\id REV  
\h REVELESEN 
\toc1 REVELESEN  God tebe ilam duluun weng maak Jon imi kafalebela utamsa uta ko 
\toc2 REVELESEN 
\mt1 REVELESEN  
\mt2 God tebe ilam duluun weng maak Jon imi kafalebela utamsa uta ko  
\ib  
\ip \it Yesus iyo tam abiil tigiin unata, bii atol ulumi kup 65 koyo yak iinuta, Jon iyo yol ok daang kun diim kafin umi win uyo Patmos kutam kal kalabus ke bom-nalata, suuk kon tem weng koyo dola ko ilami ilam sang bogosa ko. Kale kota unang tinum Kristen kelin-tem iyo tebe Kristen kesip iyo kuguup mafak mafak kupka-e-bilipta, Jon imi aget fugunin uyo, bilip iyo Yesus imi ilak dugamin uyo fomtuup waafulin o age-nalata, bogobe-nala e, “Yesus iyo God imi aget fugunin bogo-nala, ‘Bo kanumal o,’ agan-be uta kup fomtuup waafu-nalata, Saatan be dupdaak tama-se kale, afungen tem tolon-temu uyo, God iyo tebe Saatan iyo daala yang suun at kenamin diim abe ken tebelata minte, ilami unang tinum ita kup imdep tam abiil tigiin daala ilami abiip kal suun kup nan-temip o,” age suuk kon dola ko bogobesa ko.\it*  
\c 1  
\p
\v 1 Suuk kon kaa dola kolan o agan-bii koyo Yesus Krais imi mufekmufek kanumin kanumin kafalepnela utabi umi sang uta kale, God yagal Yesus imi kafalebe bogobe-nala e, “Kabo siit-nulu kanumin kanumin mitam tolon-temu umi sang uyo nimi unang tinum bilip imi kafale-bom bogobelal o,” agela kale, Krais iyo, nimi okumop man Jon beyo bogobelita, alugum bilip iyo bogobela tinangku utam-nilipta o age-nalata, ilami ensel maak daala tal-nalata, bogopneba kale,  
\v 2 nimi alugum utabi umi sang uyo ki, God imi weng so Yesus Krais imi weng so uyo dam weng uta kup kaa dola kolan o agan-bii kale,  
\v 3 kanumin kanumin boyo mep so mitam tolon o angbu kale, waantap ita kanumin kanumin mitam tolon-temu umi sang koyo fomtuup tikilip umdii, deng tebeman-temip e minte, waantap ita suuk kon tem weng dola koli kwek uyo tinangku waafulip umdii, deng tebeman-temip no ko.   
\s1 Jon tebe Kristen unang tinum abiip ban kal albip kalip imi weng umobesa uta ko  
\p
\v 4-5 Yesus imi unang tinum Provins Esia umi abiip ban kal maak albip ibo nuubip aga? Niyo Jon nita suuk kon koyo dola-bii ko. Kale God iyo kamano kaso sugayok so biilan-temu so uyo suun kup boma kale, God so imi ogok kemin sinik ban kal God imi tonamin baan diim umi mep so kugol mo-bomip so Yesus Krais so ulimal iyo tebe kuguup tambal uyo ipmi kupka-e-bom telele-bilipta, ipmi aget tem uyo bilili agebelan-temu ko. Kale Yesus Krais beyo God imi sang umi tuluun weng baga-emin tinum e minte, kaan-nala isiik kamaki fen tigi mosa tinum e minte, kafin diim komi kamogimal imi tiin molin tinum no ko.  
\p Kale Yesus beyo numi ilak uyo dugan-boma kale, bemi isak uta singkam daalu kaan-nalata, koyo numi fengmin sok uyo ugaa kwaa-nala e,  
\v 6 nuyo imdep no ilami daam tem daalata, maagup ke-sulup ko. Kale God iyo Yesus ilami God e minte, ilami Aalap no kale, God iyo nuyo ulaa imdulata, mitam ilami pris ko age tinum amem ke-sulup kale, Yesus Krais beyo te tam kamok ke-se kale, tambaliim kale, nuyo suun kup bemi tok uyo baga-bom-nulup e minte, bemi weng uyo tele tinangku tambaliim kup waafuu no ke-bom-nulupta o ageta ko.   
\p
\v 7 Ibaa. Beyo, iip tem kutam-tele tolon o angba kale, tolon-tema kota, alugum unang tinum so alugum bemi angkolip kaan-se so iyo atam-nilipta, alugum kafin kaa kutufosu komi tinum miit maak maak iyo bemi atul uyo finan-bom-nilipta, fomtuup ameman-temip kale, tuluun mitam tolon-temu ko.   
\p
\v 8 Kale Bisel God beyo titil miit kayaak kale, beyo sugamiyok uyo bii-se e minte, kamano koyo alba e minte, biilan-temu uyo, nan-tema no kale, iyo bogo-nala e, “Niyo magam tem ilota kwep no afungen tem kwek diliit kelan-temu uyo, suun nan-temi o,” ageba ko.   
\s1 Jon tebe God imi ulaa dula kamok kesa tinum Yesus Krais atamsa uta ko  
\sr (Rev 2:8,12,16,18, 3:1,7,14, 6:2, 17:14, 19:11-16,21, 21:6, 22:13,16)  
\p
\v 9 Kale ipso e ipkum Jon niso ninggil nuyo Yesus imi ilak uyo do-nulupta, mitam ilami daam tem uyo mitam ti-sulup kale, bomi kalan uta Yesus imi waasi iyo tebe kuguup mafak uyo kupka-e-bilipta, kaal fuyap uyo utaman-nuubup kuta, suun kup titil kup fagan-nuubup ko. Kale God imi weng so Yesus imi weng so baga-em-nuubi bomi kalan uta sok de namo nimtamo yol ok daang kun diim ilep tal-nilip e, ok daang kun diim umi kafin iip ugo kolin maak Patmos kaa daalipta,  
\v 10 kagal bom-nilita, Kamogim Yesus imi ifin am maak daanbu kota, God imi Sinik iyo kafalne-balata, ilam uyo duga-bomta tolong dolita, nimi umik tem katam uyo weng maak bigul weng ulutap fomtuup olan-bo kalaa agelita,  
\v 11 bogopne-nala e, “Kabo kanumin kanumin utaman-temap boyo suuk kon diim kal dola ko-nalapta, kulupmap no nimi unang tinum abiip maak maak Efesis so e Smena so Pegamum so Tayataira so Sadis so Filadelfia so Laodisia so abiip ban kal kugol albip bilip imi finang unuk o,” agela ko.   
\p
\v 12 Agela e, niyo fupkela atamta, waantap ita weng boyo bagane-be kalaa agon o ageta fupkelata utamita e, ilaam umi kefo kwep tam daagamin umi baan diim ban kal uyo albu kalaa ageli kale, boyo gol uta kulu telelasip kale,  
\v 13 kafin diim tinum ilatap maak iyo ilaam umi kefo kwep tam daagamin umi baan diim umi iibak tem kugol moba kale, iyo ilim timitim maak migila te daak yaan tem kwek iinu e minte, sen ko age gol umi sok ilu kolin uta ku tiit ingalang tem kegal migi no kesa kale,  
\v 14 imi dubom so dubom kon so uyo namaal kale, beyo fen uun namayim kon aa-e min abiil tugul aa ulutap kesa kale, imi tiin uyo at dong ulutap ke-nalata, unang tinum imi aget tem kuso tele utama-ema kale,  
\v 15 imi yaan uyo kamaa tuumon ken tibin dong so kebu ulutap e minte, imi weng bagan-be uyo ok fon umi biileng afalik uunbu ulutap no kale,  
\v 16 abiil tigiin umi biningok ban kal maak kulep te ilami sagaal miton umi kul ban diim tola albip kale, bemi weng uyo benat ko age un kong milii so milii so taalin atul tebesu ulutap kale, fen un binola yak duutamo unemin ke-bom bagan-be kale, imi tibit kun uyo ataan tal dubim e tal-nulu fomtuup kenbu ulutap keba kalaa age atami ko.   
\p
\v 17 Kale atamita, kanubeba kalaa age atam-nilita, niyo finano kumen daak Kamogim Yesus ilami miit tem kube-nilita, tinum kaanabip ulutap kelita, ilami sagaal ipkuk uyo kwep mek nimi kaal diim daa bogopne-nala e, “Kabo finanin ba kale, niyo sugayok uyo bii-sii e minte, kamano koyo albi e minte, biilan-temu umi am afungen tem uyo, nan-temi no kale,  
\v 18 suun kup nin tinum nita ko. Kale siin uyo niyo kaan-sii kuta, asok fen tigi mo-nilita, kaa kafan albi kale, suun kup nan-temi ko. Kale niyo tinum kaan-nilip begel am unsip bilip imi faal bitopmi tam unom fen tigi saanin tinum iyo nita ko.  
\v 19 Kale kabo kapmi utamap bomi sang uyo dola ko-nalap e minte, mufekmufek kalbu so mufekmufek biilu mitam tolon-temu sino bomi sang uyo dola ko no kelal o ageta kale,  
\v 20 kabo biningok ban kal kulep nimi sagaal miton umi kul ban diim kaa toli albip kaso e ilaam umi kefo kwep tam daagamin umi baan diim tambal ban kal kalbu kaso utamap bomi magam uta bogopkelan-temi kale, biningok ban kal koyo ensel tebe nimi unang tinum abiip ban kal maak kugol albip imi tiin mosip imi sang felep yak ku tolu kale minte, ilaam umi kefo kwep tam daagamin umi baan diim ban kal koyo nimi unang tinum abiip ban kal albip imi sang bogo no kelu o,” age Kamogim Yesus iyo bogopnela ko.   
\c 2  
\s1 Yesus imi weng kwaala no Kristen unang tinum abiip Efesis kutam albip imi bogobesa uta ko  
\sr (1 Jon 4:1, Rev 1:16,20, 22:1-2,14)  
\p
\v 1 Kale Kamogim Yesus beyo asok bogopne-nala e, “Jon kabo nimi weng umaak nimi unang tinum abiip Efesis kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “Tinum biningok ban kal kulep ilami sagaal miton umi kul ban diim ku toba beyo nagal e minte, ilaam umi kefo kwep tam daagamin umi baan diim tambal ban kal umi iibak tem ku-tele tiinan-be beyo nagal no kale, nimi unang tinum ibo weng umaak bogobelan o agan-bii ko.   
\p
\v 2 “‘ “Kale niyo ipmi intap intap kanum-nuubip so e minte ipmi ogok bong fagam-nuubip so ipmi dital fagaa waafusip so uyo utam-nili e minte, ibo itam no kesi kale, ibo tinum mafak iyo imkalip ipso nuubaalip kalaa age-nili e minte, tinum iyo tal bisop bogobe-nilip, ‘Nuta Yesus imi kalaan tinum o,’ agan-bilip uyo, ibo im-kuguta itamipta e, bilip iyo bisop bagan talan-bilip kalaa agan-nuubip kalaa age no ke itamsi kale,  
\v 3 tinum bilip iyo tebe ibo itamipta e, bilip iyo Yesus imi ilak uta dosip kalaa age-nilipta, kuguup mafak kupka-e-bilip kuta, ibo nimi kuguup uyo kupkasaalip binim kale, sining age-bom-nilip e, dital fagaa nimi kuguup uyo waafuu kanum tebesip kalaa age itamsi ko.  
\v 4 Kuta maagup maak bomi kalan uta ibo yegeman o agan-bii kale, tam kamaki uyo nimi aget kup kopne bii-silip kuta, am kaa daansu koyo, nimi aget uyo asok ilumano kupkalip katiban-suu ko.  
\v 5 Kale tam kamaki ipmi nimi aget kopne-bom bii kupkaa ilumanolip katiban-suu bomi aget uyo fugun-bom-nilipta, aget fupkela ko-nilip e, ilipmi kamaki kuguup tambal kanu-bii-silip ulutap ke asok maak so kanumin o ageta kale, ibo aget fupkela kolin-tem kelan-temip uyo, ipmi ilaam umi kefo kwep tam daagamin umi baan diim tambal telela ko kwep daasip uyo ulumi baan diim kugol bom-suluta, niyo tal-nilita, kupkan kepman-temi ko.  
\v 6 Aa mungkup ipmi kuguup tambal uyo maak so albu kale, Nikolas imi tinum imi kuguup mafak kanum-nuubip boyo ipkil utafinon-nuubip kale, nagal mungkup boyo utafinon-bom no kem-nuubi ko.   
\p
\v 7 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o ageta ko. Kale suun nin umi at uyo God imi ilanggiip kugol mosu kale, waantap ita nimi kuguup uyo waafulin kup taba umdii, beyo dupkalita, at bomi dum uyo dagaa ku une-nalata, suun kup nan-tema o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\s1 Yesus imi weng kwaala no Kristen unang tinum abiip Smena kutam albip imi bogobesa uta ko  
\sr (Jems 1:12, 2:5, Rev 1:17-18, 3:9, 20:14, 21:8)  
\p
\v 8 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Smena kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “Sugamiyok uyo niyo bii-sii e minte, biilu am afungen daanan-temu uyo, nan-temi no kale, siin tinum atin kaana dubalip asok fen tigi mo-nala kaa tiin kafan alba iyo nita kale, nimi unang tinum ibo weng umaak bogobelan o agan-bii kale,  
\v 9 niyo intap intap mufekmufek mafak tal ipmi diim aban-nuubu so e minte ipmi mufekmufek duumatanip so uyo utamsi kuta, ibo God imi mufekmufek so kuba. Kale minte Juda kasel iip maak maak iyo bogo-nilip, ‘Juda kasel nuyo God ilami tinum o,’ agan-nuubip kuta, bilip iyo fen God imi tinum ba kale, Saatan imi tinum ita kale, bilip imi Kristen ipmi bisop baga-e-bom ipmi win kufak daga-em-nuubip boyo utamsi ko.  
\v 10 Kale ibaa. Kota Saatan iyo, mep so ibo im-kugulita, kuguup mafak uyo maak waafulin o age-nalata, tinum bilip iyo bogobela tal-nilipta, iip maak maak ibo kulep no sok delipta, kota kuguup mafak uyo tal ipmi diim uyo abe-buluta bii, am nagaal kal kelan-temu ko. Kuta ibo kuguup mafak tal ipmi diim abelu kaal fuyap utaman-temip umi atul boyo finanin ba kale, tinum bilip iyo tebe ibo inolan-temup o agelan-temip kuta, ibo nimi ilak dugamin uyo fomtuup waafu-bom-bilipta, niyo mufekmufek tambal uyo ibo kobelita, suun kup nan-temip ko.   
\p
\v 11 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o ageta ko. Kale waantap ita nimi kuguup uyo waafulin kup tibip umdii, kaanip biilan-temu uyo, kaal binim kelan-temip kale, bilip iyo yak suun at kenan-bomu umi tem umaak iinom amiit kaan atin binimanan-temaalip binim o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\s1 Yesus imi weng kwaala no Kristen unang tinum abiip Pegamum kutam albip imi bogobesa uta ko  
\sr (Hib 4:12, Rev 1:16, 19:15)  
\p
\v 12 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Pegamum kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “Tinum bemi weng uyo benat ko age un kong milii so milii so taalin atul tebesu ulutap beyo nita kale, nimi unang tinum ibo weng umaak bogobelan o agan-bii ko.   
\p
\v 13 “‘ “Kale nagal utamsi kale, ipmi abiip tinum bilip iyo Saatan ilami man aligaap ke-bom-nilipta, ibo kuguup mafak uyo kupka-em-nuubip kuta, ibo nalami man diil ilatap kepne-bom nuubip kale, siin uyo nimi tinum maak Antipas beyo Saatan imi abiip ko age Pegamum kugol ipso bom-nala e, nimi weng uyo kup-kagamin binim unang tinum iyo baga-emin kup ke-bom waafuu kwep tebesata, bilip iyo tebe ipmi tiin diim kugol angkolip utam-silip kuta, ibo bogo-nilip e, ‘Kanubelip kale, nuyo bemi ilak dosup boyo dupkalum o,’ nagesaalip ko.  
\v 14 Kuta iip maak maak bomi kalan uta yegeman o agan-bii kale, iip maak maak ibo siin profet ko age weng kem bagamin tinum mafak Balam imi kuguup mafak uyo waafusip kale, Balam beyo tebe-nala e, kamok Balak imi kafale-balata, ita tebe Israel kasel iyo uget taga-balata, bilip iyo fenga-bii-silip kale, tinum migik tebe tam men amem umi sipsip min, kao min ano-nilip kupka-e-bilip uyo un-bom-nilip e minte, sa daga-bom no ke-bii-silip ko.  
\v 15 Kale mungkup ipkil ko. Ibo ipmi tinum iip maak maak iyo imkalipta, Nikolas ilami tinum bilip imi kuguup mafak uyo waafuu kwep tebesip ko.  
\v 16 Kale ibo aget fupkela ko kanum-nuubip boyo kupkalin a. Ale kanube aget fupkela kolan-temaalip bole, ipmi finang yuut tal-nili e, tinum bilip iyo nimi bon tem weng ko age un kong ulutap komi tuup anolita, kaal fuyap kulan-temip ko.   
\p
\v 17 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o ageta ko. Kale waantap ita nimi kuguup uyo waafulin kup taba umdii, God imi iman waansu ko age aget tem kuntuk saanemin uyo kobe-nili e minte, tuum namaal maak ku-nili kamaa umi win maak tuum bomi diim kwegal dola ko kobe no kelan-temi kale, tinum beyo tuum boyo ku-nalata, utamata e, dam niyo God imi man kalaa agon-tema kuta, kamaa win boyo tinum migik iyo utamepman-temaalip kale, ilasinon utaman-tema o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\s1 Yesus imi weng kwaala no Kristen unang tinum abiip Tayataira kutam albip imi bogobesa uta ko  
\sr (Rev 1:14-15, 22:16)  
\p
\v 18 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Tayataira kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “Niyo God imi Man kale, tinum bemi tiin uyo at kenabu ulutap e minte, bemi yaan uyo kamaa tuumon ken tibin dong so kebu ulutap no beyo nita kale, nimi unang tinum ibo weng umaak bogobelan o agan-bii ko.   
\p
\v 19 “‘ “Kale niyo itamsi kale, ipmi intap intap kanum-nuubip so nimi aget kup kopnesip so ipkumal imi aget kup kobesip so nimi ilak dosip so minte ipkumal dong daga-em-nuubip so uyo utam no kesi kale, ibo dital fagaa waafu-bilip senganu kamano komi ipta ipta ke-bilip uyo utam no kesi ko.  
\v 20 Kuta maagup maak bomi kalan uta yegeman o agan-bii kale, tam unang Jesebel boyo kupkalip kugol ipso bom-nulu e, ‘Nita God imi profet ko age weng kem baga-emin unang o,’ age-nulu e, nimi ilak dolin iip maak maak ibo kafale-bom-nulu e, kulep yang tolu fengmin ko age tam sa daga-bom-nilip e minte, tinum migik tebe men amem umi sipsip min, kao min ano kupka-e-bilip uyo unan-bom no kem-nuubip ko.  
\v 21 Kale niyo unang boyo fen-bilita, umi aget uyo fupkela koluta, bomi fengmin uyo kupkabelan o age-nilita, fen tebesi kuta, ‘Boyo aget fupkela ko-nilita, nimi sa dagan-nuubi boyo kupkalan-temaali o,’ agesu ko.  
\v 22 Ibaa. Nagal tebe-nilita, mafak ilin umaak kwaapmi yak umi kaal diim abeluta, kaal fuyap ogen abin so uyo utamamu kale minte, waantap ipta unang kuso sa dagan-nuubip ibo aget fupkela ko-nilip kanube unang umi kanum-nuubu umi kuguup uyo kupkalin-tem kelan-temip uyo, kaal fuyap afaligen umaak mungkup kwaapmi tal ipmi kaal diim abelu ogen utamip e minte,  
\v 23 unang bomi okumop man iyo nagal tebe anoli kaan no kelan-temip ko. Kale kota alugum nimi unang tinum abiip maak maak albip ibo utamipta e, God imi Man beyo unang tinum numi aget tem uyo tele utamebe-nalata, kanum-nuubup umi kalan uta boyo felebeluta, kuguup tambal aa-e min, kuguup mafak aa uyo nuyo kupka-em-nuuba kalaa nagelan-temip ko.   
\p
\v 24 “‘ “Kuta minte Tayataira kasel imi milii maak ibo kuguup mafak boyo maak waafusaalip e minte, ‘Saatan imi mufekmufek yang waansu o,’ agan-nuubip boyo maak dagaa kusaalip no kale, ibaa. Niyo ipmi bogobe-nili, ‘Kuguup bong fagamin uyo maak so waafulin o,’ agelan-temaali kale,  
\v 25 ilipmi kuguup kanum-nuubip boyo fomtuup waafulin kup ke-bom bom-bilipta biita, tolon o ageta ko.  
\v 26-27 Kale waantap ita dital fagaa nimi kuguup uyo waafulin kup bom bii-nala kaana umdii, beta ulaa dulita, kamogim ke-nalata, nimi Aatum tebe ulaa nimdula kamok kesi nalatap ke-nalata, beta abiip maak maak unang tinum iyo titil fagaa fomtuup tiin mo-bom-nalata, tinum iyo tebe at dugum ku-nala oget kola kupkaba ulutap ke-bom God imi waasi iyo imdaak tamagaman-tema kale minte,  
\v 28 nagal am kel diim biningok kiim bigiduluup mitam mobu ulutap nita kale, niyo isino nan-temup ko.   
\p
\v 29 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\c 3  
\s1 Yesus imi weng kwaala no Kristen unang tinum abiip Sadis kutam albip imi bogobesa uta ko  
\sr (Luk 10:20, 1 Tes 5:2, Rev 1:16,20, 7:9)  
\p
\v 1 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Sadis kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “God imi sinik ko age ensel ban kal imi tiin molin tinum beyo nagal e minte, biningok ban kal waafulin tinum iyo nagal no kale, nimi unang tinum ibo weng umaak bogobelan o agan-bii kale, niyo ipmi intap intap kanum-nuubip uyo utamsi kale, tinum migik iyo ipmi sang uyo baga-bom-nilip, ‘Bilip ita unang tinum kafan so albip ilitap ke-nilipta, Kamogim Yesus imi ilak uyo fomtuup dugan-bilip o,’ agan-bilip ibo win tambal uyo kusip kuta, ibo unang tinum kaansip ilitap ke-nilipta, nimi ilak uyo fomtuup duganbaalip binim ko.  
\v 2 Kale niyo ipmi kuguup kanum-nuubip boyo iliba kolita e, bota nimi God imi tiin diim uyo fen tambal telelam-nuubaalip kalaa agebi kale, ibo fen kafan bom-nilipta, ipmi kuguup tambal, mep so binimanan o angbu boyo dital fagaa asok fomtuup waafulin o ageta ko.  
\v 3 Kale siin uyo ibo God imi weng uyo tinangkulipta, tambal kalaa age-silip kale, bomi aget uyo asok fugun-bom-nilipta, aget fupkela ko fengmin kup kemin boyo kupka-nilip e, God imi weng uyo fomtuup waafulin o ageta ko. Ale minte kanube ibo fen kafan nan-temaalip uyo, niyo maagalo tem tolon-temi kale, ibo dogonubeta utamta, dok kota beyo numi fengmin umi yan uyo kupka-em tolon-tema kalaa nagelan-temaalip kuba.  
\v 4 Kuta ipmi kuguup uyo ilim ninak tonin binim ulutap kale, Sadis kasel ipmi unang tinum iip maak maak iyo fenga-bom-nilipta, ilimi win uyo kufak dagan-nuubaalip kale, bilip imi kuguup tambal telelam-nuubip boyo ki, felepmuta, bilip iyo ilim namaal uyo migilipta, niso nan-temip ko.  
\v 5 Kale waantap ita nimi kuguup uyo waafulin kup taba umdii, ilim namaal kanupmin boyo migilan-tema kale, nimi utamita, tinum beyo suun kup nan-tema kalaa age-nili bemi win suuk kon tem kwegal dola kobelan-temi uyo tolopman-temaali kale, nagal nalami Aatum so e minte imi ensel sino ilimi diim kal tinum bemi win uyo kufobe-nili e, ‘Beyo nimi tinum o,’ agelan-temi ko.   
\p
\v 6 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\s1 Yesus imi weng kwaala no Kristen unang tinum abiip Filadelfia kutam albip imi bogobesa uta ko  
\sr (Rev 14:1, 21:2)  
\p
\v 7 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Filadelfia kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogo-nala kano, “Niyo fen tinum tambal e minte, nimi, ‘Bo kanuman-temi o,’ ageli uyo suun kup kanu-bom no kem-nuubi kale, Devit imi sugayok kamok king ke-bom unang tinum tiin mo-bii-se ulutap kale, nagal mungkup king imi kii uyo waafuli albu kale, nimi abiip umi amitem faal bitan-nuubi uyo, tinum iyo maak tebe-nalata, asok ilom-nuubaala e minte, nimi abiip umi amitem faal ilom-nuubi uyo, tinum iyo maak tebe-nalata, asok bitan-nuubaala no kale, maagup nita kup ilo-bom bita-bom kem-nuubi ko. Kale nimi unang tinum ibo weng uyo maak so bogobelan o ageta kale, tinangku-silipta.   
\p
\v 8 “‘ “Niyo ipmi kanumin kanumin kanum-nuubip uyo utamsi kale, boyo ipmi titil uyo katip kuta, ipkil nimi weng uta fomtuup waafu-nilipta kale, ‘Nuyo Yesus imi tinum ba o,’ agesaalip kale, niyo ipmi tibit diim ilo umi faal uyo bitobebi kale, tinum iyo dok ita bagang-kale-nalata, faal boyo ilo-nama binim kale, faal bomi magam uyo ipkil utamin. Niyo ogok kwiin tagang uyo ipmi kobelan-temi kale, ‘Tal-nilipta, ogok kemin o,’ age-nuluta, kam agan-bo ko.  
\v 9 Kale Saatan imi tinum iyo bogo-nilip e, ‘Juda kasel nuyo God ilami tinum o,’ agan-nuubip kuta, bilip iyo fen God imi tinum ba kale, bisop baga-bom-nilipta kale, nagal bilip iyo fot tebeli tal-nilipta, Filadelfia kasel ibo itamipta e, God iyo Kristen kalip imi aget uyo kobesa kalaa age-nilipta, kamok imi weng umka-emin umi kuguup uyo kanumin kale, katuun duung fegela daak ilipmi miit tem kugol suk mo kalaak fenan-temip ko.  
\v 10 Kale ibo nimi weng bogobesi uta tinangku-nilipta, nimi kuguup uyo kup-kagamin binim, waafuu kwep tebesip kalaa age-nilita, ibo buguli tambaliim nan-temip utamta, biilu kuguup mafak afaligen mitam tolon-temu uyo, tal kafin kaa kutufosu komi unang tinum alugum so ipso ipmi diim uyo abe-buluta, utamaman-temip kuta, nagal ibo bugu-bom-bilita, ibo fen ifak daalan-temaalu ko.  
\v 11 Kale mep tolon-temi kale, ibo imkalip tinum migik iyo maak meng-nilip imtamo yang iinipta, nimi mufekmufek tambal kobelan o agan-bii uyo uk kugan ko-nimip kale, ipmi kuguup kanum-nuubip boyo fomtuup waafulin kup kemin o ageta ko.  
\v 12 Kale kanube waantap ita nimi kuguup uyo waafulin kup taba umdii, nagal mungkup tinum beyo telela dolita, nimi Aatum God imi ulotu am miton umi am kun mola daak nagat mobu ulutap kelan-tema kale, kupkaa tam iinon-temaala ko. Kale beyo nalami tinum kalaa age-nilita, nagal tebe nimi Aatum God imi win so nimi God imi abiip umi win so nalami kamaa win so uyo tinum bemi kaal diim kal dolepman-temi kale, abiip boyo kamaa abiip Jerusalam o agan-kalon-temip kale, nimi Aatum God ita abiip boyo abiil tigiin ilota alula kwaala malaak kafin diim tolon-temu ko.   
\p
\v 13 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o,” age Kamogim Yesus yagal bogopnela dola koli o,’ age-nalapta, Jon kabo suuk kon tem kwegal dola kobelal o,” age-nalata, Kamogim Yesus ita bogopneba ko.   
\s1 Yesus imi weng kwaala no Kristen unang tinum abiip Laodisia kutam albip imi bogobesa uta ko  
\sr (Luk 12:13-21, Rom 12:11, 1 Kor 11:32, Kol 1:15, Hib 12:7, Rev 19:11)  
\p
\v 14 Kale Kamogim Yesus iyo asok bogopne-nala e, “Jon kabo nimi weng umaak nimi unang tinum abiip Laodisia kutam albip imi tiin molin ko age ensel imi dola kobe bogobe-nalap e, ‘Kamogim Yesus iyo bogopne-nala kano, “God imi weng kwep daasa uyo nita waafu-bom-bili tol mitam tele-bom e minte, God ilami bon tem weng uta kup tuluun baga-e-bom no kemin tinum iyo kalbi kale, niyo alugum mufekmufek boyo God ulim nugol telela kosup kale, nimi unang tinum ibo weng umaak bogobelan o agan-bii ko.   
\p
\v 15 “‘ “Kale ipmi kanumin kanumin kanum-nuubip uyo utamsi kale, ibo tuum fen mimin tebebu ulutap ba e minte, tuum disanbu ulutap ba no kale, ibo iip kugol bom-nilipta, nimi ilak uyo fomtuup dobaalip e minte, fen niyo umik ugopnebaalip no ko. Kale niyo bogo-nili, ‘Ibo aget alop tagamin boyo kupka-nilipta, aget maagup ke-nilipta, nimi ilak uyo tele do nalami alugum kelin o,’ age-sii kuta,  
\v 16 nagal ibo itamita e, nimi ilak uyo atin dolin-tem e minte, atin umik ugopnelin-tem no kale, atuk atuk kem-nuubip kalaa age-nilita, nalami bon tem ilep usaan fuuli daak iinin ulutap ke ibo imdali yang iinon-temip kuba.  
\v 17 Kale ibo bogo-nilip, ‘Nuta mufekmufek so kasel e minte, nuyo delep tibin man no kale, nuyo mufekmufek umaak dilinota duumatansaalup o,’ agan tebesip kuta, ibo usap man ke-bilipta, niyo i-filin-bii kale,  
\m ibo tinum mufekmufek duumatanba aa-e min,  
\m minte tinum tiin mafaganebebu aa-e min,  
\m minte tinum ilim migimin binim, kaal kem alba aa-e ilitap ke-bom-nilipta, God imi kuguup tambal uyo maak waafunamin binim kuta, ibo utamta, boyo kanube albup kalaa agan-nuubaalip ko.  
\v 18 Kale kanum-nuubip bota, niyo, ibo weng kem uyo bogobelan o ageta kale, tinangku-silipta. Gol kwe fuu telela kolip tambalansu uyo nimi diim kal albu kale, ipkil tal mo-nilipta, tinum mufekmufek so kasel ilitap ke-bom-nilip e minte, ilim bisop uyo tiine-bulup nuyo itama-bilip fitom tebepmaalu o age-nilipta, ibo tal nimi diim kal ilim namaal uyo mo migi-nilipta, tinum suun ilim tambal migilin ilitap ke-bom-nilip e minte, tal nimi diim kal marasin uyo mo-nilipta, ilipmi tiin uyo abu-bilip tambalanepmu tinum tiin tambal ilitap ke-bom no keman-temip bota, God imi kuguup tambal uyo tele waafulan-temip ko.  
\v 19 Kale kanube niyo tinum dok ita imi aget kup kobeli umdii, niyo tebe bilip iyo, aalap tebe ilami man saal daga-bom kafaleba ulutap, mungkup bilip iyo yege-bom-nili e minte, kaal fuyap kobeli ogen utama-bom no keman-temip kale, ipmi aget kup kobesi kale, ipkil dital fagaa ipmi kuguup mafak uyo kupkaa ipmi aget uyo fupkela kolin o ageta ko.  
\v 20 Ibaa. Ipmi aget fugunin umi amitung diim kal mo-bom-nilita, faal dok dok ke-bii kale, kanube tinum iyo dok ita nimi weng uyo tinangku-nala faal bitopnela umdii, niyo tam tamita, niso iso maagup iman unan-bom deng tebeman-temup ko.  
\v 21 Kale siin uyo nita nita ke-nilita, Saatan iyo kubagana dupkalita, nimi Aatum God imi titil uyo tulu e minte, nimi titil uyo tulu no ke-bom ulim dagaap kem tebesup kale, ulutap mungkup waantap ita nimi kuguup uyo waafulin kup taba umdii, beyo dupkali nimi titil uyo nisino isino dagaap keman-temup ko.   
\p
\v 22 “‘ “Kale ibo tolong so kale, ibo God imi Sinik tebe-nala Kristen unang tinum ipmi weng baga-e-be boyo tele tinangku-nilipta o,” age Kamogim iyo bogola o,’ age-nalapta, suuk kon tem kwegal dola kobelal o,” age-nalata, Kamogim Yesus iyo bogopneba ko.   
\c 4  
\s1 Abiil tigiin kal ulotu ke-bom-nilip God imi win kufu-emsip uta ko  
\sr (Rev 7:11-12, 11:15-19, 14:3, 19:4-8, 21:5-7)  
\p
\v 1 Tam maak uyo ki, Jon niyo ilam maak dolita, abiil tigiin uyo faal maak bitobu kalaa ageli ko.  
\p Kale siin uyo bigul weng ko age fongket weng ulutap maak bogopnelu tinangkubi kale, asok kanupmin weng ulutap abiil tigiin ilota bogopne-nulu e, “Mitam talapta, biilan-temu umi mufekmufek mitam tolon-temu uyo kafalepkelan o,” agelu e,  
\v 2 mep maak fagaa God imi Sinik iyo tebe-nala e, nimi sinik iyo dep tam abiil tigiin daalata, utamita, tinum maak tam kamok king imi ton-bom alugum imi tiin momin umi baan diim kugol tonba kalaa ageli ko.  
\v 3 Kale atamita, imi tibit diim uyo titup kup fuko-bii tonsa kalaa ageli kale, boyo tam tuum naman-bii kolip tambaliim titup kup fuko-bii isagulut ke-nulu e minte, kaalasit ke no kebu ulutap e minte, webaal tambal tiin bulusii so kesu uta tebeta imi tonamin baan diim uyo fufala dek mobu kalaa age utami ko.  
\v 4 Kale kamok kamok ilimi kup 24 kalip igil mungkup Bisel God imi tonamin baan diim uyo fufala dek mo-nilip e, maagup maagup iyo kamok ilimi tonamin baan diim kugol tona tona ke-nilip e, ilim namaal tambal uta kup kulu migi-nilip e minte, kamok imi dufalum tambal gol kulu telelasip uta kulu kwaak kali yakyak ke no kebip kalaa age no keli ko.  
\v 5 Kale tam Bisel imi tonamin baan diim kugol bamalaang falaak molu e, weng baga-bulu e minte, tumuun bigin no kelu e, imi tonamin baan diim umi miit tem kugol ilaam ban kal iyo kenan-bilip kalaa age utam no keli kale, ilaam ban kal bilip iyo God imi ensel ko age sinik ban kal imi sang felep yak ku to telela kulep tosip ita ko.  
\v 6 Aa minte Bisel imi tonamin baan diim umi miit tem kugol mufekmufek ok muk ulutap maak ibo kosu kale, boyo tambaliim kup dong kup fining mosu kale, umi utaman-temi uyo umi mufekmufek kulaak albu uyo kalaak fen kem utam-nimi kale, boyo am umi glas ulutap ko.  
\p Kale Bisel imi tonamin baan diim umi mep so boyo God imi mufekmufek tinum ke dimduum ke kelin kalbinim maak mobip kale, maak boyo tibit kun diim ilo kugol molu e minte, maak boyo umik tem kugol molu e minte, maak boyo afaan ilo kugol molu e minte, maak uta ipkuk ilo kugol molu no kebip kale, bilip imi ol ban so umik tem so kaal diim alugum uyo tiin tagang albu kalaa ageli ko.  
\v 7 Kale mufekmufek kamaki bemi dubom uyo pusi kwiin kiim ko age layon imi dubom ulutap e minte, maak bemi dubom uyo kao imak imi dubom ulutap e minte, maak bemi dubom uyo tinum dubom ulutap e minte, maak bemi dubom uta minte uun bogol fululuu une-bom tiin dagaba ulutap no ko.  
\v 8 Kale minte God imi mufekmufek tinum ke dimduum ke kelin kalbinim alugum maagup maagup bilip iyo bal kun bugup kal kale, bilip imi bal kun tip diim uyo tiin tagang uyo albu e minte, aa mungkup bilip imi bal kun afak tem uyo tiin tagang uyo albu no kale, bilip iyo suun kup mililep so daanin so aseng kup kwaa-bom aseng kwek uyo bogo-nilip e, “Bisel God kabo tambaliim kup tebesap e minte, tol kup tebesap e minte, kabo titil magam kayaak no kale, sugayok uyo suun kup bii-salap e minte, kamano koyo albap e minte, biilan-temu ugol mungkup, suun kup nan-temap no o,” agan-bom-nilipta, aseng uyo kwan-nuubip ko.  
\v 9 Kale mungkup mufekmufek tinum ke dimduum ke kelin kalbinim bilip iyo aseng kwaa-bom-nilip e, suun kup nin tinum God tonba bemi tok uyo baga-bom-nilip e, bemi deng kup tebe-bom, “Suguul o,” age baga-e-bom no ke-bilip e minte,  
\v 10 kamok kamok ilimi kup 24 kalip igil mungkup alugum suun kup nin tinum God tonba bemi tibit kun diim ilo kugol suun kup katuun duung fegela daak ton-bom bogobe-nilip e, “Kabo numi Kamok kale, nuyo kapmi win tolop diim uta kup unang tinum tiin mobup o,” age-nilip e, ilimi dufalum uyo dulep daak tonba bemi miit tem ku to-nilip e, deng tebe-bom bogolip,  
\v 11 “Numi Bisel God kabaa. Kapmi aget fugunin uyo, ‘Mufekmufek boyo alugum telelalan-temi o,’ agesap kale, fen kabo mufekmufek boyo telela kolapta, kota albip kalaa age-nulupta, nuyo felepmuta, kapmi tok baga-bom kapmi deng tebe-bom-nulupta, ‘Suguul o,’ agan-kulum o ageta kale, kabo kwiin kiim e minte, titil miit kayaak no kalaa age-nulupta, kapmi aseng uyo kwan-bulup o,” agan-nuubip ko.   
\c 5  
\s1 Jon imi tebe, God imi suuk kon dola fufala ko kwep daasa umi utam-se uta ko  
\p
\v 1 Jon niyo utamita, tam Bisel God iyo suuk kon timitim fufala kosu maak ilami sagaal ipkuk diim kal waafuba kalaa ageli kale, suuk kon boyo tip diim katam uyo dola som, minte afak tem kalaak uyo dola no kelin kalaa ageta utamita, at dan ban kal maak fugu-nala e, suuk kon boyo fufalam kwep abe-bom-nala e, at dan uyo fukola nagat molu kupkaa yakyak ke binimanu de kwep ku daasa kale, umi kanubesa kwek uyo tinum iyo maak utamta tiki-nama binim kalaa ageli ko.  
\v 2 Kale ensel titil tebesa maak atami e, fomtuup olapne-nala e, dagala ko. “Tambal kup tebesa tinum iyo waantap ita ki tii at dan boyo tagaa kupkan ke-nalata, suuk kon boyo tiila kolan-tema o?” agela kuta,  
\v 3 tam abiil tigiin sino kafin diim sino e minte tinum kaan unsip imi abiip sino uyo tinum tambal kup tebesa iyo maak tebe-nalata, tii at dan boyo tagaa kupkan ke-nalata, suuk kon boyo tiila ko-nalata, weng kwek uyo tiki-nama binim ko.  
\v 4 Kale niyo utamita e, tinum tambal kup tebesa iyo maak tii suuk kon boyo tiila ko weng kwek uyo tiki-nama binim kalaa age-nilita, nimi aget tem uyo iluum kup tebepneluta, fomtuup amemi e,  
\v 5 kamok kamok ilimi kup 24 bilip iyo maagup maak bogopne-nala e, “Kabo amemin ba kale, mep tinum moba beyo tii kale, kek fen atamal a. Kale bemi sang uyo bogo-nilip, ‘Bemi win uyo, pusi kiim ko age layon o,’ agan-nuubip kale, win bomi magam uyo, ‘Juda imi man ilop imi kamok o,’ agan-bom-nilip e minte, asok bemi win maak uyo, ‘King Devit imi man ilop miton o,’ agan-bom no kem-nuubip kale, beyo titil kup tebe-nala minte, mufekmufek mafak uyo alugum kubaganu ita ita ke no kesa kale, beta tii suuk kon diim umi at dan uyo tagaa kupkan ke-nalata, suuk kon boyo tiila kolan-tema o,” age bogopnela ko.   
\s1 Jon imi Sipsip Man Yesus atamsa uta ko  
\sr (Rev 7:17, 14:1-5, 17:14, 21:22-24)  
\p
\v 6 Jon niyo kiit fenita, pusi ko age layon titil tebesa iyo atamin-tem keli kuta, Sipsip Man maak ita God imi tonamin baan diim umi atin ki mep sino kugol moba kalaa age-nili e, beyo tam God imi mufekmufek tinum ke dimduum ke kelin kalbinim isino kamok kamok isino imi iibak tem kutam kal moba kalaa age no keli kale, Sipsip Man Yesus beyo angkolip kaan-nala imi kaal diim uyo dul tagang kup bugusu kuta minte, beyo kafan alba kale, imi dubom diim boyo kom ko age duk ban kal e minte, imi tiin uyo ban kal no kale, tiin ban kal boyo God imi ensel ko age sinik ban kal imi sang felep yak to-nalata, God iyo bilip ita imdala no kafin kaa kutufosu koyo tiin mo tiinemin kup bomip ko.  
\v 7 Kale Sipsip Man beyo yak suuk kon Bisel God imi sagaal ipkuk diim albu uyo kula e minte,  
\v 8 mufekmufek tinum ke dimduum ke kelin kalbinim sino kamok kamok ilimi kup 24 sino iyo Sipsip Man imi tibit diim ilo kugol katuun duung fegela daak ton-nilip e, alugum maagup maagup bilip iyo biingbuung ko age gitaa sino at dan min at kon tambal tang kuunin umi at kwegalip kenan-bo umi gol tet sino uyo waafuu no kebip kale, at dan so at kon so umi tet boyo God imi unang tinum imi tebe beten kemin umi sang uta felep yak ku to-nuluta, kam agesu ko.  
\v 9-10 Kota alugum bilip iyo kamaa aseng maak kwaa-bom-nilip e, Sipsip Man Yesus bemi bogobe-nilip, “Kabo kangkolipta, kaan-nalap kapmi isak tambal boyo singkam daa tebe-nuluta,  
\m tinum miit maak maak sino,  
\m tinum miit yagalami weng migik bagamin sino,  
\m abiip maak maak unang tinum sino,  
\m tinum miit yagalami kaal migik migik sino  
\m alugum bilip imi unang tinum iip maak maak imi fengmin uta mobe-nalapta, ilim bobe-nalap imdep meng God imi miit tem daabelapta, bilip iyo mitam kalapmi kamaa tinum miit ke-silip kale, kamano koyo God imi pris ko age tinum amem imi siin kanumsip ulutap ke-nilipta, numi God imi ogok uyo ke-bilip kale, biilan-temu uyo, bilip ita tebe kafin kaa kutufosu komi unang tinum iyo alugum tiin molan-temip kale, boyo kapta felep-kamuta, kanube-nalapta, suuk kon fufala kosu uyo ku-nalapta, at dan uyo tagaa kupkan ke-nalapta, suuk kon uyo tiila kolan-temap o,” age mufekmufek tinum ke dimduum ke kelin kalbinim sino kamok kamok ilimi kup 24 so bilip ita deng tebe-bom Sipsip Man imi win uyo kufu-emip ko.   
\s1 Ulotu ke-bom Yesus imi win kufu-emsip uta ko  
\sr (Rev 4:6-11, 5:8-10, 15:3-4)  
\p
\v 11 Aa mungkup ensel tagang ko ageta tinum iyo maak tebe tiki-nama binim iyo dagaa kulep no God imi tonamin baan diim sino God imi mufekmufek tinum ke dimduum ke kelin sino kamok kamok sino imi mep so kugol falala imdek mobip kalaa age itam-nili e,  
\v 12 tolong dolita e, alugum aseng uyo fomtuup kwan-bilip kalaa ageli e, bogo-nilip, “Sipsip Man kabo kangkolip kaan-nalapta, numi ilim uyo bobe-salap kale, nuyo katamupta e,  
\m kabo afaligen kalaa agebup,  
\m kabo titil magam kayaak kalaa agebup,  
\m kabo mufekmufek soyaap kalaa agebup,  
\m kabo aget tambal fugunin kalaa age-nulupta,  
\m nuyo felepmuta, kapmi deng kup tebe-bom-nulup e, ‘Misam o,’ agan-bom no ke-bulup o,” age aseng kwaa-emip ko.  
\v 13 Kale niyo tinangkulita, dimduum min, sinik min, unang tinum min imi abiil tigiin albip isino kafin diim albip isino unang tinum kaansip imi abiip albip isino e minte, yol ok kumun tem albip isino iyo alugum maagup aseng kwan-bilip kalaa ageta tinangkulita e, aseng kwek uyo bogo-nilip e, “Alugum numi tiin molin tinum God isino minte Sipsip Man isino ulim ibo afaligen e minte, titil miit kasel no kalaa age-nulupta, ulim ipmi deng uyo tebe-bom, ‘Misam o,’ agan-kulum o ageta kale, nuyo suun kup aseng kwaa-e-bom-nulup e, ipmi deng uyo tebe-bom no keman-temup o,” age aseng kwaa-emip ko.  
\v 14 Aa mungkup mufekmufek tinum ke dimduum ke kelin kalbinim iyo, “Aafen o,” agelip e minte, kamok kamok ilimi kup 24 igil mungkup katuun duung fegela daak ton-nilip e, Bisel isino Sipsip Man isino ulim imi win uyo kufu-e-bom ulotu ke-emip ko.   
\c 6  
\s1 Yesus tebe suuk kon diim at dan takan kemsa uta ko  
\sr (Mat 24:29-31, Luk 21:9-11, Rev 5:1, 16:1-20)  
\p
\v 1 Kale Jon niyo Sipsip Man Yesus iyo atamita, suuk kon fufala kolin uyo ku-nala e, God imi at dan fukosa uyo maagup usiik tagaa kupkan ke-nala e, suuk kon atuk katip maak bim tiila kola kalaa age-nili e, kota tinangkulita e, God imi mufekmufek tinum ke dimduum ke kelin kalbinim imi maak beyo tumuun biginin ulutap imuuk weng maak waasi dinan-kalin tinum imi olabe-nala e, “Mitam sep talapta o,” agela kalaa ageli e,  
\v 2 kota kong ko age hos namaal maak amitem ilep mitam tulu kalaa ageta utamita e, tinum hos bomi daang kun diim tonba beyo un waafuba kalaa age atami kale, siin uyo beyo God imi waasi sino dinan-bii waasi iyo imdaak tama ita ita kela kalaa age-nalata, God iyo tebe tinum ita ita kela bemi dufalum uyo kobela migi-nalata, asok kota God imi waasi iso dinan-bom imdaak tama ita ita kelan o age-nalata, tala ko.   
\p
\v 3 Kale Sipsip Man iyo God imi at dan fukosa uyo aa maak tagaa kupkan ke-nala e, suuk kon atuk katip uyo maak so bim tiila kola e, kota niyo mufekmufek tinum ke dimduum ke kelin maak iyo tinangkulita, waasi dinan-kalin tinum migik imi olabe-nala e, “Mitam sep talapta o,” agela kalaa agelita,  
\v 4 kota hos isagulut maak amitem ilep mitam tulu kalaa ageli e, bomi daang kun diim tinum tonba beyo God tebe titil kobe-nala e minte, benat ko age un kong timitim uyo kobe no kela kale, bomi iibak tem uyo, tinum beyo tebe kafin diim tinum iyo imak kali-balata, dinan-bom ipkumal iyo anola anola kelip kaanamip ko.   
\p
\v 5 Kale Sipsip Man iyo God imi at dan fukosa uyo mungkup maak uyo tagaa kupkan ke-nala e, suuk kon atuk katip uyo maak so bim tiila kola e, kota niyo mufekmufek tinum ke dimduum ke kelin maak iyo tinangkulita, iman tebok kwep telemin tinum imi olabe-nala e, “Mitam sep talapta o,” agela kalaa age-nilita, kota hos kaal iim beyo amitem ilep mitam tulu kalaa age-nili e minte, tinum hos daang kun diim tonba beyo skel ko age mufekmufek iluum win dolasip umi kilo utama-bom saanin uyo sagaal tem kal waafuba kalaa age no keli ko.  
\v 6 Kale minte niyo mufekmufek tinum ke dimduum ke kelin kalbinim imi iibak tem kugol tinum weng ulutap maak bogolu tolong dolita, tinum hos daang kun diim tonba bemi bogobe-nulu e, “Kabo iman tebok boyo kwaalap malaak kafin diim abeluta, iman umi tisol uyo iit iinuta, tinum iyo ogok ke-bii am maagup kemin umi tisol uyo kulu-nalata, iman maagup min, waan asuno uta kup molak o ageta kale, kabo unan-kalin miton ko age iman sino waan sino boyo kufak daalap duumatanuta minte, sok dum ilang sino at oliv sino bota kupkalapta, dum abu-buluta, oliv umi tugul ok sino sok dum ok sino bota iip maak maak uyo malaak abe-buluta o,” agelu ko.   
\p
\v 7 Kale Sipsip Man iyo God imi at dan fukosa uyo aa mungkup maak tagaa kupkan ke-nala e, suuk kon umi atuk katip uyo maak so bim tiila kola e, kota niyo God imi mufekmufek tinum ke dimduum ke kelin maak iyo tinangkulita, tinum alop maak imi olabe-nala e, “Mitam sep tilipta o,” agela kalaa ageli e,  
\v 8 kota hos waam maak amitem ilep mitam tulu kalaa ageli kale, tinum hos bomi daang kun diim tonba beyo unang tinum imak kalila inolip kaanamin tinum e minte, tinum maak imi umik tem kal tonba beyo unang tinum imi sinik kulep no begel am tomin tinum no kale, God iyo tebe-nala tinum alop bilip imi titil kobelata, no kafin diim kasel unang tinum iyo ilo ko yakyak ke baan kalbinim faga-nilipta, unang tinum alugum baan maak albip iyo inolip kaanan-temip kale,  
\m minte tam iip maak maak ita imi waasi sino  
\m dinan-bom-nilipta, waasi tebe inolip kaanipta,  
\m minte iman tebok mitam tulu unang tinum iip maak maak iyo kaanip,  
\m minte mafak ilin afaligen mitam tulu unang tinum iip maak maak iyo kaanip,  
\m minte dimduum tinum aamin igil mungkup unang tinum iip maak maak iyo inolip kaanip no kelan-temip ko.   
\p
\v 9 Sipsip Man iyo God imi at dan fukosa uyo aa mungkup maak tagaa kupkan ke-nala e, suuk kon umi atuk katip uyo maak so bim tiila kola e, kota niyo mufekmufek kwe fuulip kenu God imi kupka-emin baan diim uyo kwegal utami kale, baan diim bomi afak tem boyo unang tinum God imi weng kwep yang ipkumal fomtuup dital fagaa baga-e-bilip waasi tebe inolip kaanan unsip imi sinik iyo no kugol albip kalaa age itami e,  
\v 10 bilip iyo fomtuup ola-nilip e, bogolip ko. “Bisel titil miit kayaak kabaa. Kabo atin tol kup tinum tambal tebesap e minte, kabo, ‘Bota kanuman-temi o,’ agesap uyo suun kanu-bom no kem-nuubap kale, nuyo bom-bulupta bii, dogap kota kabo kafin diim unang tinum tebe inolip kaansup numi kalan uyo yege-bom kaal fuyap kupka-eman-temap o?” agelip e,  
\v 11 God iyo alugum maagup maagup iyo ilim namaal timitim uyo kobela tiilip e, bogobe-nala e, “Kafin diim unang tinum iyo ipmi ipkumal kwiin tagang nimi ilak do-bom nimi ogok ke-bilip iyo ipmi inolip kaan-silip ilitap ke nimi unang tinum iip maak maak ulu-sii iyo inolip kaana-bilipta, binimanu kupkalip imi sinik iyo tal ipsino kwego dego ke nan-temip kota, niyo nimi weng kwep daasi boyo kanu-bom-nilita, niyo tinum ko tebe ipmi inolip kaansip bilip iyo yege-bom kaal fuyap kupka-eman-temi kale, ibo fen-bom bom-silipta, ipmi ipkumal iyo alugum inolip kaan kaan kem-silip binimanan-temu kota, boyo kanu-eman-temi o,” age God iyo tebe tinum bilip iyo baga-ema ko.   
\p
\v 12 Kale Sipsip Man iyo God imi at dan fukosa uyo aa mungkup bugup koyo tagaa kupkan ke-nala e, suuk kon umi atuk katip uyo maak so bim tiila kola e, kota bim kiim maak mitam tulu e, ataan ugol teno miliil mo ilim iim ulutap kelu e minte, kayop tiim ugol mungkup kenamin binim ke no ke-nulu e, isak ulutap kelu ko.  
\v 13 Aa mungkup, dulul kiim tebe-nulu at tung umi kwaalu yak o mek o ke-bom-nulu at dum yamanin binim degep malaak kafin diim aban-nuubu ulutap ke biningok ugol mungkup abiil tigiin ilota degep malaak kafin diim abemu ko.  
\v 14 God iyo suuk kon fufalabip ulutap ke abiil tigiin uyo fufala kola bubat mo binimanu e, aa mungkup, kafin uyo bumban keng keng ke-bulu e, alugum amdu tigiin sino minte yol ok daang kun diim umi kafin iip ugo kolin sino ugol mungkup ulumi baan diim molu molu kem unsu uyo kupkaa une-bala tele-bala kemu ko.  
\v 15 Aa minte kafin diim komi tinum kamogimal isino  
\m tinum win so kasel isino  
\m dinan-kalin tinum imi kamogimal isino  
\m mufekmufek so kasel isino  
\m tinum titil tebesip isino  
\m sok de imolip bisop tinum maak imi ogok ke-emin sino mani ogok kemin isino  
\m alugum unang tinum God imi ilak dolin binim bilip iyo kanu-bo bomi atul uyo finano-nilipta, iip maak maak iyo no kuung tem kal waana-bilip e minte, iip maak maak ita no amdu tigiin imal tem kal waana-bilip no ke-bomta  
\v 16-17 utamipta e, Bisel sino Sipsip Man sino ulim imi fomtuup yege-bom kaal fuyap afaligen kupka-emin tem uyo tolon o agan-bo kalaa age-nilipta, utamipta e, bomi mitam tolon-temu uyo, tinum iyo maak tebeta bagang-kaleta kaal fuyap boyo uk kugan kolan-temaalip kalaa age-nilipta, amdu sino tuum kiim kiim sino bota belep tebe nuyo fomtuup kati imaluta, Bisel God iyo itamin-tem kela e, minte Sipsip Man Yesus iyo yege-bom kaal fuyap uyo kobelin-tem ke no kelin o age-nilipta, no kuung tem sino imal tem sino kugol waanamip ko.   
\c 7  
\s1 God tebe Israel kasel unang tinum ilimi kup 144 tausen (144,000) ulula ilami unang tinum kesip uta ko  
\sr (Rev 3:12, 9:4, 14:1-5, 22:4)  
\p
\v 1 Kota Jon nimi ilam boyo binimanu e, niyo ilam migik maak dolita, ensel kalbinim bilip iyo kafin kaa kutufosu komi magaang tem kalbinim kugol mola mola ke-nilip e, dulul kiim uyo mitam tebe-nulu kafin sino yol ok sino at sino uyo kufak daa-numu o age-nilipta, alugum maagup maagup iyo dulul uyo ilibe yakyak ke-bom mola mola kebip kalaa age itami ko.  
\v 2 Kale kota ensel migik maak ataan telemin ku-tele talan-be kalaa age atami kale, bemi sagaal diim uyo suun kup nin tinum God imi mufekmufek unang tinum imi kaal diim dolamin uyo waafu-nala e, beta tebe ipkumal ensel kalbinim maak God tebe ulu-nala kuntuk mobe imkala tii ke-nilip kafin sino yol ok sino uyo kufak daalan-temip o age ulusa imi fomtuup ola bogobe-nala e,  
\v 3 “Kafin sino yol ok sino at sino uyo kufak dagagamin ba kale, bom-silip niso nimi nugumal ensel sino nuyo numi God imi win uyo ilami bon tem kiit fenin unang tinum God tebe ulula ilami kesip imi tibit kun diim kugol dolebelup binimanuta o,” age-nala e minte,  
\v 4 fupkela nimi bogopnela ko. “Tam God tebe unang tinum alugum ulula ilami kesip ilimi kup 144 tausen (144,000) kale, nuta imi tibit kun diim kugol God imi win uyo dolebe-sulup ko. Kale unang tinum ilimi kup 144 tausen (144,000) bilip imi afalik iyo Israel kale, bemi win migik uyo Jekop o agan-nuubip kale, imi man iyo tuluun kal kale,  
\v 5-8 ninggil bilip imi win uyo Juda, Ruben, Gat, Asa, Naptali, Manase, Simeon, Livai, Isaka, Sebulun, Josep e minte Benjamin no ninggil kalip ita kale, God iyo tebe alugum tinum tuluun kal maagup maagup bilip imi tinum miit kutop imi iibak tem kwegal unang tinum ilimi kup 12 tausen (12,000) ulu yakyak ke-bii kupkalata, mitam ilami unang tinum kesip o,” age ensel iyo bogopnela ko.   
\s1 Unang tinum kwiin tagang abiil tigiin kal God imi ulotu ke-bom deng tebemsip uta ko  
\sr (Rev 3:4-5, 6:9-11, 7:13-17, 12:10-11,17, 13:10, 14:12-13, 15:2-4, Rev 16:5-7, 17:6, 18:24, 19:2,7-8, 20:4,12,15)  
\p
\v 9 Kale boyo binimanu e, niyo, Bisel God ilami baan diim tonba sino Sipsip Man Yesus sino ulim imi tibit kun diim ilo kugol unang tinum tagang ko ageta tinum iyo maak tebe tiki-nama binim iyo mobip kalaa age itami e, tinum miit yagalami kaal migik migik sino, tinum miit maak maak sino, abiip maak maak unang tinum sino minte, tinum miit yagalami weng migik bagamin sino imi iibak tem uyo iip maak maak iyo mobip kalaa ageli kale, alugum bilip iyo ilim namaal timitim tii-nilip e, at bubuul uyo fagan-bii kulu imi sagaal diim uyo waafu-bom-nilip e, God iyo kul kusom taga-ebap ulutap ke-bom deng tebe-bom-nilip e,  
\v 10 fomtuup bogobelip ko. “Numi Bisel God ilami baan diim tonba isino Sipsip Man isino ulim iyo ita ita ke numi waasi iyo kubagana dupdaak tamaa dupkaa numi ilim uyo bobe-silip kale, nuyo deng tebe-bom ulim imi win uyo kufu-emum o,” agan-bilip e,  
\v 11 aa mungkup ensel iyo tebe God imi tonamin baan diim umi mep so uyo falala kwek mobip kale, iso kamok kamok ilimi kup 24 kulip iso minte God imi mufekmufek tinum ke dimduum ke kelin kalbinim sino iyo alugum God imi tibit kun diim kugol katuun duung fegela daak ton-nilip e, imi tibit kun uyo kulep daak kafin diim daa-nilip e, God imi ulotu ke-bom-nilipta, imi win uyo kufu-e-bom,  
\v 12 bogo-nilip e, “Aafen kwa. Nugol mungkup felepmuta, numi God imi deng uyo tebe-bom-nulup e, ‘Misam o,’ agan-bom-nulup e, bogo-nulup, ‘Kabo afaligen e minte, kabo aget tambal kup fugunin e minte, kabo titil magam kayaak e minte, kabo kapta kapta kesap no o,’ age suun kup suun kup kapmi tok bagamum o age-nulupta, kanuman-temup kale, aafen o,” agan-kalip ko.   
\s1 God tebe imi unang tinum imi kaal fuyap uyo kupkan kebesa uta ko  
\sr (Rev 3:4-5, 6:9-11, 7:9-12, 12:10-11,17, 13:10, 14:12-13, 15:2-4, Rev 16:5-7, 17:6, 18:24, 19:2,7-8, 20:4,12,15)  
\p
\v 13 Tam kota kamok kamok ilimi kup 24 bilip iyo, maagup maak nimi daga-nala e, “Kabaa. Kabo unang tinum ilim namaal timitim tiibip bilip iyo itamta, bilip iyo dok umi unang tinum kalaa agan-balap o?” agela e,  
\v 14 bogobeli ko. “Niyo itamsaali kale, kamogim kapkal itamsap kale, bogopnelal o,” ageli e, iyo bogopnela ko. “Bilip iyo God imi tinum unang waasi tebe kaal fuyap kwiin kiim ogen abin so kupka-e-bilip aget iluum tebemsip kuta, bilip iyo dital fagaa God imi ilak kup do-bom-bilipta bii, imi kaal fuyap afaligen uyo binimanuta, Sipsip Man Yesus iyo kaanata, imi isak uyo singkam daa-nuluta, unang tinum bilip imi fengmin uyo diing daa imoluta, ilim namaal kwaak tililin ulutap ke tambaliim kup kesip ko.  
\v 15 Kale Bisel God iyo itamata, tambaliim kelip kalaa age-nalata, ululata, ilami tiin diim uyo suun kup mililep so daanin so uyo bigi mo-bom-nilipta, God imi ogok ke-e-bom siin pris ko age tinum amem imi ulotu am miton umi ogok kemsip ulutap ke-e-bilipta, Bisel ilami baan diim tonba beyo tinum unang kuso suun kup bom-nalata, bugu tiin moba ko.  
\v 16 Kale bilip iyo maak sino iman tep tebepman-temaalu e minte, ok tep tebepman-temaalu e minte, bilip iyo ataan mimin diim sino at mimin diim sino uyo maak so ken tebelan-temaalip no ko.  
\v 17 Kale Sipsip Man tebe Bisel imi tonamin baan diim atin mep sino moba beta bilip iyo sipsip tiin molin tinum tebe ilami sipsip tambaliim kup tiin mo-boma ulutap tambaliim kup tiin mo-nalata, imtamo no tuum tem suun nin umi ok unan-kalin diim daalata, une-nilipta, suun kup nan-temip ko. Kale bilip imi kaal fuyap sino imi aget iluum sino uyo binimanuta, God tebe imi tiin ak uyo alugum maagup tolobelan-tema o,” age kamok maagup maak beta bogopnela ko.   
\c 8  
\s1 Yesus tebe suuk kon diim at dan ban tagaa kupkan kesa uta ko  
\sr (Rev 5:8, 9:13)  
\p
\v 1 Aa mungkup Sipsip Man Yesus iyo God imi at dan fukosa uyo aa mungkup ban kota tagaa kupkan ke-nala e, suuk kon umi bul uyo alugum bim tiila kola e, kota alugum unang tinum abiil tigiin albip iyo sining age bii ilugo bigilip e,  
\v 2 kota niyo itamita, ensel migik iyo tal bigul ko age fongket ban kal maak kulep tal alugum ensel ban kal maagup maagup God imi tibit diim ilo mobip imi kobela kalaa ageli ko.   
\p
\v 3 Kale siin uyo at dan min at kon umi fuumin baan diim ko age tebol boyo at sino gol sino uyo kulu telela ko-nilip e, kwep no God imi tonamin baan diim mep so daalip nuubuta, alugum God imi unang tinum iyo God imi aman duga-emip uyo, ensel maak iyo suun kup no at dan so at kon so uyo kwegala kena-bulu umi tang uyo tambal kup tebesu kale, ilep tam God imi muluum tem unu utam-nala e minte, ilami unang tinum imi beten weng uyo tinangku no ke-nalata, deng taban-nuuba kale, kota Jon niyo utamita, fuumin bomi ensel beyo no at dan so at kon so umi fuumin baan diim umi mep so kugol molata, ensel migik iyo at dan so at kon so kwiin tagang uyo maak so kulep tal-nala e, kamaki ensel moba imi kobela kalaa ageli e bole,  
\v 4 ensel maak ita kulu-nala e, at kwegalata, kena-buluta, umi at tum tang tambal uyo fakam daaluta, God iyo tang tambal uyo utam-nala e minte, ilami unang tinum imi beten weng uyo tinangku no ke-nalata, deng taban-be kalaa ageli ko.  
\v 5 Kale ensel iyo at dan so at kon so umi tet uyo ku-nala e, yang tolop min mufekmufek fuu God imi kupka-emin umi baan diim kuunom-nala e, at mol uyo kulula daak tet tem unu abula dongenu e, kwep yang binola malaak kafin diim abelu ko. Kale iyo kanubela e, kota weng maak baga-bulu e, tumuun bigina-bulu e, abiil tigiin uyo bamalaang falaak saan-bulu e, bim mitam tulu no kelu ko.   
\s1 Ensel kalbinim isiik tebe imi bigul ko age fongket bo-bilip olan-bii kupkasu uta ko  
\sr (Mat 24:29-31, Rev 6:12-17, 9:1-19, 11:6,13, 16:20)  
\p
\v 6 Kale kota ensel ban kal bigul ban kal waafubip iyo telela-nilip e, kota olalum o agan-kalip ko.   
\p
\v 7 Kale kamaki uyo ensel maagup imi bigul usiik bo-bala ol-bulu e, wep magap tuum ulutap sino bamalaang so isak sino kwego dego kelin uyo kafin kaa kutufosu komi atuk maak usiik malaak abelu kuta, kafin atuk alop maak uyo kupkalu tambaliim nu kale, bomi malaak kafin atuk maak bomi diim abelu boyo alugum at sino ifuul kon kaalasit sino mufekmufek sino uyo alugum ken tebelu ko.   
\p
\v 8 Aa mungkup tam ensel maak kegal mungkup ilami bigul uyo bo-bala ol-bulu e, mufekmufek maak amdu kwiin kiim at kenabu ulutap uyo kululip daak yol ok kumun tem iinu kale, boyo kanubelu e, yol ok atuk maak uyo mitam isak ok kelu kuta, yol ok atuk alop maak kweng uyo ugaa kupkalu tambaliim nu ko.  
\v 9 Kale yol ok atuk maak amdu tigiin ko age kumen te daak abelu kulaak uyo aniing min alugum iyo kaanip e minte, sip uyo ken tebe-nulu e, biniman no kelu ko.   
\p
\v 10-11 Aa mungkup ensel maak yagal mungkup ilami bigul uyo bo-bala ol-bulu e, biningok kiim at dong kenabu ulutap uyo abiil tigiin ilota dagaa kumen malaak kafin kaa kutufosu komi atuk maak umi iliip tem ok talan-bo sino ok tiinan-bo sino umi diim abelu e minte, ok boyo koganuta, unang tinum iyo ok tambal umaak unan-kalin binim kelip kuta, kafin atuk alop umi iliip tem ok talan-bo sino ok tiinan-bo sino uyo ugaa kupkalu tambaliim nu kale, bota kanubeluta, biningok bomi win uyo, Kok umi Magam o agan-nuubip kale, unang tinum kwiin tagang iyo ok koganu uyo une-nilipta, kaanip ko.   
\p
\v 12 Aa mungkup ensel maak yagal ilami bigul uyo bo-bala ol-bulu e, atanim sino kayop sino minte biningok sino imi atuk uyo mafaganu e minte, am daanin umi am atuk alop boyo tambaliim ataan kena-bulu ilagenu e minte, am daanin umi am atuk maagup bota ataan uyo kenamin binim kelu e, mililanamin ulutap kelu no ko. Kale am mililanin umi am atuk alop uyo kayop sino biningok sino uyo kena-bulu e, am mililanin umi atuk maagup uta kayop sino biningok sino uyo kenamin binim ke-nulu e, atin kup mililanu ko.   
\p
\v 13 Kale Jon niyo uun bogol maak atamita, abiil tigiin kugol falalam tiinan-be kalaa age-nili e, tolong dolita, iyo fomtuup bogo-nala e, “Ensel migik asuno bigul ko age fongket bomin-tem albip iyo, imi bigul boman-temip uyo, kafin diim unang tinum iyo alugum maagup kaal fuyap ogen abin so uyo utamaman-temip kalaa age-nilita, bota aget iluum tebepnelu e minte, aget mafaganepne no keluta, kafin diim kasel bilip iyo i-filin-bom no ke-bii o,” age uun bogol iyo kam agan-be kalaa age tolong doli ko.   
\c 9  
\s1 Ensel ok kemi tebe ilami bigul bo-bala olan-bii kupkasa uta ko  
\sr (Mat 24:29-31, Rev 6:12-17, 8:6-13, 9:13-19, 11:6,13, 16:1-20)  
\p
\v 1 Aa mungkup ensel ok kegal mungkup ilami bigul uyo bo-bala ol-bulu e, niyo biningok maak utamita, daak kafin diim abebu uyo, God tebe kafin umi tem kiim kalo kosu umi faal umi kii uyo biningok bomi ensel imi kobela kalaa ageli kale, kafin umi tem kiim kulaak uyo sinik mafak iyo imi kaal fuyap kugamin am daanan-temu uyo bigibip ko.  
\v 2 Kale biningok bomi ensel iyo tebe faal umi kii uyo ku-nala e, kafin umi tem kiim umi faal uyo bitola e minte, at kiim umi at tum ulutap mitambe tal-nulu e, atanim sino abiil sino uyo katilu mililanu e, atanim uyo dogonubeta ken-numu binim kelu ko.  
\v 3 Aa mungkup kweng yuuk ko age mufekmufek ifuul kon unan-kalin uyo abiil tigiin umi at tum tem kutam-tele malaak kafin diim tilip kalaa ageli e, God tebe kuntuk mobelata, kafin diim umi atoguum ulutap ke-nilipta, tebe unang tinum iyo yemip ko.  
\v 4 Kale God iyo bogobe-nala e, “Ibo tebe-nilip ilipmi kuguup uyo ku-nilip ifuul kon sino at kon sino mufekmufek tebemin migik sino boyo kufak dagamin ba kale, unang tinum imi tibit kun diim God nimi win dolalin binim bilip ita kup ifak dagamin o ageta ko.  
\v 5 Ibo unang tinum bilip iyo inolip kaanamin ba kale, ipkil kaal fuyap afaligen uta suun kup kupka-e-bilip bii, kayop ogal kelin o,” agela ko.  
\p Kale yuuk ko age bilip imi tinum aa-bom atul kupka-em-nuubip uyo atoguum imi atul kupka-em-nuubip ulutap kem-nuubip ko.  
\v 6 Kale kayop ogal kwek uyo unang tinum bilip iyo kaal fuyap afaligen kuga-bom-nilipta, imi aget kiim fugunin uyo, kaanupta bole, numi kaal fuyap binimanan-temu o agan-nuubip kuta, God iyo imkala kaansaalip kale, bilip iyo kafan so bom-nilipta, kaal fuyap kugan-bii-silip ko.   
\p
\v 7 Kale yuuk ko age kweng kulip iyo kanupmin kale, bilip iyo ki hos tiin molin tinum imi, hos kulu waasi dinan-kulum o age telela kobip ulutap ko. Yuuk ko age kweng bilip imi dubom diim uyo mufekmufek kamogimal imi dufalum gol ku telelasip ulutap uta tiilin e minte, imi tibit kun uyo tinum imi tibit kun ulutap no ko.  
\v 8 Minte imi dubom kon uyo taabalasep unang iip maak maak imi dubom kon timitim ulutap e minte, imi sit kun uyo timitim e minte atin taalin no kale, boyo pusi kiim ko age layon imi sit kun ulutap ko.  
\v 9 Kale iyo mufekmufek ain ku naam telela kosip ulutap uyo kwaak kalilipta, tuup kun uksulu ko. Kale minte imi fululuu tiinemip uyo, imi bal kun weng uyo ok faga-bulu umi biileng ulutap ko.  
\v 10 Kale imi umsan kun ko age abuk uyo atoguum umi abuk ulutap atul so kale, imi atul uyo tii no unang tinum iyo ye-bii kayop ogal kemin no kale,  
\v 11 yuuk ko age kweng bilip imi kamok king tiin mosa beyo ensel mafak kale, beyo asok kafin umi tem kiim bomi tiin mosa kale, bemi win uyo Hibru kasel iyo bogo-nilip, Abadon o agan-bilip e minte, Grik kasel igil bogo-nilip, Apolyon o agan-bom no kem-nuubip kale, win alop komi magam uyo ki, mufekmufek kufak dagamin o agesu ko.   
\p
\v 12 Kale Jon nimi ilam kaa dugan-bii koyo kuguup mafak so kaal fuyabok so umi mitam tolon-temu umi ilam dugan-bii kale, baga-e-bom dole-bom ke-bili kamaki anung uyo binimanbu kale minte, alop maak albu kale, umi iibak tem so e minte afung so umi weng uyo kulbu kale, bogobelin-tem albi kale, suluta, bomi weng uyo bogobelan-temi ko.   
\s1 Ensel bugup kemi tebe ilami bigul bo-bala olan-bii kupkasu uta ko  
\sr (Mat 24:29-31, Rev 6:12-17, 8:6-13, 9:1-12, 11:6,13, 16:1-20)  
\p
\v 13 Kale ensel bugup keyo ilami bigul uyo bo-bala ol-buluta, at dan min at kon umi fuumin baan diim at sino gol sino umi ku telela kosip uyo God imi tibit diim kugol mobu kale, bomi iibak tem ku-tele weng maak tuluta, tolong dolita,  
\v 14 ensel bugup kemi bigul tol kup waafuba bemi bogobe-nulu kano, “Israel kasel imi waasi iyo ok afek Yufretis bomi ok bal kal nin kale, God iyo bilip imi ensel mafak kalbinim bilip iyo ok bal kugol sok de imolata, kugol bigi-bii-silip kale, no-nalap talaa imdalapta, daaginin o,” agan-bo kalaa ageli ko.  
\v 15 Kale bomi magam uyo ki, God iyo utamata e, kafin diim unang tinum iyo baan asuno kale, ensel mafak kalbinim bilip iyo tebe baan maak ita inolip kaan binimanan-temip kale minte, baan alop maak ita imkalip tambaliim kup nan-temip kalaa age-nala e, sok de imo fomtuup nagat mo yakyak kela bii, ulumi am umi bogosi uyo tulu kalaa age-nilita, tiila imolan-temi o agesa ko. Kale am kanupmin beta daan-bom-salata, kanupman-temi o agesa uyo mitam tulu e, God iyo ensel bugup kemi bogobela beta tebe talaa imdala daaginip ko.  
\v 16 Talaa imdala daaginip e, waasi dinan-kalin tinum kwiin tagang iyo hos daang kun diim ton-nilip e, tala tala bii koli kale, ensel bugup iyo bogopne-nala e, “Waasi dinan-kalin tinum deng saak saak ilimi kup 200 milion ita albip o,” age ko.  
\v 17 Kale ilam anung kwek uyo kopneluta, utamita e, hos kwiin tagang sino tinum kulep tiinemin so iyo kanupmin kalaa ageli kale, waasi dinan-kalin tinum imi naam kwaak kalilip uyo bagan isagulut so bagan miil so bagan naam so uyo fogolip dong tebesu ko. Kale minte hos imi dubom uyo pusi kwiin kiim atul tebesu ko age layon umi dubom ulutap keluta, at dong sino at tum sino minte tang mafak sino uyo imi bon tem ilep mitam e talan-bo kalaa ageli ko.  
\v 18-19 Minte hos umi bon tem sino umsan sino alop kwek uyo titil kup tebe-nulu e minte, atul kup tebe no kesu kale, unang tinum iyo an-nuubu kale, hos umi umsan uyo inap dubom ulutap ke-nuluta, unang tinum iyo an-bii-suu ko. Kale at dong sino at tum sino minte tang mafak sino mufekmufek mafak asuno bota hos umi bon tem ilep mitam-nuluta, kafin diim komi unang tinum milii maak uyo bagaa kupkan ke anolu kaanipta minte, unang tinum milii alop bilip ita uk kugan imoluta, waalan-silip ko.   
\p
\v 20 Kale mufekmufek mafak asuno uyo tebe unang tinum milii alop kulip iyo anolu kaansaalip kuta, asok iyo mufekmufek mitam ti-suu boyo utam-silip kuta, imi aget fugunin umaak fupkelata, kuguup mafak ke-bilip boyo kupkalin-tem ke-nilipta, imi bisop bagamin kuguup ilimi sagaal tuup telela ko-silip uyo umik ugobe kupkalin-tem ke-nilip e, sinik mafak so men amem so umi deng uyo tebe-bom aman duga-e-bom-nilip e minte, gol min, silva min, kopa min, kuung kuung min, at min uta kulu naman-bii-nilip e, tinum so dimduum so imi sinik uta telela ko-nilip e, kwep ku daalip bom-buluta, “Bota numi god umdii kulbu o,” age-nilipta, umi deng uyo tebe-bom aman duga-e-bom no kem-nuubip kale, kuguup boyo kupkasaalip kale, kanupmin mufekmufek boyo sinik binim kale, boyo tii utamamin binim, tolong dugamin binim, tigitanin binim kuta, aman duga-em-nuubip ko.  
\v 21 Kale mungkup unang tinum bilip iyo aget fupkela ko imi tinum aamin so timon unan-kalin so sa dagamin so yuguut unan-kalin so umi kuguup uyo kupkasaalip binim ko.   
\c 10  
\s1 Ensel tebe suuk kon katip Jon imi kopma unesa uta ko  
\p
\v 1 Kale mufekmufek mitam tele-bulu utami boyo binimanu e, kota ensel migik maak abiil tigiin ilo malaak tala atami ko. Kale ensel beyo kwiin kiim e minte, titil afalik so kale, iip tem kutam-tele iip uyo de dolu e minte, webaal uyo imi dubom diim uyo de do no kelu e minte, imi tibit kun uyo ataan dong ulutap ilagen kolu e minte, imi yaan alugum uyo am kun kiim umi at kena-bom dong tebebu ulutap ke no kelu atami ko.  
\v 2 Kale ensel iyo suuk kon katip imi sagaal diim kal albu umdii kota bam daa ko-nala e, imi yaan ipkuk uyo kwep daak yol ok daang kun diim daa-nala e minte, yaan afaan uta kwep daak kafin diim daa no ke-nalata,  
\v 3 ensel imi weng uyo imuuk weng pusi kiim atul tebesu ko age layon umi weng ulutap olalata minte, tumuun usiik biginan-bii ban kal faga-nulu e, ensel imi weng uyo yan kebelu ko.  
\v 4 Tumuun fagan-bo uyo binimanu e, kota niyo, maak fagaa umi weng bo dola kolan o agan-kali e, weng maak abiil tigiin ilota maak fagalin tap tulu boyo bogopne-nulu e, “Kabaa. Tumuun faga-bulu bii, ban kal fagalu bomi weng uyo dolamin ba kale, boyo bantap weng kale, kalapmi kup waafulal o,” agelu ko.   
\p
\v 5 Kota asok ensel yaan milii kwaala daak yol ok daang kun diim abelu e minte, yaan milii kwaala daak kafin diim abe no kelu atami ita imi sagaal ipkuk uyo kufo kwep abiil tigiin kiit daa-nala e,  
\v 6 God imi win kamkaam uta kufo tol weng bogo-nala e, “God suun kup nin ita abiil tigiin so kafin so yol ok so e minte alugum mufekmufek abiil so kafin so yol ok so umi diim albip so uyo God ita telela kosa kale, God imi win tolop diim tuluun weng maak bogobelan o ageta kale, tinangku-silipta. God iyo suun kup fenan-temaala kale, kamano kota God imi weng kwep daasa uyo abuluk o agan-be ko.  
\v 7 Sugamiyok kota God iyo imi bantap weng ilami profet ko age weng kem baga-emin tinum imi bogobe-nala e, ‘Son-temu nala uyo kanupman-temi o,’ agesa kale, ensel ban bemi bigul olalan-tema kota, God imi aget fugun-bom-nala, ‘Kanupman-temi o,’ agesa uyo alugum binimanu kupkalan-tema o,” age ensel ita bogola ko.   
\p
\v 8 Kale kota siin abiil tigiin weng bogopnelu tinangkubi ulutap asok bogopne-nulu e, “Kabaa. Yak ensel suuk kon katip bam daa ko-nala waafu-bom yaan milii kwep yak yol ok daang kun diim daa som minte, milii kwep mek kafin diim daa no ke moba beyo, suuk kon kopkelan o agan-be kale, yak kulal o,” agelu ko.   
\p
\v 9 Kale niyo no ensel imi daga-nili e, “Suuk kon katip be dopne o,” ageli e, iyo bogopne-nala e, “Du-nalapta, unelal o,” agela kuta, bogopne-nala e, “Unelan-temap uyo, kapmi bon tem uyo at tem umi tin ok umi abalim ulutap kalaa age unelan-temap kuta, une miilalap daak mat tem unon-temu uyo, mat tem uyo atul tebepkelan-temu o,” age bogopne-nala e,  
\v 10 suuk kon katip dopnela iyo ilami sagaal diim kegal du uneli e, nimi bon tem uyo tin ok abalim ulutap kelu kuta, une miilali daak nimi mat tem unu uta, nimi mat tem uyo mafaganu ko. (Bomi magam uyo dok uta ba kale, suuk kon katip tem kwek umi magam uyo mufekmufek mafak mitam tolon-temu umi sang bogolu uta ko.)   
\p
\v 11 Kale ensel iyo bogopne-nala e, “Asok kota mufekmufek mafak mitam abiip maak maak unang tinum so, tinum miit yagalami kaal migik migik so, tinum miit yagalami weng migik bagamin sino minte, abiip maak maak tiin molin tinum ko age king sino imi diim mitam tolon-temu umi sang uyo baga-emal o,” agela ko.   
\c 11  
\s1 God tebe tinum alop maak imdala tal unang tinum God imi weng baga-emsip uta ko  
\sr (Luk 4:25, 21-24, 1 Tes 4:16-17, Jems 5:17-18, Rev 12:17, 13:1,7-8, 17:8)  
\p
\v 1 Kale kota ensel iyo at daang tiyuuk kemin uyo kopne bogopne-nala e, “No Jerusalam no-nalapta, God imi ulotu am miton uyo tikilapta e, tiilu kalaa age ku-nalap e minte, mufekmufek fuu God imi kupka-emin baan diim uyo tikilap, tiilu kalaa age ku no ke-nalap e, unang tinum tal ulotu ke-bilip iyo tikilapta e, intap kal kalaa age no kelan-temap kuta,  
\v 2 tam daam tem kem diim boyo tinum asit kek kek imi tal God aman duga-emin baan diim kale, kabo boyo tikimin ba ko. Kale am maak daanan-temu kota, tinum asit kek kek migik maak ko age waasi iyo tal-nilipta, God imi abiip amem Jerusalam kal bom-bilipta bii, atol asuno e anung no ke-nilipta, abiip kutam uyo atin kufak daalip mafaganu kupkalip kale, bilip imi baan diim boyo tikimin ba ko.  
\v 3 God iyo bogo-nala e, ‘Nimi tinum alop maak imdali tolon-temip bilip iyo nimi profet ko age nimi weng kem baga-emin tinum kale, bilip iyo nimi win tolop diim no, unang tinum imi kaal fuyap kulan-temip umi sang uta baga-e-bulupta, imi aget uyo fupkela ko fengmin uyo kupkalin o age-nilipta, no baga-e-bii, am ulumi kup 1,260 ko age atol asuno e minte atuk no kota dakan kelan-temip kale, bota alop bilip iyo aget iluum kiim ku-nilipta, tol fagan-bii tolon-temip o,’ agela o,” age ensel iyo bogopnela ko.   
\p
\v 4 Kale weng kem baga-emin tinum alop bilip iyo at oliv ulutap kale, umi dum ok uyo ilaam tem dela kefolip kenan-nuubu kale, tinum alop bilip iyo mungkup ilaam kenabu kulutap kale, kafin kaa kutufosu komi tiin molin God imi miit tem kal telela ko mo-bom fen-bilip ko.  
\v 5 Kale kanube waasi iyo maak tebe-nilipta, tinum alop bilip iyo ifak daalum o agan-nuubip kuta, at dong uyo tinum alop imi bon tem ilep mitam waasi iyo fuulu kaanan-nuubip kale, waantap ita, kanube ifak daalum o agansip iyo kanubelipta, kaan-silip ko.  
\v 6 Kale God iyo tinum alop bilip iyo titil kobelata, alop God imi weng kem uyo unang tinum imi baga-e-bilip kwek uyo ki, sugamiyok Elaija imi kanu-bii-se ulutap ke-nilipta, alop iyo God iyo bogobelip God yagal wep uyo waafu-balata, wep uyo malaak abelin binim ke-buluta bii, imi weng kem uyo baga-e-bilip bii, binimanu ko. Kale ulutap kale, sugamiyok Moses imi kanu-bii-se ulutap ke-nilipta, alop iyo God iyo bogobelip God yagal ok ket uyo fupkela kola mitam isak ok kelu kupkalata, mafak ilinok sino kuguup mafak so uyo kafin diim uyo mitam abelu ko. Kale dok kota alop iyo God imi daga-nilip, “Dong dogobelap kanubelum o,” agelip umdii, God iyo alop imi beten weng uyo yan ke-em-nuuba ko.   
\p
\v 7 Kale ilam duga-bom utamita, God imi weng kem uyo ku unang tinum iyo baga-e-bilip bii, binimanu e, dimduum kwiin kiim maak kafin umi tem kiim kalo kosu kulaak-tele mitam tulu kalaa ageli e, dimduum boyo tinum alop sino dinan-bii uta uta kelu alop iyo kubaganip e, inolu kaanip kuta,  
\v 8 Jerusalam kasel tinum iyo kuguup tambal umaak ku-nilipta, tinum alop bilip iyo tambaliim kup imasaalip kale, imkalip imi at kulu uyo abiip afalik Jerusalam umi ilep miton kugol nu kale, sugamiyok uyo imi Kamogim Yesus iyo Jerusalam kugol dep yak at diim daa angko-silip ulutap ke-nilipta, tinum alop iyo Jerusalam kugol ino-silip ko. Kale kuguup mafak Jerusalam ko mitam ti-suu bomi win uyo bogo-nilip, “Sodom o,” age-som, “Isip o,” age no kem-nuubip ko.  
\v 9 Kale kafin kaa kutufosu komi abiip maak maak unang tinum sino, tinum miit maak maak sino, tinum miit yagalami weng migik bagamin sino, tinum miit yagalami kaal migik migik sino Jerusalam albip bilip iyo alugum imkalipta, tinum alop bilip imi at kulu uyo telela imalin-tem kelip kale, tala tala ke tele itama-bilip bii, am asuno e minte atuk no kelip ko.  
\v 10 Kale siin uyo God imi profet ko age weng kem baga-emin tinum alop bilip iyo kaanin-tem som-nilipta, imi weng tem ilep kaal fuyabok uyo kwep mitam kafin diim unang tinum imi diim abelu kupkabe-silip kale, unang tinum iyo, tinum alop iyo suguul ke kaanip o age-nilipta bole, deng faga-e-bom iman tigi-bom un-bom-nilip e, mufekmufek misiim kobina tala ke-bom no kemsip ko.   
\p
\v 11 Kale am asuno e minte atuk no uyo binimanu e, God iyo tinum alop bilip iyo ifola fen tigi molip e, unang tinum bilip iyo itamipta e, tinum alop bilip iyo kaanip kuta, asok fen tigi molip kalaa age-nilipta, finanin kiim uyo kulip ko.  
\v 12 Kale profet alop bilip iyo tolong dolipta, abiil tigiin ilo weng maak tulu uyo bogobe-nulu e, “Alop ibo mitam tilin o,” agelu kalaa age-nilip e, alop imi yaan uyo kota kufo yak abe-bilip e, imi waasi iyo kiit fen itama-bilip e, iip tem ilep tam abiil tigiin unip ko.  
\v 13 Kale abe-bilip e, bim afalik maak mitam abuta, kafin uyo fili fili ke-buluta, abiip afalik Jerusalam umi milii fogo yakyak kelin uyo nagaal kal kale, milii maak keta dalata daak kafin diim abelu e, milii tugal kota kup kupkalu ko. Kale abiip milii ko dalata daak abelu uyo at sino tuum sino uyo biging bagang bino dupdulu une-bulu tele-bulu ke-bom-nuluta, unang tinum ilimi kup seven tausen (7,000) kalip iyo anolu kaanipta, ipkumal imkalip iyo utamipta e, boyo atin kuguup mafak kalaa age-nilipta, atin finano-nilipta, ilimi aget uyo fupkela ko abiil tigiin kayaak God imi kobe-nilip e, imi win uyo kufu-e-bom-nilip e, “God kapta kup titil magam kayaak o,” agan-kalip ko.   
\p
\v 14 Kale Jon nimi ilam kaa dugan-bii koyo kuguup mafak so kaal fuyabok so umi mitam tolon-temu umi ilam uta do-nilita, baga-e-bom dole-bom ke-bii kale minte, anung alop uyo bogobeli binimanu kale minte, weng afungen uta kup bogobelin-tem albi kale, suluta, bogobelan-temi ko.   
\s1 Ensel ban kemi bigul bo-bala olan-bii kupkasu uta ko  
\sr (Rev 4:2-11, 7:11-12, 11:15-19, 14:3, 19:4-8, 21:5-7, 12:5,10, 20:4-6)  
\p
\v 15 Kale tam ensel ban beyo afungim kale, bemi bigul uyo bo-bala ol-buluta, tolong dolita, abiil tigiin ilo ipkumal ensel iyo weng uyo fomtuup bogo-nilip e, “Numi Bisel God so imi ulaa dula kamok kesa tinum Krais so ulim ita ita ke mufekmufek mafak uyo alugum kubaganu e, ulim imi titil uta uta kelu kale, ulim ita kup kafin kaa kutufosu koyo suun kup tiin molipta, nan-temu e minte, nu no o,” agan-bilip kalaa ageli ko.  
\v 16 Kale kota tinum kamogimal ilimi kup 24 kalip imi tonamin baan diim God imi miit tem ilo tonbip bilip iyo alugum katuun duung fegela daak ton-nilip e, tibit kun uyo kwep daak kafin diim daa no ke-nilip e, God imi ulotu ke-e-bom imi win uyo kufu-e-bom no ke-bom  
\v 17 bogo-nilip e, “Titil magam kayaak God kabo afaligen e minte, kabo siin uyo bii-salap e minte, kamano ko albap no kale, kapmi titil uta uta kelu kapkal tiin mobap kale, boyo, ‘Misam o,’ agan-bulup ko.  
\v 18 Kale kota kapmi tebe unang tinum kaanin-tem albip bilip imi yege-bom kaal fuyap kupka-e-bom keman-temap uyo mep so tulu e minte, kapmi tebe unang tinum kaansip imi yegeman-temap ugol mungkup mep so tal no kelu ko. Kale minte kapmi profet ko age weng kem baga-emin tinum kapmi ogok waafusip iso e minte tinum migik kapmi ilak do kapmi win kufukem-nuubip so bilip iyo mufekmufek tambal kobe yan kebelan-temap uyo tii keluta, tinum win binim sino tinum win so so alop maagup tiilan-temip uyo mep so tulu kale, kota kapmi kafin diim unang tinum yem-nuubip tinum bilip imi anolap binimanan-temip uyo mep so tulu kale, kota kapmi ilak dugamin binim tinum iyo utamipta, God beyo nulumi fengmin umi kalan uta olsak deebeluta, kaal fuyap uyo kobelan-tema kalaa age-nilipta, iyo olsak kup tebepmu o,” age kamogimal ilimi kup 24 kalip iyo kam agan-kalip ko.   
\p
\v 19 Kale ensel iyo God imi am miton umi abiin amem abiil tigiin albu umi faal uyo bitolata, unang tinum iyo tiin fala utamipta, God imi weng de kosa umi mufekmufek umi bokis uyo kulbu kalaa age utam-silip ko. Utamip e bole, abiil tigiin uyo bamalaang falaak mo tumuun bigina-bulu e, wep magap kiim malaak abe-bulu e minte, bim so kulep mitam daalu umi biileng uyo tinum weng ulutap baga-bom ke-buluta, utami ko.   
\c 12  
\s1 Unang so inap kiim ko age Saatan iso imi sang uta ko  
\sr (Rev 11:7, 13:2,4, 16:13-14, 17:7-8, 20:1-3,7-10)  
\p
\v 1-2 Koyo Jon nimi ilam do utabi umi sang uta kale, abiil tigiin uyo mufekmufek ugulumi migik mitam tulu uyo kulbu kale, unang maak albu boyo ataan tebe falala de kolu e, unang uyo man fugulan o agan-bulu e, kayop uyo umi yaan afak tem ilep mitam yaan uyo kufopmuta, umi yaan uyo kwep daak kayop umi tip diim daa-bom fingka-bom tonu kale, unang bomi dubom diim uyo biningok tuluun kal iyo molip kale, man iyo, tolon o agan-balata, atul uyo kwiin kiim ke-e-buluta, fomtuup olan-kalu ko.   
\p
\v 3 Kale mufekmufek ugulumi migik maak asok abiil tigiin kugol mitam tulu uyo, inap kiim maak alba kale, imi kaal uyo isagulut e minte, imi dubom uyo ban kal e minte, imi dubom diim kom ko age duk uyo nagaal kal e minte, imi dubom diim uyo maagup maagup kamogimal imi dufalum ulutap so albu no ko.  
\v 4 Kale inap bemi umsan ifet uyo ku-nala e, abiil tigiin umi biningok milii iyo dukola malaak kafin diim abelip kuta, biningok milii alop maak ita kup uk kugan imo imkala abiil tigiin uyo nip kale, inap afalik iyo, unang boyo man iyo dolu kalaa ageta angko unelan o age-nalata, tal unang bomi miit tem kugol bom bon togo ko, bomta fen-silita, man iyo dolu kalaa ageta o age-nalata, fena ko.  
\v 5 Kale unang boyo man tinum dupkan-sulu e, maak fagalin tap ensel iyo tal ugaa dep tam abiil tigiin tam God imi dobela e, tambaliim na kale, man beyo God imi ulaa dula kamok kesa tinum kale, beta kafin kaa kutufosu komi alugum tinum miit maak maak uyo titil fagaa fomtuup tiin mo-balata, iyo imi weng so kuguup so uyo kupkalan-temaalip binim kale, imi weng so kuguup so uta kup waafuu kwep tebeman-temip ko.  
\v 6 Kale God imi aget fugunin uyo, yang sep iibaan bagan kugol unang bomi waanamin baan diim uyo telela kobelita, kugol bom-buluta, nimi ensel iyo no tiin molip bii, am ulumi kup 1,260 ko age atol asuno e minte atuk no kota dakan kelan-temu o age-nalata, telela kolata, kota unang boyo bilii no kutam iinu ko.   
\p
\v 7 Kale God imi ensel kamogim Maikel so e minte ipkumal ensel sino ninggil igil kelip e minte, inap yagal imi ensel mafak iyo tiin mo no kelata, ninggil abiil tigiin kal waasi uyo dinan-bilipta bole,  
\v 8 Maikel ninggil ita ita ke inap so imi ensel so ninggil iyo kubaganip imkalipta, God iyo inap iyo bogobe-nala e, “Kapsino kapmi kapkumal ensel mafak isino ibo imkalita, abiil tigiin koyo suun nan-temaalip o,” agela e,  
\v 9 God imi ensel Maikel ninggil iyo tebe inap mafak ninggil iyo alugum bagaa imdalip malaak kafin diim e tilip ko. Kale inap kiim ko age Tinum Mafagim beyo sugamiyok uyo God imi waasi kebe-bom weng mafak uyo baga-e-bom no ke-bii-se kale, imi win uyo Saatan ita kale, beta tebe-nalata, kafin diim unang tinum iyo bisop baga-e-balata, alugum iyo imi weng uta tinangka-bom-nilipta, fengam-nuubip ko.   
\p
\v 10 Kale Jon nimi weng maak tolong doli uyo kulbu kale, God imi unang tinum inolip kaan-silip iyo abiil tigiin ilo fomtuup olan-bom bogo-nilip e, “Siin uyo Saatan iyo God imi miit tem mo-bom mililep so daanin so numi nugumal God imi ilak dolin unang tinum iyo titul weng baga-e-bom-nala e minte, titin-e-bom no kem-nuuba kuta, kamano koyo God ita ita ke-nalata, God sino imi ensel sino ulimal iyo tebe Saatan ninggil iyo fot tebelipta, abiil tigiin koyo kupkaa daak kafin diim iin-silip kale, God iyo tebe ilami unang tinum iyo dong dogobe imi ilim uyo bobela binimanu kupka-nala e, ilami titil uta alugum mufekmufek uyo tiin mola e minte, imi man ulaa dula kamok kesa tinum Krais ita kafin diim uyo kamogim ke tiin mo no kelan-tema ko.  
\v 11 Kale God imi Sipsip Man Yesus iyo imi dam uyo numi kobe-nalata, at diim uyo kaana imi isak uyo singkam daa-nuluta, numi ilim uyo bobe-se kale, bomi tem ilep numi nugumal God imi ilak dolin unang tinum iyo titil faga-nilipta, God imi tuluun weng uyo dital fagaa unang tinum iyo baga-em tiine-bom-nilip e, kota Saatan iyo kubagana dupkalip kale, bilip iyo ilimi kaal umi aget umaak fugun-nuubaalip kale, imi aget fugunin uyo, ‘Yesus imi waasi iyo tebe nuyo inolip kaanan-temup kuta, imi ogok uyo suun kemup o,’ agan-nuubip ko.  
\v 12 Kale Saatan iyo abiil tigiin uyo kupkaa un-se kale, abiil tigiin kasel ibo deng tebeman-temip kale minte, kafin diim kasel ipta aget iluum kiim uyo tebeman-temu kale, bomi magam uyo, kamaa kota Saatan iyo daak kafin diim so yol ok daang kun diim so uyo abe-nalata, utamata e, Bai. Niyo kuguup mafak uyo suun kup kanuman agin kuta, kanum-silita, God iyo tebe nimi ogok uyo ilo kopnela binimanan-temu kalaa age-nalata, Saatan iyo olsak afalik uyo God imi kobe-nalata, alugum kafin kaa kutufosu komi unang tinum ibo ifak daga-balata, aget iluum afalik uyo tebe-eman-temu o,” age God imi unang tinum inolip kaan-silip iyo bagamip ko.   
\p
\v 13 Kale inap iyo utamata e, niyo nimdalip malaak kafin diim e tili kalaa age-nalata, iyo, kamaa man dobu bemi ogen boyo ungkwalan o age-nalata, un bagala unu kuta,  
\v 14 God iyo uun bogol bal kun kiim alop ulutap uyo unang umi kobela e, fululuu unanbu no God imi sep iibaan bagan kobeba kugol waan-bom-buluta, God imi ensel iyo tiin mo-bom-bilip bii, atol asuno e minte anung no dakan kelu kale, kwek uyo Saatan iyo dogobeta ungkwa-nama binim kela kale, tambaliim kup nu ko.  
\v 15 Kale inap imi aget fugunin uyo ki, unang boyo ok tebe ungkwaa kwep unom mimilepmuta, kaanuk ko age-nalata bole, imi bon tem ilep ok foga kulala unang umi umik tem unu kuta,  
\v 16 God iyo unang boyo dong dogobe-nalata, kafin uyo bigi kolata, alugum ok inap imi bon tem ilep sing daa kwaala tulu uyo kafin tem kulaak tilinom binimanu ko.  
\v 17 Kale inap iyo, unang boyo uk kugan koli kalaa age-nalata, olsak tebepmuta bole, unang umi man ilop migik isino dinan-kulum o age-nalata, no fen tiinema kale, unang bomi man ilop iyo ki, God imi ilak dolin unang tinum ita kale, God imi weng bogobe-nala, “Kanumin o,” agan-be uyo tele waafuna-bom e minte, Yesus imi sang so Yesus imi tuluun weng so umi dital fagaa baga-e-bom no kem-nuubip ita ko.  
\v 18 Kale inap iyo no yol ok kan tem kal mo-bom na ko.   
\c 13  
\s1 Jon imi ilam ilep dimduum alop itamsa uta ko  
\sr (2 Tes 2:3-12, 1 Jon 2:18-23, Rev 6:3-4, 16:13-14,16, 17:3,7-17, 19:19-21)  
\p
\v 1 Kale Jon nimi asok ilam do utabi uyo, dimduum maak yol ok kumun tem ilep mitam tala beyo dubom ban kal e minte, imi dubom diim uyo kom ko age duk nagaal kal no e minte, duk maagup maagup umi tip diim uyo kamok king imi dufalum uyo albu kale, imi dubom maagup maagup umi diim uyo win maak dola kosip boyo God imi titul weng baga-emin weng dola kosip uta kalaa ageli ko.  
\v 2 Kale yol ok kumun tem umi dimduum beyo lepat ko age pusi kwiin kiim atul tebesu ulutap kale, imi sagaal bulung boyo ki, kong ko age bea umi sagaal bulung taalin timitim ulutap e minte, imi sit uta layon ko age pusi afalik umi sit kun taalin ulutap no kale, inap ko age Saatan iyo tebe imi titil afalik uyo yol ok kumun tem umi dimduum bemi kobe-nala e, bogobela, “Kabo nimi ogok kemin tinum kale, nimi titil uta kop-kamita, kapta ku-nalapta, God imi unang tinum iyo ifak dagamal o,” agela ko.  
\v 3 Kale Saatan imi bisop bagamin kuguup uyo kulbu kale, kanubelata, kafin kaa kutufosu komi unang tinum iyo utamipta e, yol ok kumun tem umi dimduum imi dubom maak (benat ko age un kong tuup) angkolip kaanan agin ke waalana e, imi abang uyo tuganopmu kalaa age-nilipta, kumang mo-nilipta, iyo mitam yol ok kumun tem umi dimduum bemi unang tinum aligaap kebesip ko.  
\v 4 Kale alugum iyo utamipta e, inap ita kanupmin titil afalik boyo dimduum imi kobeba kalaa age-nilipta, inap bemi deng uyo tebe-bom aman duga-e-bom e minte, dimduum imi deng uyo tebe-bom aman duga-e-bom no ke-bom bogo-nilip e, “Alugum ibo yol ok kumun tem umi dimduum titil sino iyo kulatap umaak albaalip e minte, ibo bagang-kaleta dimduum beyo kubagana dupka-nimip binim no o,” agan-kalip ko.   
\p
\v 5 Kale God iyo yol ok kumun tem umi dimduum iyo dupkalata, bogo-nala e, “Niyo nita nita ke God iyo dupkan ke-sii o,” age God imi win uyo kufak daabe-nalata, unang tinum iyo tiin mola bii, kayop ulumi kup 42 uyo dakan kelip kale, kwek uyo atol asuno e minte atuk no uta ko.  
\v 6 Kale dimduum iyo God imi weng mafak baga-e-bom-nala e, imi win uyo kufak daga-e-bom-nala e, God imi abiip abiil tigiin uyo titul weng baga-e-bom e minte, abiil tigiin kasel iyo titul weng baga-e-bom no kema ko.  
\v 7 Kale God iyo dupkalata, Yesus imi unang tinum so dinan-bilip bii, dimduum ita ita kela Yesus imi unang tinum iyo kubaganip e minte, God iyo dupkala tinum miit maak maak sino, abiip maak maak unang tinum sino, tinum miit yagalami weng migik bagamin sino, tinum miit yagalami kaal migik migik sino iyo alugum imi kamok kebe tiin mola ko.  
\v 8 Kamaki God imi kafin komi telela kolin-tem som-nala uyo, unang tinum iyo kalip ita nimi unang tinum kepnelan-temip kalaa age-nala e, imi win uyo suuk kon tem kal dola ko-nala e, kalip ita nisino suun kup nan-temip kalaa age no kesa kale, Sipsip Man Yesus angkolip kaan asok fen tigi mo-se ita suuk kon boyo tiin mo waafusa kale, kafin kaa kutufosu komi unang tinum iyo dimduum bemi deng uyo tebe-bom aman duga-eman-temip kuta, God imi suun nin unang tinum bilip ita kup dimduum bemi deng uyo tebe-bom aman duga-eman-temaalip ko.   
\p
\v 9 Ibaa. God imi unang tinum ipta tolong sino kale, nimi weng ko bagaman-temi koyo tele tolong dolin o ageta ko.  
\v 10 Kale kanube God iyo waasi iyo imdala tal Yesus imi unang tinum iip maak maak iyo sok de imolin o agela umdii, kanube sok de imolan-temip kale minte, kanube God iyo waasi iyo imdala tal Yesus imi unang tinum iip maak maak iyo benat ko age un kong tuup inolip kaanamin o agela umdii, kanube benat ko age un kong tuup inolip kaanan-temip kale, Yesus imi ilak dolin unang tinum ibo ipkumal tebe yan-togonip uyo, ibo yan ke-emin ba e minte, daal tebe-bom God imi weng so kuguup so uyo kup-kagamin ba no kale, fomtuup God imi ilak uyo do-bom-nilipta o ageta ko.   
\p
\v 11 Kale Jon niyo atamita, dimduum maak kafin tem ilep mitam tala kale, bemi kom ko age duk katip alop boyo kong sipsip man imi dubom diim duk ulutap kalaa age-nili e minte, bemi weng uyo tolong dolita, inap imi weng ulutap sen-bom agol kup sek age yakyak ke-bom uget tagamin weng uta bagan-be kalaa ageli ko.  
\v 12 Kale kafin tem umi dimduum beyo yol ok kumun tem umi dimduum imi ogok kemin kale, yol ok kumun tem umi dimduum iyo imi titil kiim uyo kafin tem umi dimduum iyo kobela e, kafin tem umi dimduum iyo imi tiin diim kal bomta fiit tebe-e-bom kafin kaa kutufosu komi unang tinum iyo alugum bogobe, “Ibo bogo-nilip, ‘Yol ok kumun tem umi dimduum abang dul so beyo numi kamok o,’ agan-kalin o,” age fiit tebe-e-bom baga-ema ko.  
\v 13 Kale kafin tem umi dimduum iyo mirakel kiim ko age kuguup ugulumi migik migik uyo ke-bom-nalata, maak uyo ki, weng uta kup bogolata, maak fagalin tap abiil tigiin ilota at dong uyo malaak kafin diim e tuluta, alugum unang tinum iyo utam-nilipta, kumang molip ko.  
\v 14 Kale God iyo dupkalata, kafin tem umi dimduum iyo kanupmin mirakel uyo yol ok kumun tem umi dimduum imi tiin diim uyo kanum-nuubata kale, bomi tem ilep kafin diim kasel iyo uget taga-bom bisop baga-e-bom-nala e, “Yol ok kumun tem umi dimduum iyo benat ko age un kong tuup angkolip mep so kaanan agin kuta, fen-se kale, ibo at umaak malaa ku naman-bii ko-nilipta, yol ok kumun tem umi dimduum imi sinik tii kobe-nilipta, ‘Boyo numi god o,’ age-nilipta, ulotu ke-emin o,” agela ko.  
\v 15 Minte maak uyo, God iyo kafin tem umi dimduum iyo dupkalata, ita tebe yol ok kumun tem umi dimduum imi sinik telela kwep ku daabip uyo mam kopmata, sinik telela kobip boyo fen bogo-nulu e, “Ibo waantap ita nimi deng uyo tebe-bom aman duganebaalip iyo anolip kaanin o,” agan-kulu ko.  
\v 16 Kale kafin tem umi dimduum iyo ilami ogok ke-emin imi bogobe-nala e, “Ibo no yol ok kumun tem umi dimduum imi win uyo alugum unang tinum imi sagaal ipkuk diim o min, tibit kun diim min kugol dolemin o,” agela e, kota dolemip ko. Kale bilip iyo kamogimal so, minte unang tinum so, mufekmufek soyaap so, iip kugol man so, minte sok de imolip bisop tinum maak imi ogok kemin unang tinum so, bisop unang tinum so alugum bilip imi sagaal diim o min, tibit kun diim min uyo yol ok kumun tem umi dimduum bemi win uyo dolemip ko.  
\v 17 Kale yol ok kumun tem umi dimduum imi ogok kemin bilip iyo unang tinum iyo alugum namba kobe kobe kelip kale, namba bomi sang uta felep yak yol ok kumun tem umi dimduum imi win umi diim ku tolu kale, waantap ita maak yol ok kumun tem umi dimduum imi win o min, namba min uyo imi diim uyo dolalin binim kela umdii, bilip iyo beyo dupkalipta, mufekmufek umaak molan-temaala e minte, mufekmufek umaak kobela molan-temaalip binim no ko.   
\p
\v 18 Kanube tinum aget fugunin tambal ita nimi weng bogolan-temi komi magam uyo utamta, dok umi magam uta bagan-be kalaa agelan-tema kale, ibo bo tele aget fugunin. Koyo felep yak ku tomin weng kale, yol ok kumun tem umi dimduum bemi namba uyo 666 kale, namba boyo kafin diim tinum maak imi win ulutap kelu kale, waantap ita aget fugunin tambal umdii, iyo boyo utafi-bom-nilip e, umi magam uyo kanubeta kalaa agelin o ageta ko.   
\c 14  
\s1 Unang tinum Yesus tebe ilim bobe-se imi aseng kwaa-emsip uta ko  
\sr (Rev 5:6-14, 7:1-8,17, 17:14, 21:22-24)  
\p
\v 1 Jon niyo ilam do mufekmufek migik maak utabi uyo ki, Sayon Tigiin uyo God imi abiip miton Jerusalam kugol albu kale, Sipsip Man iyo Sayon Tigiin kugol moba kale, unang tinum ilimi kup 144 tausen (144,000) bilip ita iso mobip kale, bilip imi tibit diim uyo God iyo tebe Sipsip Man Krais bemi win so imi Aalap God ilami win sino uyo dola kosa kale,  
\v 2 niyo tolong dolita, imuuk weng maak abiil tigiin ilo tulu bomi biileng uyo ki, ok fon umi biileng afalik uunbu ulutap e minte, tumuun biginabu ulutap e minte, tinum kwiin tagang imi biingbuung ko age gitaa tambal bomin umi biileng tambal ulutap no kalaa ageli ko.  
\v 3 Kale God iyo tam ilami ton-bom alugum imi tiin mo-boma umi baan diim kal tona e minte, God imi mufekmufek tinum ke dimduum ke kelin kalbinim so e minte kamogimal ilimi kup 24 isino iyo God imi mep so kugol bomip kale, unang tinum ilimi kup 144 tausen (144,000) bilip ita God ulimal imi tibit diim kal mo-bom-nilip e, kamaa aseng maak uta kwaamip ko. Kale kafin diim unang tinum alugum imi iibak tem uyo Yesus iyo tebe unang tinum 144 tausen (144,000) ita kup ulaa imdu-nalata, imi ilim uta bobe-se kale, bilip ita kup tii aseng boyo utam dagaa ku-nimip ko.  
\v 4 Kale unang tinum kulip iyo sa dagamin binim e minte, tinum unang digin, unang tinum digin iyo ifak daga-emin binim no kebip ilitap ke-nilipta, bilip iyo atin tambal kup bomip kale, atin God imi ilak uyo fomtuup dosip kale, God imi Sipsip Man bemi dogap iina uyo, igil iso yakyak kemip ko. Kale kafin diim komi unang tinum imi iibak tem kalagal God iyo tebe bilip ita ulu kulep meng tolata, Yesus iyo kaan-nalata, bilip imi ilim uyo bobe-se kale, kamaki iman duung kobe, “Bo kapmi kop-kamup o,” age kupka-emin ulutap kale, 144 tausen (144,000) bilip ita God so Sipsip Man so ulim iyo kamaki uyo bilip isiik kulu, nulumi aligaap o age-silip ko.  
\v 5 Kale iyo kafin diim komi bom-nilip uyo, iyo ilimi kaal aget uyo fugun-bom-nilip e, bisop baga-e-bom kem-nuubaalip kale, bilip iyo God imi tiin diim uyo yuum binim ko.   
\s1 Ensel asuno God imi weng kwep tisip uta ko  
\sr (Rev 13:14-18, 16:2, 19:20, 20:4)  
\p
\v 6 Kale Jon niyo utamita, ensel migik maak unanbu tam isal kugol fululuu talan-bom-nala e, God imi weng tambal binimanamin binim suun nin uyo kwep tala kalaa ageli kale, weng ko kafin diim unang tinum imi baga-eman o agan-be boyo ki, tinum miit yagalami kaal migik migik so, tinum miit maak maak so, tinum miit yagalami weng migik bagamin sino, abiip maak maak unang tinum sino alugum imi  
\v 7 fomtuup weng uyo bogobe-nala e, “Ibaa. God imi yegemin am daanan-temu uyo mep so talan-bo kale, ibo imi atul uyo finan-bom-nilipta o ageta kuta minte, ipmi ilim uyo bobe-se kale, bemi win uyo kufu-e-bom deng tebe-bom-nilipta, unang tinum iyo baga-e-bom-nilip e, ‘Beyo kwiin kiim e minte, titil kup tebesa no o,’ agan-kalin o,” age-nala e, “Beta mufekmufek uyo alugum telelasa kale, kafin sino abiil so yol ok kumun so ok ket so telela kosa kale, bemi deng tebe-bom aman duga-emin o,” agela ko.   
\p
\v 8 Kale kamaki ensel maak isiik weng kwep tal daa unata minte, aaltam maak ita tal-nala e, bogola, “Ibo weng tambal koyo tolong do-nilip e, deng tebemin o ageta kale, abiip miton Babilon uyo kumen daak abe binimanu kale, siin uyo Babilon kasel ita kuguup mafak mafak uyo ke-e-bom-nilip e, alugum kafin diim komi tinum miit maak maak iyo kuguup mafak uyo kafale-bom no ke-bilipta, igil boyo dagaa kusip kale, Babilon kasel imi kuguup ke-em-nuubip uyo ki, ok mafak kupka-e-bilip unan-bii ilum ilum afalik kem-nuubip ulutap kuta, kota Babilon uyo alugum binimanu o,” agela ko.   
\p
\v 9 Kale ensel aaltam tala iyo weng kwep tal daa una e minte, aa maak fen umik tem tala ita fomtuup weng uyo bogola, “Waantap ita yol ok kumun tem umi dimduum so dimduum imi sinik bisop tinum igil telela kwep daabip so bilip imi bogobe-nilip, ‘Alop ibo numi kamok o,’ agelip umdii, imi namba ko age win felep yak ku tosu uyo ki tibit kun diim so sagaal diim so dolalip albu umdii,  
\v 10 bilip imi kuguup mafak bota God iyo olsak tebepmuta, kaal fuyap uyo kupka-e-bala utamaman-temip ko. Kale kaal fuyap boyo ki, ok mafak titil kup tebesu umi sing daala daak kap tem unu kobela unelip imi mat tem kulaak umi atul kup tebe-ebu ulutap ke-nalata, God iyo bilip iyo imdala yak at afalik kena-bulu tang mafak kuun-bo umi tem iinom-nilipta, kaal fuyap uyo kuga-bom utama-bom-nilipta, kek fenipta e, God imi ensel so Sipsip Man Yesus so iyo God imi abiip kal albip kalaa age itamaman-temip ko.  
\v 11 Kale unang tinum bilip iyo yol ok kumun tem umi dimduum so dimduum imi sinik telela kwep daabip so iyo bogobe-nilip, ‘Alop ibo numi kamok o,’ age-nilipta, imkalip dimduum bemi ogok kemin iyo tebe imi namba ko age win felep yak ku tosu uyo ki unang tinum bilip imi kaal diim uyo dola kobip kalaa age-nalata, God iyo imdala at tiil iinom-nilipta, kaal fuyap kwiin kiim uyo kugaman-temip kale, at boyo suun kenamin kup ke-buluta, kaal fuyabok uyo binimanan-temaalu kale, suun kup umtal dagamin kup keman-temip o,” agela ko.   
\p
\v 12 Kale God imi yegemin am uyo mep so talan-bo kale, Jon niyo Yesus imi unang tinum ipmi weng maak bogobelan o ageta kale, tinangku-silipta. Ibo God imi weng kwep daasa uyo fomtuup waafu-nilip e minte, Yesus imi ilak uyo duga-bom no ke-bilip kale, kanube mufekmufek mafak mitam tolon-temu uyo ki, mungkup ibo kupka-nimip kale, fomtuup titil fagaa Yesus imi diim uyo feba-bom imi ilak kup daga-bom no ke-bilipta o ageta ko.   
\p
\v 13 Kale kota niyo tolong dolita, abiil tigiin ilo weng maak tulu kalaa ageli uyo bogopne-nulu e, “Kabo weng koyo suuk kon tem kal dola ko bogo-nalap e, ‘Kamano kaa unon-temu kota, waantap ipta Kamogim Yesus imi diim febalip waasi iyo tebe anolip kaanip umdii, ibo tam God sino bom deng tebeman-temip kale, ibo aget kiim uyo fugunin ba o,’ age dola kolal o,” agelu e, God imi Sinik ita yan kebe bogola, “Aa. Dam bogolap kwa. Bilip imi ogok bong fagan-bilip so aget iluum so uyo kota binimanepmuta, kun fingkaman-temip kale, God iyo bilip imi ogok uyo utamata, ogok tambal ke-bilip kalaa age-nalata, bilip imi deng uyo tebe-bom, ‘Misam kelip o,’ agela e, igil aget bilili age-bom-nilip e, deng tebe-bom no keman-temip o,” age yan kebela ko.   
\s1 Unang tinum kuguup mafak kanum-nuubip bilip iyo God tebe kaal fuyabok kopman-tema uta ko  
\sr (Mat 25:31-46, Rom 2:1-16, 2 Tes 1:7-10, 2:3-12, Rev 11:17-19, 14:9-11, 16:1-20, 20:11-15, 22:12)  
\p
\v 14 Kale Jon niyo asok ilam maak dobi kwek uyo utamita, kafin diim tinum ilatap maak tam iip namaal diim kal tonba kalaa ageli kale, imi dubom diim uyo kamok kamok imi dufalum gol ku telelasip uyo maak kwaak kali-nala e minte, imi sagaal diim uta sagam maak waafuu no keba kalaa ageli kale,  
\v 15 ensel maak beyo God imi ulotu am miton abiil tigiin ilo tala kale, fomtuup tinum iip diim tonba imi olabe bogobe-nala e, “Alugum mufekmufek kafin diim albu uyo kota at dum abu-suu uyo damanbu kale, umi am afung afung am uyo kaa mitam daanu kale, kabo kapmi sagam uyo ku-nalap at dum uyo dagamal o,” agela (kale, bomi magam uyo, “God imi waasi ita aamal o,” agela) kale,  
\v 16 kota tinum tam iip diim tonba umdii kota malaak kafin diim abe-nala e, sagam uyo ku-nala e, alugum kafin diim umi iman damanu uyo faga-bala bii, binimanu ko.   
\p
\v 17 Kale asok niyo atamita, ensel migik maak God imi ulotu am miton abiil tigiin ilota sagam migik maak kwep tala kalaa ageli ko.   
\p
\v 18 Kale ensel maak alba beyo God imi at dan min, at kon fuumin baan diim abiil tigiin albu umi at uyo tiin moba kale, kota kupka-nala e, tal ensel maak sagam waafuba imi olabe-nala e, bogobela, “Kota kafin diim umi sok umi dum uyo yamanbu kale, kapmi sagam uyo ku-nalapta, sok dum yamanbu uyo dagamal o,” agela ko.  
\v 19 Kale ensel beyo sagam kwep kafin diim e tala kale, kanube tinum sagam ku-nilip sok dum uyo bo-nilip, kululip daak yaan baan diim unu, yaan tamana-bilip, sok dum ok mitam tele-bulu ilan-nuubip ulutap kale, ensel iyo unang tinum iyo afeta kulula daak kaal fuyap baan diim abelipta, God imi olsak afalik uyo kwaala no unang tinum bilip imi diim abelan-temu ko.  
\v 20 Kale yaan baan diim boyo tam Jerusalam umi daam tem kugol albu kale, kanube tinum sok dum diim tamana-bilip, sok dum ok mitam tele-bulu, ilan-nuubip ulutap kale, ensel iyo tinum iyo imdaak tama telelamip kale, imi isak uyo mitam abe fogo unu uyo ki, kilomita ulumi kup 300 ke ku diliit kupkalu kale, uyo kwiin kiim kale, isak ok bomi iibo kiit iinemin uyo uta uta ke tinum iyo dupdaak tamalu (kale, bomi tem ilep God iyo imi unang tinum waasi tebe anolip kaansip imi beten uyo yan kebe-nalata, waasi iyo inola kaanip) ko.   
\c 15  
\s1 Ensel ban kal maak kaal fuyap unang tinum kuga-emin ban kal umi kulep tisip uta ko  
\sr (Rev 1:16-20, 4:5, 5:6, 7:11)  
\p
\v 1 Koyo Jon nimi ilam do utabi umi sang uta kale, abiil tigiin uyo ugulumi mufekmufek migik maak mitam tulu kale, boyo mufekmufek kwiin kiim kale, niyo utam-nilita, kumang moli uyo kulbu kale, ensel ban kal imi mufekmufek ban kal kulep tilip boyo kaal fuyap unang tinum imi kobelan-temip umi mufekmufek ban kal uta kale, unang tinum iyo kanupmin kaal fuyap ogen man figilip afungim uyo ku utamip e, kota God imi olsak uyo binimanepman-temu kale, God iyo unang tinum iyo maak imkalata, kaal fuyap uyo maak so kulan-temaalip binim ko.   
\p
\v 2 Kale mufekmufek migik maak utami boyo ok muk ulutap maak ibo kosu kale, boyo atin mim ok binim, fital kup tebesu kale, boyo am umi glas ulutap e minte, bomi dong uyo at dong ulutap no kale, God imi unang tinum iyo mufekmufek yol ok kumun tem umi dimduum umi sinik telela kwep daa-silip uyo aman duga-e-bom-nilip e minte, imkalip imi namba ko age win felep yak ku tosu umaak imi tibit kun diim uyo dola ko no kemsaalip kale, ita ita ke yol ok kumun tem umi dimduum iyo kubagana dupka-nilip e bole, mangkal ninggil iyo ok muk dong tebesu umi magaang diim kugol mo-bom biingbuung ko age gitaa God tebe kobeba uyo bo-bom-nilip e,  
\v 3 aseng kwaamip ko. Kale God imi ogok kemin tinum Moses imi aseng kwaamsa so God imi Sipsip Man imi aseng so uta kwaa-bom bogo-nilip e, “Bisel God kabo titil magam kayaak kale, kapmi kuguup uyo kwiin kiim e minte, ugulumi migik no kale, God kabo kafin kaa kutufosu komi kamok kamok imi dubom kale, kapmi kuguup uyo tol kup e minte tuluun kup no ko.  
\v 4 Kale kapta kup atin tambal kup tebesap e minte, kapta kup titil magam kayaak kale, alugum kafin kaa kutufosu komi tinum miit migik migik bilip iyo kapmi atul uyo finan-bom-nilip e minte, alugum bilip iyo kapmi titil afalik uyo utam-nilipta, kapmi win uyo kufukeman-temip bota, alugum kulip iyo utamipta e, kabo suun kup aget tele fugun-bom tambaliim kup kuguup tambal uta waafuu no kesap kalaa age-nilipta, tal ulotu keke-bom kapmi deng uyo tebeman-temip o,” age aseng kwaamip ko.   
\p
\v 5 Kale kanube aseng uyo kululip binimanu e, utamita e, ensel iyo abiil tigiin umi ulotu am miton umi abiin amem ko age God imi alba uyo faal bitola kalaa ageli e,  
\v 6 ensel ban kal kulip iyo ulotu am miton ilota kaal fuyap unang tinum kobelan-temip umi mufekmufek ban kal uyo kulep mitam tilip kale, iyo ilim namaal dong kup tebesu uta migi-nilip e minte, gol ku ol tiil ko age let telela kosip uyo ku migi no ke mitam tilip ko.  
\v 7 Kale siin uyo suun kup nin tinum God beyo kafin diim kasel fengmin unang tinum iyo olsak kobe-nalata, kaal fuyap ulumi kup ban kal boyo kulu kulula daak gol telela kolip tet kesu ulumi kup ban kal tem iinu kale, God imi mufekmufek tinum ke dimduum ke kelin kalbinim imi iibak tem maagup maak iyo tebe tet ban kal uyo ensel ban kal bilip imi kobela ko.  
\v 8 Kale God iyo ulotu am miton kutam kal alba kale, beyo atin titil so dong so kale, imi dong uyo at dong kenabu ulutap kesu kale, imi titil so dong so uyo at tum umi am bugulin ulutap ke ulotu am miton uyo dongenu kupkalu kalaa ageli kale, tinum iyo maak tam God iyo atam-nimip binim ke-bilipta bii, ensel ban kal ita kaal fuyabok uyo sing daa kwaalip daak kafin diim kasel albip imi diim abeluta, iyo ogen man figilip uyo utam umtal daalipta, binimanan-temu ko.   
\c 16  
\s1 Ensel imi tebe kaal fuyap afungim ban kal unang tinum imi kobesip umi sang uta ko  
\sr (Luk 17:26-30,34-36, 21:20-24, 2 Fit 3:10-12, Rev 6:12-17, 8:6-9:19, 11:6,13, 14:9-11,14-20, 20:11-15)  
\p
\v 1 Kale niyo tolong dolita, God imi weng ulotu am miton ilo tulu uyo fomtuup weng uyo ensel ban kal imi bogobe-nala e, “Ibaa. Ibo no kaal fuyabok umi tet ban kal boyo sing daa kwaalip daak kafin diim kasel albip imi diim abeluk o,” agela kalaa ageli e,  
\v 2 kota ensel maak isiik imi tet uyo kwep tam sing daa kwaala daak kafin diim unang tinum albip imi diim abelu boyo, waantap ita imkalip yol ok kumun tem umi dimduum imi tinum bilip iyo tebe ilami namba ko age win felep yak ku tosu uyo tibit kun diim dola kobe-silip so, waantap ita dimduum imi sinik telela ko-silip uyo aman duga-em-nuubip so ita kale, abang mafak ko age atul tebesu uyo mitam unang tinum bomi kanum-nuubip bilip imi diim abelu ko.   
\p
\v 3 Kale tam ensel maak yagal mungkup imi tet uyo kwep tam sing daa kwaala daak yol ok kumun tem unuta, yol ok uyo mitam isak ok ke-nulu e minte, tinum kaana imi isak ulutap ke no kelu e, alugum yol ok kumun tem aniing min albip iyo kaanip ko.   
\p
\v 4 Kale ensel maak kegal mungkup imi tet uyo kwep tam sing daa kwaala daak iliip tem ok talan-bo so ok tiinemin so umi daang diim abeluta, ugol mungkup mitam isak ok ke no keluta kale,  
\v 5 niyo asok tolong dolita, ensel maak alugum ok tiinemin umi tiin moba iyo bogo-nala e, “God kabo atin tambal kup tebesap kale, kabo siin uyo bii-salap e minte, kamano ko albap no kale, kaal fuyabok mafak uyo fengmin unang tinum iyo kopman o agan-balap umdii, kabo tol kup tebesap kale, kaal fuyabok kobelan-temap uyo felepman-temu kalaa agebap uta kup kobelan-temap ko.  
\v 6 Kale siin uyo kapmi ilak dolin binim tinum iyo tebe-nilip e, kapmi ilak dolin unang tinum iyo aa-bom-nilip e minte, kapmi profet ko age weng kem baga-emin tinum iyo aa-bom no ke-bilipta, imi isak uyo singkam dagan-nuubu kale, kamano kota isak boyo kabo tebe fengmin unang tinum kulip iyo ilu kobelapta, isiik un-bom-nilipta, ilimi kaal uyo kufak dagan-bilip o,” age ensel ok tiinemin umi tiin molin iyo God imi bogobela ko.  
\v 7 Kale niyo tolong dolita, God imi unang tinum inolip kaansip imi weng maak tulu boyo mufekmufek kwe fuulip kenu God imi kupka-emin baan diim umi afak tem ilo tulu kale, bogo-nilip e, “Dam kale, Bisel kabo God titil miit kayaak iyo kulbap kale, kapmi unang tinum yega duga-em-nuubap uyo, kapmi weng telelmin boyo atin tol uta kup telel-bom-nalapta, imi kuguup mafak kem-nuubip umi yan uyo kupka-em-nuubap o,” agan-kalip kalaa ageli ko.   
\p
\v 8 Minte tam ensel maak yagal mungkup imi tet uyo kwep tam sing daa kwaala yang ataan diim abeluta, mimin kiim uyo ken-nuluta, mimin boyo tebe tinum iyo fuulu e,  
\v 9 ken tebe-bom-nilip e, kota aget fugunolipta e, boyo God ita titil so kale, kaal fuyabok boyo kwaala tal numi diim abelu ken tebe binimanan-temup kalaa age-nilipta, God imi win kufak daga-e-bom weng mafak baga-e-bom no ke-bilip kuta, iyo imi aget fugunin umaak fupkela ko ilimi fengmin uyo kupka-nimip binim e minte, God imi win uyo kufu-bom bogobe-nilip e, “God kapta kup titil magam kayaak kale, kaal fuyabok kwaalap telemin so fot tebelap binimamin so iyo kapta kup o,” agomip binim ke-bom no kemip ko.   
\p
\v 10 Kale ensel ok keyo imi tet uyo kwep tam sing daa kwaala daak yol ok kumun tem umi dimduum imi tonamin baan diim umi diim abe-nulu e minte, abiip maak maak yagal tiin moba imi diim abe no kelu e, abiip uyo alugum mililanuta, kafin diim unang tinum yol ok kumun tem umi dimduum tebe tiin moba iyo utamipta e, kaal fuyabok uyo sengan tebebu kalaa age-nilipta, sit weng kup dolot saan-bom-nilip e,  
\v 11 ilimi abang so kaal fuyap kugan-bilip so bomi kalan uta abiil tigiin kayaak God iyo titul weng baga-e-bom agan-bom kemip kuta, imi aget uyo fupkela ko-nimip binim e minte, kuguup mafak umaak kupka-nimip binim no kelip ko.   
\p
\v 12 Kale ensel bugup yagal mungkup tet uyo kwep tam sing daa kwaala daak ok kiim Yufretis daang diim abelu e, Ok Yufretis boyo kaanu ko. Kale siin uyo Ok Yufretis boyo ok kwiin kiim kale, tinum iyo dogobeta ok boyo ilo ko mek milii tolomip binim kuta, kota ok boyo kaan-nulu e, kota ilep so keluta, waasi imi kamogimal iyo imi waasi dinan-kalin tinum iyo kulep tal ataan telemin ilo uyo tal abe mitam-nilipta, yol ok kumun tem umi dimduum iso minte imi waasi dinan-kalin tinum so ninggil dinan-kalon-temip ko.  
\v 13 Kale niyo utamita, sinik mafak asuno maak kol diilip kale, maak uyo inap afaligen ko age Saatan imi bon tem ilep mitam tulu e minte, maak uyo yol ok kumun tem umi dimduum imi bon tem ilep mitam tulu e minte, maak uta kafin tem umi dimduum ko age bisop weng kem baga-emin tinum ko age profet mafak imi bon tem ilep mitam tal no kelip kalaa ageli ko.  
\v 14 Kale sinik mafak asuno bilip iyo imi mirakel ko age kuguup ugulumi migik migik uyo telela-bom-nilipta, iyo no kafin kaa kutufosu komi abiip kamogimal iyo dagalipta, kamok kamok iyo yagalami waasi dinan-kalin tinum iyo kulep tala tala ke-nilipta, God titil magam kayaak imi yegemin am umi daanan-temu kota, iyo fiko tal tamipta, Yesus so ensel so iyo dinan-kalon-temip ko.   
\p
\v 15 Kale Kamogim Yesus iyo kaltem kemin weng uyo bogo-nala e, “Nimi nugumal ibaa. Tinangku-silipta. Nimi tolon-temi uyo, yuguut unin tinum imi bantap maagalo telemin ulutap ke maagalo maak fagalin tap tolon-temi kale, kanube tinum iyo ilami ilim uyo begep to bisop kaal kem agaal bom-bala yuguut unin iyo tal imi ilim uyo dugubina umdii, tinum beyo kaal kem yuguut unin bemi at kom foga abiip iinon-tema uyo, fitom tebebelan-temu kale, ilim uyo begep toli kalaa age-nala kafan bom tiin mo son-tema bota tambaliim kale, ulutap kale, niyo maagalo tolon-temi kale, ibo tinum ilim begep to kaal kem agaal unemin ilitap ke-nimip kale, ibo telela fen-silipta, nimi tolon-temi kota, ibo fitom binim, tambaliim deng tebemin o,” agela ko.   
\p
\v 16 Kale sinik mafak asuno iyo tinum kamok kamok iso imi tinum waasi dinan-kalin sino iyo afeta-bii ko kulep no waasi dinan-kalin baan diim tolip kale, waasi dinan-kalin baan diim boyo Hibru kasel imi weng uyo bogo-nilip, Amagedon ko age Megido Tigiin o agan-nuubip uta ko.   
\p
\v 17 Kale ensel ban keta tet afungen uyo kwep tam sing daa kwaala daak iip umi diim abelu e, kota God imi weng ulotu am miton abiil tigiin ilo tulu uyo fomtuup bogo-nulu e, “Kota kaal fuyabok uyo afung afung binimanu o,” agela ko.  
\v 18 Kota abiil tigiin uyo bamalaang falaak mo tumuun biginan-bo umi biileng uyo tinum weng ulutap baga-bulu e minte, bim afalik ko age ugulumi migik kwiin kiim uyo mitam abe kafin uyo mafaganu kupkalu boyo ki, sugamiyok God imi unang tinum telela imo imdep kafin diim kaa daala kwep tal kaa diibelu koyo, kanube bim afalik mafak umaak mitam tisaalu binim kale,  
\v 19 abiip miton Babilon uyo begelalu abiip asuno kelu kupkalu kale, alugum kafin kaa kutufosu komi abiip afek afek uyo alugum mafagan fegela tebelu kale, bomi tem ilep ku-tele God imi aget fugunin uyo ki, “Babilon kasel iyo kanupmin kaal fuyabok bota kobelan-temi o,” agan-be uyo ko mitam tulu kale, Babilon kasel bilip imi kuguup mafak bota God imi olsak afalik uyo ok mafak titil kup tebesu ulutap kale, yagal sing daa kwaala daak ok tet tem unuta, kobelata, iyo unelipta, at afalik kenamin ke-buluta, kaal fuyap afalik boyo kulip ko.  
\v 20 Kale bim afalik bomi mitam tulu uyo, yol ok daang kun diim umi kafin kangkang albu uyo alugum sega kulu daak yol ok kumun tem unu e minte, amdu uyo belela tebe daak kafin diim abe koman kupkaa no kelu e minte,  
\v 21 maak tulu uyo, wep magap afaligen malaak aban-bo boyo tuum malaak abebu ulutap ke-bo kale, wep magap maagup maagup malaak aban-bo umi iluum uyo kilo ulumi kup 50 kelu kale, boyo abiil tigiin ilota dupdulu malaak tinum albip bilip imi diim abe-buluta, bilip iyo kanu-bo bomi ogen man figilip uyo utam-nilipta, God iyo weng mafak uyo baga-e-bom-nilip e minte, imi win uyo kufak daga-e-bom no kemip ko.   
\c 17  
\s1 God imi tebe Babilon kasel imi kaal fuyap kobesa uta ko  
\sr (Rev 14:8, 16:19, 18:1-24, 19:2-3)  
\p
\v 1 Kale ensel ban kal tet waafubip imi iibak tem ilota ensel maak tal bogopne-nala e, “Talapta, alop no kafalepkelita, uta-balapta, God iyo unang sa dagamin win tibin uyo kaal fuyap kobela kalaa agelal o ageta kale, weng ko bagan-bii bomi magam uyo ki, unang sa dagamin umi sang uyo felep yak abiip afalik Babilon umi diim to bagan-bii kale, Babilon boyo ok teta taban unsu magat diim mep so kugol tonsu kale,  
\v 2 kafin kaa kutufosu komi kamogimal iyo sa dagamin kuguup ulutap uyo unang kuso ke-bom-nilip e, kupkalipta, uta tebe-nulu e, umi kuguup mafak uyo kamogimal imi unang tinum iyo kafale-buluta, kanumip kale, kanube tinum ok mafak une dubom tem ilum ilum keba ulutap kale, kafin kaa kutufosu komi unang tinum iyo sa dagamin kuguup ulutap uyo unang kuso ke-bom-nilip e, umi kuguup mafak uyo waafu-bom-nilipta, ilum ilum ke-bom God iyo dupkaa yang iinip o,” age ensel iyo bogopnela ko.   
\p
\v 3 Kale God imi Sinik iyo kafalne-balata, ilam uyo duga-bomta itamita, ensel beyo tal nimtamo unanbu no anang iibaan ku daala kalaa ageli e, ensel beyo kafalepnela utamita, unang maak te tam dimduum isagulut imi daang kun diim tonbu kalaa ageli kale, dimduum bemi dubom uyo ban kal e minte, imi dubom diim uyo kom ko age duk nagaal kal no kale, God imi win kufak daga-emin uyo imi alugum kaal diim uyo dolasip kale, uyo utamita e, beyo yol ok kumun tem umi dimduum kalaa ageli ko.  
\v 4 Kale unang bomi ilim tiilu boyo unang kamok kwiin umi ilim tiim-nuubu ulutap kale, uyo ilim tambal alop maak tiilu boyo isagulut ilim e minte, ket kon boyo gol so tuum titup fukolin so samaal so kulu telelalip bugup san kesu uyo tii-nulu e minte, umi sagaal diim uta gol ku kap telela kosip umi waafubu kulaak uyo sok dum ok ba kale, kulaak uyo mufekmufek mafak ninak tonsu kuguup sa dagamin ko age min, kuguup mafak mafak umi kap abu ko waafubu kalaa ageli ko.  
\v 5 Kale unang boyo ulumi kubasu win uyo ulumi tibit kun miton diim kugol dolalin kale, “Niyo abiip afalik titil so abiip Babilon kale, niyo kafin kaa kutufosu komi unang tinum sa dagamin kuguup so atin kuguup mafak mafak fitom binim kuguup so waafusip alugum imi ogen o,” age dola kosip ko.  
\v 6 Kale Babilon kasel iyo tebe God imi weng waafulin unang tinum dital fagaa Yesus imi diim febalin bilip iyo inolip kaanip kalaa age-nuluta, unang boyo imi deng faga-e-bom-nuluta, imi isak uyo une-nuluta, ilum ilum buluta, niyo utamta, kumang moli ko.  
\v 7 Kale ensel iyo bogopne-nala e, “Kabo boyo kumang saanin ba kale, niyo unang kanu-bo bomi magam uyo kupkem daapke-nili e minte, dimduum dubom ban kal so kom ko age duk nagaal kal no kesa imi daang kun diim tonbu dimduum bemi magam uyo kupkem daapke no kelan-temi kale, tinangku-salapta.  
\v 8 Kale boyo yol ok kumun tem umi dimduum ita siin uyo kamok ke unang tinum iyo tiin mo-bii-se kuta, kamano koyo kamok ke tiin mobaala kale, unanbu daak kafin umi tem kiim kalo kosu kulagal alba kale, siit ilugo-nalata, asok kulaak ilo mitam bom-salata, God iyo tebe atin angkola binimanan-tema ko. Kale sugamiyok God imi kafin komi telelalin-tem som-nala uyo, itamata, tinum milii kafin diim ko nan-temip bilip iyo nimi tinum kelan-temaalip kalaa age-nalata, imi win uyo suuk kon tem uyo dolebesaala binim kale, iyo imi suun abiip uyo isino nan-temaalip binim kale, kanupmin unang tinum iyo utamipta, yol ok kumun tem umi dimduum iyo asok mitam tala kalaa age-nilipta, kumang molan-temip ko.   
\p
\v 9 “Kale kanube waantap kapta aget fugunin tambal ku-nalap nimi weng magam uyo utamta, dok umi magam uta bagan-be kalaa age utam bam daalan o agelap umdii, kabo bo tele aget fugunal. Yol ok kumun tem umi dimduum dubom ban kal boyo felep yak amdu ban kal unang ko age abiip afalik tonbu bomi diim to-nulu e minte, dubom ban kal boyo felep yak kamogimal ban kal ko age abiip afalik kutam imi king ban kal imi diim to no kelu ko.  
\v 10 Kale kamogimal ko age king ogal iyo isiik unang tinum iyo tiin mo bii kaana kaana ke-silip kale minte, kamano kota kamogim ko age king maagup beta kup unang tinum iyo tiin moba kale, son-temu uyo, afungim beta mitam kamok king ke-nalata, ita unang tinum iyo tiin molan-tema ko. Kale imi mitam king kelan-tema uyo, God iyo dupkalata, iyo king ke-bom siit ilugolin tap kelan-tema ko.  
\v 11 Kale siin uyo yol ok kumun tem umi dimduum iyo kamok ke unang tinum iyo tiin mo-bii-se kuta, kamano koyo kamok ke tiin mobaala kale, beyo king ban kal bilip imi iibak tem uyo tinum maagup beta kup som-nalata, kaan-se kuta, son-temu uyo, iyo asok mitam-nalata, ita asok king ke-nalata, unang tinum iyo tiin mo-bom-salata, God iyo tebe angkola atin kaan binimanan-tema ko.   
\p
\v 12 “Kale kom ko age duk nagaal kal utabap boyo felep yak son-temu nala tinum nagaal kal mitam king kelan-temip bilip imi diim tolu kale, bilip iyo yol ok kumun tem umi dimduum imi ogok ke-emin tinum kelipta, yol ok kumun tem umi dimduum iyo tebe titil ku king nagaal kal bilip imi kobelata, bilip iyo yagalami abiip maak uyo tiin mola tiin mola ke siit ilugolin tap so kelan-temip ko.  
\v 13 Kale king nagaal kal bilip iyo aget maagup ke-nilipta, imi unang tinum bilip iyo imdalip yak yol ok kumun tem umi dimduum imi unang tinum aligaap kebelipta minte, king bilip ita dimduum imi ogok ke-emin tinum kebe no ke-nilip e minte, king bilip ita yol ok kumun tem umi dimduum imi titil uta kup ku-nilipta, unang tinum iyo tiin mo no kelan-temip ko.  
\v 14 Kale yol ok kumun tem umi dimduum so e minte king nagaal kal so iyo Sipsip Man Yesus so waasi dinan-kalon-temip kuta, Sipsip Man beyo alugum kamogimal imi dubom e minte, beta atin kamogim titil kup tebesa no kale, imi titil uta alugum king bilip imi titil uyo kubaganu imka-nalata, ita ita kesa kale, God iyo Sipsip Man imi unang tinum ita kup ulaa imdula mitam imi okumop man kebe-nilipta, iyo dital fagaa imi diim uyo febalipta, Sipsip Man so imi unang tinum so iyo yol ok kumun tem umi dimduum so king nagaal kal sino imi unang tinum sino dinan-kalon-temip uyo, Sipsip Man ninggil mangkal ita ita kelan-temip o,” age ensel iyo bogopnela ko.   
\p
\v 15 Kale maak uyo ensel iyo bogopne-nala e, “Unang sa dagamin ko age abiip Babilon boyo ok teta taban unsu magat diim mep so kugol tonsu kalaa agebap bomi magam uyo kafin kaa kutufosu komi abiip maak maak unang tinum so, tinum miit maak maak so, tinum miit yagalami kaal migik migik so, tinum miit yagalami weng migik bagamin so bilip iyo Babilon kasel imi afak tem iinipta, tiin molip albip ko.  
\v 16-17 Kale God iyo yol ok kumun tem umi dimduum so king nagaal kal sino imi bogobe-nala e, ‘Kanubelin o,’ agelata, bilip iyo, maagalo kanubelum o age-nilipta, king nagaal kal iyo aget maagup ke-nilipta, imi unang tinum bilip iyo imdalip yak yol ok kumun tem umi dimduum imi unang tinum aligaap kebelipta, king ita imi ogok ke-emin tinum kebe no kelip kale, yol ok kumun tem umi dimduum ita king nagaal kal imi kamok ke-nalata, imi unang tinum iyo tiin molan-tema kale, yol ok kumun tem umi dimduum isino king nagaal kal so iyo unang sa dagamin ko age abiip Babilon umi waasi kebe olsak kobe no ke-nilipta, unang umi mufekmufek tambal uyo alugum kupkan kebe bisop kaal kem kupka-nilipta, umi dam uyo alugum bukobe une at kwegalip ken tebelan-temu kale, ko kanubelan-temip boyo abiip Babilon umi mufekmufek tambal umi sang kale, alugum kupkan ke fegela ko at kwegalip bii, tiban binimanuta, God imi weng uyo abulan-temu ko.   
\p
\v 18 “Kale unang ko utamap boyo felep yak abiip afalik win tibin umi diim tolu kale, sugayok uyo abiip kasel imi king ko age kamogimal iyo ita ita ke kafin kaa kutufosu komi king migik iyo kubaganip imka-nilipta, ita kafin kaa kutufosu komi abiip maak maak uyo tiin mo-bii kaana kaana kem tebesip o,” age ensel iyo baganema ko.   
\c 18  
\s1 God tebe abiip Babilon kufak daasa umi sang uta ko  
\sr (Rev 14:8, 16:19, 17:1-18, 19:2-3)  
\p
\v 1 Kale ensel imi weng uyo binimanuta, kota Jon niyo atamita, ensel maak abiil tigiin ilo tala beyo ki God imi titil afalik uyo kobela kwep tala kale, bemi dong uyo ki, daal yogon umi dong ulutap ela kwep tilin kelata, kafin kaa kutufosu koyo alugum ilagen kupkalu kalaa age utami ko.  
\v 2 Kale ensel iyo fomtuup ola-nala e, “Ibo weng tambal ko tolong do-nilip e, deng tebemin a. Abiip miton Babilon uyo balata kumen daak abe binimanan o angbu kale, kanubelan-temu bota, mufekmufek mafak mitam tolon-temu uyo kulbu kale, abiip Babilon boyo amem tem kasel so uun mafak mafak so bilip imi abiip kelan-temu ko.  
\v 3 Kale God imi tebe abiip boyo kufak daala binimanan-temu bomi magam uyo ki, unang ko age abiip Babilon uyo tebe-nulu e, umi kuguup mafak uyo kafin kaa kutufosu komi unang tinum iyo kafale-buluta, kanum tebesip kale, kanube tinum ok mafak une dubom tem ilum ilum keba ulutap kale, kafin kaa kutufosu komi unang tinum iyo sa dagamin kuguup ulutap uyo unang kuso ke-bom-nilip e, umi kuguup mafak uyo waafu-bom-nilipta, ilum ilum ke-bom God iyo dupkaa yang iinsip kale, kafin kaa kutufosu komi kamogimal iyo sa dagamin kuguup ulutap uyo unang kuso ke-bilip e minte, Babilon kasel iyo kamogimal bilip imi mufekmufek mok uyo unan-bom-nilip e, umi aget uyo ugaa kwaa-bom kwaamum o agan-bilipta, kafin kaa kutufosu komi bisnis kemin tinum iyo tebe kuga-e-bilip saan-bilipta bii, mitam mufekmufek soyaap tinum kelip bomi kalan uta God iyo tebe Babilon kasel iyo ifak daa anolan o agan-be o,” age-nala e, ensel iyo kam agela ko.  
\v 4-5 Kale niyo tolong dolita, God imi weng uyo abiil tigiin ilo tulu kalaa ageli e, uyo bogo-nulu e, “Nimi unang tinum ibaa. Ibo abiip Babilon boyo kupkaa daaginin o ageta kale, Babilon kasel imi kuguup mafak mafak kanu-bilip uyo kwiin kiim kalaa age-nilita, utabi kale, bota mep so niyo, kaal fuyabok kopman o agan-bii kale, nimi unang tinum kepnesip ibo tele tolong do-silipta. Ibo Babilon kasel isino kwego dego ke-bom kuguup mafak waafulip umdii, ipkil mungkup kaal fuyabok uyo kulan-temip kale, ibo imi kanu-bilip uyo ipsino kanumin ba kale, bilip iyo imi kuguup mafak kanu-bilip bomi yan uyo kaal fuyabok uyo igil kulan-temip kale, ibo bilip iyo imkaa daaginin o,” age God iyo kam agela ko.   
\p
\v 6 Age-nala e, asok God iyo bogo-nala e, “King ko age kamogimal nagaal kal ibaa. Babilon kasel iyo tebe ibo atin kuguup mafak kupka-em tebesip kale, ipsiik yan kebe atin ki kuguup mafak umaak kupka-e-bilip bii, ogen man figilip uyo utaman-temip kale, ipsiik imi kuguup mafak boyo yan ke-e-bilip bii, ilep alop fagalin o ageta kale, kanube imi ninuk tebe-e-bilip ipmi kuguup mafak ko age ok mafak unansip ulutap ke ipsiik tebe ok mafak titil kup tebesu kupka-emin ulutap ke-bom atin kuguup mafak uta kupka-e-bilip bii, ogen man figilip uyo utamin o ageta ko.  
\v 7 Kale abiip Babilon boyo unang kamok ulutap kale, uyo ton-bom aget fugun-bom-nulu e, ‘Niyo kamok unang ko age kwiin kale, abiin tambal kup tonbi kale, son-temu uyo, niyo unang kaluun umi aget iluum ku-nulu aget afek kup fugunbu ulutap uyo kelan-temaali o,’ agan-bom-nuluta, mufekmufek tambal kwiin tagang uyo afeta-bii fagaa kupkaa ket kon tambal kup tii-bii kupka-nulu e, atin tambal kup tonu kuta, ipmi tebe kaal fuyabok afalik kobelan-temip uyo, ulumi kuguup mafak kanum-nuubu bota kobelipta, tii kelan-temu ko.  
\v 8 Kale unang ko age abiip Babilon umi kuguup mafak ko kanum tebesu bota, Bisel God titil magam kayaak niyo yega dobeli e, maak fagalin tap mafak ilinok uyo malaak umi diim abelu e, umi unang tinum kaanebelip uyo, aget iluum afalik tebebelu e minte, iman tebok uyo mitam abe no ke-buluta, at fakam daa-nulu e, uyo kwe fuulu ken tebe-bulu bii, binimanan-temu o,” age God iyo kam agela ko.   
\p
\v 9 Kale kafin kaa kutufosu komi kamogimal iyo unang ko age abiip Babilon kasel imi sa dagamin kuguup uyo ke-bom e minte, imi mufekmufek afetamin kuguup uyo ke-bom no kem-nuubipta, simanim ilota tiin umolipta, at tum afalik maak fakam daalu kalaa age-nilipta, utamipta e, Bei. Abiip Babilon uta ken taban-bo kalaa age-nilipta, “Babilon umi mufekmufek tambal boyo maak so kulan-temaalup o,” agan-bom-nilipta, aget iluum afalik tebepmuta, iyo fomtuup ol-bom ameman-temip ko.  
\v 10 Kale kamogimal iyo finanip kale, kanupmin kaal fuyabok boyo nuyo kulan-temaalup o age-nilipta, meng mep so tilin-tem unanbu yang simanim kal bom-nilip e, bogo-nilip e, “Kanupmin kuguup boyo atin mafak kwei. Kanube abiip afalik Babilon boyo kwiin kiim e minte, titil tebesu no kuta, God iyo maak fagalin tap kaal fuyabok kobe abiip uyo at ken tebe binimanu kupkala o,” age-nilipta, finanan-temip ko.   
\p
\v 11 Kale ulutap kale, kafin kaa kutufosu komi bisnis kemin tinum iyo utamipta, mufekmufek saanin abiip Babilon uyo ken tebe binimanu e minte, unang tinum bom-bilip mufekmufek kwep no saanan agin iyo alugum biniman no kelip kalaa age-nilipta, numi bisnis ke-bulup koyo kumen daak abe mafaganu kalaa ageta iyo aget iluum afalik kup tebepmuta, fomtuup ameman-temip ko.  
\v 12-13 Kale siin uyo bisnis kemin tinum bilip iyo mufekmufek kwiin tagang uyo kulep no Babilon tolipta, Babilon umi unang tinum ita saan-nuubip kale, uyo ki,  
\m ket kon uyo gol, silva, samaal, tuum titup fukolin no uta kulu telela kosip so,  
\m minte ilim kaal uyo namaal min, isagulut min, ifuum min, bamalaang tebesu so,  
\m minte mufekmufek naman-bii kolin uyo at tang tambal kuunin maak maak so at tambal migik so kong afalik elefan umi sum kun so kopa so ain so kuung kuung so umi naman unsip so,  
\m minte mufekmufek tang tambal kuunin uyo unan-kalin min, kaal diim iligamin min, at kwegalap ken tebelu tang tambal kuunin so,  
\m minte unan-kalin uyo sok dum ok so oliv umi tugul ok so flawa so rais ko age wiit so,  
\m minte kao min, sipsip min, hos min, hos umi umik tem trala kup diibelip hos tebe dilila kwep unemin min uyo kulep no tolip saan-bom-nilip e minte,  
\m unang tinum de imolip bisop tinum maak imi ogok tubulin so waasi dinan-bom unang tinum yaafuu imdep tilip so iyo imdep no daalip kek kek iyo tebe unang tinum bilip iyo saan-bom no kem-nuubip kale, kanube siin uyo kulep no tolipta, Babilon kasel ita kanupmin mufekmufek boyo mani kiim kobe-nilipta, saan-nuubip kuta, kamano kota unang tinum iyo maak saanan-temaalip binim kale, numi bisnis boyo binim kelu kalaa age-nilipta, bisnis kemin tinum iyo ameman-temip ko.  
\v 14 Kale bisnis kemin tinum iyo bogo-nilip e, “Babilon kasel imi mufekmufek umi aget ugaa kwaa-bom kwaamin uyo ki, iman tambal so ket kon tambal so binimanbu uyo bilip iyo asok dogonubeta kulipta, umi olang uyo kulan-temaalu o,” agan-kalon-temip ko.   
\p
\v 15 Kale kanube siin uyo bisnis kemin tinum iyo no abiip Babilon une-bom mufekmufek saan-bom, un faga-bom-nulupta, tinum win so kelum o agan-bom kem-nuubip uyo, kota numi bisnis uyo binimanu kalaa age-nilipta, iyo aget iluum afalik kup tebepmuta, fomtuup ol-bom ameman-temip kuta, imi aget fugunin uyo, “Babilon kasel imi kaal fuyabok kubip kulutap nugol ku-numup o,” age-nilipta, finan-bom meng abiip Babilon umi mep so tolomip binim, unanbu yang simanim kugol bom-nilipta,  
\v 16 bogo-nilip e, “Kwiin. Babilon kasel so umtal kup daalip kubei. Babilon kasel iyo ilim namaal tambal so ilim isagulut tambal so uta kup tii-bom-nilip e minte, ket kon boyo gol so tuum titup fukolin so samaal so umi kulu telela kosip uyo tii bom no kem-nuubip kuta,  
\v 17 kanupmin mufekmufek boyo maak fagalin tap binimanepmu o,” agan-kalon-temip ko.  
\p Kale kanubelu e, alugum tinum sip umi duuk tubulin so minte, unang tinum, sip tem unum o agan-bilip isino sip tem ogok kemin tinum isino bisnis kemin tinum mufekmufek kwaalip sip tem unemin tinum so iyo alugum unanbu yang simanim kal mo-bomta,  
\v 18 utamipta, at tum fakam daalu boyo abiip afaligen uyo ken taban-bo kalaa age-nilipta, fomtuup ol-bom-nilip e, “Kek kek tinum imi abiip maak maak umaak kanupmin abiip afalik Babilon kulutap umaak albaalu binim o,” agan-kalon-temip kale,  
\v 19 tinum ninggil bilip iyo aget tem iluum afalik kup tebepmuta, ame-bom bogo-nilip e, “Kwiin Babilon kasel so umtal kup daalip kubei,” age-nilip e minte, “Numi sip tem ilep mufekmufek kulep tal Babilon kutam to-bom-nulup mani kwaa-bom win so ke-bulup ko so maak fagalin tap ken tebelu bulup man kelup kubei,” agan-kalon-temip ko.   
\p
\v 20 Kale kam agan-kalon-temip kuta, abiil tigiin kasel so Yesus imi kalaan tinum so God imi profet ko age weng kem baga-emin tinum so, minte God imi unang tinum migik so ibaa. Jon niyo ilam duluun ilep mufekmufek ko mitam tolon-temu bomi utabi uyo ki, kanube kamano kota God iyo tebe Babilon kasel tebe-nilip ibo aa-bilip kaanan-nuubip umi kalan uta abiip Babilon uyo kufak daala binimanan-temu kale, ibo bomi deng uyo tebemin a.   
\p
\v 21 Kale ensel titil tebesa ita tuum afalik iluum tebesu uyo kufo kwaala unanbu daak yol ok kumun tem iinu e, bogo-nala e, “Kanube tuum ko kufo kwaali unu kulutap ke waasi iyo tal-nilipta, abiip afalik Babilon umi tuum am afalik boyo dalata belelalip malaak abe binimanan-temu kale, dogonubeta asok abiip boyo telela kolip utaman-temaalip binim ko.  
\v 22 Kale tinum iyo maak Babilon kasel imi biingbuung ko age gitaa weng so fongket weng so bigul weng so aseng so umaak tolong dolan-temaalip binim e minte, Babilon kutam uyo tinum mufekmufek telelmin kuguup dagaa kusip iyo mufekmufek tambal uyo maak so telela-bilip kalaa agelan-temaalip binim e minte, Babilon kasel unang imi tuum kulu wiit te-bilip flawa ke-bo umi biileng umaak tolong dolan-temaalip binim e minte,  
\v 23 Babilon kutam umi ilaam dong umaak kefo-bulu utaman-temaalip e minte, Babilon umi tinum unang kula, unang tinum dulu kelip imi deng taban-bilip umaak tolong dolan-temaalip binim, atin dumeng age kupkalan-temu ko. Kale kanube Babilon umi bisnis kemin tinum bilip iyo mani afalik waafulin tinum kale, bilip iyo mani umi titil diim kal bom-nilipta, kafin kaa kutufosu komi tinum iyo kubaganip imkasip kale, Babilon kasel iyo bisop bagamin kuguup uta ke-bilipta, kafin kaa kutufosu komi unang tinum imi aget uyo dupkopmuta, ilep tambal uyo kupkaa yang asit abe Babilon kasel imi kuguup mafak uta kemsip o,” age ensel iyo kam agan-kala ko.   
\p
\v 24 Kale kanube God iyo utamata e, Babilon kasel iyo tebe nimi profet ko age weng kem baga-emin tinum so e minte nimi unang tinum migik sino yak abiip maak maak mep so simaan so kwiin tagang albip so iyo an tebesip kalaa age-nalata, God iyo tebe kaal fuyabok boyo kobelan-tema ko.   
\c 19  
\s1 Abiil tigiin kasel imi utamipta, God tebe abiip Babilon binimanu kupkala kalaa age-nilip deng tebemsip uta ko  
\sr (Rev 14:8, 16:19, 17:1-18, 18:1-24)  
\p
\v 1 Kale kanube ensel imi weng uyo binimanu e, Jon niyo tolong dolita, abiil tigiin ilota biileng afalik tulu uyo ki, unang tinum kwiin tagang iyo deng tebe-bom aseng kwaa-bom bogo-nilip e, “Nugumal ibaa. God imi win kufu-emum a. God iyo imi unang tinum iyo dong dogobe imi ilim bo-emin ogok boyo binimanu kupka-nala e, beyo atin titil kup tebesa tinum kale, imi titil diim ilep alugum mufekmufek uyo tiin mo-nala e minte,  
\v 2 imi alugum kuguup boyo atin tambal e minte, fen tuluun tol kup tebesu no kale, unang sa dagamin ko age abiip Babilon uta tebe-nulu e, sa dagamin kuguup so minte kuguup mafak migik migik sino uyo kafin kaa kutufosu komi unang tinum iyo kafalebe-nulu e, imi aget fugunin uyo kufak daabe no ke-nuluta, God imi ogok kemin tinum iyo anolu kaan no kelip kalaa age-nalata, God iyo tebe yega dobe-nala e minte, kaal fuyabok boyo kobe no kela o,” agan-bom-nilip e minte,  
\v 3 asok aseng maak kufo fomtuup kwaa-bom-nilip e, “Ninggil mangkal nuyo maak so God imi win kufu-emum o ageta kale, God iyo waasi iyo bogobelata, abiip afalik Babilon uyo kwegalip ken taban-bo kale, umi at tum uyo suun kup tam iinemu kale, Babilon kasel iyo kuguup mafak uyo maak so unang tinum iyo kopman-temaalu binim o,” agan-bom deng taban-bilip kalaa ageli ko.  
\v 4 Kale God imi ton-bom alugum imi tiin mo-boma umi baan diim kal ton-balata, kamogimal ilimi kup 24 sino e minte God imi mufekmufek tinum ke dimduum ke kelin kalbinim isino iyo unang tinum imi weng tinangku-nilipta, isiik God imi miit kun diim kugol katuun duung fegela ulotu ke-e-bom imi deng uyo tebe-bom bogobe-nilip e, “Bilip imi weng boyo fen tuluun weng kale, nugol mungkup God imi win uyo kufu-emum o,” agan-kalip ko.   
\p
\v 5 Kale tinum God imi tonamin umi baan diim mep so alba iyo bogo-nala e, “Alugum God imi ogok ke-emin tinum iso alugum God imi weng tolong do waafuu no kelin unang tinum win tibin so iip kugol man God imi weng waafulin iso ibaa. Numi God bemi win uyo kufu-e-bom, ‘Misam o,’ agan-bom no kemum o,” agan-kala ko.   
\s1 Son-temu nala Sipsip Man imi unang digin kelan-tema uta, alugum iyo iman tigi-bom deng tebeman-temip umi sang uta ko  
\sr (Ef 5:25-27,32, Rev 21:2-4,9-10, 22:17)  
\p
\v 6 Kale Jon niyo tolong dolita, biileng maak tulu boyo unang tinum kwiin tagang ita aseng kwan-bilip kalaa ageli kale, aseng bomi biileng uyo ki, ok fon umi biileng afalik uunbu ulutap e minte, umi biileng uyo tumuun biginkabu ulutap no kale, aseng kwek uyo bogo-nilip e, “Mangkal ninggil nuyo God imi win kufu-e-bom, imi deng tebemum o ageta kale, numi Bisel God beyo titil magam kayaak e minte, beta kup alugum mufekmufek komi dubom no kale,  
\v 7 nuyo bemi deng uyo tebe-bom imi win uyo kufu-e-bom bogo-nulup e, ‘Beyo kwiin kiim e minte, afaligen titil so no o,’ agan-kulum o ageta kale, bomi magam uyo dok uta ba kale, am kanum tulu kota, Sipsip Man Yesus iyo bogo-nala, ‘Alugum Kristen unang tinum iyo tinum miit maagup kesu kale, boyo nimi kalel kale, kwep tal nimi am daa tiin molan-temi o,’ agelata, unang bogal telela-bom fen-bo ko.  
\v 8 Kale God iyo ilim namaal tambal dong tebesu uyo unang bomi kobela migilu o,” age unang tinum kwiin tagang iyo aseng uyo kwaamip kale, unang o agelip boyo felep yak Yesus imi unang tinum imi diim to-nilip e minte, umi ilim namaal o agelip bota minte felep yak Yesus imi unang tinum imi kuguup tambal kemin umi diim to no kelip ko.   
\p
\v 9 Kale siin ensel bogopneba iyo asok bogopne-nala e, “Weng koyo suuk kon tem dola kolal o,” age-nala e, “Weng koyo God imi weng fen tuluun weng bogopnelata, kopkeli kale, imi weng boyo tuluun weng ko. Kale God iyo bogo-nala, ‘Waantap ita olabeli mitam tala tala ke-bom Sipsip Man, unang kulan o agan-be iyo atamip ton-bom iman tigi-bom unan-bom deng tebemip umdii, bilip ita abiin tambal tonan-temip o,’ age God iyo kam agela o,” age ensel iyo bogopnela ko.   
\p
\v 10 Kale niyo ensel ilami miit tem kugol imi deng uyo tebe-bom aman duga-eman o age-nilita, daak katuun duung fegela-silita, ensel iyo bogopne-nala e, “Umbae. Kabo nimi deng uyo tebe-bom aman duganemin ba kale, God maagup imi deng uta kup tebe-bom aman duga-emin o,” age-nala e, bogopne-nala e, “Kapsino kapmi kapkumal Kristen ke Yesus imi tuluun weng uyo waafu-bom titil faga-bom baga-em-nuubip isino ibo God imi bon tem kiit fenin unang tinum kale minte, nagal mungkup ulutap God imi bon tem kiit fenin tinum no kale, kabo nimi deng tebe-bom aman duganemin ba o,” agela ko.  
\p Kale fen Yesus imi tuluun weng kupkem daa-se ugol, minte sugamiyok God imi weng profet imi diim bogobela suuk kon tem dolasip ugol no weng alop bomi magam uyo maagup ko.   
\s1 Krais imi mitam hos namaal umi daang kun diim ton tisa uta ko  
\sr (Rev 1:12-18, 2:8,12,16,18, 3:1,7,14, 6:2, 17:14, 21:6, 22:13,16)  
\p
\v 11 Kale niyo utamita, abiil tigiin uyo tem kalo kolu e, hos namaal maak mitam tulu kalaa ageli kale, bomi daang kun diim tinum tonba bemi sang uyo bogo-nilip e, “Tinum beyo imi weng kwep daa, ‘Kanubelan-temi o,’ agela uyo uk kugan kolan-temaala binim kale, suun kanu-bom-nala e minte, fen tuluun weng uta kup baga-bom no ke-boma o,” agan-nuubip kale, kanube unang tinum imi im-kuguman-tema so waasi dinan-kalon-tema so uyo, bemi aget fugunin uyo, bilip iyo tol kuguup uta kup kanumin o age-nalata, suun kup im-kuguman-tema ko.  
\v 12 Kale bemi tiin uyo at dong ulutap e minte, ita kup alugum king imi dubom kale, beta king imi dufalum tagang uyo kulep iit dubom diim kal kwaak kali-nala e minte, imi win kaal diim dolebebip uyo bantap win kale, dogonubeta alugum iyo utam-nimip binim kale, maagup beta kup utamsa kuta,  
\v 13 imi win unang tinum imi utamsip uyo ki, God imi Weng ko age Krais e minte, waasi imi isak uta tebe imi ilim uyo isak foga kolu migi abe-balata minte,  
\v 14 abiil tigiin tinum waasi dinan-kalin iyo mitam abe-nilip e, tam hos namaal migik umi daang kun diim ton-nilip e, tinum una bemi daang begebelip unip kale, bilip iyo ilami okumop man waasi tebe inolip kaan-silip ita kale, God imi itamata, bilip iyo atin tinum tambal kelip kalaa age-nala ilim namaal kobeba uta migi unip ko.  
\v 15 Kale bemi weng uyo benat ko age un kong atul tebesu ulutap kale, imi titil uta uta ke kafin kaa kutufosu komi tinum miit maak maak iyo kun kulube ita ita ke kubaganip imka-nala e, yagal tiin mo-nala e, ilami kuguup sino weng sino uta kup waafuu abo dulu kwep tebe bom-bilipta o agelan-tema ko. Kale God imi Weng ko age Krais iyo tebe imi waasi iyo kaal fuyap kiim uyo kobelan-tema kale, Krais beyo sok ilang kayaak imi ogok kemin tinum imi sok dum umi diim yaan tamana-bilip bii, sok dum ok uyo alugum mitam e tulu kalaa age kup-kagabip ulutap ke bilip iyo kaal fuyabok kupka-e-bala utama-bilipta bii, God titil magam kayaak imi olsak afalik uyo biniman-temu ko.  
\v 16 Kale imi ilim diim so imi ung kun diim so uyo dola bogo-nilip e, “Keyo alugum kamogimal imi kamogim e minte, keyo tinum afalik afalik imi kamok miton no o,” age dola kosip ko.   
\p
\v 17 Kale niyo atamita, ensel maak ataan tip diim kal moba kalaa ageli kale, uun bisel bisel nuuk aa-bom unan-kalin uun imi iip kwek-tele fufalam tiinan-bilip bilip iyo ensel beyo tebe fomtuup bogobe-nala e, “God iyo iman afalik tigi-eman o agan-be kale, ninggil ibo tala tala ke-nilipta,  
\v 18 tinum kaanip imi diim uyo ugaa ku unelin o,” agela uyo ki, “Uun ibo daak waasi imi king sino, waasi dinan-kalin imi kamogimal sino waasi dinan-kalin tinum so minte, waasi imi kong hos so tinum hos imi daang kun diim tonbip so, tinum mani ogok tubulin sino tinum sok de imolip bisop tinum maak imi ogok tubulin tinum sino, tinum win tibin sino tinum win binim sino imi diim uta uga-bom unan-bilipta, binimanuk o,” agela ko.   
\p
\v 19 Kale niyo itamita, yol ok kumun tem umi dimduum e minte, sinik mafak imi kafin kaa kutufosu komi kamok kamok ko age king so imi waasi dinan-kalin tinum afeta-bilip isino ita, waasi kong hos daang kun diim tonba isino imi waasi dinan-kalin tinum sino iyo dinan-kulum o age telela-bilip kalaa ageli ko.  
\v 20 Kale Krais hos daang kun diim tonba iyo yol ok kumun tem umi dimduum iyo aafuu sok de do som-nala e minte, kafin tem umi dimduum ko age bisop bagamin profet iyo aafuu no ke sok de imola alop iyo kaanin-tem bom-bilip e, imdala unanbu daak suun at kenamin umi tem kulaak iinip ko. Kale suun at kenamin boyo tuum naam uyo mimin fuu-bom mangan-nuluta, dela daak ok muk ibolin tap ke-nuluta, kulagal suun kup at kena-bom tang mafak kuun-bom ke-bomu kale, bomi iibak tem kulagal nan-temip ko. Kale bisop bagamin profet beyo yol ok kumun tem umi dimduum imi ogok ke-emin tinum ita kale, yol ok kumun tem umi dimduum iyo imi titil kiim uyo kobela uyo, imi tiin diim kal bom-nalata, iyo mirakel ko age kuguup ugulumi migik migik ke-bom bisop weng baga-bom no ke-balata, unang tinum kwiin tagang iyo imi weng boyo tinangka-bom-nilip e, ilep tol uyo kupkaa yang asit abe fengamip kale, yol ok kumun tem umi dimduum imi namba ko age win felep yak ku tosu uyo tibit kun diim dola-silip kale, imi sinik telela kwep daasip umi deng uta tebe-bom aman duga-emsip ko.  
\v 21 Kale Krais hos namaal daang kun diim tonba bemi weng uyo benat ko age un kong ulutap atin atul kup tebesu kale, yol ok kumun tem umi dimduum so bisop bagamin profet so imi waasi dinan-kalin tinum so iyo Krais iyo tebe ilami weng tuup anola kaanipta, bilip imi diim uyo uun dimduum unan-kalin ita tebe bisil kup tebe-bomta unan-bilipta bii, mat bigin kulalip ko.   
\c 20  
\s1 Ensel tebe Saatan iyo sok de dola bii, atol ulumi kup wan tausen (1,000) dakan kesa uta ko  
\sr (Rev 11:15, 12:5,10)  
\p
\v 1 Kelip e, kota Jon niyo utamita, ensel maak abiil tigiin ilo tala bemi sagaal diim uyo kafin umi tem kiim kalo kosu umi faal umi kii so minte ain sok ko age sen iluum kup tebesu kuso waafuba kalaa ageli kale,  
\v 2-3 inap kiim sugamiyok God imi waasi ke-bom God imi unang tinum imi weng mafak baga-e-bom kem titin-e-bii-se Saatan iyo aafuu sen tuup sok de do daala unanbu daak kafin umi tem kiim kalo kosu kulaak iina e, faal uyo ilobe fomtuup nagat mobe dupkalata, waantap ita faal bitobe-nama binim kela e, Saatan iyo kulagal bom-balata bii, atol ulumi kup wan tausen (1,000) komi dakan kelan-tema kwek uyo, iyo dogonubeta mitamta kafin kaa kutufosu komi unang tinum iyo bisop baga-e-bom ifak daga-bom keman-temaala binim bii, atol ulumi kup wan tausen (1,000) koyo dakan kela binimanan-temu kota, God iyo bogobelata, asok talaa daalipta, mitam abe tiinan-siit ilugolan-tema ko.   
\p
\v 4 Kale niyo Yesus imi unang tinum inolip kaanan unsip imi sinik iyo itami kale, tinum kaansip bilip iyo Yesus imi tuluun weng kupkem daabesa so God imi weng sino uyo dital faga-bom kwep yang ipkumal migik iyo fomtuup baga-e-bom kafale-bom kemsip kale, bilip iyo yol ok kumun tem umi dimduum so dimduum imi sinik telela kwep daasip so iyo aman duga-emsaalip binim e minte, imkalip dimduum imi ogok kemin iyo tebe imi namba ko age win felep yak ku tosu uyo tibit kun diim so sagaal diim so dolasaalip binim no kale, bomi kalan uta Yesus imi waasi iyo tebe-nilip e, kaabak ku Yesus imi unang tinum imi dubom ukan kebesip kuta, God iyo ifola fen tigi molipta, iyo titil kobe-nalata, “Ipta unang tinum tiin molin o,” age-nala e minte, “Yesus Krais isino ipso ibo unang tinum iyo tiin mo-bilip bii, atol ulumi kup wan tausen (1,000) koyo dakan keluk o,” age no kelata, niyo asok itamita, iyo king imi tonamin baan diim uyo tonbip kalaa ageli ko.  
\v 5-6 Kale alugum unang tinum kaan-silip imi iibak tem uyo Yesus imi ilak uyo dobip kalaa age-nilip anolip kaansip ita God iyo tebe kamaki uyo ifola fen tigi molan-temip kale, unang tinum bilip iyo God ilami unang tinum aligaap kebesip ita kale, bilip iyo kaal binim kelan-temip kale, bilip iyo yak suun at kenan-bomu umi tem umaak iinom amiit kaan atin binimanan-temaalip binim kale, bilip iyo God so Krais so ulim ilimi pris ko age unang tinum amem kebe-bom ulim imi ogok uta kup ke-bilip e, iso Krais isino iyo kafin kaa kutufosu komi unang tinum iyo tiin mo-bilipta bii, atol ulumi kup wan tausen (1,000) koyo dakan kelan-temip ko. Kale ipkumal milii kaansip ita kafin tem kugol bom-bilip bii, atol ulumi kup wan tausen (1,000) boyo dakan kelip binimanuta, kota igil fen tigi mo no kelan-temip ko.   
\s1 God imi tebe Saatan ang kugan kelan-tema umi sang uta ko  
\sr (Mat 7:21-23, 25:41, Rev 11:7, 12:3-4,7-18, 13:2,4, 16:13-14, 17:7-8, 20:1-3)  
\p
\v 7 Kale kanube atol ulumi kup wan tausen (1,000) komi dakan kela binimanan-temu kota, ensel iyo kafin umi tem kiim kulaak Saatan alba umi faal uyo bitobe-nala e minte, sok talaa daa no kebelata, mitam e tolon-tema ko.  
\v 8 Kale mitam abe-nala e, kafin kaa kutufosu komi unang tinum iyo bisop baga-e-bom ifak daga-bilita, nimi aget uyo kop-namin o age-nalata, bisop baga-em tiineman-tema kale, God imi ilak dolin binim unang tinum milii kulip imi win uyo, Gok kasel o agan-bom-nilip e minte, tinum milii maak imi win uta, Magok kasel o agan-bom no kem-nuubip kale, Saatan iyo tebe, tinum miit alop kulip iyo kwego dego ke alugum afeta kolita, God imi tinum sino dinan-kulum o agelan-temip kale, tinum miit alop bilip imi tinum iyo ki kwiin tagang kale, yol ok umi ok diniing tem ulutap kale, dogobeta tiki-namap binim kale,  
\v 9 bilip iyo segela tebe kafin kaa kutufosu koyo bugu-bii kupkalan-temip kale, mungkup God imi abiip afalik aget kobe-boma Jerusalam kutam kal imi unang tinum iyo alugum afeta-bom waasi bilip imi fen-bilipta, waasi bilip iyo nota falala-bii ko-nulupta, aamum o age fiko tal bigilan-temip kuta, God yagal tebe abiil tigiin ilota at dong kwaala malaak-nuluta, alugum bilip iyo fuulu ken tebe binimanan-temip ko.  
\v 10 Kale Krais iyo tebe tinum kulip imi bisop baga-emin tinum Saatan iyo daala unanbu daak suun at kenamin umi tem kulaak iinon-tema kale, siin yol ok kumun tem umi dimduum so e minte kafin tem umi dimduum ko age bisop bagamin profet iso Krais tebe imdala unanbu daak kafin tem iin-silip alop iso Saatan so ninggil bilip iyo kulagal bom kaal fuyabok afalik uyo daanin so mililep so uyo ogen man figilip uyo utama-bom suun kup nan-temip kale, suun at kenamin boyo, tuum naam uyo mimin fuu-bom mangan-nuluta, dela daak abe-bom-nuluta, ok muk ibolin tap ke-nuluta, kulagal suun kup at kena-bom tang mafak uyo kuun-bom no ke-bomu kale, bomi iibak tem kulagal Saatan ulimal iyo nan-temip ko.   
\s1 God imi afung afung yega dopman-tema uta ko  
\sr (Mat 25:31-46, Rom 2:1-16, 2 Tes 1:7-10, 2:3-12, Rev 14:9-11,14-20, 16:1-20, 22:12)  
\p
\v 11 Kale niyo utamita, God iyo ilami baan diim kugol tonba kalaa ageli kale, imi tonamin baan diim boyo kwiin kiim e minte namaal no kale, kugol ton-bomta imi weng uta bagam-salata, kafin sino abiil sino koyo bubat mo maagalo keluta, dogonubeta maak so utam-nimip binim kelip ko.  
\v 12 Kale niyo utamita, unang tinum kaansip imi fenin-tem albip bilip iyo tinum win so so e minte tinum win binim iip kugol man sino imi kaansip ita kalaa ageli e, alugum iyo no God imi tibit diim kugol molip e, God imi suuk kon iip maak maak umi tem kwek uyo tinum imi kuguup tambal so mafak so kanum-nuubip uyo kwegal dolam-nuuba kale, ensel iyo suuk kon boyo bam daa kulep to-nilip e minte, suuk kon maak God tebe unang tinum suun nan-temip imi win dolasa uyo bam daa kwep daa no kelip e, kota God iyo tinum imi kuguup kanu-bii kaansip umi sang uyo fomtuup utafi-bom tiki-e-bom-nalata, imi kuguup kanum-nuubip uta tii-e-bom yan kebe yan kebe kema ko.  
\v 13 Kale tinum yol ok tebe mimilepmu kaansip iyo asok fen tigi mo yol ok kumun tem uyo kupkaa mitam tamip e minte, tinum abiip kal kaana-bala sep kal kaana-bala kem unsip iyo asok fen tigi mo begel am uyo kupkaa mitam tal no kelip e, iyo mangkal ninggil kwego dego ke-nilip e, God imi tibit diim kal molip e, God iyo tebe imi kuguup kanu-bii kupkaa kaansip umi sang uyo fomtuup utama-bom tiki-e-bom-nalata, imi kuguup kanum-nuubip uta tii-e-bom yan kebe yan kebe kema ko.  
\v 14 Kale ensel iyo kaanamin umi ilep sino kaanamin abiip sino uyo alula kwaala daak ok muk ibolin tap ke-bom suun at kenan-bomu umi tem iinom binimanu kalaa ageli kale, daak suun at kenamin umi tem iinemin boyo amiit kaan atin binimanamin uyo kulbu ko.  
\v 15 Kale God imi yega duga-eman-tema boyo, unang tinum waantap ita imi win uyo God imi suun nin unang tinum kelan-temip imi suuk kon tem kwek uyo albaalu kalaa agela umdii, bilip iyo alula kulala daak suun at kenamin umi tem iinon-temip ko.   
\c 21  
\s1 God imi abiil so kafin so migik telelalan-tema uta ko  
\sr (1 Tes 5:1-11, Hib 11:16, 12:22-24, 2 Fit 3:8-16, Rev 3:12, 20:7-15, 21:9-22:5)  
\p
\v 1 Kale Jon niyo asok ilam maak dobi boyo utamita, siin umi kafin sino abiil so yol ok so telela kola bii dusabansu kosiik bubat mo maagalo kelu e, kamaa umi kafin sino abiil so telela kola uta mitam umi abiin uyo kulu kalaa age utam-nili e,  
\v 2 minte mungkup utamita, siin umi abiip Jerusalam uyo bubat mo maagalo kelu e, God ilami kamaa abiip Jerusalam uyo abiil tigiin ilo kwep malaak kafin diim daala siin umi abiip umi abiin uyo kulu kalaa ageta utamita, kamaa abiip boyo atin tambal kup ke ket kon tiibe kupkalip kale, boyo unang, ilim tambal tii-nulu tinum digin kelan o age imak fenbu ulutap ke kamaa abiip Jerusalam kasel iyo Yesus imi tolon-tema uta fen-bilip kalaa ageta  
\v 3 tolong dolita e, tinum God imi tonamin baan diim mep so alba beyo weng bagan-be kalaa ageta tolong dolita, bogo-nala e, “Ibaa. Tinangku-silipta. Kamano kaa tubup koyo, God iyo ilami unang tinum so bom tam tam taba kale, iyo imi iibak tem kal suun bom tiin molata, unang tinum iyo te imi afak tem iinipta minte, ita imi God kebe-nalata, tiin molan-tema ko.  
\v 4 Kale God iyo tebe-nala e, mufekmufek mafak tal unang tinum imi diim aban-nuubu uyo alugum kupkan kebelan-tema uyo, maak so aget iluum uyo tebepman-temaalu e minte, ameman-temaalip no kale, kafin dusabansu komi mufekmufek mafak uyo binimanan-temu kale, kaanamin so kaal fuyabok kuso aget ilumok so amemin so umaak mitam tolon-temaalu binim, boyo ki alugum atin binimanan-temu o,” agan-kala ko.   
\p
\v 5 Kale God iyo ilami baan diim kal ton-bom weng maak bogo-nala e, “Ibaa. Tinangku-silipta. Kamano kota niyo alugum mufekmufek boyo telela koli migik kelan o angbu o,” age-nala e minte, iyo fupkela nimi bogopne-nala e, “Weng kaa tinangkulap boyo fen tuluun weng kale, kabo utamapta, alugum bilip iyo bogobelap tolong do-nilip utamipta e, fen kalaa agelan-temip kalaa age-nalapta, tinum bemi weng boyo kwep yak suuk kon tem kal dola kolal o,” age-nala e,  
\v 6 asok bogopne-nala e, “Nimi, ‘Boyo kanubelan-temi o,’ age-sii boyo alugum kanube binimanu kupkali kale, sugamiyok uyo niyo bii-sii e minte, kamano koyo albi e minte, biilan-temu uyo, nan-temi no kale, maagup nita kup alugum mufekmufek magam kayaak e minte, nita kup alugum mufekmufek uyo afung afung telela koli binimanu kupkalan-temi e minte, nita kup suun kup nan-temi no ko. Kale waantap ita ok tep tebebebu umdii, nita suun nin umi ok miit kayaak kale, nita ila-e-bili unan-kalon-temip boyo molan-temaalip binim kale, misiim niyo kuga-e-bili unan-kalin kup ke-bom suun nan-temip ko.  
\v 7 Kale waantap ita, ita ita ke Saatan iyo kubagana dupka-nilip e, dital fagaa nimi kuguup uyo waafulin kup bii-nilip kaanip umdii, nimi kanubelan-temi uyo kulbu kale, nita imi God kebeli e minte, ita nimi man aligaap kepne no kelan-temip kuta minte,   
\m
\v 8 waantap ita fitom tebe-bom e minte, finan-bom no ke-bom nimi weng uyo unang tinum iyo baga-emin binim kema min,  
\m waantap ita, God imi aget fugunin tambal uyo waafulaali o age umik ugobela min,  
\m waantap ita kuguup mafak waafu-bom ban dugama min,  
\m waantap ita tinum aama min,  
\m waantap ita sa dagama min,  
\m waantap ita ok kikit ifol-bom timon daga-bom bil duga-bom no kema min,  
\m waantap ita men amem so mufekmufek umi sinik telela kosip so umi deng uyo tebe-bom aman duga-ema min, waantap ita weng bisop baga-ema umdii,  
\m nita bilip imi abiip uyo telele-bii kale, imdali unanbu daak ok muk ibolin tap ke-bom suun at kena-bom tang mafak kup kuun-bomu umi tem kulaak iinom binimanan-temip boyo amiit kaan atin binimanamin uyo kulbu o,” age God iyo bogopnela ko.   
\s1 Kamaa abiip Jerusalam umi sang uta ko  
\sr (Hib 11:16, Rev 3:12, 21:1-7, 22:1-5)  
\p
\v 9 Kale ensel ban kal afungen tem umi kaal fuyabok kupka-eman-temip umi tet ban kal waafubip imi iibak tem ilota ensel maak tal bogopne-nala e, “Talapta, niyo unang Sipsip Man Yesus tebe kula imi kalel kelan-temu uyo kafalepkelan o,” agela ko.  
\v 10 Kale God imi Sinik iyo kafalne-balata, ilam uyo duga-bomta utamita, ensel beyo tal nimtamo unanbu tam amdu tigiin maak daala kalaa ageli e, ensel beyo kafalepnela utamita e, God ilami kamaa abiip Jerusalam uyo abiil tigiin ilo kwep malaak kafin diim daala kalaa ageli e, ensel iyo bogopne-nala e, “Kabaa. Mep abiip kutam uyo Sipsip Man imi kalel ulutap o,” agela ko.  
\v 11 Kale kanube boyo God iyo abiip Jerusalam kutam kal bom-balata, imi dong uta tebe atanim imi dong kek kwaala te yak am umi glas diim abe am kutam uyo alugum ilagenabu ulutap ke abiip boyo alugum ilagenu kupkala kale, abiip boyo tuum isagulut jaspa naman-bii kosip bomi bamalaang ulutap no ko.  
\v 12-13 Kale kanube abiip umi tuum daam fogosip boyo alaang kup tebesu e minte, timitim no kale, tuum daam boyo abiip uyo alugum falala kwek mosip kale, daam umi amitem uyo tuluun kal kale, magaang tem uyo amitem asuno kalo yakyak kem kwep tiinan-bii fufala kubak mosip kale, amitem tuluun kal uyo, ensel iyo amitem maagup tiin mola tiin mola kem unsip kale, umi tip diim kutam uyo win maak dolasip uyo Israel kasel imi tinum miit tuluun kal imi win uyo kubak daa kubak daa ke-bii kupkasip ko.  
\v 14 Kale daam umi afak tem uyo tuum afalik afalik ulumi kup tuluun kal kale, tuum bomi diim uyo win maak dolasip uyo Sipsip Man imi kalaan tinum tuluun kal imi win uta dola dola kesip kalaa age utami ko.  
\v 15 Kale ensel mo-bom nimi weng bagane-be beyo at daang ko age mufekmufek tiimin maak waafuba kale, boyo gol kulu mufekmufek tiimin boyo telela kosip kale, at daang boyo ku-nala e, abiip sino abiip daam so amitem so uyo tiila ko.  
\v 16 Kale abiip bomi magaang magaang kalbinim boyo kalbinim kano tiyuuk maagup kale, ensel iyo imi tiimin at daang uyo ku-nala e, abiip umi kiit iinemin uyo kubago som-nala e minte, abiip umi magaang magaang kalbinim uyo kubago no ke tiilata e, ogal boyo timitim maagup kale, umi timitim uyo kilomita ulumi kup 2,400 kelu kalaa agela kale,  
\v 17 daam boyo ambung telela ko fogosip kale, ensel iyo daam bomi ambung umi tiyuuk uyo tiilata e, mita ulumi kup 60 kelu kalaa agela kale, imi tiimin kuguup boyo kafin diim tinum numi tiimin kuguup ulutap ke-nalata, kanube tiila ko.   
\p
\v 18 Kale tuum daam fogosip boyo dong tambal tebesu e minte, tuum isagulut jaspa kale, abiip afalik boyo gol tambal uta kup kulu telela kolipta, atin tambal kup ke-nuluta, glas umi dong ulutap kesu ko.  
\v 19 Kale daam umi afak tem tuum afalik afalik tuluun kal boyo ket kon tambal ko age tuum migik tambal dong so uyo kulu-nilip e, kulep yak daam afak tem tuum diim kugol feba yakyak ke-bii kupkasip kale, boyo tuum ugulumi kaal migik migik dong tebesu tuum uta kup kulu feba yakyak kemsip kale,  
\m tuum maak uyo ki isagulut kale, bomi win uyo jaspa o agan-bom-nilip e minte,  
\m maak uta minte tuum ifuum kale, bomi win uyo sapaya o agan-bom,  
\m maak uta tuum dat ke namaal ke tuum kale, bomi win uyo aaget o agan-bom,  
\m minte maak bota tuum maak kaalasit komi win uta emeral o agan-bom,   
\m
\v 20 maak boyo tuum isagulut migik kale, bomi win uyo bogo-nilip, sadonikis o agan-bom,  
\m maak uta tuum isagulut migik kale, konilian o agan-bom,  
\m maak boyo tuum naam kale, bogo-nilip, krisolait o agan-bom,  
\m minte maak bota tuum kaalasit migik kale, beril o agan-bom, maak bota tuum naam migik kale, bogo-nilip, topas o agan-bom,  
\m maak boyo tuum kaalasit migik kale, bogo-nilip, krisopres o agan-bom,  
\m maak boyo tuum ifuum migik kale, bogo-nilip, hayasin o agan-bom,  
\m minte maak bota tuum ifuum migik kale, ametis o agan-bom no kem-nuubip ko.  
\v 21 Kale daam kutam umi amitem uyo tuluun kal kale, bomi amitung maagup maagup uyo tuum namaal titup biilasu kwiin kiim uta ku tem kalo kwek mo yakyak kesip kale, tuum bomi win uyo, pel o agan-nuubip kale minte, abiip kutam umi ilep tem unsip uyo tuum ko age gol tambal uyo dugu kulep tal itom abe-bom-nilipta, ilep uyo tem unsip kale, ilep bomi dong uyo glas umi dong ulutap ko.   
\p
\v 22 Kale niyo God imi abiip kutam uyo ulotu am umaak utamin-tem kale, boyo dok uta ba kale, alugum abiip kasel imi aget fugunin uyo, kanube Bisel God titil magam kayaak so e minte Sipsip Man Yesus so ulim iyo numi mep so kagal suun bomip boyo uta uta keluta minte, numi tam ulotu am umi ulotu kemin uyo kubaganuta, kupkasu kalaa age-nilipta, abiip kugol ulim imi ulotu uyo ke-e-bom bomip ko.  
\v 23 Kale God sino Sipsip Man sino ulim imi dong afalik uta tebe alugum abiip uyo kefo ilagen kupkaluta, abiip kasel iyo mufekmufek uyo tele utaman-temip kale, abiip boyo ataan binim, kayop binim kuta, abiip kasel iyo ulim imi dong diim ilep mufekmufek uyo tele utaman-temip ko.  
\v 24 Kale alugum kafin diim komi unang tinum iyo kota tele utam-nilipta, tiine-bom mufekmufek uyo ke-bom keman-temip kale minte, kafin kaa kutufosu komi kamogimal iyo, God imi deng uta tebemum o age-nilipta, mufekmufek tambal uyo kulep tal abiip faga-nilipta, God imi kuga-eman-temip ko.  
\v 25 Kale God imi yogon dong uyo kamaa umi kafin diim uyo maak kupkaluta, mililan nan-temaalu binim kale, suun kup ilagenin kup nan-temu kale, kwiina kota kafin diim komi abiip umi daam umi faal uyo ilo kupkan-nuubip kuta, God imi kamaa abiip bomi daam umi faal uyo iloman-temaalip binim kale, uyo suun kup faal bito-bom nan-temu ko.  
\v 26 Kale kafin kaa kutufosu komi abiip maak maak unang tinum iyo alugum, God imi deng uta tebemum o age-nilipta, mufekmufek tambal kwiin kiim so kangkang so kwiin tagang uyo kulep tal abiip faga-nilipta, God imi kuga-eman-temip kale,  
\v 27 iyo mufekmufek mafak umaak kwep mitam abiip boyo mitam tolon-temaalip binim e minte, kuguup mafak waafu-bom bisop baga-bom kemin unang tinum iyo tam abiip boyo tam unon-temaalip binim no kale, tol kup tebesip unang tinum imi win uyo Sipsip Man imi suuk kon tem dolebesa ita kup tam-nilip e, isino suun nan-temip ko.   
\c 22  
\s1 Suun nin umi ok so at so umi sang uta ko  
\sr (Jon 4:10-14, 7:37-39, Rev 2:7, 7:17, 21:4,6, 22:14,17,19)  
\p
\v 1-2 Kale ensel iyo Jon nimi kafalepnelata, utamita, suun nin umi ok uyo iliip tem umi ok kale, God sino Sipsip Man Yesus sino ulim imi tonamin baan diim umi afak tem ku-tele fogo kulalu tam abiip ilep miton kutop-tele abe unu kale, ok bomi iibak tem uyo webaal kup sigin-bii kota fen kem am umi glas ulutap kale, unang tinum iyo waantap ita ok bo unan-kalon-temip iyo suun nan-temip e minte, yak ok milii so mek milii so ok magaang tem umi suun nin umi at mobu boyo dum abubu kale, umi abumin uyo abumin ulumi kup tuluun kal fagalu e, atol uyo dakan ke yakyak kemin kale, boyo maagup abulu e, kayop maagup ke yakyak kemin no kale, unang tinum waantap ita tal at dum bomi dagaa ku unelan-temip iyo suun nan-temip ko. Kale alugum kafin kaa kutufosu komi tinum miit maak maak iyo suun nin umi at bomi kon uyo marasin ulutap kalaa age-nilipta, unan-nuubip kale, uta dong daga-e-buluta, imi dam sino aget fugunin so uyo mafak binim, tambaliim kup nan-temip ko.  
\v 3 Kale God iyo mufekmufek so tinum unang so iyo maak, “Waago. Ibo mafak o,” agelan-tema iyo mitam God imi abiip uyo mitam tolon-temaalip binim ko.  
\p Kale kamaa Jerusalam boyo God so Sipsip Man so ulim imi ton-bom kamaa kafin telela kola mitam tolon-temu umi alugum tiin molan-temip umi baan diim uyo kulbu ko. Kale God ilami unang tinum kutam iyo alugum God imi ulotu uta ke-e-bom-nilip e,  
\v 4 kota bilip iyo God imi tibit kun umdii utaman-temip kale minte, God imi aget fugunin uyo, kek kek iyo itamipta, God ilami unang tinum kalaa agelin o age-nalata, ensel iyo bogobelata, igil God imi win uyo God ilami unang tinum imi tibit kun diim kal dolebelan-temip ko.  
\v 5 Kale God imi dong kiim uta ilagen kupkaluta, maak so mililanan-temaalu binim keluta, iyo tele alugum mufekmufek utaman-temip uyo, ilaam dong binim, ataan dong binim keluta, imi tiinemin tonamin uyo, kamok king ilitap ke-nilipta, suun kup suun kup tambaliim nan-temip ko.   
\s1 Yesus imi bogo-nala, “Asok mep so tolon-temi o,” agesa uta ko  
\sr (Mat 24:29-31, Mak 13:24-27, Luk 21:25-28, 1 Tes 4:13-5:11, 2 Tes 2:1-4, 2 Fit 3:8-16, Rev 1:7)  
\p
\v 6 Kale ensel iyo bogopne-nala e, “Suuk kon tem weng kaa bagan-bo koyo fen tuluun weng kale, alugum iyo boyo tinangku, aafen kalaa agelin o ageta kale, Bisel God iyo imi Sinik Tambal iyo daala no Yesus imi profet ko age weng kem baga-emin tinum imi dong dogobelata bole, God imi weng uyo baga-em-nuubip kale, mungkup kamano kota God ilami ensel niyo nimdala talta ilami ilak dolin unang tinum iyo bogobe-nili e, ‘Kanupmin mufekmufek uyo, kota mitam tolon o angbu o,’ age-nilita, kafalem tili ko.  
\v 7 Kale tolong dolin. Kamogim Yesus iyo bogo-nala, ‘Niyo asok mep so tolon-temi o,’ agan-be o,” age ensel iyo bogopnela ko. Kale ibaa. Waantap ita God imi weng bogo-nala, “Kanupmin mufekmufek boyo mitam tolon-temu o,” agela suuk kon tem kaa dola koli koyo tolong do waafula umdii, beta tambaliim kup nan-tema ko.   
\p
\v 8 Kale niyo Jon nita kale, nagal alugum weng boyo tolong do-nili e minte, alugum mufekmufek boyo ensel iyo kafalepnela utam no ke-nili e, kota alugum boyo binimanu kalaa age-nili e, niyo ensel ilami miit tem kugol imi deng uyo tebe-bom aman duga-eman o age-nilita, daak katuun duung fegela-silita,  
\v 9 iyo bogopne-nala e, “Umbae. Kabo nimi deng uyo tebe-bom aman duganemin ba kale, God maagup imi deng uta kup tebe-bom aman duga-emin o,” age-nala e, bogopne-nala e, “Kapsino kapmi kapkumal profet ko age God imi weng kem baga-emin tinum sino waantap ita suuk kon tem weng kaa dola-balap boyo tolong do waafusip isino ibo God imi bon tem kiit fenin unang tinum kale minte, nagal mungkup ulutap God imi bon tem kiit fenin tinum no kale, kabo nimi deng uyo tebe-bom aman duganemin ba o,” age-nala e,  
\v 10 asok bogopne-nala e, “Alugum mufekmufek suuk kon tem ko dola kolap boyo, mep so abulan o agan-bo kale, mufekmufek, kanupman o agan-bo bomi sang boyo kubamin ba kale, kupkem daabe baga-e-balap alugum bilip iyo utamin o ageta ko.  
\v 11 Kale God iyo utamata, digibanu kalaa age-nalata, imkalata, alugum ilimi kanumin kanumin kuguup uyo ke-bom siit ilugolan-temip uta kale, waantap ita kuguup mafak uyo waafubip umdii, bilip iyo suun kup kuguup mafak uyo waafulan-temip e minte, waantap ita sa daga-bom uget taga-bom kemip umdii, bilip iyo suun kanuman-temip e minte, waantap ita kuguup tambal kemip umdii, bilip iyo kuguup tambal uta kup keman-temip e minte, waantap ita God imi ilak dolin unang tinum umdii, igil mungkup God imi ilak uyo suun kup duga-bom no keman-temip o,” age ensel iyo bogopnela ko.   
\p
\v 12 Kale kota Yesus isiik bogo-nala e, “Ibaa. Tinangku-silipta. Asok niyo mep so tolon o agan-bii kale, nimi tolon-temi kota, nimi mufekmufek kobe kobe ke-e-bom yan kebelan-temi uyo ki, unang tinum imi kuguup tambal min, mafak min kanum-nuubip uta tii-e-bom yan kebe yakyak ke-eman-temi ko.  
\v 13 Kale sugamiyok uyo niyo bii-sii e minte, kamano koyo albi e minte, biilan-temu uyo, nan-temi no kale, nita kup alugum mufekmufek magam kayaak e minte, nita kup alugum mufekmufek uyo afung afung telela koli binimanu kupkalan-temi uyo nita kup e minte, nita kup suun kup nan-temi no ko.   
\p
\v 14 “Kale unang imi ilim suubalip tambaliim kup ke namalabu ulutap kale, kanube waantap ita ilimi kuguup mafak uyo kupkaa telela ko kuguup tambal uta kup waafulip umdii, boyo niyo imkali maagalo nimi abiip umi daam tem amitem ilep ku-tele mitam suun nin umi at dum uyo dagaa ku une-nilipta, tambaliim kup suun nan-temip ko.  
\v 15 Kuta minte niyo imkalita,  
\m tinum kuguup mafak waafu-bom ban dugamin so,  
\m tinum ok kikit ifol-bom timon daga-bom bil duga-bom no kemin so,  
\m sa dagamin unang tinum so,  
\m tinum aamin tinum so,  
\m tinum men amem so mufekmufek umi sinik telela kosip so umi deng uyo tebe-bom aman duga-emin so e minte, tinum suun weng bisop bagamin so bisop bagamin kuguup kanumin so  
\m iyo maak mitam nimi abiip uyo mitam tolon-temaalip kale, iyo tam sep kugol nan-temip ko.   
\p
\v 16 “Kale Yesus niyo King Devit imi man ilop kale, God iyo ulaa nimdula Devit imi abiin ku-sii kale, am kel diim biningok afaligen bigiduluup umi mitam molu boyo utamupta, am uyo, mep so daanan o angbu kalaa age-nuluta, mitam tulu kalaa angbup kale, ulutap nagal mungkup, nimi unang tinum abiip maak maak ko albip ibo bogobe-nili, ‘Alugum mufekmufek komi mitam migik kelan-temu uyo mep so tulu o,’ agelan o age-nilita, nimi ensel iyo daabeli tal ibo weng kem boyo baga-e-be o,” age Yesus iyo kam ageba ko.   
\p
\v 17 Kale God imi Sinik Tambal so, minte Yesus imi ilak dolin unang tinum miit maagup kelu ilami kalel kulin tap ke imdep ilami abiip unon-tema bilip iso bilip ita kale, bilip iyo Yesus imi bogobe-nilip e, “Kamogim kabaa. Yuut talaal o,” agan-bilip kale, mungkup ulutap alugum ibo waantap ita weng bo tolong dolip umdii, Yesus imi bogobe-nilip, “Kamogim kabaa. Yuut talaal o,” agelin o ageta ko.  
\p Kale alugum ibo waantap ita, ok tep tebebe del kalanganbu kalaa age suun nin umi ok bomaak unelum o agelip umdii, Yesus imi suun nin umi ok boyo molan-temaalip binim kale, yagal misiim kobelan-tema kale, tal ku-nilip unelin o ageta kale, bomi unelan-temip uyo suun kup nan-temip ko.   
\s1 Jon imi weng kaltem ke-emin weng afung afung uta ko  
\p
\v 18 Unang tinum ipmi tolong do bom-bilip suuk kon tem weng tiki-bilip tolong dugan-bilip ibaa. Ibo mufekmufek ko mitam tolon-temu bomi sang uyo tolong dugan-bilip kale, niyo Jon nita suuk kon tem boyo dola-bii kale, nimi weng koyo fomtuup weng bogobelan-temi kale, nimi weng koyo tolong do waafulin o ageta kale, waantap ita maak ilami aget fugunin weng migik umaak kwego som, suuk kon tem dola-bii umi weng kwek uyo kwego no ke-nala bisop baga-ema umdii, kanupmin kuguup boyo God ita yan kebe, “Kaal fuyabok migik migik mitam tolon-temu o,” agela suuk kon tem kaa dola-bii komi kaal fuyap kwego som, imi fengmin migik umi kaal fuyap uyo kwego no ke kobelata, ogen uyo umtal daalan-temip kuba.  
\v 19 Kale ulutap kale, waantap ita mufekmufek kanupman-temu bomi weng anung suuk kon tem dola-bii bomaak kupkan kelip umdii, God iyo tebe imi mufekmufek weng kwep daa, “Kobelan-temi o,” agesa uyo, “Kupkan kebelita, iyo mitam nimi suun abiip koyo nan-temaalip binim e minte, suun nin umi at umi dum uyo unan-kalon-temaalip binim no o,” agan-kala ko.   
\p
\v 20 Kale weng alugum ko dola-bii koyo Kamogim Yesus imi weng kale, ita kopnelata, ibo bogobeli kale, iyo bogo-nala e, “Boyo ki aafen tuluun weng kale, fen niyo mep so tolon-temi o,” age-nalata, Kamogim Yesus iyo kam ageba ko.  
\p Numi Kamogim Yesus kabaa. Baan talapta, katamum o agan-bulup kale, yuut talaal a.   
\p
\v 21 Kale Kamogim Yesus iyo God imi unang tinum ibo telele-bom tiin mo-balata, alugum tambaliim kup bom-bilipta o ageta ko.