\id 2JN - Toma Bible
\ide UTF-8
\h 2 Zan
\toc1 Zan Ná-Sɛʋɛi Velesiɛi
\toc2 2 Zan
\toc3 2Za
\mt1 Zan Ná-Sɛʋɛi Velesiɛi
\imt Sɛʋɛi lɔɔzeizuʋɛ ma woo mɔungiti
\ip Zan Ná-Sɛʋɛi Velesiɛi nii, Zan ɠa é sɛʋɛni, kona ʋuulɔsaʋa maazu lɔɔlugɔi zɔɠɔzuʋɛ ta puutaaʋuugɔi (85-90), Kilista zɔlɔɔga ʋoluma. Zan la ɓɔɠɔ lɛɛzu ga tɔ ɠa é ga sɛʋɛi ɠɛɛ nui, kɛlɛ tɔun é ɓɔɠɔ laasei pɛɛʋɛ ga «Kɛwolai». Zan Ná-Sɛʋɛi Velesiɛi zu vaiti kulaʋɛ gola ga Zan ná-Woo Niinɛ Ʋagɔi zu vaiti. Naa wola ɠulaʋɛ kɛlɛma siɛgi zu é ɓɔɛzu la é lo Yesu ná-devei ʋa ga de ɓɔɠɔ nɛɛʋɛ de ɠilagilagiti, ta Yesu nɛɛ vai nu ʋɛ, ʋelei é naati kpɔsu la su ta ná-deveiti sogai (\xt 1:5-6; Zan 15:9-10\xt*). Kisiɛi wogɛ ga Zan ɠa é Woo Niinɛ Ʋagɔi zɛʋɛa, naa ʋɛɛ Zan Ná-Sɛʋɛ Mɔungi, Felesiɛi, ta Saʋasiɛi ʋa, siɛgi zu é ɠɛni la Efɛze.
\ip Zan ná-sɛʋɛi nii leʋegɛ anzanui naa ma, nii GALA ge yiimazeɠeai la ta ná-dointi. Kɛɛʋɛ eɠɛ é ɠɛni vaazu Egilisii ta ma. Zan ɠɛai ma sɛʋɛi nii ɠɛɛzu ma ungi ɠɛni ga é Egilisii iɲɔdɔ, ta é ti loo ɠisu zɛɛ ɠalamɔinti daalɔɠɔma.
\iot Unsosuʋɛ
\io1 1. Zan ná-sɛʋɛi lɔɔzeiʋɛ ga é naati dɛɛ niiti sɛʋɛi leʋesu ti ma, ta é ná-tuʋɔ gooi laazeeli naati ma, niiti ná-sɛʋɛi liizu ti ʋɔ (\xt 1:1-3\xt*).
\io1 2. Naa ʋoluma é Egilisii iɲɔdɔ ta é naati kitoo tɔgi zu nii gola ɓaɠoai (\xt 1:4-6\xt*).
\io1 3. É zɛba é tookisui ɠɛ ga naati é lo zɛɛ ɠalamɔinti ba (\xt 1:7-11\xt*).
\io1 4. Zan ná-sɛʋɛi ɠaaɓelagɛ ga Egilisii nii é ɠɛni su, é naama ɠidaaleʋe nuiti ta-luʋɔ gooi laazeeli (\xt 1:12-13\xt*).
\c 1
\s Tuʋɔ gooiti
\p
\v 1 Nɛ̀i gè ga Egilisi lotuɠɔi, nà ɠa gè sɛʋɛi nii leʋesu anzanui\f + \fr 1:1 \fr*\fq anzanui\fq*\ft : Nui tanigaa ta ɠisiɛzu ga anzanui nii GALA ge yiimazeɠeai la, naa ɠa ga Egilisi goi ta, nii su nuɓusɛiti ti lolisu ga ná-dointi.\ft*\f* ma, GALA ge yiimazeɠeai la, ta ná-dointi, niiti gè ti nɛai ʋɛ ga gaamai, nà ɠila taade, kɛlɛ zɔiti pɛ ɓalaa ti gaamai ɠwɛɛ, 
\v 2 tɔɔzei gaamai ɠa ade-yiimaʋɛ, ta toɠa yɛ ade ʋa ɠɔ.
\p
\v 3 Ɠɛɛɠɛ GALA ta ná-Doun Zunui Yesu Kilista ti zaalai la ade ma, ti ade maawɔinɠa, ti ziilɛigi ve ade ʋɛ, de zɛnvui wo ga tiye, gaamai ta nɛɛbɛi zu.
\s Gaamai ta nɛɛbɛi
\p
\v 4 Kòozunɛɛni gola gè è-loin tanigaani ka, ti ɗa ziɛ gaamai zu, eɠɛʋelei Ɠɛɛɠɛ naama levei veeni la ade ya. 
\v 5 Niizu niina, anzanui, nii gè bosu è ma sɛʋɛi zu, é la ga gè ʋa ɠɛ deve niinɛ veezu, kɛlɛ toɠa ga zɔi ade sɔlɔɔga tɔɔzeizu mɔunpa, ga ade ɓɔɠɔ nɛɛ ʋɛ ade ɠilagilagi pɛ. 
\v 6 Nɛɛbɛi ɠa ga, de ziɛ ga GALA ná-deveiti. Naa ɠa é ga devei nii wo maanɛai wo ziɛ la, eɠɛʋelei wo mɛnini la tɔɔzeizu mɔunpa.
\s Zɛɛ ɠalamɔinti
\p
\v 7 Nu yaava nu mɔinmɔin ge vazaga eteai zu, ti la kɛa ti ʋa la da ga Yesu Kilista ʋaani ga ɠite kpusɛi zu. Zɔi é ziɛzu ɠana, toɠa ga yaava nui, é ɠɛ ga Kilista zili nui. 
\v 8 À dama ga ɓɔɠɔ, naa ɠa a kɛ wo mina ʋala gá-wotii zulɔnɔgi ma, kɛlɛ wo wa-ɠulanumai laazeeliai zɔlɔɔ.
\p
\v 9 Nu-o-nu é la ɠɛ yɛni Kilista ná-kalagi ʋa, a zeɠena ba, é li yɛ, GALA ge la naama nui ʋa. Zɔi é yɛsu niima ɠalagi zu, Ɠɛɛɠɛ ta Doun Zunui ta ɠili ma nui ʋa. 
\v 10 Ni nui ta a ʋaana wo ʋɔ bɛ, kɛlɛ é la ʋaani ga kalagi nii, à mina yeezei bu wa-ʋɛlɛi wu, à ɠɛlɛ tuʋɔ fai ʋa ɓalaa. 
\v 11 Mazɔlɔɔ zɔi a tuʋɔna, naa ʋɔɔpɛa ná-kɛɛwoti ɲɔiti ba.
\s Tuʋɔ gaaɓelagiti
\p
\v 12 Faa mɔinmɔin ka kìsu ga gè bo wo ma, kɛlɛ gè la wɔinni gè ʋa naa ɠɛ ga sɛʋɛi ta sɛʋɛ ɗɛi. Toɠa kìsu ga gè ʋa wo ʋɔ bɛ, gè ɓɔɛ wo ʋɔ laani ta laa, naa ɠa a kɛ da-ɠoozunɛɛi laazeeli.
\p
\v 13 È-ʋaazeelai GALA ge yiimazeɠeai la, ná-dointi ta è luʋɔsu.