠɔ nuiti teʋe ti laalɔɠɔma ná!
\b
\q
\v 12 «Zii ɠiligiti ti ʋilɛ pelei ma,
\q ti ɗa li pɛtugi zu, daaseigi ga: ‹Ɠɔoɠɔ GALAGI ɠa tukpɔɠaaleʋezu›.
\q Miná ɠa gè zeizu ná, gè zii ɠiligiti tukpɔɠaaleʋe,
\q niiti ti Izilayɛle maaɠoolii zu.
\q
\v 13 À soo lufa leʋe woɠai zeɠe, mazɔlɔɔ moloi mɔa.
\q À dɔɔ ɠae ɠaaɠolo, mazɔlɔɔ dɔɔɓɔi kpɛtɛzuʋɛ laavega.
\q Diɠi wolaiti daavega, é ʋooʋa ma,
\q mazɔlɔɔ ta-vaa ɲɔi wɔɔlɔʋɛ.»
\b
\q
\v 14 Bɛbɛi ɠaawɔɔlɔʋɛ tukpɔɠaaleʋe ʋɛtugi zu.
\q Mazɔlɔɔ Ɠɔoɠɔ GALAGI ná-foloi maaɓuɠaa,
\q yeei é ʋaazu tukpɔi ɠaaleʋezu la náʋɛ.
\q
\v 15 Foloi ta alugi ti zuɓidia,
\q somideɠaiti ti ma zezei ɠulaa ti ʋa.
\q
\v 16 Ɠɔoɠɔ GALAGI ɠa zikɔzu Siyɔn,
\q gooi ɠa ɠulazu Zeluzalɛme,
\q geeɠɔlɔgi ta zooi ta ɓalizu.
\q Kɛlɛ Ɠɔoɠɔ GALAGI ɠa ɓaazu ná-nuɓusɛiti ma,
\q toɠa ga Izilayɛle nuiti dɔɔɠuzuʋɛ.
\b
\q
\v 17 «Wa suɠwɛɛ naazu ga nà ɠa gè ga Ɠɔoɠɔ GALAGI,
\q wa-ƓALAGI, é zeini Siyɔn, nà-gize ɲadegai ma.
\q Zeluzalɛme ɠa ɲade, wɛɛinti ti la mɔ leʋega ná.
\q
\v 18 Názu, dɔɔ niinɛi ɠa ɠɛ ɠulazu gizeiti ba,
\q nɔnɔi ɗa yei gize ɓufɛgiti kakazuʋɛti,
\q ziɛ yei ʋeleiti kpein ta laa su Zuda yooi zu,
\q ziɛungi laa ɠa leʋe po Ɠɔoɠɔ GALAGI zei ʋɛlɛi wu,
\q é ɗa yei Akasia nɛmɛi zu.
\q
\v 19 Ezipete yooi zu ɠa voo ga nuɓusɛi,
\q Edɔme yooi ɠɛ ga teʋebai,
\q tɔɔzei tooma vai ʋa, ti kɛai ga Zuda yooi,
\q ta sɔbalala nuiti ma ɲamai ʋu vai ti kɛai ná.
\q
\v 20 Kɛlɛ Zuda yooi ta Zeluzalɛme zulaa ɠa ve ɠɔ ga nuɓusɛi.
\q
\v 21 Nà ti maavaayɛsu, tɛiti ti-ma ɲamai ʋuai,
\q gè la ɠɛa dɛ ti maavaayɛni.
\q Ɠɔoɠɔ GALAGI zeizuʋɛ ɠa ɠɛ ga Siyɔn.»