\id 1TH - Toma Bible
\ide UTF-8
\h 1 Tesalonike
\toc1 Pɔle Ná-Sɛʋɛ Mɔungi É Teʋeni Tesalonike Nuiti Ma
\toc2 1 Tesalonike
\toc3 1Te
\mt2 Pɔle Ná-Sɛʋɛ Mɔungi  //  É Teʋeni
\mt1 Tesalonike Nuiti Ma
\imt Sɛʋɛi lɔɔzeizuʋɛ ma woo mɔungiti
\ip Pɔle ɠa é Tesalonike nuiti ta-zɛʋɛ mɔungi ɠɛai (\xt 1:1\xt*). Tanisu tɔ ɠa é ga Pɔle ná-sɛʋɛ mɔunpagi nii é kɛai, nii kɛai ga GALA daawooi ɠilazuʋɛ ta, ɠɛzɛɠɛzɛ. É zɛʋɛni kona ʋuulɔɔlugɔ maazu ɠila (51) kɛɠala leʋegai ma, Yesu zɔlɔɔga ʋoluma. Pɔle kɛɛni siɛgi zu é ɠɛni la Kolɛnte, é teʋe Tesalonike Egilisii ma, Egilisii nii é daaɠulani ná-keela ziɛi velesiɛi zu (\xt KKw 17:1-10\xt*). Bogɛ Keelaiti Kɛɛwotiiti ma zɛʋɛi zu ga Egilisii naa zu nuiti ti ɠɛni Zuifui tanigaani ta Gɛlɛkii ma mɔinmɔin.
\ip Egilisii laaɠulaai ma bɛ, Pɔle la ɠɛni zooni é ʋa lɛbi gola Tesalonike, naa ɠa é kɛa é sɛʋɛi nii ɠɛɛni la ná ʋoluma, nii a kɛ é kidaaleʋe nuiti iɲɔdɔ. Sɛʋɛi nii ɠa kala ungi ma mɔinmɔin su vaiti gaaɠulazu ba, é kalagi ve ɓalaa é lo faiti ba, ti ga kiti vaiti, naa ta ɠa ga ɠɛʋelei Keletiɛin maanɛai é eteai ziɛ la. Pɔle lago ɠiliʋɛ kpaan Kilista ʋaa laa velesiɛi ma. Kɛɛʋɛ eɠɛ Tesalonike ɠidaaleʋe nuiti ti wola ɠilini naama vai ʋa ga zɛbɛ. Pɔle Kilista ʋaa laa velesiɛi ma vai zeɠeni, é ti zɛbɛlɔ la ga ti eteai ziɛ ga ʋelei nɛai la GALA bɛ (\xt 5:6-8\xt*).
\iot Unsosuʋɛ
\io1 1. Pɔle sɛʋɛi nii lɔɔzeiʋɛ ga é ná-tuʋɔ gooi laazeeli Egilisii ma, ta é GALA mama naa ná-faa zu (\xt 1:1-10\xt*).
\io1 2. Naa ʋolu é ná-botiiti zɔɠɔzu lɛɛni, é zɛba fai niiti Timɔte ti woni ma, é naati suɠula (\xt 2:1—3:13\xt*).
\io1 3. Pɔle zɛba, é kalagiti fe, é lo Keletiɛin ziɛ ʋelei ʋa, é zoloo Kilista ʋaa laa velesiɛi ma (\xt 4:1—5:25\xt*).
\io1 4. Pɔle sɛʋɛi ɠaaɓelagɛ ga é Egilisii luʋɔ ʋolu ga niinɛ, ta é ɠɛ ti ma ti fai pɛ kɛ, nii a kɛ ɛsɛ pɛ ge sɛʋɛi nii ɠala Egilisii zu (\xt 5:26-28\xt*).
\c 1
\s Tuʋɔ gooiti
\p
\v 1 Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti. Zaalai la wo ma, ta ziilɛigi ve wo ʋɛ!
\s Woo Niinɛ Ʋagɔi ná-dituɠɔmai Tesalonike
\p
\v 2 Gá GALA mamasu yeenɔpɛ wo pɛ wa-vaa zu, gi ɗa wa-vaa wo yeenɔpɛ gá-ƓALA faliiti su. 
\v 3 Wa-ɠidaaleʋei ma luʋa ʋele ʋagɔi ta wa-nɛɛbɛi ma wotii, naa ʋɛɛ wa-ɠitogi wɔɔlɔ ʋelei ʋa de-Maliɠii Yesu Kilista letegi, gá ɠizɛsu naati su GALA gaazu nii é ga ade-Ɠɛɛ. 
\v 4 Kɛ̀ɛleaiti, gi suɠwɛɛ ga GALA ge wo nɛa ʋɛ, é yiimazeɠe ga woye, ga wo ɠɛ ga ná-nuiti. 
\v 5 Mazɔlɔɔ gi la Woo Niinɛ Ʋagɔi laazeelini wo ma ga kpɔɛzuɠulai letelegi nɔ, kɛlɛ gi kɛɛni ɓalaa ga zɛbɛi, ta Zɛnvu Ɲadegai ná-kpɔbai. Naa ʋoluma, gi wola laani naa la, nii gi ɠɛni bosu. Wo suɠwɛɛ ʋelei gi ziɛni la wo zaama, é ɠɛ wo ʋɛ ga faa ʋagɔ. 
\v 6 Wo ʋilɛni gi-ɠɔɠɔ ʋogi ʋa, ta Maliɠii nɔnɔi. Wo kpɔlɔ mɔinmɔin sɔlɔɔni, kɛlɛ tama wo GALA daawooi zɔlɔɔni ga Zɛnvu Ɲadegai ná-koozunɛɛi. 
\v 7 Naa ma wo ɠɛa ga poogi kidaaleʋe nuiti pɛ bɛ Masedoane yooi zu ta Akayi yooi. 
\v 8 Mazɔlɔɔ Maliɠii laawooi zeɠeni wo ʋɔ bɛ, daazeeli Masedoane ta Akayi yooi pɛ su, kɛlɛ é la ɠwɛni miná, wo ɠidaaleʋe vai GALA ma, naama wooi vazaga mini-o-mini, gi ɓɛdɛ la mɔ ba ga gi ʋa naa ta wo. 
\v 9 Mazɔlɔɔ ti pɛ ta bosu, ʋelei wo yeezeini la gi wu, gi ʋaai ma wo ʋɔ bɛ, ta ʋelei wo ɠɛlɛni la kɔɔɠɔ ganigiti ba, wo lati GALA ma, ga wo ɗa botii ɠɛ zɛnvu su ƓALAGI ʋɛ, é ga GALA kitei, 
\v 10 wa ná-Doun Zunui Yesu maaɓɔunsu, é ʋa, é zeɠe geeɠɔlɔgi zu. Tɔ ɠa GALA ge buzeɠeni, é kula saai ya, tɔ ɠa é de ɠulazu GALA ná-ziiɠaawanai wu, nii é ʋaazu.
\c 2
\s Pɔle ná-botii é kɛɛni Tesalonike
\p
\v 1 Kɛ̀ɛleaiti, wa ɓɔɠɔi wo suɠwɛɛ ga gi ʋaa vai wo ʋɔ bɛ, gi la ɠɛni ʋaani ná wafuun. 
\v 2 Gi kpɔlɔi zɔlɔɔga ʋoluma Filipe, ta ɓaaɠulama vaiti, eɠɛʋelei wo kwɛɛ da, GALA ge ziiɓaai veeni gi ʋɛ, gi GALA ná-Woo Niinɛ Ʋagɔi laazeeli wo ma, sakpegiti saama. 
\v 3 Tama toligi gi bosu ga nuiti, é la ɠulazu kaka faa zu, ɓaa kigaiziɛ ɲɔu zu, gi la ba ga gi nu nɔpɛ yaava. 
\v 4 Tama gá ɓɔɛzu yeenɔpɛ eɠɛʋelei GALA ge pɔ la, mazɔlɔɔ tɔ ɠa é vaani bu, é Woo Niinɛ Ʋagɔi ɠaliva gi ma. Gi la ɠɛɛzu kɛni gi nɛɛ nuɓusɛa ʋɛ, kɛlɛ kɛni GALA nɔ, nii é nu yiimaʋɛ vaiti fɛɠɛlɛfɛɠɛlɛsu.
\p
\v 5 Eɠɛʋelei wa ɓɔɠɔi wo kwɛɛ la, gi la nu lɛsu ɓɔɛ woni. Gi la woo nɛɛnɛgaa woni, wɔin ʋa ɠɛ gi ma ga gi nu ná-wali ɠula zea, GALA ka ga gá-zeelei. 
\v 6 Gi la lɛbiya nɔpɛ gaiziɛni nuiti zea, anɛɛ wo ʋɔ bɛ, ɓaa zɔiti pɔ bɛ, 
\v 7 tama ʋelei gi la ga Kilista ná-keelaiti, gá la zoo gi da wo ma ga maaɓaai. Kɛlɛ gi ɠɛni ga nu ʋagɔiti wo zaama, eɠɛ doun deei é ná-dointi sɛsɛbosu. 
\v 8 Wo nɛɛ ʋelei ma gi ʋɛ, gi ɠɛʋele ɓɛtɛni, é la nɔ ga gi GALA ná-Woo Niinɛ Ʋagɔi ve wo ya, kɛlɛ gi ɓɔɠɔ yɛnvuiti ɓalaa, mazɔlɔɔ wo loni gi-yii ʋa gola. 
\v 9 Kɛ̀ɛleaiti, wo-ɠi ka su, ʋelei gi botii ɠɛɛni la, gi kpɔlɔi zuzo, gi botii ɠɛ folo ʋɛɛ kpidi ʋa, ga gi mina ɠɛ ga kasɔ wo tanɔpɛ unma, siɛgi zu gi ɠɛni GALA ná-Woo Niinɛ Ʋagɔi laazeelizu la.
\p
\v 10 Wa ga naa ma zeeleiti gi ʋɛ, ta GALA ɓalaa, gi ziɛ ʋelei wo zaama, wɔiti wo ɠidaaleʋeai, naa ɠɛɛni ɲadedai zu, ta telebodai, peelalazu nɔpɛ ge la ɠɛni gi ʋa wo letema. 
\v 11 Wo suɠwɛɛ ɓalaa ga gi naa ɠɛɛni wo ɠilagilagi ʋɛ, nii doun kɛɛɠɛ a kɛ ná-dointi bɛ, 
\v 12 gi wo lɛnɛ, gi wo iɲɔdɔ, gi ɠili wo ma, ga wo-ziɛ ʋelei zoloo GALA ziimai ma, tɛigi é wo loligai ga wo wɔnɔ zɔlɔɔ ná-masadai zu ta ná-lɛbiyai.
\s Tesalonike nuiti  //  ta-ɠidaaleʋei ta ta-ɓɔlɔi
\p
\v 13 Gá mamagi veezu ɓalaa GALA bɛ yeenɔpɛ, tɔɔzei siɛgi zu gi GALA daawooi laazeelini la wo ma, wo yeezeini bu, wo la soni ga nuɓusɛ laawoo ʋe, kɛlɛ wo soni ga GALA daawooi. Tama toɠa ga naa ɠiteɠite. Tɔ ɠa é botii ɠɛɛzu wo-yiimaʋɛ, wɔiti wo ɠidaaleʋeai. 
\v 14 Kɛ̀ɛleaiti, wo ʋokɔɠɔgɛ Zudé Egilisiiti ma, ti ga GALA ná-nuiti, ti ɠidaaleʋeai Yesu Kilista ma. Wo kpɔlɔi zɔlɔɔni wa-you zu nuiti zea, ga naama wɔinzeɠemai ma ziiti nɔ, nii ti sɔlɔɔni, tiya ɓɔɠɔi, ta-nuiti zea, ti ga Zuifuiti. 
\v 15 Tiya ɠa ti Maliɠii Yesu ʋaani ta GALA goo wo nuiti. Ti gi wɔinzeɠeni. Ti la GALA ɛnɛkɛni, ta ga nuɓusɛiti pɛ sili nuiti. 
\v 16 Ti ɠaaɓaani, ti pele leʋe gi luɠɔ, ga gi mina ɓɔɛ zii ɠiligiti pɔ, ti ʋa kizogi zɔlɔɔ. Ta ta-ɠotoi laazeelizu, nii ti kɛa yeeɠɛɠalai pɛ daawu. Kɛlɛ GALA ná-ziiɠaawanai ɓega ga zeeli ti ma.
\s Pɔle wɔin vai ga é Tesalonike nuiti ka mɔnɔ
\p
\v 17 Kɛ̀ɛleaiti, gɔun gi letemazu, ade balini ma kpusɛi zu yeeɠɛɠala go laawu. Kɛlɛ ada-ɠisiɛiti ti la balini ma. Wɔin wola ɠa gi ma, ga gi wo ʋɛtɛ ʋolu, gi ɠaaɓaani ga gi naa ɠɛ. 
\v 18 Wɔin ɠɛni gi ma ga gi ɠale ma, gi ʋa wo ʋɔ bɛ. Nà Pɔle, gè ɠaaɓaani ná zeizu ɠɛ mɔinmɔin, kɛlɛ Setana pele leʋeni gi luɠɔ. 
\v 19 Tama wa laade ɓaa, wo ʋa ɠɛ ga gá-ɠitogi, ta gá-ɠoozunɛɛi, ta gá-vɔnifaamai ma zalai, gá ɠɛ ɲaɠai ɠulazu la ade-Maliɠii Yesu ɠaazu, siɛgi zu é ʋaazu la? 
\v 20 Ungo, wa ɠa wo ga gá-lɛbiyai ta gá-ɠoozunɛɛi!
\c 3
\p
\v 1 Naa ɠa é kɛɛni, gi la mɔ ɠɛni zooga gi ʋa maaɓɔun kili bo, gi deveni ga giya ɠila, gi yɛ Atɛne. 
\v 2 Gi Timɔte leʋeni wo ma, ade-ɠɛɛloin, nii ti botii ɠɛɛzu ʋɔɔma ta GALA, é ɗa Woo Niinɛ Ʋagɔi laazeeli é ʋilɛ Kilista ʋa. Gi teʋeni wo ma, ga é wo zɛbɛlɔ, é wo iɲɔdɔ wa-ɠidaaleʋei zu, 
\v 3 naa ɠa a kɛ, wo zaama, nu nɔpɛ ge mina ɲiikpi kpɔlɔiti maaʋele ma, nii ade sɔlɔɔsu. Mazɔlɔɔ wa ɓɔɠɔi wo suɠwɛɛ ga GALA ka é naa leveai ade ma. 
\v 4 Siɛgi zu gi ɠɛni la wo ʋɔ bɛ, gi boni wo ma ma yeeluɠɔ, ga kpɔlɔiti ta zeeli ade ma. Naa ma ka kɛai, wo naa zuɠwɛɛ. 
\v 5 Naa ɠa é ba, gè la mɔ ɠɛni zooga gè ʋa maaɓɔun kili bo, gè Timɔte leʋeni, é ʋa, é ɠi sɔlɔɔ wa-ɠidaaleʋe vai ma. Gè luani ga tɛga nui mina ɠɛ wo lɛɛni ga, gá-wotii kpein ge mina ɠɛ ga wafuun faa.
\p
\v 6 Kɛlɛ Timɔte ʋaai ma gi ʋɔ bɛ, é zeɠe wo ʋɔ bɛ, é wa-ɠidaaleʋei ta wa-nɛɛbɛi ma woo ʋagɔi woni gi ma. É boni gi ma ga wa ɠizɛsu gi zu ga pagɔ yeenɔpɛ, wɔin ɠa wo ma gola ga wo gi ʋɛtɛ, eɠɛʋelei wɔin gi ma la ga gi wo ʋɛtɛ. 
\v 7 Naa maaʋele ma, kɛ̀ɛleaiti, gá-ɠidaaʋili faiti saama, ta gá-ɓɔlɔiti, gi iɲɔ ge lɔɔni wa-vaa zu. Wa-ɠidaaleʋei ɠa é gi iɲɔdɔɔni. 
\v 8 Niizu gá dɛ yɛnvuzu ʋolu, tɔɔzei wa loni kpaan wa-ɠilibalai zu wa Maliɠii. 
\v 9 Gá zoo GALA mamasu ɠale wa-vaa zu, é kula ɠɛ su, tɔɔzei koozunɛɛi liegɔi ʋa gi sɔlɔɔsu ada-ƓALAGI ɠaazu wa-vaa zu? 
\v 10 Kpidi ʋɛɛ folo ʋa, gá maanɛɛnɛzu gola ga é ɓɔ gi ʋa, gi wo ɠa, gi naa la wa-ɠidaaleʋei ma, nii a ɓɔ ba daazeeli.
\p
\v 11 GALA ɓɔɠɔgoi, é ga ade-Ɠɛɛ, ta de-Maliɠii Yesu, gá-ʋelei ɓɛtɛ, é lo wo ʋa! 
\v 12 Maliɠii yɛ wa-nɛɛbɛi zuwɔɔlɔzu yeenɔpɛ, nii é wo yɔɠɔzu wo ɠilagilagiti ta nuɓusɛi zɔiti pɛ tetema, é kɛ ga nɛɛbɛi naa ɠɛʋele, nii é gi-yiimaʋɛ wa-vaa zu. 
\v 13 É wo zɛbɛlɔ wo-yiimaʋɛti, wo ɠɛ ga nu ɲadegaiti, peelalazu nɔpɛ ge mina ɠɛ wo ʋa GALA gaazu, é ga ade-Ɠɛɛ, siɛgi zu ade-Maliɠii Yesu ʋaazu la, ta ná-nuiti.
\c 4
\s Nu ziɛ ʋelei nii nɛai GALA bɛ
\p
\v 1 Kɛ̀ɛleaiti, gaaɓelagi ɠa ga: Ʋelei wa ziɛ la wo GALA ɛnɛkɛ, wo naa ɠalani gi ya. Tama, ʋele ɠana wo ziɛzu la niina. Kɛlɛ niizu gá bosu wo ma, gi wo maanɛɛnɛ Maliɠii Yesu laaseigi zu: À kɛ ga pagɔ, wo ɗa li luɠɔma. 
\v 2 Tama wo suɠwɛɛ ʋelei gi wo ɠalani da, é ɠula Maliɠii Yesu ya. 
\v 3 Nii GALA ge pɔ wa-vaa zu, tɔ ɠa ga wa-ɲade fai: Wo mina ɓɔɠɔ lɔ koloɠologi zu, 
\v 4 ɛsɛ ge zoo è-ɓusɛi zo ga pagɔ,\f + \fr 4:4 \fr*\fq ɛsɛ ge zoo è-ɓusɛi zo ga pagɔ\fq*\ft : Tati pelei taɠili ɓalaa ka ga nii: \ft*\fqa ɛsɛ ge zoo anza zeɠezu kɛʋele ɲadegai zu ta unfemai zu\fqa*\f* é eteai ziɛ ɲadedai zu, ta unfemai, 
\v 5 wo mina ɓɔɠɔ lɔ gaazuɠulapɔ ɲɔi zu, eɠɛʋelei GALA kwɛɛtala nuiti ti kɛɛzu la zii ɠiligiti saama. 
\v 6 Nu nɔpɛ ge mina kakama vaa ɠɛ ga kɛɛɠɛloin, ɓaa yaava vai. Maliɠii ɠa naama vaiti pɛ ma lukpɔi ɠaaleʋe. Gi naa woni wo ma, gi maaɓakpa. 
\v 7 Mazɔlɔɔ GALA ge la ade lolini kɔzɔba vaa ma, kɛlɛ kɛni ɲadedai. 
\v 8 Naa ɠa é ba, zɔi nɔpɛ a ɠɛlɛ kalagi nii ʋa, nu laade é ʋa ɠɛ ɠɛlɛzu gooi ʋa, GALA ka é ɠɛlɛzu ba, nii é ná-Zɛnvu Ɲadegai veezu wo ya.
\p
\v 9 Wo ɓɛdɛ la ba ga nu sɛʋɛ ɠɛ wo ma, é lo kidaaleʋe nuiti wo yɔɠɔzu nɛɛbɛi ʋa, mazɔlɔɔ wo naama ɠalagi zɔlɔɔgɛ GALA zea, ʋelei wa ɓɔɠɔ nɛɛ la ʋɛ wo ɠilagilagiti. 
\v 10 Tama, ʋele ɠana wo ziɛzu la ɠɛɛɠɛlointi pɛ bɛ Masedoane yooi kpein su. Kɛlɛ kɛ̀ɛleaiti, gá wo lɛnɛsu, wo li luɠɔma mɔnɔ naazu. 
\v 11 À ɠaaɓa, wo eteai ziɛ ziilɛigi zu, wo ɠaaɓa wo ɓɔɠɔ vaiti ma, wo boti ɠɛ ga wo-yeeiti, eɠɛʋelei gi wo ɠalani da, 
\v 12 naa ɠa a kɛ wo ziɛ ga pagɔ ladalai zu kamaʋolu nuiti tetegi, wo mina ɠɛ nu nɔpɛ unma ga kasɔ.
\s Gɔvɛiti buzeɠe vai
\p
\v 13 Kɛ̀ɛleaiti, gi la pɔ gi ʋa wo yɛ kpidii zu, naati ta-vaa zu niiti ti zaazu, naa ɠa a kɛ wo-yii mina ɓɔlɔ ga nui mɔtaiti kɛʋele, niiti kito ge la ti ʋɛ. 
\v 14 Ade laaʋɛ da ga Yesu zaani, é wuzeɠe, é ɠula saai ya. Ade laaʋɛ da ɓalaa ga niiti ti ɠidaaleʋeai Yesu ma eyɛsu ti za, GALA ka naati buzeɠe, é ti ɠula saai ya, é ʋa ga tiye Yesu ʋɔ.
\p
\v 15 Wɛlɛ, nii ɠa gi dɛɛzu ga woye, eɠɛʋelei Maliɠii laawooi bosu la: Adɛiti da yɛ vulua Maliɠii ʋa voloi, de la lia naati tuɠɔ pɛ, zɔiti ti zaai. 
\v 16 Mazɔlɔɔ deve wooi ɠa mɛni, geezuɠeela ɠundiɠii woo ɠa mɛni, ta GALA ná-puʋugi wooi, ta Maliɠii ɓɔɠɔi ɠa yei, é zeɠe geezuʋɛ. Niiti ti ɠiliai yɛgai Kilista ʋa eyɛsu ti za, naati ta wuzeɠe mɔunpa, ti ɠula saai ya. 
\v 17 Naa ʋoluma, adɛiti da yɛ vulua naama voloi, da ɓɔ ti ʋa, ade lɛ tonaɓiingiti su, ga de Maliɠii laaɠomi fiilɛi zu, ta da yɛ niina Maliɠii ʋa ɠɔoɠɔ. 
\v 18 À ɓɔɠɔ iɲɔdɔ ga niima wooiti, wo ɠilagilagiti pɛ.
\c 5
\s Maliɠii ná-foloi ta kɛʋele ɓɛtɛi
\p
\v 1 Kɛ̀ɛleaiti, wo ɓɛdɛ la ba, ga gi sɛʋɛ leʋe wo ma, é lo naama voloiti ba ta ma yeeɠɛɠalaiti, yeei niima vaiti ti ɠɛɛzu la. 
\v 2 Mazɔlɔɔ wo suɠwɛɛ ga pagɔ, ga Maliɠii ná-foloi ɠana ʋa eɠɛ unma nui é ɠulazu nu viliba kpidii. 
\v 3 Siɛgi zu nuɓusɛiti ta ɠɛ ɠɛɛzu la ma: «Ziilɛigi ɠa gi ya niina, gi ɠulaa faa zu,» názu ɠa undaaʋiligi ɠulazu la ti viliba, eɠɛʋelei doun zɔlɔɔ koozuwanai a ɗa anzanui zo da, é la ʋoola ti ʋa pɛ.
\p
\v 4 Kɛlɛ kɛ̀ɛleaiti, wo la kpidi zu, ga naama voloi ʋa ɠula wo viliba, eɠɛ unma nu. 
\v 5 Wo pɛ wo ɠɛa ga wozakalagi ná-nuiti, wo ɠɛa ga foloi nɔnɔiti. De la ga kpidii ta kuai nɔnɔ. 
\v 6 Ade mina ɲi deɠɛmu, eɠɛʋelei zɔiti ti ɲiizu la, kɛlɛ maanɛɛʋɛ ga ade yɛ ɠaazu ɠa, de ɠɛ ga sɔɓelama nuiti. 
\v 7 Mazɔlɔɔ zɔiti ti ɲiizu, ta ɗa ɲi ga kpidii, zɔiti dɔɔi ti zosu, toɠa ɗa ti zo ga kpidii. 
\v 8 Kɛlɛ dɛiti de ga foloi nɔnɔiti, ade ɠɛ ga sɔɓelama nuiti, ade kidaaleʋei ta nɛɛbɛi loo ɠɔba ga de-ɠaka makɛ ɠɔɔɠɔ zɔɔlai, ta da-ɠizogi ma ɠitogi ɠɛ de unba ga bɔɔlɔgi. 
\v 9 Mazɔlɔɔ GALA ge la ade lolini ga é yiiɠaawana ade ma, kɛlɛ kɛni kizogi zɔlɔɔ fai ade-Maliɠii Yesu Kilista zaalai zu, 
\v 10 nii é zaani ade ʋɛ, nii a kɛ ade zɛnvui wo ʋɔɔma ada tɔun, siɛgi zu a ʋaa la, de ɠɛni vulua, ɓaa de zaani. 
\v 11 Naa ɠa é ba, à ɓɔɠɔ iɲɔdɔ wo ɠilagilagiti pɛ, wo ɠilagilagi ɓɔ bɔɔlai ʋa wo li luɠɔma kidaaleʋei zu, eɠɛʋelei wo kɛɛzu la ɠiteɠite.
\s Falima ɠaaɓelagiti ta tuʋɔgiti
\p
\v 12 Kɛ̀ɛleaiti, gá valizu wo ma, ga wo unfe naati ma, niiti ti botii ɠɛɛzu wo zaama, ti losu wo luɠɔ Maliɠii laaseigi zu, ti ɗa wo ɠala. 
\v 13 À wa-nɛɛbɛi ɠula kɛlɛma ti ʋɛ, wo ti wɔɔlɔ gola ta-wotii maaʋele ma. À zei ziilɛigi zu ɓɔɠɔ ɠoba.
\p
\v 14 Kɛ̀ɛleaiti, gá wo maanɛɛnɛzu, à naati too ɠisu, niiti ti eteai ziɛzu gaaʋalaba vaiti su. Niiti ti iɲɔteʋeai, à naati iɲɔdɔ. À ɓɔ zobobɛlala nuiti ba. À yiilɔɔ ɛsɛ pɛ bu. 
\v 15 À dama, nu mina faa ɲɔi ʋotokula ga faa ɲɔi, kɛlɛ à ʋilɛ faa ʋagɔi ɠɛɛ vai ʋolu yeenɔpɛ, wo naa ɠɛ ɓɔɠɔ yɔɠɔzu, ta nuɓusɛi pɛ bɛ.
\p
\v 16 Wo ɠoozunɛai ɠɛ de yeenɔpɛ. 
\v 17 À maanɛɛnɛi wo yeenɔpɛ, wo mina ɓɔlɔ. 
\v 18 À GALA mama fai pɛ su, naa ɠa é ga GALA ziimai wa-vaa zu, wa-ɠilibalai zu wa Yesu Kilista.
\p
\v 19 À mina pele leʋe Zɛnvu Ɲadegai ná-botii luɠɔ. 
\v 20 À mina bɛlɛɠula GALA goo wo nuiti daawooi ʋa. 
\v 21 Kɛlɛ à faiti pɛ buuʋɛtɛ, zɔi pagai wo naa zo, 
\v 22 wo ɓɔɠɔ zo, wo-yee mina ɠɛ faa ɲɔu ɠɛɛ vai ma zii tanɔpɛ su.
\p
\v 23 Ziilɛi fee ƓALAGI ɓɔɠɔgoi wo ɲade mɛtu, é wo-yɛnvui, ta wo-ɠigi, ta wo-ɓusɛiti makɛ ga pagɔ, peelalazu nɔpɛ ge mina ɠɛ wo ʋa, ade-Maliɠii Yesu Kilista ʋa voloi. 
\v 24 Zɔi é wo loliga, toɠa ga wooɠɛɠila nui, toɠa a naa ɠɛ.
\p
\v 25 Kɛ̀ɛleaiti, à GALA fali gi ʋɛ.
\p
\v 26 À ade-ɠɛɛleaiti pɛ tuʋɔ ga nɛɛnɛi.
\p
\v 27 Nà wo levezu, gè maaɓakpa Maliɠii laaseigi zu, ga wo niima zɛʋɛi ɠala ade-ɠɛɛleaiti pɛ bɛ.
\p
\v 28 Ade-Maliɠii Yesu Kilista ná-zaalai yɛ wo ʋa!