\id HEB - Tacana NT -Bolivia 2009 (DBL -2013) 
\h HEBREOS 
\toc1 Carta a los Hebreos 
\toc2 Hebreos 
\toc3 Heb 
\mt2 LA CARTA A LOS 
\mt1 HEBREOS 
\ip Ye quirica Cristo peje su jei putana judío cuana sa puji bahui puina. Piada cuana ye quirica Pablo ja deretaidha eputani biame, cuaja shanapa taji mahue aiya deretaidha. 
\ip Ye quirica su yani beta saida jabuetsuati: 
\ip 1. Cristo da Moisés, ángel cuana, judío cuana jacuatsasiati cuana ebia su aida. Equene jacuatsasiati, jairutsuati cuana pamapa pupeana, Cristo pueana su. 
\ip 2. Aimue saida mahue Cristo jepuiti quisa saida cuana id'aba putsu biame, neicha jacuatsasiati cuana tije ya puji d'eji su epu puji. Ebia su saida Cristo sa jabuetsuati cuana su daja hue ai pibapiba mahue epuderati puji. 
\ip Ye versículo cuana da ebia su saida quita ebuetsuati puji: 
\ili 2.3 
\ili 4.12–16 
\ili 6.10 
\ili 7.25 
\ili 9.22 
\ili 10.23 
\ili 11.1–40 
\ili 12.1,2,5,6 
\ili 13.8 
\c 1  
\s1 Diusu ja mesa quisa saida cuana ecuana quisatana mesa Ebacua Jesucristo jepuiti 
\p  
\v 1 Biahua tiempo Diusu ja profeta cuana jepuiti mesa quisa cuana pamapa nuati, tsapiapiati jabuetsuati neje ecuana sa tata chenu cuana quisataidha.  
\v 2 Jiahue mu mesa quisa saida cuana ecuana quisatana mesa Ebacua Jesucristo jepuiti. Diusu ja pamapa ai cuana ataidha mesa Ebacua Jesucristo jepuiti. Tueda pamapa ai cuana Diusu ja Jesucristo tiataidha tuseda puji cama papu puji.  
\v 3 Jesúcristo ja Tata Diusu Aida cristiano cuana ebametani. Tueda da ene quita Diusu, Tata Diusu neje tupupai putsu. Pamapa Diusu ja ai ataidha cuana tusa tucheda neje yasemetani. Tueda curusu su manuana ecuana sa jucha cuana dhipa putsu, ecuana d'eji su ya puji. Daja a putsu, cielo su tsuatibana Diusu sa bai eni bene yaniute puji, da jenetia tu neje tupupai ecuatsasia epu puji. 
\s1 Diusu sa Ebacua Jesucristo da ángel cuana ebia su aida 
\p  
\v 4 Jesucristo da pamapa ángel cuana ebia su aida, Diusu sa Ebacua putsu.  
\v 5 Aimue ai hora su biame Diusu ja quebata ángel biame uja ataidha mahue: 
\q1 Mida da quema ebacua. 
\q1 Beju ema da mique tata. 
\m Daja huecha aimue quebata ángel biame uja ataidha mahue: 
\q1 Ema tuseda puji tata epuani. 
\q1 Tueda quema puji ebacua epuani.  
\v 6 Diusu ja Jesús ye mundo su beitutana su, pamapa ángel cuana cuatsasiatana Jesús pamitsutsuata huecuana puji.  
\v 7 Diusu sa ángel cuana jepuiti uja derejiji yani Diusu sa quirica su: 
\q1 Diusu ja mesa ángel cuana beni, cuati utsu nime hus ataidha tu emebaja puji.  
\v 8 Diusu sa Ebacua Jesucristo da ene quita Diusu. Uja Diusu puidha Cristo jepuiti: 
\q1 Mida da Diusu. 
\q1 Mida da ecuatsasia epueni. 
\q1 Butsepi neje mida ecuatsasia equeni. 
\q1  
\v 9 Pamapa ai saida, butsepi cuana miqueda tsada eni. 
\q1 Pamapa ai madhada cuana miada jubida eduininibainia. 
\q1 Da putsu, yama mi pia cuana ebia su nimebeidaji yame. 
\p  
\v 10 Pia su uja Diusu puidha Cristo jepuiti: 
\q1 Mida da Echua Puji aida. 
\q1 Miada ye mundo aidha. 
\q1 Buepa di miada aidha. 
\q1  
\v 11 Beju tueda pamapa ai cuana etaitanapeta biame, mida daja hue yanienitiyu. 
\q1 Tueda pamapa ai cuana ejud'uji edhi nime eputa. 
\q1  
\v 12 Tueda ai cuana miada etanuja ejud'uji pu cua nime. 
\q1 Tueda ai cuana pamapa miada eturucapeyu etse pia ejud'uji neje jaturucati cua nime. 
\q1 Mida mu daja hue yanienitiyu. 
\q1 Aimue emanu mahue.  
\v 13 Daja huecha aimue Diusu ja quebata ángel uja ataidha mahue: 
\q1 Aniuteque quema bai eni bene ema neje tupupai ecuatsasia epu puji, yama mi neje jamajaitiji cuana pishitiame putsu, mique eme su eicha teje. 
\m Daja Diusu ja ataidha Cristo jepuiti bahui.  
\v 14 Pamapa ángel cuana da Diusu sa emebajaji cuana Diusu ja ebeitutani huecuana mundo su mesa d'eji su eputani cuana etsahua puji. 
\c 2  
\s1 Id'abaeni taji Diusu sa ai quisa saida cuana 
\p  
\v 1 Beju Cristo huaraji aida ebainia putsu, ecuaneseda ebia su id'abaeni taji tu jepuiti ai quisa saida cuana, ecuaneda tusa jabuetsuati butsepi cuana jenetia ejeitid'u mahue puji.  
\v 2 Biahua tiempo Diusu ja mesa ai quisa cuana cristiano cuana quisataidha ángel cuana jepuiti. Tueda quisa cuana da ene quita mimi Diusu ja bametaidha huecuana. Da su quebata ja ángel sa quisa aja mahue ataidha, Diusu ja tueda jubida matsetaidha.  
\v 3 Jiahue mu ebia su jubida quita Diusu ja Cristo jepuiti quisa saida id'abaja mahue yatani cuana ematsetayu. Equene Echua Puji Jesucristo ja quitaita tueda quisa saida cuana cristiano cuana quisapirutana. Da su beju tu id'abaji cuana ja di ecuanaju quisatana.  
\v 4 Diusu ja ai nimetiuda cuana atana cristiano cuana tueda quisa saida su jei paputa puji. Espíritu Santo di ecuanaju tiatana. Tuahueda mesa tsapiapiati jatiati ai cuana ecuanaju tiatana, cuaja mesa tsada batame, cristiano cuana tueda quisa saida ene quita ebame puji. 
\s1 Jesucristo da ecuana sa Ehuidusuji 
\p  
\v 5 Beju Diusu ja ye yahua eichacua yatayu. Aimue ángel cuana tueda yahua eichacua su ecuatsasia eputa mahue. Jesucristo bahui ecuatsasia epu.  
\v 6 Diusu sa quirica su uja derejiji epuani tueda ai cuana jepuiti: 
\q1 ¿Jucuaja su ni da Diusu ja cristiano cuana ebia su ibuneda ebatani? 
\q1 ¿Jucuaja puji tuna jepuiti ebia su epibajucuatiani? 
\q1  
\v 7 Angel cuana sa chidi puji cristiano cuana ichataidha quejucua tiempo puji. 
\q1 Beju daja biame, Diusu ja mesa dharejiji cristiano cuana huaraji aida, tucheda atana. 
\q1  
\v 8 Pamapa ajiji cuana tuna ema su ichaenitana. 
\m Diusu ja pamapa ai cuana emetse ichatana huecuana. Daja biame, jiahue mu aimue pamapa ai cuana tuna ema su yani mahue tsuhu ebatani.  
\v 9 Mepibatija Jesús peje su. Tueda da Diusu biame, ye mundo su deja bataji puana. Diusu ja tueda ángel cuana sa chidi puji ichatana quejucua tiempo puji. Diusu sa tsada puana Cristo pamanu puji pamapa cristiano cuana sa eturuca, ebia su ibuneda ebatani huecuana putsu. Jianhue beju Cristo eid'e yani cielo su. Tata Diusu ja Jesús pamapa pia cuana ebia su huaraji aida atana, curusu su manuana putsu. 
\p  
\v 10 Diusu ja pamapa ai cuana ataidha tuseda cama papu puji. Tuahueda pamapa ai cuana yasemetani. Tuseda tsada pamapa mesa ebacua dharejiji cuana, Cristo neje cielo su cama paanitita puji. Da putsu, Diusu ja Cristo curusu su sufri ametana. Da neje Diusu ja Cristo tuna D'eji su Aji atana.  
\v 11 Beju Jesucristo sa Tata Diusu da ecuaneseda di Tata Diusu epuani, Jesús ja ecuana tu peje su nimebutsepi atana putsu. Da putsu, Jesús aimue ebidhuani mahue ecuana neje edue yati puji.  
\v 12 Uja Diusu sa Ebacua Jesucristo puidha Diusu sa quirica derejiji su: 
\q1 Tata Diusu, ema quema edue cuana peje su mi jepuiti saida emimi. 
\q1 Tuna duju su satsu neje yama mi emitsutsua.  
\v 13 Uja Cristo pia puidha Diusu sa quirica su derejiji yani: 
\q1 Ema Tata Diusu peje su enimetucheati. 
\m Neicha uja Cristo pia puidha Diusu sa quirica su derejiji yani: 
\q1 Hue ema upia yani Diusu ja ema tiatana edue cuana neje. 
\q1  
\v 14 Beju Jesús da deja quitaji bataji puana ecuana nime epu puji. Daja bataji puana tueda equita neje emanu puji. Manu putsu, beju Ishahua sa tucheda apeenitana, Ishahua da emanu emetse puina biame.  
\v 15 Emanu puji ebia su iyuame eputani cuana Cristo ja d'eji su atana, tueda id'eibana putsu.  
\v 16 Bahue ecuaneda aimue Cristo pueana ángel cuana etsahua puji mahue. Abraham chenu sa familia jenetia deja bataji puana cristiano cuana bahui etsahua puji.  
\v 17 Daja etsahua huecuana puji Cristo sa bataji pu taji puana tuna nime deja quitame. Tuna nime pu putsu, beju tuna sa sacerdote puji puana tuneseda puji ibuneda neje Tata Diusu daja hue ebajadera puji. Deja equita pu putsu, Cristo quitaita curusu su jairutsuatiana Diusu peje su tuna sa jucha cuana echujetia puji.  
\v 18 Da su beju jiahue Cristo ja Ishahua ja epirubatani cristiano cuana saida tsahuata cua, pamapa ai sufrimiento, Ishahua sa japirubati je jaitianana putsu. 
\c 3  
\s1 Cristo da Moisés chenu ebia su huaraji aida 
\p  
\v 1 Da su edue cuana, micuaneda da Diusu sa cielo su puji tuseda puji ichaderajiji putsu. Mepibaenitique Jesucristo peje su. Tueda da Diusu sa quisaquisa puji ecuana peje su. Daja huecha tuahueda ecuaneseda puji Tata Diusu ebajatani, cuaja biahua tiempo sacerdote cuana sa echua puji aida ja israelita cristiano cuana sa jucha cuana sa puji Diusu bajataidha nime.  
\v 2-6 Pamapa Diusu sa jacuatsasiati tu tiatana cuana tuahueda apetana. Tueda da Tata Diusu sa Ebacua quitaita atasaida. Tueda da Diusu ecuatsasiati emetse saida. Beju ecuaneda da tusa dharejiji cuana. Tata Diusu ja Jesús pamapa ai cuana ametaidha. Daja hue ecuaneda Diusu sa ene quita dharejiji cuana epuderati, ahua ecuaneda tu peje su jubida janimetucheati putsu, emanu teje beidaji neje tu peje su enimeid'uaderati su. Biahua tiempo Moisés chenu ja Tata Diusu ja cuatsasiataidha cuana apetaidha. Moisés chenu da emebajaji hue puidha Diusu ecuatsasiati su. Saida neje Diusu mebajataidha. Tueda da cuaja ai cuana epu quisa puidha. Daja biame, Jesús mu da Moisés chenu ebia su aida, tueda da Diusu sa Ebacua putsu. 
\s1 Diusu ja mesa dharejiji cristiano cuana ejanahuameta 
\p  
\v 7 Da su edue cuana, merejatique. Espíritu Santo sa mimi cuana Diusu sa quirica su uja derejiji yani: 
\q1 Jiahue ahua micuaneda quema ai quisa saida cuana eid'aba su, atasaida mepuque tueda quisa saida cuana su. 
\q1  
\v 8 Be nimetadada mepuji ema peje su micuana sa tata chenu cuana putaidha nime, ema jei aja mahue ataidha huecuana putsu. 
\q1 D'anita yahua je jaitianaidha su, ema duininiametaidha huecuana, ema neje mimicuicuinataidha putsu. 
\q1  
\v 9 Dapia d'anita yahua su micuana sa tata chenu cuana ema neje janimetadadatitaidha pushi tunca mara puji, yama saida quinaidha huecuana biame. 
\q1  
\v 10 Da putsu, ema tuna neje jubida duininidha. 
\q1 Uja ema puidha tuna jepuiti: 
\q1 “Pamapa hora su jeitid'ujiji epuniuneti huecuana, quema edid'i saida je puniunetija mahue putsu.” 
\q1  
\v 11 Da putsu, ema tuna neje jubida duininidha. 
\q1 Ema Diusu bahue puidha quema janahua yahua su be panubita mahue huecuana puji. 
\p  
\v 12 Edue cuana, merejatique. Be quebata micuana duju su eid'e eni Diusu peje su muesumu tadada papu Diusu peje jenetia enetidera puji.  
\v 13 Beju pamapa tsine huamahuama menimetucheatique Diusu peje su d'eji yani tupu. Daja micuana sa pu taji jucha jepuiti muesumu tadada epu mahue puji.  
\v 14 Cuaja ecuaneda Diusu peje su jei pu putsu, saida janimetucheapirutiana nime, ahua daja hue emanu teje ecuaneseda Diusu peje su saida janimetucheaderati taji. Da su Cristo neje ecuaneda yanienitiyu cielo su. Dapia pamapa tusa ai cuana ecuaneseda di epueni. 
\p  
\v 15 Uja Diusu epuani mesa quirica su: 
\q1 Jiahue ahua micuaneda Diusu sa ai quisa saida cuana eid'aba su, atasaida mepuque tueda quisa saida cuana su. 
\q1 Be nimetadada mepuji micuana sa tata chenu cuana putaidha nime, ema jei aja mahue ataidha huecuana putsu. 
\q1 Daja putaidha putsu, ema duininiametaidha huecuana.  
\v 16 Pamapa Egipto yahua jenetia Moisés chenu ja huidusutaidha cristiano cuana Diusu neje mimicuicuinataidha. Diusu sa quisa saida cuana id'abataidha huecuana biame, tu neje jubida mimicuicuinataidha.  
\v 17 Pushi tunca mara Diusu juchaji cuana neje duininidha. Da putsu, d'anita yahua su manutaidha huecuana.  
\v 18 Diusu ja Diusu bahue ataidha aimue mesa janahua yahua su panubita mahue huecuana puji, mesa quisa saida cuana su jei puja mahue putaidha huecuana putsu.  
\v 19 Da su beju bahue ecuaneda mue nubi putaidha huecuana janahua yahua su, Diusu jei aja mahue ataidha huecuana putsu. 
\c 4  
\p  
\v 1 Beju jiahue teje Diusu ja pamapa ecuaneda eihuatani tu neje cielo su yanieniti puji. Da su merejatique piada piada micuaneda cielo mue teje ya, tusa quisa saida cuana su jei puja mahue, pu putsu.  
\v 2 Cuaja Diusu ja ecuana sa tata chenu cuana quisametaidha nime, jiahue ecuana mesa quisa saida cuana quisametana ecuaneda d'eji su epu puji. Tuneda mue janahua yahua su nubi putaidha, Diusu jei aja mahue ataidha huecuana putsu. Be tuna nime mepuji.  
\v 3 Diusu jei yatani cuana bahui cielo su enubita. Jei aja mahue cuana aimue enubita mahue. Uja Diusu puidha tuna jepuiti: 
\q1 Diusu bahue ema puidha quema janahua yahua su panubita huecuana mahue puji, ema duininiametaidha huecuana putsu. Beju daja Diusu ja ataidha huecuana, mundo ataidha jenetia tueda janahua yahua ataidha biame.  
\v 4 Sucuta tsine jenetia pamapa ai cuana Diusu ja apetaidha. Uja derejiji yani tueda ai cuana jepuiti: 
\q1 Siete tsine puji beju janahuaidha, pamapa ape putsu.  
\v 5-6 Tuseda tsada pamapa su tu neje cielo su pajanahuatita puji. Beju piada piada cuana enubitayu tusa janahua eti jude su. Tata chenu cuana ja Diusu sa quisa saida cuana jei aja mahue ataidha putsu, aimue enubita mahue. Uja Diusu puidha: 
\q1 Aimue quema janahua yahua su enubita huecuana mahue.  
\v 7 Beju jiahue di cristiano cuana eihuatani cielo su panubita puji. Uja echua puji David chenu puidha Diusu sa quirica su derejiji yani: 
\q1 Ahua jiahue miada Diusu ja mi eihuatani eid'abainia su, be muesumu tadada puji.  
\v 8 Beju biahua tiempo Josué chenu ja tata chenu cuana Diusu sa janahua yahua su huidusutaidha. Diusu mu pia janahua eti jude jepuiti mimiana. Tueda eti jude da cielo epuani.  
\v 9 Da su Diusu sa dharejiji cristiano cuana cielo su enubi puji enimeid'uatitani.  
\v 10 Cuaja Diusu janahuaidha mudu ape putsu nime, daja huecha tusa dharejiji cristiano cuana cielo su enubitayu ejanahua puji, tuna sa mudu ye mundo su ape putsu.  
\v 11 Da su Diusu sa quisa saida cuana daja hue jei paaderatija cielo su enubi puji. Be tata chenu cuana putaidha nime mepuja. Aimue Diusu sa janahua yahua su nubitaidha huecuana mahue, Diusu jei aja mahue putaidha huecuana putsu. 
\p  
\v 12 Beju Diusu sa quisa saida cuana da eid'e, tucheda, espada bubeta queuda nime. Cuaja espada equita su enubiani nime, daja Diusu sa quisa saida cuana enime su enubiani. Tueda quisa saida cuana ja pamapa cristiano cuana sa piba madhada cuana ebametani.  
\v 13 Diusu butse su mue ai biame rubuajiji. Tuahueda d'eji su cama ebapetani. Tu butse su pamapa cristiano cuana sa jajeutsuti taji. 
\s1 Jesús da ecuana sa sacerdote aida. Diusu ecuaneseda puji ebajatani 
\p  
\v 14 Diusu sa Ebacua Jesucristo da ecuana sa sacerdote aida. Beju cielo su putiana. Diusu butse su yani ecuaneseda puji Diusu ebaja puji. Da putsu, tu peje su ecuaneseda ebia su janimetucheati taji.  
\v 15 Tueda Jesucristo ja quitaita eshanapaenitani pamapa ecuana sa sufrimiento cuana, tueda di sufri puana putsu, ye mundo su quitaji anina su. Cuaja Ishahua ja ecuana epirubatani eshanapatani, tueda di Ishahua ja pirubatana putsu. Daja Ishahua ja pirubatana biame, aimue Jesús ja jucha atana mahue.  
\v 16 Da su beju pamapa muesumu neje Diusu peje su menariatija tuahueda ecuana meibunebataja puji, daja huecha ecuaneda tsahuataja epuani su, metsahuataja puji. 
\c 5  
\p  
\v 1 Beju sacerdote cuana sa echua puji aida deja cuana duju jenetia Diusu ja edharetani. Tuahueda Diusu ebajatani cristiano cuana sa puji. Ai eirutsuaji cuana Diusu peje su eirutsuatani. Animalo manuamejiji cuana altar bia su Diusu peje su eirutsuatani cristiano cuana sa jucha cuana sa puji.  
\v 2 Cristiano cuana paciencia neje ebatani, tueda tuna nime deja tucheda mahue epuani putsu.  
\v 3 Tueda da deja juchaji epuani putsu, mesa jucha quitaita cuana jepuiti equene Diusu peje su irutsua taji. Da su beju cristiano cuana sa jucha cuana jepuiti di Diusu peje su irutsuata cua. 
\p  
\v 4 Aimue detse aidhe deja biame mesa piba quitaita sacerdote aida puji tu mehua jaichati cua mahue. Diusu ja bahui sacerdote aida puji edharetani. Daja Diusu ja Aarón chenu dharetaidha.  
\v 5 Daja huecha Cristo. Aimue tusa piba quitaita sacerdote aida puji jaichatiana mahue. Diusu ja Cristo sacerdote aida ichatana. Uja Diusu puidha mesa quirica su: 
\q1 Mida da quema Ebacua. 
\q1 Beju ema da mique Tata.  
\v 6 Neicha uja Diusu pia puidha quirica su: 
\q1 Mida da sacerdote epueni Melquisedec puidha nime.  
\v 7 Beju Cristo ye mundo su puniunetina su, Diusu jubida bajatana tuana neje, mimi jubida neje Diusu ja tueda manujiji cuana duju jenetia panetianametayu puji. Da su Diusu ja id'aba putsu, Cristo netianametaibana, Diusu peje su jubida jamenajatiatiana putsu.  
\v 8 Cristo da Diusu sa Ebacua biame, Tata Diusu jei ya puji jabuetsuatiana. Diusu sa tsada puana Cristo sufri papu puji. Beju Cristo ja Diusu jei apetana, tueda sufrimiento cuana su jamenajatiatiana putsu.  
\v 9 Tueda ai sufrimiento cuana ape putsu, pamapa Cristo jei yatani cuana sa D'eji su Jaatiji puana tuna d'eji su yaeni puji.  
\v 10 Diusu ja Cristo sacerdote aida ichaenitana Melquisedec puidha nime. 
\s1 Rejada saida Diusu peje jenetia enetidera puji 
\p  
\v 11 Beju ebia su yama micuana quisaja tueda ai cuana jepuiti biame, cuaja quisa taji mahue ebainia micuaneda, cuaja shanapaeni taji mahue ebainia putsu.  
\v 12 Micuaneseda Diusu sa ai cuana su bahue eni pu taji dhahua biame, micuaneda yanana nime epuani. Micuaneseda pia cuana buetsua taji biame, quema puji jiahue teje micuana buetsua taji. Diusu sa atadhada jabuetsuati cuana su tupu mahue micuana sa piba cuana. Atasaida jabuetsuati cuana bahui eshanapainia.  
\v 13 Quebata ja Diusu sa atasaida jabuetsuati cuana bahui eshanapatani, tueda da tupu mahue Diusu sa atadhada jabuetsuati cuana eshanapa puji.  
\v 14 Quebata ja mu Diusu sa atadhada jabuetsuati cuana eshanapaenitani, tuahueda ebutsenetani ai madhada cuana, ai saida cuana neje, ai saida bahui su epuniuneti puji. 
\c 6  
\p  
\v 1-2 Da su beju ehui su meputique 
\p Cristo jepuiti jabuetsuati cuana su. Micuaneda Cristo jepuiti equene jabuetsuati cuana beju eshanapainia. Jiahue mebuetsuatique Cristo jepuiti atadhada jabuetsuati cuana. Be neicha equene jabuetsuati cuana meaji. Beju micuaneda Diusu peje su japibaturucatiana micuana sa ai puiti madhada jenetia. Micuaneda jei epuani Diusu ja manujiji cuana enetianametayu. Daja huecha tuahueda pamapa cristiano cuana ejuzgaenitayu jei epuani. Beju bahue micuaneda cuaja jarucuati taji Diusu emebaja puji, daja huecha eme echua bia su huana putsu, eibuneba puji. Tueda ai puiti cuana micuaneda eshanapaeninia.  
\v 3 Jiahue beju ehui su meputique Cristo jepuiti jabuetsuati atadhada cuana su. Tueda micuaneda ape cua Diusu sa jatsahuati neje. 
\p  
\v 4-5 Ahua quebata ja Cristo jepuiti quisa saida cuana eid'abatani su, daja huecha Diusu ja ai saida cuana etiatani, Espíritu Santo, Diusu sa mimi, mesa ai nimetiuda yatani cuana, mesa ecuatsasiati aida epusiu shanapa putsu biame, Cristo peje su jei puja mahue epuani su, aimue detse tueda d'eji su pu cua mahue, Diusu sa quisa saida cuana ichaderatana putsu.  
\v 6 Ahua daja epu su, da su Cristo curusu su neicha tata cua pu cua nime. Cristiano cuana butse su Cristo neje jashishati cua pu cua nime, tusa quisa saida cuana eichaderatani putsu.  
\v 7 Beju tueda ai cuana da Diusu ja nai edajajametani yahua cuana bia su nime. Te cuana saida jajaji eputani su, emetse cuana nimebeidaji eputani.  
\v 8 Jaja mahue, ahua aquid'a, id'ene madhada cama emurutani su, emetse cuana aimue nimebeidaji eputani mahue. Tueda aquid'a, id'ene madhada cuana da ed'ed'a puji bahui. Daja da Diusu sa quisa saida cuana eichaderatani cuana eputani. Diusu tsada mahue eputani huecuana biame, Diusu ja tuna bia su mesa jaibunebati cuana edajajametani nai nime. Daja biame, ahua daja hue Diusu tsada mahue epuderatani huecuana su, Diusu ja cuati castigo su beituta cua huecuana. 
\s1 Ecuaneda Diusu peje su nimetucheda epu, ahua tu peje su enimeid'uati su 
\p  
\v 9 Ibuneda edue cuana, yama micuana ye quirica su daja equisameinia biame, bahue ema aimue micuaneda Diusu sa jabuetsuati butsepi cuana daja eichadera mahue. Bahue ema micuaneda d'eji su epu.  
\v 10 Beju Diusu da butsepi. Aimue tueda micuana sa ai saida ajiji cuana esetata mahue. Micuaneda edue cuana ibuneda neje tsahuana aimue esetata mahue. Jiahue teje micuaneda edue cuana daja hue etsahuainia.  
\v 11 Beju quema tsada epuani pamapa micuaneda daja hue mepuderaniunetique emanu teje. Daja a putsu, Diusu neje cielo su yanienitiyu micuaneda bahue.  
\v 12 Be tunada mepuji Diusu sa ai cuana tije ya puji. Cuaja pia cuana paciencia, janimetucheati neje cielo su cuinatitana nime, daja mepuque. 
\p  
\v 13 Diusu ja mesa jamitsuti Abraham chenu tiataidha su, mesa ebani neje Diusu bahue puidha, aimue pia tu ebia su aida anidha mahue putsu.  
\v 14 Uja Diusu ja Abraham chenu ataidha: “Yama mi ebia su eibuneba. Mique ebacua cuana ebia su eyapacameyu.”  
\v 15 Da su Abraham chenu ja paciencia neje Diusu id'uataidha. Daja id'ua putsu, inatsutaidha Diusu ja tueda jamitsuti tiataidha ai cuana.  
\v 16 Cristiano cuana da Diusu bahue eputani pia ebani aida su mecuana sa jamitsuti chujeji papu puji. Da neje pamapa jacuicuinati cuana epupeni.  
\v 17 Daja Diusu ja Diusu bahue neje Abraham chenu mesa jamitsuti tiataidha. Daja Diusu ataidha Abraham sa epusiu ebacua cuana ja pashanapata puji Diusu ja mesa jamitsuti cuana yatayu.  
\v 18 Aimue Diusu bid'umimi puji mahue. Mesa jamitsuti Abraham chenu neje yatayu, tueda Diusu bahue puidha putsu. Da su ecuaneda Diusu peje su janimetucheati cua d'eji su epu puji, aimue detse Diusu bid'umimi pu cua mahue putsu. Pamapa mesa jamitsuti cuana ecuana neje beju yatayu.  
\v 19 Da su ecuaneda nimetucheda epuani, ecuana sa janimetucheati cuana Jesús peje su yani putsu, tuahueda ecuana cielo jenetia ebaenitani.  
\v 20 Dapia Diusu butse su ecuana equene putiana ecuaneseda Diusu ebaja puji, tueda da ecuana sa sacerdote aida eni putsu Melquisedec puidha nime. 
\c 7  
\s1 Melquisedec 
\p  
\v 1 Mepibaenitique Melquisedec chenu su. Tueda da Salem ejude sa echua puji aida puidha. Diusu aida sa sacerdote puidha. Biahua tiempo Abraham chenu, mesa soldado cuana neje echua puji madhada cuana manuamepe putsu, esiapatibeyu su, Melquisedec chenu ja tsutitaidha. “Diusu ja ibunebataque”, Abraham chenu ataidha.  
\v 2 Da su Abraham chenu ja echua puji madhada cuana jenetia jemitaidha ai cuana Melquisedec chenu piada diezmo tiataidha. Melquisedec chenu ebani da, “Salem ejude sa Echua Puji Nimebutsepi”, puidha. Tueda ejude su pamapa nimepijajajiji anitaidha.  
\v 3 Tata, cuara mahue bataji puidha. Cuaja shanapa taji mahue cuaja pupirume puidha. Cuaja shanapa taji mahue tusa bataji puidha tsine. Daja huecha cuaja manume puidha. Da su tueda da sacerdote epueni Diusu sa Ebacua Jesucristo nime. 
\p  
\v 4 Mepibaenitique Melquisedec chenu su. Tueda da deja aida puidha putsu, ecuana sa tata Abraham chenu ja echua puji madhada cuana jenetia jemitaidha ai cuana piada diezmo tiataidha.  
\v 5 Beju Moisés chenu ja judío cristiano cuana uja cuatsasiataidha: “Pamapa Levi chenu sa familia jenetia sacerdote cuana diezmo tia taji tuna etsahua puji.” Daja Moisés chenu ja cuatsasiataidha patiata huecuana, sacerdote cuana Abraham chenu sa familia cuana jenetia putaidha biame.  
\v 6 Beju Melquisedec chenu da aimue Levi chenu sa familia jenetia mahue biame, diezmo inatsutaidha. Da putsu, Melquisedec chenu ja Abraham chenu: “Diusu ja ibunebaque”, ataidha.  
\v 7 Daja Melquisedec chunu ja Abraham chenu ataidha tueda Abraham chenu ebia su aida puidha putsu, Diusu ja Abraham chenu bahui mesa jamitsuti tiataidha biame.  
\v 8 Sacerdote cuana da deja emanu cuana biame, diezmo einatsutani huecuana cristiano cuana peje jenetia. Melquisedec chenu ja mu deja emanu mahue nime putsu, diezmo inatsutaidha Abraham chenu jenetia.  
\v 9-10 Beju sacerdote cuana da Levi chenu sa familia jenetia. Tuneda diezmo cuana inatsutaidha cristiano cuana peje jenetia. Levi chenu da Abraham chenu jenetia bataji puidha. Da su Abraham chenu ja Melquisedec chenu diezmo tiataidha su, Levi chenu di tia cua pu cua nime diezmo tiame ataidha, bataji puji mahue biame, Abraham chenu da Levi chenu sa tata chenu puidha putsu. 
\p  
\v 11 Levi chenu, pamapa sacerdote cuana di Aarón chenu sa familia jenetia. Tuneda Moisés chenu sa jacuatsasiati cuana israelita cuana tiataidha. Aimue tueda sacerdote cuana ja jacuatsasiati neje cristiano cuana saida, nimebutsepi Diusu peje su ataidha mahue. Da putsu, pia sacerdote Melquisedec chenu nime jatsatidha cristiano cuana Diusu peje su saida, nimebutsepi yameta puji.  
\v 12 Beju sacerdote cuana eturucati su, jacuatsasiati cuana sa di jaturucati taji.  
\v 13-14 Equene sacerdote cuana da Levi chenu sa familia jenetia bahui dharejiji puina. Tuneda Diusu peje su irutsuataidha cristiano cuana sa puji. Jiahue mu Echua Puji Jesucristo ecuana sa sacerdote aida eichacua. Diusu ja tueda sacerdote ichatana, tueda Judá chenu sa familia jenetia biame. 
\p  
\v 15-16 Beju tueda da sacerdote aida Melquisedec chenu nime. Aimue Levi chenu sa familia jenetia mahue. Pamapa Levi chenu sa familia jenetia sacerdote cuana emanutani. Cristo mu aimue emanu mahue. Da putsu, Diusu ja tueda sacerdote aida ichataidha Melquisedec chenu nime.  
\v 17 Uja Diusu puidha Cristo jepuiti: 
\q1 Mida da sacerdote epueni Melquisedec puidha nime.  
\v 18 Da su Moisés chenu sa jacuatsasiati cuana Diusu ja apemetana, tueda jacuatsasiati cuana ja cristiano cuana cuaja d'eji su a taji mahue batana putsu.  
\v 19 Tueda jacuatsasiati cuana ja aimue aidhe biame nimebutsepi atana mahue. Tueda jacuatsasiati cuana sa eturuca jiahue mu ecuana sa ebia su saida janimeid'uati yani. Jiahue ecuaneda Diusu peje su enariati Jesucristo jepuiti. 
\p  
\v 20-21 Biahua tiempo sacerdote cuana aimue Diusu bahue neje ichajiji putaidha mahue. Tuneda sacerdote putaidha, Levi chenu sa familia jenetia hue putsu. Jiahue mu beju Diusu ja Cristo sacerdote ichatana Diusu bahue neje. Uja Diusu sa quirica su derejiji yani: 
\q1 Uja Diusu Diusu bahue puidha putsu, aimue detse aiya biame turucata cua mahue: 
\q1 “Mida da sacerdote epueni Melquisedec puidha nime.”  
\v 22 Daja Diusu Diusu bahue puidha putsu, Jesucristo ja ecuana Diusu peje su, nimebutsepi ata cua pia equene sacerdote ebia su saida.  
\v 23 Equene sacerdote cuana da tisutisu manutaidha. Da putsu, anitaidha jucuada.  
\v 24 Jiahue mu aimue daja mahue Jesús neje. Tueda emanu mahue putsu, aimue pia ja tueda eturucata mahue.  
\v 25 Da putsu, cristiano cuana d'eji su ata cua. Quebata cuana Cristo jepuiti Diusu peje su enariatita su, d'eji su eputa. Beju Cristo ja tuneseda puji Diusu pamapa hora su ebajatani, eid'e eni putsu. 
\p  
\v 26 Da su Jesucristo da ecuana tsana sacerdote aida. Tueda da nimebutsepi, ai madhada jucha mahue. Juchaji cuana peje jenetia ichaderajiji yani. Tueda cielo su yani pamapa ai cuana ebia su aida.  
\v 27 Aimue tueda pia equene sacerdote aida nime mahue. Aimue tuseda animalo cuana manuame taji puina mahue Diusu peje su eirutsua puji. Pia equene sacerdote cuana ja tuna sa jucha quitaita sa puji Diusu peje su manujiji animalo cuana equene irutsuataidha. Da su beju pia cristiano cuana sa jucha cuana sa puji di irutsuataidha huecuana. Jesús ja mu piada nuati hue Diusu peje su tueda quitaita jairutsuatiana pamapa cristiano cuana sa jucha cuana sa puji.  
\v 28 Equene sacerdote aida cuana da deja juchaji cuana putaidha biame, sacerdote puji ataidha huecuana cuaja Moisés sa jacuatsasiati batame. Da su Diusu ja jacuatsasiati cuana apemetana, mesa Ebacua Jesucristo Diusu bahue neje sacerdote aida, eichacua, butsepi ichaenitana putsu. 
\c 8  
\s1 Cristo da equene sacerdote cuana ebia su saida 
\p  
\v 1 Ibuneda edue cuana, meid'abaenique yama equisainia ai cuana. Beju ecuaneseda yani sacerdote aida cielo su Diusu sa bai eni bene yani.  
\v 2 Dapia cielo su Diusu ja ataidha iyuda ete su ecuaneseda puji Diusu ebajatani pamapa hora su.  
\v 3 Pamapa equene sacerdote cuana sa echua puji aida cuana Diusu peje su ai eirutsuaji cuana eirutsuatani. Da su beju Cristo sa di Diusu peje su irutsua taji puina.  
\v 4 Cristo ahua ye mundo su ani cua hue su, aimue detse sacerdote pu cua mahue, sacerdote cuana yani hue putsu. Tueda sacerdote cuana ja daja hue Diusu eirutsuaderatani, cuaja Moisés chenu sa jacuatsasiati puidha batame.  
\v 5 Tueda sacerdote sa Diusu peje su eirutsuaji mudu cuana da aimue ene quita mahue. Yahua su iyuda ete eti jude di aimue ene quita mahue. Beju ene quita iyuda ete eti jude da cielo su yani. Moisés ja yahua su iyuda ete eti jude aji mahue su, Diusu ja uja tueda cuatsasiataidha: “Yahua su di aque iyuda ete eti jude cielo su yani eti jude nime cuaja mi yama emata su bameana nime.”  
\v 6 Beju Cristo sa Diusu peje su eirutsuaji mudu cuana da ene quita, sacerdote cuana sa ebia su saida. Tuahueda equene sacerdote cuana ebia su saida Diusu ebajatani ecuaneseda puji. Diusu ja tueda sacerdote aida, ebia su saida ichatana mesa jamitsuti eichacua neje. Uja Diusu sa jamitsuti eichacua epuani: Diusu ja cristiano cuana sa jucha cuana eperdonatayu Cristo jepuiti. 
\p  
\v 7 Israelita cristiano cuana ja mecuana sa Diusu neje jamitsuti cuana aimue apetaidha mahue. Da putsu, Diusu ja pia jamitsuti eichacua tiataidha huecuana.  
\v 8 Diusu ja tueda israelita cristiano cuana nimebutsepi mahue bataidha. Uja tuna jepuiti Diusu puidha mesa quirica su: 
\q1 Jiahue pia jamitsuti eichacua yama etia israelita cristiano cuana. 
\q1  
\v 9 Tata chenu cuana neje puidha jamitsuti nime epu mahue. 
\q1 Tueda equene jamitsuti yama tiaidha huecuana, yama Egipto yahua jenetia jemicuinaidha huecuana su. 
\q1 Beju yama tiaidha jamitsuti cuana aimue apetaidha huecuana mahue. 
\q1 Da putsu, yama setana huecuana. 
\q1  
\v 10 Neicha jamitsuti eichacua yama etiayu huecuana. 
\q1 Da tiempo su yama quema jacuatsasiati cuana eshanapamepeyu huecuana. 
\q1 Da su ema da tuna sa Diusu epu. 
\q1 Daja huecha quema dharejiji cuana eputayu. 
\q1  
\v 11 Aimue tuneda cama huamahuama ema jepuiti jabuetsuati taji mahue, pamapa su ema eshanapaenita huecuana putsu. 
\q1 Pamapa ai eni mahue, aida cuana ja ema eshanapaenitayu. 
\q1  
\v 12 Beju yama tuna sa ai madhada cuana eperdonayu. 
\q1 Tuna sa jucha cuana dhipape putsu, aimue yama neicha epibayu mahue. 
\m  
\v 13 Daja Diusu puidha mesa jamitsuti eichacua jepuiti. Equene jamitsuti eturucata jamitsuti eichacua neje, equene jamitsuti da tupu saida mahue putsu. Beju ai tupu saida mahue cuana da yapetayu. 
\c 9  
\s1 Iyuda ete eti jude jepuiti quisa 
\p  
\v 1 Biahua tiempo equene sacerdote cuana ja iyuda ete eti jude ataidha dapia Diusu emitsutsua puji.  
\v 2-4 Tueda iyuda ete sa beta eti jude anidha. Equene eti jude da iyuda eti jude banime puidha. Dapia piada candelero, piada misha netidha. Misha bia su pan iyuda cuana anidha. Telón naja su piada altar oro jenetia ajiji netidha. Tueda altar da incienso tiume jude puidha. Beju telón tibeini su pia eti jude anidha. Tueda eti jude banime iyuda saida eti jude. Dapia Diusu sa cacha nime oro neje dichujiji anidha. Tueda dume su piada emeji netidha oro jenetia ajiji. Tueda emeji manaji netina. Tueda cacha nime dume su Aarón chenu sa huara di badeina. Tueda huara Diusu ja equene huid'atametaidha Egipto yahua sa echua puji butse su, israelita cristiano cuana tueda yahua su anitaidha su. Tueda cacha nime dume su tumu pachata detse derejiji anina.  
\v 5 Beju cacha nime bia je Diusu sa querubín ángel detse eimea netina. Tuatse sa enabai neje cacha nime biapenetaidha. Tueda cacha nime bia jenetia sacerdote cuana ja eirutsuaji animalo sa ami Diusu peje su irutsuataina. Da neje Diusu bajataina cristiano cuana sa jucha cuana sa puji. Da teje hue yama jiahue micuana equisa ye ai cuana jepuiti. 
\p  
\v 6 Beju daja hue yama micuana quisainiame yainia iyuda ete jepuiti. Sacerdote chenu cuana iyuda eti jude tisutisu nubitaina tuna sa Diusu sa tsapiapiati mudu cuana ya puji.  
\v 7 Beju iyuda saida eti jude su mu sacerdote cuana sa echua puji aida bahui nubina. Piada mara su piada nuati bahui nubina animalo sa ami neje Diusu peje su eirutsua puji mesa jucha sa puji, daja huecha cristiano cuana sa puji.  
\v 8 Beju Espíritu Santo ja ecuana bahue yameenitani tueda ai cuana jepuiti. Bahue ecuaneda da tiempo su cristiano cuana cuaja Diusu yani su iyuda saida eti jude su cuinati taji mahue jabatitaidha. Equene iyuda eti jude teje bahui mecuana sa nubi taji puina, cuaja mecuana sa puiti batame.  
\v 9 Beju tueda ai cuana daja puidha ecuaneda ebuetsuati puji. Tueda Diusu peje su irutsuataidha cuana da aimue tupu saida mahue puina cristiano cuana d'eji su ya puji. Daja hue irutsuataina huecuana biame, juchaji puderataidha huecuana.  
\v 10 Mecuana sa ai puiti bahui aderataina huecuana. Jana, eid'iji cuana irutsuataina huecuana. Daja huecha jarucuatitaina huecuana, cuaja mecuana sa puiti batame. Daja huecuana Diusu ja pamapa ai cuana Cristo jepuiti turucatana teje. 
\p  
\v 11 Jiahue beju Cristo pueana. Diusu sa jabuetsuati eichacua cuana ecuana sa buetsuatana. Jiahue tueda sacerdote aida cielo su iyuda ete su yani. Tueda cielo su iyuda ete da yahua su iyuda ete ebia su saida quita, aimue deja cuana sa jamuduti mahue putsu.  
\v 12 Cristo cielo su iyuda saida eti jude su nubiana. Aimue cabra, huaca deja janana cuana sa ami neje nubiana mahue. Tusa ami neje quitaita Diusu butse su piada nuati bahui nubiana tu eirutsua puji. Tueda ami neje ecuana d'eji su aenitana.  
\v 13 Equene sacerdote cuana ja huaca deja, cabra janana cuana sa ami neje janid'umadhatitaidha cuana biahuiretaina. Huaca epuna emud'u tiumepe putsu, sacerdote cuana ja etimu yahui neje huaru putsu, biahuiretaina. Daja a putsu, mecuana sa equita cuana saitiametaiyuina.  
\v 14 Beju jiahue mu Cristo sa ami ebia su tucheda ecuana esaitia puji. Espíritu Santo sa tucheda neje Cristo Diusu peje su jairutsuatiana, jucha mahue putsu. Tusa ami neje ecuana sa enime esaitiametani. Da su beju jiahue ecuaneda eid'e eni Diusu baja cua jacuatsasiati cuana aji mahue. 
\p  
\v 15 Cristo ja Diusu sa jamitsuti eichacua cuana ecuana sa puji apirutana. Diusu sa biahua tiempo dharejiji cuana beju cielo su cuinaenitita cua, cuaja Diusu ja jamitsuti eichacua tiatana batame. Jiahue Cristo manuana putsu, cielo su putita cua huecuana, mecuana sa Cristo manuji mahue su jucha ataidha cuana Diusu ja perdonatana putsu.  
\v 16-17 Beju etse emanuani su, etse sa ai cuana pia cuana sa puji eichajusiainia. Etse eid'e hue su, aimue detse aidhe biame etse sa ai cuana jametsenetita cua mahue. Daja da Cristo neje. Tusa manu jepuiti, Diusu ja ecuana mesa jaibunebati saida cuana etiatani.  
\v 18 Da putsu, equene sacerdote cuana ja animalo ami Diusu peje su irutsuataina tusa equene jamitsuti tuna neje chujeji papu puji.  
\v 19 Moisés chenu ja Diusu sa jacuatsasiati cuana israelita cristiano cuana tiataidha su, huaca deja, cabra janana sa ami yahui neje huaru putsu, Diusu sa quirica bia su, cristiano cuana bia su di biahuiretaidha. Huapese nime dherena hisopo equi echa huitsana su icha putsu, ami su tsabiataidha. Da neje biahuiretaidha.  
\v 20 Daja biahuire putsu, Moisés chenu ja cristiano cuana uja ataidha: “Ye ami Diusu ja mesa jamitsuti ecuana etiatani. Daja huecha micuana sa jamitsuti Diusu etiainia.”  
\v 21 Daja ape putsu, Moisés chenu ja iyuda ete eti jude ami yahui neje huarujiji biahuiretaidha. Daja huecha edume su ai cuana biahuiretaidha.  
\v 22 Cuaja ai puiti cuana batame, que chidi ai cuana ami neje esaitiamepecuetani. Ami d'uicha putsu bahui, Diusu ja jucha cuana perdonata cua. Ami d'uichajiji mahue su, aimue Diusu ja perdonata cua mahue. 
\s1 Cristo sa d'uichajiji ami neje jucha cuana Diusu ja edhipatani 
\p  
\v 23 Da su beju animalo cuana sa ami neje yahua su iyuda ete dume su ai cuana esaitiame puji tsada bataidha. Beju cielo su ene quita iyuda ete dume su ai cuana mu Cristo sa ami neje saitiajiji, tueda ami da animalo cuana sa ami ebia su saida quita putsu.  
\v 24 Aimue Cristo yahua su iyuda saida eti jude su nubiana mahue. Cielo su iyuda saida eti jude quitaita su tusa ami quitaita neje nubiana Tata Diusu yani su ecuana sa puji tu ebaja puji.  
\v 25-26 Yahua su iyuda saida eti jude su judío cuana sa sacerdote aida piada mara su piada nuati enubiani animalo sa ami Diusu peje su eirutsua puji. Daja biame, aimue Cristo sa equene jenetia quejucua nuati biame manu cua puina mahue. Tueda mu piada nuati hue jairutsuatiana Diusu peje su. Da su beju Diusu sa tsada hora cuinana su, Cristo piada nuati hue bataji puana ye mundo su emanu puji. Tueda quitaita curusu su piada nuati hue jairutsuatiana Diusu peje su ecuana sa jucha cuana sa puji.  
\v 27 Beju pamapa cristiano cuana sa piada nuati hue manu taji. Emanuta su, tuna sa ajiji ai cuana jepuiti Diusu ja equisabata huecuana.  
\v 28 Daja huecha Cristo piada nuati curusu su Diusu peje su jairutsuatiana ecuana sa jucha cuana edhipa puji. Da su beju neicha beta nuati puji epueicha tu eid'uatani cuana cielo su edusuyu puji, aimue jucha jepuiti neicha emanu puji mahue. 
\c 10  
\p  
\v 1 Diusu ja mesa jacuatsasiati cuana israelita cuana tiataidha Cristo epue jepuiti ai quisa saida cuana tuna ebuetsua puji bahui. Beju tueda jacuatsasiati cuana a putsu, aimue Cristo sa ai saida cuana einatsuta huecuana mahue. Ed'eji su tueda pamapa mara Diusu peje su jairutsuati cuana ja aimue detse Diusu peje su nimebutsepi ata cua huecuana mahue.  
\v 2 Ahua tueda jairutsuati cuana ja cristiano cuana sa jucha cuana dhipataidha su, ¿jucuaja puji ni da, da su pamapa mesa daja irutsuataidha huecuana? Ahua ene tueda jairutsuati cuana ja saitiataidha huecuana su, da su aimue detse juchaji jabatita cua puidha mahue.  
\v 3 Enei hue, tueda jairutsuati cuana ja pamapa mara cristiano cuana pibametaidha tuna sa jucha cuana jepuiti.  
\v 4 Beju animalo cuana sa ami ja aimue detse cristiano cuana sa jucha cuana dhipata cua mahue. 
\p  
\v 5 Da putsu, Cristo ja ye mundo su pueana su, uja Tata Diusu atana: 
\q1 Miqueda tsada mahue animalo manujiji jairutsuati cuana. 
\q1 Miada ema equita tiana mi peje su ema eirutsuati puji. 
\q1  
\v 6 Miqueda tsada mahue animalo cuana pamanuameta huecuana. 
\q1 Daja huecha animalo sa equita cuana patiumeta huecuana. 
\q1 Aimue tueda ai cuana tupu saida mahue jucha cuana edhipape puji. 
\q1  
\v 7 Tata Diusu, hue ema upia mique tsada ya puji. 
\q1 Da puji ema pueana. 
\q1 Daja, mique quirica su derejiji yani ema jepuiti. 
\m  
\v 8 Beju daja Cristo ja Tata Diusu ataidha. Diusu sa tsada mahue animalo manujiji jairutsuati cuana. Tsada mahue mesa animalo cuana sa equita tiumejiji jucha cuana edhipape puji. Moisés chenu sa jacuatsasiati cuana ja daja ebuetsuatani biame, aimue tueda ai cuana tupu saida jucha cuana edhipape puji.  
\v 9 Mepibaenique Cristo ja Tata Diusu uja ataidha: “Tata Diusu, hue ema upia mique tsada ya puji.” Equene animalo manujiji jairutsuati cuana beju apemetana. Mesa equita quitaita jairutsuati putsu, tueda animalo jairutsuati cuana apemetana.  
\v 10 Da su Diusu ja jiahue ecuana mesa dharejiji cuana yatani, Cristo ja Diusu sa tsada atana putsu. Piada nuati hue tusa equita quitaita Diusu peje su curusu su irutsuatana ecuana sa jucha cuana edhipa puji. 
\p  
\v 11 Pamapa sacerdote cuana ja pamapa tsine tueda animalo manujiji jairutsuati cuana atiyuatiyu ape bue mahue. Beju tueda jairutsuati cuana ja aimue jucha cuana edhipapetani mahue biame, daja hue atiyuatiyu eirutsuatani huecuana Diusu peje su.  
\v 12 Jesucristo mu piada nuati hue Diusu peje su jairutsuatiana cristiano cuana sa jucha cuana edhipape puji. Daja ape putsu, Tata Diusu sa bai eni bene cielo su aniuteeniana Diusu neje tupupai ecuatsasia epu puji.  
\v 13 Dapia eid'uatani Diusu ja tu neje jamajaitiji cuana pishitiame putsu, tusa eme su eichata teje.  
\v 14 Piada jairutsuati neje bahui Cristo ja mesa dharejiji cristiano cuana nimebutsepiaenitana.  
\v 15 Espíritu Santo ja tueda ecuana eshanapameenitani. Uja tueda puidha Diusu sa quirica derejiji yani su: 
\q1  
\v 16 Neicha jamitsuti eichacua yama etiayu huecuana. 
\q1 Da tiempo su yama quema jacuatsasiati cuana eshanapamepeyu huecuana. 
\q1  
\v 17 Beju tuna sa ai madhada cuana eperdonayu. 
\q1 Tuna sa jucha cuana dhipape putsu, aimue yama neicha epibayu mahue. 
\m  
\v 18 Da su Diusu ja cristiano cuana sa jucha cuana perdona putsu, aimue beju Diusu peje su irutsuaji cuana neicha irutsua taji pu cua mahue jucha cuana sa puji. 
\s1 Diusu peje su ecuaneseda janariati taji 
\p  
\v 19 Da putsu, edue cuana, Diusu yani iyuda saida eti jude su iyuame mahue neje ecuaneda nubi cua Cristo sa ami jepuiti.  
\v 20 Mesa equita ecuana sa jucha cuana jepuiti Diusu peje su curusu su jairutsuatiana putsu, ecuaneda Diusu yani huacuinati cua. Ecuaneseda Diusu peje su ecuinahu edid'i eichacua yani. Jiahue aimue aiya biame ecuana nahuebata cua Diusu peje su enariati puji, eid'e eni Jesús ja ecuana Diusu peje su ecuinati puji etsahuatani putsu.  
\v 21 Da su edue cuana, menariatija Diusu peje su, ecuana sa sacerdote aida Jesús ja ecuaneseda puji Tata Diusu ebajatani putsu.  
\v 22 Da su beju pamapa muesumu butsepi neje menariatija. Tu peje su jubida menimetucheatija. Daja ecuaneda Diusu nariati cua, Cristo ja mesa ami neje ecuana saitiatana putsu. Aimue beju ecuaneda juchaji jabati cua mahue. Cuaja equene cristiano cuana jarucuatitaidha Diusu mebajaji mahue su nime, daja Diusu ja ecuana Espíritu Santo tia putsu ecuana rucuatana tu saida emebaja puji.  
\v 23 Diusu ja mesa tiajiji jamitsuti eichacua cuana ecuana neje yapetayu putsu, be paichaderatija Cristo jepuiti jabuetsuati cuana pia jabuetsuati cuana tije ya puji.  
\v 24 Metsahuatija ecuaneda cama huamahuama ibuneda ebati puji, daja huecha ai saida cuana ya puji.  
\v 25 Da putsu, be mepuerijiji jadhitati hora cuana su, cuaja piada piada cuana eputani nime. Be tuna nime mepuji. Edhitatiani je, menimetucheametija huamahuama, Echua Puji Jesucristo tipeida epue putsu. 
\p  
\v 26 Ahua quebata ja Cristo sa jabuetsuati saida cuana shanapa putsu biame, ene quita piba neje eichaderata su, aimue detse tueda d'eji su pu cua mahue, Cristo sa jabuetsuati saida cuana ichaderatana putsu.  
\v 27 Diusu ja tueda cuati castigo su ebeituenitayu pamapa Diusu neje jamajaitiji cuana neje tupupai.  
\v 28 Mepibaenitique Moisés chenu sa jacuatsasiati cuana su. Da tiempo su ahua quebata ja tueda jacuatsasiati cuana jei aja mahue yatani su, beta ahua quimisha etuaquisaji yani su, da su beju tuseda manu taji puidha, tu neje aimue ai jaibunebati mahue putsu. Daja epuani Moisés chenu sa jacuatsasiati cuana su.  
\v 29 Daja huecha Diusu ja mesa Ebacua eichaderatani cuana jubida ecastigaenitayu, tusa ami ai puji saida mahue nime ebatani huecuana putsu. Espíritu Santo eichaderatani huecuana putsu, Diusu sa jaibunebati cuana di eichaderatani huecuana. Da putsu, Diusu ja cuati castigo jubida neje ecastigaenitayu huecuana. Tueda Cristo sa d'uichajiji ami jepuiti Diusu ja mesa dharejiji cuana d'eji su yatani, cuaja mesa jamitsuti eichacua cuana epuani batame.  
\v 30 Beju Diusu uja puidha mesa quirica derejiji yani su: “Quema puji bahui cristiano cuana castiga taji. Yama echujetia castigo neje.” Uja neicha mesa quirica su derejiji epuani: “Diusu ja mesa dharejiji cuana biame ejuzgatayu.”  
\v 31 ¡Aba, eid'e eni Diusu ja ecastigatani cuana! 
\p  
\v 32 Mepibaenitique micuaneda equene Diusu sa quisa saida cuana id'abapiruana su. Da tiempo su cristiano cuana ja micuana duininibapirutana. Micuana sufri apirutana huecuana biame, paciencia neje micuaneda tucheana.  
\v 33 Piada piada cuana micuana neje jashishatiana. Daja huecha micuana ichetana huecuana pamapa cristiano cuana butse su. Piada piada micuana aimue daja sufri ametana huecuana mahue biame, micuaneda pia sufri yametani edue cuana ba putsu, tsahuana huecuana.  
\v 34 Daja huecha terijiji cuana micuaneda tsahuana. Cristano madhada cuana ja micuana sa ai cuana mejemitana biame, beidaji neje micuaneda tucheana, micuana sa cielo su ebia su saida eni ai cuana aimue micuana aiya biame emetsita mahue, micuaneda bahue putsu.  
\v 35 Da su menimetucheaderatique Echua Puji peje su. Be meichaderaji tueda janimetucheati cuana. Ahua micuaneda daja hue enimetucheaderati su, cielo su micuaneda ecuinati.  
\v 36 Ahua daja hue enimetucheaderati su, micuaneda Diusu sa ai tsada cuana yape. Ahua daja micuaneda ya su, Diusu ja micuana pamapa mesa jamitsuti ai saida cuana etiatayu.  
\v 37 Beju uja derejiji yani Diusu sa quirica su: 
\q1 Hua chidi hue beju Diusu sa Jabeituti Deja epue puji. 
\q1 Aimue etsunuta mahue beju. 
\q1  
\v 38 Quebata ema peje su enimetucheati su, tueda yama saida ebatsu. 
\q1 Tusa ema peje su janimetucheati jepuiti eid'e yanieniti. 
\q1 Ahua cristiano madhada cuana iyuba putsu, ema peje su enimetuchearijiti su, da su aimue ema tu neje beidaji epu mahue. 
\m  
\v 39 Beju ecuaneda mu aimue daja mahue. Aimue ecuaneda Diusu sa castigo su eputita cuana nime mahue. Beju ecuaneda Diusu peje su enimetucheatiani putsu, d'eji su epueni. 
\c 11  
\s1 Cuaja tata chenu cuana Diusu peje su janimetucheatitaidha nime, daja ecuaneseda di janimetucheati taji 
\p  
\v 1 Bahue ecuaneda eid'uainia ai cuana Diusu ja ecuana etiatayu, tu peje su ecuaneda enimetucheatiani putsu. Tueda janimetucheati neje cielo jenetia ai bataji mahue cuana da ene quita ecuaneda eshanapaeninia.  
\v 2 Ecuana sa tata chenu cuana Diusu peje su janimetucheatitaidha putsu, Diusu ja tsabataidha huecuana. 
\p  
\v 3 Janimetucheati jepuiti bahue ecuaneda Diusu ja pamapa mundo ataidha mesa mimi tucheda jepuiti. Pamapa ai ajiji ecuaneda ebainia cuana, bataji mahue jenetia bataji puidha. 
\s1 Abel 
\p  
\v 4 Janimetucheati jepuiti Abel chenu sa Diusu peje su jairutsuati cuana Caín chenu sa ebia su saida quita puidha. Da putsu, Diusu ja Abel chenu tsabataidha. Tusa jairutsuati cuana jepuiti Diusu ja tueda nimebutsepi bataidha. Abel chenu da manujiji biame, cuaja tueda eid'e hora su Diusu peje su janimetucheatidha nime, daja jiahue ecuaneseda di janimetucheati taji. 
\s1 Enoc 
\p  
\v 5 Janimetucheati jepuiti Enoc chenu Diusu ja cielo su eid'e dusutsuatitaidha, Enoc chenu ja Diusu beidaji ametaidha putsu, ye mundo su anidha su. Beju cristiano cuana ja Enoc chenu mue tejeyu ataidha.  
\v 6 Ahua etse Diusu peje su aimue enimetucheatiani mahue su, aimue detse etse Diusu beidaji ame cua mahue. Ahua etse Diusu nariaja su, equene jei pu taji Diusu eid'e yani. Daja huecha jei pu taji Diusu ja tu echacutani cristiano cuana mesa ai saida cuana etiatayu. 
\s1 Noé 
\p  
\v 7 Biahua tiempo Diusu ja Noé chenu a neje ye mundo ebiaterita quisataidha. Ena neje ye mundo biateriji mahue su, Noé chenu janimetucheati jepuiti Diusu quisa su jei puidha. Beju Diusu jei ataidha. Barco aida ataidha mesa familia cuana d'eji su ya puji. Pamapa pia cristiano cuana huidipetaidha, jei puja mahue putaidha huecuana putsu. Beju Diusu ja Noé chenu nimebutsepi bataidha, tu peje su janimetucheatidha putsu. 
\s1 Abraham 
\p  
\v 8 Janimetucheati jepuiti Abraham chenu ja Diusu jei ataidha, Diusu ja tueda ihuatana su. Beju cuinanaidha mesa yahua jenetia Diusu ja etiata yahua su. Quepia tueda yahua shanapaji mahue cuinana puidha.  
\v 9 Aimue mesa ani jude anidha mahue biame, janimetucheati jepuiti tueda tiajiji yahua je Abraham chenu puniunetidha yahua emetse mahue nime. Da putsu, carpa ete su bahui anidha. Daja huecha Isaac, Jacob chenu detse puniunetidha. Diusu ja tuatseda Abraham chenu neje tupupai tueda yahua tiataidha.  
\v 10 Beju Abraham chenu da Diusu sa ejude cielo su eputi puji janimeid'uatidha. Tueda ejude da Diusu ja quitaita ataidha. 
\s1 Sara 
\p  
\v 11 Janimetucheati jepuiti Sara chenu punatia eni biame, bacuaji puidha, cuaja Diusu ja tueda quisataidha batame. Beju mesa piada ebacua bataji puidha, Sara ja Diusu sa jamitsuti jei puidha putsu.  
\v 12 Da su Abraham chenu ebia su edhi eni putsu, cuaja bacuaji pu taji mahue biame, bacuaji puidha. Da jenetia jiahue teje tusa familia cuana ebia su jajucuatitaidha. Atujai nime jucuadame epuani jiahue. Ena sa jutujutuji nime jucuadame epuani. Beju cuaja idadape taji mahue huecuana. 
\p  
\v 13 Pamapa tuneda Diusu peje su enimetucheatiani je, manupetaidha. Ye mundo emetse mahue cuana nime puniunetitaidha huecuana. Ye mundo su eid'e anitaidha su, aimue inatsupetaidha mahue Diusu sa jamitsuti ai saida cuana. Da putsu, ye mundo su mue inatsu ataidha huecuana biame, manutaidha huecuana Diusu peje su enimetucheatiani je, Diusu ja cielo su pamapa ai saida cuana etiatayu huecuana bahue putaidha putsu.  
\v 14 Tuneda daja puniuneti putsu, pia yahua saida chacutana jabametitaidha huecuana.  
\v 15 Jasiapatiyuja mahue tuna cuinanataidha yahua su.  
\v 16 Cielo bahui chacuenitaidha huecuana yanieniti puji. Da putsu, aimue Diusu bidhuidha mahue tuna sa Diusu epu puji. Piada ejude basetataidha tuneseda puji. 
\p  
\v 17 Abraham chenu Diusu peje su janimeid'uatidha, Diusu ja tueda abataidha su. Diusu ja Abraham tusa ebacua manuame putsu, pairutsuata cuatsasiataidha. Da su janimetucheati jepuiti Abraham chenu ja Isaac dusutaidha emanuame puji, Diusu peje su eirutsua puji, Isaac dueji bacuame epu jamitsuti Diusu ja tiataidha biame.  
\v 18 Uja Diusu ja Abraham chenu, “Isaac jepuiti mique familia ebia su ejucuati”, ataidha biame, Abraham chenu ja Diusu jei ataidha. Diusu ja, “Mique ebacua Isaac manuameque”, ataidha su.  
\v 19 Abraham chenu iyuame mahue puidha mesa ebacua Isaac emanuame puji, Diusu peje su jubida janimetucheatidha Diusu ja Isaac eid'emetayu putsu. Da su Abraham chenu ja mesa ebacua emanuame quitaita su, Diusu ja, “Be daja aji”, ataidha. Daja biame, Abraham ja Isaac manuametaidha pu cua nime. Daja huecha Abraham chenu ja mesa ebacua Isaac manujiji cuana duju jenetia neicha eid'e batsutaidha pu cua nime. 
\s1 Isaac, Jacob, Josué cuana 
\p  
\v 20 Janimetucheati jepuiti Isaac chenu ja Jacob, Esaú chenu detse ibunebataidha uja: “Cuaja ema Diusu ja mesa jamitsuti tiataidha nime, daja metseda di metiataque.”  
\v 21 Janimetucheati jepuiti Jacob chenu ja emanu quitaita su, José sa ebacua cuana ibunebataidha. Diusu mitsutsuataidha mesa eituneji su tud'inetiti putsu.  
\v 22 Janimetucheati jepuiti José chenu beju emanu quitaita su, “Israelita cristiano cuana Egipto yahua jenetia ecuinanatayu”, puidha. Cuatsasiataidha huecuana mesa etsau cuana padusuta huecuana Diusu ja jamitsuti tiataidha yahua su papapata huecuana puji. 
\s1 Moisés 
\p  
\v 23 Moisés chenu bataji puidha su, mesa tata detse ja janimetucheati jepuiti rubuataidha quimisha badi puji. Daja ataidha tse, Moisés yanana ebia su ania chidi bataji puidha putsu. Echua puji ja pamapa judío cuana sa yanana deja chidi cuana pamanuameta jacuatsasiataidha biame, aimue iyuba ataidha tse. Da putsu, rubuataidha tse Moisés yanana chidi.  
\v 24 Beju Moisés chenu deja puidha su, aimue beju echua puji sa utsecua puja mahue puidha.  
\v 25 Tsada mahue mesa puidha Egipto yahua su chipiluji huaraji epu puji, tueda ai cuana ja juchaji ameta cua putsu. Tuseda tsada puidha Diusu sa israelita cristiano cuana neje eduneti puji, tuna neje tupupai sufri epu puji bahui.  
\v 26 Tuseda puji ebia su saida Cristo jepuiti sufri epu puji. Aimue Egipto yahua su ai saida cuana mesa tsada mahue puidha, Diusu ja tueda mesa ai saida cuana bahui cielo su patiata puji putsu.  
\v 27 Janimetucheati jepuiti echua puji sa duinini mue iyuba. Nimetucheda eni puidha echua puji butse su, tu neje Diusu eneti tu etsahua puji bataidha putsu. 
\p  
\v 28 Janimetucheati jepuiti Moisés chenu ja israelita cristiano cuana cuatsasiataidha huisha janana pamanuameta huecuana puji. Daja a putsu, huisha sa ami neje ete eteriji queque papapita huecuana puji, cuaja Diusu ja cuatsasiataidha huecuana batame. Daja ataidha huecuana Diusu ja equene ebacua cuana pamapa ete je pamanuameta mahue puji. Beju egipcio cristiano cuana ja eteriji cuana je ami neje mue papi ataidha putsu, pamapa mecuana sa ete je equene ebacua cuana manutaidha. Da neje Moisés chenu pamapa israelita cristiano cuana neje Egipto yahua jenetia cuinanaidha.  
\v 29 Janimetucheati jepuiti Mar Dherena dusete je jejaitianataidha huecuana, Diusu ja dusetetepai muritametana putsu. Egipcio soldado chenu cuana daja huecha jaitianaja pudhaataidha biame, pamapa huidipetaidha huecuana, Diusu ja ena neicha dhitataibana putsu. 
\s1 Rahab 
\p  
\v 30 Janimetucheati jepuiti israelita chenu cuana ja Jericó ejude tumu jenetia ajiji edichu barereajiji baqui bauda dajajametaidha. Siete tsine Jericó ejude asebarereataidha huecuana. Asebarerea putsu, siete tsine su tueda tumu edichu baqui bauda dajajametaidha beju.  
\v 31 Jenimetucheati jepuiti Rahab epuna chenu chuamadhada ja israelita jacuadhitiji detse equene rubuataidha putsu, aimue israelita soldado cuana ja tueda manuametaidha mahue pamapa pia Jericó ejude su aniji cuana neje tupupai. 
\p  
\v 32 Beju yani hue jucuada pia ai cristiano cuana jepuiti equisa puji. Gedeón, Barac, Sansón, Jefté, David, Samuel chenu, profeta chenu cuana jepuiti yama quisa cua.  
\v 33 Janimetucheati jepuiti Diusu sa jatsahuati inatsutaidha huecuana. Pia cuana ejude cuana jaicheti putsu, jametsenetitaidha tueda ejude cuana. Saida jacuatsasiatitaidha huecuana. Diusu ja jamitsuti tiataidha inatsutaidha huecuana. Pia cuana león d'aida cuana sa rara su ichanubiametaidha huecuana biame, Diusu ja bianetiataidha huecuana.  
\v 34 Pia cuana utsu jubida su ichanubiametaidha huecuana biame, Diusu ja d'eji su ataidha huecuana. Pia cuana espada jenetia d'eji su ataidha huecuana. Tucheda mahue cuana tucheda saida putaibana. Pia cuana pamapa mecuana sa majai soldado cuana pishitiametaidha, Diusu ja tucheametaidha huecuana putsu.  
\v 35 Piada piada epuna ichenu cuana mecuana sa manujiji cuana eid'e jabatsutitaibana. Pia Diusu peje su enimetucheatitani cuana deja madhada cuana ja nedaneda a putsu, manuametaidha huecuana. Daja manume putaidha huecuana, Diusu peje su jei purijiji mahue pu putsu. Diusu peje su enimeid'uatiani je, manutaidha huecuana. Diusu ja neicha eid'e yameenitayu jaid'uatitaidha huecuana.  
\v 36 Pia Diusu peje su janimetucheatitaidha cuana deja madhada cuana ja shishataidha. Huacabiti neje ichetaidha huecuana. Risi putsu, ichanubiametaidha huecuana.  
\v 37 Pia cuana tumu neje maracataidha huecuana. Pia cuana beta eped'u su siquitaidha huecuana. Pia cuana espada neje chuarijitaidha huecuana. Pia cuana abataidha huecuana Diusu tije parijita puji. Pia cuana puri ametaidha huecuana, mecuana sa ete cuana jenetia jududuametaidha huecuana putsu. Jajud'utitaidha huecuana huisha, cabra biti neje. Nedaneda ajiji, bataichenu da puniunetitaidha huecuana.  
\v 38 D'anita yahua cuana emata cuana je puniunetitaidha huecuana. Emata ebu rara cuana je anitaidha huecuana. Beju tuneda da ye mundo su Diusu peje su jei puja mahue cristiano cuana ebia su saida quita putaidha.  
\v 39 Daja pamapa tuneda jubida abajiji putaidha biame, aimue Diusu peje su janimeid'uarijiti putaidha huecuana. Daja biame, Diusu ja etiata jamitsuti ai cuana mue inatsu ataidha huecuana.  
\v 40 Diusu sa tsada puidha paid'uata huecuana. Beju ecuaneda tuna neje cielo su tupupai duji yani su chu, Diusu ja pamapa ecuana mesa ai saida cuana etiatayu. 
\c 12  
\s1 Cuaja Jesucristo pachamaenitija 
\p  
\v 1 Da su jiahue mepibaenitique tueda dueji Diusu peje su janimetucheatitaidha tata chenu cuana peje su. Tuneda ebia su sufri putaidha biame, daja hue Diusu peje su jubida janimetucheaderatitaidha huecuana. Beju ecuaneseda di tuna nime pamapa ai jucha cuana ichadera taji jucha cuana enahuebameti mahue puji. Paciencia neje ehui su meputija Diusu sa mudu yadera puji.  
\v 2 Pachamaenideratija Jesucristo ejeitid'u mahue puji. Tuahueda ecuana ehuidusutani. Ecuana sa janimetucheati cuana Diusu peje su butsepi yametani. Bidhutada curusu su emanu puji biame, tuseda puji mue ai bidhutada puana dapia emanu puji. Tueda bahue puana curusu su manu putsu, ebia su beidaji neje neicha eid'e enetianayu. Jiahue beju Diusu sa bai eni bene yanieni da jenetia tu neje ecuatsasia epu puji. 
\p  
\v 3 Mepibaenitique Jesucristo peje su. Juchaji cuana ja tueda ebia su sufri ametana biame, aimue janimetuchedataitanametiana mahue. Daja huecha micuaneda di be menimetuchedataitanametiji.  
\v 4 Aimue aiya biame micuana amicuametana mahue, jucha cuana parijita huecuana quisaquisa puana su.  
\v 5 Be mesetaji micuaneda da Diusu sa ebacua cuana. Tuahueda micuana aba neje ebuetsuatani. Uja puana mesa quirica su derejiji yani: 
\q1 Ebacua, be tsada mahue quema jabutsepiati cuana mi peje su. 
\q1 Be janimetuchedataitanatiji, yama mi ebutsepiainia su. 
\q1  
\v 6 Beju yama ibuneda ebainia cuana bahui yama ebutsepiainia. 
\q1 Pamapa yama ebatsuinia ebacua cuana yama ebutsepiainia.  
\v 7 Da su micuaneseda tuchea taji, Diusu ja micuana ebutsepiatani su. Daja micuana yatani micuana sa saida puji, micuana ebacua nime ebatani putsu. ¿Aimue jia maida tata cuana ja tuna sa ebacua cuana ebutsepiatani mahue?  
\v 8 Ahua micuana Diusu ja ebutsepiatani mahue su, da su aimue micuaneda Diusu sa ebacua quitaita mahue.  
\v 9 Enei hue, ecuana sa tata cuana ecuana ebutsepiatani putsu, ecuaneda iyuda neje ebainia huecuana. Daja huecha ecuana sa Tata Diusu peje su ecuaneseda jamenajatiati taji ecuaneda eid'e yanieniti puji.  
\v 10 Ecuana sa tata cuana ja ecuaneda yanana tupu quejucua tiempo chidi puji ecuana ebutsepiatani, cuaja mecuana sa piba cuana epuani batame. Diusu ja mu ecuana ebutsepiatani ecuana sa saida quita puji ecuaneda tu nime jucha mahue papueni puji.  
\v 11 Enei hue, ecuaneseda tsada mahue jabutsepiati cuana, neda putsu. Daja biame, jabutsepiati cuana ejaitianani su, ecuaneda Diusu neje saida, nimebutsepi epuani. 
\s1 Rejada saida Diusu eichadera puji 
\p  
\v 12 Da su jiahue nimetucheda mepuque.  
\v 13 Saida, butsepi neje mepuniunetique pia cuana di micuana tije saida papuniunetita puji. Diusu peje su nimepishihue cuana micuana tije a putsu, enimetucheatita huecuana.  
\v 14 Saida mepuque pamapa cristiano cuana neje. Diusu nime jucha mahue mepuque. Jucha mahue cuana ja bahui Echua Puji Jesucristo ebata.  
\v 15 Merejatique. Be meichaderaji Diusu sa jaibunebati cuana. Be micuaneda cama huamahuama memadhatiji, jaduininibati putsu. Meperdonaque pamapa micuana neje ai madhada eputani cuana.  
\v 16 Be quebata epuna ahua deja jabutsenetiji mahue biame, paquinati. Daja huecha quebata jabutsenetiji epuna ahua deja be pia neje paquinati. Be tsada mahue mebaji Diusu sa ai iyuda cuana. Be Esaú chenu nime mepuji. Tuahueda mesa tata ja tu etiata ai cuana tsada mahue bataidha. Piada jana dhepe echuje neje turucataidha.  
\v 17 Da su chu beju neicha mesa tata chenu sa ai cuana inatsuja ataidha su, mesa tata ja cuaja tia taji mahue bataidha, pia ebacua jamitsuti tiataidha putsu. Esaú chenu ebia su janebatidha biame, cuaja inatsu tayuji mahue bataidha. 
\p  
\v 18 Biahua tiempo israelita cristiano chenu cuana Diusu netidha emata senida butse su anidha. Tueda emata jenetia Diusu ja mesa jacuatsasiati cuana tiataidha huecuana. Emata jenetia utsu jubida cuinanaidha. Apuda eni, judu padha, beni nime jubida anidha.  
\v 19-20 Da su pututu etsui jubida id'abataidha huecuana. Diusu ja mitsutaidha huecuana mimi jubida neje. Emata pad'apabata huecuana mahue ataidha huecuana. Cristiano ja animalo ja emata etidhita su, tumu ahua, lanza neje pamanuameta huecuana. Da su Diusu ebia su bajataidha huecuana pamimiriji, mesa jacuatsasiati etsui jubida iyubataidha huecuana putsu.  
\v 21 Beju tueda ai cuana da ebia su iyuda puidha putsu, Moisés chenu biame riariaidha, ebia su iyuame pu putsu. Beju tueda ai iyuda puidha cuana neje jiahue micuaneseda ai biame a taji mahue. Micuaneda mu aimue iyuda neje Diusu enariainia mahue cuaja israelita chenu cuana ja tueda yahua su emata senida nariame ataidha nime. 
\p  
\v 22 Micuaneda eid'e eni Diusu sa ejude Jerusalén banime cielo su enariatiani. Daja huecha tusa emata saida Sión banime cielo su enariatiani. Dapia dueji ángel cuana ja Diusu emitsutsuatani.  
\v 23 Micuaneda da Diusu sa dharejiji ebacua cuana. Pamapa mesa dharejiji cuana sa ebani cuana mesa cielo su yani quirica su derejiji yani. Diusu ebaji saida micuaneda enariainia. Tu peje su jei epuani je manutana cuana sa enid'u cuana cielo su micuaneda enariainia. Diusu ja nimebutsepi atana cuana sa enid'u cuana enariainia.  
\v 24 Micuaneda Jesús quitaita enariainia. Tuahueda Tata Diusu ebajatani ecuaneseda puji, cuaja Diusu sa jamitsuti eichacua epuani batame. Micuaneda tusa ami d'uichajiji enariainia. Tueda ami jepuiti Diusu ja micuana eperdonatani. Biahua tiempo Diusu Caín chenu neje eturuca puidha, tuahueda mesa edue Abel chenu manuametaidha putsu. Beju jiahue aimue Diusu cristiano cuana neje eturuca epu mahue, mesa Ebacua Jesús manuametana huecuana biame. 
\p  
\v 25 Da putsu, merejatique. Be meichaderaji Diusu sa jiahue equisatani ai cuana. Mepibaenique ecuana sa tata chenu cuana. Diusu ja ye jubida quisataidha huecuana, ye mundo su anidha huecuana su. Manuametaidha huecuana, mesa quisa saida cuana id'abaja mahue ataidha huecuana putsu. Beju jiahue Diusu ja ecuana cielo jenetia mesa quisa saida cuana equisatani. Tata chenu cuana ebia su madhada hue ecuaneseda puji epu, ahua ecuaneda tueda cielo jenetia quisa saida cuana eichadera su.  
\v 26 Biahua tiempo Diusu ja yahua riariametaidha mesa etsui neje. Beju Diusu uja puidha mesa quirica su derejiji yani: “Neicha yama eriariame yahua. Aimue yahua bahui mahue. Cielo di yama eriariame.”  
\v 27 Beju tueda mimi derejiji yani ja ecuana eshanapametani Diusu ja pamapa mesa jaati ai cuana etaitanamepeta, riariame putsu. Daja biame, tu ecuatsasiati bahui yanienitiyu.  
\v 28 Aimue quetsunu su biame etiatanaeni mahue. Da su Diusu diusulupai ecuaneseda a taji tuahueda tu ecuatsasiati etaitanaeni mahue su, ecuana ichatana putsu. Iyuda neje ecuaneseda Diusu mebaja taji tueda beidaji yame puji.  
\v 29 Daja iyuda neje ecuaneseda Diusu mebaja taji, tueda da cuati utsu ja pamapa ai cuana etiumepetani nime putsu. 
\c 13  
\s1 Cuaja Diusu beidaji ame taji 
\p  
\v 1 Edue cuana, be ibuneda mebarijitiji micuaneda cama huamahuama.  
\v 2 Mebatsuque saida neje perepereji cuana micuana sa ete cuana su. Mepibaenique, piada piada cuana ja ángel cuana batsutana ai pibaiti mahue, tueda ángel cuana deja cuana nime batame putsu. 
\p  
\v 3 Mepibaenique Cristo jepuiti terijiji yanita cuana, micuaneda quitaita tuna neje tupupai terijiji ani cua pu cua nime. Metsahuaque Cristo jepuiti nedaneda yametitani cuana, tuna nime micuaneda di daja huecha nedaneda jaameti cua putsu. 
\p  
\v 4 Be mebaseatiji ebutse cuana neje. Be pia neje mequinatiji. Daja yatani cuana Diusu ja jubida ejuzgatayu. 
\p  
\v 5 Be ebia su quita tsada chipilu mebaji. Beidaji mepuque mecuana sa ai chidi cuana neje, Diusu uja puidha putsu: “Ai hora su biame yama mi enetiajusia mahue.”  
\v 6 Da su beju ecuaneda jubida neje uja mimi cua: 
\p Echua Puji ja ema etsahuatani putsu, aimue yama aidhe biame eiyuba mahue. 
\p  
\v 7 Mepibaenitique micuana Diusu jepuiti buetsuatana cuana su. Mepibaenitique tuna sa ai puiti saida cuana su. Cuaja tuneda Cristo peje su janimetucheati putsu, puniunetitana nime, daja huecha micuaneseda pu taji. 
\p  
\v 8 Jesucristo da aimue eturucati mahue. Cuaja epuani nime, daja hue tueda epueni.  
\v 9 Daja huecha mesa jabuetsuati cuana aimue eturucati mahue. Da putsu, be pia tsapiapiati jabuetsuati cuana tije meaji. Beju aimue micuaneda Diusu peje su nimetucheda epu mahue, pia tsapiapiati ai puiti cuana a putsu. Tueda ai puiti aji cuana ja aimue detse Diusu shanapata cua mahue. Diusu ja mu ecuana tu peje su nimetucheda yatani mesa jaibunebati jepuiti bahui. 
\p  
\v 10 Jesucristo da pamapa altar bia su manuametaidha animalo cuana ebia su saida quita Diusu peje su eirutsua puji. Equene sacerdote cuana sa mue ai chidi biame a taji Cristo sa jairutsuati neje, jiahue teje daja hue Diusu peje su animalo cuana eirutsuaderatani huecuana putsu yahua su ete iyuda eti jude su.  
\v 11 Beju sacerdote aida ja animalo cuana sa ami edusutani iyuda saida eti jude su Diusu peje su eirutsua puji cristiano cuana sa jucha cuana jepuiti. Tueda animalo cuana sa ami iyuda saida eti jude su edusutani biame, equita cuana erere tipe su etiumepetani.  
\v 12 Daja huecha Jescristo Jerusalén ejude tipe su curusu su manuana, cristiano cuana tusa ami jepuiti nimebutsepi paputa puji.  
\v 13 Da su Jesucristo neje tupupai meputija tusa bidhu sufri ya puji.  
\v 14 Beju ye mundo su aimue piada ejude biame yanieniti mahue. Ecuaneda Diusu sa ejude epusiu bahui eid'uainia.  
\v 15 Da putsu, ecuaneseda daja hue Diusu mitsutsuadera taji Jesucristo jepuiti. Ecuana sa jamitsutsuati da Diusu peje su eirutsuaji papu puji. Tusa ebani jepuiti saida memimija.  
\v 16 Be mesetaji ai saida cuana ya puji pia cuana sa saida puji. Mesajatiatique micuana sa ai cuana tsahuataja eputani cuana. Daja a putsu, Diusu beidaji yame. 
\p  
\v 17 Atasaida mepuque micuana sa ehuidusuji cuana neje. Tuna sa jacuatsasiati cuana ema su meanique, Diusu ja ichatana huecuana putsu, micuana Diusu peje su saida mehuidusutaque huecuana puji. Beju tuneseda jeutsu taji Diusu cuaja micuana huidusutana saida, ahua mahue. Beidaji meameque huecuana, tuna sa jacuatsasiati cuana a putsu. Ahua atasaida mahue micuaneda epu su, pamapa ai atasaida mahue epu tuneseda puji. Da su beju tueda da saida mahue epu micuana sa saida puji. 
\p  
\v 18 Ecuanaju sa enime cuana butsepi Diusu butse su. Daja hue ecuanaju puderatija.  
\v 19 Da su Diusu jubida mebajaque ecuanaju sa puji, ecuanaju pamapa ai su butsepi epu puji. Daja huecha mebajaque tuahueda d'eji patiata ema micuana peje su neicha tipeida eputi puji. 
\s1 Tije quisa cuana 
\p  
\v 20 Diusu ecuana sa Echua puji Jesucristo manujiji cuana duju jenetia netianametaibana ja menimepijajametaque. Netianaibana putsu, Jesucristo da ecuana sa Huisha Quinaji Nime epuani. Tusa ami d'uichajiji jepuiti Diusu ja cristiano cuana d'eji su yaenitani, cuaja mesa jamitsuti eichacua batame.  
\v 21 Tuahueda pamapa ai su saida, nimebutsepi meataque. Metsahuataque mesa ai saida cuana bahui meaque puji Jesucristo jepuiti. Tueda da Diusu beidaji yametani. ¡Gloria Jesucristo papueni! Daja papu. 
\p  
\v 22 Edue cuana, ye quirica chidi yama micuana etiameinia. Yama micuana jubida ebajainia paciencia neje meid'abaenique quema quisa cuana.  
\v 23 Bahue mepuque ecuana sa edue Timoteo d'eji su. Aimue terijiji mahue beju. Ahua tueda ema peje su tipeida ecuina su, ema tu neje micuana peje su eputiyu. 
\p  
\v 24 Pamapa edue cuana, mecuana sa ehuidusuji cuana yama emitsuameinia. Italia yahua su aniji edue cuana ja di micuana emitsuametani. 
\p  
\v 25 Diusu ja meibunebataque. Daja papu.