\id 2TI - Toma Bible
\ide UTF-8
\h 2 Timɔte
\toc1 Pɔle Ná-Sɛʋɛi Velesiɛi É Teʋeni Timɔte Ma
\toc2 2 Timɔte
\toc3 2Ti
\mt2 Pɔle Ná-Sɛʋɛi Velesiɛi  //  É Teʋeni
\mt1 Timɔte Ma
\imt Sɛʋɛi lɔɔzeizuʋɛ ma woo mɔungiti
\ip Timɔte ná-sɛʋɛi velesiɛi ɠa é ga sɛʋɛi velesiɛi nii keelai Pɔle teʋeni ná-kaladopoi Timɔte ma. Sɛʋɛi nii ɠɛɛʋɛ Pɔle ná-eteai ɠaaɓela siɛgi zu. É ɠɛni kasoi ɠa Wɔlɔme naama ziɛgi zu. Pɔleni ta Timɔte ti wola ɠilini ʋa, siɛ mɔinmɔin su é ɓena naa loli vɔlɔ ga ná-doun zunui (\xt 1Ti 1:2, 18; Fil 2:22\xt*).
\ip Sɛʋɛi nii ɠa sɛʋɛ naanigɔiti saama niiti Pɔle ti leʋega nu ɠilagilagiti ma, kɛlɛ é la teʋeni Egilisi ma. Zɔ saʋagɔiti ta ga: Timɔte ná-sɛʋɛ mɔungi ta Tite nɔnɔi, naa ʋɛɛ Filemɔn nɔnɔi ʋa. Timɔte ná-sɛʋɛi velesiɛi nii ɠɛɛ ziɛgi zu, wɔinzeɠemai ɠa é ɠɛni keletiɛinti polu Wɔlɔme masa zooi zu ná pɛ. Kɛɛʋɛ eɠɛ naama vai maaʋele ɠa é kɛɛni Pɔle ɠɛni la kasoi ɠa, ta é ɠɛni Timɔte iɲɔdɔɔzu la ga naa yiilɔɔ kpɔlɔiti bu. É ɠɛni Timɔte ma ɓalaa, yeeɠɛɠala ɓaaɓaagiti ta ʋaazu (\xt 3:1\xt*).
\iot Unsosuʋɛ
\io1 1. Pɔle tɔɔzeiʋɛ ga Timɔte luʋɔ fai (\xt 1:1-2\xt*), naa ʋoluma é naa iɲɔdɔɔ vai (\xt 1:3-18\xt*).
\io1 2. Naa ʋoluma é Timɔte zasulɔɔni ga naa yiilɔɔ kpɔlɔi zu (\xt 2:1-13\xt*).
\io1 3. É zɛba kalagi tanigaa ve zea é ʋilɛ kiti vai tanigaa ʋa (\xt 2:14-26\xt*).
\io1 4. É tooni ɠisu naa ʋolu é lo yeeɠɛɠalaiti ba ti ʋaazu, ta ʋelei a zoo ɓɔɠɔ zosu da naama ziɛgi zu ga pagɔ (\xt 3:1—4:8\xt*).
\io1 5. Pɔle ná-sɛʋɛi ɠaaɓelagɛ ga fai tanigaa é zumɔgai, é lo Timɔte ɓɔɠɔi ʋa (\xt 4:9-22\xt*).
\c 1
\s Tuʋɔ gooiti
\p
\v 1 Nɛ̀i gè ga Pɔle, gè ga Yesu Kilista ná-keelai, GALA ziimai maaʋele ma, nɛ̀i tèʋegai ga gè ɗa minazeɠe zɛnvui ma vai laazeeli, de sɔlɔɔsu da-ɠilibalai zu da Yesu Kilista, 
\v 2 nà è luʋɔsu, Timɔte, dòin è nɛai bɛ̀ gola. Ɠɛɛɠɛ GALA ta de-Maliɠii Yesu Kilista ti zaalai la è ma, ti è maawɔinɠa, ti ziilɛigi ve è ʋɛ.
\s Mamagi ta iɲɔdɔɔi
\p
\v 3 Nà GALA mamasu, nii gè botii ɠɛɛzu bɛ kisiɛ ʋagɔi zu, eɠɛʋelei mɛ̀mɛwolani ti kɛɛni la bɛ, nà ɗa ɠisiɛ è zu yeenɔpɛ nà-GALA faliiti su, kpidi ʋɛɛ folo ʋa. 
\v 4 Nà ɗa ɠisiɛ è-ɠaazuɗɛi zu, wɔin ɠa mà gola ga gè è ʋɛtɛ, nii a kɛ zìimaʋɛ laave ga koozunɛɛi. 
\v 5 Kì ka ɗa-ɠidaaleʋei zu, nii wooveleda la su. È-lee Loyise ta è-leewola Enise ɠa naama ɠidaaleʋei ɠɛni ti ya è luɠɔ. Dàaʋɛ da ga zekana é è ya la ɓalaa. 
\v 6 Naa ɠa é ba, nà è loozu ɠisu, ga è GALA ná-vebɛanii niinɛ ʋolu, nii è sɔlɔɔni, siɛgi zu gè yeelaani la è ma. 
\v 7 Mazɔlɔɔ Zɛnvui GALA ge feai de ya, é la de ɠɛɛzu ga ladalala nuiti, kɛlɛ ná-Zɛnvui ɠa zɛbɛi veezu de ʋɛ, ta nɛɛbɛi, naa ʋɛɛ ɠimalai ʋa.
\p
\v 8 Naa ɠa é ba, mina unfe ga zeele wooi wo fai Maliɠii ʋɛ. Mina unfe ɓalaa ga ze, nɛ̀i gè ga kasoɠa nui ná-faa zu. Kɛlɛ kɛni è ɗɔnɔ zɔlɔɔ kpɔlɔi zu Woo Niinɛ Ʋagɔi vaa zu, eɠɛʋelei GALA ge ma zɛbɛi veezu la è ya. 
\v 9 Tɔ ɠa é de ɠizogai, é de loli ga toli ɲadegai, naa maa la zɔlɔɔni ga kɛɛwotiiti maaʋele niiti de ti ɠɛɛni, kɛlɛ tɔɔzei é seini kpasu, é deve ɠana, ná-zaalai zu. É naama zaalai veeni de ʋɛ ga Yesu Kilista maaʋele, kaite aisa wɔlɔwɔlɔi. 
\v 10 Kɛlɛ zaalai naa ɠulaa kɛlɛma niizu de ʋɛ, ga de Ɠizo Nui Yesu Kilista ʋaa vai. É saai ná-zobogi ɠulaai zea, é zɛnvui ta saalalai ɠula kɛlɛma ga Woo Niinɛ Ʋagɔi.
\p
\v 11 GALA ge kàsɔɠiliʋɛ ga gè Woo Niinɛ Ʋagɔi naa laazeeli, gè ɠɛ ga keelai ta kalamɔin. 
\v 12 Naa ɠa é ga nà-kpɔlɔiti ma ungi. Kɛlɛ gè la unfesu ga naa, mazɔlɔɔ gè naa ɠwɛɛ, nii kìdaaleʋeai ma, dàaʋɛ da ga zobogi ɠa bɛ, nii é kalivaai mà, é naa makɛ eyɛsu tukpɔɠaaleʋe voloi. 
\v 13 Gaama ɓɔɛiti è ti mɛnigai dà, ziɛ ga tiye, kɛ kidaaleʋei ta nɛɛbɛi zu ti zɔlɔɔsu ni nu ɗa ɠilina Yesu Kilista ʋa. 
\v 14 Makɛ kala pagɔiti ma, ti ɠalivaai è ma ga Zɛnvu Ɲadegai maaʋele, nii é zeini ade-yiimaʋɛ.
\p
\v 15 È suɠwɛɛ ga niiti pɛ ti Azi yooi zu, ti màaɠelesa teʋea, ma un ge daa ma mɛɛ ga Fizɛle ta Ɛlemozɛne. 
\v 16 Maliɠii ná-maawɔinɠai ɠɛ Wonezifɔle ná-pɛlɛyeɠei ʋɛ, mazɔlɔɔ é ɠɛni ìɲɔdɔɔzu yeeɠɛɠala mɔinmɔin su, é la ɠɛni unfeni ga nà-kasoɠa vai, 
\v 17 tɔun siɛgi zu é ʋaani la Wɔlɔme, é gàiziɛni gola, eyɛsu é kà. 
\v 18 Maliɠii va bu, é GALA ná-maawɔinɠai zɔlɔɔ tukpɔɠaaleʋe voloi. È suɠwɛɛ ga pagɔ, botii kpein é kɛɛni bɛ̀ Efɛze taazuʋɛ.
\c 2
\s Yesu Kilista ná-salaʋusu ʋagɔi
\p
\v 1 Ɗɔun ɗa, dòun, è-zɛbɛi ɠaiziɛ zaalai zu, de sɔlɔɔsu da-ɠilibalai zu, da Yesu Kilista. 
\v 2 Kalagi nii è sɔlɔɔgai zèa, gè ɗa bo zeele mɔinmɔin gaazu, ti ɠaliva wooɠɛɠila nuiti ma, niiti tiya ɓɔɠɔi ta zoo ti taɠiligaani kala da.
\p
\v 3 Va bu, è ɗɔnɔ zɔlɔɔ kpɔlɔi zu, eɠɛ Yesu Kilista ná-salaʋusu ʋagɔi. 
\v 4 Salaʋusu nɔpɛ ge la ná, nii a ɗa ɓɔɠɔ lɔ faa ɠiligiti su, ni toɠa pɔ ga é nɛɛ ná-kundiɠii ʋɛ. 
\v 5 Ɠaɠo bo nu nɔpɛ ge la ná, a zoo zalai zɔlɔɔsu, ni é la ziɛni ga deveiti, ti zeiɗai. 
\v 6 Tii ɠɛ nui é botii ɓaaɓaagi ɠɛɛzu, maanɛɛʋɛ tɔ mɔunpa é nɔnɔ zɔlɔɔ ma lɔnɔgi zu. 
\v 7 Ɠida naa wu ga pagɔ, nii gè bosu è ma, naazu Maliɠii ɠa ti pɛ gaaɠaa ɠigi ve è ʋɛ.
\s Ɠizɛ Yesu zu nii é ɠulani saai ya
\p
\v 8 Ɠigi yɛ Yesu Kilista zu, nii é ga Davide mavofodai, buzeɠeai é ɠula saai ya, eɠɛʋelei Woo Niinɛ Ʋagɔi bosu la, nii gè daazeelizu. 
\v 9 Naa ɠa gè kpɔlɔi zɔlɔɔsu ma vaa zu, ti ɗa gìli eɠɛ faa ɲɔu ɠɛ nu. Kɛlɛ GALA daawooi la ɠilini. 
\v 10 Naa ɠa é ba, nà yiilɔɔzu fai pɛ bu, naati ta-vaa zu, niiti GALA ge yiimazeɠeai ga tiye, naa ɠa a kɛ tiya ɓalaa ti kizogi ta ɠɔoɠɔ lɛbiyai zɔlɔɔ ga Yesu Kilista maaʋele. 
\v 11 Wooi niiti ta ga lada ɓɔɛi:
\q «Ni ada zaa ʋɔɔma ada tɔun,
\q da zɛnvui wo tɔun ba.
\q
\v 12 Ni da lona kpaan,
\q da masadai ɠɛ ɓalaa tɔun ba.
\q Ni da ɠɛlɛna ba,
\q tɔ ɓalaa ka ɠɛlɛ ade ʋa.
\q
\v 13 Ni da ɠɛna ga wooʋalada nuiti,
\q tɔun ka yɛsu ga wooɠɛɠila nui,
\q mazɔlɔɔ é la ɓɔɠɔ maaɠaalia tɔ ɓɔɠɔi.»
\s Gaama ɓɔɛi ɠaaɠwɛ ga pagɔ
\p
\v 14 Nuiti kitoo niima vaiti su, è ti maaɓakpa GALA gaazu, ti ɓeteʋe maaɠaali vaiti ba, ti la faa nɔpɛ paa nu ma, kɛni nɔ ti ti woomɛni nuiti ziiɠoloɠolo. 
\v 15 Ɠaaɓa ga zɛbɛi pɛ, è ɓɔɠɔ lɛ ga nui nii GALA ka yeezei bu, botiɠɛ nui nii nu la unfe faa nɔpɛ ka ba, nii é gaama wooi laazeelizu ga sɔledai. 
\v 16 Yeeɠula wafuun kpɔɛzuɠulaiti su, niiti ti la zolooni kidaaleʋei ma, mazɔlɔɔ zɔiti ti ʋilɛsu naati polu, naati ta ɗa li nɔ luɠɔma, GALA gaazuluabalalai zu. 
\v 17 Kalagi ti bosu, naa ɠa luula eɠɛ palai, su ɗa li ga wɔɔlɔa. Yimené ta Filɛteni ta ga naama nui ta. 
\v 18 Ti zeɠea gaamai ʋa, ti ɗa ɠɛ ma: «Kula saayai ɓega ga ɠɛ niina.» Ʋele ɠana ti nu mɔinmɔin kakasu la kidaaleʋe ʋelei ʋa. 
\v 19 Anɛɛ naa ʋe, seɓasemai GALA ge daai, naa ɠa loni kpaan, niima wooiti sɛʋɛʋɛ ma ga poogi: «Maliɠii ná-nuiti kwɛɛ»,\f + \fr 2:19 \fr*\ft \+xt GlS 16:5\+xt*.\ft*\f* ta «Zɔi nɔpɛ é bosu ga toɠa ga Maliɠii nɔnɔ, é maaɠooza telebotalai ʋa».
\p
\v 20 Pɛlɛ wolai wu, zanu aniɲakai ta wali aniɲakai ɠila nɔ laade, é ʋa ɠɛ ná, gulu geleiti ta pɔlɔ geleiti ɓalaa ta ɗa ɠɛ ná. Tanigaani ta ɗa ɠɛ faa unbu yɛ, mɔtaiti botii ɗa ɠɛ naati su yeenɔpɛ. 
\v 21 Ni deɠɛmu nu a ɓɔɠɔ makɛna ɲadedai zu, é ʋilɛ niima vaiti ba, gè ti wosu, toɠa ɠɛ ga lɛbiya aniɲakai, é makɛsu yɛ, é pɛlɛ kɛɛɠɛi maavai ɠɛɛzu, soloogai kɛɛwoti ʋagɔi pɛ ma. 
\v 22 Ɓizɛ nu niinɛlai ma ɠaazuɠulapɔiti ba, è telebodai ɠaiziɛ, ta kidaaleʋei, ta nɛɛbɛi, ta ziilɛigi, wa naati, niiti ti wooɠulazu Maliɠii ma ga ti-yiima ɲadegai. 
\v 23 Ɠɛlɛ ɠimalala maaɠaaliiti ba, un ge la ti ʋa, naati ka ta ɗa kpɔɛi wuzeɠe. 
\v 24 Tama Maliɠii ná-botiɠɛ nui maa la nɛɛni, é ʋa ɠɛ ga kpɔɛleʋe nu. Kɛlɛ kɛni tuʋalaa nɛɛ ɛsɛ pɛ bɛ, é zoo nuiti kalasu, ziilɔɔ. 
\v 25 Maanɛɛʋɛ é ɗa sakpe nuiti kala ga sɛsɛbogi. Tanisu GALA ka pelei lɛɛ ga tiye, nii a kɛ ti-ziɛ ʋelei maavalibo, ti gaamai ɠwɛɛ. 
\v 26 Ta ʋa ɠima naazu, ti ɠɛ ʋolu ga sɔɓelama nuiti, ti ɓɔɠɔ ɠula Inɛgi ná-balii ɠa, nii é ti zoni, ti lɔ ziimai ɠɛɛ vai zu.
\c 3
\s Folo ɠaaɓelagi zu vaiti
\p
\v 1 Ɠizɛ nii zu gola, ga yeeɠɛɠalaiti ta ɓaa gola folo ɠaaɓelagiti su. 
\v 2 Mazɔlɔɔ nuiti ta ɠɛ ga gaazumaavɔɔ nuiti, wali wɔin nuiti, ɓɔɠɔ vaa lɛsu nuiti, gaazumaanɛɛ nuiti, woo ɲɔi wo nuiti, ti zɔlɔɔ nuiti goozotala nuiti. Ta ɠɛ ga faanɛɛ wuuɠwɛɛtala nuiti, faa ɲadega la ti ɠaazu ga faa, 
\v 3 maayotala nuiti, zɔɠɔzuɓɛtɛ vaa wɔin la ti ma. Ta ɠɛ ɓalaa ga tɔɠɔ ɠoloɠolo nuiti, ɓɔɠɔzotala nuiti, suɲɔu nuiti. Ta ɠɛ faa ʋagɔi laalɔɠɔma, 
\v 4 ti ɠɛ ga yaava nuiti, ziiɠula nuiti, ti laavegai ga wasogi, ɓɔɠɔyiimai ɠa nɛɛ ti ʋɛ é leʋe GALA ba. 
\v 5 GALA gaazuluabai ɠa ɠɛ ti-ɠaazuʋɛti nɔ, kɛlɛ ta ɠɛlɛ ma zɛbɛi ʋa. Maaɠooza naama nuiti ba! 
\v 6 Tanigaani ta ti zaama, niiti ta ɗa lɔ pɛlɛiti bu, ti ɗa anzanuiti dɔ ta-zobogi wu, niiti zɛbɛ la ti ya, ta ɠi ge la ti ma. Kotoi ɠa anzanui niiti ba, gaazuɠulapɔ ɲɔi ma zii pɛ ge ɠɛ ti zu, 
\v 7 anzanui naati ta kalagi zɔlɔɔsu yeenɔpɛ, kɛlɛ ti la zooga pɛ ti ʋa gaamai ɠwɛɛ. 
\v 8 Eɠɛʋelei Zanɛseni ta Zamebelɛse ti Moize maaɠaalini la, zenɔ ɠana, zunui niiti ɓalaa ti gaamai maaɠaalizu la. Zunua ʋe ti-ɠigi ɠoloɠologai, ta-ɠidaaleʋei la ga kidaaleʋe ɠiteɠite. 
\v 9 Kɛlɛ ti la lia luɠɔma pɛ, mazɔlɔɔ ɛsɛ pɛ ka suɠwɛɛ ga ta ga ɠimalala nuiti, eɠɛʋelei Zanɛseni ta Zamebelɛse tɔnɔi ɠɛni la.
\s Deve ɠaaɓelagiti
\p
\v 10 Kɛlɛ ɗɔun è ʋilɛgɛ pòlu nà-kala bo fai zu, ta tùʋa ʋelei, naa ʋɛɛ kìsu vaiti, ta nà-kidaaleʋei ʋa, ta nà-ziilɔɔi, naa ʋɛɛ nà-nɛɛbɛi ʋa, ta ʋelei gè loni la kpaan, 
\v 11 wɔinzeɠemai ta kpɔlɔi niiti ti zeiɗai mà. Kpɔlɔi ɓɛgele ɠa gè la ɠɛni sɔlɔɔni Antiyɔse ta Ikoniyume, ta Lisitele? Kpɔlɔi ɓɛgele ɠa gè la ɠɛni suzoni? Kɛlɛ Maliɠii kùlani naati pɛ su. 
\v 12 Tama, zɔi nɔpɛ é pɔ é eteai ziɛ GALA gaazuluabai zu ta-ɠilibalai zu ta Yesu Kilista, naati ta ɗa wɔinzeɠemai zɔlɔɔ. 
\v 13 Kɛlɛ faa ɲɔu ɠɛ nuiti ta yaava nuiti ta ɗa li nɔ luɠɔma yeenɔpɛ faa ɲɔi zu, ti ɗa nuiti kaka, ti ɗa ɓɔɠɔ ɠaka tiya ɓɔɠɔi.
\p
\v 14 Ɗɔun, lo kpaan naama vaiti su, niiti è ti ɠalani, è yeezeiɗai ti wu ga ladala laazeeliai, mazɔlɔɔ nui é è ɠalaga ga tiye, è naa ɠwɛɛ. 
\v 15 Kaite è-ma loungo ziɛgi zu, è GALA sɛʋɛ ɲadegai ɠwɛɛ. Toɠa zoo é ɠimalai ve è ya, é lo è luɠɔ, è kizogi zɔlɔɔ ga kidaaleʋei maaʋele Yesu Kilista ma. 
\v 16 GALA Sɛʋɛi pɛ feeʋɛ GALA saalai zu, ná-kulanumai wɔɔlɔʋɛ kalagi wo fai zu, zɛɛi zakpe fai zu, kaka faiti sɔle fai zu, ta telebodai ma ɠalagi wo fai zu, 
\v 17 naa ɠa a kɛ, GALA nui laazeeli, kɛʋele ɓɛtɛ kɛɛwoti ʋagɔi pɛ kɛɛ vai ma.
\c 4
\p
\v 1 Naa ɠa é ba, GALA ta Yesu Kilista ɠaazu, Kilista nii é ʋaazu nu vuluiti ta gɔvɛiti tukpɔɠaaleʋezu, ta tɔun paa vai ta ná-masadai maaʋele ma, nà devei nii veezu è ya, gè maaɓakpa, naama levei ɠa é ga: 
\v 2 GALA daawooi laazeeli, daazeeli ga gilimai siɛnɔpɛ su, ma yeeɠɛɠala ɠɛni de, ɓaa ma yeeɠɛɠala mina ɠɛ de, gaalɛɛ ga pagɔ, è zelii lo, è nuiti iɲɔdɔ, è ɗa kalagi wo ga ziilɔɔ laazeeliai pɛ. 
\v 3 Mazɔlɔɔ yeeɠɛɠalai ɠa ʋaazu, názu nuiti ti la mɔ wɔinɗa ga ti ʋa woilo gaama ɠalagi ma, kɛlɛ ta ʋilɛ ti ɓɔɠɔyiimaiti nɔ ʋolu, ta kalamɔinti gaalɛ ba, ga nii nɛai ti ʋɛ, naati ti ɗa naa nɔ wo ti ma. 
\v 4 Ta ɠɛlɛ woilosu gaamai ma, ti ɠaaʋote zɛɛ vaalaali ɓɔɛiti ma. 
\v 5 Kɛlɛ ɗɔun, ɠɛ ga sɔɓelama nu fai pɛ su, è yiilɔɔ kpɔlɔiti bu, ɗa-lɛnɛbo botii ɠɛ Woo Niinɛ Ʋagɔi laazeeli vai zu, ɗa-wotii ɠaaɓela ga pagɔ.
\s Pɔle ɠigaiziɛ vai ná-saa vai zu
\p
\v 6 Mazɔlɔɔ nɔ̀un, nà ga ʋa ɠɛɛzu ga puya zalaɠai, dìi yeei zeelia. 
\v 7 Gè kɔɔ ʋagɔi ɠɔa. Gè nà-kpizɛi ɠaaɓelaga. Gè kidaaleʋei makɛgɛ. 
\v 8 Niizu niina, masa bɔɔlɔgi é ga telebo kelei, naa makɛgɛ bɛ̀. Maliɠii, tukpɔɠaaleʋe nui telebogai, naa ɠa é feezu zèa naama volo ná. Nà ɠila taade, kɛlɛ toɠa fe naati pɛ zea, niiti ti ná-kulakɛlɛmai maaɓɔunsu, nɛai ti ʋɛ.
\s Pɔle ná-woo ɠaaɓelagiti
\p
\v 9 Ɠaaɓa, è ʋa pɔ̀ bɛ fala. 
\v 10 Mazɔlɔɔ Demase ɓeteʋea bà, tɔɔzei eteai nii zu vaiti gola nɛɛʋɛ bɛ, é lia Tesalonike. Kelesɛnse liiʋɛ Galate yooi zu, Tite li Dalamasi yooi zu. 
\v 11 Luke ɠila kpe nɔ ɠa é bà ʋɛ. Maleke zeɠe, è ʋaa la ʋɛ, mazɔlɔɔ toɠa zoo é ɓɔ bà nà-botii zu. 
\v 12 Gè Tisike leʋegɛ Efɛze. 
\v 13 Ɗa ɠɛna ʋaa, ʋa bɛ̀ ga tookɔba wolai gè zɛni Kaalapuse ʋɔ bɛ, Toloase, ta sɛʋɛ ɓiligiti, ma un ge daa ma mɛɛ ga kɔlɔ zɛʋɛiti.\f + \fr 4:13 \fr*\fq kɔlɔ zɛʋɛiti\fq*\ft : ti ɠɛni ga kɔlɔ ɓiligi ti ɓɛtɛai ga baala kɔlɔi ɓaa boli ɠɔlɔi, nii ti ɠɛni sɛʋɛi ɠɛɛzu ma.\ft*\f*
\p
\v 14 Ɠain bo nui Alɛgezandele faa ɲɔi wola ɠɛɛʋɛ ga ze. Maliɠii ɠa sala, é zoloo ná-kɛɛwotiiti ma. 
\v 15 Ɗa ɓalaagi, dama la, mazɔlɔɔ buzeɠeʋɛ gá-ɓɔɛiti daalɔɠɔma gola.
\p
\v 16 Kɛ̀ai ma ɓɔɠɔ maalobosu mɔungi tukpɔɠaaleʋezuʋɛ, nu nɔpɛ ge la ɠɛni loni pòlu, kɛlɛ ti pɛ ti ɠɛlɛni bà. GALA ge mina naa leve ti unma. 
\v 17 Kɛlɛ Maliɠii ɠa é ɓɔni bà, é sɛ̀bɛlɔ, naa ɠa é kɛɛni, gè zooni gè GALA daawooi laazeeli ga pagɔ zii ɠiligiti pɛ ma, gè ɠula zalai la. 
\v 18 Maliɠii ɠa kùla kɛɛwoti ɲɔiti pɛ su. Toɠa kìzo, é dɔ̀ ná-masadai zu geeɠɔlɔgi zu. Lɛbiyai ɠɛ tɔun bɛ, eyɛsu ɠɔ! Amina!
\s Tuʋɔ goo ɠaaɓelagiti
\p
\v 19 Gè Pilisile ta Akilase luʋɔ, ta Wonezifɔle ná-pɛlɛyeɠei. 
\v 20 Elasete yɛgɛ Kolɛnte, ta gè Tolofime yɛgɛ Milɛ, tɔɔzei é la ɠɛdɛni. 
\v 21 Ɠaaɓa, è ʋa pɔ̀ bɛ aisa samai ʋa zeeli. Ebuluse, ta Pudɛn, ta Linuse, ta Kelodia, ta ade-ɠɛɛloin zɔiti pɛ ta è luʋɔsu.
\p
\v 22 Maliɠii yɛ è-yɛnvui ʋa. GALA ná-zaalai yɛ wo ʋa. Amina.