\id EZR - Toma Bible
\ide UTF-8
\h Ɛsedalase
\toc1 Ɛsedalase Ná-Sɛʋɛi
\toc2 Ɛsedalase
\toc3 Ɛsd
\mt1 Ɛsedalase
\mt2 Ná-Sɛʋɛi
\imt Sɛʋɛi lɔɔzeizuʋɛ ma woo mɔungiti
\ip Ɛsedalase ta Neɠemi ta-zɛʋɛiti ta dɛɛzu ʋelei zobogi veeni la Izilayɛle nuiti zea ga ti ɠale ma ta-yooi zu, ti ɓega ʋoluma ga li ga tiye duɔlai zu Pɛɛlese ta Ɓaɓilɔne. Ɛsedalase wola ɠaazulogɛ GALA sei ʋɛlɛi lo pelei ʋa Zeluzalɛme. Faaɠwɛ nu mɔinmɔin daaʋɛ da ga Ɛsedalase ɠa é Dɔlɔ Sɛʋɛ felegɔiti kɛa ta é ti ɠaalɛ ba, naa ʋɛɛ sɛʋɛi nii ʋa tɔ ɓɔɠɔ daaseigi ba, ta Neɠemi nɔnɔi. Ni Ɛsedalase ɓɔɠɔi la ɠɛni de, kɛlɛ tanisu nu ɠila kpegi nɔ ɠa é naama zɛʋɛiti pɛ gaalɛai ba. Kɛɛʋɛ eɠɛ Ɛsedalase Ná-Sɛʋɛi ɠaalɛɛʋɛ ba kona unnaanigɔ puunaanigɔi ma (440), aisa Yesu Kilista ʋa zɔlɔɔ, kɛlɛ ma zɛʋɛi ná tanigaa ɠɛɛʋɛ yeeɠɛɠalai taɠiligaa zu.
\ip Ɛsedalase Ná-Sɛʋɛi ɠa dɛɛzu ʋelei GALA ge levega la, masagi Siluse ɗa va bu, é zobogi ve Izilayɛle nuiti zea, ti ɠale ma ta-yooi zu, ta ti GALA sei ʋɛlɛi lo ʋolu. Naa ɓalaa ɠɛni ga GALA gooi nii Zelemi boni, naa ʋilɛ fai su (\xt Zel 29:10-14\xt*). Izilayɛle zili nui tanigaa ti ɠɛni ná, niiti ti GALA sei ʋɛlɛi lo fai laalɔɠɔma. Ma wotii loni vɔlɔ yeeɠɛɠalai tanigaa laawu, kɛlɛ gaaɓela, Izilayɛle nuiti ti zooni GALA ná-kpɔbai maaʋele ma, ti GALA sei ʋɛlɛi lo ʋolu. Ɛsedalase loni ɓalaa Izilayɛle nuiti tuɠɔ, ti ti-ziɛ ʋeleiti maavalibo. Naa ɠɛni ga ta-minazeɠegi niinɛ vai ga ti ziɛ ga GALA ná-tɔgiti.
\iot Unsosuʋɛ
\io1 1. Ʋelei Siluse zobogi veeni la Izilayɛle nuiti zea ga ti ɠale ma ta-yooi zu, ta pɛlɛyeɠeiti daaseigiti niiti ti ɠaleni ma (\xt 1:1—2:70\xt*).
\io1 2. GALA sei ʋɛlɛi lo fai ʋolu Zeluzalɛme (\xt 3:1—6:22\xt*).
\io1 3. Ɛsedalase ɠaaɠaleni ma Zeluzalɛme, naa ʋɛɛ Izilayɛle ʋɛlɛyeɠei tanigaa ʋa (\xt 7:1—8:36\xt*).
\io1 4. Ɛsedalase loni Izilayɛle nuiti tuɠɔ ga ta-minazeɠegi niinɛ ti yɔɠɔzu ta GALA (\xt 9:1—10:44\xt*).
\c 1
\s Siluse zobogi vee vai ga  //  GALA sei ʋɛlɛi lo ʋolu
\r (2 Dɔlɔ Sɛʋɛi 36:22-23)
\p
\v 1 Pɛɛlese masagi Siluse ná-masa fai ma ɠona mɔungi, nii a kɛ Ɠɔoɠɔ GALAGI laawooi ʋilɛ su, nii GALA goo wo nui Zelemi boni, é Pɛɛlese masagi Siluse yiiziɠani koozu. Naa zɛba é niima wooi ɠɛ ga sɛʋɛ, naa ʋoluma ti zeze la ná-masa zooi zu ná pɛ, ti ɠɛ ma: 
\v 2 «Pɛɛlese masagi Siluse wooi ɠa é ga nii: ‹Ɠɔoɠɔ GALAGI, nii é geeɠɔlɔgi zu, naa masa zooi kpein dɔɔʋɛ zèezu eteai zu, é botii veeʋɛ zèa ga gè GALA sei ʋɛlɛ lo bɛ Zeluzalɛme, Zuda yooi zu. 
\v 3 Wo zaama, ɓɛɛni ka ti ga ná-nuɓusɛiti? Ta-ƓALAGI, Ɠɔoɠɔ GALAGI ɠa yɛ ti ʋa, ti liina, ti lɛ Zeluzalɛme, Zuda yooi zu, ti Ɠɔoɠɔ GALAGI zei ʋɛlɛi lo, Izilayɛle ná-GALAGI, nii ti dɛbizu Zeluzalɛme. 
\v 4 Ʋɛ nɔpɛ ná-nui tanigaa ti ná, ti-zeiɲɔɠɔiti ti ɓɔ ti ʋa ga walii ta zanugiti, ta anii ma zii pɛ, naa ʋɛɛ toganiiti ba, ta vebɛaniiti ti daai ɠisu Zeluzalɛme ƓALAGI zei ʋɛlɛi lo fai zu.› »
\s Zeluzalɛme ziɛi  //  ma ɠɛʋele ɓɛtɛi
\p
\v 5 Zuda ta Ɓɛnzamɛn ʋɛlɛyeɠe ɠundiɠiiti kpein ta zalaɠa ɠula nuiti, naa ʋɛɛ Levi nuiti, ta niiti kpein GALA ge puuni ti yiima, ti ɠɛʋele ɓɛtɛni ga ti ɠale ma ta-yooi zu, ti Ɠɔoɠɔ GALAGI zei ʋɛlɛi lo Zeluzalɛme. 
\v 6 Ti-zeiɲɔɠɔiti ti ɓɔni ti ʋa ga sɔɔlaiti ti ga walii, ta zanugi, ta sɔɔla ɠiligaa, sɔɔla ɓiigi ma zii pɛ, naa ʋɛɛ toganiiti ba, vebɛani ɓulukpulugiti ti la naati ba.
\p
\v 7 Masagi Siluse ɓɔɠɔi ɗa ɠula ga sɔɔla ɓiigiti pɛ niiti Neɓukadenɛzaal ti zeɠeni Ɠɔoɠɔ GALAGI zei ʋɛlɛi wu Zeluzalɛme, é li ga tiye, é ti la ná-galagiti ta-ʋɛlɛi wu. 
\v 8 Pɛɛlese masagi devei veeni naavolo makɛ nui Miteledate ya, naa nii pɛ feeni Zuda ɠundiɠii Sɛsɛɓasaal ya. 
\v 9 Ti-liegɔi ɠaa: zanu taza ʋuusaʋagɔ (30), ta wali laza waagila (1.000), boɠa ʋuufele maazu taaʋuugɔ (29), 
\v 10 zanu ziawɔ ʋuusaʋagɔ (30), wali ɗaawɔi ma ʋɛɛda felegɔi ɠɛ ga unnaanigɔ puugɔ (410), sɔɔlai mɔtai ɠɛni ga waagila (1.000). 
\v 11 Zanu sɔɔlai ta wali zɔɔlai kpein kpɔga ɠɛni ga waadɔɔlugɔ unnaanigɔ (5.400). Sɛsɛɓasaal liini ga ti pɛ ta-yooi zu, kula zou ʋa nuiti galesuʋɛ ma, ti zeɠe Ɓaɓilɔne, ti li Zeluzalɛme.
\c 2
\s Zuifuiti tɔɠɔiti kaa,  //  ti ɠula duɔlai zu
\r (Neɠemi 7:4-72)
\p
\v 1 Zuda you zɛʋɛi ma nuiti tɔɠɔiti pɛtɛ, niiti Ɓaɓilɔne masagi Neɓukadenɛzaal liini ga tiye duɔlai zu Ɓaɓilɔne, ta ti ɠaleni ma Zeluzalɛme ta Zuda yooi zu, ti zei ta-laaiti su ti ɠilagilagi pɛ. 
\v 2 Nui niiti ka ti loni ti luɠɔ: Zoloɓaɓɛle, Zozuwe, Neɠemi, Selaya, Leyɛlaya, Maledosé, Ɓilisan, Misapaal, Ɓigivayi, Lewume, Ɓaana.
\b
\li1 Izilayɛle nuɓusɛiti tiegɔi ɠaa:
\li2
\v 3 Paleyɔse mavofodaiti waafelegɔ ungila puulɔfela maazu felegɔ (2.172),
\li2
\v 4 Sefatia mavofodaiti unsaʋagɔ puulɔfela maazu felegɔ (372),
\li2
\v 5 Ala mavofodaiti undɔfela puulɔfela maazu lɔɔlugɔ (775),
\li2
\v 6 Paɠate-Moaɓe mavofodaiti, Zozuwe ta Zoaɓe ta-ʋɛlɛyeɠei wu waafelegɔ undɔsaʋa puugɔ maazu felegɔ (2.812),
\li2
\v 7 Elame mavofodaiti waagila unfele puulɔɔlu maazu naanigɔ (1.254),
\li2
\v 8 Zatu mavofodaiti untaaʋuugɔ puunaani maazu lɔɔlugɔ (945),
\li2
\v 9 Zakayi mavofodaiti undɔfela puulɔzita (760),
\li2
\v 10 Ɓani mavofodaiti undɔzita puunaani maazu felegɔ (642),
\li2
\v 11 Ɓeɓayi mavofodaiti undɔzita puufele maazu saʋagɔ (623),
\li2
\v 12 Azagade mavofodaiti waagila unfele puufele maazu felegɔ (1.222),
\li2
\v 13 Adonikame mavofodaiti undɔzita puulɔzita maazu lɔzita (666),
\li2
\v 14 Ɓigivayi mavofodaiti waafelegɔ puulɔɔlugɔ maazu lɔzita (2.056),
\li2
\v 15 Adin mavofodaiti unnaani puulɔɔlu maazu naanigɔ (454),
\li2
\v 16 Atɛɛl mavofodaiti, Ezekiase ná-pɛlɛyeɠei wu puutaaʋuu maazu lɔsaʋa (98),
\li2
\v 17 Ɓesayi mavofodaiti unsaʋagɔ puufele maazu saʋagɔ (323),
\li2
\v 18 Yola mavofodaiti ungila puugɔ maazu felegɔ (112),
\li2
\v 19 Ɠasume mavofodaiti unfelegɔ puufele maazu saʋagɔ (223),
\li2
\v 20 Giɓaal mavofodaiti puutaaʋuugɔ maazu lɔɔlugɔ (95),
\li2
\v 21 Ɓɛteleyɛme nuiti ungila puufele maazu saʋagɔ (123),
\li2
\v 22 Netofa nuiti puulɔɔlu maazu lɔzita (56), 
\v 23 Anatɔte nuiti ungila puufele maazu lɔsaʋa (128),
\li2
\v 24 Azamavɛte nuiti puunaani maazu felegɔ (42),
\li2
\v 25 Kiliyate-Yeyalime nuiti, ta Kefila nuiti, naa ʋɛɛ Ɓeyelɔte nuiti ba, undɔfela puunaani maazu saʋagɔ (743),
\li2
\v 26 Lama nuiti ta Geɓa nuiti undɔzita puufele maazu ɠila (621),
\li2
\v 27 Mikemase nuiti ungila puufele maazu felegɔ (122),
\li2
\v 28 Ɓetɛle nuiti ta Ayi nuiti unfelegɔ puufele maazu saʋagɔ (223),
\li2
\v 29 Neɓo nuiti puulɔɔlu maazu felegɔ (52),
\li2
\v 30 Magaɓise mavofodaiti ungila puulɔɔlu maazu lɔzita (156),
\li2
\v 31 Elame zɔi mavofodaiti waagila unfele puulɔɔlu maazu naanigɔ (1.254),
\li2
\v 32 Ɠalime mavofodaiti unsaʋagɔ puufele (320),
\li2
\v 33 Lode, ta Ɠadide, naa ʋɛɛ Wono nuiti ba undɔfela puufele maazu lɔɔlugɔ (725),
\li2
\v 34 Zeliko nuiti unsaʋagɔ puunaani maazu lɔɔlugɔ (345),
\li2
\v 35 Senaa nuiti waasaʋagɔ undɔzita puusaʋagɔ (3.630).
\b
\li1
\v 36 Zalaɠa ɠula nuiti tetegi:
\li2 Yedaya ná-doun zunuiti, Zozuwe ná-pɛlɛyeɠei wu untaaʋuugɔ puulɔfela maazu saʋagɔ (973),
\li2
\v 37 Imɛɛl mavofodaiti waagila puulɔɔlu maazu felegɔ (1.052),
\li2
\v 38 Pasuul mavofodaiti waagila unfele puunaani maazu lɔfela (1.247),
\li2
\v 39 Ɠalime mavofodaiti waagila puugɔ maazu lɔfela (1.017).
\b
\li1
\v 40 Levi nuiti tetegi zu:
\li2 Zozuwe ta Kadimiyɛle, ta Ɓinuwi naa ʋɛɛ Wodavia ʋa, ti-mavofodaiti puulɔfela maazu naanigɔ (74).
\b
\li1
\v 41 Guye loo nuiti:
\li2 Azafe mavofodaiti ungila puufele maazu lɔsaʋa (128).
\b
\li1
\v 42 Siɠida makɛ nuiti:
\li2 Salume, ta Atɛɛl, Talamɔn, ta Akuɓe, Ɠatita, ta Soɓai ti-mavofodaiti ungila puusaʋagɔ maazu taaʋuugɔ (139).
\b
\li1
\v 43 GALA sei ʋɛlɛi wu wotiɠɛ nuiti ti ɠɛni ga niiti ti-laaseigiti ti ʋaazu, ti-mavofodaiti:
\li2 Siɠa, Ɠasufa, Taɓayɔte, 
\v 44 Kelɔse, Siaɠa, Padɔn, 
\v 45 Leɓana, Ɠagaɓa, Akuɓe, 
\v 46 Ɠagaɓe, Samelai, Ɠanan, 
\v 47 Gidɛle, Gaɠaal, Leaya, 
\v 48 Lesin, Nekoda, Gazame, 
\v 49 Uza, Paseya, Ɓesayi, 
\v 50 Asena, Meɠunime, Nefusime, 
\v 51 Ɓakeɓuke, Ɠakufa, Ɠaaleɠuul, 
\v 52 Ɓasalute, Meyida, Ɠaalesa, 
\v 53 Ɓaalekɔse, Sisela, Tama, 
\v 54 Nesiya, Ɠatifa.
\b
\li1
\v 55 Salomɔn ná-botiɠɛ nuiti ti-mavofodaiti ti ɠɛni ga niiti ti-laaseigiti ti ʋaazu, naati ti-mavofodaiti:
\li2 Sotayi, Sofelɛte, Peluda, 
\v 56 Yaala, Daalakon, Gidɛle, 
\v 57 Sefatia, Ɠatile, Pokɛlɛte-Ɠasebayime, Ami.
\b
\li2
\v 58 GALA sei ʋɛlɛi wu wotiɠɛ nuiti, ta Salomɔn ná-botiɠɛ nuiti ti-mavofodaiti pɛ kpɔga ɠɛni ga nu unsaʋagɔ puutaaʋuu maazu felegɔ (392).
\b
\li1
\v 59 Tanigaa ti zeɠeni taai niiti su ti ʋa: Tɛle-Mela, Tɛle-Yaalesa, Keluɓe-Adan, Imɛɛl, kɛlɛ ti la ɠɛni zooni ti ʋa ta-wolodaiti dɔlɔ ta ti-mɛmɛwolani nii é dɛɛzu ga ta ga Izilayɛle nu, ti laaseigiti kaa:
\li2
\v 60 Delaya, ta Toɓiya, ta Nekoda ti-mavofodaiti undɔzita puulɔɔlu maazu felegɔ (652).
\li1
\v 61 Zalaɠa ɠula nuiti ɓalaa saama, tanigaa ti ɠɛni naama ɠɛʋelei zu, naati daaseigiti kaa:
\li2 Ɠaɓaya ta Akɔse naa ʋɛɛ Ɓaalazilayi ʋa, ti-mavofodaiti, gaaɓelagi naa Galaade nui Ɓaalazilayi laaseigi zeɠeni mazɔlɔɔ é naa ná-doun anzanui vuluni.
\p
\v 62 Sɛʋɛi nii ti-mɛmɛwolani daaseigi su, ti gaiziɛni, kɛlɛ ti la kaani. Naa maaʋele ma ti ti ʋɛtɛni ga ti la ɲadeni, ti la ɠɛni vaani bu, naati ti ʋa boti nɔpɛ kɛ zalaɠa ɠulazuʋɛ. 
\v 63 Zou zɛʋɛ ɠundiɠii ɓɔɠɔgoi ti leveni ga ti mina daamianigi naa ta mi, niiti ti veai GALA bɛ, eyɛsu zalaɠa ɠula nui gila ge GALA gaazaɠa ta-vaa zu ga wuulimegi ta tumimegi.
\b
\p
\v 64 Bɛbɛi pɛ kpɔga ɠɛni ga nu waaʋuunaanigɔ maazu felegɔ unsaʋagɔ puulɔzita (42.360). 
\v 65 Ta-wotiɠɛ nuiti, zinaa ta anzaa, ti ɠɛni ga nu waadɔfela unsaʋagɔ puusaʋa maazu lɔfela (7.337). Guye loo nuiti, zinaa ta anzaa, naati ti ɠɛ ga unfelegɔ (200). 
\v 66 Sooi ɠɛni ti ya ga undɔfela puusaʋagɔ maazu lɔzita (736), soovale fuului ɠɛ ti ya ga unfelegɔ puunaani maazu lɔɔlugɔ (245). 
\v 67 Ɲɔmɛi ɠɛni ga unnaanigɔ puusaʋagɔ maazu lɔɔlugɔ (435), soovalegi ɠɛ ga waadɔzita undɔfela puufele (6.720).
\b
\p
\v 68 Ti zeeliai ma Zeluzalɛme, Ɠɔoɠɔ GALAGI zei ʋɛlɛi ná-taazuʋɛ, pɛlɛyeɠe ɠundiɠii ma mɔinmɔin ti vebɛaniiti feeni, niiti ti daai ɠisu, GALA sei ʋɛlɛi lo fai zu, tosu wɔlɔmai. 
\v 69 Ti ti zooda vai ɠɛɛni ga naavoloi pɛlɛi lo fai zu. Nii ti kulani, naa liini ga zanu kae waaʋuulɔzita maazu ɠila (61.000), ta wali kilo waafelegɔ undɔɔlu (2.500). Ti tookɔba ungila (100) feeni ɓalaa ga zalaɠa ɠula nuiti ta-zeɠeiti.
\p
\v 70 Zalaɠa ɠula nuiti, ta Levi nuiti, ta nuɓusɛi tanigaa, ta guye loo nuiti, ta siɠida makɛ nuiti, naa ʋɛɛ GALA sei ʋɛlɛi wu wotiɠɛ nuiti ba, ti zeini taai naati su, ʋɛti ti náti feeni ti ya. Nuɓusɛi mɔtaiti ti zeini ta-laa wɔlɔmaiti su.
\c 3
\s Zalaɠa ɠulazuʋɛ lo fai ʋolu,  //  GALA dɛbi vai lɔɔzei ʋolu
\p
\v 1 Konagi ma alugi lɔfelasiɛi zeeliai ma, Izilayɛle nuiti kpein ti ɠɛnina zeini ta-laazuʋɛti, ti pɛ ti ɠaalɛɛni ba Zeluzalɛme eɠɛ nu ɠila nɔ. 
\v 2 Yosadake ná-doun zunui Zozuwe, ta bɔɔla zalaɠa ɠula nuiti, naa ʋɛɛ Seyalitiyɛle ná-doun zunui Zoloɓaɓɛle ʋa, ta ná-bolodamaiti, ti botii lɔɔzeini, ti ɗa GALA ná-zalaɠa ɠulazuʋɛ lo ʋolu, nii a kɛ ti ɗa gala zalaɠaiti kula ná, ʋelei sɛʋɛai la Moize ná-tɔ sɛʋɛi zu, GALA ná-nui. 
\v 3 Anɛɛ ni ti ɠɛni luazu nui naati ba ti ʋaani, ti zei zooi zu, ti ɠɛai ma duɔlai zu, ti zalaɠa ɠulazuʋɛ loni tosu wɔlɔmai nɔ, ti ɗa gala zalaɠaiti kula Ɠɔoɠɔ GALAGI ʋɛ, sobui ta kpɔkɔi. 
\v 4 Ti kota vɛtii ɠulani, eɠɛʋelei sɛʋɛai la, ti ɗa gala zalaɠai ɠula folo-o-folo, é zoloo zalaɠai liegi ma nii sɛʋɛai folo ɠilagilagi vaa ma. 
\v 5 Naa ʋoluma, ti gala zalaɠai ɠulani folo-o-folo, ta alu toga niinɛi ma vɛti geleiti, ta yeeɠɛɠalai zɔiti pɛ su geleiti ti ga Ɠɔoɠɔ GALAGI nɔnɔ, naa ʋɛɛ niiti kpein ba ti ɠɛɛni vebɛaniiti feezu Ɠɔoɠɔ GALAGI ʋɛ. 
\v 6 Alugi lɔfelasiɛi ma volo mɔungi, ti tɔɔzeini ga ti ɗa gala zalaɠaiti kula Ɠɔoɠɔ GALAGI ʋɛ, anɛɛ ni ti la ɠɛni dɛ GALA sei ʋɛlɛi ma ɠɔtu mɔungiti daani. 
\v 7 Ti walii veeni kɔtu zaɠa nuiti zea, ta pɛlɛ maalɛɛ nuiti, ti daamianigiti ta kpɔleɓɔle ganigiti ta gulɔi ve Sidɔn ta Tiil nuiti zea, nii a kɛ ti sɛdele gului zeɠe Liɓan, ti da kpoloɗɛi ɠa, ti ʋaa la Zafa. Nii pɛ ge ɠɛɛni ga zobogi maaʋele, nii Pɛɛlese masagi Siluse feeni.
\p
\v 8 Ti zeeliai ma Zeluzalɛme, Ɠɔoɠɔ GALAGI zei ʋɛlɛi ma laazuʋɛ, ta-ɠonagi velesiɛi ta alugi velesiɛi ma, Seyalitiyɛle ná-doun zunui Zoloɓaɓɛle, Yosadake ná-doun zunui Zozuwe ta bɔɔla zalaɠa ɠula nuiti, ta Levi nuiti, é ʋɛɛ niiti kpein ba ti zeɠeni duɔla ʋelei zu, ti ʋa, ti tɔɔzeini ga botii ɠɛa. Ti yeeloni Levi nuɓusɛiti ba, é zo kona ʋuufelegɔ (20) ma, é lɛ zeemaazu, ga ti lo Ɠɔoɠɔ GALAGI zei ʋɛlɛi lo fai luɠɔ. 
\v 9 Levi nui Zozuwe ta ná-doun zunuiti, ta kɛɛɠɛlointi, naa ʋɛɛ Kadimiyɛle ʋa, ta ná-doun zunuiti, ta kɛɛɠɛlointi, Wodavia ná-bolodamaiti su, ta Levi nui niiti ti ga Ɠenadade ná-bolodamaiti, ti pɛ ti loni GALA sei ʋɛlɛi ma wotiɠɛ nuiti tuɠɔ.
\p
\v 10 Pɛlɛ lo nuiti ti ɠɛai ma GALA sei ʋɛlɛi ma zeɓasemai laazu, zalaɠa ɠula nuiti ti ʋaani ʋelelaʋɛ, ti maaɠiliai ga ta-zalaɠa ɠula zeɠeiti, puʋugi ti ya, Levi nui Azafe mavofodaiti ti ʋa ga kɔtɛgiti, Ɠɔoɠɔ GALAGI lɛbi vai ma, eɠɛʋelei sɛʋɛai la Davide ʋɛ, Izilayɛle masagi. 
\v 11 Ti ɠɛni Ɠɔoɠɔ GALAGI lɛbizu, ti ɗa maamusɛ ga pilima wuyei, ti ɗa ɠɛ ma: «Ɠɔoɠɔ GALAGI ʋagɛ, mazɔlɔɔ ná-wooɠɛɠiladai ɠa yɛsu ná ɠɔ Izilayɛle ʋɛ!» Nuɓusɛiti ɓalaa ti ɠɛni Ɠɔoɠɔ GALAGI lɛbizu ga koozunɛ woo wolaiti, tɔɔzei Ɠɔoɠɔ GALAGI zei ʋɛlɛi ma zeɓasemai laa vai ʋa. 
\v 12 Nu mɔinmɔin ge ɠɛni ná, niiti ti ɠɛni ga kɛwolaiti zalaɠa ɠula nuiti, ta Levi nuiti, ta pɛlɛyeɠe ɠundiɠiiti saama, ti GALA sei ʋɛlɛ mɔungi ɠaani, naati ti ɠɛni wɔlɔzu ga gola, siɛgi zu GALA sei ʋɛlɛ niinɛi ma zeɓasemai ɠɛni laazu la ti ɠaazu. Kɛlɛ nu mɔinmɔin kiligaa ti ɠɛni ta-ɠoozunɛɛi ɠulazu kɛlɛma ga kpee woo wolaiti. 
\v 13 Tɔ ɠa é ba nu la ɠɛni zooga è ʋa nuiti goo yɔɠɔzuɠula, niiti ti wɔlɔzu, ta niiti ti wooɠulazu ga koozunɛɛi, mazɔlɔɔ ɛsɛ pɛ ge ɠɛni kpee wolai loozu, nu ɗa ti woomɛni ɠoozama.
\c 4
\s GALA sei ʋɛlɛi lo fai  //  ɓela fai pele zu
\p
\v 1 Nui niiti ti ɠɛni zooi zu, ti ga Zuda ta Ɓɛnzamɛn ti zili nuiti, ti mɛnini ga naati ti ɠulani kpein duɔlai zu, ta ga GALA sei ʋɛlɛi lo Ɠɔoɠɔ GALAGI ʋɛ, Izilayɛle ná-GALAGI. 
\v 2 Ti ʋaani Zoloɓaɓɛle ʋɔ bɛ ta pɛlɛyeɠe ɠundiɠiiti, ti ɠɛ ti ma: «Gá pɔ gi ɓɔ wo ʋa, ade GALA sei ʋɛlɛi nii lo. Mazɔlɔɔ GALA gilagi naa nɔ ɠa gá ɗa dɛbi, gi ɗa zalaɠaiti kula bɛ, é zo yee nuu ma Asiili masagi Ezaal-Ɠadon ʋaani la ga giye ʋɛ.» 
\v 3 Kɛlɛ Zoloɓaɓɛle ta Zozuwe, naa ʋɛɛ pɛlɛyeɠe ɠundiɠiiti ba, ti ti wooɠaaʋoteni ga: «É la zolooni ga wo ɓɔ gi ʋa, ade GALA sei ʋɛlɛi lo gá-ƓALAGI ʋɛ. Gá ɠila nɔ ɠa gi kɛɛzu, mazɔlɔɔ toɠa ɠɛɛzu ga Ɠɔoɠɔ GALAGI zei ʋɛlɛi, Izilayɛle ná-GALAGI. Pɛɛlese Masagi Siluse ɓɔɠɔi ɠa é deveni ɠani.»
\p
\v 4 Zooi zu nui naati ti tɔɔzeini ga Zuda nuɓusɛiti iɲɔteʋea, ta ti ɗa naati maalua, nii a kɛ ti looɠo GALA sei ʋɛlɛi lo fai ʋa. 
\v 5 Ti ɠɛni walii veezu masagi ná-botiɠɛ nuiti zea ga ti Zuda nuiti ta-wotii zuɠoloɠolo, naa ɠa ti yɛni daawu Pɛɛlese masagi Siluse ná-masa fai ma ziɛgi pɛ su, eyɛsu é zeeli Daliyuse nɔnɔi ma.
\s Zuifuiti maalɔɔ vai  //  masagi Aaletazɛɛlesɛse ma
\p
\v 6 Zɛɛlesɛse\f + \fr 4:6 \fr*\fk Zɛɛlesɛse\fk*\ft : É ɠɛni ga Pɛɛlese masagi niima ɠonagiti su: 486-464 aisa Yesu Kilista zɔlɔɔ.\ft*\f* ná-masa fai lɔɔzei ziɛgi zu, ti sɛʋɛi ɠɛɛni, ti teʋe ma, ti Zeluzalɛme zei wo nuiti ta Zuda you zɛʋɛi ma nuiti maalɔɔ su.
\p
\v 7 Siɛgi zu Aaletazɛɛlesɛse\f + \fr 4:7 \fr*\fk Aaletazɛɛlesɛse\fk*\ft : É ɠɛni ga Pɛɛlese masagi niima ɠonagiti su: 464-424 aisa Yesu Kilista zɔlɔɔ.\ft*\f* ɠɛni la ga Pɛɛlese masagi, Ɓisilame, ta Miteledate, naa ʋɛɛ Taɓeyɛle ʋa, ta ti-wɔɔlaiti ti sɛʋɛi ɠɛɛni masagi ma, ti kɛɛni ga Alame zɛʋɛi ta Alame wooi zu. 
\v 8 Zou zɛʋɛ ɠundiɠii Lewume ta sɛʋɛ ɠɛ nui Simesai ti sɛʋɛi ɠɛɛni tiya ɓalaa masagi Aaletazɛɛlesɛse ma, é ʋilɛ Zeluzalɛme ʋa, sɛʋɛi lɔɔzeini ɠani:
\p
\v 9 Zou zɛʋɛ ɠundiɠii Lewume, ta sɛʋɛ ɠɛ nui Simesai, ta ti-wɔɔlai mɔtaiti niiti ti ga Din nuiti, ta Afalasatake nuiti, Taalepɛle nuiti, Afalase nuiti, Ɠeelɛke nuiti, Ɓaɓilɔne ta Suze nuiti, naa ʋɛɛ Deɠa ta Elame nuiti ba. 
\v 10 Nuɓusɛi mɔtai pɛ daaseigi zu, niiti lɔɠɔɠula nu wolai Wosenapaal ʋaani ga tiye, é ti zei Samali laa wolaiti su, ta ziɛ wolai Efelate folo liizu ʋelei, ta mɔtaiti. 
\v 11 Sɛʋɛi zu wooi ɠɛni ga nii:
\p «Sɛʋɛi nii ɠa liizu masagi Aaletazɛɛlesɛse ma, é ɠula ná-botiɠɛ nuiti zea, ti ziɛ wolai Efelate folo liizu ʋelei, ta mɔtaiti. 
\v 12 Masagi, gá bosu è ma ga Zuifui niiti ti zeɠeai è ʋɔ bɛ, ti ʋa gi zaama Zeluzalɛme, ta ga taa ɲɔi é ga gaazulɛɛ laai lo ʋolu, ti ɓega ʋoluma ga seɓasemaiti da, ta ga ma ziɠigiti buzeɠe. 
\v 13 Tama kɛni masagi è kwɛɛ ga ni taai tɛi ka lona ʋolu, ma ziɠigiti ti wuzeɠe ʋolu, ti la mɔ zou zalai ta maazoloo ganii ɠula, ta zou maaleʋe salai, naama zeeʋo ka yɛ masagi ná-naavolo vaiti ba. 
\v 14 Gɛi gi undaanɛ zɔlɔɔgai ga gi botii ɠɛ è ʋɛ, gi la zooga gi ʋa yɛ wɛlɛzu, ti ʋa ɗa è ʋɛlɛlala, gi deveʋɛ ga gi è loo ɠisu ga niima vaiti. 
\v 15 Wɛlɛ masa pɔlɔmaiti ta-zɛʋɛ wɔlɔmaiti su, niiti ti ɠɛa è luɠɔ. Ɗa pɛtɛ ga gaamazu kaite taai nii ɠa ga gaazulɛɛ laai, ta é la looɠoni ga zou masagiti ta zou zɛʋɛ ɠundiɠiiti kpɔlɔa, ta kaite taai nii zu ɠa nɔ wuulee ga kpaka faiti. Naa nɔ ɠa é kɛai ɓalaa ma taai ɠoloɠologai. 
\v 16 Gá pɔ gi è loo ɠisu, masagi, ga ni taai nii a lona ʋolu, ma ziɠigiti ti wuzeɠe ʋolu, è leve la mɔ ɠɛa ziɛ wolai Efelate folo liizu ʋelei ma.»
\s Masagi ná-gooɠaaʋotegi
\p
\v 17 Masagi gooɠaaʋotegi ɠɛni ga nii é teʋeni: «Ɗɛi è ga zou zɛʋɛ ɠundiɠii Lewume, ta sɛʋɛ ɠɛ nui Simesai, naa ʋɛɛ ti zeini Samali ta wɔi wo ziɛ wolai Efelate folo liizu ʋelei ma yooi mɔtai pɛ su, nà wo luʋɔsu. 
\v 18 Sɛʋɛi nii wo teʋegai, ti kalagɛ gàazu. 
\v 19 Gè devei veeʋɛ ga ti wɛlɛ sɛʋɛiti su, tama ti kaaʋɛ ga gaamazu kaite, Zeluzalɛme ɠa ga taai nii é ga gaazulɛɛ laai masagiti daalɔɠɔma, ta kaite gaazulɛɛi ta kpaka faiti ta ná. 
\v 20 Masagaa ti ɠɛa Zeluzalɛme, ti-zɛbɛi wɔɔlɔai, niiti ti zeini ziɛ wolai Efelate folo liizu ʋelei yooiti kpein unga, naati ti ɗa zou zalai ta maazoloo ganii ve ti ya, ta zou maaleʋe salai. 
\v 21 Tɔ ɠa é ba à bo ti ma ti botii ɓela pele zu, ti mina taai naa lo, ni gè la deve veeni. 
\v 22 À mina naama vai la ɠoba, faa ɲɔi ʋa wɔɔlɔ, zeeʋo ge ʋa yɛ masagiti ba.»
\p
\v 23 Tɛi feya ti masagi Aaletazɛɛlesɛse ná-sɛʋɛi zu wooi mɛnini, Lewume ta sɛʋɛ ɠɛ nui Simesai ta ti-wɔɔlaiti ti liini ga gaazuvilɛ Zuifuiti pɔ bɛ Zeluzalɛme, ti naati ta-wotii ɓela pele zu ga toomai ta maaɓaai.
\p
\v 24 Ʋele ɠana GALA sei ʋɛlɛi lo fai ɓelani la pele zu Zeluzalɛme, eyɛsu Pɛɛlese masagi Daliyuse ná-masadai ma ɠonagi velesiɛi ma.
\c 5
\s GALA sei ʋɛlɛi lo fai  //  lɔɔzei vai ʋolu
\p
\v 1 GALA goo wo nuiti Azé\f + \fr 5:1 \fr*\ft Wɛlɛ ʋɛ: \ft*\xt Azé 1:1\xt*.\f* ta Zakali\f + \fr 5:1 \fr*\ft Wɛlɛ ʋɛ: \ft*\xt Zkl 1:1\xt*.\f*, Ido ná-doun zunui, ti ɓɔɛni Zuifuiti pɔ Zuda yooi zu ta Zeluzalɛme ga GALA daawooi, Izilayɛle ná-GALAGI. 
\v 2 Zoloɓaɓɛle, Seyalitiyɛle ná-doun zunui, ta Zozuwe, Yosadake ná-doun zunui, ti wuzeɠe ʋele ɠana, ti GALA sei ʋɛlɛi lo fai lɔɔzei Zeluzalɛme, GALA goo wo nuiti ti ɗa ɓɔ ti ʋa.
\p
\v 3 Gaamago nɔ, Tatenayi nii é ɠɛni ga zou zɛʋɛ ɠundiɠii ziɛ wolai Efelate folo liizu ʋelei pɛ unda, ta Setaal-Ɓozinayi, é ʋɛɛ ti-wɔɔlaiti pɛ ba, ti liini ti ʋɔ bɛ, ti ɠɛ ti ma: «Ɓɛ ɠa é niima levei vea wo ya ga wo GALA sei ʋɛlɛi nii lo ʋolu, wo ma ziɠigiti niinɛ? 
\v 4 Nuiti kpein ti niima ʋɛlɛi losu, à ti pɛ daaseigiti fe gi ya.» 
\v 5 Kɛlɛ GALA ge ɓaani Zuifuiti ta-ɠundiɠiiti maazu. Nu la ta-wotii loni pele zu, eyɛsu sɛʋɛ zeeli Daliyuse ma, ta é ná-gooɠaaʋotegi ve é ʋilɛ niima vai ʋa.
\s Ti Zuifuiti maalɔ vai  //  masagi Daliyuse ma
\p
\v 6 Wɛlɛ sɛʋɛi zu wooi ʋa, nii é leʋeni masagi Daliyuse ma, é ɠula Tatenayi ya, nii é ɠɛni ga zou zɛʋɛ ɠundiɠii ziɛ wolai Efelate folo liizu ʋelei pɛ unda, ta Setaal-Ɓozinayi, é ʋɛɛ ti-wɔɔlaiti pɛ ba. 
\v 7 Ʋele ɠaa ti ɓɔɛni la ta-zɛʋɛi zu:
\p «Masagi Daliyuse, ziilɛi daazeeliai ɠɛ è ʋɛ. 
\v 8 Masagi, gá bosu è ma ga gi liiʋɛ Zuda you zɛʋɛi ma, gi zeeli GALA golai zei ʋɛlɛi ʋɔ bɛ. Nuiti ta ga pɛlɛi naa lo ga kɔtu zaɠaai, ti ɗa guluiti dɔ ma ziɠigiti su, ti zɛbɛzeɠeʋɛ botii zu, é ɗa zoloo ti ya. 
\v 9 Gi kundiɠiiti gaazaɠagɛ, gi ɠɛ ti ma: ‹Ɓɛ ɠa é niima levei vea wo ya ga wo GALA sei ʋɛlɛi nii lo ʋolu, wo ma ziɠigiti niinɛ?› 
\v 10 Gi ɠɛɛʋɛ ti ma ɓalaa, niiti kpein ti unda, ti naati kpein daaseigiti sɛʋɛ, ti fe gi ya. 
\v 11 Ti gi wooɠaaʋotegɛ ga: ‹GALAGI nii é geeɠɔlɔgi ta zooi ɓɛtɛa, naa ná-botiɠɛ nuiti ka ga giye, gá sei ʋɛlɛi nii losu ʋolu, nii Izilayɛle masa golai gila ge toni kaite, é gaaɓela. 
\v 12 Kɛlɛ gi-mɛmɛwolani ti geeɠɔlɔgi ɓɛtɛ ƓALAGI yiiɠaawanaai ma, naa ti ɠwɛɛni Neɓukadenɛzaal ma, Ɓaɓilɔne masagi, Kaledé nui, tɔ ɠa é GALA sei ʋɛlɛi nii ɠoloni, é li ga tiye duɔlai zu Ɓaɓilɔne. 
\v 13 Kɛlɛ anɛɛ naa ʋe, Ɓaɓilɔne masagi Siluse ná-kona mɔungi ma, é devei veeni ga GALA sei ʋɛlɛi nii lo ʋolu. 
\v 14 Masagi Siluse ɓɔɠɔi devei veeni ga sɔɔlai niiti kpein ti ɓɛtɛai ga zanugi ta walii, niiti Neɓukadenɛzaal ti ɠulani GALA sei ʋɛlɛi wu Zeluzalɛme, é li ga tiye, é ti la ná-galagi ná-pɛlɛi wu Ɓaɓilɔne, ti sɔɔlai naati feeni Sɛsɛɓasaal ya, nii tɔ ɓɔɠɔi é kɛɛni ga Zuda you zɛʋɛ ɠundiɠii. 
\v 15 É valini ma ga: Li ga sɔɔlai niiti. Siɛgi zu GALA sei ʋɛlɛi ɓesu la ga lo tosu wɔlɔmai Zeluzalɛme, wo ti la bu. 
\v 16 Názu ɠa Sɛsɛɓasaal ʋaa la ʋɛ Zeluzalɛme, é GALA sei ʋɛlɛ niinɛi ma zeɓasemai la. É zo naazu ma botii ɠa ba, é ɗa ɠɛ, kɛlɛ gaa la dɛ ɓelani.› 
\v 17 Niizu niina, masagi, ni ɗa kaana ga faa ʋagɔ, bo, ti wɛlɛ Ɓaɓilɔne masagiti ta-zɛʋɛ wɔlɔmaiti su, é ɠwɛɛ ni masagi Siluse deve veeni ga ɠite vaa GALA sei ʋɛlɛi nii lo fai zu Zeluzalɛme, naa ʋoluma ɗa ɗa-levei lɛ ga giye niina niima vai zu.»
\c 6
\s Daliyuse ná-gooɠaaʋotegi é feeni
\p
\v 1 Naazu masagi Daliyuse devei veeni ga ti gaiziɛi wo Ɓaɓilɔne zɛʋɛiti ta ani ɓii makɛ ʋɛlɛi wu. 
\v 2 Ɛkɛɓatane taazuʋɛ, Mɛde ɠoʋii laa wolai nii siɠigi ma, miná ɠa ti sɛʋɛ ɓiligi gila kaani ná, nii sɛʋɛi ʋɔnɛni ma ɠani:
\p
\v 3 «Siluse ná-kona mɔungi masa fai zu, é niima levei woni, GALA sei ʋɛlɛi maanɛɛʋɛ é lo ʋolu Zeluzalɛme, naa ɠɛ ga ʋɛ zalaɠaiti ta ɠɛ ɠulazu ná, toɠa losu tosu wɔlɔmai nɔ, gaa ɠaaɠoozazu ga mɛtɛlɛ ʋuusaʋagɔ (30), kogi ɠɛ ga mɛtɛlɛ ʋuusaʋagɔ (30), 
\v 4 kɔtu zaɠaai ma ɲɛkpɛ saʋagɔ, gulu niinɛi ma ɲɛkpɛ ɠila. Naama walii kpein ka ɠulazu masagi ná-naavolo makɛsuʋɛ. 
\v 5 Naa ʋoluma zanu sɔɔlaiti ta wali zɔɔlaiti kpein Neɓukadenɛzaal ti ɠulani GALA sei ʋɛlɛi wu Zeluzalɛme, é ʋa ga tiye Ɓaɓilɔne, ti pɛ maanɛɛʋɛ ti ɠale ma, ʋɛ ti zeɠeai ná, ti la GALA sei ʋɛlɛi wu Zeluzalɛme.»
\p
\v 6 Naa maaʋele ma, Daliyuse niima zɛʋɛi leʋeni ziɛ wolai Efelate folo liizu ʋelei you zɛʋɛ ɠundiɠii Tatenayi ma, ta Setaal-Ɓozinayi, ta ti-wɔɔlaiti kpein: «À yeeɠula fai naa zu. 
\v 7 À Zuifuiti zɛna dɔin, ti GALA sei ʋɛlɛi lo, Zuifuiti ta-you zɛʋɛ ɠundiɠii ta ta-ɠɛwolaiti ka ti tosu, tosu wɔlɔmai. 
\v 8 Nɔ̀nɔ ma levei ɠa gè bosu, ʋelei wa ziɛ la Zuifuiti ta-ɠundiɠiiti tetemazu, GALA sei ʋɛlɛi lo fai zu. À ɠaaɓa, pɛlɛi lo walii kpein ge ɗa ve ti ya falafala, é ɠula masagi ná-naavolo makɛsuʋɛ, nii é zɔlɔɔsu maazoloo ganii zu é ɠulazu ziɛ wolai Efelate folo liizu ʋelei ma yooi zu, naa ɠa a kɛ botii mina lo pele zu. 
\v 9 Kɛni wo kɛ ʋele-o-ʋele, wo ɗa naa ve zalaɠa ɠula nuiti zea folo-o-folo, nii ta ɓɛdɛ ma, ti dɛɛ ga woye, é ɠɛni ga: nikɛ zinɛ ɓokpagiti, baala sinɛiti, baala ziʋoiti, gala zalaɠaiti faa zu é veezu GALAGI ʋɛ é geeɠɔlɔgi zu. Ʋele nɔ ɠana wa kɛɛ la ɓalaa é ʋilɛ moloi, kpoloi, dɔɔi ta gulɔiti ba. 
\v 10 Ta zoo naazu ti ɗa geeɠɔlɔgi zu ƓALAGI yiima zalaɠaiti kula, ti ɗa GALA fali masagi yɛnvui, ta ná-dointi zɛnvuiti ta-vaa zu. 
\v 11 Devei taɠili ka mɔnɔ gè feezu: Nu nɔpɛ é devei nii ɠoloɠolosu, ta kpɛdɛ gila kula ná-pɛlɛi wu, ti sɛlɛ ba, ná-pɛlɛi ɠa valibo ga kaʋa ziɠigi. 
\v 12 GALAGI nii é zeini Zeluzalɛme, naa masagi ɓaa zooi naa ɠoloɠolo, nii é yeewuzeɠezu é devei nii zeɠe ma, ga é GALA sei ʋɛlɛi nii ɠolo é Zeluzalɛme. Nà ɓɔɠɔi Daliyuse, nà ɠa gè devei nii vea, kɛni é ziɛ ga pagɔ.»
\s GALA sei ʋɛlɛ wotii ɠaaɓela fai
\p
\v 13 Naa ʋoluma ziɛ wolai Efelate folo liizu ʋelei you zɛʋɛ ɠundiɠii Tatenayi, ta Setaal-Ɓozinayi, ta ti-wɔɔlaiti kpein, ti ziɛni ga masagi Daliyuse ná-devei nɔ. 
\v 14 Zuifuiti ta-ɠundiɠiiti ti iɲɔdɔɔi zɔlɔɔni GALA goo wo nuiti Azé ta Ido ná-doun zunui Zakali ta-lɛnɛ gooiti su, ti ɗa li luɠɔma pɛlɛ logi zu, eyɛsu ti gaaɓela, eɠɛʋelei Ɠɔoɠɔ GALAGI deveni la, ta eɠɛʋelei Pɛɛlese masagiti Siluse, ta Daliyuse, é ʋɛɛ Aaletazɛɛlesɛse ʋa ti deveni la. 
\v 15 GALA sei ʋɛlɛi ɓeni alugi daa ga Adaal, naa ná-folo saʋagɔi ma, masagi Daliyuse ná-kona dɔzitasiɛi ma masa fai zu.
\p
\v 16 Izilayɛle nuiti, ta zalaɠa ɠula nuiti, ta Levi nuiti, naa ʋɛɛ nuɓusɛi mɔtai pɛ ba ti ɠulaai duɔlai zu, ti ʋa, ti GALA sei ʋɛlɛi laalaoni ga koozunɛɛi. 
\v 17 GALA sei ʋɛlɛi naa laalao fai zu, ti zalaɠaiti kulani: nikɛ zinɛ ungila (100), baala sinɛ unfelegɔ (200), baala ziʋo unnaanigɔ (400), ta boli zinɛ puugɔ maazu fele (12) koto gba vai zu Izilayɛle nuiti pɛ bɛ, é zoloo ta-woloda puugɔ maazu felegɔiti (12) ma. 
\v 18 Ti zalaɠa ɠula nuiti seini su ʋelei ta-zeikpasui la, Levi nuiti ɓalaa ʋelei ta-ɠaaɠwɛsui la, GALA ná-botiɠɛ vai zu Zeluzalɛme, ʋelei sɛʋɛai la Moize ná-sɛʋɛi zu.
\p
\v 19 Niiti kpein ti ɠulani duɔlai zu, ti ʋa, naati ti Pake fɛtii ɠulani alu mɔungi ma volo puugɔ maazu naanigɔi (14) ma. 
\v 20 Zalaɠa ɠula nuiti ta Levi nuiti ti ɓɔɠɔ ɲadeni ʋɔɔma, ti pɛ ti ɲadeni. Levi nuiti ti Pake suaiti kɔdaaleʋeni naazu nuɓusɛi pɛ bɛ, ti ɠulaai duɔlai zu, ta ti-ɠɛɛlointi bɛ zalaɠa ɠula nuiti, ta tiya ɓɔɠɔi ʋɛ. 
\v 21 Izilayɛle nui niiti kpein ti ɠulaai duɔlai zu, ti ʋa, ti Pake daamii woni ʋɔɔma, ta niiti kpein ti ɓɔɠɔ ɲadeni, ti yeeɓe zii ɠiligiti ta-ɠɔzɔba vaiti pɛ ba, ta ti ʋilɛ ti ʋolu Ɠɔoɠɔ GALAGI yiima vai ɠɛɛ vai zu, Izilayɛle ná-GALAGI. 
\v 22 Folo lɔfela laawu fɛtii ɠulani, nii ta ɗa ɓului mi su, nii lɛʋɛ la su, ti kɛɛni ga koozunɛ wolai, mazɔlɔɔ Ɠɔoɠɔ GALAGI Asiili masagi\f + \fr 6:22 \fr*\fq Asiili masagi\fq*\ft : Daliyuse, nii é ɠɛni ga Pɛɛlese masagi.\ft*\f* yii latini ti ma ga pagɔ, é ɓɔ ti ʋa GALA sei ʋɛlɛi lo fai zu, Izilayɛle ná-GALAGI.
\c 7
\s Ɛsedalase lii vai Zeluzalɛme
\p
\v 1 Niima vaiti kpein poluma, Pɛɛlese masagi Aaletazɛɛlesɛse ná-siɛgi zu, zunui ta ɠɛni ná, daa ga Ɛsedalase, Selaya ná-doun zunui, mɛmɛwolani daaseigiti ta ti zɔlɔɔ peleiti kaa: Azalia, Yilikiya, 
\v 2 Salume, Sadɔke, Ayituɓe, 
\v 3 Amalia, Azalia, Melayɔte, 
\v 4 Zelayia, Uzi, Ɓuki, 
\v 5 Aɓisua, Fineyase, Eleazaal, zalaɠa ɠula ɠundiɠi wolai Aalɔn ná-doun zunui. 
\v 6 Ɛsedalase naa zeɠeni Ɓaɓilɔne. É ɠɛni ga sɛʋɛ ɠɛ nui, kalagai Moize ná-tɔgi zu, tɔgi nii Izilayɛle ná-GALAGI, Ɠɔoɠɔ GALAGI feeni Moize ya. Masagi ɠɛni naa kpein feezu Ɛsedalase ya, nii é ɠɛni falizu ma, mazɔlɔɔ ná-GALAGI, Ɠɔoɠɔ GALAGI ɠɛni ba. 
\v 7 Masagi Aaletazɛɛlesɛse ná-masadai ma ɠonagi lɔfelasiɛi ma, Izilayɛle nui tanigaa ti ɠaleni ma, ti li Zeluzalɛme: zalaɠa ɠula nuiti, Levi nuiti, gɛingɛin gani gɛin nuiti, siɠida makɛ nuiti, ta GALA sei ʋɛlɛi wu wotiɠɛ nuiti.
\p
\v 8 Ɛsedalase yɛni ti ʋolu, ti li Zeluzalɛme, masagi Aaletazɛɛlesɛse ná-masadai ma ɠonagi lɔfelasiɛi ma alugi lɔɔlusiɛi ma. 
\v 9 É deveni ga é zeɠe Ɓaɓilɔne alu mɔungi ma volo mɔungi ma, é zeeli Zeluzalɛme alugi lɔɔlusiɛi ma volo mɔungi ma, ná-GALAGI zaalai zu, nii é ɠɛni tɔun makɛsu. 
\v 10 Mazɔlɔɔ Ɛsedalase ɠɛni ɠaaɓaazu, é ɗa Ɠɔoɠɔ GALAGI ná-tɔgi ɠala, ta é ɗa so ga yii pɛ, é ɗa Izilayɛle nuiti kala ga tɔgiti ta deveiti.
\s Tosuʋɛ niiti Aaletazɛɛlesɛse ti ɠalivaani  //  Ɛsedalase ma
\p
\v 11 Sɛʋɛi zu wooi ʋɛtɛ, nii Pɛɛlese masagi Aaletazɛɛlesɛse feeni zalaɠa ɠula nui Ɛsedalase ya, tɔgiti ta deveiti ma ɠalamɔin, niiti Ɠɔoɠɔ GALAGI ti veeni Izilayɛle nuiti zea:
\p
\v 12 «Aaletazɛɛlesɛse, masagiti ta-masagi, niima zɛʋɛi ɠa liizu zalaɠa ɠula nui Ɛsedalase ma, GALAGI nii é geeɠɔlɔgi zu, naa ná-tɔgiti ma ɠalamɔin. 
\v 13 Gè devei vea ga nu nɔpɛ Izilayɛle nuiti saama, ti nà-masa zooi zu, é ɠɛni ga zalaɠa ɠula nu, ɓaa Levi nu, é pɔ ga é li Zeluzalɛme, ti ɓe ti pɛ ba, wo li ʋɔɔma wa tiye. 
\v 14 Nɔ̀un nà, masagi, gá nà-tɛnɛbo nu lɔfelaiti ka gi è leʋesu Zeluzalɛme ta Zuda, è ka ʋelei ɗa-ƓALAGI ná-tɔgi zosu la ná, nii é è ya. 
\v 15 Siɛ ɠilagi naa nɔ zu ɗa liizu ga walii ta zanugi, nii gá nà-tɛnɛbo nuiti gi daai ɠisu ga gi fe Izilayɛle ná-GALAGI ʋɛ, é zeini Zeluzalɛme. 
\v 16 Ɗa liizu ɓalaa ga waliiti ta zanugiti, niiti ti ɠulaai nuiti zea ti Ɓaɓilɔne you zɛʋɛi zu, ta niiti nuɓusɛiti ta zalaɠa ɠula nuiti ti daai ɠisu ga vebɛanii ta-ƓALAGI zei ʋɛlɛi vaa zu, é Zeluzalɛme. 
\v 17 Naama walii ɠa è nikɛ zinɛiti ta baala sinɛiti ta baala ziʋoiti geyazu la ná, naa ʋɛɛ vebɛ zalaɠaiti ba ta puya zalaɠaiti, è ti pɛ kula ga zalaɠai wa-ƓALAGI zei ʋɛlɛi ma zalaɠa ɠulazuʋɛ Zeluzalɛme. 
\v 18 Wa è-wɔɔla zalaɠa ɠula nuiti, nii nɔpɛ wa ka ga soloogɛ ga wo kɛ ga wali ta zanu mɔtai, à kɛɛ la, eɠɛʋelei soloogai la wa-ƓALAGI yiimai ma. 
\v 19 GALA sei ʋɛlɛi wu wotiɠɛ zɔɔlai niiti ti veai è ya, li, è ti la ɗa-ƓALAGI zei ʋɛlɛi wu Zeluzalɛme. 
\v 20 Ni ani ɠili geya vaa a lona è ʋa ɗa-ƓALAGI zei ʋɛlɛi naa ma vaa zu, naama walii ɠa ɠula masagi ná-naavolo makɛsuʋɛ.
\p
\v 21 «Nɔ̀un nà, masagi Aaletazɛɛlesɛse, gè devei vea naavolo makɛ nuiti kpein zea, ti ziɛ wolai Efelate folo liizu ʋelei, ga ti naa kpein kɛ ga pagɔ, nii zalaɠa ɠula nui Ɛsedalase bosu ti ma, geeɠɔlɔgi zu ƓALAGI ná-tɔgiti ma ɠalamɔin. 
\v 22 Ti maanɛɛʋɛ ti kilo waasaʋagɔ (3.000) ɠɛɠala ve zea ga walii, moloi kilo waaʋuusaʋagɔ (30.000) ɠɛɠala, dɔɔi litɛlɛ waanaanigɔ (4.000) ɠɛɠala, gulɔi litɛlɛ waanaanigɔ (4.000) ɠɛɠala, ti kpoloi ve zea, ʋelei nɛai la ti ʋɛ. 
\v 23 Devei kpein geeɠɔlɔgi ɓɛtɛ ƓALAGI feezu, sei ʋɛlɛi ma vaa zu, ti pɛ ge ɠɛ ga kɛɛʋelei, nii a kɛ GALAGI naa mina ʋa yiiɠaawanazu masa zooi ma, ɓaa nà ɓɔɠɔi ma gá màvofodaiti. 
\v 24 Gá bosu ɓalaa naavolo makɛ nuiti kpein ma ga nu mina zou zalai, ɓaa maazoloo ganii, ɓaa zou maaleʋe salai ɠula zalaɠa ɠula nuiti zea, ta Levi nuiti, ta guye loo nuiti, é ʋɛɛ siɠida makɛ nuiti ba, ta GALA sei ʋɛlɛi wu wotiɠɛ nuiti, naa ʋɛɛ nuiti kpein ba ti botii ɠɛɛzu GALA sei ʋɛlɛi wu.
\p
\v 25 «Ɛsedalase, ɗa ma, ʋelei ɗa-ƓALAGI ɠigi veai la è ya, faawo bo nuiti ta tukpɔɠaaleʋe nuiti sei ziɛ wolai Efelate folo liizu ʋelei nuɓusɛiti saama, ti ɗa tukpɔɠaaleʋe naati bɛ, ti ɗa-ƓALAGI ná-tɔgiti kwɛɛ. Wa ti lɛɛ ga naati ɓalaa, niiti ti la ti ɠwɛɛ. 
\v 26 Zɔi nɔpɛ é la kɛɛni é ʋa ɗa-ƓALAGI ná-tɔgiti ta masagi ná-tɔgiti so ga pagɔ, naama nui maanɛɛʋɛ ga é za, ɓaa ti kula zooi ʋa, ɓaa kɔligiti ti ɠula zea, ɓaa é ʋili kasoi ɠa.»
\s Maamusɛi
\p
\v 27 Mamagi ɠa Ɠɔoɠɔ GALAGI ʋɛ, ade-mɛmɛwolani ta-ƓALAGI, nii é puai masagi yiima ga é nii ɠɛɠala lɛbiyai ve Ɠɔoɠɔ GALAGI zei ʋɛlɛi ʋɛ Zeluzalɛme. 
\v 28 Tɔ ɠa é wooɠɛɠiladai ɠɛa bɛ̀, é ɠaazu unfe fe bɛ̀ gi yɔɠɔzu gá masagi, ta ná-tɛnɛbo nuiti, naa ʋɛɛ ná-tosuba nu wolaiti kpein ba. Tɛi gè kwɛɛni ga toɠa bà, naa ìɲɔdɔɔni, gè zoo gè Izilayɛle ɠundiɠiiti gaalɛ ba, ga gi lɛ ʋɔɔma Zeluzalɛme.
\c 8
\s Ɛsedalase ziɛɲɔɠɔiti daaseigiti
\p
\v 1 Pɛlɛyeɠe ɠundiɠiiti daaseigiti kaa, niiti gi lɛɛni ʋɔɔma ga tiye, gi zeɠe Ɓaɓilɔne, gi li Zeluzalɛme, masagi Aaletazɛɛlesɛse ná-siɛgi zu.
\li1
\v 2 Fineyase mavofodaiti: Gɛɛlɛsome.
\li1 Itamaal mavofodaiti: Daniyɛle.
\li1 Davide mavofodaiti: Ɠatuse.
\li1
\v 3 Sekania ta Paleyɔse ti-mavofodaiti: Zakali, nii é ɠɛni nu ungila nu ʋuulɔɔlu (150) unda.
\li1
\v 4 Paɠate-Moaɓe mavofodaiti: Eliyɔyenayi, Zelayia ná-doun zunui, nii é ɠɛni nu unfelegɔ (200) unda.
\li1
\v 5 Zatu mavofodaiti: Sekania, Yaɠaziyɛle ná-doun zunui, nii é ɠɛni nu unsaʋagɔ (300) unda.
\li1
\v 6 Adin mavofodaiti: Eɓɛde, Zonatan ná-doun zunui, nii é ɠɛni nu ʋuulɔɔlugɔ (50) unda.
\li1
\v 7 Elame mavofodaiti: Ezayi, Atalia ná-doun zunui, nii é ɠɛni nu ʋuulɔfela (70) unda.
\li1
\v 8 Sefatia mavofodaiti: Zeɓadia, Mikayɛle ná-doun zunui, nii é ɠɛni nu ʋuulɔsaʋa (80) unda.
\li1
\v 9 Zoaɓe mavofodaiti: Aɓediyase, Yeɠiyɛle ná-doun zunui, nii é ɠɛni nu unfelegɔ nu puugɔ maazu lɔsaʋa (218) unda.
\li1
\v 10 Selomite mavofodaiti: Yosifiya ná-doun zunui, nii é ɠɛni nu ungila nu ʋuulɔzita (160) unda.
\li1
\v 11 Ɓeɓayi mavofodaiti: Zakali, Ɓeɓayi ná-doun zunui, nii é ɠɛni nu ʋuufelegɔ maazu lɔsaʋa (28) unda.
\li1
\v 12 Azagade mavofodaiti: Yoɠanan, Ɠakatan ná-doun zunui, nii é ɠɛni nu ungila nu puugɔ (110) unda.
\li1
\v 13 Adonikame mavofodaiti: gaaɓelagiti niiti ti-laaseigiti ti ɠɛni ga Elifelɛte, Yeiyɛle, ta Semaya, naati ti ɠɛni nu ʋuulɔzita (60) unda.
\li1
\v 14 Ɓigivayi mavofodaiti: Utayi ta Zakuul, niiti ti ɠɛni nu ʋuulɔfela (70) unda.
\s Zeluzalɛme ziɛi ɠɛʋele ɓɛtɛ vai
\p
\v 15 Gè niima nuiti kpein gaalɛɛni ba ziɛ wolai ɠobaʋɛ, nii é yeizu ga Aɠava ʋele, gi yɛni miná folo saʋagɔ laawu. Gè wɛlɛni nuɓusɛiti saama ta zalaɠa ɠula nuiti, gè la Levi nu nɔpɛ kaani ti zu. 
\v 16 Názu ɠa gè kundiɠii niiti tolini la: Eliyezɛɛl, Aliyɛle, Semaya, Ɛlɛnatan, Yaliɓe, Natan, Zakali, ta Mesulame, naa ʋɛɛ tɔ kalamɔn felegɔiti ba Yoyaliɓe ta Ɛlɛnatan. 
\v 17 Gè valini ti ma ga ti li Kasifia ɠundiɠii Ido ʋɔ bɛ, gè wooi ʋu ti-la, nii ta bo Ido ma, ta kɛɛɠɛlointi pɛ, GALA sei ʋɛlɛi wu wotiɠɛ nuiti niiti ti Kasifia, ga ti kpɔba nuiti teʋe gi ma, gá-ƓALAGI zei ʋɛlɛi vai zu. 
\v 18 Tɛi gá-ƓALAGI ma ge ɠɛni gi ʋa, é ɗa gi ɠaazumaawɔinɠa, ti Seleɓia leʋeni gi ma, nu ɠɛni de ɠigi ma, Maali ná-bolodai zu, Levi mavofodai zu, Izilayɛle ná-doun zunui, ti nu puugɔ maazu lɔsaʋa (18) ʋɛɛni ba kɛɛɠɛlointi saama, ta ná-doun zunuiti, 
\v 19 é ʋɛɛ Ɠasaɓiya ta Ezayi ʋa, ti ɠɛ Melali mavofodaiti, ta kɛɛɠɛlointi, é ʋɛɛ ti-loun zunuiti ba, ti pɛ kpɔga ɠɛni ga nu ʋuufelegɔ (20). 
\v 20 Ti ʋaani ɓalaa ga nu unfelegɔ nu ʋuufelegɔ (220), niiti Davide ta pɛlɛyeɠe ɠundiɠiiti ti yeeloni ti pɛ ba ga ti-laaseigiti, ti ti ve Levi nuiti zea, ga ti ɗa botii ɠɛ GALA sei ʋɛlɛi wu.
\p
\v 21 Gi yɛni miná ziɛ wolai ɠobaʋɛ, nii é yeizu ga Aɠava ʋele, gè deve ga gi zugi zo, naa ɠɛ ga gá-ɓɔɠɔmaayeii ma ʋoogi gá-ƓALAGI ʋɛ, nii a kɛ gi siɛ ʋagɔ wo ziilɛigi zu, gá gá-ʋɛlɛyeɠeiti, ta gi-ɠɔligiti. 
\v 22 Nà la ɠɛɛna masagi ma, é salaʋusuiti ta soo ɓizɛ zalaʋusuiti fe, ti gi makɛ gi zili nuiti daalɔɠɔma, naa ɠɛni ɠɛɛzu ga unfe faa zèa, tɔɔzei gi dɛɛni la ga, gá-ƓALAGI ɠa ɗa naati makɛ, niiti ti bɛ ga wooɠɛɠila nuiti, kɛlɛ toɠa ɗa yiiɠaawana gola naati ma, ti ɠɛlɛzu tɔun ba. 
\v 23 Naa maaʋele ma, gi zugi zoni, gi gá-ƓALAGI maanɛɛnɛni ga é ɓaa gi maazu, tama é gi wooɠaaʋoteni.
\p
\v 24 Naa ʋoluma gè zalaɠa ɠula ɠundiɠi puugɔ maazu felegɔ (12) lolini, ta Seleɓia, naa ʋɛɛ Ɠasaɓiya ʋa, ta ti-ɠɛɛloun puugɔ. 
\v 25 Gè walii ta zanugi ɠɔɠɔni, gè pɛɛ sɔɔla ɓiigiti kpein ba niiti masagi ta ná-tɛnɛbo nuiti, naa ʋɛɛ ná-botiɠɛ nu wolaiti ba, ta Izilayɛle nuiti ti ná-zooi zu, ti kpɔni ba gá-ƓALAGI zei ʋɛlɛi vai zu, gè fe ti ya. 
\v 26 Gè kilo waaʋuufelegɔ (20.000) veeni ti ya ga walii, gè kilo waasaʋagɔ (3.000) ve ti ya ga ani ɓiigiti ti ɓɛtɛai ga walii, gè kilo waasaʋagɔ (3.000) ve ti ya ga zanugi, 
\v 27 gè zanu ɗaawɔ ʋuufelegɔ (20) ve ti ya, nii a la zeeli zanu kae waagila (1.000) su, ta kɔlu ɓɔi aniɲaka ʋapa felegɔ, ti ʋagai ga zanugi ɠɛʋele. 
\v 28 Gè ɠɛni ti ma: «Ʋelei wo veai la Ɠɔoɠɔ GALAGI ʋɛ, ʋele ɠana niima zɔɔlaiti feai la. Walii ta zanugi ta ga vebɛaniiti, niiti ti ve Ɠɔoɠɔ GALAGI ʋɛ, wo-mɛmɛwolani ta-ƓALAGI. 
\v 29 À ɓaa ti maazu ga pagɔ, eyɛsu wo zeeli Zeluzalɛme, názu wa ti pɛ gaalu niina, wo ti ve zalaɠa ɠula ɠundiɠi wolaiti zea, ta Levi nuiti, é ʋɛɛ pɛlɛyeɠe ɠundiɠiiti ba, wo ti ʋu Ɠɔoɠɔ GALAGI zei ʋɛlɛi ma ʋɛɛbagoiti bu.» 
\v 30 Zalaɠa ɠula nuiti ta Levi nuiti ti walii ta zanugiti seɠeni, é ʋɛɛ sɔɔlai zɔiti ba, ti li ga tiye Zeluzalɛme, gá-ƓALAGI zei ʋɛlɛi wu.
\s Siɛi wo pelei,  //  ta ti zeeli ʋelei Zeluzalɛme
\p
\v 31 Alu mɔungi ma volo puugɔ maazu felegɔi (12) ma, gi zeɠeni ziɛ wolai ɠobaʋɛ, nii é yeizu ga Aɠava ʋele, gi li Zeluzalɛme. Eyɛsu gi zeeli, gá-ƓALAGI yeeyɛni gi ʋa, é ɗa ɓaa gi maazu gi zili nuiti ta toosu nuiti daalɔɠɔma, niiti ti ɠɛni gi maaluazu. 
\v 32 Gi zeeliai ma Zeluzalɛme, gi looɠoni folo saʋagɔ laawu. 
\v 33 Foloi naanisiɛi, gi walii, ta zanugi, ta sɔɔla ɓiigiti gaaluni gá-ƓALAGI zei ʋɛlɛi wu, gi ti ve zalaɠa ɠula nui Melemɔte ya, Ilii ná-doun zunui, ta Fineyase ná-doun zunui Eleazaal. Levi nui niiti ti ɠɛni ti ɠoba, ti-laaseigiti kaa: Zozuwe ná-doun zunui Yozaɓade, ta Ɓinuwi ná-doun zunui Noadia. 
\v 34 Ti gaaluni, é ɠɔɠɔ, buɲɛgi ɓɔgai pɛ ge zɛʋɛni sɛʋɛi zu.
\p
\v 35 Niiti kpein ti duɔlai ɠɛɛni, ti ɠale ma, naati ti zalaɠaiti kulani Izilayɛle ná-GALAGI ʋɛ ga: nikɛ zinɛ puugɔ maazu felegɔ (12), Izilayɛle nuiti kpein bɛ. Ti baala sinɛ ʋuutaaʋuugɔ maazu lɔzita (96), ta baala ziʋo ʋuulɔfela maazu lɔfela (77) ɠulani gala zalaɠaiti faa zu, ta boli zinɛ puugɔ maazu felegɔ (12) ga koto gba zalaɠai. Togani naati kpein ti ɠalani Ɠɔoɠɔ GALAGI ʋɛ. 
\v 36 Naa ʋoluma ti masagi ná-sɛʋɛi zu wooi laazeelini ná-nu wolaiti ma, ta zou zɛʋɛ ɠundiɠiiti ma, ti zeini ziɛ wolai Efelate folo liizu ʋelei. Naati ti tɔnɔ ma ɓɔbai ɠɛɛni Izilayɛle nuiti bɛ, GALA sei ʋɛlɛi lo fai zu.
\c 9
\s Wɛɛn anzanuiti fulu vai  //  Izilayɛle nui ma mɔinmɔin bɛ
\p
\v 1 Niima vaiti poluma, kundiɠii tanigaa ti maaɓuɠani bà, ti ɠɛ mà: «Izilayɛle nuɓusɛiti, ta zalaɠa ɠula nuiti, naa ʋɛɛ Levi nuiti ba, ti la maaɠoozani zooi nii zu nuɓusɛiti ba, ti la kɛɛni ti ʋa zeɠe zii niiti ta-ɠɔzɔba vaiti polu: Kanaan nuiti, Ɠɛte nuiti, Felɛze nuiti, Yeɓuse nuiti, Amɔn nuiti, Moaɓe nuiti, Ezipete nuiti, ta Amool nuiti. 
\v 2 Mazɔlɔɔ ti naati ti-loun anzanuiti fuluʋɛ ɓɔɠɔ ʋɛ, ta ti-loun zunuiti bɛ, ti zii ɲadegai zupua ga zooi nii zu nuɓusɛiti. Zou zɛʋɛ ɠundiɠiiti ta kundiɠiiti ka ti ɠɛa ga nu mɔungiti ti siɛ ʋele ɲɔi ɠɛ.»
\p
\v 3 Gè naa mɛnigai ma, gè nà-seɠeiti ta nà-seɠe maazu zeɠei ʋalini ga, gè ɗa nɔ̀undeɠaiti ta kpɛ̀lɛi volofolo ma kidaaʋiligi maaʋele ma, gè zei gaazuɠilii zu. 
\v 4 Gè yɛni zeini ná eyɛsu kpɔkɔ zalaɠa ɠula ziɛgi zeeli. Niiti kpein ti ɠɛni luazu Izilayɛle ná-GALAGI ná-tukpɔi ʋa, naama nuiti ta-ɠɛɛwoti ɲɔiti daalɔɠɔma, ti ɠulaai duɔlai zu, naati ti ʋaani, ti zei kòba. 
\v 5 Kpɔkɔ zalaɠa ɠula ziɛgi zu, gè wuzeɠeni, gè ɠula nà-gaazuɠilii zu, nà-seɠeiti ta nà-seɠe maazu zeɠei ʋaliai ga, gè ʋilɛni ɲìibiɠa, gè yeemaale nà-GALAGI, Ɠɔoɠɔ GALAGI ma, 
\v 6 gè maanɛɛnɛ ɠani: «Nà-GALAGI, niima unfe kaa le! Ee, nà-GALAGI, nà unfesu vɔlɔ ga gè ʋa ɠaazuwuzeɠe, gè wɛlɛ è ʋa. Mazɔlɔɔ gá-vaaɠaaza golaiti ti wola mɔinɗa, ti gi maaɓɔlea, gi-zɔgiti ti ɠaaɠooza, ti zei geeɠɔlɔgi ʋa. 
\v 7 É zo gi-ɠɛɛni ta-voloiti ma, é zeeli za ma, gá ga sɔba nuiti nɔ, gá-vaaɠaaza golaiti maaʋele ɠa é kɛa, gá-o, gá-masagiti-yo, gá-zalaɠa ɠula nuiti, è gi lɔa la zii ɠiligiti ta-masagiti zea, è gi ve boɠa zɔkpɔi ta duɔlai ya, gi ɠɛ toomai ta unfegi laawu, eɠɛʋelei é la za. 
\v 8 Kɛlɛ niima ziɛgi zu, Ɠɔoɠɔ GALAGI, gá-ƓALAGI, è undaanɛ ɠɛa gi ʋɛ yeeɠɛɠala go laawu, ga nui tanigaa ti yɛ vulua gi zaama, ti ɠale ma, ti ʋa, ti zei ɗa-you ɲadegai zu, è gi-ɠaazuʋɛti seɠea ma, ti volo, è zɛnvu go ve gi ʋɛ ga luɔlai zaama. 
\v 9 Gi ɠɛa duɔlai zu, kɛlɛ è la ɠɛlɛni gi ʋa. È Pɛɛlese masagiti gaazu ʋagɔ logɛ gi ʋa, ti vaaʋɛ bu ga ti gi-yɛnvui yɛ gi ya, nii a kɛ gi gá-ƓALAGI zei ʋɛlɛi lo ʋolu, ta gi koloɠolosuʋɛti buzeɠe ʋolu, ta gi lɔɔɠuzu ʋagɔ zɔlɔɔ Zuda ta Zeluzalɛme.
\p
\v 10 «Kɛlɛ lee ɠa gá bo niina naa pɛ poluma, ee, gá-ƓALAGI! Mazɔlɔɔ gi ɠɛlɛa ɗa-lɔgiti ba, 
\v 11 niiti è ti veai gi ya ga ɗa-wotiɠɛ nuiti maaʋele, GALA goo wo nuiti, è ɠɛni gi ma: ‹Zooi nii wo ʋaazu sɔlɔɔsu, kɔzɔʋɛ, tɔɔzei zii niiti ti zeini su ti ɠɔzɔʋɛ, tama ti sulaavegɛ ga ta-ɠɔzɔba vaiti eyɛsu é zeeli kwɛgi pɛ ma. 
\v 12 Naa ɠa é ba, à mina wo-loun anzanuiti fe ti-loun zunuiti bɛ ga anza, à mina ti-loun anzanuiti fulu wo-loun zunuiti bɛ ga anza, à mina yiizoolɛ ga ta-yiilɛigi ta ta-undaanɛɛi ma vaa, naazu wa zɛbɛi zɔlɔɔ, wo ɗa zooi ʋaalɔnɔ pagɔiti mi, wo ma zooi yɛ wo-lointi zea ga poganii eyɛsu ɠɔ.› 
\v 13 Nii kpein seeliai gi ma, naa ɠulaʋɛ gá-ɠotoiti ta gi-zɔ ɲɔu wolaiti su, kɛlɛ anɛɛ naa ʋe, è la gi zoni ga ʋelei soloogai la gá-vaaɠaaza golaiti ma, è vaaʋɛ bu ga è gi-mɔta goi yɛ ná. 
\v 14 Leeni vaa zu gá li ɗa-lɔgiti koloɠolosu ʋolu, ga gi ɗa vului ɠɛ yɔɠɔzu gá zii niiti ti kɔzɔba vaiti kɛɛzu? È la yiiɠaawana gi ma naazu ɓaa, é ʋa gi pɛ suwuɠaaleʋe, kulaba la ba? 
\v 15 Izilayɛle ná-GALAGI, Ɠɔoɠɔ GALAGI, è lelebogɛ, naa ɠa é kɛa, è gi mɔta goi gi yɛ ga vulua za, wɛlɛ gi ʋa è ɠakala ga gá-ɠotoiti, tama niima ɠɛʋelei nii zu, gi la zooga losu kpaan è ɠakala.»
\c 10
\s Izilayɛle ɠundiɠiiti ti minazeɠe vai ga  //  ti ɠolo GALA bɛ
\p
\v 1 Siɛgi zu Ɛsedalase laaʋɛa ɠɛni de zooi ma, é ɗa wɔlɔ, GALA sei ʋɛlɛi laaʋɛ, é ɗa niima ƓALA falii ta tosɔgai nii ɠɛ, Izilayɛle nuɓusɛi ma mɔinmɔin ge ɠaalɛɛni ba koba, zunuiti ta anzanuiti ta doungoiti, ti ɗa wɔlɔ ga gola. 
\v 2 Naazu Yeɠiyɛle ná-doun zunui Sekania, é ga Elame mavofodai ta, naa ɠɛni Ɛsedalase ma: «Gi ɠɛa ga wooʋalada nuiti gá-ƓALAGI ʋɛ, ga gi lii vai gi wɛɛn anzanuiti fulu zii ɠiligiti saama, niiti ti zooi nii zu. Kɛlɛ kito ko ɠa dɛ Izilayɛle ʋɛ niima vai zu. 
\v 3 Ade minazeɠe niina ada-ƓALAGI ʋɛ ga ada wɛɛn anzanui niiti kpɛɛ ta ti-lointi, eɠɛʋelei màliɠii Ɛsedalase ná-tɛnɛgi la, ta niiti kpein ti ada-ƓALAGI ná-deveiti sosu. Ade ná-tɔgiti so kpaan. 
\v 4 Wuzeɠe, tɔɔzei ɗa ɠa ɗa niima vai ɠaaɠula ba. Kɛlɛ gá yɛsu è ʋa, zɛbɛzeɠe, è kɛ!»
\p
\v 5 Ɛsedalase wuzeɠeni, é kpɛɛlagi la zalaɠa ɠula nuiti ta-ɠundiɠiiti bu, ta Levi geleiti, ta Izilayɛle nuiti pɛ, ga ti ɠona ga ta naa ɠɛ, nii ti bogai. Ti pɛ ti ɠonani. 
\v 6 Naa ʋoluma Ɛsedalase zeɠeni GALA sei ʋɛlɛi ma ɠoizuʋɛ, é li Eliasiɓe ná-doun zunui Yoɠanan laazuʋɛ, é ɲi ná, kɛlɛ é ɠɛlɛni daamianigi pɛ ba ta kpɔle aniiti pɛ, mazɔlɔɔ é ɠɛni wɔlɔzu Izilayɛle luɔ wɔlɔmaiti ta-ɠoto wolaiti faa zu.
\s Duɔ wɔlɔmaiti ta-ɠaalɛba vai Zeluzalɛme
\p
\v 7 Ti sɛʋɛi leʋeni názu Zuda yooi zu ná pɛ ta Zeluzalɛme, ga niiti kpein ti ɠɛa duɔlai zu, ti ɠalegai ma, ti ɠaalɛ ba Zeluzalɛme. 
\v 8 Kundiɠiiti ta totuɠɔiti ti deveni ga zɔi nɔpɛ é la ʋaani folo saʋagɔ laawu, kɔligiti ta ve Ɠɔoɠɔ GALAGI ʋɛ, tɔ ɓɔɠɔi ɠa ɠula naati saama, ti ɠulaai duɔlai zu.
\p
\v 9 Zuda ta Ɓɛnzamɛn zunuiti kpein ti ɠaalɛɛni ba Zeluzalɛme folo saʋagɔ laawu. Naa ɠɛɛni alugi laaʋuusiɛi ma volo ʋuufelegɔi (20) ma. Nuɓusɛiti pɛ ti ɠɛni zeini GALA sei ʋɛlɛi ma ɠoizuʋɛ, ti ɗa ɓali, tɔɔzei naama vai ʋa ti ɠɛni su, ta tonai é ɠɛni ʋuuzu ga sabalagi. 
\v 10 Zalaɠa ɠula nui Ɛsedalase wuzeɠeni, é ɠɛ ti ma: «Wooʋaladai ɠa wo kɛai ga wo wɛɛn anzanuiti fulu vai, wo ta ɓɔga Izilayɛle nuɓusɛiti ta-ɠoto ɠasɔi ʋa. 
\v 11 À laa zɔ ga niina Ɠɔoɠɔ GALAGI ʋɛ, wo-ɠɛɛni ta-ƓALAGI, wo ziima vai ɠɛ, à bali ma wa zooi nii zu nuɓusɛiti, ta wɛɛn anzanuiti.»
\p
\v 12 Nuɓusɛiti pɛ ti gooɠaaʋoteni ga woo wola, ti ɠɛ ma: «Gi-yee ɠa bu! Gá naa ɠɛ, nii è bogai! 
\v 13 Kɛlɛ nuɓusɛi mɔinʋɛ, tonai ɠaa é ʋuuzu, nu la zooga yɛsu eteaʋɛ, niima vai mu ge la vɔlɔ ga folo ɠila ɓaa folo felegɔ vaa nɔ, mazɔlɔɔ gi ma mɔinmɔin, gi tɔ koloɠologi ɠɛɛʋɛ niima vai zu. 
\v 14 Gá pɔ ga gá-ɠundiɠiiti ti yɛ nuɓusɛi yeema, zɔiti kpein ti wɛɛn anzanuiti fuluai, naati ti ɗa ʋa ti ʋɔ ta ta-laa ɠundiɠiiti, naa ʋɛɛ tukpɔɠaaleʋe nuiti ba, kui naa ma, nii togai ti ʋɛ, ga niima vai ɠaaɠulazu ba ga pagɔ eyɛsu gá-ƓALAGI ná-ziiɠaawana wolai zeɠe gi maala.» 
\v 15 Azayɛle ná-doun zunui Zonatan, ta Tikava ná-doun zunui Yaziya, naa ʋɛɛ Mesulame ʋa ta Levi nui Saɓetayi, naati gila kpe nɔ ɠa ti ɠɛlɛni naa ma levei ʋa.
\p
\v 16 Izilayɛle nuiti niiti ti ɠulani duɔlai zu, naati pɛ ti vaani bu. Zalaɠa ɠula nui Ɛsedalase yiimazeɠeni pɛlɛyeɠe ɠundiɠiiti pɛlɛyeɠeiti kpein saama, é yeeloni ti ɠilagilagi kpein ba. Ti ta-zei lɔɔzeini alugi ʋuusiɛi ma volo mɔungi ma nii a kɛ ti niima vai wuuʋɛtɛ. 
\v 17 Alu mɔungi ma volo mɔungi, ti ɓeni ga zunuiti kpein ta-vaiti gaaɠula ba, niiti ti wɛɛn anzanuiti fuluni.
\s Sɔba nuiti daaseigiti
\li1
\v 18 Zalaɠa ɠula nuiti ti-mavofodaiti saama, tanigaa ti wɛɛn anzanuiti fuluni, naama nuiti daaseigiti ka ga nii:
\li1 Yosadake ná-doun zunui Zozuwe mavofodaiti saama, ta kɛɛɠɛlointi: Maaseya, Eliyezɛɛl, Yaliɓe, ta Gedalia. 
\v 19 Ti minazeɠeni, ti ɠona ga ta ti-anzaiti kpɛɛzu, naa ʋolu ti baala sinɛ ɠilagila kula ga faazuɓɛtɛ zalaɠai ta-ɠotoi ma zuvaayɛ fai zu.
\li1
\v 20 Niiti ti ɠɛni Imɛɛl mavofodaiti saama, ti ɠɛni ga:
\li2 Ɠanani ta Zeɓadia.
\li1
\v 21 Niiti ti ɠɛni Ɠalime mavofodaiti saama, ti ɠɛni ga:
\li2 Maaseya, Eli, Semaya, Yeɠiyɛle ta Woziase.
\li1
\v 22 Niiti ti ɠɛni Pasuul mavofodaiti saama, ti ɠɛni ga:
\li2 Eliyɔyenayi, Maaseya, Isemayɛle, Netaneyɛle, Yozaɓade ta Eleyasa.
\b
\li1
\v 23 Niiti ti ɠɛni Levi nuiti saama, ti ɠɛni ga:
\li2 Yozaɓade, Simeyi, Kelaya é lolisu ɓalaa ga Kelita, Petayia, Zuda ta Eliyezɛɛl.
\b
\li1
\v 24 Nii é ɠɛni gɛingɛin gani nuiti saama, naa ɠɛni ga:
\li2 Eliasiɓe.
\b
\li1 Niiti ti ɠɛni siɠida makɛ nuiti saama, ti ɠɛni ga:
\li2 Salume, Telɛme ta Uli.
\b
\li1
\v 25 Niiti ti ɠɛni Izilayɛle nui mɔtaiti saama, ti ɠɛni ga:
\li1 Paleyɔse mavofodai zu geleiti ti ɠɛni ga:
\li2 Lamia, Yiziya, Malikiya, Miyamine, Eleazaal, Malikiya ta Ɓenaya.
\li1
\v 26 Elame mavofodai zu geleiti ti ɠɛni ga:
\li2 Matania, Zakali, Yeɠiyɛle, Aɓidi, Yelemɔte ta Eli.
\li1
\v 27 Zatu mavofodai zu geleiti ti ɠɛni ga:
\li2 Eliyɔyenayi, Eliasiɓe, Matania, Yelemɔte, Zaɓade ta Aziza.
\li1
\v 28 Ɓeɓayi mavofodai zu geleiti ti ɠɛni ga:
\li2 Yoɠanan, Ɠanania, Zaɓayi ta Atalayi.
\li1
\v 29 Ɓani mavofodai zu geleiti ti ɠɛni ga:
\li2 Mesulame, Maluke, Adaya, Yasuɓe, Seyale ta Lamɔte.
\li1
\v 30 Paɠate-Moaɓe mavofodai zu geleiti ti ɠɛni ga:
\li2 Adana, Kelale, Ɓenaya, Maaseya, Matania, Ɓɛsaleyɛle, Ɓinuwi ta Manasé.
\li1
\v 31 Ɠalime mavofodai zu geleiti ti ɠɛni ga:
\li2 Eliyezɛɛl, Yisiya, Malikiya, Semaya, Simiyɔn, 
\v 32 Ɓɛnzamɛn, Maluke ta Semalia.
\li1
\v 33 Ɠasume mavofodai zu geleiti ti ɠɛni ga:
\li2 Matenayi, Matata, Zaɓade, Elifelɛte, Yelemayi, Manasé ta Simeyi.
\li1
\v 34 Ɓani mavofodai zu geleiti ti ɠɛni ga:
\li2 Maadayi, Amalame, Uwɛle 
\v 35 Ɓenaya, Ɓedia, Keluɠu, 
\v 36 Vania, Melemɔte, Eliasiɓe, 
\v 37 Matania, Matenayi, Yaasayi, 
\v 38 Ɓani, Ɓinuwi, Simeyi, 
\v 39 Selemiya, Natan, Adaya, 
\v 40 Makenadebayi, Sasayi, Salayi, 
\v 41 Azalɛle, Selemiya, Semalia, 
\v 42 Salume, Amalia ta Zozɛfe.
\li1
\v 43 Neɓo mavofodai zu geleiti ti ɠɛni ga:
\li2 Yeiyɛle, Matitia, Zaɓade, Zeɓina, Yadayi, Zowɛle ta Ɓenaya.
\b
\p
\v 44 Zunui niiti pɛ ti wɛɛn anzanuiti fuluni, ma mɔinmɔingaa ti doun zɔlɔɔ ti ʋa.