\id 1TI - Tacana NT -Bolivia 2009 (DBL -2013) \h 1 TIMOTEO \toc1 Primera Carta a Timoteo \toc2 1 Timoteo \toc3 1 Ti \mt2 PRIMERA CARTA DEL APOSTOL SAN PABLO A \mt1 TIMOTEO \ip Timoteo da edeahue puina. Cristo peje su jei puana, Pablo sa Cristo jepuiti quisaquisa id'aba putsu. Da su ebia su buquetaina tu puniunetina je. Da su Pablo ja beta quirica deretaidha Timoteo sa puji. Equene quirica su ebuetsuatani cuaja ehuidusuji sa, Diusu sa dharejiji cuana huidusume a taji jepuiti. Daja huecha ebuetsuatani jiahue tiempo bid'umimi ebuetsuaji cuana, ai iyuda cuana, chipilu ibuneda cuana neje parejatita puji. Daja huecha ebuetsuatani cuaja edue cuana sa ehuidusuji cuana sa puniuneti taji. Dharejiji edue cuana sa ahue mahue, yanana, tata cuara mahue cuana inatsihuame a taji ebuetsuatani. \ip Ye versículo cuana da ebia su saida quita ebuetsuati puji: \ili 1.15 \ili 2.5 \ili 4.12 \ili 6.6,11,12 \c 1 \s1 Pablo ja Timoteo quirica tiametana \p \v 1 Ema da Pablo. Ecuana D'eji su Aji, \p Diusu, Jesucristo detse ja apóstol ema ichatana. Tu peje su ecuaneda enimeid'uatiani. \v 2 Timoteo, mida da quema Cristo jepuiti ebacua. Tata Diusu, Echua Puji Jesucristo detse ja ibuneba putsu, nimepijajametaque. \s1 Bid'umimi ebuetsuaji deja cuana aimue id'aba taji mahue \p \v 3 Edue, Macedonia yahua su ema putiana su, yama mi quisana Efeso ejude su mi yaniti puji. Tueda ejude su piada piada cuana ja piapiati jabuetsuati cuana ebuetsuatani. Da su cuatsasiaque jubida huecuana aimue pabuetsuata huecuana mahue puji. \v 4 Biahua tiempo tata edhi chenu cuana sa jabuetsuati ai puiti cuana parijinetiata huecuana. Tueda jabuetsuati cuana ja aimue epibatsahuatani mahue Diusu eshanapa puji. Tueda ai cuana ja ebia su yacuicuinametani huecuana. Diusu peje su janimetucheati putsu bahui ecuaneda Diusu saida mebaja cua. \p \v 5 Daja miqueda cuatsasia taji edue cuana huamahuama ibuneda pabatita huecuana puji. Nimebutsepi paputa huecuana. Daja huecha saida Diusu peje su panimetucheatita huecuana. \v 6 Beju aimue piada piada cuana daja eputani mahue. Jeitid'utana huecuana yanacane jacuicuinati jepuiti. \v 7 Moisés sa jacuatsasiati cuana buetsuaja eputani huecuana, tueda jacuatsasiati cuana bue mahue biame. Tuna sa jabuetsuati cuana aimue tuneda quitaita eshanapatani mahue. \p \v 8 Beju Moisés sa jacuatsasiati cuana da saida. Daja biame, jucuaja puji tueda jacuatsasiati cuana Diusu ja tiataidha ecuaneseda shanapa taji. \v 9-10 Tueda jacuatsasiati cuana mu aimue ai saida, butsepi yatani cuana sa puji mahue. Tueda jacuatsasiati cuana da juchaji, Diusu duininida baji, a taji mahue, nimebutsepi mahue, cuatsa adhiadhi, tata, cuara manuameji, deja manuameji, pia sa ebutse neje jaquinatiji, deja cama jucha aji, cristiano iruji, bid'umimi puji, yanacane Diusu bahue cuana sa puji bahui. Beju tuneseda puji tueda jacuatsasiati cuana Diusu ja tiataidha. Tueda jacuatsasiati cuana da Diusu sa jabuetsuati saida su jei puja mahue cuana sa puji di. \v 11 Diusu sa jabuetsuati cuana da saida. Da jepuiti Diusu ja cristiano cuana cuaja d'eji su puta cua eshanapametani. Tueda quisa saida cuana quisaquisa puji ema Diusu ja ichatana. \s1 Ecuaneseda Diusu diusulupai a taji mesa jaibunebati jepuiti \p \v 12 Yama ecuana sa Echua Puji Jesucristo diusulupai yainia tuahueda ema tucheametana mesa jabuetsuati cuana cristiano cuana ebuetsua puji. Mesa emebajaji ema ichatana, ema saida, butsepi ba putsu. \v 13 Equene yama Jesús madhabana biame, tuahueda ema mesa emebajaji ichatana. Daja huecha mesa dharejiji cuana yama jubida tijetije aina madhada hue ya puji. Yama madhabaina huecuana. Daja madhada yama aina biame, tuahueda ema ibunebatana, yama tueda ai madhada cuana aina tu shanapaji mahue su. Bue mahue ema puina putsu, daja yama aina. \v 14 Da putsu, mesa jaibunebati ema neje ebia su saida puana. Da putsu beju ema tu peje su jubida enimetucheatiani. Tueda yama ebia su ibuneda ebainia. \p \v 15 Jesucristo ye mundo su pueana juchaji cuana d'eji su ya puji. Tueda quisa da ene quita, butsepi. Beju ema pamapa pia juchaji cuana ebia su jucha aidaji biame, ema ibunebatana. \v 16 Daja yama ai madhada cuana aina biame, ema ebia su ibunebatana. Daja ema neje paciencia aidaji puana pamapa cristiano cuana ja mesa paciencia, ibuneda aida pabata, daja huecha tueda paciencia aidaji pamapa juchaji cuana neje pashanapata huecuana puji. \v 17 Da putsu, ecuaneda eid'e eni Diusu aida pamitsutsuaenitija. Tueda da quetsunu su biame emanu mahue Diusu. Aimue aiya biame bata cua mahue. Tueda da piada quita, bahue eni Echua Puji. Pamapa su tu jepuiti saida pamimienita. Daja papu. \p \v 18 Ibuneda Timoteo, jiahue yama mi jubida equisainia. Diusu peje su janimetucheati, enime eni saida neje Diusu sa quisa saida cuana quisaquisa puderaque. Daja aque, cuaja equene su edue cuana ja mi Diusu sa ebani su cuatsasiatana batame. \v 19 Diusu peje su jubida janimetucheatique. Nime eni saida mepuderaque. Pia cuana ja mu mecuana sa Diusu peje su janimetucheati cuana taitanametana, ai madhada cuana a putsu. Tueda ai madhada cuana atana huecuana, saida mahue ya puji shanapatana huecuana biame. Daja a putsu jamadhatitana huecuana. \v 20 Daja Himeneo, Alejandro detse puina. Tuatseda yama Ishahua peje su menajatiana pacastigata tse puji. Daja yama ana, Cristo sa puji madhada mimi pu taji mahue, pabuetsuati tse puji. \c 2 \s1 Cuaja Diusu mitsume a taji \p \v 1 Beju yama micuana equisa cuaja micuaneseda Diusu mitsume a taji. Equene micuaneseda Diusu baja taji pamapa cristiano cuana sa puji. Diusu diusulupai a taji. \v 2 Ecuaneseda Diusu baja taniji. Pamapa huaraji cuana sa puji Diusu baja taji. Daja a putsu, saida micuaneda yani Diusu butse su ye mundo su. \v 3 Tueda da Diusu sa tsada. \v 4 Mesa tsada pamapa cristiano cuana d'eji su paputa puji, mesa mimi pashanapata huecuana puji. \v 5 Beju Diusu da piada hue. Tu butse su Jesucristo yani pamapa cristiano cuana sa puji ebaja puji. Diusu biame, tueda da ene quita deja. \v 6 Tueda quitaita hue jamenajatiatiana Diusu ja cristiano cuana eturuca tueda curusu su ematseta puji d'eji su paputa huecuana puji. Diusu ja tueda ai cuana mesa tsada hora su pamapa cristiano cuana id'abametana. \v 7 Da puji ema Diusu ja huaratiatana mesa quisa saida cuana quisaquisa epu puji. Judío mahue cuana peje su ema beitutana mesa jabuetsuati cuana tuna buetsua putsu, tu peje su jei yame huecuana puji. \p \v 8 Da su quema tsada deja cuana ja pamapa hora su Diusu pamitsuta. Be duinini aida, jacuicuinatiji paputa huecuana. Muesumu saida, butsepi paputa huecuana. \v 9 Daja huecha epuna cuana pajud'utita saida neje. Be ebia su pajud'usaisisaisiatita huecuana. \v 10 Ai saida cuana bahui paata huecuana, Diusu sa huecuana putsu. \v 11 Cuatsa mahue, iyuda neje pabuetsuatita huecuana. \v 12 Quema tsada mahue epuna cuana ja deja cuana pabuetsuata puji. Be epuna cuana ja deja cuana pacuatsasiata. Cuatsa mahue ani taji huecuana. \v 13 Beju Diusu ja equene Adán ataidha. Tije Eva macha. \v 14 Aimue Ishahua ja Adán baseataidha mahue. Beju Eva bahui Ishahua ja baseataidha. Tueda epuna jucha puidha, Ishahua ja baseataidha putsu. \v 15 Da putsu, epuna cuana nedaji puja eputa su, ebia su mecuana sa neba taji. Yanana cuana saida pabatita huecuana. Ibuneda neje daja hue papuderatita huecuana. Daja huecha Diusu butse su butsepi padusuderatita huecuana. Patupuaderatita huecuana. Ahua daja yata huecuana su, d'eji su eputa huecuana. \c 3 \s1 Diusu sa dharejiji huidusuji cuana sa saida jadusuti taji \p \v 1 Ahua quebata edue cuana sa ehuidusuji puja su, tueda saida. Tueda mudu da ebia su saida. \v 2 Beju ehuidusuji sa deja butsepi pu taji aimue aiya biame tueda patuaquisata mahue puji. Piada ehuaneji bahui mesa pu taji. Pamapa ai su jatupuati bahue pu taji. Saida jadusuti taji pamapa cristiano cuana neje. Ai hora papu perepereji cuana epuetani su, saida neje batsu taji. Diusu sa jabuetsuati cuana saida buetsua bahue pu taji. \v 3 Be tsetse aida, icheiche aida papu. Saida, paciencia aidaji papu. Be jasatsiati aida papu. Be chipilu tsada papu. \v 4 Mesa familia saida cuatsasia bahue papu. Mesa ebacua cuana atasaida paputa. \v 5 Ahua ehuidusuji ja mesa familia quitaita cuatsasia bue mahue su, da su, ¿jucuaja ni da Diusu sa dharejiji cuana saida bame ata cua? \v 6 Be ehuidusuji ye chu jei Diusu peje su pujiji papu, cuapuitime tueda ebia su aida quita jabati cua putsu. Tueda jucha neje Ishahua jucha puidha, ebia su aida jabatidha putsu. \v 7 Jei Diusu peje su eputani mahue cuana neje ehuidusuji sa saida jadusuti taji tueda saida pabata huecuana puji tueda aiya biame etuaquisata mahue puji. Daja ehuidusuji sa pu taji madhada su ebameti mahue puji. \s1 Ilisha mebajaji deja cuana sa saida jadusuti taji \p \v 8 Daja huecha ilisha mebajaji deja cuana sa saida, butsepi jadusuti taji. Tuneseda jatupuati taji. Mecuana sa jamitsuti a bahue paputa huecuana. Be tsetse aida paputa huecuana. Be chipilu tsada paputa huecuana. \v 9 Diusu sa jabuetsuati cuana paata huecuana enime eni saida neje. \v 10 Ehuidusuji cuana nime tsabajiji paputa huecuana. Da su ahua jucha mahue ta huecuana su, ilisha mebajaji puta cua huecuana. \v 11 Daja huecha ilisha mebajaji cuana sa ehuane cuana sa saida, butsepi jadusuti taji. Be pia sa ebani yanacane pajemitsuata huecuana. Jatapuati bahue paputa huecuana pamapa ai su. Pamapa ai ape bahue paputa huecuana. \v 12 Ilisha mebajaji sa piada ehuane bahui ani taji. Mesa familia cuana saida cuatsasia bahue pu taji. Mesa ebacua cuana atasaida paputa. \v 13 Ahua ilisha mebajaji cuana saida emebajata su, cristiano cuana ja di saida ebata huecuana. Cristo peje su ebia su enimetucheaderatita huecuana. \s1 Diusu sa jabuetsuati ai cuana ebia su aida, nimetiuda \p \v 14 Timoteo, ema mi peje su tipeida putija. Cuapuitime ema tsunuta cua ye quirica yama mi peje su ebeituinia mi ai cuana equisa puji. \v 15 Daja mi yama equisainia mida bahue epu puji cuaja edue cuana sa jadusutime pu taji Diusu sa dharejiji cuana duju su. Pamapa Cristo peje su jei eputani cuana da eid'e eni Diusu sa familia. Diusu ja mesa jabuetsuati cuana tuna peje su menajatiatana painatsihuata huecuana puji, da je papuniunetita huecuana puji. \v 16 Beju Diusu sa jabuetsuati ai cuana da ebia su aida, nimetiuda: \q1 Diusu da ye mundo su quitaji jabametiana. \q1 Tueda da nimebutsepi. \q1 Espíritu Santo ja tueda butsepi quisanetiacuinatana. \q1 Angel cuana ja tueda batana. \q1 Pamapa ejude cuana je cristiano cuana ja mesa jabuetsuati cuana id'abatana. \q1 Daja huecha dueji cristiano cuana pamapa ejude cuana je tu peje su jei putana. \q1 Da su bejo cielo su Diusu yani su tsuatibana. \c 4 \s1 Piada piada cuana Diusu sa jabuetsuati cuana jenetia enetiderata \p \v 1 Espíritu Santo ja ecuana butsepi equisatani. Tiempo beju epupeni su, piada piada cuana Diusu sa jabuetsuati cuana jenetia enetideratayu. Bid'umimi ebuetsuaji cuana sa jabuetsuati cuana su bahui jei eputa huecuana. Tueda bid'umimi jabuetsuati cuana da Ishahua peje jenetia. \v 2 Cristiano cuana ja bid'umimi ebuetsuaji, bubeta cuana bahui id'abaja yata. Tueda bid'umimi ebuetsuaji, bubeta cuana da mue mecuana sa ai biame piba, ai madhada cuana a putsu. \v 3 Tuneda emenahuebatani ebutseneti puji. Diusu ja pamapa saida ai dia taji cuana ichataidha biame, cristiano cuana ebuetsuatani huecuana piada piada ai dia taji cuana padiata huecuana puji. Beju Diusu sa tsada tu peje su jei eputani cuana ja pamapa ai dia taji cuana tu diusulupai a putsu, padiata huecuana. \v 4 Aimue detse etse aidhe biame ai dia taji cuana menahueba cua mahue, pamapa ai dia taji Diusu ja ataidha cuana da saida putsu. Beidaji neje ecuaneseda inatsu taji, diusulupai Diusu a putsu. \v 5 Ahua ecuaneda Diusu sa mimi neje diusulupai ya su, pamapa ai dia taji cuana da saida epu. \s1 Jesucristo sa emebajaji saida \p \v 6 Timoteo, ahua miada ye quema jabuetsuati cuana edue cuana ebuetsua su, mida Jesucristo sa emebajaji saida epu. Quema jabuetsuati cuana miada pia cuana buetsua putsu, miada quitaita Diusu eshanapaderati, daja huecha Diusu peje su enimetucheaderati. \v 7 Netideraque bid'umimi jabuetsuati cuana peje jenetia. Saida nimebutsepi Diusu butse su puniunetique. \v 8 Equita sa saida puji jasituti taji biame, ebia su saida, chujeji Diusu butse su nimebutsepi epu puji. Ahua ecuaneda Diusu butse su ye mundo su yani tupu nimebutsepi epu su, ecuaneda saida, nimebeidaji epu. Cielo su di ecuaneda ecuinati su, nimebeidaji Diusu neje yanienitiyu. \v 9 Beju tueda quema quisa cuana da ene quita, butsepi putsu, pamapa sa jei pu taji ema peje su. \v 10 Ecuaneda Diusu jubida emebajainia, pia cuana ja ecuana emadhabatani biame. Tu peje su ecuaneda ebia su enimetucheatiani, tueda da eid'e eni Diusu putsu. Tueda da pamapa D'eji su Aji. Quebata cuana tu peje su jei eputa su, tuahueda d'eji su yata huecuana. \p \v 11 Jubida cristiano cuana buetsuaque quema quisa cuana. \v 12 Be aiya biame ai eni mahue nime ba taji, mida edeahue ba putsu. Mique mimi, ai puiti cuana da saida, butsepi papu. Pamapa su ibuneda baque. Diusu peje su jubida janimetucheatique. Da su pamapa edue cuana ja daja mida ba putsu, daja huecha ata cua huecuana. \v 13 Ema epue teje Diusu sa derejiji mimi cuana edue cuana butse su mimiame taji. Da neje nimetucheameque huecuana, buetsuadera putsu. \v 14 Equene Diusu ja mi huaratiatana, ehuidusuji cuana ja tuna sa eme mi bia su ichatana putsu. Be setaji Diusu ja mi tiatana ai cuana. \p \v 15 Daja hue tueda ai saida cuana su puderatique pamapa ja cuaja mi Diusu neje saida epuderaniuneti bataque puji. \v 16 Mida quitaita jarejatique. Daja huecha mique jabuetsuati cuana su. Mique jabuetsuati cuana quitaita miada di aque. Pamapa ai su nimetucheda puderaque. Ahua daja miada yaderati su, mida d'eji su epu. Daja huecha mi id'abaji cuana d'eji su eputa. \c 5 \s1 Cuaja edue cuana neje jadusutime pu taji \p \v 1 Edue Timoteo, be d'ayaji tata edhi cuana. Mique tata quitaita nime quisaque huecuana ibuneda neje. Edeahue cuana mique edue quitaita nime ba taji. \v 2 Punatia cuana mique cuara quitaita nime ba taji. Epuneje cuana mique dudu quitaita nime ba taji. Tuna neje saida, butsepi jadusuti taji. \p \v 3 Ahue manujiji ene quita tsahuataja eputani cuana edue cuana sa tsahua taji. \v 4 Ahua quebata ahue manujiji bacuaji, utsecuaji su, tuneseda puji tueda ba taji. Tueda da Diusu sa tsada. \v 5 Ahue manujiji bacua mahue cuana Diusu peje su jubida enimetucheatitani, familia mahue putsu. Tsine, dhidha Diusu ebia su ebajatani huecuana. Tueda ahue manujiji ichenu cuana da edue cuana sa tsahua taji. \v 6 Quebata ahue manujiji tu mehua hue mesa ai utsatada madhada cuana yatani su, tueda eid'e biame, manujiji nime Diusu butse su. Aimue tueda edue cuana sa tsahua taji mahue. \v 7 Quisaque edue cuana pamapa tueda ai cuana pashanapenita huecuana puji, cuaja ahue manujiji cuana neje a taji. \v 8 Ahua quebata deja ja mesa familia quitaita aimue ebatani mahue su, Diusu sa jacuatsasiati cuana aimue yaderatani mahue. Tueda da Diusu peje su jei eputani mahue ebia su madhada hue. \p \v 9 Ahua quebata ahue manujiji sa sucuta tunca maraji ebia su yani su, tueda ebutseneti mahue jamitsuti pu putsu, ilisha sa etsahuaji pu cua. \v 10 Ahua mesa piada ebutse neje bahui saida jaquinatina, ai saida cuana a bahue, ebacua saida sehuame bahue, perepereji cuana saida ba bahue, edue cuana pamapa ai chidi su saida ba bahue, sufri eputani cuana tsahua bahue, pamapa ai saida cuana jubida neje a bahue puina su, da su tueda ilisha sa etsahuaji pu cua. \v 11 Epuneje ahue manujiji cuana aimue inatsu taji mahue ilisha sa etsahuaji paputa huecuana puji. \v 12 Cuapuitime tuneda neicha ahueji puja puta cua, epuneje putsu. Ahua jahuetita cua su, Cristo emebajarijita. Da su juchaji eputa, huecuana, mecuana sa jamitsuti arijitana putsu. \v 13 Epuneje ahue manujiji cuana tunada detse puta cua, jahuetiji mahue putsu. Ete meamea puniuneti putsu, mimi aida puta cua huecuana. Pia cuana sa ai cuana su bahui jahuarutita cua huecuana. \v 14 Da su yama epuneje ahue manujiji jubida equisainia pahuetita huecuana puji. Bacuaji paputa hucuana. Tuna sa ete quitaita cuana saida pabatita huecuana. Ahua daja saida epuniunetita huecuana su, cristiano cuana ja aimue madhada ebata huecuana mahue. \v 15 Piada piada ahue manujiji cuana Cristo peje jenetia netidera putsu, Ishahua tije yatani huecuana. \p \v 16 Neicha yama mi equisainia, ahua quebata edue sa familia ahue manujiji yani su, tuseda puji saida ba taji dharejiji edue cuana sa atadhada epu mahue puji. Da su edue cuana ja ahue manujiji ene quita tsahuataja eputani cuana bahui patshuata. \p \v 17 Ehuidusuji cuana ja edue cuana saida pahuidusuta. Saida pabuetsuatita huecuana. Saida Diusu sa quisa cuana pamimita huecuana. Meiyubaque ehuidusuji cuana. Saida chujetia taji huecuana. \v 18 Uja Diusu sa mimi epuani tueda ai cuana jepuiti: “Be juye sa ehuiburisiji ichaji, emudia epuneti su.” Neicha uja epuani Diusu sa mimi: “Mudu puji sa yani echuje einatsuti puji.” \p \v 19 Be tipeida edue cuana sa ehuidusuji tuaquisaji. Beta ahua quimisha etuaquisaji yani su, da su bahui tuaquisata cua. \v 20 Ahua ehuidusuji ene quita jucha atana su, pamapa dharejiji edue cuana butse su, tuaquisa putsu, d'aya taji pamapa edue cuana iyuame paputa puji. \v 21 Diusu, Jesucristo, mesa dharejiji ángel cuana butse su yama mi jubida ecuatsasiainia, daja hue quema jacuatsasiati aque, aimue dhare putsu mahue. \v 22 Be aidhe biame tipeida edhuidusuji ichaji. Equene ba taji mesa jucha yani ahua mahue. Ahua mesa jucha yani su, be tueda ichaji ehuidusuji. Tueda juchaji eshanapainia biame, ehuidusuji eicha su, da su miada tueda etsabainia. \p \v 23 Be yahui bahui id'iji. Vino chidi id'ique eidue nime mique edhe saida papu puji, mida nedaji pad'i putsu. \p \v 24 Piada piada cristiano cuana sa jucha cuana batasaida epuani. Castigo su tueda jucha cuana ja edusutani huecuana. Pia cuana sa jucha cuana mu bataji mahue biame, pia tsine su mecuana sa jucha cuana bataji epu. \v 25 Daja huecha ai saida ajiji cuana batasaida. Pia ai saida cuana ajiji cuana mu bataji mahue biame, pia tsine su bataji epu. \c 6 \s1 Emebajaji cuana jepuiti quisa \p \v 1 Pamapa emebajaji edue cuana sa emetse cuana iyuba taji. Tuneseda puji saida pamudumuduta huecuana cristiano cuana saida Diusu sa puji pamimita puji. \v 2 Ahua quebata emebajaji sa emetse Cristo jepuiti edue epuani su, emebajaji ja tueda saida neje pabata. Be iyubarijiji emetse, Cristo jepuiti edue ba putsu. Ebia su saida quita emetse iyuba taji, Cristo jepuiti edue ibuneda putsu. Beju daja buetsuaque dharejiji edue cuana. \p \v 3 Ahua quebata ja pia jabuetsuati cuana ebuetsuatani su, aimue Echua Puji Jesucristo sa jabuetsuati butsepi quitaita cuana ebuetsuatani mahue. \v 4 Tueda ebia su aida ebatiani. Aimue ai biame eshanapatani mahue. Jacuicuinatija bahui epuani. Tueda jacuicuinati cuana jepuiti pamapa ai madhada cuana ecuinanani. Cristiano cuana huamahuama eduininiametitani. Huamahuama madhada hue ebatitani huecuana jacuicuinati cuana jepuiti. \v 5 Tuneseda jacuicuinati cuana pupe bue mahue. Mecuana sa piba madhada cuana pitsajiji, Diusu sa ene quita mimi cuana bue mahue ta huecuana putsu. Tuna sa piba su Diusu sa quisa saida cuana quisaquisa pu putsu, chipilu einatsu puji bahui pepe hue eputani huecuana. Beju tueda cristiano madhada cuana peje jenetia netideraque. \p \v 6 Enei hue, quebata ja Cristo eshanapatani, tueda da nimebeidaji. Chipilu mesa tsada mahue nimebeidaji epu puji. \v 7 Beju ye mundo su ecuaneda aiji mahue bataji puana. Daja huecha ecuaneda emanu su, aimue ai biame edusu mahue. Da putsu, aimue ecuaneseda ebia su chipilu tsada ba taji mahue. \v 8 Saida ecuaneseda ani taji jana, ejud'uji tupu neje. \v 9 Ebia su chipilu inaja eputani cuana Ishahua ja epirubatani enimemadhatia puji huecuana. Tipeida jucha yametani huecuana, mecuana sa utsatada madhada cuana a putsu. \v 10 Cristiano cuana chipilu eje cua biame eputani putsu, pamapa ai madhada cuana yani. Piada piada cuana da chipilu eje cua biame putana putsu, Diusu sa jabuetsuati cuana jenetia netideratana. Daja netidera putsu, ebia su sufrimiento neje jamadhatitana huecuana. \s1 Ai madhada cuana tuchea putsu, Diusu sa quisa saida cuana quisaquisa pu taji \p \v 11 Timoteo, aimue mida chipilu tsada baji cuana nime mahue, mida da Diusu sa deja putsu. Tuasiuque pamapa tueda ai madhada cuana. Ai butsepi cuana bahui a putsu, Diusu peje su janimetucheaderatique. Pia cuana ibuneda baderaque. Paciencia aidaji, nimemitsida puque. \v 12 Diusu peje su nimetucheda puque pamapa ai madhada cuana su tuchea putsu, mesa jabuetsuati saida cuana ebuetsua puji. Pibaderaenique Diusu ja mi tu neje cielo su eid'e yameenitayu. Da puji Diusu ja mi dharetana. Saida miada Diusu quisanetiacuinana dueji cristiano cuana butse su. \v 13 Daja huecha Jesús di saida jaquisanetiacuinatiana Pilato butse su. \v 14 Beju pamapa eid'e amejia Diusu, Jesucristo detse butse su yama mi jubida ecuatsasiainia, butsepi puque aimue aiya biame mi etuaquisata mahue puji. Apeque pamapa quema jacuatsasiati cuana Cristo epueicha teje. \v 15 Diusu aida sa tsada hora su Cristo epue cielo jenetia, tueda da pamapa pia echua puji cuana ebia su aida Echua Puji Diusu putsu. \v 16 Tueda bahui manu bue mahue. Hueda jubida su eid'e yanieni. Dapia aimue aiya biame nariata cua mahue. Aimue aiya biame tueda batana mahue, daja huecha aimue bata cua mahue. Pamapa cristiano cuana ja tueda bahui saida pabaenita. Tuseda puji saida pamimienita huecuana. Tuahueda pacuatsasiaenita tucheda neje. Daja papu. \p \v 17 Quisaque chipiluji cuana jubida be ebia su aida pabatita huecuana, chipiluji huecuana putsu. Be chipilu su panimetucheatita huecuana, chipilu cuana da epupe putsu. Diusu peje su bahui panimetucheatita huecuana, tueda da eid'e eni putsu. Tuahueda ecuana pamapa ai saida cuana etiatani ecuana sa saida puji. \v 18 Quisaque chipiluji cuana ja ai mudu saida cuana paata huecuana. Ai hora papu tsahuataja eputani cuana patsahuata huecuana. \v 19 Ahua daja yata huecuana su, Diusu ja echuje cielo su etiata huecuana. Dapia tu neje saida yanienititayu huecuana. \s1 Tije quisa cuana \p \v 20 Timoteo, yama mi uja equisainiayu: Diusu ja mi menajatiatana jabuetsuati cuana saida quinaenique. Be jacuicuinatiji deja bahue eni nime ebatitani cuana neje. Bahue eni pepe epibatitani huecuana biame, aimue daja mahue, mecuana sa jabuetsuati cuana da bid'umimi putsu. Be jahuarutiji tueda bid'umimi jabuetsuati neje. \v 21 Tueda bid'umimi jabuetsuati tije aji cuana da Diusu sa ene quita jabuetsuati cuana jenetia jeitid'utana. \p Diusu ja ebia su ibunebataque. Daja papu.