\id 2TI HARUAI NT 2 Timothy translated by John Davies 14-October-2009 
\h 2 Timoti 
\toc1 Pol köp agñɨŋ rɨbyöbö aku Timoti kai kɨtöŋa 
\toc2 2 Timoti 
\mt1 Pol köp agñɨŋ rɨbyöbö aku Timoti kai kɨtöŋa  
\c 1  
\p
\v 1 Nɨ Pol. Krais Jisas an nöbö mö ñöx nɨgön wöröxöŋ aku mɨ, God nɨ mɨ uliöxön kömö pɨmɨn, nɨ kömö mag yoŋyöbö kömö öim mɨdɨb mag aku pɨla. God rɨb nuŋ mag akwör rɨmɨn nɨ Krais Jisas mönö wä pön dub nöbö nuŋwa mɨdla.   
\p
\v 2 \x - \xo 1:2 \xt Apos 16:1; 1Tim 1:2\x*Ha madmag yöbö nɨ Timoti, nagö köp kɨ kai kɨtmɨdla. Acö God aipam, Nöbö Dib ana Krais Jisas aipam, nagö uliöxön, pɨ ösös rɨ ri abön nugwidɨx mɨdɨŋ, naŋ tar mɨd ri abö.   
\s1 An God mönö yad nöinɨŋ aku, möigw yöxöinɨŋ  
\p
\v 3 \x - \xo 1:3 \xt Apos 23:1\x*Nöso auso nöbö God mabö rɨ mɨdmɨdöi mag akuyöbö, nɨ algör ör rɨb mös yöx nugwöi, God nugwör rɨbyöx nugwön, mabö nuŋwa rɨmɨdla. Nɨ mil pɨxmag yuö bö God höjöpalmɨdɨl aku, nɨ öim öim ib nagö urön, God nugwo ri ablaŋe rɨmɨdla.  
\v 4 Nagö imɨmö aku rɨbyöx nugu gɨrön mɨdla. Makwam, nagö u nugwön, nɨ mɨ ödöriö wahax pɨna.   
\p
\v 5 \x - \xo 1:5 \xt Apos 16:1\x*Naŋ rɨb paŋyöbö adakwör yöx nugwön, Krais Jisas nugw pɨ cɨcɨ nɨglö aku, rɨbyöx nugu gɨrön mɨdla. Apɨnaŋ Lois, nam Yunis yöŋö, Krais Jisas nugw pɨ cɨcɨ nɨgön mɨdmɨdmä mag akuyöbö, nagö kwo algör Krais Jisas nugw pɨ cɨcɨ nɨglaŋö, rɨ rɨbyöx nugula.  
\v 6 \x - \xo 1:6 \xt 1Tim 4:14\x*Naŋ Krais Jisas nugw pɨ cɨcɨ nɨgmɨdlö makwam, nɨ nagö yadmɨdla, imag na yöcmac rol nagö aku nɨgmön, God nagö ap wä nölöŋ aku, rɨbyöx nugu gɨrön mɨdö. Ap yuö naŋ kwo mɨd aku, pɨrmɨdaŋ pina nɨgöna.  
\v 7 \x - \xo 1:7 \xt Rom 8:15\x*God nuŋ Inöm nuŋwa anɨŋ nölaŋ, ipöxöinɨŋ; God Inöma nuŋ raŋ, an ölɨsö nuŋwa pön, nöbö mö akuyöbö ñɨgö madmag nɨgön, mɨxɨñ ana keir rɨbyöxöl adaku röinɨŋ.   
\p
\v 8 Makwam, naŋ Nöbö Dib ana mönö wä nuŋwa yad nölaŋ, möigw henɨm. Nöbö mö akuyöbö ñɨgö amnör yad nölö. Nɨ Nöbö Diba mönö wä nuŋwa yad nölmɨdmön, nɨ nag nɨgim aku, naŋ kwo algör ör möigw henɨm. God nuŋ ölɨsö nuŋwa nagö nölmɨd aku, Jisas mönö wä aku yad nöl yönmɨdö. Aliö almɨdaŋ, nagö rɨ gwogwam rɨmɨdɨŋ, rɨb mɨga yöxmɨjɨnö.  
\v 9 \x - \xo 1:9 \xt Epes 2:8-9; Tait 3:5\x*God anɨŋ pɨ asɨx abön, nöbö mö lei na keir mɨjöñɨŋö, röŋa. An mag wä rol aku dum nugwön God anɨŋ pölöŋ; nuŋ keir höd aliö cɨnö, röŋ aku, anɨŋ nöbö mö mɨ ödöriö ögwö yöxön pöŋa. Mögörɨb maduar ör rɨ nɨgölöŋ wop aku, God nöbö mö mɨ ödöriö ögwö yöxön, Krais Jisas nöbö mö akuyöbö ñɨgö pɨ asɨx abönɨŋö, rön, rɨb aku yöx nugwöŋa.  
\v 10 \x - \xo 1:10 \xt Hib 2:14\x*Makwam weik, God nöbö mö mɨ ödöriö ögwö yöxmɨd aku, wöxnö nugwöla. Krais Jisas hön, anɨŋ nöbö mö ñöx nɨgön wöröxöŋ aku mɨ, God anɨŋ nöbö mö magalɨg mɨ ödöriö ögwö yöxmɨd aku, wöxnö nugwöla. Krais Jisas anɨŋ nöbö mö ñöx nɨgön ölɨŋ höb pön wöröxöŋ aku mɨ, wopik wöröxɨb mag aku ölɨsö i mɨdöl. Jisas almɨdöŋ aku mɨ, kömö mɨdɨb mag aku aipam, öim öim mɨdɨb mag aku aipam, anɨŋ nöbö mö wöxnö yabua.   
\p
\v 11 \x - \xo 1:11 \xt 1Tim 2:7\x*Krais Jisas mönö mag wä aku nöbö mö akuyöbö magalɨg nugwɨŋ, me rön, Krais Jisas nuŋ keir nɨ yadmɨn, nɨ Jisas mönö wä pön dub nöbö nuŋwa i mɨdön, mönö mag wä aku nöbö mö piaku magalɨg yad nöl ri abön, mönö il aku yad nöl ri abön, rɨmɨdla.  
\v 12 Jisas mönö wä nuŋ aku yad nöl yönmɨdla aku mɨ, nɨ rɨ gwogwam rɨm, öliöxön mɨdla. Jɨ nɨ möigw yöxöi; nɨ rɨbyöx gɨba alɨg mɨdla. Nugw pɨl Nöbö aku nugwo mödö nugula. Nɨ nugwo ap nöil aku, nuŋ ap aku pön nugwidɨx mɨd ri abön, rɨp duön duön, wop maiyöbö aku höna.   
\p
\v 13 Mönö yadmön nugulö aku, paxdöriar mɨdö, rön, nöbö mö piaku ñɨgö yad nölö. Naŋ aliö alön, Krais Jisas nugw pɨ gɨr mɨd gɨrön, nöbö mö piaku ñɨgö madmag nɨg gɨrön, rɨmɨdö. Naŋ Krais Jisas nugwo cɨrɨp ri abön rɨmɨdlö aku mɨ, paŋ mag akuyöbö alɨb maga ra.  
\v 14 \x - \xo 1:14 \xt 1Tim 6:20\x*God ap wä imag rol nagö nɨgöŋ aku, pɨ ri abö. Inöm Leia yuö an kwo mɨd aku mɨ, ölɨsö nuŋ akwör nagö rɨ nölaŋ, pɨ ri abö.   
\p
\v 15 Naŋ nugulö, nöbö mö Esia Propins yöbö piaku magalɨg nɨ röböxmä. Pigelas aipam, Hemogenis aipam, paŋ mag akwör rɨmä.  
\v 16-17 Nöbö Diba nuŋ Onesiporas nöbö mö ram nuŋwa mɨdöi piaku uliöxön pɨ ri abaŋ. Nuŋ taun dib Rom hö mɨdöŋ wop aku, möigw yöxnö, rön, nɨ röböxölöŋ. Nɨ yörɨk naga mɨdla, nuŋ nɨ öliöxön hölu nugup hön nugwöŋa. Wop mɨga akwör hön nɨ nugumɨdöŋ aku, nɨ mɨ wä röŋa. \fig Nɨ yörɨk naga mɨdla, Onesiporas nuŋ nɨ öliöxön hölu nugup hön nugwöŋa.|alt="chains & prison wall" src="HK00204B.TIF" size="col" ref="1:16-17" \fig*  
\v 18 Makwam, wop dib maiyöbö aku, Nöbö Diba nuŋ Onesiporas nugwo ögwö yöxön pɨ ri abaŋ. Nɨ Epesas mɨdmön, nɨ pɨ ri abön ap hörɨrör agap apɨm mɨga akwör rɨ nölmɨd aku, naŋ keir nugw ri ablö maku.   
\c 2  
\s1 Jisas nugwo cɨrɨpön, ami nöbö nuŋwa röxg mɨjnɨm  
\p
\v 1 Makwam ha na Timoti. Naŋ Krais Jisas nugwo mai dumɨjɨnö aku, nuŋ nagö ögwö yöxön pɨ ri aböna. Makwam, naŋ rɨb paŋyöbö iör yöx nugwön, ususör rɨmɨdö.  
\v 2 Jisas mönö wä nuŋwa nöbö mö akuyöbö ñɨgö öim yad nölmɨdla nugulö aku, Krais Jisas nugw pɨ gö nɨgön mönö wä nuŋwa mai dumɨdöi nöbö mö bli hölu nugwön, ñɨgö Jisas mönö wä yad nöl ri abö; nöbö mö wä akuyöbö ñɨŋ piöŋö nöbö mö halöu ha bli Jisas mönö wä aku yad nöl ri aböña.   
\p
\v 3 \x - \xo 2:3 \xt 2Tim 1:8\x*Krais Jisas mabö rɨmɨdöl aku, nöbö mö bli anɨŋ rɨ gwogwam rɨm, öliöx mɨdöla. Nagö algör ör, Jisas Krais ami nöbö wä nuŋwa mɨdlö aku mɨ, nɨ algör ör cöñɨŋö, rön, ipöxön, nugwo röböxmɨjɨnö; mabö nuŋ aku amɨn rɨ mɨdö.   
\p
\v 4 Ami nöbö bla, nöbö dib ñɨŋ aku nugwo wä raŋ, me rön, rɨba paŋ akwör yöx nugumɨdöia. Ap rɨŋadö piaku rɨbyöx nugwölöi.  
\v 5 \x - \xo 2:5 \xt 2Tim 4:8\x*Nöbö mö ipalɨp dumɨdöi bla, ipalɨp duba nugwidɨx mɨdöi nöbö bla rɨg yadöi yadöi mag akwör rön, ap wä pɨmɨdöia.   
\p
\v 6 \x - \xo 2:6 \xt 1Kor 9:7\x*Nöbö mö mörö mabö rɨmɨdöi bla, iŋ ölɨŋ wöröxmɨdöi aku mɨ, ñɨŋ mɨnöbö höd nɨmɨŋ. Mai nöbö mö bli nɨmöña.  
\v 7 Mönö yadmɨdɨl kɨ, nagö rɨbyöx nugugu mɨdaŋ, Nöbö Diba nagö rɨba nölaŋ, nugw ri abnö.   
\p
\v 8 \x - \xo 2:8 \xt Rom 1:3; 1Kor 15:4\x*Jisas Krais nugwo rɨbyöx nugu gör mɨdane. Depid ha yöxɨm yöxɨp höuöilmel rön, Jisas nugwo yöx pön hömä. Nuŋ wöröxön öbɨlöŋa. Jisas Krais mönö mag wä yadmɨdɨl aku, mönö aku maku pal.  
\v 9 \x - \xo 2:9 \xt Epes 3:1,13; Pil 1:12-14\x*Nɨ mönö mag wä aku yad nölmɨdmön, nɨ nöbö mag gwogwo rɨb i röxg nag nɨgɨm mɨdla. Makwam God Mönö aku naga mɨdöl.  
\v 10 Makwam, God nöbö mö pɨnö, rön, nugw nɨg bla, Krais Jisas ñɨgö pɨ asɨx abaŋ, ñɨŋ God pɨsaŋ mil mag wä nuŋwa alɨg öim öim kömö mɨdɨŋ, me rön, nöbö mö piaku nɨ ölɨsö wölaŋ rɨ gwogwam rɨmɨdɨŋ, nɨ ipöxön röböxöinöm.   
\p
\v 11 \x - \xo 2:11 \xt 2Kor 4:11\x*Mönö aŋadö nugw pɨb i yadɨba rɨmɨdla:  
\q1 An Krais Jisas pɨsaŋ wöröxmɨŋa aku mɨ,  
\q2 nuŋ pɨsaŋ öim öim kömö mɨjnɨŋa.   
\q1
\v 12 \x - \xo 2:12 \xt Mat 10:33\x*An Krais Jisas mabö nuŋwa rɨmɨdɨŋ,  
\q2 nöbö mö piaku anɨŋ ölɨsö wölaŋ rɨ gwogwam rɨmɨdɨŋ,  
\q1 ipöxiö röböxöinɨŋ aku,  
\q2 nuŋ Kiŋ mɨdön nöbö mö piaku nugwidɨx mɨjön wop aku,  
\q2 an nuŋ pɨsaŋ mɨdön, algör ör nöbö mö piaku nugwidɨx mɨjnɨŋa.  
\q1 An Krais Jisas nugwo nugwölölɨŋö, cɨnɨŋ aku,  
\q2 anɨŋ kwo algör ör, ñɨgö nugumɨdöiö, cöna.   
\q1
\v 13 \x - \xo 2:13 \xt Rom 3:3-4; Tait 1:2\x*Krais Jisas mönö wä nuŋwa rɨg yadmɨd mag akuyöbö röinɨŋ aku,  
\q2 nuŋ mönö wä nuŋwa rɨg yadmɨd mag akwör cöna.  
\q1 Aku agapɨm: Krais öim öim mönö ma akwör yadmɨda;  
\q2 mönö mɨ aku röböxbä maga nɨgöl.   
\s1 God mabö nagö yad nɨgöŋ aku, ususör rön rɨ ri abö  
\p
\v 14 \x - \xo 2:14 \xt 1Tim 6:4; Tait 3:9\x*Mönö kai kɨtmɨdɨl kɨ, nöbö mö akuyöbö ñɨgö öim öim yad nöl ri abaŋ ñɨŋ mönö aku uplöbölɨŋ. Naŋ nöbö mö akuyöbö ñɨgö yad nöl ri abön yajɨnö, God nuŋ nugugu mɨd makwam, ñɨŋ mönö mag akuyöbö nɨgön nuö nuö yadɨp uhölɨŋ; hör mönö maga nuö nuö yadɨp uhömɨjöñ aku, mag wä i ren; nöbö mö mönö aku nugwöñ akuyöbö ñɨgö gwogwo cöna.  
\v 15 \x - \xo 2:15 \xt 1Tim 4:6\x*Nɨ God mabö nuŋwa rɨ ri abön, mönö mɨ nuŋ aku ödöriö akwör yad nöl ri abmɨjɨn aku, God nɨ wä cönɨŋö, rön, rɨba mag paŋ akwör yöx nugwön, ususör rön rɨ mɨdö.  
\v 16 \x - \xo 2:16 \xt 1Tim 4:7\x*God nugwo rɨbyöx nugwölön, mönö hör öim öim yadɨp uhö gɨr cöñ aku, nagö pɨsaŋ yadmɨjɨnö. Yadɨp uhö gɨrön, ñɨŋ God Mönö ma aku röböxön, pad piaku diöña.  
\v 17 \x - \xo 2:17 \xt 1Tim 1:20\x*Mönö inakmönö hörön yad nöiöñ aku, uj ulmɨdö mɨŋi nɨgön, mɨdɨp duön, mai mɨ uj diba nɨg mag akuyöbö cöna. Nöbö yad nölɨb nöbö Haimenias Pailitas yöŋö ñɨŋ mag akuyöbö rɨmɨdöia.  
\v 18 Nöbö piaku God Mönö ma aku röböxön yadmɨdöia, “An mödö öbɨlmɨŋa; wöröxön höbkal öbɨleñɨŋö,” rɨmɨdöia. Ñɨŋ mönö inakmönö aku hörmɨn, nöbö mö bli Jisas mönö wä aku mödö röböxöia.   
\p
\v 19 \x - \xo 2:19 \xt Naba 16:5; Ais 52:11; Jon 10:14; 1Kor 8:3\x*Jɨ God ram nuŋwa padö pɨl gö nɨgöŋ aku ölɨsö mɨda. Padö mibɨl yöra kai kɨtɨb bli mɨda: “Nöbö Diba nuŋ nöbö mö nuŋwa keir nugwa.” Mönö i aipam mɨda: “Nöbö mö ñɨŋ Nöbö Diba nöbö mö nuŋwa mɨdölö, rɨmɨdöi piaku, mag gwogwo rol aku aŋadö höglöm nölɨp duŋ.”   
\p
\v 20 Ram dib ödöriö piaku, namag kwosö hörɨrör mɨda. Namag kwosö bli, rɨg gol mönö silpa pön rɨmɨdöia. Bli piöŋö bɨ mönö mögö akwör pön rɨmɨdöia. Namag kwosö bli pön, ap pɨx yöi, ap wä wä piakwör nɨgmɨdöia; jɨ kwosö bli hör ap piaku amnɨmab nɨgmɨdöia.  
\v 21 Nöbö mö Krais Jisas nugw pöi piaku magalɨg paŋ mag aliö akwör. Nöbö mö bɨl kai ap pɨx ap amnɨmab hölul cöñ piaku, ñɨŋ nöbö mö lei nuŋwa keir mɨdön, mabö wä bɨl kai mɨjön akuyöbö ñɨŋ wahax pɨ gɨrön mabö cöña. Makwam, Nöbö Diba nöbö mö lei nuŋwa keir piaku nugwön, ñɨgö mabö wä bli yad nɨgöna.   
\p
\v 22 \x - \xo 2:22 \xt 1Tim 6:11\x*Makwam, ha mö ha nöbö bli rɨb gwogwo yöx nugumɨdöi mag aliö akuyöbö nagö rɨb aliö yöx nugumɨjɨnö. Nagö piöŋö rɨ ri abön, God rɨg yadmɨd mag akuyöbö akwör rön, Krais Jisas mönö wä nuŋwa nugw pön, nöbö mö piaku madmag nɨgön, ususör rön rɨp duön, nöbö tar höimölɨb mɨda mɨdön, rɨ mɨdö. Nöbö mö hölul mɨdöl akuyöbö röxg mɨdön, Nöbö Diba nugwo höjöpalmɨdöi piaku pɨsaŋ nɨgiö nɨg gɨ mɨdön, yadmɨdɨl adakwör rɨ mɨdö.  
\v 23 \x - \xo 2:23 \xt 1Tim 4:7\x*Mönö hör yadɨp uhö gɨrön, nuö nuö yadmɨdöi piaku, nagö pɨsaŋ yadmɨjɨnö. Aku agapɨm: al mɨjöñ aku, mai ölɨsö wölaŋ, ölɨsö rödön, mönö gwogwo yadön, nuö nuö rɨb gwogwo nugwöña.  
\v 24 Nöbö mö Nöbö Diba mabö nuŋwa rɨmɨjöñ piaku, nuö nuö yadölön, tar mɨdön, nöbö mö pɨ ösös rɨ ri abön, yad nöl ri abön cöña. Ñɨgö rɨ gwogwam rɨŋ, paiŋö mag i rɨ gwogwam rölɨŋ.  
\v 25 Nöbö mö bli mönö ñɨŋa yöxmɨdölɨŋ, ñɨŋ tar yad nöl ri ab gɨr mɨdɨŋ, God nuŋ nöbö mö piaku rɨb wä nölaŋ, ap kib mag gwogwo rɨmɨdöi aku, pödpöd rɨmɨn aliö alölɨŋö, rön, höuöil nugwo adö hön, mönö ma ödöriö aku nugw pɨb maga ra.  
\v 26 Ñɨŋ aliö tar yad nöl ri ab gɨr mɨdɨŋ, rɨb wä haŋ, kɨjaki ñɨgö inag inag inakmönö hörön paŋ, nuŋ adö mɨdön, mönö inakmönö nuŋwa nugumɨdöi aku röböxön mɨd ri abɨb maga ra.   
\c 3  
\s1 Wop maiyöbö kɨ nöbö mö mɨ rɨ gwogwam cöña  
\p
\v 1 \x - \xo 3:1 \xt 1Tim 4:1\x*Makwam naŋ nugulö, wop maiyöbö kɨ nöbö mö öliöxmɨjöña.  
\v 2 Ñɨŋ mɨxɨñ ñɨŋ keir akwör rɨbyöx nugwön, köme ulnöu löpöi gol rɨg ap bla akwör madmag nɨgön, anör nöbö mö diba mɨdölɨŋö, rön, ib ñɨŋa keir pɨrag wölön, nöbö mö akuyöbö yad höimöuön, nuö nuöm ñɨŋ bla mönö röd abön, nöbö mö ñɨgö rɨ ri abmɨdöi piaku ñɨgö wä rö rön yadeñ, God nugwo rɨbyöx nugweñ.  
\v 3 Ñɨŋ nöbö mö bli madmag nɨgeñ; nöbö mö ñɨgö rɨ gwogwam cöñ aku nugwön röböxeñ; nöbö mö bli ñɨgö mönö gwogwo mönö inakmönö hörön, tar mɨd höimöl gɨ mɨdeñ; mɨ ödöriö ölɨsö gwogwo rödön, ap agap apɨm wä mɨd aku nugwɨŋ, mɨ ölɨsö wöiöna.  
\v 4 Ñɨŋ mönömɨm nugwön, amnör rɨ gwogwam rön, anör nöbö mö diba mɨdölɨŋö, rön, mɨxɨñ ana keir wä cön adakwör rön wahax pɨnɨŋö, rön, God nugwo madmag nɨgeñɨm.  
\v 5 \x - \xo 3:5 \xt Mat 7:15,21; Tait 1:16\x*An nöbö mö piaku nugwön, God nugw pöi nöbö mö rɨg rɨmɨdöi mag akuyöbö rɨ mɨdöiŋö, cɨnɨŋ aku, jɨ aku wöhö. God Inöma nuŋ raŋ, an ölɨsö nuŋwa pön, God rɨg yadmɨd mag akwör cɨnɨŋö, rön, rɨb aku yöx nugweñɨm. Makwam, naŋ nöbö mö mag aliö akuyöbö rɨmɨdöi piaku röböxön, pɨsaŋ mögum rɨmɨjɨnö.   
\p
\v 6 Nöbö aliö akuyöbö bli, tar ram ram nugup dumɨdɨŋ nugugɨrön, mö rɨb wä mɨdöl piaku ñɨgö yad wahax pön ram möl ñɨŋa pön duŋ, ñɨŋ ñɨgö mönö inakmönö hörön yad nölmɨdɨŋ nugwön mö piaku nöbö gwogwo piaku adö diöña. Mö piaku, ap kib mag gwogwo rɨmɨdöl mag pɨx piaku, pödpödiö örɨx abön mɨd ri abnɨŋö, rön, ömörö diba pön, rɨb diba yöx gɨr mɨjöña. Aliö alɨŋ, madmag ñɨŋa pabɨlɨm, rɨb gwogwo hörɨrör mɨga akwör hö ñɨgö pɨ adaku adaku rön, ödöi gwogwo piaku pön pɨxɨp duba cöna.  
\v 7 Mö piaku röxgöb, mönö adadö bla nugwöña, jɨ Krais Jisas mönö wä aku yöxmɨjöñ aku, aku mönö ma maku, me rön, nugweñ.  
\v 8 \x - \xo 3:8 \xt Eks 7:11\x*Nöbö Janis Jabris yöŋö, Mosɨs mönö yadöŋ aku höj nugwim mag akuyöbö, nöbö mönö inakmönö hörmɨdöi piaku algör ör Krais Jisas mönö ma aku höj nugumɨdöia. Ñɨŋ rɨb gwogwo akwör yöx nugwön, Krais Jisas mönö wä aku nɨg duöia.  
\v 9 Makwam almɨdöi mag aku mɨŋi uplöb rɨŋ dubä maga nɨgöl. Janis Jabris yöŋö rɨ gwogwam rɨm, nöbö mö wöxnö nugwim mag akuyöbö, nöbö mö weik mag aliö akuyöbö algör inakmönö hörön yad nölmɨdöi piaku algör wöxnö nugwöña.   
\s1 Jisas Krais mönö mag wä aku nugw pɨ ri abö  
\p
\v 10 Makwam naŋ nɨ pɨsaŋ mɨdön, rɨb mag paŋyöbö iör yöx nugwön, nɨ Jisas Krais mönö wä yad nölmɨdɨl aku aipam, nɨ rɨmɨdɨl mag wä adö aku aipam, naŋ mödö nugw ri abön paŋ mag akwör algör rɨmɨdlö maku. Nɨ Krais nugw pɨ gö nɨgön, mabö nuŋwa mɨ ususör rɨ gɨrön, nöbö mö bla ñɨgö madmag nɨgön, ömörö höm öliöx mɨdön röböxöi mag akuyöbö, naŋ mödö nugulö maku.  
\v 11 \x - \xo 3:11 \xt Apos 13:14-52; 14:5,8-20\x*Nɨ Krais mönö wä yad nölmɨdmön nɨ rɨ gwogwam rɨm, ömörö pön amɨn mɨdɨm aku, naŋ mödö nugulö maku. Nöbö mö taun dib Adiok, Aikoniam, Listra piaku nɨ rɨ gwogwam rɨm rɨm, ömörö pɨ öliöxön amɨn mɨdɨm aku, jɨ Nöbö Diba nɨ kömö pöŋ aku, naŋ mödö nugulö maku.   
\p
\v 12 \x - \xo 3:12 \xt Mat 16:24; Jon 15:20; Apos 14:22\x*Nöbö mö Krais Jisas nugwo cɨrɨpön, rɨg yadmɨd mag akwör rɨba rɨmɨdöi piaku, ñɨgö magalɨg ömörö nölɨŋ, öliöxmɨjöña.  
\v 13 Makwam nöbö mö gwogwo mönö inakmönö adakwör hör yad nölmɨdöi bla, mɨ ödöriö mag gwogwo rɨm rɨm duŋ, ñɨŋ höd nöbö mö gwogwo mɨdmɨdöi akuyöbö wöhö, mai mɨ nöbö mö gwogwo ödöriö mɨjöña. Ñɨŋ keir God ödöi wä aku nugweñ; nöbö mö bli ñɨgö mönö inakmönö aku yad nölɨŋ, ñɨŋ algör ör God ödöi wä aku nugweñɨm.   
\p
\v 14 Jɨ naŋ ha ulmɨdö akwör mɨdön, nagö Krais Jisas mönö ma aku yad nölmɨn, nugwön aŋadö akwör nugw pɨmö mönö wä aku ususör rön, nugw pɨ gɨrön, rɨg yad mag akuyöbö akwör rɨ gɨrön, rɨ mɨdane. An nöbö mö nagö mönö wä aku yad nölmɨn nugumö aku, naŋ mödö nugulö maku.  
\v 15 Naŋ nugulö, ha mɨ ulmɨdö mɨdmö wop aku, naŋ God Mönö Lei aku mödö nugumö. An God Mönö Lei aku mämäg nɨg nugumɨjɨnɨŋ aku, God Mönö Lei aku anɨŋ rɨb wä yöx nugw ri abɨb mag aku nölaŋ, Krais Jisas nugw pɨŋ anɨŋ pɨ asɨx abɨb mönö il aku nugw ri abnɨŋa.  
\v 16 \x - \xo 3:16 \xt Rom 15:4\x*God Mönö aku magalɨg, God nuŋ keir aŋöi abɨb mag nuŋwa pɨröŋa. Makwam, God Mönö aku magalɨg pön, nöbö mö akuyöbö ñɨgö yad nölön, nöbö mö mönö ma röböxöi piaku ñɨgö mönö nölön, nöbö mö rɨ gwogwam rɨmɨdöi piaku ñɨgö yadyöxön, nöbö mö ñɨŋ, pödpödiö God Mönö rɨg yadmɨd mag akuyöbö cɨnɨŋö, rɨ rɨbyöx nugumɨdöi piaku, ñɨgö yad nöl ri abnɨŋa.  
\v 17 Al mɨjnɨŋ aku, God mabö rɨ nölɨb nöbö mö nuŋ piaku, God Mönö aku nugw ri abön, God ñɨgö mabö wä pödiö pödiö yad nɨgön aku, ñɨŋ rɨba yöx nugw ri abön, mɨ rɨ ri aböña.   
\c 4  
\s1 God Mönö paxdöriö aku nöbö mö piaku yad nölö  
\p
\v 1 Nagö mönö kɨ hör yadmɨdöi. Krais Jisas nöbö mö nuŋ piaku magalɨg Kiŋ ñɨŋa mɨdön nugwidɨx mɨjɨnö, rön, höbkal hömɨjön wop aku, nuŋ nöbö mö kömö mɨjöñ bla aipam, nöbö mö wöröxim bla aipam, nuöm nɨg hörɨrör nɨgɨba rɨmɨda. Makwam, God aipam, Krais Jisas aipam nugugu mɨdɨm nugugɨrön, nɨ nagö mönö kɨ yadɨba rɨmɨdla.  
\v 2 God Mönö wä aku nöbö mö piaku yad nölö. Nöbö mö akuyöbö wahax pöñɨŋönö wahax peñɨŋö, rön, röböxmɨjɨnö; weik pöñɨŋönö peñ, aku rɨbyöx nugumɨjɨnö; ususör rön God Mönö wä aku yad nölö. Nöbö mö rɨ gwogwam rɨmɨdöi piaku yadyöxö. Nöbö mö mönö ma röböxöi piaku mönö nölö. Nöbö mö ñɨŋ, pödpödiö God Mönö rɨg yadmɨd mag akuyöbö cɨnɨŋö, rɨ rɨbyöx nugumɨdöi piaku, ñɨgö tar höimöliö mɨda yad nöl ri ab mɨdö.  
\v 3 \x - \xo 4:3 \xt 1Tim 4:1\x*Aku agapɨm: mai wop aku, God Mönö mɨ ödöriö aku nugwön, nugw peñɨm; yad nölɨb nöbö mö mɨga akwör yölɨŋ pön höŋ, ñɨŋ hör mönö inakmönö hör ör rɨb ñɨŋ keir du adakwör yad nölɨŋ, ñɨŋ nugwön wahax pɨ gɨrön nugw pöña.  
\v 4 God Mönö ma aku röböxön, haiwo hör akuyöbö yadɨŋ, rɨmgör nugw pöña.   
\p
\v 5 Makwam naŋ keir, ap agap apɨm cön aku, rɨbyöx nugw ri ab gɨr mɨdö. Ömörö hömɨdaŋ, rɨb mɨga yöx nugumɨjɨnö. Nagö mɨ ususör rön, Krais Jisas mönö wä aku nöbö mö akuyöbö yad nöl yönmɨdö. Nagö God mabö rɨ nölɨb nöbö nuŋwa mɨdlö aku mɨ, God nagö mabö bɨl kai yad nɨgöŋ aku, magalɨg rɨp dumɨd dumɨd aŋadö rɨ pörö.   
\s1 Nɨ womiöx wöröxɨba rɨmɨdlö, röŋa  
\p
\v 6 \x - \xo 4:6 \xt Pil 2:17\x*Nɨ Krais mabö nuŋwa rɨmön, nɨ nag nɨgɨm mɨdmön mɨdmön, weik pal nɨgɨŋ hañ nuŋwa pɨnaŋ, me rön, nɨ rɨmɨdöia. Makwam, mögörɨb rol il kɨ mɨdɨl kɨ, röböx dub wop aku womiöx ha.  
\v 7 \x - \xo 4:7 \xt 1Tim 6:12\x*Nɨ ususör rön, kɨjaki pɨsaŋ nuö nuö rɨp duön, ödöi womiöx yöra mödö höla. Nɨ ususör rön, Krais Jisas mönö wä aku nöbö mö akuyöbö yad nölɨp dumɨd dumɨd, Krais Jisas nugw pɨ gɨr mɨdön, mabö nɨ yad nɨgöŋ aku röböxöi; rɨg yadöŋ mag akuyöbö akwör magalɨg rɨla.  
\v 8 \x - \xo 4:8 \xt 1Kor 9:24-25\x*Nuŋ Nöbö Dib, nuŋ mönö pɨ nuöm nɨg ri abön yadmɨd aku mɨ, agap apɨm rɨla aku nugugu mɨdön, wop dib nuŋ aku haŋ, nɨ nöbö kömö wä nɨ, me cöna. Makwam nör wöhö; nöbö mö, Nöbö Diba hönɨŋö, rön, wä rɨmɨn nugugɨrön pöx mɨdöi akuyöbö, ñɨgö magalɨg paŋ mag akwör cöna.   
\p
\v 9 Timoti. Ödöi i mɨjön aku, nɨ mɨdɨl kɨ yadkap hane.  
\v 10 \x - \xo 4:10-11 \xt Apos 15:37-39; 2Kor 8:23; Kol 4:14\x*Nöbö nɨ pɨsaŋ mɨdmɨdöl piaku, weik nɨ pɨsaŋ yörɨk mɨdölöi. Nöbö nagö Demas, ap mögörɨb il kɨ madmag nɨgön, nɨ aŋadö röböxön, mödö taun dib Tesalonaika duöŋa. Nöbö nɨ Kresej nuŋ Galesia Propins duöŋa. Taitas nuŋ Dalmesia Propins duöŋa.  
\v 11 Nöbö paŋyöbö Luk ör nɨ pɨsaŋ mɨdöla. Krais Jisas mabö rɨmɨdɨl yörɨk, Mak nuŋ mabö rɨ ri ab mɨda. Makwam, naŋ du Mak yölɨŋ pön haŋ, nɨ pɨsaŋ yörɨk mɨdön mabö rɨ nölaŋ.  
\v 12 Nɨ Ticikas yad abmön Epesas duöŋa.  
\v 13 \x - \xo 4:13 \xt Apos 20:6\x*Hönö wop aku, taun dib Troas hön, ij ap uñ mɨxɨl na aku, nöbö nagö Kapas rama nɨgɨm makwam pön hane; ödöia mɨjön aku, köp nɨ rogw rɨ wob gɨ mɨd piaku magalɨg pön rag hane; nöi mɨjön aku, hön meme sipsip uña iba alɨg kai kɨtim piakwör pön rag hane.   
\p
\v 14 \x - \xo 4:14 \xt Ais 59:18; Rom 2:6\x*Nöbö kapa mabö rɨmɨd Aleksada nɨ rɨ gwogwam ödöriö röŋa. Nɨ alöŋ mag aku, Nöbö Diba nugwo paiŋö algör ör cöna.  
\v 15 Krais Jisas mönö wä yad nölmɨdöl aku, Aleksada nuŋ mɨ rɨ gwogwam röŋ aku mɨ, nɨ rɨ gwogwam röŋ mag akuyöbö nagö kwo algör ör rɨb maga rɨmɨd makwam, nugw ri ab gɨ mɨdö.   
\p
\v 16 Nɨ höd mönö diba yadim wop aku, nöbö i nɨ höglöm adö nugugu mɨdɨm mönö diba yadölim; ñɨŋ magalɨg nɨ röböxmä. Makwam God ñɨgö rɨb aku yöx nugu gɨrön mɨdölaŋ.  
\v 17 Nɨ mönö diba yadim aku, Nöbö Diba nɨ nugwidɨx mɨdmɨn nugugɨrön, mönö wä nuŋ aku nöbö mö piakuyöbö mɨga akwör hön mɨdim bla, ñɨgö amnör yad nölmön nugumä. Nöbö Diba rɨmɨn, hön laiön aku nɨ öbɨx nɨmɨb maga nɨgölöŋ.  
\v 18 Nɨ nugula, Nöbö Diba nɨ nugwidɨx mɨdmɨn, ap gwogwo i nɨ rɨb maga nɨgen; nuŋ nɨ kömö pön, mögörɨb wä nuŋ adöx yöd röul adö kau sö yöraku pön wöliöna. Nöbö Dib aku, ib nuŋwa öim öim yadɨŋ bɨl sö duaŋ. Mag aliö akuyöbö aku mag waiö.   
\s1 Pol yada, “Ñɨŋ mɨdöiŋ ä?” ra  
\p
\v 19 \x - \xo 4:19 \xt Apos 18:2; 2Tim 1:16-17\x*Mö Prisila aipam, nöbönɨŋ nuŋwa Akwila aipam, nöbö nagö Onesiporas nöbö mö ram nuŋwa mɨdöi piaku aipam ñɨgö yajɨnö, Pol “Ñɨŋ mɨdöiŋ ä?” rö, rö.   
\p
\v 20 \x - \xo 4:20 \xt Apos 19:22; 20:4; Rom 16:23\x*Nöbö nagö Erastas yörɨk hölöŋ; mɨd taun dib Korid piaku. Nöbö nagö Tropimas nugwo ap rɨmɨn, nɨ nugwo röböx höm taun dib Mailitas. \fig Ödöia mɨjön aku, köp nɨ rogw rɨ wob gɨ mɨd piaku pön rag hane.(4:13)|alt="Timothy brings scrolls to Paul" src="cn02087B.tif" size="col" \fig*   
\p
\v 21 Hödal diba höb wop aku igöp mɨd makwam, ödöia mɨjön aku, hödal hen adaku rɨmɨg hö.  
\p Makwam Yubulas, Pudens, Lainas, Klodia, Krais Jisas nöbö mö nuŋwa taun dib Rom kɨ mɨdöi akuyöbö magalɨg, “Nagö mɨdlö ä?” rɨmɨdöia.   
\p
\v 22 Timoti, Nöbö Diba nagö pɨsaŋ mɨjöna.  
\p God ñɨgö magalɨg uliöxön pɨ ri aböna.