\id EPH  
\h EFESIS 
\toc1 Fol imi Efesis kasel imi suuk kon dola kobesa uta ko 
\toc2 EFESIS 
\mt1 Fol imi Efesis kasel imi suuk kon dola kobesa uta ko  
\ib  
\ip \it Yesus iyo tam abiil tigiin unata, bii atol ulumi kup 32 kota binimanuta, Fol iyo suuk kon tem weng koyo Efesis kasel Kristen unang tinum imi dola kobe-nala e, imi duup Tikikus imi kobelata, kwep no kobesa ko. Fol iyo Yesus imi weng uyo kwep no abiip maak maak uyo baga-em tiine-balata, tinum Kristen kelin-tem kesip iyo tebe Fol iyo sok de do dep unanbu no abiip Rom umi kalabus am kutam daalip bom-nalata, suuk kon tem weng koyo dola ko Efesis kasel imi kwaapma unsu ko. Kale Fol iyo bogobe-nala e, “Yesus iyo God yagal ulaa dusa kale, beyo unang tinum imi ilim bo-emin tinum kale minte, beyo yagal alugum mufekmufek boyo tiin mola tambaliim albu ko. Kale ibo Yesus imi weng koyo tele utam-nilip e, ipsiik weng kuptamo yang abiip maak maak iyo baga-e-bilipta o,” ageta dola kobesa ko.\it*  
\c 1  
\p
\v 1 Nugumal nuubip aga? Niyo Yesus Krais imi kalaan tinum Fol nita kale, God ilami aget fugunin uta ulaa nimdulata, mitam Krais imi kalaan tinum kesi nita suuk kon koyo God ilami unang tinum abiip Efesis ko bom Yesus Krais imi ilak kup do-nilip yang iinemin binim ipmi dola kobelan o agan-bii kale,  
\v 2 niyo dagaga-bilita, numi Aatum God so minte Kamogim Yesus Krais so ulim iyo tebe ibo telele-bilip ipmi aget tem uyo bilili age bom-nilipta o ageta ko.   
\s1 Aatum God tebe Yesus imi sagaal diim ilep alugum kanumin kanumin tambal kupka-em-nuuba uta ko  
\sr (Ef 2:11-22, Fpai 3:1-11, Kol 1:26-28, 2:6-15, 1 Jon 2:3-6, 4:13-15)  
\p
\v 3 God iyo numi Kamogim Yesus Krais imi God e minte imi Aalap no kale, God beyo Krais imi sagaal diim ilep ilami mufekmufek tambal uyo alugum kobela numi aget fugunin uyo dong daga-em-nuubu kalaa age-nulupta, God imi win kufu-bom imi tok bagamum o ageta ko.  
\v 4 God iyo kafin koyo telela kolin-tem som-nalata, nuyo ulaa imdu-nala e, bilip iyo Krais imi ilak uyo do-nilipta, nimi tiin diim uyo atin tol kup bom-nilipta, yuum binim nin o age-nalata, nuyo ulaa imdusa ko.  
\v 5 Siin sugamiyok uyo God iyo numi aget uyo kobe-nalata, imi aget uyo, Yesus Krais iyo daali no kaanata, bilip iyo imi ilak uyo dolipta, niyo imdep mitam nimi man kepnelip imkalan o agesa kale, boyo ki God ilami san kanubelan o agesa kale,  
\v 6 God iyo ilami Man bemi aget kup ugaa kwaasa kuta, nuyo atin i-filin daa-nalata, ilami Man iyo misiim daala tal telela imo-se kale, atin ki God imi kanube-se bota, nuyo, God imi win uyo kufu-bom imi tok uyo baga-bom-nulupta o ageta ko.   
\p
\v 7-8 God imi numi i-filin daa dong daga-emin uyo ki, kwiin kiim kobe-nalata, Yesus Krais imi kaana imi isak singkam daa-suu uta, God iyo numi fengmin uyo kupkan kebe-nalata, numi ilim uyo bobe-nala e minte, kanumin kanumin dagaa ku bam dagamin uyo kobe no ke-se kale, boyo imi i-filinin uyo atin kwiin kiimen kwaala tal numi diim abe-suu kuba.  
\v 9 Sugamiyok uyo God iyo, “Nimi Man Krais iyo dong dogopnelata, boyo kanubelan-temi o,” age-nalata, aget fuguno-nalata, waafula suuta, ilami san kale, imi aget fugunin yang waansu uyo numi diim kupkem daabela utam-sulup kale,  
\v 10 God imi aget fugunin uyo ki, “Mufekmufek alugum uyo du mo abe-bilita, nimi Man imi kobelan-temi kalaa agesi uyo mitam tulu kalaa age-nilita, kota abiil tigiin umi mufekmufek so kafin diim umi mufekmufek so unang tinum so uyo alugum nimi Man imi diim kal fagalita, yagal kamok ke tiin molan-tema o,” agesata, kupkem daa-se ko.   
\p
\v 11 Kale kamaki sugamiyok uyo God ilami aget fugunin uta nuyo ulusata kale, kota nuyo Krais imi diim kal febalupta, bota God iyo tebe telela imolata, ilami tinum unang kebe-sulup ko. Tuluun kale, God iyo intap intap aget fuguno, bota kanubelan-temi kalaa agelan-tema uyo, mungkup uyo telela kola mitam felep unan-nuubu ko.  
\v 12 Kale kamaki Juda kasel nusiik God imi weng kwep daa-nala, “Nimi ulaa duli kamok kesa tinum Krais iyo daapmi no tolon-tema o,” agesa imi fen tebesup kale, God win tibin imi tok uyo bagamum o ageta ko.   
\p
\v 13 Kale Efesis kasel ibo Juda kasel ba kale, ibo tinum miit maak kale, ipkil mungkup God imi tuluun weng tambal uyo tinangku-silip kale, umi ki God imi tebe ipmi ilim bobelan-tema umi sang uyo bogobelup ibo tinangku-nilipta, Krais imi ilak uyo do-nilipta, imi diim kal tebesip kale, God iyo, ilami Sinik Tambal iyo unang tinum iyo dobelan-temi o age weng kwep daasata, ilami Sinik ita ibo dobe-nalata, faal fagak kolin tap ke-se kale,  
\v 14 kapkum mufekmufek imiin kobelap son-temu nala atin alugum kobelap isiik mufekmufek yan ke kupkakeba ulutap kale, God imi Sinik numi dobe-se beyo imiin kale, Sinik iyo kafalebelata, utamupta e, God imi weng kwep ku daa-nala, “Kanubelan-temi o,” agesa uyo atin kup kulan-temup kalaa agesup kale, boyo utamupta e, nuyo waantap ita God imi unang tinum kebup umdii, God iyo numi sok talaa imdalata, iluum binim kelan-temup kalaa age atin utamsup kale, God win tibin imi tok uyo bagamum o ageta ko.   
\s1 Fol imi beten weng uta ko  
\sr (Fpai 2:9-10, Kol 1:4-11,18, 2:15, Hib 1:3,13)  
\p
\v 15-16 Niyo tinangkulita e, “Ibo Kamogim Yesus imi ilak kup atin do-nilip e, God imi unang tinum imi aget kup do no kesip o,” agelip kalaa age tinangku-nilita, God imi alugum kanum tebesa uta, niyo ibo im-kagan-nuubaali kale, ipmi aget kup ugel kala-bom-nilita, suun kup God iyo, “Misam o,” agan tebesi kale, kanube niyo ki suun kup ipmi aget uta fugun-bom-nilita, beten kem tebesi ko.  
\v 17 Kale numi Kamogim Yesus Krais imi God iyo numi Aalap abiil tigiin kayaak iyo kulba kale, niyo aman duga-e-bilita, aget fugunin tambal uyo ibo kupka-e-bom-nala e, imi weng magam uyo ipmi diim kal kupkem daga-e-bom no kelata, God iyo kulba kalaa age tele atamin o age-nilita, aman duga-em-nuubi kale,  
\v 18 nimi beten uyo God iyo ipmi aget fugunin uyo telela kobelata, atin tele utamipta e, God tebe numi olabela imi ilak dolup bogo-nala, “Kanubelan-temi bomi uyo fen-bilipta o,” agesa bomi magam uyo kulbu kalaa age-nilip e minte, ibo utamipta e, God imi weng kwep daa bogo-nala, “Nimi unang tinum ibo dong daga-e-bilita, nisino tambaliim nan-temip o,” agesa boyo atin mufekmufek tambal kalaa age-nilip e minte,  
\v 19 ibo utamipta e, imi titil kiim ku God imi ilak dosup numi dong daga-em tebesa bota dogobeta utam-numup binim kalaa agelin o age-nilita, aman duga-em-nuubi ko. Kale kanupmin titil kiim ko God imi ku-nala ilata te yak numi iibak tem ogok ke-boma boyo,  
\v 20 imi titil ku-nala siin Krais imi kaana uyo dufo dep no abiil tigiin daala God ilami sagaal ipkuk diim tonsa uyo kulbu ko.  
\v 21 Kale sinik mafak mafak sino minte sinik tambal tambal sino bilip iyo Krais tebe alugum imdaak tama tam iinsa e minte, tinum kamok kamok win so iyo imdaak tama iit katop kal alba no kale, kaa so son-temu so uyo imi win uyo suun kup iit kutop kal bon-temu ko.  
\v 22 Kale God iyo abiil so kafin so unang tinum so alugum mufekmufek so uyo kulupma yak Krais ilami diim abelu dupka-nala e, God iyo Krais yagal dep daalata, atin Kristen numi dubom ke-bom-nala tiin mo tebesa ko.  
\v 23 Kristen unang tinum nuyo Krais imi dam ulutap kale, Krais iyo abiip so sep so abiil tigiin so uyo alugum bugu ton-bom-nala e, alugum tiin mo-bom no kem-nuuba kale, ulutap kale, iyo Kristen unang tinum numi iibak tem kal bom-nala e, fomtuup dong dogobe tiin mo-bom no kem-nuuba ko.   
\c 2  
\s1 God tebe numi sinik kufola mitam tigi mosu uta ko  
\sr (Ap 15:11, Rom 6:1-14, Gal 2:16, Kol 2:11-15, 2:20-3:4, Tat 3:3-7, 1 Fit 2:24)  
\p
\v 1 Kale siin uyo ibo God imi weng uyo kwaasule-bom yak fengmin migik migik uyo kwep mek kwep mek ke-bilipta, bota tebe ipmi sinik uyo ungkwalu kaanuta, ilep mafak diim kal bii-silip kale,  
\v 2 siin boyo ibo kuguup mafak uyo kafin diim komi unang tinum imi kanum-nuubip ulutap ke-bii-silip kale, boyo ibo sinik mafak imi kamok imi weng uta tinangka-bomta kanu-bii-silip kale, kamano koyo sinik mafak beyo tinum unang waantap ita God imi weng kwaasulemin imi igalak balata, kanu-bilip ko.  
\v 3 Kale tinum miit maak ipta kup ba kale, Juda kasel nugol mungkup siin uyo kanupmin tinum bilip imi kuguup mafak kanu-bii-silip ulutap ke kanu-bii-sulup no kale, ipso nuso alugum numi san kale, nulumi aget fugunin kup kanu-bii-sulup bota, nulumi aget tem bubul tem uta kanu-buluta, yang kanu-bii-sulup ko. Kale sugamiyok uyo God iyo fengmin umi kalan uta olsak tebepmuta, “Kaal fuyap kulan-temip o,” agesa kale, nugol kanube som-nulup e, tinum migik imi kaal fuyap kulan-temip ulutap ke nugol kanube kulan agin kuta, uk kugan ko-sulup ko.   
\p
\v 4-5 Dam kale, nulumi fengmin uta tebe numi sinik uyo ungkwaluta, kaan-suu kuta, God iyo nuyo inal o age telelemin tinum kale, numi aget kup ugaa kwaasata, utamata e, nimi Man Krais iyo aafen dufoli fen tigi mo-se kalaa age-nalata, numi sinik ugol mungkup kufola mitam tigi mo no ke-suu ko. Atin ki God iyo inal o age-nalata, ipmi ilim uyo bobelata, waalan-silip kuba.  
\v 6 Kale God imi aget fugunin uyo, “Son-temu uyo, nimi Man Yesus Krais imi ilak dolin iyo ifo imdep mitam abiil tigiin daalita, nimi Man so bilip iso mufekmufek uyo tiin molin o,” age-nalata, numi mitam Kristen ke-sulup uyo numi sinik uyo kufola tigi moluta, isino tambaliim tebesup kale,  
\v 7 God imi aget fugunin uyo, “Kanubelita, tinum unang man fagan fagan tibip kutop iyo utamipta e, God iyo numi aget uta atin ugel kala-nalata, Yesus Krais iyo daala tal yagal mungkup numi aget uyo ugel kala no ke-se kale, dogobeta tele utam-numup binim kalaa age utamin o,” age-nalata, numi sinik uyo kufola mitam tigi mo-suu ko.  
\v 8 Kale God beyo ibo inal o age-nalata, ilami Man iyo dobelata, ibo Yesus imi ilak uyo dolip kalaa age-nalata, ipmi ilim uyo bobe-se kale, ibo mufekmufek tambal umaak kanu-bilipta, God iyo, bomi yan o ageta ipmi ilim uyo bobesaala kale, ilami aget fugunin uta tebe-nalata, ipmi ilim uyo misiim bobe-se kale,  
\v 9 God ita kup kanube-se kale, nuyo dogobeta nulumi win uyo kufolup iit kutop iinon-temaalu kuba.  
\v 10 Kale kaa tonsup koyo ki, nuyo Yesus Krais imi diim febalupta, God yagal telela imolata, kamaa unang tinum ke-sulup kale, God imi aget fugunin uyo, “Nimi kuguup tambal kan kesi boyo waafulin o,” age-nalata, telela imolata, kamaa unang tinum ke-sulup ko.   
\s1 Yesus Krais tebe Juda kasel so tinum migik kek kek so alula kola mitam miit maagup kesip uta ko  
\sr (Ef 1:3-14, Fpai 3:1-11, Kol 1:26-28, 2:6-15, 1 Jon 2:3-6, 4:13-15)  
\p
\v 11 Kale Juda tinum iyo man tinum imi kaal ukan kemin kuguup uyo waafu-bom-nilip e, “Nuyo God imi tinum miit miton iyo kalbup o,” agan-nuubip kale minte, ibo Juda tinum ba kale, kek kek tinum miit maak ita ibo fogosip kale, Juda kasel iyo ibo bogobe-nilip e, “Ibo kaal ukan kemin kuguup uyo waafulin binim kale, ibo God imi tinum miit imi ilop ba o,” agan-nuubip kuta, bilip iyo God imi kuguup sang uyo bagan-nuubaalip kale, tinum imi kuguup sang uta kup bagan-nuubip kale, ipmi kanube ton-bii-silip umi aget uyo fugunolin.  
\v 12 Ipmi kanube bii-silip uyo, ibo Yesus Krais imi diim umaak feba biisaalip kale minte, ibo God imi tinum miit miton imi atuk igi ba kale, ibo tinum migik utamta, Juda kasel iyo bogobe-nilip e, “Ibo fital man o,” agan-bii-silip kale, sugamiyok uyo God iyo weng kwep daa bogobelata, Juda kasel iyo tal mep so tilip ninggil ulimal maagup bii-silip kuta, ibo kutam iyo ipso biisaalip ko. Ipmi kafin diim kaa bii-silip uyo, ibo God imi diim umaak feba biisaalip e minte, ibo aget umaak fugunota, suun tambal kup ton bon-temup kalaa agan-biisaalip no kale, ibo bisop maagalo ilum ilum bii-silip ko.  
\v 13 Kale siin uyo ibo God imi simanim kal nuubip kuta, kamano kota Yesus Krais iyo ibo itamata e, nimi at diim kaani isak singkam daa-suu uta o age-nilipta, nimi diim uyo febalip kalaa age-nalata, ibo imdep meng daalata, God imi mep so kal albip ko.   
\p
\v 14 Kale Krais yagal tebe-nalata, Juda kasel nuyo imago som, minte tinum migik ibo imago no ke afeta kolata, tinum miit maagup keta abiin tambal tonbup ko. Kale siin tinum miit alop numi atafinono una tala kemsup uyo daam fogolin ulutap ke iip kalagal fogo-nulu e, ugaa daalu una tala kesupta, Krais ita at diim kal kaan-nalata, daam fogosup boyo dalata kolata, binimanuta, tala tala keta tambaliim albup ko.  
\v 15 Kale Juda kasel imi ulo umi bogo-nulu, “Yak maak bota kanumin ba kale minte, yak maak bota kanumin o,” agesu uta fomtuup waafuu kwep tebesip kale, Krais imi aget fugunin uyo, “Niyo ulo boyo dagaa kwaali daak kaanu kupkalita, unang tinum sok de imolin kesu uyo binimanuta, tinum miit alop bilip iyo meng nimi diim febalipta, telela imoli mitam tinum miit migik ke miit maagup ke-nilipta, abiin tambal tonin o,” age-nalata, ulo boyo dagaa kwaala daak kaanu kupka-se ko.  
\v 16 Kale Krais imi at diim kaan-se kota, tinum miit alop bilip imi atafinono una tala kemin umdii kota binimanu kupkabe-nalata, kulep tal katam katam ke telela imolata, tinum miit maagup ke-nilipta, God ilami miit tem e tolom-nilipta, kwegina tala ke-silip ko.  
\v 17 Kale nimi weng miton uyo kulbu kale, Krais imi tal unang tinum imi God imi weng tambal baga-emsa uyo, asok mitam duup kiina tala kemin umi sang uta baga-emsa kale, boyo tinum miit migik God imi simanim albip ipso Juda kasel God imi mep so albup nuso numi sang uta baga-emsa kale,  
\v 18 Krais imi kaan-se bota tinum miit alop nuyo God imi Sinik maagup ita tebe dong daga-e-balata, tii Aatum God iyo aman duga-e-bon-temup ko.   
\s1 Fol imi bogo-nala, “Alugum Kristen nuyo God imi am ulutap o,” agesa uta ko  
\sr (1 Kor 3:9-17, 1 Fit 2:4-8)  
\p
\v 19 Kale tinum miit maak ibo Krais imi ilak uyo do-silip bole, ibo maak so fital man min, tinum migik min ke nan-temaalip kale, ibo God imi unang tinum imi milii iyo kulbip e minte, God imi mulup no.  
\v 20 Ipso nuso nuyo God imi am delin tap ke-se kale, iyo tebe-nala e, ilami kalaan tinum so weng kem baga-emin tinum so nuyo imdep daa am kun molin tap ke-nala e minte, Yesus Krais ita am duu dol molin ke no kesata minte, kota ipta talagol fukolin tap ke no ke-se ko.  
\v 21 Kale Krais beta tebe-nalata, alugum kun kun uyo kulu de kola tulu tulu ke te tam am tambal ke-nuluta, senganan-bii Bisel God imi aligaap ke imi win kufumin am ulutap kelu kup-kagan-nuuba kale,  
\v 22 ibo Krais imi diim kal feba-silip utamta, Krais tebe-nalata, ibo imdep yak alugum ipkumal Kristen migik imi tem kal imagolata, alugum te tam God imi Sinik am ulutap kelip im-kagan-balata, Sinik yagal ipmi iibak tem kal alba ko.   
\c 3  
\s1 God imi weng tambal Fol tebe tinum miit migik imi baga-emsa uta ko  
\sr (Rom 10:5-13, 2 Kor 11:16-12:10, Kol 1:24-29, 2 Tim 1:11-12, Tat 1:1-3)  
\p
\v 1 God iyo alugum bota kanu-bom-nalata, tinum miit migik migik ibo dong dogobelan o age-nalata, kanube-se utamta, Fol niyo ibo God iyo aman duga-em-nuubi ko. Niyo Yesus Krais imi ogok uyo waafu-bom-nili e minte, tinum miit migik migik ibo dong daga-e-bom no ke-bilita kale, bomi kalan uta sok ke-sii ko.  
\v 2 Ibo nimi sang uyo tinangkulipta, “God ita Fol iyo ogok tambal uyo kobelata, kanu-balata, bemi ogok boyo tebe Efesis kasel ibo dong daga-em-nuubu e minte,  
\v 3 God iyo ilami sugayok aget fuguno, ‘Bota kanuman-temi o,’ age waafusa uyo Fol imi diim kal kupkem daabelata, utam-se o,” agelip kalaa age tinangku-silip tap kale, bomi sang katip uyo malaak iip kwegal dola koli kale,  
\v 4 ibo ise bomi tikilan-temip kota, nimi bomi utamsi uyo ipkil mungkup tol utam-nilip e minte, Krais imi tebe-nala God imi sugayok aget fugunin yang waansu bo kanu-bom-nala kupkem daa-se uyo utam no kelan-temip ko.  
\v 5 Sugamiyok uyo tinum iyo God imi aget fugunin waansu boyo maak utamsaalip kuta, kota imi Sinik iyo daala talta God ilami tinum win tibin ko age ilami kalaan tinum nuso ilami weng kem baga-emin tinum so numi diim kal Sinik tebe God imi aget fugunin waansu boyo kupkem daabelata, bo kem utamsup ko.  
\v 6 Kale God imi aget fugunin yang waansu uyo ki, fugun-bom-nala e, “Tinum miit migik iyo nimi weng tambal uyo tinangku yak nimi Man Yesus Krais imi diim uyo febalan-temip kota, niyo tambal kup telela imo imkaa Juda kasel imi te tam Krais imi ilak dolip telela imkabi ulutap kelita, tinum miit alop iyo dam maagup ke-nilipta, nimi mufekmufek sang bogo, ‘Kanubelan-temi o,’ age kwep daasi uyo kulan-temip o,” age-nalata, God iyo aget fuguno waafusata ko.   
\p
\v 7 God iyo saak tinum kale, yagal ulaa nimdulata, ilami ogok waafusi uyo ki, unang tinum iyo ilami weng tambal kalbu koyo kupka-em-nuubi kale, boyo yagal titil uyo kopnelata, kanum-nuubi kale,  
\v 8 nugumal God imi unang tinum imi tiin diim uyo niyo atin win binim ke kubagansi kuta, God ilami atin ogok tambal bota kopnelata, tinum miit migik iyo God imi weng tambal boyo baga-e-bom-nili e minte, bogobe-nili, “Krais iyo ki atin ipmi ilak uta o age-nalata, mufekmufek bisel maak ko kanube-se o,” agan-bom no kem-nuubi kale,  
\v 9-10 God imi aget fugunin yang waansu uyo nita ku-nilita, tinum unang alugum iyo tele kafale-bilita, utamipta, God iyo dogobeta boyo kanubelan-tema kalaa age-nilipta, utaman-nuubip ko. God iyo sugayok abiil so kafin so kafin kaa kutufosu komi mufekmufek so telela kosa tinum kale, aget fugun-bom-nala e, “Son-temu uyo, abiil tigiin umi ensel titil kup tebesip iyo utamipta e, God iyo tebe Kristen unang tinum iyo telela imola dogonupmin albip kalaa age-nilipta, boyo utamipta e, atin ki God iyo aget tambal kup fugunin tinum kalaa age utamin o,” age-nalata, God iyo ilami kamaki sugayok aget fuguno-nala, “Bo kanuman-temi o,” agesa uyo waafusata, ko kupkem daa-se ko.  
\v 11 Kamaki sugamiyok uyo God imi aget fugunin uyo, “Son-temu uyo, nimi aget fugunin nalami aget tem albu uyo baga-e-bilita, tele utam-nilipta, dagaa kulin o,” agesata, mungkup ko numi Kamogim Yesus Krais iyo daala talta yagal God imi aget fugunin tambal umdii kota kupkem daala keman-suu ko.  
\v 12 Nuyo yak Krais ilami diim feba-nulup e, numi aget uyo kwep yak ilami diim daa no ke-sulup utamta, tele utamupta e, nuyo ilep so kale, God iyo dagalupta, numi weng uyo tinangkulan-tema kalaa age-nulupta, finanin binim God iyo aman duga-em-nuubup ko.  
\v 13 Atin nugumal ibaa. Waasi iyo tebe-nilipta, niyo ipmi dong daga-em tebesi umi kalan o age kaal fuyap uyo kupkane-bilip kuta, ibo nimi kaal fuyap bomi aget uyo fugun-bom aget iluum kugamin ba kale, nimi kaa dong daga-e-bili ipmi titil fagagan-bilip komi aget uta kup fugun-bom deng tebe-bom-nilipta o ageta ko.   
\s1 Yesus Krais imi unang tinum imi aget kup ugel kalagamin uta ko  
\sr (Jon 3:16, Rom 8:31-39, 1 Jon 3:1-2, 4:7-21)  
\p
\v 14 Tinum miit migik migik ipso Juda kasel nuso nuyo kwego dego ke tinum miit maagup ke-sulup kale, tiinemi uyo dok kota bomi aget fugunoli uyo katuun duung fegela daak ton-nilita, Aatum God iyo aman duga-e-bomi ko.  
\v 15 Alugum abiil tigiin kasel so alugum kafin diim kasel nuso nuyo tinum yagalami miit maak kela kela kesup kuta minte, Aatum God beyo alugum numi miit kayaak iyo kulba kale,  
\v 16 utamita e, titil kiim uyo Aatum God imi diim kal albu kalaa age-nilita, dagalita, imi Sinik iyo bogobelata, yagal tebe titil kobe-nalata, ipmi aget fugunin uyo dong dogobelata, titil faga-bom-bilipta o age dagaga-bom-nili e minte,  
\v 17 ipmi aget kwep yak Yesus Krais imi diim daalipta, yagal suun kup ilipmi aget tem kal bom-balata o age dagaga-bom no ke-bomi kale, ipmi kuguup kanum-nuubip umi magam uyo ki, at timtim boyo dong dogobelu at umi titil fagaa momin kale, ulutap kale, niyo God iyo dagalita, yagal dong dogobelata, ibo God imi aget sino unang tinum imi aget so uyo ugel kala-bom-nilipta, titil fagaa mo-nilip e, kuguup tambal uyo waafu-bilipta o age dagagan-bomi kale,  
\v 18-19 Krais iyo atin numi aget kup ugel kalasa kale, nuyo dogobeta bomi magam uyo tele utam-numup binim kesup kuta, God iyo dagalita, yagal dong dogobelata, ipso alugum Krais imi ilak dolin unang tinum iso ibo bagang-kale utam dagaa kulipta e, Krais iyo ipmi aget uyo kwiin kiim ugel kalagan kwep kutop kutop kem-nuuba kalaa age-nilipta, ipkil atin God ilatap ke top so kemin o age dagagan-bomi ko.   
\p
\v 20 God iyo ilami titil uta ku-nalata, bagang-kale numi iibak tem kegal ogok afaligen uyo kem kwep top so kem-nama kale minte, numi beten weng uyo, “God kabo bota kanubelal o,” age-nulup e minte, nulumi aget fugunin uta, “God iyo bagang-kale boyo kanube-nama bele o?” age no kelan-temup uyo kubaganuta, imi kubak daa kanubelan-tema bole, uta uta ke unanbu tam iinon-temu kale,  
\v 21 Yesus Krais ilami diim kal feba ilami tinum miit ke-sulup nuyo God imi win uyo kufu-bom imi tok uyo baga-bom ke-bomta nuso man ilop kutop iso nuyo ke-bomta kutop kutop ke-bulupta o ageta kale, bota kwa.   
\c 4  
\s1 Fol imi bogo-nala, “Kristen unang tinum nuyo Yesus Krais imi dam umdii kalbup o,” agesa uta ko  
\sr (Rom 12:4-21, 1 Kor 12:12-20, Fpai 2:1-5, Kol 2:19)  
\p
\v 1 Kale niyo Bisel God imi ogok waafulin tinum utamta, bomi kalan uta sok de namolipta, nuubi kale, God iyo ipkil mungkup bogobela mitam ilami man ke-silip kale, ipmi tonamip tiinemip uyo, ibo te tam God imi kuguup tambal, “Bota kanumin o,” agesa uyo tiilu kupkalin o age-nilita, weng koyo fomtuup baga-e-bii ko.  
\v 2 Kale ibo ipkumal kek kek imi afak tem iinom win binim ke-bom bet bubul uta kupka-e-bom-nilipta o ageta kale, ipkum iyo maak God imi kuguup, “Kanumin o,” agesa uyo no tiyuuk ilalin-tem umdii, atafimin ba kale, imi aget uyo kupka-e-bom bilili age-bom dong daga-e-bilip te tam yagal tiyuuk ila no kelata o ageta ko.  
\v 3 Kale God imi Sinik iyo tebe dong dogobe angge sok de imolin tap kela duup kiina tala ke aget maagup ke-silip kale, boyo fomtuup waafu-bom-bilipta o ageta ko.   
\p
\v 4 Numi kwego dego ke-sulup uyo dam maagup ulutap kale minte, God imi Sinik ipmi diim alba beyo maagup ita kup kale, God imi ipmi bogobela mitam ilami man ke-silip kota, weng maak bogobe bogobe ke, “Ibo imdep tal nalami abiip daalita, ipsino nisino kagal nan-temup o,” agela fen tebesip boyo weng migik migik ba kale, weng maagup uta kup kale,  
\v 5 aa mungkup yagalami kamok kamok ba kale, ipmi Kamogim iyo maagup ita kup no kale, minte ipmi Krais imi ilak dola dola kesip uyo maagup, minte imi win tolop diim ok sam ugan tebesip uyo maagup,  
\v 6 minte numi God iyo maagup no kale, beyo alugum numi Aalap kale, beyo alugum nuyo tiin mo-bom-nala e minte, alugum numi tiin diim kugol ogok ke-bom-nala e minte, alugum numi iibak tem uyo bom no kem tebesa ko.   
\p
\v 7 Kale minte Krais iyo kuguup tambal tambal uyo maagup maagup nuyo kafalebelata, imi titil diim ku-tele kanum-nuubup kale, boyo ilami san kale, yagal mufekmufek uyo misiim kobe kobe ke-se kale,  
\v 8 ulutap kale, God imi suuk kon tem uyo Krais imi sang bogo-nulu e,  
\pi1 “Siin bemi unanbu tam iin-se uyo, beyo waasi sok de imolin kwiin tagang iyo kulep tam-nala e minte, unang so tinum so iyo mufekmufek uyo misiim kobe no ke-se o,”  
\m agesu kale,  
\v 9 weng ko bogo-nulu, “Tam iin-se o,” agesu boyo dok uta ba kale, Krais imi tam abiil tigiin iin-se uta kup ba kale, kamaki uyo talanbu malaak kafin diim o-nalata, tam iin-se kale,  
\v 10 ise tinum ko kamaki malaak ti-se beyo yagal asok tam iin-se kale, beyo atin tam abiil tigiin tam-nalata, abiip so sep so abiil tigiin so uyo alugum bugu ton-bom-nilita o age-nalata, tam iin-se ko.   
\p
\v 11 Kale Krais imi mufekmufek misiim kupka-em tebesa uyo kulbu kale, tam tinum iip maak iyo nimi kalaan tinum o age ulu-nala e, milii iyo God imi weng kem baga-emin tinum o age ulu-nala e minte, atuk iyo God imi weng tambal kupka-em yak abiip maak maak kem tiinemin tinum o age ulu-nala e minte, iip maak iyo Kristen imi tiin mo-bom dong daga-e-bom God imi weng kafalemin tinum o age ulu no ke-nalata, ilami aget fugunin tambal uyo kopmata, ogok uyo tambaliim kem tebesip ko.  
\v 12 Kale kanube Krais imi mufekmufek kupka-em tebesa boyo, iyo God imi unang tinum nuyo dong dogobe, kafale-bili igil te yak nimi ogok boyo tii waafulan-temip kalaa age kanubelipta, nimi unang tinum ko age nimi dam uyo mitam senganan-temu kalaa age-nalata, kupka-em tebesa kale,  
\v 13 kanum abe-balata, unanbu top alugum nuyo mitam aget maagup kelupta, numi God imi Man imi ilak dugamin min, atamamin min uyo maagup kelan-temu kale, kanum abe-buluta, numi God imi ilak dugamin uyo sengan-nuluta, unanbu top man tinum imi te tam fito ko biselaba ulutap keluta, te tamta Krais ilatap kelan-temup ko.   
\p
\v 14 Kale kanumup umdii, nuyo suun kup man kangkang ilitap nan-temaalup e minte, alugum uget tagamin tinum bilip imi bisop bagamin weng uyo baga-e-bilipta, nuyo man kuguup kanubelin tap ke, boyo aafen ko age kupkaa yang iinon-temaalup no kale, imi bisop weng bagamin uyo yol ok daang kun umi aliin iit o daak o ke-bom-nulu bot kwaalu unbu talbu kem-nuubu ulutap e minte, dulul tebe at kon kwaalu tam tam unan-nuubu ulutap no kale, nuyo bisop weng bo tinangkamin ba kale,  
\v 15 God imi tuluun weng uta kup tinangku waafu-bom-nulup e minte, unang tinum kek kek imi aget kup ugaa kwaa-bom no ke-nulupta, mitam fen tinum ke-nulup e minte, numi dubom Krais imi diim kal feba no kelum o ageta ko.  
\v 16 Kale numi dubom beyo tiin mo-bom-balata, ilami yaan, sagaal, tiin nuyo ilami mufekmufek, “Kanupmin bota kanumin o,” age-nala maagup maagup numi baga-e-be uyo tambaliim kanum-nuubup kale, tinum imi mamel uyo tulu tulu ke dam uyo alugum de koluta, atin dam maagup kesu ulutap kale, dam umi atuk nuyo dong dogobina tala ke-bomta alugum maagup kem-nuubup kale, kanube aget kobina tala kem-nuubup uyo dam nuyo mitam titil fagaa senganan-nuubup ko.   
\s1 “Kristen numi siin kuguup uyo kupkaa kamaa kuguup uta kup waafuu bom-bulupta o,” agan-kalin umi sang uta ko  
\sr (Rom 12:9-21, Ef 5:1-20, Kol 3:5-17, 1 Tes 4:1-12, 1 Fit 4:1-6)  
\p
\v 17 Kale niyo weng kem umaak Bisel imi win tolop diim fomtuup bogobelan o ageta kale, ibo Aatum God imi ilak dolin binim unang tinum imi kuguup uyo ibo maak so kanumin ba o ageta ko. Bilip imi aget fugunin uyo tambal binim kale, bisop aget uta kup fugun-nuubip kale,  
\v 18 bilip iyo utamsaalip e minte, imi utamamin uyo bisop magam binim e minte, bilip iyo ilum ilum bii tonsip no utamta, mitam God imi suun nin unang tinum kelin-tem yang kugol albip kale,  
\v 19 bilip iyo fitom umaak tebe-emsaalu binim kale, atin kuguup mafak mafak umi aget uta ugel kala-nilipta, daal binim suun kup kanumin kup tebesip ko.   
\p
\v 20 Bilip imi kanupmin kuguup mafak boyo Krais imi kuguup ipmi kafalebe-sulup uyo kulbaalu kuba.  
\v 21 Krais imi sang uyo bogobelup ibo tinangku-nilipta, mitam imi unang tinum ke-nilip e minte, Yesus imi tuluun weng tambal uyo kafalebelup tinangku no ke-silip kale, aafen ko.  
\v 22 Kale siin uyo ipmi intap intap mok unan-bii-silip uyo, ibo kuguup tambal ko ageta no kuguup mafak boyo kanu-bomta ilipmi kaal uyo kufak dagan-bii-silip kuta, ipmi kanupmin siin aget fugunin boyo kwaalip kot iinu kupka-nilipta,  
\v 23 ipmi sinik so aget fugunin so uyo kwaalip yak God imi diim abeluta, yagal telela kobelata, uyo atin kamaa keluta,  
\v 24 kamaa aget fugunin uyo kulin o ageta kale, kamaa aget fugunin boyo God yagal, nimi aget fugunin ulutap kelin o age kobelata, ibo kanupmin aget fugun-bom kanu-bilipta, kek kek iyo itamipta e, bilip iyo tol kup tebesip e minte, atin tambal no kalaa agelan-temip ko.   
\p
\v 25 Kale alugum ibo bisop bagamin kuguup uyo kupka-nilipta, kanumin kanumin sang uyo tuluun uta kup ipkumal Kristen kek kek iyo baga-e-bom-nilipta o ageta kale, alugum nuyo dam maagup umi atuk atuk ke-bom albup kale, tuluun weng uta kup baga-bom-nulupta o ageta ko.  
\v 26 Ibo kanube olsak kup dine-emu umdii, fenga kolan-temip kale, tele utama-bom-nilipta o. Olsak uyo waafu-bom-balap ataan uyo tem iinemin ba kale, yuut kupkan kelal o ageta ko.  
\v 27 Olsak uyo waafulin kup nan-temip bole, ipmi aget tem uyo sinik mafak imi kamok imi faal umdii bitopman-temip ko.  
\v 28 Yuguut unin tinum iyo maak so yuguut unan-kalin ba kale, kamano koyo ogok tambal ke-bom-nalata, ilami titil diim kugol iman min, mani uyo kwaa-bom-nalata, utamata e, ipkum iyo mufekmufek uyo duumatanba kalaa agela umdii, dong daga-e-bom bon-tema ko.  
\v 29 Kale ibo weng mafak uyo bagamin ba kale, weng tambal tambal uta kup baga-bom-nilipta, unang tinum titii binim iyo kuntuk mobe-nilip e minte, unang tinum tinangkan-bilip iyo dong dogobe no ke-bilipta, ito God imi deng uyo tebeman-temip ko.  
\v 30 Kale ibo ipkumal iyo weng mafak uyo kupka-e-bom God imi Sinik Tambal iyo aget iluum uyo kupka-emin ba ko. Kale God imi Sinik Tambal ko ipmi diim alba beyo God tebe ipmi faal fagak kobe-se ulutap kale, ibo bo utamipta, nuyo aafen God imi unang tinum iyo kalbup kalaa age, son-temu uyo, God iyo sok talaa imdalata, nuyo iluum binim kelan-temup kalaa agelin o ageta ko.  
\v 31 Kale ipmi iluuk iluuk ke-bom  
\m aget mafak fugunin so,  
\m aget atul tebemin so,  
\m olsak tebemin so,  
\m alaang weng bagamin so,  
\m weng miil tebemin so,  
\m ipkumal itafinonin so uyo alugum kwaalip kot iinu kupka-nilipta,  
\v 32 inal o agan-bom tambaliim kup telelebina tala ke-bom-nilipta o ageta kale, God tebe Krais imi win tolop diim ipmi fengmin kupkabe-se ulutap ke ipkumal tebe ipmi mufekmufek uyo fenga kolip uyo ipkil mungkup kupkabina tala ke-bom-nilipta o ageta ko.   
\c 5  
\s1 Fol imi bogo-nala, “Ibo utama-bomta ilagenin diim kugol kuguup tambal uta kup waafu-bilipta o,” agesa uta ko  
\sr (Jon 3:18-21, 8:12, Rom 12:9-21, Kol 3:5-17, 1 Jon 1:5-10, 2:7-11)  
\p
\v 1 Ibo God ilami man utamta, iyo ipmi aget kup kobesa kale, imi kuguup kanum-nuuba ulutap ke ipkil kanu-bom bom-bilipta o ageta ko.  
\v 2 Krais iyo, numi ilak uyo do dong dogobelan o age-nalata, tinum bilip imi, God imi mufekmufek kobelum o age fuulip tang tambal kuun-bulu ku-nala, “Tambaliim o,” agan-nuuba ulutap ke-nalata, imi dam uyo God imi kobelata, waasi iyo tebe angkolipta, yagal tebe imi sinik iyo God imi dobe no ke-nalata, kaanata, God yagal du-nalata, “Tambaliim o,” age-se kale, ulutap kale, ipkil mungkup ipkumal imi ilak uyo duga-bom dong daga-e-bom ke-bom-nilipta o ageta ko.   
\p
\v 3 Kale minte ibo God imi unang tinum kale, ipmi sa daga-bom kayaam ilatap keman-temip min, mufekmufek soyaap kelupta o agan-kalon-temip uyo felepmuta, kanuman-temaalip kale minte, maak uyo, ibo intap intap kuguup umaak, “Bo tambal o,” age-nilip kanu-bilip ipkumal iyo itam-nilipta, boyo sa dagamin kuguup ulutap kalaa agelip umdii, ipmi kanuman-temip boyo felepman-temaalu kale, ibo kanu-bilipta, ipkumal iyo kanupmin aget uyo fugunin ba ko.  
\v 4 Kale ipmi fitom weng bagaman-temip min, bisop weng bagaman-temip min, tinol faga-bom weng mafak bagaman-temip uyo felepmuta, kanuman-temaalip kale, ipmi God imi, “Suguul o,” agan-kalon-temip uta fen felepmuta, kanuman-temip ko.  
\v 5 Kale ibo utamin. Waantap ita sa daga-bom kayaam ilatap kema min, mufekmufek soyaap kelita o agan-kala umdii, beyo yak Krais imi diim feba-nalata, tam God imi daam tem uyo tam unon-temaala binim. Kale tinum iyo, mufekmufek soyaap kelita o agan-kala umdii, kanupmin aget fugunin boyo mitam-nulu e, God imi aget fugun-be uyo kupkan kebeluta, God imi aget uyo atin iluman kupkalan-tema ko.   
\p
\v 6 Kale unang tinum iyo God imi weng uyo kwaasule-bom yang fengmin sang ko bagan-bii boyo fengamip umdii, bomi kalan uta fen God iyo olsak tebepmuta, kaal fuyap uyo kupka-eman-tema kale, ibo tinum bisop bagamin imi weng uyo tinangkulip imdep yang kuguup mafak mafak tem uyo tilimin ba e minte,  
\v 7 kanupmin tinum bilip iyo yang mep so tamap iso tiinemin ba no ko.  
\v 8-9 Siin uyo ipmi aget tem uyo miliil mo-buluta, kuguup mafak mafak uyo kanu-bii-silip kale, am kaa daan-suu koyo, te tam Kamogim Yesus imi unang tinum ke-nilip e, ipmi aget tem uyo ilagen-suu kale, ilagenamin bota unang tinum iyo dong dogobelu kuguup tambal tol kup tebesu uta kup waafunamin kale, ibo tinum ilagenin diim albip imi kuguup kanubip ulutap ke-bom-nilipta o ageta kale,  
\v 10 ibo fomtuup fen-bom-nilipta, utamipta e, Bisel God imi weng bogobe-nala, “Bota kuguup tambal o,” agan-be uyo kulbu kalaa age-nilipta, bota waafu-bom-bilipta o ageta ko.  
\v 11-12 Bilip imi kanumin kanumin mufekmufek kanum-nuubip boyo mililanin kuguup ko age kuguup mafak kale, imi kuguup boyo dogobeta ipkumal iyo dong dogopmomu binim kale, mungkup bilip imi kuguup bantap kanum-nuubip boyo fen kuguup mafak kale, kanube bomi sang kem bogolan-temap uyo fitom tebepkelan-temu kale, ibo iso yakyak kem tiinemin ba kale, kuguup tambal uta kup waafu-bom-bilipta, ipmi kuguup uyo ilagen-nuluta, tebe bilip imi mililanin kuguup uyo kupkem daabeluta, kek kek iyo utamipta e, bo kuguup mafak kalaa agelin o ageta kale,  
\v 13 God ilami yogon uyo kefolata, kuguup boyo kemanuta, unang tinum iyo utamipta e, kuguup boyo kanupmin kalaa age utaman-temip kale,  
\v 14 Kristen nuyo bomi sang uta baga-bom do weng koyo bogo-nulup e, “Kabo yuut kapmi agaal unbap ko age kapmi kaanbap uyo kupkaa fen mitam tigi molapta, Krais iyo tebe kamdep yang ilami ilagenin diim daalan-tema o,” agan-nuubup ko.   
\p
\v 15 Ibo ipmi ilagenin diim albip bomi aget uyo fugun-bom-nilipta, ipmi tiinemin tonamin uyo tele utama-bom-nilip e minte, ipmi kuguup uyo tinum utamsaalip binim imi kuguup kanubip ulutap uyo kemin ba kale, tinum utamsip imi kuguup kanubip ulutap uta ke-bom kanumin o ageta ko.  
\v 16 Kale kamano koyo unang tinum kwiin tagang iyo kuguup mafak uyo waafuu kwep mitam abu kale, kanube ibo utamipta, dok kota numi ipkumal kuguup tambal kobelan agin so umi am uyo daanu kalaa agelip umdii, kupkalip bisop te yang iinemin ba kale, kanumin uta kup ko.  
\v 17 Kale kanube amon amon nin kuguup uyo waafunamin ba kale, kup-kugu utamipta, Bisel God imi ipmi bogobe-nala, “Bota kanumin o,” agan-be uyo kulbu kalaa age utam-nilipta, bo kanumin o ageta ko.   
\p
\v 18 Ibo ok mafak uyo unan-bom ilum ilum ke-bom ipmi tonamin uyo kufak dagamin ba kale, ibo God imi Sinik iyo dupkalip yagal tebe ipmi aget fugunin min, sinik min uyo fomtuup tiin molata, tambaliim kup bom-bilipta o ageta kale,  
\v 19 ipkumal Kristen sino weng bagamip uyo, Baibel umi aseng so Yesus imi deng tebe-bom kwaamin aseng so God imi Sinik tebe aseng kobe-se aseng so uyo kwaa-bom-nilipta o ageta kale, Bisel imi deng uyo tebe-bom imi aseng uyo kwaa-bom-nilipta o ageta ko.  
\v 20 Kale ibo, “Nuyo Kamogim Yesus Krais imi unang tinum kesup o,” agan-bom suun kup mufekmufek alugum umi sang uyo Aatum God iyo baga-e-bom, “Misam o,” agan-bom no ke-bomta bom-bilipta o ageta ko.   
\s1 Unang tinum digin, tinum unang digin imi sang uta ko  
\sr (1 Kor 7:1-5, Kol 3:18-19, 1 Tes 4:3-7, Tat 2:3-5, Hib 13:4, 1 Fit 3:1-7)  
\p
\v 21 Ibo aget fugunolipta, Krais beyo numi Kamogim ita kalaa age-nilipta, ilami weng uyo tinangkan-nuubip kale, ibo ipkumal Kristen imi weng ugol mungkup tinangku-nilipta, imi afak tem kugol bom-nilipta o ageta ko.   
\p
\v 22 Kale unang tinum digin ibaa. Ipmi Kamogim Krais imi dupkalip ipmi tiin mola ilami weng kup tinangkan-bomip ulutap ke imagal imi weng kup tinangka-bom-nilipta o ageta kale,  
\v 23 kanube Krais beyo ilami dam ko age ilami unang tinum numi ilim uyo bo-nala e, numi dubom ke-se kale, mungkup ulutap unang tinum digin ibo imagal bilip iyo ipmi dubom no kale,  
\v 24 ibo Kristen unang tinum numi Krais imi dupkalup numi tiin mola ilami weng kup tinangkan-bomup ulutap ke atin ki imagal imi weng kup tinangka-bom-nilipta o ageta ko.   
\p
\v 25 Minte tinum unang digin ibaa. Ibo Krais imi unang tinum numi aget kup ugel kala-nala ilami kaal sigim ke-nala numi ilim bo-se ulutap ke kalelal imi ilak kup do tambaliim tiin mo-bom-nilipta o ageta kale,  
\v 26-27 ilami kaal sigim ke-se bomi magam uyo kulbu kale, Krais imi aget fugunin uyo, “Nimi ilak dolan-temip unang tinum iyo weng tambal uyo kobe-nili e, diing daa imoli mitam tambalanipta, kulep meng nalami mit kun diim to itamita e, kalip iyo unang kapket ilitap ke alugum mafak binim, atin tambaliim kalaa age-nilita, bilip iyo kululi yak God imi sagaal ban diim abelipta, ilami man aligaap kelin o,” age-nalata, Krais iyo ilami kaal sigim ke-se ko.  
\v 28 Kale ulutap kale, tinum ibo ilipmi kaal umi ilak do tambaliim tiin mobip ulutap ke ipmi kalelal imi ilak uyo do telelemin o ageta ko. Kale tinum so ilami kalel so agam iyo maagup kale, tinum iyo ilami kalel umi ilak do tambaliim tiin mola umdii, bomi tem ku-tele beyo ilami kaal kuso tiin molan-tema kale,  
\v 29-30 tinum iyo maak ilami kaal aa dam aa uyo utafinon-nuubaala kale, ilami kaal umi ilak uyo do-bom ilami dam uyo unan-kalin uyo kupka-e-bom-nala e, tambaliim kup tiin mo-boma kale, ulutap kale, Krais yagal mungkup ilami dam ko age Kristen unang tinum nuyo tambaliim kup tiin mo-boma ko.  
\v 31 Kale God imi suuk kon tem weng uyo bomi sang uyo bogo-nulu e,  
\pi1 “Tam tinum iyo ogen aalap iyo imkaa yak kalel umi diim kal febala e, agam iyo te tam dam maagup ulutap kelan-temip o,”  
\m agesu kale,  
\v 32 weng bomi magam uyo kwiin tagang kuta, nimi aget fugunin uyo, “Bomi magam maagup maak uyo Krais so ilami unang tinum so imi sang uta kam agesu o,” agan-bii kale minte,  
\v 33 alugum maagup maagup ipmi sang ugol mungkup kam agesu kale, tinum ibo ilipmi kaal umi ilak do tambaliim tiin mobip ulutap ke ipmi kalelal imi ilak uyo do telele-bilip e minte, kalelal igil imagal imi weng uta kup tinangka-bom no ke-bom-nilipta o ageta ko.   
\c 6  
\s1 Man sino ogenal aalabal sino imi sang uta ko  
\sr (2 Kor 12:14, Kol 3:20-21)  
\p
\v 1 Minte man ibaa. Ipkil Kristen kale, ogen aalap imi weng uta kup tinangkaman-temip uyo felepmuta, waafulan-temip ko.  
\v 2 Kale God imi suuk kon tem uyo bogo-nulu e, “Kogen kaalap iyo, ‘Nimi dubom o,’ age-nalapta, imi weng uta kup tinangka-bom-nalapta o,” agesu kale, weng boyo God imi kamaki ulo kwep daa-nala ilami weng kwego kwep daa, “Kanupman-temi o,” age kwep daa no kesa kale,  
\v 3 weng kwep daasa kwek uyo bogo-nulu e, “Tinangkamap umdii, tambaliim kup bom-nalap e, kafin diim koyo iibilip unelan-temap o,” agesu ko.   
\p
\v 4 Minte aalabal ibaa. Ibo man iyo suun kup alaang weng min uyo kupka-e-bilip man iyo olsak tebe-emin ba kale, tambaliim kup tiin mo-bom-nilip e, Kamogim Krais imi weng uyo kafale-bom-nilip e, kuguup mafak ke-bilip uyo yege-bom no ke-bom-nilipta o ageta ko.   
\s1 Bisop sok de imolip tinum maak imi ogok kemin tinum so tiin molin so imi sang uta ko  
\sr (Kol 3:22-4:1, 1 Tim 6:1-2, Tat 2:9-10, 1 Fit 2:18-25)  
\p
\v 5 Minte bisop sok de imolip tinum maak imi ogok kemin tinum ibaa. Ibo ipmi kafin diim komi ogok ke-bilip umi aget uyo maagup uta kup fugun-bom-nilip e minte, ipmi ogok tiin molin tinum imi weng kup tinangka-bom no ke-bom-nilip e, Krais imi weng tinangka-bom kanu-bomip ulutap ke-bom-nilip e,  
\v 6 ilipmi kamok imi tiin diim uta kup ogok ke-bulupta, deng tebemin o agan-kalin ba kale, nuyo Krais imi ogok ke-emin tinum kalaa age-nilipta, bilip imi tiin kubabip kuso suun kup ogok fomtuup waafu-bom-nilip e, God imi, “Bota kanumin o,” agan-be uta kup ipmi tiin aa bubul aa kwek iinu waafuu kanu-bom no ke-bom bom-bilipta o ageta ko.  
\v 7 Kale ipmi bisop sok de imolip tinum maak imi ogok ke-bilip uyo ki, aget tambal kup fugun-bom ogok ke-bom-nilipta o ageta kale, ibo, “Nuyo tinum imi ogok ke-e-bulup bota aga o?” age mafak mafak ke-emin ba kale, ipmi Kamogim Yesus Krais imi ogok tambaliim kup fomtuup waafulan-temip ulutap ke ogok uyo tambal kup ogok kemin ko.  
\v 8 Kale ipkil utamsip kale, aget fugunolin. Tinum iyo dok ita ogok tambal uyo waafuu kwep taba uyo, Bisel God iyo tebe bomi yan uyo kopman-tema kale, tinum sok de imolin so e minte tinum sok de imolin binim so iyo kuguup tambal uyo tiyuuk maagup kobe kobe kelan-tema ko.   
\p
\v 9 Bisop sok de imolip tinum maak imi ogok kemin tinum imi aalabal ko age tiin molin ibaa. Ipkil mungkup ipmi ogok kemin tinum iyo kanu-e-bom-nilipta, ipmi bilip imi alaang weng baga-e-bilip finanin bomi kuguup boyo kupka-nilipta, kuguup tambal uta kup kupka-e-bom-nilipta o ageta kale, ipkil utamin. Abiil tigiin alba beyo ipmi tiin molin e minte ipmi ogok kemin tinum imi tiin molin no kale, beta tebe-nalata, tinum unang win tibin so win binim so alugum maagup iyo im-kugu-bom yegeman-tema ko.   
\s1 Fol imi bogo-nala, “Kristen unang tinum iyo waasi dinan-kalin ilitap o,” agesa uta ko  
\sr (Rom 13:14, 1 Tes 5:8-9)  
\p
\v 10 Kale nimi weng afungen uyo kaa baga-eman-temi kale, ibo Kamogim Yesus Krais imi diim kal feba bom-bilipta, imi titil kiim uyo ku ibo dong daga-e-balata, ipmi aget tem kuso kuguup kuso titil faga-bom-bilipta o ageta kale,  
\v 11-12 numi waasi dinan-kalin uyo ki, tinum kem iso dinan-nuubaalup kale, sinik mafak kiit albip so sinik mafak kalaak kafin diim komi mililanin kuguup umi magam kasel so alugum sinik mafak atin titil kup tebesip iso dinan-nuubup kale, ibo waasi dinan-kalin mufekmufek God iyo numi kupka-e-boma uyo alugum tii-nilipta, bagang-kale titil fagaa molan-temip uta, sinik mafak imi kamok imi bisop baga-em imdep yang tem tililan-tema uyo, tele utama-bom fagaa kwaalip une-buluta, bom-bilipta o ageta kale,  
\v 13 kanube kabo God imi waasi dinan-kalin mufekmufek uyo alugum tii-nalapta, kuguup mafak mitam tolon-temu uyo, titil fagaa mo umik ugobe-nalapta, fagaa kwaalap une-buluta, titil fagaa mo bom-balapta o ageta ko.   
\p
\v 14 Kale kabo mo-nalap fikolan-temap uyo kalbu kotam. Kabo tam waasi dinan-kalin imi ol tiil uyo ku migilip nagat molu tambaliim dinbip ulutap ke-bom-nalapta, tuluun weng uta kup baga-bom-nalapta, tambaliim bom-balapta o ageta kale, waasi dinan-kalin imi ilim ko age naam kwaak kalilipta, un uyo tal bubul uyo bigipman-temaalu binim kale, ulutap kale, kabo te tam kuguup tambal waafulan-temap uta tebe-nuluta, kapmi tiin kafan sinik uyo de kubaluta, tambaliim nan-temap e minte,  
\v 15 waasi dinan-kalin imi yaan ilom tii-nilip, tam abe simanim unum o agan-nuubip ulutap kapkal tam God imi weng tambal bogo-nala, “Kwegii duup kiina tala kelum o,” agesa uyo kwep no baga-em tiineman o agelap uyo kan ke-nalapta o ageta kale,  
\v 16 maak uyo, kabo waasi dinan-kalin imi at kom katip imi fet kun tem ililip te top unu ilimi kaal uyo uksu dinbip ulutap ke-nalap e, suun kup kapmi aget uyo kwep yak God imi diim daalapta, Tinum Mafagim imi dem tem kwegal at milip fogo kwek kali binola tebe at nang sok nang kuso fuu-bo uyo kangkolan-temaalu kale, tenolan-temu kale,  
\v 17 waasi dinan-kalin imi dufalum titil tebesu uyo kwaak kalilan-temip uta, dubom uyo tambaliim nan-temu kale, ulutap kale, utamapta, God iyo nimi ilim uyo bopnelata, kaal binim albi kalaa agan-bom-nalapta o ageta kale, kabo waasi dinan-kalin imi benat ko age un kong waafuu waasi imi bubul begelemin ulutap ke-nalap e, God imi weng ilami Sinik tebe kopkeba uyo ku unang tinum iyo baga-e-balapta, tebe-nuluta, imi aget tem uyo tam unon-temu kale, kanumin kanumin bota kanu-bom-nalapta, fiko-bom-balapta o ageta ko.   
\p
\v 18 Ipmi God imi aman duga-eman-temip uyo, ilami Sinik iyo dong daga-e-balata, kanumin kanumin beten weng uyo ku suun kup aman duga-emin kup ke-bom-nilip e, kup-kagamin ba kale, daal binim abu binim tiin ak binim tiin alop ke tiginin kup ke-bom-nilipta, ibo God iyo aman duga-e-bilipta, yagal ilami unang tinum alugum iyo dong daga-e-bom-nala e minte,  
\v 19 niso dong dagane-bom no ke-balata, ilami weng ku unang tinum imi kobelan-temi uyo, God iyo dong dogopnelata, finanin binim, titil fagaa Yesus Krais imi sang uyo baga-e-bilita, God imi weng tambal yang waansu uyo tele utamin o ageta ko.  
\v 20 Niyo God imi bon tem tinum ko age weng tambal kwaala tulu tinangku unang tinum imi kupka-emin tinum kuta, bomi kalan uta niyo sok de namolip albi kale, niyo ilami weng tambal kupka-emin bomi ogok so kale, ibo God iyo aman duga-e-bilipta, yagal dong dagane-balata, finanin uyo kupkaa titil fagaa mo-nili baga-e-bilita o ageta ko.   
\s1 Fol imi afungen weng uta ko  
\sr (Kol 4:7-8)  
\p
\v 21-22 Kale Tikikus beyo atin nulumi atuk aligaap e minte, Kamogim Yesus Krais imi ogok fomtuup waafulin tinum no kale, daali no tala kale, yagal nimi ogok ke-bomi so kanube albi so umi sang uyo alugum bogobelata, ibo tinangku utamipta, Fol ninggil alugum iyo dogobe albip kalaa age-nilipta, deng tebeman-temip ko.   
\p
\v 23 Aatum God sino Kamogim Yesus Krais so ulim iyo tebe dong dogobelipta, atin nalami Kristen duup-afin ibo, “Numi duup o,” agina tala ke-bom-nilip e, ipkumal imi aget kup kobina tala ke-bom-nilip e minte, ilipmi aget uyo fomtuup kwep yak ulim imi diim uyo feba no ke-nilipta o ageta kale,  
\v 24 ipso e minte alugum unang tinum dok ita suun kup numi Kamogim Yesus Krais imi aget kup ugel kalasip sino ibo God iyo tebe telele-bom tiin mola tambaliim kup bom-bilipta o ageta ko.