\id 2TI  
\h 2 Timoteo 
\toc1 Xlimactiy Xcarta San Pablo Hua̠ntu̠ Tzók­nilh Timoteo 
\toc2 2 Timoteo 
\toc3 2 Ti. 
\mt1 Xlimactiy Xcarta San Pablo Hua̠ntu̠ 
\mt1 Tzók­nilh Timoteo 
\ip Umá xli̠­mactiy carta hua̠ntu̠ San Pablo tzók­nilh Timoteo a̠huayu luu xta̠­chuná hua̠ntu̠ luu pu̠lh titzók­nilh, porque nac u̠má carta li̠ma̠­kalh­chu­hui̠­ni̠cán Timoteo pi̠ hua̠ntu̠ aksti̠tum cat­lá­hualh xta­scújut Cristo y cali̠­pá̠hua y cata̠­yá­nilh nac xla­táma̠t cumu “lá cha̠tum scu­lujua xtropa Jesucristo” (2.3). Xa̠huachí hua­nicán pi̠ la̠ta aksti̠tum nali̠­pa̠­huán Cristo y nali̠­chu­hui̠nán xta­chu­huí̠n lhu̠hua hua̠ntu̠ amá̠­calh li̠ma̠ak­spu­li̠cán, hasta nali̠­pu­tza­sta̠­lacán, nata­mac­nu̠cán nac pu̠la̠­chi̠n o nachi̠­hui­li̠cán, y lhu̠hua hua̠ntu̠ nali̠­ma̠­pa̠­ti̠­ni̠cán caj xpa̠­la­cata cumu li̠s­cujma Cristo. Pero laca­tancs hua­nicán Timoteo, para xli̠­ca̠na lac­xtum ta̠ni̠­yá̠hu Cristo mima quilh­ta­macú acxni̠ lac­xtum nata̠­ma̠­pek­si̠­na­ná̠hu nac xpu̠­ma̠­peksí̠n. 
\ip Xa̠huachí li̠ma̠­kalh­chu­hui̠­ni̠cán Timoteo pi̠ xlianka­lhi̠ná quilh­ta­macú cali̠­kalh­ta­huá­kalh a̠má xta­chu­huí̠n Dios hua̠ntu̠ maká̠n tatzok­ta­hui­lani̠t nac li̠kalh­ta­huaka (3.15-16). 
\ip Nac u̠má xcarta San Pablo li̠chu­hui̠nán la̠ta lácu aya maka̠sá pa̠ti̠­nani̠t nac pu̠la̠­chi̠n y lac­pu­huán pi̠ aya tala­ca­tzu­hui̠ma quilh­ta­macú acxni̠ namak­ni̠cán. Li̠ma̠aka­tzanke̠y Timoteo pi̠ na̠ juerzaj cat­la­huá­nilh la̠qui̠ nata̠­yaniy nac xla­táma̠t y cama̠­kan­tax­ti̠­ko̠lh hua̠ntu̠ Dios li̠lac­sacni̠t cumu la̠ xlá xma̠­kan­tax­ti̠nit nac xla­táma̠t. 
\c 1  
\p  
\v 1 Aquit Pablo xapóstol Jesu­cristo, porque Dios qui­lac­sacni̠t pi̠ nac­liakchu­hui̠nán a̠má li̠pa̠­xúhu latáma̠t hua̠ntu̠ xlá ma̠lacnu̠y naca̠­ma̠x­qui̠y la̠tachá ti̠cu nali̠­pa̠­huán Cristo Jesús.  
\v 2 Luu ca̠na li̠pa̠­xúhu ctzok­nimá̠n eé carta huix Timoteo hua̠nti̠ cli̠­ma̠x­tuyá̠n quin­ka­huasa porque cpa̠x­qui̠yá̠n, aquit cla­cas­quín pi̠ Quin­tla̠­ticán Dios xa̠hua Quim­pu̠­chi­nacán Jesu­cristo cata­si­cu­la­na̠t­la­huán y cata­ma̠x­quí̠n hua̠ntu̠ tla̠n latáma̠t. 
\s1 Tancs xli̠ma̠lulókot Timoteo pi̠ li̠pa̠huán Cristo 
\p  
\v 3 Timoteo, xcha̠­liyá̠n laca­tzi̠sa y ca̠tzi̠sní acxni̠ ckalh­ta­hua­kaniy a̠má Quin­tla̠­ticán Dios hua̠nti̠ aksti̠tum clac­scuj­nima chuná cumu xta­li̠­pa̠­huán y xtas­cuj­ni­má̠­nalh xalak­maká̠n qui­li̠­ta­la­ka­pasni, aquit cla­ca­pa̠s­tacá̠n y cpa̠x­cat­ca­tzi̠niy Dios caj xpa̠­la­cata hua̠ntu̠ tla­huama nac mila­táma̠t.  
\v 4 Acxni̠ aquit cla­ca­pa̠s­taca la̠ta huix tasa acxni̠ tapaj­pi­tzíhu, hasta caj u̠cu xacuc­xilhni clac­pu­huán la̠qui̠ chuná xac­ka­lhi̠pá tapa̠­xu­huá̠n caj mim­pa̠­la­cata,  
\v 5 porque aquit sta­lanca cca­tzi̠y lácu aksti̠tum li̠pa̠­huana Cristo, ma̠squi xli̠­ca̠na pi̠ pu̠lh huá li̠pa̠­huani̠t tamá mina̠na hua­nicán Loida xa̠hua mintzí Eunice. Pero na̠ laca­tancs cma̠­lu­loka pi̠ huix na̠chuná aksti̠tum li̠pa̠­huana.  
\v 6 Huá xpa̠­la­cata cli̠­ma̠aka­tzan­ke̠yá̠n pi̠ cama̠uxca̠ni tamá xli̠t­li­hueke Dios hua̠ntu̠ huix mak­lhtí̠­nanti a̠má quilh­ta­macú acxni̠ aquit ckalh­ta­hua­ká­nilh Dios mim­pa̠­la­cata y cliacchipán qui­macán.  
\v 7 Porque Dios ni̠ quin­ca̠­ma̠x­qui̠­ni̠tán xli̠t­li­hueke Espíri­tu Santo la̠qui̠ caj cha̠­pe̠­cuaj nala­ta­ma̠­yá̠hu, huata huá quin­ca̠­li̠­ma̠x­qui̠­ni̠tán la̠qui̠ naka­lhi̠­yá̠hu li̠t­li­hueke, tla̠n tala­ca­pa̠s­tacni y la̠qui̠ naca̠­pa̠x­qui̠­yá̠hu la̠tachá tícu ya̠ cris­tiano.  
\v 8 Ne̠c­xnicú tili̠­ma̠­xa­nana la̠ta tancs ma̠lu­loka pi̠ li̠pa̠­huana Quim­pu̠­chi­nacán Jesús; na̠ ni̠para aquit ne̠c­xnicú quin­ti­li̠­ma̠­xa­nana pi̠ cta­nu̠ma nac pu̠la̠­chi̠n caj xpa̠­la­cata cumu na̠ cli̠­pa̠­huán Cristo. Huata huix cata̠­ta̠­yani tamá li̠t­li­hueke hua̠ntu̠ Dios ma̠x­qui̠yá̠n, ma̠squi lhu̠hua hua̠ntu̠ li̠pa̠­ti̠ya nac mila­táma̠t caj xpa̠­la­cata min­ta­ca̠­nájlat y cumu li̠chu­hui̠­námpa̠t tamá li̠pa̠­xúhu xta­chu­huí̠n Cristo hua̠ntu̠ ma̠sta̠y lak­táxtut.  
\v 9 Dios quin­ca̠­lac­sac­ni̠tán la̠qui̠ nama­ca­ma̠x­qui̠­yá̠hu qui­la­ta­ma̠tcán porque huá quin­ca̠­lak­ma̠xtún, pero ni̠ huá quin­ca̠­li̠­la­ka­lhamán cumu para túcuya̠ tla̠n ta­scújut ma̠kan­tax­tí̠hu sinoque chuná tuncán xlac­lhca̠­hui­li̠ni̠t pi̠ naquin­ca̠­lak­ma̠x­tuyá̠n cumu snu̠n quin­ca̠­pa̠x­qui̠yá̠n y antá sta­lanca ma̠sí­yulh nac xla­táma̠t Cristo Jesús. Hasta la̠ta Dios nia̠ xma̠­la­ca­tzu­qui̠y ca̠quilh­ta­macú xlá chu­na­tiyá xquin­ca̠­lac­sac­ni̠tán y xquin­ca̠­pa̠x­qui̠­ma̠ná,  
\v 10 pero acxni̠ chú macá­milh Qui­ma̠­ka­pu̠­tax­ti̠­nacán Jesu­cristo nac ca̠quilh­ta­macú luu laca­tancs ma̠lú­lokli pi̠ xli̠­ca̠na quin­ca̠­la­ka­lha­maná̠n, porque xlá makat­lá­jalh xli̠­hua̠k xli̠t­li­hueke xpu̠­china ca̠li̠ní̠n y caj xpa̠­la­cata u̠má xasa̠sti xta­ma̠­ca­tzi̠ní̠n hua̠ntu̠ ma̠sta̠y lak­táxtut antá sta­lanca quin­ca̠­ma̠­ca­tzi̠­ni̠má̠n lácu naka­lhi̠­yá̠hu a̠má li̠pa̠­xúhu latáma̠t hua̠ntu̠ ne̠c­xnicú lak­sputa para nali̠­pa̠­hua­ná̠hu. 
\p  
\v 11 Dios qui­li̠­lác­sacli la̠qui̠ nac­liakchu­hui̠nán eé xasa̠sti xta­ma̠­ca­tzi̠ní̠n, y qui­li̠­má̠x­tulh xapóstol Jesu­cristo hua̠nti̠ li̠huana̠ naca̠­li̠­ma̠­kalh­chu­hui̠ni̠y cris­tianos.  
\v 12 Pus huá xpa̠­la­cata aquit cli̠­ta̠­ya­nima ma̠squi lhu̠hua hua̠ntu̠ cpa̠­ti̠ma uú nac pu̠la̠­chi̠n; hua̠mpi̠ ni̠para tzinú cli̠­ma̠­xanán porque sta­lanca cca­tzi̠y tícu cma­ca­ma̠x­qui̠ni̠t qui­la­táma̠t, xa̠huachí cca­tzi̠y pi̠ Dios kalhi̠y li̠t­li­hueke la̠qui̠ naqui­mak­ta­kalha ni̠tu̠ naquiak­spulay hasta nalak­chá̠n quilh­ta­macú acxni̠ nac­ma̠­kan­tax­ti̠ko̠y u̠má xta­scújut hua̠ntu̠ qui­ma̠­cuentaj­li̠ni̠t.  
\v 13 Huix aksti̠tum cali̠­la­tapa tamá xatlá̠n tala­ca­pa̠s­tacni hua̠ntu̠ aquit cma̠­si­yu­ni­ni̠tán, xa̠hua min­ta­ca̠­nájlat y a̠má tapa̠x­qui̠t hua̠ntu̠ aquinín kalhi̠­yá̠hu cumu huá ta̠ta­la­cas­tuc­ni̠­táhu Cristo Jesús.  
\v 14 Cama̠xqui quilh­ta­macú tamá Espíri­tu Santo hua̠nti̠ lama nac qui­la­ta­ma̠tcán pi̠ namak­ta̠­yayá̠n la̠qui̠ li̠huana̠ nama̠­kan­tax­ti̠ya min­ta­scújut hua̠ntu̠ Dios li̠lac­sac­ni̠tán naliakchu­hui̠­nana. 
\p  
\v 15 Cumu la̠ huix sta­lanca catzi̠ya pi̠ xli̠­hua̠k a̠ma̠ko̠lh nata̠lán hua̠nti̠ uú xta­hui­lá­nalh hua̠nti̠ xalac xapu̠­la­tama̠n Asia quin­taak­xtek­makan­ko̠lh, na̠chuná quin­tat­lá­hualh quin­ta̠­lacán Figelo xa̠hua Her­mó­genes; xli̠­ca̠na pi̠ la̠n quin­ta­ma­ka­li̠­púhua acxni̠ chuná quin­tat­lá­hualh.  
\v 16 Aquit cla­cas­quín pi̠ Quim­pu̠­chi­nacán caca̠­si­cu­la­na̠t­lá­hualh y caca̠­mak­tá̠­yalh Ones­í­foro chu xli̠­ta­la­ka­pasni, porque xlá mak­lhu̠hua qui­ma̠uxcá̠­ni̠lh y qui­ma̠akpu­wan­ti­yá­ni̠lh acxni̠ aquit xac­li̠­pu­huama, y ni̠ qui­li̠­ma̠­xá­nalh ma̠squi aquit xac­ta­nu̠ma nac pu̠la̠­chi̠n.  
\v 17 Na acxni milh uú nac xaca̠­chi­quí̠n Roma qui­la­ca­pú­tzalh hasta qui­ma̠­nók­lhulh.  
\v 18 Pus huá Quim­pu̠­chi­nacán cala­ka­lhá­malh y camá̠x­qui̠lh xlak­táxtut acxni̠ nalak­chá̠n a̠má quilh­ta­macú namim­paray xli̠­maktiy, porque huix sta­lanca catzi̠ya la̠ta lácu xlá qui­mak­tá̠­yalh acxni̠ xla­ma̠­nan­chá̠hu nac xaca̠­chi­quí̠n Efeso. 
\c 2  
\s1 Huanicán Timoteo pi̠ cascujli cumu la̠ cha̠tum sculujua xtropa Jesucristo 
\p  
\v 1 Pero huix quin­ka­huasa Timoteo, huá cata̠­ta̠­yani tamá xli̠t­li­hueke Cristo la̠qui̠ chuná tancs nama̠­kan­tax­ti̠ya min­ta­scújut.  
\v 2 Hua̠ntu̠ huix kax­pat­ni̠ta pi̠ cca̠­li̠­ma̠­kalh­chu­hui̠­ni̠ni̠t lhu̠hua cris­tianos la̠ta lácu li̠huana̠ nata­li̠­pa̠­huán Cristo, pus na̠chuná huix caca̠­li̠­ma̠­kalh­chu­hui̠ni a̠ma̠ko̠lh hua̠nti̠ luu lak­tli­huekén tali̠­ta­siyuy xta­ca̠­naj­latcán, la̠qui̠ chuná xlacán na̠ nata­li̠­ma̠­kalh­chu­hui̠ni̠y xa̠maka­pi­tzí̠n cris­tianos. 
\p  
\v 3 Huix hua̠k tla̠n cat­lahua y pa̠xu­hua̠na̠ capa̠ti hua̠ntu̠ akspu­layá̠n cumu la̠ cha̠tum scu­lujua xtropa Jesu­cristo.  
\v 4 Acxni̠ cha̠tum tropa ma̠kan­tax­ti̠ma xli̠­ta­scújut hua̠ntu̠ laka­ya̠­hua­cani̠t, ni̠tu̠ tili̠s­cuj­pa­rake̠y a̠túnuj ta­scújut huata caj xma̠nhuá li̠s­cuja hua̠ntu̠ li̠ma̠­pek­si̠­cani̠t la̠qui̠ chuná namaka­pa̠­xu­huay xpuxcu.  
\v 5 Na̠chu­na­li̠túm acxni̠ cha̠tum kama̠ná hua̠nti̠ la̠t­la­jama para xatícu a̠tzinú tlak tla̠n kama̠nán, xli̠­ca̠na pi̠ ni̠ cati­ma̠x­quí̠­calh xtrofeo para ni̠chuná nama̠­kan­taxti̠y la̠ta lácu xli̠­ka­má̠nat xuani̠t.  
\v 6 Pus na̠chuná cama̠­kan­taxti min­ta­scújut cumu la̠ a̠má cris­tiano hua̠nti̠ scujma y cha­na̠­nama nac xca̠­tu­huá̠n, tancs tla­huay xta­scújut porque catzi̠y pí pu̠lh huá lak­chá̠n nali̠­hua̠yán hua̠ntu̠ antá nama­kalay.  
\v 7 Xli̠­hua̠k u̠má hua̠ntu̠ aquit cuanimá̠n, huix li̠huana̠ cala­ca­pá̠s­tacti lácu a̠tzinú nali̠­ma­cuaniyá̠n nac mila­táma̠t, xa̠huachí Dios namak­ta̠­yayá̠n la̠quí naaka­ta̠ksa xli̠­hua̠k hua̠ntu̠ huix catzi̠­pu­tuna. 
\p  
\v 8 Xa̠huachí ne̠c­xnicú tipa̠­tzan­ka̠ya nali̠­chu­hui̠­nana Jesu­cristo, pus huá u̠má tachu­huí̠n hua̠ntu̠ aquit cca̠­li̠­ma̠­kalh­chu­hui̠ni̠y cris­tianos pi̠ Cristo huá xli̠­ta­la­ka­pasni xuani̠t xamaká̠n kolu­tzí̠n rey David, pero cumu Xka­huasa Dios huá li̠la­cas­ta­cuánalh nac ca̠li̠ní̠n, y para xlacán na̠ nata­li̠­pa̠­huán pus na̠ naca̠­lak­ma̠x­tuniy xli̠s­tac­nicán.  
\v 9 Xli̠­ca̠na pi̠ caj xpa̠­la­cata u̠má xasa̠sti xta­ma̠­ca­tzi̠ní̠n lhu̠hua tapa̠tí̠n hua̠ntu̠ aquit cli̠­pa̠­ti̠ma y hasta caj huá xpa̠­la­cata ma̠squi qui­li̠­ma­ca­chi̠­cani̠t cadena cumu la̠ cha̠tum mak­ni̠ná; pero ma̠squi aquit quin­chi̠­cani̠t a̠má li̠pa̠­xúhu xta­ma̠­ca­tzi̠ní̠n Dios ni̠tu̠ chi̠­má̠­calh.  
\v 10 Huá xpa̠­la­cata aquit cli̠­ta̠­ya­nima ma̠squi lhu̠hua hua̠ntu̠ cpa̠­ti̠ma nac qui­la­táma̠t la̠qui̠ chuná nac­ca̠­li̠­mak­ta̠yay a̠ma̠ko̠lh hua̠nti̠ Dios ca̠lac­sacni̠t y xlacán na̠ nata­ka­lhi̠y lak­táxtut chu a̠má li̠pa̠­xúhu latáma̠t hua̠ntu̠ ne̠c­xnicú lak­sputa para nata­li̠­pa̠­huán Quim­pu̠­chi­nacán Cristo Jesús. 
\p  
\v 11 Luu xta­lu­lóktat a̠má takalh­chu­huí̠n hua̠ntu̠ chiné huan: 
\q1 Para aquinín tancs catzi̠­yá̠hu pi̠ aya ta̠ni̠­ni̠­táhu Cristo, 
\q1 pus na̠ qui­li̠­ca̠­naj­latcán pi̠ acxtum nata̠­la­ta­ma̠­ya̠­chá̠hu nac akapú̠n. 
\q1  
\v 12 Para la̠nchú lhu̠hua hua̠ntu̠ pa̠ti̠­ma̠­náhu caj xpa̠­la­cata, 
\q1 na̠ tancs caca­tzí̠hu pi̠ lac­xtum nata̠­ma̠­pek­si̠­na­ná̠hu. 
\q1 Pero para aquinín ni̠ li̠ta̠­ya­yá̠hu nac xla­ca­ti̠ncán cris­tianos pi̠ laka­pa­sá̠hu, 
\q1 pus na̠ ni̠para huá cati­li̠­tá̠­yalh para quin­ca̠­la­ka­pasá̠n. 
\q1  
\v 13 Ma̠squi aca­tunu aquinín ni̠ luu xli̠­ca̠na aksti̠tum li̠pa̠­hua­ná̠hu, pero xlá chu­na­tiyá quin­ca̠­la­ka­lha­maná̠n. 
\q1 Porque ni̠lay caj naaksa­ni̠nán y ni̠ nama̠­kan­tax­ti̠­putún hua̠ntu̠ aya quin­ca̠­li̠­ta̠­ya­ni­ni̠tán. 
\s1 Pablo huaniy Timoteo pi̠ tancs cama̠kantáxti̠lh a̠má tascújut hua̠ntu̠ Dios li̠lacsacni̠t 
\p  
\v 14 Huix li̠huana̠ caca̠­ma̠­la­ca­pa̠s­tacni cris­tianos y caca̠­li̠­ma̠­peksi nac xla­catí̠n Dios pi̠ niaj cata­liaklhu̠­huá̠t­nalh a̠má tachu­huí̠n hua̠ntu̠ ni̠tu̠ li̠ma­cuán, porque xli̠­ca̠na pi̠ taaklhú̠­hui̠t ni̠tu̠ li̠ma­cuán, huata caj tali̠­lac­la­ta̠yay xli̠­hua̠k hua̠nti̠ ca̠ka­lha­kax­mata.  
\v 15 Huix juerza cat­la­huani li̠huana̠ nama̠­kan­tax­ti̠ya min­ta­scújut hua̠ntu̠ Dios li̠lac­sac­ni̠tán la̠qui̠ chuná nali̠­tax­tuya cha̠tum tla̠n xta­sa̠cua hua̠nti̠ aksti̠tum lama y ni̠tu̠ cati­li̠­ma̠­ma̠­xa­ní̠­canti porque tancs ma̠si­yúpa̠t a̠má xata­lu­lóktat xta­chu­huí̠n Dios hua̠ntu̠ ma̠sta̠y lak­táxtut.  
\v 16 Ne̠c­xnicú tili̠­chu­hui̠­nana tamá tala­ca­pa̠s­tacni hua̠ntu̠ uú xala ca̠quilh­ta­macú porque ni̠tu̠ li̠ma­cuán xa̠huachí caj hua̠k xta­la­ca­pa̠s­tac­nicán cris­tianos, y xli̠­hua̠k hua̠nti̠ chuná tali̠­kalh­chu­hui̠nán li̠huaca tali̠­lak­tzan­ka̠­ta̠yay nac tala̠­ka­lhí̠n.  
\v 17 Y a̠má li̠xcáj­nit tachu­huí̠n hua̠ntu̠ tama̠­siyuy la̠li̠­huán tala­ka­pun­tumi̠y xta̠­chuná cumu la̠ surum­piyu tajátat, hua­tiyá u̠má hua̠ntu̠ tali̠­lak­tzan­ka̠­ta̠­yani̠t Himeneo xa̠hua Fileto.  
\v 18 Cumu niaj chuná taca̠­najlay xta­lu­lóktat Dios xlacán tahuán pi̠ acxni̠ nani̠­yá̠hu niaj cati­la­cas­ta­cuanáhu nac ca̠li̠ní̠n porque la̠ qui­li̠­la­cas­ta­cuanatcán xuani̠t aya kan­tax­tuni̠t nac qui­la­ta­ma̠tcán, chuná taliakchu­hui̠­nam­pu̠lay y lhu̠hua cris­tianos aka­tiyuj ca̠t­la­hua­nima xta­ca̠­naj­latcán.  
\v 19 Pero aquinín sta­lanca catzi̠­yá̠hu pi̠ Dios li̠huana̠ ca̠xuili̠ni̠t xta­la­ca­pa̠s­tacni hua̠ntu̠ ni̠para cha̠tum tícu cati­lac­x­tlá­hualh y antá chiné tatzok­ta­hui­lani̠t: “Mim­pu̠­chi­nacán hua̠k ca̠la­ka­pasa hua̠nti̠ tatapeksi̠niy”, y lacatum chiné huam­paray: “Y xli̠­hua̠k hua̠nti̠ tali̠­pa̠­huán Quim­pu̠­chi­nacán Cristo cata­lak­má­kalh xli̠­hua̠k hua̠ntu̠ li̠xcáj­nit tala̠­ka­lhí̠n.” 
\p  
\v 20 Cumu la̠ hui­xinín catzi̠­yá̠tit pi̠ anta­nícu tla̠na hui­lá­calh nac aktum lanca chiqui lhu̠hua jalá̠n kalhi̠cán, maka­pi­tzí̠n pula̠tu xla oro, vasos xla plata, y na̠ kalhi̠cán maka­pi­tzí̠n xla pák­lha̠t chu xla li̠lh­támat tíyat; a̠máko̠lh hua̠ntu̠ xla oro o plata caj xma̠n ca̠pu̠­hua̠­yancán acxni̠ tla­huacán lanca pa̠xcua o caj li̠cá̠cni̠t li̠ka­lhi̠cán, y maka­pi­tzí̠n jalá̠n hua̠ntu̠ xla quihui chu xla li̠lh­támat caj chu­natá li̠mac­la­ca­squincán.  
\v 21 Pus xli̠­hua̠k a̠ma̠ko̠lh cris­tianos hua̠nti̠ talak­makán hua̠ntu̠ li̠xcáj­nit tala̠­ka­lhí̠n nac xla­ta­ma̠tcán tali̠­taxtuy cumu la̠ vaso chu pula̠tu xla plata y xla oro hua̠ntu̠ ca̠li̠­la­ka­chix­cu­hui̠cán Dios. Para tícu luu aksti̠tum nala­tama̠y Dios nama̠­cuentajli̠y xta­scújut. 
\p  
\v 22 Huix catza̠­la­má­kanti xli̠­hua̠k hua̠ntu̠ ni̠ ca̠mi­ni̠niy tat­la­huay lakka­huasán y ni̠chuná caca̠­maca­sta̠la, huata caj xma̠nhuá aksti̠tum cali̠­la­tapa min­ta­ca̠­nájlat la̠ta li̠pa̠­huana Dios, la̠ta ca̠pa̠x­qui̠ya min­ta̠­cris­tianos, y aksti̠tum cala­tapa nac xlak­sti̠­pa̠ncán hua̠nti̠ xli̠­hua̠k xli̠t­li­hueke xna­cujcán taquilh­cha̠niy Quim­pu̠­chi­nacán.  
\v 23 Huix calak­má­kanti xli̠­hua̠k hua̠ntu̠ caj xta­la­ca­pa̠s­tac­nicán cris­tianos hua̠nti̠ caj tali̠­ma̠aklhu̠­hui̠­nam­putún ma̠squi tahuán pi̠ huá xax­li̠­ca̠na tla̠n tala­ca­pa̠s­tacni, porque huix aya catzi̠ya pi̠ ni̠tu̠ li̠ma­cuán huata caj antá tali̠­ma̠­tzu­qui̠y tasi̠tzi.  
\v 24 Porque cha̠tum cris­tiano hua̠nti̠ aya maca­ma̠x­qui̠ni̠t xla­táma̠t Quim­pu̠­chi­nacán ni̠para tzinú mini̠niy caj xma̠n natat­lan­ca̠­ni̠­ta̠k­chokoy, huata xlá mini̠niy pi̠ la̠tachá tícuya̠ cris­tianos tla̠n caca̠­ca­tzí̠­nilh, caká­lhi̠lh li̠s­ka­lala la̠qui̠ naca̠­ma̠­kalh­chu­hui̠ni̠y cris­tianos, y ma̠squi túcu ni̠tlá̠n nat­la­hua­nicán xlá ni̠ pála xli̠­sí̠­tzi̠t o xli̠aklhu̠­huá̠tnat.  
\v 25 Y para tícu catzi̠y pi̠ tla­huama hua̠ntu̠ ni̠tlá̠n tala̠­ka­lhí̠n, xlá mini̠niy pi̠ laca­ti̠tum cama̠­kalh­chu­huí̠­ni̠lh, chicá para xamaktum Dios nala­ka­lhamán y chuná nata­la­ka­pasa hua̠ntu̠ xlá kalhi̠y xta­lu­lóktat,  
\v 26 y chuná nata­tza̠­laniy akska­huiní hua̠nti̠ xta­chí̠n ca̠li̠­lama y ca̠ma̠t­la­hui̠ma hua̠ntu̠ xlá lacas­quín natat­la­huay. 
\c 3  
\s1 Lácu natalay cristianos acxni̠ talacatzuhui̠majá nahuán quilhtamacú la̠ta namimparay Cristo 
\p  
\v 1 Timoteo, huix luu mili̠­cá­tzi̠t pi̠ acxni̠ aya tala­ca­tzu­hui̠maj nahuán quilh­ta­macú la̠ta namim­paray Cristo luu catu̠huá hui­la̠­náhu nahuán.  
\v 2 Lhu̠hua cris­tianos hua̠nti̠ caj xma̠n sac­stucán naca̠akli̠­huancán, xma̠n huá luu nata­la­ka­ti̠­lacá̠n nata­ka­lhi̠y lhu̠hua tumi̠n; luu lac­ta­li̠­pa̠hu naca̠­maklh­ca­tzi̠cán y nata­la­ca­ta̠­qui̠nán, xa̠huachí catu̠hua hua̠ntu̠ xala u̠má ca̠quilh­ta­macú caj lak­sputa y ni̠tu̠ li̠ma­cuán xlacán hua̠k nata­la­kati̠y. Hasta cala̠huá nata­li̠­kalh­ka­ma̠nán xta­chu­huí̠n Dios y niaj cati­ta­ka­lha­káx­matli hua̠ntu̠ naca̠­li̠­ma̠­peksi̠y xtla̠tcán huata nata­ka­lha­kax­mat­makán, ma̠squi Dios xca̠­la­ka­lha­mani̠t ca̠ma̠­lac­nu̠­nini̠t naca̠­lak­ma̠xtuy, xlacán caj nata­lak­makán y ni̠para tzinú cati­ta­ca̠c­ni̠­ná­nilh xli̠­hua̠k hua̠nti̠ tali̠­pa̠­huán Dios.  
\v 3 Xlacán ni̠para cha̠tum tícu cati­ta­la­ka­lhá­malh, y para tícu naca̠t­la­huaniy hua̠ntu̠ ni̠tlá̠n ni̠ cati­ta­ma̠­tzan­ke̠­ná­nilh, xa̠huachí xlacán lanca xaaksa­ni̠­naní̠n nata­huán, luu lanca ca̠la­ka­yá̠­calh nahuán y luu tlakaj nata­li̠lay xmac­nicán y lhu̠hua hua̠ntu̠ li̠xcáj­nit nata­li̠t­la­huay, luu lac­li̠xcáj­nit nata­li̠­ca­tzi̠y y ni̠ cati­taucxilh­pu­túlh hua̠ntu̠ tla̠n ta­scújut.  
\v 4 Hasta sac­stucán natzucuy la̠liak­ska­huinín nala̠­li̠­ta­la­kas­pit­ta̠yay y ni̠para tzinú cati­ta­la­ca­ma̠­xá­nalh, tlancaj naca̠­maklh­ca­tzi̠cán cumu la̠ ti̠ ni̠tu̠ ca̠tzan­ka̠niy, xa̠huachí caj luu xma̠nhuá nata­lak­tzaksay lácu nata­maka­pa̠­xu­huay xmac­nicán ni̠ xachuná cati­ta­lac­pú­tzalh lácu li̠huana̠ nata­li̠­pa̠­huán Dios.  
\v 5 Tama̠­ko̠lh cris­tianos ca̠la­kuá̠n nata­ma̠­si­yu­putún pi̠ luu tali̠­pa̠­huán Dios ma̠squi sta­lanca nata­li̠­ta­siyuy xli̠­hua̠k hua̠ntu̠ li̠xcáj­nit tat­la­huay pi̠ ni̠para tzinú tama­ca­ma̠x­qui̠­putún xla­ta­ma̠tcán Dios. 
\p Xli̠­hua̠k tama̠­ko̠lh cris­tianos hua̠nti̠ chuná tala­má̠­nalh huix ni̠ amigoj caca̠­ta̠la.  
\v 6 Hua­tuní̠n tama̠­ko̠lh lac­chix­cu­huí̠n hua̠nti̠ maka­pi­tzí̠n tali̠­taxtuy pi̠ luu tali̠­pa̠­huán Dios y taliakchu­hui̠nán xta­chu­huí̠n, y hasta taán tala­ka­pa­xia̠lhnán nac xchiccán a̠ma̠ko̠lh laka­hui­tiní̠n lac­chaján hua̠nti̠ tatit­la­huani̠t lhu̠hua tala̠­ka­lhí̠n nac xla­ta­ma̠tcán, y ma̠squi tali̠­li̠­pu­huán caj xpa̠­la­cata hua̠ntu̠ li̠xcáj­nit tatit­la­huani̠t niaj lay talak­makán hua̠ntu̠ tat­la­huay.  
\v 7 Uma̠­kó̠lh lac­chaján anka­lhi̠ná talac­pu­tza­má̠­nalh li̠huana̠ nata­ca­tzi̠y lácu luu aksti̠tum nata­la­tama̠y, pero niaj lay taaka­ta̠ksa xta­lu­lóktat Dios.  
\v 8 Pero nac­ca̠­hua­niyá̠n la̠ta xamaká̠n quilh­ta­macú xta­hui­lá̠­nalh cha̠tuy scu­hua­naní̠n hua̠nti̠ xca̠­hua­nicán Janes y Jam­bres, xlacán anka­lhi̠ná xta­huán pi̠ ni̠tlá̠n hua̠ntu̠ xma̠­si­yuma Moisés y xta­ma̠­lak­spu­tu­putún ma̠squi huá a̠má li̠ma̠­peksí̠n xta­lu­lóktat, pus na̠chuná chú tama̠­ko̠lh lac­chix­cu­huí̠n ni̠ tala­cas­quín nala­ka­pascán xta­lu­lóktat Dios, porque xlacán aya ca̠ma̠­lak­tzan­ke̠­ya̠­huani̠t xali̠xcáj­nit xta­la­ca­pa̠s­tac­nicán y niaj tali̠­pa̠­huán Dios.  
\v 9 Pero ni̠ luu maka̠s quilh­ta­macú cati­ta­ta­pá­lhi̠lh porque xli̠­hua̠k cris­tianos nata­ca­tzi̠y pi̠ caj taaksa­ni̠­na­má̠­nalh y ni̠tu̠ xta­ca­tzi̠ncán, na̠chuná naca̠ak­spulay cumu la̠ ca̠ak­spú­lalh a̠ma̠ko̠lh cha̠tiy scu­hua­naní̠n acxni̠ ni̠ tama̠t­lá̠n­ti̠lh hua̠ntu̠ xli̠­chu­hui̠­nama ko̠lu­tzí̠n Moisés. 
\s1 Aksti̠tum cali̠latáma̠lh Timoteo hua̠ntu̠ ma̠siyunicani̠t 
\p  
\v 10 Pero luu ca̠na cli̠­pa̠­xu­huay pi̠ aksti̠tum li̠lápa̠t hua̠ntu̠ aquit cli̠­ma̠­kalh­chu­hui̠­ni̠­ni̠tán chuná cumu la̠ aquit aksti̠tum cli̠­lama hua̠ntu̠ luu cca̠­najlay, xa̠hua lácu cca̠­pa̠x­qui̠y cris­tianos, chuná cumu la̠ qui­li̠­ca­mama hua̠ntu̠ aquit cli̠­tat­li­hueklha ma̠squi anka­lhi̠ná.  
\v 11 Quim­pu­tza­sta̠­la­má̠­calh y lhu̠hua hua̠ntu̠ qui­li̠­ma̠­pa̠­ti̠­ni̠cán cumu la̠ huix sta­lanca catzi̠ya lácu qui­ma̠­pa̠­ti̠­ní̠­calh nac xaca̠­chi­quí̠n Antioquía, Iconio y Listra, antá la̠n quin­ta­li̠­ka­má̠­nalh y hasta quin­ta­pu̠t­la­ká­le̠lh, pero acxni̠ chuná xquin­tla­hua­má̠­calh Quim­pu̠­chi­nacán qui­mak­tá̠­yalh y ni̠tu̠ quiak­spú­lalh.  
\v 12 Aquit tancs cuaniyá̠n pi̠ xli̠­hua̠k a̠ma̠ko̠lh cris­tianos hua̠nti̠ luu aka­tzi­yanca y aksti̠tum tala­ta­ma̠­putún porque tama­ca­ma̠x­qui̠ni̠t xla­ta­ma̠tcán Cristo Jesús, xli̠­ca̠na pi̠ lhu̠hua hua̠ntu̠ naca̠­li̠­ma̠­pa̠­ti̠­ni̠cán y naca̠­pu­tza­sta̠­lacán.  
\v 13 Pero la̠ta ámaj nahuán quilh­ta­macú xli̠­hua̠k a̠ma̠ko̠lh lac­li̠xcáj­nit lac­chix­cu­huí̠n a̠tzinuj tat­la̠­hua­le̠ni̠t nahuán porque chuná cumu la̠ xlacán taak­ska­hui­mi̠­na­má̠­nalh nahuán na̠chuná sac­stucán tataak­ska­hui­ta­ma̠­má̠­nalh y nata­lak­tzan­ka̠­ta̠yay. 
\p  
\v 14 Timoteo, pero hua̠ntu̠ huix mila­cata aksti̠tum calí̠s­cujti hua̠ntu̠ aya catzi̠ya pi̠ mili̠­ma̠­kan­táxti̠t, y hua̠ntu̠ li̠pa̠­huana pi̠ chuná lak­chá̠n, porque sta­lanca catzi̠ya tícu chuná tali̠­ma̠­kalh­chu­hui̠­ni̠­ni̠tán.  
\v 15 Xa̠huachí cala­ca­pá̠s­tacti pi̠ hasta acxni̠ actzu̠ kahuasa xuani̠­tacú tzu­cu­ni̠ta ma̠si­yu­ni­cana lácu huan Dios nac xli̠­kalh­ta­huaka, antá huí lacuán tas­tac­ya̠hu hua̠ntu̠ xta­la­ca­pa̠s­tacni Dios y huá tla̠n nali̠­lak­ma̠x­tuya mili̠s­tacni para aksti̠tum li̠pa̠­huana.  
\v 16 Porque xli̠­hua̠k hua̠ntu̠ tatzok­ta­hui­lani̠t nac li̠kalh­ta­huaka huá xta­la­ca­pa̠s­tacni Dios, huá ca̠ma̠­lac­pu­huá̠­ni̠lh cris­tianos pi̠ cata­tzo­kuíli̠lh y hua̠k aquinín quin­ca̠­li̠­ma­cuaniyá̠n la̠qui̠ naca­tzi̠­yá̠hu lácu tancs nama̠­si­yu­yá̠hu xta­la­ca­pa̠s­tacni Dios y lácu nama̠­tan­csa­yá̠hu xta­la­ca­pa̠s­tacni cha̠tum hua̠nti̠ taak­ska­huini̠t y ni̠ aksti̠tum li̠pa̠­huán Dios, y la̠qui̠ na̠ naca­tzi̠­yá̠hu naca̠­hua­ni­yá̠hu lácu xli̠­la­ta­ma̠tcán hua̠nti̠ taaktzan­ka̠­ta̠­ya­má̠­nalh nac xla­ta­ma̠tcán, xa̠huachí acxtum nala̠­li̠­ma̠­kalh­chu­hui̠­ni̠­yá̠hu la̠qui̠ aksti̠tum nala­ta­ma̠­yá̠hu uú nac ca̠quilh­ta­macú,  
\v 17 la̠qui̠ chuná xli̠­hua̠k hua̠nti̠ tat­la­hua­putún xta­scújut Dios nata­ka­lhi̠y li̠s­ka­lala xa̠hua tala­ca­pa̠s­tacni y chuná naca­tzi̠y lácu nama̠­kan­taxti̠y hua̠ntu̠ lacuán ta­scújut. 
\c 4  
\p  
\v 1 Nac xla­catí̠n Dios xa̠hua nac xla­catí̠n Cristo Jesús hua̠nti̠ namim­paray cumu la̠ cha̠tum rey la̠qui̠ naca̠­ma̠­ka­lha­pali̠y naca̠­ta̠t­la­huay cuenta xli̠­hua̠k hua̠nti̠ tala­má̠­nalh xas­tacná chuná cumu la̠ ti̠ aya tani̠ni̠t, aquit cli̠­ma̠­pek­si̠yá̠n  
\v 2 pi̠ anka­lhi̠ná caliakchu­huí̠­nanti xta­chu­huí̠n Dios, huix cali̠­chu­huí̠­nanti acxni̠ cris­tianos takax­mat­putún y asta ma̠squi acxni̠ xlacán ni̠ takax­mat­putún huix anka­lhi̠ná caca̠­li̠­ma̠­kalh­chu­hui̠ni. Caca̠­ma̠aka­ta̠ksni hua̠nti̠ nia̠ li̠huana̠ taaka­ta̠ksa, caca̠­ma̠uxca̠ni hua̠nti̠ tata­xlaj­uani̠­má̠­nalh nac xta­ca̠­naj­latcán, caca̠­huani lácu aksti̠tum xli̠­la­ta­ma̠tcán hua̠nti̠ talak­tzan­ka̠­ta̠­ya­putún nac xta­ca̠­naj­latcán, y ne̠c­xnicú caca̠­li̠t­la­kuanti.  
\v 3 Porque lak­cha̠ma quilh­ta­macú acxni̠ cris­tianos niaj cati­ta­kax­mat­pú­tulh hua̠ntu̠ xax­li̠­ca̠na xta­la­ca­pa̠s­tacni Dios huata xma̠n huá nata­pu­tzay hua̠ntu̠ a̠tzinú tala­kati̠y, hasta lhu̠hua cris­tianos nata­pu­tzay xak­chu­hui̠­nacán hua̠nti̠ naca̠­liakchu­hui̠­naniy hua̠ntu̠ xma̠n sac­stucán takax­mat­putún.  
\v 4 Xli̠­hua̠k xatlá̠n xta­la­ca­pa̠s­tacni Dios nata­lak­makán huata huá nata­ca̠­najlay cuen­tos hua̠ntu̠ ca̠li̠­chu­hui̠­nancán ma̠squi caj hua̠k xta­la­ca­pa̠s­tac­nicán cris­tianos.  
\v 5 Pero hua̠ntu̠ huix mila­cata, acxni̠ para túcuya̠ ta­scújut nat­la­huaya li̠huana̠ cala­ca­pá̠s­tacti para chuná lak­chá̠n la̠ tla­hua­pu­tuna, y acxni̠ lak­chiná̠n tapa̠tí̠n huix cata̠­yani y capa̠ti, pero chu­na­tiyá aksti̠tum caliakchu­huí̠­nanti xta­chu­huí̠n Cristo hua̠ntu̠ ma̠sta̠y lak­táxtut, xa̠huachí xma̠n huá cali̠­taaka­tzanke la̠ta li̠huana̠ nama̠­kan­tax­ti̠ya min­ta­scújut hua̠ntu̠ laka­ya̠­hua­ca­ni̠ta. 
\p  
\v 6 Pero hua̠ntu̠ aquit qui­la­cata, xta̠­chu­na­tiyá cli̠­ta­mak­xtekni̠t cumu la̠ aktum li̠la­ka­chix­cu­hui̠n hua̠ntu̠ nali̠­la­ka­chix­cu­hui̠cán Dios, chuná cuan porque aya tala­ca­tzu­hui̠ma quilh­ta­macú la̠ta naqui­mak­lhti̠cán qui­la­táma̠t y nacni̠y.  
\v 7 Pero aquit juerza ctla­hua­nini̠t la̠qui̠ nac­ta̠­yaniy nac qui­la­táma̠t y nac­ma̠­kan­tax­ti̠ko̠y hua̠ntu̠ Dios qui­li̠­lac­sacni̠t, luu xta̠­chuná qui̠­taxtuy cumu la̠ aktum takamá̠n anta­nícu la̠t­la­jacán, pero aya lak­cha̠ni̠t quilh­ta­macú nac­chá̠n anta­nícu qui­li̠­chá̠nat xuani̠t, luu ca̠na cpa̠­xu­huay pi̠ ne̠c­xnicú luu ctat­la­ji̠ni̠t y ni̠tu̠ clac­la­ta̠­yama huata cma̠­kan­tax­ti̠ni̠t hua̠ntu̠ Dios qui­ma̠­cuentaj­li̠ni̠t.  
\v 8 Ahuatá chú cma­ka­ka­lhi̠ma acxni̠ Quim­pu̠­chi­nacán naqui­ma̠x­qui̠­yá̠chá nac akapú̠n quin­co­rona o tas­káhu hua̠ntu̠ xlá ma̠lac­nu̠ni̠t naca̠­ma̠x­qui̠y xli̠­hua̠k hua̠nti̠ tama̠­kan­taxti̠y xta­chu­huí̠n. Y ni̠ caj xma̠n aquit caquin­ti­má̠x­qui̠lh hua̠ntu̠ ma̠lac­nu̠ni̠t, sinoque na̠ nata­mak­lhti̠nán hua̠ntu̠ naca̠­li̠­ma̠s­ka­hui̠cán xli̠­hua̠k a̠ma̠ko̠lh hua̠nti̠ takalh­ka­lhi̠­má̠­nalh acxni̠ namim­paray Quim­pu̠­chi­nacán porque tapa̠x­qui̠y. 
\s1 Pablo huan la̠ta lácu Dios makta̠yani̠t 
\p  
\v 9 Timoteo, luu xtlahua lanca li̠tlá̠n, aktum cacatzi juerza cat­la­huani la̠qui̠ pála naqui­lak­tana,  
\v 10 porque tamá Demas hua̠nti̠ caj xma̠n lakati̠y li̠pa̠­xúhu nali̠­la­tama̠y hua̠ntu̠ uú xala ca̠quilh­ta­macú aktum cátzi̠lh quiak­xtek­má­kalh y alh putzay hua̠ntu̠ lakati̠y nac xaca̠­chi­quí̠n Tesa­ló­nica; quin­ta̠­lacán Cres­cente ani̠t nac xapu̠­la­tama̠n Gali­cia, y Tito na̠ ani̠t nac Dal­macia.  
\v 11 Caj xma̠n sacstu Lucas quin­ta̠­ta­mak­xtekni̠t. Cat­lahua li̠tlá̠n capu­tzapi quin­ta̠­lacán Marcos y acxtum cata̠ta porque xli̠­ca̠na pi̠ la̠n naqui­li̠­ma­cuaniy y naqui­mak­ta̠yay nac quin­ta­scújut.  
\v 12 Porque a̠má quin­ta̠­lacán Tíquico aquit cma̠­la­ka­cha̠ni̠t nac Efeso.  
\v 13 Xa̠huachí acxni̠ natana nat­la­huaya li̠tlá̠n naqui­li̠­ta­niya capote hua̠ntu̠ cak­xte­kuili̠ni̠t cxa­ca̠­chi­quí̠n Troas nac xchic Carpo; na̠ nata̠­li̠­tana qui­libros, pero ni̠tu̠ tipa̠­tzan­ka̠ya luu xla­ca­squinca naca̠­li̠­tana a̠má lac­sta­caca xu̠hua anta­nícu ctzok­nuni̠t. 
\p  
\v 14 Xli̠­ca̠na pi̠ luu li̠pe̠cua qui­ma­ka­li̠­pu­huani̠t tamá Ale­jandro hua̠nti̠ ca̠li̠s­cuja ca̠t­la­huay pailas, porque lhu̠hua tu̠ ni̠tlá̠n quin­tla­hua­nini̠t. Pero Quim­pu̠­chi­nacán nama̠­xo­ko̠ni̠y la̠ta lácu mini̠niy napa̠­ti̠nán xpa̠­la­cata hua̠ntu̠ tla­huani̠t.  
\v 15 Huix luu ska­lalh cala­ta­pu̠li ni̠tu̠ tiak­ska­huiyá̠n, porque luu li̠pe̠cua la̠ta quin­ca̠­si̠­tzi̠­niyá̠n y ni̠ ma̠t­la̠nti̠y hua̠ntu̠ aquinín li̠chu­hui̠­na­ná̠hu xta­chu­huí̠n Cristo. 
\p  
\v 16 Acxni̠ huacu quin­ta­mac­xtú­calh nac pu̠la̠­chi̠n la̠qui̠ naquin­ta­ma̠­ka­lha­pali̠y ma̠pek­si̠­naní̠n ni̠para cha̠tum tícu xquin­kalh­mak­tá̠­yalh. Xuá Dios pi̠ ni̠ xca̠­li̠­ma̠­pa̠­ti̠­ni̠­chá̠n caj xpa̠­la­cata hua̠ntu̠ quin­tat­la­huá­nilh.  
\v 17 Pero ma̠squi ni̠ti̠ quin­kalh­mak­tá̠­yalh sola­mente Quim­pu̠­chi­nacán qui­mak­tá̠­yalh xlá qui­má̠x­qui̠lh li̠t­li­hueke la̠qui̠ tla̠n nac­liakchu­hui̠nán a̠má li̠pa̠­xúhu xta­chu­huí̠n Cristo hua̠ntu̠ ma̠sta̠y lak­táxtut, y xli̠­hua̠k a̠ma̠ko̠lh hua̠nti̠ ni̠ tala­ka­pasa xta­chu­huí̠n Dios aquit cca̠­ma̠­kax­má­talh la̠ta la̠cu xlá ca̠lak­ma̠x­tu­putún xli̠­hua̠k cris­tianos. Pero huá Dios qui­lak­má̠x­tulh la̠qui̠ ni̠ naquin­ta­huay tama̠­ko̠lh lac­li̠­pe̠­cuánit la̠páni̠t,  
\v 18 y chu­na­tiyá qui­mak­ta­kalhma nahuán la̠qui̠ tla̠n nac­chá̠n nac akapú̠n y naqui­ma̠x­qui̠y a̠má tapa̠­xu­huá̠n hua̠ntu̠ xlá ma̠lacnu̠y. ¡Caj xma̠n sacstu mini̠niy nama̠x­qui̠cán cá̠cni̠t cane̠c­xni­cahuá quilh­ta­macú! Chuná calalh, amén. 
\s1 Pablo a̠huatá ca̠xakatli̠lacá̠n ca̠najlaní̠n 
\p  
\v 19 Cat­lahua li̠tlá̠n li̠pa̠­xúhu caqui­la̠­xa­kat­li̠­ni­chá̠hu y hua̠ntu̠ qui­la­cata caca̠­ma­ca­ti­ya­pítit Prisca y Aquila, na̠chuná xli̠­hua̠k hua̠nti̠ tahui­lá̠­nalh nac xchic Ones­í­foro.  
\v 20 Erasto antá tamak­xtekchá nac Corinto, y Trófimo cumu xta̠­tatlay antá cmak­xtekchá nac Mileto.  
\v 21 Clac­pu­huán pi̠ pálaj tuncán xtat li̠huán nia̠ lak­chá̠n ca̠lonkni. Luu li̠pa̠­xúhu taxa­kat­li̠­la­ca̠­ma̠­chá̠n Eubulo, Pudente, Lino, Clau­dia y xli̠­hua̠k nata̠­laní̠n hua̠nti̠ uú xalaní̠n. 
\p  
\v 22 Cla­cas­quín pi̠ Quim­pu̠­chi­nacán Jesu­cristo acxtum cata̠­la­tamá̠n.