\id 2CO - Tacana NT -Bolivia 2009 (DBL -2013) \h 2 CORINTIOS \toc1 Segunda Carta a los Corintios \toc2 2 Corintios \toc3 2 Co \mt2 SEGUNDA CARTA DEL APOSTOL SAN PABLO A LOS \mt1 CORINTIOS \ip Beta puji Corintios quirica su Pablo ja dharejiji edue cuana sa puji neicha deretaidha ai enime cuana jepuiti. Daja huecha tusa sufrimiento cuana neje Cristo ja mesa tucheda bametana Pablo ja deretaidha. \ip Ye versiculo cuana da ebia su saida quita ebuetsuati puji: \ili 2.14 \ili 3.5 \ili 6.14 \ili 8.9 \ili 9.6,7 \ili 12.7–9 \c 1 \s1 Pablo ja Corinto ejude su aniji edue cuana quirica tiametana \p \v 1 Ema da Pablo. Diusu ja ema ichatana \p Jesucristo sa apóstol epu puji. Mesa beitujiji quisaquisa puji da ema. Hue ema upia yani edue Timoteo neje. Tu neje yama ye quirica ebeituinia Corinto ejude su aniji Diusu sa dharejiji cuana peje su. Pamapa Acaya yahua su aniji Diusu sa dharejiji cuana peje su di ye quirica yama ebeituinia. \v 2 Ecuana sa Tata Diusu, Echua Puji Jesucristo detse ja meibunebataque. Menimepijajametaque tse. \s1 Pablo sufri puana \p \v 3 Ecuana sa Echua Puji Jesucristo sa Tata Diusu pamitsutsuatija, tuahueda ecuana pamapa hora su ebia su enimetucheametani putsu. \v 4 Ahua ecuaneda sufri epuani su, Diusu ja ecuana enimetucheametani. Da su ecuaneseda pia sufri eputani cuana nimetucheame taji, cuaja Diusu ja ecuana enimetucheametani nime. \v 5 Beju ecuaneda Cristo jepuiti sufri epu su, Diusu ja ecuana daja huecha Cristo jepuiti enimetucheameta. \v 6 Yama micuana saida tsahua cua, ema ebia su sufri pu bahue putsu. Quema sufrimiento cuana da micuaneseda puji beju saida micuaneda d'eji su epu puji. Cuaja yama tueda sufrimiento cuana etucheainia nime micuaneda tuchea cua paciencia neje. Diusu ja ema enimetucheametani putsu, yama micuana tucheame cua. \v 7 Bahue ema micuaneda nimetucheda epu Cristo peje su. Ahua micuaneda Cristo jepuiti sufri epu su, Diusu ja micuana ebia su enimetucheametayu. \p \v 8 Edue cuana, bahue mepuque, ema ebia su sufri puana Cristo jepuiti Asia yahua su, ema anina su. Cuaja tuchea taji mahue putsu, beju ema manucueana. \v 9 Emanuame puji deja nime ema jabatiana. Tueda enime iyuda cuana ja ema manujiji cuana id'emeyuji Diusu peje su ebia su jubida nimetucheametana. Aimue ema tucheda su mahue. \v 10 Beju Diusu ja mu ema d'eji su atana tueda ai enime iyuda cuana jenetia. Daja hue ema d'eji aderame yatani. Tu peje su quema janimeid'uati cuana ichana tuahueda ema daja hue yaderata puji. \v 11 Daja Diusu ja ema yatayu, ahua micuaneda quema puji tueda ebaja su. Pia edue cuana di quema puji pabajata Diusu. Daja a putsu, diusulupai Tata Diusu yatayu huecuana Diusu ja ema etsahuatayu putsu. \s1 Pablo Corinto ejude su eputi puji tsunutana \p \v 12 Ema nimebeidaji, beju ema saida, butsepi micuana duju su puniunetiana putsu. Aimue ema daja saida micuana duju su puniuneti quema tucheda neje mahue. Diusu ja ema tsahuatana daja saida micuana duju su epuniuneti puji. \v 13 Yama micuana saida, butsepi quisana quema quirica cuana su micuaneda quema piba cuana saida eshanapa puji. Tsada quema micuaneda pamapa tueda ai cuana eshanapape. \v 14 Aimue micuaneda ema eshanapaeninia mahue tsuhu biame, Echua Puji Jesucristo epue su, micuaneda ema jepuiti beidaji epu. Daja huecha da tsine su ya di micuana jepuiti beidaji epu. \p \v 15 Da putsu, yama micuana beta nuati peretija adhaana. \v 16 Equene yama micuana perehuananaja adhaana, Macedonia yahua su epuhu je. Da je pubeyu neicha hue perehuananaja adhaana micuaneda ema etsahua puji, Judea yahua su ema micuaneda saida ebeitu puji. \v 17 Be ema beta pibaji pepe hue mepuji, micuana peje su mue cuinati putsu. Mue ema cuinati micuana peje su aimue ema bid'umimi puji su mahue. Aimue yama quema ai cuana yainia mahue, Diusu shanapaji mahue cuana ja yatani nime. Ema mu butsepi emimiani. \v 18 Diusu bahue aimue ema beta pibaji mahue. \v 19 Aimue Diusu sa Ebacua Jesucristo daja puina mahue. Beju yama Silvano, Timoteo detse neje Jesús sa jabuetsuati cuana micuana buetsuana. Tueda jabuetsuati cuana da ene quita, butsepi. \v 20 Cristo ja pamapa Diusu sa jamitsuti cuana ecuana peje su yapeenita. Da putsu, ecuaneda Diusu emitsutsuainia Cristo jepuiti. \v 21 Tata Diusu ja ecuana nimetucheametana Cristo peje su. Tuseda puji ecuana ichaderatana. \v 22 Cuaja cristiano cuana ja mecuana sa ai cuana emarcatani nime tueda ai cuana tunseseda ebame puji, daja Diusu ja ecuana Espíritu Santo tiatana ecuaneda tuseda ebame puji. Tueda Espíritu Santo ja ecuana eshanapametani cielo su ecuaneda d'eji su epuenitiyu. \p \v 23 Edue cuana, jiahue yama micuana equisa jucuaja jepuiti ema mue puti micuana peje su. Ahua ema putiana su, dapia detse yama micuana jubida d'aya cua puina. Ema micuana peje su putija puana biame, mue ema puti micuana d'ayaja mahue putsu. Diusu bahue yama micuana butsepi equisainia. Ahua daja mahue su, ahua ema micuana bid'umimi yainia su, Diusu ja ema pacastigata emanu teje. \v 24 Aimue ema micuana emetse mahue cuaja micuana sa jei pu taji cuana equisa puji, beju micuaneda Diusu peje su jubida enimetucheatiani putsu. Micuana tsahuaja bahui ema micuaneda Diusu peje su ebia su beidaji epu puji. \c 2 \p \v 1 Da putsu, aimue yama micuana peretija ana mahue micuana ebia su epibapibame puji mahue. \v 2 Ahua yama micuana ebia su epibapibame su, aimue micuaneda ema beidaji yame mahue. \v 3 Da putsu, yama micuana pia quirica su jubida d'ayana tueda ai madhada mebasetaque puji, ema micuana peje su cuinatiji mahue su. Da su beju ema micuana peje su ecuinati su, aimue ema ebia su epibapiba mahue, micuana d'aya putsu. Bahue ema micuaneda beidaji epu, ahua ema micuana neje beidaji epu su. \v 4 Equene quirica edereinia je, ebia su japibapibametiana. Epani huaru ema puana. Aimue yama tueda quirica beitu micuana ebia su epibapibame mahue puji. Daja yama quirica su micuana jubida d'ayana micuaneda bahue epu puji cuaja yama micuana ebia su ibuneda ebainia. \s1 Edue cuana ja edue juchaji perdonatana \p \v 5 Bahue mepuenique, tueda micuana duju su edue juchaji ja pamapa ecuana pibapibamepad'itana. \v 6 Micuaneda jadhitati putsu, castigo tueda deja tiana beju tupu saida tuseda puji. \v 7 Jiahue beju micuaneseda perdona taji. Nimetucheda ame taji aimue tueda ebia su papibapiba mahue puji. \v 8 Neicha micuaneseda tueda ibuneda ba taji. \v 9 Equene yama daja micuana jubida d'ayana quirica su, micuana yaba puji, ahua quema jad'ayati neje micuaneda quema quisa cuana jei aja yainia eba puji. \v 10 Ahua quebata micuaneda eperdonainia su, daja huecha yama di tueda eperdonayu. Tueda yama eperdonainia Cristo butse su micuana sa saida puji. \v 11 Daja ecuaneseda perdona taji tueda deja aimue Ishahua ja ecuana esajasajata mahue puji. Beju ecuaneda eshanapaeninia tusa jabaseati madhada cuana. \s1 Pablo Troas ejude su janimepibapibametiana \p \v 12 Troas ejude su ema cuinatiana su, saida ema punuatiana Cristo sa quisa saida cuana quisaquisa epu puji. \v 13 Daja biame, aimue ema nimebeidaji puana mahue, edue Tito neje mue ema jatsuti puana putsu. Da putsu, ema tueda ejude su aniji edue cuana neje jamitsutiyu putsu, ema putiana Macedonia yahua su. \s1 Cristo ja ecuana nimetucheda, saida ametana \p \v 14 Diusulupai Tata Diusu yama yainia pamapa hora su, Cristo neje tupupai ecuaneda epishitiame epuani putsu. Ecuana etsahuatani tusa quisa saida cuana pamapa cristiano cuana eshanapame puji. Tueda quisa saida da ai puida pu cua nime cristiano cuana peje su eberereatiani. \v 15 Ecuaneda da incienso puida Tata Diusu peje su eirutsuaji nime. Daja puidame nime da ecuaneda Diusu peje su, Cristo neje dunejiji yani putsu. Tueda Diusu sa quisa saida puida nime cuana eberereatiani tu peje su jei eputani cuana peje su. Daja huecha tu peje su jei puja mahue cuana peje su di eberereatiani. \v 16 Tueda quisa saida puida nime cuana da jei puja mahue cuana sa puji ai ehuani jamanuametiji pu cua nime. Diusu peje su jei eputani cuana sa puji mu tueda quisa saida puida nime cuana da eid'e jaametiji. ¿Aidhe cuana da tueda quisa saida cuana quisa pu cua? \v 17 Beju ecuaneda mu tueda quisa saida cuana quisa pu cua, Diusu ja quitaita ecuana da puji huaratiatana putsu. Ecuaneda Cristo sa tucheda neje Diusu sa quisa saida cuana quisaquisa epuani. Ecuaneda butsepi neje Diusu butse su mesa quisa saida cuana cristiano cuana equisainia. Aimue ecuaneda mu Diusu sa quisa saida cuana chipilu einatsu puji quisaquisa epuani mahue, cuaja pia cuana ja yatani nime. \c 3 \s1 Diusu sa jamitsuti eichacua \p \v 1 Aimue quema saida puji bahui ema emimiani mahue, cuaja tueda bid'umimi quisaquisa puji cuana micuana duju su eputani nime. Tuneda mu tuna sa saida puji bahui yatani. Tuna biamimiaji quirica cuana edusutitani. Beju aimue quema tuna nime daja pu taji mahue. \v 2 Micuaneda quitaita hue quema ebiamimiaji quirica cuana nime, pamapa cristiano cuana ja micuaneda saida edusutiani ebatani putsu. Pamapa su beju bahue ecuanaju micuana duju su saida mudumuduana Diusu sa puji. \v 3 Cristiano cuana ja micuana sa puniuneti cuana saida ba putsu, micuaneda da Cristo sa dharejiji cuana eshanapata huecuana. Espíritu Santo eid'e eni ja micuana butsepi mepuniunetique yatani. \p \v 4 Ema Diusu peje su enimetucheatiani ema etsahuata puji, mesa ai saida cuana ya puji. \v 5 Aimue ema tupu saida mahue Diusu sa puji ai saida cuana ya puji. Diusu ja mu ema mesa tucheda etiatani mesa ai saida cuana ya puji. \v 6 Ema tucheametana mesa jamitsuti eichacua saida cuana quisaquisa epu puji. Aimue beju ecuaneseda Moisés chenu sa jacuatsasiati cuana a taji mahue d'eji su epu puji. Tueda jacuatsasiati cuana da emanu teje puji bahui. Beju jiahue mu Diusu ja mesa Espíritu Santo ecuana etiatani ecuaneda butsepi epuniuneti puji. Tuahueda ecuana eid'e yatani. \p \v 7 Biahua tiempo Diusu ja mesa jacuatsasiati cuana tumu pachata su derejiji yani Moisés chenu tiataidha. Mesa hueda jubida neje tiataidha. Da putsu, Moisés chenu judío cuana peje su jasiapatidha su, mesa ebu cuaja chama taji mahue bataidha huecuana, ebia su cuareda saida puidha putsu, tueda Diusu neje anidha putsu. Daja puidha biame, tueda hueda mesa ebu su tipeida chamumuidha. Tueda jacuatsasiati tiajiji cuana emanu teje puji bahui biame, ebia su hueda tucheda neje cuinaidha. \v 8 Daja biame, Diusu sa Cristo jepuiti eichacua quisa saida cuana ebia su saida quita, Espíritu Santo ja ecuana sa edusetani putsu. \v 9 Diusu ja Moisés chenu tiataidha jacuatsasiati cuana da hueda tucheda neje biame, beju emanu teje puji bahui. Diusu sa Cristo jepuiti eichacua quisa saida cuana mu da ebia su saida quita, ecuana Diusu peje su nimebutsepi yametani putsu. \v 10 Biahua tiempo tueda jacuatsasiati cuana tucheda eni puidha. Jiahue mu beju aimue tucheda mahue, Cristo jepuiti eichacua quisa saida cuana neje turucajiji putsu. \v 11 Tueda jacuatsasiati tiajiji cuana quejucua tiempo chidi puji hue tucheda eni puidha. Beju jiahue Cristo jepuiti eichacua quisa saida cuana mu ebia su tucheda eni yanieniti. \p \v 12 Da putsu, ema Cristo jepuiti ai eichacua quisa saida cuana jubida, nimetucheda neje quisaquisa epuani, aimue quetsunu su biame epupe mahue putsu. \v 13 Moisés chenu jabud'amatidha Diusu sa hueda mesa ebu su epene puji, judío cristiano cuana ja tueda hueda echamumuani ebata huecuana mahue puji. Beju Moisés chenu ja ataidha nime, aimue ema yainia nime mahue. Aimue ema Diusu sa eichacua quisa saida cuana Cristo jepuiti erubuainia mahue, Moisés chenu jabud'amatidha nime, Diusu sa edhamutiani hueda mesa ebu su erubua puji. Jubida ema tueda quisa saida cuana cristiano cuana peje su quisaquisa epuani. \v 14 Biahua tiempo judío cuana ja aimue Diusu shanapaenitaidha mahue, tu peje su pibatadadaji putaidha huecuana putsu. Jiahue teje daja ta huecuana. Tueda tiataidha jacuatsasiati derejiji cuana emimiametani je, aimue eshanapaenitani huecuana mahue. Diusu eba mahue puji jabud'amatiji pu cua nime huecuana. Daja biame, Cristo ja bahui Diusu sa eichacua quisa saida cuana shanapameta cua huecuana. \v 15 Enei hue, jiahue teje aimue Diusu eshanapaenitani huecuana mahue Moisés chenu sa jacuatsasiati cuana emimiametani je, tuna sa piba bud'amajiji pu cua nime putsu. \v 16 Etse Cristo peje su jei epuani su, Diusu ja tueda ebud'amaji ejemitani Cristo etse pashanapa puji. \v 17 Beju Echua Puji da Espíritu Santo neje piada hue epuani. Quebata sa Espíritu Santo yani, tueda da d'eji su beju. \v 18 Edue cuana, aimue ecuaneseda ebud'amaji yani mahue Moisés chenu sa anidha nime. Ecuaneda Diusu sa hueda ebainia putsu, aimue ecuaneda mu Moisés chenu puidha nime jabud'amatiji mahue. Ecuaneda Diusu sa eichacua quisa saida cuana su jei puana su, aimue tueda quisa saida cuana rubuana mahue, cristiano cuana peje su jubida quisaquisa puana putsu. Ecuaneda da espejo pu cua nime cuaredame. Diusu sa hueda ecuana peje su etsucuahuatiani pamapa cristiano cuana ja pabata puji. Aimue ecuaneda Diusu sa quisa saida cuana erubuainia mahue. Pamapa cristiano cuana peje su ecuaneda quisaquisa epuani. Beju Diusu ja ecuana etsapiatani. Tsapia chidi tsapiadera yainia je, Cristo nime ecuaneda epu puji. Echua Puji da Espíritu Santo neje piada hue epuani. Tuahueda daja ecuana saida etsapiaderatani tu nime epu puji. \c 4 \p \v 1 Da putsu, aimue ema enimetuchedataitanameti mahue. Diusu ja quitaita mesa jaibunebati jepuiti ema huaratiatana mesa ai quisa saida cuana quisaquisa epu puji. \v 2 Pamapa ai puiti madhada cuana yama ichajusiapeana. Ai rubuajiji, bidhutada yatiani cuana beju ichajusiapeana. Aimue yama etsapiainia mahue Diusu sa quisa saida cuana cristiano cuana ebaseame puji. Butsepi neje bahui ema tueda quisa saida cuana cristiano cuana peje su quisaquisa epuani. Pamapa ema eshanapatani cuana beju bahue ema Diusu butse su butsepi quisaquisa epuani. \v 3 Cuati castigo su eputita cuana ja aimue quema Cristo jepuiti quisaquisa cuana eshanapatani mahue, Ishahua ja tuna sa piba cuana pitsametana putsu. \v 4 Daja Ishahua ja atana huecuana aimue Cristo jepuiti quisa saida cuana pashanapata huecuana mahue puji. Tueda Cristo da ene quita Diusu. \v 5 Aimue ema jepuiti quitaita bahui quisaquisa epuani mahue. Echua Puji Jesucristo jepuiti bahui ema quisaquisa epuani. Beju ema micuana emebajainia Jesús ja ema ibuneda ebatani putsu. \v 6 Cuaja Diusu ja biahua tiempo apuda su hueda ametaidha nime, daja huecha jiahue mesa quisa saida cuana ecuana eshanapametani, Cristo peje su jei epuani su. \s1 Diusu peje su bahui janimetucheati taji \p \v 7 Ema pishihue biame, Diusu ema duju su yani mesa tucheda quitaita ebame puji. \v 8 Da su quema ebia su tsapiapiati enime cuana yani biame, aimue ema pishitiamejiji yani mahue. \v 9 Pia cuana ja ema tijetije yatani biame, aimue Diusu ja ema emesiata mahue. Ema edajajametani huecuana biame, neicha ema enetiananiyu daja hue epuderati puji. \v 10 Queje papu ema paputi biame, manu su hue ema epuani, cuaja Cristo puana nime. Daja ema sufri epuani biame, Cristo quema equita su eid'e yani ja ema etucheametani cristiano cuana ja ebatani. \v 11 Ema eid'e tupu, manu su hue epuani, Cristo emebajainia putsu. Daja biame, Cristo quema equita su eid'e yani ja ema etucheametani cristiano cuana ja ebatani. \v 12 Da su ema Diusu sa quisa saida cuana quisaquisa pu putsu, manu su hue epuani biame, micuaneseda puji mu saida, eid'e yametani putsu. \p \v 13 Uja Diusu sa quirica su derejiji yani: “Ema mimiana, Diusu peje su janimetucheatiana putsu.” Daja huecha ema Diusu peje su enimetucheatiani putsu, tu peje su jei epuani, tu jepuiti emimiani. \v 14 Bahue ema cuaja Diusu ja Jesucristo manujiji cuana duju jenetia netianametaibana nime, daja ecuana enetianametayu. Da su beju micuana neje tupupai ema Cristo butse su cielo su edusutsuatitayu. \v 15 Pamapa quema Cristo jepuiti tsapiapiati ai sufrimiento cuana micuana sa saida puji puana. Jucuada cristiano cuana Cristo peje su jei putana quema tsapiapiati ai sufrimiento cuana jepuiti. Tueda da saida micuaneseda puji. Tu peje su jei eputani cuana eyapacatitani putsu, Diusu emitsutsuatani huecuana micuana neje tupupai. Da neje Diusu aida ebameti. \p \v 16 Da putsu, aimue yama etaitaname mahue quema Diusu peje su janimetucheatie cuana. Quema equita pishihue emanu puji biame, Diusu ja ema pamapa tsine etucheametani. \v 17 Ye quema mundo su tsapiapiati ai sufrimiento cuana da ubu hora puji hue. Diusu ja ema cielo su etiata mesa ai saida cuana mu daja hue saida epueni. \v 18 Da putsu, be papibatija ye mundo su ai sufrimiento cuana, tipeida etaitana putsu. Diusu sa bataji mahue ai saida cuana su bahui mepibatija, tueda ai saida cuana da daja hue saida epueni putsu. \c 5 \p \v 1 Beju bahue ecuaneda ecuana sa equita cuana emanuta biame, Diusu ja pia equita eichacua ecuana etiata cielo su. Aimue tueda equita cuana ye yahua su equita cuana nime mahue. \v 2 Ye yahua su ecuana sa equita cuana eid'e tupu, turucaja ecuaneda yainia pia ebia su saida, eichacua cielo su equita cuana neje. \v 3 Aimue ecuana sa enid'u cuana quitaji eputa mahue dapia cielo su. \v 4 Ye mundo su eid'e yani tupu, ecuaneda ebia su epibapibani. Manuja mahue epuani biame, ye equita cuana, manu bue mahue equita cuana neje turucaja yainia. \v 5 Daja Diusu ja ecuana yatayu. Jiahue ecuana ye mundo su eid'e tupu, Diusu ja Espíritu Santo ecuana tiatana. Tueda Espíritu Santo ja ecuana eshanapametani Diusu ja equita eichacua cuana cielo su ecuana etiatayu. \p \v 6 Da su beju pamapa hora su ecuaneda Diusu peje su enimetucheatiani, ecuana equita eichacua cuana cielo su etiatayu putsu. Bahue ecuaneda ye mundo su ecuaneda quitaji yani tupu, aimue Echua Puji Jesucristo neje yani mahue. \v 7 Tueda ecuaneda mue ba putsu, ye mundo su yani tupu, ecuaneda tu peje su jubida enimetucheatiani. \v 8 Aimue ecuaneda iyuame epuani mahue emanu puji. Beju ecuaneseda puji ebia su saida quita ye equita cuana eichajusia puji Echua Puji neje saida yanieniti puji. Tueda da ecuaneseda tsada. \v 9 Da putsu, ecuaneseda pamapa hora su Echua Puji nimebeidaji ame taji, quitaji su, ahua cielo su quitaji mahue su. \v 10 Pamapa ecuaneseda Cristo butse su neti taji. Da tsine su tuahueda ecuana equisabata ecuaneda ye equita neje eid'e anina tupu, ai saida cuana ana, ahua mahue. Cuaja ecuaneda ana batame, ecuana metse su hue eturuca etiatayu. \s1 Diusu neje saida pu taji \p \v 11 Da su yama Echua Puji eiyubainia putsu, pamapa cristiano cuana quema jei ame taji Diusu peje su. Diusu ja eshanapaenitani aimue ema bid'umimi puji mahue. Daja huecha micuaneseda shanapaeni taji. \v 12 Beju aimue quema puji quitaita ema saida emimiani mahue. Daja yama micuana equisainia micuaneda ema neje saida, nimebeidaji epu puji, ebia su aida ebatitani cuana ejeutsu puji. Tuneda aida ebatitani, piba mahue ta biame. \v 13 Ahua pia cuana ja ema tseitsi nime ebatani su, jade, daja tseitsi ema epu Diusu sa puji. Ahua ema piba saida ebatani huecuana su, tueda da micuana sa saida puji hue. \v 14 Cristo pamapa cristiano cuana sa puji manuana, ebia su ibuneda batana huecuana putsu. Da putsu, daja ema tu jepuiti jubida quisaquisa epuani. Ecuaneda pamapa su tu neje curusu su manuana pu cua nime, tu neje dunejiji yani putsu. \v 15 Cristo pamapa ecuaneseda puji beju manuana. Daja huecha pamapa ecuaneseda puji id'eibana. Da putsu, pamapa tu jepuiti eid'e, nimeeichacua cuana sa tueda bahui mebaja taji. Aimue tuneseda puji bahui eid'e ani taji mahue. \v 16 Ecuaneda Cristo sa dharejiji cuana putsu, cristiano cuana equene Cristo shanapaji mahue su ecuaneda baina nime, aimue ebainia mahue. Beju yama Cristo shanapaji mahue su, quema enime japitsatijiji puina, yama Cristo deja nime hue bana putsu. Jiahue mu aimue daja ema tu jepuiti epibatiani mahue. \v 17 Quebata Cristo neje dunejiji yani, tueda da nimeeichacua, mesa equene ai puiti madhada cuana pupeana putsu. Jiahue beju pamapa mesa ai puiti cuana eichacua epupiruani. \p \v 18 Beju Diusu ja daja yatani ecuaneseda puji. Ecuaneda Diusu neje jamajaiti bahue puina biame, tuahueda ecuana tu neje saida ametana, ecuaneda Cristo peje su jei puana putsu. Tuseda tsada ecuaneda pia cristiano cuana peje su Cristo jepuiti quisa saida cuana quisaquisa epu puji, tuneda di Diusu neje saida paputa huecuana puji. \v 19 Diusu ja Cristo jepuiti pamapa cristiano cuana tu neje saida yametani, Cristo peje su jei eputani huecuana su. Pamapa mecuana sa jucha cuana edhipatayu. Cristo jepuiti ai quisa saida cuana Diusu ja ecuana tiatana pia cristiano cuana equisati puji. \v 20 Beju ecuaneda da Cristo sa quisa puji cuana ye mundo su aniji cristiano cuana peje su. Ecuana jepuiti Diusu ja mesa ai quisa saida cuana cristiano cuana equisatani. Jubida ecuanaju cristiano cuana ebajainia Diusu neje pabasetatita huecuana puji Cristo jepuiti. \v 21 Cristo juchaji mahue biame, Diusu ja tueda curusu su juchaji pu cua nime manuamemetana. Ecuana eturuca curusu su tueda matsetana, ecuaneda Cristo peje su jei pu putsu, nimebutsepi epu puji. \c 6 \p \v 1 Edue cuana, micuaneda ema neje tupupai Diusu emebajainia. Diusu ja micuana daja ebia su ibunebatana putsu, saida mebaja taji. Beju micuana sa mudu tuseda puji cuaja arijinetia taji mahue. \v 2 Uja derejiji yani Diusu sa quirica su: \q1 Beju yama mique jabajati id'uana. \q1 Yama mi tsahuana, mi d'eji su yainia je. \m Jiahue beju tiempo cuinaitia cristiano cuana d'eji su paputa puji. \p \v 3 Beju ema saida, butsepi epuniunetiani cristiano cuana duju su Cristo peje su tuna jei puja paputa huecuana puji, ema ba putsu. Daja ema saida epuniunetiani aimue tuneda ema patuaquisata mahue puji, aimue Echua Puji Jesucristo sa puji madhada hue papibatita huecuana mahue puji. \v 4 Pamapa ai cuana su ema Diusu sa emebajaji butsepi ebametiani cristiano cuana butse su. Pamapa ai tsapiapiati sufrimiento cuana yama etucheainia paciencia neje ema Diusu sa emebajaji saida, butsepi cristiano cuana peje su ebameti puji. \v 5 Beju cristiano cuana ja ema neje duinini putsu, ebia su ichemetana. Teriichanubiametana huecuana. Nimetipei cuana ema sufri puana. Mudu tadada cuana yama ana. Tahuiji mahue, dhemanu neje sufri ema puana. \v 6 Pamapa ai saida cuana neje ema Diusu sa emebajaji saida cristiano cuana peje su jabametiana. Ema saida, butsepi, jucha mahue puniunetiana tuna duju su. Yama Diusu eshanapaeninia batana huecuana. Ema tuna neje paciencia, saida neje puniunetiana batana huecuana. Espíritu Santo sa tucheda quema yani batana huecuana. Ibuneda neje ema jadusutiniunetiana batana huecuana. \v 7 Ema Diusu sa tucheda neje butsepi mimiana batana huecuana. Beju tueda pamapa ai saida cuana neje ema Diusu sa emebajaji saida jabametiana cristiano cuana butse su. \v 8 Pia puji su quema puji saida mimitaina huecuana. Pia puji su mu madhada hue. Pia puji su ema bid'umimi puji mahue, pia puji su mu ema butsepi quisa puji bataina huecuana. \v 9 Pia puji su ema eshanapa mahue, pia puji su mu ema eshanapa bataina huecuana. Manu su hue ema epuani biame, ema eid'e beju. Ema jubida eichetani huecuana biame, aimue ema manu. \v 10 Ema ebia su epibapibani biame, pamapa hora su ema nimebeidaji Echua Puji peje su. Quema ye mundo su ai cuana mue ani biame, Diusu sa quisa saida cuana ema cristiano cuana peje su quisaquisa epuani. Beju quema ye mundo su ai cuana mue ai ani biame, pamapa Diusu sa ai saida cuana quema yani. \p \v 11 Corinto ejude su aniji edue cuana, yama pamapa ai cuana micuana butsepi equisainia pamapa muesumu ebeibi neje. \v 12 Quema ibuneda cuana, yama micuana mue menahue. Micuaneda mu micuana sa ibuneda ema emenahueinia. \v 13 Tata cuana ja mecuana sa ebacua ibuneda neje ebajatani nime, daja yama micuana ebajainia. Pamapa muesumu ebeibi neje ibuneda mebaque ema, cuaja yama micuana ebainia nime. \s1 Ecuana sa equita cuana da eid'e eni Diusu sa ani jude \p \v 14 Be medunetiji pia Diusu peje su jei puja mahue cuana neje. ¿Ai da ai saida cuana sa a taji ai madhada cuana neje? ¿Ai da hueda sa a taji apuda neje? \v 15 ¿Ai da Cristo sa a taji Ishahua neje? ¿Ai da Diusu peje su jei eputani cuana sa a taji jei puja mahue cuana neje? \v 16 ¿Ai da Diusu sa templo sa a taji eimea cuana neje? Beju ecuana sa equita cuana da eid'e eni Diusu sa ani jude. Tueda ecuana sa equita duju su yani. Uja Diusu epuani mesa quirica su: \q1 Ema tuna duju su yaniti, daja huecha epuniuneti. \q1 Tuna sa Diusu ema epu. \q1 Quema dharejiji cristiano cuana eputa huecuana. \m \v 17 Neicha Diusu uja epuani mesa quirica su: \q1 Mecuinanaque tuna peje jenetia. \q1 Menetideraque tuna peje jenetia. \q1 Be mecuana sa ai jucha adhida cuana meaji. \q1 Da su yama micuana ebatsu. \q1 \v 18 Ema micuana sa Tata epu. \q1 Micuaneda da quema ebacua cuana epu. \c 7 \p \v 1 Da su ibuneda edue cuana, daja \p Diusu ja mesa jamitsuti saida cuana tiatana putsu, pamapa ai madhada cuana jenetia ecuaneseda netidera taji. Equita, enime madhatiaji ai cuana jenetia netidera taji. Diusu sa puji bahui nimebutsepi ecuaneseda pu taji, tu eiyubainia putsu. \s1 Corinto ejude su aniji edue cuana japibaturucatitana \p \v 2 Meibunebaque ema. Aimue yama aidhe biame ai madhada a. Aimue yama aidhe biame baseana mahue. \v 3 Aimue yama micuana daja yainia mahue micuana juchaji ya puji. Equene yama micuana quisana yama micuana ebia su ibuneda ebainia. Ema micuana neje dunejiji yani eid'e epu puji ahua emanu puji. \v 4 Ema micuana neje nimebeidaji. Ema ebia su sufri epuani biame, nimetucheda, nimebeidaji ema. \p \v 5 Macedonia yahua su cuinana jenetia, ema janahuaji mahue. Tsapiapiati enime iyuda cuana quema puji puana. \v 6 Daja biame, Diusu enimetucheameji ja ema nimetucheametana, Tito ema peje su cuinatiana putsu. Beidaji neje yama batsuana. \v 7 Tito ja ema cuaja micuana neje saida aniana quisatana. Micuaneda ema jubida ibuneda ebainia tsuhu quisatana. Micuaneda ebia su pibapibana cuaja ema ai cuana puana jepuiti quisatana. Micuaneda ema jepuiti etacuamadhatiani quisatana. Da su tueda quisa saida cuana neje Tito ja ema ebia su nimebeidaji ametana. \p \v 8 Bahue ema quema equene quirica neje yama micuana ebia su pibapibameana quejucua tsine puji hue. Daja biame, mue ema pibapiba tueda quirica beituana jepuiti. Tueda quirica ja micuana Diusu peje su pibaturucametana putsu, ema beidaji epuani. \v 9 Aimue ema beidaji mahue, micuaneda ebia su pibapibameana putsu. Ema beidaji, micuana sa ai madhada cuana jenetia japibaturucatiana putsu. Quema jad'ayati cuana ja aimue micuana madhatana mahue. \v 10 Ebia su saida, jucha cuana jepuiti etse pibapiba putsu, Diusu peje su epibaturucati puji. Da su etse japibaturucati putsu, Diusu ja d'eji su yametayu. Da putsu, etse sa beidaji pu taji, Diusu ja etse jucha jepuiti epibapibametani su. Jucha jepuiti epibapibametitani cuana bahui Diusu ja eid'e yameenitayu. Pia pibapiba cuana mu da emanu puji bahui. \v 11 Beju micuaneseda puji tueda pibapiba cuana saida puana, micuana Diusu peje su pibaturucametana putsu. Yama micuana sa jucha cuana jepuiti pibapibameana putsu, micuaneda jabasetapetiana. Tueda deja juchaji micuana duju su micuaneda castigana. Neicha micuaneda Diusu iyuba putsu, micuaneseda tsada puana ema eba puji, micuana etsahua puji. \v 12 Aimue yama quema quirica su micuana jubida d'ayana mahue micuaneda tueda edue juchaji ecastiga puji. Daja huecha aimue tueda quirica micuana peje su yama beituana mahue micuaneda tueda deja sa enime cuana tusa tata detse neje ebaseta puji. Beju yama micuana daja quirica su ameana micuaneda Diusu jepuiti neicha ema ebia su ibuneda eba puji. \p \v 13 Da su ema jatucheatiana, micuaneda ema daja hue ibuneda ebainia putsu. Beidaji ema, micuaneda Tito saida batsuana putsu. Tuahueda micuaneda neicha Diusu peje su saida batana. \v 14 Yama Tito micuana peje su beituji mahue su, ema bahue puina micuaneda tueda saida ebatsu. Daja yama Tito quisana. Beju ene daja puana. \v 15 Cuaja yama tueda quisana batame, daja micuaneda tueda saida batsuana. Tuahueda micuana ebia su ibuneda ebatani, micuaneda saida batsuana putsu. Daja huecha tusa ai quisa cuana iyuda neje jei ana. \v 16 Da su ema micuana neje ebia su beidaji, micuaneda ema neje neicha saida yani putsu. \c 8 \s1 Beidaji neje chipilu Diusu tia taji \p \v 1 Edue cuana, pia ai cuana jepuiti yama micuana equisa, cuaja Diusu ja Macedonia yahua je aniji dharejiji cuana ibunebatana nime. \v 2 Mecuana sa ebia su tsapiapiati sufrimiento cuana yani biame, nimebeidaji huecuana. Ebia su puri huecuana biame, tiatana tuna sa ucua chidi ai cuana yani jenetia pia edue cuana etsahua puji. \v 3 Ene putsu, yama micuana equisainia, tuna sa tupu tiatana huecuana. Cha ebia su tiajucuajucua atana huecuana. Tuneda quitaita daja tiaja atana. \v 4 Jubida ema bajatana huecuana pia edue cuana daja etsahua puji. \v 5 Da su yama bajana ebia su tiatana huecuana. Tuneda quitaita Diusu peje su jamenajatiatitana Diusu sa ai tsada cuana ya puji, ema etsahua puji. \v 6 Da putsu, yama Tito jubida ebajainia micuana peje su neicha panuati puji. Equene Tito micuana neje anina su, micuana sa chipilu tia taji pia edue cuana etsahua puji micuana buetsuapirutana. Jiahue quema tsada micuana peje su tueda paputi micuaneda dhitapiruana chipilu edhitapetsahuati puji. \v 7 Beju micuaneda pamapa ai saida cuana bahue eni epuani. Diusu peje su janimetucheati bahue. Pia cristiano cuana buetsua bahue. Micuaneda Diusu eshanapaeninia. Ebia su micuaneda ema ibuneda ebainia putsu, ema jubida tsahuaja yainia. Daja huecha cuaja micuana sa chipilu pia edue cuana etsahua puji tia taji, micuaneseda jabuetsuaeniti taji. \p \v 8 Aimue yama micuana ecuatsasiainia mahue cuaja micuana sa chipilu tia taji. Cuaja pia edue cuana ja chipilu tiame yatani bahui yama micuana quisaja yainia. Aimue mimi neje bahui etse ibuneda ebametiani mahue. Ahua micuaneda micuana sa chipilu neje tsahuaji mahue edue cuana etia su, da su micuaneda ene quita ibuneda ebainia huecuana ebametiani. \v 9 Beju micuaneda eshanapaeninia Echua Puji Jesucristo sa jaibunebati cuana. Tueda pamapa aiji biame, deja puri nime jabametiana micuaneda pamapa aiji tu jepuiti epu puji. Daja tueda puana, micuaneda ebia su ibuneda ba putsu. \p \v 10 Micuana sa saida puji hue yama micuana uja equisainia: Micuaneda mara jaitianajiji su equene pibapiruana chipilu neje edue dharejiji tsahuaji mahue cuana etsahua puji. \v 11 Beju micuaneda mue ape putsu, jiahue micuana sa apetayuji. \v 12 Ahua ene quita micuaneda chipilu tiaja su, micuana sa ai chidi cuana jenetia tia taji. Quejucua tiaja tupu beju tia taji. Daja Diusu sa tsada. \p \v 13 Tsada mahue quema micuana sa ai dia taji cuana ehueiti, pia cuana etsahuainia je. \v 14 Tsada quema micuaneda tuna neje micuana sa ai chidi cuana esajatiati puji, tuneseda pahueiti mahue puji. Daja huecha micuaneseda chipilu ehueitiani su, tuneda mesajatiataque. Daja micuana sa huamahuama jabati taji. \v 15 Uja israelita cuana putaidha, d'anita yahua su maná chudutaidha huecuana su: Dueji jachudutitaidha cuana ucua chidi jachudutitaidha cuana neje jasajatiatitaidha huecuana. Da su pamapa sa tupu anidha. \s1 Tito, mesa ebuqueji cuana neje \p \v 16 Jubida yama Diusu diusulupai yainia, cuaja tuahueda ema micuana ebia su eibunebametani nime, daja huecha Tito micuana ibunebametana. \v 17 Tueda yama micuana peje su paputi puji quisana biame, tueda quitaita micuana jubida batija epuani. Tusa piba hue micuana peje su eputi. \p \v 18 Tu neje pia edue Diusu sa quisa puji yama ebeitu micuana peje su. Pamapa pia ejude je Diusu sa dharejiji cuana ja tueda eshanapaenitani, tueda Diusu sa ai quisa saida cuana saida quisaquisa pu bahue putsu. \v 19 Beju dharejiji cuana ja equene tueda edue dharetana ema pabuqueta puji, dhitajiji chipilu cuana etsahuaji mahue edue cuana peje su edusuta puji. Tueda dhitajiji chipilu neje micuaneda edue cuana ibuneda ebame. Tueda dhitajiji chipilu etiainia jepuiti Echua Puji Jesucristo jepuiti saida emimita huecuana. \v 20 Ecuanaju tueda dhitajiji chipilu saida, butsepi dusuja yainia aimue aiya biame tueda chipilu aida jepuiti ecuanaju patuaquisata mahue puji. \v 21 Ecuanaju tueda ai cuana butsepi aja yainia Diusu butse su, daja huecha pamapa cristiano cuana butse su. \p \v 22 Tuatse neje yama pia edue ebeitu. Bahue ecuanaju tueda da edue saida, butsepi Diusu peje su. Tuseda ebia su tsada yani micuana ebati puji. Micuana peje su tuseda ebia su janimetucheati cuana yani. \v 23 Ahua quebata Tito jepuiti equisabati su, mequisaque tueda Tito da quema ebuqueji. Tueda ema neje tupupai emudumuduani micuana sa saida puji. Daja huecha pia edue ebuqueji detse jepuiti equisabati su, mequisaque tueda Diusu sa jadhareti cuana sa jabeituti tuatseda. Cristo saida emebajatani tse mequisaque tueda. \v 24 Da su saida batsuque tueda quimisha edue cuana yama micuana peje su ebeituinia. Dhitajiji chipilu aida metiaque huecuana etsahuaji mahue edue cuana sa puji. Daja a putsu, pamapa pia ejude je aniji dharejiji cuana ja micuaneda etsahuaji mahue cuana ebia su ibuneda ebainia ebameta. Da su pamapa dharejiji cuana bahue eputa jucuaja su ema micuana neje nimebeidaji epuani. \c 9 \s1 Chipilu dhitatana huecuana edue etsahuaji mahue edue cuana sa puji \p \v 1 Edue cuana, aimue tsada quita mahue yama micuana ebaja puji edue tsahuaji mahue cuana metsuahuaque puji. \v 2 Mara jaitianajiji jenetia micuaneda dhitapiruana chipilu cuana tuneseda puji. Macedonia yahua su aniji edue cuana di daja yama quisana micuaneda quitatita tsahuaja epuani mara jaitianajiji jenetia. Beju daja id'aba putsu, tuneda di janimetucheatitana pia tsahuaji mahue edue cuana chipilu neje etsahua puji. \v 3 Da su yama ye quimisha edue micuana peje su ebeituinia tueda chipilu dhitajiji pabata huecuana puji. Beju paani tueda chipilu dhitapejiji micuana peje su ecuinatita huecuana su, ema pamapa edue cuana peje su micuana jepuiti saida mimiana putsu. \v 4 Cuapuitime piada piada Macedonia yahua jenetia aniji edue cuana ema neje micuana peje su puti cua. Da putsu, tiempo neje hue yama micuana equisainia, chipilu dhitaichapejiji papu puji aimue pamapa ecuaneda bidhutada su ebameti mahue puji, ecuanaju micuana peje su ecuinati su. \v 5 Da putsu, ema putiji mahue su, yama ye quimisha edue cuana micuana peje su ebeituinia micuana chipilu medhitatsahuataque puji. Ahua micuaneda daja edhitape mahue su, ema micuana peje su ecuinati su, micuaneda tipeitipei chipilu dhita cua ema nimebeidaji yame puji. Beju tueda saida mahue epu. Ebia su saida tueda chipilu dhitaichapejiji paani, ema cuinatiji mahue su. Ahua daja micuaneda ya su, pamapa edue cuana ja micuana sa tsada quitaita neje chipilu cuana edhitainia ebata. Aimue yama micuana cuatsasiana mahue ebata huecuana. \p \v 6 Mepibaenitique tueda ai cuana su. Quebata ja ucua chidi hue ebanata su, ucua chidi hue ejemitsuati. Daja huecha quebata ja jucuada ebanata su, dueji ejemitsuati. \v 7 Micuaneseda tia taji, cuaja micuaneda pibana batame. Be metiaji tiaja mahue neje ahua jubida neje. Beidaji neje tia taji, beidaji neje etiatani cuana Diusu ja eibunebatani putsu. \v 8 Beju Diusu ja micuana pamapa ai saida cuana ebia su tiata cua pamapa micuana sa ai cuana pahueiti mahue. Ehueitiani cuana ebia su etiatayu mesa ai saida cuana paata huecuana puji. \v 9 Uja epuani Diusu sa quirica su: \q1 Tuahueda pamapa muesumu neje puri cuana tiatana. \q1 Mesa ai saida mudu cuana da chujeji eni yanienitita. \v 10 Micuana sa Diusu sa puji mudu da ejaja banajiji cuana nime. Cuaja Diusu ja ejaja cuana ebana puji etiatani nime, daja huecha tuahueda mesa mudu cuana micuana etiatani micuaneda ya puji. Cuaja Diusu ja tueda ejaja cuana ejucuametani cristiano cuana sa ediaji puji nime, daja huecha micuana sa mudu tuseda puji ejucuametayu mesa dharejiji cuana etsahua puji. \v 11-12 Tuahueda micuana sa ai cuana eyapacametayu micuaneda pia edue cuana ebia su etsahua puji. Beju ecuanaju micuana sa dhitajiji chipilu edue etsahuaji mahue cuana peje su edusuti su, beidaji eputa huecuana. Jamitsutsuati neje diusulupai Tata Diusu yata huecuana, micuaneda tsahuana putsu. \v 13 Diusu emitsutsuata huecuana, micuaneda tueda jei yainia putsu, tuna etsahuainia je. \v 14 Da su micuaneseda puji ibuneda neje Diusu jubida ebajata huecuana, Diusu ja edue tsahuataja cuana tueda dhitajiji chipilu neje micuana tsahuametana putsu. \v 15 Beju yama Diusu diusulupai yainia, mesa Ebacua Jesucristo ecuana tiatana putsu. Tusa jaati ai cuana cuaja quisape taji mahue ecuaneda ebainia. \c 10 \s1 Diusu ja Pablo apóstol ichatana \p \v 1 Edue cuana, cuaja Cristo ja micuana quisata cua pu cua nime, yama ibuneda nimemitsida neje micuana equisainia. Piada piada micuaneda uja epuani: “Pablo ecuanaju neje yani su, nimemitsida epuani. Ecuanaju peje jenetia uqueda yani su, beju nimetucheda ebatiani.” \v 2 Aimue ema pia deja cuana nime emimiani mahue. Diusu ja ema huaratiatana putsu, yama micuana jubida butsepia cua. Daja biame, tsada mahue quema mimi jubida neje micuana ebutsepia puji. \v 3-4 Aimue ema pia deja cuana nime mahue, piada piada micuaneda daja epuani biame. Aimue yama pia deja cuana ja yatani nime quema ai cuana yainia mahue. Yama ai yainia cuana Diusu sa tucheda neje bahui yainia. Tueda tucheda neje Ishahua epishitiameinia. \v 5 Pamapa ema tuaquisaji cuana di yama epishitiameinia. Daja huecha pamapa aida jabatiji cuana yama epishitiameinia. Tsada mahue mecuana sa cristiano cuana ja Diusu sa ene quita quisa saida cuana eid'abata puji. Aimue yama cristiano cuana sa piba cuana epibainia mahue. Cristo sa saida piba cuana neje bahui yama cristiano cuana jei yameinia, Cristo jei paata huecuana puji. \v 6 Ahua quema jabuetsuati su micuaneda jei epudera mahue su, yama micuana butsepia cua. Daja huecha yama yayu quebata pia jei puja mahue cuana. \p \v 7 Aimue micuaneda ema ebainia mahue cuaja ema. Ema da Cristo sa puji micuaneda nime. \v 8 Aimue ema ebidhuani mahue micuana ebia su equisaicha puji, Diusu ja ema huaratiatana putsu. Daja ema Diusu ja huaratiame atana micuana tsahua putsu, tu peje su jubida enimetucheame puji. Aimue micuana sa madhada puji ema huaratiatana mahue. \v 9 Be mepibatiji quema quirica neje cha rubutaname hue ya puji mahue. \v 10 Piada piada micuaneda uja epuani: “Pablo ja ecuana jubida ed'ayatani mesa quirica su bahui. Beju tueda ecuinani su, nimemitsida epuani ecuana duju su, mimi eni bue mahue putsu.” \v 11 Aimue yama eiyubainia mahue micuana ebutsepia puji. Mepibaenique cuaja yama micuana uqueda jenetia quirica su jubida butsepiameana. Daja huecha yama ya, micuana neje yani tupu. \p \v 12 Aimue ema quema puji bahui saida emimiani mahue, cuaja pia deja cuana micuana duju su eputani nime. Beju tuneda da bue mahue nime, pia cuana ebia su quita jabatija eputani huecuana putsu. \v 13 Yama micuana ecuatsasiainia, cuaja Diusu ja ema huaratiatana batame. Diusu ja ema mesa ai mudu cuana etiatani. Tuahueda ema micuana peje su Corinto ejude su dusucuinatitana. \v 14 Yama micuana peje su equene Diusu sa ai quisa saida cuana Cristo jepuiti dusucuinatiana putsu, da su quema puji micuana cuatsasia taji. \v 15 Aimue yama pia edue cuana sa Diusu sa puji mudu micuana duju su emetseneinia mahue. Quema mu tsada micuana etsahua puji bahui Diusu micuaneda ebia su eshanapaeni puji. \v 16 Da su beju micuaneda Diusu shanapaenija su, ema ejaitiana Diusu sa ai quisa saida cuana shanapaji mahue ejude uqueda cuana su tueda ai quisa saida cuana quisaquisa epupiru puji. Putija mahue ema quepia pia quisaquisa pujiji ejude cuana su. \p \v 17 Ahua quebata tuseda puji quitaita bahui saida mimija epu su, ebia su saida quita Diusu sa puji bahui emimi puji. \v 18 Ahua quebata tuseda puji bahui saida emimi su, tueda da chuje mahue. Ahua Diusu etseseda puji saida emimi su, da su tueda tsabajiji epu Diusu butse su. \c 11 \s1 Bid'umimi puji apóstol cuana \p \v 1 Edue cuana, paciencia mepuque ema neje, yama daja micuana equisainia putsu. Paciencia neje quema quisa cuana meid'abaque. Be ema mimi aida, tseitsi nime mebaji. \v 2 Diusu ja ema micuana ebia su ibuneda ebametani Echua Puji Jesucristo jepuiti. Tsada quema micuaneda da Cristo sa puji bahui mepuque puji. Cuaja yahueti nimebutsepi, saida emenajatiatani mesa yahue epu peje su nime, daja yama micuana nimebutsepi, saida Cristo peje su menajatiaja yainia. \v 3 Daja biame, cuaja Ishahua ja Eva jucha a putsu, baseataidha nime, cuapuitime daja tuahueda micuaneda di baseata cua quema piba. Ahua micuana baseata cua su, micuaneda seta cua Echua Puji Jesucristo. \v 4 Beju tipeida micuaneda pamapa ai papu su jei epuani yama ebainia. Ahua aidhe micuana peje su Jesucristo jepuiti ai bid'umimi quisaquisa epuani su, tipeida micuaneda jei epuani. Micuaneda Espíritu Santo batsuana biame, quebata pia espíritu madhada tipeida micuaneda ebatsuinia. Daja huecha pia cuaja d'eji su epu puji ai jabuetsuati cuana su di micuaneda tipeida jei epuani. \v 5 Tueda ai bid'umimi quisaquisa puji cuana da aimue ema ebia su ta mahue. \v 6 Ema ebia su saida quisaquisa eputani huecuana biame, ema mu Diusu sa ene quita quisa saida cuana eshanapaeninia. Beju pamapa tueda Diusu sa quisa saida cuana micuana yama butsepi quisapeana. \p \v 7 Ema micuana peje su Diusu sa ai quisa saida cuana quisaquisa puana su, aimue yama micuana chipilu bajana mahue quema ai dia taji cuana ebajati puji. Daja yama yainia micuana sa saida puji, quema puji mu tadada puana biame. Daja ema mehua ai eni mahue jaatiana micuaneda aida epu puji. ¿Cuaja jia da ahua yama madhada hue ana, daja yainia je? \v 8 Pia dharejiji cuana jenetia yama chipilu inatsuana quema ai dia taji cuana ebajati puji, micuana peje su Diusu sa quisa saida cuana quisaquisa epu puji. \v 9 Ema micuana neje anina su, quema ai cuana pishihue epuani su, aimue yama micuana sa jatsahuati cuana bajana mahue. Macedonia yahua su aniji edue cuana mu ema tsahuatana, ema peje su cuinati putsu. Da tiempo su aimue yama micuana sa jabajati cuana bajaja ana mahue micuana sa atadhada mahue puji. Beju daja hue ema jiahue teje epibaderati. \v 10 Yama pamapa Acaya yahua su aniji edue cuana butsepi equisapeti uja: Aimue ema Diusu sa quisa saida cuana quisaquisa epuani chipilu einatsu puji. \v 11 ¿Cuaja su jia ema daja jubida emimiani? ¿Aimue jia maida yama micuana ibuneda ebainia mahue? Beju Diusu bahue yama micuana ebia su ibuneda ebainia. \p \v 12 Daja hue yama pamapa butsepi equisaderati, “Pablo quisaquisa epuani chipilu einatsu puji”, pamimita mahue huecuana puji. Tuneda yama Diusu emebajainia nime, Diusu emebajatani eputani huecuana biame, aimue daja yatani huecuana mahue. \v 13 Aimue ene quita Diusu sa quisaquisa puji quitaita eputani huecuana mahue. Bid'umimi puji, jabaseatiji ta huecuana. Micuana duju su ene quita Cristo sa quisaquisa puji cuana nime jabametitana huecuana. Beju aimue daja ta mahue. \v 14 Beju aimue bid'umimi mahue. Ishahua quitaita Diusu sa quisaquisa puji nime cristiano cuana duju su ebametiani. \v 15 Daja huecha Ishahua emebajatani deja cuana Diusu sa quisaquisa puji cuana nime ebametitani Diusu sa dharejiji cuana ebasea puji. Beju Diusu ja ematsetayu huecuana cuati castigo su mecuana ai madhada ajiji cuana jepuiti. \s1 Pablo sufri puana \p \v 16 Neicha yama micuana equisainia, be ema tseitsi nime mebaji, ema daja mimiana putsu. Tseitsi nime ema mebaque papu biame, meid'abaque ema. Cuaja tueda bid'umimi quisaquisa puji deja madhada cuana tuneseda puji ebia su saida emimitani nime, daja ya di ema jepuiti huai chidi cama micuana neje quema puji saida mimija. Aimue tuna jepuiti quitaita butsepi emimiani mahue. Ema mu saida, butsepi emimiani quema puji. \v 17 Aimue Echua Puji Jesucristo ema micuana neje daja quema puji saida emimiametani mahue. Da mu ema jenetia bahui. \v 18 Tueda bid'umimi quisaquisa puji deja madhada cuana aida, bahue eni micuana peje su ebia su ebametitani putsu, ya di butsepi neje micuana peje su quema puji saida mimija. \v 19 Micuaneda bahue eni ebatiani biame, mimi aida, bid'umimi quisaquisa puji deja cuana eid'abainia. \v 20 Tuneda micuana jubida neje mebajame putsu, micuana emetsenetani huecuana. Micuana sa chipilu bahui mecuana sa tsada. Micuana ai eni mahue nime ebatani huecuana. Micuana ecastigatani huecuana. Beju daja ai madhada cuana micuana yatani huecuana biame, micuaneda jei camacama tuna peje su epuani. \v 21 Aimue ema mu nimetadada mahue daja micuana yame puji. Tueda ai madhada cuana aimue yama a bue mahue. \p Ahua tuneseda puji micuana peje su ebia su saida emimita huecuana su, ya di quema puji saida emimi, micuaneda ema mimi aida, tseitsi nime ebainia biame. \v 22 Ebia su aida ebatitani huecuana judío deja cuana putsu. Daja huecha ema. Ebia su aida ebatitani huecuana, Israel yahua jenetia putsu. Daja huecha ema. Ebia su aida ebatitani huecuana, Abraham chenu sa familia jenetia putsu. Daja huecha ema. \v 23 “Ecuanaju da Cristo sa emebajaji cuana”, eputani huecuana biame, yama tuna ebia su saida quita Cristo emebajainia. Beju daja ema micuana peje su quema puji saida emimiani biame, quema tsada mahue, saida mahue jepuiti saida emimi puji putsu. Tuna ebia su ema mudumuduana Diusu sa puji. Pia hora su ema jateriametiana, jaichemetiana tuna ebia su. Pia hora su ema manu su hue puana tuna ebia su. \v 24 Pishica nuati judío cuana ja ema quimisha tunca nueve ejaitiana ebai ichetana. \v 25 Quimisha nuati ema aquiriji neje ichetana huecuana. Piada nuati tumu neje ema maracatana huecuana. Quimisha nuati quema barco jabusiapatiana. Mar su ema piada tsine, piada dhidha bed'asana, jabarcobusiapati putsu. \v 26 Pamapa ejude, yahua je ema puniunetina. Ena iyuda cuana je ema puniunetina. Tsi puji, judío, judío mahue iyuda cuana duju je puniunetina. Ejude, ejije, mar iyuda cuana su puniunetina. Edue bid'umimi puji iyuda cuana duju su di ema puniunetina. Pamapa tueda ai iyuda cuana su ema puniunetina. \v 27 Beju ebia su ema sufri puana. Jubida mudumudu bahue. Piada piada hora su ema mue tahui. Edhemanu, jaid'itija, ayuna, huiname, jud'uji mahue pu bahue puina. \p \v 28 Tueda ai cuana ebia su dharejiji cuana jepuiti ema epibapibani. \v 29 Nimepishihue edue cuana jepuiti ema ebia su epibapibani. Ahua quebata ja edue jucha yameta su, tu neje ema enimepuani. \v 30 Ahua quema puji ema mimi taji epu su, da su quema Cristo jepuiti ai sufrimiento cuana jepuiti bahui ema emimi. Quema ai saida jaati cuana jepuiti mimija mahue. \v 31 Echua Puji Jesucristo sa Tata Diusu bahue ema butsepi emimiani. Beju pamapa su tueda pamitsutsuaenita. \v 32 Ema Damasco ejude su anina su, tueda ejude sa huaraji aida ja ejude sa esacuinaji su soldado cuana ichatana ema ina putsu, eteriicha puji, dapia yahua sa echua puji Aretas ja daja cuatsasiatana putsu. \v 33 Beju tueda ejude su aniji edue cuana ja ema d'iti aida su nubiame putsu, ejude tumu pirica barereajiji baqui bauda jenetia butemetana huecuana. Da jepuiti ema huaraji sa eme jenetia d'eji su puana. \c 12 \s1 Diusu ja Pablo tahui su nime ai iyuda cuana bametana \p \v 1 Edue cuana, saida mahue quema puji bahui ema daja saida emimi puji. Daja biame, daja hue yama micuana Cristo ja ema bametana ai cuana equisadera. \v 2 Piada tunca pushi ejaitiana mara jaitianana jenetia Diusu ja ema atujai cuana chu bene cielo su dusutana. Bue mahue ema ahua ema quitaji cielo su dusutana, ahua mahue. \v 3 Cuaja ema cielo su putiana bue mahue ema. Diusu bahui bahue. \v 4 Dapia yama id'abatiana etsia ai iyuda cuana. Tueda ai cuana jepuiti cuaja quisa pu taji mahue yama ebainia, Diusu ja ema be quisa puji cuatsasiatana putsu. \v 5 Beju tueda etsia ai iyuda cuana ba putsu, ema detse ebia su aida jabati cua. Daja biame, aimue ema aida ebainia ebatiani mahue. Aimue ema tueda ai cuana jepuiti emimi mahue. Quema Cristo jepuiti ai sufrimiento cuana jepuiti bahui ema emimi. \v 6 Quema jaati saida cuana jepuiti ema butsepi neje mimi cua biame, aimue daja emimi mahue pia cuana ja ema ebia su aida pabata mahue puji. Quema tsada mu papibata huecuana quema ai puiti, jabuetsuati saida cuana bahui su. \p \v 7 Beju Diusu ja ema mesa etsia ai iyuda cuana chamametana biame, ema ai neda macha tiatana aimue ema ebia su aida ebati mahue puji. Tueda neda da aquid'a nime quema equita su. Diusu ja Ishahua d'eji tiatana daja ema neda yame puji ema aimue ebia su aida ebati mahue puji. \v 8 Quimisha nuati yama Diusu bajana ema esaisiameta puji. \v 9 Beju ema mahue atana. Uja ema atana: “Tupu saida quema jaibunebati miqueda puji. Beidaji hue puque da jepuiti. Cristiano cuana peje su quema tucheda yama ebia su saida bame cua quema emebajaji tucheda mahue cuana peje jenetia.” Da su ema beidaji hue epuani daja nedaji epu puji, Cristo sa tucheda ema peje jenetia ebameti puji. \v 10 Da putsu, ahua ema tucheda mahue, nedaji epu su, ahua ema emadhabatani huecuana su, ahua quema ai cuana ehueiti su, ahua ema tijetije yata huecuana su, ahua ema Cristo jepuiti ebia su sufri epu su, beju ebia su beidaji ema epu. Ema tucheda mahue epuani su, da su beju ema ebia su tucheda epuani Cristo peje su. \s1 Pablo Corinto ejude su dharejiji cuana jepuiti pibapibana \p \v 11 Edue cuana, quema puji mimi taji mahue biame, daja ema mimiana micuana peje su. Ema tseitsi nime puana, daja mimiana putsu. Beju micuaneda da juchaji ema daja emimi puji. Aimue quema puji micuaneda saida mimiana mahue putsu, quema quitaita mimi taji quema puji. Ema mue ai eni papu biame, beju ema tueda bid'umimi quisaquisa puji deja cuana ebia su bahue eni quita. \v 12 Ema micuana neje anina su, yama micuana bameana Diusu ja ema huaratiatana mesa quisa saida cuana quisaquisa epu puji. Diusu ja ema mesa apóstol ichatana yama micuana bameeniana, ai nimetiuda cuana a putsu. Paciencia neje yama Diusu sa mudu ana micuana duju su. \v 13 Pamapa pia dharejiji cuana sa jatsahuati cuana yama inatsuana. Micuaneseda mu mahue micuana sa atadhada epu mahue puji. Ahua ema japitsatiana su, meperdonaque ema. \p \v 14 Beju jiahue ema micuana peje su eputi neicha quimisha nuati puji. Equene ema micuana neje anina su puina nime, daja ema epu micuana peje su, eputiicha su. Aimue yama micuana sa jatsahuati cuana ebaja mahue micuana sa atadhada epu mahue puji. Beju micuana sa saida cuana bahui quema tsada. Aimue micuana sa ai chidi cuana mahue. Tata cuana sa tuna sa ebacua cuana sa saida puji chacu taji. Aimue yanana cuana sa tata cuana sa puji chacu taji mahue. Micuaneda da quema ebacua cuana nime, ema da micuana sa Cristo jepuiti tata nime putsu. \v 15 Beidaji neje yama quema chipilu chidi, ai cuana etia micuana sa saida puji. Emanu teje, quema mudumudu taji micuana sa saida puji, yama micuana ibuneda ebainia putsu. Yama micuana ebia su ibuneda ebainia biame, micuaneda mu aimue ema ibuneda ebainia mahue. \p \v 16 Piada piada micuaneda uja epuani: “Pablo ja aimue ecuanaju sa ai chidi cuana bajatana mahue biame, ai chidi su papu biame ecuana jemitana, tueda da nimepirida putsu. Beju ecuanaju baseacuatajusiatana.” \v 17 ¿Ai quema beitujiji cuana ja micuana baseatana bata? \v 18 Yama Tito beituana micuana peje su pia edue neje. ¿Ai tuatseda micuana baseatana bata? Bahue micuaneda, Tito ema neje tupupai saida micuana duju su puniunetiana, Espíritu Santo ja huidusu etseju putsu. \p \v 19 Edue ibuneda cuana, bahue mepuenique, aimue ema micuana peje su daja emimiani mahue ema ebiahuanati puji. Beju Diusu bahue ema micuana peje su daja Cristo jepuiti mimiana micuana sa saida puji, micuana Diusu peje su enimetucheame puji. \v 20 Yama epibainia cuapuitime ema micuana peje su eputi su, yama micuana jucha su epuniuneti ba cua. Ahua daja micuana epu su, quema puji micuana neje nimetadada pu taji epu. Beju micuaneseda tsada mahue tueda epu. Cuapuitime yama micuana envidia, duinini neje huamahuama yacuicuinatiani ba cua. Cuapuitime ebia su aida micuana ebatiani, pia sa puji micuaneda madhada hue emimiani, aimue micuaneda edunetiani mahue yama ba cua. Beju pamapa tueda ai madhada cuana cuapuitime yama ba cua, micuana peje su ema eputiicha su. \v 21 Neicha ema micuana peje su puti cua su, beju Diusu butse su ema ebidhuti, daja madhada hue micuana ba putsu. Beju piada piada micuaneda ema ebia su epibapibame, micuana sa jucha jenetia japibaturucatija mahue putsu. Tueda equene ai madhada jucha aina cuana daja hue jiahue teje piada piada micuaneda yaderainia. Piada piada micuaneda pia sa ebutse neje equinatiani tsuhu. Tueda ai madhada jucha cuana ichajusiaja mahue yainia putsu, ema ebia su epibapiba micuana peje su eputiicha su. \c 13 \s1 Tije quisa cuana \p \v 1 Edue cuana, quimisha nuati puji beju micuana peje su eputi. Aimue detse micuaneda pia edue matse cua mahue, piada ja hue etuaquisatani su. Beta ahua quimisha etuaquisaji cuana sa pu taji. \v 2 Ema micuana neje anina su, tueda juchaji cuana micuana duju su yama jubida quisana jucha paarijita huecuana. Beju equene yama jubida quisana huecuana nime, jiahue ema uqueda biame daja hue yama be jucha meaderaji yainia huecuana. Ahua ema neicha micuana peje su eputi su, jubida yama tueda juchaji edue cuana ematseti. \v 3 Da su micuaneda bahue epu Cristo ja micuana jubida equisatani quema mimi jepuiti. Tuahueda micuana jubida ebutsepiatayu, micuana duju su tucheda eni putsu. \v 4 Mesa equita tucheda mahue curusu su manuana biame, jiahue mu Tata Diusu sa tucheda neje beju eid'e yani. Daja huecha ya di tucheda mahue biame, quema yani tusa tucheda micuana ebutsepia puji, ema tu neje dunejiji putsu. \p \v 5 Meabatique ahua micuaneda ene quita Cristo peje su enimetucheatiani, ahua mahue. ¿Bue mahue jia maida micuaneda Cristo micuana sa muesumu su eid'e yani? Quebata sa muesumu su Cristo yani mahue su, aimue tueda Cristo sa mahue. \v 6 Meshanapaenique ema da Cristo sa puji tueda quema muesumu su yani. Aimue ema bid'umimi puji mahue. \v 7 Yama Diusu jubida ebajainia micuaneda tu peje su nimebutsepi epu puji, ai madhada cuana ya mahue puji. Quema tsada mu micuaneda ai saida cuana bahui meaque puji. \v 8 Tsada mahue quema micuaneda ai madhada cuana ya. Quema mu tsada micuaneda tsine mea hue Echua Puji Jesucristo peje su butsepi, nimetucheda mepuque puji. \v 9 Beidaji ema micuaneseda puji sufri epu puji, ahua tueda sufrimiento jepuiti micuaneda Diusu peje su nimetucheda pu cua. Beju yama Diusu daja hue ebajadera micuaneseda puji, micuaneda tu peje su nimebutsepi epu puji. \v 10 Daja yama jubida micuana equisainia ema micuana peje jenetia uqueda yani tupu, micuaneda mebasetatique puji, ema micuana peje su cuinatiji mahue su. Ahua micuaneda daja epu su, aimue quema d'aya taji epu mahue, ema micuana neje yani su. Beju Echua Puji Jesucristo ja ema huaratiatana micuana etsahua puji, tu peje su jubida enimetucheame puji. Aimue ema huaratia micuana emadha puji mahue. \p \v 11 Da su edue cuana, mepuchidiniunetique. Nimebutsepi, nimebeidaji mepuque. Huamahuama saida medunetique. Nimepijajajiji mepuque. Ahua micuaneda daja hue yaderati su, janimepijajametiji Diusu mesa jaibunebati micuana neje yaniti. \v 12 Ibuneda neje huamahuama memitsutique. \v 13 Pamapa upia aniji edue cuana ja micuana emitsuametani. \p \v 14 Ecuana sa Echua Puji Jesucristo ja meibunebataque. Tata Diusu ja ibuneda mebataque. Espíritu Santo ja mebuquetaque. Daja papu.