\id 3JN - Toma Bible
\ide UTF-8
\h 3 Zan
\toc1 Zan Ná-Sɛʋɛi Zaʋasiɛi
\toc2 3 Zan
\toc3 3Za
\mt1 Zan Ná-Sɛʋɛi Zaʋasiɛi
\imt Sɛʋɛi lɔɔzeizuʋɛ ma woo mɔungiti
\ip Zan Ná-Sɛʋɛi Zaʋasiɛi nii, Zan ɠa é sɛʋɛni, kona ʋuulɔsaʋa maazu lɔɔlugɔi zɔɠɔzuʋɛ ta puutaaʋuugɔi (85-90), Kilista zɔlɔɔga ʋoluma. Zan la ɓɔɠɔ lɛɛzu ga tɔ ɠa é ga sɛʋɛi ɠɛɛ nui, kɛlɛ tɔun é ɓɔɠɔ laasei pɛɛʋɛ ga «Kɛwolai» (\xt 1:1\xt*). Kisiɛi wogɛ ga Zan ɠa é Woo Niinɛ Ʋagɔi zɛʋɛa, naa ʋɛɛ Zan Ná-Sɛʋɛ Mɔungi, Felesiɛi ta Saʋasiɛi ʋa, siɛgi zu é ɠɛni la Efɛze.
\ip Zan sɛʋɛi nii leʋegɛ kidaaleʋe nui ta ma, nii daaseigi ga Gaiyuse. Toɠa ɓɔɛzu Gaiyuse ʋɔ eɠɛ bɔɔlai ta, ta é deveiti fe naa ya, ga é ɠa ga wɛɛn zuzo nu ɠɛɛɠɛlointi bɛ, ti leʋesu zou zɛʋɛi naa zu, tama ta naati ti gilibalai zu ta Kilista.
\iot Unsosuʋɛ
\io1 1. Zan ná-sɛʋɛi lɔɔzeizuʋɛ ma woo mɔungiti bogɛ (\xt 1:1\xt*).
\io1 2. Naa ʋolu é Gaiyuse iɲɔdɔɔʋɛ, ta é deveiti fe naa ya ga é ɠɛ ga wɛɛn zuzo nu ɠɛɛɠɛlointi bɛ (\xt 1:2-8\xt*).
\io1 3. É zɛba é ɓɔɛ, é ʋilɛ zunu felegɔ ɠiligaa ʋa, Diyotelɛfe ta Demetiliyuse (\xt 1:9-12\xt*).
\io1 4. É gaaɓela ga é ná-sɛʋɛi unsei (\xt 1:13-14\xt*).
\c 1
\s Tuʋɔ gooiti
\p
\v 1 Nɛ̀i gè ga Egilisi lotuɠɔi, nà ɠa gè sɛʋɛi nii leʋesu nɛ̀ɛɲɔɠɔi Gaiyuse ma, gè nɛai ʋɛ ga gaamai.
\p
\v 2 Nɛ̀ɛɲɔɠɔi, nà pɔ ga è-yeavaiti pɛ ti zoloo ga pagɔ, è ɠɛ kɛdɛyai zu è-ɓusɛi zu, eɠɛʋelei è la zɛnvu zu vaiti su. 
\v 3 Kòozunɛɛni gola, de-ɠɛɛleaiti paai ma, ti zeɠe è ʋɔ bɛ, ti ɗa-wooɠɛɠiladai wo gaamai zu, eɠɛʋelei è ziɛzu la gaamai zu. 
\v 4 Koozunɛ nɔpɛ ge la wɔɔlɔa zèa, é ʋa leʋe nii ʋa, ga gè mɛni ga dòinti ta ziɛzu gaamai zu.
\s Gaiyuse maamusɛ vai
\p
\v 5 Nɛ̀ɛɲɔɠɔi, ɗa ziɛzu ga wooɠɛɠiladai fai pɛ su è kɛɛzu ɠɛɛɠɛlointi bɛ, anɛɛ naati bɛ niiti ti ga wɛɛinti. 
\v 6 Ti naama zeele wooi woni Egilisi nuiti gaazu, nii pilɛgai ɗa-nɛɛbɛi ʋa. Nà è maanɛɛnɛzu ga è ɓɔ ti ʋa ta-ziɛi zu, eɠɛʋelei soloogai la GALA gaazu. 
\v 7 Tɔɔzei Kilista ná-botii ma ziɛi ɠa ti bosu, ti la yeezeini kidaaleʋelala nuiti ta-ɓɔba nɔpɛ bu. 
\v 8 Naa ma, de maanɛɛʋɛ de yeezei nii ɠɛɠala nuiti bu, naa ɠa a kɛ de losu ɠɛ botii naa ʋa, nii ti kɛɛzu gaamai ʋɛ.
\s Diyotelɛfe ziɛ ʋele ɲɔi
\p
\v 9 Gè sɛʋɛ go leʋeni Egilisii ma, kɛlɛ Diyotelɛfe, nii wɔinɗai ga é ɠɛ ga ta-ɠundiɠii, é la gi levezu ga tago ɓalaa. 
\v 10 Naa ɠa é ba, siɛgi zu gè ʋaazu la, nà siɛ ʋele ɲɔiti bo, woo ɲɔiti ta zɛɛiti é ti wosu gi ma. Kɛlɛ é la ɓelani naa ʋa, é la kɛɛzu é ʋa yeezei de-ɠɛɛleaiti bu, ti ʋaazu, zɔiti ta ɠɛɛna ti yeezei ti wu, é pele ɓesa naati tuɠɔ, é ti ɓɛ Egilisii zu.
\p
\v 11 Nɛ̀ɛɲɔɠɔi, mina ʋokɔɠɔ faa ɲɔi ma, kɛni faa ʋagɔi. Zɔi é faa ʋagɔi ɠɛɛzu, naa ɠa ga GALA nu, kɛlɛ zɔi é faa ɲɔi ɠɛɛzu, naa la GALA kwɛɛ pa.
\p
\v 12 Ɛsɛ pɛ ka zeele woo ʋagɔi wosu Demetiliyuse ʋɛ, gaamai ɓɔɠɔi ɠa ɓɔɛzu ná-faa zu. Gá ɓalaagi gá zeele wooi wosu bɛ, tama è kwɛɛ ga nii gi bosu, gaamai ɠana.
\s Tuʋɔ gaaɓelagiti
\p
\v 13 Faa mɔinmɔin ka kìsu ga gè bo è ma, kɛlɛ gè la wɔinni gè ʋa naa ɠɛ ga sɛʋɛ ɓakui ta sɛʋɛ ɗɛi. 
\v 14 Toɠa kìsu ga su la ɠoozazu de ɓɔɠɔ ɠa, da ɓɔɛ ʋɔ názu, laani ta la.
\p
\v 15 Ziilɛigi ɠɛ è ʋɛ. De-wɔɔlaiti ta è luʋɔsu. De-wɔɔlaiti tuʋɔ, ti ɠilagilagi pɛ.