\id COL - Toma Bible
\ide UTF-8
\h Kolɔse
\toc1 Pɔle Ná-Sɛʋɛi É Teʋeni Kolɔse Nuiti Ma
\toc2 Kolɔse
\toc3 Kol
\mt2 Pɔle Ná-Sɛʋɛi  //  É Teʋeni
\mt1 Kolɔse Nuiti Ma
\imt Sɛʋɛi lɔɔzeizuʋɛ ma woo mɔungiti
\ip Pɔle ɠa é sɛʋɛi nii ɠɛɛni Kolɔse nuiti ma (\xt 1:1\xt*). É sɛʋɛi ɠɛɛni siɛgi zu é ɠɛni la kasoi ɠa, kona ʋuulɔzita (60) ɠɛɠala leʋegai ma, Kilista zɔlɔɔgai ʋoluma. Kolɔse nuiti ta-zɛʋɛi, ta Efɛze nuiti tɔnɔi, ta Filipe nuiti tɔnɔi, naa ʋɛɛ Filemɔn nɔnɔi ʋa, ti-laasei pɛɛʋɛ ga kasoɠa zɛʋɛiti, tɔɔzei é ti zɛʋɛni siɛgi zu é ɠɛni la kasoi ɠa. É sɛʋɛi nii ɠɛɛni Egilisii ma, é Kolɔse taa wolai zu. Pɔle lɛi é ʋa ɠɛni Kolɔse Egilisii laaɠulani (\xt 2:1\xt*), kɛlɛ é gaaɠaani ga tosu ɠa ná Egilisii naa letemazu. Kɛɛʋɛ eɠɛ Epafelase ɠa é Kolɔse Egilisii laaɠulani, tɔɔzei é ɠɛni Kolɔse nu.
\ip Nii é ɠɛni Pɔle yiiɓɔlɔzu, naa ɠɛni ga zɛɛ ɠalagiti ti ɠɛni wosu Kolɔse Egilisii zu. É ná-sɛʋɛi ɠilazu wola ɠɛɛʋɛ, é lo naa ʋa. Ɗa ka ga Egilisii naa zu, keletiɛin tanigaa ti ga Zuifuiti, naati ka ti ɠɛni ɠɛɛzu ti da zɔiti ma ga maaɓa ga ti ɠolo Zuifuiti ta-lɔgiti bɛ, niiti Minazeɠe Pɔlɔmai zu, ma un ge daa ma mɛɛ ga tatipɛlɛʋolu vai. Pɔle sɛʋɛi nii ɠɛɛʋɛ ɠɛzɛɠɛzɛ, nii a kɛ é dɛɛ ga keletiɛinti kpɛdɛ nu ɠili nɔpɛ ba, ɓaa ani nɔpɛ ga GALA ge ʋa yeezei ti wu, kɛni Kilista ɠila kpe nɔ (\xt 1:15-20\xt*), ta é dɛɛ ga kalagi niiti ti lɔɔɓadɔai nuɓusɛ ɠisiɛi nɔ ma, kulanuma la naati ba (\xt 2:8\xt*).
\iot Unsosuʋɛ
\io1 1. Pɔle sɛʋɛi lɔɔzeiʋɛ ga é ná-tuʋɔ gooi laazeeli Egilisii ma, é Kolɔse (\xt 1:1-2\xt*).
\io1 2. Naa ʋolu é sɛʋɛi ɠɛ, é dɛɛ ʋelei Kilista wɔɔlɔai la, é naa ɠɛ ga gooɠaaʋotegi zɛɛ ɠalabogiti daalɔɠɔma Kolɔse (\xt 1:3—3:4\xt*).
\io1 3. Eɠɛʋelei kɛɛ vaa wɔlɔmai la ná-sɛʋɛ mɔinmɔin su, Pɔle ná-sɛʋɛi ɠaaɓelasuʋɛ ɠɛɛʋɛ ga é kala kɛzɛɠɛzɛ fe, é lo keletiɛn eteai ziɛ ʋelei ʋa (\xt 3:5—4:6\xt*).
\io1 4. Pɔle gaaɓelagɛ ga tuʋɔ gooiti, ta é deveiti fe, nii a kɛ ti sɛʋɛi nii ɠala woo wola zu zɔɔma Egilisiiti su (\xt 4:7-18\xt*).
\c 1
\s Tuʋɔ gooiti
\p
\v 1 Nɛ̀i gè ga Pɔle, nà ga Yesu Kilista ná-keelai, GALA ziimai maaʋele ma, gá ade-ɠɛɛloin Timɔte, 
\v 2 gá wo luʋɔsu, GALA ná-nuɓusɛiti, wɔi wo Kolɔse taazuʋɛ, gi-ɠɛɛleaiti gilibalai zu ada Kilista, wɔi wo ga wooɠɛɠila nuiti: Ade-Ɠɛɛ GALA ge zaalai la wo ma, é ziilɛigi ve wo ʋɛ.
\s Mama fee ƓALA falii
\p
\v 3 Gá GALA mamasu ɠɔ, de-Maliɠii Yesu Kilista Kɛɛɠɛ ya, siɛgi zu gá ɠɛna GALA falia la wo ʋɛ. 
\v 4 Tama, gi wa-ɠidaaleʋe vai mɛnini Yesu Kilista ma, ta nɛɛbɛi é wo-yiimaʋɛ, é lo GALA ná-nuiti pɛ ba. 
\v 5 Naama ɠidaaleʋei ta ma nɛɛbɛi ʋilɛgɛ naa ʋa, nii é ga wa-ɠitogi GALA ge makɛsu wo ʋɛ geeɠɔlɔgi zu. Kitogi naa, wo kwɛni ga gaamai ma lɛnɛgi maaʋele, é woni wo ma, nii é ga Woo Niinɛ Ʋagɔi. 
\v 6 Woo Niinɛ Ʋagɔi tɛi ge ʋaani wo ʋɔ bɛ. É ʋaani ga kulanumai, é li luɠɔ eteai zu ná pɛ, ʋelei é kɛai la wo zaama, kaite naama voloi, yeei mɔunpa wo GALA ná-zaalai ma wooi mɛnini da, wo tɔɔzei ga kwɛɛga, ʋelei é la ɠiteɠite. 
\v 7 Gi-nɛɛɲɔɠɔi Epafelase, gi boti ɠilagi zu, naa ɠa é wo ɠalagai ga naa, toɠa wo ʋɛ ga Kilista ná-botiɠɛ nui, é ga wooɠɛɠila nui. 
\v 8 É nɛɛbɛ vai wogɛ gi ma, nii Zɛnvu Ɲadegai feai wo ʋɛ.
\s Pɔle ná-GALA falii
\p
\v 9 Naa ɠa é ba, kaipa gi wo-maawooi mɛnini, gi la looɠosu GALA falii ʋa wo ʋɛ. Gá GALA falizu ga é wo laave ga ziimai ɠwɛɛgai ga ɠimalai maaʋele, ta keleɠelegi nii Zɛnvu Ɲadegai feezu. 
\v 10 Naazu, wa zoo wo ziɛ eɠɛʋelei Maliɠii pɔ la, wo ɗa naa ɠɛ yeenɔpɛ, nii nɛai bɛ. Wa gwaai wo ga kɛɛwoti ʋagɔi ma zii pɛ, wa li luɠɔma GALA kwɛɛgai zu. 
\v 11 GALA ge wo zɛbɛlɔ fai pɛ su ga ná-zɛbɛi maanɛai, nii a kɛ wo ziɛ fai pɛ bu ga ziilɔɔi. 
\v 12 À Ɠɛɛɠɛ GALA mama ga koozunɛɛi. Tɔ ɠa é zobo fea wo ʋɛ, ga wo wɔnɔ zɔlɔɔ poganiiti su, ti makɛgai wozakalagi ma masadai zu naati bɛ, ti ga ná-nuiti. 
\v 13 É ade ɠulaa kpidii ná-zobogi ya, é li ga deye nɛɛbɛ Loun Zunui ná-masadai zu. 
\v 14 De unmɔɔgi zɔlɔɔga ga tɔun maaʋele, é ade zuvaayɛ ga da-ɠotoiti.
\s Kilista ɠɛʋelei ta ná-botii
\p
\v 15 GALAGI nu la kaazu, Kilista ɠa é ga naa maaniinigi. Tɔ ɠa é ga Doun Zunu Mɔungi, bɔɔlɔai kpɛtɛanii pɛ ba. 
\v 16 Mazɔlɔɔ GALA ge aniiti kpein kpɛtɛni ga Kilista maaʋele, geeɠɔlɔgi zu, zooi ma, niiti nu a ti ɠa ga ɠaazu, ta niiti nu la ti ɠa ga ɠaazu, masadaiti, maliɠilaiti, kundiɠilaiti, zobodaiti. GALA ge anii pɛ kpɛtɛni saɓui zu, ta tɔun bɛ. 
\v 17 Kaite toɠa ná aniiti pɛ tuɠɔ, ti pɛ ta ɠɛʋele ma tɔun saɓui zu. 
\v 18 Egilisii é ga kpusɛi, tɔ ɠa é ga naa ma ungi. Tɔ ɠa é ga fai pɛ tɔɔzeigi, Doun Zunu Mɔungi, buzeɠeai, é ɠula saai ya, naa ɠa a kɛ é ɠɛ ga ma mɔungi fai pɛ su. 
\v 19 Mazɔlɔɔ GALA ge deveni ga fai kpein daazeeliai, naa zei ziimaʋɛ. 
\v 20 Zenɔ ɠana, GALA ge deveni ga é ti yɔɠɔzuɓɛtɛ ta aniiti pɛ ga ná-Doun Zunui maaʋele, niiti ti eteai zu, ta niiti ti geeɠɔlɔgi zu. É ziilɛigi ɓɛtɛni ga ná-Doun Zunui ma ɲamai maaʋele, nii puai saa wului ma.
\p
\v 21 Wa ma, mɔungi wo maaɠoozani GALA ba, wo ɠɛni ga sili nuiti, tɔɔzei wo ɠɛni kisiɛ ɲɔiti bosu, wo ɗa faa ɲɔiti kɛ. 
\v 22 Kɛlɛ é wo yɔɠɔzuɓɛtɛa niizu ga saai maaʋele nii ná-Doun Zunui boga kpusɛi zu, ga é ʋa wo lo ɠaazu ɲadedai zu, kɔzɔzu nɔpɛ ge mina ɠɛ wo ʋa, ta peelalazu nɔpɛ. 
\v 23 Anɛɛ naa ʋe, kɛni wo lo kpaan, wo zapelɔ kidaaleʋei zu. À mina ɲiikpi, wo ʋa maaɠooza wa-ɠitogi ʋa, nii wo mɛnini ga Woo Niinɛ Ʋagɔi maaʋele. Niima Woo Niinɛ Ʋagɔi ɠa ga naa, nii daazeelini kpɛtɛanii pɛ ma eteai zu. Nà Pɔle, gè ɠɛa ga ma wotiɠɛ nui.
\s Ɲɛpii Pɔle kɔɔzu Egilisii ʋɛ
\p
\v 24 Kòozu ɠa nɛɛzu niizu nà-kpɔlɔiti su wa-vaa zu. Nii daa la zeelini Kilista ná-kpɔlɔi vaa zu, gè naa laazeeli kpùsɛi zu, nɔnɔ ma ɓusɛi ʋɛ, nii é ga Egilisii. 
\v 25 Gè ɠɛa ga Egilisii ná-botiɠɛ nui, eɠɛʋelei naama losuʋɛ la GALA ge kalivaai mà wa-vaa zu. É tèʋeni ga gè daawooi laazeeli, ta mina yɛ ʋoluzu. 
\v 26 Daawooi nii é ga GALA ná-faazeikpasui ma lɔɔɠuzu vai é ɠɛa lɔɔɠuni nuɓusɛiti ba kaite wɔlɔwɔlɔ, kɛlɛ é ɠulaa kɛlɛma niizu ná-nuiti bɛ. 
\v 27 GALA ge devea ga é dɛɛ ga tiye ga ʋelei naama lɔɔɠuzu vai maayikiai la gola zii ɠiligiti bɛ. Naama lɔɔɠuzu vai ɠa é ga: Kilista ɠɛ wo-yiimaʋɛ,\f + \fr 1:27 \fr*\fq wo-yiimaʋɛ\fq*\ft : Tati pelei taɠili ɓalaa ka ga nii: \ft*\fqa wo zaama\fqa*\f* lɛbiyai é ʋaazu, naa ma ɠitogi. 
\v 28 Gá Kilista ná-fai laazeelizu nui pɛ ma. Gá tɛnɛgi wosu, gi ɛsɛ pɛ kala ga ɠimalai pɛ, naa ɠa a kɛ ɛsɛ pɛ suzeeli ta-ɠilibalai zu ta Kilista. 
\v 29 Naa ɠa é kɛɛzu gè botii ɠɛɛzu, gè ɲɛpii ɠɔ ga Kilista ná-zɛbɛi, nii é botii ɠɛɛzu zìimaʋɛ ga gola.
\c 2
\p
\v 1 Nà pɔ ga wo naa ɠwɛɛ, ɲɛpi wolai gè kɔɔzu wo ʋɛ, wa Laodisé nuiti, ta niiti ti la kwɛ̀ɛ kpusɛi zu. 
\v 2 Nà ɲɛpi ɠɔɔzu ti ʋɛ, ga ti iɲɔ ge lɔ, ti ɠili ʋa nɛɛbɛi zu, ti ladalai ma mɔinmɔin sɔlɔɔ, nii keleɠele kitei feezu. Ta GALA ná-faazeikpasui ma lɔɔɠuzu vai ɠwɛɛ naazu, naa ɠa é ga Kilista ɓɔɠɔi. 
\v 3 Ɠimalai ta faaɠwɛgi ma naavoloi pɛ dɔɔɠuʋɛ tɔun zea.
\p
\v 4 Nà nii wosu wo ma ga nu nɔpɛ ge mina wo ɠaka ga ná-kpɔɛzuɠula ʋagɔiti. 
\v 5 Mazɔlɔɔ anɛɛ ni kpùsɛi la miná wo zaama, kɛlɛ nà wo ʋa kisiɛi zu, ta toɠa bɛ̀ ga koozunɛ, gè faazeikpasu ʋagɔi ɠa é ɠɛɛzu wo zaama, ta ʋelei wo loni la kpaan wa-ɠidaaleʋei zu Kilista ma.
\s Fai pɛ daazeeli vai ade ʋɛ,  //  Kilista zaɓui zu
\p
\v 6 Naa ɠa é ba, tɔɔzei wo yeezeiɗa Yesu Kilista wu ga wo-Maliɠii, wo-ziɛ ʋelei dɛɛ ga wo ɠiliʋɛ ba. 
\v 7 À zapelɔ, wo lo kpaan wa-ɠilibalai zu wa Kilista, wo zɛbɛlɔ kidaaleʋei zu, eɠɛʋelei kalagiti ti la wo ti zɔlɔɔni. À yɛ GALA mamasu ɓalaa yeenɔpɛ.
\p
\v 8 À dama, nu nɔpɛ ge mina wo lɔ duɔlai zu ga ná-ɠima ɓɔɛ ɲakaiti, ti ga nu ɠaka saɓui, ti ɠulazu nuiti ta-vaa wɔlɔmaiti su, ta eteai zu yɛnvuiti su, ti la zolooni Kilista ná-faiti ma. 
\v 9 Mazɔlɔɔ galadai laazeeliaiti pɛ seiʋɛ Kilista ɓusɛi zu. 
\v 10 Fai pɛ daazeeliʋɛ wo ʋɛ tɔun saɓui zu. Tɔ ɠa é ga zobodaiti ta kundiɠilaiti ma ungi.
\p
\v 11 Wa-ɠilibalai zu wa Kilista, wo latigɛ pɛlɛʋolu. Tatipɛlɛʋolui naa la ga nii nuiti ti kɛai ga yeei, kɛlɛ toɠa ga tatipɛlɛʋolui nii é zeɠezu Kilista ʋɔ bɛ, é nu unmɔɔsu, é kula kotoba ɓusɛi ná-zɛbɛi ya. 
\v 12 Wo maaɠuluʋɛ ʋɔɔma wa Kilista ga ɓatizei maaʋele, wo wuzeɠe ɓalaa ʋɔɔma, wo ɠula saai ya, tɔɔzei wo laani GALA ná-zɛbɛi la, nii é buzeɠeni, é kula saai ya. 
\v 13 Wɔi wo zaa ɠɛni de zɛnvu zu vaiti tetemazu, wa-vaaɠaazagiti maaʋele ma, tɔɔzei wo ɠɛni ga tatipɛlɛʋolulala nuiti kpusɛi zu. Kɛlɛ niizu GALA ge wo vulua su ʋolu ʋɔɔma wa Kilista. GALA ge ade zuvaayɛga ga da-vaaɠaazagiti pɛ. 
\v 14 Mazɔlɔɔ de maalɔ zɛʋɛi, é ɠɛni ade laalɔɠɔma, é ɠɛni dɛɛzu ga ada ɠa de la deveiti sosu, é naa ɠaaʋaani, é koloɠolo, é kpadɔ saa wului ma. 
\v 15 GALA ge kundiɠilai ta zobodaiti suvikɛi ɠulani zɛnvuiti zea, é zɔngɔ zɛlɛ ti ʋa eteai pɛ gaazu, é pilɛ sɔlɔɔ ti ma ga Kilista maaʋele.
\p
\v 16 Naa ɠa é ba, à mina va bu, nu nɔpɛ ge ʋa wo ʋeelala naama vaa zu, nii wa mi, ɓaa nii wa kpɔle, ɓaa fɛti vaa zu, ɓaa alu niinɛ vaa zu, ɓaa dooɠo folo vaa zu. 
\v 17 Naati pɛ ti ɠɛni nɔ ga niiti ti ʋaazu ti-maaniinigi, kɛlɛ ma ɠitei ɠa ga Kilista nɔ. 
\v 18 À mina va bu, nu nɔpɛ ge ʋa wo ʋeelala, nii ziimai ga zɛɛ ɓɔɠɔmaayeii, ta geezuɠeelaiti dɛbi vaiti. Ti ɠilizu ta-ɠulakɛlɛmaiti nɔ ʋa, ti laavegai ga wasogi wafuun, ga kpusɛ zu ɠisiɛiti maaʋele. 
\v 19 Ta ɠɛlɛzu ga ti mina ɠili Kilista ʋa, nii é ga ma ungi. Tɔun saɓu zu ɠa kpusɛi kpein ge ɠɔnɔgi zɔlɔɔsu da, giliai ɓɔɠɔ ʋa ga todazuʋɛti ta pɛɛpɛɛbazuʋɛti maaʋele, é ɗa wɔɔlɔ eɠɛʋelei GALA ge pɔ la.
\s Wo za ta wo yɛnvu ʋɔɔma wa Kilista
\p
\v 20 Wo zaani ʋɔɔma wa Kilista, eteai zu yɛnvuiti ti la mɔ ga ani nɔpɛ wo letema. Leeni vaa zu mu wo wa-eteai ziɛzu eɠɛ wa ɠɛ ga eteai nɔnɔ? Leeni vaa zu wo vaazu bu, ti ɗa naama leve ziiti da wo ma: 
\v 21 «Mina nii zeɠe! Mina naa ɠɔɠɔ! Mina yeevɔɔɠu nuu ʋa!»? 
\v 22 Naama aniiti kpein ti la ɠoloɠolosu ɓaa, botii ɠɛa ʋoluma ga tiye? Naama leveiti ta ga nuɓusɛiti ta-leveiti nɔ, ta ta-ɠalagiti. 
\v 23 Gaamazu, naama leveiti ta ɠɛɛzu eɠɛ ɠima vaa, ɓɔɠɔyiima ɠala dɛbii, zɛɛ ɓɔɠɔmaayeii, tɔgi ti seizu ɓɔɠɔ ma, ga ti ti-ɓusɛi ɓɔlɔ gola, kɛlɛ tosu nɔpɛ ge la ti ʋa, ga de ʋa vɔni kpusɛi yiimaiti ma la.
\c 3
\p
\v 1 Kɛlɛ wo wuzeɠeni, wo ɠula saai ya wa Kilista. Deɠɛmu, à geezuʋɛ vaiti gaiziɛ, ʋɛ Kilista zeini ná, GALA zeezazuʋɛ. 
\v 2 Wa-ɠigaiziɛi pɛ ge lo geezuʋɛ vaiti ba, é mina mɔ li ga etea geleiti pɔ pelei. 
\v 3 Mazɔlɔɔ wo zaani, wo-yɛnvui ʋɛɛ Kilista ʋa, ti lɔɔɠu GALA zea. 
\v 4 Siɛgi zu Kilista, é ga wo-yɛnvui, é ɠulazu la kɛlɛma, wa ɓalaagi wa ɠula kɛlɛma wa tɔun, wo wɔnɔ zɔlɔɔ ná-lɛbiyai zu.
\s Zɛnvu wɔlɔmai ta zɛnvu niinɛi
\p
\v 5 Deɠɛmu, à etea vaa ɲɔiti suɠoloɠolo, ti wo-yiimaʋɛ: koloɠologi, kɔzɔba vai, ɓɔɠɔyiimai, ani wɔin ɲɔu vaiti, ta koozu yii, é ga kɔɔɠɔ gani kɔɔ vai. 
\v 6 Naama ziɛ ʋeleiti ka ti GALA ná-ziiɠaawanai maalolisu naati ma, niiti ti la kɛɛzu ti ʋa gooi zo. 
\v 7 Wo ɠɛni ziɛzu ɠana mɔungi zu, siɛgi zu wo ɠɛni eteai ziɛzu la naama ɠotoiti su. 
\v 8 Kɛlɛ niizu, à ɠɛlɛ niima vaiti pɛ ba: ziiɠaawanai, ziiɠulagi, keleɠele ɲɔi, tɔɠɔ ɠoloɠologi, ta woo ɲɔu wo faiti ti ɠulazu wo-laaʋɛ. 
\v 9 À mina ɗa ga zɛɛ wo ɓɔɠɔ ma mɔnɔ, mazɔlɔɔ wo nu wɔlɔmalai ta ma ziɛ ʋelei ɠulaa ɠɔba. 
\v 10 Wo ɓɔɠɔ maaɠilia ga nu niinɛlai, nii é niinɛzu, é zoloo Kpɛtɛ ƓALAGI ma niinigi ma, nii a kɛ wo kwɛɛ. 
\v 11 Zeeɠaaɠwɛɛzu nɔpɛ ge la Zuifuiti ba ta nuiti ti la ga Zuifua, ɓaa tatipɛlɛʋolu nuiti ta tatipɛlɛʋolulala nuiti, ɓaa dɔɓɔzu nuiti, ɓaa kalatala nuiti, ɓaa duɔiti ta wɔɔlɔiti, kɛlɛ Kilista ɠa é ga ma ɓiigi fai pɛ su.
\p
\v 12 Naa ɠa é ba, tɛi wo ga nu ɲadegaiti, GALA ge wo nɛai ʋɛ, é yiimazeɠe ga woye ga wo ɠɛ ga nɔnɔ, à ɓɔɠɔ maaɠili ga niima vaiti: maawɔinɠai, nuɓɔɠɔlai, ɓɔɠɔmaayeii, sɛsɛbogi, ta ziilɔɔi. 
\v 13 À yeezei ɓɔɠɔ wu wo ɠilagilagi pɛ. Ni ta-zɔ ka bɔɔla ɠisu, à ɓɔɠɔ zuvaayɛ. Eɠɛʋelei Maliɠii wo zuvaayɛgai da, wa ɓalaagi, wo maanɛɛʋɛ wo zɔiti suvaayɛ ɠana. 
\v 14 Kɛlɛ nii bɔɔlɔai ti pɛ ba, à ɓɔɠɔ maaɠili ga nɛɛbɛi, nii é wo ɠilizu ɓɔɠɔ ʋa kpaan. 
\v 15 Kilista ná-ziilɛigi lo wo luɠɔ, naama yiilɛigi ɠa GALA ge wo loligai ma ʋɔɔma, wo ɠɛ ga kpusɛ ɠilagi ʋaalobazuʋɛti. À ɠɛ ga faanɛɛ wuuɠwɛɛ nuiti. 
\v 16 Kilista laawooi yɛ wo zaama ga bɔɔlɔa. À ɓɔɠɔ ɠala, wo ɓɔɠɔ lɛnɛ wo ɠilagilagi ɠimalai pɛ su. À GALA guyeiti too, ta GALA dɛbi wuyeiti, naa ʋɛɛ guyeiti ba Zɛnvu Ɲadegai ti lɛɛzu ga woye. À ti loo GALA bɛ ga yii pɛ ta faanɛɛ wuuɠwɛɛgai. 
\v 17 Nii nɔpɛ wo kɛɛzu, kpɔɛzuɠulai zu ɓaa kɛɛwotii zu, à ti pɛ kɛ, é zoloo Maliɠii Yesu yiimai ma, wo ɗa Ɠɛɛɠɛ GALA mama ga tɔun maaʋele.
\s GALA nui ná-pɛlɛyeɠei
\p
\v 18 Anzaiti, à ɓɔɠɔmaayei wo-zinigiti bɛ, eɠɛʋelei soloogai da anzanuiti ma, niiti ti ga Maliɠii nɔnɔiti. 
\v 19 Anzazinigiti, à wo-anzaiti nɛɛ ʋɛ, à mina ti zopele ɲɔu. 
\v 20 Dointi, à ɠolo fai pɛ su wo zɔlɔɔ nuiti bɛ, mazɔlɔɔ Maliɠii yiimai ɠana. 
\v 21 Doun kɛɛɠɛiti, à mina wo-lointi ziiɓɔlɔ vaa ɠɛ, wo ʋa ti iɲɔteʋe.
\s Duɔiti ta duɔ kɛɛɠɛiti zɔɠɔzuʋɛ
\p
\v 22 Duɔiti, à ɠolo fai pɛ su wa-luɔ kɛɛɠɛiti bɛ eteai zu, naa mina ɠɛ ga ti ɠaazu vaa nɔ, wo ʋa nu ɛnɛkɛ nɔ, kɛlɛ à kɛ ga zii zɔledai, unfemai maaʋele ma wo feezu Maliɠii ʋɛ. 
\v 23 Boti nɔpɛ wo kɛɛzu, à kɛ ga wo-yiimaʋɛ pɛ, eɠɛʋelei wo kɛɛzu la Maliɠii ʋɛ, nuiti taade wo ʋa ɠɛ kɛɛzu ti ʋɛ. 
\v 24 À suɠwɛɛ ga Maliɠii ɠa wa-ɠulanumai ve wo ya, wo wɔnɔ zɔlɔɔ poganiiti su. Kilista ɠa é ga Maliɠii nii wo botii ɠɛɛzu bɛ. 
\v 25 Mazɔlɔɔ zɔi nɔpɛ é telebotalai ɠɛɛzu, toɠa naama zalai zɔlɔɔ nii soloogai telebotalai ma nii é kɛai. GALA ge la ɗa ga zeelɔzɔɠɔzu ɠɛ nuɓusɛiti su.
\c 4
\p
\v 1 Duɔ kɛɛɠɛiti, à wa-luɔiti sopele ɓɛtɛ, é zoloo telebodai ta sɔledai ma, wo ɠɛ suɠwɛɛ ga wa ɓalaagi wo-Maliɠii ɠa geeɠɔlɔgi zu.
\s Tɛnɛ gaaɓelagiti
\p
\v 2 À yiilɔɔ GALA falii wu, wo ɠaaɓa ma, naa ʋɛɛ mamagi ʋa. 
\v 3 À GALA fali gá ɓalaa gi ʋɛ, GALA ge pele laalao gi luɠɔ daawooi wo fai zu, naa ɠa a kɛ gi zoo gi Kilista ná-dɔɔɠuzu vai laazeeli. Naa maaʋele ɠa gè ɠɛa la ga kasoɠa nu. 
\v 4 À GALA fali ga gè wooi naa lɛ, é ɠole, eɠɛʋelei maanɛai gè kɛ la.
\p
\v 5 À ziɛ ga ɠimalai kamaʋolu nuiti bɛ. À mina yeeɠɛɠalai ɠoloɠolo. 
\v 6 Woo nɛɛnɛgiti ti ɠɛ wo la yeenɔpɛ, nii a nu ɛnɛkɛ, naa ɠa a kɛ, wo kwɛɛ ʋelei wa zoo nuiti gooɠaaʋotesu la.
\s Tuʋɔ gaaɓelagiti
\p
\v 7 Gi-ɠɛɛloin, gi-nɛɛɲɔɠɔi Tisike, é Maliɠii ná-botii ɠɛɛzu wooɠɛɠiladai zu, gi botii ɠɛɛzu ʋɔɔma ga tɔ Maliɠii ʋɛ, naa ɠa nà-faiti pɛ bo wo ma. 
\v 8 Nà teʋesu wo ma, naama vai nɔ ma, naa ɠa a kɛ wo gá-vaiti kwɛɛ, é wo iɲɔdɔ ga pagɔ. 
\v 9 Nà ti leʋesu ta gi-ɠɛɛloin, gi-nɛɛɲɔɠɔi Wonezime, é ga wooɠɛɠila nui, nii é ga wo ta. Ta naati pɛ bo wo ma, niiti ti leʋegai ʋɛ.
\p
\v 10 Alisitaake ɠa wo luʋɔsu, gá nii gi kasoi ɠa ʋɔɔma. Ɓalanaɓase kɛkɛ loin Maleke ɓalaa ɠa wo luʋɔsu. Kaite gè deveiti feeni wo ya ná-faa zu. Ni a ʋaana wo ʋɔ bɛ, à yeezei bu ga pagɔ. 
\v 11 Yesu, nii daasei pɛai ga Zusetuse, naa ɓalaa ɠa wo luʋɔsu. Naama zunu saʋagɔiti nɔ ɠa ti ga Zuifuiti ti bà, gi botii ɠɛɛzu ʋɔɔma GALA ná-masadai vaa ma, ta ìɲɔdɔɔzu gola. 
\v 12 Epafelase ɓalaa ɠa wo luʋɔsu, toɠa ga wo ta. Yesu Kilista ná-botiɠɛ nui naa la looɠosu GALA falii ʋa wo ʋɛ, nii a kɛ wo lo kpaan, wo ɠɛ ga nu ɠiteiti kidaaleʋei zu, ti laai GALA ziima vai pɛ da. 
\v 13 Nà niima zeele wooi wosu bɛ, ga toɠa ɓɔlɔzu gola wo ʋɛ, ta niiti ti Laodisé, ta niiti ti Yielapolise. 
\v 14 Luke, ɗɔɠɔtɔlɔi, gi-nɛɛɲɔɠɔi, ta Demase ta wo luʋɔsu ɓalaa.
\p
\v 15 À ade-ɠɛɛleaiti tuʋɔ gi ʋɛ, niiti ti Laodisé, wo Nimefa luʋɔ, ta Egilisii é ɠaalɛɛzu ba ná-pɛlɛi wu. 
\v 16 Niima zɛʋɛi ɠalagai ma wo ʋɔ bɛ, à teʋe, é ɠala Egilisii zu Laodisé nuiti pɔ bɛ. Wa ɓalaagi wo naama zɛʋɛi ɠala, nii gè teʋeni Laodisé nuiti pɔ. 
\v 17 À bo Aalisipe ma, ga é ɠaaɓa é botii naa ɓe ga pagɔ, nii é sɔlɔɔgai Maliɠii ya.
\p
\v 18 Nà Pɔle, nà ɓɔɠɔi zèeʋogi ɠa gè wo luʋɔsu da. À mina yeema ga nà kasoi ɠa. GALA ná-zaalai yɛ wo ʋa!