\id 2TH - Toma Bible
\ide UTF-8
\h 2 Tesalonike
\toc1 Pɔle Ná-Sɛʋɛi Velesiɛi É Teʋeni Tesalonike Nuiti Ma
\toc2 2 Tesalonike
\toc3 2Te
\mt2 Pɔle Ná-Sɛʋɛi Velesiɛi  //  É Teʋeni
\mt1 Tesalonike Nuiti Ma
\imt Sɛʋɛi lɔɔzeizuʋɛ ma woo mɔungiti
\ip Keelai Pɔle é Tesalonike nuiti ta-zɛʋɛi velesiɛi ɠɛai (\xt 1:1\xt*). É Tesalonike nuiti ta-zɛʋɛ mɔungi ɠɛɛni, su la ɠoozani é felesiɛi nii ɠɛ, kona ʋuulɔɔlugɔ maazu ɠila (51) kɛɠala leʋegai ma, Kilista zɔlɔɔga ʋoluma. Pɔle ɠɛni dɛ Kolɛnte siɛgi zu é niima zɛʋɛi ɠɛa la, é teʋe Tesalonike Egilisii ma, Egilisii nii é daaɠulani ná-keela ziɛi velesiɛi zu (\xt KKw 17:1-10\xt*). Bogɛ Keelaiti Kɛɛwotiiti ma zɛʋɛi zu ga Egilisii naa zu nuiti ti ɠɛni ga Zuifui tanigaani ta Gɛlɛkii ma mɔinmɔin.
\ip Kɛɛʋɛ eɠɛ Tesalonike Egilisii wola ɠilini yeeɠɛɠala ɠaaɓelagiti ta-vai ʋa ta Kilista ʋaa laa velesiɛi, tɔɔzei Pɔle faa mɔinmɔin sɛʋɛʋɛ é lo naama vai ʋa ná-sɛʋɛiti su ti leʋegai Tesalonike nuiti ma. Tesalonike nuiti ta-zɛʋɛi velesiɛi ɠilazuʋɛ kpein ka ɓɔɛzu é lo yeeɠɛɠala ɠaaɓelagi ʋa. Pɔle ti wola lɛnɛni é lo faaʋaalalai ʋa. Nui ɠilagilagi pɛ maanɛɛʋɛ é botii ɠɛ kɔnɔgi zɔlɔɔ fai zu (\xt 3:6-10\xt*).
\iot Unsosuʋɛ
\io1 1. Pɔle tɔɔzeiʋɛ ga é ɓɔɠɔ lɛɛ, naa ʋoluma é siɛɲɔɠɔiti ɓalaa dɛɛ (\xt 1:1-2\xt*).
\io1 2. É zɛba é GALA mama ta é GALA fali Tesalonike Egilisii ʋɛ (\xt 1:3-12\xt*).
\io1 3. Gaaɠwɛsu felegɔi zu, Pɔle ɠa ɓɔɛzu miná é lo yeeɠɛɠala ɠaaɓelagiti ba (\xt 2:1-17).\xt*
\io1 4. Kpɔɛʋɛ naa ʋolu, é lo faaʋaalalai ʋa, ta ʋelei fizɔgai la nu botii ɠɛ (\xt 3:1-15\xt*).
\io1 5. Pɔle gaaɓelagɛ ga é ná-tuʋɔ gooi laazeeli Egilisii ma (\xt 3:16-18\xt*).
\c 1
\s Tuʋɔ gooiti
\p
\v 1 Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti. 
\v 2 Ɠɛɛɠɛ GALA ta Maliɠii Yesu Kilista ti zaalai la wo ma, ti ziilɛigi ve wo ʋɛ.
\s Tukpɔɠaaleʋe vai Kilista ʋa voloi ʋolu
\p
\v 3 Kɛ̀ɛleaiti, gi maanɛɛʋɛ gi mamagi ve GALA bɛ yeenɔpɛ wa-vaa zu, gaamazu naa zɔlegɛ, mazɔlɔɔ wa-ɠidaaleʋei ɠa liizu luɠɔma gola, nɛɛbɛi é wo yɔɠɔzu, naa ɠa liizu ga wɔɔlɔa. 
\v 4 Gá unbuzeɠei lɛɛzu wa-vaa zu GALA ná-Egilisiiti su, tɔɔzei ʋelei wo loni la kpaan, ta ʋelei wa-ɠidaaleʋei la wɔinzeɠemaiti ta kpɔlɔiti pɛ saama wo sɔlɔɔsu.
\p
\v 5 Kpɔlɔi nii ɠa é ga GALA ná-telebo tukpɔɠaaleʋei ma ʋoogi, naa ɠa é dɛɛzu ga wa zoloo GALA ná-masadai zɔlɔɔ fai ma, nii wo kpɔlɔi zɔlɔɔsu maaʋele ma. 
\v 6 Soloogɛ ga GALA ge kpɔlɔi zei naati zea, niiti ti wo ɓɔlɔ vai laazu wo ya. 
\v 7 Wɔiti wo kpɔlɔi zu, GALA ge dooɠogi ve wo ya, ta gá ɓɔɠɔi gi ya, siɛgi zu Maliɠii Yesu ɠulazu la kɛlɛma, é zeɠe geeɠɔlɔgi zu, ta ná-geezuɠeelaiti, zɛbɛ wolai ti ya. 
\v 8 Toɠa ʋa abuzogi zaama, ga é naati sala, niiti ti la GALA kwɛɛ, ti la ɠolozu Woo Niinɛ Ʋagɔi ʋɛ, é ʋilɛ de-Maliɠii Yesu ʋa. 
\v 9 Ta ti-zalai zɔlɔɔ ga ɠɔoɠɔ undaaʋiligi, ti maaɠooza, ti zeɠe Maliɠii ɠaazu, ti maaɠooza ná-zobogi ma lɛbiyai ʋa, 
\v 10 siɛgi zu é ʋaazu la naama voloi, ga é lɛbiyai zɔlɔɔ ná-nuiti zea, niiti ta ɠidaaleʋe ma. Wa ɠɛ naati saama niiti ta maawui, tɔɔzei wo ɠidaaleʋeni gá-zeele wooi ma, gi boni wo ma.
\p
\v 11 Naa ɠa é ba, gá GALA falizu wo ʋɛ yeenɔpɛ, nii a kɛ ada-ƓALAGI wo ɠɛʋele ɓɛtɛ, wo zoloo toligi ma, é bogai ga woye. Gá falizu ná-zɛbɛi zu, ga faa ʋagɔi nii pɛ wo wɔinɗai ga wo kɛ, é naa laazeeli wo ʋɛ ga pagɔ, é wa-ɠidaaleʋei ma ɠɛɛwotii ɠaavɔni, 
\v 12 naa ɠa a kɛ Maliɠii Yesu laaseigi lɛbiyai zɔlɔɔ wo maaʋele ma, wa ɓalaa wo lɛbiyai zɔlɔɔ tɔun maaʋele ma, eɠɛʋelei da-ƓALAGI ná-zaalai la, ta de-Maliɠii Yesu Kilista.
\c 2
\s Tɔ Koloɠolo Nui ná-fai
\p
\v 1 Kɛ̀ɛleaiti, nii é ga ade-Maliɠii Yesu Kilista ʋaa vai, ta ada-maaɓɔ fai tɔun koba, gá wo maanɛɛnɛzu, 
\v 2 à mina va bu, wo yii ʋa ɓɔlɔ, wo zasu ʋa ɓali ga wooi ta, ga Maliɠii ná-foloi zeelia. Kɛɛʋɛ eɠɛ nui ta boni wo ma, kɛai ma kulakɛlɛma vaiti bosu, ɓaa é ɗa tɛnɛgi wo, ɓaa tanisu ti boni wo ma ga gi sɛʋɛni gá-zɛʋɛi ta zu. 
\v 3 À mina va bu, nu nɔpɛ ge ʋa wo ɠaka pele nɔpɛ ma. Mazɔlɔɔ aisa naama voloi ʋa zeeli, kɛni pele ʋilɛgi ɠɛ mɔunpa, Tɔ Koloɠolo Nui ɠula kɛlɛma, zunui nii undaaʋiligi leveai ma. 
\v 4 Tɔ Koloɠolo Nui naa, nii é wuzeɠezu naati pɛ daalɔɠɔma, niiti ti lolisu ga galagiti, ɓaa nuɓusɛ a ti lɛbi, eyɛsu é li, é zei GALA sei ʋɛlɛi wu, é ɓɔɠɔ lɛ eɠɛ a ɠɛ ga GALA.
\p
\v 5 Wo-ɠi ge la su ɓaa, ga gè niima vaiti boni wo ma, siɛgi zu gè ɠɛni la dɛ wo ʋɔ bɛ? 
\v 6 Anɛɛ naa ʋe, wo suɠwɛɛ, nii é pele ɓesasu dɛ tuɠɔ, ga é mina ɠula kɛlɛma kɛni ná-yeeɠɛɠalai. 
\v 7 Tɔ Koloɠolo Nui ná-zobogi é botii ɠɛɛzu la dɔɔɠuzu, naa ɠa ɠula niina kɛlɛma, kɛlɛ kɛni zɔi é pele ɓesasu dɛ tuɠɔ, naa a ɲɛɛlɛna. 
\v 8 Názu Tɔ Koloɠolo Nui ɠa ɠula niina kɛlɛma. Maliɠii Yesu ɠa paa ga laa viilɛi, é koloɠolo ga ná-kulakɛlɛmai ma zezei. 
\v 9 Tɔ Koloɠolo Nui naa ɠa ʋa ga Setana ná-zɛbɛi, é ɗa zɛɛ laavɔɔ vaiti kɛ, ta zɛɛ maaɓɛlɛ vaiti pɛ. 
\v 10 Toɠa telebotalai ma zii pɛ kɛ ga é naati kaka, niiti ti undaaʋilisu. Ti undaa ɠa ʋili, tɔɔzei ti la yeezeini gaamai wu, ti ʋa nɛɛ ʋɛ, nii a la ti ɠizo. 
\v 11 Naa ɠa é ba, GALA ka kakagi ma zobo golai leʋe ti ma, nii a kɛ ti la zɛɛi la, 
\v 12 naa ɠa a kɛ, niiti kpein ti la ɠidaaleʋeni gaamai ma, kɛlɛ ti telebotalai nɛai ʋɛ, ti ʋeelala.
\s Tesalonike nuiti ta-lo kpaangi
\p
\v 13 Kɛ̀ɛleaiti, wɔi wo nɛai Maliɠii ʋɛ, maanɛɛʋɛ yeenɔpɛ gɔun gi ɗa GALA mama wa-vaa zu. Mazɔlɔɔ GALA ge yiimazeɠeʋɛ ga woye kaite tɔɔzeizu mɔunpa, é wo ɠizo Zɛnvu Ɲadegai zaalai zu nii é wo ɲadesu, ta wa-ɠidaaleʋei maaʋele gaamai ma. 
\v 14 GALA ge wo loligɛ naa ma ga Woo Niinɛ Ʋagɔi maaʋele, gi daazeelini wo ma ga wo ade-Maliɠii Yesu Kilista ná-lɛbiyai zɔlɔɔ. 
\v 15 Deɠɛmu, kɛ̀ɛleaiti, à lo kpaan, wo kala gooiti so, niiti gi ti woni wo ma ga gi-laaʋɛ, ɓaa ga zɛʋɛi.
\p
\v 16 Ade-Ɠɛɛ GALA nii é ade wola nɛai ʋɛ, é ɠɔoɠɔ iɲɔdɔɔi ve ade ʋɛ ta kito pagɔi ga zaalai maaʋele, ta ade-Maliɠii Yesu Kilista ɓɔɠɔi 
\v 17 wo-yiiti daave ga iɲɔdɔɔi, é wo zɛbɛlɔ, wo ziɛ ga faa ʋagɔiti pɛ, kɛɛwotiiti su ta wo ɓɔɛ ʋeleiti su.
\c 3
\s Toligi é lo GALA falii ʋa
\p
\v 1 Kɛ̀ɛleaiti, gaaɓelagi ɠa ga: À GALA fali gi ʋɛ, ga Maliɠii laawooi li ga vazaga, é lɛbiyai zɔlɔɔ, eɠɛʋelei é ɠɛɛzu la wo ʋɔ bɛ. 
\v 2 À GALA fali ɓalaa ga é gi ɠizo faa ɲɔu ɠɛ nuiti ta suɲɔu nuiti ma, mazɔlɔɔ kidaaleʋei la ɛsɛ pɛ zea.
\p
\v 3 Kɛlɛ Maliɠii ɠa ga wooɠɛɠila nu. Toɠa wo zɛbɛlɔ, é wo makɛ ma ɲɔi ma. 
\v 4 Maliɠii naama ladalai veeʋɛ gi ya wa-vaa zu, ga fai niiti gi ɠɛai wo ti ɠɛ, wa naati kɛɛzu, ta wa yɛsu ti ɠɛɛzu.
\p
\v 5 Maliɠii lo wo-yiimaʋɛti tuɠɔ, ti laazeeli GALA ná-nɛɛbɛi zu faan, ta é ziilɔɔi ma zobogi ve wo ʋɛ ga Kilista ɠɛʋele faan.
\s Botii ɠɛ ungi
\p
\v 6 Kɛ̀ɛleaiti, gá wo levezu, Maliɠii Yesu Kilista laaseigi zu, ga wo maaɠooza ɠɛɛɠɛloin kpein ba, niiti ti eteai ziɛzu dɔɔʋɛi zu, ti la ziɛzu ga kalagi naa, nii gi boni ga woye. 
\v 7 Wa ɓɔɠɔi wo suɠwɛɛ kpezekele, ʋelei wo maanɛai la wo ʋokɔɠɔ gi ma. Mazɔlɔɔ gi la ɠɛni zeini wo zaama ga dɔɔʋɛ vaa, 
\v 8 gi la ɠɛni vaani bu nu nɔpɛ ge ʋa gi ɠɔnɔkula ni gi la sɔngɔ veeni, kɛlɛ tɔun, gi kpɔlɔi ɠwɛɛni, ta gi botii ɠɛɛni folo ʋɛɛ kpidi ʋa, nii a kɛ gi mina ɠɛ ga kasɔ wo taɠila kpalaa unma. 
\v 9 É la ga ma zobo ka é la ɠɛni gi ʋɛ, kɛlɛ wɔin ɠɛni gi ma, ga gi poo fe wo ya, wa ɠɛ ziɛzu la. 
\v 10 Mazɔlɔɔ siɛgi zu gi ɠɛni la wo ʋɔ bɛ, gi niima levei veeni wo ya ga: «Zɔi nɔpɛ é la pɔ ga é botii ɠɛ, é mina daami wo.»
\p
\v 11 Tama gá mɛnisu ga, tanigaa ta wo zaama, ti ta-eteai ziɛzu dɔɔʋɛi zu, ti la faa nɔpɛ kɛɛzu, kɛni faazupui nɔ. 
\v 12 Gá ɓɔɛzu naama nui naati pɔ Maliɠii Yesu Kilista laaseigi zu, devei gi feezu, toɠa ga ti botii ɠɛ ziilɛigi zu, ti-zɔlɔɔ ganii ɠɛ ga ti-ɠɔnɔgi.
\p
\v 13 Wɔun wo letegi, kɛ̀ɛleaiti, à mina ɓɔlɔ ga faa ʋagɔi ɠɛɛ vai. 
\v 14 Ni nui ta la ɠɛ ziɛni ga kala gooi nii gi bosu wo ma niima zɛʋɛi zu, à ɠizɛ su, kpɔfaama nɔpɛ ge mina ɠɛ wo yɔɠɔzu, wa tiyagaani, naa ɠa a kɛ ti unfe. 
\v 15 À mina pɛtɛ ga wo zili nu, kɛlɛ à tɛnɛ eɠɛ ɠɛɛɠɛloun.
\s Tuya loo vai ta tuʋɔ fai
\p
\v 16 Maliɠii nii é ziilɛigi veezu, naa ɓɔɠɔi ziilɛigi ve wo ʋɛ mɛtu fai pɛ su. Maliɠii yɛ wo pɛ wo ʋa.
\p
\v 17 Nà Pɔle, nà ɓɔɠɔi zèeʋogi ɠa gè wo luʋɔsu da. Naa ɠa é ga zèeʋogi nà-sɛʋɛiti pɛ su, zekana nà ɗa sɛʋɛ la.
\p
\v 18 De-Maliɠii Yesu Kilista ná-zaalai yɛ wo pɛ wo ʋa.