\id HAG - Toma Bible
\ide UTF-8
\h Azé
\toc1 Azé Ná-Sɛʋɛi
\toc2 Azé
\toc3 Azé
\mt1 Azé
\mt2 Ná-Sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Keela woo naanigɔ ɠa é sɛʋɛi nii zu, nii GALA ge boni GALA goo wo nui Azé ma. Yeeɠɛɠalai niiti Azé ti ɠilagilagi zɔlɔɔni ma, é naati bogɛ (\xt 1:1; 2:1, 10, 20\xt*). Keela wooiti feeʋɛ zea alu naanigɔ laawu, kona undɔɔlugɔ puufelegɔ (520) ma, aisa Yesu Kilista ʋa zɔlɔɔ. Naama ziɛgi zu Pɛɛlese masadai pilɛ sɔlɔɔni Ɓaɓilɔne masadai ma, tama Pɛɛlese nuiti ti vaani bu ga Zuifuiti ti ɠale ma Zeluzalɛme.
\ip Azé ná-keela wooi ɠɛni zelii losu Zuifuiti ma, ga ti ɠaaɓaaʋɛ ti-ɓɔɠɔ ʋɛlɛiti to fai nɔ ma, ti ʋoluave GALA sei ʋɛlɛi lo fai ʋa, Maliɠii ná-pɛlɛi (\xt 1:4\xt*). GALA ge ɠɛ naa ɠa é kɛai ti la tuya zɔlɔɔni, ta ta-molo leʋeiti, ta-wulu waaiti kula vai, naa ʋɛɛ lɔɔ ɓɛtɛ vaiti, gola maalɔiɗai. Naama vaiti poluma Izilayɛle nuɓusɛiti ti ɠoloni Maliɠii ʋɛ, ti GALA sei ʋɛlɛi lo fai ɠaaɓela. GALA ge minazeɠeni ga GALA sei ʋɛlɛ niinɛi ná-lɛbiyai ɠa wɔɔlɔzu ma mɔungi nɔnɔi ʋa (\xt 2:9\xt*). É minazeɠeni ɓalaa ga toɠa tuya loozu ti ʋɛ.
\iot Unsosuʋɛ
\io1 1. Azé ná-keela woo mɔungi, naa ʋɛɛ nuɓusɛiti ta-wooɠaaʋotegi ʋa (\xt 1:1-15\xt*).
\io1 2. Azé ná-keela wooi velesiɛi (\xt 2:1-9\xt*).
\io1 3. Azé ná-keela wooi zaʋasiɛi (\xt 2:10-19\xt*).
\io1 4. Azé ná-keela wooi naanisiɛi (\xt 2:20-23\xt*).
\c 1
\s GALA sei ʋɛlɛi lo fai ʋolu  //  ma yeeɠɛɠalai
\p
\v 1 Masagi Daliyuse ná-masadai ma ɠona felesiɛi ma alu dɔzitasiɛi ma volo mɔungi ma, Ɠɔoɠɔ GALAGI ɓɔɛni GALA goo wo nui Azé ʋɔ, ga é daazeeli Zuda you zɛʋɛ ɠundiɠii Zoloɓaɓɛle ma, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ma, Yewosadake ná-doun zunui, é ɠɛ ti ma: 
\v 2 Ɠɔoɠɔ GALAGI, Fai-Pɛ-Maliɠii wooi ɠaa: «Niima nuiti ta ɠɛɛzu ma: ‹Yeeɠɛɠalai la dɛ zeelini, ga Ɠɔoɠɔ GALAGI zei ʋɛlɛi ʋa lo ʋolu.› »
\p
\v 3 Ɠɔoɠɔ GALAGI laawooi laazeelini ti ma, GALA goo wo nui Azé ya, é ɠɛ ti ma: 
\v 4 «Yeeɠɛɠalai ɠa nɛi wo ʋɛ ɓaa, wo zei wa-ʋɛlɛ ʋagɔiti bu, ti maanɛai, tama GALA sei ʋɛlɛi ɠoloɠologai?»
\p
\v 5 Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 
\v 6 Wo ani mɔinmɔin fazaga, kɛlɛ tago nɔ ɠa wo sɔlɔɔsu, wa daami wosu, é la kula ɠɛɛzu ga woye, wa ɓɔɔlezu, kɛlɛ é la wo yiilɛizu, wa ɓɔɠɔ maaɠilizu, die ge la zeiɗa wo ma, botiɠɛ nui zalai ɠa ɠɛɛzu, eɠɛ a ɠɛ ʋuuzu ɓɔlɔ zaɠai zu.»
\p
\v 7 Ɠɔoɠɔ GALAGI, Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 
\v 8 À lɛ gizeiti ma, wo ʋa ga guluiti, wo sèi ʋɛlɛi lo. Naazu kòozu ɠa nɛɛ miná, ná lɛbiyai zɔlɔɔ.» Ɠɔoɠɔ GALAGI ɠa é boga. 
\v 9 «Wo ɠigi loni ani mɔinmɔin ba, kɛlɛ tago nɔ ɠa wo sɔlɔɔni wa-ɓalagaʋɛti. Nágoi ɠa wo ʋaani la wa-ʋɛlɛiti bu, kɛlɛ gè laa viilɛi ʋuuni ma, gaaʋala ba. Leeni vaa zu? Tɔɔzei sèi ʋɛlɛi vai ʋa, koloɠologai, tama wo pɛ wa ɠaaɓaazu wa-ʋɛlɛiti nɔ ma,» Ɠɔoɠɔ GALAGI, Fai-Pɛ-Maliɠii wooi ɠana. 
\v 10 «Naa ɠa é kɛɛzu, geeɠɔlɔgi la kɛɛzu, é ʋa duɓui ve, zooi la vaazu bu, ani a ʋa ʋɔnɔ. 
\v 11 Nà ɠa gè fɔɔvɔgi maaloliga zooi ma, ta gizeiti ma, ta kpalagiti ma, ta leezɛn ɓeleiti, ta wolive ɓeleiti, ta ziinziin ganigiti kpein zooi ma, ta nuɓusɛiti ta suaiti pɛ, é ɠɔkula nuɓusɛiti ta-wotiiti pɛ ma.»
\p
\v 12 Zoloɓaɓɛle, Seyalitiyɛle ná-doun zunui, ta zalaɠa ɠula ɠundiɠi wolai Zozuwe, Yewosadake ná-doun zunui, ta nuɓusɛi mɔtaiti pɛ, niiti ti ʋaani ti ɠula duɔlai zu, naati pɛ ti Ɠɔoɠɔ GALAGI, ta-ƓALAGI wooi zeɠeni ga gaamai, niigi GALA goo wo nui Azé boni ti ma. Keela wooi Ɠɔoɠɔ GALAGI ta-ƓALAGI feeni zea, é naa ɠaaɓelani ga pagɔ, nuɓusɛiti ti luani Ɠɔoɠɔ GALAGI ʋa. 
\v 13 Naa ʋoluma, Azé, Ɠɔoɠɔ GALAGI ná-keelai é teʋeni, é Ɠɔoɠɔ GALAGI wooi woni ti ma, é ɠɛ ti ma: «Nà ya, nà wo ʋa! Ɠɔoɠɔ GALAGI wooi ɠana.» 
\v 14 Ɠɔoɠɔ GALAGI zɛbɛ niinɛ veeni Zuda you zɛʋɛ ɠundiɠii Zoloɓaɓɛle ʋɛ, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ʋɛ, Yewosadake ná-doun zunui, ta nuɓusɛi mɔtaiti pɛ bɛ, niiti ti ʋaani ti ɠula duɔlai zu. Ti pɛ ti liini Ɠɔoɠɔ GALAGI, Fai-Pɛ-Maliɠii zei ʋɛlɛi wu, ti botii lɔɔzei, 
\v 15 naa ɠɛɛni, masagi Daliyuse ná-konagi velesiɛi ma alu dɔzitasiɛi ma folo ʋuufelegɔ maazu naanigɔi (24) ma.
\c 2
\s GALA sei ʋɛlɛ niinɛi ná-pagi
\p
\v 1 Masagi Daliyuse ná-masadai ma ɠona felesiɛi ma alugi lɔfelasiɛi ma volo ʋuufelegɔ maazu ɠilagi (21) ma, Ɠɔoɠɔ GALAGI laawooi laazeelini ga GALA goo wo nui Azé maaʋele, é ɠɛ ma: 
\v 2 «Nii ɠa ɗa bo Zuda you zɛʋɛ ɠundiɠii Zoloɓaɓɛle ma, Seyalitiyɛle ná-doun zunui, ta zalaɠa ɠula ɠundiɠi wolai Zozuwe ma, Yewosadake ná-doun zunui, ta nuɓusɛiti mɔtaiti pɛ ma, niiti ti ʋaani ti ɠula duɔlai zu, ɠɛ ti ma: 
\v 3 ‹Ɓɛ ɠa é wo zaama, é niima ƓALA sei ʋɛlɛi tɛi kaani ná-pada mɔungi zu? Wa pɛtɛsu ɠale niizu? É la mɔ wo ɠaazu ga ani nɔpɛ niizu, kɛlɛ? 
\v 4 Niizu, zɛbɛzeɠe, Zoloɓaɓɛle. Zɛbɛzeɠe, zalaɠa ɠula ɠundiɠi wolai Zozuwe, Yewosadake ná-doun zunui,› » Ɠɔoɠɔ GALAGI wooi ɠana. « ‹À zɛbɛzeɠe, wa ʋe, zooi zu nuɓusɛiti pɛ,› » Ɠɔoɠɔ GALAGI wooi ɠana. « ‹À ɓɔɠɔ ve botii ya, mazɔlɔɔ nà wo ʋa,› » Ɠɔoɠɔ GALAGI, Fai-Pɛ-Maliɠii wooi ɠana. 
\v 5 « ‹Gè naama minazeɠegi ɠɛɛni wo ʋɛ, siɛgi zu wo ɠulani la Ezipete yooi ʋa. Nà-Zɛnvui ɠa wo zaama, à mina lua ɲɛgɛlɛin!›
\p
\v 6 «Mazɔlɔɔ Ɠɔoɠɔ GALAGI, Fai-Pɛ-Maliɠii wooi ɠaa: ‹Naa ʋoluma mɔnɔ, su la mɔ ɠoozazu gè geeɠɔlɔgi ɓali ta zooi, ta kpoloɗɛi ta zooiti. 
\v 7 Nà zii ɠiligiti pɛ kɛɛzu unga wuulee, ta-naavoloiti pɛ ta ʋa ʋɛ, nà niima ƓALA sei ʋɛlɛi laave ga padai.› Ɠɔoɠɔ GALAGI, Fai-Pɛ-Maliɠii ɠa é boga. 
\v 8 ‹Walii kpein ka ga nɔ̀nɔ, zanugi kpein ka ga nɔ̀nɔ,› Ɠɔoɠɔ GALAGI, Fai-Pɛ-Maliɠii wooi ɠana. 
\v 9 ‹Naazu, niima ƓALA sei ʋɛlɛ niinɛi ɠa ʋa, é ɗa volo, é leʋe ma mɔungi ʋa.› Ɠɔoɠɔ GALAGI, Fai-Pɛ-Maliɠii ɠa é boga. ‹Nà ziilɛigi zei miná.› » Ɠɔoɠɔ GALAGI, Fai-Pɛ-Maliɠii wooi ɠana.
\s Tuyai ma minazeɠegi bogai nuɓusɛiti bɛ,  //  ti ɠɔzɔai
\p
\v 10 Masagi Daliyuse ná-masadai ma ɠona felesiɛi, ma alu taaʋuusiɛi ma volo ʋuufelegɔ maazu naanisiɛi (24) ma, Ɠɔoɠɔ GALAGI ɓɔɛni GALA goo wo nui Azé ʋɔ, é ɠɛ ma: 
\v 11 «Ɠɔoɠɔ GALAGI, Fai-Pɛ-Maliɠii wooi ɠaa: ‹Zalaɠa ɠula nuiti gaazaɠa, ti ɠi fe è ʋɛ niima vaiti su: 
\v 12 Ni zalaɠa zua ɲadegai ta a ɠɛna nui ta ná-seɠe la, seɠei naa a vɔɔɠuna ɓului ʋa, ɓaa ɠɔnɔgi ta, ɓaa dɔɔi, ɓaa gulɔi, ɓaa daamiani nɔpɛ nɔ, naama anii ɠa ɲade niina ɓaa?› » Zalaɠa ɠula nuiti ti gooɠaaʋoteni, ti ɠɛ ma: «Ɓa-o.» 
\v 13 Azé ti ɠaazaɠani mɔnɔ, é ɠɛ ti ma: «Ni nui ta a ɠɔzɔna, tɔɔzei é vɔɔɠuni nu ʋoomai ta ʋa, ni a vɔɔɠuna daamianigi tanɔpɛ ba, naa ɠa ɠɔzɔ niina ɓaa?» Zalaɠa ɠula nuiti ti gooɠaaʋoteni, ti ɠɛ ma: «Ungo, toɠa ɠɔzɔ.» 
\v 14 Názu ɠa Azé kpɔɛi zeɠeni la, é ɠɛ ti ma: «Deɠɛmu zekana niima nuɓusɛiti ti la, zekana zii nii la gàazu, zekana ta-woti zulɔnɔgi kpein ge la, nii ti feezu bɛ̀ ɠana, kɔzɔʋɛ,» Ɠɔoɠɔ GALAGI wooi ɠana.
\p
\v 15 «Niizu, à ɠida lɛɛ bu ga pagɔ, nii é ʋaazu ɠɛɛzu, é zo za ma, é li. Aisa wo ʋa kɔtuiti da ɓɔɠɔ maazu, Ɠɔoɠɔ GALAGI zei ʋɛlɛi lo fai zu, 
\v 16 leeni ɠa é ɠɛɛni ga woye? Ni nui ɠigi ɠana panisu ʋuufelegɔ (20) ʋa ná-kpalagi zu, puugɔi nɔ ɠa é sɔlɔɔsu ná. Ni nui ɠigi ɠana litɛlɛ ʋuulɔɔlugɔ (50) ʋa ná-dɔɔi ʋɔ bɛ, puufelegɔi (20) nɔ ɠa é sɔlɔɔsu ná. 
\v 17 Gè vɔɔɠuni wo ʋa, gè wa-wotiiti pɛ ma lɔnɔ fai ɠaaʋala ba, ga siinziin ganigiti ta-zeeɓɛiti, ta sakɔtuiti, kɛlɛ wo la zeɠeni yee ma, wo ʋa ʋa pɔ̀,» Ɠɔoɠɔ GALAGI wooi ɠana. 
\v 18 « ‹Za ɠa ga alugi laaʋuusiɛi ma volo ʋuufelegɔ maazu naanisiɛi (24), yeei Ɠɔoɠɔ GALAGI zei ʋɛlɛi lo fai lɔɔzeini la. Niizu, à ɠida lɛɛ bu ga pagɔ, nii é ʋaazu ɠɛɛzu, é zo za ma, é li. 
\v 19 Kɛbɛ ani zuwu nɔpɛ ge la mɔ wo ya kotaiti su, kɛlɛ? Leezɛn ɓelei, ta kooleɠoole guluiti, ta gelenade guluiti ta wolive wuluiti, tanɔpɛ ge la gwaa woni, ɲɛgɛlɛin. Kɛlɛ é zo za voloi ma, nà nà-tuyai zuwɔɔlɔzu wo ʋɛ.› »
\s Minazeɠegi é woni Zoloɓaɓɛle ʋɛ,  //  Maliɠii yiimazeɠeni la
\p
\v 20 Ma volo ná nɔ, alugi ma volo ʋuufelegɔ maazu naanigɔi (24) ma, Ɠɔoɠɔ GALAGI ɓɔɛni mɔnɔ Azé ʋɔ, ná zeizu velesiɛi zu, é ɠɛni ma: 
\v 21 «Ɓɔɛ Zoloɓaɓɛle ʋɔ, Zuda you zɛʋɛ ɠundiɠii, è ɠɛ ma: ‹Nà ʋaazu geeɠɔlɔgi ɲiikpisu ta zooi. 
\v 22 Nà ʋaazu masagiti tokasu, gè zii ɠiligiti ta-masadaiti ma zobogiti koloɠolo, gè kɔɔɠɔ wotoloiti daaʋɛ ta ti ɓizɛ nuiti, sooiti ta za, ti ɠɔma nuiti ti ɓɔɠɔ ʋa.› 
\v 23 Ɠɔoɠɔ GALAGI, Fai-Pɛ-Maliɠii wooi ɠaa: ‹Kɛlɛ naama volo ná, nà boti ɠalivaazu è ma, nà-botiɠɛ nui, Zoloɓaɓɛle, ɗɛi è ga Seyalitiyɛle ná-doun zunui,› » Ɠɔoɠɔ GALAGI wooi ɠana. « ‹Gè yiimazeɠea ga ɗe, gè è ɠɛ ga nà-balaɠaegi, nii nu ɠa ɗa poogi ɠɛ la.› » Ɠɔoɠɔ GALAGI, Fai-Pɛ-Maliɠii wooi ɠana.