\id 1PE HARUAI NT 1 Peter translated by John Davies 14-October-2009 
\h 1 Pita 
\toc1 Pita köp agñɨŋa kai kɨtöŋa 
\toc2 1 Pita 
\mt1 Pita köp agñɨŋa kai kɨtöŋa  
\c 1  
\p
\v 1 Nɨ Pita, Jisas Krais mönö wä pön dub nöbö i. Nɨ ñɨgö nöbö mö God maduar ör nöbö mö nuŋwa keir yad nɨgöŋa akuyöbö köp kɨ kai kɨtmɨdla.  
\p Ñɨŋ bli Podas mɨdöia, bli Galesia mɨdöia, bli Kapadosia mɨdöia, bli Esia mɨdöia, bli Bitinia mɨdöia. Ñɨŋ nöbö mö mögörɨb pad piakuyöbö mɨdöia. Mönö pik kai kɨt abmön, mögörɨb hörɨrör mɨdöi piaku waŋ nugwöña. \fig Pita nuŋ Krais nöbö mö mögörɨb pik köp kai kɨt aböŋa.|alt="map" src="1peter-map.tif" size="col" ref="1:1" \fig*   
\p
\v 2 \x - \xo 1:2 \xt Rom 8:29; 2Tes 2:13\x*Acö God maduar ör ñɨgö rɨbyöx nugwön, nöbö mö na mɨjöñɨŋö, röŋa. Makwam, God Inöma nuŋ rɨmɨn, ñɨŋ nöbö mö nuŋwa mɨdön, Jisas Krais rɨg yadmɨd mag akuyöbö cöña nugwön hañ nuŋwa ap kib mag gwogwo rɨmɨdöi pɨx aku örɨx aböna.  
\p Makwam, God nuŋ ñɨgö ögwö yöxön, pɨ ösös rɨ ri abön, nugwidɨx mɨdaŋ, ñɨŋ öim öim tar mɨd ri aböña.   
\s1 Mɨd ri abɨb mag an aku mɨd God mögörɨb adöx yöd röul adö kau sö yöraku  
\p
\v 3 Nöbö Dib ana Jisas Krais God nuŋwa nugwo ri ablaŋe cɨnɨŋa! Jisas Krais Nuö nuŋwa nugwo ri ablaŋe cɨnɨŋa! Nuŋwör an mɨ ödöriö ögwö yöxön, Ha nuŋwa Jisas Krais nugwo agal abmɨn hön wöröxön, höbkal öbɨlöŋ aku mɨ, an halöu ha nuŋwa ödöriö mɨdön, nuŋ pɨsaŋ öim öim kömö mɨjnɨŋö, rön, rɨbyöx gɨba alɨg mɨdöla.  
\v 4 \x - \xo 1:4 \xt Kol 1:12\x*God halöu ha nuŋwa mɨdöla aku mɨ, nuŋ anɨŋ mögörɨb wä nuŋwa adöx yöd röul adö kau sö pɨ ri aböna. Mögörɨb döul il kɨ ap bla pöpɨl u lɨdu lɨl rɨ pɨñöna, jɨ God mögörɨb adöx yöd röul adö kau sö akuyöbö alen. God ap wä akuyöbö ñɨgö yad nɨgöŋa nugwön öim öim mɨd ri aböna. Anɨŋ rɨg yadmɨd mag akuyöbö, an duön nuŋ pɨsaŋ öim öim mɨd ri ab gɨ mɨjnɨŋa.   
\p
\v 5 \x - \xo 1:5 \xt Jon 10:28; 17:11\x*God nuŋ nöbö ölɨsö. Ñɨŋ God nugw pön cɨrɨp ri abɨŋ, nuŋ ñɨgö nugwidɨx mɨd ri abön, mɨdɨp duön, mai wop aku ñɨgö pön mögörɨb wä nuŋ aku pön wöliöna.  
\v 6 \x - \xo 1:6 \xt Jems 1:2; 1Pit 5:10\x*Makwam, wahax pɨ gɨrön rɨ mɨjöña.  
\p Jɨ weik mag ulul mɨŋi ñɨgö, nöbö mö Krais adö mɨdöiŋö, rön, mɨ rɨ gwogwam rɨŋ öliöx mɨdɨbä maga ra.  
\v 7 \x - \xo 1:7 \xt Prop 17:3; Sek 13:9; Mal 3:3; Jems 1:3\x*Nöbö mö rɨg gol woböi bla urmɨn yönmɨn, magalɨg gol akwör mɨdönö ap bɨcep cepa alɨg mɨdö, rön, nugwöia. Gol hör ap aku, jɨ mag akuyöbö alöia. Ñɨŋ God nugw pöiŋönö nugw pölöi aku ap dib ödöriö. Ömörö pön öliöx mɨjöñ aku, ñɨŋ God nugw pöiŋönö nugw pölöiŋö, rön, nugwöna. Ömörö pön, God nugw pɨ gör mɨjöñ aku, Jisas Krais höbkal hön wop aku, God nuŋ ñɨgö, rɨ ri aböiŋö, rön, ñɨgö yad wahax pön, mögörɨb wä nuŋwa pön wöliöna.   
\p
\v 8-9 \x - \xo 1:8-9 \xt Jon 20:29; 2Kor 5:7\x*Ñɨŋ höd Jisas Krais nugwo mämäga nugwölim aku, jɨ nugwo madmag nɨgmɨdöia. Ñɨŋ wopik algör ör nugwo mämäga nugwölöi aku, jɨ nugwo nugw pön, mɨ ödöriö wahax pɨmɨdöia. Ñɨŋ Jisas Krais nugw pɨm, God nuŋ, ñɨŋ öim öim kömö mɨjöñɨŋö, rön, ñɨgö nugwidɨx mɨda. Makwam, ñɨŋ mɨ ödöriö wahax pɨ gɨr mɨdöia.   
\p
\v 10-11 \x - \xo 1:10-11 \xt Sam 22; Ais 53; Mat 13:16-17; Luk 24:26-27\x*Maduar ör Krais Inöm nuŋwa God mönö yadɨb nöbö piaku yuö ñɨŋ kwo mɨdön rɨba nölmɨn, ñɨŋ Krais ölɨŋ höb pödiö pödiö pön, mai ap wä yöbö agap ap bɨlɨm cön mönö aku yadön kai kɨtmä. Krais ölɨŋ höb pön wöröxaŋ, God ñɨgö uliöxön pɨ ösös rɨ ri abaŋ, mɨd ri aböñɨŋö, rön, yadim mönö aku, ñɨŋ keir nugw ri abölim. Anɨŋ wopik mɨdöla yadönö nöbö mö maiyöbö bla yadö, rön, ususör rön hölu nugu gör mɨdmɨdmä.   
\p
\v 12 Ñɨŋ aliö ususör rön hölu nugumɨn, Krais Inöm nuŋwa ñɨgö rɨba nölmɨn, ñɨŋ nugumä, God ñɨŋ keir, me rön, yadölöŋ; ñɨgö weik mɨdöi wop kɨ ör, me rön, yadöŋa. Makwam an nugwöla, Krais Inöm nuŋwa rɨba nölmɨn, God mönö yadɨb nöbö bla mönö yadmɨdmä mönö aku, ñɨgö nöbö mö weik mɨdöi wop kɨ ör, me rön, yadmä. Mönö wä yadmɨdmä aku mɨ, God nuŋ Inöm Leia adöx yöd röul adö kau sebö yad abmɨn hön, nöbö mö bli ñɨgö rɨbyöx nölmɨn, ñɨŋ piöŋö ñɨgö Jisas Krais mönö mag wä aku yadmɨn nugwöia. God rɨmɨn ñɨŋ wopik ap wä wä agap apɨm nugwöi aku, ejol bla, an aipam nugunɨŋö, rɨ rɨbyöx nugwöi aku, jɨ nugwölöi.   
\s1 Ñɨŋ nöbö mö lei gudogudö mɨjöña  
\p
\v 13 Makwam, ñɨŋ rɨb hör adö bli yöx nugumɨjeñ; rɨb mag ñɨŋa mɨxɨña rɨbyöx nölmɨd mag akuyöbö rɨmɨjeñ; Jisas Krais höbkal hön an pɨ ri abön ap wä nöiönɨŋö, rön, rɨb akwör yöx nugwön, wä raŋ nugugɨrön, rɨbyöx gɨba alɨg mɨjöña.   
\p
\v 14 \x - \xo 1:14 \xt Rom 12:2; Epes 2:3; 4:17-18\x*Ñɨŋ höd Jisas Krais mönö wä aku nugwölön, rɨb gwogwo ñɨŋa keir yöxön rɨmɨdim mag akuyöbö rɨmɨjeñ; ñɨŋ God halöu ha nuŋwa mɨdöi aku mɨ, mönö nuŋwa rɨg yadmɨd mag akwör cöña.  
\v 15 Ñɨŋ agap apɨm rɨba cöñ aku, God ñɨgö yad wö röŋ Nöbö aku nuŋ keir lei gudogudö mɨd mag akuyöbö, ñɨŋ kwo algör ör lei gudogudö akwör mɨjöña.  
\v 16 \x - \xo 1:16 \xt Lep 11:44-45; Mat 5:48\x*God nuŋ keir yadöŋ mönö aku God Mönö um mɨŋi kai kɨtön yadmä, “Nɨ ap kib mag gwogwo rɨb mag aku hölul rön leia mɨdɨl aku mɨ, ñɨŋ kwo algör ör ap kib mag gwogwo rɨb mag aku hölul rön leia mɨjöñɨŋö,” rɨmä.   
\s1 God ap wä abön, an wobön höbkal pöŋa  
\p
\v 17 \x - \xo 1:17 \xt Rom 2:11; Rep 2:23\x*God nuŋ nöbö mö akuyöbö ñɨgö nuöm nɨgön, amnɨmab röl; rɨg rɨmɨdöi rɨmɨdöi mag akwör nugwön nuöm nɨgmɨda. God aliö almɨd aku, Acö an, me rɨmɨdöi aku, ram nuŋwa adöx yöd röul adö kau sö duölöi wop kɨ, nuŋ Nöbö dib ödöriö, me rön, rɨg yad mag akwör cöña.  
\v 18-19 \x - \xo 1:18-19 \xt Apos 20:28; Hib 9:12-14\x*Ñɨŋ nöso auso nöbö rɨg rɨmɨdim mag aku rɨp duön kömö dinɨŋa, rön, rɨ wöhö nugumɨn, God ñɨgö kömö pöŋa. Jɨ nuŋ ñɨgö kömö pöŋ aku, gol silpa köme ulnöu ap lɨdu lɨl rɨ pɨn hör ap akuyöbö i ñɨgö wobön pölöŋ. Sipsip ha pɨx pɨlöl, adlöi mɨdöla pön du pal God höjöpal ur nölmɨdöi mag akuyöbö, Krais pön du pɨl pal nɨgɨm hañ nuŋwa gol silpa köme ulnöu wobölɨb hañ aku pɨnmɨn wöröxöŋ aku mɨ, God ñɨgö wobön höbkal pöŋa.  
\v 20 \x - \xo 1:20 \xt Epes 1:4; 2Tim 1:9-10\x*God mögörɨb il kɨ rɨ nɨgölöŋ wop aku, Krais nuŋ mag akuyöbö cönɨŋö, rön, yad nɨgöŋ aku, jɨ wopik wop maiyöbö mɨdö kɨ, ñɨgö rɨ ri abɨba wöxnö höŋa.  
\v 21 \x - \xo 1:21 \xt Jon 14:6; Rom 5:1-2\x*God rɨmɨn, Krais öbɨlmɨn, God nugwo pɨ mɨ bɨl pisö nɨgöŋa. Makwam, ñɨŋ God nugw pön, cɨrɨp ri abön, anɨŋ röböxenɨŋö, rön, rɨbyöx gɨba alɨg mɨdöia.   
\s1 Haul nöbö mölöu nöbö piaku ñɨgö madmag nɨgöña  
\p
\v 22 \x - \xo 1:22 \xt Jon 13:34; Rom 12:10\x*Ñɨŋ God Mönö mɨ ödöriö aku nugwön, rɨg yadmɨd mag akuyöbö rɨm, ñɨgö ap kib mag gwogwo pɨx aku mɨdöl. Akuyöbö alön, ñɨŋ haul nöbö mölöu nöbö God adö mɨdöi akuyöbö madmag ödöriö nɨgmɨdöia. Makwam, ñɨŋ ususör rön nuö nuö mɨ ödöriö madmag nɨg gɨr mɨjöña.  
\v 23 God Mönö mag akwör rɨmɨn, ñɨŋ iswob halöu ha kiai hañkap nöbö röxöia. Jɨ kömö mag yoŋyöbö pöi aku, nuö nuöm halöu ha yöx pön hömɨdöi mag akuyöbö yöi; nuö nuöm halöu ha yöx pön höm wöröxöia. Jɨ God Mönö aku, mönö öim öim mɨdɨb mönö kömö mag akwör raŋ, God halöu ha nuŋwa mɨdön öim öim mɨjöña.  
\v 24 \x - \xo 1:24-25 \xt Ais 40:6-8\x*God Mönö aku kai kɨtön yadmä,  
\q1 “Nöbö mö bla magalɨg ap panö röxg mɨdöia;  
\q2 ib diba pɨmɨdöi aku bɨ pɨpɨl röxg mɨda.  
\q1 Ap piaku rɨmgör wödö wöla.   
\q2
\v 25 Jɨ God Mönö mag aku öim öim mɨjönɨŋö,” rɨmä.  
\m God Mönö mag aku, ñɨgö yad nölmɨn nugwöi mönö wä mag akwör.   
\c 2  
\s1 Nöbö Diba nuŋ Rɨg Kömö röxgöb öim mɨjöna  
\p
\v 1 \x - \xo 2:1 \xt Epes 4:22; Jems 1:21\x*Makwam, ñɨŋ mag gwogwo rɨmɨdöi adaku magalɨg mödoŋwadö röböxön, mönö inakmönö hörmɨdöi adaku mödoŋwadö röböxön, inakmönö hörön an nöbö mö waiö mɨdölɨŋö rɨmɨdöi adaku mödoŋwadö röböxön, ap wä ñɨŋ piaku an pölɨxa, rɨ rɨbyöx nugumɨdöi adaku mödoŋwadö röböxön, nöbö mö bli yad höimöumɨdöi adaku mödoŋwadö röböxöña.   
\p
\v 2-3 \x - \xo 2:2-3 \xt Sam 34:8\x*Halöu ha kiai yöudöŋdöŋ yöx pön höi bla kau nɨmnɨŋö, rön, rɨb paŋyöbö akwör yöx nugwöia. Mag aliö akuyöbö, ñɨŋ Nöbö Dib nöbö wä ödöriö ñɨgö pɨ ri abmɨd aku mödö nugwöia aku mɨ, mönö wä nuŋwa kau röxg nɨmnɨŋö, rön, rɨba paŋyöbö akwör yöx nugwöña. Kau aku nɨmöñ aku, ñɨŋ dib röxön, kömö mɨdɨb mag aku ila nugw ri aböña.   
\p
\v 4 Jisas Krais nuŋ rɨg i röxgɨb. Nuŋ rɨg hör i wöhö; nuŋ Rɨg Kömö. Rɨg Kömö aku nöbö mö bli höj nugwön röböxöia, jɨ God nuŋ pön, rɨg aku rɨg waiö ödöriö mö, röŋa. Ñɨŋ Rɨg Kömö aku hön,  
\v 5 \x - \xo 2:5 \xt Epes 2:21-22; Rep 1:6\x*ñɨŋ keir rɨg kömö akuyöbö nɨgmɨn, God nuŋ rɨg piaku pön ram nuŋwa urmɨda. Ram aku, Jisas Krais nuŋ ram yöj nöbö mɨda nugwön ñɨŋ God höjöpal ur nölɨb nöbö mö leia mɨdön, ap agap apɨm God nugwo wä ra ap aku höjöpal ur nölmɨdöia. God nugwo höjöpal ur nölɨb ap aku hön ap bla wöhö; inöma rɨmɨd ap bla höjöpal ur nölmɨdöia.   
\p
\v 6 \x - \xo 2:6 \xt Ais 28:16; Epes 2:20\x*God Mönö aku kai kɨtön yadmä,  
\q1 “Nugwi! Nɨ rɨg i taun dib Saion nɨgmön,  
\q2 rɨg aku Saion ram padö röxg mɨjöna.  
\q2 Nɨ keir rɨg wä keiryöbö aku pɨ nɨgla.  
\q1 Nöbö mö bɨl kai ñɨŋ nugwo nugw pön cɨrɨpöñ piaku,  
\q2 mai, an pödpöd rɨmɨn nugwo nugw pölɨŋö, rön, yadeñɨm mɨ wöhö,” rɨmä.   
\p
\v 7 \x - \xo 2:7 \xt Sam 118:22\x*Nöbö mö nugwo nugw pöi bla, rɨg aku rɨg wä keiryöbö röxg nɨgmɨda; jɨ nöbö mö nugwo nugw pölöi bla, God Mönö aku kai kɨtön yadmä,  
\q1 “Rɨga höj nugwön röböxim rɨg akwör  
\q2 weik ram padö ölɨsö ödöriö mibɨl yöbö kwo mɨdö,” rɨmä.   
\m
\v 8 \x - \xo 2:8 \xt Ais 8:14\x*Mönö i yadmä,  
\q1 “Rɨg akwör, nöbö mö duŋ yamsö pɨñöna;  
\q2 rɨg akwör, nöbö mö hön, pɨn bɨcöñɨŋö,” rɨmä.  
\m Krais mönö wä aku nugw pölim aku mɨ, ñɨŋ pɨn bɨrmä. Ñɨŋ pɨn bɨrmä aku, God höd rɨg yad nɨgöŋ mag akwör rɨmä.   
\p
\v 9 \x - \xo 2:9 \xt Diut 7:6; 14:2; Ais 9:2; Apos 26:18; Epes 5:8\x*Jɨ God nuŋ keir ñɨgö pön, yam nuŋwa keir yad nɨgöŋa. Ñɨŋ Kiŋa ap höjöpal ur nölɨb nöbö mö nuŋwa mɨdöia. Ñɨŋ nöbö mö lei nuŋwa mɨdöia. Ñɨŋ God yam nuŋwa keir mɨdöia. Makwam, ñɨŋ nöbö mö piaku piaku, God nuŋ ap wä keiryöbö rɨmɨd aku yad wöxnö nɨgön, höd pɨxmag yuö piaku mɨdön öliöxɨp yönmɨdim aku, jɨ God nuŋ rɨmɨn, wopik mil wä nuŋwa nugwön yön ri abmɨdöi, mönö aku wöxnö yajöña. Ñɨŋ aliö yadön, ib nuŋwa yadɨŋ möx diöna.   
\p
\v 10 \x - \xo 2:10 \xt Hos 2:23\x*Höd God nöbö mö nuŋwa mɨdmɨdölöi, jɨ wopik nöbö mö nuŋwa keir mɨdöia. Höd God ñɨgö uliöxön pɨmɨdöl, jɨ wopik ñɨgö uliöxön pa.   
\s1 God nöbö mö nuŋwa mɨdöi aku, mɨd ri aböña  
\p
\v 11 \x - \xo 2:11 \xt Gal 5:17,24\x*Makwam, nöbö mö nugub wä nɨ bla. Mögörɨb il kɨ mögörɨb ñɨŋ ödöriö yöi, hör hön mɨdöia. Makwam, ap kib mag gwogwo mögörɨb il kɨ mɨxɨña rɨbyöx ap bla, madmag nɨgön rɨŋ duenɨm. Ap piaku rɨbyöx nugwön rɨŋ duaŋ, inöm ñɨŋa pɨsaŋ nuö nuö raŋ, pɨn bɨrɨb maga ra.   
\p
\v 12 \x - \xo 2:12 \xt Mat 5:16\x*Ñɨŋ nöbö mö God adö mɨdölöi piaku pɨsaŋ mɨdöi aku, mag wä akwör rɨ ri ab gɨ mɨjöña. Aliö alɨŋ, wop bli, ñɨgö, rɨ gwogwam röiŋö, rön, yad höimöuöña, jɨ ñɨŋ rɨ ri ab gɨ mɨdöi aku nugwön, mai Jisas Krais hön wop aku, mag wä rɨ ri ab gɨ mɨdöi aku yad wöxnö nɨgɨŋ, God ib nuŋwa wöliöna.   
\p
\v 13-14 \x - \xo 2:13-14 \xt Tait 3:1\x*Nöbö Diba nöbö mö nuŋwa mɨdöi aku mɨ, nöbö dib ñɨgö mögörɨb il kɨ nugwidɨx mɨdöi bla rɨg yajöñ mag akwör cöña. Kiŋ nöbö dib ödöriö mɨd aku mɨ, mönö nuŋwa yöxön, nöbö nuŋwa yad abmɨn hön ñɨgö nugwidɨx mɨdöi bla mönö ñɨŋa magalɨg yöxön diöña. Nöbö dib piaku, nöbö mö rɨ ri ab gɨ mɨjöñ akuyöbö ñɨgö pɨ ri ab gɨ mɨjöña; jɨ nöbö mö rɨ gwogwam rɨmɨjöñ akuyöbö ñɨgö mönö diba yadön, ölɨŋ höb paiŋö pɨ nöiöña. Aku agapɨm: God nöbö piaku mabö aku rɨŋ, me rön, yad nɨgöŋa.  
\v 15 \x - \xo 2:15 \xt 1Pit 3:16\x*Makwam God nugwo wä cön aku, ñɨŋ rɨ ri ab gɨr mɨdɨŋ, nöbö mö rɨba mɨdöl bla ñɨgö inakmönö hörön yad höimöub maga nɨgen.  
\v 16 Nöbö mö bli, ñɨŋ keir nugumɨdöi mag akuyöbö cɨne, rɨmɨdöia. Aku wä jɨ rɨb aku yöx nugwön, ap kib mag gwogwo i rɨmɨjeñ. God mabö rɨ nölɨb nöbö mö nuŋwa mɨdöi aku mɨ, agap apɨm rɨba cöñ aku, nuŋ rɨg yadmɨd mag akuyöbö akwör cɨnɨŋö, rön, cöña.   
\p
\v 17 \x - \xo 2:17 \xt Rom 12:10\x*Nöbö mö rɨb bla aipam, nöbö mö hör bla aipam, mönö ñɨŋa yöxöña. Haul nöbö mölöu nöbö Krais adö mɨdöi akuyöbö ñɨgö madmag nɨgöña. God nuŋ Nöbö ölö, me rön, ipöxöña. Kiŋ ñɨŋa nöbö dib, me rön, mönö nuŋwa yöxöña.   
\s1 Krais mai duön, ömörö hömɨdaŋ, ipöxöinɨŋ  
\p
\v 18 \x - \xo 2:18 \xt Epes 6:5\x*Ñɨŋ Krais nöbö mö nuŋwa mɨdön, nöbö bli ñɨgö nag mabö röxg rɨmɨdöi aku, nöbö dib ñɨŋ akuyöbö pɨ ri abön, rɨg yajöñ mag akuyöbö akwör cöña. Ñɨgö mag wä rɨ ri abön tar mɨd ri ab gɨ mɨdmɨdöi nöbö bla akwör yöi, mɨ ölɨsö rödmɨdöi nöbö bla algör ör, pɨ ri abön, rɨg yajöñ mag akuyöbö akwör cöña.  
\v 19 Ñɨgö rɨ gwogwam rɨmɨdɨŋ, ñɨŋ God nugwo rɨbyöx nugwön ñɨgö paiŋö rɨb gwogwo yöx nugweñ aku, God nuŋwaŋ wä cöna.  
\v 20 \x - \xo 2:20 \xt 1Pit 3:14,17\x*Ñɨŋ rɨ gwogwam rɨŋ, ñɨgö palmɨdɨŋ, ñɨgö paiŋö rɨb gwogwo yöx nugweñ aku yadöin; akuyöbö aiöñ aku, God ñɨgö pɨ ri aben. Jɨ ñɨŋ mɨd ri ab gɨ mɨdɨŋ, ñɨgö rɨ gwogwam rɨmɨdɨŋ, ñɨgö paiŋö rɨb gwogwo yöx nugweñ aku yadmɨdla; akuyöbö aiöñ aku mɨ, God ñɨgö pɨ ri aböna.  
\v 21 \x - \xo 2:21 \xt Mat 16:24; Jon 13:15\x*Ñɨŋ ömörö pön tar ör mɨjne, rön, God ñɨgö pöŋa. Krais an ñöx nɨgön ölɨŋ höb pöŋ rɨb akwör yöxöña. Ñɨŋ ömörö pön rɨb diba yöxmɨjeñ. Krais nuŋ röŋ mag akwör rɨŋ diöna.   
\q1
\v 22 \x - \xo 2:22 \xt Ais 53:9\x*“Nuŋ ap kib mag gwogwo i rölöŋ;  
\q2 mönö inakmönö i hörölöŋ.”   
\m
\v 23 \x - \xo 2:23 \xt Ais 53:7; 1Pit 3:9\x*Krais nugwo yad höimöum, nuŋ paiŋö ñɨgö yad höimöuölöŋ. Nugwo rɨ gwogwam rɨmɨdɨm, nuŋ ölɨŋ höb pön, ñɨgö ipöxbä mönö bli yadölöŋ. Jɨ Nuö nuŋwa mönö diba paxdöriar yadmɨd Nöbö aku, nɨ nugwidɨx mɨjönɨŋö, rön, rɨb akwör yöx nugugu mɨdöŋa.  
\v 24 \x - \xo 2:24 \xt Ais 53:5-6; Rom 6:11\x*Krais nugwo bɨ um sö pɨl pal nɨgmɨn, nuŋ ap kib mag gwogwo rɨmɨdöl bla mɨxɨñ nuŋwa keir pön wöröxöŋa. “Nɨ ap kib mag gwogwo ñɨgö pön wöröxmön, ap kib mag gwogwo rɨb rɨb mag ñɨŋ aku wöröxön, ñɨŋ kömö duön, rɨ ri ab gɨr mɨdɨŋ,” me rön, ap kib mag gwogwo an bla mɨxɨñ nuŋwa keir pön wöröxöŋa. Krais nuŋ uj adlöi diba nɨgöŋ aku döŋö ñɨgö röŋ ap aku kömö nɨgöŋa.  
\v 25 \x - \xo 2:25 \xt Esik 34:5-6; Mat 9:36; Jon 10:14; Hib 13:20-21\x*Ñɨŋ hön sipsip u bla rɨgaja dumɨdöi mag aliö akuyöbö alɨg mɨdmä, jɨ weik Nöbö Hön Sipsip Urɨb, Nöbö inöm ñɨŋa nugwidɨx mɨd ri abmɨd Nöbö aku mɨdɨba höuöil höia.   
\c 3  
\s1 Mö kap nöbö  
\p
\v 1-2 \x - \xo 3:1-2 \xt Epes 5:22\x*Makwam ñɨŋ nöbö kap mö mɨdöi bla, ñɨgö kwo algör mönö yadɨba rɨmɨdla. Nöbönɨŋ nöbö rɨg yajöñ mönö akuyöbö yöxön mai diöña. Nöbönɨŋ nöbö Jisas Krais mönö wä aku nugw peñ aku, pödpöd rɨmɨn mönö wä aku nugw pöiaŋö, rön, yadmɨjeñ. Ñɨŋ keir rɨ ri aböñ aku nugwön yajöña, mö na aku Jisas Krais nugw pɨ rɨ ri abön mag wä rɨmɨdö, rön, nuŋ kwo aipam nugw pɨb maga ra.  
\v 3 \x - \xo 3:3 \xt 1Tim 2:9\x*Mɨxɨñ ana ud wabɨl nöl ri abön mö kɨtɨb wä mɨjnɨŋö, rön, rɨb aku yöx nugumɨjeñ. Yöj panö wajɨxön, wölɨj wä wä yömön, ap wä wä rɨg gol pön rɨmɨdöi piaku pɨ mɨxɨña ud wabɨl nölmɨjeñ.  
\v 4 Mö höimölɨba mɨdön, rɨbyöx nugw ri abön, ölɨsö rödmɨjeñ. Nöbö mö bla pɨsaŋ tar mɨd ri aböña. Aliö ri aböñ aku, ap wä piaku madmag yuörɨb ñɨŋ kwo mɨd aku, nöbö mö mämäga nugweñ, jɨ God nuŋ nugwaŋ, ap kɨtɨb wä keiryöbö mɨjöna. Ap kɨtɨb wä wä piaku pöpɨl wen; öim öim mɨjöna.  
\v 5 Ap kɨtɨb wä piaku madmag yuö kwo rɨg gol röxg mɨd aku, auso an God nugw pim piaku pön ñɨŋör keir ud wabɨlmɨdmä; ñɨŋ nöbönɨŋ nöbö mönö yöxön mai dumɨdmä.  
\v 6 \x - \xo 3:6 \xt Jen 18:12\x*Mö Sara nöbönɨŋ Ebraham nugwo, nöbö dib nɨ, me rön, rɨg yadmɨdöŋ mönö akuyöbö yöxön mai dumɨdöŋa. Ñɨŋ ipöxmɨjeñ, Sara rɨmɨdöŋ mag akuyöbö rɨ ri ab gɨ mɨjöñ aku, Sara halöu nuŋwa mɨjöña.   
\p
\v 7 \x - \xo 3:7 \xt Epes 5:25\x*Ñɨŋ mö kap nöbö mɨdöi piaku, ñɨgö kwo algör ör mönö yadɨba rɨmɨdla. Mö piaku nöbö röxg ölɨsö mɨdölöi aku nugwön, mö ñɨŋ bla pɨ ri aböña. God ñɨgö nöbö piakwör pön, mö piaku röböxöl; ñɨgö nöbö piaku ögwö yöxön pɨmɨd mag aliö akuyöbö, mö piaku ñɨgö kwo algör ör ögwö yöxön pɨmɨda. Ñɨŋ mö ñɨŋ piaku nugwidɨx mɨd ri abön God höjöpalɨŋ, mönö ñɨgö nugwöna.   
\s1 Nɨgiö nɨgön mɨjöña  
\p
\v 8 Mönö yad pörɨba rɨmɨdla. Ñɨŋ haul nöbö mölöu nöbö Krais adö mɨdöi piaku magalɨg rɨb mag paŋyöbö iör yöxön; haul nöbö mölöu nöbö bli ölɨŋ höb pɨmɨdɨŋ, ñɨgö ögwö yöxön; haul nöbö mölöu nöbö bli wahax pɨmɨdɨŋ, ñɨŋ kwo algör ör pɨsaŋ wahax pöña; haul nöbö mölöu nöbö nuö nuö madmag nɨgön, nuö nuö ögwö yöxön pɨ ösös rɨ ri aböña; nɨ nöbö dib, nɨ mö dib, me rön, rɨb aku yöx nugumɨjeñ.  
\v 9 Nöbö mö bli ñɨgö rɨ gwogwam rɨmɨdɨŋ, ñɨŋ paiŋö rɨ gwogwam rɨmɨjeñ. Ñɨgö yad höimöumɨjöñ aku, ñɨŋ paiŋö yad höimöumɨjeñ. Ñɨgö agap apɨm rɨmɨdɨŋ, God höjöpalön yajöña, naŋ ñɨŋ rɨ ri abön nugwidɨx mɨdane, cöña. Aku agapɨm: God ñɨgö pöŋ aku, ñɨŋ nöbö mö akuyöbö ñɨgö pɨ ösös rɨ ri aböñɨŋö, rön, pöŋa. Aliö aiöñ aku, God ñɨgö kwo algör ör rɨ ri abön ap wä nöiöna.  
\v 10 \x - \xo 3:10-12 \xt Sam 34:12-16\x*God Mönö aku kai kɨtön yadmä,  
\q1 “Nöbö mö, an mɨd ri ab gɨ mɨdön nöbö nom ödöriö röxgön wöröxŋö, rön, rɨb aku yöx nugumɨdöi piaku,  
\q2 mönö inakmönö hörön, mönö gwogwo yadölɨŋ.   
\q1
\v 11 Ap kib mag gwogwo rɨmɨdöi adaku röböxön,  
\q2 rɨ ri abön mag wä akwör rön,  
\q1 rɨb wä yöxön, nɨgiö nɨgön mɨjnɨŋö, rön,  
\q2 tar ör mɨjöña.   
\q1
\v 12 Aku agapɨm: nöbö mö God Mönö rɨg yadmɨd mag akwör rɨmɨdöi piaku,  
\q2 Nöbö Diba ñɨgö nugwidɨx mɨd ri abön, höjöpaiöñ aku nugwöna;  
\q1 jɨ nöbö mö rɨ gwogwam rɨmɨdöi piaku nugwaŋ,  
\q2 ölɨsö wöiönɨŋö,” rɨmä.   
\s1 Mɨd ri abɨŋ, ñɨgö rɨ gwogwam rɨmɨdɨŋ, ipöxmɨjeñ  
\p
\v 13 Ñɨŋ mag wä rɨŋö, rön, ususör rɨŋ duaŋ, nöbö mö bli ñɨgö ölɨŋ höb pɨ nöleñ.  
\v 14 \x - \xo 3:14 \xt Ais 8:12-13; Mat 5:10; 1Pit 2:20; 4:14\x*Jɨ ñɨŋ mag wä akwör rɨŋ ñɨgö rɨ gwogwam rɨmɨjöñ aku, wahax pöña. Nöbö mö ñɨgö rɨ gwogwam rɨmɨdöi akuyöbö ñɨgö ipöxmɨjeñ, rɨb diba yöxmɨjeñ.  
\v 15 Madmag yuö ñɨŋ kwo aku, Krais nuŋwör Nöbö Dib, me rön, ib nuŋwa yadɨŋ möx duaŋ. Ñɨŋ öim öim rɨbyöx nugugu mɨjöña, nöbö mö bli, pödpöd rɨmɨn rɨbyöx gɨba alɨg mɨdöiŋö, rön, yad nugumɨdɨŋ, ñɨgö pɨ ri abön, mönö höimöliö yadön, Krais mönö wä aku ñɨgö yad nöl ri aböña.  
\v 16 \x - \xo 3:16 \xt 1Pit 2:12\x*Mönö yad nöiöñ aku, an mönö kai yadɨŋ God nugwo wä cönɨŋö, rön, rɨbyöx nugw ri abön yad nöiöña. Krais nugw pön cɨrɨpön, rɨ ri aböñ aku, nöbö mö ñɨgö yad höimöuba rɨmɨdöi piaku ñɨŋ möigw yöxön röböxöña.  
\v 17 Ñɨŋ mag wä akwör rɨmɨdɨŋ, ñɨgö rɨ gwogwam rɨmɨjöñ aku, God nugwaŋ wä cöna. Jɨ ñɨŋ mag gwogwo rɨmɨdɨŋ, ñɨgö rɨ gwogwam rɨmɨjöñ aku, God nugwaŋ wä ren.   
\s1 Krais wöröxön pɨx kepkep ana örɨx aböŋa  
\p
\v 18 Aku agapɨm: Krais nuŋ Nöbö wä keiryöbö jɨ nugwo rɨ gwogwam rɨm wöröxöŋa. Nuŋ mag wä akwör rɨmɨdöŋa, jɨ ñɨŋ nöbö mö ap kib mag gwogwo rɨmɨdöi piaku God pɨsaŋ nɨgliu nöinö, rön, wöröxöŋa. Wop paŋyöbö akwör wöröxöŋa; mai iswob wöröxen. Krais mɨxɨña pɨl pal nɨgɨm wöröxöŋa, jɨ Inöm nuŋwa wöröxölöŋ. Inöm nuŋwa kömö mɨdön, nuŋ höbkal öbɨlöŋa.  
\v 19 Inöma almɨdmɨn nuŋ duön, nöbö mö höd wöröxön du nag mɨdim piaku ñɨgö mönö wä nuŋ aku yad nölöŋa.  
\v 20 \x - \xo 3:20 \xt Jen 6–7\x*Nöbö mö naga mɨdim piaku, Noa mɨdöŋ wop aku, God mönö aku nugumɨdölim, jɨ God ñɨgö rɨmgör mönö diba yadölöŋ; mönö na nugwöñɨŋönö wöhö, rön, pöx mɨdöŋa. Pöx mɨdmɨn nugugɨrön, Noa nagö bɨ yöja rane, röŋ aku rɨp duön, nöbö mö mɨga yöi wöhö, Noa mönɨŋ ha kap akuyöbö amñaxɨb sö ñɨŋör bɨyöj möla duön, ban yuö mɨdön mɨdɨp duön, God rɨmɨn kömö dumä.  
\v 21 Ñɨŋ bɨyöj möla wölu mɨdɨm, röbö aku ñɨgö pɨrag wölɨm, kömö dumä mag akuyöbö, wopik an Jisas Krais wöröxön öbɨlöŋ mönö aku nugw pön röbö yaxnɨŋ aku, an kwo algör ör kömö dinɨŋa. Röbö yaxmɨdöl aku, mɨxɨñ pɨxa örɨx abnɨŋö, rön, yaxmɨdölöl. Krais anɨŋ ñöx nɨgön wöröxön höbkal öbɨlöŋ aku mɨ, God rɨb madmag yuö ana nugumɨn pɨx i mɨdöl. Rɨb akwör nugwön röbö yaxmɨdöla. God nuŋ mönö ölɨsö ma yad nɨgöŋ aku maku.  
\v 22 Krais nuŋ wöröxön öbɨlön, mögörɨb adöx yöd röul adö kau sö yöraku wöluön, God imag mɨrɨx pɨlö adö mɨda nugwön ejol bla aipam, ap ölɨsö mɨdöi bla aipam, magalɨg mo nuŋwa mɨdöia.   
\c 4  
\s1 Ömörö pɨ gɨrön, mag gwogwo hödyöbö rol aku röböxnɨm  
\p
\v 1 \x - \xo 4:1 \xt Rom 6:2,7\x*Krais mɨxɨñ nuŋwa ölɨŋ höb diba pöŋ aku, an kwo algör ör ölɨŋ höb pɨnɨŋö, rön, rɨb akwör yöx nugu gör mɨjöña. Aku agapɨm: nöbö mö mɨxɨñ ñɨŋa ölɨŋ höb diba pöi bla, ap kib mag gwogwo cɨnɨŋö, rön, rɨb aku yöx nugwölöi.  
\v 2 Wop aku ila nɨgön, wop pödiöm mögörɨb il kɨ mɨxɨña alɨg mɨjnɨŋ aku, God nugwo wä cön adakwör cɨnɨŋö, rön, madmag ñɨŋa keir öbiön adaku reñɨm.  
\v 3 \x - \xo 4:3 \xt Epes 2:2-3\x*Ñɨŋ höd nöbö mö God Mönö nugw pɨmɨdölöi bla röxg mɨdmɨdmä. Rɨb gwogwo yöxön, mö kib nöbö kib rön, röbö ölɨsö nɨmön u pɨlön, ap mɨga ödöriö nɨmön, amnör rön, ap inakmönö God höjöpalmɨjeñɨŋö, rɨ ap piaku, höjöpal gɨr mɨdmɨdmä.  
\v 4 Jɨ weik, nöbö mö God Mönö pɨmɨdölöi bla, ñɨŋ mɨd ri abmɨdöi aku nugwön, pödpöd rɨmɨn an pɨsaŋ mögum rön amnör rɨmɨdölöiŋö, rön, ñɨgö yad höimöumɨdöia.  
\v 5 \x - \xo 4:5 \xt Apos 10:42\x*Jɨ womiöx mɨda, Nöbö Diba nöbö mö kömö mɨjöñ bla aipam, nöbö mö mödö wöröxim bla aipam, agap apɨm röi bla, pödpöd rɨmɨn aliö alöiŋö, rön, mönö diba yadaŋ, ñɨŋ agap apɨm röi bla magalɨg nugwo yad wöxnö nɨgöña.  
\v 6 Nöbö mö magalɨg wöröxöi akuyöbö wöröxön, mɨxɨñ aku aŋadö lɨdu lɨl rɨ pɨnöŋa, jɨ inöm piaku duön, God kömö rɨg mɨd mag akuyöbö ñɨŋ kwo algör kömö mɨjöñɨŋö, rön, Krais mönö mag wä aku nöbö mö mödö wöröxim piaku ñɨgö yad nölöŋa.   
\s1 God mabö anɨŋ adö hörɨrör yad nɨgmɨd aku, rɨ ri abnɨŋa  
\p
\v 7 \x - \xo 4:7 \xt Rom 13:11-12\x*Womiöx mɨda, ap agapɨm mɨd akuyöbö magalɨg hölögɨpɨba rɨmɨda. Makwam, rɨbyöx nugw ri abön, tar mɨd ri abön, God höjöpaiöña.  
\v 8 \x - \xo 4:8 \xt 1Pit 1:22\x*Mönö dib ödöriö aku, ñɨŋ Krais nöbö mö öim öim nuö nuö mɨ madmag nɨg gɨr mɨjöña. Ñɨŋ nuö nuö madmag nɨg gɨr mɨjöñ aku, nöbö mö bli ap kib mag gwogwo rön ñɨgö wop mɨga akwör rɨ gwogwam rɨmɨjöñ aku, ñɨŋ nugwön rɨmgör röböxöña.  
\v 9 \x - \xo 4:9 \xt Hib 13:2\x*Krais nugw pöi nöbö mö bli ram ñɨgö hömɨdɨŋ, ñɨgö pikai nöbö bɨlɨm ram na höiŋö, rön, yadmɨjeñ; ñɨgö yad wahax pöña.  
\v 10 \x - \xo 4:10-11 \xt Rom 12:6-8\x*God nöbö mö ögwö yöxön pɨ ri abön, ñɨgö ap wä hörɨrör nölmɨdöla. God ap wä ñɨgö nöl aku, ñɨgör yöi, haul nöbö mölöu nöbö Krais nöbö mö nuŋwa mɨdöi piaku ñɨgö magalɨg algör ör rɨbyöx nugwön ñɨgö ap wä aku nöla. Makwam, God ñɨgö ap wä nöl aku nugwön, haul nöbö mölöu nöbö akuyöbö pɨ ösös rɨ ri aböña.  
\v 11 God ñɨgö ap wä nölaŋ, ñɨŋ nöbö mö akuyöbö ñɨgö yad nöiöñ aku, rɨbyöx nugw ri abön, God Mönö wä aku ödöriö akwör yad nöiöña. God ñɨgö ap wä nölaŋ, ñɨŋ nöbö mö bli mabö rɨ nöiöñ aku, God ñɨgö ölɨsö nuŋwa nölmɨd aku pön, nöbö mö akuyöbö ñɨgö mabö rɨ nöiöña. Almɨjöñ aku, ñɨgö Jisas Krais nöbö mö nuŋwa mɨdöi aku nugwön, ñɨŋ God ib nuŋwa yadɨŋ bɨl sö diöna. Jisas Krais, Nöbö ölɨsö ödöriö akwör, nugwo ri ablaŋe rɨ gɨrön, ib nuŋwa öim öim yadɨŋ bɨl sö duaŋ. Mag aliö akuyöbö aku mag waiö.   
\s1 Krais nöbö mö nuŋwa mɨdöi aku nugwön, ñɨgö ömörö pɨ nöiöña  
\p
\v 12 Haul hödpɨg nöbö nɨ wä bla. Ñɨŋ Krais nugwo cɨrɨp gö nɨgöñɨŋönö röböxöñɨŋö, rön, God nuŋ wop bli nugwogwo rɨmɨn an ömörö pɨmɨdöla. Makwam, nöbö mö bli anɨŋ mɨ ölɨŋ höb rɨn alñö yönmɨd akuyöbö pɨ nölmɨdöi aku, pödpöd rɨmɨn anɨŋ almɨdöiŋö, rön, rɨb aku yöx nugumɨjeñ.  
\v 13 \x - \xo 4:13 \xt Apos 5:41; Jems 1:2; 1Pit 1:6‑7\x*Krais nöbö mö nuŋwa mɨdöla aku mɨ, nugwo rɨg rim mag akuyöbö anɨŋ rɨmɨdöiŋö, rön, wahax pɨ gɨr mɨdɨŋ, nuŋ mil wä mag nuŋ alɨg hön wop aku, ñɨŋ wahax pɨ gɨr mɨjöña.  
\v 14 \x - \xo 4:14 \xt 1Pit 2:20\x*Ñɨŋ Krais nöbö mö nuŋ, me rön, ñɨgö yad höimöuöñ aku, wahax pɨ gɨr mɨjöña. God Inöma mil wä mag aku anɨŋ pɨsaŋ mɨd aku nugwön mɨ, mag akuyöbö almɨdöiŋö, rön, wahax pɨ gɨr mɨjöña.  
\v 15 Ñɨŋ nöbäpö pɨl pal nɨgmɨjeñ; ap kib pɨmɨjeñ; nöbö mö bli rɨ gwogwam rɨmɨjeñ; nöbö hör kwo röi mag aku ñɨŋ nugwön um pɨnön, nɨ yadmɨdɨl akuyöbö aliö ali, rön, yadmɨjeñ. Nöbö i aliö alaŋ, nugwo rɨ gwogwam rɨmɨjöñ aku, ap nuŋ.  
\v 16 Jɨ ñɨŋ Krais nugw pön nuŋ rɨg yadmɨd mag akwör rɨmɨdɨŋ, ñɨgö ömörö nölmɨjöñ aku, möigw hen. Krais nöbö mö nuŋwa mɨdöl aku mɨ, anɨŋ mag akuyöbö almɨdöiŋö, rön, wä raŋ nugugɨrön, God ib nuŋwa yadɨŋ bɨl sö duaŋ.  
\v 17 Womiöx mɨda, God nöbö mö mönö diba yajöna. Nuŋ ila nɨgön nöbö mö nuŋwa keir mönö diba yajöna. Jɨ God nuŋ an nöbö mö nuŋwa keir mönö diba yajön aku, nöbö mö God mönö mag wä nuŋwa pölöi piaku ñɨgö mönö diba yadaŋ, ñɨŋ pödpödiö mɨjöñ?  
\v 18 \x - \xo 4:18 \xt Prop 11:31\x*God Mönö aku kai kɨtön yadmä,  
\q1 “Nöbö mö God rɨg yadmɨd mag akuyöbö rɨmɨdöi piaku  
\q2 öliöxön kömö diöña;  
\q1 aku mɨ, nöbö mö God Mönö yöxölön,  
\q2 ap kib mag gwogwo rɨmɨdöi piaku, ñɨŋ pödpödiö kömö diöñ?” rɨmä.   
\p
\v 19 Makwam, God anɨŋ yad nɨgöŋ ömörö akuyöbö pɨnɨŋ aku, rɨb mɨga yöxöinɨŋ. Nöbö Diba anɨŋ rɨ nɨgöŋ aku, amnör ren, jɨ nuŋ höd yadöŋ mag akuyöbö akwör anɨŋ pɨ ri abönɨŋö, rön, rɨb aku yöx nugwön, rɨ ri ab gɨrön rɨŋ diöna.   
\c 5  
\s1 Krais nugw pöi nöbö mö nugwidɨx mɨdɨb nöbö bla  
\p
\v 1 Krais nugw pöi nöbö mö nugwidɨx mɨdɨb nöbö mɨdöi bla, ñɨgö mönö yadɨba rɨmɨdla. Mabö ñɨŋ rɨmɨdöi akuyöbö, nɨ algör ör Krais nugw pöi nöbö mö nugwidɨx mɨdɨb nöbö i mɨdla. Krais ölɨŋ höb diba pɨmɨdöŋ aku, nɨ nugugu mɨdma. God nuŋ Krais mil wä mag nuŋwa nöbö mö akuyöbö magalɨg ñɨgö yabuön wop aku, nɨ duön nugugu mɨjɨna. Makwam, nɨ ñɨgö mönö kɨ yadɨba rɨmɨdla.  
\v 2 \x - \xo 5:2 \xt Jon 21:15-17; Apos 20:28\x*Nöbö hön sipsip urɨb bla hön sipsip ñɨŋ bla ur ri abmɨdöi mag akuyöbö, God nöbö mö nuŋ keir imag rol ñɨŋa nɨgöŋ nöbö mö akuyöbö, ñɨgö nugwidɨx mɨd ri ab gɨr mɨjöña. Nöbö mö bli ñɨgö God mabö cɨnö rön yad gö gö rɨmɨdɨŋ, God mabö aku rɨmɨjeñ. Rɨg ap bla pɨnɨŋö, rön, God mabö aku rɨmɨjeñ. Wahax pɨ gɨrön God mabö cöña. Almɨjöñ aku, God nugwo wä cöna.  
\v 3 \x - \xo 5:3 \xt 2Kor 1:24; Pil 3:17; Tait 2:7\x*An nöbö diba mɨdölɨŋö, rön, God sipsip nuŋ akuyöbö ñɨgö yadyöxmɨjeñ. Ñɨŋ keir rɨ ri ab gɨ mɨdɨŋ, ñɨŋ ñɨgö nugwön algör rɨŋ.  
\v 4 Ñɨŋ aliö alɨŋ, Sipsip Urɨb Nöbö Dib aku hön, usaŋ ölɨsö mea öim öim mil milöu gɨ mɨjön aku ñɨgö nɨg nöiöna.   
\s1 Ib ana keir pɨrag wölöinɨŋ; rɨba paxdöriö akwör yöx nugunɨŋa  
\p
\v 5 \x - \xo 5:5 \xt Prop 3:34; Epes 5:21; Jems 4:6\x*Mag aliö akuyöbö, ñɨŋ ha nöbö piaku, Krais nugw pöi nöbö mö nugwidɨx mɨdɨb nöbö piaku rɨg yajöñ mönö akuyöbö yöxön mai diöña. Ñɨŋ magalɨg, Krais adö mɨdöi haul nöbö mölöu nöbö bla nugwön, ñɨŋ nöbö mö ulul, an nöbö mö dib, me rön, rɨb aku yöx nugumɨjeñ. God Mönö aku kai kɨtön yadmä,  
\q1 “God nöbö mö ib diba pɨnɨŋö, rɨmɨdöi bla, ñɨgö pɨ ösös rɨ ri aben;  
\q2 jɨ nöbö mö ib diba pɨnɨŋö, rɨmɨdölöi bla, ñɨgö ögwö yöxön, pɨ ösös rɨ ri abö,” rɨmä.   
\m
\v 6 \x - \xo 5:6 \xt Mat 23:12; Luk 14:11; Jems 4:10\x*Makwam, God Nöbö ölɨsö keiryöbö aku nugwo nugwön anau pön, rɨg yadmɨd mag akwör cöña. Almɨjöñ aku, mai yad nɨgöŋ wop aku, nuŋ raŋ, ñɨŋ nöbö mö diba mɨjöña.  
\v 7 \x - \xo 5:7 \xt Mat 6:25-30\x*God nuŋ keir ñɨgö rɨbyöx nugwön nugwidɨx mɨd ri abmɨd aku nugwön, ñɨŋ ömörö mɨjön aku, magalɨg pɨ imag rol nuŋwa nɨgöña.   
\p
\v 8 \x - \xo 5:8 \xt 1Tes 5:6\x*Wop öim öim pɨdɨlu gör mɨdön, nugw ri ab gɨr mɨjöña. Kwolmal nöbö ñɨŋ aku, kɨjaki, wöñö dib laiön mönö diba pön aulmɨd mag akuyöbö, nöbö mö bli öbɨx nɨmnö, rön, piaku piaku du hölu nugu gɨrön, hö wölu hö pɨn dumɨda.  
\v 9 \x - \xo 5:9 \xt Epes 6:11-13; Jems 4:7\x*Kɨjaki almɨd mag aku, anör rɨmɨdöl; Krais adö mɨdöi haul nöbö mölöu nöbö ana mögörɨb piaku piaku magalɨg ñɨŋ paŋ mag akwör rɨmɨdö, rön, kɨjaki nugwo wöhö rön, Krais mönö wä aku nugw pɨ gö nɨgön rɨ gɨr mɨjöña.  
\v 10 God nöbö mö uliöxön, pɨ ösös rɨ ri abmɨd Nöbö aku, öim öim Krais nöbö mö nuŋwa mɨjne, rön, mögörɨb wä mɨda ñɨgö yad nɨgöŋ aku mɨ, wop kɨ ñɨgö rɨ gwogwam rɨm ölɨŋ höb pɨmɨdöia, jɨ mag ulul mɨŋi God nuŋ keir hön ölɨsö nuŋwa ñɨgö nölaŋ, ñɨŋ Krais nugw pɨ gö nɨgön, cɨrɨp ri abön, nöbö mö ölɨsö nuŋwa mɨdön, mɨd ri aböña.  
\v 11 God Nöbö ölɨsö aku nöbö mö akuyöbö magalɨg öim öim nugwidɨx mɨdaŋ! Mag aliö akuyöbö aku mag waiö.   
\s1 Mönö rɨb mag bli  
\p
\v 12 \x - \xo 5:12 \xt Apos 12:2,25; 13:13; 15:22,37-40\x*Nöböhöd wä na Sailas pɨsaŋ mɨdöla. Mönö ñɨgö yadmɨdɨl kɨ Sailas nuŋ kai kɨtmɨda nugwön nɨ köp metyöbö kɨ ñɨgö abna. Haul nöbö aku, rɨb nɨ yöx nugumɨdɨl akuyöbö nuŋ kwo algör yöx nugumɨda. Ñɨgö mönö ölɨsö yadön, mönö ulmɨdö kai kɨtmɨdɨl pik, God nöbö mö uliöxɨb mag yuö ödöriö akwör kai kɨtmɨdla. Mönö kɨ, mönö mɨ ödöriö, me rön, nugu gör mɨjöña.   
\p
\v 13 \x - \xo 5:13 \xt Apos 12:2; 2Tim 4:11\x*Krais nöbö mö nuŋwa taun dib Babilon yörɨk mɨdöi akuyöbö ñɨgö, “Mɨdöiŋ ä?” röia. God ñɨgö yad nɨgöŋ mag aliö akuyöbö, nöbö mö piaku algör yad nɨgöŋa. Ha na Mak ñɨgö algör ör, “Mɨdöiŋ ä?” ra.  
\v 14 Krais adö mɨdöi haul nöbö mölöu nöbö madmag nɨgölɨŋö, rön, nuö nuö wahax pɨ gɨrön, alguna bɨmɨl nɨmöña. Krais nuŋ ñɨgö nöbö mö nuŋwa mɨdöi piaku magalɨg pɨ ri abaŋ, ñɨŋ tar mɨd ri ab gɨ mɨjöña.